ដោយៈ ម៉ាណា

សៀមរាបៈ លោក លី សារី អភិបាលរងខេត្ត នៃគណៈអភិបាលខេត្តសៀមរាប បានដឹកនាំកិច្ចប្រជុំពិនិត្យវឌ្ឍនភាព “គម្រោងរថយន្តក្រុងអគ្គិសនី” ជាមួយក្រុមហ៊ុនទីប្រឹក្សា Misca Advisors Ltd តាមប្រព័ន្ធzoom និងផ្ទាល់នៅសាលប្រជុំលេខ២ រដ្ឋបាលខេត្តសៀមរាប។

លោក លី សារី អភិបាលរងខេត្ត មានប្រសាសន៍ថា ប្រព័ន្ធដឹកជញ្ជូនសាធារណៈ តាមរថយន្តក្រុងអគ្គិសនីសៀមរាប ផ្តល់អត្ថប្រយោ​ជន៍សំខាន់ៗជាច្រើនដល់ប្រជាពលរដ្ឋ និងជួយជំរុញឱ្យក្រុងសៀមរាបក្លាយជាទីក្រុងបៃតង សំដៅទាក់ទាញវិនិយោគិន និងទេសចរ។​

លោកអភិបាលរងខេត្ត បានបញ្ជាក់ថា ក្រុមការងារនាយកដ្ឋានដឹកជញ្ជូនសាធារណៈក្រុង បានចុះសិក្សាកំណត់យកខ្សែរត់ចំនួន៣ខ្សែ និងស្ថានីយរង់ចាំចំនួនប្រមាណ៣៣ទីតាំង ដូចខាងក្រោមរួមមាន

-ខ្សែរត់ទី១៖ តាមបណ្តោយផ្លូវជាតិលេខ៦ (ទាំងទៅ និងមក) ចាប់ពីចំណុចរង្វង់មូលវិទ្យាល័យសម្តេចឪ ផ្លូវជាតិលេខ៦ រហូតដល់រង្វង់មូលផ្ការំដួល (ស្វាយធំ) ស្រុកប្រាសាទបាគង។

-ខ្សែរត់ទី២៖ តាមផ្លូវស្របស្ទឹងសៀមរាប ចាប់ពីតំបន់ចុងឃ្នៀស រហូតដល់បុរីប្រឹមប្រិយ។

-ខ្សែរត់ទី៣៖ តាមផ្លូវក្រវាត់ក្រុង ចាប់ពីស្តុបចុងកៅស៊ូ រត់តាមបណ្តោយវិថីឈ្នះឈ្នះ (ផ្លូវក្រវាត់ក្រុង) រហូតដល់ស្តុបឈ្នះឈ្នះ បន្តតាមវិថីសម្តេចក្រឡាហោម ស ខេង រហូតដល់រុក្ខវិថីព្រះសីហនុ បត់តាមស្តុបគន្ធបុប្ផា មកតាមបណ្តោយវិថីសម្តេចវិបុលបញ្ញា សុខ អាន រហូតដល់រង្វង់មូលព្រៃគុយ បន្តឆ្ពោះទៅរង្វង់មូលផ្ការំដួល (ស្វាយធំ) និងបន្តតាមផ្លូវជាតិលេខ៦ រហូតដល់ស្តុបចុងកៅស៊ូវិញ៕

ដោយ: សហសេវិក
អន្តរជាតិ: ទីផ្សារអចលនទ្រព្យរបស់តំបន់អាស៊ាននៅតែមានភាពធន់ ទោះបីជាសេដ្ឋកិច្ចពិភពលោកមានភាពមិនប្រាកដប្រជាយ៉ាងណាក្តី កំណើនត្រូវបានគាំទ្រដោយនគរូបនីយកម្ម ការវិនិយោគផ្ទាល់ពីបរទេស (FDI) ការផ្លាស់ប្តូរទីតាំងផលិតកម្ម និងការពង្រីកហេដ្ឋារចនាសម្ព័ន្ធឌីជីថល។

យោងតាមក្រុមហ៊ុន ​​CBRE បានព្យាករណ៍ថា ការវិនិយោគលើអចលនទ្រព្យពាណិជ្ជកម្មនៅតំបន់អាស៊ីប៉ាស៊ីហ្វិកនឹងកើនឡើងចន្លោះពី៥ភាគរយទៅ១០ភាគរយក្នុងឆ្នាំ២០២៦ ដោយការិយាល័យកំពុងទទួលបានប្រជាប្រិយភាពឡើងវិញក្នុងចំណោមវិនិយោគិន។

ប្រទេសសិង្ហបុរីនៅតែបន្តនាំមុខគេក្នុងតំបន់ ដោយមានអត្រាការិយាល័យទំនេរកម្រិត A ត្រឹមតែ៣,៣ភាគរយនៅក្នុងត្រីមាសទី២ ឆ្នាំ២០២៦។

នៅប្រទេសឥណ្ឌូនេស៊ី វៀតណាម ម៉ាឡេស៊ី និងហ្វីលីពីន តម្រូវការសួនឧស្សាហកម្ម មជ្ឈមណ្ឌលដឹកជញ្ជូន និងមជ្ឈមណ្ឌលទិន្នន័យកំពុងត្រូវបានជំរុញដោយក្រុមហ៊ុនអន្តរជាតិ ដែលផ្លាស់ប្តូរផលិតកម្មទៅកាន់តំបន់អាស៊ាន។

ទីផ្សារលំនៅឋាននៅតំបន់អាស៊ានកំពុងងើបឡើងវិញបន្តិចម្តងៗ ខណៈលក្ខខណ្ឌហិរញ្ញវត្ថុមានភាពប្រសើរឡើង ទោះបីជាការអនុវត្តប្រែប្រួលទៅតាមប្រទេសយ៉ាងណាក្តី។ តម្រូវការលំនៅឋាននៅក្នុងទីក្រុងធំៗ នៅតែមានភាពរឹងមាំ ខណៈការផ្គត់ផ្គង់លំនៅឋាននៅមានកម្រិត។

ជារួម អាស៊ាននៅតែជាគោលដៅវិនិយោគអចលនទ្រព្យដ៏ទាក់ទាញបំផុតមួយរបស់តំបន់អាស៊ីប៉ាស៊ីហ្វិក។ កំណើនសេដ្ឋកិច្ចរឹងមាំ ប្រជាជនវ័យក្មេង ការអភិវឌ្ឍហេដ្ឋារចនាសម្ព័ន្ធជាបន្តបន្ទាប់ និងការធ្វើពិពិធកម្មខ្សែសង្វាក់ផ្គត់ផ្គង់ ត្រូវបានគេរំពឹងថានឹងគាំទ្រដល់តម្រូវការរយៈពេលវែងសម្រាប់អចលនទ្រព្យលំនៅឋាន ពាណិជ្ជកម្ម និងឧស្សាហកម្ម៕

ដោយៈ ចំណាន

   ភ្នំពេញៈ មន្រ្តីជំនាញក្រសួងរៀបចំដែនដី បានដឹកនាំកិច្ចប្រជុំពិភាក្សា និងផ្តល់លទ្ធភាពកែតម្រូវលើឯកសារ សេចក្តីព្រាងប្លង់គោលប្រើប្រាស់ដី និងផែនការប្រើប្រាស់ដីរាជធានីភ្នំពេញ ក្នុងខណ្ឌច្បារអំពៅ ចំការមន និងបឹងកេងកង។

លោកបេងហុង សុជាតិ ខេមរ៉ូ អគ្គលេខាធិការនៃអគ្គលេខាធិការដ្ឋាន គ.ដ.ន.ជ. និងជាអគ្គនាយកនៃអគ្គនាយកដ្ឋានរៀបចំដែនដី និងនគរូបនីយកម្មបានដឹកនាំកិច្ចប្រជុំនេះ។

កិច្ចប្រជុំនេះ មានការចូលរួមពីឯកឧត្តមទីប្រឹក្សា អគ្គលេខាធិការរង មន្ត្រីជំនាញពាក់ព័ន្ធ និងតំណាងរដ្ឋបាលខណ្ឌទាំងបី ដោយបានផ្តោតលើការពិនិត្យកែសម្រួលចំណងជើង ព្រំប្រទល់ និមិត្តសញ្ញា ពណ៌តាមបទដ្ឋានគំរូបច្ចេកទេស និងការដកចេញនូវផ្ទៃខាងក្រោយ Open Street Map ដើម្បីបង្កើនភាពច្បាស់លាស់នៃផែនទីផ្លូវការ៕

ដោយៈ ចំណាន

   ព្រះសីហនុៈ ក្រុមការងាររាជរដ្ឋាភិបាលចុះជួយខេត្តព្រះសីហនុ ដឹកនាំដោយលោកឧបនាយករដ្ឋមន្រ្តីសាយ សំអាល់ បានគិតគូរនិងជំរុញបន្ថែមទៀតលើវិស័យអប់រំ និងវិស័យសុខាភិបាល ប្រកបដោយភាពនវានុវត្ត ឆ្លើយតបតម្រូវការ ទំនៀមទម្លាប់នៃការរស់នៅរបស់បងប្អូនប្រជាពលរដ្ឋ។

ដើម្បីឱ្យវិស័យនេះរីកចម្រើន បង្ការកុំអោយពលរដ្ឋមានជំងឺ ធ្វើឱ្យពួកគាត់មានសុខភាពល្អ ជាប្រជាជនសកលតាមរយ:ទី១ រៀបចំសា​លារៀន ឱ្យមានថ្នាក់រៀននិងទីធ្លាស្អាត មានកន្លែងក្មេងលេង មានបន្ទប់ទឹកស្អាត បណ្តុះផ្នត់គំនិត និងទម្លាប់ការរស់នៅក្នុងជីវិត។ ទី២ រៀបចំមន្ទីរពេទ្យ និងមណ្ឌលសុខភាពឱ្យបានស្អាតបាត សមរម្យ មានអនាម័យ មានលំហសាធារណៈ ដើម្បីបម្រើសេវាជូនពលរដ្ឋ។ ទី៣ ពង្រឹងសមត្ថភាពក្រុមគ្រូពេទ្យទាំងវិជ្ជាជីវៈ និងអាកប្បកិរិយា ដើម្បីប្រាស្រ័យទាក់ទងនិងលើកទឹកចិត្តអ្នកជំងឺ។

ទី៤ ផ្សព្វផ្សាយដើម្បីពង្រឹងការយល់ដឹង ពីជំងឺដល់ប្រជាពលរដ្ឋ និងទី៥ គិតគូរពីអាហារូបត្ថម្ភ សម្រាប់សុខភាពសាធារណៈ៕

ដោយៈ ឆាយ ផាន់នី

សៀមរាបៈ ក្រុមអ្នកជំនាញនៃអាជ្ញាធរជាតិអប្សរា កំពុងដំណើរការធ្វើកំណាយស្រាវជ្រាវបុរាណវិទ្យា នៅតាមបណ្តោយផ្លូវចូលឆ្លងកសិន្ធុខាងលិច នៃប្រាសាទបាគង ដើម្បីប្រមូលទិន្នន័យបច្ចេកទេស និងសិក្សាពីស្ថានភាពខូចខាត នៃរចនាសម្ព័ន្ធទាំងមូល មុននឹងឈានទៅអនុវត្តគម្រោងជួសជុល និងពង្រឹងសោភ័ណភាពស្ពានហាលនេះឡើងវិញ។

លោក សារាយ គឹមហួល ប្រធានក្រុមអភិរក្សតំបន់រលួស នៃនាយកដ្ឋានអភិរក្សប្រាសាទ និងបុរាណវិទ្យា មានប្រសាសន៍ថា ផ្លូវចូលឆ្លងកសិន្ធុខាងលិចរបស់ប្រាសាទបាគង មានប្រវែង៧០ម៉ែត្រ ទទឹង១២ម៉ែត្រ និងកម្ពស់៤ម៉ែត្រ។

មុននឹងចាប់ផ្តើមការងារជួសជុលជាក់ស្តែង ក្រុមការងារចាំបាច់ត្រូវធ្វើកំណាយបុរាណវិទ្យាជាមុនសិន ដើម្បីសិក្សាស្វែងយល់ពីរចនាសម្ព័ន្ធដើមទាំងស្រុង ព្រមទាំងរករៀបចំប្រមូលបំណែកថ្មបាយក្រៀម និងចម្លាក់ដងខ្លួននាគ ដែលបានរលុះធ្លាក់ និងកប់នៅក្នុងកសិន្ធុ។

បច្ចុប្បន្ន រចនាសម្ព័ន្ធផ្លូវចូលនេះ បានរងការខូចខាតយ៉ាងធ្ងន់ធ្ងរ បន្ទាប់ពីឆ្លងកាត់កាលវេលាជាង១,០០០ឆ្នាំ។ ជញ្ជាំងទប់តួថ្នល់ធ្វើអំពីថ្មបាយក្រៀមទាំងសងខាង បានរលុះធ្លាក់ស្ទើរតែទាំងស្រុង។ រីឯ ចម្លាក់ដងខ្លួននាគអមសងខាងផ្លូវ ក៏បានបាត់បង់ពីទីតាំងដើមភាគច្រើនផងដែរ។ កត្តាចម្បង ដែលបណ្តាលឱ្យមានការខូចខាតនេះ គឺបណ្តាលមកពីការដើមឈើ ដុះចាក់ឫសរីកសាយភាយ និងការហូរច្រោះដីដោយសារទឹកភ្លៀងជារៀងរាល់រដូវវស្សា។

លោកបណ្ឌិតជា សុជាតិ បុរាណវិទូ និងជាអ្នកទទួលបន្ទុកការងារកំណាយនៅទីតាំងនេះ បានបញ្ជាក់ថា ផ្លូវចូលឆ្លងកសិន្ធុខាងលិចប្រាសាទបាគង ពុំធ្លាប់មានប្រវត្តិ នៃការសិក្សាស្រាវជ្រាវបុរាណវិទ្យា ឬជួសជុលនាពេលកន្លងមកនោះឡើយ។ ហេតុនេះ ការធ្វើកំណាយនាពេលនេះ គឺមានសារសំខាន់បំផុត ក្នុងការប្រមូលទិន្នន័យឱ្យបានគ្រប់ជ្រុងជ្រោយ ស្របតាមអនុសាសន៍ និងបទដ្ឋានបច្ចេកទេសរបស់គណៈកម្មាធិការអន្តរជាតិ ដើម្បីសម្របសម្រួលកិច្ចគាំពារ និងអភិវឌ្ឍន៍រមណីយដ្ឋានប្រវត្តិសាស្ត្រអង្គរ និងសំបូរព្រៃគុក។

ក្រុមការងារបានរៀបចំផែនការសកម្មភាព និងបច្ចេកទេសនៃកំណាយ ដោយកំណត់ទីតាំងកំណាយ ក្នុងជំហានដំបូងយក៤រួមមាន៖ ជ្រុងឦសាន ជ្រុងអាគ្នេយ៍ ជ្រុងនិរតី និងជ្រុងពាយ័ព្យ។ បន្ទាប់មក នឹងបន្តធ្វើកំណាយនៅចំណុចកណ្តាល និងភាគខាងលិចនៃស្ពានហាល។ កំណាយនេះ មានគោលបំណងសិក្សាពី៖ ទី១ រចនាសម្ព័ន្ធគ្រឹះនៃផ្លូវចូល កម្រាស់ជញ្ជាំងទប់ថ្មបាយក្រៀម និងបច្ចេកទេសបុកបង្ហាប់ដីក្នុងតួផ្លូវ។

ទី២ ពិនិត្យទំនាក់ទំនងរចនាសម្ព័ន្ធរវាងផ្លូវចូល ជាមួយកាំជណ្តើរចុះកសិន្ធុ និងដំណាក់កាលផ្សេងៗនៃការសាងសង់។ ទី៣ ស្រាវជ្រាវផ្នែកខាងលើនៃតួផ្លូវ ថាជាកម្រាលរៀបដោយថ្មភក់ ថ្មបាយក្រៀម ឬត្រឹមជាដីបុកបង្ហាប់ ដោយសារបច្ចុប្បន្ន ពុំមានសល់ស្លាកស្នាមច្បាស់ លាស់ និងចុងក្រោយស្វែងរក និងស្រង់យកបំណែកថ្មបាយក្រៀម ព្រមទាំងចម្លាក់ដងខ្លួននាគ និងចម្លាក់គ្រុឌចំនួន២ (ដែលធ្លាប់ឈរអមសងខាងកន្ទុយនាគនៅទិសខាងកើតស្ពានហាល ហើយបច្ចុប្បន្នសល់តែជើងទម្រ) ដើម្បីយកមកផ្គុំ និងប្រគល់ទីតាំងដើមវិញ៕