ដោយៈ គង់ សូរិយា

       ខេត្តកែបៈ បន្ទាប់ពីទទួលបានអាជ្ញាប័ណ្ណផ្លូវការពីរដ្ឋាភិបាល ក្រុមហ៊ុនទ្រីភាពគ្រុបបាន និងកំពុងពន្លឿនកាតសាងសង់ រមណីយដ្ឋានកោះទន្សាយ ដែលជាកោះល្បីល្បាញជាងគេក្នុងខេត្តកែប។

អភិបាលនៃគណៈអភិបាលខេត្តកែប លោកសោម ពិសិដ្ឋបានមានប្រសាសន៍ឲ្យដឹងតាមបណ្តាញតេឡេក្រាមនាព្រឹកថ្ងៃទី២៩ វិច្ឆិកាថា ក្រុមហ៊ុនកោះទន្សាយ អ៉ិនវិសម៉ិន ដែលជាបុត្រសម្ព័ន្ឋរបស់ក្រុមហ៊ុនទ្រីភាពគ្រុប បាននិងកំពុងពង្រីកល្បឿន សាងសង់ហេដ្ឋារចនាសម្ព័ន្ឋនានា ដើម្បីប្រែក្លាយកោះនេះជាតំបន់វិស្សមកាលកម្រិតខ្ពស់។

លោកបន្តថា តាមគំរោងក្រុមហ៊ុននេះ គ្រោងសាងសង់សណ្ឋាគារលំដាប់ផ្កាយ៥ ទីលានវាយកូនហ្គោល រមណីយដ្ឋានកែច្នៃ អាហារដ្ឋាន ភោជនីយដ្ឋានលំដាប់ខ្ពស់ និងសេវាកម្មកំសាន្តជាច្រើនទៀត។

ជាមួយគ្នានេះ ក្រុមហ៊ុនទ្រី ភាពក៏ទទួលបានសិទ្ឋពីរដ្ឋាភិបាល ដើម្បី​វិនិយោគកោះត្បាល់ ដែលមានទំហំផ្ទៃដីប្រមាណ២០ហិកតាផងដែរ។

កោះទន្សាយមានទំហំផ្ទៃដីសរុប ១៤០ហិកតា ដែលផ្នែកខ្លះនៃកោះនេះមិនត្រូវបានអនុញ្ញាត្តឲ្យវិនិយោគទេ ព្រោះវាជាតំបន់ព្រៃធម្មជាតិ ដែលត្រូវការពារ។

លោកសោម ពិសិដ្ឋបានបន្តថា “ក្រុមហ៊ុនទ្រី ភាពនឹងអភិវឌ្ឍន៍ផ្នែកម្ខាងនៃកោះទន្សាយ ពោលគឺមិនអភិវឌ្ឍន៍៍ទាំងអស់ទេ​ ដោយសហគមន៍៍ទេសច​រណ៍ ដែលមានបច្ចុប្បន្ននេះមិនរងផលប៉ះពាល់ឡើយ ព្រោះប្រជាសហគមន៍នៅលើកោះនេះ ជាប្រជាជនចាស់ ប៉ុន្តែពួកគេរស់នៅលើដីឯកជនរបស់រដ្ឋ”។

លោកបានបន្តថា នៅផ្នែកម្ខាងនៃកោះ នឹងមានការរៀបចំឆ្នេរឡើងវិញ ពីសំណាក់ក្រុមហ៊ុននេះ ព្រោះឆ្នេរលើកោះភាពច្រើនសម្បូរ ដោយថ្មរដិបរដុប៕

ដោយ: លាងហួរ

ភ្នំពេញ: ខណៈខែវិច្ឆិកាជិតកន្លងផុតទៅ ក្រសួង​ទេសចរណ៍​កម្ពុជាបាន​កត់ត្រា​ចំនួនភ្ញៀវ​ទេសចរជាតិ អន្តរជាតិ ធ្វើដំណើរកំសាន្ត នៅ​ទូទាំង​ប្រទេស​បាន​ជាង៣៦៩.៤០៤​នាក់ នៅក្នុងសប្តាហ៍ទី៤នៃខែវិច្ឆិកានេះ។

រដ្ឋមន្ត្រីក្រសួងទេសចរណ៍ លោក ថោង ខុន បានមានប្រសាសន៍ថា ក្នុងចំណោមភ្ញៀវទេសចរណ៍សរុប មានភ្ញៀវទេសចរចំនួន៣៣៤.១៤៣នាក់ជាជនជាតិខ្មែរ និងភ្ញៀវទេសចរចំនួន៣៥.២៦១នាក់ បន្ថែមទៀតជាជនបរទេស។

ខេត្តគោលដៅទេសចរណ៍សំខាន់ៗ រួមមាន ខេត្តព្រះសីហនុ ដែលមានភ្ញៀវទេសចរចំនួន១៨១.៥៣៩នាក់ ខេត្តសៀមរាបមានចំនួន៣២.៥១៥នាក់ រាជធានី​ភ្នំពេញ​មានចំនួន២៧.៣០១ នាក់ និងខេត្តកំពត​ដែល​បាន​កត់ត្រា ​ភ្ញៀវទេសចរចំនួន២៣.៣៤០នាក់ ខេត្ត​កែបមានចំនួន២០.៧២៧នាក់ ខេត្តបាត់ដំបង​មានចំនួន១២.៣២៩នាក់។ ចំណែកឯខេត្តកំពង់ចាម ​បានកត់ត្រាភ្ញៀវទេសចរចំនួន ១១.០៣៦នាក់។

តួលេខនេះគឺកើនឡើង៦,២៤ភាគរយ ធៀបនឹងសប្តាហ៍មុន ដែលកាលពីសប្តាហ៍មុន ដែលមានភ្ញៀវទេសចរសរុបមានចំនួន ៣៤៧.៧០១នាក់។

ខេត្តព្រះសីហនុ នៅតែបន្តទទួលបានភ្ញៀវទេសចរយ៉ាងច្រើន កាលពីសប្តាហ៍មុន ដោយសារមានព្រឹត្តិការណ៍ធំៗចំនួន២គឺ ការប្រគំតន្ត្រី និងការតាំងពិពណ៌រយៈពេលមួយសប្តាហ៍ ចាប់ពីថ្ងៃទី ២២ដល់ទី២៧ខែវិច្ឆិកា និងការប្រកួតជិះស្គីរយៈពេល៤ថ្ងៃ នៅឆ្នរអូរឈើទាលចាប់ពីថ្ងៃទី២៤ ដល់ទី២៧ខែវិច្ឆិកា។

រដ្ឋបាលខេត្តព្រះសីហនុ បានសហការជាមួយគណៈកម្មការអន្តរក្រសួងរៀបចំពិធីបុណ្យសមុទ្រ ដែលនឹងប្រព្រឹត្តទៅនៅថ្ងៃទី៩-១១ ខែធ្នូ ហើយកម្មវិធីនេះត្រូវបានគេរំពឹងថា នឹងទាក់ទាញលំហូរ​ភ្ញៀវ​ទេសចរ​ជាច្រើន​បន្ថែមទៀត​ចូលមកក្នុងខេត្តព្រះសីហនុ៕

ដោយៈ គង់ សូរិយា

       ខេត្តកែបៈ ការវិនិយោគដីលំហែរកាយស្តង់ដាអន្តរជាតិ ដែលបានបោះទុន៧លានដុល្លារអាមេរិក កំពុងក្លាយជាទីចាប់អារម្មណ៍របស់ភ្ញៀវទេ​ស​ចរណ៍ជាតិ អន្តរជាតិដែលទៅទស្សនាខេត្តកែប។

ភ្ញៀវទេសចរណ៍អាចអុំទូកកាយ៉ាក់ តាមដងព្រែកជាប់ដៃសមុទ្រ អាចដើរលើស្ពានជាប់ឆ្នេរដ៏ត្រកាល អាចគយគន់ទេសភាពថ្ងៃរះ និងថ្ងៃលិចយ៉ាងរ៉ូមែនទិក អាំងសាច់ ស្ទូចត្រីកំសាន្តនៅក្នុងគំរោង “ឆ្នេរសមុទ្រកោងកាង ដែលជាគំរោងមួយកំពុងមានការអភិវឌ្ឍយ៉ាងលឿន ស្របតាមគោល​នយោបាយរបស់រដ្ឋាភិបាល ក្នុងការប្រែក្លាយខេត្តកែបជាតំបន់លំហែរកាយកម្រិតខ្ពស់។

លោកCooler Tanអគ្គនាយកក្រុមហ៊ុនYoungsia Real Estateបានមានប្រសាសន៍ឲ្យដឹង តាមបណ្តាញតេឡេក្រាម នាព្រឹកថ្ងៃទី២៩ វិច្ឆិកានេះថា ដោយសារគោលដៅរបស់យើង គឺចូលរួមចំណែកអភិវឌ្ឍន៍ខេត្តកែបផង ធ្វើឲ្យគំរោងយើងជាគំរោង មានការអភិវឌ្ឍប្រកបដោយចីរភាព និងធ្វើ  ឲ្យអ្នកទិញដីលំហែរ ទទួលបានទីតាំងលំហែរពិតប្រាកដផង ក្រុមហ៊ុនកំពុងរៀបចំប្រែក្លាយវិនិយោគគំរោង “ឆ្នេរសមុទ្រកោងកាង” ជាសហគមន៍ទេស​ចរណ៍គំរូមួយ និងមានភាពស្ងប់ស្ងាត់ស្របតាមផែនការរបស់រដ្ឋាភិបាល។

       លោកបន្តថា “ដើម្បីសម្រេចគោលដៅនេះ ក្រុមហ៊ុនបានបោះទុនវិនិយោគលើហេដ្ឋារចនាសម្ព័ន្ឋ អស់ជិត១លានដុល្លារអាមេរិករួចហើយ ក្នុងការ​សាងសង់ផ្លូវបេតុង សាងសង់ស្ពានដើរជាប់មាត់ សមុទ្រប្រវែង១គីឡូម៉ែ​ត្រ និងរៀបចំហេដ្ឋារចនាសម្ព័្នឋជាច្រើនក្នុងគំរោងនេះ”។ លោកបន្តថា “ក្រៅពីហេដ្ឋារចនាសម្ព័ន្ឋដ៏ទាក់ទាញ ពត់ពែនតាមដងព្រែកធម្មជាតិ និងការកែច្នៃបន្ថែម ក្រុមហ៊ុនបាននិងកំពុងដាំដូងជាជួរៗ ដើម្បីលំអរគំរោងនេះផងដែរ”។

គំរោងនេះបាន និងកំពុងទទួលការគាំទ្រពីលោកសោម ពិសិដ្ឋអភិបា​លនៃគណៈអភិបាលខេត្តកែបផងដែរ ដែលលោកលើកទឹកចិត្តចំពោះគំរោងអភិវឌ្ឍន៍នេះ ដើម្បីចូលរួមចំណែកអភិវឌ្ឈន៍ខេត្ត ក៏ដូចជាផ្តល់ទំនុកចិត្តដល់អ្នកវិនិយោគដទៃទៀត មកកាន់ខេត្តកែបកាន់តែច្រើន។

លោកCooler Tanបានបន្តថា ក្រុមហ៊ុនបាននិងកំពុងគិត និងធ្វើយ៉ាងណា ដើម្បីជួយអភិវឌ្ឈន៍ខេត្តកែបបន្ថែមទៀត ប៉ុន្តែអ្វីៗអាស្រ័យលើការគាំទ្ររបស់អតិថិជនលើគំរោងនេះផងដែរ ព្រោះការអភិវឌ្ឍន៍គម្រោងគំរូមួយ ប្រកបដោយការទទួលខុសត្រូវផ្នែកសង្គមមួយ គឺទាមទារឲ្យយើងមានឆន្ទៈពិតប្រាកដ និងចំណាយទុនច្រើន ដើម្បីអតិថិជនសម្រេចបានតាមក្តី​សុបិនរបស់ពួកគាត់ចង់បាន៕

 ដោយៈ វឌ្ឍនៈ

ភ្នំពេញៈ មន្រ្តីជាន់ខ្ពស់រដ្ឋាភិបាលបានបង្ហើបឲ្យដឹងថា បច្ចុប្បន្ននេះ

មានក្រុមហ៊ុន៤ បានដាក់ពាក្យស្នើសុំសិក្សាផ្លូវល្បឿនលឿនថ្មីមួយទៀត គឺផ្លូវល្បឿនលឿនចេញពីរាជធានីភ្នំពេញ ទៅកាន់ខេត្តសៀមរាប។

លោកទេសរដ្ឋមន្រ្តីស៊ុន ចាន់ថុលរដ្ឋមន្ត្រីក្រសួងសាធារណការ និងដឹកជញ្ជូន បានមានប្រសាសន៍ឲ្យដឹងនាព្រឹកថ្ងៃទី២៩ វិច្ឆិកានេះថា មានក្រុមហ៊ុន៤ បានស្នើក្រសួងសាធារណការ និងដឹកជញ្ជូន ដើម្បីសិក្សាផ្លូវល្បឿនលឿនភ្នំពេញ សៀមរាប ដូច្នេះវាជាសញ្ញាវិជ្ជមាន និងជឿជាក់ថានៅថ្ងៃអនាគត យើងនឹងមានផ្លូវល្បឿនលឿនភ្នំពេញ សៀមរាបមួយទៀត។

លោកបន្តថា “បើសិនជាគេមិនជឿជាក់លើរដ្ឋាភិបាល នោះគេនឹងមិនដាក់ពាក្យស្នើសុំយើង ដើម្បីសិក្សាផ្លូវល្បឿនលឿនភ្នំពេញ សៀមរាបនេះទេ ដែលការវិនិយោគលើផ្លូវល្បឿនលឿនគឺជាការវិនិយោគធំ ”។

លោកស៊ុន ចាន់ថុលបានបន្តថា យើងគ្រាន់តែដឹងថាមានក្រុមហ៊ុន៤ បានស្នើមកក្រសួង ដើម្បីសិក្សាលើផ្លូវល្បឿនលឿនភ្នំពេញ សៀមរាប ប៉ុន្តែលទ្ធផលយ៉ាងណានោះ យើងមិនទាន់ទទួលបានជាផ្លូវការនៅឡើយទេ ហើ​យការស្នើរបស់ក្រុមហ៊ុនទាំងនោះ គឺជាសញ្ញាល្អសម្រាប់កម្ពុជា ដែលអាចឱ្យដឹងថា នៅថ្ងៃខាងមុខយើងនឹងមានផ្លូវល្បឿនលឿន ពីភ្នំពេញទៅខេត្តសៀម​រាប ។

បច្ចុប្បន្ននេះ កម្ពុជាមានផ្លូវល្បឿនលឿនភ្នំពេញ ព្រះសីហនុបានដាក់ដំណើរការរួចហើយ ដែលផ្លូវល្បឿនលឿននេះ បានជួយដល់សេដ្ឋកិច្ចកម្ពុជាច្រើន ជាពិសេសនឹងជំរុញកំណើនចលនាទេសចរ ក្នុងស្រុកនិងអន្តរជាតិ ។ ក្រៅពីផ្លូវល្បឿនលឿនមួយនេះ កម្ពុជាក៏គ្រោងនឹងសាងសង់ផ្លូវល្បឿនលឿនមួយទៀតពីភ្នំពេញ ទៅកាន់ក្រុងបាវិត ខេត្តស្វាយរៀង ដែលគ្រោងចំណាយទឹកប្រាក់ជិត១,៧ពាន់លានដុល្លារអាមេរិក ហើយគម្រោងនេះដែរក៏បាននិងជំរុញ ចលនានៃការទិញលក់ដីធ្លីនៅខេត្តពីរ ប៉ែកខាងកើតរាជធានីភ្នំពេញ ។

សម្រាប់ការសិក្សាលើការសាងសង់ ផ្លូវល្បឿនលឿនភ្នំពេញ សៀម​រាប គឺដូចនឹងអ្វីដែលរដ្ឋាភិបាលកំពុងអភិវឌ្ឍន៍ខេត្តមួយនេះផងដែរ ដូចជាផ្លូវជិត៤០ខ្សែ បានសាងសង់រួចនិងកំពុងបន្តសាងសង់ផ្លូវថ្មីៗ ព្រលានយន្តហោះអន្តរជាតិថ្មី និងការជំរុញការអភិវឌ្ឍទីក្រុងសៀមរាប ឱ្យក្លាយជាទីក្រុងឆ្លាតវៃជាដើម៕