សារព៌តមានរបស់ចិនលើកឡើងពីប្រវត្តិសម្តេចតេជោពីកូនកសិករ និងក្លាយជាមេដឹកនាំដ៏ល្បាញល្បី

ដោយៈគង់ សូរិយា

ប្រទេសចិនៈ សារព័ត៌មាន TOUTIAO របស់ចិន បានចាប់អារម្មណ៍យ៉ាងខ្លាំងចំពោះប្រវត្តិ និងសាវតាររបស់សម្តេចតេជោ ហ៊ុន សែន នាយករដ្ឋមន្ត្រីកម្ពុជា ហើយចងក្រងជាព័ត៌មាន និងផ្សព្វផ្សាយយ៉ាងទូលំទូលាយនៅក្នុងប្រទេសចិន។

សារព័ត៌មាន TOUTIAO បានចេញផ្សាយវិដេអូ រៀបរាប់យ៉ាងលំអិតពីប្រវត្តិរបស់សម្តេចតេជោ ហ៊ុន សែន ក្នុងការតស៊ូ ផ្តើមពីជីវិតកូនកសិករក្រីក្រលើដីជនបទ រហូតក្លាយទៅជាមេដឹកនាំមួយរូបដ៏មានឥទ្ធិពល និងល្បាញល្បីទាំងក្នុងប្រទេស និងលើឆាកអន្តរជាតិ។

វីដេអូនិយាយពីសាវតាររបស់សម្តេចតេជោ ហ៊ុន សែន ទទួលបានការចាប់អារម្មណ៍ជាខ្លាំងក្នុងសង្គមចិន៕

សម្ដេចតេជោស្នើសុំឲ្យអង្គការកម្មសិទ្ធិបញ្ញាពិភពលោកជួយកម្ពុជា ចុះបញ្ជីដំណាំភូមិសាស្ត្រ

ដោយៈ សុផារី

ភ្នំពេញៈ សម្ដេចតេជោហ៊ុន សែននាយករដ្ឋមន្រ្តីនៃកម្ពុជា បានស្នើសុំឲ្យអង្គការកម្មសិទ្ធិបញ្ញាពិភពលោក ជួយដល់កម្ពុជា ក្នុងការចុះបញ្ជីដំណាំភូមិសាស្ត្ររបស់កម្ពុជា។

ការស្នើសុំនេះ ក្នុងឱកាសដែលសម្ដេចតេជោ ហ៊ុន សែនបានអនុញាតឱ្យលោក Daren Tang នាយកអង្គការកម្មសិទ្ធិបញ្ញាពិភពលោក ចូលជួបសម្តែងការគួរសម និងពិភាក្សាការងារ នៅរាជធានីភ្នំពេញ នាព្រឹកថ្ងៃទី១៦ ខែកញ្ញា ឆ្នាំ២០២២។

លោក Daren Tang បានជម្រាបជូនសម្ដេចតេជោថា លោកបានមកកម្ពុជាជាច្រើនដងហើយ ហើយសព្វដងដែលបានមកដល់កម្ពុជា គឺឃើញកម្ពុជា មានការអភិវឌ្ឍយ៉ាងឆាប់រហ័ស។

លោកក៏បានគោរពជម្រាបជូនសម្ដេចតេជោបន្ថែមថា អង្គការកម្មសិទ្ធិបញ្ញាពិភពលោក កាលពីដើមឡើយ គឺជាអង្គការបច្ចេកទេស ប៉ុន្តែនាពេលនេះ អង្គការនេះ កំពុងប្រែក្លាយខ្លួនទៅជាអង្គការអភិវឌ្ឍន៍ គាំទ្រគម្រោងការអភិវឌ្ឍរបស់ប្រទេសដែលកំពុងអភិវឌ្ឍន៍ ហើយដំណើរទស្សនកិច្ចរបស់ឯកឧត្តម មកកាន់កម្ពុជានៅពេលនេះ គឺដើម្បីចូលរួមកិច្ចប្រជុំរដ្ឋមន្ត្រីអាស៊ានផង និងដើម្បីស្វែងយល់ និងស្វែងរក វិធីជួយគាំទ្រដល់កម្ពុជាផង។

ជាការឆ្លើយតប សម្ដេចតេជោ ហ៊ុន សែន បានស្នើសុំឲ្យអង្គការកម្មសិទ្ធិបញ្ញាពិភពលោកជួយដល់កម្ពុជា ក្នុងការចុះបញ្ជីដំណាំភូមិសាស្ត្ររបស់កម្ពុជា ហើយក៏បានជម្រាបជូនលោក Daren Tang និងប្រតិភូ អំពីការកត់សម្គាល់របស់សម្ដេច រួមមាន ពាណិជ្ជកម្មរវាងប្រទេសនៅក្នុងតំបន់ មានការកើនឡើង នៅក្នុងអំឡុងពេលមានកូវីដ១៩។ នោះសបញ្ជាក់ឲ្យឃើញថា AFTA ចាប់ផ្ដើមដំណើរការសកម្ម នៅពេលដែលមានជំងឺកូវីដ១៩។

ជាឧទាហរណ៍ ពាណិជ្ជកម្មរវាងកម្ពុជា-វៀតណាម កម្ពុជា-ថៃ និងកម្ពុជា-ឡាវ មានការកើនឡើងគួរឲ្យកត់សម្គាល់។ កំណត់សម្គាល់មួយទៀត គឺសង្គ្រាមនៅប្រទេសអ៊ុយក្រែន គឺជារឿងមួយ ប៉ុន្តែការដាក់ទណ្ឌកម្មហួសហេតុពេក នាំទៅដល់វិបត្តិ ដែលមិនត្រឹមតែនៅអឺរ៉ុបទេ ប៉ុន្តែវិបត្តិជាពិសេស គឺវិបត្តិសេដ្ឋកិច្ច រីករាលដាលដល់ប្រទេសដទៃទៀត នៅក្រៅទ្វីបអឺរ៉ុប ក្នុងនោះ រួមមានទាំងកម្ពុជាផងដែរ៕

ធនាគារពិភពលោកព្រមានពីការកើនឡើងហានិភ័យនៃវិបត្តិសេដ្ឋកិច្ចសកលឆ្នាំ២០២៣

ដោយ: លាងហួរ

ពិភពលោក: ធនាគារពិភពលោកបានព្រមានថា ពិភពលោកអាចនឹងឈានឆ្ពោះទៅរកវិបត្តិសេដ្ឋកិច្ចសកល នៅឆ្នាំ២០២៣ ខណៈធនាគារក ណ្តាលជុំវិញពិភពលោក បានដំឡើងការប្រាក់ក្នុងពេលដំណាលគ្នា។

ធនាគារពិភពលោកបានឱ្យដឹងនៅក្នុងការសិក្សាថ្មីមួយ ដែលបានចេញផ្សាយកាលពីម្សិលម៉ិញនេះបានឲ្យដឹងថា ធនាគារកណ្តាលនៅជុំវិញពិភពលោក បាននឹងកំពុងដំឡើងអត្រាការប្រាក់នៅឆ្នាំនេះ ក្នុងពេលដំណាលគ្នា ក្នុងរយៈពេល៥ទសវត្សកន្លងមកនេះ។

ការសិក្សាបានកត់សម្គាល់ថា ការដំឡើងអត្រាការប្រាក់ និងសកម្មភាពគោលនយោបាយផ្សេងទៀត ប្រហែលជាមិនគ្រប់គ្រាន់ទេ ក្នុងការធ្វើ ឱ្យអតិផរណាសកលធ្លាក់ចុះ ដល់កម្រិតមុនពេលជំងឺរាតត្បាត។

វិនិយោគិនរំពឹងថា ធនាគារកណ្តាលនឹងដំឡើង អត្រាគោលនយោបាយរូបិយវត្ថុពិភពលោក ដល់ជិត៤ភាគរយរហូតដល់ឆ្នាំ២០២៣ ដែលជាការកើនឡើងច្រើនជាង២ភាគរយ លើសពីមធ្យមភាគឆ្នាំ២០២១ ហើយប្រសិនបើមានភាពតានតឹងទីផ្សារហិរញ្ញវត្ថុ នោះកំណើនGDP សកល (ផលិតផលក្នុងស្រុកសរុប) នឹងថយចុះមកត្រឹម០,៥ភាគរយ នៅឆ្នាំក្រោយ។

លោក Ayhan Kose អនុប្រធានស្តីទីនៃធនាគារពិភពលោកសម្រាប់កំណើនប្រកបដោយសមធម៌ ហិរញ្ញវត្ថុ និងស្ថាប័នបានកត់សម្គាល់ថា ដោយសារតែការដំឡើងអត្រាការប្រាក់ មានភាពស៊ីសង្វាក់គ្នាយ៉ាងខ្លាំងនៅទូទាំងពិភពលោក វាអាចក្លាយជាកត្តាគួបផ្សំគ្នា ក្នុងការរឹតបន្តឹងលក្ខខណ្ឌហិរញ្ញវត្ថុ និងធ្វើឱ្យមានការធ្លាក់ចុះនៃកំណើនសេដ្ឋកិច្ចពិភពលោក។

លោក David Malpass ប្រធានធនាគារពិភពលោកបាននិយាយថា ដើម្បីសម្រេចបាននូវអត្រាអតិផរណាទាប ស្ថិរភាពរូបិយប័ណ្ណ និងកំណើនសេដ្ឋកិច្ចកាន់តែលឿន អ្នកបង្កើតគោលនយោបាយអាចផ្លាស់ប្តូរ ការផ្តោតអារម្មណ៍របស់ពួកគេ ពីការកាត់បន្ថយការប្រើប្រាស់ ទៅជាការជំរុញផលិតកម្ម។

លោក Malpass បានបន្ថែមថា “គោលនយោបាយគួរតែបង្កើតការវិនិយោគបន្ថែម និងធ្វើឱ្យប្រសើរឡើងនូវផលិតភាព និងការបែងចែកដើមទុន ដែលមានសារៈសំខាន់សម្រាប់កំណើន និងការកាត់បន្ថយភាពក្រីក្រ”៕

ប្រទេសកម្ពុជា-តួកគីជំរុញការតភ្ជាប់ជើងហោះហើរត្រង់រវាងប្រទេសទាំងពីរ

ដោយ៖ សុផារី

ភ្នំពេញ៖ ឯកអគ្គរដ្ឋទូតថ្មីនៃស្ថានទូតតួកគីប្រចាំកម្ពុជា លោកស្រី អ៊ូលឃូ កូចេអ៊ែហ្វ៊ែ (ÜLKÜ KOCAEFE) ប្ដេជ្ញាជំរុញឱ្យមានជើងហោះហើរត្រង់កម្ពុជា-តួកគីឱ្យបានក្នុងអាណត្តិបេសកកម្មរបស់ខ្លួន ដើម្បីពង្រីកកិច្ចសហប្រតិបត្តិការលើវិស័យទេសចរណ៍បន្ថែមទៀត។

ការសន្យានេះធ្វើឡើងនាឱកាសដែលលោកស្រី អ៊ូលឃូ កូចេអ៊ែហ្វ៊ែ ជួបសម្ដែងការគួរសមជាមួយលោក ថោង ខុន រដ្ឋមន្ត្រីក្រសួងទេសចរណ៍ នារសៀលថ្ងៃទី១៥ ខែកញ្ញា ឆ្នាំ២០២២ បន្ទាប់ពីលោកស្រីទទួលបេសកកម្មថ្មីជាឯកអគ្គរដ្ឋទូតសាធារណរដ្ឋតួកគីប្រចាំកម្ពុជា។

លោករដ្ឋមន្ត្រី ថោង ខុន បានជម្រាបជូនលោកស្រីឯកអគ្គរដ្ឋទូតអំពីស្ថានភាពទេសចរណ៍កម្ពុជាដែលកំពុងងើបឡើងវិញបណ្ដើរៗ តាមរយៈការខិតខំស្ដារនិងលើកស្ទួយវិស័យទេសចរណ៍ឡើងវិញក្នុងដំណាក់កាលវិបត្តិជំងឺកូវីដ១៩ ពីសំណាក់រាជរដ្ឋាភិបាលក្រោមការដឹកនាំរបស់សម្ដេចតេជោ ហ៊ុន សែន នាយករដ្ឋមន្ត្រី។ ប្រការនេះបានជំរុញឱ្យកម្ពុជាទទួលបានភ្ញៀវអន្តរជាតិជិត១លាននាក់ (កើនឡើង ៧២០%) ត្រឹមរយៈពេល៨ខែឆ្នាំ២០២២។

លោកស្រី អ៊ូលឃូ កូចេអ៊ែហ្វ៊ែ បានកោតសរសើរអំពីភាពល្អប្រសើរនៃការគ្រប់គ្រងស្ថានភាពកូវីដ១៩នៅកម្ពុជា ការគោរពបាននូវវិធានការសុខាភិបាលរបស់ប្រជាជនកម្ពុជា ការយកចិត្តទុកដាក់ចំពោះសុខភាព អាយុជីវិតរបស់ប្រជាជន តាមរយៈគោលនយោបាយចាក់ស្រោចវ៉ាក់សាំង និងការទប់ស្កាត់ការរីករាលដាលជំងឺកូវី១៩របស់រាជរដ្ឋាភិបាល។

លោកស្រីក៏ពេញចិត្តជាខ្លាំងចំពោះភាពរួសរាយរាក់ទាក់របស់ប្រជាជនកម្ពុជា គឺដូចការផ្សព្វផ្សាយនៅក្រៅប្រទេសពិតមែន។ លោកស្រីបានបង្ហាញអារម្មណ៍មានភាពកក់ក្ដៅ មានសុវត្ថិភាពក្នុងការមករស់នៅនិងបំពេញបេសកកម្មនៅកម្ពុជានេះ ហើយមានចំណាប់អារម្មណ៍ខ្លាំងចំពោះគោលដៅទេសចរណ៍នៅកម្ពុជា ពិសេសតំបន់បេតិកភណ្ឌអង្គរ។

លោករដ្ឋមន្ត្រី ថោង ខុន បញ្ជាក់ថា ភាគីកម្ពុជា-តួកគីឯកភាពគ្នាជំរុញការអនុវត្តនូវកិច្ចព្រមព្រៀងស្ដីពីវិស័យទេសចរណ៍ ដែលបានចុះហត្ថលេខារួចរាល់នៅប្រទេសតួកគីកាលពីឆ្នាំ២០១៨ និងបានរៀបចំក្រុមការងារអនុវត្តរួចហើយដែរ ធ្វើយ៉ាងណាអនុវត្តឱ្យបានប្រសិទ្ធភាព ផ្លែផ្កា និងផ្ដល់ផលប្រយោជន៍ឱ្យគ្នាទៅវិញទៅមក។

លោករដ្ឋមន្ត្រី ថោង ខុន បានបន្ថែមថា កិច្ចព្រមព្រៀងស្ដីពីវិស័យទេសចរណ៍នោះគឺផ្ដោតលើការជំរុញចលនាទេសចរទៅវិញទៅមក ពិសេសគឺការតភ្ជាប់ជើងហោះហើរត្រង់រវាងកម្ពុជា-តួកគី។ លោកថា “ក្នុងអាណត្តិដែលលោកស្រីបំពេញបេសកកម្មនៅកម្ពុជា លោកស្រីឯកអគ្គរដ្ឋទូតតួកគីបានសន្យាសម្រេចឱ្យបាននូវការតភ្ជាប់ការហោះហើរត្រង់កម្ពុជា-តួកគី ពីព្រោះដើម្បីជំរុញឱ្យមានកំណើនទេសចរទៅបាន ចាំបាច់ត្រូវមានការដឹកជញ្ជូន”។

លោករដ្ឋមន្ត្រីបានអះអាងថា បច្ចុប្បន្នអាកាសយានដ្ឋានអន្តរជាតិភ្នំពេញ សៀមរាប និងព្រះសីហនុ គឺសុទ្ធតែអាចឱ្យយន្តហោះខ្នាតធំចុះចតបាន ដូច្នេះការចុះចតយន្តហោះដែលមកពីតួកគីនោះគឺមិនមែនជាបញ្ហាឡើយ។

ពិសេសជាងនេះ ភាគីទាំងពីរក៏បានលើកឡើងពីការជំរុញឱ្យមានបណ្ណទេសចរណ៍ពណ៌បៃតង (Green Pass) ដែលនឹងជួយសម្រួលដល់ការធ្វើដំណើរ ការស្នើសុំទិដ្ឋការចេញ/ចូលរបស់ភ្ញៀវទេសចរ ក៏ដូចជាការធ្វើដំណើរកម្សាន្តនៅក្នុងប្រទេសទាំងពីរ។

ក្រៅពីនេះ កិច្ចព្រមព្រៀងក៏ផ្ដោតលើការជំរុញអ្នកវិនិយោគក្នុងវិស័យទេសចរណ៍ ខណៈតួកគីគឺមានអ្នកវិនិយោគច្រើនដែរ ហើយកម្ពុជា-តួកគីក៏ត្រូវបន្តការបណ្ដុះបណ្ដាលធនធានមនុស្សក្នុងវិស័យទេសចរណ៍ ការផ្លាស់ប្ដូរទស្សនកិច្ចរវាងមន្ត្រីរាជការប្រទេសទាំងពីរជាដើម៕

អាកាសយានដ្ឋានតារាសាគរគ្រោងដាក់ឱ្យដំណើរការនៅពាក់ កណ្តាលឆ្នាំ២០២៣

ដោយៈ សុផារី

កោះកុងៈ រហូតមកដល់ពេលនេះ អាកាសយានដ្ឋានអន្តរជាតិតារាសាគរ ស្ថិតក្នុងខេត្តកោះកុង បានបញ្ចប់រួចរាល់១០០% និងគ្រោងដាក់ដំណើរការនៅពាក់កណ្តាលឆ្នាំ២០២៣ខាងមុខ។

នេះបើតាមការបញ្ជាក់របស់លោក ស៊ិន ចាន់សេរីវត្ថា អ្នកនាំពាក្យអាកាសចរស៊ីវិល នៅក្នុងសន្និសីទសារព័ត៌មាន ស្ដីពី “សមិទ្ធផលសម្រេចបានរយៈពេល ៥ឆ្នាំកន្លងមក របស់រដ្ឋលេខាធិការដ្ឋានអាកាសចរស៊ីវិល” ព្រឹកថ្ងៃទី១៦ ខែ កញ្ញា ឆ្នាំ២០២២នេះ។

លោកស៊ិន ចាន់សេរីវត្ថា បានមានប្រសាសន៍ថា “អាកាសយានដ្ឋានអន្តរជាតិតារាសាគរ ជាគម្រោងភ្ជាប់ជាមួយ គម្រោងអភិវឌ្ឍន៍ផ្សេងទៀតជាកញ្ចប់តែម្តង ក្នុងខេត្តកោះកុង។ អាកាសយានដ្ឋាននេះ សាងសង់បញ្ចប់ហើយ១០០ភាគរយ នៅតែការបំពេញកាតព្វកិច្ច ក្នុងការទទួលបានវិញ្ញាបនបត្រប្រតិបត្តិការអាកាសយានដ្ឋាននេះ”។

អ្នកជំនាញរូបនេះបញ្ជាក់ថា ការសាងសង់អាកាសយានដ្ឋាននេះ ត្រូវបានបិទជាច្រើនលើកច្រើនសារ ដោយសារតែផលប៉ះពាល់ពីវិបត្តិកូវីដ១៩ ជាពិសេសផលប៉ះពាល់ លើខ្សែចង្វាក់នៃការដឹកជញ្ជូន ការផ្គត់ផ្គង់សម្ភារៈ និងការធ្វើដំណើររបស់វិស្វករជំនាញ ដែលបានធ្វើឱ្យមានការយឺតយ៉ាវ ជាបន្តបន្ទាប់ក្នុងការបញ្ចប់ការសាងសង់។

លោកបន្តថា “បញ្ហាដែលនៅសេសសល់មួយចំនួន រួមមាន ការរៀបចំធនធានមនុស្ស ការបណ្តុះបណ្តាល ការសម្អាតការងារបន្ទាប់បន្សំ។ តាមផែនការ នៅពាក់កណ្តាលឆ្នាំ២០២៣ អាកាសយានដ្ឋាននេះនឹងអាចបើកប្រតិបត្តិការបាន”។

គម្រោងអាកាសយានដ្ឋានអន្តរជាតិតារាសាគរ វិនិយោគសាងសង់ដោយក្រុមហ៊ុន Tianjin Union Development Group ប្រទេសចិន ក្នុងទឹកប្រាក់ប្រមាណ៣៥០លានដុល្លារ។ ពេលដាក់ដំណើរការ អាកាសយានដ្ឋានខ្នាតអន្តរជាតិនេះនឹងអាចទទួលការចុះចត និងហោះចេញយន្តហោះប្រភេទ Boeing 777 និង Airbus A340 ជាដើម៕

មន្រ្តីជាន់ខ្ពស់ឡាវបង្ហើបពីគម្រោងតភ្ជាប់ពីរថភ្លើងពីឡាវមកកាន់កម្ពុជា

ដោយៈ គង់ សូរិយា

ប្រទេសឡាវៈ មន្រ្តីជាន់ខ្ពស់ប្រទេសឡាវបាបបង្ហើបពីគម្រោងតភ្ជាប់ខ្សែរថភ្លើងពីឡាវ មកកាន់កម្ពុជា ខណៈប្រទេសនេះកំពុងពង្រីកការតភ្ជាប់ផ្លូវដែកមកកាន់ប្រទេសក្នុងតំបន់។

ព៌តមាននេះត្រូវបានបង្ហើបឲ្យដឹង ក្នុងឱកាសលោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្រ្តី រដ្ឋមន្រ្តីក្រសួងទំនាក់ទំនងរដ្ឋសភា ព្រឹទ្ធសភា និងអធិការកិច្ច តំណាងដ៏ខ្ពង់ខ្ពស់ សម្តេចអគ្គមហាពញាចក្រី ហេង សំរិន ប្រធានរដ្ឋសភា បានអញ្ជើញដឹកនាំគណៈប្រតិភូជាន់ខ្ពស់រដ្ឋសភាកម្ពុជា ទស្សនាតំបន់កំពង់ផែស្ងួត Vientiane Logistice Park ដែលជាគម្រោងវិនិយោគលើបណ្តាញ ផ្លូវគមនាគមន៍ផ្លូវគោក ដ៏ធំមួយរបស់ប្រទេសឡាវ នារសៀលថ្ងៃទី១៥ ខែកញ្ញា ឆ្នាំ២០២២។

គណៈប្រតិភូបានកំពុងបំពេញទស្សនកិច្ចផ្លូវការ និងមិត្តភាពនៅប្រទេសឡាវ ដោយប្រទេសឡាវ អះអាងថា នឹងមានគម្រោងតភ្ជាប់ផ្លូវដែក មកកាន់កម្ពុជា។

យោងតាមរបាយការណ៍របស់ថ្នាក់ដឹកនាំ កំពង់ផែស្ងួត Vientiane Logistice Park បានឲ្យដឹងថា គម្រោង វិនិយោគដោយទុននៅក្នុងស្រុកក្នុងទំហំទឹកប្រាក់ប្រមាណ៧០០លានដុល្លារ ក្នុងការតភ្ជាប់ផ្លូវដែកពីប្រទេសឡាវទៅប្រទេសចិន និងប្រទេសក្នុងតំបន់អាស៊ាន និងពីឡាវទៅប្រទេសនៅប៉ែកអឺរ៉ុប មានអាល្លឺម៉ង់ជាដើម។ គម្រោងនេះ នឹងធ្វើឱ្យប្រទេសឡាវ ដែលគ្មានកំពង់ផែសមុទ្រ មានផ្លូវគមនាគមន៍ដឹកជញ្ជូនភ្ជាប់ ទៅកាន់ពិភពលោក គឺLand locked to land linked។

តាមលោកអគ្គនាយកក្រុមហ៊ុនបានឲ្យដឹងថា ទៅថ្ងៃអនាគតក្រុមហ៊ុនមានគម្រោងតភ្ជាប់ផ្លូវដែកពីឡាវមកកម្ពុជា ដែលជាមធ្យោបាយដឹកជញ្ជូនមួយធ្វើឱ្យការដឹកជញ្ជូនទំនិញ ពិសេសកសិផលពីកម្ពុជាទៅប្រទេសចិននឹងចំណាយពេលវេលាខ្លីជាងបច្ចុប្បន្ននេះ និងនីតិវិធីងាយស្រួលទៀតផង។

លោកជំទាវកិត្តិសង្គហបណ្ឌិត ម៉ែន សំអន បានវាយតម្លៃខ្ពស់ចំពោះគម្រោងវិនិយោគដ៏ធំនេះ។ លោកជំទាវចាត់ទុកថា គម្រោងនេះជាចក្ខុវិស័យវែងឆ្ងាយមួយ របស់ថ្នាក់ដឹកនាំប្រទេសឡាវ ហើយនេះជាគម្រោងមួយ គួរជាទីមោទនៈណាស់ ពីព្រោះបានប្រើប្រាស់ទុននៅក្នុងស្រុក។

គម្រោងចង់តភ្ជាប់ផ្លូវគមនាគមន៍ចូលមកកម្ពុជានោះ លោកជំទាវ កិត្តិសង្គហបណ្ឌិត ម៉ែន សំអន និងពាំនាំគម្រោងនេះជូនថ្នាក់ដឹកនាំ។

លោកជំទាវបានបញ្ជាក់ថា “កម្ពុជាត្រៀមស្វាគមន៍ជានិច្ច នៅពេលក្រុមហ៊ុនចុះទៅសិក្សានៅកម្ពុជានោះ”៕

CLDAនឹងបើកវគ្គបណ្តុះបណ្តាលលើជំនាញកសាងBranding និងពង្រីកបណ្តាញជំនួញ

ដោយៈគង់ សូរិយា

ភ្នំពេញៈ សមាគមអ្នកអភិវឌ្ឈន៍ដីឡូត៍កម្ពុជា(CLDA) នឹងរៀបចំសិក្ខាសាលា និងវគ្គបំពាក់បំប៉នចំណេះដឹងទាក់ទង នឹងការកសាងBanding និងពង្រីកឱកាសក្នុងពិភពជំនួញ។

សិក្ខាសាលាស្តីពី “វិធីសាស្រ្តកសាងកេរ្តិ៍ឈ្មោះអោយល្បី និងយុទ្ធសាស្រ្តផ្សព្វផ្សាយ Digital Marketing ក្នុងវិស័យអចលនទ្រព្យ”នេះនឹងប្រារពធ្វើនៅថ្ងៃទី២២ កញ្ញាខាងមុខ ដោយជួបជាមួយវាគ្មិនល្បីៗ ដែលមានជំនាញក្នុងវិស័យអចលនទ្រព្យ និងបច្ចេកវិទ្យាជាច្រើនឆ្នាំដូចជា ទី១ ឧកញ៉ា ម៉ន សុខា ប្រធានសមាគមអ្នកអភិវឌ្ឍន៍ដីឡូត៍កម្ពុជា។ ឧកញ៉ា ផន វណ្ណិត អនុប្រធានសមាគម និងជាស្ថាបនិកក្រុមហ៊ុន រាជសន្តុសិត ឯ.ក និងលោក រស់ សុវណ្ណថា អគ្គលេខាធិការសមាគម និងជាស្ថាបនិកក្រុមហ៊ុន NSO Technology។

តើសិស្ស និស្សិត ភ្នាក់ងារអចលនទ្រព្យ និងអ្នកពាក់ព័ន្ឋនៅក្នុងវិស័យអចលនទ្រព្យ និងសេដ្ឋកិច្ច ចង់កសាង Branding អោយល្បីដែរឬទេ? ចង់មានឱកាសកសាងបណ្តាញ ទំនាក់ទំនងអោយកាន់តែទូលាយដែរឬទេ?។ ចង់ស្វែងយល់ពីការធ្វើទីផ្សារតាមបែប Digital ក្នុងវិស័យអចលនទ្រព្យដែរឬទេ? និងចង់ Build Network ជាមួយអ្នកជំនាញអចលនទ្រព្យដែរឬទេ?។

រួសរាន់ឡើង កន្លែងមានកំណត់ ត្រឹមតែ80នាក់តែប៉ុណ្ណោះ សូមធ្វើការចុះឈ្មោះតាមរយៈ👉https://forms.gle/5DanuDXfdtDdndhE8

☎️ 099 /093 50 777 9 👉Telegram Contact: https://t.me/CLDA_secretary៕

តើបុរីGB Residenceស្ថិតនៅលើទីតាំងមានលក្ខណៈពិសេសបែបណាសម្រាប់សម្រួលការរស់នៅ?

ដោយៈគង់ សូរិយា

ភ្នំពេញៈ បុរី GB Residence ដែលកំពុងដំណើរការសាងសង់ និងលក់ជូននូវលំនៅដ្ឋានប្រណីត ជាច្រើនជម្រើសសម្រាប់ការរស់នៅ និងការវិនិយោគល្អបំផុតសម្រាប់អតិថិជន។

គម្រោងនេះ មានទីតាំងស្ថិតនៅក្នុងភូមិស្រុកធំ ឃុំជើងកើប ស្រុកកណ្តាលស្ទឹង ខេត្តកណ្តាល មានចម្ងាយប្រមាណ៥គីឡូម៉ែត្រ ពីព្រលានយន្តហោះអន្តរជាតិភ្នំពេញថ្មី និងមានចម្ងាយប្រមាណ៥គីឡូម៉ែត្រ ពីផ្សារទំនើប AEON Mall៣ ជាគម្រោងមានគុណភាព ដោយមានការសិក្សាយ៉ាងច្បា ស់លាស់ ដោយមានការសាងសងតាមស្តង់ដា បច្ចេកទេសសំណង់ ប្រើប្រាស់សម្ភារៈមានគុណភាពល្អ និងធានាប្រើបានរយៈពេលយូរ និងផ្តល់នូវគេហដ្ឋានរចនាពោពេញដោយគុណភាព ប្រណិតភាព និងស៊ីវិល័យ។

អ្វីជាចំណុចពិសេសរបស់គម្រោងនេះររួមមាន ទី១ មានទីតាំងអាចប្រកបអាជីវកម្មបាន នាពេលអនាគតខាងមុខ ទី២ បុរីនេះត្រូវបានឌីសាញដោយស្ថាបត្យករ ជំនាញលំដាប់ពិភពលោក ដែលធ្លាប់ឈ្នះពានរង្វាន់ពីទីក្រុងដូបៃ ទី៣ ជាគំរោងដែលគិតពីផាសុខភាពដល់អ្នករស់់នៅ ដោយមានការសាងសង់សួនច្បារនៅចំកណ្តាលគម្រោង ដែលផ្តល់ឲ្យអ្នករស់នៅអាចប្រកដអាជីវកម្ម ហាត់ប្រាណ និងសំរាកលំហែរបាន។

អ្វីកាន់តែពិសេស ហេដ្ឋារចនាសម្ព័ន្ធក្នុងបុរី ផ្លូវថ្នល់ សួនច្បារ ប្រព័ន្ធទឹក ភ្លើង និងរុក្ខជាតិដើមឈើបៃតងខាងមុខផ្ទះ តាមបណ្តោយផ្លូវបុរី យ៉ាងស្រស់បំព្រងតាមបែបធម្មជាតិ។ ប្រព័ន្ធរំដោះទឹក ស្របតាមបទដ្ឋានបច្ចេកទេសត្រឹមត្រូវ ធ្វើអោយចរន្តទន្ទឹមនឹងនេះ បុរីក៏យកចិត្តទុកដាក់លើគ្រប់ចំណុច នៃការសាងសង់ ចាប់ពីផ្នែកមូលដ្ធានគ្រឿងបង្គំ នៃសំណង់រហូតដល់ការងារដេកគ័រ បំពាក់គ្រឿងទាន់សម័យ និងសន្សំសំចៃភ្លើនិងគុណភាព ក៏ដូចជាសោភ័ណភាពដ៏ស្រស់ស្អាត នៃគម្រោងទាំងមូលដែរ។

លោកឧកញ៉ាតាំង គួងហាវអគ្គនាយកបុរីGB Residenceបានមានប្រសាសន៍ឲ្យដឹងកន្លងមកថា លោកសម្រេចចិត្តវិនិយោគបុរីនេះឡើង ដោយផ្តោតលើគុណភាព ប្រណិតភាព និងភាពស៊ីវិល័យ ដោយសារមើលឃើញសក្តានុពល និងភាពរីកចំរើនដ៏ឆាប់រហ័សនៅជុំវិញតំបន់នេះ ជាប់នឹងផ្លូវក្រវ៉ាត់ក្រុងទី៣ ហើយមិនឆ្ងាយពីព្រលានយន្តហោះអន្តរជាតិភ្នំពេញថ្មី និងការកើនឡើងនូវជីវភាពរបស់ប្រជាពលរដ្ឋ។

លោកឧកញ៉ាបានបន្តថា “ជាមួយនឹងការរចនាលំនៅដ្ឋាន មានម៉ូតផ្ទះស្អាត ប្លែក ប្រកបដោយស៊ីវិល័យ ពិសេសផ្តល់ជូនអ្នករស់នៅប្រកបដោយផាសុកភាព”។

ទំនាក់ទំនងលេខទូរសព្ទ៖ 077/070/066 363 005 សម្រាប់ការសាកសួរព័ត៌មានបន្ថែម និងការណាត់ជួប។ ទីតាំង: ស្ថិតនៅជិតនឹងផ្លូវក្រវ៉ាត់ក្រុងទី៣ មានចម្ងាយត្រឹមតែ២.៤គមប៉ុណ្ណោះពីរង្វង់មូលកួរស្រូវ ។https://maps.app.goo.gl/wBoNnmoPBP1GDb4r9៕

ប្រទេសថៃនិងកម្ពុជាគ្រោងពិភាក្សាបញ្ហាតំបន់ត្រួតស៊ីគ្នាក្នុងដែន សមុទ្រឡើងវិញ

ដោយៈ សុផារី

ភ្នំពេញៈ ថ្នាក់ដឹកនាំជាន់ខ្ពស់នៃប្រទេសថៃ នឹងជួបពិភាក្សាជាមួយភាគីកម្ពុជា លើតំបន់ត្រួតស៊ីគ្នាក្នុងដែនសមុទ្រ (OCA) ដែលមានទំហំ២៦.០០០គីឡូម៉ែត្រក្រឡា ដែលគេប៉ាន់ស្មានថា អាចផ្ទុកប្រេង និងឧស្ម័នរហូតដល់៥០០លានបារ៉ែលនៅក្រោមបាតសមុទ្រ។

បើតាមការចុះផ្សាយរបស់កាសែតថៃនៅថ្ងៃទី១៤ ខែកញ្ញាម្សិលមិញនេះ។ ការពិភាក្សាក្នុងសំណុំរឿងព្រំដែនសមុទ្រ ដែលជាប់គាំងតាំងពីដើមទសវត្ស១៩៧០មកនេះ គឺជាសញ្ញាល្អក្នុងការជួយថៃ និងកម្ពុជាដោះស្រាយវិបត្តិថាមពល។

បន្ទាប់ពីពន្យារពេលអស់រយៈពេល២០ឆ្នាំ ការចរចាលើការអភិវឌ្ឍប្រេងនិងឧស្ម័ន នៅក្នុងការទាមទារតំបន់ត្រួតស៊ីគ្នា នៅឈូងសមុទ្រថៃជាមួយកម្ពុជានឹងចាប់ផ្តើមឡើងវិញ ដើម្បីចូលរួមកាត់បន្ថយផលប៉ះពាល់នៃការប្រែប្រួលតម្លៃប្រេងនិងថាមពល។

លោក Supattanapong Punmeechaow រដ្ឋមន្ត្រីក្រសួងថាមពលថៃ បានប្រាប់កាសែតបាងកកប៉ុស្តិ៍កាលពីថ្ងៃទី១៣ កញ្ញាថា រដ្ឋាភិបាលថៃ បានបង្កើតគណៈកម្មាការមួយ ដើម្បីធ្វើការងារនេះ ដោយមានក្រសួងការបរទេសថៃ ដើម្បីដឹកនាំកិច្ចចរចាជាមួយរដ្ឋាភិបាលកម្ពុជា។ យ៉ាងណា ប្រទេសថៃ កំពុងបន្តសិក្សាព័ត៌មានលម្អិតមួយចំនួន ជាក់ស្តែងក្តីបារម្ភជុំវិញការបោះបង្គោលព្រំដែនមួយចំនួន និងការស្វែងរកដំណោះស្រាយ ពន្យល់ប្រាប់ពលរដ្ឋថៃជាដើម។

រដ្ឋាភិបាលថៃរំពឹង ការអភិវឌ្ឍន៍រួមគ្នានេះ ក្លាយជាផ្នែកមួយនៃគោលនយោបាយរយៈពេលវែងរបស់ខ្លួន ក្នុងការបង្កើតប្រភពថាមពលទំនើបជួយដល់បរិស្ថាន ការជម្រុញការដេញថ្លៃសម្បទានប្រេងថ្មីៗ និងការជម្រុញកិច្ចពិភាក្សាថាមពលជាមួយប្រទេសក្បែរខាង ពិសេសកម្ពុជា។

លើសពីនោះ ថៃក៏ចង់ដោះស្រាយចំណុចជម្លោះយូរអង្វែង នៃដែនសមុទ្រខ្លួនជាមួយកម្ពុជាដែរ។ថៃរំពឹងថាកិច្ចសហប្រតិបត្តិការ ចាប់ផ្តើមកាន់តែឆាប់ នឹងរឹតតែប្រសើរចំពោះកម្ពុជានិងថៃ។

លោក ម៉េង សក្តិធារ៉ា រដ្ឋលេខាធិការក្រសួងរ៉ែនិងថាមពល បានលើកឡើងក្នុងសន្និសិទមួយ កាលពីដើមខែសីហាកន្លងទៅថា ការចរចាលើបញ្ហានេះ មានភាពស្មុគស្មាញខ្លាំង ដោយសារតែមានពាក់ព័ន្ធ មិនត្រឹមតែបញ្ហាប្រេងប៉ុណ្ណោះទេ ប៉ុន្តែមានធនធានធម្មជាតិផ្សេងៗទៀត ហើយបញ្ហានេះ មានចរិតជានយោបាយផង និងជាសេដ្ឋកិច្ចផង។

លោកបន្តថា “ទោះបីប្រមុខថ្នាក់ដឹកនាំប្រទេសទាំង២ ចង់ឱ្យមានការដោះស្រាយបានឆាប់ ប៉ុន្តែវឌ្ឍនភាពនៃការចរចានេះ នៅមានភាពយឺតយ៉ាវ”។លោកបន្ថែមថា “តែយ៉ាងណា កម្ពុជាបានត្រៀមខ្លួនរួចស្រេច ក្នុងការចរចាជាមួយភាគីថៃ ជុំវិញកិច្ចអភិវឌ្ឍរួមគ្នា ក្នុងតំបន់ប្រេងត្រួតស៊ីគ្នានៅដែនសមុទ្រនេះ”។

តំបន់ទាមទារត្រួតស៊ីគ្នា(OCA)នោះ មានមានទំហំ២៦.០០០គីឡូម៉ែត្រការ៉េដែលគេប៉ាន់ប្រមាណថា នឹងអាចស្តុកទុកប្រេង និងឧស្ម័នរហូតដល់៥០០លានបារ៉ែល នៅក្រោមបាតសមុទ្រ។ សិទ្ធិអភិវឌ្ឍន៍លើតំបន់ទាមទារត្រួតស៊ីគ្នា ក្នុងឈូងសមុទ្រថៃ គឺជាចំណុចនៃជម្លោះរវាងប្រទេសជិតខាងថៃនិងកម្ពុជា ដែលបានទាមទារតំបន់នេះ តាំងពីដើមទសវត្សរ៍១៩៧០មក។

រដ្ឋាភិបាលនៃប្រទេសទាំងពីរ បានចុះហត្ថលេខាលើអនុស្សរណៈយោគយល់ កិច្ចចរចារអភិវឌ្ឍប្រេងនិងឧស្ម័ននៅតំបន់នោះ តាំងពីខែមិថុនាឆ្នាំ២០០១ ក៏ប៉ុន្តែត្រូវបានផ្អាក នៅក្នុងអន្តរកាលប្តូរនាយករដ្ឋមន្ត្រីថៃកាលពីឆ្នាំ២០០៩។ កិច្ចពិភាក្សាគ្នារវាងប្រទេសទាំង២ ក៏ធ្លាប់ចង់គូសវាសឡើងវិញដែរ តែត្រូវបង្អាក់ដោយសារវិបត្តិជំងឺកូវីដ១៩ កាលពីឆ្នាំ២០១៩៕

សម្តេចតេជោ៖ កិច្ចព្រមព្រៀងអាសិបនឹងក្លាយជា “ក្របខណ្ឌស្នូល” ស្ថាបនាតំបន់ពាណិជ្ជកម្មសេរីអាស៊ាន-ចិនទម្រង់៣.០

ដោយ៖ សុផារី

ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា និងជាប្រធានអាស៊ាន បានមានប្រសាសន៍ថា កិច្ចព្រមព្រៀងដៃគូសេដ្ឋកិច្ចគ្រប់ជ្រុងជ្រោយតំបន់ (អាសិប) នឹងនាំមកនូវកាលានុវត្តភាពពាណិជ្ជកម្ម និងវិនិយោគ ហើយនឹងក្លាយជា “ក្របខណ្ឌស្នូល” សម្រាប់ការស្ថាបនាតំបន់ពាណិជ្ជកម្មសេរីអាស៊ាន-ចិន ទម្រង់ ៣.០ នាពេលខាងមុខ។

សម្តេចតេជោ ហ៊ុន សែន បានលើកឡើងក្នុងសុន្ទរកថាថ្លែងបើកពិព័រណ៍ចិន-អាស៊ាន លើកទី១៩ តាមប្រព័ន្ធវិដេអូ ក្រោមប្រធានបទ “ការចែករំលែកកាលានុវត្តភាពថ្មី ដែលទទួលបានពីភាពជាដៃគូសេដ្ឋកិច្ចគ្រប់ជ្រុងជ្រោយតំបន់ ដើម្បីស្ថាបនាតំបន់ពាណិជ្ជកម្មសេរីចិន-អាស៊ាន ទម្រង់ថ្មី ៣.០”។

សម្តេចតេជោ ហ៊ុន សែន បានមានប្រសាសន៍ថា ការចាប់ផ្តើមអនុវត្តកិច្ចព្រមព្រៀងដៃគូសេដ្ឋកិច្ចគ្រប់ជ្រុងជ្រោយតំបន់ ក្នុងឆ្នាំ២០២២នេះ នឹងនាំមកនូវកាលានុវត្តភាពពាណិជ្ជកម្ម និងវិនិយោគជាច្រើន សម្រាប់ប្រទេសក្នុងតំបន់ និងចូលរួមចំណែកយ៉ាងសំខាន់ ក្នុងការលើកស្ទួយដល់ការលូតលាស់សេដ្ឋកិច្ច ជាពិសេស នឹងក្លាយជា “ក្របខណ្ឌស្នូល” សម្រាប់ការស្ថាបនាតំបន់ពាណិជ្ជកម្មសេរីអាស៊ាន-ចិន ទម្រង់ ៣.០ នាពេលខាងមុខផងដែរ។

ក្នុងនាមជាប្រធានអាស៊ានសម្រាប់ឆ្នាំ២០២២ សម្តេចតេជោ ហ៊ុន សែន បានប្រកាសថា កម្ពុជា នឹងខិតខំបន្តពង្រឹងកិច្ចសហការអាស៊ានជាមួយប្រទេសចិន ឱ្យកាន់តែប្រសើរឡើង ដើម្បីធានានូវចីរភាព បរិយាប័ន្ន និងភាពធន់ នៃកិច្ចអភិវឌ្ឍសង្គម-សេដ្ឋកិច្ចក្នុងតំបន់ទាំងពីរ។

សម្តេចតេជោ បានបញ្ជាក់ថា កម្ពុជាជាមួយការសម្រេចបាននូវ “ភាពស៊ាំសហគមន៍រឹងមាំ” រាជរដ្ឋាភិបាលបានបើកប្រទេស និងដំណើរការឡើងវិញនូវរាល់សកម្មភាពផលិតកម្ម ធុរកិច្ច និងពាណិជ្ជកម្មទាំងអស់ក្នុងស្រុក ចាប់តាំងពីចុងឆ្នាំ២០២១មក។

សម្តេចបន្តថា ក្នុងរយៈពេលជាងពីរឆ្នាំកន្លងមកនេះ រាជរដ្ឋាភិបាលបានខិតខំប្រឹងប្រែងដោះស្រាយបញ្ហាជារចនាសម្ព័ន្ធ និងដាក់ចេញឱ្យអនុវត្តនូវកម្មវិធីកែទម្រង់ជាបន្តបន្ទាប់ តាមរយៈការដាក់ឱ្យអនុវត្តនូវ “ច្បាប់ស្តីពីវិនិយោគថ្មី” “ក្របខណ្ឌគោលនយោបាយសង្គម-សេដ្ឋកិច្ចឌីជីថលកម្ពុជា ២០២១-២០៣៥” និង “ក្របខណ្ឌយុទ្ធសាស្ត្រ និងកម្មវិធីស្តារ និងជំរុញកំណើនសេដ្ឋកិច្ចកម្ពុជា ក្នុងការរស់នៅជាមួយកូវីដ-១៩ តាមគន្លងប្រក្រតីភាពថ្មីសម្រាប់ឆ្នាំ២០២១-២០២៣” និងការសម្រេចបាននូវកិច្ចព្រមព្រៀងពាណិជ្ជកម្មសេរីកម្ពុជា-ចិន កម្ពុជា-កូរ៉េ ។ល។ សំដៅជំរុញការងើបឡើងវិញនៃសេដ្ឋកិច្ចកម្ពុជា។

សម្តេចតេជោក៏បានជំរុញឱ្យអាស៊ាន និងចិន ពង្រីកវីសាលភាពកិច្ចសហប្រតិបត្តិការសេដ្ឋកិច្ចឱ្យកាន់តែទូលំទូលាយ និងស៊ីជម្រៅថែមទៀត ជាពិសេសត្រូវផ្តោតលើការកាត់បន្ថយរបាំងពាណិជ្ជកម្មទំនិញ សេវាកម្ម និង ការវិនិយោគនានាផងដែរ។

អាស៊ាន-ចិន គឺជាដៃគូពាណិជ្ជកម្មដ៏ធំមួយនៅក្នុងតំបន់។ ក្នុងឆ្នាំ២០២១កន្លងទៅនេះ ទំហំពាណិជ្ជកម្មរវាងអាស៊ាន និងចិន មានរហូតដល់ទៅជិត៩ពាន់លានដុល្លារអាមេរិក។ ក្នុងនោះ ចិននាំទៅអាស៊ានមានជិត៥ពាន់លានដុល្លារអាមេរិក និងនាំចូលពីអាស៊ាន ជិត៤ពាន់លានដុល្លារអាមេរិក។ ដោយឡែក ការវិនិយោគរបស់ចិននៅអាស៊ាន មានជាង១៤ពាន់លានដុល្លារ ហើយការវិនិយោគរបស់អាស៊ាន នៅក្នុងប្រទេសចិនវិញ មានជាង១០ពាន់លានដុល្លារ៕

1...1,2521,2531,254...3,261 Page 1,253 of 3,261