មហាយក្សចិនបញ្ចប់ការស្ថាបនា និងដាក់ឱ្យប្រើប្រាស់ផ្លូវហាយវ៉េឆ្លងកាត់សមុទ្រខ្សាច់ដ៏ធំបំផុតទី២ក្នុងពិភពលោក

ដោយ៖ សុខុម

ប្រទេសចិន: ផ្លូវហាយវ៉េថ្មីមួយខ្សែដែលឆ្លងកាត់សមុទ្រខ្សាច់ Taklimakan Desert ក្នុងតំបន់ភ្នំស្វយ័តស៊ីនជាំង (Xinjiang) កន្លែងដែលជនជាតិភាគតិចវីហ្គួរ (Uygur) រស់នៅនាភាគពាយ័ព្យនៃប្រទេសចិន ត្រូវបានស្ថាបនាបញ្ចប់ជាស្ថាពរ និងដាក់ឱ្យដំណើរការកាលពីថ្ងៃព្រហស្បតិ៍ ទី៣០ ខែមិថុនា។

ផ្លូវហាយវ៉េដែលតភ្ជាប់តំបន់តំបន់យូលី (Yuli) និងតំបន់ឈាម៉ (Qiemo) នេះគឺជាផ្លូវខ្សែទី៣ ហើយដែលឆ្លងកាត់សមុទ្រខ្សាច់ Taklimakan ដែលជាសមុទ្រខ្សាច់ធំបំផុតទី២ ក្នុងពិភពលោក។

ផ្លូវហាយវ៉េនេះមានប្រវែងសរុប៣៣៤គីឡូម៉ែត្រ ដោយក្នុងនោះប្រវែង៣០៧គីឡូម៉ែត្ររត់កាត់សមុទ្រខ្សាច់នេះ។ រហូតមកទល់ពេលនេះ ប្រទេសចិន មានផ្លូវហាយវ៉េសរុបប្រវែងជាង១.២០០គីឡូម៉ែត្ររត់កាត់សមុទ្រខ្សាច់ Taklimakan Desert។

ផ្លូវហាយវ៉េដែលទើបដាក់ឱ្យដំណើរការថ្មីនេះ ត្រូវបានស្ថាបនាក្រោមទុនវិនិយោគប្រមាណ២៦១,៥លានដុល្លារអាមេរិក ហើយដំណើរការស្ថាបនាបានចាប់ផ្ដើមនៅខែតុលា ឆ្នាំ២០១៧។

គម្រោងនេះពិតជាមានសារៈសំខាន់ណាស់ ព្រោះវានឹងជួយសម្រួលដល់ការធ្វើដំណើរ កាត់បន្ថយចំណាយ និងផ្ដល់ភាពងាយស្រួលដល់ការលក់ផលិតផលកសិកម្ម។

ចំណុចដ៏សំខាន់មួយទៀត ការដាក់ឱ្យដំណើរការផ្លូវហាយវ៉េនេះបានធ្វើឱ្យក្រុមហ៊ុនសហគ្រាសនានាកាន់តែមានទំនុកចិត្តក្នុងការវិនិយោគក្នុងតំបន់នានានៅតាមបណ្តោយផ្លូវនេះ៕

តម្រូវការអាផាតម៉ិនប្រណិតនៅទីក្រុង New Delhi ហក់ឡើងរហូតដល់ ១១៤ភាគរយ

ដោយ: លាងហួរ

ប្រទេសឥណ្ឌា: យោងតាមរបាយការណ៍របស់ ក្រុមហ៊ុនភ្នាក់ងារអចលនទ្រព្យ JLL បានឱ្យដឹងថា តម្រូវការសម្រាប់ផ្ទះល្វែងលំដាប់ខ្ពស់នៅ ទីក្រុង Delhi មានការកើនឡើង១១៤%ពីមួយ ត្រីមាសទៅមួយត្រីមាស ជាមួយនឹងការបើក ដំណើរការថ្មីនីមួយៗក្នុងត្រីមាសទទួលបានការ ទិញច្រើន។

ការលក់អាផាតម៉ិនលំដាប់ខ្ពស់នៅ ទីក្រុង Gurgaon មានចំនួន៥៤%ចំណែក ឯទីក្រុង Noida និង ទីក្រុង Delhi មាន ចំនួន ២៤%និង២២% រៀងៗគ្នា។

តម្រូវការអាផាតមិនលំដាប់ខ្ពស់បានកើនឡើងនា ពេលថ្មីៗនេះដោយសារកត្តាផ្សេងៗ ដូចជា អតិថិជនចង់រស់នៅ ប្រកបដោយសេចក្តីប្រាថ្នានិងតម្រូវការ ផ្ទះធំជាងមុននិងការកើនឡើងប្រាក់ចំណូល ប្រើប្រាស់របស់អតិថិជន។

ការបើកដំណើរការថ្មីបានកត់ត្រាការ កើនឡើង២៤%ពីមួយត្រីមាសទៅមួយត្រីមាស នៅក្នុងត្រីមាសទី១ឆ្នាំ២០២២ ការបើកដំណើរការថ្មី នៅក្នុងផ្នែកកម្រិតខ្ពស់ បានកើនឡើង២៤%។

ទីក្រុង Gurgaonមានចំណែក៥៦%នៃការ បើកដំណើរការថ្មីជាមួយនឹងគម្រោងថ្មីភាគច្រើន ដែលបានសាងសង់នៅច្រករបៀង Dwarka Expressway ដោយអ្នកអភិវឌ្ឍន៍ដូចជា M3M, Godrej, Shapoorji Pallonji s Sobha ចាប់ផ្តើមគម្រោងថ្មី ឬដំណាក់កាលថ្មី នៅក្នុងគម្រោងដែលមានស្រាប់របស់ពួកគេ៕

អ្នកជំនាញបង្ហើបជម្រើសល្អ រវាងការវិនិយោគដីធ្លីក្រវាត់ក្រុងទី៣ និងក្រវាត់ក្រុងទី៤

ដោយ៖ សុផារី

ភ្នំពេញ៖ ការវិនិយោគដីធ្លីនៅតាមតំបន់ជាយក្រុងអាចផ្តល់ផលចំណេញបាន អាស្រ័យតាមទីតាំង និងការអភិវឌ្ឍនៃតំបន់។ រវាងផ្លូវក្រវាត់ក្រុងទី៣ និងក្រវាត់ក្រុងទី៤ អ្នកជំនាញលើកឡើងថា ជម្រើសទាំងពីរជាទីតាំងល្អសម្រាប់ការវិនិយោគដូចគ្នា ប៉ុន្តែក្រវាត់ក្រុងទី៤ ជាជម្រើសល្អបំផុតនាពេលបច្ចុប្បន្ន។

ឆ្លើយតបនឹងសំណួរថា តើបច្ចុប្បន្ននេះជាឱកាសល្អសម្រាប់ការវិនិយោគដីធ្លីនៅតាមបណ្តោយក្រវាត់ក្រុងទី៣ និងទី៤ ឬទេ លោក ង៉ែត ជូ អ្នកជំនាញផ្នែកហិរញ្ញវត្ថុ និងជាអ្នកជំនួញនៅក្នុងវិស័យអចលនទ្រព្យនៅកម្ពុជាបានលើកឡើងថា ការវិនិយោគនៅតាមផ្លូវក្រវាត់ក្រុងទី៣ ហាក់យឺតពេលបន្តិចហើយ ប៉ុន្តែការវិនិយោគនៅផ្លូវក្រវាត់ក្រុងទី៤វិញ គឺជាឱកាសល្អបំផុត។

បើតាមការបញ្ជាក់របស់លោក ង៉ែត ជូ ដីធ្លីនៅតាមផ្លូវក្រវាត់ក្រុងទី៣ និងតំបន់ក្បែរៗនេះ សម្រាប់ផ្លូវតូចៗ មានតម្លៃក្នុងរង្វង់៥០ដុល្លារ ទៅ១០០ដុល្លារ ហើយដីធ្លីជាប់ផ្លូវធំមានតម្លៃដល់ទៅ៣០០ឬ៤០០ដុល្លារអាមេរិក។

អ្នកជំនាញរូបនេះលើកឡើងថា ដោយសារតម្លៃដីធ្លីផ្លូវក្រវាត់ក្រុងទី៣ មានការកើនឡើងខ្ពស់ស្រាប់ទៅហើយ ធ្វើឱ្យមេគុណនៃផលចំណេញលើការវិនិយោគដីនៅផ្លូវក្រវាត់ក្រុងទី៣ ក៏កាន់តែមានតិច។ កាលណាតម្លៃដីធ្លីឡើងខ្ពស់ នោះអត្រាមេគុណក៏ថយចុះតាមដែរ។

លោកបន្តថា ចំណែក ការវិនិយោគដីធ្លីនៅតាមបណ្តោយផ្លូវក្រវាត់ក្រុងទី៤ អាចផ្តល់ផលចំណេញបានច្រើន ដោយសារតម្លៃដីធ្លីនៅមានតម្លៃទាបហើយនាពេលអនាគតនឹងមានតម្រូវការច្រើន ជាពិសេសលើអចលនទ្រព្យពាណិជ្ជកម្ម និងលំនៅឋាន។

លោកមានប្រសាសន៍ថា “តម្លៃនៅទាប មេគុណ [ផលចំណេញ] នៅមានច្រើន។ ក្រវាត់ក្រុងទី៤ នៅមានមេគុណច្រើន”។

លោកលើកឧទាហរណ៍ ផ្លូវជាតិលេខ៥១ ដែលជាផ្នែកមួយនៃផ្លូវក្រវាត់ក្រុងទី៤ តម្លៃដីធ្លីនៅប៉ែកខាងខេត្តកណ្តាល ឆ្ពោះមកភ្នំពេញ នៅមានចន្លោះ១៥ទៅ៣០ដុល្លារអាមេរិក។ ចំណែក ប៉ែកខាងកំពង់ស្ពឺ តម្លៃដីធ្លីនៅមានរង្វង់១០ដុល្លារអាមេរិក។

លោកបន្តថា “តំបន់១០ដុល្លារ និងក្រោម១០ដុល្លារនេះហើយ ដែលយើងគួរផ្តោត។ ក្រវាត់ក្រុងទី៣ រាងយឺតពេលបន្តិចហើយ ក្រវាត់ក្រុងទី៤ល្អសម្រាប់ការវិនិយោគ ប៉ុន្តែត្រូវមើលតម្លៃតាមផ្លូវល្មមៗ យកត្រឹម១០ដុល្លារក្នុងមួយម៉ែត្រការ៉េបាន”។

យ៉ាងណាក្តី លោកផ្តល់ទស្សនៈថា សម្រាប់អ្នកវិនិយោគនៅក្រវាត់ក្រុងទី៤ ដែលមិនចង់មានហានិភ័យខ្ពស់ គួរជ្រើសរើសយកការវិនិយោគនៅតាមបណ្តោយផ្លូវធំ នៃផ្លូវក្រវាត់ក្រុងទី៤តែម្តង ឬត្រឹមផ្លូវទំហំ៣០ម៉ែត្រ៤០ម៉ែត្រ។

លោកថា “បើយើងចង់បានហានិភ័យទាប យើងយកផ្លូវធំ ឬផ្លូវខ្នែងមានផ្លូវ៣០ម៉ែត្រ ៤០ម៉ែត្រ សម្រាប់ការវិនិយោគពាណិជ្ជកម្ម នាពេលអនាគត ដោយសារតម្រូវការសម្រាប់ពាណិជ្ជកម្មមានច្រើន ការផ្គត់ផ្គង់នៅជាប់ផ្លូវធំមានកម្រិតខ្លាំង ដោយសារបច្ចុប្បន្ននេះវាជាផ្នែកនៃអចលនទ្រព្យលំនៅឋានរួចជាស្រេច”៕

សិក្សានិតិវិធីមូលដ្ឋាននៃការផ្ទេរកម្មសិទ្ធិអចលនវត្ថុ ៥ដំណាក់កាល

ដោយ៖ សហការី

ភ្នំពេញ៖ យោងតាមឯកសាររបស់រដ្ឋបាលសូរិយោដី នៃក្រសួងរៀបចំដែនដី នគរូបនីយកម្ម និងសំណង់បានឱ្យដឹងថា នីតិវិធីការផ្ទេរកម្មសិទ្ធិអចលនវត្ថុមាន៥ដំណាក់កាល គឺ ១.បំពេញឯកសារនៅការិយាល័យភូមិបាល ២.ប្រថាប់ត្រាដោយអាជ្ញាធរឃុំ-សង្កាត់ ៣.កសាងសាលកបត្រក្បាលដី និងពិនិត្យទីតាំង ៤.សុំការអនុម័តមន្ទីរសុរិយោដី និងបង់ពន្ធ ៥.ចារឹកឈ្មោះលើប្លង់ដី។

ដំណាក់ទី១ បំពេញឯកសារនៅការិយាល័យភូមិបាល៖ ភាគីទាំងសងខាង ឬអ្នកទទួលបានសិទ្ធិ ត្រូវមកការិយាល័យរៀបចំដែនដី នគរូបនីយកម្ម សំណង់ និងភូមិបាលក្រុង ស្រុក ខណ្ឌ (ដែលជាទូទៅគេហៅថា ការិយាល័យភូមិបាល) ដែលអចលនទ្រព្យនោះស្ថិតនៅ ដើម្បីបំពេញឯកសារនានា នៅមុខមន្ត្រីភូមិបាល ដោយមានសាក្សីមកជាមួយផង។

គូភាគី ត្រូវភ្ជាប់មកជាមួយនូវឯកសារចាំបាច់មួយចំនួនដូចជា៖ កិច្ចសន្យាទិញ-លក់ (លិខិតលក់ផ្តាច់ សម្រាប់ការផ្ទេរកម្មសិទ្ធិក្នុងករណីទិញ-លក់) លិខិតធ្វើអំណោយផ្តាច់ (ក្នុងករណីដីនោះ ត្រូវបានធ្វើអំណោយដល់នរណាម្នាក់) អត្តសញ្ញាណប័ណ្ណ (មានបញ្ជាក់ពីសាលាក្រុង ស្រុក/ ខណ្ឌ) សេចក្តីចម្លងសំបុត្រអាពាហ៍ពិពាហ៍ (ប្រសិនបើជាទ្រព្យប្តីប្រពន្ធ) ឯកសារបញ្ជាក់អត្តសញ្ញាណ (នៅលីវ រៀបការ និង លែងលះ….) និងឯកសារផ្សេងៗទៀត ទៅតាមតម្រូវការជាក់ស្តែងនៃអចលនទ្រព្យនោះ។

ដំណាក់ទី២ ប្រថាប់ត្រាដោយអាជ្ញាធរឃុំ-សង្កាត់៖ បន្ទាប់ពីបំពេញឯកសារ នៅការិយាល័យភូមិបាលរួចរាល់ ម្ចាស់ដី ត្រូវយកឯកសារ ទៅឱ្យអាជ្ញាធរឃុំ-សង្កាត់ ដែលអចលនទ្រព្យនោះស្ថិតនៅ ដើម្បីត្រួតពិនិត្យនូវភាពស្របច្បាប់ និងប្រថាប់ត្រាលើឯកសារទាំងអស់នោះ។

ដំណាក់ទី៣ កសាងសាលកបត្រក្បាលដី និងពិនិត្យទីតាំង៖ បន្ទាប់ពីប្រថាប់ត្រារួចហើយ ម្ចាស់ដីត្រូវបន្តយកឯកសារនោះទៅការិយាល័យភូមិបាលវិញ ដើម្បីមន្ត្រីអនុវត្តនីតិវិធីបន្ត។ មន្ត្រីភូមិបាល នឹងធ្វើការងារផ្ទេរសិទ្ធិអចលនទ្រព្យនោះ ដោយចុះទៅពិនិត្យទីតាំង កសាងសាលកបត្រក្បាលដី សម្រង់ពត៌មានក្បាលដី កសាងកំណត់ហេតុចុះវាស់វែង និងកសាងឯកសាររណបផ្សេងៗទៀតដែលពាក់ព័ន្ធ។

ដំណាក់ទី៤ សុំការអនុម័តមន្ទីរសុរិយោដី និងបង់ពន្ធ៖ យោងតាមសេចក្តីសម្រេចលេខ០៤ សសរ ចុះថ្ងៃទី១០ ខែមករា ឆ្នាំ២០១៦ មានការផ្ទេរសិទ្ធិខ្លះ គឺមិនជាប់ពន្ធនោះទេ ដូចជាការផ្ទេរអចលនទ្រព្យជាសំណង់ ឬ/និងដី ចំពោះដីដែលចុះបញ្ជីរួច (ប្លង់រឹង) ម្ចាស់ដីត្រូវយកឯកសារទាំងអស់នោះ ទៅច្រកចេញចូលតែមួយនៅមន្ទីររៀបចំដែនដី នគរូបនីយកម្ម សំណង់ និងសុរិយោដី (ឬហៅថាមន្ទីរសុរិយោដី) ដែលអចលនទ្រព្យនោះស្ថិតនៅ។

មន្ត្រីសុរិយោដីនៅទីនោះ នឹងធ្វើការត្រួតពិនិត្យឯកសារទាំងនោះ។ ក្នុងករណីដែលឯកសារគ្រប់គ្រាន់ តាមច្បាប់ហើយនោះ មន្ត្រីនឹងហៅម្ចាស់មកបង់សេវាសុរិយោដី និងយកឯកសារទៅបង់ពន្ធនៅសាខាពន្ធដារដែលអចលនទ្រព្យនោះស្ថិតនៅ។

ប៉ុន្តែចំពោះដីដែលមិនទាន់ចុះបញ្ជី (ប្លង់ទន់) ក្រោយពីមន្ត្រីចុះវាស់វែង និងធ្វើកំណត់ហេតុរួចរាល់ហើយ (តំណាក់កាលទី៣) ការិយាល័យភូមិបាល នឹងរៀបចំឯកសារ ដើម្បីឱ្យអ្នកស្នើសុំយកឯកសារទៅបង់ពន្ធប្រថាប់ត្រា៤%។
យោងតាមសេចក្តីណែនាំលេខ៨៧២៦ របស់អគ្គនាយកដ្ឋានពន្ធដារ ចុះថ្ងៃទី១៤ ខែមិថុនា ឆ្នាំ២០១៦ ការផ្ទេរសិទ្ធិអចលនទ្រព្យត្រូវជាប់ពន្ធ ៤ភាគរយ ទាំងប្លង់រឹងនិងប្លង់ទន់។ ដីដែលពុំទាន់បានចុះបញ្ជី អ្នកទទួលសិទ្ធិមានកាតព្វកិច្ច ត្រូវបង់ពន្ធប្រថាប់ត្រា៤% ដូចដីដែលបានចុះបញ្ជីដែរ។ រវាងឪពុក-ម្តាយបង្កើត និងកូនបង្កើត រវាងប្តី និងប្រពន្ធ រវាងយាយ-តាបង្កើតនិងចៅបង្កើត។

ដំណាក់ទី៥ ចារឹកឈ្មោះលើប្លង់ដី៖ កិច្ចបង្ហើយ បន្ទាប់ពីបង់ពន្ធរួច សម្រាប់ដីដែលបានចុះបញ្ជីរួច (ប្លង់រឹង) ម្ចាស់ដី ត្រូវយកឯកសារទាំងអស់ មកមន្ទីរសុរិយោដីម្តងទៀត ដើម្បីមន្ត្រីធ្វើបច្ចុប្បន្នភាពអំពីម្ចាស់ដី នៅក្នុងកុំព្យូទ័រ និងធ្វើលេខាចារឹកលើប្លង់ដី។ ម្ចាស់ដីថ្មី នឹងទទួលបានប្លង់កម្មសិទ្ធិ នៅពេលនីតិវិធីទាំងអស់បានបញ្ចប់។
ចំណែកដីដែលមិនទាន់ចុះបញ្ជី (ប្លង់ទន់) ក្រោយពីបានបង់ពន្ធរួចរាល់ហើយ អ្នកស្នើសុំត្រូវយកបង្កាន់ដៃបង់ពន្ធរួចរាល់ ទៅការិយាល័យភូមិបាលវិញ ដើម្បីមន្ត្រីពិនិត្យ និងសម្រេច ដើម្បីបញ្ចប់ការផ្ទេរសិទ្ធិកាន់កាប់ អចលនទ្រព្យ ជូនម្ចាស់ថ្មី ត្រឹមថ្នាក់ស្រុកខណ្ឌ។ លោកអ្នកនឹងទទួលសំណុំ ឯកសារនៃការផ្ទេរសិទ្ធិអចលនទ្រព្យ ដែលបានផ្ទេរសិទ្ធិត្រឹមត្រូវឱ្យទៅឈ្មោះម្ចាស់ថ្មី៕

សកម្មភាពទិញ លក់ ជួល ក្នុងវិស័យអចលនទ្រព្យមានសកម្មភាពល្អប្រសើរឡើងវិញ

ដោយៈ គង់ សូរិយា

ភ្នំពេញៈ សកម្មភាពទិញលក់ ជួល ក្នុងវិស័យអចលនទ្រព្យបាននិងកំពុងមានចលនាឡើងវិញបណ្តើរៗ និងមានសភាពកាន់តែល្អប្រសើរឡើង។

លោកស្រីតាំង ហួរ អគ្គនាយិកាក្រុមហ៊ុន Amatak Property Service Co, Ltdបានមានប្រសាសន៍ឲ្យដឹង នារសៀលថ្ងៃទី១ កក្កដានេះថា បច្ចុប្បន្ននេះ អ្នកវិនិយោគទិញផ្ទះ ជួលផ្ទះធ្វើអាជីវកម្ម និងការទិញលក់ដីធ្លីនៅតែបន្តមានជាប្រចាំ ប៉ុន្តែចរន្តមិនល្អប្រសើរដូចមុនវិបត្តិនៅឡើយទេ។

លោកស្រីបន្តថា “ការទិញលក់ ភាគច្រើនផ្តោតលើអចលនទ្រព្យតម្លៃក្រោមទីផ្សារ ដោយសារវិនិយោគិនមានជម្រើសច្រើន សម្រាប់វិនិយោគ ព្រោះមានអចលនទ្រព្យលក់ច្រើន អ្នកទិញមានចំនួនតិច”។ លោកស្រីបន្តថា សកម្មភាពជួលផ្ទះអាជីវកម្ម មានច្រើនឡើងវិញបណ្តើរៗ ប៉ុន្តែការជួលអាគារធំៗហាក់នៅស្ងប់ស្ងាត់នៅឡើយ”។

ជាមួយគ្នានេះ លោកច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានមានប្រសាសន៍ឲ្យដឹងផងដែរថា ស្របពេលស្ថានភាព វិនិយោគិនចិន និងបរទេសថ្មីៗដទៃទៀត នៅមិនទាន់ចូលមកច្រើននៅឡើយ ទីផ្សារអចលនទ្រព្យទាក់ទងការទិញ លក់ ជួល ពិតជាមានកម្រិត ដោយសកម្មភាពទិញ លក់ ជួល មានសកម្មភាពមួយៗនៅឡើយ។

លោកបន្តថា “ទីផ្សារជួលមានសកម្មភាពខ្លះ ការទិញខុនដូកើនឡើង ប៉ុន្តែភាគច្រើនជាភ្ញៀវក្នុងស្រុក ដែលទិញស្នាក់នៅ និងសម្រាប់ការវិនិយោគ”។ លោកបន្តថា “ការទិញខុនដូសម្រាប់វិនិយោគលើការជួល មានផលចំណេញពីការវិនិយោគប្រមាណ១០ភាគរយប្រចាំឆ្នាំ”។

លោកច្រឹក សុខនីមបានបន្តថា ភ្ញៀវបរទេសភាគច្រើនជាជនជាតិចិន ហើយភាគច្រើន ជាអ្នកវិនិយោគចាស់ៗ ដែលបានមកកម្ពុជា ដើម្បីចាប់ផ្តើមសកម្មភាពវិនិយោគឡើងវិញ ខណភ្ញៀវថ្មីៗនៅស្ងប់ស្ងាត់នៅឡើយ ប៉ុន្តែយើងរំពឹងថា ចំនួនអ្នកវិនិយោគបរទេសនឹងកើនឡើងច្រើន នាពេលខាងមុខនេះ៕

លោកឧកញ៉ាលឹម ហេងៈ អ្នកធុរកិច្ចជប៉ុនជាច្រើនបានចូលមកកាន់កម្ពុជាបន្ទាប់ពីវិបត្តិ

ដោយៈ ជេស៊ីកា

ភ្នំពេញៈ អនុប្រធានសភាពាណិជ្ជកម្មកម្ពុជា លោកឧកញ៉ាលឹម ហេងបានថ្លែងថា អ្នកវិនិយោគជប៉ុនមកកម្ពុជាមានការកើនឡើង និងច្រើនផ្នែក ដូចជាកសិកម្ម ឧស្សាហកម្ម ធនាគារ សេវាកម្ម សំណង់ អចលនទ្រព្យផ្សារទំនើបជាដើម។

លោកបន្តថា អ្នកវិនិយោគជប៉ុនមកកម្ពុជាមានការកើនឡើង និងច្រើនផ្នែក ដូចជាកសិកម្ម ឧស្សាហកម្ម ធនាគារ សេវាកម្ម សំណង់ អចលនទ្រព្យផ្សារទំនើបជាដើម។ ការវិនិយោគរបស់ជប៉ុន បានរួមចំណែកដល់សេដ្ឋកិច្ចរបស់កម្ពុជា តាមរយៈប្រព័ន្ធបច្ចេកវិទ្យាទំនើបទាន់សម័យ។

លោកបន្តថា “បច្ចុប្បន្ននេះបរិយាកាស និងឱកាសវិនិយោគនៅកម្ពុជា មានភាពល្អប្រសើរ ដោយសារកម្ពុជាមានសមត្ថភាព អាចគ្រប់គ្រងបានទាំងស្រុងនូវការឆ្លងរាលដាលជំងឺកូវីដ-១៩”។ លោកឧកញ៉ាបន្តថា “អ្នកវិនិយោគជប៉ុន បានស្វះស្វែងមកកាន់តែច្រើន ដើម្បីរកឱកាសវិនិយោគនៅកម្ពុជា”។

លោកឧកញ៉ា បានគូសបញ្ជាក់ទៀតថា ការកើនឡើងនេះ គឺលើគ្រប់វិស័យ។ លើសពីនេះទៀត ក្រុមហ៊ុនជប៉ុន បាននិងកំពុងសម្លឹងមើលលើការវិនិយោគបង្កើតរោងចក្រដំឡើង រថយន្តតូយ៉ូតានៅកម្ពុជា នាពេលឆាប់ៗខាងមុខនេះ។ តាមរយៈយុទ្ធសាស្រ្តមេគង្គជប៉ុន ឬជប៉ុនបូកមួយ ដែលត្រូវតភ្ជាប់ពីវៀតណាម កម្ពុជា ថៃ និងភូមា។

លោកបន្តថា រាជរដ្ឋាភិបាលកម្ពុជា បាននិងកំពុងជំរុញកិច្ចព្រមព្រៀងពាណិជ្ជកម្មសេរីរវាងកម្ពុជា ជប៉ុន ផងដែរ។ ការពន្លឿនកិច្ចព្រមព្រៀងនេះ ដោយសារនាថ្ងៃអនាគត កម្ពុជាយើងក្លាយជាប្រទេសជឿនលឿន យើងអាចនឹងអស់ EBA និង GSP ដោយយើងរំពឹងលើ FTAដែលជាឈ្នាន់នៃកំណើនសេដ្ឋកិច្ចវិញ។

ទិន្នន័យដែលកត់ត្រាដោយអគ្គនាយកដ្ឋានគយ និងរដ្ឋាករកម្ពុជា បានបញ្ជាក់ថា នៅត្រីមាសទី១ ឆ្នាំ២០២២នេះ ទំហំពាណិជ្ជកម្មកម្ពុជា-ជប៉ុន មានទឹកប្រាក់ប្រមាណ៤៨០លានដុល្លារអាមេរិក កើនឡើង៣.៥ភាគរយ ក្នុងនោះកម្ពុជា នាំចេញទៅជប៉ុនមានទឹកប្រាក់៣០៥លានដុល្លារ និងជប៉ុននាំចូលមកកម្ពុជា មានទឹកប្រាក់១៧៤លានដុល្លារ៕

កម្ពុជាបាត់បង់ផលទុនជាតិសរុប (GDP) ប្រមាណ ២,៥ទៅ៣ភាគរយក្នុងមួយឆ្នាំ ដោយសារគ្រោះថ្នាក់ចរាចរណ៍

ដោយៈ គង់ សូរិយា

ញូយ៉កៈ លោកទេសរដ្ឋមន្រ្តីស៊ុន ចាន់ថុលរដ្ឋមន្រ្តីក្រសួងសាធារណៈការ និងដឹកជញ្ជូនបានលើកឡើងថា កម្ពុជាបានបាត់បង់GDPចន្លោះពី២,៥ទៅ៣ភាគរយក្នុងមួយឆ្នាំដោយសារគ្រោះថ្នាក់ចរាចរណ៍។

យោងតាមរបាយការណ៍ប្រចាំឆ្នាំ២០១០ដល់ឆ្នាំ២០២០ របស់ប្រព័ន្ធជនរងគ្រោះ ដោយសារគ្រោះថ្នាក់ចរាចរណ៍ (RCVIS) មូលហេតុចម្បងនៃគ្រោះថ្នាក់ចរាចរណ៍គឺ ល្មើសល្បឿន ជែងគ្រោះថ្នាក់ មិនគោរពសិទ្ធិអាទិភាព និងស្រវឹង។ កំហុសក្នុងការរចនាផ្លូវ និងកង្វះលក្ខណៈបច្ចេកទេសយានជំនិះ ក៏បានរួមចំណែកដល់គ្រោះថ្នាក់ចរាចរណ៍ផងដែរ។

លោកស៊ុន ចាន់ថុល បានថ្លែងបែបនេះ ក្នុងពេលចូលរួមកិច្ចប្រជុំកំពូលស្តីពី ការធ្វើឱ្យប្រសើរឡើងនូវសុវត្ថិភាពចរាចរណ៍សកល ក្រោមប្រធានបទ “ដំណើរឆ្ពោះទៅឆ្នាំ២០៣០ សម្រាប់សុវត្ថិភាពចរាចរណ៍ផ្លូវគោក ការធានាឱ្យមានសកម្មភាពប្រចាំទសវត្សរ៍ និងការផ្សព្វផ្សាយ” ដែលបានប្រព្រឹត្តទៅ នៅទីស្នាក់ការអង្គការសហប្រជាជាតិ នៅទីក្រុងញូវយ៉ក សហរដ្ឋអាមេរិក។

លោកបន្តថា យើងបានពង្រឹងការអនុវត្ត ច្បាប់ចរាចរណ៍ផ្លូវគោក និងគោលនយោបាយជាតិស្ដីពី សុវត្ថិភាពចរាចរណ៍ផ្លូវគោក និងទសវត្សរ៍នៃសកម្មភាពឆ្នាំ២០១១-២០២០។ យើងបានជួយសង្គ្រោះជីវិតមនុស្ស ៤.៥៦១នាក់ក្នុងអំឡុងពេលនេះ បើធៀបនឹងគោលដៅរបស់យើង ដែល មានចំនួន៧.៣៣៨នាក់។

លោកបន្តថា “ការកាត់បន្ថយគ្រោះថ្នាក់ចរាចរណ៍ គឺជាការទទួលខុសត្រូវរបស់អ្នកពាក់ព័ន្ធទាំងអស់ រដ្ឋាភិបាលមិនអាចធ្វើបានតែម្នាក់ឯងទេ”។ លោកបន្ថែមថា “យើងត្រូវការទាំងវិស័យសាធារណៈ និងឯកជន អង្គការក្រៅរដ្ឋាភិបាល និងប្រព័ន្ធផ្សព្វផ្សាយ ដើម្បីសហការជាមួយរដ្ឋាភិបាល ដើម្បីអប់រំអ្នកប្រើប្រាស់ផ្លូវអំពីច្បាប់ស្តីពី ចរាចរណ៍ផ្លូវគោក”។

ក្នុងន័យនេះ គ.ស.ច.គ. បាន និងកំពុងសហការជាមួយសភាពាណិជ្ជកម្មក្នុង ប្រទេសកម្ពុជា ដើម្បីឱ្យអប់រំបុគ្គលិករបស់ពួកគេអំពីច្បាប់ស្តីពីចរាចរណ៍ផ្លូវគោក៕

បន្ទាប់ពីរង់ចាំយ៉ាងយូរ ក្រុមហ៊ុនមកពីហុងកុងនឹងបើកការស៊ីណូនៅតំបន់តារាសាគរនាខែកញ្ញាខាងមុខ

ដោយៈ គង់ សូរិយា

កោះកុងៈ បន្ទាប់ពីបានពន្យាពេលយ៉ាងយូរ ទីបំផុតក្រុមហ៊ុនហុងកុង Century Entertainment International Holdings Ltd រំពឹងថា ខ្លួននឹងអាចចាប់ផ្តើមប្រតិបត្តិការអាជីវកម្មតុហ្គេម នៅក្នុងកាស៊ីណូថ្មីមួយនៅតារាសាគរ ខេត្តកោះកុងប្រទេសកម្ពុជា នៅចុងខែកញ្ញា ខាងមុខនេះ បន្ទាប់ពីមានការធ្លាក់ចុះ ជាបន្តបន្ទាប់ដោយសារវិបត្តិកូវីដកន្លងមក។

ក្រុមហ៊ុននេះ បានប្រកាសពីលទ្ធផលហិរញ្ញវត្ថុរបស់ខ្លួន កាលពីថ្ងៃទី ៣១ ខែមីនា ឆ្នាំ ២០២២កន្លងមកនេះ។

របាយការណ៍របស់ក្រុមហ៊ុននេះបានបង្ហាញថា ប្រាក់ចំណូលធ្លាក់ចុះ ៧២,៥% ទៅ២០០,០០០ដុល្លារហុងកុង (២៥៥០០ដុល្លារអាមេរិក) ប៉ុន្តែគម្លាតនៃការខាតបង់គឺតូច ពី ៤៣លានដុល្លារហុងកុង (៥,៥ លានដុល្លារ) ក្នុងឆ្នាំសារពើពន្ធ២០២១ ដល់៣,៧លានដុល្លារហុងកុង (៤៧១ ០០០ ដុល្លារ)។ ដូច្នេះក្រុមហ៊ុនក៏បានបញ្ជាក់ថា ខ្លួននៅតែរក្សាសិទ្ធិក្នុងការដំណើរការតុហ្គេមចំនួនពីរនៅកាស៊ីណូ។

ប្រធាន និងជានាយកប្រតិបត្តិរបស់ Century Entertainment លោក Ng Man Sun ធ្លាប់បានលើកឡើងម្តងរួចហើយថា កាស៊ីណូនេះ នឹងត្រូវផ្លាស់ប្តូរទីតាំងពីក្រុងព្រះសីហនុ មកកាន់តំបន់តារាសាគរវិញ។

លោកក៏បានបន្តថា “ក្រុមហ៊ុនត្រូវតែអនុវត្តន៍ផែនការ បើកដំណើរការអាជីវកម្មតុហ្គេមនេះឡើងវិញ នៅក្នុងតំបន់វិនិយោគតារាសាគរ និងកំណត់គោលដៅ ចាប់ផ្តើមប្រតិបត្តិការអាជីវកម្មតុហ្គេម ចាប់ពីខែកញ្ញា ឆ្នាំ២០២២ ខាងមុខនេះ បន្ទាប់ពីបញ្ចប់ការធ្វើតេស្តប្រព័ន្ធអេឡិចត្រូនិច និងបណ្តុះបណ្តាលបុគ្គលិកកាស៊ីណូបានរួចរាល់”៕

World Bank: វ៉ាក់សាំងនិងកិច្ចព្រមព្រៀងពាណិជ្ជកម្មសេរីជួយជំរុញឱ្យសេដ្ឋកិច្ចរបស់កម្ពុជាស្ទុះងើបឡើងវិញ

ដោយ៖ សុខុម

ភ្នំពេញ: អត្រាខ្ពស់នៃការចាក់វ៉ាក់សាំងកូវីដ-១៩ និងកិច្ចព្រមព្រៀងពាណិជ្ជកម្មសេរី (FTAs) ដូចជាកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) និងកិច្ចព្រមព្រៀងពាណិជ្ជកម្មសេរីកម្ពុជា-ចិន (CCFTA) បាននិងកំពុងជួយជំរុញឱ្យសេដ្ឋកិច្ចរបស់កម្ពុជា ស្ទុះងើបឡើងវិញ។

នេះបើយោងតាមរបាយការណ៍បច្ចុប្បន្នភាពសេដ្ឋកិច្ចរបស់ធនាគារពិភពលោក (World Bank) ដែលត្រូវបានចុះផ្សាយកាលពីថ្ងៃព្រហស្បតិ៍ ទី៣០ ខែមិថុនា។

របាយការណ៍ដដែលនេះព្យាករថា សេដ្ឋកិច្ចរបស់កម្ពុជា នឹងសម្រេចបានកំណើន៤,៥%ក្នុងឆ្នាំ២០២២ នេះ និងប្រមាណ៦%សម្រាប់រយៈពេលមធ្យម។

ទោះជាយ៉ាងណា ការឡើងថ្លៃថាមពល និងស្បៀងអាហារទូទាំងពិភពលោកត្រូវបានរំពឹងថានឹងជំរុញអតិផរណារបស់កម្ពុជា ឱ្យឡើងដល់៧,២%នៅឆ្នាំនេះ បើធៀបនឹង៣,៥%កាលពីឆ្នាំ២០២១។

រហូតមកដល់ពេលនេះ វ៉ាក់សាំងកូវីដ-១៩ ត្រូវបានចាក់ជូនប្រជាជនបានរហូតដល់ទៅជិត១៥,១លាននាក់ ដែលស្មើនឹង៩៤,៣%នៃប្រជាជនសរុប១៦លាននាក់ ហើយវ៉ាក់សាំង Sinovac និង Sinopharm របស់ប្រទេសចិន ត្រូវបានប្រើប្រាស់យ៉ាងទូលំទូលាយនៅក្នុងកម្មវិធីចាក់វ៉ាក់សាំងនៅកម្ពុជា។

ការចាក់វ៉ាក់សាំងក្នុងអត្រាខ្ពស់ បានធ្វើឱ្យកម្ពុជា មានលទ្ធភាពបន្តគ្រប់សកម្មភាពសេដ្ឋកិច្ច និងសង្គម ហើយបានបើកព្រំដែនរបស់ខ្លួនឡើងវិញ ដើម្បីស្វាគមន៍ភ្ញៀវទេសចរដែលចាក់វ៉ាក់សាំងគ្រប់ដូសដោយមិនតម្រូវឱ្យធ្វើចត្តាឡីស័ក ចាប់តាំងពីខែវិច្ឆិកា ឆ្នាំមុន។

លោកស្រី Maryam Salim នាយកធនាគារពិភពលោកប្រចាំប្រទេសកម្ពុជា មានប្រសាសន៍អំឡុងពេលបញ្ចេញរបាយការណ៍ខាងលើថា “យុទ្ធសាស្ត្ររបស់រដ្ឋាភិបាលកម្ពុជា នៅក្នុងរៀនរស់ជាមួយកូវីដ-១៩ បានអនុញ្ញាតឱ្យកម្ពុជា បើកប្រទេសឡើងវិញ ដែលបានជួយជំរុញឱ្យសេដ្ឋកិច្ចងើបឡើងវិញ”។

លោកស្រីបានបន្ថែមទៀតថា “ទោះជាយ៉ាងណា ផ្លូវនៅខាងមុខនៅតែមិនច្បាស់លាស់នៅឡើយ។ ការឡើងថ្លៃថាមពល និងស្បៀងអាហារដោយសារសង្រ្គាមនៅអ៊ុយក្រែន កំពុងដាក់បន្ទុកបន្ថែមទៀតមកលើពលរដ្ឋក្រីក្រ ហើយស្ថានភាពនេះនឹងធ្វើឱ្យការកាត់បន្ថយភាពក្រីក្រមានសន្ទុះយឺត”។

យោងតាមទិន្នន័យរបស់រដ្ឋាភិបាលបង្ហាញថា ការនាំចេញសរុបរបស់ប្រទេសមានទំហំ៩,៤១ពាន់លានដុល្លារអាមេរិក អំឡុងខែមករា ដល់ខែឧសភា ឆ្នាំ២០២២ នេះ ដោយកើនឡើង៣៤,៥%បើធៀបនឹងរយៈពេលដូចគ្នាកាលពីឆ្នាំមុន ជាពិសេសសម្លៀកបំពាក់ ទំនិញសម្រាប់ដំណើរកម្សាន្តដូចជាវ៉ាលិសជាដើម ព្រមទាំងស្បែកជើងផងដែរ។ ទន្ទឹមនេះ ឧស្សាហកម្មផលិតកម្មថ្មីៗដូចជាផ្នែកអគ្គិសនី និងរថយន្តក៏កំពុងមានសន្ទុះងើបឡើងផងដែរ។

លោក លី សុដេត អ្នកសេដ្ឋកិច្ចជាន់ខ្ពស់របស់ធនាគារពិភពលោកប្រចាំនៅកម្ពុជា មានប្រសាសន៍ថា ច្បាប់វិនិយោគថ្មីរបស់កម្ពុជា រួមជាមួយនឹងកិច្ចព្រមព្រៀងពាណិជ្ជកម្មសេរី RCEP និង CCFTA បានជួយជំរុញការវិនិយោគ និងពាណិជ្ជកម្មរបស់កម្ពុជា៕

មន្រ្តីជំនាញពន្យល់ពីហេតុផលធ្វើឱ្យពន្យារពេលបើកដំណើរការផ្លូវល្បឿនលឿនភ្នំពេញ-ព្រះសីហនុ

ដោយ៖ សហការី

ភ្នំពេញ៖ ឆ្លើយតបជាមួយនឹងចម្ងល់ជាច្រើនពីសំណាក់មហាជន ដែលមានបំណងចង់បើកបរលើផ្លូវល្បឿនលឿនភ្នំពេញ-ព្រះសីហនុ ក្រោយមានការពន្រយាពេលឲ្យធ្វើដំណើរនោះ លោក គង់ វិមាន អនុរដ្ឋលេខាធិការ និងជានាយកខុទ្ទកាល័យក្រសួងសាធារណការ និងដឹកជញ្ជូន នាថ្ងៃទី០១ ខែកក្តដា ឆ្នាំ២០២២នេះ បានលើកឡើងពីហេតុផលសំខាន់ៗមួយចំនួន។

លោក គង់ វិមាន បានឡើកឡើងដូចនេះថា ហេតុផលនៃការពន្យារពេលបើកឱ្យប្រើប្រាស់ជាបណ្តោះអាសន្នផ្លូវល្បឿនលឿនភ្នំពេញ-ខេត្តព្រះសីហនុ ដោយមូលហេតុ សំខាន់ៗ ដោយសារលទ្ធផលសាងសង់បាន៩៤%នៅឡើយ ក្នុងនោះបញ្ហាស្លាកសញ្ញាចរាចរណ៏មិនទាន់បានបំពាក់អោយបានគ្រប់គ្រាន់នៅឡើយ ហើយរបងការពារសុវត្ថិភាពផ្លូវទើបបានជាង៧០%។

ចំណែក រនាំងទ្រូងផ្លូវនិងសួនច្បារទើបបានប្រហែល៨០% ស្ពានរំលងអាកាសមួយចំនួនពុំទាន់បានរួចរាល់ និងចំនុចចាប់ផ្តើមដើមទីចុងទីពុំទាន់បានបញ្ចប់ជាស្ថាពរនៅឡើយ។ ម្យ៉ាងទៀត ទីតាំងចំណតទាំង៤កន្លែងនៅពុំទាន់រួចរាល់១០០% បរិក្ខាមួយចំនួនទៀតពុំទាន់បានបំពាក់រួចរាល់ និង បញ្ហាផ្សេងៗ។

លោក គង់ វិមាន បានបញ្ជាក់ទៀតថា ការងារដែលនៅសេសសល់និងត្រូវបញ្ចប់ចុងខែសីហា ឆ្នាំ២០២២ខាងមុខនេះ ជាមួយគ្នានោះ ក្រសួង និងក្រុមហ៊ុនបានពិភាក្សាគ្នា និងបានកំណត់ថានឹងដាក់ឱ្យដំណើរការបណ្តោះអាសន្ន នៅដើមខែកញ្ញា ឆ្នាំ២០២២ខាងមុខនេះ។

គម្រោងផ្លូវល្បឿនលឿនភ្នំពេញ-ព្រះសីហនុ មានប្រវែង ១៨៧.០៥គីឡូម៉ែត្រ ដែលបានបើកការដ្ឋានសាងសង់ កាលពីថ្ងៃទី២២ ខែមីនា ឆ្នាំ២០១៩។ ផ្លូវនេះតភ្ជាប់ពីភូមិ១ សង្កាត់ សំរោងក្រោម ខណ្ឌពោធិ៍សែនជ័យ រាជធានីភ្នំពេញ ដល់ភូមិ១ សង្កាត់លេខ៣ ក្រុងព្រះសីហនុ ខេត្តព្រះសីហនុ។

ផ្លូវនេះអនុវត្តការសាងសង់ដោយក្រុមហ៊ុន PPSHV Expressway Co., Ltd និងក្រុមហ៊ុនបុត្រសម្ព័ន្ធនៃ ក្រុមហ៊ុនសាជីវកម្មស្ពានថ្នល់ចិន (CRBC) និងត្រួតពិនិត្យ បច្ចេកទេសដោយក្រុមហ៊ុន MINCONSULT SDN. BHD. ប្រើរយៈពេលសាងសង់ ៤៨ខែ គ្រោងចំណាយថវិកាជិត ២ពាន់លានដុល្លារ សហរដ្ឋអាមេរិក មានគន្លងផ្លូវចំនួន៤គន្លង ទទឹងផ្លូវសរុប ២៤,៥ ម៉ែត្រ មានផ្លូវបំបែកទិស ៧កន្លែង មានកន្លែងឈប់សម្រាកចំនួន ៣កន្លែង ចំណតរថយន្ត១កន្លែង មណ្ឌលប្រតិបត្តិការ និងថែទាំចំនួន ៤កន្លែង ស្ពានធំ និងស្ពានមធ្យមចំនួន៤០កន្លែង ស្ពានតូចចំនួន៥កន្លែង។

ផ្លូវល្បឿនលឿននេះឆ្លងកាត់រាជធានីភ្នំពេញប្រមាណ៨គីឡូម៉ែត្រ និងខេត្តចំនួន០៤បួន ក្នុងនោះ ខេត្តកណ្តាលប្រវែង៩,១គីឡូម៉ែត្រ ខេត្តកំពង់ស្ពឺប្រវែង៨០,៨គីឡូម៉ែត្រ ខេត្តកោះកុងប្រវែង១,៩២គីឡូម៉ែត្រ និងខេត្តព្រះសីហនុប្រវែង៨៩,៨៩គីឡូម៉ែត្រ។

គម្រោងសាងសង់ផ្លូវល្បឿនលឿន-ភ្នំពេញព្រះសីហនុ គឺជាគម្រោងផ្លូវល្បឿនលឿនទី១ និងជាគម្រោងផ្លូវរបៀងយុទ្ធសាស្ត្រសំខាន់បំផុតនៅកម្ពុជា ជួយកាត់បន្ថយ ពេលវេលាធ្វើដំណើរពីរាជធានីភ្នំពេញទៅ ផែសមុទ្រក្រុងព្រះសីហនុ ពីចំនួនប្រាំម៉ោងមកត្រឹមតែពីរម៉ោងប៉ុណ្ណោះ និងជួយកាត់បន្ថយតម្លៃភស្តុភារកម្មផងដែរ៕

1...1,3811,3821,383...3,286 Page 1,382 of 3,286