ដោយៈ សុផារី

ភ្នំពេញៈ ក្រុមហ៊ុន លី ហួរ ឌីវេឡុបម៉ិនវិមានភ្នំពេញឯ.ក បានបញ្ចុះបឋមសិលា និងបុកគ្រឹះសាងសង់ គម្រោងដ៏ប្រណិតទី១៥ របស់ខ្លួនបន្ថែមទៀតគឺ “ឌឹសេនត្រល ខាប់ភីថល៣ ការសាងសង់ ឌឹសេនត្រល ខាប់ភីថល II នេះដោយសារតែតម្រូវការវិស័យអចលនទ្រព្យកើនឡើង និងមានលំនឹងល្អសម្រាប់ប្រទេសកម្ពុជាផងដែរ។

ការបញ្ចុះបឋមសិលានិងបុកគ្រឹះសាងសង់ គម្រោងដ៏ប្រណិតទី១៥ ឌឹសេនត្រល ខាប់ភីថល II របស់បុរីវិមានភ្នំពេញក្រោមអធិបតីភាពរបស់ អ្នកឧកញ៉ា លី ហួរ ប្រធានក្រុមប្រឹក្សាភិបាលក្រុមហ៊ុន លី ហួរ ឌីវេឡុបម៉ិនវិមានភ្នំពេញឯ.ក និងលោកជំទាវ ព្រមទាំងបុគ្គលិកគ្រប់ផ្នែករបស់ក្រុមហ៊ុនផងដែរ។

គម្រោងដ៏ប្រណីតទី១៥ ឌឹសេនត្រល ខាប់ភីថល II នេះ សាងសង់នៅលើផ្ទៃដីទំហំ១១ហិចតា ដែលមានទីតាំងជាប់ គម្រោងឌឹសេនត្រល ខាប់ភីថលI ដែលទើបបើកសម្ភោធកាលពីដើមឆ្នាំ២០២១ ដែលគម្រោងទាំងពីរសាងសង់លើផ្ទៃដី ទំហំសរុប៣១ហិចតា ស្ថិតនៅតាមបណ្តោយផ្លូវ៥៩៨ ជិតស្នងការនគរបាលរាជធានីភ្នំពេញ ក្នុងសង្កាត់ច្រាំងចំរេះទី២ ខណ្ឌឫស្សីកែវ រាជធានីភ្នំពេញ។

ថ្លែងក្នុងពិធីក្រុងពាលីបុកគ្រឹះសាងសង់គម្រោងឌឹសេនត្រល ខាប់ភីថល II នៅព្រឹកនេះ អ្នកឧកញ៉ា លី ហួរ ដែលជាប្រធានក្រុមព្រឹក្សាភិបាលក្រុមហ៊ុន លី ហួរ ឌីវេឡុបម៉ិនវិមានភ្នំពេញឯ.ក បានប្រាប់អ្នកសារព័ត៌មានថា “ការសម្រេចចិត្តវិនិយោគ គម្រោងដ៏ប្រណិតទី១៥ ឌឹសេនត្រល ខាប់ភីថល II នេះឡើងដោយសារបច្ចុប្បន្ន លោកមើលឃើញស្ថានភាពទូទៅ សម្រាប់វិស័យអចលនទ្រព្យនៅកម្ពុជា មានកំណើនល្អគួបផ្សំជាមួយនឹងស្ថេរភាពនយោបាយ សេដ្ឋកិច្ចមានលំនឹងនាំអោយការធ្វើវិនិយោគលើ វិស័យអចលនទ្រព្យនៅតែមានតម្រូវការខ្ពស់”។

អ្នកឧកញ៉ាបន្តថា “សំណង់របស់បុរីវិមានភ្នំពេញទាំងអស់ គឺជាសំណង់ដែលសាងសង់ឡើង ដោយក្រុមវិស្វករ ស្ថាបត្យករ និងកម្មករខ្មែរសុទ្ធសាធ ហើយការសាងសង់តែងផ្តោតជាសំខាន់ទៅលើគុណភាពជាចម្បង”។ លោកបន្តថា បច្ចុប្បន្នគម្រោងអភិវឌ្ឍន៍របស់ បុរីវិមានភ្នំពេញ បានគ្របដណ្តប់លើតំបន់ជាច្រើនក្នុងរាជធានីភ្នំពេញ។ ក្រុមហ៊ុនក៏បានធ្វើការសាងសង់លំនៅឋានបែបទំនើប ដើម្បីបំពេញតម្រូវការរបស់អតិថិជន និងតម្រូវការតាមតំបន់នីមួយៗ ហើយក្រុមហ៊ុនក៏មានគម្រោងធំៗជាច្រើនទៀត ដែលត្រូវធ្វើជាបន្តបន្ទាប់”។

អ្នកឧកញ៉ា លី ហួរ សូមធ្វើការបង្ហាញពីសមិទ្ធិផលមួយចំនួន របស់ក្រុមហ៊ុន លី ហួរ ឌីវេឡុបម៉ិនវិមានភ្នំពេញឯ.ក ដែលជាក្រុមហ៊ុនអភិវឌ្ឍន៍សាងសង់ អគារលំនៅឋាន បានចាប់ផ្តើមដំណើរការតាំងពីឆ្នាំ២០១១ រហូតមកដល់បច្ចុប្បន្នមានរយៈពេល១០ឆ្នាំ និងបានសាងសង់នូវប្រភេទផ្ទះ និងអគារជាច្រើន សម្រាប់លក់ជូនប្រជាពលរដ្ឋគ្រប់កម្រិ​តជីវភាពដែលអគារ និងផ្ទះទាំងនោះមានដូចជា អគារពាណិជ្ជកម្ម ផ្ទះពាណិជ្ជកម្ម ភូមិគ្រឹះ ផ្ទះវីឡាទោល ផ្ទះវីឡាភ្លោះ ផ្ទះវីឡាកូនកាត់ ផ្ទះល្វែង និងផ្ទះកម្រិតមធ្យមផងដែរ។

អ្នកឧកញ៉ាបានបញ្ជាក់ផងដែរថា ចាប់តាំងពីឆ្នាំ២០១១ រហូតមកដល់បច្ចុប្បន្ន ក្រុមហ៊ុន លី ហួរ ឌីវេឡុបម៉ិនវិមានភ្នំពេញឯ.ក បង្កើតបានចំនួន១៥គម្រោង ស្ថិតនៅទីតាំងផ្សេងៗគ្នា និងមានផែនការបង្កើតគម្រោងបន្តបន្ទាប់ទៀតទៅថ្ងៃអនាគត។

កត្តាដែលធ្វើឱ្យក្រុមហ៊ុន អាចបោះទុនវិយោគអភិវឌ្ឍន៍សាងសង់ អគារលំនៅឋានបានរហូតមកដល់បច្ចុប្បន្ននេះ គឺដោយសារតែក្រុមហ៊ុនបានយកចិត្តទុកដាក់ ទៅលើគុណភាពសេវាកម្ម គុណភាពសំណង់ ទីតាំងអភិវឌ្ឍន៍ និងលក្ខខណ្ឌបង់ប្រាក់ងាយស្រួ​លស្របទៅតាមស្ថានភាព កម្រិតជីវភាពរបស់អតិថិជន និងទៅតាមប្រភេទម៉ូតផ្ទះ ហើយអ្វីដែលមិនអាចខ្វះបាន គឺប្រទេសមានសុខសន្តិភាព និងការគាំទ្រពីសំណាក់ អតិថិជនជាច្រើន។

កន្លងមក ក្រុមហ៊ុន លី ហួរ ឌីវេឡុបម៉ិនវិមានភ្នំពេញឯ.ក បានចូលរួម ចំណែកអភិវឌ្ឍន៍រាជធានីភ្នំពេញមួយផ្នែកដែរ ដោយកែប្រែតំបន់មួយចំនួន ដែលជាទីតាំងដីឡូតិ៍ទុកចោល មិនមានមនុស្សរស់នៅ ក្រុមហ៊ុនបានកែប្រែតំបន់នោះ ដោយសាងសង់លំនៅឋានសម្រាប់ប្រជាពលរដ្ឋទិញស្នាក់នៅ និងប្រកបអាជីវកម្ម ធ្វើឲ្យតំបន់នោះក្លាយជាទីប្រជុំជន មានមនុស្សអ៊ូរអរ និងមានហេដ្ឋារចនាសម្ព័ន្ធស្អាត ជាក់ស្តែងក្រុមហ៊ុនបានគូសប្លង់ឲ្យមានផ្លូវមួយខ្សែ ឆ្លងកាត់បុរីផ្នែកខាងមុខពីផ្លូវ៥៩៨ ទៅផ្លូវ៣០ម៉ែត្រថ្មី ដែលទើបនឹងអភិវឌ្ឍន៍ទាំងអស់នេះហើយ ជាកម្លាំងចលករមួយក្នុងការចូលរួម ចំណែកអភិវឌ្ឍន៍រាជធានីភ្នំពេញ ក៏ដូចជាសង្គមជាតិទាំងមូលហើយនៅថ្ងៃនេះផងដែរ៕

ដោយៈគង់ សូរិយា

ភ្នំពេញៈ រដ្ឋបាលរាជធានីភ្នំពេញ គ្រោងសាងសង់រោងចក្រលិតទឹកស្អាតថ្មីមួយ ដើម្បីឆ្លើ់យតបនឹងតម្រូវការទឹកស្អាត ដែលកើនឡើងនៅបំពេញតម្រូវការនៅតំបន់ជាយក្រុងមួយចំនួន ដែលមិនទាន់មានទឹកស្អាតប្រើប្រាស់នៅឡើយ។

អភិបាលរាជធានីភ្នំពេញ លោកឃួង ស្រេងបានបើកកិច្ចប្រជុំជាមួយលោកសូ ណារ៉ូអគ្គនាយករដ្ឋករទឹកស្វបយ័តក្រុងភ្នំពេញកាលពីថ្ងៃទី១៦ វិច្ឆិកាកន្លងមកនេះ និងបានស្នើឱ្យរដ្ឋាករទឹកស្វយ័តក្រុងភ្នំពេញពិចារណា សាងសង់រោងចក្រផលិតទឹកស្អាតថ្មីមួយកន្លែងទៀត នៅលើស្ទឹងព្រែកត្នោត ភាគខាងលិចរាជធានីភ្នំពេញ ដើម្បីបង្កើនការផ្គត់ផ្គង់ទឹកស្អាត ដល់ខណ្ឌចំនូន៣ នៅជាយរាជធានីភ្នំពេញ ដែលបច្ចុប្បន្នមិនទាន់មានទឹកស្អាតប្រើគ្រប់គ្រាន់នៅឡើយ។

លោកបានបន្តថា “ចង់ឱ្យរដ្ឋាករទឹកស្វយ័តក្រុងភ្នំពេញ បង្កើតរោងចក្រផលិតទឹកស្អាតមួយថ្មីទៀត នៅសណ្តរស្ទឹងព្រែកត្នោត ពោលគឺយកទឹកពីស្ទឹងព្រែកត្នោត មកផលិតជាទឹកស្អាត ដើម្បីផ្គត់ផ្គង់ដល់ប្រជាពលរដ្ឋ នៅខណ្ឌកំបូលខណ្ឌ ដង្កោ និង ពោធិ៍សែនជ័យ”។

រដ្ឋករទឹកស្វយ័តក្រុងភ្នំពេញកាលពីពេលថ្មីៗនេះ ក៏បានបង្ហាញផែនការបង្កើនការផលិតទឹកស្អាតបន្ថែម៣ម៉ឺនម៉ែត្រគូប សម្រាប់ក្រុងតាខ្មៅ ខេត្តកណ្តាល ត្រឹមឆ្នាំ ២០២៤ និង ៦ម៉ឺនម៉ែត្រគូប ត្រឹមឆ្នាំ២០៣០។
បច្ចុប្បន្ន តម្រូវការទឹកស្អាតក្នុងរាជធានីភ្នំពេញ និងក្រុងតាខ្មៅ មានបរិមាណជាង៧០ម៉ឺនម៉ែត្រគូប ខណៈការផលិតទឹកស្អាតពីរដ្ឋាករទឹកស្វយ័តក្រុងភ្នំពេញ មានបរិមាណតែជាង៦០ម៉ឺនម៉ែត្រគូបប៉ុណ្ណោះ។

ដោយៈវឌ្ឈនៈ

ភ្នំពេញៈ បន្ទាប់ពីប្រមុខរាជរដ្ឋាភិបាលកម្ពុជា ប្រកាសបើកឱ្យវិនិយោគិននិងទេសចរអន្តរជាតិ ដែលចាក់វ៉ាក់សាំងប្រឆាំងកូវីដ១៩រួចរាល់ចូលមកកម្ពុជា ដោយមិនបាច់ធ្វើចត្តាឡីស័ក អ្នកវិនិយោគិននិងអ្នកជំនាញអចលនទ្រព្យ ក្នុងស្រុករំពឹងថា ទីផ្សារខុនដូ នឹងវិលត្រលប់ទៅរកស្ថានភាពដូចដើមឡើងវិញ។

លោកនាក់ សមសែន អគ្គនាយកក្រុមហ៊ុនអចលនទ្រព្យ RENT KH បានលើកឡើងកាលពីពេលថ្មីៗនេះថា តម្លៃជួលទាំងខុនដូ និងអាផាតមិន បានថមថយប្រហែល៥ភាគរយ ទៅ១០ភាគរយ ក្នុងអំឡុងពេលកំពុងផ្ទុះកូវីដ-១៩។

លោកថា “មុនពេលផ្ទុះកូវីដ តម្លៃជួលខុនដូ និងអាផាតមិន អាចជួលក្នុងតម្លៃជាមធ្យម ៦០០ដុល្លារអាមេរិក ទៅ៧០០ដុល្លារអាមេរិក  សម្រាប់បន្ទប់គេងគ្រែ១ និងបន្ទប់គេងគ្រែ២ដាក់ជួលជាមធ្យម១២០០ ទៅ១៣០០ ដុល្លារក្នុងមួយខែ។ ប៉ុន្តែសម្រាប់ស្ថានបច្ចុប្បន្នម្ចាស់ខុនដូ និងអាផាតមិន មួយចំនួនបានដាក់តម្លៃជួល ដូចមុនពេលផ្ទុះកូវីដ-១៩ វិញ”។

លោកបន្តថា នៅពេលឆាប់ៗខាងមុខនេះ ទីផ្សារខុនដូនៅកម្ពុជានឹងវិលត្រលប់ទៅរកដើមវិញ និងអាចមានទីផ្សារខ្លាំងជាងមុនកូវីដ១៩ ទៅទៀត ដូច្នេះតម្រូវការខុនដូ និងអាផាត់មិននៅកម្ពុជា នឹងកាន់តែមានច្រើនឡើង ដោយក្នុងនោះយើងមើលឃើញថាប្រជាពលរដ្ឋកម្ពុជាកាន់តែច្រើន បានផ្លាស់ប្តូរពីការរស់នៅក្នុងផ្ទះល្វែងរឺវីឡា ផ្ទះជាប់ដីទៅជាការរស់នៅក្នុងខុនដូ ឬអាផាត់មិនដែលជាអគារសហកម្មសិទ្ធិវិញ ។

លោកបន្ថែមថា នៅពេលរាជរដ្ឋាភិបាល ប្រកាសបើកប្រទេសឡើងវិញ និងអនុញ្ញា​តឱ្យអ្នកដំណើរបរទេស ចូលមដោយមិនធ្វើចត្តាឡីស័ក រំពឹងថាវិនិយោគិននិងទេសចរបរទេសនឹងចូលមកម្ពុជាជាថ្មី ហើយពេលនោះ តម្រូវការជួលខុនដូ អាផាត់មិននៅកម្ពុជានឹងមានកំនើនខ្ពស់ឡើងវិញ ។

ជាមួយគ្នានេះ លោកច្រឹក សុខនីមប្រធានសមាគមអ្នកវាយតម្លៃនិងភ្នាក់ងារអចល​នវត្ថុកម្ពុជាបានមានប្រសាសន៍កន្លងមកថា លោករំពឹងដូចគ្នាថា វិស័យអចលនទ្រព្យនៅកម្ពុជានឹងមានសន្ទុះងើបឡើងវិញ ហើយខ្លាំងជាមុនពេលមានកូវីដ១៩ទៅទៀត ។ គម្រោ​ងមួយចំនួន ត្រូវបានផ្អាកសកម្មនៅក្នុងវិបត្តិកូវីដ ហើយនៅពេលចប់កូវីដ១៩ឬពេលកូវីដ១៩បានធូរស្រាល គម្រោងទាំងនោះនឹងចាប់ផ្ដើមឡើងវិញ ហើយគម្រោងថ្មីៗជាច្រើនទៀតក៏នឹងផ្ដើមអនុវត្តន៍ដូចគ្នាផងដែរ៕

ដោយសហការី

ភ្នំពេញ៖ ពិតជាពិសេសមែន!!! ហ្សបហោស៍ ម៉ាជេស្ទីក ស្ថិតនៅលើដងវិថីពាណិជ្ជកម្ម ក្នុងតំបន់ដ៏មានសក្តានុផល ផ្តល់ជូនតម្លៃកាន់តែពិសេសចាប់ពី 274,148 ដុល្លារឡើងទៅ ជាមួយនឹងការបង់ប្រាក់កាន់តែងាយស្រួល។ ក្នុងនោះផងដែរ​ អតិថិជននឹងទទួលបានកម្ចីដែលមិនធ្លាប់មានពីមុនមក 100% រហូតដល់25ឆ្នាំ ជាមួយធនាគារ CIMB។ ប្រញាប់រួសរាន់ឡើង ការផ្តល់ជូននេះ ផុតកំណត់ត្រឹមដំណាក់ខែវិច្ឆិកានេះ តែប៉ុណ្ណោះ។

ហ្សបហោស៍ម៉ាជេស្ទីក ជាហ្សបហោស៍ដ៏ថ្មីសន្លាងមួយ របស់បុរី ប៉េង ហួត ត្រូវបានរចនាឡើងយ៉ាងល្អប្រណិតថ្មីបែបអឺរ៉ុប យ៉ាងពិសេស​ដោយផ្តោតលើគុណភាព សោភ័ណភាព និង សាកសមសម្រាប់ការប្រកបអាជីវកម្ម និងការិយាល័យទំនើប មានកំពស់ ៣​ជាន់ ជាមួយផ្ទៃសំណង់ទំហំ 4.5m x 14m បែងចែកជា 4បន្ទប់គេង និង 5បន្ទប់ទឹក និងទីធ្លាមុខផ្ទះសម្រាប់ចតរថយន្តធំទូលាយ ព្រមជាមួយសម្ភារៈបន្ថែមជូនដែលមានដូចជា ទូតាំងទូរទស្សន៍ ទូតាំងសម្ភារៈ ស៊ុមច្រកចូល ទូចង្ក្រានលើក្រោម​ ស៊ីងលាងចាននិងម៉ាស៊ីនបឺតផ្សែង ផងដែរ។

ហ្សបហោស៍ ម៉ាជេស្ទីក អាចចូលរួមធ្វើឱ្យអាជីវកម្មដ៏សម្បូរបែបរបស់លោកអ្នកជោគជ័យក្នុងពេលអនាគតដ៏ខ្លី ជាមួយផ្នែកខាងក្នុងដែលត្រូវបានរចនាឡើងស័ក្ដិសមសម្រាប់គ្រប់ប្រភេទអាជីវកម្ម ចំណែកឯការរចនាខាងក្រៅដែលមានការច្នៃប្រឌិតបែបក្លាសស៊ិកពិតជាធ្វើឱ្យអាជីវកម្មរបស់លោកអ្នកកាន់តែមានភាពទាក់ទាញ និងផ្ដល់នូវទំនុកចិត្តដល់អតិថិជនបន្ថែមទៀត។ ហ្សបហោស៍ ម៉ាជេស្ទីក ប្រភេទថ្មីនេះ អាចរកបាននៅទីតាំងក្នុងតំបន់ដ៏មានសក្តានុពលពាណិជ្ជកម្ម ៣ធំៗ រួមមាន តំបន់បឹងស្នោ មហាវិថីសម្តេចតេជោ (៦០ម៉ែត្រ) និងផ្លូវក្រវ៉ាត់ក្រុងទី២ (៥០ម៉ែត្រ)។

សម្រាប់តំបន់បឹងស្នោរ ហ្សបហោស៍ ម៉ាជេស្ទិក ស្ថិតក្នុងគម្រោងដឹស្តាផ្លាទីនីម ខេភីថល វ័ន តាមបណ្តោយផ្លូវជាតិលេខ1 ផ្ទាល់តែម្តង ដែលមានចំងាយត្រឹមតែ 5នាទីប៉ុណ្ណោះពីស្ពានព្រះមុនីវង្ស (ច្បារអំពៅ) គឺជាបណ្តុំនៃសហគមន៍ទំនើបចម្រុះដ៏ថ្មីសន្លាងមួយ និងជាតំបន់សក្តានុពលពាណិជ្ជកម្មដ៏មមាញឹកមួយនាពេលអនាគត សម្រាប់ការប្រកបអាជីវកម្ម ក្នុងការផ្គត់ផ្គង់តម្រូវការរបស់ប្រជាជនរាប់ម៉ឺនគ្រួសារដែលកំពុងរស់នៅក្នុងគម្រោងមេ ហ្គ្រេនស្តាផ្លាទីនីមទាំងមូល ព្រមទាំងប្រជាជនដែលរស់នៅក្នុង​ ទឹកដីខណ្ឌច្បារអំពៅនេះផ្ទាល់ផងដែរ។

គម្រោងដ៏ថ្មីសន្លាងនេះ ក៏ជាចរន្តផ្លូវចេញចូលថ្មី​ដ៏សំខាន់មួយទៀតដែលតភ្ជាប់ពីផ្លូវជាតិលេខ1 ឆ្ពោះទៅកាន់  មហាវិថីក្លាស្ទ័រ ដែលជាបណ្តុំពាណិជ្ជកម្មដ៏សម្បូរបែប ព្រមទាំងតភ្ជាប់ទៅមហាវិថី អេកូ ខលឡិកសិន ដែលជាមហាវិថីសួនសាធារណៈ មានប្រវែងជាង 2 គីឡូម៉ែត្រ រួមជាមួយផ្លូវសម្រាប់ជិះកង់ ​និងផ្លូវរត់ Marathon   ស្តង់ដាអន្តរជាតិដំបូងគេបង្អស់ក្នុងប្រទេសកម្ពុជា។ គម្រោងដ៏ថ្មីសន្លាងនេះ ក៏តភ្ជាប់ ទៅកាន់គម្រោង ភីអេច យូរ៉ូផាក ដែលជាសួនកម្សាន្តបែបអឺរ៉ុបដំបូងគេ ​និងមានតែមួយគត់ក្នុងរាជធានីភ្នំពេញ។

ងាកមកតំបន់មហាវិថីសម្តេចតេជោ (៦០ម៉ែត្រ) ហ្សបហោស៍ ម៉ាជេស្ទិក  ស្ថិតគម្រោង ដឹស្តាដាយមិន ជាគម្រោងមួយក្នុងតំបន់ដ៏មានសក្តានុពលនៃមហាវិថីសម្តេចតេជោ (៦០ម៉ែត្រ) ដែលពោរពេញទៅដោយគម្រោងអភិវឌ្ឍអចលនទ្រព្យចម្រុះនានា ព្រមទាំង​គម្រោងអភិវឌ្ឍផ្សារទំនើប និងតំបន់ពាណិជ្ជកម្ម ប្រមូលផ្តុំគ្នា នៅលើតំបន់តែមួយ ដែលធ្វើអោយការប្រកបអាជីវកម្ម និងការរស់នៅរបស់លោកអ្នកកាន់តែមានភាពសម្បូរបែប។

គម្រោងនេះផ្ទាល់ ជាបណ្តុំសហគមន៍ទំនើបសម្រាប់ការរស់នៅដ៏ល្អប្រសើរបំផុត ជាមួយនឹងការអភិវឌ្ឍន៍ចម្រុះដែលមានផ្លូវតភ្ជាប់ទៅកាន់ផ្លូវជាតិលេខ២ ក្នុងគម្រោងផ្ទាល់ ដែលបានបែងចែកជាតំបន់សម្រាប់ការរស់នៅ និងតំបន់សម្រាប់ពាណិជ្ជកម្ម ជាពិសេសផ្សារទំនើប ភី​អេច ដាយមិនផ្លេស ត្រូវបានសាងសង់ឡើងជាមួយនឹងរចនាបថដ៏ប្រណីតដ៏ល្អឥតខ្ចោះ បែបទាន់សម័យសមស្របទៅតាមស្តង់ដារអន្តរជាតិ ដែលមានភាពលេចធ្លោជាងគេក្នុងតំបន់ ផ្តល់​ជូន​លោកអ្នក​នូវ​ការ​កម្សាន្ត និង​ជម្រើស​ហាង​ទំនិញ សេវាកម្ម​រាប់​រយ​ប្រភេទ រួមទាំងសាលសន្និសីទ ក្លឹបហាត់ប្រាណ អាងហែលទឹក អមទៅដោយសួនច្បារ ដែលពោរពេញដោយសោភ័ណភាព បែបធម្មជាតិពណ៌បៃតងដ៏ស្រស់បំព្រងផងដែរ។

ចុងក្រោយតំបន់ផ្លូវក្រវ៉ាត់ក្រុងទី២ (៥០ម៉ែត្រ) ហ្សបហោស៍ ម៉ាជេស្ទិក ស្ថិតក្នុង​គម្រោងដឹស្តា មេរាហ្គាដិន  ជាគម្រោង នៅលើផ្លូវក្រវាត់ក្រុងទី2 (ផ្លូវ50ម៉ែត្រ) ដែលមានចំងាយត្រឹមតែ 3 នាទីប៉ុណ្ណោះ  ពីមហាវិថីសម្តេចតេជោ ហ៊ុន សែន (60ម៉ែត្រ) គម្រោងនេះផ្ទាល់ ជាបណ្តុំសហគមន៍សម្រាប់ការរស់នៅដ៏ល្អប្រសើរនិងការអភិវឌ្ឍន៍ចំរុះ ជាមួយ អគារពាណិជ្ជកម្ម បែបទាន់សម័យសមស្របទៅតាមស្តង់ដារអន្តរជាតិ រុក្ខវិថីពោរពេញទៅដោយ លំហធម្មជាតិបៃតង អមដោយផ្កាចម្រុះពណ៌ ព្រមជាមួយក្លឹបហាត់ប្រាណបែបទំនើបទាន់សម័យ សួនច្បារដ៏ស្រស់បំព្រង ធំជាងគេ វេទិកាសិល្បៈកណ្តាលសួនច្បារ ទីធ្លាកីឡា និងទីតាំងពិចនិចសម្រាប់គ្រួសារនិងសួនកុមារ ដែលផ្តល់ជូននូវបរិយាកាសបរិសុទ្ធ ពិតជាធ្វើអោយការរស់នៅប្រកបដោយផាសុកភាព និងភាពស្រស់ថ្លាទ្វេដង ថែមទាំងមានតំបន់ពាណិជ្ជកម្ម ពោរពេញទៅដោយហាងទំនិញ សេវាកម្ម និងអគារពាណិជ្ជកម្ម សម្រាប់បំពេញតម្រូវការក្នុងតំបន់។

សម្រាប់ព័ត៌មានបន្ថែមទាក់ទងមកកាន់ទូរសព្ទលេខ 015 90 6789 , Telegram: Borey Peng Huoth ឬ ចូលទៅកាន់ទំព័រហ្វេសប៊ុក Facebook:www.facebook.com/boreypenghuoth

ដោយៈគង់ សូរិយា

ភ្នំពេញៈ គេហទំព័រអចលនទ្រព្យឈានមុខគេ នៅកម្ពុជា Propertyarea.asia បានសម្រេចចុះកិច្ចព្រមព្រៀងរយៈពេលវែង ជាមួយម្ចាស់គំរោងអភិវឌ្ឍន៍ខុនដូខ្ពស់ជាងគេ​នៅតំបន់ទួលទំពូង Royal Skyland ជាកិច្ចសហការរយៈពេលវែង។

ការចុះហត្ថលេខានេះ ធ្វើឡើងរវាងលោកយិន លាងគង់សហស្ថាបនិកនិងជាអគ្គនាយកគេហទំព័រ Propertyareas.asia និងគេទំព័រ Cambodiafinancialtimes.com និងលោក Liu Quao Zhu ប្រធានផ្នែកផែនការក្រុមហ៊ុន Mingyu Group ដែលកំពុងសាងសង់ខុនដូ Royal SkyLandនៅតំបន់ទួលទំពូល ដែលវានឹងក្លាយជា Landmark ថ្មីមួយសម្រាប់តំបន់នេះ។

លោកយិន លាងគង់អគ្គនាយកគេហទំព័រទាំងពីរខាងលើបានជម្រាបជូនពីប្រវត្តិកកើតនៃគេហទំព័រ Propertyarea.asia ដែលបាននិងកំពុងក្លាយជាស្ថាប័នផ្តល់ព៌តមានអចលនទ្រព្យ ហិរញ្ញវត្ថុ និងទិដ្ឋភាពទូទៅនៃសេដ្ឋកិច្ចឈានមុខគេនៅកម្ពុជា និងទទួល​បានការគាំទ្រពីមិត្តអ្នកអានជាតិ និងអន្តរជាតិ ដោយសារតែគេហទំព័រនេះមានព៌តមានចេ ញផ្សាយជាភាសាខ្មែរ និងអង់គ្លេស។

លោកបន្តថា “យើងបាននិងកំពុងដើរតួនាទី កាន់តែមានសារៈសំខាន់ឡើង ក្នុងទិដ្ឋភាពនៃសេដ្ឋកិច្ច អចលនទ្រព្យ ដោយយើងផ្តល់ព៌តមានលឿន រហ័សអាចទុកចិត្តបាន និងឈរលើមូលដ្ឋានក្រមសីលធ៌មវិជ្ជាជីវៈ”។ លោកបន្តថា “ គេហទំព័រនេះបាននិងកំពុងឆ្ពោះទៅកាន់ភាពជាស្ថាប័នកម្រិតជាតិ ដែលអ្នកវិនិយោគជាតិ អន្តរជាតិអាចយកព៌តមានរបស់យើងទៅប្រើប្រាស់ និងធ្វើជាមូលដ្ឋានចំណេះដឹង និងវិភាគសម្រាប់ជាចំណេះដឹងផង និងសំរាប់យកធ្វើជាមួលដ្ឋាន សម្រាប់សម្រេចចិត្តវិនិយោគផង”។

កិច្ចសហការនេះ Propertyarea.asia នឹងផ្តល់ឲ្យក្រុមហ៊ុន Mingyu Group ដែលកំពុងវិនិយោគគំរោងខុនដូ Royal Skyland នូវកញ្ចប់ព៌តមានជាអត្ថបទ និងវីដេអូព៌តមាន ក្នុងតម្លៃពិសេសមួយ។

លោកយិន លាងគង់បានបន្តថា ទស្សនវិស័យរបស់យើង គឺផ្តល់កិច្ចសហការក្នុងភាពជាដៃគូ ដោយយើងផ្តល់ឲ្យអ្នកវិនិយោគនានា ឬដៃគូពាណិជ្ជកម្មរបស់យើងទទួលបានផលប្រយោជន៍ស័ក្តិសមនឹងទំហំទឹកប្រាក់ ដែលពួកគេចំណាយផ្សព្វផ្សាយជាមួយយើង ពោលគឺយើងឈរលើគោលការណ៍ឈ្នះ ឈ្នះទាំងអស់គ្នា។

ចំណែកលោក Liu Quao Zhu ប្រធានផ្នែកផែនការក្រុមហ៊ុន Mingyu Group បានសម្តែងក្តីរីករាយក្នុងការសហការជាមួយគេហទំព័រ Propertyrea.asia ដោយលោកបានមាន​ប្រសាសន៍ថា លោកបានសិក្សា និងស្រាវជ្រាវពីគេហទំព័រព៌តមានរាប់រយនៅកម្ពុជា ហើ​យយើងបានឃើញគេហទំព័រ Propertyarea.asia ជាគេហទំព័រមួយ ដែលមានលក្ខណៈ ផ្តោតលើព៌តមានអចលនទ្រព្យ សេដ្ឋកិច្ច និងមានភាពលេចធ្លោជាងគេនៅកម្ពុជា។

លោកបន្តថា “បទដ្ឋានវិជ្ជាជីវៈរបស់គេហទំព័រនេះ នឹងមានអនាគតដ៏ប្រសើរនៅ ពេលខាងមុខ ហើយយើងនឹងផ្តល់កិច្ចសហការរយៈពេលវែង ជាមួយគេហទំព័រនេះ”។​ លោកបន្តថា “ក្រុមហ៊ុន Mingyu Groupមានគំរោងបន្តបន្ទាប់ទៀត នាពេលខាងមុខ ហេតុនេះយើងនឹងបន្តសហការគ្នា ដើម្បីធ្វើការរួមគ្នាក្នុងគោលដៅពង្រីកការរផ្សព្វផ្សាយ និងការលក់របស់យើង”៕

ដោយ:ម៉ាលីស

សៀមរាបៈ មន្រ្តីជាន់ខ្ពស់ក្រសួងសាធារណការ និងដឹកជញ្ជូន បានអោយដឹងថា ក្រសួងសាធារណការ និងដឹកជញ្ជូនកោះប្រជុំបន្ទាន់ ដើម្បីជំរុញឱ្យអង្គភាពសាងសង់ ក្រុមការងារត្រួតពិនិត្យបច្ចេកទេស និងមន្ត្រីជំនាញបច្ចេកទេស ពន្លឿនគម្រោងស្ថាបនាហេដ្ឋារចនាសម្ព័ន្ធផ្លូវចំនួន៣៨ខ្សែ នៅក្រុងសៀមរាប ខេត្តសៀមរាប ឱ្យបានចប់មុនថ្ងៃទីថ្ងៃទី២៩ ខែធ្នូ ឆ្នាំ២០២១។

លោក សួង ហេង រដ្ឋលេខាធិការក្រសួងសាធារណការ និងដឹកជញ្ជូន តំណាងលោកទេសរដ្ឋមន្ត្រី ស៊ុន ចាន់ថុល បានអញ្ជើញដឹកនាំកិច្ចប្រជុំបន្ទាន់ដើម្បីពន្លឿនការអនុវត្តគម្រោងគម្រោង ស្ថាបនាហេដ្ឋារចនាសម្ព័ន្ធផ្លូវចំនួន៣៨ខ្សែ នៅក្រុងសៀមរាប ខេត្តសៀមរាប ឱ្យបានចប់សព្វគ្រប់តាមផែនការ ដែលបានគ្រោងទុកនៅថ្ងៃទី២៩ ខែធ្នូ ឆ្នាំ២០២១ ដោយមានការចូលរួមពីអង្គភាពសាងសង់ ក្រុមការងារត្រួតពិនិត្យបច្ចេកទេស មន្ត្រីជំនាញបច្ចេកទេសក្រោមឱវាទក្រសួង និងភាគីពាក់ព័ន្ធផងដែរ។

យោងតាមស្មារតីនៃកិច្ចប្រជុំរបស់គណៈកម្មការ អន្តរក្រសួងកាលពីថ្ងៃទី១៣ ខែវិច្ឆិកា ឆ្នាំ២០២១ នៅ ទីក្រុងសៀមរាប ខេត្តសៀមរាប អង្គប្រជុំបានជំរុញឱ្យអង្គភាពសាងសង់ទាំងអស់ខិតខំប្រឹងប្រែង បញ្ចប់គម្រោងសាងសង់នេះ ឱ្យបានត្រឹមថ្ងៃទី២៩ ខែធ្នូ ឆ្នាំ២០២១ ឱ្យត្រូវនឹងថ្ងៃបញ្ចប់សង្គ្រាមរ៉ាំរ៉ៃនៅកម្ពុជា ដើម្បីតបស្នងសងគុណជូនចំពោះសម្ដេចតេជោនាយករដ្ឋមន្ត្រី ជាថ្ងៃចងចាំមិនអាចបំភ្លេចបាន។

ថ្លែងក្នុងកិច្ចប្រជុំបន្ទាន់នាឱកាសនេះ លោកសួង ហេង បានជំរុញឱ្យអង្គភាពសាងសង់ខិតខំប្រឹង ប្រែងពន្លឿនការងារ ដែលនៅសេសសល់មួយចំនួនរបស់ខ្លួនរួមមាន ការងារអ៊ុតកៅស៊ូ ការងារត បណ្ដាញលូទឹកភ្លៀង និងលូទឹកកខ្វក់ពីខ្នងផ្ទះប្រជាពលរដ្ឋមកប្រព័ន្ធលូមេចំនួន១២២៩៩តំណ ជូនប្រជាពលរដ្ឋដោយឥតគិតថ្លៃ ការសាងសង់ចំណតរថយន្តដោយប្រើប្រាស់បេតុងសរសៃដែក កម្រាស់១៥សង់ទីម៉ែត្រ ការងាររៀបខឿនចិញ្ចើមផ្លូវ និងការងារមួយចំនួនផ្សេងទៀត ដើម្បីឱ្យគម្រោងសាងសង់ហេដ្ឋារចនាសម្ព័ន្ធផ្លូវ៣៨ខ្សែ បញ្ចប់តាមការគ្រោងទុក និងបានស្នើឱ្យក្រុមហ៊ុនផ្តត់ផ្គង់សម្ភារ:ដូចជា៖ ថ្ម កៅស៊ូ និងសម្ភារៈចាំបាច់ផ្សេងទៀត ជូនអង្គភាពអនុវត្តគម្រោងឱ្យបានត្រឹមត្រូវ តាមស្តង់ដាដែលបានកំណត់។

យោងតាមរបាយការណ៍របស់អគ្គនាយកដ្ឋានបច្ចេកទេស នៃក្រសួងសាធារណការ និងដឹកជញ្ជូនឱ្យដឹងថា វឌ្ឍនភាពគម្រោងសាងសង់ហេដ្ឋារចនាសម្ព័ន្ធផ្លូវ៣៨ខ្សែនៅក្រុងសៀមរាប ខេត្តសៀមរាបនេះ គិតត្រឹមថ្ងៃទី១០ ខែវិច្ឆិកា ឆ្នាំ២០២១ ឬរយៈពេលជាង ១១ខែ សម្រេចបាន៨៩,៣៩%នៃទំហំការងារសរុប (២% លឿនជាងផែនការធៀបនឹងរយៈពេលសាងសង់)៕