ដោយៈ សុខុម

ហុងកុង: បណ្ដាវិនិយោគិនក្រៅប្រទេសនៅពេលនេះ បានងាកមកសម្រុកទិញចូលវិញ នូវភាគហ៊ុនរបស់ប្រទេសចិន គួរឱ្យអបអរសាទរ បន្ទាប់ពី២ខែមកនេះ ពួកគេបានសម្រុកលក់ចេញភាគហ៊ុនចិន ដោយសារគោលនយោបាយសូន្យកូវីដ-១៩ ដ៏តឹងរ៉ឹងរបស់រដ្ឋាភិបាលក្រុងប៉េកាំង។

ការសម្រុកទិញរបស់វិនិយោគិន ក្នុងបរិមាណយ៉ាងច្រើនសន្ធឹកសន្ធា​ប់គួរឱ្យភ្ញាក់ផ្អើលនេះ បានជួយឱ្យតម្លៃផ្សារហ៊ុនចិន ទាំងមូលឈានដល់១ទ្រីលានដុល្លារអាមេរិក ដែលនេះជាសញ្ញាល្អសម្រាប់ទីផ្សារអាស៊ី ទាំងមូល ព្រោះមហាយក្សចិន ជាសេដ្ឋកិច្ចធំបំផុតទី២ របស់ពិភពលោក។ នេះបើយោងតាមសារព័ត៌មាន South China Morning Post ចុះផ្សាយកាលពីថ្ងៃច័ន្ទ ទី៥ ខែធ្នូ។

វិនិយោគិនក្រៅប្រទេស បានសម្រុកទិញភាគហ៊ុនក្នុងស្រុករបស់ប្រទេសចិន រហូតដល់ទៅ៨,៥ពាន់លានដុល្លារអាមេរិក ក្នុងខែវិច្ឆិកា តាមរយៈការតភ្ជាប់ Stock Connect ជាមួយក្រុងហុងកុង បន្ទាប់ពីពួកគេបានសម្រុកលក់ចេញភាគហ៊ុនសរុប រហូតដល់ទៅ៩,៨ពាន់លានដុល្លារអាមេរិក ក្នុងខែកញ្ញា និងខែតុលា។

នេះក៏ជាការសម្រុកទិញច្រើនបំផុតទី២ ប្រចាំឆ្នាំនេះផងដែរ បន្ទាប់ពីពួកគេបានសម្រុកទិញ ក្នុងទំហំ១០,៤៦ពាន់លានដុល្លារអាមេរិក កាលពីខែមិថុនា។

ដោយប្រឈមនឹងបាតុកម្មនៅតាមដងផ្លូវ មិនធ្លាប់មានប្រឆាំងនឹងការបិទខ្ទប់កូវីដ-១៩ ក្នុងទីក្រុងនានាទូទាំងប្រទេសចិន រដ្ឋាភិបាលក្រុងប៉េកាំង បានបន្ទន់ឥរិយាបថយ៉ាងប្រញាប់ ដោយសុខចិត្តបន្ធូរបន្ថយវិធានការកូវីដ ព្រមទាំងសន្យាបង្កើនកម្មវិធីចាក់វ៉ាក់សាំង សម្រាប់មនុស្សចាស់ផងដែរ។ កត្តាទាំងពីរនេះហើយ ដែលបានទាក់ទាញវិនិយោគិន ទូទាំងពិភពលោក ដែលពឹងផ្អែកលើការបើកសេដ្ឋកិច្ចចិនឡើងវិញ។

លោក David Chao អ្នកជំនាញខាងធ្វើយុទ្ធសាស្ត្រប្រចាំក្រុមហ៊ុន Invesco ដែលគ្រប់ក្រងទ្រព្យសកម្ម មានតម្លៃសរុបប្រមាណ១,៣៦ទ្រីលានដុល្លារអាមេរិក នៅទូទាំងពិភពលោកបានលើកឡើងថា “បណ្ដាវិនិយោគិន បានចាប់ផ្ដើមមើលឃើញពន្លឺ នៃការបញ្ចប់វិបត្តិកូវីដ-១៩ ដ៏អូសបន្លាយនៅក្នុងប្រទេសចិនហើយ”។

អ្នកជំនាញរូបនេះបានបន្ថែមទៀតថា “យើងមានសុទិដ្ឋិនិយមជាងមុន ចំពោះទ្រព្យសកម្មមានហានិភ័យរបស់ចិន សម្រាប់ឆ្នាំ២០២៣ ដោយ​សារតែមានតម្លៃទាប និងកំណើនសេដ្ឋកិច្ច ដែលជំរុញដោយការបើកប្រទេ​សឡើងឡើងវិញ ក្រោមការគ្រប់គ្រងយ៉ាងយកចិត្តទុកដាក់នៅឆ្នាំក្រោយ”៕ South China Morning Post៕

  ដោយៈ គង់ សូរិយា

       ភ្នំពេញៈ ក្រសួងសាធារណៈការ និងដឹកជញ្ជូនបានធ្វើកិច្ចសហប្រតិបត្តិការ នាពេលអនាគតលើការគ្រប់គ្រងអនាម័យ និងការងារទឹកកខ្វក់របស់អគ្គនាយក ដ្ឋានប្រព័ន្ធចម្រោះទឹកកខ្វក់ ជាមួយវិទ្យាស្ថានAgro Paris Tech នៃប្រទេសបារាំង។

កិច្ចប្រជុំនេះមានការចូលរួមពី លោករស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន និងលោកស្រីMaria Magana នាយិកាវិទ្យាស្ថានAgro Paris Tech និងលោក Wilfried Ligan ប្រធាន គ្រប់គ្រងគម្រោងហិរញ្ញវត្ថុ ដោយមានការអញ្ជើញចូលរួមពីថ្នាក់ដឹកនាំក្រសួង និងមន្ត្រីជំនាញពាក់ព័ន្ធ។

កិច្ចប្រជុំនេះធ្វើឡើងក្នុងគោលបំណង ដើម្បីជួបសម្ដែងការគួរសមពីសំណាក់តំណាងភាគីខាងវិទ្យាស្ថាន Agro Paris Tech ដើម្បីបង្កើតកិច្ចសហការជាមួយក្រសួងសាធារណការ និងដឹកជញ្ជូនលើការគ្រប់ គ្រងអនាម័យ និងការងារទឹកកខ្វក់នៅរាជធានីភ្នំពេញ និងរាជធានី-ខេត្តមួយចំនួនផងដែរ។

អង្គប្រជុំបានពិភាក្សា លើការរៀបចំផែនការបណ្ដុះបណ្ដាល របស់អគ្គនាយកដ្ឋានប្រព័ន្ធចម្រោះទឹកកខ្វក់ និងកម្មវិធីសិក្សា ដើម្បីត្រៀមរៀបចំកិច្ចសហការចុះអនុស្សរណៈយោគយល់ រវាងវិទ្យាស្ថានAgro Paris Tech និងវិទ្យាស្ថានតេជោសែន សាធារណការ និងដឹកជញ្ជូន នៃក្រសួងសាធារ​ណការ និងដឹកជញ្ជូន នៅឆ្នាំ២០២៣ខាងមុខនេះ។

លោករស់ វណ្ណាបានសម្តែងការស្វាគមន៍យ៉ាង កក់ក្ដៅចំពោះការអញ្ជើញជួបសម្ដែងការគួរសម ពីសំណាក់តំណាងវិទ្យាស្ថាន Agro Paris Tech និងបានបង្ហាញប្តេជ្ញាយ៉ាងមុតមាំ លើកិច្ចសហប្រតិបត្តិការនាពេលអនាគតលើការគ្រប់គ្រងអនាម័យ និងការងារទឹកកខ្វក់ជាមួយវិទ្យាស្ថាននេះ។

ជាមួយគ្នានោះដែរ ភាគីខាងវិទ្យាស្ថាន Agro Paris Tech បានស្នើសុំ លោកប្រធានអង្គប្រជុំបង្កើត កិច្ចសហការជាមួយអគ្គនាយកដ្ឋានប្រព័ន្ធចម្រោះទឹកកខ្វក់ ផ្អែកទៅលើការបណ្ដុះបណ្ដាល និងកម្មវិធីសិក្សាមួយចំនួ​នជាមួយនឹងវិទ្យាស្ថានតេជោសែន សាធារណការ និងដឹកជញ្ជូនផងដែរ។

ជាលទ្ធផល លោករស់ វណ្ណា បានទទួលយកសំណើរបស់ភាគីAgro Paris Tech និងបានស្នើឱ្យវិទ្យាស្ថាននេះ ពន្លឿនកិច្ចសហប្រតិបត្តិការឱ្យបានឆាប់រហ័ស ដើម្បីត្រៀមលទ្ធភាពចុះ អនុស្សរណៈយោគយល់ រវាងវិទ្យាស្ថានAgro Paris Tech និងវិទ្យាស្ថានតេជោសែន សាធារណការ និងដឹកជញ្ជូន នៅឆ្នាំ២០២៣ ឆាប់ៗខាងមុខនេះ៕

 ដោយៈ វឌ្ឍនៈ

ភ្នំពេញៈ តំបន់ស្ថិតនៅស្របផ្លូវជាតិលេខ៦អា ចាបតាំងពីគល់ស្ពានជ្រោយចង្វារត្រើយខាងកើត រហូតដល់សង្កាត់ព្រែកលាភ មានការអភិវឌ្ឍគួរឱ្យកត់សម្គាល់ ទៅលើតំបនលំនៅឋាននិងពាណិជ្ជកម្ម ដោយមានអាជីវកម្មជាច្រើនរីកដុះដាលកាន់តែខ្លាំង ដែលនឺងធ្វើឱ្យតំបន់នេះក្លាយជាតំបន់ពាណិជ្ជកម្មដ៏មមាញឹកនៅពេលអនាគត។

អ្នកជំនាញនៃវិស័យអចលនទ្រព្យមើលឃើញថា តំបន់នេះពីមុនជាតំបន់ដែលមានការអភិវឌ្ឍ លើលំនៅឋាន ប៉ុន្តែមកដល់ពេលនេះ បន្ថែមពីលើការអភិវឌ្ឍ លំនៅឋានគេឃើញថាមានអាជីវកម្មជាច្រើន និងមានម៉ាកយីហោល្បីៗ បានចូលទៅបោះទីតាំងនៅតំបន់នោះ ដែលធ្វើឱ្យតំបន់លេខ៦អាកាន់តែទាក់ទាញបន្ថែមទៀត ។

អ្នកស្រី តាំងហួរ អគ្គនាយិកានៃក្រុមហ៊ុន Amatak Property បានលើកឡើងកាលពីថ្ងៃម្សិលម៉ិញនេះថា តំបន់ត្រើយខាងកើត ពោលគឺជ្រោយចង្វារក្នុងនោះ ក៏មានផ្លូវជាតិលេខ៦អាផងដែរ នឹងក្លាយជាទីក្រុងថ្មីមួយ មានការអភិវឌ្ឍលើលំនៅឋាន អាជីវកម្មជាច្រើនប្រភេទ ពីព្រោះថាតំបន់នោះមិនឆ្ងាយពីភ្នំពេញ ដោយមានការតភ្ជាប់ស្ពានជាបន្តបន្ទាប់ ពីត្រើយខាងលិចទៅត្រើយខាងកើត ។

អ្នកស្រីបន្តថា “បច្ចុប្បន្ននេះតាមបណ្ដោយផ្លូវលេខ៦អា ឃើញថាមានការអភិវឌ្ឍលំនៅឋានតម្លៃខ្ពស់ៗជាច្រើនគម្រោង និងបានធ្វើឱ្យតំបន់ទាំងនេះ ក្លាយជាតំបន់អភិវឌ្ឍន៍លំនៅឋានទៅហើយ”។ លោកបន្តថា “បន្ថែមពីលើការអភិវឌ្ឍលំនៅឋាន តំបន់នេះក៏កំពុងតែមានការអភិវឌ្ឍតំបន់ពាណិជ្ជកម្មបន្ថែមទៀតដែរ ពីព្រោះថានៅពេលមានមនុស្សទៅរស់នៅច្រើន នឹងធ្វើឱ្យតម្រូវការប្រើប្រាស់ចាំបាច់ នឹងកើនឡើងដូចគ្នាផងដែរ”។

ចំណែកលោកប៉ូ អ៊ាវគង់ អគ្គនាយកនៃក្រុមហ៊ុនadvance ក៏បានឱ្យដឹងថាតំបន់ផ្លូវជាតិលេខ៦អានេះ ជាតំបន់ដែលសំបូរទៅដោយអ្នកមានរស់នៅពីព្រោះបុរីលំនៅឋាន ដែលអភិវឌ្ឍន៍នៅតំបន់នោះ សុទ្ធសឹងតែបុរីធំៗនិងមានតម្លៃខ្ពស់ៗ។ ម្យ៉ាងទៀតតំបន់នេះ ក៏មានសក្ដានុពលដែលទាក់ទាញដល់ការអភិវឌ្ឍបន្ថែមផងដែរ ដូចជា ស្ដាតថ្មី វិមានឈ្នះឈ្នះ ជាពិសេសនោះការអភិវឌ្ឍហេដ្ឋារចនាសម្ព័ន្ធ នៅប៉ែកខាងហ្នឹងក៏មានច្រើនផងដែរ ។

ជាមួយគ្នានេះ លោកថាន់ ចាន់ណាអគ្គនាយកក្រុមហ៊ុនចាន់ណាលែន ក៏បានបញ្ជាក់ថា ការអភិវឌ្ឍន៍លំនៅឋាន នៅតាមបណ្ដោយផ្លូវជាតិលេខ៦អានាពេលនេះ គឺភាគច្រើនជាគម្រោងដែលមានតម្លៃខ្ពស់ៗ ពីព្រោះដីនៅតំបន់នោះ ក៏មានតម្លៃខ្ពស់ដែរ។

តែយ៉ាងណាការអភិវឌ្ឍ នៅតាមបណ្ដោយផ្លូវជាតិលេខ៦អា ក៏បានរុញឱ្យគម្រោងអភិវឌ្ឍន៍តម្លៃសមរម្យ ងាកទៅកាន់តែឆ្ងាយ ដូចជាទៅកាន់វិហាសួគ៌ អរិយក្សត្រជាដើម ដោយសារតែតម្លៃដីធ្លីនៅតំបន់ទាំងនេះអាចអភិវឌ្ឍន៍លំនៅឋានតម្លៃសមរម្យបាន តែបើសិនជាបន្តិចទៀតនៅពេលរដ្ឋាភិបាលសង់ស្ពានឆ្លងទន្លេរួច នឹងធ្វើឱ្យតំបន់អរិយក្សត្រ នឹងកាន់តែមានភាពមមាញឹកបន្ថែម៕

   ដោយៈ ជេស៊ីកា

       ភ្នំពេញៈ អនុប្រធានសភាពាណិជ្ជកម្មកម្ពុជាបានលើកឡើងថា ការនិយាយតៗគ្នាថា សេដ្ឋកិច្ចនឹងជួបការលំបាក មិនខុសពីការធ្វើអត្តឃាតខ្លួនឯងឡើយ។

លោកឧកញ៉ាបានសរសេរតាមរយៈបណ្តាញទំនាក់ទំនងសង្គមតេឡេក្រាមកាលពីថ្ងៃទី៨ ធ្នូកន្លងមកថា សព្វថ្ងៃនេះពិតមែនហើយវិស័យអចលនទ្រព្យមានការថមថយ តែក៏សូមមេត្តាបងប្អូនទាំងអស់គ្នា មិនគួរដើរនិយាយតៗគ្នាថា សេដ្ឋកិច្ចនឹងពិបាក! នោះវាមិនខុសពីការធ្វើអត្តឃាតមុខរបរខ្លួនយើងឡើយ។

លោកបន្តថា ការនិយាយពីផលលំបាកតៗគ្នា វាដូចធ្វើអត្តឃាតខ្លួនឯង ពីព្រោះធ្វើអោយអ្នកមានលុយចង់ទិញមិនហ៊ានទិញ អ្នកលក់ក៏លក់មិនបាននឹងធ្វើឲ្យចរន្តជួញដូរ និងសាច់ប្រាក់ត្រូវជាប់គាំង ធ្វើឲ្យប៉ះពាល់ដល់វិស័យផ្សេងទៀត(ពិសេសគឺធនាគារ) ហើយក៏នឹងអាចនាំទៅដល់វិប្បតិ្តសេដ្ឋកិច្ចជាតិផងដែរ។

លោកឧកញ៉ាលឹម ហេងបានបន្តថា ស្ថានភាពសេដ្ឋកិច្ចយើងចាប់ផ្តើមប្រសើរហើយ ពិសេសលំហូរពាណិជ្ជកម្មកម្ពុជា ទៅកាន់ប្រទេសជាដៃគូ ពិសេសប្រទេសចិន កូរ៉េ ដែលកិច្ចព្រមព្រៀងពាណិជ្ជកម្មសេរីបានចូលជាធរមាន គឺជាសញ្ញាវិជ្ជមាន។ លោកបន្តថា លើសពីនេះការចូលជាធរមាននៃកិច្ចព្រមព្រៀងRCEP ក៏ជាចំណែកមួយជួយជម្រុញការនាំចេញ និងធ្វើឲ្យ​សេដ្ឋកិច្ចកម្ពុជានៅឆ្នាំ២០២២ និងឆ្នាំ២០២៣ មានភាពកាន់តែប្រសើរឡើង៕

ដោយៈ សុផារី

ព្រះសីហនុៈ ឆ្នេរខ្សាច់កម្សាន្តចំនួន១១ឆ្នេរ បានទទួលជ័យលាភីក្នុងការប្រឡងប្រណាំង ឆ្នេរខ្សាច់កម្សាន្តស្អាតលើកទី៣ ឆ្នាំ២០២២។

ក្នុងចំណោមឆ្នេរទាំងនោះ មានកម្រិតល្អណាស់ចំនួន៦ឆ្នេរ និងកម្រិតមធ្យមចំនួន៥ឆ្នេរ ក្នុងចំណោមឆ្នេរបេក្ខភាពចំនួន២៧ឆ្នេរ នៅក្នុងតំបន់ឆ្នេរសមុទ្រនៃខេត្តជាប់តំបន់ឆ្នេរទាំងបួនរបស់កម្ពុជា។

ការប្រគល់ជ័យលាភីនេះ ត្រូវបានធ្វើឡើងក្នុងសិក្ខាសាលាស្ដីពី ការពង្រឹងគុណភាពសេវាកម្មទេសចរណ៍ ឆ្ពោះទៅការអបអរសាទរពិធីបុណ្យសមុទ្រលើកទី៩ ជុំទី៣ អមជាមួយពិធីចែកបណ្ណសរសើរ និងលិខិតសរសើរដល់ប្រតិបត្តិករទេសចរណ៍ ខេត្តគោលដៅតំបន់ឆ្នេរ នាព្រឹកថ្ងៃទី៨ ខែធ្នូ ឆ្នាំ២០២២។

យោងតាមរបាយការណ៍របស់លោក មុំ បូវីល លេខាធិការក្រុមការងារទទួលបន្ទុកតាមដាន និងវាយតម្លៃឆ្នេរកម្សាន្ត នៃអគ្គលេខាធិការដ្ឋានគណៈកម្មាធិការជាតិគ្រប់គ្រង និងអភិវឌ្ឍន៍ឆ្នេរសមុទ្រកម្ពុជា បានឱ្យដឹងថា បន្ទាប់ពីការដាក់ចេញនូវចលនាប្រឡងប្រណាំង ឆ្នេរខ្សាច់កម្សាន្តស្អាតលើកទី៣ ឆ្នាំ២០២២ ក្រុមការងារទទួលបន្ទុកតាមដាន និងវាយតម្លៃឆ្នេរខ្សាច់កម្សាន្ត បានចុះត្រួតពិនិត្យ និងវាយតម្លៃឆ្នេរបេក្ខភាពចំនួន២៧នៅតាមបណ្តាខេត្តតំបន់ឆ្នេរសមុទ្រកម្ពុជា ក្នុងនោះនៅខេត្តកែបមានចំនួន៦ឆ្នេរ ខេត្តកោះកុងចំនួន៥ឆ្នេរ និងខេត្តព្រះសីហនុចំនួន១៦ឆ្នេរ។

ឆ្នេរខ្សាច់កម្សាន្តដែលទទួលបានចំណាត់ថ្នាក់ជាឆ្នេរស្អាត “កម្រិតល្អណាស់” មានចំនួន៦ឆ្នេរ រួមមាន ខេត្តកែបមាន២ឆ្នេរ ឆ្នេរកែប និងឆ្នេរកោះទន្សាយ ខេត្តព្រះសីហនុមានចំនួន៤ ដូចចា ឆ្នេរសុខា ឆ្នេរអូរឈើទាល ឆ្នេរអូរត្រេះ និងឆ្នេរឋានសួគ៌។

ឆ្នេរខ្សាច់កម្សាន្ត ដែលទទួលបានចំណាត់ថ្នាក់ជាឆ្នេរស្អាត “កម្រិតមធ្យម” មានចំនួន៥ឆ្នេរ រួមមាន ខេត្តកោះកុងមាន១ឆ្នេរ ឆ្នេរកោងកាង ខេត្តព្រះសីហនុមាន៤ឆ្នេរ ឆ្នេរឯករាជ្យ ឆ្នេរសុខសាន្ត (គ្រប់គ្រងដោយសហគមន៍) ឆ្នេរកោះរ៉ុង និងឆ្នេរប្រាសាទ។

លោក មុំ បូវីល បានបញ្ជាក់ទៀតថា សម្រាប់ឆ្នេរខ្សាច់កម្សាន្តណាដែលមិនទទួលបានចំណាត់ថ្នាក់ ក្រុមការងារទទួលបន្ទុកត្រូវរៀបចំផែនការ និងមានចំណាត់ការកែលម្អជាបន្ទាន់ ហើយត្រូវវាយតម្លៃឡើងវិញនាពេល៣ខែបន្ទាប់៕

ដោយ៖ សុផារី

ភ្នំពេញ៖ ក្រុមហ៊ុនអាកាសចរណ៍ Air Asia អន្តរជាតិនឹងបង្កើតក្រុមហ៊ុនអាកាសចរណ៍ Air Asia នៅកម្ពុជា អោយឈ្មោះថា Air Asia Cambodia ដែលនឹងធ្វើពិធីចុះហត្ថលេខា និងប្រកាសជាផ្លូវការនាស្អែកនេះ។

ប្រទេសកម្ពុជាជាប្រទេសទី៥ក្នុងតំបន់អាស៊ី ដែលមានទីស្នាក់ការរបស់ក្រុមហ៊ុន Air Asia ហើយក្រុមហ៊ុនគ្រោងចាប់ផ្តើមដំណើរការជើងហោះហើរនៅកម្ពុជាក្នុងឆ្នាំ២០២៣ ខាងមុខនេះ។

លោក ជា បូរ៉ា រដ្ឋលេខាធិការតំណាងលោក ថោង ខុន រដ្ឋមន្រ្តីក្រសួងទេសចរណ៍ នៅថ្ងៃទី០៨ ខែធ្នូ ឆ្នាំ២០២២ បានទទួលជួបពិភាក្សាការងារជាមួយតំណាងក្រុមហ៊ុនអាកាសចរ Air Asia លើការបង្កើតក្រុមហ៊ុនអាកាសចរ Air Asia នៅកម្ពុជា អោយឈ្មោះថា Air Asia Cambodia។

នេះបើយោងតាមសេចក្តីប្រកាសព័ត៌មានពីក្រសួងទេសចរណ៍ នៅថ្ងៃទី០៨ ខែធ្នូនេះ ដោយគម្រោងនេះនឹងធ្វើពិធីចុះហត្ថលេខា និងប្រកាសជាផ្លូវការនាស្អែកនេះ។

ក្រុមហ៊ុននេះមានគម្រោងទាក់ទាញទេសចរជាតិ និងអន្តរជាតិឱ្យបាន ៣-៤លាននាក់ ក្នុងមួយឆ្នាំ តាមក្រុមហ៊ុនរបស់ខ្លួន ដោយជំហានដំបូង គ្រោងដាក់ដំណើរការយន្តហោះចំនួន០៤គ្រឿង ដែលជាប្រភេទ​ Boeing A321 ដោយតភ្ជាប់គោលដៅអន្តរជាតិក្នុងតំបន់អាស៊ាន ចិន និងឥណ្ឌា និងគោលដៅក្នុងស្រុកពីរាជធានីភ្នំពេញ-សៀមរាប ខេត្តព្រះសីហនុ។

ក្រសួងទេសចរណ៍សង្ឃឹមថា ការវិនិយោគរបស់ក្រុមហ៊ុន Air Asia នឹងនាំមកនូវទេសចរបន្ថែមទៀតមកទស្សនាកម្ពុជា ពិសេសបានចូលរួមផ្សព្វផ្សាយពីគោលដៅរបស់កម្ពុជាទៅកាន់ពិភពលោកបន្ថែមទៀត៕

 ដោយៈ គង់ សូរិយា

       ភ្នំពេញៈ លោកឧត្តមសេនីយ៍ឯកបណ្ឌិតហ៊ុន ម៉ាណែតនឹងអញ្ជើញជាអធិបតីក្នុងពិធីបើកសម្ភោធ ផ្សារទំនើបMAKROស្ថកិតនៅតាមបណ្តោយផ្លូវជាតិលេខ៦អា នៅថ្ងៃទី១៤ ធ្នូខាងមុខនេះ។

ក្រុមប្រឹក្សាអភិវឌ្ឍន៍កម្ពុជា CDC បានឱ្យដឹងកាលពីដើមខែឧសភា កន្លងទៅថា CDC បានសម្រេចចេញវិញ្ញាបនបត្រ​ ចុះបញ្ជីគម្រោងវិនិយោគលើ ផ្សារទំនើប Makro ដែលមានទីតាំងវិនិយោគស្ថិតនៅ ភូមិបាក់ខែងលើ សង្កាត់បាក់ខែង ខណ្ឌជ្រោយចង្វារ រាជធានីភ្នំពេញ មានទុនវិនិយោគប្រមា​ណ១២,៧លានដុល្លារអាមេរិក និងអាចបង្កើត​ការងារបានចំនួន១៦១កន្លែង។

ផ្សារទំនើប ម៉ាក្រូនេះ នឹងក្លាយជាផ្សារទំនើបដ៏ធំមួយ និងមុនគេបង្អស់នៅទីតាំងនេះ ដែលនឹងជំរុញសក្តានុពលតំបន់នេះ ឱ្យកើនឡើងមួយកម្រិតទៀត ពិសេសអាចទាក់ទាញការវិនិយោគផ្សេងៗ មកកាន់តំបន់នេះផងដែរ។

ផ្សារទំនើបម៉ាក្រូដំបូងគេបង្អស់នៅកម្ពុជា បើកដំណើរការកាលពីចុងឆ្នាំ ២០១៧ បានសាងសង់ឡើង​លើផ្ទៃដីជាង ៥ហិកតា នៅក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ខណៈសាខាទី២ អភិវឌ្ឍន៍លើ​ផ្ទៃដីទំហំ៥ហិកតា ដែលមានទីតាំង នៅផ្លូវជាតិលេខ៦អា ភូមិគោកត្នោត ឃុំកណ្តែក ស្រុកប្រាសាទបាគង ខេត្តសៀមរាប។

ក្រោយសម្ពោធផ្សារម៉ាក្រូទី៣ មួយថ្ងៃ ពោលគឺថ្ងៃទី ១៥ ខែ ធ្នូ ផ្សារទំនើបអ៊ីអន៣ ឬអ៊ីអនមានជ័យ នៅផ្លូវសម្តេចតេជោ (ផ្លូវ៦០ម៉ឺត្រ) ក៏បើកដំណើរការជាផ្លូវការផងដែរ៕

ដោយៈ វណ្ណា

       ភ្នំពេញៈ បុរីវីឡាទួលសង្កែអរិយក្សត្រ ដែលជាបុរីធំជាងគេ និងកំពុង​ត្រៀមបើកដំណើរការផ្សារទំនើបបែបសហគមន៍នឹងនឹងធ្វើការដាក់ស្តង់តាំងបង្ហាញគម្រោង បុរីវីឡាទួលសង្កែ អរិយក្សត្រ និង ផ្សារសហគមន៍បែបទំនើប AK Avenue  នៅស្ងានីយប្រេងឥន្ធនៈ ភីធីធី ខាងត្បូងវត្តអរិយក្សត្រ (ផ្លូវចូលទៅកាន់គម្រោង) នៅថ្ងៃទី10-11 និង 24-25 ខែធ្នូ ឆ្នាំ២០២២ខាងមុខនេះ។

យោងតាមព៌តមានរបស់ក្រុមហ៊ុនបុរីវីឡាទួលសង្កែអរិយក្សត្របានឲ្យដឹងនាព្រឹកថ្ងៃទី៨ ធ្នូនេះថា នៅក្នុងកម្មវិធីដាក់បង្ហាញនេះ បុរីរបស់យើងនឹងមានផ្តល់ជូននូវប្រូម៉ូសិនមហាចំណេញ ដែលអតិថិជននឹង មានឱកាសចំណេ​ញយ៉ាងច្រើន សរុបជាទឹកប្រាក់រហូតដល់ជិត $50,000 រាល់ការកក់ផ្ទះ និង ការផ្តល់ជូនពិសេសៗជាច្រើនទៀតពី ផ្សារ AK Avenue ក្នុងកំឡុងពេលនៃការដាក់តាំងបង្ហាញនេះ។

បុរីវីឡាទួលសង្កែអរិយក្សត្រ ជាបុរីធំជាងគេនៅតំបន់ខាងលើនេះ ដែលមានផ្ទៃដីរហូតដល់ជាង៦០ហិកតា ហើយអ្វីកាន់តែពិសេសបុរីនេះបា​ននិងកំពុងរៀបចំដំណើរការ បើកផ្សារទំនើបបែបសហគមន៍AK Avenueនៅតំបន់នេះនាពេលឆាប់ៗខាងមុខនេះផងដែរ៕