អ្នកជំនាញដីធ្លីរំពឹងពីកំណើននៃតម្រូវការដីធ្លីនៅខេត្តកំពត ក្រោយរដ្ឋាភិបាលបើកការដ្ឋានសាងសង់កំពង់ផែថ្មី

ដោយ៖ វឌ្ឍនៈ

ភ្នំពេញ ៖ មជ្ឈមណ្ឌលភស្តុភារកម្ម និងកំពង់ផែពហុបំណងក្នុងខេត្តកំពតបានបើកការដ្ឋានសាងសង់ជាផ្លូវការកាលពីថ្ងៃទី៥ ខែឧសភា ឆ្នាំ២០២២ ហើយគ្រោងដាក់ដំណើរការនៅអំឡុងឆ្នាំ២០២៥ខាងមុខ។ អ្នកជំនាញលើវិស័យអចលនទ្រព្យកម្ពុជារំពឹងថា គម្រោងដ៏ធំមួយនេះ នឹងធ្វើឱ្យមានកំណើននៃតម្រូវការដីធ្លីសម្រាប់អភិវឌ្ឍន៍មួយកម្រិតទៀតនៅពេលខាងមុខ។

លោក ជិន ណារិន នាយកប្រតិបត្តិក្រុមហ៊ុនអចលនទ្រព្យ Sunshine Kampot Real Estate បានឱ្យដឹងថា គម្រោងអភិវឌ្ឍន៍ មជ្ឈមណ្ឌលភស្ដុភារកម្ម និងកំពង់ផែពហុបំណងនៅក្នុងទឹកដីនៃខេត្តកំពតនេះ នឹងធ្វើឱ្យតម្រូវការដីសម្រាប់ប្រើប្រាស់មានកំណើនទ្វេរដង។

លោកបន្តថា ការសាងសង់កំពង់ផែពហុបំណងនៅក្នុងខេត្តកំពតនេះនឹងធ្វើឱ្យកំណើនអ្នកវិនិយោគ កំណើនប្រជាជន តាមរយៈការផ្ដល់ឱកាសការងារដល់ប្រជាពលរដ្ឋមកពីខេត្តផ្សេងៗ មកកាន់ខេត្តកំពត មានការកើនឡើង និងធ្វើឱ្យភ្ញៀវទេសចរជាតិនិងអន្តរជាតិកាន់តែច្រើនចូលមកទស្សនា នៅក្នុងខេត្តកំពតបន្ថែមទៀត។ ពេលនោះតម្រូវការការស្នាក់នៅ ការហូបចុក និងការកម្សាន្តក៏មានកំណើនដូចគ្នាដែរ ដែលទាមទារឱ្យមានការវិនិយោគបន្ថែម។

លោកបន្តទៀតថា “តាមពិតទៅ អ្នកវិនិយោគជាតិនិងអន្តរជាតិជាច្រើនហើយបានចូលមកកាន់ខេត្តកំពត ដើម្បីស្វែងរកការវិនិយោគ គឺចាប់តាំងពីរាជរដ្ឋាភិបាលបានប្រកាសពីការវិនិយោគលើមជ្ឈមណ្ឌលភស្តុភារកម្ម និងកំពង់ផែពហុបំណងមកម្ល៉េះ ។ នៅពេលដែលម្រោងនេះត្រូវបានចាប់ផ្ដើមសាងសង់ បានធ្វើឱ្យអ្នកវិនិយោគកាន់តែមានទំនុកចិត្ត និងបង្កើនល្បឿននៃការវិនិយោគរបស់ខ្លួនបន្ថែមទៀត”។

លោកបន្ថែមថា សម្រាប់អ្នកសម្របសម្រួលការវិនិយោគដូចជារូបលោកជាដើម បានត្រៀមខ្លួនរួចហើយ ក្នុងការជួយដល់វិនិយោគិនជាតិ និងអន្តរជាតិ ដែលចូលមកក្នុងខេត្តកំពត ដើម្បីស្វែងរកការវិនិយោគ ទាំងទីតាំងសម្រាប់ពួកគាត់វិនិយោគ និងឯកសារផ្លូវច្បាប់នានា។

លោកកែវ សុជាតិ ប្រធានសាខានៃក្រុមហ៊ុន KW Cambodia ប្រចាំខេត្តកំពត ក៏បានឱ្យដឹងផងដែរថា នៅពេលមានគម្រោងវិនិយោគធំៗណាមួយ វានឹងទាក់ទាញដល់ការវិនិយោគនានាមកកាន់តំបន់នោះ ហើយគម្រោងកំពង់ផែពហុបំណងនេះអាចចាត់ទុកជាគម្រោងធំមួយរបស់កម្ពុជា ដែលមានទុនរាប់រយលានដុល្លារអាមេរិក។

លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានមានប្រសាសន៍ នៅក្នុងពិធីបើកការដ្ឋានសាងសង់កំពង់ផែពហុបំណងនោះថា គម្រោងមជ្ឈមណ្ឌលភស្តុភារកម្ម និងកំពង់ផែពហុបំណងមួយនេះ នឹងក្លាយជាច្រកនាំចេញនាំចូលសំខាន់មួយទៀតរបស់កម្ពុជា និងអាចបំពេញបន្ថែមនូវចំណុចខ្វះខាតរបស់កំពង់ផែ ដែលមានស្រាប់ ដូចជា កំពង់ផែស្វ័យតក្រុងព្រះសីហនុ និងកំពង់ផែស្វយ័តក្រុងភ្នំពេញជាដើម៕

អចលនទ្រព្យឌូបៃស្ទុះឡើងខ្ពស់ ក្រោយក្រុមមហាសេដ្ឋីរុស្ស៊ីសម្រុកភៀសខ្លួន ដើម្បីគេចពីទណ្ឌកម្ម

ដោយ៖ សុខុម

ឌូបៃ៖ ក្រុងឌូបៃ នៃប្រទេសអារ៉ាប់រួមអេមីរ៉ាត បានក្លាយកន្លែងជ្រកកោនដ៏មានសុវត្ថិភាពសម្រាប់ក្រុមអ្នកមានជនជាតិរុស្ស៊ី ដែលកំពុងគេចពីផលប៉ះពាល់នៃទណ្ឌកម្មពីលោកខាងលិចដាក់លើរុស្ស៊ី ចំពោះការបញ្ឆេះសង្គ្រាមចូលឈ្លានពានអ៊ុយក្រែន។

បណ្ដាថ្នាក់ដឹកនាំអាជីវកម្មបានប្រាប់សារព័ត៌មាន BBC កាលពីថ្ងៃព្រហស្បតិ៍ ទី៥ ខែឧសភាថា ក្រុមមហាសេដ្ឋី និងសហគ្រិនរុស្ស៊ី បានមកដល់ប្រទេសអារ៉ាប់រួមអេមីរ៉ាតយ៉ាងគំហុកក្នុងចំនួនច្រើនមិនធ្លាប់មាន។

សេចក្ដីរាយការណ៍មួយបង្ហាញថា ការទិញអចលនទ្រព្យក្នុងក្រុងឌូបៃ ពីសំណាក់ពលរដ្ឋរុស្ស៊ី បានហក់ឡើងខ្ពស់រហូតដល់ទៅ៦៧%ក្នុងរយៈពេល៣ខែដំបូងនៃឆ្នាំ២០២២។

ប្រទេសអារ៉ាប់រួមអេមីរ៉ាត មិនបានដាក់ទណ្ឌកម្មលើរុស្ស៊ី ឬរិះគន់រុស្ស៊ីឡើយចំពោះការឈ្លានពានចូលប្រទេសអ៊ុយក្រែន។ ប្រទេសនេះក៏កំពុងផ្តល់ទិដ្ឋាការដល់ជនជាតិរុស្ស៊ី ដែលមិនរងទណ្ឌកម្មផងដែរ ខណៈប្រទេសលោកខាងលិចជាច្រើនបានរឹតបន្តឹងលើពួកគេ។

យោងតាមការប៉ាន់ប្រមាណបង្ហាញថា ជនជាតិរុស្ស៊ីរាប់សែននាក់បានចាកចេញពីប្រទេសរុស្ស៊ី ក្នុងរយៈពេល២ខែចុងក្រោយនេះ ទោះបីជាគ្មានតួលេខជាក់លាក់ក្ដី។

អ្នកជំនាញសេដ្ឋកិច្ចជនជាតិរុស្ស៊ី ម្នាក់បានទម្លាយឱ្យដឹងថា ជនជាតិរុស្ស៊ី រហូតដល់២០០.០០០នាក់បានចាកចេញពីប្រទេសរុស្ស៊ី ក្នុងរយៈពេលត្រឹមតែ១០ថ្ងៃ ក្រោយផ្ទុះសង្គ្រាមចូលឈ្លានពានអ៊ុយក្រែន។

ក្រុមហ៊ុន Virtuzone ដែលជួយក្រុមហ៊ុននានាបង្កើតប្រតិបត្តិការក្នុងក្រុងឌូបៃ បានមើលឃើញថា ចំនួនអតិថិជនដែលជាជនជាតិរុស្ស៊ី បានកើនឡើងយ៉ាងខ្លាំង។

រំហូរចូលយ៉ាងគំហុកនៃជនជាតិរុស្ស៊ី បានជំរុញឱ្យតម្រូវការផ្ទះវីឡា និងអាផាតម៉ិនប្រណីតៗនៅទូទាំងក្រុងឌូបៃ មានសន្ទុះកើនឡើងខ្លាំង។ យោងតាមក្រុមភ្នាក់ងារអចលនទ្រព្យឱ្យដឹងថា តម្លៃអចលនទ្រព្យកំពុងហក់ឡើងខ្លាំង ខណៈជនជាតិរុស្ស៊ី ដែលមកដល់ទីក្រុងឌូបៃ កំពុងស្វែងរកទិញផ្ទះ។

ទីភ្នាក់ងារអចលនទ្រព្យ Betterhomes ដែលមានមូលដ្ឋាននៅក្រុងឌូបៃ បញ្ជាក់ថា ការទិញអចលនទ្រព្យ ដោយជនជាតិរុស្ស៊ី ក្នុងក្រុងឌូបៃ បានកើនឡើងដល់ទៅ២ភាគ៣ក្នុងរយៈពេល៣ខែដំបូងនៃឆ្នាំ២០២២៕

អាកាសយានដ្ឋានអន្តរជាតិតេជោលក់មូលបត្របំណុលតម្លៃ១លានដុល្លារបន្ថែមទៀត

ដោយ៖ សុផារី

ភ្នំពេញ៖ ក្រុមហ៊ុនសាងសង់ព្រលានយន្តហោះអន្តរជាតិតេជោ នៅថ្ងៃទី០៦ ខែឧសភា ឆ្នាំ២០២២នេះ បានលក់មូលបត្របំណុលតម្លៃ១លានដុល្លារ ឲ្យគ្រឹះស្ថានមីក្រូហិរញ្ញវត្ថុ អេ អឹម ខេ ដើម្បីចូលរួមគាំទ្រគម្រោងសាងសង់ អាកាសយានដ្ឋានអន្តរជាតិថ្មីនេះ។

តាមសេចក្ដីប្រកាសព័ត៌មាន របស់ក្រុមហ៊ុន CAIC ដែលចេញផ្សាយបាននៅថ្ងៃទី០៦ ខែឧសភានេះ បានបញ្ជាក់ថា “AMK Microfinance Institution Plc. បានបណ្តាក់ទុនចំនួន១ លានដុល្លារអាមេរិក នៅលើសញ្ញាបណ្ណមានបុគ្គលធានា របស់អាកាសយានដ្ឋានអន្តរជាតិតេជោ ដែលចេញដោយ CAIC នៅថ្ងៃទី ០៦ ខែឧសភា ឆ្នាំ២០២២”។

ក្រុមហ៊ុន បានបញ្ជាក់ទៀតថា ទឹកប្រាក់វិនិយោគដែលទទួលបានពីសញ្ញាបណ្ណនេះ នឹងត្រូវប្រើប្រាស់សម្រាប់ការសាងសង់ និងការអភិវឌ្ឍន៍ គម្រោងសាងសង់អាកាសយានដ្ឋានអន្តរជាតិតេជោ នៅខេត្តកណ្តាល។ អត្រាការប្រាក់(Coupon rate) របស់សញ្ញាបណ្ណនេះគឺ៥,៥% ក្នុងមួយឆ្នាំ ជាមួយនឹងរយៈពេល (tenor) ៣ឆ្នាំ ហើយត្រូវបានធានាដោយក្រុមហ៊ុន OCIC ។

សម្តេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានអំពាវនាវដល់គ្រឹះស្ថានធនាគារ និងហិរញ្ញវត្ថុនានា ឲ្យជួយទិញសញ្ញាបណ្ណ (មូលបត្របំណុល-Bond) របស់ក្រុមហ៊ុនខេមបូឌា អ៊ែរផត អ៊ីនវេសមិន (CAIC) ដែលសាងសង់អាកាសយានដ្ឋាន អន្តរជាតិតេជោ។

ការចូលរួមទិញសញ្ញាបណ្ណនេះ គឺជាការចូលរួមការអភិវឌ្ឍន៍ព្រលានយន្តហោះថ្មី ដែលកាត់បន្ថយនូវការប្រើប្រាស់ទុន ពីក្រៅប្រទេស ហើយការគ្រឹះស្ថាន ហិរញ្ញវត្ថុទាំងនោះ ក៏ទទួលបានផលចំណេញពីអត្រាការប្រាក់ ដោយទទួលបានការធានាផ្នែកហានិភ័យ ស្មើសូន្យពីរាជរដ្ឋាភិបាលផងដែរ។

CAIC គឺជាក្រុមហ៊ុនបណ្តាក់ទុនរួមគ្នា រវាងរាជរដ្ឋាភិបាលកម្ពុជា (RGC) ដែលតំណាងដោយរដ្ឋលេខាធិការដ្ឋានអាកាសចរស៊ីវិល និងក្រុមហ៊ុន OCIC ។ រាជរដ្ឋាភិបាលកម្ពុជា បានផ្តល់សិទ្ធិឲ្យ ក្រុមហ៊ុន CAIC ក្នុងការកាន់កាប់ រចនា ប្លង់ សាងសង់ ធ្វើហិរញ្ញប្បទាន និងគ្រប់គ្រងប្រតិបត្តិការគម្រោង អាកាសយានដ្ឋានអន្តរជាតិតេជោ៕

ទីផ្សារខុនដូប្រទេសថៃរំពឹងសញ្ញាងើបឡើងវិញទាំងស្រុងនៅក្នុងឆ្នាំ២០២២នេះ

ដោយ៖ លាងហួរ

ប្រទេសថៃ៖ ក្រុមហ៊ុនអភិវឌ្ឍន៍ស៊ុផាឡៃ (Supalai) ដែលជាក្រុមហ៊ុនអភិវឌ្ឍន៍ធំមួយនៅក្នុងប្រទេសថៃ បានធ្វើការព្យាករថា ទីផ្សារខុនដូថៃនឹងងើបឡើងវិញទាំងស្រុង នៅក្នុងឆ្នាំ២០២២នេះ ដែលជំរុញដោយការត្រលប់មកវិញនៃភ្ញៀវទេសចរបរទេស និងកំណើនការនាំចេញ។

លោក Tritecha Tangmatitham អគ្គនាយកក្រុមហ៊ុនស៊ុផាឡៃ បានឱ្យដឹងថា ទីផ្សារខុនដូបានស្ទុះងើបឡើងវិញ នៅក្នុងត្រីមាសទី៤ ឆ្នាំ២០២១កន្លងមក ដោយនៅក្នុងត្រីមាសទី១ ឆ្នាំ២០២២នេះ ចំនួនអតិថិជនទិញខុនដូបានកើនឡើង១៥ភាគរយ ពីមួយឆ្នាំទៅមួយឆ្នាំ។

លោកបានបន្តថា ការលក់ខុនដូបានស្ទុះងើបឡើងវិញនៅក្នុងត្រីមាសទី៤នៃឆ្នាំ២០២១ ហើយបន្តមានកំណើនខ្ពស់នៅត្រីមាសទី១ក្នុងឆ្នាំ២០២២នេះ ដែលជាលទ្ធផលល្អបំផុត ក្នុងរយៈពេល៥ត្រីមាសចុងក្រោយ ទោះបីប្រឈមនឹងស្ថានភាពអាក្រក់បំផុតនៃជំងឺកូវីដ១៩ក្តី។

លោក Tritecha បានឱ្យដឹងបន្ថែមថា សញ្ញាវិជ្ជមានសម្រាប់ទីផ្សារខុនដូនៅដើមឆ្នាំនេះ ជំរុញដោយ កំណើនខ្ពស់នៃចំនួនអ្នកទេសចរបរទេស ដែលបានកើនឡើងរហូតដលទៅ ២.១០០ភាគរយ ពីមួយឆ្នាំទៅមួយឆ្នាំ និង ៣០ភាគរយ ពីមួយត្រីមាសទៅមួយត្រីមាស។ ម្យ៉ាងទៀត ការនាំចេញត្រូវបានព្យាករណ៍ថានឹងមានកំណើន ៧ភាគរយក្នុងឆ្នាំ២០២២នេះ។

បើតាមអ្នកជំនាញដដែលបានឱ្យដឹងទៀតថា ចាប់តាំងពីចុងឆ្នាំ២០២១មក ខុនដូតម្លៃប្រហែល៦ម៉ឺនទៅ១២ម៉ឺនដុល្លារអាមេរិក មានភាពល្អប្រសើរឡើង ដោយសារអតិថិជនគោលដៅ គឺជាអ្នកធ្វើការ ខណៈអតិថិជនបរទេសបានត្រឡប់មកវិញនៅដើមឆ្នាំនេះ។ អ្នកទិញកម្រិតមធ្យមឡើង មួយចំនួនបានឆ្លៀតឱកាសនេះ ដើម្បីទិញបានក្នុងតម្លៃទាបមួយ មុនពេលដែលតម្លៃចាប់ផ្តើមឡើងខ្ពស់ឡើងវិញ។

ចំណែកអតិថិជនថ្នាក់ក្រោមមធ្យម ហានិភ័យនៅតែមាន ខណៈអ្នកទិញមានការព្រួយបារម្ភអំពីការមិនទទួលបានប្រាក់កម្ចីទិញផ្ទះ៕

សួនរុក្ខជាតិអង្គរទំហំជាង១៥ហិចតានឹងដាក់ឱ្យដំណើរការ ដើម្បីទាក់ទាញទេសចរបន្ថែមទៀត

ដោយ៖ សុផារី

សៀមរាប៖ សួនរុក្ខជាតិអង្គរ មានទំហំផ្ទៃដីប្រមាណជិត១៥ហិកតា សម្ភោធដាក់ឱ្យដំណើរការជាផ្លូវការនៅថ្ងៃខាងមុខឆាប់ៗនេះ ដើម្បីបង្កើនកិច្ចអភិវឌ្ឍន៍ក្នុងតំបន់រមណីយដ្ឋានអង្គរ និងទាក់ទាញភ្ញៀវទេសចរផង។

លោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ និងជាប្រធានក្រុមប្រឹក្សាភិបាលអាជ្ញាធរជាតិអប្សរា អមដំណើរដោយលោក ហង់ ពៅ អគ្គនាយកអាជ្ញាធរជាតិអប្សរា បានអញ្ជើញចុះពិនិត្យមើលស្ថានភាពទូទៅនៅសួនរុក្ខជាតិអង្គរ មុនពេលសម្ភោធដាក់ឱ្យដំណើរការជាផ្លូវការនៅថ្ងៃខាងមុខឆាប់ៗនេះ។

ដើម្បីបង្កើនកិច្ចអភិវឌ្ឍក្នុងតំបន់រមណីយដ្ឋានអង្គរ និងទាក់ទាញភ្ញៀវទេសចរផង អាជ្ញាធរជាតិអប្សរាបានបង្កើតសួនរុក្ខជាតិអង្គរ ក្រោមទំហំផ្ទៃដីប្រមាណជិត១៥ហិកតា ដោយមានរៀបចំជាសួនសំខាន់ៗជាច្រើន ក្នុងនោះអាជ្ញាធរជាតិអប្សរាបានដាំកូនឈើ និងប្រភេទរុក្ខជាតិផ្សេងៗរាប់ម៉ឺនដើម មានប្រភេទរុក្ខជាតិសរុបជាង៥០០ប្រភេទផ្សេងៗគ្នា។

នៅទីនោះក៏មាន សួនសត្វ និងសួនរុក្ខជាតិសំខាន់ៗចំនួន៥សួន បានបង្កើតឡើងក្នុងរចនាបទបែបខ្មែរ រួមមាន សួនឱសថនិងគ្រឿងទេស សួនផ្កាស្មៅ និងផ្កាចម្រុះ សួនអម្បូរត្នោត សួនលំនៅដ្ឋានខ្មែរ សួនព្រៃឈើ និងសត្វព្រៃអង្គរជាដើម ដោយសួនទាំងនោះមានភាពទាក់ទាញខុសប្លែកពីគ្នា ជាពិសេសមានដើមឈើ និងរុក្ខជាតិកម្រៗជាច្រើនប្រភេទ បម្រើផលប្រយោជន៍ខុសប្លែកពីគ្នា សម្រាប់មនុស្សជំនាន់ក្រោយ បានស្គាល់ និងការងារសិក្សាស្រាវជ្រាវ៕

អ្នកជំនាញព្យាករណ៍ ខុនដូតម្លៃសមរម្យបន្តមានកំណើន ខណៈខុនដូប្រណីតនិងមធ្យមអាចបន្តធ្លាក់ចុះបន្ទិច ក្នុងឆ្នាំនេះ

ដោយ៖ សុផារី

ភ្នំពេញ៖ ស្របពេលសកម្មភាពវិនិយោគលើវិស័យខុនដូចាប់ផ្តើមមានដំណើរការឡើងវិញបន្តិចម្តងៗ អ្នកជំនាញនៅបន្តមើលឃើញពី កំណើននៃការផ្គត់ផ្គង់ និងតម្លៃនៃប្រភេទខុនដូតម្លៃសមរម្យ (Affordable) ស្របពេលដែលខុនដូប្រណីត និងមធ្យម (High-end និង Mid-range) អាចប្រឈមនឹងការធ្លាក់ចុះការផ្គត់ផ្គង់និងតម្លៃ។

អ្នកនាង គឹម គិនកេសា អ្នកគ្រប់គ្រងជាន់ខ្ពស់នៃក្រុមហ៊ុន CBRE Cambodia បានមានប្រសាសន៍ប្រាប់ Property Area Asia ថា សម្រាប់ខុនដូប្រភេទប្រណីត និងមធ្យម (High End និង Mid-Range) នៅក្នុងកំឡុងឆ្នាំ២០២២នេះ ការផ្គត់ផ្គង់នៅបន្តមានចំនួនតិច មិនអ៊ូអរដូចកាលពីឆ្នាំ២០២១ទេ ព្រោះមិនមានគម្រោងថ្មីណាមួយចាប់ផ្តើមបើកដំណើរការលក់នោះទេ។

អ្នកនាងបន្តថា ចំណែកតម្លៃនៃខុនដូ ក៏មានការធ្លាក់ចុះបន្ទិចបន្ទួចផងដែរ ប៉ុន្តែភាគរយនៃការធ្លាក់ចុះយឺតជាងមុន។ នៅក្នុងឆ្នាំ២០២២នេះ តម្លៃនៃខុនដូប្រភេទនេះត្រូវបានរំពឹងថា អាចនឹងមានការធ្លាក់ចុះបន្តិចទៀតនៅក្នុងឆ្នាំនេះ ប៉ុន្តែមិនធ្លាក់ចុះគំហុកដូចកាលពីឆ្នាំ២០២០ទេ។

អ្នកនាងបញ្ជាក់ថា ការធ្លាក់ចុះនៃការទិញប្រភេទខុនដូប្រណីត និងមធ្យម ដោយសារអតិថិជនគោលដៅរបស់ប្រភេទខុនដូទាំងពីរនេះគឺ ក្រុមអ្នកវិនិយោគបរទេស។ អ្នកនាងថា “ទោះបីជាស្ថានភាពជំងឺកូវីដ១៩នៅក្នុងប្រទេសមានការថមថយ និងមានការបើកចំហការធ្វើដំណើរក្តី អ្នកធ្វើដំណើរបែបវិនិយោគអាចត្រូវការពេលមួយរយៈទៀត ទើបអាចត្រឡប់មកវិនិយោគក្នុងប្រទេសកម្ពុជាវិញ។ ជាពិសេស វិនិយោគិនធំបំផុតគឺ វិនិយោគិនជនជាតិចិន ដែលមិនទាន់បើកទូលាយទាក់ទងនឹងការធ្វើដំណើរនោះទេ”។

ស្របពេលជាមួយគ្នានេះ អ្នកនាងកេសាមើលឃើញពីភាពផ្ទុយគ្នានៃខុនដូតម្លៃសមរម្យ (Affordable) ដែលអាចនឹងមានភាពនឹងនរ និងអាចមានកំណើនបន្ទិចបន្ទួច ដោយសារក្រុមអ្នកអភិវឌ្ឍន៍បានបង្វែរទិសដៅនៃការលក់មកកាន់ក្រុមអតិថិជនប្រភេទនេះ និងបានបំប្លែងខុនដូប្រភេទប្រណីត មកជាខុនដូប្រភេទសមរម្យ ដើម្បីផ្គត់ផ្គង់តម្រូវការនៅក្នុងស្រុកបន្ថែមទៀត។

អ្នកនាងលើកឡើងថា “ចាប់តាំងពីឆ្នាំ២០២០មក សកម្មភាពទិញរបស់អ្នកទិញជាជនជាតិបរទេសចាប់ផ្ដើមមានការថយចុះ តែអតិថិជនក្នុងស្រុកមានកំណើនក្នុងការទិញវិញ គ្រាន់តែក្នុងទំហំនៃការលក់មិនទាន់អាច Cover ដូចចំនួនអ្នកទិញបរទេសទេ”។

លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុ បានមានប្រសាសន៍កាលពីពេលថ្មីនេះថា បច្ចុប្បន្ននេះ ស្ថានភាពកូវីដ-១៩នៅកម្ពុជាកាន់តែភាពល្អប្រសើរ ដូចនេះស្ថានភាពនៃការវិនិយោគលើវិស័យខុនដូក៏ផ្តើមមានដំណើរការឡើងវិញបន្តិចម្តងៗ ជាពិសេសក្រុមការងារលើវិស័យនេះក៏បានកំពុងតែមមាញឹកក្នុងការធ្វើការងារជាមួយវិនិយោគិនក្នុងស្រុក។

លោកសង្កេតឃើញថា ផ្នែកខ្លះនៃវិស័យនេះក៏ចាប់ផ្តើមមានវិនិយោគិនបរទេសផ្តើមបញ្ជូនតំណាងមកកម្ពុជាក្នុងគោលបំណងវិនិយោគលើវិស័យខុនដូនៅកម្ពុជា។

លោកបន្ថែមថា តម្រូវការនៃការប្រើប្រាស់ខុនដូនៅកម្ពុជាកាន់តែបន្តដំណើរទៅមុខជាលំដាប់ ហើយតម្លៃក៏មិនមានការធ្លាក់ថ្លៃខ្លាំង ឬឡើងថ្លៃហួសកម្រិតនោះដែរ។ ចំពោះស្ថានភាពនៃការសាងសង់ គឺនៅតែមានឧបសគ្គតិចតួច ហើយក៏មិនមានការប្រែប្រួលច្រើននោះដែរ ប៉ុន្តែលោកសង្ឃឹមថានៅដំណាច់ឆ្នាំ២០២២នេះ អាចនឹងមានការប្រែប្រួលច្រើន។

លោកបញ្ជាក់ថា ចំពោះចរន្តទិញលក់វិស័យខុនដូនៅទីតាំងមានសក្តានុពល គឺនៅតែមានការទិញលក់ជារឿយៗ ប៉ុន្តែការទិញលក់នេះនៅមានចំនួនតិចតួចនៅឡើយបើធៀបនឹងការទិញលក់ក្នុងវិស័យផ្ទះល្វែង និងអចលនទ្រព្យផ្សេងៗទៀត៕

អាមេរិកគ្រោងដកក្រុមហ៊ុនចិនធំៗប្រមាណ ៨០ ចេញពីផ្សារហ៊ុនរបស់ខ្លួន

ដោយៈសុខុម

អន្តរជាតិ: គណៈកម្មការមូលបត្រអាមេរិក ហៅកាត់ថា SEC បានដាក់បញ្ចូលបន្ថែមក្រុមហ៊ុនជាង៨០ ទៅក្នុងបញ្ជីឈ្មោះក្រុមហ៊ុន ដែលអាចប្រឈមការបណ្តេញចេញពីផ្សារភាគហ៊ុនអាមេរិក។ នេះបើយោងតាមសារព័ត៌មាន CNA ចុះផ្សាយកាលពីថ្ងៃព្រហស្បតិ៍ ទី៥ ខែឧសភា។

គណៈកម្មការមូលបត្រអាមេរិក បានបញ្ចូលបន្ថែមក្រុមហ៊ុនទាំងនេះទៅក្នុងបញ្ជីខ្មៅរបស់កាលពីថ្ងៃពុធ ទី៤ ខែឧសភា ក្រោមច្បាប់ចាប់បង្ខំក្រុមហ៊ុនមេឱ្យទទួលខុសត្រូវ (The Holding Foreign Companies Accountable Act)។

ក្រុមហ៊ុនចិន ចុះបញ្ជីនៅសហរដ្ឋអាមេរិក ជាច្រើនដែលជាប់ឈ្មោះក្នុងបញ្ជីខ្មៅនេះរួមមានដូចជាក្រុមហ៊ុន JD.com ក្រុមហ៊ុន Pinduoduo ក្រុមហ៊ុន Bilibili ក្រុមហ៊ុន NetEase ក្រុមហ៊ុន JinkoSolar Holding ក្រុមហ៊ុន NIO និងក្រុមហ៊ុន China Petroleum & Chemical ជាដើម។

ច្បាប់ដែលប្រធានាធិបតី ដូណាល់ ត្រាំ បានចុះហត្ថលេខាឱ្យចូលជាធរមានក្នុងឆ្នាំ២០២០ ខាងលើនេះនឹងដក ឬបណ្ដេញក្រុមហ៊ុនបរទេសចេញពីផ្សារភាគហ៊ុនអាមេរិក ប្រសិនបើក្រុមហ៊ុនទាំងនោះ មិនអនុវត្្តន៍តាមស្តង់ដារសវនកម្មរបស់សហរដ្ឋអាមេរិក រយៈពេល៣ឆ្នាំជាប់គ្នា។

ប្រភពបានទម្លាយប្រាប់ទីភ្នាក់ងារព័ត៌មាន Reuters កាលពីខែមុនថា ក្រុមនិយតករចិន បានស្នើឱ្យក្រុមហ៊ុនចិន មួយចំនួនដែលចុះបញ្ជីនៅសហរដ្ឋអាមេរិក រួមមានទាំង Alibaba ក្រុមហ៊ុន Baidu និងក្រុមហ៊ុន JD.com ជាដើមត្រៀមខ្លួន សម្រាប់ការបង្ហាញលទ្ធផលសវនកម្មបន្ថែមទៀត។

ប្រទេសចិន កាលពីដើមខែមេសា ក៏បានស្នើឱ្យកែប្រែវិធានស្ដីពីការរក្សាការសម្ងាត់ ទាក់ទិនការចុះបញ្ជីក្រុមហ៊ុនចិន នៅក្រៅប្រទេសផងដែរ ដើម្បីការពារការណ៍សម្ងាត់របស់ជាតិរបស់ប្រទេស៕ Reuters៕

សន្និសីទអន្តរជាតិរៃអង្គាសជំនួយបាន៦,៥ពាន់លានដុល្លារសម្រាប់ជួយដល់អ៊ុយក្រែន

ដោយៈសុខុម

វ៉ាសាវី: នាយករដ្ឋមន្ត្រីប៉ូឡូញ លោក Mateusz Morawiecki បានអះអាងថា សន្និសីទម្ចាស់ជំនួយអន្តរជាតិ (International Donors Conference) នៅទីក្រុងវ៉ាសាវី ប្រទេសប៉ូឡូញ កាលពីថ្ងៃព្រហស្បតិ៍ ទី៥ ខែឧសភា រៃអង្គាសមូលនិធិសម្រាប់ជួយដល់អ៊ុយក្រែន បានប្រមាណ៦,៥ពាន់លានដុល្លារអាមេរិក។

សន្និសីទដែលមានគោលបំណងជួយប្រទេសអ៊ុយក្រែន ដោះស្រាយវិបត្តិសេដ្ឋកិច្ច និងវិបត្តិមនុស្សធម៌ដែលបង្កឡើង ដោយសារសង្គ្រាមឈ្លានពានរបស់រុស្ស៊ី នេះត្រូវបានរៀបចំឡើងដោយប្រទេសប៉ូឡូញ និងប្រទេសស៊ុយអែត ក្រោមកិច្ចសហប្រតិបត្តិការជាមួយប្រធានគណៈកម្មការអឺរ៉ុប និងប្រធានក្រុមប្រឹក្សាអឺរ៉ុប។

អំឡុងសន្និសីទសារព័ត៌មាននៅចុងបញ្ចប់ នៃព្រឹត្តិការណ៍ដ៏សំខាន់នេះ លោក Mateusz Morawiecki បានធ្វើការប៉ាន់ប្រមាណតួលេខខ្ពស់ជាងនេះ ដោយលើកឡើងថា ជំនួយដែលរៃអង្គាសបានអាចមានចំនួនជាង៧ពាន់លានដុល្លារ។

ទោះជាយ៉ាងណា នៅពេលទីភ្នាក់ងារព័ត៌មាន Reuters ស្នើសុំការបញ្ជាក់ជុំវិញការរៃអង្គាសមូលនិធិនេះ អ្នកនាំពាក្យក្រសួងការបរទេសប៉ូឡូញ មិនបានឆ្លើយបំភ្លឺនោះទេ។

ប្រទេសមួយចំនួន ដូចជា បារាំង ហ្វាំងឡង់ សាធារណរដ្ឋឆែក ក្រូអាស៊ី និងប្រទេសផ្សេងទៀត បានសន្យាផ្តល់ជំនួយច្រើនលានដុល្លារអាមេរិក ដើម្បីគាំទ្រដល់កិច្ចការមនុស្សធម៌ និងយោធានៅអ៊ុយក្រែន។

គណៈកម្មការអឺរ៉ុប បានចេញសេចក្ដីថ្លែងការណ៍ថា ខ្លួនក៏បានសន្យាផ្តល់ជំនួយប្រមាណ២១០លានដុល្លារអាមេរិកផងដែរ សម្រាប់ជួយជនភៀសខ្លួនក្នុងប្រទេសអ៊ុយក្រែន។

នាយករដ្ឋមន្ត្រីអ៊ុយក្រែន លោក Denys Shmyhal បានបញ្ជាក់បន្ថែម តាមរយៈសេចក្តីថ្លែងការណ៍មួយ នៅចុងបញ្ចប់នៃសន្និសីទនេះថា ប្រទេសអ៊ុយក្រែន ទទួលបានជំនួយសព្វាវុធ និងជំនួយហិរញ្ញវត្ថុសរុបជាង១២ពាន់លានដុល្លារអាមេរិក ហើយចាប់តាំងពីប្រទេសរុស្ស៊ី បញ្ឆេះសង្គ្រាមចូលឈ្លានពានអ៊ុយក្រែន នៅថ្ងៃទី២៤ ខែកុម្ភៈ មក៕ Reuters៕

ក្រុមអ្នកជំនាញៈ ចរន្តទិញ លក់ទីផ្សារដីធ្លីនៅតាមបណ្តាខេត្តបន្តមានភាពស្ងប់ស្ងាត់

ដោយៈស៊ីវ ម៉េង

ភ្នំពេញៈ ក្រុមអ្នកជំនាញបានលើកឡើងថា ចរន្តទិញលក់ដីធ្លីនៅយាមបណ្តាខេត្ត ដែលមានសក្តានុពលសេដ្ឋកិច្ចបាន និងកំពុងមានសភាពស្ងប់ស្ងាត់នៅឡើយ ដោយសារកត្តាមួយចំនួន។

អគ្គនាយិកាក្រុមហ៊ុន Amatax Property Service Co, Ltd បានមានប្រសាសន៍ឲ្យដឹងតាមទូរស័ព្ទ កាលពីថ្ងៃទី៥ ឧសភាថា សកម្មភាពទិញលក់ដីធ្លី នៅតាមបណ្តាខេត្ត ទោះជាមានតម្លៃល្អក្តី ប៉ុន្តែមិនសូវមានការចាប់អារម្មណ៍ពីបណ្តាអ្នកវិនិយោគនោះទេ ប៉ុន្តែទីផ្សារដីលំហែរនៅតែមានតម្រូវការនៅឡើយ។

អ្នកស្រីបន្តថា “អ្នកវិនិយោគបច្ចុប្បន្នផ្តោត តែលើអចលនទ្រព្យក្នុងទីក្រុង និងតំបន់ជាយក្រុង ដែលមានតម្លៃល្អៗ”។ អ្នកស្រីបន្តថា “ក្នុងស្ថានភាពបែបនេះ ចរន្តទិញ លក់នៅតែមានកញ្ចប់ចម្រុះ ដោយមានទាំងទំហំថវិកាធំ តូច និងមធ្យមផងដែរ ប៉ុន្តែភាគច្រើនអ្នកវិនិយោគផ្តោតលើអចលនទ្រេ ព្យតម្លៃក្រោមទីផ្សារ”។

ជាមួយគ្នានេះ លោកច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានមានប្រសាសន៍ឲ្យដឹងផងដែរថា ទីផ្សារដីធ្លី និងលំនៅដ្ឋាននៅតែមានសកម្មភាពច្រើន ពិសេសក្រុមការងារមានភាពរវល់ច្រើន ដោយមានអ្នកវិនិយោគ បានចាប់ផ្តើមបញ្ចេញសកម្មភាព បន្ទាប់ពីចូលឆ្នាំប្រពៃណីជាតិខ្មែររួច។

លោកបន្តថា “យ៉ាងណាដីធ្លីនៅតាមបណ្តាខេត្ត មានបញ្ហានៅឡើយ ដោយសារអ្នកវិនិយោគ បានផ្តោតតែតាមបណ្តាខ័ណ្ឌនៅជាយក្រុង និងតំបន់ជាយក្រុងភ្នំពេញ”។លោកបន្តថា “ដីធ្លីនៅតាមបណ្តាខេត្ត មិនសូវទាក់ទាញការចាប់អារម្មណ៍ ព្រោះអ្នកវិនិយោគឆ្លាតវៃតែងតែផ្តោត លើតំបន់ជាយក្រុងជាមុន”។

លោកច្រឹក សុខនីមបានបន្តថា នៅពេលសេដ្ឋកិច្ចមានវិបត្តិ ក៏ការទិញលក់នៅតែមាន មានឱកាសឡើងថ្លៃលឿន និងងើបលឿន ប៉ុន្តែដីធ្លីនៅតាមបណ្តាខេត្តងាយធ្លាក់ជាង និងមិនងាយងើបឡើងវិញផងដែរ៕

ភាគហ៊ុនរបស់ Alibaba ខាតជិត ៣០ពាន់លានដុល្លារ ក្រោយផ្ទះព៌តមាន ថា Jack Ma ត្រូវបានចាប់ខ្លួន

ដោយ សុខុម

ហុងកុង: ដំណឹងដ៏រំជើបរំជួលថា កំពូលមហាសេដ្ឋីចិន Jack Ma សហស្ថាបនិកក្រុមហ៊ុន Alibaba ត្រូវឃាត់ខ្លួន បានធ្វើឱ្យភាគហ៊ុនរបស់ក្រុមហ៊ុនប្រភេទ E-commerce ខ្នាតយក្សមួយនេះធ្លាក់ចុះរហូតដល់ទៅ៩,៤% ដែលគិតជាប្រាក់ស្មើនឹង២៦ពាន់លានដុល្លារអាមេរិក។

ភាពជ្រួលច្របល់ក្នុងទីផ្សារភាគហ៊ុននេះ បានកើតមានឡើង ក្រោយពីស្ថានីយទូរទស្សន៍រដ្ឋ China Central Television (CCTV) បានផ្សាយកាលពីថ្ងៃអង្គារ ទី៣ ខែឧសភាថា ជនសង្ស័យម្នាក់មានត្រកូល Ma រស់នៅក្រុងហាងចូវ (Hangzhou) ទីដែលក្រុមហ៊ុន Alibaba បោះមូលដ្ឋានការិយាល័យកណ្ដាលត្រូវបានឃាត់ខ្លួន តាមការសង្ស័យពីបទបង្កអសន្តិសុខជាតិ។ នេះបើយោងតាមសារព័ត៌មាន CNN ចុះផ្សាយនៅថ្ងៃព្រហស្បតិ៍ ទី ៥ ខែឧសភា នេះ។

ស្ថានីយទូរទស្សន៍ចិន ដដែលបានផ្សាយថា ជនសង្ស័យត្រូវបានឃាត់ខ្លួនកាលពីថ្ងៃទី២៥ ខែមេសា តាមការសង្ស័យពីបទ “ឃុបឃិតជាមួយកងកម្លាំងប្រឆាំងប្រទេសចិន នៅក្រៅប្រទេស” និងបទ “ញុះញង់”។

សេចក្ដីរាយការណ៍នេះ បានធ្លាយទៅដល់ស្ថាប័នសារព័ត៌មានរដ្ឋផ្សេងៗទៀត និងស្ថាប័នសារព័ត៌មានទូទាំងប្រទេសចិនភ្លាមៗ បង្កការឆោឡោ និងធ្វើឱ្យអ្នកវិនិយោគសម្រុកលក់ចេញ ភាគហ៊ុននៅក្រុងហុងកុង ដែលធ្វើឱ្យតម្លៃទីផ្សាររបស់ក្រុមហ៊ុន Alibaba ខាតបង់រហូតដល់ទៅ២៦ពាន់លានដុល្លារអាមេរិក ក្នុងពេលត្រឹមតែប៉ុន្មាននាទី។

ទោះជាយ៉ាងណា អំឡុងពេលចលាចលនេះ លោក Hu Xijin អតីតអគ្គនិពន្ធនាយកកាសែតចិន Global Times បានប្រញាប់ចូលទៅបញ្ជាក់ លើបណ្ដាញទំនាក់ទំនងសង្គមចិន Weibo ថា សេចក្ដីរាយការណ៍ព័ត៌មាននោះ បានបង្កឱ្យមានការយល់ច្រឡំ ព្រោះជនសង្ស័យ ដែលត្រូវឃាត់ខ្លួនមានឈ្មោះ Ma Yun គឺមិនមែនកំពូលមហាសេដ្ឋី Jack Ma មេក្រុមហ៊ុន Alibaba នោះឡើយ។

ដើម្បីបញ្ជាក់ឱ្យកាន់តែច្បាស់បន្ថែមទៀត កាសែតGlobal Times បានចុះផ្សាយថា ជនសង្ស័យរូបនោះកើតក្នុងឆ្នាំ១៩៨៥ នៅក្រុងវិនចូវ (Wenzhou) បច្ចុប្បន្នមានវ័យ៣៧ឆ្នាំ និងមានមុខងារជានាយកផ្នែកស្រាវជ្រាវ និងអភិវឌ្ឍន៍ Hardwareនៅក្រុមហ៊ុនបច្ចេកវិទ្យាព័ត៌មាន (IT) មួយ ខណៈលោក Jack Ma កើតក្នុងឆ្នាំ១៩៦៤ នៅក្រុងហាងចូវ (Hangzhou) បច្ចុប្បន្នវ័យ៥៨ឆ្នាំ៕ CNN៕

1...1,4611,4621,463...3,288 Page 1,462 of 3,288