តម្លៃអាផាតមុិននៅទីក្រុងសុីដនីរបស់ប្រទេសអូស្ត្រាលីបន្តកើនឡើង ខណៈការផ្គត់ផ្គង់ក្នុងឆ្នាំ២០២៥ រំពឹងធ្លាក់ចុះ

July 15, 2025

ដោយ: គង់ លាងហួរ
អន្តរជាតិ: ការផ្គត់ផ្គង់អាផាតមុិននៅក្នុងទីក្រុងស៊ីដនីរបស់ប្រទេសអូស្ត្រាលីបានបង្ហាញសញ្ញាអំពីការធ្លាក់ចុះ។ យោងតាមក្រុមហ៊ុនប្រឹក្សាយោបល់អចលនទ្រព្យ JLL បានឱ្យដឹងថា អាផាតមុិន ដែលបានបញ្ចប់ការសាងសង់មានចំនួន៨០៤យូនីតប៉ុណ្ណោះកាលពីត្រីមាសទី១ ឆ្នាំនេះ។

ក្រុមហ៊ុនប្រឹក្សាយោបល់អចលនទ្រព្យ JLL បានលើកឡើងក្នុងរបាយការណ៍របស់ខ្លួនថា “យើងកំពុងតាមដានវឌ្ឍនភាពក្នុងការសាងសង់អាផាតមុិនចំនួន១.៧៥០យូនីតផ្សេងទៀត ដែលគ្រោងបញ្ចប់រួចរាល់នៅក្នុងឆ្នាំ២០២៥នេះ”។

ប្រសិនបើគម្រោងទាំងអស់បញ្ចប់រួចរាល់តាមកាលវិភាគ នោះការផ្គត់ផ្គង់អាផាតមុិនថ្មីសរុបក្នុងឆ្នាំ២០២៥នេះត្រូវបានគេរំពឹងថា នឹងមានចំនួន២.៥៥៤យូនីត។ តួលេខនៃការព្យាករណ៍នេះបង្ហាញសញ្ញាពីការដាំក្បាលចុះចំនួន១៣ភាគរយបើធៀបនឹងឆ្នាំ២០២៤។

បច្ចុប្បន្ន ទីផ្សារអាផាតមុិននៅក្នុងទីក្រុងស៊ីដនីកំពុងសម្រេចបានទាំងអត្រាកំណើនតម្លៃដាក់លក់ និងតម្លៃជួល។ តម្លៃអាផាតមុិនជាមធ្យមបានកើនឡើង២,៦ភាគរយធៀបនឹងឆ្នាំមុនដល់ចំនួន៧៩៩.៩៩០ដុល្លារអូស្ត្រាលីក្នុងមួយយូនីត ខណៈតម្លៃជួលបានកើនឡើង៧,៧ភាគរយដល់ចំនួន៧០០ដុល្លារអូស្ត្រាលីក្នុងមួយសប្តាហ៍។

ការសម្រេចបានអត្រាកំណើនយ៉ាងរឹងមាំនេះឆ្លុះបញ្ចាំងពីកំណើនតម្រូវការ និងការផ្គត់ផ្គង់អាផាតមុិននៅមានកម្រិត ជាពិសេសសម្រាប់ផ្នែកជួល។

កង្វះនៃការផ្គត់ផ្គង់ និងកំណើនតម្រូវការ ត្រូវបានគេរំពឹងថា នឹងបន្តជំរុញឱ្យតម្លៃជួល និងតម្លៃដាក់លក់អាផាតមុិនកើនឡើង។ ទោះជាយ៉ាងណា កង្វះលទ្ធភាពផ្នែកហិរញ្ញវត្ថុអាចធ្វើឱ្យល្បឿននៃអត្រាកំណើនថយចុះ។

លើសពីនេះទៀត បញ្ហាប្រឈមកង្វះលំនៅដ្ឋានតម្លៃសមរម្យកំពុងបន្តអូសបន្លាយនៅតាមបណ្តាទីក្រុងធំៗ រួមទាំងទីក្រុងសុីដនី ខណៈមនុស្សជាច្រើនមិនមានលទ្ធភាពគ្រប់គ្រាន់ដើម្បីទិញផ្ទះ ដែលនៅតែបន្តហក់ឡើងថ្លៃជាលំដាប់៕ប្រភព: Real Estate Asia៕

ក្រុមហ៊ុនអាកាសយានដ្ឋានកម្ពុជាប្រារពខួបលើកទី៣០ឆ្នាំជាមួយនឹងសមិទ្ឋផលជាច្រើនលើវិស័យអាកាសចរណ៍

July 15, 2025

ដោយៈ ម៉ាណា

ភ្នំពេញៈ លោកឧបនាយករដ្ឋមន្រ្តីប្រចាំការ វង្សី វិស្សុត អញ្ជើញជាអធិបតីក្នុងពីធី “អបអរសាទរគម្រប់ខួប៣០ឆ្នាំ នៃក្រុមហ៊ុនអាកាសយានដ្ឋានកម្ពុជា”។

លោកវង្សី វិស្សុត ឧបនាយករដ្ឋមន្រ្តីប្រចាំការ រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី តំណាងដ៏ខ្ពង់ខ្ពស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានអញ្ជើញជាអធិបតីក្នុងពិធី “អបអរសាទរគម្រប់ខួប៣០ឆ្នាំ នៃក្រុមហ៊ុនអាកាសយានដ្ឋានកម្ពុជា-SCA” ដោយមានការអញ្ជើញចូលរួមពីសំណាក់ លោក Nicolas Notebaert អគ្គនាយកក្រុមហ៊ុនអាកាសយានដ្ឋានVINCI និងជាប្រធានក្រុមប្រឹក្សាភិបាលក្រុមហ៊ុនSCA, មន្រ្តីមកពីស្ថាប័នពាក់ព័ន្ធ ឯកអគ្គរដ្ឋទូតបារាំងប្រចាំកម្ពុជា លោកឯកអគ្គរាជទូតម៉ាឡេស៊ីប្រចាំកម្ពុជា តំណាងក្រុមហ៊ុនអាកាសចរណ៍ជាតិ និងអន្តរជាតិ ព្រមទាំងភ្ញៀវជាតិនិងអន្តរជាតិជាច្រើនរូប។

លោកវង្សី វិស្សុត ឧបនាយករដ្ឋមន្រ្តីប្រចាំការ បានសម្តែងនូវក្ដីសោមនស្សរីករាយ និងវាយតម្លៃខ្ពស់ ចំពោះក្រុមហ៊ុនអាកាសយានដ្ឋាន VINCI របស់បារាំង និងក្រុមហ៊ុន Muhibbah របស់ម៉ាឡេស៊ី ចំពោះការវិនិយោគ ប្រកបដោយចក្ខុវិស័យវែងឆ្ងាយ និងបានវិនិយោគអស់ទឹកប្រាក់រាប់លានដុល្លារ ធ្វើឱ្យសន្ទុះនៃកំណើនអ្នកដំណើរតាមផ្លូវអាកាសកើនឡើងយ៉ាងខ្លាំង។

លោកឧបនាយករដ្ឋមន្រ្តីបានគូសរំលេចថា សមិទ្ធផលទាំងនេះអាចសម្រេចបាន ផ្តើមចេញពីគំនិតផ្តួចផ្តើម ប្រកបដោយចក្ខុវិស័យវែងឆ្ងាយរបស់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រីនិងបច្ចុប្បន្នជាប្រធានព្រឹទ្ធសភា តាមរយៈការដាក់ចេញនូវគោលនយោបាយ “បើកចំហជើងមេឃ” កាលពីឆ្នាំ១៩៩៩ និងផែនការមេគ្រប់ជ្រុងជ្រោយស្តីពី “ប្រព័ន្ធដឹកជញ្ជូនអន្តរមធ្យោបាយ និងភស្តុភារកម្មកម្ពុជា ២០២៣-២០៣៣” និងបន្តដោយរាជរដ្ឋាភិបាលនីតិកាលទី៧ ក្រោមការដឹកនាំដ៏ឈ្លាសវៃ ស្វាហាប់ និងចក្ខុវិស័យវែងឆ្ងាយរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី ដោយបានដាក់ចេញ នូវយុទ្ធសាស្រ្តបញ្ចកោណដំណាក់កាលទី១ ដែលបន្តផ្តល់អាទិភាពខ្ពស់ លើវិស័យអាកាសចរណ៍ស៊ីវិលនិង គោលនយោបាយជាតិស្តីពីការដឹកជញ្ជូនតាមផ្លូវអាកាសឆ្នាំ២០២៥-២០៣៥ និងបានបញ្ចប់ការរៀបចំ “សេចក្តីព្រាងច្បាប់ស្តីពីអាកាសចរណ៍ស៊ីវិលនៃព្រះរាជាណាចក្រកម្ពុជា” នាពេលថ្មីៗនេះ។

លោកវង្សី វិស្សុតបានគូសបញ្ជាក់បន្ថែមថា រាជរដ្ឋាភិបាលកម្ពុជាកាន់តែផ្ដល់អាទិភាពខ្ពស់ចំពោះវិស័យឯកជន ដែលជាដៃគូមិនអាចខ្វះបាន ដើម្បីដើរតួជាកម្លាំងចលករដ៏សំខាន់ ក្នុងការចូលរួមដោះស្រាយបញ្ហាជារចនាសម្ព័ន្ធ ដែលរាំងស្ទះដល់ការទាក់ទាញការវិនិយោគ និងការអភិវឌ្ឍវិស័យឯកជន ហើយស្ថាប័នរដ្ឋនឹងដើរតួនាទីស្នូល ក្នុងការធានាបរិយាកាស អំណោយផលសម្រាប់ធុរកិច្ច និងទីផ្សារ សំដៅជំរុញសន្ទុះនៃការអភិវឌ្ឍសេដ្ឋកិច្ច ជាពិសេសលើកកម្ពស់ជីវភាពរស់នៅរបស់ប្រជាពលរដ្ឋឱ្យកាន់តែប្រសើរឡើង ប្រកបដោយបរិយាបន្ន និងចីរភាព។

លោកបានបន្តថា ទន្ទឹមនឹងការគ្រប់គ្រងប្រកបដោយប្រសិទ្ធភាពរយៈពេល៣០ឆ្នាំកន្លងមកនេះ ក្រុមហ៊ុននឹងបន្តឈរជើងនិងវិនិយោគបន្ថែមទៀតនៅកម្ពុជា តាមរយៈការចូលរួមគ្រប់គ្រង និងប្រតិបត្តិការអាកាសយានដ្ឋានអន្តរជាតិតេជោ លំដាប់ថ្នាក់4F ដែលគ្រោងនឹងដាក់ឱ្យដំណើរការនាពេលឆាប់ៗនេះ ដែលនឹងក្លាយជាGame Changer មួយ នៅក្នុងវិស័យអាកាសចរណ៍ស៊ីវិល និងការដឹកជញ្ជូនតាមផ្លូវអាកាសរបស់កម្ពុជា ដែលនឹងរួមចំណែកបង្កើនសក្ដានុពល ជើងហោះហើរឆ្លងទ្វីបរបស់កម្ពុជាថែមមួយកម្រិតទៀត និងទាក់ទាញការវិនិយោគបរទេសបន្ថែម ប្រកបដោយសុវត្ថិភាព គុណភាព និងជំនឿទុកចិត្ត។

លោកវង្សី វិស្សុត បានលើកទឹកចិត្តឱ្យក្រុមហ៊ុនអាកាសយានដ្ឋាន VINCI និងក្រុមហ៊ុនMuhibbah ប្រកាន់ខ្ជាប់នូវស្មារតីនៃការពិភាក្សាបើកចំហ និងការទទួលខុសត្រូវ ដែលកិច្ចសហប្រតិបត្តិការនេះបានបង្កើតមូលដ្ឋានគ្រឹះដ៏រឹងមាំ ក្នុងការបង្កើតសមិទ្ធផលជាច្រើនអនេក និងបន្តទទួលបានជោគជ័យ នារយៈពេល៣០ឆ្នាំតទៅមុខទៀត៕

ប្រទេសចិនដាក់បង្ហាញរថភ្លើង Maglev ជាសាធារណៈនៅទីក្រុងប៉េកាំង ដែលអាចរត់បានក្នុងល្បឿន៦០០គីឡូម៉ែត្រក្នុងមួយម៉ោង

July 15, 2025

ដោយ: គង់ លាងហួរ
អន្តរជាតិ: រថភ្លើងល្បឿនលឿនប្រភេទ Maglev ដែលផលិតដោយប្រទេសចិន ត្រូវបានដាក់បង្ហាញជាសាធារណៈនៅទីក្រុងប៉េកាំង។ គម្រោងនេះត្រូវបានគេរំពឹងថា នឹងជួយកាត់បន្ថយពេលវេលាធ្វើដំណើរបានយ៉ាងច្រើន និងពង្រឹងកេរ្តិ៍ឈ្មោះរបស់ប្រទេសចិនក្នុងនាមជាប្រទេសនាំមុខគេលើពិភពលោកក្នុងការកសាងបណ្តាញផ្លូវដែកល្បឿនលឿន។

រថភ្លើង ដែលអាចរត់ក្នុងល្បឿន៦០០គីឡូម៉ែត្រក្នុងមួយម៉ោងនេះត្រូវបានដាក់តាំងបង្ហាញនៅឯពិធីតាំងពិព័រណ៍ផ្លូវដែកទំនើបលើកទី១៧ ក្នុងរដ្ឋធានីប៉េកាំងកាលពីសប្តាហ៍មុន។ ការណ៍នេះបង្ហាញពីក្តីប្រាថ្នាប្រកបដោយមហិច្ឆិតារបស់ប្រទេសចិនចំពោះអនាគតសម្រាប់ការដឹកជញ្ជូនតាមបណ្តាញផ្លូវដែក។

រថភ្លើងនេះត្រូវបានផលិតឡើងដោយក្រុមហ៊ុន China Railway Rolling Stock Corporation (CRRC) ដែលត្រូវបានរចនាឡើងជាពិសេស ដើម្បីកាត់បន្ថយការកកិតជាមួយកម្លាំងខ្យល់។នេះបើយោងតាមការចុះផ្សាយដោយកាសែត South China Morning Post។

ក្រុមអ្នកតំណាងក្រុមហ៊ុន CRRC បានអះអាងថា ដំណាក់កាលដំបូងនៃវិស្វកម្មត្រូវបានបញ្ចប់កាលពីខែកក្កដា ឆ្នាំមុន។ជាមួយគ្នានោះ ការធ្វើតេស្តផ្លូវដែក និងប្រព័ន្ធសុវត្ថិភាព និងការវាយតម្លៃលទ្ធភាពជោគជ័យផ្នែកវិស្វកម្មនឹងត្រូវបានអនុវត្តន៍ មុនពេលរថភ្លើងនេះអាចដាក់ឱ្យប្រើប្រាស់បាន។

រថភ្លើងនេះនឹងក្លាយជាមធ្យោបាយធ្វើដំណើររវាងបណ្តាទីក្រុងធំៗ ដោយបន្ថែមពីលើបណ្តាញផ្លូវដែកនាពេលបច្ចុប្បន្នក្នុងប្រទេសចិន។នេះបើយោងតាមការចុះផ្សាយដោយគេហទំព័រសារព័ត៌មាន The Paper ដែលមានមូលដ្ឋាននៅទីក្រុងសៀងហៃ។

ជាមួយនឹងល្បឿនអតិបរមាចំនួន៦០០គីឡូម៉ែត្រក្នុងមួយម៉ោង ការធ្វើដំណើរចម្ងាយ១.២០០គីឡូម៉ែត្ររវាងទីក្រុងប៉េកាំង និងទីក្រុងសៀងហៃនឹងចំណាយពេលត្រឹមតែជាង២ម៉ោងប៉ុណ្ណោះ បើធៀបនឹងពេលវេលាធ្វើដំណើរបច្ចុប្បន្នចំនួន៥ម៉ោងកន្លះ៕ប្រភព: SCMP៕

តម្លៃហាងឆេងមាសបានងើបឡើងថ្លៃនៅថ្ងៃអង្គារនេះ

July 15, 2025

ដោយ: គង់ លាងហួរ
អន្តរជាតិ: តម្លៃហាងឆេងមាសបានងើបឡើងថ្លៃក្នុងការជួញដូរនៅព្រឹកថ្ងៃអង្គារនេះ ក្រោយពេលតម្លៃមាសប្រភេទ Spot Gold បានជួញដូរក្នុងទំហំទឹកប្រាក់ចំនួន៣៣៤៣,៥២ដុល្លារអាមេរិកក្នុងមួយអោនគិតត្រឹមពេលបិទការជួញដូរកាលពីថ្ងៃចន្ទម្សិលមិញ។

តួយ៉ាង តម្លៃមាស Spot Gold បានងើបឡើង០,៣៥ភាគរយដល់៣៣៥៥,១៥ដុល្លារក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold futures បានងើបឡើង០,១១ភាគរយដល់៣៣៦២,៨ដុល្លារក្នុងមួយអោនគិតត្រឹមម៉ោង១០:២៦នាទីព្រឹក។

យោងតាមឧបករណ៍ CME FedWatch បានឱ្យដឹងថា បច្ចុប្បន្ន ទីផ្សារមើលឃើញឱកាសចំនួន៩៥,៣ភាគរយ ដែលធនាគារកណ្តាលអាមេរិក (Fed) នឹងរក្សាទុកអត្រាការប្រាក់ឱ្យនៅថេរដដែលក្នុងកិច្ចប្រជុំគោលនយោបាយនៅថ្ងៃទី៣០ ខែកក្កដាខាងមុខ។

ចំណែក សន្ទស្សន៍ប្រាក់ដុល្លារ ដែលវាស់វែងប្រាក់ដុល្លារអាមេរិកធៀបនឹងរូបិយបណ្ណសំខាន់ៗចំនួន៦ ដូចជាប្រាក់យ៉េន និងប្រាក់អឺរ៉ូ បានធ្លាក់ថ្លៃចុះដល់៩៨,០៣ពិន្ទុនៅព្រឹកថ្ងៃអង្គារនេះ បន្ទាប់ពីបានបិទការជួញដូរត្រឹម៩៨,០៨ពិន្ទុកាលពីថ្ងៃចន្ទម្សិលមិញ៕

រដ្ឋាភិបាលស្នើអង្គការយូណេស្កូពិនិត្យសំណង់ប្រាសាទរបស់ថៃនៅខេត្តបុរីរម្យដែលចម្លងតាមគំរូប្រាសាទអង្គរវត្ត

July 15, 2025

ដោយៈ គង់ សូរិយា

ភ្នំពេញៈ រដ្ឋមន្ត្រីក្រសួងវប្បធម៌ និងវិចិត្រសិល្បៈកម្ពុជា លោកស្រី ភឿង សកុណា ស្នើអង្គការយូណេស្កូ ពិនិត្យសំណង់ប្រាសាទរបស់ថៃនៅខេត្តបុរីរម្យ ដែលចម្លងតាមគំរូប្រាសាទអង្គរវត្ត ដោយបញ្ជាក់ថា ករណីសាងសង់ចម្លងនេះ កំពុងបង្កជាសំណល់គំរូដ៏គ្រោះថ្នាក់បំផុត សម្រាប់គ្រប់បេតិកភណ្ឌពិភពលោកទាំងអស់ និងរំលោភលើស្មារតីបុព្វបុរសខ្មែរ។

ការស្នើនេះធ្វើឡើង ក្នុងសម័យប្រជុំលើកទី៤៧របស់គណៈកម្មាធិការបេតិកភណ្ឌពិភពលោក នៅក្រុងប៉ារីស ប្រទេសបារាំង កាលពីថ្ងៃព្រហស្បតិ៍ ខណៈភាគីថៃបានសម្ដែងការភ្ញាក់ផ្អើល និងខកចិត្តចំពោះការលើកឡើងរបស់ភាគីកម្ពុជា។

ក្នុងកិច្ចប្រជុំនោះ លោកស្រី ភឿង សកុណា បានថ្លែងអំណរគុណចំពោះការយកចិត្តទុកដាក់ របស់គណៈកម្មាធិការបេតិកភណ្ឌពិភពលោក លើកិច្ចការពារបេតិកភណ្ឌពិភពលោក ជាពិសេសប្រាសាទអង្គរវត្ត ដែលបានចុះក្នុងបញ្ជីបេតិកភណ្ឌពិភពលោក តាំងពីឆ្នាំ១៩៩២ ហើយក៏ជានិមិត្តរូបរបស់កម្ពុជាផងដែរ។

ជាមួយគ្នានោះ លោកស្រីបានលើកឡើងពីកង្វល់របស់កម្ពុជាពាក់ព័ន្ធ នឹងសំណង់ចម្លងដ៏ធំតាមគំរូប្រាសាទអង្គរ នៅខេត្តបុរីរម្យ ប្រទេសថៃ ដោយមិនបានពិភាក្សាជាមួយកម្ពុជា ហើយក៏មិនបានគោរពក្រមសីលធម៌ នៃតម្លៃវប្បធម៌របស់កម្ពុជានោះដែរ។

ការសាងសង់នេះក៏បានប៉ះពាល់ដល់ Integrity និង Authenticity និងតម្លៃលេចធ្លោជាសកល (OUV- Outstanding Universal Value) របស់រមណីយដ្ឋានអង្គរទាំងមូលផងដែរ។

លោកស្រីបញ្ជាក់ថា “ទោះបីជាខ្ញុំបានខិតខំព្យាយាមជជែកជាច្រើនលើច្រើនសាជាមួយថៃ ក៏ការសាងសង់នោះនៅតែបន្តមិនបញ្ឈប់នោះទេ”។ លោកជំទាវបន្តថា “ការសាងសង់ចម្លងនេះ កំពុងបង្កជាសំណង់គំរូដ៏គ្រោះថ្នាក់ សម្រាប់បេតិកភណ្ឌពិភពលោកទាំងអស់”។

លោកជំទាវភឿង សកុណា បានស្នើសុំអង្គការយូណេស្កូ ក៏ដូចជាស្ថាប័នពិគ្រោះយោបល់ទាំងអស់ របស់អង្គការយូណេស្កូ ពិនិត្យជាទូទៅលើបញ្ហានេះ ជាមួយការយកចិត្តទុកដាក់ខ្ពស់។

ជាការឆ្លើយតប មេដឹកនាំគណៈប្រតិភូថៃ គឺលោក Sihasak Phuangketkeow បានសម្តែងការភ្ញាក់ផ្អើល និងខកចិត្តចំពោះការលើកឡើងរបស់កម្ពុជា ដោយលោកសង្កត់ធ្ងន់ថា បេតិកភណ្ឌវប្បធម៌គួរតែពង្រឹងឯកភាពគ្នា មិនមែនការបែងចែកគ្នាទេ។

តាមការចុះផ្សាយដោយកាសែត The Nation របស់ថៃ លោក Sihasak Phuangketkeow បានកត់សម្គាល់ថា ប្រាសាទវត្តភូម៉ានហ្វា បានកសាងឡើងតាមរចនាបថស្ថាបត្យ ព្រះពុទ្ធសាសនា និងការបំផុសគំនិត ពីកន្លែងប្រវត្តិសាស្ត្រថៃផ្សេងៗ ពោលគឺមិនមែនចម្លងតាមគំរូប្រាសាទអង្គរនោះទេ។

អំឡុងកិច្ចប្រជុំបច្ចេកទេសលើកទី៤០ របស់គណៈកម្មាធិការអន្តរជាតិ សម្របសម្រួលកិច្ចគាំពារ និងអភិវឌ្ឍន៍តំបន់រមណីយដ្ឋានប្រវត្តិសាស្រ្តអង្គរនិងសំបូរព្រៃគុក ដែលប្រារព្ធធ្វើនៅខេត្តសៀមរាបកាលពីខែមុន លោកស្រី ភឿង សកុណា ក៏បានលើកឡើងផងដែរពីករណីថៃបំពានលើអត្តសញ្ញាណ និងព្រលឹងវប្បធម៌ខ្មែរ តាមរយៈការលួចចម្លង ប្លង់ប្រាសាទអង្គរវត្តរបស់ខ្មែរ ទៅសាងសង់ជាប្រាសាទមួយមានសណ្ឋាន ដូចប្រាសាទអង្គរនៅវត្តភូម៉ានហ្វា ខេត្តបុរីរម្យ ប្រទេសថៃ ដែលមានឈ្មោះថាសីហនគរ។

សំណង់ប្រាសាទសីហនគរ នៅវត្តភូម៉ានហ្វា ខេត្តបុរីរម្យ ប្រទេសថៃ បានសាងសង់ឡើងកាលពីអំឡុងឆ្នាំ២០២១ ដោយការចម្លងប្លងនិងរចនាបថប្រាសាទអង្គរវត្តរបស់ខ្មែរទាំងស្រុង។

ភ្លាមៗនោះ ពោលគឺនៅថ្ងៃទី៧ ខែកក្កដា ឆ្នាំ២០២១ ក្រសួងវប្បធម៌ និងវិចិត្រសិល្បៈកម្ពុជា បានចេញសេចក្ដីប្រកាសព័ត៌មានដោយផ្អែកតាមការបំភ្លឺរបស់ចៅអធិការវត្តវត្តភូម៉ានហ្វាថា ការសាងសង់ប្រាសាទសីហនគរ មិនបានលួចចម្លងប្លង់ ឬសាងសង់តាមរចនាបថស្ថាបត្យកម្មដូចគ្នា នឹងប្រាសាទអង្គរវត្ត ឬប្រាសាទបុរាណណាមួយនៅក្នុងប្រទេសកម្ពុជាឡើយ ពោលគឺសាងសង់តាមគំនូសប្លង់ដោយខ្លួនឯងនិងរចនាទៅតាមស្ថាបត្យកម្ម ប្រាសាទបុរាណមួយចំនួន ដែលមាននៅក្នុងតំបន់នោះ។

ក្រោយមកនៅថ្ងៃ២៦ ខែកញ្ញា ឆ្នាំ២០២៣ ក្រសួងវប្បធម៌និងវិចិត្រសិល្បៈកម្ពុជា បានចេញសេចក្ដីជូនដំណឹង ជុំវិញការសាងសង់សំណង់ប្រាសាទសីហនគរ នៅវត្តភូម៉ានហ្វាថា ក្រុមការងារជំនាញរបស់ខ្លួន បានតាមដានជាប់ជាប្រចាំ ដោយផ្ដោតលើសកម្មភាពទំនាក់ទំនងការទូត ដែលបានបញ្ជូនអ្នកសិក្សាស្រាវជ្រាវចុះ ទៅពិនិត្យទីតាំងសាងសង់ដោយផ្ទាល់ ប៉ុន្តែស្ថានភាពពេលដែលអ្នកជំនាញ ចុះទៅពិនិត្យឃើញថា សំណង់ប្រាសាទសីហនគរ នៅវត្តភូម៉ានហ្វា នៅមិនទាន់មានការសាងសង់បន្ថែមនៅឡើយទេ។

តាមសេចក្ដីជូនដំណឹងពេលនោះ ក្រសួងវប្បធម៌ និងវិចិត្រសិល្បៈកម្ពុជា បានបញ្ជាក់ពីជំហរច្បាស់លាស់ ក្នុងការទប់ស្កាត់នូវរាល់ទង្វើទាំងឡាយណា ដែលបានចម្លងអត្តសញ្ញាណជាតិខ្មែរ ដោយផ្អែកលើសកម្មភាពការទូត ការងារផ្ទៀងផ្ទាត់បែបបច្ចេកទេស ការងារចុះពិនិត្យទីតាំង និងការងារផ្លូវច្បាប់ជាតិនិងអន្តរជាតិ៕

ទំហំពាណិជ្ជកម្មរបស់កម្ពុជាជាមួយបណ្តាប្រទេសជាមិត្តហក់ឡើងដល់ទឹកប្រាក់ជាង៣០ពាន់លានដុល្លារអាមេរិកក្នុងឆមាសទី១

July 15, 2025

ដោយៈ គង់ សូរិយា

ភ្នំពេញៈ ទំហំពាណិជ្ជកម្មសរុបរបស់កម្ពុជា ជាមួយដៃគូពាណិជ្ជកម្មកំពូលទាំង២០ បានឈានដល់៣០.៥៧ពាន់លានដុល្លារក្នុងរយៈពេល៦ ខែដំបូងនៃឆ្នាំ២០២៥ កើនឡើង១៧.២ភាគរយ ធៀបនឹង ២៦.០៩ពាន់លានដុល្លារ ដែលបានកត់ត្រាក្នុងអំឡុងពេលដូចគ្នាកាលពីឆ្នាំមុន។

នេះបើយោងតាមរបាយការណ៍ចេញផ្សាយ កាលពីថ្ងៃព្រហស្បតិ៍ដោយអគ្គនាយកដ្ឋានគយ និងរដ្ឋាករកម្ពុជា (GDCE)។

ក្នុងពេលជាមួយគ្នានេះ ការនាំចូលបានកើនឡើង១៨ភាគរយដល់១៦.២៨ពាន់លានដុល្លារ បើធៀបនឹង១៣.៨០ ពាន់លានដុល្លារក្នុងរយៈពេលដូចគ្នាកាលពីឆ្នាំមុន។ ជាលទ្ធផល ឱនភាពពាណិជ្ជកម្មរបស់កម្ពុជាបានកើនដល់ប្រមាណ១,៩៩ ពាន់លានដុល្លារ ធៀបនឹង ១,៥០ ពាន់លានដុល្លារកាលពីឆ្នាំមុន។

ទិន្នន័យដដែលបានបង្ហាញថា ប្រទេសចិននៅតែជាដៃគូពាណិជ្ជកម្មដ៏ធំបំផុតរបស់កម្ពុជា ជាមួយនឹងទំហំពាណិជ្ជកម្មទ្វេរភាគីសរុបឈានដល់៩.២៧ពាន់លានដុល្លារ កើនឡើង២៦.៩ភាគរយ។ ទោះបីជាមានកំណើនពាណិជ្ជកម្មជារួមក៏ដោយ ការនាំចេញរបស់កម្ពុជាទៅកាន់ប្រទេសចិនបានធ្លាក់ចុះ៧.៩ភាគរយ មកនៅត្រឹម៧៥០.៦ លានដុល្លារ ខណៈដែលការនាំចូលពីប្រទេសចិន បានកើនឡើងខ្លាំង ៣១.២ ភាគរយដល់៨.៧៨ ពាន់លានដុល្លារ។

សហរដ្ឋអាមេរិក បានឈរជាដៃគូពាណិជ្ជកម្មធំជាងគេទីពីរ ក្នុងអំឡុងពេលនេះ ដោយទំហំពាណិជ្ជកម្មបានកើនឡើង២៥.៧ភាគរយដល់៥.៦៩ពាន់លានដុល្លារ។ ការនាំចេញទៅកាន់សហរដ្ឋអាមេរិកបានកើនឡើង២៥.៦ភាគរយ ដល់៥.៥២ពាន់លានដុល្លារ ខណៈដែលការនាំចូលកើនឡើង២៩ ភាគរយដល់១៦៤.៩០លានដុល្លារ។

ចំណែកវៀតណាមជាប់ចំណាត់ថ្នាក់លេខ៣ ជាមួយនឹងទំហំពាណិជ្ជកម្មសរុបកើនឡើង៧.២ភាគរយ ដល់៤.៣៤ពាន់លានដុល្លារ។ ការនាំចេញរបស់កម្ពុជាទៅវៀតណាម បានកើនដល់២,១៩ ពាន់លានដុល្លារ ខណៈការនាំចូលមានចំនួន២,១៤ ពាន់លានដុល្លារ។

រីឯពាណិជ្ជកម្មជាមួយប្រទេសថៃ ក៏មានការកើនឡើងផងដែរ ដោយពាណិជ្ជកម្មទ្វេរភាគីសរុប បានឈានដល់២,១៩ពាន់លានដុល្លារ កើនឡើង៦,៦ភាគរយ។ ការនាំចេញទៅប្រទេសថៃមាន ៤៤៨,០៩លានដុល្លារ កើនឡើង១,៩ភាគរយ ខណៈការនាំចូលពីប្រទេសថៃបានកើនឡើង៧,៩ភាគរយ ដល់១,៧៤ពាន់លានដុល្លារ។

ប្រទេសជប៉ុនបានរក្សាជំហររបស់ខ្លួន ជាដៃគូពាណិជ្ជកម្មធំជាងគេទី៥របស់កម្ពុជា ដោយពាណិជ្ជកម្មទ្វេរភាគី បានកើនឡើង២៨.៧ ភាគរយដល់១.២២ពាន់លានដុល្លារ។

ការនាំចេញរបស់កម្ពុជាទៅជប៉ុន បានឈានដល់៧៣៥.៥លានដុល្លារ កើនឡើង១៩.៩ភាគរយ ខណៈការនាំចូលពីប្រទេសជប៉ុនកើនឡើង៤១.៨ភាគរយ ដល់៤៦៩.៧២លានដុល្លារ។

កម្ពុជាក៏មានពាណិជ្ជកម្មដ៏រឹងមាំ ជាមួយទីផ្សារសំខាន់ៗមួយចំនួនដូចជា អាល្លឺម៉ង់ ហូឡង់ បារាំង កាណាដា ឥណ្ឌូនេស៊ី អេស្ប៉ាញ ចក្រភពអង់គ្លេស អ៊ីតាលី បែលហ្សិក កូរ៉េខាងត្បូង សិង្ហបុរី ឥណ្ឌា ម៉ាឡេស៊ី តៃវ៉ាន់ និងហុងកុង។

អ្នកជំនាញបានចង្អុលបង្ហាញ ពីការបន្តនៃភាពធន់របស់វិស័យផលិតកម្មរបស់កម្ពុជា ជាពិសេសសម្លៀកបំពាក់ ស្បែកជើង និងផលិតផលកសិកម្ម ដែលជាកត្តាជំរុញដ៏សំខាន់ នៅពីក្រោយការនាំចេញដ៏រឹងមាំ។ ទន្ទឹមនឹងនេះ ការនាំចូលកើនឡើងបង្ហាញពីតម្រូវការក្នុងស្រុកខ្លាំងសម្រាប់វត្ថុធាតុដើម គ្រឿងម៉ាស៊ីន ការផ្គត់ផ្គង់សំណង់ និងទំនិញប្រើប្រាស់។

ទោះបីជាមាននិន្នាការនាំចេញវិជ្ជមានក៏ដោយ ឱនភាពពាណិជ្ជកម្មកាន់តែធំឡើង ជាពិសេសជាមួយប្រទេសចិន។ រាជរដ្ឋាភិបាលកំពុងបន្តយុទ្ធសាស្ត្រ ធ្វើពិពិធកម្មទីផ្សារនាំចេញ ទាក់ទាញការវិនិយោគក្នុងឧស្សាហកម្មតម្លៃបន្ថែម និងជំរុញការប្រកួតប្រជែងតាមរយៈការសម្របសម្រួលពាណិជ្ជកម្ម កំណែទម្រង់បទប្បញ្ញត្តិ និងការអភិវឌ្ឍន៍ភស្តុភារ។ កិច្ចខិតខំប្រឹងប្រែងទាំងនេះ គឺសំដៅរក្សាកំណើនប្រកបដោយនិរន្តរភាព ស្របពេលមានភាពមិនប្រាកដប្រជា នៃសេដ្ឋកិច្ចពិភពលោក។

លោកឡោ វិចិត្រ អនុប្រធានសមាគមពាណិជ្ជកម្មចិនកម្ពុជា (CCCA) បានមានប្រសាសន៍ថា តួលេខពាណិជ្ជកម្មឆ្លុះបញ្ចាំងពីប្រព័ន្ធសេដ្ឋកិច្ចដែលដំណើរការបានល្អ។

លោកបានមានប្រសាសន៍ថា “ពាណិជ្ជកម្មរវាងប្រទេសកម្ពុជា និងទីផ្សារធំៗចំនួន២០ ឆ្លុះបញ្ចាំងពីសរសៃឈាមសេដ្ឋកិច្ច ដែលមានដំណើរការល្អរបស់ប្រទេស ដែលជំរុញដោយកម្លាំងទិញ ដែលមានស្ថិរភាព និងរីកចម្រើនរបស់កម្ពុជា និងបង្ហាញពីការប្រកួតប្រជែងនៃការនាំចេញរបស់ខ្លួន”។

លោកបានពន្យល់ថា ការកើនឡើងជាលំដាប់ នៃទំហំពាណិជ្ជកម្ម គឺជាលទ្ធផល នៃគោលនយោបាយរបស់រដ្ឋាភិបាល។ ការកើនឡើងនៃទំហំពាណិជ្ជកម្ម ក៏បង្ហាញថារដ្ឋាភិបាលបានអនុវត្តន៍ គោលនយោបាយជាក់លាក់ ក្នុងគោលបំណងជំរុញការនាំចេញ និងការនាំចូលដែលនាំឱ្យមានកំណើនប្រចាំឆ្នាំ។

លោកបញ្ជាក់ថា “ស្ថិរភាពនយោបាយ សេដ្ឋកិច្ចធន់ និងកម្លាំងពលកម្មជំនាញវ័យក្មេង សុទ្ធតែបានរួមចំណែកក្នុងការលើកកម្ពស់ការប្រកួតប្រជែងនៃការនាំចេញរបស់កម្ពុជា ដូចដែលបានឆ្លុះបញ្ចាំងនៅក្នុងទិន្នន័យពាណិជ្ជកម្ម”។

ការវិនិយោគនៅតែបន្តដើរតួនាទីយ៉ាងសំខាន់ ដោយក្រុមប្រឹក្សាអភិវឌ្ឍន៍កម្ពុជា(CDC) បានអនុម័តគម្រោងជាច្រើនទៀតជារៀងរាល់ឆ្នាំ ដែលភាគច្រើនបានផ្សារភ្ជាប់ទៅនឹងឧស្សាហកម្មនាំចេញ។

ដៃគូពាណិជ្ជកម្មសំខាន់ៗរបស់កម្ពុជា រួមមាន ចិន សហរដ្ឋអាមេរិក វៀតណាម ថៃ ជប៉ុន និងសហភាពអឺរ៉ុប។ ការនាំចេញសំខាន់ៗដូចជា សម្លៀកបំពាក់ ស្បែកជើង ទំនិញធ្វើដំណើរ កង់ និងផលិតផលកសិកម្ម បានរក្សាដំណើរការយ៉ាងរឹងមាំ ទោះបីជាមានបញ្ហាប្រឈមជាសកលក៏ដោយ៕

ឆ្ពោះទៅមុខ លោកបានបង្ហាញទំនុកចិត្តថា ការនាំចេញនឹងបន្តកើនឡើង នៅពេលដែលការវិនិយោគហេដ្ឋារចនាសម្ព័ន្ធរីកចម្រើន។ «គម្រោងសំខាន់ៗរួមមានការកែលម្អកំពង់ផែទឹកជ្រៅក្នុងខេត្តព្រះសីហនុ គម្រោងព្រែកជីកហ្វូណនតេជោ និងការអភិវឌ្ឍហេដ្ឋារចនាសម្ព័ន្ធផ្សេងទៀតដែលនឹងជួយដល់ពាណិជ្ជកម្ម»។

ជាមួយនឹងការអភិវឌ្ឍន៍ទាំងនេះ កម្ពុជាមានទីតាំងល្អក្នុងការពង្រឹងមូលដ្ឋានសេដ្ឋកិច្ចរបស់ខ្លួន និងលើកកម្ពស់ការប្រកួតប្រជែងពាណិជ្ជកម្មពិភពលោករបស់ខ្លួននៅឆ្នាំខាងមុខ។

ការសិក្សាថ្មីៈ លំនៅដ្ឋានបានបញ្ចប់ការសាងសង់មានចំនួន២១០០យូនីត ខណៈគម្រោងសាងសង់ថ្មីមានចំនួន១១

July 15, 2025

ដោយៈ គង់ សូរិយា

ភ្នំពេញៈ ការសិក្សាថ្មីមួយបានរកឃើញថា លំនៅដ្ឋានដែលបានបញ្ចប់ការសាងសង់នៅដំណាច់ឆមាសទី១ឆ្នាំនេះ មានចំនួន២១០០យូនីត ខណៈគំរោងសាងសង់ថ្មីមានចំនួន១១។

យោងតាមក្រុមហ៊ុនCBRE Cambodiaបានបង្ហាញទិន្នន័យនៃការសិក្សាកាលពីសប្តាហ៍មុនថា គម្រោងបុរីដែលបានបញ្ចប់ការសាងសង់នៅឆមាសទី១ រួមមាន បុរី William Angkor Chey បុរី Lay Kong Emerald Residence បុរី Chom Chao Premium by Chea Ry និងបុរី L Village Village ដំណាក់កាលទី១ និងបុរី Khemarak Phumi ជាដើម។

ជាមួយគ្នានេះ បុរីដែលបានបើកដំណើរការលក់លំនៅដ្ឋាន នៅឆមាសទី១ មានចំនួន១១គម្រោងស្មើនឹងជាង១.៩០០យូនីត និងចំនួនលំនៅដ្ឋាន ដែលបានបញ្ចប់ការសាងសង់ មានចំនួនជាង២.១០០យូនីត។

ចំណែកគម្រោងខុនដូដែលបានបញ្ចប់ ការសាងសង់នៅឆមាសទី១ រួមមានអគារ Vue Aston អគារ East Condo Sensok អគារ City View និងអគារ La Vista One។ ចំនួនខុនដូ ដែលបានបញ្ចប់ការសាងសង់ក្នុងឆមាសទី១ មានចំនួនជាង៣.៦០០យូនីត។

ការសិក្សាបានរកឃើញផងដែរថា តម្លៃខុនដូលំដាប់សមរម្យ បានកើនឡើង១,០៤ភាគរយ ដល់ចំនួនជាង១.៥០០ដុល្លារក្នុងមួយម៉ែត្រការ៉េ នៅឆមាសទី១ ធៀបនឹងរយៈពេលដូចគ្នាកាលពីឆ្នាំមុន ខណៈតម្លៃខុនដូលំដាប់មធ្យម បានកើនឡើង៦,៩ភាគរយ ដល់ជិត២.៥០០ដុល្លារក្នុងមួយម៉ែត្រការ៉េ។

ចំណែកតម្លៃខុនដូលំដាប់ខ្ពស់ ឬប្រណីតបានកើនឡើង១,៩ភាគរយ ដល់ជាង៣.០០០ដុល្លារ ក្នុងមួយម៉ែត្រការ៉េនៅឆមាសទី១ ឆ្នាំ២០២៥ ធៀបនឹងរយៈពេលដូចគ្នាកាលពីឆ្នាំមុន។

អ្នកនាង គឹម កិនកេសាអគ្គនាយិកាក្រុមហ៊ុនCBRE Cambodia បានលើកឡើងថា បណ្តាអ្នកអភិវឌ្ឍន៍កំពុងមានទំនុកចិត្តខ្ពស់ជាងមុនចំពោះទីផ្សារ និងការធ្វើពិពិធកម្មពីគម្រោងលំនៅដ្ឋានកម្រិតខ្ពស់ ទៅជាគម្រោងលំនៅដ្ឋាន ដែលមានតម្លៃសមរម្យជាងមុន៕

អគារខ្ពស់ជាងគេបំផុតនៅទីក្រុងឆុងឈីងក្នុងប្រទេសចិនគ្រោងបញ្ចប់ការសាងសង់នៅអំឡុងខែកក្កដានេះ

July 14, 2025

ដោយ: គង់ លាងហួរ
អន្តរជាតិ: ទិដ្ឋភាពរបស់បណ្តាទីក្រុងធំៗនៅតំបន់អាសុីកំពុងផ្លាស់ប្តូរ ស្របពេលមានកំណើននៃការសាងសង់អគារខ្ពស់កប់ពពក ដែលធ្វើឱ្យទីក្រុងទាំងនោះកាន់តែមានភាពទាក់ទាញ និងបង្ហាញពីសមត្ថភាពផ្នែកស្ថាបត្យកម្មសម័យទំនើប។

ក្នុងនោះ ប្រទេសចិនគ្រោងនឹងបញ្ចប់ការសាងសង់អគារកប់ពពកមួយនៅខែកក្កដា ឆ្នាំ២០២៥នេះ ក្រោយពីបានចាប់ផ្តើមសាងសង់តាំងពីឆ្នាំ២០១២។ អគារនោះមានឈ្មោះថា “International Land‑Sea Center”ស្ថិតក្នុងទីក្រុងឆុងឈីង (Chongqing)។

អគារ International Land‑Sea Center មានកំពស់៤៥៨,២ម៉ែត្រ ដោយជាប់ឈ្មោះជាអគារខ្ពស់ជាងគេបំផុតក្នុងទីក្រុងឆុងឈីង និងខ្ពស់ជាងគេបំផុតនៅតំបន់ភាគខាងលិចប្រទេសចិន បន្ទាប់ពីគ្រោងឆ្អឹងរបស់អគារបានបញ្ចប់រួចរាល់កាលពីឆ្នាំ២០២២។

អគារនេះត្រូវបានរចនាឡើងដោយក្រុមហ៊ុន Kohn Pedersen Fox និងវិទ្យាស្ថានរចនាស្ថាបត្យកម្ម Chongqing។ អគារ International Land‑Sea Center មានរូបរាងដូចជាសំពៅ ដោយបានឆ្លុះបញ្ចាំងអំពីប្រវត្តិសាស្ត្រនៃការធ្វើដំណើរតាមសំពៅលើទន្លេ Yangtze និងទន្លេ Jialing ក្នុងទីក្រុងឆុងឈីង។

អគារខាងលើត្រូវបានសាងសង់ឡើង ដោយប្រើប្រាស់គ្រឿងម៉ាស៊ីន ដែលមានភាពទំនើបខ្ពស់បំផុត និងបានប្រើប្រាស់ដែកប្រហែល៧០.០០០តោន។ តួលេខនេះមានចំនួនច្រើនជាងទម្ងន់ដែកសម្រាប់សាងសង់អគារ Eiffel Towers ដ៏ល្បីល្បាញក្នុងរដ្ឋធានីប៉ារីសរបស់ប្រទេសបារាំងចំនួន៧ដង។

អគារ International Land‑Sea Center មានទំហំផ្ទៃក្រឡាសរុបចំនួន៣,៦លានម៉ែត្រការ៉េស្ថិតនៅក្នុងសង្កាត់ Yuzhong ជាប់មាត់ទន្លេ Jialing ដែលជាតំបន់ពាណិជ្ជកម្មអន្តរជាតិរបស់ទីក្រុង Chongqing។ អគារនេះរួមមាន ការិយាល័យ លំនៅដ្ឋាន បដិសណ្ឋារកិច្ច ការលក់រាយ និងការកម្សាន្ត៕ប្រភព: Artfilemagazine៕

តើទីផ្សារអចលនទ្រព្យនៅរាជធានីភ្នំពេញមានស្ថានភាពជារួមដូចម្តេចនៅឆមាសទី១?

July 14, 2025

ដោយ: គង់ លាងហួរ
ភ្នំពេញ: ថ្មីៗនេះ ក្រុមហ៊ុនប្រឹក្សាយោបល់អចលនទ្រព្យ CBRE Cambodia បានចេញផ្សាយរបាយការណ៍វាយតម្លៃស្ថានភាពទីផ្សារអចលនទ្រព្យនៅក្នុងរាជធានីភ្នំពេញ គិតត្រឹមឆមាសទី១ ឆ្នាំ២០២៥។ ខាងក្រោមនេះជាទិដ្ឋភាពទូទៅនៃផ្នែកនីមួយៗក្នុងវិស័យអចលនទ្រព្យ៖

ទី១: ការិយាល័យ

អគារការិយាល័យដែលបានបញ្ចប់ការសាងសង់នៅឆមាសទី១ រួមមានអគារ Chief Tower មួយប៉ុណ្ណោះ។ ចំណែក អត្រាគ្របដណ្តប់ការជួលការិយាល័យជាមធ្យម(Occupancy Rate) នៅទូទាំងរាជធានីភ្នំពេញសម្រេចបានចំនួន៦៤ភាគរយ។

តម្លៃជួលការិយាល័យកម្រិត A បានធ្លាក់ចុះ៧,៥ភាគរយធៀបនឹងរយៈពេលដូចគ្នាកាលពីឆ្នាំមុនមកនៅត្រឹមជាង៣០ដុល្លារក្នុងមួយម៉ែត្រការ៉េក្នុងឆមាសទី១ ឆ្នាំ២០២៥ ខណៈតម្លៃជួលការិយាល័យកម្រិត B ក្នុងតំបន់ពាណិជ្ជកម្មកណ្តាលបានធ្លាក់ចុះ០,១ភាគរយធៀបនឹងឆ្នាំមុនមកនៅត្រឹមប្រហែល២៥ដុល្លារក្នុងមួយម៉ែត្រការ៉េ។

អ្នកនាង គឹម កិនកេសា នាយិកាជាន់ខ្ពស់របស់ក្រុមហ៊ុន CBRE Cambodia បានលើកឡើងថា ទីផ្សារបានសញ្ញាមិនច្បាស់លាស់នៅឆមាសទីមួយនៃឆ្នាំនេះ។ ទោះជាយ៉ាងណា ទីផ្សារអចលនទ្រព្យពាណិជ្ជកម្ម ដូចជាការិយាល័យបានជួបប្រទះការប្រែប្រួលជាបន្តបន្ទាប់ទាំងតម្រូវការ និងតម្លៃជួល។

ទី២: ផ្នែកលក់រាយ

ផ្សារទំនើប “The Commons Community Mall”ស្ថិតនៅខណ្ឌទួលគោក ជាប្រភេទគម្រោងអចលនទ្រព្យលក់រាយដែលបានបញ្ចប់ការសាងសង់ក្នុងឆមាសទី១។ អត្រាគ្របដណ្តប់ការជួលទីតាំងលក់រាយទៅទូទាំងរាជធានីភ្នំពេញសម្រេចបានចំនួន៥៨,៦ភាគរយក្នុងឆមាសទី១។

តម្លៃជួលទីតាំងលក់រាយនៅតាមផ្សារទំនើប(Shopping Mall)បានកើនឡើង៤,៣ភាគរយក្នុងឆមាសទី១ ខណៈតម្លៃជួលទីតាំងលក់រាយនៅតាមផ្សារទំនើបសហគមន៍(Community Mall)បានធ្លាក់ចុះ៤,១ភាគរយបើធៀបនឹងឆមាសទី១ ឆ្នាំ២០២៤។

ទី៣: ផ្នែកលំនៅដ្ឋាន

គម្រោងខុនដូដែលបានបញ្ចប់ការសាងសង់នៅឆមាសទី១ រួមមានអគារ Vue Aston អគារ East Condo Sensok អគារ City View និងអគារ La Vista One។ ចំនួនខុនដូ ដែលបានបញ្ចប់ការសាងសង់ក្នុងឆមាសទី១ មានចំនួនជាង៣.៦០០យូនីត។

តម្លៃខុនដូលំដាប់សមរម្យបានកើនឡើង១,០៤ភាគរយដល់ចំនួនជាង១.៥០០ដុល្លារក្នុងមួយម៉ែត្រការ៉េនៅឆមាសទី១ធៀបនឹងរយៈពេលដូចគ្នាកាលពីឆ្នាំមុន ខណៈតម្លៃខុនដូលំដាប់មធ្យមបានកើនឡើង៦,៩ភាគរយដល់ជិត២.៥០០ដុល្លារក្នុងមួយម៉ែត្រការ៉េ។

ចំណែក តម្លៃខុនដូលំដាប់ខ្ពស់ ឬប្រណីតបានកើនឡើង១,៩ភាគរយដល់ជាង៣.០០០ដុល្លារក្នុងមួយម៉ែត្រការ៉េនៅឆមាសទី១ ឆ្នាំ២០២៥ ធៀបនឹងរយៈពេលដូចគ្នាកាលពីឆ្នាំមុន។

ទន្ទឹមនឹងនេះ គម្រោងបុរីដែលបានបញ្ចប់ការសាងសង់នៅឆមាសទី១ រួមមាន បុរី William Angkor Chey បុរី Lay Kong Emerald Residence បុរី Chom Chao Premium by Chea Ry និងបុរី L Village Village ដំណាក់កាលទី១ និងបុរី Khemarak Phumi ជាដើម។

គម្រោងបុរី ដែលបានបើកដំណើរការលក់លំនៅដ្ឋាននៅឆមាសទី១ មានចំនួន១១គម្រោង ស្មើនឹងជាង១.៩០០យូនីត និងចំនួនលំនៅដ្ឋាន ដែលបានបញ្ចប់ការសាងសង់មានចំនួនជាង២.១០០យូនីត។

អ្នកនាង គឹម កិនកេសា បានលើកឡើងថា បណ្តាអ្នកអភិវឌ្ឍន៍កំពុងមានទំនុកចិត្តខ្ពស់ជាងមុនចំពោះទីផ្សារ និងការធ្វើពិពិធកម្មពីគម្រោងលំនៅដ្ឋានកម្រិតខ្ពស់ទៅជាគម្រោងលំនៅដ្ឋានដែលមានតម្លៃសមរម្យជាងមុន។

ទី៤: ផ្នែកអចលនទ្រព្យឧស្សាហកម្ម

ក្នុងឆមាសទី១ គម្រោងតំបន់សេដ្ឋកិច្ចពិសេសថ្មីចំនួន២ត្រូវបានអនុម័តដោយរដ្ឋាភិបាលកម្ពុជា រួមមានតំបន់សេដ្ឋកិច្ចពិសេសកំពតហ្វូណនទំហំ៧២១ហិកតា និងតំបន់សេដ្ឋកិច្ចពិសេសខេមបូឌាន ប៊ីនហៃព្រៃនប់ ក្នុងខេត្តព្រះសីហនុទំហំ២៣៤ហិកតា។

ជាមួយគ្នានេះ កម្ពជាកំពុងបោះជំហានឆ្ពោះទៅការធ្វើពិពិធកម្មឧស្សាហកម្មផលិត និងការនាំចេញ។ តួយ៉ាង ក្រុមហ៊ុនយក្សចិន BYD បានចាប់ផ្តើមសាងសង់រោងចក្រផលិតយានយន្តអគ្គិសនីនៅកម្ពុជា៕ប្រភព: CBRE Cambodia ៕

តើគួរវិនិយោគលើដីធ្លីសម្រាប់ផលចំណេញរយៈពេលវែងបន្តទៀត ឬទេនៅកម្ពុជា?

July 14, 2025

ដោយៈ គង់ សូរិយា

ភ្នំពេញៈ ការវិនិយោគលើដីធ្លីនៅកម្ពុជាអាចទទួលបានផលចំណេញក្នុងរយៈពេលវែង ប៉ុន្តែជម្រើសរវាងវិនិយោគិនក្នុងស្រុក និងបរទេសអាស្រ័យទៅលើកត្តាសំខាន់ៗមួយចំនួន។

ចំណុចទាំងអស់នេះជាការវិភាគ ដែលអ្នកវិនិយោគត្រូវពិចារណា

ហេតុអ្វីបានជាអ្នកវិនិយោគក្នុងស្រុកអាចមានអត្ថប្រយោជន៍៖

សិទ្ធិកម្មសិទ្ធិស្របច្បាប់

មានតែប្រជាពលរដ្ឋកម្ពុជាទេ ដែលអាចកាន់កាប់ដីធ្លីបានទាំងស្រុង។
ជនបរទេសមិនអាចកាន់កាប់ដីនៅកម្ពុជា ដោយផ្ទាល់បាននោះទេ។ ពួកគេត្រូវតែប្រើវិធីដោះស្រាយ (រចនាសម្ព័ន្ធអ្នកតែងតាំង ក្រុមហ៊ុនកាន់កាប់ដីធ្លី ឬការជួលរយៈពេលវែង ឬប្រើប្រាស់ច្បាប់បរធនបាលកិច្ច)។

ចំណេះដឹងទីផ្សារក្នុងស្រុកកាន់តែប្រសើរ

ជាធម្មតាអ្នកក្នុងស្រុក ពួកគេយល់ពីតម្លៃដីពិតប្រាកដ និន្នាការទីផ្សារ និងសក្តានុពល សម្រាប់ការអភិវឌ្ឍន៍ប្រសើរជាងជនបរទេស។

តម្លៃប្រតិបត្តិការទាប

អ្នកវិនិយោគក្នុងស្រុក អាចប្រឈមមុខនឹងឧបសគ្គខាងភាសា និងការិយាធិបតេយ្យតិចជាងមុន ហើយពួកគេស៊ាំនឹងនីតិវិធីក្រៅផ្លូវការ សន្សំសំចៃពេលវេលា និងថវិកា។

ហេតុអ្វីបានជាជនបរទេសនៅតែទទួលបានអត្ថប្រយោជន៍៖

ការចូលប្រើដើមទុនខ្ពស់

ជនបរទេស តែងតែនាំយកមូលនិធិវិនិយោគធំជាងមុន ហើយអាចអភិវឌ្ឍន៍ ឬបន្ថែមតម្លៃដីឆៅបានលឿនជាងមុន។

សក្តានុពលភាពជាដៃគូ

ជនបរទេស អាចចាប់ដៃគូជាមួយអ្នកក្នុងស្រុក ឬប្រើឧបករណ៍ផ្លូវច្បាប់ដូចជា
ការជួលបន្តរយៈពេល50ឆ្នាំ។
ក្រុមហ៊ុន Cambodia Land Holding Company (មានភាគហ៊ុនបរទេស 49%)។

តម្រូវការកើនឡើង៖

នៅពេលដែលប្រទេសកម្ពុជារីកចម្រើន (នៅតំបន់មួយចំនួនដូចជា ភ្នំពេញ សៀមរាប ព្រះសីហនុ កំពត។ល។) តម្លៃដីធ្លីត្រូវបានគេរំពឹងថានឹងកើនឡើងជាបន្តបន្ទាប់ ដែលទាក់ទាញចំណាប់អារម្មណ៍ពីបរទេស។

តំបន់វិនិយោគដីល្អបំផុត សម្រាប់ប្រាក់ចំណេញរយៈពេលវែង (គិតត្រឹមឆ្នាំ 2025):

ជាយក្រុងភ្នំពេញ – ល្អសម្រាប់ការកោតសរសើររយៈពេលវែង នៅពេលដែលទីក្រុងពង្រីក។
ក្រុងព្រះសីហនុ – ជំរុញដោយទេសចរណ៍ កាស៊ីណូ និងការវិនិយោគរបស់ចិន។
កំពត និងកែប – ដីឆ្នេរសមុទ្រមានតម្លៃកាន់តែច្រើន។
ជាយក្រុងសៀមរាប – ជាមួយនឹងទេសចរណ៍ ងើបឡើងវិញក្រោយកូវីដ១៩។
ច្រករបៀងផ្លូវជាតិ – ជាពិសេសជុំវិញផ្លូវជាតិលេខ 3, 4, និង 6 ។

ហានិភ័យដែលត្រូវពិចារណា

រចនាសម្ព័ន្ធច្បាប់សម្រាប់ជនបរទេស គឺប្រថុយប្រថានដោយគ្មានដៃគូក្នុងស្រុកដែលអាចទុកចិត្តបាន។
វិវាទដីធ្លី និងប័ណ្ណកម្មសិទ្ធិមិនច្បាស់លាស់គឺជារឿងធម្មតា។
កង្វះហេដ្ឋារចនាសម្ព័ន្ធនៅតំបន់ជនបទ ធ្វើឱ្យការវាយតម្លៃយឺតយ៉ាវ។

សាលក្រម

អ្នកស្រុក៖ ស័ក្តិសមបំផុត សម្រាប់ការកាន់កាប់ដីផ្ទាល់ ដែលមានហានិភ័យផ្នែកច្បាប់តិចជាង។
ជនបរទេស៖ នៅតែអាចទទួលបានប្រាក់ចំណេញ រយៈពេលវែង ប៉ុន្តែត្រូវប្រើវិធីដោះស្រាយតាមផ្លូវច្បាប់ និងត្រូវប្រុងប្រយ័ត្នដោយមានការឧស្សាហ៍ព្យាយាម និងដៃគូក្នុងស្រុក៕

1...161162163...3,225 Page 162 of 3,225