ដោយៈ គង់ សូរិយា

       ភ្នំពេញៈ ផ្អែកលើកម្រិតទំនាក់ទំនងទ្វេរភាគី ដែលមេដឹកនាំប្រទេសទាំងពីរបានពូនជ្រុំកម្រិតទំនាក់ទំនង មកដល់ភាពជាដៃគូយុទ្ឋសាស្រ្តគ្រប់ជ្រុងជ្រោយ ការកើនឡើងនូវលំហូរពាណិជ្ជកម្ម ការគាំទ្រគ្នាទៅវិញទៅមក លើឆាកអន្តរជាតិ សមណាស់រដ្ឋាភិបាលចិន បញ្ជូនអ្នកវិនិយោគរបស់ខ្លួន មកកាន់កម្ពុជាកាន់តែច្រើន។

ប៉ុន្តែហេតុអ្វីបានជាមកដល់ពេលនេះ ចំនួនអ្នកវិនិយោគចិននៅតែហូរចូលមកកម្ពុជានៅមានកម្រិត?។

អ្នកវិភាគឯករាជ្យ ដែលបានតាមដានទំនាក់ទំនងកម្ពុជា ចិន និងជាអគ្គនាយកគេហទំព័រPropertyarea.asia លោកយិន លាងគង់ដែលបានសរសេរអត្ថបទវិភាគជាច្រើន ពីទំនាក់ទំនងកម្ពុជា ចិនបានលើកឡើងថា ការមិនទាន់មកដល់របស់អ្នកវិនិយោគចិនធំៗ នៅកម្ពុជាដោយសារកត្តាសំខាន់ៗចំនួន៤ រួមមានទី១ ប្រមុខដឹកនាំចិន ពោលគឺប្រធានាធិបតីស៊ី ជីនពីងកំពុងជាប់ដៃរកសម្លេងឆ្នោត ដើម្បីអានបន្តកាន់អំណាចនៅអាណត្តិទី៣បន្តទៀត។

ការបោះឆ្នោតជ្រើសរើសប្រធានាធិបតីចិន នឹងធ្វើឡើងនៅថ្ងៃទី១៦ តុលាខាងមុខនេះ។

ហេតុផលទី២ ដោយសារអ្នកវិនិយោគចិន បាននិងកំពុងត្រៀមរៀបចំខ្លួន ដើម្បីរៀបចំពិធីបុណ្យចូលឆ្នាំប្រពៃណីជាតិចិន នាពេលខាងមុខនេះ។

ហេតុផលទី៣ ការបិទប្រទេស និងវិបត្តិអចលនទ្រព្យរបស់ចិនជាផ្នែកសំខាន់មួយទៀត ដែលរដ្ឋាភិបាលចិនបានបិទលំហូរមូលធន ចេញក្រៅប្រទេស ដែលនេះជាគោលនយោបាយដ៏ស្ងៀមស្ងាត់ និងឆ្លាតវៃរបស់ប្រមុខ​រដ្ឋាភិបាលចិន ដើម្បីបង្ហាញទៅកាន់ពិភពលោកថា ខ្លួនកំពុងជួបវិបត្តិផងដែរ ខណៈអាមេរិក និងបណ្តាសម្ព័ន្ឋមិត្តរបស់ខ្លួន បានរុញឲ្យចិនធ្វើអន្តរា​គមន៍ជាមួយរុស្ស៊ី ដើម្បីបញ្ចប់សង្រ្គាមរុស្ស៊ី ឈ្លានពានអ៊ុយ ក្រែន។

ហេតុផលធំលំដាប់ទី៤ ភាពតានតឹងនៃភូមិសាស្រ្តនយោបាយរបស់ចិន និងអាមេរិក ដែលតែងតែព្យាយាមកកូរកាយបញ្ហាផ្ទៃក្នុងចិនផង និងកំពុងព្យាយាមដុតចិន ដើម្បីបញ្ឆេះសង្រ្គាមលើកោះតៃវ៉ាន់។

លោកយិន លាងគង់បានបន្តថា​ “ក្រោយការបោះឆ្នោតប្រធានាធិបតីចិន រដ្ឋាភិបាលចិននឹងបើកចំហរ និងអនុញ្ញាត្តឲ្យលំហូរមូលធនចេញពីប្រទេសចិន បើពុំដូច្នោះវិបត្តិធំមួយ នឹងកើតមាននៅក្នុងប្រទេសដែលមានសេដ្ឋកិច្ចធំលំដាប់ទី២ របស់ពិភពលោកនេះមិនខាន”៕

 ដោយៈជេស៊ីកា

       ភ្នំពេញៈ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានថ្លែងថា ការសាងសង់ផ្លូវល្បឿនលឿនភ្នំពេញ បាវិតនឹងអាចបើកដំណើរការសាងសង់ នៅពាក់កណ្តាលឆ្នាំ២០២៣ខាងមុខនេះ។

លោកបានមានប្រសាសន៍ឲ្យដឹងនៅថ្ងៃទី២១ កញ្ញាកន្លងមកថា លោក

បានស្នើសុំទៅសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា​ ដើម្បីចុះហត្ថលេខា​លើកិច្ចព្រមព្រៀង ​ក្របខ័ណ្ឌ​ជាមួយក្រុមហ៊ុនCRBC ដែលជាក្រុមហ៊ុនសាង សង់ផ្លូវល្បឿនលឿនភ្នំពេញ- ព្រះសីហនុក្នុងការបន្តសិក្សា និងសាងសង់ផ្លូវល្បឿនលឿន​ភ្នំពេញ-បាវិត ដែលជាផ្លូវល្បឿនលឿនទី២។

លោកទេសរដ្ឋមន្ត្រីបានបន្តថា រាជរដ្ឋាភិបាលកម្ពុជា បានឯកភាព​ឱ្យក្រុមហ៊ុន CRBC ដដែលនេះ ជាអ្នកវិនិយោគ ដាក់ថវិកាសាង​សង់ផ្លូវល្បឿនលឿន​ភ្នំពេញ- បាវិត ដែលជាផ្លូវល្បឿនលឿនទី២ បន្ទាប់ពីបញ្ចប់ផ្លូវល្បឿនលឿនទី១ (ភ្នំពេញ-ក្រុងព្រះសីហនុ) នាពេលឆាប់ៗនេះ។

លោកទេសរដ្ឋមន្ត្រី ស៊ុន ចាន់ថុល ​បញ្ជាក់ថា “យើងបានចុះអនុស្សរណៈយោគយល់គ្នា (MoU) រួចហើយជាមួយក្រុមហ៊ុន CRBC យើងនឹងត្រៀមចុះហត្ថលេខា លើកិច្ចព្រមព្រៀមនៅខែវិច្ឆិកានេះ ហើយក្រុមហ៊ុននឹងធ្វើការសិក្សា ជាមួយការត្រៀមរៀបចំ ចុះកិច្ចព្រមព្រៀងសម្បទាន ឱ្យបានមុនដាច់ឆ្នាំនេះ ដើម្បីបានបើកការដ្ឋានឱ្យបាន នៅពាក់កណ្តាលឆ្នាំ២០២៣។

លោកទេសរដ្ឋមន្ត្រី បានបញ្ជាក់ទៀតថា ការរៀបចំដំណើរការបានយ៉ាងលឿននេះ ដោយសារក្រុមហ៊ុនCRBC មានបទពិសោធន៍ធ្លាប់បានសាងសង់ផ្លូវល្បឿនលឿន មួយខ្សែរួចហើយ រួមទាំងមានទាំងសម្ភារៈគ្រប់គ្រាន់ និងអាចដឹងពីបញ្ហាអាកាសធាតុ នៅក្នុងប្រទេសកម្ពុជាបានត្រឹមត្រូវផងដែរ៕

Phnom Penh: The Asian Development Bank (ADB) maintained its economic growth forecast for Cambodia at 5.3% in 2022 but lowered the 2023 forecast to 6.2% from 6.5% due to weaker global growth.

According to the Asian Development Outlook (ADO) 2022 Update, released today, Cambodia’s garments, travel goods, and footwear outputs remained robust, registering 39.8% year-on-year growth in the first half of 2022, despite the economic slowdown in the United States and Europe. The non-garment manufacturing sector continued its strong growth momentum.

Construction gradually recovered, with imports of construction materials rising 22.8%. Industry output is projected to grow 9.1% this year, before moderating to 8.6% in 2023 because of weaker external demand.

“An increase in Cambodia’s manufactured product exports, and a gradual recovery in the construction and service sectors, have supported economic growth in 2022 despite the drop in agricultural growth caused by surging fuel and fertilizer prices and heavy rains,” said ADB country director for Cambodia Jyotsana Varma.

“The government’s socioeconomic interventions such as the Cash Transfer Program for Poor and Vulnerable Households have been effective in lessening the impacts of the global surges in commodity prices on the poor.”

ដោយ: លាងហួរ

ប៉េកាំង: អ្នករៀបចំផែនការសេដ្ឋកិច្ចកំពូលរបស់ប្រទេសចិន បាននិយាយ កាលពីថ្ងៃអង្គារថា ការសាងសង់តំបន់ថ្មី Xiong’an បានបញ្ចប់ការវិនិយោគ៤០០ពាន់លានយ័ន (ប្រហែល៥៧,៥៥ពាន់លានដុល្លារអាមេរិក) បន្ទាប់ពីប្រទេសចិនបានប្រកាសផែនការបង្កើតតំបន់ថ្មីក្នុងឆ្នាំ២០១៧។

លោក Cao Yuanmeng មន្ត្រីមកពីគណៈកម្មាធិការកំណែទម្រង់ និងអភិវឌ្ឍន៍ជាតិ បានថ្លែងនៅក្នុងសន្និសីទសារព័ត៌មានមួយថា ការសាងសង់ Xiong’an ឥឡូវនេះអាចផ្តល់ការងារប្រហែល១០០.០០០។

តំបន់ថ្មីនេះលាតសន្ធឹងលើស្រុក Xiongxian Rongcheng និង Anxin ក្នុងខេត្តហឺប៉ី (Hebei) និងមានបឹង Baiyangdian ស្ថិតក្នុងតំបន់ថ្មីនេះ ដែលជាតំបន់សើមដ៏សំខាន់នៅភាគខាងជើងប្រទេសចិន។

លោក Cao បាននិយាយថា គុណភាពទឹកនៅបឹង Baiyangdian បានប្រសើរឡើងពីថ្នាក់ទី V ដែលជាកម្រិតទាបបំផុតនៃប្រព័ន្ធវាយតម្លៃទឹកប្រាំថ្នាក់របស់ប្រទេសចិន ដល់ថ្នាក់ទី III ។

តំបន់ថ្មី Xiong’an ស្ថិតនៅចម្ងាយប្រហែល១០០គីឡូម៉ែត្រ ភាគនិរតីនៃទីក្រុងប៉េកាំង តំបន់ថ្មីនេះនឹងក្លាយជាមជ្ឈមណ្ឌលអភិវឌ្ឍ សម្រាប់ទីក្រុងBeijing-Tianjin-Hebei។

តំបន់ថ្មីនេះត្រូវបានរចនាឡើង ដើម្បីទទួលមុខងារសំខាន់ពីទីក្រុងប៉េកាំង និងដើម្បីស្វែងរកគំរូអភិវឌ្ឍន៍ថ្មីនៅក្នុងតំបន់ ដែលមានប្រជាជនរស់នៅច្រើន៕

ដោយ៖ សុផារី

ភ្នំពេញ៖ ក្រោយផ្លូវល្បឿនលឿនភ្នំពេញ-ក្រុងព្រះសីហនុ ត្រូវបានសាងសង់រួចរាល់ស្ទើរទាំងស្រុងហើយ ក្រុមហ៊ុននឹងបើកឱ្យប្រជាពលរដ្ឋធ្វើដំណើរហើយ ជាមួយការមិនគិតថ្លៃរយៈពេលមួយខែ ចាប់ពីនៅថ្ងៃទី០១ ខែតុលា ឆ្នាំ២០២២។

ជាមួយនឹងការប្រកាសដាក់ឱ្យដំណើរការ ក្រុមហ៊ុនក៏បានបង្ហាញតារាងតម្លៃ សម្រាប់ការធ្វើដំណើរឆ្លងកាត់លើផ្លូវល្បឿនលឿនលើកដំបូងនៅកម្ពុជានេះផងដែរ។ តម្លៃសម្រាប់ការធ្វើដំណើរលើផ្លូវល្បឿនលឿននេះ ចែកចេញជា៥ប្រភេទដូចខាងក្រោម។

ប្រភេទទី១៖ ទោចក្រយានយន្ត ដែលមានទំហំស៊ីឡាំងចាប់ពី៦០០សេសេឡើង រថយន្តគ្រួសារ/រថយន្តដឹកទំនិញ (គ្រួសារ) ផ្ទុកមិនលើពី ៧នាក់ រថយន្តដឹកទំនិញធុនស្រាល ផ្ទុកមិនលើសពី២តោន តម្លៃ០,០៦៤ដុល្លារ ក្នុងមួយគីឡូម៉ែត្រ សម្រាប់ឆ្នាំដំបូងនៅឆ្នាំបន្ទាប់តម្លៃ០,០៨ដុល្លារក្នុងមួយគីឡូម៉ែត្រ។

ប្រភេទទី២៖ រថយន្តដឹកអ្នកដំណើរផ្ទុកចាប់ពី៨នាក់ ដល់១៩នាក់ រថយន្តដឹកទំនិញផ្ទុកចាប់ពី ២តោនដល់៥តោន តម្លៃ ០,១២៨ដុល្លារ ក្នុងមួយគីឡូម៉ែត្រសម្រាប់ឆ្នាំដំបូង នៅឆ្នាំបន្ទាប់តម្លៃ០,១៦ដុល្លារ ក្នុងមួយគីឡូម៉ែត្រ។

ប្រភេទទី៣៖ រថយន្តដឹកអ្នកដំណើរធុនធំ ផ្ទុកចាប់ពី២០នាក់ ដល់៥៦នាក់ រថយន្តដឹកទំនិញផ្ទុកចាប់ពី៥តោនដល់១០តោន តម្លៃ០,១៩២ដុល្លារក្នុងមួយគីឡូម៉ែត្រ សម្រាប់ឆ្នាំដំបូងនៅឆ្នាំបន្ទាប់តម្លៃ០,២៤ដុល្លារ។

ប្រភេទទី៤៖ រថយន្តដឹកទំនិញធុនធ្ងន់ផ្ទុកចាប់ពី១០តោនដល់២០តោន តម្លៃ០,២៥៦ដុល្លារក្នុងមួយគីឡូម៉ែត្រសម្រាប់ឆ្នាំដំបូង នៅឆ្នាំបន្ទាប់តម្លៃ០,៣២ដុល្លារសម្រាប់មួយគីឡូម៉ែត្រ។

ប្រភេទទី៥៖ រថយន្តដឹកទំនិញធុនធ្ងន់ ផ្ទុកលើសពី២០តោនឡើងទៅ (គិតទាំងរ៉ឺម៉កសណ្តោង) តម្លៃ០,៣២ដុល្លារ ក្នុងមួយគីឡូម៉ែត្រ សម្រាប់ឆ្នាំដំបូង នៅឆ្នាំបន្ទាប់តម្លៃ០,៤០ដុល្លារក្នុងមួយគីឡូម៉ែត្រ៕

ដោយ៖ សុផារី

ភ្នំពេញ៖ គិតមកដល់ពេលនេះ ផ្លូវល្បឿនលឿន ភ្នំពេញ- ព្រះសីហនុ សម្រេចការងារសាងសង់រួចរាល់ស្ទើរតែ១០០%ហើយ ខណៈការងារនៅសល់បន្តិចបន្តួច ក្រុមហ៊ុននឹងសាងសង់ឱ្យបានរួចរាល់ មុនពេលបើកដំណើរជាបណ្តោះអាសន្ន ឱ្យប្រជាពលរដ្ឋប្រើប្រាស់ ដោយឥតគិតថ្លៃចំនួន១ខែ នៅខែតុលា ឆ្នាំ២០២២ខាងមុខនេះ។

នេះបើយោងតាមលោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន នាព្រឹកថ្ងៃទី២១ ខែកញ្ញា ឆ្នាំ២០២២នេះ ក្នុងឱកាសដឹកនាំមន្ត្រីជំនាញ រួមទាំងក្រុមហ៊ុនសាងសង់ ចុះពិនិត្យលើកចុងក្រោយលើផ្លូវល្បឿនលឿនភ្នំពេញ-ព្រះសីហនុ មុននឹងដាក់ឱ្យប្រើប្រាស់ជាបណ្តោះអាសន្ន ក្នុងពេលឆាប់ៗនេះ។

ក្នុងឱកាសនោះលោកទេសរដ្ឋមន្ត្រី ស៊ុន ចាន់ថុល បានបញ្ជាក់ពីការប្រើប្រាស់ល្បឿនលើផ្លូវនេះផងដែរ។ លោករដ្ឋមន្ត្រី បានបញ្ជាក់ថា សម្រាប់រថយន្តគ្រួសារ ដែលជារថយន្តតូចអាចបើកបរល្បឿនខ្ពស់បំផុត១២០គីឡូម៉ែត្រ ក្នុងមួយម៉ោង ខណៈដែលល្បឿនទាបបំផុត៦០គីឡូម៉ែត្រក្នុងមួយម៉ោង។ ចំពោះរថយន្តកុងតឺន័រ ដែលមានសណ្តោងអនុញ្ញាតឱ្យប្រើប្រាស់ល្បឿនត្រឹមតែ៨០គីឡូម៉ែត្រក្នុងមួយម៉ោង ខណៈរថយន្តធំអត់មានសណ្តោង អាចឱ្យប្រើប្រាស់ល្បឿន១០០គីឡូម៉ែត្រក្នុងមួយម៉ោង។

បើតាមលោកទេសរដ្ឋមន្ត្រី រថយន្តដឹកទំនិញធុនធំ គឺតម្រូវឱ្យបើកដោយប្រកាន់ស្តាំជានិច្ច មិនអាចបើកលើគន្លងខាងឆ្វេង ដោយប្រើពេលយូរបាននោះទេ ខណៈឡានតូចអាចប្រើប្រាស់បាន ក្នុងករណី ដែលមិនមានឧបសគ្គនៅខាងមុខ។ ជាមួយគ្នានោះ រថយន្តដែលបើកលើផ្លូវនេះ ដាច់ខាតត្រូវមានសុពលភាពឆៀកបានត្រឹមត្រូវ ទើបអាចបើកលើផ្លូវល្បឿនលឿននេះបាន។

លោកទេសរដ្ឋមន្ត្រី ស៊ុន ចាន់ថុល បានបញ្ជាក់ទៀតថា សម្រាប់ផ្លូវល្បឿនលឿនភ្នំពេញ-ក្រុងព្រះសីហនុនេះ ក៏មានការអនុញ្ញាតឱ្យម៉ូតូ ដែលមានទំហំស៊ីឡាំងលើសពី៥០០សេសេ អាចប្រើប្រាស់បានផងដែរ ដោយមានកំណត់ល្បឿនត្រឹមតែ១០០គីឡូម៉ែត្រក្នុងមួយម៉ោង ខណៈដែលម៉ូតូមានមានទំហំស៊ីឡាំងតូចជាងនេះ គឺមិនមានការអនុញ្ញាតឱ្យប្រើប្រាស់នោះឡើយ។

បើតាមលោកទេសរដ្ឋមន្ត្រី ស៊ុន ចាន់ថុល ទោះបីផ្លូវល្បឿនលឿននេះ ជាផ្លូវឯកជន តែក៏នៅក្រោមច្បាប់របស់ប្រទេសកម្ពុជា ដូចនេះផ្លូវនេះនៅតែមានការដាក់កាមេរ៉ាចាប់ល្បឿន នៅតាមគោលដៅនានា ជាមួយនឹងការផាកពិន័យងតាមច្បាប់ ដោយមិនមានការលើកលែងនោះឡើយ។

គម្រោងផ្លូវល្បឿនលឿនភ្នំពេញ-ព្រះសីហនុ មានប្រវែង១៨៧,០៥គីឡូម៉ែត្រ ដែលបានបើកការដ្ឋានសាងសង់ កាលពីថ្ងៃទី២២ ខែមីនា ឆ្នាំ២០១៩។ ផ្លូវនេះតភ្ជាប់ពីភូមិ១ សង្កាត់ សំរោងក្រោម ខណ្ឌពោធិ៍សែនជ័យ រាជធានីភ្នំពេញ ដល់ភូមិ១ សង្កាត់លេខ៣ ក្រុងព្រះសីហនុ ខេត្តព្រះសីហនុ។

ផ្លូវនេះអនុវត្តការសាងសង់ដោយក្រុមហ៊ុន PPSHV Expressway Co., Ltd និងក្រុមហ៊ុនបុត្រសម្ព័ន្ធនៃក្រុមហ៊ុនសាជីវកម្មស្ពានថ្នល់ចិន (CRBC) និងត្រួតពិនិត្យបច្ចេកទេសដោយក្រុមហ៊ុន MINCONSULT SDN. BHD. ប្រើរយៈពេលសាងសង់ ៤៨ខែ គ្រោងចំណាយថវិកាជាង២ពាន់លានដុល្លារសហរដ្ឋអាមេរិក។

គម្រោងសាងសង់ផ្លូវល្បឿនលឿន-ភ្នំពេញព្រះសីហនុ គឺជាគម្រោងផ្លូវល្បឿនលឿនទី១ និងជាគម្រោងផ្លូវ របៀងយុទ្ធសាស្ត្រសំខាន់បំផុតនៅកម្ពុជា ជួយកាត់បន្ថយពេលវេលាធ្វើដំណើរពីរាជធានីភ្នំពេញទៅផែសមុទ្រក្រុងព្រះសីហនុ ពីចំនួនប្រាំម៉ោងមកត្រឹមតែពីរម៉ោងប៉ុណ្ណោះ និងជួយកាត់បន្ថយតម្លៃភស្តុភារកម្មផងដែរ៕