ដោយ៖ សុផារី

ភ្នំពេញ៖ ក្រោយទទួលបានការគាំទ្រយ៉ាងគគ្រឹកគគ្រេងពីសំណាក់អតិថិជនលើគម្រោងបុរីចាន់ណាលែនទី១ និងទី២ ក្រុមហ៊ុនចាន់ណាលែនបាន និងកំពុងឈានឆ្ពោះទៅអភិវឌ្ឍគម្រោងបុរីទី៣ ដោយនឹងជំរុញសក្តានុពលតំបន់បន្ថែមទៀត ព្រមទាំងកែប្រែការរស់នៅរបស់ប្រជាជនកាន់តែមានផាសុកភាពបន្ថែមទៀត។

លោក ថាន់ ចាន់ណា អគ្គនាយកក្រុមហ៊ុនចាន់ណាលែន បានមានប្រសាសន៍ប្រាប់គេហទំព័រ Property Area កាលពីរសៀលថ្ងៃទី០៦ ខែកញ្ញា ឆ្នាំ២០២២ថា គម្រោងបុរីចាន់ណាលែនទី២ ទទួលបានការគាំទ្រពីសំណាក់អតិថិជនពីគ្រប់ទិសទី ដោយសម្រេចការលក់បានជាង៥០ភាគរយហើយ ក្រោយបើកដំណើរការទើបតែបានប៉ុន្មានខែប៉ុណ្ណោះ។

ដោយទទួលបានការជោគជ័យយ៉ាងខ្លាំងលើគម្រោងទី២ ក្រុមហ៊ុនចាន់ណាលែនបាននិងកំពុងសិក្សាហេដ្ឋារចនាសម្ព័ន្ធ ប្លង់ស្ថាបត្យកម្មសម្រាប់ការអភិវឌ្ឍគម្រោងបុរីចាន់ណាលែនទី៣បន្តទៀត។

លោកអគ្គនាយកបង្ហើបឱ្យដឹងថា គម្រោងថ្មីទី៣នេះគ្រោងអភិវឌ្ឍលើផ្ទៃដីសរុបជាង១០ហិចតា ដែលនឹងត្រូវសាងសង់ផ្ទះជាង១០០០ល្វែង។ គម្រោងចាន់ណាលែនទី៣ ចំណាយថវិកាប្រមាណ៧លានដុល្លារអាមេរិក រួមមាន ការបោះទុនជាង២លានដុល្លារអាមេរិកលើដីធ្លី និងការសាងសង់ប្រមាណ៥លានដុល្លារអាមេរិក។

ដោយមើលឃើញសក្តានុពលកាន់តែខ្លាំងនៃតំបន់វិហារសួគ៌ ក្នុងស្រុកខ្សាច់កណ្តាល ខេត្តកណ្តាល ទើបលោកអគ្គនាយកក្រុមហ៊ុនជ្រើសរើសតំបន់នេះ ជាទីតាំងសម្រាប់ការអភិវឌ្ឍថ្មីបន្តទៀត។

លោកបញ្ជាក់ប្រាប់ថា “គម្រោងធំៗថ្មីៗជាច្រើន បានឈានជើងចូលមក ជាពិសេស គម្រោងស្ពានមិត្តភាពកម្ពុជាកូរ៉េ ភ្នំពេញ-អរិយក្សត្រ ជិតចេញជាផ្លូវការមែនទែន ហើយដីធ្លីនៅទីនេះត្រូវបានចេញជាប្លង់រឹងរួចរាល់អស់ហើយ”។

បើតាមលោកចាន់ណា បានឲ្យដឹងថា នាពេលថ្មីៗនេះ ការប្រកាសពីគម្រោងបង្កើតក្រុងល្វាឯម ដែលមានទីតាំងជិតតំបន់វិហារសួគ៌ផងដែរនោះ នឹងធ្វើឱ្យតំបន់នៃគម្រោងរបស់លោកកាន់តែមានសក្តានុពល ហើយទាក់ទាញបាននូវគម្រោងវិនិយោគធំៗជាច្រើនបន្ថែមទៀតកាន់តែច្រើន។

លោកបន្តថា “បើយើងមើលលើការវិវត្តនៃរាជធានីភ្នំពេញ តំបន់នេះស្ថិតនៅប៉ែកខាងកើតក្រុងភ្នំពេញ និងមានទីតាំងនៅជិតភ្នំពេញជាងគេ ដែលមានភាពងាយស្រួល ក្នុងការធ្វើដំណើរទៅមករវាងភ្នំពេញនិងវិហារសួគ៌ ដោយគ្រាន់តែមានស្ពានតែប៉ុណ្ណោះ នឹងធ្វើឲ្យមានភាពងាយស្រួល។ តំបន់នេះក៏មានភាពងាយស្រួល ក្នុងការរៀបចំប្រព័ន្ធហេដ្ឋារចនាសម្ព័ន្ធផងដែរ ព្រោះនៅទីនេះ មិនសូវមានផ្ទះប្រជាជនរស់នៅកុះករដូចតំបន់ផ្សេងឡើយ”។

លោកបន្ថែមថា “ចក្ខុវិស័យនាពេលអនាគត ការរៀបចំទាំងប្រព័ន្ធទឹក ភ្លើង និងលូត្រូវបានរៀបចំតាមស្តង់ដារតាមសម័យទំនើប ដែលនឹងមិនមានការប៉ះពាល់នាពេលអនាគត”។

លើសពីនេះទៅទៀត គម្រោង7NG ដែលប្រមូលផ្ដុំដោយរោងចក្រធំៗជាង១០រោងចក្រ និងមានប្រជាពលរដ្ឋ កម្មករកម្មការនីជាច្រើនរស់នៅតំបន់នេះរួចស្រេចទៅហើយ ក៏បង្កភាពងាយស្រួលដល់ការអភិវឌ្ឍ និងសក្តានុពលបន្ថែមទៀត។

គម្រោងបុរីចាន់ណាលែនទី៣នេះ ផ្តោតលើអតិថិជនកម្រិតមធ្យម ដែលរស់នៅក្នុងមូលដ្ឋាន មកពីរាជធានីភ្នំពេញ និងបណ្ដាខេត្តនានា ព្រមទាំងក្រុមអតិថិជនមកពីក្រៅប្រទេសផងដែរ។ លោកចាន់ណាបានលើកឡើងថា “គម្រោងរបស់ក្រុមហ៊ុនចាន់ណាលែន បាននិងកំពុងកែប្រែការរស់នៅរបស់ប្រជាជននៅក្នុងមូលដ្ឋានពីការរស់នៅក្នុងផ្ទះឈើតូចៗ មករស់នៅក្នុងលំនៅឋាន ដែលមានផាសុខភាពជាងមុន”។

ក្រៅពីនេះ គម្រោងចាន់ណាលែនទី៣ ក៏មានការអភិវឌ្ឍផ្សារ ព្រមទាំងផ្តោតលើភាពងាយស្រួលក្នុងការបង់ប្រាក់ ល្បឿនលឿននៃការសាងសង់ផ្ទះផងដែរ ដើម្បីបង្កើនទំនុកចិត្តជូនអតិថិជន ហើយជំរុញឱ្យពួកគាត់មករស់នៅក្នុងគម្រោងកាន់តែច្រើន។

លោកបញ្ជាក់ថា “យើងមានបង្កើតផ្សារ ដោយផ្តោតលើភាពងាយស្រួលក្នុងការបង់ប្រាក់ ទាំងល្បឿននៃការសាងសង់ យើងក៏ធ្វើលឿន ដើម្បីឲ្យអតិថិជនមករស់នៅក្នុងគម្រោង ហើយយើងបន្តអភិវឌ្ឍគម្រោងថ្មី ដែលទទួលបានការគាំទ្រពីសំណាក់អតិថិជនបន្ថែមទៀត”៕

សុខុម

ហាណូយ: ប្រាក់កម្ចីមិនទាន់ទូទាត់សង (Outstanding Loan) ក្នុងវិស័យអចលនទ្រព្យវៀតណាម គិតត្រឹមថ្ងៃទី៣០ ខែមិថុនា ឆ្នាំ២០២២ បានកើនឡើង១៤,០៧%ឈានដល់១០២,៧ពាន់លានដុល្លារអាមេរិក ដែលជាអត្រាខ្ពស់ខ្លាំងបើធៀបនឹងកំណើនកម្ចីធនាគារជាមធ្យម។

នាយកប្រតិបត្តិមួយរូបមកពីធនាគាររដ្ឋវៀតណាម (State Bank of Việt Nam) ដែលជាធនាគារកណ្ដាលប្រទេសនេះបានទម្លាយឱ្យដឹងក្នុងលក្ខខណ្ឌអនាមិកថា ការកើនឡើងយ៉ាងខ្លាំងនូវប្រាក់កម្ចីបានជួយវិស័យអចលនទ្រព្យទប់ទល់នឹងកង្វះសាច់ប្រាក់ ដែលបណ្តាលមកពីផ្សារភាគហ៊ុនដាំក្បាលចុះ។ នេះបើយោងតាមសារព័ត៌មាន Vietnam News ចុះផ្សាយកាលពីថ្ងៃច័ន្ទ ទី៥ ខែកញ្ញា។

ក្រុមអ្នកឃ្លាំមើលស្ថានការណ៍ទីផ្សារលើកឡើងថា ប្រាក់កម្ចីយ៉ាងច្រើនពីធនាគារនានាបានហូរចូលទៅក្នុងគម្រោងអចលនទ្រព្យនៅឆ្នាំនេះ។

អ្នកជំនាញខាងធនាគារ លោក Đinh Thế Hiển និយាយថា វិស័យអចលនទ្រព្យទាក់ទាញប្រាក់កម្ចីពីធនាគារបានច្រើនជាងវិស័យណាៗទាំងអស់។

ទោះជាយ៉ាងណា ក្រុមអ្នកវិភាគបានគូសបញ្ជាក់ថា មិនមែនក្រុមហ៊ុនអចលនទ្រព្យទាំងអស់សុទ្ធតែទទួលបានកម្ចីពីធនាគារដោយងាយស្រួលនោះទេ ពោលគឺមានតែក្រុមហ៊ុនធំៗ និងក្រុមហ៊ុនដែលជាបុត្រសម្ព័ន្ធរបស់ធនាគារប៉ុណ្ណោះ។

ពួកគេបានបន្តថា ក្រុមហ៊ុនផ្សេងៗទៀតបានជួបការលំបាកក្នុងការទទួលបានប្រាក់កម្ចី ដោយសារខ្វះសាច់ប្រាក់ ចំពេលធនាគារកណ្តាលកំពុងរឹតបន្តឹងគោលនយោបាយរូបិយវត្ថុ។

ទីផ្សារមូលបត្របំណុលសាជីវកម្មនៅវៀតណាម មិនទាន់ងើបឡើងវិញនៅឡើយទេ បន្ទាប់ពីរឿងអាស្រូវពាក់ព័ន្ធនឹងក្រុមហ៊ុនអចលនទ្រព្យ Tân Hoàng Minh Group ចាប់តាំងពីវិធានការនិយ័តកម្មតឹងរ៉ឹង ដើម្បីទប់ស្កាត់កុំឱ្យករណីបែបនេះកើតឡើងដដែលៗ នៅពេលអនាគត ត្រូវបានបណ្ដាទីភ្នាក់ងាររដ្ឋាភិបាលដាក់ចេញជាបន្តបន្ទាប់។

ស្ថិតិពីសមាគមផ្សារមូលបត្រវៀតណាម (Việt Nam Bond Market Association) បង្ហាញយ៉ាងច្បាស់អំពីរឿងនេះ។ នៅក្នុងខែកក្កដា កន្លងទៅ មានតែក្រុមហ៊ុនអចលនទ្រព្យមួយប៉ុណ្ណោះដែលអាចបោះផ្សាយមូលបត្របំណុល និងប្រមូលដើមទុនបានចំនួន៨,៦លានដុល្លារអាមេរិក ដោយដាំក្បាលចុះរហូតដល់ទៅ៩៨%៕

x

ដោយ៖ សុផារី

ភ្នំពេញ៖ ​ក្រសួង​សាធារណការ ​និង​ដឹក​ជញ្ជូន បាន​បើក​កិច្ចប្រជុំ ដើម្បីពិនិត្យពិភាក្សា លើចំណុចត្រូវធ្វើឱ្យប្រសើរឡើងនូវការងារ ដែលនៅសេសសល់ និងត្រៀមដាក់ឱ្យដំណើរការសាកល្បង ផ្លូវល្បឿនលឿន ភ្នំពេញ-ព្រះសីហនុ នាពេលឆាប់ៗខាងមុខនេះ។

ក្នុងកិច្ចប្រជុំជាមួយថ្នាក់ដឹកនាំក្រុមហ៊ុនសាជីវកម្មស្ពានថ្នល់ចិន (CRBC) ដឹកនាំដោយលោក Sun Yao Guo ប្រធានវិស្វករ នៅថ្ងៃទី០៦ ខែកញ្ញា ឆ្នាំ២០២២ លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានសម្តែងនូវការកោតសរសើរ និងអំណរគុណទៅកាន់ក្រុមហ៊ុនសាជីវកម្មស្ពានថ្នល់ចិន (CRBC) ដែលបានអនុវត្តការងារសាងសង់លឿនជាងគម្រោងដែលបានគ្រោងទុកក្នុងកិច្ចសន្យា។

ជាមួយគ្នានេះដែរ លោកទេសរដ្ឋមន្ត្រីក៏បានដាក់ផែនការ ឱ្យគ្រប់ភាគីពាក់ព័ន្ធដោះស្រាយការងារដែលនៅសេសសល់យកមកពិភាក្សារកដំណោះស្រាយឱ្យបានរួចរាល់ ដើម្បីត្រៀមដាក់ឱ្យដំណើរសាកល្បង ក្នុងពេលឆាប់ៗខាងមុខនេះ។

ក្នុងនោះដែរ ចំពោះទីតាំងសាងសង់បង្គោលអង់តែនទូរសព្ទសំខាន់ៗមួយចំនួន នៅតាមបណ្តោយផ្លូវល្បឿនលឿនភ្នំពេញ-ព្រះសីហនុ  ក្រសួងសាធារណការ និងដឹកជញ្ជូនបានឯកភាពជាមួយក្រុមហ៊ុន CRBC ផ្តល់ជូនក្រសួងប្រៃសណីយ៍ និងទូរគមនាគមន៍ ធ្វើការរៀបចំបំពាក់បង្គោលតាមនីតិវិធីរបស់ខ្លួន ជាមួយភាគីពាក់ព័ន្ធ។

ផ្លូវល្បឿនលឿនភ្នំពេញ-ព្រះសីហនុ មានប្រវែងសរុប១៨៧,០៥គីឡូម៉ែត្រ តភ្ជាប់ពីភូមិ១ សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ដល់ភូមិ១ សង្កាត់លេខ៣ ក្រុងព្រះសីហនុ ខេត្តព្រះសីហនុ បានបើកការដ្ឋានសាងសង់កាលពីថ្ងៃទី២២ ខែមីនា ឆ្នាំ២០១៩។ គិតត្រឹមថ្ងៃទី២៦ ខែសីហា ឆ្នាំ២០២២ ផ្លូវនេះសម្រចបាន៩៦,៦០%។

គម្រោងផ្លូវល្បឿនលឿន ភ្នំពេញ-ព្រះសីហនុ នឹងក្លាយជាផ្លូវល្បឿនលឿនថ្មី និងដំបូងបំផុតនៅកម្ពុជា និងជាគម្រោងផ្លូវរបៀងយុទ្ធសាស្រ្តសំខាន់បំផុត ជួយកាត់បន្ថយពេលវេលាធ្វើដំណើរពី រាជធានីភ្នំពេញ ទៅកាន់ក្រុងព្រះសីហនុ ពីចំនួនប្រាំម៉ោងថយមកប្រមាណពីរម៉ោងប៉ុណ្ណោះ ព្រមទាំងជួយកាត់បន្ថយតម្លៃដឹកជញ្ជូនផងដែរ៕

ដោយ៖ សុផារី

ភ្នំពេញៈ របាយការណ៍ត្រីមាសទី២ របស់ការិយាល័យឥណទានកម្ពុជា​ ឬហៅកាត់ថា CBC បានបង្ហាញថា គិតមកត្រឹមពាក់កណ្តាលឆ្នាំ២០២២នេះ កម្ចីក្នុងវិស័យអចលនទ្រព្យ ដែលផ្តល់ឲ្យដោយគ្រឹះស្ថានធនាគារ និងហិរញ្ញវត្ថុនៅកម្ពុជា បានបន្តកើនឡើងគួរឲ្យកត់សម្គាល់ ស្របពេលដែលស្ថានភាពសេដ្ឋកិច្ចកម្ពុជាកំពុងបង្ហាញពីកំណើនល្អប្រសើរឡើងវិញច្រើន។

បើតាមទិន្នន័យរបស់ CBC បានបង្ហាញថា កម្ចីក្នុងវិស័យអចលនទ្រព្យដែលភាគច្រើនផ្តោតលើការទិញផ្ទះ បានកើនដល់ប្រមាណ៧ ពាន់លានដុល្លារគិតត្រឹមដំណាច់ខែមិថុនាឆ្នាំ២០២២ ដែលកើនឡើងពីត្រឹម៦,៤ពាន់លានដុល្លារកាលពីដំណាច់ឆ្នាំ២០២១។

កម្ចីអចលនទ្រព្យបន្តកំណើនរឹងមាំ បានឆ្លុះបញ្ចាំងពីការគាំទ្រដល់ដ៏សំខាន់ពីគ្រឹះស្ថានធនាគារ ក្នុងការរួមចំណែកអភិវឌ្ឍន៍វិស័យអចលនទ្រព្យ។ គ្រឹះស្ថានធនាគារភាគច្រើនផ្តល់កម្ចីទិញទិញផ្ទះ​ដោយ​មាន​​អត្រាការប្រាក់៧,៥ភាគរយក្នុងមួយឆ្នាំ សម្រាប់ទ្រព្យ​ធានាជា​អចលនទ្រព្យប្លង់រឹង ចំណែកអចលនទ្រព្យប្លង់ទន់ ទទួលបានកម្ចី ជាមួយអត្រាការប្រាក់ក្នុងរង្វង់១០ភាគរយក្នុងមួយឆ្នាំ។

កម្ចីអចលនទ្រព្យគឺជាផ្នែកមួយនៃ ឥណទានលក្ខណៈបុគ្គលដែលកត់ត្រាដោយការិយាល័យឥណទានកម្ពុជាហើយគិតមកត្រឹមខែមិថុនាឆ្នាំ២០២២នេះ ឥណទានលក្ខណៈបុគ្គលបានកើនដល់១៣ពាន់លានដុល្លារ។

សម​តុល្យឥណទានលក្ខណៈបុគ្គល រួមមានឥណទានសម្រាប់ប្រើប្រាស់ផ្ទាល់ខ្លួន ប័ណ្ណឥណទាន និងកម្ចីអចលនទ្រព្យ។ ក្នុងនោះ កម្ចីអចលនទ្រព្យមានចំណែកដល់ទៅ៥៤ភាគរយ នៃសមតុល្យឥណទានលក្ខណៈបុគ្គលសរុប៕​

ដោយៈ សុផារី

       ភ្នំពេញៈ ការវិនិយោគហេដ្ឋារចនាសម្ព័ន្ឋរបស់រដ្ឋាភិបាល បាននិងកំពុងធ្វើឲ្យជីវភាពប្រជាពលរដ្ឋប្រសើរឡើង ហើយទីក្រុងនិងជនបទកាន់តែខិតចូលគ្នា។

ជាក់ស្តែងតំបន់ផ្លូវក្រវ៉ាត់ក្រុងទី៣ បានលេចចេញបុរីកាន់តែច្រើន ដែលវិនិយោគដោយអ្នកធុរកិច្ចក្នុងស្រុក និងអន្តរជាតិ។

បុរី GB Residence ជាបុរីធំមួយដែលបាន កំពុងបោះទុនវិនិយោគលើផ្ទៃដីជាង១០ហិចតា រួមជាមួយហ្នឹងគុណតម្លៃពិសេសៗជាច្រើន។

លោកតាំង កៅគៀត នាយកប្រតិបត្តិ របស់បុរី GB Residence បានមានប្រសាសន៍ឲ្យដឹងកាលពីពេលថ្មីៗនេះថា មូលហេតុដែលក្រុមហ៊ុនសម្រេចចិត្តវិនិយោគគម្រោងបុរីGB នៅតំបន់ផ្លូវក្រវាត់ក្រុងទី៣ សម្រាប់ការ ដោយសារហេតុផលសំខាន់ៗមួយចំនួន។ ហេតុផលទី១ តំបន់ខាងលើនេះជាតំបន់ ដែលកំពុងតែមានការអភិវឌ្ឍន៌ខ្លាំង ទោះបីជាទទួលរងផលប៉ះពាល់ពីវិបត្តិជំងឺកូវីដ១៩ក៏ដោយ ការអភិវឌ្ឍន៍លើហេដ្ឋារចនាសម្ព័ន្ធផ្លូវថ្នល់ ការអភិវឌ្ឍន៌ព្រលានយន្តហោះថ្មី នៅតែបន្តដំណើរការយ៉ាងសកម្ម។

លោកបានបន្តថា “តំបន់នេះ មានទីតាំងជិតគម្រោងអភិវឌ្ឍន៍ធំៗ មជ្ឈមណ្ឌលសេដ្ឋកិច្ច ផ្សារទំនើបៗ សាលារៀនអន្តរជាតិផ្សេងៗ ដែលនឹងធ្វើឱ្យតំបន់នេះ ក្លាយជាទីតាំងល្អបំផុតសម្រាប់ការរស់នៅ”។ លោកបន្តថា “បន្ថែមលើសនេះ ប្រព័ន្ធហេដ្ឋារចនាសម្ព័ន្ធនៅទីនេះ មានភាពប្រទាក់ក្រឡា​គ្នា ដែលអាចភ្ជាប់ទៅកាន់ផ្លូវជាតិសំខាន់ៗ ដែលជាសរសៃឈាមសេដ្ឋកិច្ច ហើយភ្ជាប់ទៅកាន់កំពង់ផែស្វយ័តក្រុងភ្នំពេញ”។

លោកតាំង កៅកៀតបានបន្តថា ការវិនិយោគបុរីនៅទីនេះ អ្នកវិនិយោគនឹងទទួលបានផលចំណេញខ្ពស់ ដោយសារតំបន់នេះនឹងមានមនុ​ស្សរស់នៅកាន់តែច្រើន សកម្មភាពអាជីវកម្ម កាន់តែមានសភាពរសរវើក មានមនុស្សឆ្លងកាត់ច្រើន ដោយសារតំបន់នេះ ជាតំបន់ព្រលានយន្តហោះ ដែលអ្នកដំណើរជាតិ និងអន្តរជាតិនឹងធ្វើដំណើរឆ្លងកាត់តំបន់នេះ ដែលធ្វើឲ្យអ្នកវិនិយោគបុរីរបស់យើង អាចប្រកបអាជីវកម្មនានាបាន។

លោកតាំង កៅគៀតបានបន្ថែមទៀតថា គម្រោងបុរី GB Residence ត្រូវបានសាងសង់ឡើង លើផ្ទៃដីជាង១០ហិចតា ដោយបែងចែកចេញជាដំណាក់កាល ក្នុងនោះដំណាក់កាលទី១ សម្រេចការសាងសង់បានចំនួន២០ភាគរយហើយ។ លោកបន្តថា ទោះបីជាប្រឈមនឹងផលប៉ះពាល់ពីកូវីដ១៩ និងវិបត្តិសេដ្ឋកិច្ចសកលក្តី គម្រោងបុរី GB នៅតែបន្តទទួលបានការគាំទ្រពីសំណាក់អតិថិជនជាបន្តបន្ទាប់។

មូលហេតុ ដែលបណ្តាលឲ្យបុរី GB នៅតែពេញនិយម ក្នុងចំណោមអ្នកទិញ ព្រោះបុរីស្ថិតនៅផ្លូវក្រវាត់ក្រុងទី៣ ត្រឹមតែ៣០ម៉ែត្រប៉ុណ្ណោះ ហើយជាប់នឹងផ្លូវរដ្ឋ៥០ម៉ែត្រ ដែលអនុញ្ញាតឱ្យអ្នកទិញប្រកបរបររកស៊ីបានយ៉ាងងាយស្រួល។ បន្ថែមលើសនេះ គុណភាពខ្ពស់នៃផ្ទះក្នុងបុរី ប្រព័ន្ធហេដ្ឋារចនាសម្ព័ន្ធ ដូចជាសួនច្បារ ការរចនាឌីហ្សាញ ជាដើមត្រូវបានគិតគូរដល់សុខុមាលភាពនៃការរស់នៅរបស់ប្រជាជន។

លោកបញ្ជាក់ថា “ប្លង់ផ្ទះត្រូវបានគូរប្លង់ ដោយស្ថាបត្យករលំដាប់អន្តរជាតិ ធ្លាប់ឈ្នះរង្វាន់ជាច្រើននៅទីក្រុងឌូបៃ។ ប្លង់ដែលត្រូវបានគូរចេញមក ត្រូវបានគិតគូរអំពីភាពងាយស្រួល ក្នុងការរស់នៅប្រចាំថ្ងៃ ម៉ូតទាន់សម័យ និងប្រកបដោយគុណភាពផងដែរ”។

លោកបញ្ជាក់ថា បុរីGB បានព្យាយាមធ្វើឱ្យប្រសើរលើភាពបៃតង ដូចជា ការប្រើប្រាស់ឧបករណ៍សន្សំសំចៃថាមពលខ្ពស់ ដែលរួមចំណែកដល់ការកាត់បន្ថយការប្រើប្រាស់អគ្គិសនី និងការឡើងកំដៅពិភពលោក។ ពិសេសជាងនេះទៅទៀត បុរីបានរៀបចំសាងសង់សួនច្បារ ទំហំបណ្តោយប្រហែល១០០ម៉ែត្រគុណ និង២០ម៉ែត្រ ហើយគ្រប់ផ្ទះទាំងអស់អាចភ្ជាប់ទៅកាន់សួនច្បារនេះបាន ដើម្បីជាទីកន្លែងកំសាន្ត និងហាត់ប្រាណបាន។

បុរី GB មាន២ប្រភេទផ្ទះធំៗ រួមមាន ផ្ទះអាជីវកម្ម (Shop house) និងវីឡាភ្លោះ (Twin Villa) វីឡាកូនកាត់ (Link Villa) ប្រកបដោយលក្ខខណ្ឌបង់ប្រាក់ល្អបំផុត។ តម្លៃផ្ទះមានតម្លៃចាប់ផ្ដើមពី ៨០.០០០ដុល្លារឡើងទៅ ជាមួយនឹងការបញ្ចុះតម្លៃជាច្រើនផងដែរ។

អតិថិជនចាប់អារម្មណ៍ សូមទំនាក់ទំនងលេខទូរស័ព្ទ០៧៧ ៣៦៣ ០០៥, 066 363 005, 070 363 005៕

ដោយៈ គង់ សូរិយា

       ភ្នំពេញៈ មានវិធីសាស្រ្តច្រើនណាស់ ដែលអ្នកនៅក្នុងវិស័យនេះបានរៀបចំឡើង និងធ្វើឲ្យអ្នកមានចំណេះដឹងមានកម្រិតក្នុងវិស័យនេះ បានរងគ្រោះ។

គេហទំព័រPropertyarea.asia សូមលើកយកករណីមិនប្រក្រតីមួយចំនួន​មកបង្ហាញ ដើម្បីឲ្យប្រជាពលរដ្ឋបានសិក្សាស្វែងយល់ និងអាច​បង្កាហានិភ័យបាន។

ប្រយ័ត្នចំពោះប្រាក់កក់

អ្នកលក់ដីឡូតិ៍ខ្យល់ម្ចាស់ក្លែងក្លាយ ឬអ្នកលក់ក្លែងតែងតែចង់បានប្រាក់កក់មុនបំផុត។ អ្នកទិញត្រូវបានស្នើរឲ្យកក់ប្រាក់ ដើម្បីទទួលបានអចលនទ្រព្យមុនគេ។ បន្ទាប់ពីទទួលបានប្រាក់កក់ អ្នកលក់ក្លែងក្លាយបានគេចខ្លួនបាត់។

ដំណោះស្រាយ

អ្នកអាចជ្រើសយកជម្រើស នៃការផ្ញើប្រាក់កក់ តាមរយៈភាគីទីបីដែលអាចទុកចិត្តបាន ឬដាក់ក្នុងគណនីធនាគារអន្តរការី រង់ចាំរហូតដល់អ្វីគ្រប់យ៉ាងត្រូវបានដោះស្រាយ។  ធ្វើបែបនេះអាចការពារខ្លួនអ្នកពី​ការឆបោក។

អ្នកលក់ដីឡូតិ៍ខ្យល់

ពួកគេប្រើប្រាស់គម្រោងអ្នកដទៃមកធ្វើទីផ្សារ ដោយប្រាប់ថាជាដីរបស់ក្រុមហ៊ុន ឬគម្រោងរបស់ពួកគេ។  ពួកគេមិនមានក្រុមហ៊ុនច្បាស់លា ស់តែមានក្រុមការងារច្រើន និងមានជាការិយាល័យបណ្តោះអាសន្ន។

អ្នកចាញ់បោកអ្នកលក់ដីឡូតិ៍ខ្យល់ អាចមកពីមិនបានធ្វើការស្វែងរយល់ស៊ីជម្រៅពីគម្រោង ពិសេសអ្នកធ្វើការនៅក្រៅប្រទេស (ដូចជាប្រទេសកូរ៉េជាដើម)។

ដំណោះស្រាយ

អ្នកទិញមិនត្រូវជឿ ដោយគ្រាន់តែឃើញ តាមរយៈការផ្សព្វផ្សាយតាមហ្វេកប៊ុកនោះឡើយ។ អ្នកត្រូវដឹងពីប្រវត្តិក្រុមហ៊ុន និងភាពស្របច្បាប់របស់ក្រុមហ៊ុន​ និងកម្មសិទ្ធិស្របច្បាប់នៃអចលនទ្រព្យនោះ។ ករណីបើអ្នកមិនសូវយល់ដឹងពីទីផ្សារ អ្នកត្រូវស្វែងរកការប្រឹក្សាយោបល់ ជាមួយភ្នាក់ងារ អចលនទ្រព្យ ឬអ្នកជំនាញមុននឹងសម្រេចចិត្តទិញ។

ការខូចខាតលាក់កំបាំង

មូលហេតុមួយដែលគេលក់ផ្ទះ ក្នុងតម្លៃទាបជាងទីផ្សារខ្លាំង គឺអាចដោយសារតែមានការខូចខាត ដែលអ្នកនឹងមិនអាចមើលឃើញ។ អ្នកលក់អាចប្រាប់ថាប្រញាប់ លក់ក្នុងហេតុផលណាមួយ ហើយអ្នក ទិញមិនអាចរកឃើញការខូចខាតទាំងនេះ បានទេក្នុងពេលភ្លាមៗ ប៉ុន្តែនឹងដឹងនៅពេលទិញ និងចូលទៅស្នាក់នៅបានមួយរយៈពេល។

ដំណោះស្រាយ

ជាការណែនាំអ្នកគួរនាំអ្នកជំនាញមកជាមួយ ដើម្បីឲ្យជួយពិនិត្យមើលប្រព័ន្ធទឹក អគ្គិសនី និងភាពរឹងមាំនៃសំណង់នោះ មុនពេលអ្នកទិញលំនៅដ្ឋានណាមួយ។

តំបន់មានទឹកជំនន់

“គ្មានទឹកជំនន់” គឺជាចំណុចដ៏ពិសេសមួយ នៃអចលនទ្រព្យសម្រាប់លក់។ អ្នកលក់នឹងធ្វើការផ្សព្វ ផ្សាយថាតំបន់នោះគឺគ្មា​នទឹកជំនន់ទេ បើទោះបីជាក្នុងតំបន់នោះ មានទឹកជំនន់ក៏ដោយ។ អ្នកទិញអាចនឹងមានបញ្ហានៅពេល ដែលមានភ្លៀងធ្លាក់ច្រើននៅក្នុងតំបន់។

ដំណោះស្រាយ

អ្នកអាចត្រួតពិនិត្យមើលថា តើតំបន់នេះមានទឹកជំនន់ ឬក៏អត់ ដោយធ្វើការសាកសួរអ្នកក្នុងតំបន់​ ឬអ្នកជិតខាងនៅកន្លែងនោះ ថាតើតំបន់នោះពិតជាមានទឹកជំនន់ ឬក៏អត់។

ការបង់ប្រាក់មុនគម្រោង

អ្នកអភិវឌ្ឍក្លែងក្លាយបានផ្សព្វផ្សាយថា ពួកគេមានគម្រោងថ្មី​ និងចាប់បើកលក់មុនគម្រោង។   ពួកគេបើកឲ្យមានការទិញ និងបង់ប្រាក់ ឬកក់ប្រាក់មុនគម្រោង ហើយបន្ទាប់ពីប្រមូលបានប្រាក់ច្រើនល្មម ពួកគេស្រាប់តែគេចខ្លួនបាត់។

ដំណោះស្រាយ

ដើម្បីជៀសវាងរាល់បញ្ហាទាំងនេះ អ្នកអាចធ្វើការពិនិត្យឲ្យបានម៉ត់​ចត់លើប្រវត្តិរបស់គម្រោងពីមុនៗ របស់អ្នកអភិវឌ្ឍន៍។ អ្នកអភិវឌ្ឍន៍ដែលទុកចិត្តបានជាធម្មតា បានបន្សល់ទុកកេរ្តិ៍ឈ្មោះល្អ តាមរយៈគម្រោងកន្លងមក។ អ្នកអាចព្យាយាមរកមើលអត្ថបទព័ត៌មានល្អៗ ពីគេហទំព័រ ដែលអាចទុកចិត្តបាន​ ដែលផ្សព្វផ្សាយទាក់ទងនឹងគម្រោងអភិវឌ្ឍន៍នានា។

ប្រសិនបើជាក្រុមហ៊ុនស្របច្បាប់ ពួកគេមានអាជ្ញាប័ណ្ណក្រុមហ៊ុន អាជ្ញាប័ណ្ណសាងសង់ អាជ្ញាប័ណ្ណបុរី ផែនការមេ និងប្លង់រឹងជាដើម។ ប្រសិ​នបើអ្នកអភិវឌ្ឍន៍ មិនបង្ហាញនូវឯកសារទាំងនេះច្បាស់លាស់ទេ នេះជាសញ្ញាមិនល្អសម្រាប់អ្នកទិញ៕

ដោយ: លាងហួរ

ភ្នំពេញ: ទស្សនវិស័យទីផ្សារអចលទ្រព្យ លក់រាយរបស់កម្ពុជាកំពុងមានភាពរឹងមាំជាងពេលណាៗទាំងអស់ ហើយកម្ពុជាជាទីផ្សារដ៏ទាក់ទាញបំផុតមួយ។ នេះបើតាមការលើកឡើងរបស់លោក Edward Lee នាយក ប្រតិបត្តិនៃក្រុមហ៊ុន Prince Real Estate Group។

ក្រុមហ៊ុន Prince Real Estate ព្រមទាំង សមាគមខ្សែសង្វាក់លក់រាយម៉ាឡេស៊ី(MRCA) និងសភាធុរកិច្ចម៉ាឡេស៊ីនៃកម្ពុជា បានចុះហត្ថលេខាលើអនុស្សរណៈ នៃការយោគយល់ត្រីភាគីនៅថ្ងៃទី៦ ខែកញ្ញាម្សិលម៉ិញនេះ។

ក្រុមហ៊ុនបានរៀបចំកិច្ចប្រជុំ ប្រតិភូបេសកកម្មពាណិជ្ជកម្មរបស់MRCA នៃសហគ្រិនម៉ាឡេស៊ីចំនួន៦០នាក់ មកពីក្រុមហ៊ុនជាង៤០ ដែលដឹកនាំដោយលោក Dato Vincent Choo ប្រធានរៀបចំបេសកកម្មពាណិជ្ជកម្ម និងជាអនុប្រធាននៃ MRCA នៅសណ្ឋាគារ Raffles Hotel Le Royal។

ក្នុងឱកាសនោះ ក្រុមការងារបានចុះអនុស្សរណៈយោគយល់គ្នា (MoU) ត្រីភាគីជាមួយ MRCA និងសភាម៉ាឡេស៊ីនៃកម្ពុជា ធ្វើជាសាក្សីដោយ លោកជ័យ វិចិត្រ ឯកអគ្គរាជទូតកម្ពុជាប្រចាំប្រទេសម៉ាឡេស៊ី។

MoU គ្រោងជំរុញការវិនិយោគក្នុងប្រទេសកម្ពុជា ជាពិសេសឧស្សា​ហកម្មលក់រាយ ដោយជួយសម្រួលដល់ក្រុមហ៊ុនម៉ាឡេស៊ី ដែលមានចំណា​ប់អារម្មណ៍ក្នុងការពង្រីកខ្លួនមកកម្ពុជា។

ព្រឹត្តិការណ៍នេះ គឺជាផ្នែកមួយនៃកិច្ចខិតខំប្រឹងប្រែង របស់ក្រុមហ៊ុន Prince Real Estate ក្នុងការពង្រឹងយុទ្ធសាស្ត្រពង្រីកខ្លួន តាមរយៈការវិនិយោគខាងក្នុង ស្របតាមចក្ខុវិស័យរបស់ក្រុមហ៊ុន ក្នុងការផ្លាស់ប្តូរឧស្សា​ហកម្មលក់រាយនៅក្នុងប្រទេសកម្ពុជា។

ក្រុមហ៊ុននេះ បានចាប់ផ្តើមពង្រីកខ្លួនជាបណ្តើរៗឡើងវិញ ក្នុងប្រទេ​សកម្ពុជា ដោយមើលឃើញការវិលត្រឡប់ ទៅរកភាពប្រក្រតីវិញ ក្រោយការបើកដំណើរការសេដ្ឋកិច្ចកម្ពុជានៅដើមឆ្នាំនេះ៕

  ដោយៈ ជេស៊ីកា

       ភ្នំពេញៈ មជ្ឈមណ្ឌលពាណិជ្ជកម្ម និងលំនៅដ្ឋានចម្រុះកំពស់កប់ពព​កចំនួន៥បាននិងកំពុងសាងសង់ នៅរាជធានីភ្នំពេញ និងកំពុងផ្លាស់ប្តូរមុខមាត់រាជធានីនេះទៅកាន់លំដាប់ថ្មីមួយទៀត។

មជ្ឈមណ្ឌលពាណិជ្ជកម្មចំនួន៥នោះ មានកំពស់ចាប់ពី២២៣ម៉ែត្រ រហូតដល់កំពស់៣៥៨ម៉ែត្រ។

អាគារពាណិជ្ជកម្ម លំនៅដ្ឋាន និងកំសាន្តទាំង៥នោះរួមមាន ដូចជា ទី១ មជ្ឈមណ្ឌលកំសាន្ត កាស៊ីណូ សណ្ឋាគារ អាផាតម៉ិនប្រណីតNaga World 3   ( 75ជាន់   358ម៉ែត្រ ) ដែលគំរោងនេះស្ថិតក្នុងសង្កាត់ទន្លេបាសាក់ ខ័ណ្ឌបឹងកេងកង។

គំរោងនេះបាន និងកំពុងចំណាយប្រាក់៣៥០០លានដុល្លារ និងកំពុងវិនិយោគដោយក្រុមហ៊ុនNaga Corp ដែលមានមូលដ្ឋាននៅប្រទេសម៉ាឡេស៊ី។

ទី២ មជ្ឈមណ្ឌលកំសាន្ត និងខុនដូ Morgan Enmaison កំពស់ 72 ជាន់331.2ម៉ែត្រ ដែលគំរោងនេះស្ថិតក្នុងខ័ណ្ឌជ្រោយចង្វាររាជធានីភ្នំពេញ និងបានវិនិយោគ ដោយក្រុមហ៊ុនមានមូលដ្ឋាននៅប្រទេសចិន។ គំរោងនេះមានតម្លៃទុនវិនិយោគ៧០០លានដុល្លារអាមេរិក។

ទី៣ គំរោងខុនដូ Mesong Tower 71ជាន់ មានកំពសស់269ម៉ែត្រ ដែលគំរោងនេះ ស្ថិតក្នុងទីក្រុងកោះពេជ្រ ក្នុងសង្កាត់ទន្លេបាសាក់ រាជធានីភ្នំពេញ និងវិនិយោគដោយក្រុមហ៊ុនមានមូលដ្ឋាននៅទីក្រុងហុងកុង។

ទី៤ គំរោងKBX Universal Financial Center 60ជាន់ 230ម៉ែត្រ

ដែលគំរោងនេះបានអនុម័ត ដោយក្រុមប្រឹក្សាអភិវឌ្ឍន៍កម្ពុជា (CDC) ដែលបានបោះទុនវិនិយោគ១២៨ លានដុល្លារ ដើម្បីសាងសង់អគារផ្កាយ ៥ថ្មីមួយកន្លែង នៅកណ្តាលទីក្រុងភ្នំពេញ។

សណ្ឋាគារនេះ នឹងមានទីតាំងនៅតាមបណ្តោយ ផ្លូវព្រះមុនីវង្ស សង្កា ត់បឹងកេងកងទី៣ ខណ្ឌបឹងកេងកង ហើយនឹងអាចបង្កើតការងារយ៉ាងតិច៧៣០កន្លែង។

ទី៥ ក្រុមហ៊ុនSUNWAH បានវិនិយោគខុនដូ និងមជ្ឈមណ្ឌលពាណិជ្ជកម្មចម្រុះ Sunwah Pearl Phnom Penh ដែលគំរោងនេះមានអាគារភ្លោះចំនួន២ និងមានកំពស់62ជាន់ ស្មើនឹងកំពស់223.2ម៉ែត្រ។

គំរោងនេះ ស្ថិតនៅទល់មុខ សណ្ឋាគារ និងកាស៊ីណូNaga World1 មានទីតាំងស្ថិតក្នុងសង្កាត់ទន្លេបាសាក់ ខ័ណ្ឌបឹងកេងកង រាជធានីភ្នំពេញ៕