ដោយៈ វឌ្ឍនៈ

ភ្នំពេញៈ ក្រុមហ៊ុនអភិវឌ្ឍន៍អចលនទ្រព្យដ៏ធំមួយរបស់កម្ពុជា WorldBridge Group និងក្រុមហ៊ុនJaymart Group របស់ប្រទេសថៃបានចុះហត្ថលេខាលើអនុស្សរណៈមួយ ក្នុងការបង្កើតក្រុមហ៊ុនធ្វើអាជីវកម្មក្នុងវិស័យអចលនទ្រព្យថ្មីមួយនៅក្នុងប្រទេសកម្ពុជា។

ក្រោយការចុះហត្ថលេខាលើអនុស្សរណៈនេះ ក្រុមហ៊ុនទាំងពីរនឹងបន្តធ្វើការលើផ្នែកច្បាប់ និងនីតិវិធីក្នុងការស្នើសុំចុះបញ្ជី ជាក្រុមហ៊ុនអចលនទ្រព្យថ្មី។

ថ្លែងនៅក្នុងសន្និសីទសារព័ត៌មាន ក្រោយពិធីចុះហត្ថលេខាកាលពីថ្ងៃទី៩ ធ្នូ ២០២២ អ្នកឧកញ៉ាសៀ ឬទ្ធី ប្រធានក្រុមប្រឹក្សានៃក្រុមហ៊ុន WorldBridge Groupបានមានប្រសាសន៍ថា កិច្ចសហប្រតិបត្តិការនៃក្រុមហ៊ុនទាំងពីរ(កម្ពុជា ថៃ )នឹងបង្កើតនូវក្រុមហ៊ុនថ្មីមួយ ផ្ដោតលើវិស័យ៣ រួមមាន ក្រុមហ៊ុនហិរញ្ញវត្ថុ អេឡិចត្រូនិក និងអចលនទ្រព្យ។

អ្នកឧកញ៉ាបន្តថា “ដោយមើលឃើញថាក្រុមហ៊ុន Jaymart Group មានបទពិសោធន៍លើការងារក្នុងវិស័យទាំងបី ទើបក្រុមហ៊ុនយើងសម្រេចក្នុងការចាប់ដៃជាមួយគ្នា ដើម្បីបង្កើតនូវក្រុមហ៊ុនថ្មី ដែលនឹងបង្កើតការងារជាច្រើនដល់ប្រជាពលរដ្ឋកម្ពុជា”។ លោកបន្តថា “វិស័យទាំងបី ដែលក្រុមហ៊ុនទាំងពីរនឹងបង្កើតក្រុមហ៊ុនឡើង ក្នុងប្រទេសកម្ពុចាគឺជាវិស័យដែលកំពុងមានតម្រូវការនៅក្នុងប្រទេសកម្ពុជា ហើយអ្វីដែលពិសេសនោះក្រុមហ៊ុនJaymart Group ជាក្រុមហ៊ុនដែលមានភាពជោគជ័យ ក្នុងប្រទេសថៃរួចទៅហើយ និងមានបុត្រសម្ព័ន្ធជាច្រើនក្រុមហ៊ុនផងដែរ”។

អ្នកឧកញ៉ាសៀ​ ឬទ្ឋីបានបន្ថែមថា កិច្ចសហប្រតិបត្តិការនេះដែរ នឹងនាំមកនូវចំណេះដឹង បទពិសោធន៍ថ្មីៗរបស់Jaymart Group មកកាន់ប្រទេសកម្ពុជា ដែលជាផលប្រយោជន៍សម្រាប់ប្រជាពលរដ្ឋកម្ពុជា ក៏ដូចជាសេដ្ឋកិច្ចកម្ពុជាទាំងមូលតាមរយៈការបង្កើតក្រុមហ៊ុនថ្មីៗ ។

ជាមួយគ្នានេះ លោក Adisak Sukumvitaya នាយកប្រតិបត្តិក្រុមហ៊ុន Jaymart Public Company Limited បានឱ្យដឹងថា ក្រុមហ៊ុន Jaymart Group ជាក្រុមហ៊ុនវិនិយោគខាងបច្ចេកវិទ្យ ដែលមានប្រព័ន្ធអេកូឡូពេញលេញ រាប់ចាប់ពីអាជីវកម្មពាណិជ្ជកម្ម ហិរញ្ញវត្ថុនិងបច្ចេកវិទ្យា ។

លោកជឿជាក់ថា “ការពង្រីកប្រព័ន្ធអេកូឡូស៊ី ទាមទារឱ្យមានការបន្ថែមដៃគូ ដែលរួមគ្នាអាចធ្វើឱ្យអាជីវកម្មមានការរីកចម្រើន ជាពិសេសនៅពេលពង្រីកបណ្ដាញប្រទេសអាស៊ីអាគ្នេយ៍ផ្សេងទៀត”។

លោកឧកញ៉ាចេង ខេង អគ្គនាយកក្រុមហ៊ុនCPL បានមានប្រសា​សន៍ថា អាជីវកម្មអចលនទ្រព្យនៅតែជាអាជីវកម្ម ដែលពេញនិយម និងសាងភាពមានបាន ដល់អ្នកធ្វើអាជីវកម្មនេះ។ ដូច្នេះហើយ ទោះបីជាកម្ពុជាជួបវិបត្តិនឹងកូវីដ១៩ក្ដី ក៏អាជីវកម្មអចលនទ្រព្យនៅតែមានសកម្មភាព និងដំណើរការល្អប្រសើរ ខណៈអាជីវកម្មផ្សេងមួយចំនួនទៀត បានផ្អាកនិងបិទ ទ្វារ៕

ដោយ: លាងហួរ

ភ្នំពេញ: ការិយាល័យជំរឿនសហរដ្ឋអាមេរិក បានរាយការណ៍កាលពីម្សិលមិញនេះថា ប្រទេសកម្ពុជាបាននាំចេញផលិតផល មានតម្លៃទឹកប្រាក់រហូតដល់១០.៦៤៩លានដុល្លារ  ទៅកាន់សហរដ្ឋអាមេរិក គិតចន្លោះខែមករា ដល់ខែតុលានៃឆ្នាំ២០២២នេះ  ពោលគឺកើនឡើង៤៧,៥ភាគរយបើធៀបនឹងរយៈពេលដូចគ្នាកាលពីឆ្នាំមុន។

ចំណែក កម្ពុជាបាននាំចូលផលិតផល មានតម្លៃ៤០៣លានដុល្លារពីសហរដ្ឋអាមេរិក ពោលគឺកើនឡើង១៦,៥ភាគរយ ពីមួយឆ្នាំទៅមួយឆ្នាំ ហើយអតិរេកពាណិជ្ជកម្មរបស់កម្ពុជា ជាមួយសហរដ្ឋអាមេរិកមានចំនួន១០.២៤៦លានដុល្លារ។

កាលពីខែតុលាកន្លងទៅ ទំហំនៃការនាំចេញរបស់កម្ពុជា ទៅកាន់សហ​រដ្ឋអាមេរិកមានចំនួន១.០៣១លានដុល្លារ ខណៈការនាំចូលមានតម្លៃ៣០,៥លានដុល្លារ។

ផលិតផលនាំចេញរបស់កម្ពុជា ទៅកាន់សហរដ្ឋអាមេរិកភាគច្រើនជាសម្លៀកបំពាក់ ហើយរួមបញ្ចូលទាំងទំនិញដូចជា ស្បែកជើង កង់ និងគ្រឿងសង្ហារឹម  ក្រោមការអនុគ្រោះពន្ធពាណិជ្ជកម្ម  ហើយផលិតផលធ្វើដំណើរត្រូវបាននាំចេញ ក្រោមអនុគ្រោះទូទៅពិសេស (GSP)។ ចំណែក ផលិតផលនាំ​ចូល​របស់​កម្ពុជា​ រួម​មាន​រថយន្ត គ្រឿងចក្រ គ្រឿង​អគ្គិសនី និង​គ្រឿង​អេឡិច​ត្រូនិក។

កាលពីពេលថ្មីៗនេះ រដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្តិ បានអំពាវនាវដល់សមាជិកសភាអាមេរិក ដែលកំពុងបំពេញទស្សនកិច្ច ឱ្យដំណើរការប្រព័ន្ធអនុគ្រោះពន្ធដល់កម្ពុជាឡើងវិញ ។

លោកបានបន្តថា “កម្ពុជាបានទទួលផលប្រយោជន៍ជាបណ្តើរៗ ពីប្រព័ន្ធអនុគ្រោះពន្ធទូទៅ របស់សហរដ្ឋអាមេរិក និងបានផ្តល់ការងារបន្ថែមទៀតដល់ប្រជាជនកម្ពុជា”៕

ដោយៈ គង់ សូរិយា

       ភ្នំពេញៈ សម្តេចតេជោ ហ៊ុន សែន នាយករដ្ឋមន្ត្រីកម្ពុជានៅព្រឹកថ្ងៃទី៩ ធ្នូនេះ បានអញ្ជើញជាអធិបតីក្នុងពិធីប្រគល់ និងទទួលប្រាក់កម្ចីសរុប១៥០០លានដុល្លារអាមេរិក សម្រាប់គាំទ្រការអភិវឌ្ឍនៅកម្ពុជា។

យោងតាមក្រសួងការបរទេស និងសហប្រតិបត្តិការអន្តរជាតិ បានឱ្យដឹងថា ពិធីចុះហេត្ថលេខានេះមានចំនួនពីររួមមាន ទី១ ការចុះហត្ថលេខាលើកិច្ចសម្របសម្រួលក្របខណ្ឌ ស្ដីពីការផ្ដល់ឥណទានសម្បទាន នៃមូលនិធិសហប្រតិបត្តិការអភិវឌ្ឍន៍សេដ្ឋកិច្ច សម្រាប់ឆ្នាំ២០២២-២០២៦ ដែលមានទំហំទឹកប្រាក់ចំនួន១៥០០លានដុល្លារអាមេរិក។

ឯកសារនេះ ត្រូវចុះហត្ថលេខារវាងលោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិកម្ពុជា និង លោក ប៉ាក ហឹងឃ្យង (PARK Heung-kyeong) ឯកអគ្គរដ្ឋទូតនៃសាធារណរដ្ឋកូរ៉េ ប្រចាំកម្ពុជា។

ទី២ ការចុះហត្ថលេខាលើគម្រោងពង្រឹង សមត្ថភាពប្រព័ន្ធបណ្ដាញបញ្ជូនអគ្គិសនីនៅខេត្តព្រះសីហនុ ដែលមានទឹកប្រាក់ចំនួន៧០លានដុ​ល្លា​រអាមេរិក និងគម្រោងសាងសង់ស្ពានមិត្តភាពកម្ពុជា -សាធារណរដ្ឋកូរ៉េ (ផ្សារចាស់-ជ្រោយចង្វារ និងជ្រោយចង្វារ-អរិយក្សត្រ) ដែលមានទឹកប្រាក់ចំនួន ២៤៥,៩០៩,០០០ដុល្លារអាមេរិក។

គម្រោងទាំងពីរនេះ ចុះហត្ថលេខាដោយអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ និងលោកស្រី Minnie CHEY ប្រធានមូលនិធិសម្រាប់ កិច្ចសហប្រតិបត្តិការអភិវឌ្ឍន៍សេដ្ឋកិច្ច នៃធនាគារនីហ័រណអាហ័រណកូរ៉េប្រចាំកម្ពុជា។

ក្រសួងការបរទេសកម្ពុជា បានគូសបញ្ជាក់ ឥណទានសម្បទានដែលផ្ដល់ដោយរដ្ឋាភិបាល នៃសាធារណរដ្ឋកូរ៉េនាពេលនេះ នឹងចូលរួមចំណែកដ៏សំខាន់ ដល់កិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ពន្លឿនការអភិវឌ្ឍសេដ្ឋកិច្ច ព្រមទាំងពង្រឹងបន្ថែមទៀត នូវទំនាក់ទំនងល្អ ដែលមានស្រាប់រវាងប្រជាជាតិទាំងពីរ៕

ដោយ: លាងហួរ

ហុងកុង: អង្គភាពបុត្រសម្ព័ន្ធមួយ របស់ក្រុមហ៊ុនផលិតគ្រឿងអេឡិចត្រូនិកដ៏ធំបំផុត នៅលើពិភពលោក Foxconn បានប្រកាសថា ខ្លួនបានទិញភាគហ៊ុនចំនួន៤,០៨លាន  ក្នុងតម្លៃ៥០០លានដុល្លារ របស់ក្រុមហ៊ុន Foxconn Hon Hai Technology India Mega Development Private Limited ។

សេចក្តីប្រកាសនេះ បានធ្វើឡើងបន្ទាប់ពីសារពត៌មាន Reuters បានរាយការណ៍កាលពីខែមុនថា ក្រុមហ៊ុនផ្គត់ផ្គង់Apple Foxconn គ្រោងបង្កើនកម្លាំងពលកម្មចំនួន៤ដង នៅរោងចក្រiPhone របស់ខ្លួន នៅក្នុងប្រទេសឥណ្ឌា ក្នុងរយៈពេល២ឆ្នាំខាងមុខនេះ ។

ក្រុមហ៊ុន Foxconn គ្រោងបង្កើនកម្លាំងពលកម្ម នៅរោងចក្ររបស់ខ្លួន នៅភាគខាងត្បូងប្រទេសឥណ្ឌា ដល់៧ម៉ឺននាក់ដោយបន្ថែមកម្មករចំនួន៥៣.០០០នាក់បន្ថែមទៀត  ក្នុងរយៈពេល២ឆ្នាំខាងមុខ។

ក្រុមហ៊ុននេះ ក៏បានចែករំលែកផែនការរបស់ខ្លួន ជាមួយក្រុមមន្ត្រីឥណ្ឌា អំពីការពន្លឿនកិច្ចខិតខំប្រឹងប្រែង របស់ខ្លួននៅក្នុងរោងចក្រឥណ្ឌា ក្រោយពីផលិតកម្មរបស់ក្រុមហ៊ុន បានរងការរំខាននៅក្នុងប្រទេសចិន។

យោងតាមមន្រ្តីតៃវ៉ាន់មួយរូ ដែលមានចំណេះដឹងអំពីបញ្ហានេះ បានមានប្រសាសន៍ថា Foxconn កំពុងពង្រីកប្រតិបត្តិការរបស់ខ្លួន នៅក្នុងប្រទេសឥណ្ឌា ដើម្បីបង្កើនសមត្ថភាពសម្រាប់ម៉ូដែលមូលដ្ឋាន និងដើម្បីបំពេញតម្រូវការរបស់ប្រទេសនេះផងដែរ៕

ដោយ: លាងហួរ

បាងកក:អាជ្ញាធរអចលនទ្រព្យឧស្សាហកម្ម របស់ប្រទេសថៃ (IEAT) បានព្យាករណ៍ថា ខ្លួននឹងអាចលក់ ឬជួលដី ដែលមានទំហំប្រហែល៤០០ហិកតា ទៅកាន់វិនិយោគិននៅឆ្នាំ២០២៣ខាងមុខ។

លោក Wiris Amrapal អភិបាលនៃអាជ្ញាធរឧស្សាហកម្មរបស់ប្រទេសថៃ (IEAT)បានរំពឹងទុកថា ការងើបឡើងវិញនៃសេដ្ឋកិច្ចពិភពលោក រួមជាមួយនឹងការអភិវឌ្ឍអចលនទ្រព្យរបស់ IEAT ដើម្បីទាក់ទាញលំហូរវិនិយោគផ្ទាល់ពីបរទេស (FDI) នឹងបណ្តាលឱ្យមានកំណើននៃការលក់ ឬជួលអចលនទ្រព្យកាន់តែច្រើនឡើង។

លោកបានបន្តថា លំហូរវិនិយោគផ្ទាល់ពីបរទេស  កំពុងតែចាប់ផ្តើមកើនឡើងជាថ្មី  ដោយក្រុមហ៊ុនក្រៅប្រទេសនានាជាច្រើន កំពុងស្វែងរកឱកាសវិនិយោគ នៅក្នុងច្រករបៀងសេដ្ឋកិច្ចភាគខាងកើត ចាប់តាំងពីថ្ងៃទី០១ ខែកញ្ញា បន្ទាប់ពីប្រទេសថៃ បានចាប់ផ្តើមចេញទិដ្ឋាការស្នាក់នៅរយៈពេលវែង។

គិតចាប់ពីខែកញ្ញា ឆ្នាំ២០២១ដល់ខែតុលា ឆ្នាំ២០២២នេះ IEAT បានលក់  ឬជួលអចលនទ្រព្យចំនួន២០១៦,១៤រ៉ៃ កើនឡើង៦៥​,១ភាគរយ  ធៀបនឹងរយៈពេលដូចគ្នាកាលពីឆ្នាំ២០២១ ។

លោក Wiris បានបន្ថែមថា គម្រោងអភិវឌ្ឍន៍សំខាន់ៗរបស់ IEAT  ដែលបានសម្រេចវឌ្ឍនភាព គួរឱ្យកត់សម្គាល់នៅឆ្នាំ២០២២នេះរួមមាន ទី១: គម្រោង​កំពង់ផែ​ឧស្សាហកម្ម​“Map Ta Phut” ដំណាក់កាល​ទី​៣  ដែល​ការ​សាងសង់​សម្រេច​បាន​៣០,៣ភាគរយ។

ទី២: សួនឧស្សាហកម្ម“Smart Park”ដែលការសាងសង់សម្រេចបាន៣៨,៦៥ភាគរយ។ ទី៣: តំបន់សេដ្ឋកិច្ចពិសេស (SEZ) ដែលការសាងសង់បានបញ្ចប់ទាំងស្រុង  និងមានវិនិយោគិនចំនួន៦រូប បានចូលមកបណ្តាក់ទុន។

ទី៤: រោងចក្រឧស្សាហកម្មចំនួន២ ដែលត្រូវបានអភិវឌ្ឍដោយក្រុមហ៊ុន Sivachai Co Ltd និងក្រុមហ៊ុន Green Utility Holding និងទី៥គម្រោង​កាត់​បន្ថយ​ ការ​បំភាយ​ឧស្ម័ន​ផ្ទះ​កញ្ចក់ ដែលបច្ចុប្បន្ននេះ​គ្របដ ណ្តប់លើរោងចក្រ​ចំនួន៣១៕

ដោយ: លាងហួរ

វ៉ាស៊ីនតោន: យោងតាមការចុះផ្សាយដោយទស្សនាវដ្តី Forbes បានឱ្យដឹងថា លោក Elon Musk ម្ចាស់ក្រុមហ៊ុនTwitter និងTesla បានបាត់បង់តំណែងជាមហាសេដ្ឋីពិភពលោក កាលពីថ្ងៃពុធម្សិលមិញនេះ បន្ទាប់ពីតម្លៃភាគហ៊ុនរបស់លោក នៅក្នុងក្រុមហ៊ុនផលិតរថយន្តអគ្គិសនីធ្លាក់ចុះយ៉ាងខ្លាំង។

លោក Bernard Arnault នាយកប្រតិបត្តិនៃក្រុមហ៊ុនមេរបស់ Louis Vuitton LVMH (LVMH.PA) និងក្រុមគ្រួសារបានកាន់តំណែងជាអ្នកមានបំផុតនៅលើពិភពលោក ប៉ុន្តែពួកគេបានត្រលប់មកលេខរៀងទី២វិញ ជាមួយនឹងទ្រព្យសម្បត្តិផ្ទាល់ខ្លួន ចំនួនសរុប១៨៥,៣ពាន់លានដុល្លារអាមេរិក។

លោក Elon Musk ដែលធ្លាប់បានកាន់កាប់តំណែង ជាអ្នកមានកំពូលក្នុងបញ្ជីForbes ចាប់តាំងពីខែកញ្ញាឆ្នាំ២០២១ ដែលលោកមានទ្រព្យសម្បត្តិសុទ្ធចំនួន១៨៥,៧ពាន់លានដុល្លារអាមេរិក។

ផ្សារហ៊ុនរបស់ក្រុមហ៊ុន Tesla ដែលបានបាត់បង់តម្លៃ៤៧ភាគរយ ចាប់តាំងពី លោកMusk បានចំណាយប្រាក់ដើម្បីទិញTwitter កាលពីដើមឆ្នាំនេះ បានធ្លាក់ចុះ២,៧ភាគរយ។

ទ្រព្យសម្បត្តិសុទ្ធរបស់លោក Musk បានធ្លាក់ចុះក្រោម២០០ពាន់លានដុល្លារ កាលពីដើមថ្ងៃទី០៨ ខែវិច្ឆិកា ខណៈវិនិយោគិនបានបោះចោលភាគហ៊ុនរបស់ក្រុមហ៊ុន Tesla ។

ក្រុមហ៊ុន Tesla បានបាត់បង់តម្លៃទីផ្សារជិតពាក់កណ្តាល ហើយទ្រ​ព្យសម្បត្តិសុទ្ធរបស់លោកMusk បានធ្លាក់ចុះប្រហែល៧០ពាន់លានដុល្លារចាប់តាំងពីលោកបានដេញថ្លៃទិញ Twitter ក្នុងខែមេសា៕