ដោយៈ ម៉ាណា

    ខេត្តព្រះវិហារៈ អាជ្ញាធរថៃបាននិងកំពុងបន្តរំលោភ បំពានដែនអធិបតេយ្យភាព និងបូរណភាពទឹកដីកម្ពុជា ដោយដាក់កុងទីណ័រថ្មីៗ ដើម្បីព័ទ្ធយកដីដោយខុសច្បាប់អន្តរជាតិ។

ក្រសួងការបរទេស និងសហប្រតិបត្តិការអន្តរជាតិ នៃប្រទេសកម្ពុជា បានប្រកាសតវ៉ាជាផ្លូវការប្រឆាំងនឹង ការដាក់កុងតឺន័រចំនួនបី នៅថ្ងៃទី៣ ខែកុម្ភៈ ឆ្នាំ២០២៦ ដោយកងកម្លាំងប្រដាប់អាវុធថៃ នៅក្នុងភូមិអានសេះ ឃុំជាំក្សាន្ត ស្រុកជាំក្សាន្ត ខេត្តព្រះវិហារ នៃព្រះរាជាណាចក្រកម្ពុជា ដែលរារាំងដល់ការចូលទៅកាន់ច្រកព្រំដែន អន្តរជាតិអានសេះ។

ក្រសួងការបរទេសបានចាត់ទុកថា សកម្មភាពនេះ ដែលជាការរំលោភបំពានយ៉ាងជាក់ច្បាស់លើអធិបតេយ្យ និងបូរណភាពទឹកដីរបស់កម្ពុជា អាចនឹងធ្វើឱ្យមានការផ្លាស់ប្តូរបរិយាកាសសន្តិសុខនៅក្នុង និងជុំវិញតំបន់ស៊ីវិល ពង្រឹងការ គ្រប់គ្រង់ដោយយោធា ឬបង្កើតស្ថានភាពថ្មីនៅលើទីតាំងជាក់ស្តែង ដែលធ្វើឱ្យប៉ះពាល់ដល់កិច្ចខិតខំប្រឹង ប្រែងកាត់បន្ថយភាពតានតឹង និងរារាំងដល់ការវិលត្រឡប់ដោយសុវត្ថិភាព និងថ្លៃថ្នូររបស់ប្រជាជនស៊ីវិលទៅ កាន់ផ្ទះសម្បែង និងទ្រព្យសម្បត្តិរបស់ពួកគេវិញ។

កម្ពុជាបានអះអាងថា “ខ្លួនជំទាស់យ៉ាងដាច់អហង្ការ ចំពោះសកម្មភាពខុសច្បាប់នេះ ដែលជាការពង្រឹងការកាន់កាប់ លើទឹកដីកម្ពុជាដោយប្រទេសថៃ”។ ក្រសួងបន្តថា “សកម្មភាពនេះផ្ទុយនឹងវិធានការកាត់បន្ថយភាពតានតឹង ដែលមានចែង ក្នុងចំណុចទី១ នៃសេចក្តីប្រកាសរួម នៃកិច្ចប្រជុំពិសេសលើកទី៣ របស់គណៈកម្មាធិការព្រំដែនទូទៅ ថ្ងៃទី២៧ ខែធ្នូ ឆ្នាំ២០២៥ ព្រមទាំងបំពានទៅនឹងធម្មនុញ្ញអង្គការសហប្រជាជាតិ និងធម្មនុញ្ញអាស៊ាន”។

កម្ពុជាសូមបញ្ជាក់ជាថ្មីនូវការប្តេជ្ញាចិត្តយ៉ាងខ្ជាប់ខ្ជួន និងឥតងាករេ ក្នុងការស្វែងរកដំណោះស្រាយ ប្រកបដោយមិត្តភាពចំពោះជម្លោះព្រំដែនទាំងអស់ជាមួយប្រទេសថៃ ក៏ដូចជាជាមួយប្រទេសជិតខាងទាំង អស់ តាមរយៈមធ្យោបាយសន្តិភាព ស្របតាមច្បាប់អន្តរជាតិ ទន្ទឹមនឹងនេះ ប្រកាន់ខ្ជាប់នូវគោលជំហរជា គោលការណ៍ថា ព្រំដែនមិនត្រូវបានផ្លាស់ប្តូរដោយកម្លាំងឡើយ៕

ភ្នំពេញៈ ក្នុងគោលដៅទាក់ទាញភ្ញៀវទេសចរណ៍ជាតិ អន្តរជាតិ ក្រុមហ៊ុនOCIC ត្រៀមបើកដំណើរការកន្រ្តកខ្សែរ៉ត ជិះឆ្លងកាត់កោះពេជ្រ មកកាន់ទីក្រុងនរា នៅខែមេសាខាងមុខនេះ។

ប្រធានគ្រប់គ្រងទីក្រុងនរា លោកលឹម គានអានបានមានប្រសា​សន៍ឲ្យដឹងនាព្រឹកថ្ងៃទី៥ កុ​ម្ភៈនេះថា គំរោងនេះជាទិសដៅទេសច​រណ៍ថ្មី សម្រាប់ភ្ញៀវទេសចរណ៍អន្តរជាតិ និងភ្ញៀវទេសចរណ៍ជាតិ ដែលចូលចិត្តបែបផ្សងព្រេង(Adventure) ពួកគាត់អាចជិះចេញពីគំរោងCoconut Parkមកកាន់ទីក្រុងនរា។

លោកបន្តថា គំរោងនេះនឹងធ្វើឲ្យទីក្រុងទាំងពីរ កាន់តែទាក់ទាញ ជាមួយការកម្សាន្តសម្រាប់កុមារ និងមនុស្សពេញវ័យ”។ លោកបន្ថែមថា “រហូតមកទល់ពេលនេះ គំរោងនេះមិនទាន់កំណត់តម្លៃសម្រាប់ការជិះកំសាន្តនៅឡើយទេ”។

លោកលឹម គានអានបានបន្តថា ទីក្រុងកោះនរាកាន់តែមានភាពទាក់ទាញ និងការចាប់អារម្មណ៍ពីភ្ញៀវទេសចរណ៍ជាតិ អន្តរជាតិកាន់តែច្រើនពីមួយថ្ងៃទៅមួយថ្ងៃ។

លោកបានបង្ហើបផងដែរថា នាពេលឆាប់ៗខាងមុខនេះ នឹងមានLandmarkថ្មីមួយ ដែលនឹងបង្កើនការទាក់ទាញ និងចំណាប់អារម្ម​ណ៍របស់ភ្ញៀវទេសចរណ៍អន្តរជាតិ កាន់តែច្រើនថែមទៀតនាពេលអនាគត៕

ដោយៈ ម៉ាណា

    សៀមរាបៈ លោក អ៊ុន សាវ៉ាន់ អ្នកគ្រប់គ្រងគម្រោងតុក្កតាយក្ស បានឲ្យដឹងថា ព្រឹត្ដិការណ៍ដង្ហែក្បួនតុក្កតាយក្ស ឆ្នាំ២០២៦នេះ នឹងប្រារព្ធឡើងក្រោមប្រធានបទ “ក្បួនដង្ហែព្រៃ” ដើម្បីអបអរសាទរសត្វព្រៃ ដ៏អស្ចារ្យរបស់ប្រទេសកម្ពុជា ចាប់ពីប្រភេទសត្វល្បីៗ រហូតដល់សត្វកម្រ និងជិតផុតពូជ។

លើកឡើងប្រាប់ដល់បណ្តាញព័ត៌មានក្នុងស្រុកមួយ កាលពីថ្ងៃទី៤ ខែកុម្ភៈ ឆ្នាំ២០២៦ លោក អ៊ុន សាវ៉ាន់ បានបន្តថា ក្បួនដង្ហែតុក្កតាយក្សនៅឆ្នាំនេះ នឹងនាំយកមកនូវរូបសត្វព្រាបស ដែលជានិមិត្តរូបនៃ “សន្តិភាព” ដែលមនុស្សជាតិត្រូវការ។

លោកបន្តថា “ដោយសារប្រទេសយើង ទើបតែមានសង្គ្រាមឈ្លា​នពាននៅតាមព្រំដែនថ្មីៗនេះ។ ដូច្នេះហើយ ទើបយើងយកសត្វព្រាបនេះ ដើម្បីបង្ហាញឲ្យពិភពលោកឃើញថា ពួកយើងដែលត្រូវការ “សន្តិភាព””។

លោកបន្តថា ព្រឹត្ដិការណ៍ដង្ហែក្បួនតុក្កតាយក្ស ឆ្នាំ២០២៦ ដែលជាគម្រោងសិល្បៈសហគមន៍ កុមារធំបំផុតរបស់កម្ពុជា នៅក្រុងសៀម​រាបនេះ នឹងរៀបចំឡើងនៅថ្ងៃទី២១ ​ខែកុម្ភៈ ឆ្នាំ២០២៦ ក្នុងនោះ មានព្រាប​ស រមាំង ភេរោមច្រមុះ ដំរីអាស៊ី ទោចថ្ពាល់លឿង អំពិលអំពែក តុកកែខ្លួនបង្កង់ភ្នំក្រវាញ និងកេងកងធំ។

លោកបន្ថែមថា រូបតុក្កតាយក្យ នឹងត្រូវបានដាក់តាំងបង្ហាញនៅក្នុងសួនច្បារក្បែព្រះរាជដំណាក់ ហើយនឹងបន្ដដាក់តាំងបង្ហាញ នៅទីតាំងរបស់ម្ចាស់ឧបត្ថម្ភនៅក្នុងក្រុង និងនៅមន្ទីរពេទ្យកុមារ ដែលអនុញ្ញាតឲ្យសហគមន៍ បន្តរីករាយជាមួយតុក្កតាយក្ស និងពង្រីកផលចំណាប់អារម្មណ៍ នៃគម្រោងលើសពីមួយយប់។

គម្រោងតុក្កតាយក្ស បង្កើតឡើងតាំងពីឆ្នាំ២០០៧ ក្នុងគោលបំណង ដើម្បីបង្ហាញឲ្យកុមារ និងយុវជនយល់ថា សិល្បៈ គឺលើសពីភាពច្នៃប្រឌិត និងជំរុញទំនុកចិត្ត ព្រមទាំងការបញ្ចេញមតិដោយខ្លួនឯង ការធ្វើការជាក្រុម និងមោទនភាព ចំពោះបេតិកភណ្ឌវប្បធម៌ និងធម្មជាតិដ៏សម្បូរបែបរបស់កម្ពុជា។

ព្រឹតិការណ៍នេះដែរ គឺមានកុមារជាច្រើនមកពីសាលារៀនរដ្ឋ និងអង្គការក្រៅរដ្ឋាភិបាលរួមគ្នាធ្វើរចនា និងដំឡើងតុក្កតាយក្សដ៏ធំ ក្រោមការណែនាំរបស់ក្រុមសិល្បករអាជីពរបស់គម្រោង។ កិច្ចខិតខំប្រឹងប្រែង សហការរបស់ពួកគេបានបញ្ចប់ ដោយក្បួនដង្ហែពេលយប់ដ៏រស់រវើក អមដោយតន្ត្រីករ និងអ្នកសម្តែង។

ជាមួយនេះដែរ ព្រឹត្ដិការណ៍ដង្ហែក្បួនតុក្កតាយក្សឆ្នាំ២០២៦ ​ក៏សូមអំពាវនាវដល់សប្បុរសជនទាំងអស់ សូមបេត្តាជួយគាំទ្រជាថវិកា ដើម្បីឲ្យព្រឹត្ដិការណ៍នេះ ដំណើរទៅបានដោយរលូន និងទទួលបានជោគជ័យផងដែរ៕

ដោយៈ ម៉ាណា

    ភ្នំពេញៈ មន្រ្តីជាន់ខ្ពស់ក្រសួងសាធារណការ និងដឹកជញ្ជូន បានបើកកិច្ចប្រជុំត្រៀម សម្រាប់ការចុះត្រួតពិនិត្យរួមគ្នា ដើម្បីកំណត់តំបន់ សម្រាប់សាងសង់ផ្លូវតភ្ជាប់រវាងខេត្តរតនគិរី (កម្ពុជា) និងខេត្តអាតតាពើ(ឡាវ)។

កិច្ចប្រជុំនេះដឹកនាំដោយលោកឡេង ធនយុទ្ធា រដ្ឋលេខាធិការ ក្រសួងសាធារណការ និងដឹកជញ្ជូន និងមានការចូលរួមពីថ្នាក់ដឹកនាំ តំណាងអគ្គនាយកដ្ឋានក្រោមឱវាទក្រសួង រដ្ឋលេខាធិការដ្ឋានកិច្ចការព្រំដែន តំណាងក្រសួងការបរទេស និងសហប្រតិបត្តិការអន្តរជាតិ តំណាងអគ្គនាយកដ្ឋាន អន្តោប្រវេសន៍នៃក្រសួងមហាផ្ទៃ រដ្ឋបាលខេត្តស្ទឹងត្រែង និងខេត្តរតនគិរី មន្ទីរសាធារណការ និងដឹកជញ្ជូនខេត្តស្ទឹងត្រែង និងរតនគិរី និងមន្ត្រីជំនាញពាក់ព័ន្ធផងដែរ។

លទ្ធផលនៃកិច្ចប្រជុំរួមមាន៖ ១). ឯកភាពចុះត្រួតពិនិត្យរួមគ្នាជាមួ​យភាគីឡាវ ដើម្បីកំណត់តំបន់សម្រាប់សាងសង់ផ្លូវ តភ្ជាប់រវាងខេត្តរតនគិរី (កម្ពុជា) និងខេត្តអាតតាពើ (ឡាវ) នាថ្ងៃទី១០-១៤ ខែកុម្ភៈ ឆ្នាំ២០២៦ នៅខេត្តអាត់ពើ ប្រទេសឡាវ  ២.) រក្សាជំហរក្នុងការស្នើសុំភាគីឡាវចុះត្រួតពិនិត្យលើទីតាំងចំនួន២ គឺខ្សែផ្លូវតភ្ជាប់ទៅកាន់បង្គោលព្រំដែនលេខ០៧៨ (ជាអាទិភាពសម្រាប់ភាគីកម្ពុជា) និងបង្គោលព្រំដែនលេខ១៤១ (ជាអាទិភាពសម្រាប់ភាគីឡាវ និងសម្រាប់កម្ពុជាក្នុងផែនការរយៈពេលវែង)។

ការបន្តសិក្សាលើការតភ្ជាប់ រវាងខេត្តរតនគិរី(កម្ពុជា) និងខេត្តអាត់តាពើ(ឡាវ) ត្រូវបានធ្វើឡើងស្របតាមស្មារតី នៃការឯកភាពគ្នាកន្លងមករវាងនាយករដ្ឋមន្ត្រី នៃប្រទេសទាំងពីរ កម្ពុជា-ឡាវក្នុងដំណើរទស្សនកិច្ចផ្លូវការទៅវិញទៅមក រវាងនៅកម្ពុជា និងនៅឡាវ ក្នុងចក្ខុវិស័យ និងគោលបំណងរួមគ្នា ដើម្បីតភ្ជាប់ការផ្លាស់ប្ដូររវាងប្រជាជន និងប្រជាជននៃខេត្តជាប់ព្រំដែនទាំងពីរ ការជំរុញឱ្យមានកំណើនផ្លាស់ប្ដូរពាណិជ្ជកម្ម ទេសចរណ៍ និងលទ្ធភាពក្នុងការបើកឱ្យមានច្រកទ្វារព្រំដែនអន្តរជាតិថ្មីរវាងប្រទេសទាំងពីរផងដែរ៕