ការផ្គត់ផ្គង់ខុនដូរំពឹងកើនឡើងដល់ជិត៨ម៉ឺនយូនីតក្នុងរយៈពេល៣ឆ្នាំខាងមុខ

ដោយ៖ វឌ្ឍនៈ

 

ភ្នំពេញ ៖     ទីផ្សារខុនដូនៅក្នុងប្រទេសកម្ពុជា បាននិងកំពុងរីកដុះដាលជាបន្តបន្ទាប់ ដោយមានអ្នកវិនិយោគជាច្រើន បានសាងសង់ខុនដូផ្គត់ផ្គត់ដល់អតិថិជន ទាំងក្នុងស្រុក និងក្រៅប្រទេស ដែលធ្វើឱ្យចំនួនយូនីតខុនដូមានការកើនឡើងជាបន្តបន្ទាប់។ ការព្យាករណ៍របស់ក្រុមហ៊ុនអន្តរជាតិមួយ ចេញផ្សាយកាលពីពេលថ្មីៗនេះ ឱ្យដឹងថាការផ្គត់ផ្គង់ខុនដូនៅក្នុងប្រទេសកម្ពុជា នឹងកើនឡើងដល់ជិត៨ម៉ឺនយូនីត។

យោងតាមរបាយការណ៍របស់ក្រុមហ៊ុនអចលនទ្រព្យ Knight Frank បានឱ្យដឹងថា គិតត្រឹមដំណាច់ឆ្នាំ២០២១ ការផ្គត់ផ្គង់ខុនដូនៅរាជធានីភ្នំពេញ បានកើនដល់ជាង២ម៉ឺន៧ពាន់យូនីត ស្មើនឹងចំនួនអគារ៩៥អគារ។ ការផ្គត់ផ្គង់ខុនដូ ត្រូវបានរំពឹងថានឹងកើនឡើងដល់ជាង៧ម៉ឺន៨ពាន់យូនីត ស្មើនឹង១៧៥ អគារ នៅត្រឹមឆ្នាំ២០២៥។

យ៉ាងណាក្ដី បើតាមរបាយការណ៍របស់ក្រុមហ៊ុនអចលនទ្រព្យ CBRE Cambodia បានបង្ហាញថាក្នុងឆ្នាំ២០២២នេះ ការផ្គត់ផ្គង់ខុនដូលើទីផ្សារ រំពឹងថា នឹងមានចំនួនជាង១ម៉ឺន៣ពាន់យូនីត ប៉ុន្តែក្នុងត្រីមាសទី១នៃឆ្នាំ២០២២នេះ ខុនដូកំពុងផ្គត់ផ្គង់លើទីផ្សារ សម្រេចបានត្រឹមតែ៥ភាគរយ នៃចំនួនជាង១ម៉ឺន៣ពាន់យូនីតប៉ុណ្ណោះ។

របាយការណ៍ឱ្យដឹងថា ការយឺតយ៉ាវនេះ បណ្ដាលមកពីតម្រូវការក្រៅប្រទេសនៅ បន្តធ្លាក់ចុះ ដោយសារបញ្ហាកូវីដ១៩សកលមិនទាន់បានធូរស្បើយ និងបញ្ហាប្រឈម នៃសង្គ្រាមរវាងប្រទេសរុស្ស៊ី និងអ៊ុយក្រែន។

អ្នកនាង គឹម គិនកេសា អ្នកគ្រប់គ្រងជាន់ខ្ពស់ នៃក្រុមហ៊ុនអចលនទ្រព្យ CBRE Cambodia បានលើកឡើងផងដែរថា វិនិយោគិនបរទេសបន្តធ្លាក់ចុះ នៅដើមឆ្នាំ២០២២នេះ ដែលជាហេតុធ្វើឱ្យការផ្គត់ផ្គង់ខុនដូនៅលើទីផ្សារកម្ពុជាបន្តមានចំនួនតិចតួច ដោយសារបញ្ហាកូវីដ១៩សកលមិនទាន់មានភាពប្រសើរ ហើយបញ្ហាសង្គ្រាមរុស្ស៊ី អ៊ុយក្រែន បន្តប៉ះពាល់ដល់ពិភពលោក។

ទោះបីឆ្នាំ២០២២នេះ ចំនួនផ្គត់ផ្គត់ខុនដូនៅលើទីផ្សារ មានចំនួនតិចតួចក្ដី អ្នកជំនាញជាច្រើនរំពឹងថា ទីផ្សារខុនដូនៅកម្ពុជា នឹងមានកំណើនឡើងខ្ពស់ នាពេលអនាគត ស្របពេលប្រជាពលរដ្ឋកម្ពុជាកាន់តែច្រើន បានងាកទៅផ្លាស់ប្តូរការរស់នៅក្នុងខុនដូ ជំនួសឱ្យការរស់នៅផ្ទះជាប់ដីដែលមានទីតាំងនៅឆ្ងាយពីក្រុង និងឆ្ងាយពីកន្លែងការងារ។

លោក ឃុន ហេង នាយកជាន់ខ្ពស់ផ្នែកវិនិយោគខុនដូ នៃក្រុមហ៊ុន Century 21 Mekong បានឱ្យដឹងថា ទីផ្សារខុនដូនៅកម្ពុជានឹងមានកំណើនកាន់តែខ្ពស់ នៅរយៈពេលពីរបីឆ្នាំខាងមុខ ដូច្នេះអ្នកអភិវឌ្ឍន៍ខុនដូ នាពេលបច្ចុប្បន្ននេះ នឹងមានទីផ្សារខ្ពស់នៅខាងមុខ។ វិនិយោគិនបរទេសកាន់តែច្រើន នឹងចូលមកវិនិយោគ ជាអ្នកអភិវឌ្ឍន៍ និងអ្នកទិញ ឬជួលខុនដូ៕

តំបន់អាស៊ីប៉ាស៊ីហ្វិកទាក់ទាញកំណើនទុនវិនិយោគច្រើនបំផុត ក្នុងត្រីមាសទី១ឆ្នាំនេះ

ដោយ៖លាងហួរ

 

អចលនទ្រព្យ៖ ទីផ្សារអចលនទ្រព្យនៅអាស៊ីប៉ាស៊ីហ្វិកមានសន្ទុះយ៉ាងខ្លាំង ក្នុងត្រីមាសទី១ ឆ្នាំ២០២២នេះ​ ជាមួយនឹងទំហំវិនិយោគកើនឡើង២០% ពីមួយឆ្នាំទៅមួយឆ្នាំ កើនដល់ចំនួន៤០,៨ពាន់លានដុល្លារ នេះបើយោងតាមទិន្នន័យរបស់ JLL ។

 

របាយការណ៍បានឱ្យដឹងថា ប្រទេសសិង្ហបុរី កូរ៉េខាងត្បូង និងអូស្ត្រាលី គឺជាប្រទេសធំទាំង៣ ដែលមានកំណើនវិនិយោគច្រើនជាងគេ។  វិស័យលក់រាយ និងការិយាល័យបានដំណើរការយ៉ាងល្អប្រសើរ ខណៈពេលដែលភស្តុភារ និងឧស្សាហកម្មបានរាយការណ៍ថាមានកំណើនជាមធ្យម៣.៥% ពីមួយឆ្នាំទៅមួយឆ្នាំ។

 

អចលនទ្រព្យពាណិជ្ជកម្មរបស់ប្រទេសសិង្ហបុរី មានកំណើនវិនិយោគដ៏ធំបំផុតនៅក្នុងតំបន់ កើនឡើង១៣៤% ដោយនៅចុងត្រីមាសទីមួយនេះ មានទុនវិនិយោគចំនួន៥,៧ ពាន់លានដុល្លារ ជំរុញដោយប្រតិបត្តិការក្នុងទីផ្សារការិយាល័យ និងទីផ្សារលក់រាយ។

 

ប្រទេសកូរ៉េខាងត្បូងបានបន្តមានកំណើនវិនិយោគ៨៩% កើនឡើងដល់៨,២ពាន់លានដុល្លារ ដែលជំរុញដោយការវិនិយោគចម្រុះ លើទីផ្សារការិយាល័យ ការលក់រាយ និងភស្តុភារ និងវិស័យឧស្សាហកម្ម។

ដោយឡែក ប្រទេសអូស្ត្រាលី បានប្រកាសពីកំណើនវិនិយោគប្រចាំឆ្នាំធំបំផុតទីបី ដោយបានកើនឡើង៤៩% ខណៈវិនិយោគិនបានបោះទុនជាង៤,៧ពាន់លានដុល្លារ ទៅក្នុងទីផ្សារការិយាល័យ។

 

ប្រទេសជប៉ុននៅតែជាទីផ្សារវិនិយោគធំបំផុតក្នុងតំបន់ ក្រោមទុនវិនិយោគ៨,៥ពាន់លានដុល្លារ ទោះបីជាមានការធ្លាក់ចុះ២៦% បើធៀបនឹងឆ្នាំ​មុនក្តី។ ប្រទេស​ចិន​នៅ​តែ​រក្សាទ្រឹងនៅ​ក្នុង​ត្រីមាស​ទី​មួយ ​ដោយ​មាន​ទុនវិនិយោគ​សរុប​ចំនួន៨,៣ពាន់​លាន​ដុល្លារ។

 

លោក Stuart Crow នាយកប្រតិបត្តិក្រុមហ៊ុន Capital Markets ប្រចាំតំបន់អាស៊ីប៉ាស៊ីហ្វិក បានឱ្យដឹងថា “វិនិយោគិនបាននិងបន្តបោះទុនវិនិយោគ នៅទូទាំងតំបន់អាស៊ីប៉ាស៊ីហ្វិក ដែលបណ្តាលមកពីបម្រែបម្រួលការរវិនិយោគទ្រព្យសកម្មនៃ​ទីផ្សារលក់រាយ ការបន្តជំរុញទីផ្សារការិយាល័យ និងកំណើនខ្ពស់នៅក្នុងប្រទេសសិង្ហបុរី កូរ៉េ និងអូស្ត្រាលី។”

 

លោកបន្តថា “យើងមានសុទិដ្ឋិនិយមថា វិស័យអចលនទ្រព្យក្នុងតំបន់នឹងអាចទប់ទល់នឹងការកើនឡើងអត្រាការប្រាក់ខ្ពស់ និងភាពមិនច្បាស់លាស់ ដែលកំពុងកើនឡើងបាន។

យើងនៅតែមើលឃើញការប្រកួតប្រជែងខ្លាំង សម្រាប់ទ្រព្យសកម្ម និងរក្សាការព្យាករណ៍របស់យើងជាង២០០ពាន់លានដុល្លារ ក្នុងការវិនិយោគផ្ទាល់ ទៅកាន់អាស៊ីប៉ាស៊ីហ្វិក សម្រាប់ឆ្នាំ២០២២នេះ”។

 

លោក Stuart Crow បានមានប្រសាសន៍ថា អចលនទ្រព្យពាណិជ្ជកម្ម មានកំណើនវិនិយោគធំបំផុតនៅក្នុងតំបន់ កើនឡើង១៣៤%ពីមួយឆ្នាំទៅមួយឆ្នាំ ដោយនៅចុងត្រីមាសទីមួយនេះ មានទំហំវិនិយោគចំនួន៥,៧ពាន់លានដុល្លារអាមេរិក៕

មហាយក្សចិនសម្រុកនាំចូលប្រេងពីរុស្ស៊ីនិងអារ៉ាបីសាអូឌីត ខណៈពិភពលោកកំពុងជួបវិបត្តិថាមពល

ដោយ៖ សុខុម

 

អន្តរជាតិ: ប្រទេសចិន បានសម្រុកនាំចូលប្រេងឆៅយ៉ាងគំហុកពីប្រទេសរុស្ស៊ី និងជាពិសេសប្រទេសអារ៉ាប៊ីសាអូឌីត ខណៈពិភពលោកកំពុងប្រឈមវិបត្តិថាមពល។ នេះបើយោងតាមសារព័ត៌មាន CNA ចុះផ្សាយនៅថ្ងៃសុក្រ ទី២០ ខែឧសភានេះ។

ផ្អែកតាមទិន្នន័យគយចិន ដែលទីភ្នាក់ងារព័ត៌មាន Reuters ទទួលបានបង្ហាញថា ការនាំចូលប្រេងឆៅរបស់ប្រទេសចិន ពីអារ៉ាប៊ីសាអូឌីត ដែលជាអ្នកផ្គត់ផ្គង់កំពូលរបស់ខ្លួន បានកើនឡើងរហូតដល់៣៨%ក្នុងខែមេសា បើធៀបនឹងឆ្នាំ២០២១។ កំណើននាំចូលប្រចាំខែនេះ គឺច្រើនបំផុតមិនធ្លាប់មាន ចាប់តាំងពីខែឧសភា ឆ្នាំ២០២០មក។

ទិន្នន័យពីរដ្ឋបាលគយទូទៅនៃប្រទេសចិន បង្ហាញថា ការនាំចូលប្រេងពីប្រទេសអារ៉ាប៊ីសាអូឌីត មានចំនួន៨,៩៣លានតោន កាលពីខែមុន ដែលស្មើនឹង២,១៧លានបារ៉ែលក្នុងមួយថ្ងៃ។

 

ការនាំចូលប្រេងពីប្រទេសរុស្ស៊ី ដែលជាអ្នកផ្គត់ផ្គង់ធំបំផុតទី២របស់ខ្លួន បានកើនឡើងជាង៤% កាលពីខែមុន បើធៀបនឹងឆ្នាំ២០២១ ដោយទំនិញប្រេងត្រូវបានកក់ មុនពេលបណ្ដារដ្ឋាភិបាលលោកខាងលិចរឹតបន្តឹងទណ្ឌកម្មលើរុស្ស៊ី ចំពោះការបញ្ឆេះសង្គ្រាមឈ្លានពានចូលប្រទេសអ៊ុយក្រែន នៅថ្ងៃទី២៤ ខែកុម្ភៈ។

ទិន្នន័យបង្ហាញថា ប្រេងរុស្ស៊ី ដែលនាំចូលមកដល់ប្រទេសចិន ក្នុងខែមេសា មានចំនួនសរុប៦,៥៥លានតោន ឬស្មើនឹង១,៥៩លានបារ៉ែលក្នុងមួយថ្ងៃ បើធៀបនឹង១,៥លានបារ៉ែលក្នុងមួយថ្ងៃ ក្នុងខែមីនា និង១,៥៣លានបារ៉ែល ក្នុងមួយថ្ងៃ កាលពីឆ្នាំមុន។

 

ទិន្នន័យបានបង្ហាញថា ការនាំចូលប្រេងឆៅសរុបរបស់ប្រទេសចិន កាលពីខែមុន បានកើនឡើងជិត៧% ដែលជាការកើនឡើងលើកដំបូងរបស់ខ្លួន ក្នុងរយៈពេល៣ខែមកនេះ៕

គំរោងដីលំហែរបូកគោលែន៣កំពុងទាក់ទាញការវិនិយោគនិងជម្រុញ កំនើនតម្លៃដីធ្លីនៅតំបន់នេះ

ដោយៈវឌ្ឍនៈ

ភ្នំពេញៈ ផ្ទះលំហែកាយដីលំហែកាយភាគច្រើន ត្រូវបានអភិវឌ្ឍន៍នៅតំបន់ដែលឆ្ងាយពីទីប្រជុំជន ជាលក្ខណៈឯកជន ហើយការអភិវឌ្ឍអចលនទ្រព្យប្រភេទនេះ នឹងជំរុញឱ្យដីធ្លីនៅតំបន់ជុំវិញនោះ កាន់តែមានហាងឆេងមួយកម្រិតទៀត។

ជាក់ស្ដែងបទពិសោធន៍កន្លងមក ដូចជា នៅខេត្តកំពត និងខេត្តមណ្ឌលគីរី បានធ្វើឱ្យតម្លៃដី ដែលមិនសូវមានការចាប់អារម្មណ៍ ក្លាយជាដីដែលមានហាងឆេងខ្ពស់ជាមុន។

លោក Cooler Tanអគ្គនាយកក្រុមហ៊ុនYoungsia Real Estateដែលបានអភិវឌ្ឍន៍ដីលំហែកាយបូកគោលែន នៅក្នុងខេត្តកំពតបានឱ្យដឹងថា ការអភិវឌ្ឍគំរោងបូកគោលែន៣បាននិងកំពុងឆ្ពោះទៅមុខ ជាមួយនឹងការរៀបចំហេដ្ឋារចនាសម្ព័ន្ឋកាន់តែប្រសើរ ដោយមានខ្លោងទ្វារ ការបង្ហាប់ផ្លូវមេ និងផ្លូវរណបក្នុងគំរោង និងការត្រៀមដាំផ្កាសាគូរ៉ាចំនួន៤០០ដើមនាពេលឆាប់ៗខាងមុខនេះ។

លោកបន្តថា “ការអភិវឌ្ឍតែងតែនាំមកនូវភាពរីកចម្រើន ហើយការអភិវឌ្ឍន៍ដីលំហែរកាយរបស់ខ្ញុំ ស្ថិតនៅក្នុងគម្រោងផ្លូវជាតិលេខ៤៣ នឹងជំរុញសក្ដានុពលនៅតំបន់នោះ កាន់តែមានសន្ទុះមួយកម្រិតផងដែរ”។

លោកបន្តថា “ការអភិវឌ្ឍដីផ្ទះលំហែកាយ ក៏នឹងផ្ដល់ប្រយោ​ជន៍ដល់ប្រជាជនក្នុងភូមិក្នុងតំបន់នោះផងដែរ ដូចជាការលក់ដូរផលិតផលកសិកម្មដែលដាំដុះបាន ហើយកសិករក្នុងតំបន់នោះ ក៏អាចដាំដុះបន្ថែមបង្កើនចំណូលក្នុងគ្រួសារផងដែរ”។

ជាមួយគ្នានេះ លោកផឹង សុភី អ្នកគ្រប់គ្រងគម្រោងអភិវឌ្ឍន៍ដីផ្ទះលំហែឧទ្យានកោះព្រែក ខេត្តកំពតក៏បានឱ្យដឹងថា មុននឹងចាប់ផ្ដើមអភិវឌ្ឍន៍គម្រោង អ្នកវិនិយោគត្រូវការអភិវឌ្ឍ ហេដ្ឋារចនាសម្ព័ន្ធតភ្ជាប់ពីផ្លូវធំទៅកាន់ទីតាំងគម្រោង ហើយនៅពេលមានការអភិវឌ្ឍផ្លូវបែបនេះ វាក៏នឹងជំរុញឱ្យតម្លៃដីធ្លីនៅក្នុងតំបន់នោះ មានសន្ទុះមួយកម្រិតផងដែរ ។

ចំណែកលោកមាឃ ឬទ្ធីជ័យប្រធានក្រុមហ៊ុនអចលនទ្រព្យ Century 21 Zillion Holding ប្រចាំខេត្តមណ្ឌលគីរីក៏បានឱ្យដឹងផងដែរថា តម្លៃដីធ្លីនៅក្នុងខេត្តមណ្ឌលគីរីបានហក់ឡើងខ្ពស់ ក្រោយពេលមានវិនិយោគិនក្នុងស្រុកជាច្រើន ស្វែងរកទិញដីសម្រាប់អភិវឌ្ឍន៍ ជាផ្ទះលំហែកាយក៏ដូចជារីសតជាដើម ។

លោកបន្តថា “កាលពីមុនដីធ្លីក្នុងតំបន់មួយចំនួន ក្នុងខេត្តមណ្ឌលគីរី មិនសូវមានការចាប់អារម្មណ៍តម្លៃក៏ទាប តែពេលនេះតម្លៃបានហក់ឡើងមួយគុណជាពីរជាបីក៏មានដែរ ជាពិសេសនៅតំបន់ជិតរមណីយដ្ឋាន និងនៅជិតច្រកព្រំដែនកម្ពុជាវៀតណាម”។

លោកបន្តថា នៅពេលអនាគតខាងមុខនេះ ការវិនិយោគលើលំនៅឋានលំហែកាយក្នុងខេត្តមណ្ឌលគីរី នឹងកាន់តែមានច្រើនឡើង ហើយតម្រូវការដីធ្លី សម្រាប់អភិវឌ្ឍន៍ក៏នឹងមានច្រើន ដូច្នេះតម្លៃក៏កើនឡើងខ្ពស់ដែរ ជាពិសេសនៅពេលគម្រោងព្រលានយន្តហោះ ក្នុងខេត្តមណ្ឌលគីរីចាប់ផ្ដើមសាងសង់៕

ស្រុកមួយនៃខេត្តពោធិ៍សាត់ទាក់ទាញគម្រោងវិនិយោគអចលនទ្រព្យ បែបអេកូទេសចរណ៍ដ៏ពេញនិយម

ដោយៈសុផារី

ពោធិ៍សាត់ៈ ស្រុកវាលវែង ដែលជាព្រំដែនកម្ពុជា-ថៃ និងជាតំបន់ដាច់ស្រយាល និងស្ងប់ស្ងាត់មួយ រយៈពេលប៉ុន្មានឆ្នាំកន្លងមក បានផ្លាស់ប្ដូរមុខមាត់ថ្មី ស្ទើរតែមិននឹកស្មានដល់ ជុំវិញការវិនិយោគអភិវឌ្ឍជាច្រើន ដូចជា ផ្សារទំនើប ក្លឹបកម្សាន្ត កាស៊ីណូ សណ្ឋាគារ ផ្ទះសំណាក់ បឹងកាឡូ សួនកម្សាន្ត ។ល។

លោកប៊ឹក ពោធិ៍ ប្រធានសាខាក្រុមហ៊ុនអចលនទ្រព្យ Century 21 Zillion Holding ប្រចំាខេត្តពោធិ៍សាត់ បានប្រាប់គេហទំព័រ Property Area Asia នៅថ្ងៃទី១៩ ខែឧសភាថា ស្រុកវាលវែង មានសក្តានុពលខ្លាំងជាងគេ ក្នុងចំណោមស្រុកផ្សេងទៀត នៃវិស័យទេសចរណ៍ ដោយសារតំបន់នេះមានទីតាំងនៅជាប់ព្រំដែនកម្ពុជា-ខេត្តត្រាត ប្រទេសថៃ ជាពិសេសមានភ្នំ១០០៥ ដែលជាទីពេញនិយមបំផុតរបស់ទេសចរ។

លោកបានបញ្ជាក់ឱ្យដឹងថា “សកម្មភាពទិញលក់ដីធ្លី ក្នុងស្រុកវាលវែង មានកំណើនយ៉ាងច្រើន ដោយអ្នកវិនិយោគបានសម្រុកមកទិញដី នៅទីនេះ ដើម្បីកែច្នៃទៅជាតំបន់ទេសចរណ៍ រីសត បឹងកាឡូ ជាដើម”។ លោកថា “ការទិញដីមកធ្វើជារីសត ឬផ្ទះលំហែកាយ បឹងកាឡូ មានកំណើនខ្ពស់ជាងគេនៅក្នុងស្រុកវាលវែង មួយរយៈនេះមានកំណើនខ្ពស់មែនទែន”។

យោងតាមអ្នកឯកទេសដីធ្លីរូបនេះ ទីផ្សារដីធ្លី ដែលពេញនិយមសម្រា​ប់ការកែច្នៃជាតំបន់ទេសចរណ៍ ក្នុងស្រុកវាលវែង បច្ចុប្បន្នមានតម្លៃដាក់លក់ចន្លោះពី២ម៉ឺន ទៅ៤ម៉ឹនដុល្លារក្នុងមួយហិចតា។ សម្រាប់ដីដែល ជាប់ផ្លូវធំ តម្លៃចន្លោះពី២ពាន់ដុល្លារ ទៅដល់៤ពាន់ដុល្លារអាមេរិកក្នុងមួយម៉ែត្រដើរ។ ប្រសិនបើដីនោះ ស្ថិតនៅក្នុងតំបន់ទីប្រជុំជន តម្លៃអាចកើនឡើងខ្ពស់ដល់៦ពាន់៧ពាន់ដុល្លារក្នុងមួយម៉ែត្រដើរ។

លោក បូរី ប្រធានគ្រប់គ្រងផ្នែកទីផ្សារ នៃគម្រោងរីសតល្បីឈ្មោះមួយនៅក្នុងឃុំថ្មដារ ស្រុកវាលវែង បានមានប្រសាសន៍នៅថ្ងៃទី២០ ខែឧសភាថា រមណីយដ្ឋានធម្មជាតិ និងរមណីយដ្ឋានកែច្នៃជាច្រើនកន្លែង ក៏ត្រូវបាននឹងកំពុងវិវត្តន៍ខ្លួន ជាមួយនឹងសន្ទុះកើនឡើងគួរឱ្យកត់សម្គាល់ នៅឃុំថ្មដា ស្រុកវាលវែង ខណៈដែលស្រុកមួយនេះ ត្រូវបានជាប់ឈ្មោះជាស្រុកទេស​ចរណ៍ដ៏ល្បីបំផុត នៅខេត្តពោធិ៍សាត់ ក្នុងការទាក់ទាញភ្ញៀវទេសចរជាតិ និងអន្តរជាតិ ឱ្យទៅទស្សនាកម្សាន្ត។

លោកបូរី បានឱ្យដឹងថា ទីតាំងដែលជាទីចាប់អារម្មណ៍ សម្រាប់ភ្ញៀវទេសចរ គឺនៅមាត់ផ្លូវជាតិលេខ៥៥ តំបន់ភ្នំ១៥០០ ផ្លូវបុប្ផាលាក់ខ្លួន ឬផ្លូវអន្ទង់អាំង រមណីយដ្ឋានទឹកធ្លាក់ថ្មដាតូច ថ្មដាផារ៉ាដាយរីសត ដែលទីតាំងទាំងនោះ សុទ្ធសឹងតែជាទីគាប់ប្រាថ្នា របស់បណ្ដាភ្ញៀវទេសចរជិតឆ្ងាយ ដែលចង់មកគយគន់ និងថតរូបទុកជាអនុស្សាវរីយ៍នូវទេសភាព ព្រៃ ភ្នំ ទឹកធ្លាក់ និងខ្សែផ្លូវបត់បែនឡើងចុះដូចអន្ទង់អាំង។

លោកបន្ថែមថា សព្វថ្ងៃនេះ កំណើនការអភិវឌ្ឍលើវិស័យទេសចរណ៍ បានជំរុញការវិនិយោគអភិវឌ្ឍ លើអចលនទ្រព្យនានា ជាច្រើនដូចជា ផ្សារទំនើប ក្លឹបកម្សាន្ត កាស៊ីណូ សណ្ឋាគារ ផ្ទះសំណាក់ បឹងកាឡូ សួនកម្សាន្ត ។ល។

យោងតាមស្ថិតិនៃមន្ទីរទេសចរណ៍ខេត្តពោធិ៍សាត់ បានឱ្យដឹងថា ខេត្តពោធិ៍សាត់ មានតំបន់ទេសចរណ៍សំខាន់ៗជាង៣៥កន្លែង ក្នុងនោះតំបន់ទេសចរណ៍ ដែលជាទីចាប់អារម្មណ៍ និងមានអ្នកទៅលេងកម្សាន្តច្រើនជាងគេ គឺស្រុកវាលវែង នៅផ្លូវបុប្ផាលាក់ខ្លួន(ភ្នំ១៥០០) ឃុំថ្មដា និងឃុំអូរសោម ក្រៅពីនោះមានស្រុកក្រគរ នៅទឹកធ្លាក់ច្រកល្អៀង ភ្នំនាគស និងស្រុកតាលោសែនជ័យ នៅសួនកម្សាន្តតាលោសែនជ័យ។

រដ្ឋបាលខេត្តបានឱ្យដឹងទៀតថា ទឹកដីនៃស្រុកវាលវែងបានលេចចេញនូវសមិទ្ធផលផ្លូវជាតិលេខ៥៥ និងផ្លូវជាតិលេខ១០ ដែលអាចឱ្យបងប្អូនប្រជាពលរដ្ឋ ក៏ដូចជាភ្ញៀវទេសចរ អាចធ្វើដំណើរបានស្រួល ទៅកាន់រមណីយដ្ឋាន តំបន់ទេសចរណ៍ ព្រៃ ភ្នំ ទឹកធ្លាក់ និងតំបន់គយគន់ទេសភាពជាច្រើនទៀត ដែលជាប់នឹងព្រំដែនខេត្តត្រាត ប្រទេសថៃ៕

CDC អនុម័តគម្រោងវិនិយោគថ្មីចំនួន២ទៀតមានទុនវិនិយោគជាង៦លានដុល្លារ

ដោយ៖ សុផារី

ភ្នំពេញ៖ ក្រុមប្រឹក្សាអភិវឌ្ឍន៍កម្ពុជា (CDC) នៅថ្ងៃទី២០ ខែឧសភា ឆ្នាំ២០២២នេះ បានអនុម័តគម្រោងវិនិយោគថ្មីៗចំនួន២បន្ថែមទៀត ដែលសរុបទុនវិនិយោគចំនួន៦,១លានដុល្លារ និងអាចបង្កើតការងារបានជាច្រើនកន្លែង។

តាមសំណើសុំវិនិយោគរបស់ក្រុមហ៊ុន គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីគម្រោងវិនិយោគ ជូនដល់ក្រុមហ៊ុនដូចខាងក្រោម៖

១. SANJIN (CAMBODIA) KNITTING TECHNOLOGY CO., LTD គម្រោងបង្កើតរោងចក្រកាត់ដេរ និងចាក់សម្លៀកបំពាក់ ដែលមានទីតាំងវិនិយោគស្ថិតនៅភូមិព្រៃភ្ញី ឃុំព្រៃផ្តៅ ស្រុកព្រៃកប្បាស ខេត្តតាកែវ ទុនវិនិយោគប្រមាណ ៣,៨លានដុល្លារអាមេរិក និងអាចបង្កើតការងារបានចំនួន ១.២០៩កន្លែង។

២. HAO TIAN MAKE CLOTHES ASSIST MATERIAL CO., LTD. គម្រោងបង្កើតរោងចក្រត្បាញខ្សែបន្ទះ ខ្សែយឺត និងខារអំបោះ ដែលមានទីតាំងវិនិយោគស្ថិតនៅភូមិព្រៃខ្វាវ ឃុំរកាកោះ ស្រុកគងពិសី ខេត្តកំពង់ស្ពឺ មានទុនវិនិយោគប្រមាណ ២,៣លានដុល្លារអាមេរិក និងអាចបង្កើតការងារបានចំនួន ១៩០កន្លែង៕

ឧត្តមសេនីយ៍ឯក ហ៊ុន ម៉ាណែត: វិស័យការពារជាតិ ជាឆ្អឹងខ្នងនៃសេដ្ឋកិច្ចជាតិ

ដោយ៖ សូរិយា

 

បាត់ដំបង៖ លោកឧត្តមសេនីយ៍ឯក ហ៊ុន ម៉ាណែត បានថ្លែងបញ្ជាក់ថា វិស័យការពារជាតិ ជាឆ្អឹងខ្នងនៃកាតព្វកិច្ច និងបុព្វហេតុរួមរបស់ជាតិខ្មែរទាំងមូល គឺការការពារជាតិ សាសនា ព្រះមហាក្សត្រ និងរាជរដ្ឋាភិបាលស្របច្បាប់ សំដៅធានាឱ្យបានដាច់ខាត នូវសន្តិភាព ស្ថិរភាពភាពសុខសាន្ត និងការអភិវឌ្ឍប្រកបដោយនិរន្តរភាពជូនប្រជាពលរដ្ឋ និងសង្គមជាតិ។

 

លោកឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងទ័ពជើងគោក បានថ្លែងដូចនេះនាថ្ងៃទី១៩ ខែឧសភា ឆ្នាំ២០២២នេះបានអញ្ជើញសម្ពោធដាក់ឱ្យប្រើប្រាស់អគារទីបញ្ជាការរបស់បញ្ជាការដ្ឋាន រថក្រោះ កងទ័ពជើងគោក និងបើកវគ្គហ្វឹកហ្វឺនបំប៉នជំនាញរថក្រោះ រថពាសដែក ប្រចាំឆ្នាំ២០២២ នៅខេត្តបាត់ដំបង។

លោកឧត្តមសេនីយ៍ឯក បានបន្ថែមថា ដើម្បីធានាបានប្រសិទ្ធភាពក្នុងការឆ្លើយតបទៅនឹងតម្រូវការនៃការបំពេញភារកិច្ចឱ្យបានមុតស្រួច និងលឿនរហ័ស វិស័យការពារ ជាតិ ចាំបាច់ត្រូវបន្តធ្វើទំនើបកម្មជាប់ជាប្រចំា ព្រមជាមួយនឹងទិសដៅច្បាស់លាស់ និងចក្ខុវិស័យវែងឆ្ងាយប្រកបដោយភាពឯករាជ្យម្ចាស់ការខ្ពស់ ទាំងលើរចនាសម្ព័ន្ធ ដឹកនាំបញ្ជាការហ្វឹកហ្វឺន និងគ្រឿងបំពាក់ផងដែរ។

បន្ថែមពីនេះ លោកឧត្តមសេនីយ៍ឯក ហ៊ុន ម៉ាណែត ក៏បានអបអរសាទរចំពោះសំណង់អគារទីបញ្ជាការថ្មីៗ ដែលជាអំណោយដ៏ថ្លៃថ្លារបស់សម្តេចតេជោ នាយករដ្ឋមន្ត្រី និងបានអះអាងថា អគារនេះក៏អាចត្រូវបានចាត់ទុកជាសមិទ្ធផលប្រវត្តិសាស្ត្រថ្មីមួយទៀត ដែលបង្ហាញឱ្យឃើញអំពីការរីកចម្រើនប្រែមុខប្រែមាត់របស់បញ្ជាការដ្ឋាន រថក្រោះកងទ័ពជើងគោក ដែលត្រូវបានបង្កើតឡើងតាំងពីឆ្នាំ១៩៩៩ ហើយចាប់ពីឆ្នាំ២០០២ ក៏បានសម្រេចរៀបចំទីតាំងឈរជើងនៅតំបន់ភ្នំតូច ខេត្តបាត់ដំបង ដោយនៅពេលនោះ ស្ទើរតែគ្មានអ្វីសោះ ព្រោះជាតំបន់ព្រៃរបោះគ្មានហេដ្ឋរចនាសម្ព័ន្ធតភ្ជាប់ឡើយ។

លោកឧត្តមសេនីយ៍ឯក បានបន្ថែមថា ការបន្តរីកចម្រើនឥតឈប់ឈរនេះ គឺពិតជាបានបង្ហាញឱ្យឃើញអំពីលទ្ធផលជាក់ស្តែងនៃយកចិត្តទុកដាក់ និងការគិតគូររបស់ សម្តេចតេជោ នាយករដ្ឋមន្ត្រី អំពីសុខទុក្ខរបស់យោធិន និងគ្រួសារយោធិននៅគ្រប់បណ្តាកងឯកភាពនៃកងយោធពលខេមរភូមិន្ទ ហើយតែងបានជួយឧបត្ថម្ភគាំទ្រ គ្រប់បែបយ៉ាងទាំងផ្នែកស្មារតី ថវិកា និងសម្ភារ ដើម្បីជួយសម្រួលដល់ការបំពេញការងារប្រចាំថ្ងៃ ការហ្វឹកហ្វឺនរៀនសូត្រ ការបំពាក់សម្ភារបរិក្ខារផ្សេងៗ ការលើកស្ទួយ ជីវភាពសុខមាលភាពកងទ័ព និងគ្រួសារកងទ័ព តាមរយៈការកសាងជំរុំជម្រកស្នាក់នៅ និងការដោះស្រាយប្រាក់ហូបប្រចាំថ្ងៃជាដើម រហូតយោធិនប្រសិទ្ធនាមថាជា “អគ្គភស្តុភារជាន់ខ្ពស់” ដែលតែងតែយកចិត្តទុកដាក់គិតសព្វគិតគ្រប់ ដោយសារខ្លួនសម្តេចតេជោផ្ទាល់ ក៏ជាធ្លាប់យោធិនដែលបានឆ្លងកាត់ការលំបាកសព្វបែបយ៉ាង នៅក្នុងភ្នក់ភ្លើងសង្គ្រាម។

 

លោកឧត្តមសេនីយ៍ឯក ហ៊ុន ម៉ាណែត បានបន្ថែមថា នេះក៏បានបង្ហាញពីកម្លាំងសាមគ្គីភាពដ៏រឹងមាំរវាងបញ្ជាការដ្ឋានរថក្រោះ កងទ័ពជើងគោកជាមួយនឹងអគ្គនាយក ដ្ឋានពន្ធដារ និងក្រុមហ៊ុនវឌ្ឍនៈគ្រុប ក្នុងនាមជាអង្គភាពភាពសម្ព័ន្ធមេត្រីភាព និងជាការចូលរួមសម្រេចបាននូវទិសដៅភារកិច្ចស្របតាមចក្ខុវិស័យដ៏វែងឆ្ងាយរបស់ សម្តេចតេជោ នាយករដ្ឋមន្ត្រី ក្នុងការបង្កើតឱ្យមានភាតរភាពជិតស្និទ្ធរវាងសមរភូមិមុខ និងសមរភូមិក្រោយ ដែលជាមូលដ្ឋានគ្រឹះនៃខឿនការពារជាតិរបស់ប្រជាជន គាំទ្រដល់ការបំពេញភារកិច្ចរបស់កងទ័ព ដើម្បីពង្រឹងនូវខឿនការពារជាតិទាំងមូលឱ្យកាន់តែរឹងមាំ និងខ្លាំងក្លា៕

ក្រុមហ៊ុនSokha Real Estateសម្ភោធវិមានដ៏ធំមួយលើកំពូលភ្នំបូកគោ

ដោយៈ គង់ សូរិយា

       កំពតៈ ក្រុមហ៊ុនSokha Real Estateកាលពីថ្ងៃទី១៨ ឧសភា បានបើកសម្ភោធ និងដាក់ឲ្យដំណើរការវិមានដ៏ធំមួយ នៅលើកំពូលភ្នំបូកគោ ជាមួយនឹងការរាប់បាត្រព្រះសង្ឃចំនួន២៦៨អង្គ។

វិមានដែលសាងសង់ឡើង ដោយយកលំនាំតាមរចនាបទបែបសហសម័យនេះ មានភាពលេចត្រដែត នៅលើកំពូលភ្នំមួយ ក្នុងចំណោមកំពូលភ្នំជាច្រើននៅលើទីក្រុងបូកគោ ពិសេសវិមានដ៏ស្កឹមស្កៃនេះ មានទីតាំងនៅជិតបឹងមួយដែលមានទឹកថ្លាខួបប្រាំង ខួបវស្សា ដែលផ្តល់នូវបរិយាកាសដ៏ត្រជាក់មនោរម្យសម្រាប់ការស្នាក់នៅ និងលំហែរកំសាន្ត។

អ្នកឧកញ៉ាសុខ គង់ប្រធានក្រុមហ៊ុនសុខាអូតែលបានមានប្រសាសន៍ឲ្យដឹងនាព្រឹកថ្ងៃទី១៩ ឧសភាថា ក្រុមហ៊ុនសុខា រៀលអេស្ទេត ដែលបាននិងកំពុងសាងសង់បុរីលំហែរកាយចំនួនបី ​និងគំរោងជាច្រើនទៀតនៅលើទីក្រុងបូកគោ បាននិងកំពុងអភិ​វឌ្ឍន៍នៅទីនេះយ៉ាងសកម្ម ពិសេសវិមានដ៏ធំនេះបាននិងកំពុងបង្ហាញពីទំនុកចិត្ត សម្រាប់អ្នកវិនិយោគជាតិ និងអន្តរជាតិដែលមានបំណង​មកធ្វើធុរកិច្ចនៅទីនេះ។

អ្នកឧកញ៉ាបានបន្តថា “វិមានដ៏ធំនេះ ត្រូវបានសាងសង់ឡើងលើទំហំ​ដី២ហិកតា ដែលផ្ទៃដីទាំងអស់ត្រូវបានរៀបចំទៅតាមប្លង់មេ សំខាន់ៗសំរាប់វិមាននេះ ដូចជាសួនច្បារខាងមុខ និងខាងក្រោយវិមានដ៏ឆើតឆាយនេះផងដែរ”។ អ្នកឧកញ៉ាបានបន្តថា “សំណង់វិមាននេះមានកំពស់២ជាន់ និងបានរៀបចំសាលប្រជុំ និងសាលទទួលទានភោជនាហាធំៗជាច្រើន ដើម្បីស្វាគមន៍ឥស្សរជនជាតិ និងអន្តរជាតិ ដែលមានបំណងមកលំហែរកំសាន្ត ក៏ដូចជា សិក្សានូវប្លង់ស្ថាបត្យកម្ម ដែលក្រុមហ៊ុនបានរៀបចំឡើងដោយខ្លួនឯង ជាមួយលក្ខណៈពិសេស តាមរយៈការរួមបញ្ចូលនូវរចនាបទខ្មែរ ចិន និងរចនាបទបែបសហសម័យផងដែរ៕

តើING CITYមានផែនការអភិវឌ្ឍន៍អ្វីខ្លះនៅទីក្រុងរណបភាគ ខាងត្បូងរាជធានី?

ដោយៈគង់ សូរិយា

       ភ្នំពេញៈ ការរៀបចំMaster Planមានសារៈសំខាន់ណាស់ សំរាប់ការអភិវឌ្ឍទីក្រុងរណបមួយ ឬទីក្រុង១ ដើម្បីសម្រេចបាននូវការរីកចម្រើនប្រកបដោយចីរភាព។

ការអភិវឌ្ឍ​នៅ​តំបន់​ភាគខាងត្បូង​ក្រុងភ្នំពេញ កំពុង​ដើរ​តាម​ផែនការមេ​របស់​ទីក្រុង​រណប ING CITY ដែលជា​ទីក្រុង​រណប​ធំជាងគេ​នៅ​រាជធានី​ភ្នំពេញ បាននិងកំពុង​ដើរ​តាម​ផែនការមេ​របស់ខ្លួន ខណៈ​តម្លៃ​ដីធ្លី​នៅ​តំបន់​នេះ​មាន​កំនើន​យ៉ាងខ្ពស់ ជាមួយ​គំរោង​សាងសង់​បុរី មជ្ឈមណ្ឌល​ពាណិជ្ជកម្ម​លំដាប់​អន្តរជាតិ​នានា កំពុង​លេចចេញ​ជា​រូបរាង​ឡើងបណ្តើរ។

យោងតាម​ផែនការមេ​របស់​ក្រុមហ៊ុន ING Holding ដែល Propertyarea.asia ទទួលបាន​ឲ្យ​ដឹងថា ទីក្រុង​រណប ING CITY គ្របដណ្តប់​លើ​ផ្ទៃដី​ជាង ២០០០ហិកតា ដែលមាន​វិសាលភាព​ដ៏​ធំ​មួយ និង​ជាទី​ក្រុង​រណប​ធំជាងគេ​នៅ​រាជធានី​ភ្នំពេញ។ តាម​គំរោង​ក្រុមហ៊ុន​គ្រោង​អភិវឌ្ឍន៍​តំបន់​នេះ ជា​តំបន់​មានការ​អភិវឌ្ឍ​បែប​បៃតង និង​គោរព​តាម​គោលការណ៍​បរិស្ថាន។

ឯកសារ​ដដែល​បាន​ឲ្យ​ដឹងថា ក្រុមហ៊ុន​គ្រោង​អភិវឌ្ឍន៍​តំបន់​នេះ ជា​មជ្ឈមណ្ឌល​លំនៅដ្ឋាន មជ្ឈមណ្ឌល​ពាណិជ្ជកម្ម កន្លែង​ចំណត​យានយន្ត ជា​សហគមន៍​សម្រាប់​និវត្តន៍​ជនជាតិ​ចិន មជ្ឈមណ្ឌល​កីឡា​ជាដើម។

ជាមួយនឹង​ទស្សនវិស័យ​ចំពោះមុខ និង​រៀបចំ​តំបន់​ដែល​ទើប​អភិវឌ្ឍន៍​ថ្មី​នេះ សាលា​រាជធានី​ភ្នំពេញ រួមជាមួយ​សាលាក្រុង​ប៉ារីស​ដើម្បី​សិក្សា​រួមគ្នា​ពី​ការអភិវឌ្ឍ និង​ដោះស្រាយ​បញ្ហា​ប្រឈម​ចំពោះមុខ ទាក់ទង​នឹង​ការកើនឡើង​នូវ​យានយន្ត ការបំពុល​ទឹក​កខ្វក់ និង​ហេ​ដ្ឋា​រចនា​ស​ម្ព័​ន្ឋ​នានា ដើម្បី​ធ្វើយ៉ាងណា​ឲ្យ​តំបន់​នេះ​សមស្រប​ជា​តំបន់ ដែលមាន​ភាព​បៃតង និង​ត្រៀម​រៀបចំ​នគរូបនីយកម្ម​ឲ្យ​មាន​ភាពល្អប្រសើរ និង​អាចឆ្លើយតប​នឹង​កំនើន​ប្រជាសាស្ត្រ​នៅ​តំបន់​នេះ។

ដោយសារ​ជា​តំបន់​ថ្មី ងាយស្រួល​ហេ​ដ្ឋា​រចនា​ស​ម្ព័​ន្ឋ និង​កំនើន​ប្រជាសាស្ត្រ​នៅ​តំបន់​នេះ ទើប​អ្នកវិនិយោគ​ជាតិ អន្តរជាតិ​បាននិងកំពុង​វិនិយោគ​គំរោង​លំនៅដ្ឋាន​ធំៗនៅ​តំបន់​នេះ ពិសេស​ផ្សារ​ទំនើប​លំដាប់​អន្តរជាតិ២កំពុង​បាន​សាងសង់ឡើង ក្នុងចំណោម​ផ្សារ​ទំនើបធំៗចំនួន​បី។ អ្វី​កាន់តែ​ពិសេស​ផ្សារ​ទំនើប AEON MALL3 នឹង​សាងសង់​នៅ​តំបន់​នេះ​នាពេល​អនាគត ខណៈ​ក្រុមហ៊ុន AEON GROUP បាន​ទិញ​ដី​នៅ​តំបន់​នេះ​ទុក​រួចទៅហើយ។

អតីត​វីរ​ស្ថា​ត្យ​ករ​កម្ពុជា លោក​បណ្ឌិត​វណ្ណ ម៉ូលីវណ្ណ​ធ្លាប់​បានផ្តល់​អនុសាសន៍​ឲ្យ​អភិវឌ្ឍន៍​រាជធានី​ភ្នំពេញ​ឆ្ពោះទៅកាន់​ភាគខាងត្បូង ដោយសារ​តំបន់​ភាគខាងត្បូង​មាន​ដី​ទំនេរ​ច្រើន មាន​សណ្ឋាន​ដី​ខ្ពស់​មិន​ប្រឈម​នឹង​ការ​លិច​ទឹក និង​ងាយស្រួល​រៀបចំ​ហេ​ដ្ឋា​រចនា​ស​ម័​ន្ឋ​នានា ដោយសារ​ជា​តំបន់​មានការ​អភិវឌ្ឍ​ថ្មី៕

តើវិបត្តិអតិផរណានៅសហរដ្ឋអាមេរិក អាចបញ្ចប់សង្គ្រាមពាណិជ្ជកម្ម អាមេរិក-ចិន បានដែរឬទេ?

ដោយៈសុខុម

អាមេរិក: ខណៈការឡើងថ្លៃទំនិញរាប់ចាប់ពីឧស្ម័នហ្គាស រហូតដល់គ្រឿងទេស កំពុងបង្កការលំបាកដល់ពលរដ្ឋអាមេរិក អ្នកជំនាញមួយចំនួនបានមើលឃើញវិធានការដ៏ងាយស្រួលមួយ ដែលរដ្ឋាភិបាលអាមេរិក អាចអនុវត្តន៍បានដើម្បីបន្ធូរសម្ពាធនេះ នោះគឺការដកទណ្ឌកម្មពន្ធលើប្រទេសចិន ដែលដាក់ដោយអតីតប្រធានាធិបតី ដូណាល់ ត្រាំ។

អតិផរណា បានហក់ឡើងខ្ពស់ដល់ទៅ៨,៥%ក្នុងខែមីនា ដែលជាកម្រិតខ្ពស់បំផុត មិនធ្លាប់មាននៅសហរដ្ឋអាមេរិក ចាប់តាំងពី “វិបត្តិអតិផរណា” ដ៏អាក្រក់ក្នុងទសវត្សរ៍ឆ្នាំ១៩៧០។ នេះបើយោងតាមសារព័ត៌មាន CNA ចុះផ្សាយកាលពីថ្ងៃព្រហស្បតិ៍ ទី១៩ ខែឧសភា។

ក្រុមអ្នកជំនាញសេដ្ឋកិច្ចបានមើលឃើញថា ការកើនឡើងអតិផរណានេះ បណ្ដាលមកពីកត្តាចម្រុះ ដែលកើតឡើងដំណាលគ្នាជាច្រើន រួមទាំងផ្នែកតម្រូវការ និងការផ្គត់ផ្គង់ផងដែរ។ ទី១ ការធូរស្បើយពីវិបត្តិកូវីដ-១៩ ទីផ្សារការងារងើបឡើងវិញ តម្រូវការកម្លាំងពលកម្មខ្ពស់មិនធ្លាប់មាន និងការឡើងថ្លៃអចលនទ្រព្យ សុទ្ធតែបានរួមចំណែកធ្វើឱ្យតម្រូវការសរុប នៅសហរដ្ឋអាមេរិក កើនឡើងយ៉ាងរហ័ស។

ទន្ទឹមនេះ សង្គ្រាមរុស្ស៊ី ចូលឈ្លានពានប្រទេសអ៊ុយក្រែន និងទណ្ឌ​កម្មដាក់លើរុស្ស៊ី ជាបន្តបន្ទាប់ដូចទឹកបាក់ទំនប់ បានធ្វើឱ្យការផ្គត់ផ្គង់ធ្លាក់ចុះ ហើយជំរុញឱ្យថ្លៃថាមពល និងស្បៀងអាហារហក់ឡើងយ៉ាងគំហុក។ ហើយស្ថានភាពដ៏អាក្រក់នេះ កាន់តែធ្ងន់ធ្ងរឡើង ដោយសារការពន្យារពេលដោះស្រាយបណ្ដាលមកពីកូវីដ-១៩ គោលនយោបាយរូបិយវត្ថុធូររលុង និងហេដ្ឋារចនាសម្ព័ន្ធវ័យចាស់ទ្រុឌទ្រោម និងបញ្ហាផ្សេងៗទៀត។

មិនថាយ៉ាងណាក៏ដោយចុះ ការឡើងថ្លៃទំនិញបានធ្វើឱ្យរដ្ឋាភិបាលសហរដ្ឋអាមេរិក ជួបទ្វេគ្រោះដែលពិបាកនឹងដោះស្រាយ។

ផ្អែកតាមសូចនាករបានចង្អុលបង្ហាញថា សេដ្ឋកិច្ចអាមេរិកនៅពេលនេះកំពុងរីកលូតលាស់ទៅមុខ ប៉ុន្តែទន្ទឹមនេះ ក៏កំពុងប្រឈមអតិផរណាកើនឡើងយ៉ាងរាលដាលផងដែរ។

ប្រធានាធិបតី ចូ បៃឌិន បាននិយាយកាលពីខែឧសភាបានថ្លែងថា លោកអាចដឹងពីការខកចិត្តរបស់ពលរដ្ឋអាមេរិក។ លោកដឹងយ៉ាងច្បាស់ថា លោកត្រូវតែធ្វើអ្វីម្យ៉ាង ដើម្បីដោះស្រាយវិបត្តិអតិផរណា ឱ្យបានមុនការបោះឆ្នោតពាក់កណ្តាលអាណត្តិខែវិច្ឆិកា បើមិនដូច្នោះទេ ក្រុមប្រជាធិបតេយ្យនឹងប្រឈមហានិភ័យ បាត់បង់អំណាចគ្រប់គ្រងនៅរដ្ឋសភា និងព្រឹទ្ធសភា។

ដូចនេះសំណួរចោទឡើងថា ហេតុអ្វីបានជាលោក ចូ បៃឌិន ដែលបានរិះគន់វិធានការពន្ធក្នុងសម័យលោក ដូណាល់ ត្រាំ អំឡុងយុទ្ធនាការឃោសនាបោះឆ្នោតប្រធានាធិបតីរបស់លោក មិនចាប់យកឱកាសនេះដើម្បីបន្ធូរទាំងបញ្ហាពន្ធ និងអតិផរណា?៕ CNA៕