ដោយ: លាងហួរ

បាងកក: តម្លៃដីទំនេរនៅក្នុងទីក្រុងបាងកក មានកំណើនយឺត ដោយ សារសេដ្ឋកិច្ចធ្លាក់ចុះ និងការប្រមូលពន្ធដីនិងអគារ ដែលបានចាប់  ផ្តើមនៅឆ្នាំ២០២២នេះ។

លោក Vichai Viratkapan អគ្គនាយកស្តីទីនៃមជ្ឈមណ្ឌលព័ត៌មានអចលនទ្រព្យ (REIC) បាននិយាយថា សន្ទស្សន៍តម្លៃដីទំនេរ នៅទីក្រុងបាងកកគឺ ៣៥៤,៥ភាគរយ នៅក្នុងត្រីមាសទីពីរនៃឆ្នាំនេះ កើនឡើង៤ភាគរយពីត្រីមាសទីមួយ។

លោកបន្តថា តម្លៃ ដី ទំនេរ បន្ត កើន ឡើង ជាប់ គ្នា ប៉ុន្តែ ក្នុង ល្បឿន យឺត ជាង បើ ធៀប នឹង កំណើន មធ្យម ប្រចាំ ឆ្នាំ១៤,៨% ចន្លោះ ឆ្នាំ២០១៥ដល់ឆ្នាំ២០១៩។

កត្តាសំខាន់មួយដែលនាំឱ្យតម្លៃដីធ្លាក់ចុះ គឺកត្តាសេដ្ឋកិច្ចដែលបណ្តាលមកពីជំងឺរាតត្បាត ដែលកាន់តែអាក្រក់ទៅ និងសង្គ្រាមអ៊ុយក្រែន និងរុស្ស៊ី ដែលមានន័យថា សេដ្ឋកិច្ចថៃមានកំណើនទាបជាងការរំពឹងទុក។

លោក vichai បានបន្ថែមថា អ្នកអភិវឌ្ឍន៍ជាច្រើនបានបន្ថយល្បឿននៃការទិញដី ដោយសារតម្លៃដីឡើងថ្លៃ ជាងមុនបន្ទាប់ពីរដ្ឋចាប់ផ្តើមប្រមូលពន្ធលើដី និងអគារ១០០ភាគរយនៅឆ្នាំ២០២២នេះ ពី១០ភាគរយពីឆ្នាំ២០២០ដល់ឆ្នាំ២០២១៕

ដោយ៖ សុខុម

ហាណូយ: នៅក្នុងទ្រឹស្តីជំនួញ អ្នកដែលក្ដាប់ឱកាសវិនិយោគបានមុនគេ គឺមានឱកាសចំណេញមុនគេ ហើយថែមទាំងអាចចំណេញច្រើនទៀតផង ជាពិសេសក្នុងវិស័យអចលនទ្រព្យ។ ទោះជាយ៉ាងណា អ្នកវិនិយោគត្រូវធ្វើការសិក្សាឱ្យបានគ្រប់ជ្រុងជ្រោយជាមុនសិន បើមិនដូច្នោះទេ នឹងប្រឈមហានភ័យធំ។

ក្រុមអ្នកជំនាញព្រមានថា ក្រុមហ៊ុនសហគ្រាស និងបុគ្គលដែលស្វែងរកប្រាក់ចំណេញពីការវិនិយោគលើដីធ្លី និងអចលនទ្រព្យក្នុងតំបន់នានាដែលនៅជិតគម្រោងហេដ្ឋារចនាសម្ព័ន្ធ មិនគួរប្រញាប់ប្រញាល់បោះទុនវិនិយោគលឿនពេកទេ ពោលគឺគួរតែសិក្សាអំពីគម្រោងទាំងនោះឱ្យបានច្បាស់លាស់សិនដើម្បីបង្ការហានិភ័យ។

តួយ៉ាងកាលពីពេលថ្មីៗនេះ គម្រោងសាងសង់ផ្លូវក្រវាត់ក្រុងលេខ៤ ក្នុងទីក្រុងហាណូយ ប្រទេសវៀតណាម បានក្លាយជាចំណុចផ្ដោតការចាប់អារម្មណ៍របស់បណ្ដាអ្នកវិនិយោគ នៅពេលតម្លៃដីធ្លីក្នុងតំបន់ដែលផ្លូវនេះរត់កាត់កំពុងបន្តហក់ឡើងថ្លៃស្រឺតៗ។ នេះបើយោងតាមសារព័ត៌មាន Vietnam News ចុះផ្សាយកាលពីថ្ងៃពុធ ទី៣ ខែសីហា។

សេចក្តីសម្រេចលើគោលនយោបាយវិនិយោគសម្រាប់គម្រោងផ្លូវក្រវាត់ក្រុងលេខ៤ ទទួលបានភ្លើងខៀវពីរដ្ឋសភាវៀតណាម កាលពីខែមិថុនា ឆ្នាំនេះ។ គម្រោងនេះនឹងស្ថាបនាផ្លូវមួយខ្សែប្រវែង១១២,៨គីឡូម៉ែត្រជាមួយនឹងទុនវិនិយោគប្រមាណ៣,៦៥ពាន់លានដុល្លារអាមេរិក ក្នុងដំណាក់កាលទី១ ដែលនឹងតភ្ជាប់តំបន់ឧស្សាហកម្ម តំបន់ប្រជុំជន ខេត្ត និងទីក្រុងជាច្រើន។

តាមការរំពឹងទុក គម្រោងផ្លូវក្រវាត់ក្រុងលេខ៤ នេះនឹងជំរុញការអភិវឌ្ឍ និងការវិនិយោគគម្រោងអចលនទ្រព្យជាច្រើននៅក្នុងតំបន់ជុំវិញ។

ទោះជាយ៉ាងណា ប្រធានសមាគមភ្នាក់អចលនវត្ថុវៀតណាម លោក Nguyễn Văn Đính បានលើកឡើងថា ក្នុងករណីខ្លះ ព័ត៌មានអំពីទីផ្សារគ្រាន់តែជាល្បិចបោកបញ្ឆោតដើម្បីបង្កើតរលកទីផ្សារប៉ុណ្ណោះ។

អ្នកជំនាញរូបនេះបានបន្ថែមថា បណ្ដាអ្នកវិនិយោគគួរតែមានការប្រុងប្រយ័ត្នខ្ពស់ និងសិក្សាអំពីផែនការ និងសាច់ប្រាក់ឱ្យបានហ្មត់ចត់ជាមុនសិនដើម្បីជៀសវាងហានិភ័យនៃការខាតបង់ប្រាក់។

លោកគូសបញ្ជាក់ថា អ្នកវិនិយោគគួរតែស្វែងយល់ពីកត្តាចំនួន២ជាមុនសិន មុននឹងសម្រេចចិត្តវិនិយោគ ដោយទី១ គឺឱកាសដីហក់ឡើងថ្លៃ ហើយទី២ វឌ្ឍនភាពនៃការសាងសង់ហេដ្ឋារចនាសម្ព័ន្ធ។

លោកបន្តថា នៅតំបន់មួយចំនួនដែលផ្លូវក្រវាត់ក្រុងលេខ៤ រត់កាត់ តម្លៃដីធ្លីបានហក់ឡើងខ្លាំងរួចទៅហើយកាលពីឆ្នាំមុន ហើយថា កម្រិតតម្លៃថ្មីមួយត្រូវបានបង្កើតឡើង ហើយវាជាតម្លៃខ្ពស់ខ្លាំងណាស់។ ក្នុងន័យនេះលោកចង់បញ្ជាក់ថា បើគេកំណត់តម្លៃខ្ពស់ខ្លាំងរួចទៅហើយបែបនេះ អ្នកដែលបោះទុនទិញដីធ្លីដើម្បីទុកលក់យកចំណេញ កុំរំពឹងខ្ពស់ពេក។

យោងតាមលោកស្រី Đỗ Thu Hằng នាយកជាន់ខ្ពស់ផ្នែកអភិវឌ្ឍន៍ការប្រឹក្សាយោបល់ និងស្រាវជ្រាវនៃក្រុមហ៊ុន Savills Hà Nội លើកឡើងថា ជាធម្មតាការងារហេដ្ឋារចនាសម្ព័ន្ធដឹកជញ្ជូនត្រូវចំណាយពេលអនុវត្តន៍ច្រើនឆ្នាំទម្រាំបញ្ចប់ ដូចនេះបណ្ដាអ្នកវិនិយោគចាំបាច់ត្រូវតែយល់អំពីផែនការ និងដំណើរការបញ្ចប់គម្រោង មុននឹងសម្រេចចិត្តបោះទុនវិនិយោគ។

លោកស្រីបានបន្ថែមថា អ្នកវិនិយោគក៏គួរតែយកចិត្តទុកដាក់លើលក្ខខណ្ឌផ្លូវច្បាប់នៃអចលនទ្រព្យផងដែរដើម្បីជៀសវាងជម្លោះដែលធ្វើឱ្យអ្នករងការខាតបង់៕ Vietnam News៕

ដោយ៖ វឌ្ឍនៈ

ភ្នំពេញ ៖ នៅក្នុងឆ្នាំ២០២២និងឆ្នាំ ២០២៣នេះ កម្ពុជានឹងធ្វើម្ចាស់ផ្ទះនូវព្រឹត្តិការណ៍អន្តរជាតិចំនួន២ ក្នុងនោះឆ្នាំ២០២២នេះកម្ពុជានឹងធ្វើជាម្ចាស់ផ្ទះកិច្ចប្រជុំអាស៊ាន និងឆ្នាំ២០២៣ កម្ពុជានឹងធ្វើម្ចាស់ផ្ទះនៃព្រឹត្តិការណ៍កីឡាស៊ីហ្គេម ដែលព្រឹត្តិការណ៍ទាំងពីរនេះនឹងនាំមកនូវទេសចរ អ្នកជំនួញ វិនិយោគិនបរទេសចូលមកកាន់តែច្រើនឡើងវិញ ។

លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានមានប្រសាសន៍ថា នៅចុងឆ្នាំនេះ ឬយ៉ាងយូរនៅដើមឆ្នាំ២០២៣ខាងមុខនេះ កម្ពុជានឹងទទួលបានវិនិយោគិនបរទេស ដែលចូលមកស្វែងរកការបណ្ដាក់ទុនវិនិយោគឡើងវិញ ដូច្នេះពេលនោះដែរ វិនិយោគក្នុងស្រុកគួរតែត្រៀមខ្លួនក្នុងការទទួលយកវិនិយោគិនបរទេសឡើងវិញ។

អ្នកស្រី អាន សុធីតា អគ្គនាយិកាក្រុមហ៊ុនអចលនទ្រព្យ PropNex Cambodia បានមានប្រសាសន៍ថា នៅក្នុងឆ្នាំ២០២២នេះ កម្ពុជាធ្វើជាម្ចាស់ផ្ទះនៃកិច្ចប្រជុំអាស៊ាន ដែលមាន១០ឆ្នាំម្ដង ហើយក្នុងឆ្នាំនោះដែរ កម្ពុជានឹងផ្សព្វផ្សាយពីសក្ដានុពល ការវិនិយោគ សេដ្ឋកិច្ចរបស់ខ្លួនដល់បណ្ដាវិនិយោគិនមកពីបណ្ដាប្រទេសអាស៊ាន និងប្រទេសជាច្រើនទៀត។

អ្នកស្រីបន្តថា “មិនថាតែកិច្ចប្រជុំអាស៊ាន ឬកិច្ចប្រជុំណានោះទេ បើសិនជាកម្ពុជាធ្វើជាម្ចាស់ផ្ទះ នោះនឹងធ្វើឱ្យកម្ពុជាកាន់តែ មានឈ្មោះល្បីនៅលើឆាកអន្តរជាតិ ហើយមានជនបរទេសជាច្រើននឹងសិក្សាពីកម្ពុជា ចូលមករកការវិនិយោគនៅក្នុងប្រទេសកម្ពុជា ដូច្នេះនៅក្រោយកិច្ចប្រជុំនេះ កម្ពុជានឹងទទួលបានការវិនិយោគបន្ថែមទៀតជាក់ជាមិនខាន”។

ដោយឡែក អ្នកស្រីហ្គ្រេស រចនី អគ្គនាយិកាក្រុមហ៊ុន Century 21 Cambodia បានឱ្យដឹងផងដែរថា នៅក្នុងឆ្នាំ២០២៣ខាងមុខ កម្ពុជានឹងធ្វើជាម្ចាស់នូវព្រឹត្តិការណ៍កីឡាមួយទៀត គឺកីឡាស៊ីហ្គេម។ ព្រឹត្តិការណ៍នេះនឹងមានជនបរទេសកាន់តែច្រើនចូលមកកម្ពុជា ពេលនេះ ទេសចរណ៍ និងការធ្វើជំនួញក្នុងប្រទេសកម្ពុជារំពឹងថានឹងមានកំណើនខ្ពស់ឡើងវិញ។

អ្នកស្រីបន្តថា នៅក្រោយព្រឹត្តិការណ៍ប្រកួតកីឡាខ្នាតអន្តរជាតិនេះ នឹងមានជនបរទេសកាន់តែច្រើនចូលមកកម្ពុជា ដើម្បីស្វែងរកការវិនិយោគ ហើយក្នុងអំឡុងពេលនៃព្រឹត្តិការណ៍នេះប្រព្រឹត្តិទៅ នឹងមានអ្នកមកទស្សនាផង មកមើលពីឱកាសវិនិយោគក្នុងប្រទេសកម្ពុជាផងដែរ។

លោក ខន គង្គា អគ្គនាយកក្រុមហ៊ុន ERA Cambodia បានលើកឡើងផងដែរថា នៅរយៈពេលពីរទៅបីខែខាងមុខនេះ វិនិយោគិនបរទេស ជាពិសេស វិនិយោគិនចិន នឹងចូលមកកាន់កម្ពុជាឡើងវិញ ស្របពេលប្រទេសមួយចំនួនមានជនជាតិចិនចូលទៅច្រើនហើយ។

លោកបន្តថា កម្ពុជាជាប្រទេសមានគោលនយោបាយល្អ មួយជាមួយប្រទេសចិន អញ្ចឹងហើយយើងរំពឹងខ្ពស់ពីការហូរចូលរបស់ជនជាតិចិន នៅក្នុងប្រទេសកម្ពុជា។ ចិនដែលមកកម្ពុជានឹងមានទេសចរជនជាតិចិន វិនិយោគិនចិន ហើយពេលនោះតម្រូវការអចលនទ្រព្យដូចជាខុនដូ ដីធ្លីអភិវឌ្ឍន៍ នឹងមានកំណើនឡើងវិញ៕

ដោយៈសុផារី

ភ្នំពេញៈ សេវាកម្មទីផ្សារឌីជីថល គឺជាវិធីដែលអាជីវកម្មអាចទំនាក់ទំនងជាមួយអតិថិជន ដែលមានសក្តានុពល តាមរយៈការធ្វើទីផ្សារដោយប្រើឧបករណ៍អេឡិចត្រូនិច នៅលើទូរស័ព្ទ និងកុំព្យូទ័រ ឬអ៊ីនធឺណិតដូចជាប្រព័ន្ធផ្សព្វផ្សាយសង្គម អ៊ីម៉ែល តេឡេក្រាមជាដើម។ ល។

អតិថិជននៅកម្ពុជា កំពុងប្រើប្រាស់អ៊ីនធឺណិត ដោយអ្នកប្រើប្រាស់អ៊ីនធឺណេតមានចំនួនរាប់លាននាក់ និងមានការកើនឡើងជារៀងរាល់ឆ្នាំ។ តាមរយៈកំណើនខ្ពស់នេះ ធ្វើឱ្យទីផ្សារឌីជីថលមានសារៈសំខាន់ខ្លាំង នៅក្នុងអាជីវកម្មនានា។

លោកអាលី អគ្គនាយកក្រុមហ៊ុន NDMA Digital Media Services ដែលជាក្រុមហ៊ុនជំនាញការលើទីផ្សារឌីជីថលមួយ នៅក្នុងទីក្រុងភ្នំពេញ បានមានប្រសាសន៍ប្រាប់ Property Area Asia នៅល្ងាចថ្ងៃទី២ ខែសីហាម្សិលមិញថា “គ្រប់គ្នាងាកមកប្រើប្រាស់ទូរស័ព្ទ និងកុំព្យូទ័រ ហើយធ្វើការទិញលក់ផលិតផល និងសេវាកម្មតាមរយៈប្រព័ន្ធអនឡាញអស់ហើយ។ ជាង៨០ភាគរយ នៃអាជីវកម្មសំខាន់ៗ ត្រូវបានប្រើប្រាស់ និងប្រាស្រ័យទាក់ទងតាមប្រព័ន្ធឌីជីថល ដោយប្រើប្រាស់ទូរស័ព្ទ និងកុំព្យូទ័រ”។

បើតាមបទពិសោធន៍ជាច្រើនឆ្នាំរបស់លោកអាលី នៅក្នុងទីផ្សារឌីជីថល លោកយល់ថា “បច្ចេកវិទ្យាមួយនេះ ពិតជាមានសារៈសំខាន់ណាស់ ដើម្បីជម្រុញការធ្វើទីផ្សារប្រកបដោយប្រសិទ្ធិភាព និងចំគោលដៅ”។ លោ​កបន្ថែមថា “ការធ្វើប្រតិបត្តិការ ទាក់ទងនឹងទីផ្សារអចលនទ្រព្យ នៅក្នុងប្រទេសកម្ពុជាកើនឡើងច្រើន។ បច្ចុប្បន្ននេះ លោកអ្នកអាចមើលតាមប្រព័ន្ធអនឡាញ ដោយមិនចាំបាច់ទៅមើលដោយផ្ទាល់ ឬអាចទៅមើលដោយផ្ទាល់នៅពេលក្រោយបាន”។

លោកសង្កត់ធ្ងន់ថា “សម័យនេះ ប្រសិនបើមិនប្រើប្រាស់ទីផ្សារឌីជីថលទេ អាជីវកម្មអាចបាត់បង់ឱកាសក្នុងការទទួលបានអតិថិជនថ្មីៗ”។

អ្នកជំនាញទីផ្សារឌីជីថលរូបនេះ លើកឡើងថា ប្រសិនបើចង់ទទួលបានជោកជ័យ ក្នុងការប្រើប្រាស់បច្ចេកវិទ្យាមួយនេះ នៅក្នុងការធ្វើទីផ្សារនៅក្នុងវិស័យអចលនទ្រព្យរបស់ក្រុមហ៊ុន សហគ្រាស ឬបុគ្គល ត្រូវពិនិត្យមើលលើចំណុចសំខាន់ៗចំនួន០៧ចំណុច រួមមាន៖

១. ពិនិត្យម៉ាកយីហោផ្ទាល់ខ្លួន។
២. បង្កើតគណនីប្រព័ន្ធផ្សព្វផ្សាយសង្គមគ្រប់ប្រភេទ ដើម្បីបង្កើនឱកាសផ្សព្វផ្សាយ ទៅកាន់ក្រុមអតិថិជនគោលដៅផ្សេងៗគ្នា។
៣. រៀបចំផែនការរាល់សកម្មភាពអាជីវកម្ម។
៤. ផ្តោតលើការផ្សព្វផ្សាយមាតិកាទីផ្សារថ្មីៗ។
៥. ពិនិត្យ តាមដានមើលគេហទំព័ររបស់ដៃគូរប្រកួតប្រជែង។
៦. ជ្រើសរើសផ្តោតលើប្រព័ន្ធផ្សព្វផ្សាយណាមួយ ដែលពេញនិយមបំផុត ក្នុងចំណោមអតិថិជននៅក្នុងស្រុក។
៧. ផ្តោតលើការប្រើប្រាស់ “ពាក្យគន្លឹះ” តាមប្រធានបទ និងតាមលក្ខណសម្បត្តិនៃអចលនទ្រព្យ ដើម្បីងាយស្រួលក្នុងការស្វែងរករបស់អតិថិជន។

លោកអាលីបន្ថែមថា បើប្រៀបធៀបនឹងការធ្វើទីផ្សារ តាមបែបបុរាណ ការធ្វើទីផ្សារឌីជីថលត្រូវចំណាយតិច និងលឿនជាងច្រើនណាស់ ហើយអាជីវកម្មត្រូវចំណាយប្រាក់យ៉ាងច្រើន ដើម្បីធ្វើការផ្សាយពាណិជ្ជកម្ម ជាមួ​យនឹងទីផ្សារឌីជីថល យើងអាចដំណើរការការផ្សព្វផ្សាយភ្លាមៗ៕

ដោយ សុខុម

វៀងចន្ទន៍: តំបន់សេដ្ឋកិច្ចពិសេស Sithandon នៃប្រទេសឡាវ បានចាប់ផ្តើមការសាងសង់គម្រោងអភិវឌ្ឍន៍ធំៗចំនួន២នៅតំបន់ទឹកជ្រោះល្បាក់ខោន។ នេះបើយោងតាមសារព័ត៌មាន Laotian Times ចុះផ្សាយកាលពីថ្ងៃពុធ ទី៣ ខែសីហា។

ផែនការគម្រោងទាំងនេះត្រូវបានសម្រេចដំណាក់កាលផ្ដាច់ព្រ័ត្រកាលពីថ្ងៃទី២៥ ខែកក្កដា បន្ទាប់ពីការពិភាក្សារយៈពេល៤៥ថ្ងៃរវាងរដ្ឋាភិបាលឡាវ និងក្រុមហ៊ុនម៉ៅការ។

តាមការរំពឹងទុក សណ្ឋាគារ Mekong Intercontinental Hotel ដែលជាគម្រោងមួយក្នុងចំណោមគម្រោងទាំង២ នឹងក្លាយជាសណ្ឋាគារខ្ពស់ជាងគេបំផុតប្រចាំប្រទេសឡាវ ចំណែកឯគម្រោងមួយទៀតគឺឃ្លាំងខ្នាតយក្សថ្នាក់តំបន់។

អគារសណ្ឋាគារដែលខ្ពស់ជាងគេបំផុតលំដាប់ប្រទេសខាងលើនេះនឹងមានរាងដូចគែន ដែលជាឧបករណ៍តន្ត្រីបុរាណម្យ៉ាងរបស់ឡាវ ហើយវានឹងមានកម្ពស់ជាង២៣៨ម៉ែត្រ។

ទន្ទឹមនេះនេះការសាងសង់ឃ្លាំងស្តុកខ្នាតយក្សមួយ ដែលមានទំហំដល់ទៅ១២០.០០០ម៉ែត្រការ៉េក៏បានចាប់ផ្តើមក្នុងថ្ងៃតែមួយជាមួយនឹងការសាងសង់សណ្ឋាគារដែរ។ តាមការរំពឹងទុកថា ឃ្លាំងខ្នាតយក្សនេះនឹងធ្វើឱ្យប្រសើរឡើងនូវប្រព័ន្ធដឹកជញ្ជូនរវាងប្រទេសថៃ កម្ពុជា ចិន និងឡាវ។

គម្រោងទាំង២នេះគឺជាផ្នែកមួយនៃដំណាក់កាលទី១ ក្នុងគម្រោងតំបន់សេដ្ឋកិច្ចពិសេស Sithanon ហើយកាលពីក្នុងឆ្នាំ២០១៨ ដំណាក់កាលទី១ នេះត្រូវបានប៉ាន់ប្រមាណថាគ្រោងចំណាយអស់៦០០លានដុល្លារ។

ដំណាក់កាលទី១ នៃការសាងសង់គម្រោងតំបន់សេដ្ឋកិច្ចពិសេស Sithanon បានចាប់ផ្តើមនៅឆ្នាំ២០១៨ ហើយគ្រោងនឹងបញ្ចប់នៅឆ្នាំ២០២៥៕ Laotian Times៕