ដោយៈ ចំណាន

    កំពតៈ កំពង់ផែអន្តរជាតិកំពត និងតំបន់សេដ្ឋកិច្ចពិសេសកំពត (កំពង់ផែកំពត) បានត្រៀមខ្លួនរួចជាស្រេច ក្នុងការផ្តល់សេវាកម្មច្រកចេញចូលតែមួយ សម្រាប់ប្រតិបត្តិការពាណិជ្ជកម្ម ដោយគូសបញ្ជាក់ពីតួនាទីកាន់តែសំខាន់ ក្នុងការពង្រឹងការតភ្ជាប់ភស្តុភារកម្ម និងកិច្ចសម្របសម្រួលពាណិជ្ជកម្មរបស់ប្រទេសកម្ពុជា។

ថ្លែងទៅកាន់ប្រព័ន្ធផ្សព្វផ្សាយមួយ លោកស្រី អាត់ សំភី ប្រធានទំនាក់ទំនងអតិថិជន នៃកំពង់ផែពហុបំណង និងសួនឧស្សាហកម្មកំពត បាននិយាយថា កំពង់ផែកំពតបានក្លាយជាកំពង់ផែសមុទ្រជ្រៅអន្តរជាតិទីបីរបស់កម្ពុជា ដែលត្រូវបានដាក់ឱ្យដំណើរការជាផ្លូវការនៅក្នុងខែមិថុនា ឆ្នាំ២០២៤ ដែលជាការផ្លាស់ប្តូរដ៏សំខាន់មួយ នៅក្នុងវិធីសាស្រ្តរបស់ប្រទេសចំពោះពាណិជ្ជកម្ម និងភស្តុភារកម្ម។

លោកស្រី សំភី បានពន្យល់ថា ទាំងតំបន់សេដ្ឋកិច្ចពិសេសកំពត (KSEZ) និងកំពង់ផែពហុបំណងកំពត (KMP) មានទីតាំងស្ថិតនៅក្នុងតំបន់សេដ្ឋកិច្ចពិសេស និងកំពង់ផែអន្តរជាតិខេត្តកំពត ដែលកាត់បន្ថយពេលវេលាដឹកជញ្ជូន និងថ្លៃភស្តុភារកម្មយ៉ាងច្រើន សម្រាប់អាជីវកម្មដែលកំពុងប្រតិបត្តិការនៅក្នុងតំបន់នោះ។

ដោយដំណើរការដោយកំពង់ផែពហុបំណង និងសួនឧស្សាហកម្មខេត្តកំពត ប្រធានទំនាក់ទំនងអតិថិជនបានសង្កត់ធ្ងន់ លើការប្តេជ្ញាចិត្តរបស់រាជរដ្ឋាភិបាល រួមជាមួយនឹងការលើកទឹកចិត្តជាច្រើន រួមទាំងវិធានការគាំទ្របរិស្ថាន ការលើកលែងពន្ធ និងអត្ថប្រយោជន៍ពន្ធ។

លោកស្រីបានបញ្ជាក់ថា “កំពង់ផែខេត្តកំពត បានត្រៀមខ្លួនរួចជាស្រេចដើម្បីស្វាគមន៍វិនិយោគិនថ្មី ជាមួយនឹងហេដ្ឋារចនាសម្ព័ន្ធសំខាន់ៗ សេវាកម្មច្រកចេញចូលតែមួយ និងការលើកទឹកចិត្តដែលគាំទ្រដោយរដ្ឋាភិបាល”។លោកស្រីបន្ថែមថា “គម្រោងជាច្រើនកំពុងដំណើ​រការនៅក្នុងកំពង់ផែខេត្តកំពត រួមមានរោងចក្រដែកថែប រោងចក្រជី និងរោងចក្រក្តារបន្ទះ ដែលឆ្លុះបញ្ចាំងពីសកម្មភាពឧស្សាហកម្ម ដែលកំពុងកើនឡើងនៅក្នុងតំបន់”។

លោកស្រី សំភី បានកត់សម្គាល់ថា KSEZ គឺជាទីតាំងយុទ្ធសាស្ត្រ ដែលផ្តល់នូវការលើកទឹកចិត្តជាច្រើន ដើម្បីទាក់ទាញវិនិយោគិនក្នុងស្រុក និងបរទេស រួមមានការសម្រួលដំណើរការបទប្បញ្ញត្តិ ហេដ្ឋារចនាសម្ព័ន្ធដែលប្រសើរឡើង និងគោលនយោបាយអំណោយផលដល់វិនិយោគិន។

លោកស្រីបន្ថែមថា កំពង់ផែពហុបំណងខេត្តកំពត (KMP) ដែ​លជាកំពង់ផែឈានមុខគេ មានគោលដៅគាំទ្រអាជីវកម្ម ក្នុងការកសាងដំណោះស្រាយភស្តុភារកម្ម ប្រកបដោយប្រសិទ្ធភាពតាមរយៈប្រតិបត្តិការកំពង់ផែប្រកបដោយវិជ្ជាជីវៈ និងតំបន់សេដ្ឋកិច្ចពិសេសរួមបញ្ចូលគ្នា ដែលរួមចំណែកដល់កំណើនពាណិជ្ជកម្ម និងវិនិយោគរយៈពេលវែងរបស់ប្រទេសកម្ពុជា៕

ដោយៈ ចំណាន

    ភ្នំពេញៈ ទុនបម្រុងអន្តរជាតិរបស់កម្ពុជា បានកើនឡើងដល់ជាង ២៧ពាន់លានដុល្លារនៅឆ្នាំ ២០២៥ ដោយគ្របដណ្តប់ប្រហែល៨ខែនៃការនាំចូលទំនិញ និងសេវាកម្មក្នុងរយៈពេលបន្ទាប់ ដែលជាកម្រិតមួយ ត្រូវបានគេចាត់ទុកថាគ្រប់គ្រាន់។

នេះបើយោងតាមរបាយការណ៍ ដែលចេញផ្សាយដោយធនាគារជាតិនៃកម្ពុជា (NBC) កាលពីថ្ងៃសុក្រ។

ធនាគារជាតិបានអោយដឹងថា កម្រិតខ្ពស់នៃទុនបម្រុងដែលបន្តឆ្លុះបញ្ចាំងពីសមត្ថភាព ទូទាត់បំណុលខាងក្រៅដ៏រឹងមាំរបស់កម្ពុជា ស្ថិរភាពអត្រាប្តូរប្រាក់ និងភាពធន់នៃប្រព័ន្ធទូទាត់ជាតិ ខណៈដែលផ្តល់នូវទ្រនាប់ទុនគ្រប់គ្រាន់ ដើម្បីបំពេញតម្រូវការសន្ទនីយភាពក្នុងករណីមានវិបត្តិខាងក្រៅ។

យោងតាមរបាយការណ៍បានឲ្យដឹងថា ទុនបម្រុងអន្តរជាតិបានកើនឡើង២២,៣ភាគរយ ពី២២,៥ពាន់លានដុល្លារនៅឆ្នាំ ២០២៤ ដល់២៧,៥ ពាន់លានដុល្លារនៅឆ្នាំ២០២៥ ស្មើនឹងប្រហែលប្រាំបីខែនៃការនាំចូលទំនិញ និងសេវាកម្ម ដែលត្រូវបានចាត់ទុកថាមានកម្រិតខ្ពស់សម្រាប់សេដ្ឋកិច្ចកំពុងអភិវឌ្ឍន៍។

ការកើនឡើងនេះ ភាគច្រើនបណ្តាលមកពីតម្លៃមាសពិភពលោកកើនឡើង ប្រាក់ចំណូលពីការវិនិយោគបរទេស ការប្រែប្រួលអត្រាប្តូរប្រាក់ និងការកើនឡើងនៃប្រាក់បញ្ញើពីស្ថាប័នធនាគារ និងហិរញ្ញវត្ថុ រាជរដ្ឋាភិបាល និងទុនបម្រុងចាំបាច់។

ធនាគារជាតិនៃកម្ពុជាបានកត់សម្គាល់ថា ការគ្រប់គ្រងទុនបម្រុងអន្តរជាតិ នៅតែបន្តធ្វើឡើងដោយប្រុងប្រយ័ត្ន ស្របតាមឧត្តមានុវត្តអន្តរជាតិ។ ក្របខ័ណ្ឌគ្រប់គ្រងទុនបម្រុងត្រូវបានរចនាឡើង ដើម្បីធានាសុវត្ថិភាព សន្ទនីយភាព និងប្រសិទ្ធភាព ជាមួយនឹងទិសដៅយុទ្ធសាស្ត្រ និងកម្រិតហានិភ័យដែលអាចទទួលយកបាន ដែលកំណត់ដោយក្រុមប្រឹក្សាភិបាល តាមរយៈការអនុម័តគោលនយោបាយវិនិយោគប្រចាំឆ្នាំ ឬតាមតម្រូវការ។

ការត្រួតពិនិត្យប្រតិបត្តិការ ត្រូវបានអនុវត្តតាមរយៈការត្រួតពិនិត្យប្រចាំខែ ដោយគណៈកម្មាធិការវិនិយោគទុនបម្រុង ដែលមានទេសាភិបាលធនាគារជាតិនៃកម្ពុជាជាប្រធាន។

គណៈកម្មាធិការពិនិត្យឡើងវិញ នូវការអនុវត្តវិនិយោគ វាយតម្លៃស្ថានភាពទីផ្សារ និងណែនាំការកែតម្រូវចាំបាច់ ដើម្បីធានាថាការគ្រប់គ្រងទុនបម្រុង នៅតែផ្តោតលើការអភិរក្សដើមទុន សន្ទនីយភាព និងផលចំណេញសមស្រប។

នៅឆ្នាំ២០២៥ ធនាគារជាតិបានពង្រឹងក្របខ័ណ្ឌ គ្រប់គ្រងទុនបម្រុងរបស់ខ្លួនបន្ថែមទៀត ដោយធ្វើបច្ចុប្បន្នភាពឧបករណ៍សំខាន់ៗមួយចំនួន រួមទាំងគោលការណ៍ណែនាំវិនិយោគ គោលការណ៍ណែនាំស្តីពីការជ្រើសរើស និងការគ្រប់គ្រងអ្នកគ្រប់គ្រងខាងក្រៅ និងអ្នកថែរក្សា និងបទប្បញ្ញត្តិផ្ទៃក្នុងស្តីពី ក្រមសីលធម៌វិជ្ជាជីវៈសម្រាប់បុគ្គលិកគ្រប់គ្រងទុនបម្រុង។

ការកែលម្អក៏ត្រូវបានធ្វើឡើង ចំពោះប្រព័ន្ធគ្រប់គ្រងទុនបម្រុង រួមជាមួយនឹងការធ្វើពិពិធកម្ម និងការបន្ថែមអ្នកការពារ សំដៅបំណងបង្កើនសុវត្ថិភាព និងប្រសិទ្ធភាពប្រតិបត្តិការ។

ក្នុងពេលជាមួយគ្នានេះ ធនាគារជាតិនៃកម្ពុជាបានបន្តពង្រីកការវិនិយោគលើមូលបត្របៃតង និងមូលបត្រទាកទងនឹងបរិស្ថាន សង្គម និងអភិបាលកិច្ច (ESG) ដែលចេញដោយស្ថាប័នហិរញ្ញវត្ថុអន្តរជាតិធំៗនៅក្នុងប្រទេសចិន កូរ៉េខាងត្បូង ជប៉ុន និងអឺរ៉ុប។

វិធានការនេះ ស្របទៅនឹងយុទ្ធសាស្ត្រគ្រប់គ្រងទុនបម្រុង របស់កម្ពុជា ជាមួយនឹងនិន្នាការវិនិយោគសកល ខណៈដែលគាំទ្រដល់ការអនុវត្តវិនិយោគប្រកបដោយចីរភាព មានទំនួលខុសត្រូវ និងមានហានិភ័យទាប៕