ប្រភេទនៃអចលនទ្រព្យទាំង៤ដែលកំពុងពេញនិយមក្នុងការវិនិយោគនៅកម្ពុជា

ដោយៈវឌ្ឍនៈ

ភ្នំពេញៈ នៅក្នុងប្រទេសកម្ពុជានាពេលបច្ចុប្បន្ននេះ គេសង្កេតឃើញថាមានអចលនទ្រព្យ៤ប្រភេទ ដែលវិនិយោគិនមានការចាប់អារម្មណ៍ និងបានបណ្ដាក់ទុនវិនិយោគច្រើនជាង។

នៅថ្ងៃនេះយើងនឹងលើកយកពីប្រភេទ នៃអចលនទ្រព្យទាំង៤ប្រភេទមកជម្រាបអ្នកអានឱ្យបានយល់ដឹងបន្ថែមទៀត ។

១. អចលនទ្រព្យលំនៅឋាន
អចលនទ្រព្យប្រភេទនេះ សំដៅដល់ប្រភេទសំណង់ទាំងឡាយណា ដែល មានលក្ខណៈគ្រួសារដូចជាផ្ទះដីឡូត៍ ខុនដូ និង អាផាត់មិនជាដើម ។អចលនទ្រព្យប្រភេទនេះ គឺកំពុងទទួលបានការពេញនិយមខ្លាំង នៅក្នុងប្រទេសកម្ពុជា លើការអភិវឌ្ឍន៍រួមទាំងប្រភេទលំនៅឋាន ដែលមានតម្លៃទាប និងមធ្យមរហូតដល់អចលនទ្រព្យដែលមានតម្លៃខ្ពស់ៗ។

២. អចលនទ្រព្យពាណិជ្ជកម្ម
អចលនទ្រព្យនេះ គឺសំដៅដល់ប្រភេទសំណង់ណា ដែលបង្កើតឡើង សម្រាប់ រកប្រភពចំណូលឬសម្រាប់រកស៊ីនានា ។ ឧទាហរណ៍ជាក់ស្តែងដូចជាផ្សារទំនើប មជ្ឈមណ្ឌលកំសាន្ត មន្ទីរពេទ្យ គ្លីនិកបុរី និងសណ្ឋាគារជាដើម ។អចលនទ្រព្យប្រភេទគឺមានតម្លៃខ្ព ស់ជាងអចលនទ្រព្យប្រភេទ ផ្សេងទៀត សូម្បីតែផ្ទះនៅក្នុងតំបន់ពាណិជ្ជកម្ម ក៏លក់បានថ្លៃជាងផ្ទះដែលស្ថិតនៅក្នុងតំបន់លំនៅឋាន គឺមិនមានអាជីវកម្មសំបូរបែប។

៣. អចលនទ្រព្យឧស្សាហកម្ម
អចលនទ្រព្យស្ថិតនៅក្នុងប្រភេទនេះ គឺសំដៅដល់អចលនទ្រព្យណា ដែល បង្កើតមកសម្រាប់ធ្វើជាឃ្លាំង ដាក់ទំនិញឬក៏រោងចក្រទូទៅ ។តំបន់ឧស្សាហកម្ម ត្រូវបានគេចាត់ទុកជាតំបន់ ដែលសំបូរអ្នកមានចំណូលទាបនិងមធ្យមរស់នៅច្រើន។

៤. ដីធ្លី
អចលនទ្រព្យក៏កំពុងមានការវិនិយោគច្រើន ពីសំណាក់វិនិយោគិនជាតិនិងអន្តរជាតិ ផងដែរ ។ វាសំដៅដល់ដីធ្លីទាំងមូលដូចជា ដីស្រែ ដីឡូត៍ ដីទំនេរ ( រាប់ទាំងដីមិនទាន់អភិវឌ្ឍនិងកំពុងអភិវឌ្ឍ ) ឬក៏ដី កសិដ្ឋាន ។

អ្នកជំនាញនៃវិស័យអចលនទ្រព្យបានផ្ដល់ជាយោបល់ និងការយល់ឃើញថា ដីធ្លីជាអចលនទ្រព្យដែលគួរវិនិយោគ ដើម្បីទទួលបានប្រាក់ចំណេ​ញនៅពេលអនាគត ហើយទិញដីទុកចំណេញក្នុងតម្លៃទាប និងលក់វិញក្នុងតម្លៃខ្ពស់ គឺជាឱកាសក្នុងការសាងភាពមានបាន។ ម្យ៉ាងទៀតបើចង់វិនិយោគដីធ្លី កុំរកទីតាំងនៅជិតៗក្រុង គួររកទីតាំងដែលនៅឆ្ងាយៗពីក្រុង ៕

បុរីបុស្បាសាងសង់ឡើងស្របតាមបរិបទនៃលក្ខខ័ណ្ឌអាកាសធាតុនិងចំណូលចិត្តមនុស្សសម័យថ្មី

ដោយៈជេស៊ីកា

ភ្នំពេញៈ ការផ្តល់នូវបែបផែននៃការរស់នៅ ផ្សារភ្ជាប់ជាមួយធម្មជាតិ កាន់តែជារសនិយមរបស់មនុស្សសម័យថ្មី ដែលចូលចិត្តធម្មជាតិ និងបរិយាកាសស្រស់ស្រាយនៅក្នុងជីវិតរបស់ពួកគេ។

បុរីថ្មីមួយបានសាងសង់ឡើងលើទំហំផ្ទៃដីជាង២០ហិកតា នោះគឺបុរី​បុស្បា ដែលអ្នករចនាគំរោងនេះ បានទុកទំហំដីធំសំរាប់សួនសាធារណៈរៀបចំនូវការឌីសាញទ្វារបង្អួចធំៗ និងស្របតាមទទិសខ្យល់ ដែលអាចផ្តល់​បរិយាកាសក្នុងលំនៅដ្ឋាន ពោរពេញដោយខ្យល់ត្រជាក់ និងអារម្មណ៍ស្រស់ស្រាយ។

បុស្បា បាននិងកំពុងសាងសង់ក្នុងសង្កាត់ព្រៃវែង ខ័ណ្ឌដង្កោរាជធានីភ្នំពេញ ជាតំបន់ដែលកំពុងមានការរីកចម្រើនយ៉ាងឆាប់រហ័ស។

លោកឧកញ៉ាឈាង រ័ត្នសហភាគហ៊ុននិកនៃបុរីបុស្បាបានមានប្រសា​សន៍ឲ្យដឹងតាមរយៈការ Live របស់ខ្លួនថា បុរីបុស្បាបាននិងកំពុងទទួលបានការចាប់អារម្មណ៍យ៉ាងខ្លាំងពីអតិថិជន ពិសេសម៉ូតផ្ទះវីឡា ផ្ទះអាជីវកម្ម ននិងផ្ទះជាច្រើនម៉ូតទៀត ដែលត្រូវបានឌីសាញឡើង ប្រកបដោយប្រណីត​ភាព ភាពស៊ីវិល័យ និងគគិតគូជាចម្បងដល់បរិស្ថាន នៃការររស់នៅតាមរសនិយមរបស់មនុស្សសម័យថ្មី។

លោកឧកញ៉ាបានបន្តថា “ជាមួយនឹងចក្ខុវិស័យដ៏វែងឆ្ងាយ យើងបាននិងកំពុងវិនិយោគបុរីថ្មីមួយ ដើម្បីផ្តល់លំនៅដ្ឋានប្រកប ដោយគុណភាព ប្រណីតភាព ភាពស៊ីវិល័យ និងផ្សារភ្ជាប់ជាមួយធម្មជាតិដល់អតិថិជន”។​លោកបន្តថា“មូលហេតុដែលយើងរើសទីតាំងនេះ ដោយសារតំបន់នេះ​មានមនុស្សរស់នៅច្រើន ជាអ្នកមានជីវភាពថ្នាក់កណ្តាល និងថ្នាក់ខ្ពស់ ហើយវាជាតំបន់មួយ ដែលមានភាពស៊ីវិល័យនាពេលអនាគត”។

ជាមួយគ្នានេះ លោកស្មុយ សុផលសហភាគហ៊ុននិកនៃបុរីបុស្បាបានបង្ហាញចំនួនអតិថិជនច្រើនកុះករ នៅក្នុងអគារការរិយាល័យរបស់បុរីនេះ នៅលើទំនាក់ទំនងសង្គមរបស់ខ្លួន។

លោកឧកញ៉ាឈាង រ័ត្ន បានបន្តថា ជាមួយនឹងការលើកទឹកចិត្តអតិថិជនជាពិសេស បុរីបុស្បាបានលក់ក្នុងតម្លៃទាបជាងទីផ្សារ៣០ភាគរយ ប៉ុន្តែយើងនីតែរក្សាបាននូវគុណភាព ប្រណីតភាព និងភាពស៊ីវិល័យ ព្រោះការវិនិយោគរបស់យើង មិនបញ្ចប់ត្រឹមគំរោងនេះទេ ប៉ុន្តែយើងនឹងវិនិយោគបុរីកាន់តែធំជាងនេះនាពេលអនាគត។

បុរីបុស្បាមានទីតាំង ពោរពេញដោយភាពអំណោយផល ដោយសារតំបន់នេះងាយស្រួល ក្នុងការតភ្ជាប់ទៅកាន់ផ្លូវជាតិលេខ២ ផ្លូវជាតិលេខ៣ ផ្លូវជាតិលេខ៤ និងផ្លូវ៦០ម៉ែត្រ ដែលសម្បូរដោយផ្សារទំនើប ពិសេសផ្សារទំនើប AEON Mall3 បាននិងកំពុងសាងសង់យ៉ាងសកម្ម។

លោកឧកញ៉ាឈាង រ័ត្ន និងលោកជំទាវស្រីអូន ម្ចាស់ក្រុមហ៊ុនសម្រ​ស់ធម្មជាតិ និងដៃគូមួយចំនួនទៀតបានវិនិយោគបុរីបុស្បាឡើង ដើម្បីផ្តល់ឲ្យប្រជាពលរដ្ឋនូវលំនៅដ្ឋាន ដែលគោរពបាននូវស្តង់ដា និងគុណតម្លៃមួយ ដែលធ្វើឲ្យអ្នករស់នៅមានផាសុខភាព និងមនោរម្យ ដោយសារបុរីនេះ​បានរៀបចំសួនច្បារ ទីធ្លាសាធារណៈ​និងហេដ្ឋារចនាសម្ព័ន្ឋ យ៉ាងធំទូលាយ​ងាយស្រួលការដើរហាត់ប្រាណ ប្រារពពិធីនានា និងការធ្វើដំណើរចេញ​ចូលបុរី ដែលផ្តល់សន្តិសុខ២៤ម៉ោងផងដែរ។

អតិថិជនចាប់អារម្មណ៍សូមទំនាក់ទំនង តាមរយៈលេខទូរស័ព្ទ០៨១ ២៣០ ៧៨៩, ០៨៧២៣០ ៧៨៩, ០៩៩ ២៣០ ៧៨៩៕

អ្នកឧកញ៉ាសុខ គង់ បង្ហើបពីទំហំចំណាយ ផែនការអភិវឌ្ឈន៍និងរយៈពេលនៃការសាងសង់ទីក្រុងបូកគោថ្មី

ដោយៈជេស៊ីកា

កំពតៈ អ្នកឧកញ៉ាសុខ គង់ប្រធានក្រុមហ៊ុនសុខាអូតែលបាន និងកំពុ​ងចំណាយប្រាប់រាប់រយលានដុល្លារអាមេរិក ដើម្បីអភិវឌ្ឍន៍រមណីយដ្ឋានឋានសួគ៌បូកគោ និងទីក្រុងបូកគោថ្មី ដែលបច្ចុប្បន្នហេដ្ឋារចនាសម្ព័ន្ឋជាច្រើនបាន និងកំពុងសាងសង់យ៉ាងខ្វាត់ខ្វែងលើកំពូលភ្នំនេះ។

ក្នុងពេលអនុញ្ញាត្តឲ្យសហស្ថាបនិក និងជាអគ្គនាយកគេហទំព័រ Propertyarea.asia លោកយិន លាងគង់កាលពីសប្តាហ៍មុន អ្នកឧកញ៉ាសុខគង់បានលើកឡើងពីផែនការ និងពន្យល់ពីទស្សនវិស័យលើការអភិវឌ្ឍន៍ទីក្រុងនេះ។

សំណួរៈ តើរហូតមកទល់ពេលនេះ ទីក្រុងបូកគោថ្មីមានការអភិវឌ្ឍន៍យ៉ាងដូចម្តេច?

ចម្លើយៈ ទីក្រុងបូកគោថ្មីបាន និងកំពុងសាងសង់លំនៅដ្ឋានលើគំរោងធំៗចំនួន៣ ដែលបានលក់អស់មួយចំនួន និងកំពុងលក់បន្ត ដោយមានការចាប់អារម្មណ៍ច្រើន ពីអ្នកចង់បានផ្ទះលំហែរកាយ។ បច្ចុប្បន្នក្រុមហ៊ុនបានសាងសង់ផ្លូវថ្មីមួយខ្សែ ចេញពីតំបន់ស្រែ៥០០ទៅកាន់ផ្លូវជាតិលេខ៤ ត្រង់ចំណុចគីឡូម៉ែត្រលេខ១៥៨ និងមួយខ្សែទៀតជាខ្នែងផ្លូវឆ្ពោះទៅកាន់កំពូលភ្នំបូកគោ ដែលស្ថិតនៅផ្នែកផ្សេងទៀត។

បច្ចុប្បន្នផ្លួវនេះ បានឈូសឆាយបានជាង៨គីឡូម៉ែត្ររួចហើយ ប៉ុន្តែមិនទាន់ដឹងចប់នៅពេលណាទេ វាអាស្រ័យលើទំហំទុនដែលយើងមាន។ ផ្លូវដ៏សំខាន់នេះមានប្រវែង១២៧គីឡូម៉ែត្រ ដែលវានឹងជួយសម្រួលការធ្វើដំណើររបស់ប្រជាពលរដ្ឋ និងជួយសេដ្ឋកិច្ចជាតិ ពិសេសអ្នកចង់មកលេងកំសាន្តនៅទីក្រុងបូកគោ អាចមកតាមផ្លូវជាតិលេខ៤ ហើយបើកត្រង់តាមផ្លូវនេះ មកកាន់ទីក្រុងបូកគោតែម្តង។

សំណួរៈ តើទីក្រុងនេះមានលក្ខណៈពិសេសផ្នែកភូមិសាស្រ្ត និងអាកា​សធាតុដូចម្តេច?

ច​ម្លើយៈ ទីក្រុងបូកគោ ដែលបានរកឃើញដោយជនជាតិបារាំង ជាភ្នំដ៏ខ្ពស់ និងមានលក្ខណៈពិសេសជាងគេនៅកម្ពុជា ដោយសារភ្នំនេះមានកំពស់ជាង១០០០ម៉ែត្រ ដែលផ្តល់នូវទិដ្ឋភាពស្រស់ត្រកាល ព្រៃឈើត្រូវបានអភិរ័ក្ស ព្រោះវាជាតំបន់ឧទ្យានជាតិ។

លក្ខខ័ណ្ឌអាកាសធាតុនេះ មានសីតុណ្ហភាពជាមធ្យម១៧ ទី១៨អង្សារសេ នៅពេលរាត្រី ដែលខ្យល់អាកាសបែបនេះ ត្រូវបានអ្នកជំនាញស្រាវជ្រាវផ្នែកសុខភាពបានឲ្យដឹងថា “ខ្យល់អាកាសនៅភ្នំបូកគោ អាចជួយសុខភាពមនុស្សបានយ៉ាងប្រសើរ ពិសេសអាចជួយអ្នកមានជម្ងឺសួតបានទៀតផង”។

ទីក្រុងបូកគោ ដែលគ្របដណ្តប់លើផ្ទៃដី៣០,០០០ហិកតានេះ នឹងក្លាយជាទីតាំងមួយ ទាក់ទាញការវិនិយោគពីសំណាក់ អ្នកវិនិយោគជាតិ អន្តរជាតិ ជាពិសេសនឹងរួមចំណែកអភិវឌ្ឍន៍សេដ្ឋកិច្ចកម្ពុជា បានយ៉ាងប្រសើរ ក្រោមការដឹកនាំរបស់សម្តេចតេជោនាយករដ្ឋមន្រ្តី។

សំណួរៈ តើទីក្រុងបូកគោមានទំហំប៉ុន្មានហិកតា ហើយរហូតមកទល់ពេលនេះ ក្រុមហ៊ុនបានចំណាយប្រាក់អស់ប៉ុន្មានហើយ?

ចម្លើយៈ ទីក្រុងបូកគោមានផ្ទៃដី ៣០,០០០ហិកតា សម្រាប់អភិវឌ្ឍន៍បាន ក្នុងចំណោមផ្ទៃដី១៤០,០០០ហិកតា ដែលស្ថិតក្នុងឧទ្យានជាតិមួយនេះ។ បើគិតពីការអភិវឌ្ឍន៍តាំងពីដើមដំបូង រាប់ទាំងសណ្ឋាគារ កាស៊ីណូ ផ្លូវឡើងភ្នំ និងហេដ្ឋារចនាសម្ព័ន្ឋជាច្រើនទៀតក្រុមហ៊ុន បានវិនិយោគអស់ទឹកប្រាក់ចន្លោះពី៤០០ ទៅ៥០០លានដុល្លាររួចហើយ។

សំណួរៈ តើក្រុមហ៊ុនគ្រោងចំណាយប្រាក់ប៉ុន្មានលានដុល្លារ ដើម្បីវិនិយោគទីក្រុងបូកគោថ្មី?

ចម្លើយៈ ទំហំទីក្រុងបូកគោថ្មីនេះធំណាស់ ដែលយើងចំណាយប្រាក់ពី១០ទៅ២០ពាន់លានដុល្លារ មិនគ្រប់ទេ ព្រោះវាត្រូវចំណាយច្រើនណាស់ ដើម្បីបង្កើតទីក្រុងថ្មីមួយបាន និងមានមនុស្សមករស់នៅច្រើន។

ការអភិវឌ្ឍន៍ទីក្រុងនេះ មានរយៈពេលមិនតិចជាង៥០ឆ្នាំឡើយ ឬអាចយូរជាងនេះ ទើបអាចបញ្ចប់បានតាមផែនការ។

សំណួរៈ តើទីក្រុងនេះ មានលក្ខណៈពិសេសដូចម្តេច តើក្រុមហ៊ុនជួលដីពីរដ្ឋ ហើយជនបរទេសអាចមានសិទ្ឋជួលបន្តដែរឬទេ?

ចម្លើយៈ ទីក្រុងថ្មីនេះ ក្រុមហ៊ុនបានជួលពីរដ្ឋាភិបាល ហើយមានកាលផុតកំណត់នៅថ្ងៃទី៣១ ខែសីហា ឆ្នាំ២១០៩ ខាងមុខ មានន័យថា វាមានសុពលភាពរយៈពេល៨៧ឆ្នាំទៀត។

សម្រាប់ជនជាតិខ្មែរ និងជនបរទេស ដែលចង់វិនិយោគគម្រោងផ្សេងៗលើទីក្រុងនេះ អាចចចារជាមួយក្រុមហ៊ុនដើម្បីជួលបន្តបាន តាមកិច្ចសន្យាជាមួយក្រុមហ៊ុន ដែលបានទទួលសិទ្ឋសម្បទានជួល ពីរដ្ឋាភិបាលកម្ពុជា៕

ដំណឹងល្អៈផ្លូវជាតិលេខ៤បាននិងកំពុងចាប់ផ្តើមស្ថាបនានិងពង្រីក

ដោយ: សុផារី

ភ្នំពេញ: រាជរដ្ឋាភិបាលកម្ពុជា តាមរយៈក្រសួងសាធារណការ និងដឹកជញ្ជូន នឹងធ្វើការស្ថាបនា និងពង្រីកផ្លូវជាតិលេខ៤ ដើម្បីធន់នឹងការបម្រែបម្រួលអាកាសធាតុ និងបង្កើនសុវត្ថិភាពដល់ការធ្វើដំណើរ របស់ប្រជាពលរដ្ឋ។

គម្រោងនេះបានទទួលប្រាក់កម្ចី សម្បទានពីធនាគារពិភពលោក តាមរយៈគម្រោងលេខ IDA Credit. 6279-KH: សម្រាប់ធ្វើការស្ថាបនា និងពង្រីកផ្លូវជាតិលេខ៤ ដើម្បីធន់នឹងការបម្រែបម្រួលអាកាសធាតុ និងបង្កើនសុវត្ថិភាពដល់ការធ្វើដំណើរ របស់ប្រជាពលរដ្ឋ។

រយៈពេលនៃការងារស្ថាបនាពង្រីក និងជួសជុលថែទាំផ្លូវជាតិលេខ៤នេះមានរយៈពេល៥ឆ្នាំ ចាប់ផ្តើមពីខែធ្នូ ឆ្នាំ២០២១ និងគ្រោងនឹងបញ្ចប់នៅខែធ្នូ ឆ្នាំ២០២៦។

ក្រសួងបានចាប់ផ្ដើមធ្វើការពង្រីក និងជួសជុលផ្លូវជាតិលេខ៤ ចាប់ពី ឃុំបែកចាន ស្រុកអង្គស្នួល ខេត្តកណ្តាល (គ.ម ១៩ + ៧០០) និងបញ្ចប់ នៅឃុំបិតត្រាំង ស្រុកព្រៃនប់ ខេត្តព្រះសីហនុ (គ.ម ២១៥ + ៨០០)។

ការងារស្ថាបនា និងពង្រីកនេះ រួមមាន ការងារពង្រីកផ្លូវកៅស៊ូបច្ចុប្បន្នពី ទទឹង៧ម៉ែត្រ ទៅទទឹងចាក់កៅស៊ូ១០ម៉ែត ការងារពង្រីកស្ពានបេតុង និងលូ ចំនួន៤៦ទីតាំង និងការងារស្ថាបនាស្ពានថ្មីចំនួន៨ទីតាំង ដើម្បីធានាដល់ការធ្វើចរាចរណ៍គ្រប់រដូវកាល ដែលឆ្នាំខ្លះត្រូវទឹកជំនន់ជន់លិចកំណាត់ផ្លូវជាតិលេខ៤៕

ខេត្តមណ្ឌលគិរីនឹងមានផលិតផលទេសចរណ៍ថ្មី ដោយភ្ញៀវអាចទៅទស្សនាអណ្តូងរ៉ែមាស

ដោយៈគង់ សូរិយា

មណ្ឌលគិរីៈ រដ្ឋបាលខេត្តមណ្ឌលគិរី សហការជាមួយក្រុមហ៊ុនរ៉ុករករ៉ែ Renaissance Minerals Cambodia គ្រោងររៀបចំតំបន់អណ្តូងរ៉ែមាសទៅជាកញ្ចប់ទេសចរណ៍ទៅថ្ងៃអនាគត។

លោកជាក់ ម៉េងហាង អភិបាលរងខេត្តមណ្ឌលគិរីបានមានប្រសា​សន៍ឲ្យដឹងក្នុងកម្មវិធីវឌ្ឍនភាពមូលដ្ឋាន កាលពីថ្ងៃទី២៤ ខែកុម្ភៈកន្លងមកថា

ក្រុមហ៊ុននឹងរៀបចំតំបន់នោះ ជាទេសចរណ៍ ឱ្យដូចនៅក្រៅប្រទេស ដោយនឹងបង្កើតជាកញ្ចប់ទេសចរណ៍តែម្តង។
លោកបន្តថា “កញ្ចប់នេះអាចមានរយៈពេលពី៣ ទៅ៤យប់ ដោយកញ្ចប់ទី១ គឺការទស្សនារមណីយដ្ឋានធម្មជាតិនានា ក្នុងខេត្តមានដូចជាទឹកជ្រោះ ភ្នំជាដើម រីឯកញ្ចប់ទី២ គឺជាការទស្សនាដំណើរការ នៃការចម្រា​ញ់យករ៉ែមាស”៕

ជប៉ុននឹងផ្ដល់ហិរញ្ញប្បទានឥតសំណងដល់កម្ពុជាជាង៤១លានដុល្លារ

ដោយ: ម៉ាលីស

ភ្នំពេញៈ រដ្ឋាភិបាលជប៉ុន នឹងផ្តល់ហិរញ្ញប្បទានឥតសំណងដល់រដ្ឋាភិបាលកម្ពុជា ដើម្បីអនុវត្តគម្រោងចំនួន២ ដែលមានទឹកប្រាក់សរុបប្រមា​ណ៤១លានដុល្លារអាមេរិក។

ពិធីចុះហត្ថលេខាលើលិខិតប្ដូរសារ និងឯកសារពាក់ព័ន្ធ ស្តីពីការផ្តល់ហិរញ្ញប្បទានឥតសំណងរបស់ជប៉ុន នឹងប្រព្រឹត្តទៅនៅថ្ងៃទី២ ខែមីនា ឆ្នាំ២០២២ខាងមុខនេះ ក្រោមវត្តមានលោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេសកម្ពុជា និងលោក MIKAMI Masahiro ឯក​អគ្គរដ្ឋទូតជប៉ុនប្រចាំព្រះរាជាណាចក្រកម្ពុជា។

យោងតាមសេចក្តីប្រកាសព័ត៌មាន ពីក្រសួងការបរទេសកម្ពុជា បានឱ្យដឹងថា គម្រោងទាំងពីរ ដែលនឹងទទួលបានហិរញ្ញប្បទានឥតសំណងនេះ រួមមាន ទី១ ការបោសសម្អាតមីនប្រកប ដោយសមាហរណកម្ម និងស     ង្គ្រោះជនពិការដោយសារមីន ដំណាក់កាលទី២ ដែលមានទឹកប្រាក់ចំនួន ២០០០ លានយ៉េន (ប្រមាណ១៧លានដុល្លារអាមេរិក)។

ទី២ ការពង្រីកប្រព័ន្ធផ្គត់ផ្គង់ទឹកស្អាត នៅខេត្តស្វាយរៀង ដែលមានទឹកប្រាក់ចំនួន២៧៨៦លានយ៉េន (ប្រមាណ២៤លានដុល្លារអាមេរិក)។

ក្រសួងការបរទេស បានលើកឡើងបន្ថែមថា ហិរញ្ញប្បទានឥតសំណ​ង ដែលផ្ដល់ដោយរដ្ឋាភិបាលជប៉ុននេះ នឹងចូលរួមចំណែកយ៉ាងសំខាន់ដល់កិច្ចខិតខំប្រឹងប្រែង របស់រាជរដ្ឋាភិបាលកម្ពុជា ក្នុងការជំរុញការអភិវឌ្ឍសេដ្ឋកិច្ច និង សង្គមកម្ពុជា ព្រមទាំងពង្រឹងបន្ថែមទៀត នូវកិច្ចសហប្រតិ​បត្តិការល្អដែលមានស្រាប់ និងចំណង មិត្តភាពជាប្រពៃណីរវាងប្រទេសទាំងពីរ៕

អ្នកឧកញ៉ាសុខ គង់ស្នើរដ្ឋាភិបាលបន្តគាំទ្រ និងស្វែងរកការវិនិយោគពីអន្តរជាតិដើម្បីអភិវឌ្ឍន៍៍ទីក្រុងបូកគោ

ដោយៈស៊ីវ ម៉េង

កំពតៈ ទីក្រុងបូកគោថ្មី ដែលមានផ្ទៃដីទំហំ៣០,០០០ហហិកតាបាននិងកំពុងសម្រេចបានវឌ្ឍនភាពបណ្តើរៗ ដោយបច្ចុប្បន្នហេដ្ឋារចនាសម្ព័ន្ឋជាច្រើនបាននិងកំពុងសាងសង់ ហើយបុរីជាច្រើនគំរោងកំពុងលក់ជូនអតិថិជន។

អ្នកឧកញ៉ាសុខ គង់ប្រធានក្រុមហ៊ុនសុខាអូតែលបានមានប្រសា​សន៍ឲ្យឲ្យក្រុមអ្នកសារព៌តមានដឹង កាលពីចុងសប្តាហ៍មុនថា យើងបាននិងកំពុងកសាងទីក្រុងថ្មីនេះ ដើម្បីជំរុញការអភិវឌ្ឍន៍សេដ្ឋកិច្ចជាតិ ប៉ុន្តែទំហំចំណាយមានច្រើនណាស់ ដែលទុនវិនិយោគពី១០ទៅ២០ពាន់លានដុល្លារ មិនគ្រប់នោះទេ ហេតុនេះក្រុមហ៊ុនសូមស្នើរដ្ឋាភិបាល បន្តគាំទ្រឲ្យកាន់តតែខ្លាំងក្លាថែមទៀត ដើម្បីក្រុមហ៊ុនមានទឹកចិត្ត ពង្រីកការវិនិយោគកាន់តតែលឿន​ថែមមួយកម្រិតទៀត។

អ្នកឧកញ៉ាបានបន្តថា “បើគ្រាន់តែលុយសំរាប់ចាយ សម្រាប់ការដើរកំសាន្តនៅក្រៅប្រទេសខ្ញុំមានហើយ។ ខ្ញុំមានលុយគ្រប់គ្រាន់សំរាប់ការចូលនិវត្តន៍ ខ្ញុំមិនចាំបាច់ហត់ទេ ព្រោះខ្ញុំចាស់ហើយ ប៉ុន្តែខ្ញុំចង់ទុកមរតកដល់អ្នកជំនាន់ក្រោយ និងចូលរួមអភិវឌ្ឍន៍ប្រទេសជាតិជាមួយរដ្ឋាភិបាល”។ អ្នក​ឧកញ៉ាបន្តថា “យើងត្រូវចំណាយច្រើនណាស់ ពិសេសលើការសាងសង់ផ្លូវជាតិ ដែលតភ្ជាប់ពីក្រុងបូកគោ ទៅកាន់ផ្លូវជាតិលេខ៤ និងតភ្ជាប់ទៅតំបន់យាយម៉ៅពេជ្រនិល ហេតុនេះក្រុមហ៊ុនសូមស្នើឲ្យរដ្ឋាភិបាលបន្តគាំទ្រឲ្យបានកាន់តែខ្លាំងងក្លាថែមទៀត។

អ្នកឧកញ៉ាសុខ គង់ក៏ចង់បានការចូលមកវិនិយោគពីអ្នកវិនិយោគជាតិ ពិសេសអ្នកវិនិយោគអន្តរជាតិ ដើម្បីធ្វើឲ្យទីក្រុងនេះមានការរីកចម្រើនយ៉ាងឆាប់រហ័ស និងសម្រេចបានតាមផែនការមេរបស់ក្រុមហ៊ុន ហើយជនបរទេសក៏មានសិទ្ឋជួលដីបន្តនៅលើភ្នំបូកគោ ពីក្រុមហ៊ុនសុខាអូតែល និងអាចផ្ទេរឈ្មោះទៅរូបវ័ន្តបុគ្គល ឬនិតិបុគ្គល ដែលជួលបន្តនោះនៅក្នុងវិញ្ញាប​នបត្រសម្គាល់សិទ្ឋជួលអចិន្រ្តយ៍។

ជាមួយនឹងសកម្មភាពសាងសង់ហេដ្ឋារចនាសម្ព័ន្ឋ  ពិសេសផ្លូវថ្មីមួយខ្សែចេញពីទទីក្រុងនេះ តភ្ជាប់ទៅកាន់ផ្លូវជាតិលេខ៤ និងទៅកាន់តំបន់យាយម៉ៅ ពេជ្រ និលប្រវែង១២០គីឡូម៉ែត្រ សម្រេចសាងសង់បានជាង៨គីឡូម៉ែត្រហើយ ខណៈបបុរីចំនួនបី ដែលមានផ្ទៃដីរាប់រយហិកតាបាននិងកំពុងលក់ជូនអតិថិជនយ៉ាងជោគជ័យផងដែរ៕

 

ខេត្តកណ្ដាលនិងកំពង់ស្ពឺនឹងក្លាយជាតំបន់ដែលមានសក្ដានុពលខ្ពស់ក្នុងការវិនិយោគដីធ្លី

ដោយៈវឌ្ឍនៈ

ភ្នំពេញៈ ផែនការពង្រីកទីក្រុងភ្នំពេញបាន និងកំពុងធ្វើឱ្យតំបន់ជាយ​ៗក្រុងមួយចំនួន ទទួលបានការអភិវឌ្ឍជាបន្តបន្ទាប់ ក្នុងនោះដែរខេត្តកណ្ដាល និងខេត្តកំពង់ស្ពឺ នឹងក្លាយជាតំបន់ ដែលមានសក្ដានុពលខ្ពស់ និងទទួលបានការអភិវឌ្ឍ ទៅលើវិស័យដីធ្លីច្រើនជាងគេ នៅពេលការពង្រីកទីក្រុងកាន់តែធំ។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីមបានមានប្រសាសន៍ឲ្យដឹងនៅព្រឹកថ្ងៃទី២៨ កុម្ភៈនេះថា ទីផ្សារដីធ្លី នៅតាមបណ្ដាជាយរាជធានីភ្នំពេញ នៅតែបន្តជាសក្ដានុពលខ្ពស់ក្នុងការវិនិយោគ ដែលអ្នកវិនិយោគភាគច្រើន ជាអ្នកវិនិយោគនៅក្នុងស្រុកខណៈគោលនយោបាយរបស់រាជរដ្ឋាភិបាលបាន និងកំពុងពង្រីកសក្ដានុពលនៅក្នុងការអភិវឌ្ឍនេះ ជារង្វង់មូល៣៦០ដឺក្រេ ដែលធ្វើឱ្យដីនៅជាយរាជធានីភ្នំពេញចេះតែធំ។

លោកបន្តថា “តាមគោលនយោបាយរបស់រាជរដ្ឋាភិបាល ក្នុងការអភិវឌ្ឍផ្លូវក្រវ៉ាត់ក្រុងទី២ ទី៣និងទី៤ គឺជាផែនការនៅពេលអនាគត ហើយជាទស្សនផ្ទាល់ខ្លួនរបស់លោក មើលឃើញថាការអភិវឌ្ឍតំបន់ថ្មី ជុំវិញរាជធានីភ្នំពេញ ភាគច្រើនកើតមានឡើងនៅខេត្តកណ្ដាល ខេត្តកំពង់ស្ពឺ និងផ្នែកខ្លះនៃខេត្តកំពង់ចាម”។ លោកបន្តថា ”ប្រភេទដីដែលជាតំបន់ពាណិជ្ជកម្មនឹងមានការអភិវឌ្ឍខ្លាំង នៅជាយក្រុងនឹងអាចងាក ទៅរកខេត្តកំពង់ស្ពឺ និងខេត្តកណ្ដាល ដោយសារតែតំបន់ទាំងពីរនេះ មានភាពងាយស្រួលក្នុងការតភ្ជាប់ទៅកំពង់ផែទឹកជ្រៅក្រុងព្រះសីហនុ និងព្រំដែនកម្ពុជាថៃ ក្នុងការដឹកជញ្ជូនទំនិញចេញចូលប្រទេស”។

លោកច្រឹក សុខនីមបានបន្ថែមថា អ្នកវិនិយោគ ដីធ្លីអាចធ្វើការជ្រើសរើសទីតាំងទាំងនេះ ដើម្បីទុកសម្រាប់អភិវឌ្ឍន៍ ឬលក់បន្តទៅអ្នកអភិវឌ្ឍន៍ ដើម្បីឱ្យគេយកទៅអភិវឌ្ឍន៍បន្ត ដើម្បីបំពេញតម្រូវការអចលនទ្រព្យ ដែលកំពុងមានកំណើនពីមួយឆ្នាំទៅមួយឆ្នាំ ។

ជាមួយគ្នានេះ លោកសន សៀប ស្ថាបនិកនិងជាអគ្គនាយកក្រុមហ៊ុនអចលនទ្រព្យឃី រៀលអ៊ីស្ទេតបានបញ្ជាក់ផងដែរថា អ្នកវិនិយោគដីធ្លីបើចង់បានប្រាក់ចំណេញខ្ពស់ និងឆាប់ គួរងាកទៅតំបន់ដែលឆ្ងាយពីក្រុងបន្តិច ពីព្រោះតំបន់នៅជិតក្រុង ឬកណ្ដាលក្រុងវាបានឡើងខ្ពស់រួចទៅហើយ ។

លោកបន្តថា “ខេត្តកំពង់ស្ពឺ ជាតំបន់ដែលមានសក្ដានុពលខ្ពស់ មួយនៅពេលអនាគតខាងមុខនេះ ហើយតំបន់នេះនឹងក្លាយជាឧស្សាហកម្មដ៏ទាក់ទាញ ខណៈវិនិយោគិនលើវិស័យនេះមួយចំនួន ក៏បានងាកទៅរកតំបន់នៃខេត្តកំពង់ស្ពឺ សម្រាប់ការវិនិយោគរបស់ខ្លួនផងដែរ”៕

ដំណឹងរីករាយៈសម្តេចតេជោបញ្ជាក់ពីលទ្ធផលសំណាកគឺរកឃើញអវិជ្ជមានជំងឺកូវីដ១៩

ដោយៈម៉ាលីស

ភ្នំពេញៈ បន្ទាប់ពីសម្ដេចតេជោ បានប៉ះពាល់ផ្ទាល់ជាមួយអ្នកវិជ្ជមានកូវីដ១៩ កាលពីប៉ុន្មានថ្ងៃមុននោះ សម្ដេចតេជោ ហ៊ុន សែនត្រូវធ្វើតេស្តម្ដងទៀត និងជាលទ្ធផលបានបញ្ជាក់ថា សម្ដេចអវិជ្ជមានកូវីដ១៩ ។

នេះបើតាមអ្វីដែលសម្ដេចតេជោ នាយករដ្ឋមន្រ្តីនៃកម្ពុជាបានសរសេរក្នុងទំព័រ បណ្តាញទំនាក់ទំនងសង្គមរបស់សម្ដេចផ្ទាល់ នៅថ្ងៃរសៀល ថ្ងៃទី ២៨ កុម្ភៈ ២០២២។

សម្ដេចបានបញ្ជាក់ថា “បងប្អូនជនរួមជាតិជាទីគោរពស្រឡាញ់ ក្រោ​យពីការធ្វើតេស្តជាថ្មីម្តងទៀត ខ្ញុំត្រូវបានបញ្ជាក់ថាអវិជ្ជមានកូវីដ.១៩ ហេតុដូចនេះ ខ្ញុំត្រូវបញ្ចប់ការធ្វើចត្តាឡីសក័ និងចេញធ្វើការងារធម្មតាឡើងវិញ សូមជូនបងប្អូនជនរួមជាតិសូមជួបតែ សេចក្តីសុខសេចក្តីចម្រើន”។

កាលពីថ្ងៃទី២៥ កុម្ភៈ ប៉ុន្មានថ្ងៃកន្លងទៅសម្តេច បានប្រកាសធ្វើចត្តាឡីស័ក ខណៈដែលសម្តេចបានមានការពាក់ពន្ធ័ ជាមួយអ្នកមានវីរុសកូវិដ១៩ ដោយសម្តេចធ្វើចត្តាឡីស័ក និងតាមដានសុខភាពមួយរយៈកន្លងមក៕

ដំណឹងល្អ: ស្ថានទូតកម្ពុជាដំបូងប្រចាំសាធារណរដ្ឋតួគីត្រូវបានសម្ពោធជាផ្លូវការហើយ

ដោយ: ម៉ាលីស

ប្រទេសតួគី: វត្តមានដំបូងនៃស្ថានទូតកម្ពុជា ប្រចាំទីក្រុងអង់ការ៉ា សាធារណរដ្ឋទួរគី ត្រូវបានសម្ពោធជាផ្លូវការហើយ កាលពី ថ្ងៃ២៧ ខែកុម្ភៈ ឆ្នាំ២០២២ ម្សិលមិញនេះ។

ពិធីសម្ពោធនេះប្រព្រឹត្តទៅក្រោមអធិបតីភាព លោកឧបនាយករដ្ឋមន្រ្តី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ និងលោក Mevlüt Çavuşoğlu រដ្ឋមន្ត្រីក្រសួងការបរទេសតួគី។

យោងតាមក្រសួងការបរទេស និងសហប្រតិបត្តិការអន្តរជាតិ ឯកអគ្គរាជទូតកម្ពុជាប្រចាំប្រទេសតួគី បច្ចុប្បន្នគឺលោកមាស គឹមហេង ខណៈ ឯកអគ្គរដ្ឋទូតតួគី ប្រចាំកម្ពុជាវិញគឺលោកស្រី Ayda Unlu ។

នៅថ្ងៃដដែលនោះ លោក ប្រាក់ សុខុន បានចូលជួបសម្តែងការគួរសម  Fuat Oktay អនុប្រធានាធិបតីនៃសាធារណរដ្ឋតួកគី និងបានជួបពិភាក្សាការងារជាមួយ លោក Mevlüt Çavuşoğlu និងបានចុះហត្ថលេខាលើកិច្ចព្រមព្រៀងស្តីពី ការជៀសវាងការយកពន្ធទ្វេរដង និងការទប់ស្កាត់ការគេចវេសពីសារពើពន្ធ ទាក់ទងនឹងពន្ធលើប្រាក់ចំណូល និងអនុស្សរណៈនៃការយោគយល់គ្នាស្តីពី កិច្ចសហប្រតិបត្តិការក្នុងពិធីសារ តាមរយៈសន្និសីទវីដេអូ៕