សហរដ្ឋអាមេរិកប្រកាសផ្តល់មូលនិធិថាមពលស្អាតថ្មីចំនួន២០លានដុល្លារសម្រាប់តំបន់ទន្លេមេគង្គ

ដោយ: លាងហួរ

បាងកក: អនុប្រធានាធិបតីសហរដ្ឋអាមេរិក លោកស្រី Kamala Harris បានប្រកាសផ្តល់មូលនិធិថ្មីចំនួន២០លានដុល្លារ សម្រាប់គម្រោងថាមពលស្អាតនៅក្នុងតំបន់មេគង្គ ក្នុងអំឡុងពេលថ្ងៃចុងក្រោយនៃដំណើរទស្សនកិច្ចរបស់លោកស្រី ទៅកាន់ប្រទេសថៃកាលពីថ្ងៃអាទិត្យ ទី២០ ខែវិច្ឆិកា បន្ទាប់ពីកិច្ចប្រជុំកំពូលក្នុងតំបន់។

លោកស្រីបានថ្លែងដូចនេះ ទៅកាន់សង្គមស៊ីវិល និងក្រុមថ្នាក់ដឹកនាំធុរកិច្ចនៅទីក្រុងបាងកក បន្ទាប់ពីបិទកិច្ចប្រជុំនៃប្លុកAPEC ដែលមានសមាជិ កចំនួន២១ប្រទេស។

លោកស្រីបានបន្តថា សកម្មភាពអាកាសធាតុយ៉ាងម៉ឺងម៉ាត់នេះ មិនត្រឹមតែចាំបាច់ ដើម្បីការពារប្រជាជននៃភពផែនដី និងធនធានធម្មជាតិរបស់យើងប៉ុណ្ណោះទេ ប៉ុន្តែវាក៏ជាកត្តាជំរុញដ៏មានឥទ្ធិពល នៃកំណើនសេដ្ឋកិច្ចផងដែរ។

នៅក្នុងសេចក្តីប្រកាសព័ត៌មានមុននេះ លោកស្រីបានមានប្រសាសន៍ថា រដ្ឋបាលលោកចូ បៃដិន នឹងស្នើសុំមូលនិធិពីសភាអាមេរិក សម្រាប់ភាពជាដៃគូថាមពលជប៉ុន -អាមេរិក-មេគង្គ (JUMPP) ដែលតាមរយៈនោះប្រទេសទាំងពីរធ្វើជាដៃគូជាមួយប្រទេសក្នុងតំបន់ ដើម្បីលើកកម្ពស់វិស័យថាមពលប្រកបដោយនិរន្តរភាព។

លោកស្រីបានបន្ថែមថា “យើងដឹងហើយថា វិបត្តិអាកាសធាតុបង្ហាញការគំរាមកំហែងយ៉ាងពិតប្រាកដ ដល់សហគមន៍ដែលពឹងផ្អែកលើទន្លេមេគង្គនៅក្នុងប្រទេសថៃ វៀតណាម និងប្រទេសឡាវ”៕

វិភាគៈការមកដល់ និងចាកចេញរបស់ចិននៅក្រុងព្រះសីហនុ តើពួកគេនឹង ត្រលប់មកវិញឬទេ?

ដោយៈយិន លាងគង់ស្ថាបនិកនិងជាអគ្គនាយកគេហទំព័រPropertyarea.asia

ព្រះសីហនុៈ សម្លេងព្រះសង្ឃសូត្រធ៌មនៅវត្តលើ ក្រុងព្រះសីហនុនៅតែលាន់ឮរងំដដែល ប៉ុន្តែទិដ្ឋភាពជាក់ស្តែងនៃទីក្រុងនេះ បានផ្លាស់ប្តូរទាំងស្រុង។

កាលពីឆ្នាំ២០១៦ បើសម្លឹងពីទីទួលខាងក្រោយវត្តនេះ គេឃើញតែផ្ទះល្វែង និងសណ្ឋាគារកំពស់ទាបៗ ជាមួយប្រជាជនធ្វើដំណើរ តាមយានយន្តរបស់ពូកគេយ៉ាងស្ងប់ស្តាត់ និងហាក់រំពៃរង់ចាំមើលអ្វីមួយ។

ទីបំផុតអ្វីៗបានមកដល់ និងវិវត្តន៍លឿនស្ទើមិនគួរឲ្យជឿ ស្របពេលឆ្នាំ២០១៧ ទី

ក្រុងព្រះសីហនុ បានចាប់ផ្តើមទទួលពន្លឺព្រះអាទិត្យថ្មី។ ជាទីក្រុងធ្លាប់ស្ងប់ស្ងាត់ ក៏បានចាប់ផ្តើមមានភាពអ៊ូរអរបណ្តើរៗ ជាមួយកំនើនប្រជាពលរដ្ឋក្នុងស្រុក ពិសសលំហូរជនជាតិចិន ដែលជាអ្នកជំនាញ និងអ្នកវិនិយោគ។ ប៉ុន្មានឆ្នាំជាបន្តបន្ទាប់ទីក្រុងនេះ កាន់តែមានសភាពគគ្រឹកគគ្រេង ផ្លូវដែលមិនដែលកកស្ទះចរាចរណ៍ មកជាកកស្ទះ ផ្ទះសំណាក់ សណ្ឋាគារបានឡើងថ្លៃ ចរន្តនៃការទិញលក់ដីធ្លីបានកើនឡើងយ៉ាងគំហុក ដែលធ្វើឲ្យតម្លៃព្រះធរណីក្នុងទីក្រុង និងតំបន់ជុំវិញទីក្រុងនេះ កើនឡើងខ្ពស់រហូតដល់១០០០ភាគរយឬលើសពីនេះ។

ព្រះអាទិត្យលិចនៅក្រុងព្រះសីហនុ

ជាមួយលំហូរជនជាតិចិន មានទាំងអ្នកល្អ និងក្រុមអ្នកលេងបានធ្វើឲ្យរដ្ឋាភិបាលសម្រេចចិត្តយ៉ាងតក់ក្រហល់ ដើម្បីបិទហ្គេមឡនឡាញ ជាអាជីវកម្មកាស៊ីណូដែលបានធ្វើឲ្យទីក្រុងនេះលេចឡើងនូវពន្លឺភ្លើងព៌ណ ប្រៀបដូចជាទីក្រុងម៉ាកាវ ប្រទេសចិន ស្របពេលវត្តមានអាគារខ្ពស់ៗកើនឡើងដូចផ្សិត និងលូតទៅលើមេឃជារៀងរាល់ថ្ងៃ។

សម្លេងនៅតាមការដ្ឋានសំណង់ បានលាន់លឺពេញទីក្រុងនេះ ខណៈប្រជាជនមូលដ្ឋាន អ្នកវិនិយោគក្នុងស្រុក កម្មករ អ្នករត់តុក តុក និងប្រជាពលរដ្ឋធ្លាប់ក្រីក្រ បានក្លាយជាអ្នកមានយ៉ាងឆាប់់រហ័ស ដោយសារលក់ដីរបស់ពួកគេ។

រាជរដ្ឋាភិបាលកម្ពុជា កាលពីថ្ងៃទី១៨ ខែសីហា ឆ្នាំ២០១៩កន្លងទៅ បានចេញសារាចរណ៍បិទអាជីវកម្មល្បែងភ្នាល់ តាមម៉ាស៊ីនអេឡិចត្រូនិច តាមរយៈអ៊ីនអើណេតអនឡាញក្នុង និងក្រៅប្រទេសគ្រប់ប្រភេទ និងគ្រប់រូបភាព។

សារាចរណ៍របស់រដ្ឋាភិបាលបានពន្យល់ថា ការបិទនេះ បន្ទាប់ពីបានពិនិត្យឃើញថា មានឧក្រិដ្ឋជនបរទេសមួយចំនួន បានជ្រកក្រោមរូបភាពល្បែងភ្នាល់ប្រភេទនេះ ធ្វើសកម្មភាពបោកប្រាស់ជំរិតទារប្រាក់ ពីជនរងគ្រោះទាំងក្នុង និងក្រៅប្រទេស ធ្វើឱ្យប៉ះពាល់ដល់សន្តិសុខ សណ្តាប់ធ្នាប់សាធារណៈ និងរបៀបរៀបរយក្នុងសង្គម។

ជាលទ្ឋផលបន្ទាប់ពីបិទហ្គេមឡនឡាញ ក្រុងព្រះសីហនុបានស្លោកស្រពោនមុនគេ ជាមួយនឹងការចាកចេញរបស់អ្នកធ្វើការ និងអ្នកវិនិយោគអន្តរជាតិ ពិសេសអ្នកវិនិយោគចិន។

៥ឆ្នាំអ្វីៗបានផ្លាស់ប្តូរទាំងស្រុង

ទីក្រុងដែលធ្លាប់តែមានអាគារខ្ពស់បំផុត១០ជាន់នេះ បានផ្លាស់ប្តូរមុខមាត់ទាំងស្រុង ជាមួយនឹងវត្តមានអាគារកប់ពពកកំពស់ពី៥ជាន់ ដល់៥៣ជាន់កើនឡើងដល់៦០៤អគារ ដោយទាក់ទាញលំហូរទុនវិនិយោគពីអ្នកវិនិយោគជាតិ អន្តរជាតិ ពិសេសអ្នកវិនិយោគចិនប្រមាណ៧០០០លានដុល្លារអាមេរិក។

អភិបាលខេត្តព្រះសីហនុ លោក គួច ចំរើន នៅក្នុងសន្និសីទសារព័ត៌មានស្ដីពីវឌ្ឍនភាព និងទិសដៅការងារបន្តរបស់រដ្ឋបាល ខេត្តព្រះសីហនុកាលពីឆ្នាំ២០២០កន្លងមកថា ការគ្រប់គ្រង និងអភិវឌ្ឍន៍លើវិស័យសំណង់ នៅទូទាំងខេត្តព្រះសីហនុ គឺមានភាពរីកចម្រើនខ្លាំងគួរឱ្យកត់សម្គាល់ ជាពិសេសបានទាក់ទាញលំហូរទុនវិនិយោគ នៅក្នុងវិស័យនេះបានរហូតដល់ជាង៧ពាន់លានដុល្លារ។

លោកបានមានប្រសាសន៍បញ្ជាក់ថា “គិតចាប់ពីឆ្នាំ២០១៧ រហូតដល់ខែឧសភា ឆ្នាំ២០២០កន្លងទៅនេះ កំនើនគម្រោងសាងសង់នៅទូទាំងខេត្ត ដែលទទួលបានលិខិតអនុញ្ញាតមានចំនួន១៣៥៥គម្រោង នៅលើផ្ទៃក្រឡាសំណង់សរុប១៣.១០៧.២០៩ ម៉ែត្រការ៉េ ដែលមានទុនវិនិយោគសរុប៧០៩៩លានដុល្លារសហរដ្ឋអាមេរិក។

ស្វាគមន៍ទេសចរណ៍ និងវិនិយោគិនជាមួយហេដ្ឋារចនាសម្ព័ន្ឋថ្មីទាំងស្រុង

ជាមួយនឹងគោលដៅប្រែក្លាយទីក្រុងនេះ ជាទីក្រុងនៃការអភិវឌ្ឍបែបពហុបំណង តាមលំនាំទីក្រុងស៊ិនជិន ប្រទេសចិន ប្រមុខនៃរាជរដ្ឋាភិបាលកម្ពុជា បានធ្វើវិភាជន៍ថវិកាប្រមាណ៣០០លានដុល្លារអាមេរិក ដើម្បីសាងសង់ផ្លូវចំនួន៣៤ខ្សែ នៅទូទាំងក្រុងព្រះសីហនុ ប៉ុន្តែគំរោងនេះមិនគ្រប់គ្រាន់ទេ ដោយរាជរដ្ឋាភិបាល តាមរយៈក្រសួងសាធារណៈការ និងដឹកជញ្ជូន បានបន្ថែមការស្ថាបនាផ្លូវថ្មីចំនូន១២ខ្សែបន្ថែមទៀត ដើម្បីប្រែក្លាយ និងពង្រីកសក្តានុពលខេត្តនេះឲ្យបានពេញលេញ។

ជាលទ្ឋផលរហូតមកទល់ពេលនេះ ក្រុងព្រះសីហនុ បានផ្លាស់ប្តូរមុខមាត់ទាំងស្រុង ទាំងហេដ្ឋារចនាសម្ព័ន្ឋ ទាំងវត្តមានអាគារកប់ពពក ទាំងការផ្លាស់ប្តូរជីវភាពរបស់ប្រជាពលរដ្ឋ និងផែនការអភិវឌ្ឍថ្មី បន្ទាប់ពីប្រមុខរាជរដ្ឋាភិបាលសម្តេចតេជោហ៊ុន សែនបានបង្កើតគណៈកម្មាធិការអន្តរក្រសួង ដើម្បីរៀបចំធ្វើឲ្យទីក្រុងនេះ ក្លាយជាទីក្រុងទំនើប ស៊ីវិល័យ និងទាក់ទាញអ្នកវិនិយោគជាតិ អន្តរជាតិកាន់តែច្រើនថែមទៀតនាពេលអនាគត។

កាលពីឆ្នាំ២០១៥ រាជរដ្ឋាភិបាលបានដាក់ទីក្រុងនេះ ទៅក្នុងគោលនយោបាយអភិវឌ្ឍន៍ វិស័យឧស្សាហកម្មឆ្នាំ២០១៥ ២០២៥ជាលើកដំបូង ហើយទីក្រុងនេះបានស្ថិតនៅក្នុងគោលនយោបាយអភិវឌ្ឍន៍ នៃគំនិតផ្តួចផ្តើមខ្សែក្រវ៉ាត់១ និងផ្លូវ១ របស់រដ្ឋាភិបាលចិន។

បណ្តុំមូលដ្ឋានសក្តានុពលសេដ្ឋកិច្ច

តាមរយៈគោលនយោបាយ និងចក្ខុវិស័យដ៏មុតស្រួច របស់ប្រមុខរាជរដ្ឋាភិបាលកម្ពុជា ហេដ្ឋារចនាសម្ព័ន្ឋធំៗលំដាប់អន្តរជាតិ បានចាប់ផ្តើមវិនិយោគ ជាក់ស្តែងផ្លូវរថភ្លើងត្រូវបាន ដាក់ឲ្យដំណើរការយ៉ាងលឿន ពិសេសហេដ្ឋារចនាសម្ព័ន្ឋធំៗជាច្រើនបានបញ្ចប់ និងកំពុងសាងសង់ ដូចជា ព្រលានយន្តហោះអន្តរជាតិខេត្តព្រះសីហនុ ដែលបានពង្រីករហូតដល់៣០០០ម៉ែត្រ សំរាប់ផ្លូវរត់របស់យន្តហោះ ដែលអនុញញ្ញាត្តឲ្យយន្តហោះខ្នាតធំអាចចុះចតបាន និងផ្លូវល្បឿនលឿនជាប្រវត្តិសាស្រ្តភ្នំពេញ ខេត្តព្រះសីហនុបានសាងសង់ហើយនិងកំពុងដាក់ដំណើរការយ៉ាងសកម្ម។

អ្វីកាន់តែពិខសេសរដ្ឋាភិបាល ក៏បានអនុញ្ញាត្តឲ្យក្រុមហ៊ុនចិន សិក្សាលទ្ឋភាពដើម្បីស្ថាបនាផ្លូវរថភ្លើងល្បឿនលឿន តភ្ជាប់ពីភ្នំពេញ ទៅកាន់ខេត្តនេះផងដែរ។

កំពង់ផែទឹកជ្រៅតែមួយគត់ នឹងត្រូវអភិវឌ្ឍន៍នៅជំហ៊ានទី៣ នៅឆ្នាំ២០២២ខាងមុខ ដែលមានជម្រៅទឹក១៨ម៉ែត្រ និងអាចអនុញ្ញាត្តឲ្យកប៉ាល់ដឹកទំនិញធំៗ លំដាប់ពិភពលោកអាចចូលចតបាន ដែលធ្វើឲ្យកម្ពុជាកាន់តែមានឯករាជ្យភាពផ្នែកសេដ្ឋកិច្ច ដោយកាត់បន្ថយការពឹងផ្អែកប្រទេសជិតខាង។

តារារះនាទិសនារតី

ក្រៅពីផែនការអភិវឌ្ឍន៍របស់រដ្ឋាភិបាល និងការគាំទ្ររបស់វិស័យឯកជន ខេត្តព្រះសីហនុក៏មានគ្រាប់ពេជ្រដ៏អស្ចារ្យ ដូចខេត្តជាប់តំបន់ឆ្នេរដទៃទៀត គឺឆ្នេរសមុទ្រដ៏ស្រស់ស្អាត ដែលត្រូវបានដាក់បញ្ចូលក្នុងក្លឹប “ឆ្នេរស្អាតជាងគេលើពិភពលោក”ផងដែរ ដោយសារតំបន់ឆ្នេរកម្ពុជា ពិសេសកោះរ៉ុង និងកោះរ៉ុងសន្លឹម កោះសង្សា កោះក្របី កោះតាគៀវ កោះឬស្សីជាដើម សុទ្ឋតែស្ថិតក្នុងបញ្ជីរឆ្នេរស្អាត និងល្បីល្បាញលើពិភពលោក។

សម្បត្តិធម្មជាតិ ដែលចាយមិនចេះអស់នេះ មិនទាន់ប្រើប្រាស់អស់លទ្ឋភាពនៅឡើយ ដោយសារការផ្សព្វផ្សាយ និងធនធានមនុស្សនៅមានកម្រិត។

បន្ទាប់ពីបាំងដោយពពកខ្មៅ ព្រះអាទិត្យនឹងរះចែងចាំងឡើងវិញ

ព្រះអាទិត្យថ្មីត្រៀមរះនៅក្រុងព្រះសីហនុជាថ្មី បន្ទាប់ពីវិបត្តិសេដ្ឋកិច្ចសកល ដែលបណ្តាលមកពីជំងឺកូវីដ១៩ ប៉ុន្តែការគ្របដណ្តប់លើការចាក់វ៉ាក់សាំងយ៉ាងលឿន បានធ្វើឲ្យកម្ពុជាលើកពានថ្មីមួយ ដែលអាចចាក់វ៉ាក់សាំងបានលឿនជាងគេក្នុងតំបន់ បើទោះបីប្រទេសនេះស្ថិតនៅក្នុងនាមជាប្រទេស មានប្រាក់ចំណូលមធ្យមកម្រិតទាបក្តី។

អ្នកវិនិយោគចិន និងអន្តរជាតិដទៃទៀត ដែលបានចាក់លុយរបស់ពូកគេនៅទីក្រុងនេះរាប់រយលានដុល្លារបានត្រៀមវេចបង្វិច មកមើលគំរោងរបស់ពូកគេ និងទាញលុយត្រលប់ទៅវិញ (Return of Investment) ខណៈគោលនយោបាយរបស់កម្ពុជាកាន់តែបើកចំហរ ទំនាក់ទំនងរវាងរដ្ឋាភិបាលកម្ពុជា ចិនកាន់តែស្អីតរមួត បន្ទាប់ពីប្រទេសទាំងពីរបានផ្លាស់ប្តូរពីមិត្តភាពធម្មតា មកជាដៃគូយុទ្ឋសាស្រ្តគ្រប់ជ្រុងជ្រោយ និងកំពុងប្រែក្លាយជា “សហគមន៍ពីរ វាសនាតែមួយ”។

ការរីកចម្រើនរបស់កម្ពុជា មិនអាចកាត់ផ្តាច់ពីចិនឡើយ ដោយរដ្ឋាភិបាល និងអ្នកវិនិយោគចិនបាន និងកំពុងពង្រីកមូលដ្ឋាន នៃការយល់ដឹងពីគ្នាទៅវិញទៅមក និងផ្តល់ផលប្រយោជន៍ឲ្យគ្នាទៅវិញទៅមក ក្នុងនាមជាមិត្តដែកថែប ដែលមិនអាចបំបែកបាន។

គំរោងសាងសង់អចលនទ្រព្យទទួលបានការចុះបញ្ជីថ្នាលជាតិច្រើនបំផុត និងមានដើមទុនច្រើនជាងគេ

ដោយៈ សុផារី

ភ្នំពេញៈ ការវិនិយោគលើការសាងសង់អគារ សកម្មភាពអចលនទ្រព្យ ដោយប្រើប្រាស់អចលនទ្រព្យផ្ទាល់ខ្លួន ទទួលបានការចុះបញ្ជីតាមថ្នាលបច្ចេកវិទ្យាព័ត៌មាន របស់រាជរដ្ឋាភិបាលកម្ពុជាច្រើនបំផុត ក្នុងចំណោមសកម្មភាពអាជីវកម្មធំៗចំនួន៥ប្រភេទ។

យោងតាមប្រព័ន្ធចុះបញ្ជីអាជីវកម្ម តាមថ្នាលបច្ចេកវិទ្យាព័ត៌មានរបស់រាជរដ្ឋាភិបាល បានបង្ហាញឱ្យឃើញថា សកម្មភាពអាជីវកម្មធំៗចំនួន៥ប្រភេទទទួលបានការចុះបញ្ជី និងមានដើមទុនច្រើនជាងគេរួម មាន ការវិនិយោគលើការសាងសង់អគារ សកម្មភាពអចលនទ្រព្យ ដោយប្រើប្រាស់អចលនទ្រព្យផ្ទាល់ខ្លួន សកម្មភាពពិគ្រោះយោបល់ផ្នែកគ្រប់គ្រង កម្មន្តសាល សំលៀកបំពាក់ (លើកលែង សំលៀកបំពាក់ ធ្វើពីរោមសត្វ) អន្តរការីរូបិយវត្ថុ និងការចុះបញ្ជីរបស់ក្រុមហ៊ុនផ្សេងៗទៀត។

កម្ពុជាទទួលបានក្រុមហ៊ុន និងសហគ្រាស ដែលបានចុះបញ្ជីតាមប្រព័ន្ធចុះបញ្ជីអាជីវកម្ម តាមថ្នាលបច្ចេកវិទ្យាព័ត៌មាន ដែលអនុម័តរួច មានចំនួនជិត២០ពាន់ក្រុមហ៊ុន គិតជាដើមទុនសរុបមានចំនួន៥,៥១ពាន់ពាន់លានដុល្លារអាមេរិក គិតត្រឹមពាក់កណ្តាល ខែវិច្ឆិកា ឆ្នាំ២០២២នេះ និងនាមករណ៍បម្រុងទុកប្រមាណ១២ពាន់ក្រុមហ៊ុន សហគ្រាសផ្សេងទៀត ដែលនឹងធ្វើការអនុម័តជាបន្តបន្ទាប់។

ការបើកប្រព័ន្ធចុះបញ្ជីអាជីវកម្ម តាមថ្នាលបច្ចេកវិទ្យាព័ត៌មាន របស់រាជរដ្ឋាភិបាល ក្នុងជំហានទី១ បានដាក់ឲ្យប្រើប្រាស់ កាលពីថ្ងៃទី១៥ ខែ មិថុនា ឆ្នាំ២០២០ រួមមាន ក្រសួងពាណិជ្ជកម្ម អគ្គនាយកដ្ឋានពន្ធដារ ក្រសួងការងារ និងបណ្តុះបណ្តាលវិជ្ជាជីវៈ ក្រសួងមហាផ្ទៃ និងក្រុមប្រឹក្សាអភិវឌ្ឍន៍កម្ពុជា ។

ចំណែកជំហានទី២ បានអនុវត្តនៅថ្ងៃទី ១៥ ខែកញ្ញា ឆ្នាំ២០២១ ប្រព័ន្ធនេះបានពង្រីកវិសាលភាព ដល់ការស្នើសុំអាជ្ញាបណ្ណឬលិខិតអនុ ញ្ញាតផ្សេងៗតាមអនឡាញ ទៅតាមសកម្មភាពអាជីវកម្ម ពី ក្រសួង-ស្ថាប័នជំនាញរួមមាន ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ ក្រសួងទេសចរណ៍ ក្រសួងប្រៃសណីយ៍និងទូរគមនាគមន៍ និង និយ័តករ អាជីវកម្មអចលនវត្ថុ និងបញ្ចាំ នៃអាជ្ញាធរសេវាហិរញ្ញវត្ថុមិនមែនធនាគារ៕

ទីបំផុតអគារដ៏មហស្ចារ្យ The Line តម្លៃ១ទ្រីលានដុល្លារចាប់ផ្ដើមសាងសង់ហើយ

ដោយៈ សុខុម

រីយ៉ាដ: នៅទីបំផុត ការសាងសង់អគារដ៏មហស្ចារ្យ បែបថ្ងៃអនាគត The Line ដែលមានតម្លៃរហូតដល់ទៅ១ទ្រីលានដុល្លារអាមេរិក ស្ថិតក្នុងគម្រោងទីក្រុងខ្នាតយក្ស NEOM របស់ប្រទេសអារ៉ាប៊ីសាអូឌីតបានចាប់ផ្តើមហើយ។

គំរោងនេះស្ថិតនៅក្នុងខេត្ត Tabuk នាភាគពាយ័ព្យនៃប្រទេសនេះ។ នេះបើយោងតាមសារព័ត៌មានNDTV ចុះផ្សាយកាលពីពេលថ្មីៗកន្លងទៅ។

កាលពីប្រកាសលើកដំបូងក្នុងឆ្នាំ២០១៧ គម្រោងNEOM បានបង្កការភ្ញាក់ផ្អើលពេញពិភពលោក ព្រោះវាទំនើប និងអស្ចារ្យខ្លាំងពេកដោយសារនៅក្នុងទីក្រុងនេះ នឹងមានអ្វីៗអស្ចារ្យជាច្រើន ដូចជា តាក់ស៊ីហោះ និងអ្នកបម្រើជាមនុស្សយន្តជាដើម ដែលសូម្បីតែក្រុមស្ថាបត្យករ និងអ្នកជំនាញសេដ្ឋកិច្ច ក៏ធ្លាប់បានចោទជាសំណួរដោយក្ដីមន្ទិលដែរថា តើវាពិតជាអាចទៅរួចដែរឬទេ ឬក៏គ្រាន់តែជាការស្រមើស្រមៃ។

ទោះជាយ៉ាងណា ពេលនេះតាមរយៈរូបភាពវីដេអូឃ្លីប និងរូបភាពពីយន្តហោះដ្រូនបានបង្ហាញយ៉ាងច្បាស់ថា ការសាងសង់ក្នុងកម្រោងដ៏ធំមហិមានេះ បានចាប់ផ្ដើមជាផ្លូវការហើយ ដោយឃើញមានរថយន្តធុនធំ និងគ្រឿងចក្រយ៉ាងច្រើន កំពុងធ្វើការយ៉ាងមមាញឹក នៅការដ្ឋានកណ្ដាលវាលខ្សាច់ក្នុងប្រទេសអារ៉ាប៊ីសាអូឌីត។

បណ្ដុំសំណង់អគារកប់ពពក ដែលស្រោបដោយកញ្ចក់សងខាង និងលាតសន្ធឹងប្រវែង រហូតដល់ទៅជាង១៧០គីឡូម៉ែត្រ ទទឹងត្រឹមតែ២០០ម៉ែត្រ និងកម្ពស់៥០០ម៉ែត្រពីកម្រិតទឹកសមុទ្រនេះ ត្រូវបានគេហៅជារួមថា The Line។

យោងតាមរបាយការណ៍របស់គេហទំព័រ The National ឱ្យដឹងថា ព្រះអង្គម្ចាស់រាជទាយាទ Mohammed bin Salman នៃប្រទេសអារ៉ាប៊ីសាអូឌីត ជាអ្នកដែលបានប្រកាសការឌីហ្សាញអគារ The Line។

វានឹងក្លាយជាទីក្រុងដំបូងគេបង្អស់ ក្នុងពិភពលោកដែលដំណើរការដោយថាមពលកកើតឡើងវិញ រួមមាន ថាមពលខ្យល់ ថាមពលសូឡា (ពន្លឺព្រះអាទិត្យ) និងថាមពលអ៊ីដ្រូសែនជាដើម ពោលគឺការរស់នៅបែបថ្ងៃអនាគតដ៏អស្ចារ្យដែលមិនប៉ះពាល់ដល់បរិស្ថាន៕ NDTV៕

គំរោងវិនិយោគហូរចូលខេត្តកំពង់ស្ពឺមានសភាពស្ងប់ស្ងាត់

ដោយៈ គង់ សូរិយា

កំពង់ស្ពឺៈ អភិបាលខេត្តកំពង់ស្ពឺ លោកវ៉ី សំណាងបានមានប្រសាសន៍ឲ្យដឹងថា គំរោងវិនិយោគថ្មីៗឈានជើងចូលទឹកដី ខេត្តកំពង់ស្ពឺមានសភាពស្ងប់ស្ងាត់ ក្នុងរយៈពេលប៉ុន្មានខែចុងក្រោយនេះ។

លោកបានមានប្រសាសន៍ឲ្យដឹង តាមទូរស័ព្ទកាលពីថ្ងៃម្សិលម៉ិញនេះថា ការអភិវឌ្ឍន៍នៅក្នុងមូលដ្ឋានខេត្ត នៅតែបន្តយ៉ាងសកម្ម ពិសេសនៅតាមបណ្តោយផ្លូវលេខ៤១ និងផ្លូវលេខ៥១ ប៉ុន្តែសម្រាប់គំរោងវិនិយោគ ថ្មីៗមានសភាពស្ងប់ស្ងាត់់ បើធៀបនឹងដើមឆ្នាំ២០២២នេះ។

លោកបន្តថា“ប្រសិនជាខ្ញុំមានឱកាសដើរ ទៅទស្សនកិច្ចក្រៅប្រទេស នឹងអាចមានក្រុមហ៊ុនចូលមកកាន់ខេត្តនេះ ប៉ុន្តែមួយរយៈពេលចុងក្រោយនេះលោកជាប់កាតព្វកិច្ចច្រើន”។

លោកវ៉ី សំណាងបានបន្តថា ខេត្តកំពង់ស្ពឺ ទោះបីមិនមានរោងចក្រ សហគ្រាសថ្មីៗហូរចូលច្រើនក្តី ប៉ុន្តែខេត្តនេះនៅតែខ្វះកំលាំងពលកម្ម បំរើការងារនៅតាមរោងចក្រ សហគ្រាសនានានៅឡើយ។ លោកបន្តថា លោកបានជូនដំណឹង ទៅថ្នាក់ដឹកនាំខេត្តផ្សេងៗផងដែរ ដើម្បីជួយគៀងគរប្រជាពលរដ្ឋមកធ្វើការនៅតាមរោងចក្រ សហគ្រាសនានា។

ខេត្តកំពង់ស្ពឺ លែងត្រូវគេមើលរំលងទៀតហើយ ដោយសារខេត្តនេះមានសក្តានុពលខ្លាំងលើតំបន់សេដ្ឋកិច្ច និងឧស្សាហកម្ម ព្រោះខេត្តនេះមានទីតាំងស្ថិតនៅចំណុចកណ្តាល ក្នុងការតភ្ជាប់ពីរាជធានីភ្នំពេញ ទៅកាន់ខេត្តព្រះសីហនុ ដែលជាខេត្តមានកំពង់ផែទឹកជ្រៅតែមួយគត់របស់កម្ពុជា៕

PROPNEX HOLDS ANOTHER SUCCESSFUL CAREER WORKSHOP

After the overwhelming response from PropNex’s last recruitment seminar [Real Estate Success Seminar] held on the 23^rd of October this year, they carried out another seminar [Career Workshop] held on the 15^th of November.

The belief in adding value and providing the best service has propelled them to nurture world-class realty professionals led by a management team of visionaries. The PropNex brand has expanded regionally beyond Singapore to Indonesia, Malaysia, Vietnam, Cambodia, and the latest addition to the PropNex family, Australia.

PropNex (Cambodia) Co., Ltd is a full-service real estate agency with headquarters in Phnom Penh, Cambodia. The services they provide are project marketing, residential and commercial brokerage, land and investment, property valuation, research consulting, and property management. Their business strategy is to provide cost-effective solutions and the expertise needed to achieve the market development goals of their clients. They aim to provide a transparent platform to their customers in the real estate market and help end misleading and deceptive practices within Cambodia’s Real Estate industry.

They currently stand at 400 freelance agents and among many of their goals for the upcoming year, is to increase that number to 1000 salespersons. To achieve this, they are driven to conduct substantial recruitment seminars to bring quality agents into Cambodia, and to give back to the community by improving the standards of real estate agencies in the Cambodian market. Career Workshop was conducted by 2 PropNex leaders; Mor Maneth, Russel Tizon, and Managing Director Thida Ann. During the workshop, they inspired the audience and empowered them to realize everything comes from yourself and everything is achievable with perseverance, authenticity, consistency, and dedicated hard work.

The objective of this recruitment seminar is directing to those, especially fresh graduates who are looking for a promising career that would take them to greater heights, breaking barriers to allow them to reach their fullest potential. During the seminar, they were introduced to new career opportunities and engaged in self-development activities opportunities, and interactive team activities. The ultimate guide widens their perspectives to enable them to have a clearer vision of their career pathways that could result in employability. To inculcate the spirit of entrepreneurship and the power of building a local economy that results in jobs and opportunities in the local but with a global context in the real estate industry where they see themselves fit.

ការស្ទង់មតិ: វិស័យអចលនទ្រព្យក្នុងប្រទេសចិននឹងងើបឡើងវិញ ជាបណ្តើរៗនៅឆ្នាំ២០២៣

ដោយ: លាងហួរ

ប៉េកាំង: ក្រុមសេដ្ឋវិទូបានឱ្យដឹង នៅក្នុងការស្ទង់មតិរបស់សារពត៌មានReuters ថា វិស័យអចលនទ្រព្យរបស់ប្រទេសចិន នឹងងើបឡើងវិញបន្តិចម្តងៗនៅឆ្នាំ២០២៣ ដោយរំពឹងថា នឹងមានវិធានការជំរុញបន្ថែមទៀត និងការបន្ធូរបន្ថយការទប់ស្កាតជំងឺកូវីដ ដើម្បីគាំទ្រដល់វិស័យដែលជួបនូវវិបត្តិនៅឆ្នាំក្រោយ។

តម្លៃផ្ទះថ្មីត្រូវបានគេរំពឹងថា នឹងធ្លាក់ចុះនៅក្នុងឆមាសទី១ នៃឆ្នាំក្រោយ មុនពេលកើនឡើងពេញមួយឆ្នាំ២០២៣ ខណៈពេលដែលការលក់ត្រូវបានគេមើលឃើញថា នឹងធ្លាក់ចុះកាន់តែយឺត។ នេះបើយោងតាមអ្នកវិភាគ និងសេដ្ឋវិទូចំនួន១៦រូប ដែលត្រូវបានស្ទង់មតិដោយសារពត៌មានReutersនៅចន្លោះថ្ងៃទី៩ដល់ថ្ងៃទី១៧ខែវិច្ឆិកា។

យោងតាមការស្ទង់មតិបានឱ្យដឹងថា តម្លៃផ្ទះថ្មីត្រូវបានគេមើលឃើញថានឹងធ្លាក់ចុះ០,៥ភាគរយ នៅក្នុងឆមាសទីមួយនៃឆ្នាំ២០២៣ ប៉ុន្តែតម្លៃនេះ នឹងកើនឡើងវិញ១,៨ភាគរយពេញមួយឆ្នាំ។

លោក Li Zongguang ប្រធានក្រុមសេដ្ឋវិទូនៅក្រុមហ៊ុន China Renaissance Holdings Limited បានមានប្រសាសន៍ថា សម្រាប់ឆ្នាំ២០២៣ខាងមុខនេះ សន្ទស្សន៍អចលនទ្រព្យត្រូវបានគេរំពឹងថា នឹងមានចំណុចរបត់មួយ ហើយទំនុកចិត្តរបស់អ្នកប្រើប្រាស់ នឹងប្រសើរឡើងវិញជាមួយនឹងសេដ្ឋកិច្ចមានស្ថេរភាពទាំងស្រុង បន្ទាប់ពីមានការកាត់បន្ថយនូវការរឹតបន្តឹងជំងឺកូវីដ១៩។

វិបត្តិនៅក្នុងទីផ្សារអចលនទ្រព្យរបស់ប្រទេសចិន ដែលរួមចំណែកប្រហែលមួយភាគបួន នៃសេដ្ឋកិច្ចទំហំ១៧ពាន់ពាន់លានដុល្លាររបស់ប្រទេសនេះ បានបណ្តាលមកពីការទប់ស្កាត់ជំងឺកូវីដដ៏តឹងរ៉ឹង និងបញ្ហាឧស្សាហកម្មទាំងមូល។

វិធានការគាំទ្រមួយចំនួននាពេលថ្មីៗនេះ រួមមានការពន្យារពេលសងប្រាក់កម្ចី ក្នុងគោលបំណងធ្វើឱ្យប្រសើរឡើង នូវលំហូរសាច់ប្រាក់ងាយស្រួលក្នុងវិស័យអចលនទ្រព្យ បានគាំទ្រដល់អារម្មណ៍នៃទីផ្សារ។

យ៉ាងណាមិញក្រុមអ្នកវិភាគ និងអ្នកសេដ្ឋកិច្ចមានក្តីបារម្ភអំពីការធ្លាក់ចុះនៃតម្លៃផ្ទះ ការរឹតបន្តឹងលើជំងឺកូវីដ និងការពន្យារពេលក្នុងការសាងសង់ដែលនឹងបន្តធ្វើឱ្យតម្រូវការមានការធ្លាក់ចុះ។

ចំណែកឯទំហំនៃការលក់អចលនទ្រព្យ ត្រូវបានគេមើលឃើញថា នឹងធ្លាក់ចុះ៥ភាគរយ នៅក្នុងឆមាសទីមួយនៃឆ្នាំ២០២៣ ពោលគឺទាបជាងការព្យាករណ៍ថា នឹងអាចធ្លាក់ចុះរហូតដល់១៥ភាគរយ នៅក្នុងការស្ទង់មតិកាលពីខែកញ្ញាកន្លងទៅ។

យោងតាមការស្ទង់មតិបានបង្ហាញថា ក្រុមសេដ្ឋវិទូរំពឹងថា ការលក់នឹងធ្លាក់ចុះត្រឹមតែ១ភាគរយប៉ុណ្ណោះ សម្រាប់ឆ្នាំ២០២៣ទាំងមូល។

លោកស្រី Huang Yu អនុប្រធាននៃ ស្ថាប័នស្រាវជ្រាវផ្នែកអចលនទ្រព្យ ឯករាជ្យChina Index Academy បានរំពឹងទុកថា ទីផ្សារនឹងមានស្ថិរភាពជាបណ្តើរៗ ដោយសារវិធានការផ្តល់ហិរញ្ញប្បទាន បានបង្កើននូវទំនុកចិត្ត ប៉ុន្តែលោកស្រីមិនរំពឹងថា វានឹងមានការកើនឡើងឆាប់រហ័សពេកនោះទេ ដោយលោកស្រីសង្កត់ធ្ងន់ លើតម្រូវគោលនយោបាយបន្ថែមទៀតដើម្បីផ្តោតលើតម្រូវការ។

លោកស្រី Huang Yu បានមានប្រសាសន៍បន្ថែមថា គោលនយោបាយគាំទ្រការទិញផ្ទះកាន់តែច្រើន គឺត្រូវការជាចាំបាច់ណាស់ ជាពិសេសគឺសកម្មភាព ដើម្បីបន្ធូរបន្ថយការទប់ស្កាត់ ការទិញផ្ទះមួយចំនួននៅក្នុងបណ្តាទីក្រុងធំៗ៕

តើនៅឆ្នាំ២០២៣នឹងមានអ្វីល្អខ្លះសម្រាប់កម្ពុជា ?

ដោយៈ វឌ្ឍនៈ

ភ្នំពេញៈ ឆ្នាំ២០២៣ជាឆ្នាំមួយ ដែលត្រូវបានគេរំពឹងទុកខ្ពស់ពីការងើបឡើងវិញនៃសេដ្ឋកិច្ច ក៏ដូចជាវិស័យនានា ពិសេសវិស័យពាណិជ្ជកម្មដែលគាំទ្រដល់កំណើនសេដ្ឋកិច្ចប្រទេសនេះ។

គម្រោងធំៗមួយចំនួន ដែលរង់ចាំជាយូរមកហើយនោះ ក៏រំពឹងថា នឹងត្រូវចាប់ផ្ដើមនៅឆ្នាំ២០២៣ដែរខាងមុខនេះដែរ ។ តើឆ្នាំ២០២៣នឹងមានអ្វីល្អខ្លះសម្រាប់កម្ពុជា ?។

ឆ្នាំ២០២៣គម្រោងធំមួយ ដែលពលរដ្ឋកម្ពុជារង់ចាំជាយូរនោះ គឺគម្រោងស្ពានតភ្ជាប់ភ្នំពេញ ទៅអរិយក្សត្រ នឹងបើកការដ្ឋានសាងសង់ជាផ្លូវការ ហើយការចាប់ផ្ដើមសាងសង់ស្ពានតភ្ជាប់ភ្នំពេញ អរិយក្សត្រនេះដែរគឺជាក្ដីរំពឹងខ្ពស់ពីសំណាក់អ្នកអភិវឌ្ឍន៍ ដែលនឹងងាកទៅកាន់ត្រើយខាងកើតនៃទន្លេមេគង្គ ក៏ដូចជាផ្ដល់នូវសេចក្ដីរំពឹងខ្ពស់ ដល់ប្រជាពលរដ្ឋរស់នៅត្រើយខាងកើតទន្លេផងដែរ។

អ្នកជំនាញមើលឃើញថា “ការសាងសង់ស្ពាននេះ នឹងនាំពលរដ្ឋទៅរស់នៅតំបន់ត្រើយខាងកើតកាន់តែច្រើន ខណៈតំបន់នេះនៅមិនឆ្ងាយពីរាជធានីភ្នំពេញប៉ុន្មាននោះទេ”។ អ្នកជំនាញគិតថា “តំបន់អរិយក្សត្រ មានឧបសគ្គ ត្រង់អត់មានស្ពានឆ្លងតែប៉ុណ្ណឹង តែបើសិនជាមានស្ពានឆ្លងនោះ ការអភិវឌ្ឍរវាងត្រើយខាងកើត និងត្រើយខាងលិខនឹងមានភាពប្រកួតប្រជែងគ្នា”។

ឆ្នាំ២០២៣នេះដែរ គម្រោងមួយទៀត ដែលមានទឹកប្រាក់ជាង១,៦ពាន់លានដុល្លារអាមេរិក គឺគម្រោងផ្លូវល្បឿនលឿនភ្នំពេញបាវិត ដែលនឹងត្រូវសាងសង់ នៅពាក់កណ្ដាលឆ្នាំ២០២៣។ គម្រោងនេះ នឹងតភ្ជាប់ប៉ូលសេដ្ឋកិច្ចរវាងភ្នំពេញ និងបាវិត ហើយនឹងនាំការវិនិយោគនានា ទៅកាន់តំបន់ព្រំដែនអន្តរជាតិកម្ពុជា វៀតណាមផងដែរ ។

ឆ្នាំ២០២៣ក៏ជាឆ្នាំ ដែលកម្ពុជារៀបចំនូវព្រឹត្តិការណ៍មួយ ជាប្រវត្តិសាស្ត្រគឺព្រឹត្តិការណ៍កីឡាស៊ីហ្គេម ដែលព្រឹត្តិការណ៍នឹងនាំមក នូវទេសចរអន្តរជាតិមកពីគ្រប់ទិសទី ចូលមកទស្សនានូវការប្រកួតកីឡា ខ្នាតអន្តរជាតិនៅតាមបណ្ដាខេត្តនិងរាជធានីរបស់កម្ពុជា ។ រដ្ឋាភិបាលកម្ពុជា ក៏បាននិងកំពុងត្រៀមរៀបចំព្រឹត្តិការណ៍ ចាប់ពីពេលនេះតទៅរួចហើយដែរ ។

នៅមានព្រឹត្តិការណ៍ និងគំរោងហេដ្ឋារចនាសម្ព័ន្ឋធំៗជាច្រើនទៀតនឹងត្រូវប្រកាស និងចាប់ផ្តើមសាងសង់ ហេតុនេះប្រសិនជាអ្វីៗមានភាពប្រសើរ ពិសេសសេដ្ឋកិច្ចពិភពលោករីកចម្រើន មិនជួបវិបត្តិច្បាស់ណាស់អ្វីៗ នឹងមានភាពប្រសើរឡើង។

លោកខន គង្គា អគ្គនាយកនៃក្រុមហ៊ុន ERA Cambodia ក៏បានលើកឡើងផងដែរថា ឆ្នាំ២០២៣ និង២០២៤ លោករំពឹងថាវិស័យអចលនទ្រព្យ ជាពិសេសទីផ្សារខុនដូ នៅក្នុងប្រទេសកម្ពុជា នឹងមានសន្ទុះឡើងវិញ ក្រោយពីកម្ពុជា បានរៀបចំព្រឹត្តិការណ៍អន្តរជាតិពីរសំខាន់ និងមានវត្តមានភ្ញៀវអន្តរជាតិ ជាពិសេសមេដឹកនាំពិភពលោកជាច្រើន ចូលរួមផងដែរនោះ ។

សរុបសេចក្ដីមកឆ្នាំ២០២៣ តទៅបើមិនមានអ្វីរារាំងថ្មីៗទៀតនោះទេ វាគឺជាឆ្នាំដែលកម្ពុជា ក៏ដូចជា ពិភពលោកនឹងទទួលបាននូវសញ្ញាវិជ្ជមាននៃការវិនិយោគ សេដ្ឋកិច្ចនិងការធ្វើពាណិជ្ជកម្មជាមួយគ្នាឡើងវិញ ដូចដែលមុនពេលដែលពិភពលោកនេះ មានវិបត្តិកូវីដ១៩អញ្ចឹងដែរ។

លោកបណ្ឌិតBen Li ប្រធានក្រុមប្រឹក្សាភិបាលនៃគំរោងUrban Village ដែលជាគំរោងមានទស្សនទានចម្រុះ និងការអភិវឌ្ឍស្តង់ដារស់នៅបែបសហគមន៍ដំបូងគេ នៅរាជធានីភ្នំពេញ បានមានប្រសាសន៍កាលពីពេលថ្មីៗនេះថា “ខ្ញុំស្ទើរមិនអាចរង់ចាំ ក្នុងការទៅអង្គុយទស្សនាពិធីបើកកីឡាស៊ីហ្គេមនៅឆ្នាំ២០២៣ខាងមុខនេះ”។

លោកបន្តថា “កម្ពុជា ជាប្រទេសមួយមានសេដ្ឋកិច្ចរីកចម្រើន និងជាប្រទេសមួយស្ថិតក្នុងតំបន់អាស៊ាន ដែលសេដ្ឋកិច្ចមានការរីកចម្រើនលឿន”។ លោកបន្តថា “ប្រសិនជាអ្នកមានប្រាក់ សូមចាប់ផ្តើមវិនិយោគលើអចលនទ្រព្យ ព្រោះវិស័យនេះនឹងរីកចម្រើនរយៈពេលវែងបន្ថែមទៀត”៕

ក្រុមហ៊ុនអាកាសចរណ៍ Air Canada គ្រោងបើកជើងហោះហើរត្រង់ទៅកាន់ប្រទេសថៃក្នុងខែធ្នូខាងមុខនេះ

ដោយ: លាងហួរ

បាងកក: ក្រុមហ៊ុន Air Canada បានប្រកាសថា ខ្លួននឹងបើកជើងហោះហើរត្រង់ ទៅកាន់ទីក្រុងបាងកក នៅខែក្រោយនេះ ដែលនឹងបង្កជាភាពងាយស្រួល សម្រាប់អ្នកធ្វើដំណើររវាងប្រទេសឡាវ និងអាមេរិកខាងជើង។

ជាមួយនឹងសហគមន៍ជនជាតិឡាវដ៏ធំ ដែលបានតាំងលំនៅទាំងនៅកាណាដា និងសហរដ្ឋអាមេរិក ជម្រើសជើងហោះហើរត្រង់ថ្មីនេះ អាចមានប្រយោជន៍ សម្រាប់អ្នកដែលមកលេងគ្រួសារ ឬធ្វើដំណើរសម្រាប់អាជីវកម្មរវាងទ្វីបទាំងពីរ។

ជំនួសឱ្យការឈប់សំចត និងពេលវេលាធ្វើដំណើរយូរ ទៅកាន់តៃវ៉ាន់ ហុងកុង ឬកូរ៉េខាងត្បូង ពេលវេលាហោះហើររវាងទីក្រុងវៀងចន្ទន៍ និងបាងកក ត្រូវចំណាយពេលតិចជាងមួយម៉ោងប៉ុណ្ណោះ ហើយមានជើងហោះហើរជាច្រើន ជារៀងរាល់ថ្ងៃរវាងប្រទេសទាំងពីរ។

សេវាកម្មហោះហើរត្រង់ជាលើកដំបូង រវាងអាមេរិកខាងជើង និងប្រទេ សថៃ ក្នុងរយៈពេលដប់ឆ្នាំ យន្តហោះ Boeing 787-9 Dreamliner នឹងហោះហើរពីទីក្រុង Vancouver ទៅកាន់អាកាសយានដ្ឋានសុវណ្ណភូមិ ទីក្រុងបាងកកចំនួន៤ដងក្នុងមួយសប្តាហ៍។

ការប្រកាសនេះត្រូវបានធ្វើឡើង បន្ទាប់ពីនាយករដ្ឋមន្រ្តីកាណាដាលោកJustin Trudeau បានទៅជួបពិភាក្សាជាមួយនាយករដ្ឋមន្ត្រីថៃលោក ប្រាយុទ្ធ ចាន់អូចា ក្នុងអំឡុងកិច្ចប្រជុំកំពូល នៃកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) ដែលប្រព្រឹត្តទៅចាប់ពីថ្ងៃទី១៦ដល់ទី១៩ខែវិច្ឆិកា។

ថ្នាក់ដឹកនាំនៃប្រទេសទាំងពីរ បានពិភាក្សាអំពីការចាប់ផ្តើមកិច្ចព្រមព្រៀងពាណិជ្ជកម្មសេរីកាណាដា -អាស៊ាន ដើម្បីបង្កើនឱកាសការងាររវាងប្រជាជាតិទាំងពីរ និងជំរុញដល់វិស័យទេសចរណ៍ផងដែរ៕

អង្គការហ្វាពន្លឺសិល្បៈបានបំបែកឯកទគ្គកម្មពិភពលោកលើការសម្តែងសៀកបានយូរជាងគេ

ដោយៈ គង់ សូរិយា

ភ្នំពេញៈ លោកបណ្ឌិត ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងទ័ពជើងគោក បានសម្តែងការអបអរសាទរដល់ក្រុមសៀកអង្គការហ្វារពន្លឺសិល្បៈ ដែលបានបំបែកឯកទគ្គកម្មពិភពលោក លើការសម្តែងសៀកមានរយៈពេលយូរជាងគេ។

ក្រុមសៀកអង្គការហ្វារពន្លឺសិល្បៈរបស់កម្ពុជា បានព្យាយាមបង្កើតកំណត់ត្រាពិភពលោកហ្គីណេស (Guinness) ដោយសម្តែងសៀកជាប់រហូតរយៈពេលជាង២៤ម៉ោង។ ការសម្តែងនោះ បានធ្វើឡើងតាំងពីឆ្នាំ២០២១ ប៉ុន្តែអង្គការ Guinness World Records ទើបនឹងប្រកាសនៅថ្ងៃព្រហស្បតិ៍ ទី១៧ ខែវិច្ឆិកានេះ។

អង្គការហ្វារពន្លឺសិល្បៈ បានឱ្យដឹងថា ការសម្តែងសៀករបស់ខ្លួន បានធ្វើឡើងនៅក្រុងបាត់ដំបង ដែលមានរយៈពេលសរុប២៤ម៉ោង ១០នាទី និង៣០វិនាទី គឺជាកិច្ចខិតខំប្រឹងប្រែងចុងក្រោយ ដើម្បីកៀរគរថវិកាដើម្បីរស់រានមានជីវិតពីជំងឺរាតត្បាត។

អង្គការ Guinness បានប្រកាសកំណត់ត្រាពិភពលោក “ការសម្តែងសៀកវែងបំផុង” ឱ្យក្រុមសៀកហ្វារពន្លឺសិល្បៈនេះ ក្នុងការផ្សាយផ្ទាល់នៅថ្ងៃព្រហស្បតិ៍ ម្សិលមិញនេះ។

អង្គការហ្វាពន្លឺសិល្បៈត្រូវបានបង្កើតឡើង ដោយជនភៀសខ្លួនកម្ពុជា និងជនរងគ្រោះ ពីអំពើប្រល័យពូជសាសន៍ខ្មែរក្រហម ដើម្បីជួយគ្រួសារកម្ពុជាឱ្យចេញពីភាពក្រីក្រ និងដើម្បីថែរក្សាវប្បធម៌កម្ពុជា។

មន្រ្តីអង្គការ Guinness World Records បាននិយាយថា ក្រុមសៀកកម្ពុជា បានជួយកុមារជួបការលំបាកជាង៨០០នាក់ ហើយបានចាត់វិធានការប្រកបដោយការច្នៃប្រឌិត ក្នុងមួយទសវត្សរ៍ចុងក្រោយនេះ ដើម្បីជៀសវាងការពឹងផ្អែកលើអំណោយ ដោយបង្កើតសៀកមិនប្រើសត្វ និងកន្លែងទេសចរណ៍ដ៏ពេញនិយមមួយ ដែលបានផ្តល់មូលនិធិទ្រទ្រង់កម្មវិធីជួយសង្គ្រោះប្រជាពលរដ្ឋក្រីក្ររបស់ពួកគេ។

កំណត់ត្រាពិភពលោក “ការសម្តែងសៀកវែងបំផុត”នេះ ត្រូវបានបញ្ចូលទៅក្នុងបញ្ជី កំណត់ត្រាពិភពលោកផ្សេងទៀតរបស់កម្ពុជា រួមមាន ក្រមាវែងជាងគេបំផុត នំអន្សមធំជាងគេបំផុត អក្ខរក្រមច្រើនជាងគេបំផុត និងអគារសាសនាធំជាគេបំផុតគឺប្រាសាទអង្គរវត្ត៕