ភ្នំពេញ, ថ្ងៃទី ៣០ ខែមិថុនា ឆ្នាំ២០២៥ – ធនាគារ ហត្ថា ដែលជាសម្ព័ន្ធហិរញ្ញវត្ថុអន្តរជាតិ MUFG (Mitsubishi UFJ Financial Group) បានបន្ថែមដើមទុនថ្មីចំនួន ៨០លាន ដុល្លារអាមេរិក ដែលធ្វើអោយដើមទុនសរុបរបស់ធនាគារ ហត្ថា បានកើនឡើងដល់ ២២០ លាន ដុល្លារអាមេរិក ដើម្បីគាំទ្រដល់ការរីកចម្រើនអាជីវកម្មរបស់ខ្លួន ។ ការវិនិយោគទុនបន្ថែម បញ្ជាក់ឲ្យឃើញថាធនាគារ ហត្ថា នៅតែបន្តរីកចម្រើនជាមួយនឹងចក្ខុវិស័យយូរអង្វែងនៃប្រតិបត្តិការអាជីកម្មរបស់ខ្លួនក្នុងប្រទេសកម្ពុជា។

ការវិនិយោគទុននេះ ជាសក្ខីភាពថ្មីមួយទៀត ដែលមានតម្លៃដ៏វិសេសវិសាល និងការតាំងចិត្តដ៏មុតមាំរបស់     ភាគទុនិករបស់ធនាគារ ហត្ថា គឺ MUFG ក្នុងការផ្លាស់ប្តូរផ្នែកហិរញ្ញវត្ថុនៅក្នុងតំបន់អាស៊ាន។ សម្រាប់កាបន្ថែមទុននេះ គឺជាចំណុចសំខាន់មួយក្នុងការជំរុញដល់ការពង្រីកសេវាកម្មរបស់ធនាគារ ហត្ថា ទៅដល់អតិថិជននៅគ្រប់វិស័យរួមមាន អតិថិជនជាលក្ខណៈបុគ្គល សហគ្រាសខ្នាតតូច និងមធ្យម (SME) ព្រមទាំងស្ថាប័នសាអាជីវកម្មធំៗជាច្រើនទៀត។ នេះបញ្ជាក់ឲ្យឃើញថាធនាគារ ហត្ថា ការប្តេជ្ញាចិត្តខ្ពស់ក្នុងបន្តធ្វើអាជីវកម្មប្រកបដោយចេរភាព ដែលមានចក្ខុវិស័យអាជីវកម្មច្បាស់លាស់ និងរក្សាជំហរដ៏រឹងមាំនៅក្នុងទីផ្សារហិរញ្ញវត្ថុនៃប្រទេស       កម្ពុជា។

លោក មិន សុផា ប្រធាននាយកប្រតិបត្តិនៃធនាគារ ហត្ថា បានមានប្រសាសន៍ថា៖ “ការវិនិយោគទុនថ្មីចំនួន ៨០ លាន ដុល្លារអាមេរិកពីម្ចាស់ភាគទុនិក  គឺពិតជាមានសារៈសំខាន់ និងទាន់ពេលវេលាដើម្បីគាំទ្រដល់ការពង្រីកអាជីវកម្មរបស់ខ្លួនទៅចាប់យកអតិថិជនជាលក្ខណៈបុគ្គល សហគ្រាសខ្នាតតូច និងមធ្យម (SME) ព្រមទាំងស្ថាប័នសាអាជីវកម្មធំៗជាច្រើនទៀត។” លោកបន្ថែមថា៖ “ ការវិនិយោគទុននេះ  គឺជាការបង្ហាញយ៉ាងច្បាស់លាស់នៃការប្តេជ្ញាចិត្តដ៏មុតមាំ និងភាពជឿជាក់របស់ភាគទុនិក ក្នុងការអភិវឌ្ឍវិស័យហិរញ្ញវត្ថុ និងសេដ្ឋកិច្ចនៅកម្ពុជា ព្រមទាំងក្នុងតំបន់អាស៊ានទាំងមូលផងដែរ។”

“ការដាក់បញ្ចូលដើមទុនបន្ថែមថ្មីនេះ គឺជាជំហានជោគជ័យដ៏ធំមួយទៀតសម្រាប់ធនាគារ ហត្ថា ហើយបានបញ្ជាក់យ៉ាងច្បាស់ពីតួនាទីដ៏សំខាន់របស់ធនាគារ ហត្ថា នៅក្នុងតំបន់អាស៊ាន។ ភាពជោគជ័យនេះ កើតឡើងបានដោយសារការគាំទ្រ និងការជឿទុកចិត្តយ៉ាងខ្លាំង ព្រមទាំងការសហការយ៉ាងពេញទំហឹងពីអ្នកពាក់ព័ន្ធ ទាំងអស់។”

អំពី ធនាគារ ហត្ថា៖

ធនាគារ ហត្ថា ជាធនាគារពាណិជ្ជ ដែលមានវត្តមាននៅក្នុងព្រះរាជាណាចក្រកម្ពុជាអស់រយៈកាលជាង ៣០ឆ្នាំមកហើយ ដែលបានផ្តល់ជូនសេវាហិរញ្ញវត្ថុយ៉ាងទូលំទូលាយ ដល់អតិថិជនរបស់ខ្លួន ដែលរួមានអតិថិជនជាលក្ខណៈបុគ្គល សហគ្រាសខ្នាតតូច និងមធ្យម (SME) ព្រមទាំងស្ថាប័នសាអាជីវកម្មធំៗជាច្រើនទៀត។ ហត្ថា ជាធនាគារពាណិជ្ជឈានមុខគេមួយក្នុងប្រទេសកម្ពុជា ដែលមានតាមបណ្ដាញសាខាយ៉ាងទូលំទូលាយរហូតដល់ ១៥៦ សាខា គ្របដណ្តប់ទូទាំងប្រទេស។ ធនាគារ ហត្ថា បានទទួលការវាយតម្លៃជាស្ថាប័នមានស្ថិរភាពហិរញ្ញវត្ថុរឹងមាំ តាមរយៈការរក្សាបាននូវចំណាត់ថ្នាក់ BBB+ អស់រយៈពេល ០៧ឆ្នាំជាប់គ្នា ពីក្រុមហ៊ុន TRIS Rating ដែលចំណាត់ថ្នាក់នេះសបញ្ជាក់ឱ្យឃើញថា ធនាគារ ហត្ថា មានដំណើរការមុខជំនួញរបស់ខ្លួនប្រកបដោយស្ថិរភាព និងឈានមុខគេនៅក្នុងទីផ្សារហិរញ្ញវត្ថុកម្ពុជា។ ជាងនេះទៅទៀត ធនាគារ ហត្ថា មានមូលធនគ្រប់គ្រាន់ ស្ថិរភាពផ្នែកហិរញ្ញវត្ថុខ្ពស់ ព្រមទាំងមានសាច់ប្រាក់បង្វិលគ្រប់គ្រាន់ ដែលអាចធានាបាននូវការបន្តប្រតិបត្តិការអាជីវកម្មដោយរលូន។ ភាពរឹងមាំផ្នែកហិរញ្ញវត្ថុនេះ ទទួលបានការគាំទ្រយ៉ាងពេញទំហឹងពីធនាគារអាណាព្យាបាល គឺ MUFG ដែលជាសម្ព័ន្ធហិរញ្ញវត្ថុធំមួយ ដែលមានសាខាប្រហែល ​២000 ទីតាំង ស្ថិតនៅក្នុងទីផ្សារជាង ៤០ ក្នុងពិភពលោក។ សម្ព័ន្ធក្រុមហ៊ុនផ្តល់សេវាកម្មហិរញ្ញវត្ថុ MUFG បានការចុះបញ្ជីនៅលើផ្សារហ៊ុន (Tokyo Stock Exchange), ណាហ្គូយ៉ា (Nagoya Stock Exchange) និងញូយ៉ក (New York Stock Exchange) ដោយមានតម្លៃទីផ្សារ និងមានតម្លៃទីផ្សាររហូតដល់ ២៤.២៧ កោដិយាន់ និងប្រាក់ចំណេញសុទ្ធចំនួន ១.៥៩១,១ ពាន់លានយាន់ នៅត្រឹមចុងខែមីនា ឆ្នាំ ២០២៥។

ដោយ: គង់ លាងហួរ
អន្តរជាតិ: រដ្ឋាភិបាលវៀតណាមបានស្នើឱ្យរដ្ឋសភាអនុម័តយល់ព្រមចំពោះការចូលរួមបណ្តាក់ទុនវិនិយោគរបស់វិស័យឯកជននៅក្នុងគម្រោងផ្លូវរថភ្លើងល្បឿនលឿនខ្នាតយក្ស ដែលតភ្ជាប់រវាងរដ្ឋធានីហាណូយ និងទីក្រុងហូជីមិញ ក្រោមទំហំទឹកប្រាក់ចំនួន៦១ពាន់លានដុល្លារ។

នៅទូទាំងពិភពលោក ជាធម្មតា គម្រោងផ្លូវដែកត្រូវបានផ្តល់មូលនិធិដោយរដ្ឋាភិបាលដោយសារតែការចំណាយទុនវិនិយោគខ្ពស់ និងត្រូវការរយៈពេលយូរដើម្បីស្រង់ដើម។ បណ្តាប្រទេសមួយចំនួនប្រើប្រាស់គំរូភាពជាដៃគូរវាងសាធារណៈ និងឯកជន (PPP)។ប៉ុន្តែការគាំទ្ររបស់រដ្ឋនៅតែមានភាពចាំបាច់។

កាលពីខែឧសភា ក្រុមហ៊ុនឯកជនខ្នាតយក្ស VinSpeed ​​របស់មហាសេដ្ឋីវៀតណាមលោក Pham Nhat Vuong បានស្នើសុំសាងសង់ផ្លូវរថភ្លើងល្បឿនលឿននេះ ដោយប្តេជ្ញាផ្តល់មូលនិធិចំនួន២០ភាគរយនៃទំហំទុនវិនិយោគសរុបចំនួន៦១ពាន់លានដុល្លារ និងខ្ចីដើមទុនចំនួន៨០ភាគរយទៀតពីរដ្ឋាភិបាល។

យ៉ាងណាមិញ ក្រុមហ៊ុន VinSpeed បានស្នើសុំកុំឱ្យរដ្ឋាភិបាលគិតអត្រាការប្រាក់លើប្រាក់កម្ចីចំនួន៨០ភាគរយនេះ ដោយសន្យាទូទាត់សងត្រឡប់វិញក្នុងរយៈពេល៣៥ឆ្នាំ។

ក្រុមហ៊ុនក៏បានស្នើសុំការជួយសម្រួលពីរដ្ឋាភិបាលលើការទិញដី សិទ្ធិអភិវឌ្ឍន៍អចលនទ្រព្យនៅជិតស្ថានីយ៍រថភ្លើង ការលើកទឹកចិត្តពន្ធ អាជ្ញាប័ណ្ណគ្រប់គ្រងប្រតិបត្តិការរយៈពេល៩៩ឆ្នាំ និងស្នើសុំកំណត់តម្លៃសំបុត្ររថភ្លើងឱ្យថោកជាងតម្លៃសំបុត្រយន្តហោះ។

ចំណែក ក្រុមហ៊ុនផលិតរថយន្ត Thaco Group ក៏បានដាក់សំណើស្រដៀងគ្នានេះផងដែរ។ ក្រុមហ៊ុន Thaco Group បានប្តេជ្ញាបោះទុនចំនួន២០ភាគរយនៃទុនវិនិយោគសរុបចំនួន៦១ពាន់លានដុល្លារ និងស្វែងរកទុនចំនួន៨០ភាគរយទៀតពីប្រភពក្នុងស្រុក និងបរទេស។

ក្រុមហ៊ុន Thaco Group ក៏បានស្នើឱ្យរដ្ឋាភិបាលជួយសម្រួលដល់ការទិញដី ការតាំងទីលំនៅថ្មីរបស់ប្រជាជនដែលរងផលប៉ះពាល់ ព្រមទាំងស្នើសុំការជួយធានាលើប្រាក់កម្ចី និងស្នើឱ្យរដ្ឋាភិបាលជួយបង់អត្រាការប្រាក់រយៈពេល៣០ឆ្នាំ។

ក្រុមហ៊ុន Thaco បានអះអាងថា ខ្លួននឹងបង្កើតក្រុមហ៊ុនបុត្រសម្ព័ន្ធមួយ ដើម្បីគ្រប់គ្រងគម្រោងនេះ ប្រសិនបើទទួលបានការអនុម័តយល់ព្រមពីរដ្ឋាភិបាល៕ប្រភព: Vnexpress៕

ដោយៈ សហការី

ភ្នំពេញៈ ដើម្បីការពារ និងជួយលើកកម្ពស់វារីវប្បកម្មនៅកម្ពុជា ក្រសួងកសិកម្ម រុក្ខាប្រមាញ់ និងនេសាទ បានចាប់ផ្ដើមរឹតបន្តឹងលើការនាំត្រីចូលពីក្រៅប្រទេស។

ក្រសួងកសិកម្ម រុក្ខាប្រមាញ់ និងនេសាទ បានសម្រេចថា ត្រីដែលនឹងត្រូវបានអនុញ្ញាតឱ្យនាំចូលមកកម្ពុជា គឺជាប្រភេទត្រីដែលមិនមានការចិញ្ចឹម ឬមិនអាចផលិតនៅក្នុងស្រុកបាន ឬការផលិតនៅក្នុងស្រុកមិនអាចបំពេញតម្រូវការទីផ្សារជាក់ស្ដែងបាន រីឯអ្នកនាំចូលទៀតសោតត្រូវតែទិញត្រីផលិតក្នុងស្រុកឱ្យអស់ជាមុនសិន មុននឹងស្នើសុំការអនុញ្ញាតនាំចូលបន្ថែម ហើយការនាំចូលក៏ត្រូវអនុលោមទៅតាមបរិមាណដែលក្រសួងអនុញ្ញាត ប៉ុន្តែជាក់ស្តែងក្រសួងកសិកម្មហាក់មិនមានយន្តការតម្លាភាពដែលបញ្ជាក់អំពីលទ្ធភាព នៃការចិញ្ចឹមធនធានត្រីនៅក្នុងស្រុកនោះឡើយ។

សេចក្ដីសម្រេចនេះធ្វើឡើងក្នុងកិច្ចប្រជុំក្រុមការងារផ្នែកកសិកម្ម កសិ-ឧស្សាហកម្ម នៃវេទិការាជរដ្ឋាភិបាល-ផ្នែកឯកជន នៅទីស្តីការក្រសួងកសិកម្ម រុក្ខាប្រមាញ់ និងនេសាទ ក្រោមអធិបតីភាពលោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងឧកញ៉ា ម៉ុង រិទ្ធថា សហប្រធានក្រុមការងារផ្នែកកសិកម្ម កសិ-ឧស្សាហកម្មផ្នែកឯកជនកាលពីរសៀលថ្ងៃអង្គារ ទី២៤ ខែមិថុនា ដើម្បីពិភាក្សា និងស្វែងរកដំណោះស្រាយ សម្រាប់អ្នកប្រកបមុខរបរវារីវប្បកម្មនៅកម្ពុជា។

យោងតាមក្រសួងកសិកម្មឱ្យដឹងថា ផលវារីវប្បកម្មនៅកម្ពុជា ក្នុងឆ្នាំ២០២៤ ទទួលបានប្រមាណ៣សែន២ម៉ឺនតោន ហើយកាលពីឆ្នាំ២០២០ កម្ពុជា ធ្លាប់នាំត្រីចូលចំនួនប្រមាណ ១ម៉ឺន ៧ពាន់ ៤០០តោន។

ទោះជាយ៉ាងណា សមាជិកសមាគអ្នកផ្គត់ផ្គង់ត្រីនៅកម្ពុជា បានបង្ហាញក្ដីបារម្ភចំពោះសេចក្ដីសម្រេចរបស់ក្រសួង ក្នុងការរឹតបន្តឹងលើការនាំត្រីចូលពីក្រៅប្រទេសនេះ ដោយសមាគមបានលើកឡើងពីក្ដីកង្វល់ជុំវិញកង្វះតម្លាភាព នៃកូតាអនុញ្ញាតឱ្យនាំត្រីចូល ជាហេតុដែលអាចធ្វើឱ្យត្រីឡើងថ្លៃ ហើយការផ្គត់ផ្គង់ត្រីក្នុងស្រុកមិនគ្រប់តាមតម្រូវការជាក់ស្ដែង ដោយបង្កការលំបាកដល់ប្រជាពលរដ្ឋដែលជាអ្នកប្រើប្រាស់ផ្ទាល់។

សមាជិកសមាគមអ្នកផ្គត់ផ្គង់ត្រីនៅកម្ពុជា ដែលជាអ្នកនាំចូលផ្គត់ផ្គង់ត្រីនៅកម្ពុជា បានសំណូមពរឱ្យក្រសួងកសិកម្មពិនិត្យមើលឡើងវិញនូវសេចក្ដីសម្រេច រឹតបន្តឹងការនាំត្រីចូលពីក្រៅប្រទេស ពីព្រោះកូតាអនុញ្ញាតឱ្យក្រុមហ៊ុននាំត្រីចូលតិចជាងចំនួនដែលខ្លួនបានស្នើសុំតាមទំហំតម្រូវការទីផ្សារ បានធ្វើឱ្យពួកគាត់មិនអាចផ្គត់ផ្គង់ទាន់តម្រូវការជាក់ស្ដែងនៅលើទីផ្សារ ដែលជាលទ្ធផលធ្វើឱ្យត្រីឡើងថ្លៃ និងទម្លាក់បន្ទុកបន្ថែមទៅលើពលរដ្ឋ។

ក្រុមសមាជិកសមាគមបានបង្ហើបឱ្យដឹងថា ការកំណត់កូតាដែលក្រុមហ៊ុនអាចនាំត្រីចូលបាន ក្នុងចំនួនជាក់លាក់កំណត់ដោយក្រសួង គឺតិចជាងចំនួនដែលអ្នកនាំចូលបាន ស្នើសុំតាមតម្រូវការទីផ្សាររបស់ខ្លួន ព្រោះទាល់តែសុំតាមចំនួនដែលក្រសួងកំណត់ ទើបគេអនុញ្ញាត តែបើសុំក្នុងចំនួនដែលក្រសួងកំណត់ គឺស្មើនឹងយល់ព្រមបាត់ទីផ្សាររបស់ខ្លួន ហើយបើរក្សាទីផ្សារខ្លួន គឺត្រូវដឹកចូលលើសចំនួនដែលក្រសួងអនុញ្ញាត នោះត្រូវប្រឈមផ្លូវច្បាប់ ហើយនៅពេលដែលពួកយើងខ្ញុំលែងនាំចូលបាន ពេលនោះទីផ្សារនាំចូលត្រី នឹងត្រូវក្រឡុកដោយក្រុមអាជីវករថ្មីហើយ ព្រោះដោយសារតែតាមការពិតគឺប្រជាកសិករក្នុងស្រុក មិនទាន់មានលទ្ធភាពចិញ្ចឹមផ្គត់ផ្គង់តម្រូវការទីផ្សារបាននៅឡើយទេ ហើយវាក៏នឹងធ្វើឱ្យត្រីនៅក្នុងស្រុកឡើងថ្លៃផងដែរ។

សរុបមក បណ្ដាក្រុមហ៊ុននាំត្រីចូលបានស្នើសុំក្រសួងកសិកម្មអនុញ្ញាតឱ្យនាំត្រីចូលក្នុងចំនួនសមស្រប សម្រាប់បំពេញតម្រូវការទីផ្សារដែលទទួលការបញ្ជាទិញ ដោយហ៊ានធានាថាផ្តល់អាទិភាពជួយប្រមូលទិញផលិតផល ដែលចិញ្ចឹមបានក្នុងស្រុកក្នុងតម្លៃទីផ្សារ តែបើក្រសួងនៅតែកំណត់ចំនួនបែបនេះ ក្រុមហ៊ុនហ៊ានដឹកចូលគឺខុសច្បាប់ បំពានសេចក្ដីសម្រេចរបស់ក្រសួង ទោះដើម្បីរក្សាទីផ្សាររបស់ខ្លួនក្តី នោះប្រាកដជាខុសច្បាប់ តែបើមិនដឹកចូលគឺបាត់បង់ទីផ្សារ ស្មើនឹងចែកទីផ្សារឱ្យក្រុមហ៊ុនខុសច្បាប់ផ្សេងៗទៀតយ៉ាងអយុត្តិធ៌ម។

ទាក់ទិននឹងក្ដីកង្វល់ ដែលខ្លាចការនាំត្រីចូលពីក្រៅប្រទេសជោរជន់នៅក្នុងស្រុកខ្លាំងពេក ដែលជះផលប៉ះពាល់ដល់អ្នកប្រកបរបរវារីវប្បកម្មនៅកម្ពុជា សមាជិកសមាគមអ្នកផ្គត់ផ្គង់ត្រីនៅកម្ពុជា បានបញ្ជាក់ថា សមាគមរីករាយនឹងជួយប្រមូលទិញត្រី និងផលិតផលវារីវប្បកម្មផ្សេងៗទាំងអស់នៅកម្ពុជា ស្របតាមគោលការណ៍របស់ក្រសួងដើម្បីរួមចំណែកជាមួយរាជរដ្ឋាភិបាល ក្រោមការដឹកនាំដ៏ឈ្លាសវៃប្រកបដោយចក្ខុវិស័យវែងឆ្ងាយរបស់ សម្ដេចបវរមហាធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងការលើកកម្ពស់កម្រិតជីវភាពរបស់ប្រជាពលរដ្ឋ សំដៅកាត់បន្ថយភាពក្រីក្រ ស្របពេលដែលកម្ពុជា កំពុងត្រៀមខ្លួនចាកចេញពីប្រទេសអភិវឌ្ឍន៍តិចតួចនៅឆ្នាំ២០២៩ ខាងមុខនេះ។

ដូចនេះ សមាជិកសមាគមអ្នកផ្គត់ផ្គង់ត្រីនៅកម្ពុជា ដែលជាក្រុមហ៊ុននាំចូលផ្គត់ផ្គង់ត្រី សង្ឃឹមយ៉ាងមុតមាំថា ក្រសួងកសិកម្ម និងថ្នាក់ដឹកនាំនឹងគិតគូរពីបញ្ហានេះឡើងវិញ ដោយក្ដីអនុគ្រោះ ដើម្បីលើកកម្ពស់ការប្រកួតប្រជែងដោយស្មើភាពក្នុងវិស័យឯកជន។

ជាចុងក្រោយ ក្រុមហ៊ុនដែលជាសមាជិកទាំងអស់នៃសមាគមអ្នកផ្គត់ផ្គង់ត្រីនៅកម្ពុជា ក៏ស្នើសុំឱ្យក្រសួងកសិកម្មជួយចង្អុលបង្ហាញថា ប្រភេទត្រីណាខ្លះដែលកំពុងនាំចូលពេលបច្ចុប្បន្នអាចផលិតបានក្នុងស្រុក ដើម្បីឱ្យក្រុមហ៊ុនទៅប្រមូលទិញមកបង្គ្រប់ទីផ្សាររបស់ខ្លួន មុននឹងកាត់បន្ថយបរិមាណដែលលិខិតរបស់ក្រសួងមិនអនុញ្ញាតឱ្យនាំចូល។ យើងខ្ញុំដែលជាសមាជិកនៃសមាគមអ្នកផ្គត់ផ្គង់ត្រីនៅកម្ពុជា ប្ដេជ្ញានឹងមិននាំចូលប្រភេទត្រីដែលផលិតបានក្នុងស្រុកដែលគ្រប់តម្រូវការឡើយ៕