ផ្សារហ៊ុនរបស់ក្រុមហ៊ុនទូទាត់ប្រាក់ចិនហក់ឡើងស្រឺតៗ ខណៈលោកខាងលិចកាត់ផ្ដាច់ពីរុស្ស៊ីចេញពីប្រព័ន្ធ SWIFT

ដោយៈសុខុម

សៀងហៃ: ទីផ្សារហ៊ុននៃបណ្ដាក្រុមហ៊ុនទូទាត់ប្រាក់ របស់ប្រទេសចិន ស្រាប់តែហក់ឡើងស្រឺតៗនៅថ្ងៃច័ន្ទ ទី២៨ កុម្ភៈ នេះ ស្របពេលសហរដ្ឋអាមេរិក និងអឺរ៉ុបកាត់ផ្ដាច់ប្រទេសរុស្ស៊ី ចេញពីប្រព័ន្ធទូទាត់ប្រាក់សកល SWIFT។

ស្ថានភាពនេះ បានធ្វើប្រព័ន្ធទូទាត់ប្រាក់ឆ្លង ប្រទេសរបស់ប្រទេសចិន ទទួលបានផលប្រយោជន៍យ៉ាងធំធេង និងជាឱកាសមាសសម្រាប់ព  ន្លឿនការអភិវឌ្ឍរូបិយប័ណ្ណឌីជីថលរបស់ខ្លួន។ នេះបើយោងតាមការចុះផ្សាយរបស់សារព័ត៌មាន CNA។

ដោយបង្កើនការដាក់ទណ្ឌកម្មលើប្រទេសរុស្ស៊ី ក្រោយបញ្ឆេះសង្គ្រាមចូលឈ្លានពានប្រទេសអ៊ុយក្រែន សហរដ្ឋអាមេរិក និងអឺរ៉ុប បានប្រកាសកាលពីថ្ងៃសៅរ៍ ទី២៦ កុម្ភៈ ថា ពួកគេនឹងកាត់ផ្ដាច់ធនាគារធំៗ របស់រុស្ស៊ី ចេញពីប្រព័ន្ធទូទាត់សកលដ៏សំខាន់ SWIFT ហើយបានប្រកាសពីវិធានការផ្សេងៗទៀត រួមទាំងការបង្អកទុនបម្រុងអន្តរជាតិ របស់ធនាគារកណ្ដា​លរុស្ស៊ី ចំនួន៦៣០ពាន់លានដុល្លារអាមេរិកផងដែរ។

ផ្សារហ៊ុនរបស់បណ្ដាក្រុមហ៊ុនចិន ឈានមុខគេដែលចូលរួមអភិវឌ្ឍហេដ្ឋារចនាសម្ព័ន្ធទូទាត់ សម្រាប់រូបិយប័ណ្ណយ័ន ឌីជីថល រួមមានទាំងក្រុមហ៊ុន Newland Digital Technology Co ក្រុមហ៊ុន Lakala Payment Co និងក្រុមហ៊ុន Client Service International Inc ផងដែរនោះបានហក់ឡើងយ៉ាងខ្លាំង។

លោកDang Congyu អ្នកវិភាគនៅក្រុមហ៊ុនចិន Founder Securities បានលើកឡើងថា ការដាក់ទណ្ឌដោយកាត់ផ្ដាច់ ប្រទេសរុស្ស៊ី ចេញពីប្រព័ន្ធទូទាត់សកល SWIFT “គឺជាព្រឹត្តិការណ៍ដ៏សំខាន់មួយ ដែលមានអំណោយផល ជួយពន្លឿនដំណើរការធ្វើបដិដុល្លារនីយកម្ម (ការឈប់ប្រើប្រាក់ដុល្លារ ជំនួសរូបិយប័ណ្ណជាតិ)”។

អ្នកវិភាគរូបនេះបានបន្ថែមទៀតថា “ទោះបីវាពិបាកនឹងជំនួសប្រព័ន្ធទូទាត់សកល SWIFT ក្នុងរយៈពេលខ្លីយ៉ាងណាក៏ដោយ ក៏ឧប្បត្តិហេតុនេះ ផ្ដល់អត្ថប្រយោជន៍ខ្លាំងណាស់ ចំពោះការធ្វើសកលភាវូបនីយកម្មរបស់រូបិយប័ណ្ណយ័នក្នុងរយៈពេលវែង”៕  Reuters៕

អ្នកឧកញ៉ាកុក អានវិនិយោគស្ថានីយប្រព្រឹត្តិកម្មទឹកស្អាត៣កន្លែងនៅខេត្តព្រះសីហនុ

ដោយៈម៉ាលីស

ព្រះសីហនុៈ អ្នកឧកញ៉ាកកុក អានបាននិងកំពុងវិនិយោគស្ថានីយ៍ទឹកស្អាតនៅខេត្តព្រះសីហនុ ស្របពេលចំនួនប្រជាពលរដ្ឋនិងតម្រូវការប្រើប្រាស់ទឹកស្អាតបានកើនឡើងនៅក្នុងខេត្តមួយនេះ។

លោកទេសរដ្ឋមន្រ្តីចម ប្រសិទ្ធ រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍កាលពីចុងសប្តាហ៍មុន និងលោក គួច ចំរើន អភិបាល នៃគណៈអភិបាលខេត្តព្រះសីហនុ បានអញ្ជើញចុះពិនិត្យប្រព័ន្ធប្រព្រឹត្តកម្មទឹកស្អាត របស់ក្រុមហ៊ុនអាន កូ មានទីតាំងនៅតំបន់ក្បាលឆាយ  ស្ថិតក្នុងសង្កាត់លេខ១ ក្រុងព្រះសីហនុ។

លោកឧកញ៉ា កុក អានអគ្គនាយកក្រុមហ៊ុនទឹកស្អាតអានកូ បានឱ្យដឹងថា បច្ចុប្បន្នក្រុមហ៊ុន មានស្ថានីយ៍ប្រព្រឹត្តិកម្មទឹកស្អាត ចំនួន៣កន្លែង ដោយមានសមត្ថភាពផលិតទឹក ក្នុងមួយថ្ងៃបានចំនួន១៦ម៉ឺនម៉ែត្រគីប ក្នុងនោះទំនប់ទី១ អាចផលិតបាន៤ម៉ឺនម៉ែត្រគីប ទំនប់ទី២ ផលិតបាន៦ម៉ឺនម៉ែត្រគីប និងទំនប់ទី៣ មានសមត្ថភាពផលិតចំនួ៦ម៉ឺនម៉ែត្រគីបក្នុងមួយថ្ងៃ សម្រាប់ចែកចាយប្រើប្រាស់នៅក្នុងខេត្តព្រះសីហនុ។

បច្ចុប្បន្ន ក្រុមហ៊ុនបានអូសបណ្ដាញតភ្ជាប់ ជូនប្រជាពលរដ្ឋ រោងចក្រសហគ្រាសប្រើប្រាស់នៅក្នុងក្រុងព្រះសីហនុ មួយផ្នែកនៃស្រុកព្រៃនប់ និងស្រុកស្ទឹងហាវ ដែលអាចប្រើប្រាស់ទឹកក្នុងរង្វង់ ពី៦ម៉ឺនទៅ៧ម៉ឺនម៉ែត្រគីបក្នុងមួយថ្ងៃ។ ចំពោះមុខទិសដៅបន្ត ក្រុមហ៊ុននឹងខិតខំតបណ្ដាញភ្ជាប់ឱ្យបានច្រើនទូលំទូលាយ ទៅតាមបណ្ដាក្រុងស្រុក រោងចក្រសហគ្រាស ដែលកំពុងមានការអភិវឌ្ឍនថ្មីៗ ដើម្បីឱ្យស្របទៅនឹងកំណើន នៃការអភិវឌ្ឍន៍របស់ខេត្តព្រះសីហនុ។

លោកចម ប្រសិទ្ធក៏បានណែនាំឱ្យ ក្រុមហ៊ុនធ្វើការពង្រីកខ្នងទំនប់បន្ថែម និងធ្វើទំនើបកម្មប្រព័ន្ធផ្គត់ផ្គង់ទឹកស្អាត ព្រមទាំងបន្តពង្រីកការគ្រប់​គ្រងទឹកឱ្យបានកាន់តែច្រើន ខណៈពេលដែលខេត្តព្រះសីហនុ នាពេលបច្ចុប្បន្ន និងទៅអនាគត កំពុងមានការអភិវឌ្ឍន៍ តាមរយៈអ្នកវិនិយោគទុនទាំងជាតិ និងអន្តរជាតិមកបណ្ដាក់ទុន។

លោកបន្ថែមថា ទន្ទឹមនឹងខេត្តព្រះសីហនុ មានការអភិ​វ ឌ្ឍហេដ្ឋារចនាសម្ព័ន្ធល្អស្អាត ប្រព័ន្ធគមនាគមន៍រៀបចំបានរួចរាល់ ក្នុងនោះទាមទារឱ្យក្រុមហ៊ុនផ្គត់ផ្គង់ទឹកស្អាតអានកូ រៀបចំបណ្ដាញប្រព័ន្ធទឹកស្អាតឱ្យបានគ្រប់គ្រាន់តាមតម្រូវការ និងឱ្យក្រុមហ៊ុនបន្តតបណ្ដាញឱ្យបាន ទៅដល់ក្រុងស្រុក ជាពិសេសនៅតំបន់ដែលកំពុងមានការអភិវឌ្ឍន ប្រើប្រាស់គ្រប់គ្រាន់ ដើម្បីឱ្យឆ្លើយតបទៅនឹងស្ថានភាពជាក់ស្ដែង បើគ្មានបណ្ដាញទឹកការអភិ​វ ឌ្ឍន៍ក៏មិនអាចទៅរួចដែរ។

ជាមួយគ្នានេះ លោកគួច ចំរើន អភិបាល នៃគណៈអភិបាលខេត្តព្រះសីហនុ បានលើកឡើងនូវពីរចំនុចសំខាន់ៗ ទី១ គឺការថែរក្សា និងអភិរក្សនូវផ្ទៃរងទឹកភ្លៀងនៅក្នុងតំបន់ក្បាលឆាយ ដោយក្នុងនោះស្នើសុំមន្ទីរបរិស្ថាន ខេត្ត ផ្តល់ផែនទីជូនក្រុមហ៊ុនអានកូ ដើម្បីសហការគ្នាក្នុងការអភិរក្ស និងការពារធនធានធម្មជាតិ និងព្រៃឈើឱ្យបានគង់វង្ស ឱ្យមានការកាប់ទន្ទ្រាន ក៏ដូចជាការលោកលួចសង់លំនៅដ្ឋាន ធ្វើកសិកម្ម ដែលបង្កឱ្យខូចគុណភាពទឹក និងប៉ះពាល់បរិស្ថាន តាមរយៈការប្រើប្រាស់សារជាតិគីមីផ្សេងៗ។

ទី២ ខេត្តព្រះសីហនុត្រូវបានរាជរដ្ឋាភិបាលកម្ពុជា បានកំណត់ជាតំប​ន់​សេដ្ឋកិច្ចពិសេសគំរូពហុបំណង និងជាតារារះនាទិសនារតី ដែលមានចក្ខុវិស័យ វែងឆ្ងាយ អំពីរៀបចំឱ្យខេត្តរបស់យើងក្លាយជា តំបន់ឧស្សាហកម្មធុនធ្ងន់ ទំនើប និងវិទ្យាសាស្ត្រ ដែលរាជរដ្ឋាភិបាលបានរៀបចំផែនការមេ ដើម្បីតម្រង់ទិស នៃការអភិវឌ្ឍន៍ខេត្តព្រះសីហនុ នាពេលអនាគត ជាពិសេ​សផ្លូវ ទឹក និងភ្លើង ត្រូវដើរស្របគ្នាទៅនឹងគោលដៅ នៃការអភិវឌ្ឍន៍ ដើម្បីប្រសិទ្ធភាព នៃរៀបចំផែនការ នៃការផ្គត់ផ្គង់ស្របតាមតម្រូវការនៃការប្រើប្រាស់នៅក្នុងខេត្តព្រះសីហនុ នាពេលបច្ចុប្បន្ន និងទៅអនាគត៕

 

ហេដ្ឋារចនាសម្ព័ន្ធដើរតួនាទីសំខាន់ក្នុងការជំរុញតម្លៃដីធ្លីនិងអចលនទ្រព្យ

ដោយៈវឌ្ឍនៈ

ភ្នំពេញៈការអភិវឌ្ឍហេដ្ឋារចនាសម្ព័ន្ធ គឺមានសារសំខាន់ណាស់ក្នុងការជំរុញកំណើនតម្លៃ និងហាងឆេងដីធ្លី នៅក្នុងប្រទេសកម្ពុជា ជាពិសេសការទាក់ទាញ ដល់ការវិនិយោគពីសំណាក់វិនិយោគិន ក្នុងនិងក្រៅប្រទេស លើការអភិវឌ្ឍអចលនទ្រព្យនានា។

ជាការកត់សម្គាល់ទីណា មានការអភិវឌ្ឍហេដ្ឋារចនាសម្ព័ន្ធកាន់តែច្រើន ទីនោះក៏ទទួលបានការវិនិយោគ និងអភិវឌ្ឍលើអចលនទ្រព្យដីធ្លីនិងសំណង់ជាដើម។

អគ្គនាយិកានៃក្រុមហ៊ុនអចលនទ្រព្យ  PropNex Cambodia អ្នក​ស្រីអាន សុធីតាបានមានប្រសាសន៍ឲ្យដឹងនាព្រឹកថ្ងៃទី២៨ កុម្ភៈនេះថា នៅតំបន់ដែលមានការអភិវឌ្ឍហេដ្ឋារចនាសម្ព័ន្ធ គឺតែងតែទទួលបានការអភិ​វ ឌ្ឍ និងការវិនិយោគពីបណ្ដាវិនិយោគិនក្នុង និងក្រៅប្រទេស ក្នុងនោះ តំបន់ប៉ែកខាងត្បូងរាជធានីភ្នំពេញ យើងឃើញថាមានការអភិវឌ្ឍហេដ្ឋារចនាសម្ព័ន្ធច្រើន ហើយក៏បានឃើញថាតំបន់នោះ មានការអភិវឌ្ឍទៅលើអចលនទ្រព្យជាច្រើនផងដែរ ដូចជាលំនៅឋាន ផ្សារទំនើបផងដែរ ។

លោកស្រីបន្តថា “នៅពេលមានការអភិវឌ្ឍហេដ្ឋារចនាសម្ព័ន្ធ ប្រជាពលរដ្ឋងាយស្រួលក្នុងការធ្វើដំណើរ ងាយស្រួលក្នុងការរស់នៅ និងប្រកបអាជីវកម្ម ដូច្នេះហើយទើបវិនិយោគិន តែងតែសម្លឹងមើលលើតំបន់នោះក្នុងការអភិវឌ្ឍលំនៅឋានសម្រាប់ផ្គត់ផ្គង់ជូនពលរដ្ឋ”។

រាជរដ្ឋាភិបាលបានបណ្ដាក់ទុន លើហេដ្ឋារចនាសម្ព័ន្ធក្នុងមួយឆ្នាំៗ ជាពិសេសលើផ្លូវថ្នល់ ស្ពាន ទូទាំងប្រទេស ជាពិសេសនៅបណ្ដាខេត្តដែលមានសក្ដានុពលមួយចំនួនក្នុងប្រទេសកម្ពុជា ក្នុងនោះដែរឃើញថា ខេត្តពីរបន្ទាប់ពីភ្នំពេញ ទទួលបានការអភិវឌ្ឍហេដ្ឋានរចនាសម្ព័ន្ធ ផ្លូវជាច្រើនខ្សែរួមមាន ខេត្តព្រះសីហនុ និងខេត្តសៀមរាប។ ខេត្តទាំងពីរនេះ ចាត់ទុកជាពោលសេដ្ឋកិច្ចដ៏សំខាន់ បន្ទាប់ពីរាជធានីភ្នំពេញ ដោយមានការចាប់អារ​ម្មណ៍ខ្លាំងពីវិនិយោគិនក្នុងនិងក្រៅប្រទេស ។

លោកស៊ុន ចាន់ថុល ទេសរដ្ឋមន្ត្រី និង រដ្ឋមន្ត្រីក្រសួងសាធារណការនិងដឹកជញ្ជូន បានមានប្រសាសន៍ថា ទោះបីជាកម្ពុជាជួបវិបត្តិនឹងស្ថានភាពកូវីដ១៩ក៏ដោយ ក៏កម្ពុជានៅតែបន្តអភិវឌ្ឍន៍ហេដ្ឋារចនាសម្ព័ន្ធ ជាបន្តបន្ទាប់ ហើយជាលទ្ធផលនៅប៉ុន្មានថ្ងៃខាងមុខនេះ ផ្លូវជាតិលេខ៣ពីភ្នំពេញទៅកំពត នឹងត្រូវដាក់ឱ្យប្រើប្រាស់ជាផ្លូវការ ហើយត្រៀមនឹងបើកការដ្ឋានសាងសង់ផ្លូវច្រើនខ្សែទៀត នៅពេលបន្តបន្ទាប់ ស្របតាមដំណើរការនៃការរីកចម្រើននៃសេដ្ឋកិច្ច៕

ក្រុមហ៊ុនហនុមានអ៊ឺស្ទេត បានប្រកាសគម្រោងដឹអាណាចក្របើកលក់មុនសម្ពោធហើយ

ដោយៈសហការី

ភ្នំពេញៈ ក្រុមហ៊ុនហនុមាន អ៉ីស្ទេត បានប្រកាសគម្រោង ដឹអាណាចក្រ បើកលក់មុនសម្ពោធហើយ សម្រាប់ដំណាក់កាលទី១ យ៉ាងពិសេសបំផុត។ អតិថិជនជាច្រើនបានអញ្ជើញ មកសាកសួរព័ត៌មាន ដោយភាគច្រើនបានចាប់អារម្មណ៍ជម្រើស នៃការបង់ប្រាក់រយៈពេលវែង ដែលមានការបញ្ចុះតម្លៃយ៉ាងពិសេស ដែលនេះជាឱកាសចំណេញទាំងការវិនិយាគ និងការរស់នៅ។

ដោយគម្រោងនេះ ជាគម្រោងទី១ ដូច្នេះក្រុមហ៊ុនបានសម្រិតសម្រាំងយ៉ាងខ្លាំង នូវគំនិតច្នៃប្រឌិតរបស់ក្រុមអ្នកបច្ចេកទេសជាតិ និងអន្តរជាតិ ព្រមទាំងបន្ថែមនូវបរិបទការរស់នៅថ្មី ស្របទៅតាមសម័យកាលចុងក្រោយ។

គម្រោង ដឹអាណាចក្រ មានទំហំរហូតដល់ជាង៣០០ហិកតា ដោយបែងចែកជា៧ផ្នែកធំៗ។ ដោយក្នុងឱកាសការបើកលក់មុនសម្ពោធ នាថ្ងៃទី១៥ ខែកុម្ភៈ នេះ ក្រុមហ៊ុនបានបើកផ្នែកទី១ ជាពិសេសជាមួយទីតាំងល្អៗ មានផ្ទះ៣ប្រភេទ ដូចជាផ្ទះអាជីវកម្ម SOVANN ស្ថិតនៅលើផ្លូវមេ ៣៤ម៉ែត្រ, KONGKEA Grand វីឡាភ្លោះហ្គ្រេន និង KONGKEA  វីឡាភ្លោះ ដែលមានតម្លៃជាង១០ម៉ឺនដុល្លារអាមេរិក ឡើងទៅប៉ុណ្ណោះ! ព្រមទាំងមានលក្ខខណ្ឌបង់ប្រាក់ពិសេស និងងាយស្រួលបំផុត ដែលមានរយៈពេលវែង មិនគិតការប្រាក់ទៀតផង។

ដូច្នេះឱកាសនៃការវិនិយោគ និងការរស់នៅតំបន់សក្តានុពលទិសខាងជើងក្នុងទីក្រុងភ្នំពេញ គឺជាជម្រើសដ៏ល្អបំផុត។បទពិសោធន៍រស់នៅថ្មីបែបនេះ លោកអ្នកនឹងទទួលបាននៅគម្រោង ដឹ អាណាចក្រ ដែលអភិវឌ្ឍន៍ដោយ ក្រុមហ៊ុនហនុមាន អ៉ីស្ទេត ដែលមានទីតាំងស្ថិតតាមបណ្តោយផ្លូវជាតិលេខ៥ ហួសផ្សារព្រែកព្នៅតែ៥នាទីប៉ុណ្ណោះ។

កុំឲ្យឱកាសដ៏ល្អនេះកន្លងផុតទៅ! សូមអញ្ជើញទៅកាន់ការិយាល័យលក់ផ្ទាល់ ដើម្បីទទួលបានកាដូពិសេសផងដែរ។

សម្រាប់ព័ត៌មានបន្ថែមសូមទាក់ទងទូរស័ព្ទ៖ 095 339 339 / 098 339 339 ៕

អ្នកឧកញ៉ាសុខ គង់បង្ហើបពីតម្លៃនិងលក្ខខ័ណ្ឌតម្លៃដីនិងសណ្ឋាគារនៅតំបន់ជ្រោយចង្វារ

ដោយៈ គង់ សូរិយា

 ភ្នំពេញៈ ជាមួយនឹងផែនការដើម្បីប្រមូលទុន យកទៅសាងសង់ទីក្រុងបូកគោថ្មី អ្នកឧកញ៉ាសុខ គង់បានបង្ហើបនូវលក្ខខ័ណ្ឌពិសេសទាក់ទងនឹងតម្លៃដី និងសណ្ឋាគារទំហំ១៣ហិកតានៅតំបន់ជ្រោយចង្វារ។

សហស្ថាបនិក និងជាអគ្គនាយកគេហទំព័រPropertyarea.asia ដែលបានទទួលព៌តមាននេះមកចុះផ្សាយមុនគេ លោកយិន លាងគង់បានមានប្រសាសន៍ឲ្យដឹងកាលពីចុងសប្តាហ៍មុនថា ដើមឡើយការចុះផ្សាយអត្ថបទនេះ គឺសណ្ឋាគារ និងដីនៅទីតាំងខាងលើ គឺលក់ក្នុងតម្លៃ៩០០លានដុល្លារ ប៉ុន្តែព៌តមាននេះ គឺលោកទទួលបានពីសាច់ញាតិរបស់លោកឧកញ៉ា ដែលអ្នកផ្តល់ព៌តមាននេះ បានក្តាប់ព៌តមានមិនច្បាស់។

លោកបន្តថា “ក្រោយពេលខ្ញុំជួបអ្នកឧកញ៉ាផ្ទាល់ ទើបដឹងការពិតដែលគំរោងនេះ ដាក់លក់ក្នុងតម្លៃ១៥០០លានដុល្លារអាមេរិក”។ លោកបន្តថា “វាជាព៌តមាន ដែលមានការចាប់អារម្មណ៍ខ្លាំងណាស់ ពីអ្នកវិនិយោគជាតិ និងអន្តរជាតិ ពិសេសសាធារណៈជននានា”។

អ្នកឧកញ៉ាសុខ គង់ប្រធានក្រុមហ៊ុនសុខាអូតែលបានមានប្រសាសន៍ឲ្យដឹងថា ព៌តមាននេះ ជាព៌តមានពិត ប៉ុន្តែវាជាតម្លៃមួយ ដែលមានក្រុមហ៊ុនមួយចំនួនឲ្យតម្លៃបែបនេះ ហើយបច្ចុប្បន្នមានក្រុមហ៊ុនជាច្រើនកំពុងចាប់អារម្មណ៍ទិញគំរោងនេះ ប៉ុន្តែស្ថិតនៅក្នុងការចចានៅឡើយ។

អ្នកឧកញ៉ាបន្តថា “ការពិតខ្ញុំដាក់លក់គំរោងនេះ ក្នុងតម្លៃ១៥០០លាន​ដុល្លារអាមេរិក ជាតម្លៃមួយអាចជួបជជែកចចារគ្នាបានបន្តទៀត”។ អ្នកឧកញ៉ាបានបន្តថា “ខ្ញុំលក់គម្រោងនេះ ដើម្បីយកទុនទៅវិនិយោគសាងសង់ទីក្រុងបូកគោថ្មី សម្រាប់អ្នកជំនាន់ក្រោយ ព្រោះទីក្រុងថ្មីនេះ ត្រូវចំណាយទុនច្រើនណាស់”។

អ្នកឧកញ៉ាសុខ គង់បានបន្តទៀតថា “តាមពិតខ្ញុំចាស់ហើយ ខ្ញុំមានលុយសំរាប់ដើរកំសាន្តនៅក្រៅប្រទេស ខ្ញុំមិនចាំបាច់ហត់ទេ តែខ្ញុំកសាងទីក្រុងបូកគោ ដើម្បីអ្នកជំនាន់ក្រោយ និងកសាងសេដ្ឋកិច្ចជាតិ”៕

ក្រុមហ៊ុនអាកាសចរណ៍ថៃចាប់ផ្តើមហោះហើរទៅមកបាងកក-សៀមរាបឡើងវិញនៅដើមខែក្រោយនេះ

ដោយៈ លក្ខិណា

ភ្នំពេញៈ តាមការបញ្ជាក់របស់ក្រសួងទេសចរណ៍កម្ពុជា នៅថ្ងៃទី២៧កុម្ភៈ ២០២២កន្លងមកនេះបានឱ្យដឹងថា ក្រុមហ៊ុនអាកាសចរណ៍ Thai Smile របស់ប្រទេសថៃ គ្រោងនឹងចាប់ផ្ដើមដំណើរការហោះហើរឡើងវិញនៅថ្ងៃទី ៣ មីនា ២០២២តទៅ គោលដៅបាងកក សៀមរាប ។

តាមសេចក្ដីប្រកាសពព៌តមាន របស់ក្រសួងទេសចរណ៍កម្ពុជាបានបញ្ជាក់ថា ក្រុមហ៊ុនអាកាសចរណ៍អន្តរជាតិ របស់ប្រទេសថៃមួយនេះនឹងបើកការហោះហើរត្រង់២ជើងក្នុង១សប្តាហ៍។

ក្រសួងទេសចរណ៍ក៏បានអំពាវនាវ ដល់សមាគមទេសចរណ៍ ប្រតិបត្តិករទេសចរណ៍ និងសាធារណជនបន្តចូលរួមផ្សព្វផ្សាយ ក៏ដូចជាជំរុញទេស​ចរអន្តរជាតិ មកកាន់គោលដៅទេសចរណ៍ខេត្តសៀមរាប ដែលជាគោលទេសចរណ៍វប្បធម៌ និងប្រវត្តិសាស្រ្តដ៏សំខាន់បំផុតមួយរបស់កម្ពុជា។

សេចក្ដីប្រកាសរបស់ក្រសួងទេសចរណ៍កម្ពុជាបានបង្ហាញថា ដោយអត្រានៃការចាក់វ៉ាក់សំាងការពារជំងឺកូវីដ-១៩ ទូទំាងប្រទេសកម្ពុជា សម្រេ​ចបានប្រមាណជាង៩០% នៃចំនួនប្រជាជនសរុប១៦លាននាក់ គិតត្រឹមថ្ងៃទី២៥ ខែកុម្ភៈ ឆ្នាំ២០២២ និងការអនុវត្តវិធានសុវត្ថិភាពបានយ៉ាងល្អ កម្ពុជា គឺជាគោលដៅទេសចរណ៍សុវត្ថិភាព និងបានបើកទទួលទេសចរអន្តរជាតិ ដោយមិនតម្រូវឱ្យធ្វើចត្តាឡីស័ក ក្នុងករណីអ្នកដំណើរពិនិត្យឃើញអវិជ្ជមានកូវីដ-១៩ ពេលមកដល់កម្ពុជា ។

លោកស៊ីន ចាន់សិរីវុត្ថា អ្នកនាំពាក្យរដ្ឋលេខាធិការអាកាសចរស៊ីវិលកម្ពុជាបានឱ្យដឹងផងដែរថា រហូតមកដល់ពេលនេះ មេរោគរាតត្បាតនៃកូវីដ១៩ប្រភេទថ្មី អូមីក្រុង មិនទាន់ធ្វើឱ្យប៉ះពាល់ដល់ការមកដល់ នៃអ្នកដំណើរមកពីបរទេសនៅឡើយទេ។ លោកបន្តថា ចំនួនអ្នកដំណើរមកពីបរទេសចូលមកកម្ពុជា ចាប់តាំងពីរាជរដ្ឋាភិបាលកម្ពុជា បានបើកប្រទេសឡើងវិញបានកើនឡើង រហូតដល់មានការផ្ទុះនូវមេរោគកូវីដ១៩ប្រភេទ អូមីក្រុង ។

លោកបន្តថា “នៅក្នុងពេលកម្ពុជារកឃើញ វត្តមានមេរោគកូវីដ១៩ប្រភេទ អូមីក្រុង ក៏ចំនួនអ្នកដំណើរបរទេស ចូលមកម្ពុជានៅតែមានចំនួនថេរ មិនកើនឡើងហើយក៏មិនថយដែរ”៕

អ្នកនិពន្ឋខ្មែរម្នាក់បញ្ចេញទស្សនទាក់ទងនឹងសង្រ្គាមរវាងរុស្ស៊ី និងអ៊ុយក្រែន

ដោយៈម៉ី សនសុធារី

ភ្នំពេញៈ យុគសម័យមួយ ដែលម្នាក់ៗហាក់នៅឱ្យតម្លៃខ្លាំង និងរំពឹងខ្ពស់ពីអំណាចលោកខាងលិច ជឿលើសាច់ដុំកម្លាំងសហរដ្ឋអាមេរិក ពេលនេះកំពុងហារមាត់ឆ្ងល់ថា ជាមួយភ្នក់ភ្លើងបង្កាត់ដោយរុស្ស៊ីនៅអ៊ុយក្រែន អ្វីទៅជាឆ្លើយតបត្រឡប់ពី “អាមេរិក”?។

ទិដ្ឋភាពនយោបាយ ដែលចោមព័ទ្ធដោយសង្គ្រាម ប្រដាប់អាវុធថ្មីបំផុ​តនេះ បានបកអាក្រាតបណ្តើរៗ អំពីធាតុពិតក្នុងពិភពប្រកួតប្រជែងជ្រាលជ្រៅរវាងពួកមហាអំណាច។

សំណួរជាច្រើន គឺតើអាមេរិកនឹងលូកដៃទៅកូរជម្លោះឆ្ងាយៗ ដូចជាអ៊ុយក្រែននេះ តាមលំនាំសង្គ្រាមឆ្នាំ១៩៩០ នៅអ៉ីរ៉ាក់ទៀតដែរទេ? អ្នកខ្លះថា ទេ! ដោយសារកិត្យានុភាពរបស់យក្សចិន អាមេរិកពេលនេះ ផ្តោតការយកចិត្តទុកដាក់ធ្ងន់មកលើ Indo-Pacific (ឥណ្ឌូប៉ាស៊ីហ្វិក) ជាង។

គិតបកក្រោយបន្តិច នៅឆ្នាំ១៩៩០ដែល អ៊ីរ៉ាក់បានឈ្លានពានគុយវ៉ែត សហរដ្ឋអាមេរិក និងសម្ព័ន្ធមិត្តបានធ្វើអន្តរាគមន៍ ខុសពីពេលនេះឆ្ងាយ ឬមួយថា សង្គ្រាមនៅអាហ្វហ្គានីស្ថាន អ៉ីរ៉ាក់ ទំនងជាបានធ្វើឱ្យអាមេរិករសាយចិត្តនឹងសង្គ្រាម ធុញទ្រាន់នឹងការជាប់ពាក់ព័ន្ធ ជាមួយជម្លោះបរទេ​សហើយដឹង?។

គួរកត់សម្គាល់ថា ដំណើរផ្សងព្រេងដ៏ធំ និងក្តារអុកចុងក្រោយ១របស់ វ្លាឌីមៀ ពូទីនពេលនេះ បានហ្រ្វីនូវពាក្យព្រមានចំៗ ហាមមិនឱ្យមានអ្នកទីបីមកជ្រៀតជ្រែកជួយអ៊ុយក្រែន ជាមួយឃ្លាញាក់សាច់បញ្ជាក់ថា “អ្នកនោះនឹងបង់តម្លៃមួយ ធំមិនធ្លាប់មានក្នុងប្រវត្តិសាស្រ្ត ប្រសិនលូកដៃ”។ នេះហើយជាមូលហេតុធំពីក្រោយ ការតស៊ូយ៉ាងឯកោរបស់ក្រុងគៀវ។

ជូនអ្នកដែលរង់ចាំប្រតិកម្មពីអាមេរិក!
ឧទាហរណ៍ងាយយល់មួយជូនប្អូនៗជាហ្វេនរបស់ខ្ញុំ ពីភាពខុសគ្នារវាងស្ថានភាព ឆ្នាំ១៩៩០-៩១ និង ២០២២ នេះគឺមិនមែនស្អីទាំងអស់ ក្រៅពី “អាវុធប្រល័យលោក” ត្រូវហើយគឺ នុយក្លេអ៊ែរ ប្អូន! មេដឹកនាំល្បីរន្ទឺ សាដាម ហ៊ូសេន ខ្លាំងមែន តែគាត់មិនមានអាវុធនុយក្លេអ៊ែរទេ ឯ វ្ល៉ាឌីមៀ ពូទីន ពេលនេះមានប្រហែល ជាង៥ពាន់ជិត៦០០០នុយក្លេអ៊ែរ ( I-news/UK )។ នេះហើយមូលហេតុចម្បង ដែលអាមេរិកនិងសម្ពន័មិត្ត មិនអាចកម្រើកដៃ។

សង្គ្រាមលោកលើកថ្មីមួយ ដែលឮហើយព្រឺ (សម្រាប់យើងជាអ្នកស្រ​លាញ់សន្តិភាព) គឺអាចថា នៅកៀកៗនឹងការចង់បាន របស់អ្នកមួយចំនួន ដែលចង់ឃើញ ការជ្រៀតជ្រែករបស់លោកខាងលិច ទៅក្នុងសង្គ្រាមនៅអ៊ុយក្រែន។
មកទល់ពេលនេះម៉ោងនេះ ពិភពលោកនៅតែបន្តព្រួយបារម្ភជាសកល អំពីលទ្ធភាព នៃការប្រឈមមុខដាក់គ្នារវាងរុស្ស៊ី និងសហរដ្ឋអាមេរិក ខណៈអ្នកវិទ្យាសាស្ត្រនិយាយថា មហាអំណាចពីរនេះ មានក្បាលគ្រាប់នុយក្លេអ៊ែរ ស្មើ៩០ភាគរយ នៃនុយក្លេអ៊ែរសរុបលើពិភពលោក។

នុយក្លេអ៊ែ គឺជាអាវុធប្រល័យលោក ដែលត្រូវបានមនុស្សជាតិបង្កើតឡើង ក្នុងគោលដៅបំផ្លាញមនុស្សលោកខ្លួនឯង ក្នុងល្បឿនយ៉ាងឆាប់រហ័សនិងមហន្តរាយ។ ហានិភ័យ នៃជម្លោះរវាងពួកមហាអំណាច ដែលមានអាវុធនុយក្លេអ៊ែរ គឺធំធេងលើសអ្វីដែលយើងដឹង។

ទាំងសហរដ្ឋអាមេរិក និងរុស្ស៊ី មានសមត្ថភាពវាយប្រហារ “Nuclear Triad” ដោយយន្តហោះទម្លាក់គ្រាប់បែក នុយក្លេអ៊ែរ នាវាមុជទឹកបំពាក់ដោយកាំជ្រួចនុយក្លេអ៊ែរ និងកាំជ្រួចមីស៊ីលនៅលើដីផ្ទាល់។

ប្រការនេះហើយ ដែលគួរគិតឡើងវិញថា ទន្ទឹមនឹងពេលដែលគ្មានអ្នកណាដឹងពីលទ្ធផលចុងក្រោយថាអាមេរិក ឬរុស្ស៊ីដែលនឹង ឈ្នះសង្គ្រាមនុយក្លេអ៊ែរ រឿងប្រាកដដែលយើងដឹង គឺពេលដែលពួកគេបើកបេសកកម្មស្លាប់រស់បំផ្លាញមូលដ្ឋានយោធាសំខាន់ៗ និងមជ្ឈមណ្ឌលសេដ្ឋកិច្ចគ្នា ទៅវិញទៅមក អ្វីទៅជាលទ្ធផលសម្រាប់លោកមួយនេះ។

គ្រប់គ្នានឹងចាញ់ រួមទាំងប្រទេសផ្សេងៗដែលមិនពាក់ព័ន្ធផង។

ការបញ្ចប់សង្គ្រាមនៅអ៊ុយក្រែន ដោយគ្មានការលូកដៃពីលោកខាងលិចនៅតែជាជម្រើសឈ្នះ ! គួរមិនគួរ ខុសចិត្ត ខុសការយល់ឃើញ សូមអធ្យាស្រ័យ៕

ដំណឹងល្អៈសម្តេចតេជោបានចារលើទីតាំងដែលត្រូវសាងសង់ស្ពានមិត្តភាពកម្ពុជា កូរ៉េរួចហើយ

ដោយៈស៊ីវ ម៉េង

ភ្នំពេញៈ សម្តេចតេជោហ៊ុន សែននាយករដ្ឋមន្រ្តីនៃកម្ពុជាបានចារយល់ព្រមឲ្យមានការសាងសង់ស្ពាន និងទីតាំងស្ពានមិត្តភាពកម្ពុជា កូរ៉េរួចហើយ។

ប្រភពព៌តមានពីមន្រ្តីជាន់ខ្ពស់រដ្ឋាភិបាល បានឲ្យដឹងកាលពីរសៀល​ថ្ងៃទី២៦ កុម្ភៈនេះថា ការសាងសង់ស្ពាននេះ ជាស្ពានយោងដោយខ្សែកាប ដូចការលើកឡើង របស់​ឯកអគ្គ​រដ្ឋទូតកូរ៉េកាលពីពេលថ្មីៗនេះ។ ស្ពាននេះ តាមគំរោងនឹងឆ្លងកាត់ទន្លេចំនួនពីរ ប៉ុន្តែវាជាគម្រោងតែមួយ ដែលនឹងជួយលើកកំពស់សោភ័ណភាព និងមុខមាត់រាជធានីភ្នំពេញ។

ទោះជាយ៉ាងណាមន្រ្តូដដែល មិនទាន់បង្ហើបឲ្យបានដឹងពីទីតាំងជាក់លាក់នោះទេ​ដោយសារគម្រោងនេះ ត្រូវបានបង្ហើបឲ្យដឹងត្រឹមកម្រិតមន្រ្តីជាន់ខ្ពស់នៅឡើយ។

ស្ពានមិត្តភាពកម្ពុជា កូរ៉េ ត្រូវបានលើកសំណើរដោយសម្តេចតេជោហ៊ុន សែននាយករដ្ឋមន្រ្តីនៃកម្ពុជា អំឡុងពេលសម្តេចអញ្ជើញទស្សនកិច្ចនៅសាធារណៈរដ្ឋកូរ៉េកាលពីប៉ុន្មានឆ្នាំមុន។

លោក ​Park Heung-kyeong​ ឯក​អគ្គរដ្ឋទូត​សាធារណរដ្ឋ​កូរ៉េប្រចាំកម្ពុជា បានមានប្រសាសន៍ឲ្យដឹងអំឡុងពេលលោក អញ្ជើញចូលរួមស្តារនិងសាងសង់ផ្លូវជាតិលេខ៤៨ ជាមួយសម្តេចតេជោកាលពីពេលថ្មីៗនេះថា
ពេលថ្មីៗនេះថា ក្រុមហ៊ុនកូរ៉េមួយបានសិក្សា គំរោងសាងសង់ស្ពានមិត្ត​ភាពកម្ពុជា កូរ៉េរួចហើយ ដោយបច្ចុប្បន្នកំពុងដាក់សំណើរ ជ្រើសរើសទីតាំងពីរដ្ឋាភិបាលកម្ពុជា។

លោកបន្តថា “ស្ពានមិត្តភាពកម្ពុជា កូរ៉េនឹងជ្រើសរើសយកគំរោងស្ពានយោងដោយខ្សែកាប ដែលវានឹងជួយលើកកំពស់សោភ័ណភាព និងជា Landmark មួយនៃទីក្រុងភ្នំពេញ។ លោកបន្តថា “ស្ពាននេះនឹងចូលរួមទាក់ទាញភ្ញៀវទេសចរណ៍កូរ៉េ មកទស្សនានៅរាជធានីភ្នំពេញបន្ថែមទៀតផងដែរ”៕

ក្រុមហ៊ុនអចលនទ្រព្យចិន Evergrande បង្ខំចិត្តលក់គម្រោងលំនៅដ្ឋានធំចំនួន៤ឱ្យទៅក្រុមហ៊ុនរដ្ឋចិន

ដោយៈសុខុម

ហុងកុង: ក្រុមហ៊ុន China Evergrande Group បានប្រកាសកាលពីថ្ងៃសុក្រ ទី២៥ កុម្ភៈ ថា ខ្លួនបានលក់ភាគហ៊ុន និង “សិទ្ធិរ៉ាប់រងបំណុល” ក្នុងគម្រោអភិវឌ្ឍន៍ចំនួន៤ឱ្យទៅក្រុមហ៊ុនរដ្ឋចិន ចំនួន២ក្នុងតម្លៃសរុបជាង៣៣៧លានដុល្លារអាមេរិក។

ការលក់គម្រោងទាំងនេះ គឺដើម្បីធានាថា ដំណើរការសាងសង់ក្នុងគម្រោងទាំងនេះ នៅតែអាចដំណើរការទៅមុខ ដោយគ្មានការរាំងស្ទះ និងដើម្បីឱ្យគម្រោងផ្សេងៗទៀតរបស់ខ្លួន អាចប្រគល់លំនៅដ្ឋានជូនអតិថិជនទាន់ពេលវេលាផងដែរ។

ក្រុមហ៊ុនអភិវឌ្ឍន៍អចលនទ្រព្យ Evergrande ដែលជំពាក់បំណុលច្រើនជាងគេបំផុតរបស់ពិភពលោក ជាមួយនឹងបំណុលគរដូចភ្នំរហូតដល់ទៅជាង៣០០ពាន់លានដុល្លារអាមេរិក កំពុងប្រឹងប្រែងទាំងត្រដាបត្រដួសដើម្បីបញ្ចប់គម្រោងនានា ជាពិសេសគម្រោងលំនៅដ្ឋានរបស់ខ្លួន ដែលក្រុមអ្នកបង្កើត គោលនយោបាយរបស់ប្រទេសចិន ចាត់ទុកជាអាទិភាពដ៏សំខាន់មួយដើម្បីធានាស្ថិរភាពសង្គម។

ក្រុមហ៊ុន Evergrande អះអាងថា ខ្លួនបានលក់ភាគហ៊ុន និងសិទ្ធិរ៉ាប់រងបំណុលក្នុងគម្រោងចំនួន៤ ឱ្យទៅក្រុមហ៊ុនរដ្ឋចិនចំនួន២ គឺក្រុមហ៊ុន Everbright Trust និងក្រុមហ៊ុន Minmetals Trust ក្នុងតម្លៃសរុបជាង៣៣៧លានដុល្លារអាមេរិក។ គម្រោងទាំងនោះមាន ដូចជា ក្នុងទីក្រុងឆុងឈីង (Chongqing) ក្រុងតុងគ័ន (Dongguan ក្រុងហ្វូសាន (Foshan) និងក្រុងគ័ងចូវ ឬ ក្វាងចូវ (Guangzhou)។

“សិទ្ធិរ៉ាប់រងបំណុល” មានន័យថា ម្ចាស់ថ្មីនៃគម្រោងទាំងនេះ ត្រូវរ៉ាប់រងបន្ត ចំពោះការសងបំណុលដែលគម្រោងជំពាក់។ ក្រុមហ៊ុនរដ្ឋដែលទិញយកទាំងនេះ គឺជាផ្នែកមួយនៃអ្វីដែលគេហៅថា វិស័យធនាគារស្រមោ​លរបស់ប្រទេសចិន។

ក្រុមហ៊ុនរដ្ឋចិន ដែលទិញយកគម្រោងទាំងនេះ នឹងជាអ្នកទទួលខុសត្រូវចំពោះការសាងសង់ និងការប្រគល់លំនៅដ្ឋានជូនពលរដ្ឋ ជាអ្នកទិញ ហើយប្រាក់ចំណូល ដែលសេសសល់ពីការលក់អចលនទ្រព្យ នឹងត្រូវប្រើប្រាស់ ដើម្បីទូទាត់សងដើមទុនដំបូងដែលក្រុមហ៊ុន Evergrande បោះទុន៕ Reuters៕

តើការកាត់ផ្តាច់ប្រព័ន្ឋទូទាត់ប្រាក់សកល (SWIFT) របស់អាមេរិកលើរុស្ស៊ីនឹងបង្កផលវិបាកបែបណាដល់រុស្ស៊ី

ដោយៈសុខុម

វ៉ាស៊ីនតោន: ក្នុងចំណោមទណ្ឌកម្មនានាប្រឆាំងរុស្ស៊ី ចំពោះការបញ្ឆេះសង្គ្រាមចូលឈ្លានពាន ប្រទេសអ៊ុយក្រែន គេមើលឃើញថា ប្រព័ន្ធផ្ទេរប្រាក់ ឬទូទាត់ប្រាក់អន្តរជាតិ SWIFT គឺជាទម្រង់ទណ្ឌកម្មដ៏ធ្ងន់ធ្ងរបំផុតមួយដែលអាមេរិក និងសម្ព័ន្ធមិត្តមិនចង់ប្រើប្រាស់ ព្រោះវាស្មុគស្មាញ និងមានផលប៉ះពាល់ខ្លាំង ប៉ុន្តែពេលនេះលែងមានជម្រើសទៀតហើយ។

ប៉ុន្តែទីបំផុត សហរដ្ឋអាមេរិក អង់គ្លេស អឺរ៉ុប និងកាណាដា កាលពីថ្ងៃសៅរ៍ ទី២៦ កុម្ភៈ បានបង្ខំចិត្តចាត់វិធានការកាត់ផ្ដាច់ប្រទេសរុស្ស៊ី ចេញពីប្រព័ន្ធទូទាត់អន្តរជាតិ SWIFT ដែលជាប្រព័ន្ឋទូទាត់សាច់ប្រាក់ដ៏សំខាន់នៅលើពិភពលោក។ នេះគឺជាផ្នែកមួយនៃការដាក់ទណ្ឌកម្មជុំថ្មីមួយទៀតលើរដ្ឋាភិបាលក្រុងមូស្គូ នៅពេលរុស្ស៊ី នៅតែបន្តវាយសម្រុកទៅលើអ៊ុយក្រែន។ នេះបើយោងតាមសារព័ត៌មាន CNA ចុះផ្សាយកាលពីថ្ងៃអាទិត្យ ទី២៧ កុម្ភៈ។

បណ្តាប្រទេសទាំងនេះ បានចេញសេចក្តីថ្លែងការណ៍រួមថា វិធានការទាំងនេះ ដែលនឹងរួមបញ្ចូលទាំងការរឹតបន្តឹង លើទុនបម្រុងអន្តរជាតិរបស់ធនាគារកណ្តាលរុស្ស៊ីផងដែរនោះ នឹងត្រូវអនុវត្តន៍នៅប៉ុន្មានថ្ងៃខាងមុខនេះ ហើយក៏បានប្ដេជ្ញាចាត់វិធានការប្រឆាំងរុស្ស៊ី បន្ថែមទៀតផងដែរ។

បណ្ដាមេដឹកនាំនៃគណៈកម្មការអឺរ៉ុប បារាំង អាល្លឺម៉ង់ អ៉ីតាលី អង់​ គ្លេស កាណាដា និងសហរដ្ឋអាមេរិក បានលើកឡើងក្នុងសេចក្ដីការណ៍នោះថា “យើងនឹងចាប់ឱ្យរុស្ស៊ី ទទួលខុសត្រូវ ហើយយើងនឹងរួមគ្នាជាធ្លុងមួយដើម្បីធានាថា សង្រ្គាមនេះ (សង្គ្រាមនៅអ៊ុយក្រែន) គឺជាការបរាជ័យផ្នែកយុទ្ធសាស្រ្តសម្រាប់ ពូទីន”។

មេដឹកនាំទាំងនេះ បានលើកឡើងបន្ថែមទៀតថា “លើសពីវិធានការដែលយើងកំពុងប្រកាសនៅថ្ងៃនេះ យើងក៏ត្រៀមចាត់វិធានការបន្ថែមទៀតដែរដើម្បីចាប់ឱ្យរុស្ស៊ី ទទួលខុសត្រូវ ចំពោះការវាយប្រហាររបស់ខ្លួនលើប្រទេសអ៊ុយក្រែន”។

ចំណាត់ការថ្មីនេះធ្វើឡើង បន្ទាប់ពីសហរដ្ឋអាមេរិក និងបណ្ដាសម្ព័ន្ធមិត្តរបស់ខ្លួនកាលពីសប្តាហ៍កន្លងទៅ បានដាក់ទណ្ឌកម្មលើធនាគារធំៗរបស់រុស្ស៊ី ក៏ដូចជា លើប្រធានាធិបតីរុស្ស៊ី លោក វ្លាឌីមៀ ពូទីន ដោយផ្ទាល់ផងដែរ ខណៈកងកម្លាំងរបស់ក្រុងមូស្គូ បានបន្តធ្វើការវាយប្រហាររុលចូលកណ្ដាលរដ្ឋធានីគៀវ ដែលជាបេះដូងនៃប្រទេសអ៊ុយក្រែន។

វិធានការទាំងនេះធ្វើឡើង ដើម្បីរារាំងលោក ពូទីន ពីការប្រើប្រាស់ថវិ​ការហូតដល់ទៅ៦៣០ពាន់លានដុល្លារអាមេរិក ដែលមាននៅក្នុងទុនបម្រុងអន្តរជាតិរបស់ធនាគារកណ្ដាលរុស្ស៊ី ដើម្បីឆ្លើយតបទៅនឹងសង្គ្រាមចូលឈ្លានពានប្រទេសអ៊ុយក្រែន។

ការកាត់ផ្ដាច់ធនាគារនានារបស់ប្រទេសរុស្ស៊ី ចេញពីប្រព័ន្ធ SWIFT គឺជាការវាយប្រហារយ៉ាងធ្ងន់ធ្ងរ ទៅលើពាណិជ្ជកម្មរុស្ស៊ី ហើយវានឹងធ្វើឱ្យបណ្ដាក្រុមហ៊ុនរុស្ស៊ី ជួបការលំបាកកាន់តែខ្លាំង នៅក្នុងការធ្វើពាណិជ្ជកម្ម។ ក្នុងមួយឆ្នាំៗ ប្រាក់ជាច្រើនទ្រីលានដុល្លារអាមេរិក ត្រូវបានផ្ទេរ ឬទូទាត់ដោយប្រើប្រាស់ប្រព័ន្ធ SWIFT។

មន្ត្រីជាន់ខ្ពស់មួយរូបនៃរដ្ឋាភិបាលអាមេរិក បានអះអាងថា “រដ្ឋាភិបាលរបស់ពូទីន នឹងត្រូវបានកាត់ផ្ដាច់ចេញ ពីប្រព័ន្ធហិរញ្ញវត្ថុអន្តរជាតិ”៕ Reuters៕