ដោយ វុត្ថា

ភ្នំពេញ៖ រដ្ឋសភា​នៃ​ប្រទេស​កម្ពុជា បាន​បើក​ទំព័រ​ថ្មី​មួយ​ដល់​កម្ពុជា ដោយបាន​អនុម័ត​យល់​ព្រម​លើ​កិច្ចព្រមព្រៀង ស្តីពី​ការជំរុញ និង​សម្រួល​ពាណិជ្ជកម្ម តំបន់ត្រីកោណ​អភិវឌ្ឍន៍ កម្ពុជា-ឡាវ-វៀត​មណា​ម។

លោក ប៉ាន សូរ​ស័ក្តិ រដ្ឋមន្ត្រីក្រសួង​ពាណិជ្ជកម្ម បាន​ដឹកនាំ​គណៈប្រតិភូ​ក្រសួងពាណិជ្ជកម្ម ចូលរួម​ការពារ​សេច​ក្តី​ព្រាង​ច្បាប់​ដែល​រដ្ឋ សភា​អនុម័ត​នា​ព្រឹក​ថ្ងៃទី១៤ កុម្ភៈ​នេះ​បាន​គូសបញ្ជាក់ថា កិច្ចព្រមព្រៀង​ស្តីពី​ការជំរុញ និង​សម្រួល​ពាណិជ្ជកម្ម តំបន់ត្រីកោណ​អភិវឌ្ឍន៍ កម្ពុជា-ឡាវ-វៀតណាម​នេះ មាន​គោលបំណង​សម្រួល​ដល់​សកម្មភាព​ពា​ណិ​ជ្ជ​កម្ម និង​វិនិយោគ នៅក្នុង​តំបន់ត្រីកោណ​អភិវឌ្ឍន៍ (កម្ពុជា មាន ៤ខេត្ត គឺ​ខេត្តស្ទឹងត្រែង រតនគិរី មណ្ឌលគិរី និង​ក្រចេះ ឡាវ មាន ៤ខេត្ត និង​វៀតណាម​មាន ៥ ខេត្ត) ដែលជា​មធ្យោបាយ​មួយ​ក្នុងការ​បង្រួម​គម្លាត​អភិវឌ្ឍន៍​រវាង​តំបន់ត្រីកោណ និង​តំបន់​ដទៃទៀត។

ក្នុងសម័យ​ប្រជុំ​រដ្ឋសភា​ជា​វិសាមញ្ញ​នីតិកាល​ទី៥ ធ្វើឡើង​ក្រោម​អធិបតីភាព​សម្តេច​អគ្គ​មហា​ពញា​ចក្រី ហេង សំរិន ប្រធានរដ្ឋសភា​នៃ​ព្រះរាជាណាចក្រ​កម្ពុជា ក្នុង​សម្លេងគាំទ្រ​ចំនួន ១២១ សំឡេង។

លោក​រដ្ឋមន្ត្រី​ប៉ាន សូ​ស័ក្តិ​បាន​បញ្ជាក់ថា កិច្ចព្រមព្រៀង​នេះ នឹង​ផ្តល់​អត្ថប្រយោជន៍​រួមមាន ទី១ បង្កើន​សកម្មភាព​ជំរុញ​ពាណិជ្ជកម្ម ទី២ បង្កើត​បរិ​យាស​ធុរកិច្ច​ល្អប្រសើរ ទី៣ សម្រួល​បំលាស់​ទី​របស់​ប្រជាជន យានយន្ត និង​ទំនិញ​នៃ​ប្រទេស​ទាំងបី​ក្នុង​តំបន់ត្រីកោណ  និង​ទី៤ បង្កើន​លក្ខខណ្ឌ​អនុគ្រោះ​ដើម្បី​សម្រួល​ដល់​លំហូរ​ពាណិជ្ជកម្ម និង​វិនិយោគ។

សេចក្តីព្រាងច្បាប់​នេះ ត្រូវបាន​គណៈរដ្ឋមន្ត្រី​សម្រេច​យល់ព្រម​ក្នុងសម័យ​ប្រជុំ​ពេញអង្គ​គណៈរដ្ឋមន្ត្រី កាលពី​ថ្ងៃទី១២ ខែមករា ឆ្នាំ២០១៨ ដើម្បី​បញ្ជូន​ទៅសុំ​ការពិនិត្យ និង​អនុម័ត​ពី​ស្ថាប័ន​នីតិប្បញ្ញត្តិ ដោយ​ចាត់ទុកជា​ការប្រញាប់។ បន្ទាប់ពី​រដ្ឋសភា​នៃ​ព្រះរាជាណាចក្រ​កម្ពុជា បានអនុម័ត​យល់ព្រម​រួចហើយនោះ កិច្ចព្រមព្រៀង​នឹងត្រូវ​បញ្ជូនទៅ​ព្រឹទ្ធិ​សភា ដើម្បី​ពិនិត្យ និង​អនុម័ត​តាម​នីតិវិធី​នាពេលខាងមុខ​ដ៏​ខ្លី៕

ដោយ វុត្ថា

ភ្នំពេញ៖​ ទុនវិនិយោគផ្ទាល់របស់សាធារណៈរដ្ឋកូរ៉េ នៅក្នុងប្រទេ​សកម្ពុជា កាន់តែមានសន្ទុះកើនឡើងទ្វេដងជាលំដាប់ ដោយទំហំទឹកប្រាក់បានកើនឡើងជាង ៤៥០០លានដុល្លារអាម៉េរិក ដែលវិនិយោគដោយក្រុមហ៊ុនចំនួន៩០០នៅក្នុងប្រទេសកម្ពុជា។

ក្រុមហ៊ុនកូរ៉េភាគច្រើនធ្វើការវិនិយោគ ទៅលើវិស័យវាយនភណ្ឌកាត់ដេរ ហិរញ្ញវត្ថុ អចលនទ្រព្យ សំណង់ និងកសិកម្មជាដើម។ នេះបើតាមរបាយការណ៍ពីស្ថានទូតកូរ៉េប្រចាំនៅព្រះរាជាណាចក្រកម្ពុជា។

របាយការណ៍ដែលបានផ្សព្វផ្សាយ ដើមសប្តាហ៍នេះបានបង្ហាញ ទៀតថា ទំហំពាណិជ្ជកម្មរវាងប្រទេសទាំងពីរ បានកើនឡើងរហូតដល់ ៩០០លានដុល្លារអាម៉េរិក ខណៈដែលចំនួនមនុស្សបានធ្វើដំណើរទ  ស្ស​នកិច្ចទៅវិញទៅមក ប្រចាំឆ្នាំមានជាង ៤០ម៉ឺននាក់ ហើយពលករឧស្សហកម្មកម្ពុជាប្រមាណ៤ម៉ឺននាក់កំពុងធ្វើការនៅកូរ៉េ។ ក្រៅពីនេះប្រទេសកូរ៉េ ក៏បាននិងកំពុងតែផ្តល់ជំនួយអភិវឌ្ឍន៍ ផ្លូវការសរុបប្រមា​ណ៦០០លានដុល្លារអាម៉េរិកដល់កម្ពុជា ដែលផ្តោតលើវិស័យជាច្រើននាពេលកន្លងមក។

លោក OH Nak Young ឯកអគ្គរដ្ឋទូតនៃសាធារណៈរដ្ឋកូរ៉េ ប្រចាំនៅកម្ពុជាបានមានប្រសាសន៍ថា ទំនាក់ទំនងការទូតផ្លូវការវាងប្រទេ​សទាំងពីរត្រូវបាន កសាងឡើងវិញកាលពីឆ្នាំ១៩៩៧ ហើយឆ្នាំនេះគឺជាឆ្នាំទី២១។ ទោះជាពេលវេលាខ្លីដូចនេះ ក៏ដោយក៏ទំនាក់ទំនងប្រទេ​សទាំងពីរបាននិងកំពុងតែរីកចម្រើន ដ៏គួរឱ្យកត់សម្គាល់លើគ្រប់វិស័យ ដូចជា វិស័យនយោបាយសេដ្ឋកិច្ច កិច្ចសហប្រតិបត្តិការអភិវឌ្ឍន៍សង្គម និងវប្បធម៌ជាដើម។

លោកបន្តទៀតថា ប្រទេសកម្ពុជា និងកូរ៉េមានរចនាសម្ព័ន្ធលើវិស័យសេដ្ឋកិច្ច និងសង្គមដែលបំពេញនូវកង្វះខាត ដែលលអាចជួយគ្នាទៅវិញទៅមក។ ពោលគឺទំនាក់ទំនងរបស់ប្រទេសទាំងពីរ នឹងមានការរីកចម្រើនគ្មានឈប់ឈរ នៅពេលដែលមានការផ្សំឡើង រវាងកម្លាំ​ងពលកម្ម ប្រកបដោយភាពសម្បូរកសិដ្ឋានដ៏ទូលំទួលាយ លក្ខខណ្ឌភូមិសាស្ត្រ ភាពបើកចំហរលើវិស័យសេដ្ឋកិច្ចខ្ពស់របស់កម្ពុជា និងប  ច្ចេកវិទ្យាលទ្ធភាពធ្វើហិរញ្ញប្បទាន និងបទពិសោធន៍សេដ្ឋកិច្ចរបស់កូរ៉េ៕

ដោយ គង់ សូរិយា

ភ្នំពេញ៖ ជាលើកដំបូងហើយ ដែលទេសាភិបាលធនាគារជាតិនៃកម្ពុជាបាន​ផ្ញើរសារ ដោយស្នើឲ្យប្រជាពលរដ្ឋប្រើប្រាស់កម្ចីឲ្យចំគោលដៅ ដោយជៀសវាងការប្រើប្រាស់លើអ្វីដែលមិនផ្តល់ចំណូល ដែលនាំឲ្យមានបំណុលវ័នក។

លោកជា ចាន់តូទេសាភិបាលធនាគារជាតិនៃកម្ពុជាបានថ្លែងកាលពីម្សិលម៉ិញនេះថា អតិថិជនដែលប្រើប្រាស់ឥណទានពីធនាគារឯកទេស ធនាគារពា​ណិ​ជ្ជ និងគ្រឹះស្ថានមីក្រូហិរញ្ញវត្ថុនានា សូមយកកម្ចីទាំងនោះទៅប្រើប្រាស់ដោ​យសុច្ចរឹត ចំគោលដៅនិងបង្កើនចំណូល ជាជាងប្រើប្រាស់លើអ្វីដែលមិនផ្តល់​ចំណូល ដែលអាចជាប់ផុងក្នុងបំណុល។

ជាមួយគ្នានេះ លោកជា ចាន់តូក៏បានផ្តល់អនុសាសន៍ចំនួន៦ចំណុចដល់អតិថិជន ដូចជា ទី១ ត្រូវយល់ដឹងខ្លួនឯងឲ្យច្បាស់ពីតម្រូវការពិតប្រាកដ ក្នុងការ​ខ្ចីប្រាក់ និងប្រើប្រាស់ប្រាក់ឲ្យចំគោលដៅ និងបង្កើតចំណូលមកវិញ ទី២ ត្រូវតែ​ដឹងពីកាតព្វកិច្ចនៃការប្រើប្រាស់ប្រាក់កម្ចី បើពុំដូច្នេះទេនឹងបាត់បង់ឳកាស ក្នុងការទទួលបានប្រាក់កម្ចីលើកក្រោយៗទៀត ទី៣ ត្រូវចេះប្រៀបធៀបអត្រាកា​រប្រាក់កម្ចី រវាងគ្រឹះស្ថានមួយទៅគ្រឹះស្ថានមួយ និងពិនិត្យលក្ខខ័ណ្ឌខ្ចីប្រាក់ឲ្យ​បានច្បាស់លាស់ មុននឹងសម្រេចចុះហត្ថលេខានិងផ្តិតមេដៃទទួលកម្ចី។

ទី៤ ត្រូវជៀសវាងដាច់ខាតក្នុងការខ្ចីប្រាក់ពីឈ្មួញចងការប្រាក់ ឬអ្នករកស៊ី ដែលពុំមានច្បាប់អនុញ្ញាត្តិត្រឹមត្រូវ ដែលគិតការប្រាក់ខ្ពស់និងកេងប្រវ័ញ្ច ទី៥ ត្រូ

វ​ជៀសវាងការខ្ចីប្រាក់ពីមួយកន្លែង ទៅសងមួយកន្លែង ព្រោះការធ្វើបែបនេះអាច​ធ្វើឲ្យជាប់បន្ទុកបំណុលកាន់តែច្រើនឡើង និងទី៦ ពុំត្រូវជឿលើការឃោសនា បោកប្រាស់របស់ជនខុលខូចមួយចំនួន ដែលដើរបោកប្រាស់តាមរយៈការប្រមូ​លប្រាក់បញ្ញើរ ឬខ្ចីប្រាក់ដោយសន្យាផ្តល់ការប្រាក់ខ្ពស់ ដោយពុំបានពិចារណា ឲ្យបានគ្រប់ជ្រុងជ្រោយនោះទេ ព្រោះចុងក្រោយអាចនឹងនាំបញ្ហាមកឲ្យខ្លួនឯង៕​

ដោយ ដួង ចន្ទ្រា

ភ្នំពេញ៖ រដ្ឋាភិបាល​នឹង​ផ្តល់​កាដូ​ធំ​មួយទៀត ដល់​ប្រជាពលរដ្ឋ​ខេត្តបន្ទាយមានជ័យ ក៏ដូចជា​ទូទាំងប្រទេស ដែល​ពួកគេ​អាចធ្វើ​ដំណើរ​តាម​រថភ្លើង​ពី​ក្រុង​សេរី​សោភ័ណ ទៅកាន់​ក្រុង​ប៉ោយប៉ែត មុន​ពិធីបុណ្យ​ចូលឆ្នាំ​ប្រពៃណីជាតិ​ខ្មែរ​នា​ឆ្នាំនេះ។

កំណាត់​ផ្លូវ​រថភ្លើង​ពី​ក្រុង​ប៉ោយប៉ែត មក​ក្រុង​សិរី​សោ​ភ័​ណ្ឌ ខេត្តបន្ទាយមានជ័យ ប្រវែង៤៨គីឡូម៉ែត្រ​បានបញ្ចប់ ការសាងសង់​រួចរាល់​ហើយ នៅ​ថ្ងៃទី១៣ កុម្ភ​នេះ។

បើតាម​មន្ត្រីជាន់ខ្ពស់​ក្រសួង​សាធារណៈការ និង​ដឹកជញ្ជូន​លោក​លី បូ​រិ​ន​អនុរដ្ឋលេខាធិការ​ក្រសួង​នេះ និង​ជាម​ន្ត្រី​ទទួលបន្ទុក​ការងារ​ផ្លូវដែក​បាន​ឲ្យ​ដឹង​នា​ល្ងាច​ថ្ងៃទី១៣ កុម្ភៈ​នេះ​ថា ខ្សែ​រថភ្លើង​នេះ​នឹងមិន​ត្រឹមតែ​សម្រាប់​ផ្ទៃក្នុង​កម្ពុជា​នោះទេ ប៉ុន្តែ​វាត​ភ្ជាប់​ជាមួយ​តំបន់​អាស៊ាន​នាពេល​អនាគត និង​ភ្ជាប់​ជាមួយ​ប្រទេស​ចិន​ផងដែរ ហើយ​តាម​គំរោង​ខ្សែ​រថភ្លើង​ភ្ជាប់​ជាមួយ​ប្រទេស​ថៃ ដឹកជញ្ជូន​ឆ្លងកាត់​កម្ពុជា អាច​ចាប់ផ្តើម​នៅ​ចុង​ឆ្នាំនេះ ឬ​ឆ្នាំ២០១៩ខាងមុខ។

លោក​បន្តថា ចំណែក​កំណាត់​ផ្លូវដែក​ត​ភ្ជាប់​ពី​ក្រុង​សិរីសោភ័ណ មកកាន់​ក្រុង​បាត់ដំបង មាប្រវែង៦៥គីឡូម៉ែត្រ​ក៏​ជិត​បញ្ចប់​ផងដែរ ពិសេស​ការតភ្ជាប់​មក​កាន់​រាជធានី​ភ្នំពេញ ក៏​បាននិងកំពុង​សាងសង់​យ៉ាងសកម្ម​ផងដែរ។

ការដឹកជញ្ជូន​តាមផ្លូវ​ដែក ជា​ផ្នែក​មួយ​យ៉ាងសំខាន់ ក្នុងការ​កាត់បន្ថយ​ថ្លៃ​ដើម​នៃ​ការដឹកជញ្ជូន​ដែលមាន​តម្លៃ​ថ្លៃ​នៅ​កម្ពុជា ព្រោះ​បច្ចុប្បន្ន​ការដឹកជញ្ជូន​នៅ កម្ពុជា​មានតម្លៃ​ថ្លែ​ជាង​បណ្តា​ប្រទេស​នានា​នៅក្នុង​តំបន់។

លោក វ៉ា ស៊ីម​សូរិយា អ្នកនាំពាក្យ​ក្រសួង​សាធារណៈការ និង​ដឹកជញ្ជូន​បាន​ថ្លែងថា ដើម្បី​ជំរុញ​ការអភិវឌ្ឍន៍​សេដ្ឋកិច្ច និង​ជំរុញ​កំនើនសេដ្ឋកិច្ច​ទៅកាន់​កម្រិត​ថ្មី​មួយទៀត កម្ពុជា​ចាំបាច់​ត្រូវ​វិនិយោគ​លើ​វិស័យ​ហេ​ដ្ឋា​រចនា​ស​ម្ព័​ន្ឋ ព្រោះ​ហេ​ដ្ឋា​រចនា​ស​ម្ព័​ន្ឋ ជា​ចំណុច​យុ​ទ្ឋ​សាស្ត្រ ក្នុងការ​សម្រួល​ការដឹក​ជញ្ជូន​ឲ្យ​កាន់តែ​មានតម្លៃ​ទាប កាត់បន្ថយ​ពេលវេលា និង​កាត់បន្ថយ​អត្រា​គ្រោះថ្នាក់​ចរាចរណ៍​ផងដែរ។

លោក​បន្តថា“បើ​ចង់​អភិវឌ្ឍន៍​សេដ្ឋកិច្ច ត្រូវ​កសាង​ហេ​ដ្ឋា​រចនា​ស​ម្ព័​ន្ឋ។ បើ​ចង់​ជំរុញ​ប្រទេស​កាន់តែ​រីកចម្រើន​លឿន ក៏ត្រូវ​កសាង​ហេ​ដ្ឋា​រចនា​ស​ម្ព័​ន្ឋ”៕

ដោយ ដួង ចន្រ្ទា

ភ្នំពេញ៖ រោងចក្រស៊ីម៉ងត៍ថ្មីមួយទៀត ឈ្មោះ Battambang Coin Cement ដែលមានមូលដ្ឋាននៅក្នុងខេត្តបាត់ដំបង នឹងបើកដំណើរការនៅកំឡុងត្រីមាសទី១ឆ្នាំនេះ ប្រសិនជាគ្មានអ្វីប្រែប្រួលទេនោះ។

អ្នកនាំពាក្យក្រសួងរ៉ែ និងថាមពល លោក យស មុនីរ៉ាត់ បានមានប្រសាសន៍ឲ្យដឹងតាមទូរស័ព្ទនាព្រឹកថ្ងៃទី ១៣ កុម្ភៈនេះថា រោងចក្រ Battambang Coin Cement មានសមត្ថភាពផលិតបាន ១,៧លានតោនក្នុងមួយឆ្នាំ អាចនឹងបើក​ដំណើរការនៅខែមិនា ឬមេសាខាងមុខនេះ។ លោកបន្តថា តាមពិតរោងចក្រនេះ​បានសាងសង់រួចរាល់ហើយ ប៉ុន្តែមានបញ្ហាបច្ចេកទេសមួយចំនួន ទើបក្រុមហ៊ុន​សម្រេចពន្យាពេលដំណើរការ។

លោកបន្តថា “រោងចក្រនេះ មានសមត្ថភាពផលិតស៊ីម៉ងត៍បានក្នុងរង្វង់១,៧លានតោន ដែលមានសមត្ថភាពផលិតប្រហាក់ប្រហែលរោងចក្រស៊ីម៉ងត៍​របស់ក្រុមហ៊ុនជីព ម៉ុងផងដែរ”។

បច្ចុប្បន្ននៅកម្ពុជា មានក្រុមហ៊ុនស៊ីម៉ង់ចំនួន៤ កំពុងផលិតស៊ីម៉ងត៍ ដូចជា​ក្រុមហ៊ុន Kampot Cement, Chip Mong Insee Cement, Cambodia Cement Chakrey Ting Factory, និងក្រុមហ៊ុនBattambang Coin Cement ដែលរោងចក្រ​ចុងក្រោយនេះ នឹងចាប់ផ្តើមផលិតនៅកំឡុងត្រីមាសទី១ឆ្នាំនេះ។

លោក យស មុនីរ៉ាត់ បានបន្ថែមថា ស៊ីម៉ងត៍ផលិតក្នុងស្រុកមានគុណភាព​មិន​ចាញ់ស៊ីម៉ងត៍នាំចូលនោះទេ ហើយវត្ថុធាតុដើមរបស់យើងក៏មានគុណភាពល្អ។ ទោះជាផលិតក្នុងស្រុកក្តី ប៉ុន្តែបច្ចេកវិទ្យាប្រើប្រាស់សម្រាប់ការផលិតសុទ្ឋតែនាំចូលពីបរទេស។លោកបន្តថា ប្រសិនជាស៊ីម៉ងត៍ក្នុងស្រុក មិនមានគុណភាព​មិនមែនក្រុមហ៊ុនជប៉ុន ជ្រើសរើសសម្រាប់សាងសង់ស្ពាន ឬអាគាររបស់ពួកគេនោះទេ។

លោកឧកញ៉ាលី ហួរប្រធានសមាគមអ្នកអភិវឌ្ឈន៍លំនៅដ្ឋានកម្ពុជាបាន​ថ្លែងថា រហូតមកទល់ពេលនេះ ការផលិតស៊ីម៉ងត៍ក្នុងស្រុក នៅតែមិនអាចឆ្លើយតបបានតាមតម្រូវការនៅឡើយ ព្រោះបច្ចុប្បន្នមានតមម្រូវការស៊ីម៉ងត៍ច្រើនណាស់ ពិសេសវិស័យសំណ​ង់ ដោយសារកម្ពុជាកំពុងសាងសង់អាគារខ្ពស់ៗច្រើន និងវិស័យដទៃទៀត ក៏មាន​ការប្រើប្រាស់ស៊ីម៉ងត៍ច្រើនផងដែរ។

លោកឧកញ៉ាបានបន្តថា “ទោះជាមិនអាចផ្គត់ផ្គង់បានគ្រប់ក្តី ប៉ុន្តែខ្ញុំគិតថា វាអាចរួមចំណែកកាត់បន្ថយ ការនាំចូលស៊ីម៉ងត៍ពីក្រៅប្រទេសបានច្រើន”៕

ដោយ វុត្ថា

ភ្នំពេញ៖ ព្រះរាជាណាចក្រទាំងពីរ គ្រោងនឹងចាប់ផ្តើមសករាជថ្មីមួយទៀត ដើម្បីពង្រីកទំហំពាណិជ្ជកម្ម តាមរយៈគណកម្មការចម្រុះពា​ណិជ្ជកម្ម រវាងប្រទេ​សទាំងពីរ ដែលគ្រោងបើកកិច្ចប្រជុំនៅសប្តាហ៍ក្រោយនេះ។

រដ្ឋមន្រ្តីពាណិជ្ជកម្មកម្ពុជា លោកប៉ាន សូរស័ក្តិ បានជួបជាមួយលោក Jirawuth Suwanna-Arj អគ្គទីប្រឹក្សាពាណិជ្ជកម្មនៅស្ថានរាជទូតថៃ ប្រចាំកម្ពុជា និងក្រុមការងារ បានជួបពិភាក្សាគ្នាកាលពីថ្ងៃម្សិលម៉ិញ ដើម្បីពិភាក្សាផ្លាស់ប្តូរយោបល់ ដើម្បីត្រៀមរៀបចំកិច្ចប្រជុំគណៈកម្មការចម្រុះ ផ្នែកពាណិជ្ជកម្មរវាងកម្ពុជា-ថៃលើកទី៦ (6th JTC កម្ពុជា-ថៃ) ដែលគ្រោងនឹងប្រព្រឹត្តទៅនៅថ្ងៃទី២១-២២ ខែកុម្ភៈ ឆ្នាំ២០១៨ នៅរាជធានីភ្នំពេញ។

កិច្ចប្រជុំគណៈកម្មការចម្រុះ ផ្នែកពាណិជ្ជកម្មរវាងកម្ពុជា-ថៃលើកទី៦នឹង  ផ្តោ​តសំខាន់ទៅលើការជំរុញ និងពង្រីកទំហំពាណិជ្ជកម្មទ្វេភាគី ព្រមទាំងដោះស្រាយបញ្ហាប្រឈមនានា។

លោក Jirawuth Suwanna-Arj ក៏បានជម្រាបជូន លោកប៉ាន សូស័ក្តិអំពីការរៀបចំព្រឹត្តការណ៍ផ្គូរផ្គងធុរកិច្ច រវាងប្រទេសទាំងពីរ ក្នុងន័យបង្កើនទំហំពាណិជ្ជកម្ម និងសហប្រតិបត្តការរវាងវិស័យឯកជននៃប្រទេសទាំងពីរ ស្របពេលនៃកិច្ចប្រជុំគណៈកម្មការចម្រុះ ផ្នែកពាណិជ្ជកម្មរវាងកម្ពុជា-ថៃលើកទី៦ផងដែរ។

រដ្ឋមន្រ្តីពាណិជ្ជកម្មកម្ពុជា លោកប៉ាន សូស័ក្តិបានស្វាគមន៍នូវគោលបំណង ក្នុងការរៀបចំព្រឹត្តការណ៍ផ្គូរផ្គងធុរកិច្ចនេះ និងលើកទឹកឲ្យការរៀបចំនេះទទួលបានជោគជ័យ៕