ភ្នំពេញ ៖ ប្រទេសមហាអនុតំបន់មេគង្គបានបើកកិច្ចប្រជុំចង្អៀតមួយ ដោយពិភាក្សាទៅលើប្រធានបទ សំខាន់ៗ ពាក់ព័ន្ធនឹងការបើកទេសចរណ៍អន្តរជាតិឡើងវិញ បន្ទាប់ពីរឹតបន្តឹងចំពោះភ្ញៀវទេសចរអន្តរជាតិអស់រយៈពេលជិត២ឆ្នាំ ពីព្រោះតែកូវីដ១៩ ។

ប្រធានបទ៤សំខាន់ដែលកម្ពុជាបានចូលរួមក្នុងកិច្ចប្រជុំកាលពីថ្ងៃទី១៧កញ្ញា២០២១ រួមមាន ១) ស្ថានភាពទេសចរណ៍ក្នុងបណ្តាប្រទេសជាសមាជិកមហាអនុតំបន់មេគង្គ ២) ការស្តារ និងការចាប់ផ្តើមវិស័យទេសចរណ៍ឡើងវិញ ៣)ផែនការស្តារទំនាក់ទំនងទេសចរណ៍មហាអនុតំបន់មេគង្គ ៤)ការបង្កើតអង្គភាពទេសចរណ៍មេគង្គនៅកម្ពុជា ។

បើតាមរបាយការណ៍របស់ក្រសួងទេសចរណ៍កម្ពុជាឱ្យដឹងថា លទ្ធផលដែលទទួលបានក្នុងកិច្ចប្រជុំនោះមាន

១). អង្គប្រជុំបានកោតសរសើរ និងបានវាយតម្លៃខ្ពស់ចំពោះលោក Jens Thraenhart ដែលបានដឹកនំាអង្គភាព MTCO បានយ៉ាងល្អប្រសើរក្នុងការជំរុញកិច្ចសហប្រតិបត្តិការទេសចរណ៍មេគង្គ ជាគោលដៅទេសចរណ៍តែមួយ និងអបអរសារទរចំពោះនាយកប្រតិបត្តិថ្មី ដែលនឹងចូលបម្រើការងារនៅអំឡុងខែតុលា ខាងមុខ និងបន្តជំរុញអនុវត្តនូវផែនការស្តារទំនាក់ទំនងវិស័យទេសចរណ៍ឡើងវិញក្នុងមហាអនុតំបន់តំបន់មេគង្គ ផែនការងាររបស់ MTCO និងពង្រឹងទេសចរណ៍ក្នុងតំបន់ឲ្យកាន់តែរឹងមាំបន្ថែមទៀត ។

២). ប្រទេសជាសមាជិកមហាអនុតំបន់មេគង្គទាំងអស់បានលើកឡើងពីអំពីស្ថានភាពទេសចរណ៍ដែលប៉ះពាល់ដោយវិបត្តិកូវីដ-១៩ ផែនការបើកទទួលទេសចរអន្តរជាតិឡើងវិញជាដំណាក់កាល និងបានឯកភាពទាំងស្រុងលើផែនការស្តារទំនាក់ទំនងទេសចរណ៍ឡើងវិញក្នុងមហាអនុតំបន់មេគង្គ ដែលគ្រោងនឹងប្រកាសប្រើប្រាស់ជាផ្លូវការ នៅចុងខែតុលា ឆ្នាំ២០២១ ក្រោមជំនួយបច្ចេកទេស និងថវិកាសម្រាប់ការអនុវត្តពីធនាគារអភិវឌ្ឍន៍អាស៊ី (ADB) ក្នុងនោះ អង្គប្រជុំបានឯកភាពតាមសំណើរបស់កម្ពុជាក្នុងការបញ្ជូលកីឡាទេសចរណ៍ផងដែរ។

៣). កម្ពុជាគ្រោងស្វាគមន៍ធ្វើជាម្ចាស់ផ្ទះ ទទួលអង្គភាពទេសចរណ៍មេគង្គ (Destination Mekong) ជាផ្លូវការនៅអំឡុងត្រីមាសទី៤ ឆ្នាំ២០២១ ដើម្បីជំរុញការផ្សព្វផ្សាយសក្តានុពលទេសចរណ៍មេគង្គ ការពង្រឹងកិច្ចសហប្រតិបត្តិការក្នុងតំបន់ជាមួយវិស័យឯកជន និងជាទម្រង់ផ្តល់យោបល់លើការអភិវឌ្ឍន៍វិស័យទេសចរណ៍តំបន់បានយ៉ាងល្អប្រសើរនិងការស្តារវិស័យទេសចរណ៍ឡើងវិញ ក្នុងនោះ។

៤) តំណាងរបស់ធានាគារអភិវឌ្ឍន៍អាស៊ី (ADB) បានវាយតម្លៃខ្ពស់ចំពោះការអនុវត្តគម្រោងអភិវឌ្ឍន៍ហេដ្ឋារចនាសម្ព័ន្ធប្រកបដោយបរិយាប័ន្នក្នុងវិស័យទេសចរណ៍ នៃប្រទេសកម្ពុជា ឡាវ និងវៀតណាម និងបង្ហាញជំហ៊របន្តគាំទ្រផ្នែកហិរញ្ញវត្ថុ និងជំនួយបច្ចេកទេសដល់តំបន់ GMS បន្ថែមទៀតស្របតាមរយៈ ក្របខណ្ឌយុទ្ធសាស្ត្រមហាអនុតំបន់មេគង្គ ឆ្នាំ២០៣០ ដែលបានអនុម័តដោយថ្នាក់ដឹកនាំកំពូល GMS កាលពីថ្ងៃទី០៩ ខែកញ្ញា ឆ្នាំ២០២១។ ក្នុងនោះ តំណាងឲ្យកម្ពុជាក៏បានលើកពីការខិតខំជំរុញការអនុវត្តគម្រោងកសាងហេដ្ឋារចនាសម្ព័ន្ធទេសចរណ៍ នៅតំបន់ឆ្នេរសមុទ្រ ការអនុវត្តស្តង់ដាទេសចរណ៍អាស៊ាន និងការពង្រឹងសមត្ថភាពដឹកនាំទេសចរណ៍សម្រាប់តំបន់ឆ្នេរសមុទ្រកម្ពុជា។

សម្ដេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាកាលពីថ្ងៃទី១៧ កញ្ញា២០២១នេះថាកម្ពុជាគ្រោងនឹងបើកទទួលស្វាគមន៍ភ្ញៀវទេសចរអន្តរជាតិឡើងវិញនិងធ្វើចត្តាឡីស័ករយៈពេលតែ៧ថ្ងៃប៉ុណ្ណោះ ហើយក្នុងអំឡុងពេលនៃការធ្វើចត្តាឡីស័កនោះ ក៏អនុញ្ញាតឱ្យពួកគាត់ធ្វើដំណើរម្សាន្តទស្សនានៅក្នុងតំបន់ដែលធ្វើចត្តាឡីស័កដែរ ។ ឧទាហរណ៍ថាគាត់ចុះចតនៅភ្នំពេញ គាត់អាចទស្សនានៅតាមរមណីយដ្ឋាននានាក្នុងរាជធានីភ្នំពេញបានផងដែរ ក្នុងអំឡុងពេលធ្វើចត្តាឡីស័ក ៕

ដោយៈសុខុម

ភ្នំពេញ: ទិន្នន័យដែលទីភ្នាក់ងាររដ្ឋាភិបាលសិង្ហបុរី Enterprise Singapore បានចេញផ្សាយកាលពីថ្ងៃសុក្រ ទី១៧កញ្ញា បានបង្ហាញថា ការនាំចេញទំនិញមិនមែនប្រេង (NODX) របស់សិង្ហបុរី រួមទាំងមកកាន់ទីផ្សារកម្ពុជា ផងទទួលបានកំណើនទាបត្រឹមតែ២,៧%ប៉ុណ្ណោះក្នុងខែសីហា។ នេះបើយោងតាមការចុះផ្សាយរបស់សារព័ត៌មាន CNA។

ទោះបីជាទទួលបានកំណើន៩ខែ ជាប់ៗគ្នាយ៉ាងណាក្ដី ក៏តួលេខកំណើនក្នុងខែសីហា បានធ្លាក់ចុះក្នុងអត្រាទាបបំផុតចាប់តាំងពីខែវិច្ឆិកា ឆ្នាំ២០២០ ហើយខុសគ្នាឆ្ងាយពីអត្រាកំណើន៨,៣% ដែលទីភ្នាក់ងារព័ត៌មាន Reuters បានព្យាករទុក។ ការនាំចេញទំនិញមិនមែនប្រេងទទួលបានកំណើន១២,៧%ក្នុងខែកក្កដា។

ការនាំចេញទំនិញមិនមែនប្រេង បានធ្លាក់ចុះ៣,៦%ក្នុងខែសីហា បន្ទាប់ពីធ្លាក់ចុះ០,៩%កាលពីខែកក្កដា បើធៀបនឹងអត្រាកំណើន២,៤% ដែលក្រុមអ្នកជំនាញសេដ្ឋកិច្ចបានព្យាករទុក។

ការនាំចេញគ្រឿងអេឡិចត្រូនិក ទទួលបានកំណើន១៦,៧%ក្នុងខែសីហា ខណៈការនាំចេញផលិតផល មិនមែនគ្រឿងអេឡិចត្រូនិកបានធ្លាក់ចុះ១,៤%ក្នុងខែសីហា បើធៀបនឹងឆ្នាំមុន។

*នាំចេញទៅកាន់ទីផ្សារកំពូលៗ
ការនាំចេញទៅកាន់ទីផ្សារកំពូលៗទាំងមូល ទទួលបានកំណើនក្នុងខែសីហា ប៉ុន្តែការនាំចេញទៅកាន់ប្រទេសចិន និងសហភាពអឺរ៉ុប បានធ្លាក់ចុះ។ កំណើននេះភាគច្រើនទទួលបានពីការនាំចេញទៅកាន់កោះតៃវ៉ាន់ ក្រុងហុងកុង និងប្រទេសម៉ាឡេស៊ី។

ការនាំចេញទៅកាន់កោះតៃវ៉ាន់ ទទួលបានកំណើន៥០.៦% ខណៈការនាំចេញទៅកាន់ទីក្រុងហុងកុង ទទួលបានកំណើន២២,៨% ហើយការនាំចេញទៅកាន់ប្រទេសម៉ាឡេស៊ី ទទួលបានកំណើន១៧,៩%ក្នុងខែសីហា។

ការនាំចេញទៅកាន់បណ្ដាទីផ្សារកំពុងអភិវឌ្ឍន៍ខ្លាំង (Emerging market) ទទួលបានកំណើនទាបត្រឹមតែ២,៦%ប៉ុណ្ណោះ ក្រោយពីទទួលបានកំណើនខ្ពស់ដល់ទៅ៥៩,៨%ក្នុងខែកក្កដា។ កំណើនទាបនេះភាគច្រើន ដោយសារការធ្លាក់ចុះនូវការនាំចេញទៅកាន់អាស៊ីខាងត្បូង ឡាវ មីយ៉ាន់ម៉ា វៀតណាម និងមកកាន់កម្ពុជា ព្រមទាំងទៅកាន់តំបន់មជ្ឈិមបូព៌ាផងដែរ។

ពាណិជ្ជកម្មសរុប ទទួលបានកំណើន១៩,៨%ក្នុងខែសីហា បើធៀបនឹងកំណើន១៨%ក្នុងខែកក្កដា។ ក្នុងនោះការនាំចូលទទួលបានកំណើន១៧,៤% ហើយការនាំចេញទទួលបានកំណើន២២,៨%៕

ដោយៈសុធា

ភ្នំពេញៈ រដ្ឋាភិបាលបាននិងកំពុងជម្រុញកម្មវិធីភាពជាដៃគូ ជាមួយដៃគូអភិវឌ្ឈន៍នានា ដើម្បីអភិវឌ្ឍន៍វិស័យឧស្សាហកម្ម ដើម្បីជំរុញវិស័យនេះឲ្យមានភាពរីកចម្រើនថែមទៀត។

លោកទេសរដ្ឋមន្រ្តី ចម ប្រសិទ្ធិ រដ្ឋមន្ដ្រីក្រសួងឧស្សាហកម្ម វិទ្យាសាស្ដ្រ បច្ចេកវិទ្យា និងនវានុវត្តន៍ និងជាប្រធាន NCB អង្គភាពសម្របសម្រួលថ្នាក់ជាតិ បានលើកឡើងក្នុងកិច្ចប្រជុំកាលពីពេលថ្មីៗនេះថា កិច្ចប្រជុំនេះគឺ ដើម្បីប្រគល់ភារកិច្ចភាពជាដៃគូនិងដៃគូអភិវឌ្ឍន៍ (PDWG) នៃអង្គភាពសម្របសម្រួលថ្នាក់ជាតិ (NCB) នៃកម្ម វិធី ដើម្បី ភាពជា ដៃគូ ប្រទេស (PCP) ក្នុងយន្តការនៃការអនុវត្តកម្មវិធី ដើម្បីភាពជាដៃគូប្រទេស (PCP) ២០២០-២០២៣ ដែលកម្ពុជាជាប្រទេសទី១ នៅអាស៊ីប៉ាស៊ីហ្វីកទទួលបានកម្មវិធីនេះ ពីអង្គការសហប្រជាជាតិ ជួយគាំទ្រដល់គោលនយោបាយអភិវឌ្ឍន៍ឧស្សាហកម្ម២០១៥-២០២៥ របស់រាជរដ្ឋាភិបាល ក្នុងគោលបំណងសម្រេចបានគោលដៅ អភិវឌ្ឍន៍ឧស្សាហកម្មប្រកបដោយ ចីរភាព និងបរិយាប័ន (Inclusive and Sustainable Industrial Development-ISID) ដែលជាគោលដៅអភិវឌ្ឍទី៩របស់អង្គការសហប្រជាជាតិ។

កម្មវិធីដើម្បីភាពជាដៃគូប្រទេសនេះ គ្របដណ្ដប់លើផ្នែកធំៗ២ និងផ្នែកអន្ដរវិស័យចំនួន៥ រួមមាន ផ្នែកទី១ ស្ដីអំពីការអភិវឌ្ឍខ្សែសង្វាក់តម្លៃកសិកម្ម រួមទាំងការភ្ជាប់ជាមួយវិស័យទេសចរណ៍ និងផ្នែកទី២ ស្ដីអំពីការធ្វើពិពិធកម្មឧស្សាហកម្ម ការអភិវឌ្ឍតំបន់សេដ្ឋកិច្ចពិសេស និងនវានុវត្តន៍ រួមទាំងផ្នែកអន្ដរវិស័យមួយចំនួន ដែលចែកចេញជា៣ផ្នែកដួចជា (១) វិស័យសេដ្ឋកិច្ច ដែលក្នុងនោះមាន គោលនយោបាយឧស្សាហកម្ម និងស្ថិតិ និងហេដ្ឋារចនាសម្ព័ន្ធគុណភាព (២) វិស័យបរិស្ថាន ដែលក្នុងនោះមានថាមព​លប្រកបដោយចីរភាព និងសេដ្ឋកិច្ចចក្រា (Circular Economy) និង (៣) ផ្នែកសង្គម ដែលក្នុងនោះមាន ការផ្ដល់អំណាចទៅស្ដ្រី និងការបង្កើតការងារជូនយុវជន។ ថវិកាសរុបនៃកម្មវិធី ដើម្បីភាពជាដៃគូប្រទេស២០២០-២០២៣នេះ ត្រូវបានប៉ាន់ស្មានប្រមាណ៦០លានដុល្លាសហរដ្ឋអាមេរិក៕

ដោយៈសុខុម

អន្តរជាតិៈ ប្រទេសអារ៉ាប់រួមអេមីរ៉ាត នឹងបោះទុនវិនិយោគរហូតដល់ទៅ១៤ពាន់លានដុល្លារ នៅប្រទេសអង់គ្លេស ក្នុងរយៈពេល៥ឆ្នាំខាងមុខ ខណៈប្រទេសនេះកំពុងព្យាយាម ធ្វើពិពិធកម្មសេដ្ឋកិច្ចរបស់ខ្លួនឱ្យហួសពីវិស័យប្រេង។ នេះបើយោងតាមសារព័ត៌មាន CNN ចុះផ្សាយកាលពីថ្ងៃទី១៦ កញ្ញា។

ការិយាល័យវិនិយោគ (Office for Investment) របស់អង់គ្លេស និងមូលនិធិវិនិយោគ Mubadala នៃប្រទេសអារ៉ាប់រួមអេមីរ៉ាត បានប្រកាសពីគម្រោងវិនិយោគមហាសាលនេះ តាមរយៈសេចក្ដីថ្លែងការណ៍មួយ កាលពីថ្ងៃព្រហស្បតិ៍ សប្ដាហ៍នេះ ដោយលើកឡើងថា ការវិនិយោគនេះនឹងជួយជំរុញកំណើនសេដ្ឋកិច្ច និងបង្កើតការងារសម្រាប់ពលរដ្ឋក្នុងប្រទេសទាំង២ ព្រមទាំងបង្កើនការវិនិយោគលើបច្ចេកវិទ្យា ហេដ្ឋារចនាសម្ព័ន្ធ និងថាមពលកកើតឡើងវិញផងដែរ។

ប្រទេសអារ៉ាប់រួមអេមីរ៉ាត បានបោះទុនវិនិយោគចំនួន១,៥ពាន់លានដុល្លារ ចូលក្នុងសេដ្ឋកិច្ចអង់គ្លេស រួចមកហើយចាប់តាំងពី “កិច្ចព្រមព្រៀងភាពជាដៃគូវិនិយោគ” រវាងប្រទេសទាំង២ ត្រូវបានបង្កើតឡើងកាលពីខែមីនា ដើមឆ្នាំនេះ។

លោក Khaldoon Al Mubarak នាយកប្រតិបត្តិមូលនិធិវិនិយោគ Mubadala បានថ្លែងថា “ការពង្រីកភាពជាដៃគូវិនិយោគរបស់យើងនៅថ្ងៃនេះ នឹងជួយពន្លឿនការផ្តល់ហិរញ្ញប្បទាន និងនវានុវត្តន៍ថ្មីក្នុងវិស័យសំខាន់ៗ ដែលមានសារៈសំខាន់សម្រាប់ជួយជំរុញកំណើនសេដ្ឋកិច្ចនៃប្រទេសទាំង២”។លោកបន្ថែមទៀតថា “យើងកំពុងអភិវឌ្ឍអន្តរកាលថាមពលប្រកបដោយមហិច្ឆតា និងកម្មវិធីវិនិយោគលើបច្ចេកវិទ្យា និងហេដ្ឋារចនាសម្ព័ន្ធដែលជួយបង្កើតការងារ និងពង្រឹងទំនាក់ទំនងពាណិជ្ជកម្ម រវាងប្រទេសយើងទាំង២”។

កិច្ចព្រមព្រៀងនេះ នឹងពង្រឹងផែនការរយៈពេល១០ឆ្នាំ របស់អារ៉ាប់រួមអេមីរ៉ាត ដែលត្រូវបានបង្ហាញកាលពីដើមខែនេះ ដើម្បីបង្កើនទំហំសេដ្ឋកិច្ចរបស់ខ្លួនទ្វេដង និងដើម្បីទាក់ទាញការវិនិយោគផ្ទាល់ពីបរទេស (FDI) ឱ្យបានចំនួន១៥០ពាន់លានដុល្លារ នៅត្រឹមឆ្នាំ២០៣០។ ប្រទេសផលិតប្រេង និងឧស្ម័នហ្គែសដ៏ធំមួយនេះ ចង់បង្កើនការនាំចេញរួមទាំងទៅកាន់ប្រទេសរុស្ស៊ី និងប្រទេសចិន ផងដែរ ហើយទាក់ទាញជនបរទេសដែលមានទេពកោសល្យ តាមរយៈការបន្ធូរបន្ថយលក្ខខណ្ឌទិដ្ឋាការ។

ក្រោមកិច្ចព្រមព្រៀងនេះជាមួយអង់គ្លេស ការវិនិយោគនានានឹងត្រូវផ្តល់អាទិភាពដោយផ្អែកលើសក្តានុពល នៃគម្រោងទាំងនោះ ដើម្បីជួយគាំទ្រដល់ការបង្កើតការងារក្នុងប្រទេសទាំង២ ពង្រឹងសមត្ថភាពស្រាវជ្រាវ និងអភិវឌ្ឍន៍ថ្នាក់ជាតិ ក៏ដូចជារឹតចំណងទំនាក់ទំនងសេដ្ឋកិច្ចផងដែរ៕ CNN៕