ដោយ: គង់ លាងហួរ
អន្តរជាតិ: អាជ្ញាធររបស់សង្កាត់មួយក្នុងចំណោមសង្កាត់ទាំង២៣ របស់ទីក្រុងតូក្យូនៃប្រទេសជប៉ុនបានអំពាវនាវឱ្យមានការហាមឃាត់រយៈពេល៥ឆ្នាំចំពោះការលក់ខុនដូចេញវិញ(Resale) ដើម្បីទប់ទល់នឹងការហក់ឡើងនៃតម្លៃខុនដូ ដោយសារការទិញក្នុងគោលបំណងវិនិយោគ។

ជាក់ស្តែង អាជ្ញាធរសង្កាត់ Chiyoda បានដាក់សំណើផ្លូវការមួយទៅកាន់សមាគមនៃបណ្តាក្រុមហ៊ុនអចលនទ្រព្យជប៉ុន(Real Estate Companies Association of Japan) ដើម្បីហាមឃាត់ការលក់ខុនដូចេញវិញក្នុងរយៈពេល៥ឆ្នាំ។

អាជ្ញាធររបស់សង្កាត់ Chiyoda នៅទីក្រុងតូក្យូក៏បានស្នើការហាមឃាត់មិនឱ្យអតិថិជនអាចទិញខុនដូច្រើនយូនីតនៅក្នុងអគារតែមួយ ក្រោមឈ្មោះរបស់ម្ចាស់កម្មសិទ្ធិត្រួតគ្នា។ នេះបើយោងតាមការចុះផ្សាយដោយកាសែត Nikkei Asia។

អាជ្ញាធររបស់សង្កាត់ Chiyoda បានអំពាវនាវឱ្យមានការជួយដល់ប្រជាជន ដែលមានគោលបំណងទិញខុនដូដើម្បីរស់នៅពិតប្រាកដ។ អាជ្ញាធរក៏គ្រោងដាក់សំណើទៅកាន់រដ្ឋាភិបាលថ្នាក់ជាតិដើម្បីដំឡើងពន្ធលើចំណេញមូលធនចំពោះការលក់ខុនដូចេញវិញ។

តម្លៃខុនដូថ្មីជាមធ្យមនៅតំបន់ Greater Tokyo មានទំហំទឹកប្រាក់ចំនួន៨៩,៥៨លានយ៉េន (ប្រមាណ៦០៣.០០០ដុល្លារ) ក្នុងខែមករាដល់ខែមិថុនា ឆ្នាំ២០២៥ ហក់ឡើង១៧ភាគរយបើធៀបនឹងរយៈពេលដូចគ្នាកាលពីឆ្នាំមុន។នេះបើយោងតាមរបាយការណ៍របស់វិទ្យាស្ថានសេដ្ឋកិច្ចអចលនទ្រព្យ ដែលមានមូលដ្ឋាននៅទីក្រុងតូក្យូ។

ចំណែក តម្លៃខុនដូថ្មីជាមធ្យមនៅក្នុងសង្កាត់ទាំង២៣ របស់ទីក្រុងតូក្យូបានហក់ឡើង២០ភាគរយដល់ទំហំទឹកប្រាក់ចំនួន១៣០,៦៤លានយ៉េនក្នុងមួយយូនីត។ តម្លៃខុនដូជាមធ្យមនៅទីក្រុងតូក្យូបានកើនឡើងដល់ទំហំទឹកប្រាក់លើសពី១០០លានយ៉េនចាប់តាំងពីឆ្នាំ២០២៣។

ក្រៅពីការខ្វះខាតដីសម្រាប់ការអភិវឌ្ឍន៍អគារខុនដូ កង្វះកម្លាំងពលកម្ម និងការកើនឡើងតម្លៃសម្ភារៈសំណង់កំពុងជំរុញឱ្យការផ្គត់ផ្គង់ខុនដូថ្មីនៅមានកម្រិត និងជំរុញឱ្យតម្លៃខុនដូកើនឡើងយ៉ាងគំហុក៕ប្រភព: Nikkei Asia៕

ដោយ: គង់ លាងហួរ
អន្តរជាតិ: បច្ចុប្បន្ន តម្លៃដីក្នុងអនាគតរដ្ឋធានីថ្មី Nusantara របស់ប្រទេសឥណ្ឌូនេសុីនៅមានកម្រិតទាបនៅឡើយ ដោយមានទំហំទឹកប្រាក់ត្រឹមតែ១.៩០០.០០០រូពៀ (ប្រមាណ១២០ដុល្លារអាមេរិក)ក្នុងមួយម៉ែត្រការ៉េ។

តម្លៃដីនៅតំបន់ជុំវិញទីក្រុង Nusantara សម្រេចបានអត្រាកំណើនប្រចាំឆ្នាំចន្លោះពី៥ភាគរយទៅ៨ភាគរយក្នុងមួយឆ្នាំ ដោយសារការអភិវឌ្ឍន៍ហេដ្ឋារចនាសម្ព័ន្ធ និងការចាប់អារម្មណ៍របស់បណ្តាអ្នកវិនិយោគចំពោះអនាគតរដ្ឋធានីថ្មីរបស់ឥណ្ឌូនេសុី។

ផ្ទុយទៅវិញ បច្ចុប្បន្ន ទីក្រុងហ្សាការតា (Jakarta) ជាមជ្ឈមណ្ឌលសេដ្ឋកិច្ចរបស់ប្រទេសឥណ្ឌូនេស៊ី និងមានតម្លៃដីថ្លៃ ដោយសារតម្រូវការនៃការអភិវឌ្ឍន៍មានស្ថានភាពរឹងមាំ បើទោះជាទីក្រុងមួយនេះកំពុងប្រឈមមុខនឹងបញ្ហាទឹកជំនន់ និងបរិស្ថានយ៉ាងណាក្តី។

ទីផ្សារដីធ្លីរបស់ទីក្រុងហ្សាការតាមានភាពចាស់ទុំ(mature) ខណៈក្រុមហ៊ុនអាជីវកម្មនានា ប្រជាជនក្នុងស្រុក និងបណ្តាអ្នកវិនិយោគបានសម្រុកទិញដីក្នុងទីក្រុងហ្សាការតា។

ផ្ទុយទៅវិញ ទីក្រុង Nusantara កំពុងស្ថិតក្នុងដំណាក់កាលនៃការអភិវឌ្ឍន៍នៅឡើយ ខណៈការសាងសង់បណ្តាញហេដ្ឋារចនាសម្ព័ន្ធចាំបាច់នៅមិនទាន់ត្រូវបានបញ្ចប់រួចរាល់នៅឡើយ។

ទោះជាយ៉ាងណា ប្រសិនបើទីក្រុង Nusantara បំពេញបានយ៉ាងពេញលេញនូវគោលដៅអភិវឌ្ឍន៍របស់ខ្លួន ដោយសម្រេចបានកំណើននៃចំនួនប្រជាជន ការតាំងទីលំនៅរបស់មន្ត្រីរដ្ឋាភិបាល បូករួមទាំងការតភ្ជាប់ហេដ្ឋារចនាសម្ព័ន្ធយ៉ាងរឹងមាំ និងសកម្មភាពសេដ្ឋកិច្ចរស់េវើប នោះតម្លៃដីធ្លីនៅទីក្រុង Nusantara អាចកើនឡើងលើសពីតម្លៃដីនៅតំបន់មួយចំនួននៃទីក្រុងហ្សាការតា។

បច្ចុប្បន្ន តម្លៃដីនៅទូទាំងរដ្ឋធានីហ្សាការតាមានទំហំទឹកប្រាក់ជាមធ្យមចំនួន២៥លានរូពៀ(ប្រមាណ១.៥៤០ដុល្លារ)ក្នុងមួយម៉ែត្រការ៉េ ខណៈតម្លៃដីនៅតំបន់ពាណិជ្ជកម្មកណ្តាល(CBD) មានទំហំទឹកប្រាក់២០០លានរូពៀ(ប្រមាណ១២.៣០០ដុល្លារ)ក្នុងមួយម៉ែត្រការ៉េ។

ភាពជោគជ័យរបស់អនាគតរដ្ឋធានីថ្មីនេះពឹងផ្អែកលើកត្តានានា ដូចជាលំហូរវិនិយោគផ្ទាល់បរទេស និន្នាការចំណាកស្រុក ទំនុកចិត្តលើនិរន្តរភាពនៃរដ្ឋធានីថ្មី និងការសាងសង់ហេដ្ឋារចនាសម្ព័ន្ធក្នុងទីក្រុងប្រកបដោយប្រសិទ្ធភាព៕ប្រភព: Oxford Economics & The Guardian៕

ដោយៈ ម៉ាល័យ

    ភ្នំពេញៈ ក្រុមមន្រ្តីបានបើកកិច្ចប្រជុំពិភាក្សា លើករណីសំណើសុំអន្តរាគមន៍ ដោះស្រាយបញ្ហាសំណង់លំនៅឋាន របស់ប្រជាពលរដ្ឋ ស្ថិតនៅភូមិបឹងធំទី៣ សង្កាត់បឹងធំ ខណ្ឌកំបូល នៃគម្រោងវិនិយោគបន្ទាន់លើហេដ្ឋារចនាសម្ព័ន្ធលូ និងប្រព័ន្ធរំដោះទឹកសម្រាប់បញ្ចៀសការជន់លិចនៅភូមិសាស្រ្តរាជធានីភ្នំពេញ។

លោកចៅសុភៈ ភិបាល អគ្គនាយក នៃអគ្គនាយកដ្ឋានប្រព័ន្ធចម្រោះទឹកកខ្វក់ តំណាងលោកជំទាវរដ្ឋលេខាធិការប្រចាំការ រួមជាមួយលោកហ៊ាង វុត្ថា អគ្គនាយក នៃអគ្គនាយកដ្ឋានបច្ចេកទេស ក្រសួងសាធាណការ និងដឹកជញ្ជូន បានដឹកនាំក្រុមការងារបច្ចេកទេសចូលរួមកិច្ចប្រជុំពិភាក្សាលើបញ្ហាខាងលើនេះ។

កិច្ចប្រជុំនេះ បានរៀបចំនៅស្ដីការក្រសួងមហាផ្ទៃ ដោយដឹកនាំ និងសម្របសម្រួល ដោយឯកឧត្តម សួស ប្រាថ្នា អគ្គនាយក នៃអគ្គនាយកដ្ឋានរដ្ឋបាល ក្រសួងមហាផ្ទៃ និងមានការចូលរួមពីតំណាងក្រសួងសេដ្ឋកិច្ច និងហិរញ្ញវត្ថុ តំណាងរដ្ឋបាលរាជធានីភ្នំពេញ តំណាងមន្ទីររៀបចំដែនដី នគរូបនីយកម្ម សំណង់ និងសុរិយោដីរាជធានី អភិបាលខណ្ឌកំបូលនៃរាជធានីភ្នំពេញ និងប្រធាននាយកដ្ឋានកិច្ចការរដ្ឋបាលរាជធានី ខណ្ឌ និងខេត្តនៃអគ្គនាយកដ្ឋានរដ្ឋបាល ព្រមទាំងមន្រ្តីជំនាញពាក់ព័ន្ធចំនួន១៨នាក់។

គម្រោងគម្រោងវិនិយោគបន្ទាន់ លើហេដ្ឋារចនាសម្ព័ន្ធលូ និងប្រព័ន្ធរំដោះទឹក សម្រាប់បញ្ចៀសការជន់លិច នៅភូមិសាស្រ្តរាជធានីភ្នំពេញ បានបើកដំណើរការការដ្ឋាននៅថ្ងៃទី៥ ខែកក្កដា ឆ្នាំ២០២៤។ វឌ្ឍនភាពការងារសម្រេចបានជារួម៩៨,១០% គិតត្រឹមថ្ងៃទី៨ ខែសីហា ឆ្នាំ២០២៥៕