ដោយ: សហសេវិក

ភ្នំពេញៈ អភិបាលខេត្តពោធិសាត់ លោកជាវ តាយ បានចាប់ផ្តើមផ្តោតអាទិភាពលើការធ្វើឲ្យប្រសើរឡើង នូវហេដ្ឋារចនាសម្ព័ន្ឋ ក្នុងខេត្តពោធិសាត់ត្រូវបានដាក់ក្នុងផែនការអាទិភាព។

រដ្ឋបាលខេត្តពោធិ៍សាត់អោយដឹងថា លោក ជាវ តាយ អភិបាលខេត្តពោធិ៍សាត់ និងលោក វង្ស ពិសិដ្ឋ អនុរដ្ឋលេខាធិការក្រសួងសាធារណការ និងដឹកជញ្ជូន និងជានាយកគម្រោងកាលពីពេលថ្មីៗនេះ បានអញ្ជើញបើកការដ្ឋាន ស្ថាបនា«ផ្លូវក្រាលកៅស៊ូDBST ផ្លូវលេខ២០៩+១០៩ និងផ្លូវប៉េតុងជុំវិញផ្សារថ្មីពោធិ៍សាត់ ផ្លូវ លេខ២០៥+២០៦+១០៣» ដែលជាផ្លូវអាទិភាព ក្នុងចំណោមផ្លូវដទៃទៀតនៃគម្រោងគ្រប់គ្រងកែលម្អបរិស្ថាន ក្រុងជុំវិញបឹងទន្លេសាប ក្នុងសង្កាត់ផ្ទះព្រៃ ក្រុងពោធិ៍សាត់ ខេត្តពោធិ៍សាត់។

ពិធីនេះត្រូវបានធ្វើឡើង នៅលើផ្លូវលេខ២០៩ ទល់មុខពហុកីឡដ្ឋានខេត្ត ដោយបានការអញ្ជើញចូលរួមពី លោកម៉ក់ រ៉ា ប្រធានក្រុមប្រឹក្សាខេត្ត លោក លោកស្រី អភិបាលរងខេត្ត ថ្នាក់ដឹកនាំមន្ទីរអង្គភាពនានាជុំវិញខេត្ត កងកម្លាំងប្រដាប់អាវុធទាំង៣ ប្រធានគម្រោងទីប្រឹ ក្សាបច្ចេកទេសគម្រោង ក្រុមហ៊ុនគិរីដងរែក អាជ្ញាមូលដ្ឋាន និងបងប្អូនពុកម៉ែប្រជាពលរដ្ឋ យ៉ាងច្រើនកុះករ។

លោក ចាប នាង អភិបាលក្រុងពោធិ៍សាត់ បានឱ្យដឹងថា គម្រោង គ្រប់គ្រងកែលម្អបរិស្ថានក្រុងជុំវិញបឹងទន្លេសាប បានរៀបចំសិក្សាចាប់តាំងពីឆ្នាំ២០១៤មក ម្ល៉េះហើយចាប់ផ្តើមអនុវត្តន៍ នៅដើមឆ្នាំ២០២០កន្លងទៅ។ គម្រោងនេះទទួលកញ្ចប់ថវិកាជា កម្ចីហិរញ្ញប្បទានពីធនាគារអភិវឌ្ឍន៍អាស៊ី (ADB) អនុវត្តដោយក្រសួងសាធារណការ និងដឹក ជញ្ជូន តាមរយៈរាជរដ្ឋាភិបាលកម្ពុជា ផ្តល់ជូនប្រជាពលរដ្ឋ ក្នុងក្រុងពោធិ៍សាត់ ខេត្តពោធិ៍សា ត់ដែលក្នុងនោះរួមមាន “អាងប្រព្រឹត្តកម្មទឹកកខ្វក់ ប្រព័ន្ធលូរំដោះទឹកភ្លៀង, ទំនប់ការពារទឹកជំនន់ ទីលានចាក់សម្រាម និងការធ្វើឱ្យប្រសើរឡើង ផ្លូវកៅស៊ូថ្មីក្នុងក្រុងពោធិ៍សាត់”។

បច្ចុប្បន្នអនុគម្រោងប្រព័ន្ធលូរំដោះ ទឹកភ្លៀង ទឹកស្អុយ និងអាងប្រព្រឹត្តិកម្មទឹកកខ្វក់សម្រេចបាន៨០%ហើយ គ្រោងនឹងបញ្ចប់ នៅខែមីនា ឆ្នាំ២០២២ខាងមុខ។

ដោយឡែកអនុគម្រោងទីលានចាក់សម្រាម សម្រេចបាន៨៥%ហើយ គ្រោងនឹងបញ្ចប់ នៅខែ កុម្ភៈឆ្នាំ២០២២ខាងមុខនេះ។ ថ្ងៃនេះគឺជាមោទនភាពសម្រាប់ប្រជាពលរដ្ឋក្នុងក្រុងពោធិ៍សាត់ ដែលត្រូវបានថ្នាក់ដឹកនាំ អញ្ជើញបើកការដ្ឋានស្ថាបនា “ផ្លូវក្រាលកៅស៊ូDBST ផ្លូវលេខ២០ ៩+១០៩ និងផ្លូវប៉េតុងជុំវិញផ្សារថ្មីពោធិ៍សាត់ ផ្លូវលេខ២០៥+២០៦+១០៣” ដែលជាផ្លូវអាទិ ភាពមួយ ក្នុងចំណោមផ្លូវដទៃទៀត ត្រូវបានរៀបចំប្រព័ន្ធលូរួចរាល់ ដើម្បីជាគុណប្រយោជន៍ ជូនដល់បងប្អូនពុកម៉ែប្រជាពលរដ្ឋបានប្រើប្រាស់។

លោក ជាវ តាយ បានមានប្រសាសន៍ថា ដើម្បីលើកកម្ពស់សោភ័ណភាព សុខសុវត្ថិភាពប្រជាពលរដ្ឋ និងដើម្បីលើកស្ទួយអភិវឌ្ឍសេដ្ឋកិច្ចជាតិ ក៏ដូចជា សេដ្ឋកិច្ចខេត្ត ឱ្យមានការរីកចម្រើននោះ ក៏បានរៀបចំតបណ្តាញភ្លើងបំភ្លឺផ្លូវសាធារណៈ ក្នុងទីប្រជុំជនក្រុងពោធិ៍សាត់ ដែលគិតមកទល់ពេលនេះ បានចំនួន៣៥០អំពូលហើយ នឹងឈានទៅតម្លើងបន្ថែមដល់៥០០អំពូល ក្នុងជំហានទី១ សម្រាប់ជំហានទី២បន្តទៀត”។

លោកនឹងរៀបចំដំឡើងបន្ថែម រហូតដល់១០០០អំពូលLED ធ្វើយ៉ាងណាឱ្យគ្រប់ផ្លូវទាំងអស់ភ្លឺលែងងងឹត៕

ដោយៈសុផារី

ភ្នំពេញៈ ដំណឹងទាក់ទងនឹងការបង្កើតរដ្ឋបាលខេត្តថ្មី “ខេត្តឧដុង្គមានជ័យ” ធ្លាប់ត្រូវបានលេចឮពីមាត់មួយទៅមាត់មួយ ហើយក៏មានអ្នកជំនាញនៅក្នុងវិស័យនេះអះអាងថា រដ្ឋាភិបាលធ្លាប់បានប្រកាស ពីគម្រោងដ៏ធំមួយនេះផងដែរ តែក្រោយមកត្រូវបានផ្អាកទៅវិញ។

ទោះបីជាដំណឹងនេះបានស្ងប់ស្ងាត់ ក្នុងមួយរយៈពេលចុងក្រោយក្តី អ្នកជំនួញនៅក្នុងវិស័យដីធ្លី នៅតែមានក្តីសង្ឃឹមខ្ពស់ លើការកកើតឡើងនៃគម្រោងនេះ ដោយគេសង្គេតឃើញមានការបន្ត ទៅប្រមូលទិញដីធ្លីនៅក្នុងស្រុកសាមគ្គីមានជ័យ ស្រុកកំពង់ត្រឡាច នៃខេត្តកំពង់ឆ្នាំង ដែលបានធ្វើឱ្យតម្លៃដីធ្លីនៅក្នុងតំបន់នេះមានការកើនឡើងខ្ពស់។

លោក ហ៊ិន រស់ ម្ចាស់គម្រោងផ្ទះនិងដីឡូតិ៍លំហែរចំការដូងរីសត មានប្រសាសន៍ប្រាប់គេហទំព័រ Property Area កាលពីសប្តាហ៍មុនថា អ្នកមានធនធានជាច្រើន បានចាប់ផ្តើមសម្រុកទៅទិញដី នៅតាមបណ្តោយផ្លូវជាតិលេខ៥ ជាពិសេសនៅក្នុងតំបន់ផ្សារត្រាច និងសាលាលេខ៥ ជាដើម ដោយសារតំបន់នេះសម្បូររោងចក្រច្រើន។

ចំពោះអតិថិជនដែលមានការចាប់អារម្មណ៍ ក្នុងការស្វែងរកទិញផ្ទះនៅក្នុងតំបន់ខាងលើនេះ ភាគច្រើនជាអតិថិជនមកពីភ្នំពេញ និងអតិថិជននៅក្នុងមូលដ្ឋានផ្ទាល់តែម្តង មាននៅផ្សារឧដុង្គ ផ្សារត្រាច ផ្សារសាលាលេខ៥។

លោក ហ៊ិន រស់ លើកឡើងពីសក្តានុពលសំខាន់ៗ នៃតំបន់សាមគ្គីមានជ័យថា ទី១ ផ្លូវជាតិលេខ៥នេះ ជាផ្លូវដែលកំពុងត្រូវបានសាងសង់ថ្មី ជាផ្លូវភ្លោះផ្លូវអាស៊ានថ្មី ដែលសាងសង់ជិតរួចរាល់ហើយ ទី២ គម្រោងលំនៅ   ដ្ឋានទាំងឡាយណា ដែលមានទីតាំងជិតសាលាលេខ៥ ត្រូវបានចាត់ទុកថា ជាទីតាំងនៅជិតរាជធានីភ្នំពេញ។

ទី៣ តំបន់ខាងលើនេះត្រូវជាមុំ៣ នៃខេត្តសក្តានុពល រួមមានខេត្តកណ្តាល ខេត្តកំពង់ស្ពឺ និងខេត្តកំពង់ឆ្នាំង។ ទី៤ ការនិយាយតៗគ្នាពាក់ព័ន្ធនឹងការបង្កើតនូវក្រុងឧដុង្គមានជ័យ ដែលអតិថិជនមួយចំនួននៅមានក្តីសង្ឃឹមថា អចលនទ្រព្យរបស់ខ្លួននឹងមានតម្លៃថ្លៃ នៅពេលដែលក្រុងមួយនេះត្រូវបានបង្កើតឡើងនាពេលអនាគត និងទី៥ ដីនៅក្នុងតំបន់នៅមានដីធ្លីនៅសម្បូរច្រើន និងមានតម្លៃសមរម្យ។

លោកបានមានប្រសាសន៍ថា “អ្នកជំនួញមួយចំនួន នៅតែមានក្តីសង្ឃឹ​មលើការប្រកាសពីការបង្កើតនូវខេត្តថ្មី គឺខេត្តឧត្តុង្គគីមានជ័យ ដែលមានស្រុកសាមគ្គីមានជ័យ ស្រុកពញាឮ ស្រុកឧដុង្គ បញ្ចូលគ្នាចេញជាខេត្តឧដុង្គមានជ័យ បើតាមអ្វីដែលអ្នកជំនួយសិក្សាមើលទៅ”។

លោកបញ្ជាក់ថា “តាមពិតរដ្ឋាភិបាលធ្លាប់បាន ប្រកាសពីគម្រោងនេះរួមមកហើយ ប៉ុន្តែត្រូវបានផ្អាកវិញ។ ប៉ុន្តែវានៅតែអាចមានការកើតឡើង។ ជាពិសេស មួយរយៈនេះ ផ្លូវជាតិលេខ៥ ធ្វើរួចរាល់ប្រហែល៩០ភាគរយ អញ្ចឹងការធ្វើដំណើរមានភាពងាយស្រួល។ ម្យ៉ាងទៀតចាប់ពីផ្សារឧដុង្គ មកដល់ម្តុំសាលាលេខ៥ មានផ្សារច្រើន និងមានតំបន់ប្រវត្តិសាស្រ្តលង្វែកផងដែរ”។

លោកបន្ថែមថា “ដីនៅកំពង់ឆ្នាំងមានភាពងាយស្រួល ក្នុងការអភិវឌ្ឍ មានទីតាំងទួល និងសម្បូរប្រភពទឹកដែលស័ក្តិសម សម្រាប់ការអភិវឌ្ឍតំបន់លំហែកាយ និងរីសត”។ លោកបន្តថា “ឥឡូវនេះមានគេមកអភិវឌ្ឍន៍ច្រើនណាស់ ជាពិសេសក្នុងស្រុកសាមគ្គីមានជ័យ ដោយសារតែដីនៅទូលា​យ មានតម្លៃសមរម្យ បើប្រៀបធៀបខេត្តកណ្តាលម្តុំផ្លូវជាតិលេខ៥១ វាថ្លៃខ្លាំងណាស់ យកមកកាត់គម្រោងកាត់មិនបានទេ”។

ជាមួយគ្នានេះ មន្រ្តីជាន់ខ្ពស់ផ្នែកកភូមិបាល ស្រុកសាមគ្គីមានជ័យខេត្តកំពង់ឆ្្នាំង បានបង្ហើបឲ្យដឹងកាលពីពេលថ្មីៗនេះថា ក្រុងឧត្តុងសែនជ័យនឹងត្រូវបង្កើតឡើងនាពេលអនាគត ព្រោះថ្នាក់ដឹកនាំនាពេេលអនាគតនឹងបង្កើតខេត្តឬក្រុងថ្មីនេះ ដែលបច្ចុប្បន្នមានមន្រ្តីជាន់ខ្ពស់រដ្ឋាភិបាល បាននិងកំពុងប្រមូលទិញដី នៅក្នុងមូលដ្ឋានខាងលើនេះច្រើន៕

ដោយ សុខុម

ញូវដែលី: ប្រទេសឥណ្ឌា ប្រកាសកាលពីថ្ងៃសៅរ៍ ទី៣០ ខែមេសា ថា ខ្លួនបានរឹបអូសទឹកប្រាក់ចំនួន៧២៥លានដុល្លារអាមេរិក ពីគណនីធនាគារក្នុងស្រុករបស់ក្រុមហ៊ុនចិន Xiaomi។

ការរឹបអូសនេះធ្វើឡើង ក្រោយពីឥណ្ឌា ស៊ើបអង្កេតរកឃើញថា ក្រុមហ៊ុនផលិតទូរស័ព្ទស្មាតហ្វូនរបស់ប្រទេសចិន មួយនេះបានផ្ញើប្រាក់ខុសច្បាប់ទៅឱ្យអង្គភាពបរទេសដោយដាក់ថា វាជាប្រាក់កម្រៃអ្នកនិពន្ធ។

អគ្គនាយកដ្ឋានប្រយុទ្ធបទល្មើសហិរញ្ញវត្ថុនៃប្រទេសឥណ្ឌា បានបើកការស៊ើបអង្កេតការអនុវត្តន៍អាជីវកម្មរបស់ក្រុមហ៊ុនចិន មួយនេះដោយសារសង្ស័យថា ក្រុមហ៊ុននេះរំលោភបំពានច្បាប់ស្ដីពីការប្តូរប្រាក់បរទេសរបស់ឥណ្ឌា។

អគ្គនាយកដ្ឋាននេះបានអះអាងកាលពីថ្ងៃសៅរ៍ ទី៣០ ខែមេសា ថា ខ្លួនបានរឹបអូសប្រាក់ក្នុងគណនីធនាគាររបស់ក្រុមហ៊ុន Xiaomi Technology India ប្រចាំប្រទេសឥណ្ឌា បន្ទាប់ពីរកឃើញថា ក្រុមហ៊ុននេះបានបញ្ជូនរូបិយប័ណ្ណបរទេសដែលស្មើនឹង៧២៥លានដុល្លារ ឱ្យទៅអង្គភាពបរទេសចំនួន៣ រួមមានទាំងបុត្រសម្ព័ន្ធមួយរបស់ Xiaomi ទៀតផង “ក្នុងរូបភាពជាប្រាក់កម្រៃអ្នកនិពន្ធ”។

ទោះជាយ៉ាងណា ភ្លាមៗក្រុមហ៊ុន Xiaomi មិនបានឆ្លើយតបសំណើសុំការឆ្លើយបំភ្លឺឡើយជុំវិញរឿងនេះ ប៉ុន្តែបានប្រាប់ទីភ្នាក់ងារព័ត៌មាន Reuters ថា ខ្លួនកំពុង “សហការជាមួយអាជ្ញាធរដែលកំពុងស៊ើបអង្កេតដើម្បីធានាថា ពួកគេមានរាល់ព័ត៌មានចាំបាច់”៕

ដោយ សុខុម

អន្តរជាតិ: រុស្ស៊ី និយាយកាលពីថ្ងៃសៅរ៍ ទី៣០ ខែមេសា ថា ខ្លួនរំពឹងថារំហូរទំនិញជាមួយប្រទេសចិន នឹងកើនឡើង ហើយពាណិជ្ជកម្មជាមួយក្រុងប៉េកាំង នឹងឈានដល់២០០ពាន់លានដុល្លារអាមេរិក នៅត្រឹមឆ្នាំ២០២៤ ខណៈក្រុងមូស្គូ ប្រឈមនឹងភាពឯកោកាន់តែខ្លាំងឡើងពីលោកខាងលិច។

ប្រទេសចិន បានបដិសេធមិនថ្កោលទោសទង្វើឈ្លានពានរបស់រុស្ស៊ី ចូលក្នុងប្រទេសអ៊ុយក្រែន ឡើយ ហើយបែរជារិះគន់លោកខាងលិច ដែលបានដាក់ទណ្ឌកម្មធ្ងន់ធ្ងរមិនធ្លាប់មានជាប្រវត្តិសាស្ត្រទៅលើក្រុងមូស្គូ ទៅវិញ។

ប្រទេសទាំងពីរបានពង្រឹងទំនាក់ទំនងកាន់តែស្អិតរមួតក្នុងប៉ុន្មានឆ្នាំចុងក្រោយនេះ រួមទាំងការប្រកាសភាពជាដៃគូ “គ្មានដែនកំណត់” កាលពីខែកុម្ភៈ ផងដែរ។

លោក Georgiy Zinoviev ប្រធាននាយកដ្ឋានទទួលបន្ទុកកិច្ចការអាស៊ី នៃក្រសួងការបរទេសរុស្ស៊ី បានប្រាប់ទីភ្នាក់ងារព័ត៌មាន Interfax ថា “យើងកំពុងផ្តោតលើការសម្រេចគោលដៅដែលប្រមុខរដ្ឋនៃប្រទេសទាំងពីរបានកំណត់ ដើម្បីបង្កើនទំហំពាណិជ្ជកម្មទ្វេភាគីឱ្យឈានដល់២០០ពាន់លានដុល្លារអាមេរិក នៅត្រឹមឆ្នាំ២០២៤”។

ដោយរុស្ស៊ី កំពុងទទួលរងទណ្ឌកម្មជុំទិសដែលធ្វើឱ្យសេដ្ឋកិច្ចប្រទេសនេះទទួលរងផលប៉ះពាល់ធ្ងន់ធ្ងរ លោក Georgiy Zinoviev លើកឡើងថា ប្រទេសទាំងពីរត្រូវការពេលវេលាដើម្បីសម្របខ្លួន។

លោកគូសបញ្ជាក់ថា “ក្រុមហ៊ុនសហគ្រាសចិន នៅតែចាប់អារម្មណ៍ពង្រីកវត្តមានរបស់ខ្លួននៅក្នុងប្រទេសរុស្ស៊ី ដែលកំពុងបើកចំហឱកាសបន្ថែមដោយសារក្រុមហ៊ុនលោកខាងលិចមួយចំនួនបានចាកចេញពីប្រទេសរុស្ស៊ី”។

លោកបានបន្ថែមថា “ខ្ញុំជឿជាក់ថា បណ្ដាដៃគូរបស់យើង និងយើងនឹងអាចប្រើប្រាស់ស្ថានភាពបច្ចុប្បន្នដើម្បីផលប្រយោជន៍រួមរបស់យើង ហើយបញ្ចេញសក្តានុពលពេញទំហឹងសម្រាប់ការបង្កើនកិច្ចសហប្រតិបត្តិការលើគ្រប់វិស័យ”៕

ដោយ៖ សុផារី

ភ្នំពេញ៖ ច្រកព្រំដែនកម្ពុជា-ថៃបាន​ចាប់ផ្ដើមបើកដំណើរការឡើងវិញ ទាំង​ច្រក​អាកាស និង​ផ្លូវ​គោក​ ចាប់ពីថ្ងៃទី១ ខែឧសភា ឆ្នាំ២០២២ តទៅហើយ​។ ខេត្តរបស់ថៃជាប់ច្រកព្រំដែនអន្តរជាតិជាមួយកម្ពុជាដែលអាចធ្វើដំណើរចូលបាន រួមមាន ខេត្តស្រះកែវ ខេត្តសុរិន្ទ ខេត្តត្រាច ខេត្តចន្ទបុរី។​

ស្ថានទូតកម្ពុជាប្រចាំប្រទេសថៃបានចេញផ្សាយនៅលើទំព័រ Facebook របស់ខ្លួន នៅ​ក្នុង​ថ្ងៃទី១ ខែឧសភានេះថា អ្នកដំណើរដែលត្រូវធ្វើដំណើរពីកម្ពុជាទៅកាន់ប្រទេសថៃតាមផ្លូវអាកាស និងផ្លូវគោក ត្រូវបានបែងចែកជា៣ប្រភេទ ហើយក៏ត្រូវអនុវត្តតាមលក្ខខណ្ឌផ្សេងគ្នាផងដែរ ក្នុងនោះរួមមាន៖

ប្រភេទទី១. អ្នកដំណើរដែលបានចាក់វ៉ាក់សាំងពេញលេញ (Vaccinated Travelers)៖
១. ចុះឈ្មោះ Thailand Pass មុនពេលធ្វើដំណើរ (មានលីងតំណភ្ជាប់៖ tp.consular.go.th) ខណៈការត្រួតពិនិត្យ និងសម្ដេចផ្ដល់ Thailand Pass នេះ គឺប្រើពេលមិនលើសពី៤៨ម៉ោងឡើយ។
២. មានធានារ៉ាប់រងព្យាបាលជំងឺកូវីដ១៩ ដែលមានទឹកប្រាក់សរុបធានា១០,០០០ដុល្លារអាម៉េរិក។
៣. មិនតម្រូវឱ្យធ្វើតេស្ត RT-PCR ទាំងមុននិងចូលមកដល់ប្រទេសថៃ។
៤. ត្រូវធ្វើតេស្តរហ័ស (ATK) ដោយខ្លួនឯង អំលុងពេកស្នាក់នៅក្នុងប្រទេសថៃ។

ប្រភេទទី២. អ្នកដំណើរដែលមិនចាក់វ៉ាក់សាំង ឬចាក់វ៉ាក់សាំងមិនពេញលេញ (Unvaccinated Travelers)៖
១. ចុះឈ្មោះ Thailand Pass មុនពេលធ្វើដំណើរ (មានលីងតំណភ្ជាប់៖ tp.consular.go.th) ខណៈការត្រួតពិនិត្យ និងសម្រេចផ្ដល់ Thailand Pass នេះ គឺប្រើពេលមិនលើសពី៤៨ម៉ោងឡើយ។
២. មានធានារ៉ាប់រងព្យាបាលជំងឺកូវីដ១៩ ដែលមានទឹកប្រាក់សរុបធានា១០,០០០ដុល្លារអាម៉េរិក។
៣. ករណី
a. មានលទ្ធផលតេស្ត RT-PCR អវិជ្ជមាន មុនពេលធ្វើដំណើរមិនលើសពី៧២ម៉ោង អាចធ្វើដំណើរចូលក្នុងប្រទេសថៃដូចអ្នកដែលបានចាក់វ៉ាក់សាំងពេញលេញដែរ។
b. ពុំមានលទ្ធផលតេស្ត RT-PCR អវិជ្ជមាន មុនពេលធ្វើដំណើរមិនលើសពី៧២ម៉ោងទេនោះ គឺតម្រូវឱ្យធ្វើចត្តាឡីស័កចំនួន៥ថ្ងៃ ដោយធ្វើតេស្ត RT-PCR នៅថ្ងៃទី៤ ឬទី៥។
៤. ត្រូវធ្វើតេស្តរហ័ស (ATK) ដោយខ្លួនឯង អំលុងពេកស្នាក់នៅក្នុងប្រទេសថៃ។

ប្រភេទទី៣. អ្នកដំណើរដែលជាប្រជាជនក្នុងខេត្តជាប់ព្រំដែនហើយកាន់ប័ណ្ណព្រំដែន (Border Pass)៖
១. មិនតម្រូវឱ្យចុះឈ្មោះ Thailand Pass ទេ។
២. មិនតម្រូវឱ្យមានធានារ៉ាប់រងទេ។
៣. ត្រូវជាអ្នកដែលបានចាក់វ៉ាក់សាំងពេញលេញតែប៉ុណ្ណោះ។
៤. ការធ្វើដំណើរត្រូវបានអនុញ្ញាតតែក្នុងតំបន់ដែលមានចែងដោយកិច្ចព្រមព្រៀងរវាងកម្ពុជា-ថៃប៉ុណ្ណោះ។
៥. អាចស្នាក់នៅក្នុងប្រទេសថៃមិនត្រូវលើសពី៣ថ្ងៃ (២យប់) ឡើយ៕

ដោយៈសុខុម

អន្តរជាតិ: របាយការណ៍បង្ហាញថា ប្រាក់ចំណូលរបស់រុស្ស៊ីបានពីការនាំចេញឥន្ធនៈហ្វូស៊ីលទៅកាន់សហភាពអឺរ៉ុប បានហក់ឡើងយ៉ាងខ្លាំងគួរ ឱ្យភ្ញាក់ផ្អើល អំឡុងពេល២ខែដំបូងនៃសង្គ្រាមឈ្លានពានអ៊ុយក្រែន បើទោះ​បីជាអ្នកទិញខ្លះ បានគេចចេញពីថាមពលរុស្ស៊ី ហើយស្វែងរកអ្នកផ្គត់ផ្គង់ជំនួសក៏ដោយ។

យោងតាមរបាយការណ៍របស់មជ្ឈមណ្ឌលស្រាវជ្រាវថាមពល និងខ្យល់ស្អាត (Centre for Research on Energy and Clean Air) ហៅកាត់ CREA បង្ហាញថា ការនាំចូលឥន្ធនៈហ្វូស៊ីលរុស្ស៊ី ពីសំណាក់បណ្ដាប្រទេសសភាពអឺរ៉ុប មានទំហំទឹកប្រាក់ រហូតដល់ទៅ៤៦,៣ពាន់លានដុល្លារអាមេរិក គិតចាប់ពីថ្ងៃទី២៤ ខែកុម្ភៈ ដែលជាថ្ងៃរុស្ស៊ី បញ្ឆេះសង្គ្រាមចូលឈ្លានពានប្រទេសអ៊ុយក្រែន មកទល់នឹងថ្ងៃទី២៤ ខែមេសា។

លោក Lauri Myllyvirta អ្នកវិភាគជាន់ខ្ពស់នៅមជ្ឈមណ្ឌល CREA បានប្រាប់សារព័ត៌មាន CNN បាននិយាយថា ចំនួននេះគឺលើសទ្វេដង បើធៀបនឹងតម្លៃថាមពលរុស្ស៊ី ដែលបណ្ដាប្រទេសសហភាពអឺរ៉ុប បាននាំចូលក្នុងរយៈពេលដូចគ្នាក្នុងឆ្នាំ២០២១។

សហភាពអឺរ៉ុប គ្របដណ្ដប់ប្រមាណ៧០% នៃប្រាក់ចំណូលនាំចេញឥន្ធនៈហ្វូស៊ីលរបស់រុស្ស៊ី នៅទូទាំងពិភពលោក ដែលមានចំនួន៦៦,៣ពាន់លានដុល្លារអាមេរិក ក្នុងរយៈពេល២ខែមកនេះ។

តម្លៃថាមពលបានហក់កើនឡើងកាលពីឆ្នាំមុន ខណៈប្រទេសនានាបានងើបឡើងពីការបិទខ្ទប់ ដែលបានជំរុញឱ្យតម្រូវការកើនឡើង។ ហើយសង្គ្រាមរុស្ស៊ី ចូលឈ្លានពានអ៊ុយក្រែន បានធ្វើឱ្យតម្លៃប្រេង និងឧស្ម័នហក់ឡើងកាន់តែខ្ពស់។ ប្រទេសជាសមាជិកអង្គការប្រេង OPEC ក៏មិនបានបង្កើនផលិតកម្មតាមការសន្យា ដោយធ្វើឱ្យការផ្គត់ផ្គង់កាន់តែខ្វះថែមទៀត។

របាយការណ៍ស្ដីពីលទ្ធផលរកឃើញនេះ ត្រូវបានផ្សព្វផ្សាយ ស្របពេលអឺរ៉ុប ទទួលរងសម្ពាធកាន់តែខ្លាំងឡើង ឱ្យឈប់នាំចូលប្រេង និងឧស្ម័នរុស្ស៊ី ដើម្បីផ្ដាច់ដង្ហើមសេដ្ឋកិច្ចរបស់វិមានក្រឹមឡាំង ដើម្បីកុំឱ្យរុស្ស៊ីមានលុយធ្វើសង្រ្គាមនៅអ៊ុយក្រែនតទៅទៀត៕ CNN៕