ដោយៈ សុផារី

ពោធិ៍សាត់ៈ លោក ចម ប្រសិទ្ធ រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានថ្លែងថា បច្ចុប្បន្ននេះ ខេត្តពោធិ៍សាត់មិនមែនគ្រាន់តែជាតំបន់កសិកម្ម និងនេសាទដូចកាលពីអតីតកាលនោះទេ ប៉ុន្តែបានក្លាយទៅជាច្រកសំខាន់មួយ នៃការធ្វើពាណិជ្ជកម្មជាមួយប្រទេសជិតខាង។

លោកក៏បានអះអាងថា ពោធិសាត់ ក៏ជាខេត្តមានសក្តានុពលខាងឧស្សាហកម្ម និងកសិ-ឧស្សាហកម្មផងដែរ។
រដ្ឋមន្ត្រីបានថ្លែងយ៉ាងនេះ ក្នុងឱកាសប្រារព្ធពិធីសម្ពោធដាក់ឱ្យប្រើប្រាស់ជាផ្លូវការអគាររដ្ឋបា លរបស់មន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ខេត្តពោធិ៍សាត់ នៅថ្ងៃទី១៥ ខែធ្នូនេះ។

លោកបានមានប្រសាសន៍ថា “តាមរយៈគម្រោង របស់រាជរដ្ឋាភិបាល ខេត្តនេះ នឹងភ្ជាប់ការដឹកជញ្ជូនផលិតផលទំនិញ និងការបង្កើតលំហូរទេស​ចរណ៍ ជាមួយខេត្តបាត់ដំបង កោះកុង និងព្រំដែនថៃ និងតភ្ជាប់ជាមួយខេត្តព្រះសីហនុដែលមានកំពង់ផែ ទឹកជ្រៅផងដែរ”។

លោកបន្ថែមថា ខេត្តអាចទាញយកអត្ថប្រយោជន៍នេះ ដើម្បីពង្រីកសក្តានុពល សេដ្ឋកិច្ចក្នុងខេត្តដែលមានស្រាប់ មានដូចជាដំណាំកសិ-ឧស្សា​ហកម្ម មានដូចជា ដំឡូងមី ស្វាយកែវរមៀត ស្វាយចន្ទីរ ពោត អំពៅ សណ្តែកសៀង និងកៅស៊ូ។ល។ បន្ថែមលើផលិតផលស្រូវ និងជលផល។

លោកចម ប្រសិទ្ឋបានបញ្ជាក់ថា រាជរដ្ឋាភិបាលបាន និងកំពុងបើកច្រកទីផ្សារដ៏ធំ ក្នុងការនាំចេញផលិតផលកសិកម្មទៅប្រទេសចិន ដែលនេះក៏ជាឱកាសល្អមួយសម្រាប់ខេត្តនេះ ហើយនឹងត្រៀមបើកចំហទីផ្សារជា​មួយសាធារណរដ្ឋ កូរ៉េនៅពេលខាងមុខ តាមរយៈកិច្ចព្រមព្រៀងពាណិជ្ជកម្មសេរី កម្ពុជា-កូរ៉េ។ ហេតុដូច្នេះ ការពង្រឹង ផលិតផលក្នុងស្រុករបស់ខេត្តសម្រាប់បម្រើឱ្យការនាំចេញ គឺជាការចាំបាច់និងចំសភាពការណ៍។

ជាមួយគ្នានេះ លោកបានស្នើដល់រដ្ឋបាលខេត្ត ក្រុង ស្រុក និងគ្រប់អង្គភាពពាក់ព័ន្ធ យកចិត្តទុកដាក់ ក្នុងការអនុវត្តកិច្ចសម្រួលពាណិជ្ជកម្ម និងការបម្រើសេវាសាធារណៈឱ្យកាន់តែល្អ កាន់តែមានភាព ទាក់ទាញដល់អ្នកវិនិយោគ និងធុរជនក្នុងនិងក្រៅប្រទេស ស្របពេលដែលច្បាប់ស្តីពីវិនិយោគ (ជា ច្បាប់ថ្មី ជំនួសឱ្យច្បាប់ចាស់) ត្រូវបានប្រកាសឱ្យប្រើដោយព្រះរាជក្រមរួចហើយ។

រាជរដ្ឋាភិបាលបានដាក់ចេញនូវយុទ្ធសាស្ត្រ ស្តារសេដ្ឋកិច្ចឡើងវិញក្រោយវិបត្តិកូវីដ-១៩។ ផែនការស្តារសេដ្ឋកិច្ចឡើងវិញ ពីវិបត្តិកូវីដ-១៩សម្រាប់ឆ្នាំ២០២១-២០២៣ គឺដើម្បីប្រែក្លាយវិបត្តិនៃជំងឺកូវីដ-១៩ ទៅជាកាលានុវត្តភាព តាមរយៈការកែទម្រង់កាន់តែស៊ីជម្រៅ សំដៅកសាងប្រព័ន្ធសេដ្ឋកិច្ច និងសង្គម កាន់តែរឹងមាំ និងមានភាពធន់ទៅនឹងវិបត្តិនាពេលអនាគត។

នាពេលថ្មីៗនេះ ខេត្តពោធិ៍សាត់ ទទួលបានសមិទ្ធផលសំខាន់ថ្មីពីរទៀត គឺទី១ អគាររដ្ឋបាលរបស់មន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ខេត្តពោធិ៍សាត់ បានកើត ជារូបរាងឡើងថ្មីសន្លាង ក្រោមការឧបត្ថម្ភគាំទ្រថវិកា ពីរាជរដ្ឋាភិបាលកម្ពុជា តាមរយៈក្រសួងសេដ្ឋកិច្ច និងហិរញ្ញវត្ថុ និងទី២ ការបើកការដ្ឋានគម្រោងពង្រីក សមត្ថភាពប្រព័ន្ធផ្គត់ផ្គង់ទឹកស្អាត នៅទីរួមខេត្តពោធិ៍សាត់ ដែលត្រូវប្រើប្រាស់ ទឹកប្រាក់ប្រមាណ ២២លានដុល្លាអាមេរិក ជាមួយនឹងសមត្ថភាពផ្គត់ផ្គង់ ទឹកស្អាត៦.៦០០ម៉ែត្រគូប/ថ្ងៃ រួមទាំងបណ្តាញទុយោចែកចាយជិត ៨០គីឡូម៉ែត្រ ក្រោមហិរញ្ញប្បទានឥតសំណងរបស់រដ្ឋាភិបាលជប៉ុន៕

ដោយៈសុខុម

ហ្សាការតា: សភាឥណ្ឌូនេស៊ី កាលពីថ្ងៃពុធ ទី១៥ ធ្នូ បានអនុម័តចាក់បញ្ចូលដើមទុន លើទំហំទឹកប្រាក់៧,៧១ពាន់លានដុល្លារអាមេរិក បន្ថែមទៀត ដើម្បីជួយស្រោចស្រង់ក្រុមហ៊ុនសហគ្រាស និងទីភ្នាក់ងារវិនិយោគដែលគ្រប់គ្រង ដោយរដ្ឋចំនួន១១សម្រាប់ឆ្នាំនេះ និងសម្រាប់ឆ្នាំ២០២២។

យោងតាមការចុះផ្សាយរបស់សារព័ត៌មានCNA ឱ្យដឹងថា ការអនុម័ត​នេះ រួមបញ្ចូលទាំងដើមទុនប្រមាណ៤៨០លានដុល្លារអាមេរិក សម្រាប់ក្រុមហ៊ុនប្រតិបត្តិករផ្លូវដែករដ្ឋ PT Kereta Api Indonesia (KAI) ជួយផ្តល់ហិរញ្ញប្បទាន ដល់គម្រោងរថភ្លើងល្បឿនលឿន ដែលគាំទ្រដោយប្រទេ​សចិនផងដែរ។

ប្រទេសឥណ្ឌូនេស៊ី នឹងបង្កើនភាគហ៊ុនរបស់ខ្លួន ក្នុងគម្រោងផ្លូវដែកប្រវែង១៤២គីឡូម៉ែត្រខាងលើនេះ ដែលតភ្ជាប់រដ្ឋធានីហ្សាកាតា ជាមួយក្រុងបានឌុង (Bandung) តាមរយៈក្រុមហ៊ុនប្រតិបត្តិករផ្លូវដែករដ្ឋ KAI ជាមួយនឹងដើមទុន៣០០លានដុល្លារអាមេរិក ក្នុងចំណោមដើមទុន៤៨០លានដុល្លារអាមេរិក ដែលបម្រុងទុកសម្រាប់ក្រុមហ៊ុននេះ។

នាយកប្រតិបត្តិក្រុមហ៊ុនសាងសង់ឥណ្ឌូនេស៊ី Wijaya Karya ដែលគ្រប់គ្រង៦០%នៃគម្រោងនេះ បាននិយាយកាលពីខែមេសា ថា តាមការរំពឹងទុក ការដំឡើងថ្លៃចំណាយ អាចឈានដល់២០% ដើម្បីការសាងសង់បញ្ចប់ជាស្ថាពរ ហើយដៃគូនានា ត្រូវបានស្នើសុំឱ្យដំឡើងភាគហ៊ុនរបស់ពួកគេ។

ហ៊ុនសាជីវកម្មវិស្វកម្មផ្លូវដែកចិន China Railway Engineering Corporation និងក្រុមហ៊ុនចិន ផ្សេងទៀតគ្រប់គ្រងភាគហ៊ុន ដែលនៅសេសសល់។

ក្នុងចំណោមការអនុម័តផ្សេងទៀត ដោយសមាជិកសភាកាលពីថ្ងៃពុធ គឺមាន៣៤៨លានដុល្លារអាមេរិក សម្រាប់ក្រុមហ៊ុនអគ្គិសនីរដ្ឋ PT Perusahaan Listrik Negara ក្នុងឆ្នាំ២០២២ ដើម្បីគាំទ្រដល់ការពង្រីកខ្លួនរបស់ក្រុមហ៊ុននេះ ព្រមទាំងការចាក់បញ្ចូលដើមទុន សម្រាប់ក្រុមហ៊ុនសំណង់ Waskita Karya និង Adhi Karya សម្រាប់ផ្ដល់ហិរញ្ញប្បទានដល់គម្រោងហេដ្ឋារចនាសម្ព័ន្ធផ្សេងៗទៀតផងដែរ៕ Reuters៕

ដោយៈគង់ សូរិយា

ភ្នំពេញៈ លោកទេសរដ្ឋមន្រ្តីស៊ុន ចាន់ថុល រដ្ឋមន្រ្តីក្រសួងសាធារណៈការ និងដឹកជញ្ជូនបានថ្លែងថា រដ្ឋាភិបាលក្នុងនាមជាអ្នកសម្របសម្រួល យើងធ្វើយ៉ាងណា ឱ្យវិស័យឯកជនទទួលបានជោគជ័យ ជោគជ័យរបស់វិស័យឯកជនគឺជាជោគជ័យរបស់យើងផងដែរ។

លោកបានមានប្រសាសន៍ ក្នុងពេលអញ្ជើញចូលរួមជាវាគ្មិនកិត្តិយសក្នុងសន្និបាតប្រចាំឆ្នាំ ដែលរៀបចំឡើងដោយសភាពាណិជ្ជកម្មសហរដ្ឋអាមេរិកប្រចាំនៅកម្ពុជា (American Chamber of Commerce in Cambodia) កាលពីថ្ងៃទី១៤ ធ្នូកន្លងមកថា ដូច្នេះសូមបន្តរួមគ្នា ដើម្បីជាប្រយោជន៍ដល់វិស័យឯកជន និងដើម្បីជាប្រយោជន៍ ដល់ព្រះរាជាណាចក្រកម្ពុជាផងដែរ។

បន្ថែមពីលើនេះ លោកទេសរដ្ឋមន្ត្រី បានលើកឡើងអំពីវឌ្ឍនភាព និងការរីកចម្រើន គួរឱ្យកត់សម្គាល់របស់កម្ពុជាលើគ្រប់វិស័យ ដែលកើតចេញពីសុខសន្តិភាព និងការផ្សះផ្សាជាតិពេញលេញ គោលនយោបាយឈ្នះ-ឈ្នះរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាកចក្រកម្ពុជា និងគម្រោងអភិវឌ្ឍហេដ្ឋារចនាសម្ព័ន្ធ សម្រេចបាន និងកំពុងអនុវត្តបន្តជាច្រើន។

ជាមួយគ្នានេះ លោកបានថ្លែងអំណរគុណយ៉ាងជ្រាលជ្រៅដល់ វិស័យ​ឯកជន ជាពិសេសសភាពាណិជ្ជកម្មសហរដ្ឋអាមេរិក ប្រចាំនៅកម្ពុជា ដែលបានឋិត នៅជាមួយរាជរដ្ឋាភិបាលកម្ពុជា ក្នុងគ្រាដ៏លំបាកនៃវិបត្តិជំងឺកូវីដ-១៩ ដើម្បីចូលចំណែកដល់ការអភិវឌ្ឍសេដ្ឋកិច្ចកម្ពុជា និងបានគូសបញ្ជាក់ផងដែរ អំពីតួនាទីរបស់រាជរដ្ឋាភិបាលកម្ពុជា ក្នុងការជួយសម្របសម្រួល ដល់ការធ្វើអាជីវកម្មនៃវិស័យឯកជននៅកម្ពុជា។
លោកបញ្ជាក់ទៀតថា “វិស័យឯកជន ជាក្បាលម៉ាស៊ីននៃកំណើនសេដ្ឋកិច្ចកម្ពុជា”៕

ដោយៈលក្ខិណា

ភ្នំពេញៈ កម្ពុជាបានប្រកាស កាលពីយប់កណ្ដាលអាធ្រាត្រថ្ងៃទី១៤ធ្នូ២០២១ ពីការរកឃើញវត្តមានមេរោគកូវីដ១៩ បំប្លែងថ្មីអូមីក្រុងលើកដំបូងលើស្ត្រីជនជាតិខ្មែរ ម្នាក់ត្រលប់មកពីប្រទេសហ្កាណា ហើយក៏មានការចែកចាយតាមបណ្ដាសារព័ត៌មានក្នុងស្រុកព្រោងព្រាង។

យ៉ាងណាក្ដីមេរោគប្រភេទថ្មីនៃកូវីដ១៩នេះ ទំនងជាមិនបង្កផលប៉ះពាល់ធ្ងន់ធ្ងរ ដល់សេដ្ឋកិច្ចរបស់ប្រទេសកម្ពុជានោះឡើយ ខណៈសម្តេចតេជោ នាយករដ្ឋមន្ត្រីអំពាវនាវកុំឱ្យមានការកត់ស្លុត។

សម្ដេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃកម្ពុជា បានថ្លែងនៅក្នុងពិធី សម្ពោធសណ្ឋាគារមួយនៅរាជធានីភ្នំពេញ កាលពីព្រឹកថ្ងៃទី១៥ធ្នូ ២០២១ថា កម្ពុជាបានរកឃើញមេរោគកូវីដ១៩ អូមីក្រុង១ករណី លើស្ត្រីជនជាតិខ្មែរមកពីប្រទេសហ្កាណា ប៉ុន្តែសម្ដេចសូមបញ្ជាក់សុំកុំស្លន់ស្លោ ហើយបង្កើនការប្រុងប្រយ័ត្ន។

សម្ដេចបានបង្ហាញការមិនសប្បាយចិត្ត ចំពោះការប្រកាសអាសន្ននូវផ្នែកណាមួយនោះ របស់អង្គការសុខភាពពិភពលោក និងក្រសួងសុខាភិបាលប្រទេសមួយចំនួន ខណៈមេរោគអូមីក្រុង មិនទាន់បានសម្លាប់មនុស្សច្រើ​ននៅឡើយទេ ដូចជា ទើបតែមានករណីស្លាប់ម្នាក់ នៅប្រទេសអង់គ្លេស ក្នុងដែលតា និងអាល់ហ្វាសម្លាប់មនុស្សយ៉ាងច្រើន។

សម្ដេចដាក់ជាសំនួរថា Delta និងអាល់ហ្វាសម្លាប់មនុស្សជាច្រើន តែមិននាំគ្នាភ័យ បែរជាមកភ័យជាមួយអូមីក្រុង ទើបតែសម្លាប់ម្នាក់សោះ ។

សម្ដេចបញ្ជាក់ថា ស្ត្រីដែលមានផ្ទុកកូវីដ១៩ ប្រភេទអូមីក្រុងនឹងជាវិញនៅពេលឆាប់ៗនេះ ពីព្រោះគាត់បានចាក់វ៉ាក់សាំងរួចហើយ ប្រភេទវ៉ាក់សាំចនសុន&ចនសុន ហើយសុខភាពគាត់ក៏ធម្មតា អត់មានអ្វីប្លែកទេ តែអ្វីដែលយើងបារម្ភ គឺទារកក្នុងផ្ទៃរបស់ស្ត្រីនោះ ដូច្នេះក្រុមគ្រូពេទ្យត្រូវយកចិត្តទុកដាក់ខ្ពស់ចំពោះអ្នកជំងឺរូបនេះ។

លោកគី សេរីវឌ្ឍន៍អ្នកវិភាគសេដ្ឋកិច្ចមួយរូបក្នុងប្រទេសកម្ពុជាក៏បានមានប្រសាសន៍តាមទូរសព្ទនៅរសៀលថ្ងៃទី១៥ធ្នូ ២០២១នេះថា អូមីក្រុងមកដល់កម្ពុជា គឺជារឿងមួយដែលគួរប្រុងប្រយ័ត្ន ហើយហានិភ័យនៃការឆ្លងរាលដាលក៏មានដែរ បើពុំមានវិធានការការពារ និងការចូលរួមទាំងអស់គ្នា។

យ៉ាងណាក្ដី លោកជឿជាក់ថាតាមរយៈបទពិសោធន៍ នៃព្រឹត្តិការណ៍សហគមន៍២០កុម្ភៈ២០២១កន្លងទៅ រាជរដ្ឋាភិបាលនឹងមានវិធានការនិងចំណាត់ការ ក្នុងការទប់ស្កាត់មេរោគនេះ មិនឱ្យរាលដាលនិងធ្វើឱ្យប៉ះពាល់ដល់សេដ្ឋកិច្ចធំធេងដូច២០កុម្ភៈ២០២១ ។

លោកបន្តថា ទន្ទឹមនឹងនេះដែរ ក៏ត្រូវមានការចូលរួមទាំងអស់គ្នា ដើម្បីទប់ស្កាត់នូវមេរោគ ប្រភេទថ្មីនេះកុំឱ្យឆ្លងរាលដាលធំ ដោយក្នុងនោះអាជ្ញាធរត្រូវអប់រំពលរដ្ឋបន្ថែម ពីមេរោគមួយនេះ ហើយពលរដ្ឋខ្លួនឯងក៏ត្រូវតែបង្កើនការប្រុងប្រយ័ត្ន ឱ្យបានខ្លាំងជាងមុន ត្រូវបង្កើនការអនុវត្តន៍វិធានការអនាម័យរបស់ក្រសួងសុខាភិបាល។

បណ្ដាវិនិយោគិនជាច្រើន ក៏បានផ្ដល់ទំនុកចិត្ត និងជឿជាក់ថារាជរដ្ឋាភិបាលកម្ពុជា នឹងអាចទប់ស្កាត់នូវការរីករាលដាល នៃជំងឺកូវីដមិនឱ្យត្រលប់ទៅរក ការរាលដាលធ្ងន់ធ្ងរទៀតនោះទេ ហើយក៏សង្ឃឹមថាបណ្ដាវិនិយោគិនបរទេសជាច្រើន នឹងចូលកម្ពុជាវិញនៅពេលឆាប់នេះដែរ៕