ដោយ៖ សូរិយា

កណ្តាល: ផ្លូវយុទ្ធសាស្រ្តថ្មីៗចំនួន២ខ្សែ នឹងត្រូវកសាងឡើងក្នុងពេលឆាប់ៗនៅក្នុងស្រុកលើកដែក តភ្ជាប់ទៅស្រុកកោះធំ និងតភ្ជាប់ទៅផ្លូវក្រវាត់ក្រុងទី៣ក្នុងទឹកដីខេត្តកណ្តាល ដើម្បីងាយស្រួលដល់ការដឹកជញ្ជូន និងជួយជំរុញសេដ្ឋកិច្ចរបស់ពលរដ្ឋ។

បើយោងតាម លោក ចាប ច័ន្ទវិទ្យា អភិបាលស្រុកលើកដែក បានប្រាប់ឱ្យដឹងកាលពីថ្ងៃទី២៣ ខែមេសា ឆ្នាំ២០២២ ថា ផ្លូវយុទ្ធសាស្រ្តថ្មីៗចំនួន២ខ្សែនេះ រួមមាន ផ្លូវទី១មានប្រវែងបណ្តោយជាង៧ គីឡូម៉ែត្រ ទទឹង៦០ម៉ែត្រ កំពុងសាងសង់ចេញពីក្បែរច្រកទ្វារក្អមអន្តរជាតិសំណ ស្រុកលើកដែក ឆ្ពោះទៅស្រុកកោះធំ។

ផ្លូវថ្មីមួយខ្សែទៀតមានប្រវែង៣២គីឡូម៉ែត្រ ទទឹង៥០ម៉ែត្រ ចេញពីស្រុកលើកដែក ឆ្ពោះទៅផ្លូវក្រវាត់ក្រុងទី៣ ឬចំណុចបំបែកផ្លូវលេខ១ ម្តុំខាងលិចស្ពានអ្នកលឿង។ ហើយបច្ចុប្បន្ននេះ ABB ក៏កំពុងសិក្សាកសាងផ្លូវប្រវែងជាង៥គីឡូម៉ែត្រ ទទឹង៥០ម៉ែត្រឆ្ពោះទៅស្រុកកោះធំមួយផ្សេងទៀតផងដែរ។

លោកបញ្ជាក់ថា “ការកសាងផ្លូវទាំងនេះ គឺជាសសៃឈាមសេដ្ឋកិច្ចដ៏សំខាន់ សម្រាប់តភ្ជាប់ការជញ្ជូនពីតំបន់មួយទៅតំបន់មួយ និងពីស្រុកមួយទៅស្រុកមួយ រហូតដល់ប្រទេសវៀតណាម តាមរយៈច្រកទ្វារអន្តរជាតិក្អមសំណហើយក៏ជាការឆ្លើយតបយ៉ាងសំខាន់ និងទាន់ពេលវេលាផងដែរ ខណៈដែលប្រទេសជាតិកំពុងមានការអភិវឌ្ឍរីកចម្រើនលើគ្រប់វិស័យ ពិសេសវិស័យកសិកម្មក្នុងតំបន់ ដែលកំពុងរីកលូតលាស់ និងដាំដុះយ៉ាងច្រើន ដូចជា ដំណាំពោត និងស្វាយជាដើម”។

លោកថា ការតភ្ជាប់សសៃឈាមគ្រប់ច្រកល្ហកនេះ ទៅថ្ងៃអនាគតដ៏ខ្លីខាងមុខ រំពឹងថាស្រុកលើកដែកនឹងក្លាយជាកូនក្រុងតូចមួយជាក់ជាមិនខាន។

ជាមួយគ្នានេះ លោកអភិបាលស្រុកបញ្ជាក់ថា ក្នុងពេលឆាប់ខាងមុខនេះ ឬយ៉ាងយូរមួយខែទៀត ស្រុកលើកដែក នឹងប្រកាសបើកច្រកទ្វារអន្តរជាតិក្អមសំណជាផ្លូវការ ជាមួយនឹងភាគីវៀតណាម ខណៈដែលច្រកទ្វារនេះ ទាំងផ្លូវគោក និងផ្លូវទឹកបានដំណើរការជាមួយមកហើយ តែមិនទាន់ពេញលេញនៅឡើយ ដោយសារតែខាងភាគីវៀតណាមមិនទាន់បានបើកជាច្រកអន្តរជាតិ។ លោកថា ការដែលមិនបានបើកជាច្រកអន្តរជាតិកន្លងមកនេះ ធ្វើឲ្យទំនិញចំនួនមិនអាចដឹកឆ្លងកាត់បានទេ។

លោកមានសុទិដ្ឋិនិយមដែរថា បន្ទាប់ពីកសាងផ្លូវខ្វាត់ខ្វែង និងបើកច្រកអន្តរជាតិពេញលេញនេះ នឹងផ្តល់ផលប្រយោជន៍ ច្រើនដល់ប្រជាជន និងប្រទេសទាំងពីរ និងធ្វើឱ្យទំនាក់ទំនងនៃប្រទេសទាំងពីរកាន់តែល្អប្រសើរថែមទៀត៕

ដោយ៖ សុផារី

ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅព្រឹកថ្ងៃទី២៦ខែមេសា ឆ្នាំ២០២២នេះ បានប្រកាសថា រាជរដ្ឋាភិបាលបានសម្រេចលើកលែងកាតព្វកិច្ចពាក់ម៉ាសនៅទូទាំប្រទេស ចំពោះទីកន្លែងសាធារណៈ និងទីកន្លែងចំហនានា ហើយទុកឱ្យប្រជាជនទាំងអស់ ជាអ្នកសម្រេចថា តើគួរពាក់ម៉ាស ឬមិនពាក់ម៉ាស។

យោងតាមសារជាសំឡេងពិសេស របស់សម្ដេចតេជោ នៅព្រឹកថ្ងៃនេះ បានឱ្យដឹងថា “បន្ទាប់ពីមានការដឹកនាំកិច្ចប្រជុំពីសំណាក់លោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាអនុប្រធានគណៈកម្មការប្រចាំការប្រយុទ្ធប្រឆាំងជំងឺកូវីដ-១៩ និងមន្ត្រីពាក់ព័ន្ធនានារួចមក គឺរាជរដ្ឋាភិបាល បានលើកលែងកាតព្វកិច្ចពាក់ម៉ាសនៅទូទាំងប្រទេស ចំពោះទីកន្លែងសាធារណៈ និងទីកន្លែងចំហនានា ក្រៅតែពីកន្លែងបិទជិតដោយទុកឱ្យប្រជាជនទាំងអស់ ធ្វើការសម្រេចចិត្តដោយខ្លួនឯងថា ពាក់ម៉ាស ឬមិនពាក់ម៉ាស”។

សម្តេចបានថ្លែងថា ដូច្នេះ ចាប់ពីពេលនេះតទៅបងប្អូនមានសិទ្ធក្នុងការសម្រេចចិត្តថា តើគួរពាក់ម៉ាស់ ឬទេ លើកលែងតែ ក្នុងទីតាំងទាំងឡាយណាដែលបិទជិត ដូចជា រោងភាពយន្ត បន្ទប់ប្រជុំ ឬបន្ទប់ម៉ាស៊ីនត្រជាក់ តែក្នុងករណីលំហរនៅខាងក្រៅអាចដោះម៉ាស់ចេញបាន ដូចជា តាមដងផ្លូវ សួនច្បារ ទីសាធារណៈ ជាដើម។
បើតាមការលើកឡើងរបស់សម្តេច កាលពីថ្ងៃទី២៥ ខែមេសា ឆ្នាំ២០២២ កន្លងមក នៅក្នុងប្រទេសកម្ពុជា ជាលើកដំបូង មិនមានករណីអ្នកឆ្លងកូវីដ១៩នោះទេ។ ការលើកលែងកាតព្វកិច្ចពាក់ម៉ាស់នេះ គឺធ្វើតាមការចង់បានរបស់បងប្អូនប្រជាពលរដ្ឋ ដើម្បីជួយកាត់បន្ថយការចំណាយប្រចាំលើម៉ាស់ និងការបង្វែរកញ្ចប់ថវិកានេះទៅប្រើប្រាស់លើផ្នែកផ្សេងទៀត។

យ៉ាងណាក្តី សម្តេចនៅតែបន្តអំពាវនាវឱ្យរក្សាទុកម៉ាស់នៅជាប់នឹងខ្លួន ហើយនៅបន្តការពារខ្លួនជានិច្ច កំណត់ឱ្យបងប្អូនប្រជាពលរដ្ឋកម្ពុជាទទួលដូសវ៉ាក់ស៊ាំង ជំរុញដូសទី៣ឱ្យបានគ្រប់ៗគ្នា៕

ដោយៈសុខុម

ញូវយ៉ក: ក្រុមហ៊ុនបណ្ដាញទំនាក់ទំនងសង្គម Twitter ត្រៀម នឹងយល់ព្រមលក់ឱ្យកំពូលមហាសេដ្ឋី Elon Musk ក្នុងតម្លៃប្រមាណ ៤៣ពាន់លានដុល្លារជាសាច់ប្រាក់ ជាតម្លៃដែលនាយកប្រតិបត្តិក្រុមហ៊ុន Tesla រូបនេះចាត់ទុកថាជា “តម្លៃល្អបំផុត និងតម្លៃចុងក្រោយ”។

លោក Elon Musk ដែលទស្សនាវដ្ដី Forbes ចុះផ្សាយកាលពីពេលថ្មីៗនេះថា ជាមហាសេដ្ឋីមានប្រាក់ជាងគេ បំផុតរបស់ពិភពលោក កំពុងចរចាទិញយកក្រុមហ៊ុន Twitter ដោយផ្ទាល់ ហើយក្រុមហ៊ុន Tesla របស់លោក មិនពាក់ព័ន្ធនឹងកិច្ចព្រមព្រៀងនេះទេ។ នេះបើយោងតាមសារព័ត៌មាន Reuters ចុះផ្សាយកាលពីថ្ងៃច័ន្ទ ទី២៥ ខែមេសា។

ប្រភពខាងលើបានស្នើសុំមិនបញ្ចេញឈ្មោះនោះទេ ព្រោះរឿងនេះជាការសម្ងាត់ ហើយពេលទាក់ទងទៅទាំងក្រុមហ៊ុន Twitter និងលោក Elon Musk ក៏មិនបានឆ្លើយបំភ្លឺដែរជុំវិញរឿងនេះ។

ភាគហ៊ុនរបស់ក្រុមហ៊ុន Tesla បានហក់ឡើង៤,៥%នៅក្នុងការជួញដូរ នៅក្រុងញូវយ៉ក កាលពីថ្ងៃច័ន្ទ ទី២៥ ខែមេសា ក្នុងតម្លៃ ៥១,១៥ដុល្លារក្នុងមួយភាគហ៊ុន។

លោក Elon Musk ធ្លាប់បានលើកឡើងថា ក្រុមហ៊ុនបណ្ដា​ញទំនាក់ទំនងសង្គម Twitter គួរតែក្លាយជា Platform ដ៏ល្អមួយ សម្រាប់ការបញ្ចេញមតិដោយសេរី និងគ្មានការរឹតបន្តឹង៕ Reuters៕

ដោយៈ គង់ សូរិយា

ភ្នំពេញៈ ការវិនិយោគដើម្បីធ្វើឲ្យប្រសើរឡើង នូវប្រព័ន្ឋដឹកជញ្ជូនតាមផ្លូវទឹក ពិសេសគំរោងចំណតផែរណប ពហុបំណងរបស់កំពង់ផែស្វ័យ័ត្នក្រុងភ្នំពេញសម្រេចបាន វឌ្ឍនភាពការងារបានប្រមាណ ៨៥%ហើយ។

លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញចុះពិនិត្យវឌ្ឍនភាព ការងារសាងសង់កំពង់ផែរណបពហុបំណង TS១១ របស់កំពង់ផែស្វយ័តភ្នំពេញ ដែលមានទីតាំងស្ថិតនៅតាមបណ្តោយផ្លូវជាតិលេខ៥ គីឡូម៉ែត្រ៦ ខណ្ឌឬស្សីកែវ រាជធានីភ្នំពេញ និងជួបសំណេះសំណាល ជាមួយក្រុមប្រឹក្សាភិបាល មន្រ្តី បុគ្គលិក កម្មករ។

ថ្លែងទៅកាន់អង្គពិធីនាពេលនោះ លោកទេសរដ្ឋមន្ត្រី បានជម្រាបជូនថា រាជរដ្ឋាភិបាលបានអនុញ្ញាតឱ្យក្រសួងសាធារណការ និងដឹកជញ្ជូន ធ្វើការសិក្សា ពីការស្ដារផ្លូវទឹកនៅតាមទន្លេបាសាក់ ពីព្រែកអំបិល ទៅខេត្តតាកែវ កំពត កែប មានចម្ងាយ១៦៨គីឡូម៉ែត្រ ហើយក្រសួងសាធារណការ និងដឹកជញ្ជូន បានធ្វើការសិក្សាការស្ដារផ្លូវទឹក និងពិនិត្យមើលលទ្ធភាពធ្វើផ្លូវទឹកនេះថាធ្វើបាន ឬមិនបាន។

លោកគូសបញ្ជាក់ថា “ការរៀបចំផែនការស្ដារផ្លូវទឹក និងការសាងសង់ផែរណបបន្ថែមនេះ គឺជាទិសដៅមួយដែលមានសារៈសំខាន់ណាស់ ក្នុងការធ្វើឱ្យចម្ងាយដឹកជញ្ជូនពីគ្រប់ផ្លូវទន្លេ ទៅកាន់សមុទ្រកម្ពុជាកាន់តែខ្លី កាត់បន្ថយពេលវេលា និងចម្ងាយដឹកជញ្ជូន ចំណេញថវិកាក្នុងការដឹកជញ្ជូន កាត់បន្ថយគ្រោះថ្នាក់ចរាចរណ៍ និងសម្ពាធនៃការប្រើប្រាស់ផ្លូវ ព្រមទាំងបង្កើនសកម្មភាពដឹកជញ្ជូនតាមផ្លូវទឹកកាន់តែច្រើនផងដែរ”។

ការអភិវឌ្ឍហេដ្ឋារចនាសម្ព័ន្ធ ចំណតផែរណបពហុបំណង TS១១ គឺជាការវិនិយោគ រវាងកំពង់ផែស្វយ័តភ្នំពេញ (ភាគទុន៥១%) និងក្រុមហ៊ុន PTLS Co., LTD (ភាគទុន៤៩%) ដោយចំណាយទឹកប្រាក់សាងសង់ប្រមាណ១២លានដុល្លារអាមេរិក។ គិតមកដល់ពេលនេះ ការសាងសង់សម្រេចបានជារួមប្រមាណ ៨៥% ដោយគ្រោងបញ្ចប់ការសាងសង់នៅចុងខែមិថុនា និងបើកឱ្យដំណើរការប្រើប្រាស់កំឡុងខែកក្កដា ឆ្នាំ២០២២ ខាងមុខនេះ ដែលអាចផ្ទុកទំនិញបានពី៦ម៉ឺន ទៅ៩ម៉ឺន TEUs ក្នុង១ឆ្នាំ។

លោកស៊ុន ចាន់ថុល បានបន្ថែមទៀតថា ការរៀបចំផែនការស្ដារផ្លូវទឹកទន្លេបាសាក់ ក៏ដូចជា ការរៀបចំរបស់កំពង់ផែស្វយ័តភ្នំពេញ គឺជាជំហានមួយដែលជួយបង្កើន ការដឹកជញ្ជូននៅតាមផ្លូវទឹកឱ្យបានច្រើន ហើយការសាងសង់ពង្រីកផែរណបមួយចំនួនទៀតនេះគឺ ជាជំហានដ៏ធំមួយដែលជួយបង្កើនការដឹកជញ្ជូនតាមផ្លូវទឹកឱ្យបានច្រើន និងពង្រីកវិស័យភស្តុភារកម្មរបស់កម្ពុជាឱ្យមានប្រសិទ្ធភាពខ្ពស់ ផងដែរ។

គម្រោងប្រព័ន្ធផ្លូវទឹក និងភស្តុភារកម្មទន្លេបាសាក់ នឹងផ្តល់អត្ថប្រយោ​ជន៍យ៉ាងច្រើនដល់ការអភិវឌ្ឍពហុវិស័យ ដូចជា លើកកម្ពស់ការតភ្ជាប់ការដឹកជញ្ជូនអន្តរកម្មដែលចុះសម្រុងគ្នា និងរួមបញ្ចូលគ្នាជាមួយមជ្ឈមណ្ឌលដឹកជញ្ជូន តំបន់ពាណិជ្ជកម្ម កសិកម្ម ប្រព័ន្ធធារាសាស្រ្ត ឧស្សាហកម្ម ទេស​ចរណ៍ និងមជ្ឈមណ្ឌលពាណិជ្ជកម្ម។

គម្រោងនេះក៏នឹងជួយជំរុញ និងពន្លឿនការអភិវឌ្ឍនគរូបនីយកម្មទីក្រុង និងហេដ្ឋារចនាសម្ព័ន្ធជនបទ ឆ្ពោះទៅរកការលើកកម្ពស់ជីវភាពរស់នៅរបស់ប្រជាពលរដ្ឋ ក្នុងមូលដ្ឋាននៅកម្ពុជានិរន្តរភាព កំណើនម៉ាក្រូសេដ្ឋកិច្ចរបស់ប្រទេស ព្រមទាំងពន្លឿនការកាត់បន្ថយភាពក្រីក្រ របស់ប្រជាជនកម្ពុជាផងដែរ៕

ដោយៈ ជេស៊ីកា

ភ្នំពេញៈ សម្តេចតេជោហ៊ុន សែននាយករដ្ឋមន្រ្តីនៃកម្ពុជាបានថ្លែងថា បរិយកាសកាលវិនិយោគនៅកម្ពុជា មានភាពល្អប្រសើរ ដោយសារកត្តាសំខាន់ៗមួយចំនួន។

សម្តេចបានថ្លែងបែបនេះ ក្នុងពេលអនុញ្ញាត្តឲ្យថ្នាក់ដឹកនាំក្រុមហ៊ុនចិនចំនួនបី ជួបពិភាក្សាការងារ ដែលដឹកនាំដោយ អ្នកឧកញ៉ា ចេន ហ្ស៊ី ប្រធានសម្ព័ន្ធក្រុមហ៊ុន ព្រីនស៍ គ្រុប។

ក្នុងជំនួបនេះផងដែរ អ្នកឧកញ៉ា ចេន ហ្ស៊ី ប្រធានសម្ព័ន្ធក្រុមហ៊ុន ព្រីនស៍គ្រុប និងថ្នាក់ដឹកនាំក្រុមហ៊ុន China investment ក្រុមហ៊ុនអ៊ីស្ទ័រ និងក្រុមហ៊ុនគួអាន បានគោរពថ្លែងអំណរគុណយ៉ាងជ្រាលជ្រៅជាទីបំផុតជូនចំពោះសម្តេចតេជោ ដែលបានឆ្លៀតឱកាសដ៏មមាញឹក ដោយបានអនុញ្ញាត ឲ្យបានជួបសំដែងការគួរសមផង និងស្វែងយល់ពីបរិ​យាកាសវិនិយោគនៅកម្ពុជាផង។

អ្នកឧកញ៉ា ចេន ហ្ស៊ី បានគោរពជម្រាបជូនសម្ដេចតេជោ ពីអាជីវកម្មរបស់ក្រុមហ៊ុនខាងលើ ដែលរួមមាន វិស័យឧស្សាហកម្មរ៉ែ, ហេដ្ឋារចនាស ម្ព័ន្ធ អចលនវត្ថុ ពាណិជ្ជកម្មសំណង់ឡូជីស្ទីក មូលបត្រ និងពាណិជ្ជកម្មមូលបត្រ។ អ្នកឧកញ៉ា ចេន ហ្ស៊ី ក៏បានគោរពអនុញ្ញាតដ៏ខ្ពង់ខ្ពស់ពីសម្ដេចតេជោ ស្វែងយល់អំពីបរិយាកាសវិនិយោគនៅកម្ពុជា។

ជាការឆ្លើយតប សម្តេចតេជោ ហ៊ុន សែន បានស្វាគមន៍អ្នកឧកញ៉ា ចេន ហ្ស៊ី ក្រុមហ៊ុន China investment ក្រុមហ៊ុនអ៊ីស្ទ័រ និងក្រុមហ៊ុន គួរអាន ហើយបានជម្រាបជូនលោកចេន ហ្ស៊ី និងប្រតិភូដឹកនាំក្រុមហ៊ុនទាំង៣ថា បរិយាការវិនិយោគនៅកម្ពុជា មានភាពល្អប្រសើរ ដោយមូលហេតុ ទី១-កម្ពុជា មានសុខសន្តិភាព និងស្ថិរភាពដែលជាមូលដ្ឋានគ្រឹះសម្រាប់ការវិនិយោគ ទី២-កម្ពុជា មានច្បាប់វិនិយោគ ដែលផ្ដល់ការងាយស្រួលដល់អ្នកវិនិយោគ។

ទី៣-កម្ពុជាមានក្បាលម៉ាស៊ីនគ្រប់គ្រងច្រកចេញចូលតែមួយ សម្រាប់ការជួយសម្រួលដល់ការវិនិយោគ ទី៤-កម្ពុជា មិនតំរូវឲ្យអ្នកវិនិយោគប្រើតែប្រាក់រៀល សម្រាប់បើកប្រាក់ខែឲ្យបុគ្គលិក ដោយកម្ពុជាអនុញ្ញាតដល់ការប្រើប្រាក់ដទៃទៀត ដូចជា ប្រាក់ដុល្លារជាដើម ដើម្បីបើកប្រាក់ខែឱ្យបុគ្គលិកផង និងធ្វើពាណិជ្ជកម្មនៅកម្ពុជាផង និងទី៥-កម្ពុជា មានកម្លាំងពលកម្មវ័យក្មេងច្រើន ។

សម្ដេចតេជោ ហ៊ុន សែន បានធ្វើការណែនាំឲ្យអ្នកឧកញ៉ាចេន ហ្ស៊ី និងប្រតិភូ ធ្វើការស្វែងយល់បន្ថែមទៀតពីឯកឧត្តម សុខ ចិន្តាសោភា អគ្គលេខាធិការក្រុមប្រឹក្សាអភិវឌ្ឍន៍កម្ពុជា (CDC) អំពីទិសដៅវិនិយោគនៅកម្ពុជា ៕