ដោយៈវឌ្ឍនៈ

ភ្នំពេញៈ ផ្លូវលេខ៤៣ ក្នុងទឹកដីខេត្តកំពត ដែលជាគម្រោងអភិវឌ្ឍន៍ផ្លូវថ្មី បាននិងកំពុងទាក់ទាញវិនិយោគិនជាច្រើន ចូលទៅបណ្ដាក់ទុនវិនិយោគ ធ្វើជាគំរោងតំបន់លំហែកាយ ដូចជា ការទិញដីសម្រាប់សង់ផ្ទះលំហែ និងការទិញដីធំៗសម្រាប់ពុះជាចំការលំហែកាយជាដើម ។

លោក កែវ សុជាតិប្រធានក្រុមហ៊ុនអចលនទ្រព្យ KW Cambodia ប្រចាំខេត្តកំពតបានឱ្យដឹងនារសៀលថ្ងៃទី១៦ កញ្ញានេះថា ផ្លូវនេះជាផ្លូវថ្មីមួយក្នុងខេត្តកំពត ហើយក៏កំពុងទាក់ទាញ នូវការវិនិយោគទៅលើការអភិវឌ្ឍជាផ្ទះលំហែ និងចំការលំហែ ។ លោកថា បច្ចុប្បន្នមានក្រុមហ៊ុនមួយចំនួន បានចូលទៅកាន់តំបន់នោះ ដើម្បីធ្វើការអភិវឌ្ឍគម្រោងរបស់ខ្លួនបណ្ដើរៗហើយ និងធ្វើឱ្យតម្លៃដីធ្លីនៅតាមបណ្ដោយផ្លូវនោះ បានស្ទុះងើបមួយកម្រិតថែមទៀតផងដែរ។

លោកបន្តថា “អ្នកដែលមានដីផ្ទាល់ខ្លួននៅតំបន់នោះ ដែលទិញយូរមកហើយនោះក៏ចាប់ផ្ដើមធ្វើសកម្មភាពអភិវឌ្ឍន៍ជាចំការ ឬអភិវឌ្ឍន៍ជាផ្ទះលំហែ។ ចំណែកវិនិយោគិនផ្សេងទៀតក៏ទិញដីធំៗ ពុះជាឡូត៏ប្រភេទដីលំហែ សម្រាប់លក់ជូនអតិថិជននៅពេលខាងមុខនេះ”។ លោកបន្តថា “អ្នកអភិវឌ្ឍន៍ភាគច្រើននៅតំបន់មួយនេះ ជាវិនិយោគិនក្នុងស្រុក ដោយមិនទាន់មានវិនិយោគិនក្រៅប្រទេស បណ្ដាក់ទុនវិនិយោគក្នុងតំបន់មួយនេះនៅឡើយ”។

លោកបន្ថែមថា កាលពីមុនតម្លៃនៅតាមបណ្ដោយផ្លូវមួយនេះ មានតម្លៃត្រឹមពីរបីដុល្លារ ឬយ៉ាងច្រើនត្រឹម៥ដុល្លារអាមេរិកក្នុងមួយម៉ែត្រការ៉េ ប៉ុន្តែពេលនេះវាបានហក់ឡើងចាប់ពី៥ដុល្លារអាមេរិកឡើងទៅហើយ គឺអាស្រ័យលើស្ថានភាពដីធ្លី ទីតាំង។

មន្ត្រីជាន់ខ្ពស់នៃរាជរដ្ឋាភិបាលកម្ពុជា លោកស៊ុន ចាន់ថុល រដ្ឋមន្ត្រីក្រសួងសាធា​រណការនិងដឹកជញ្ជូនបានបញ្ជាក់ថា រដ្ឋាភិបាលបានកំណត់យកតំបន់ឆ្នេរ ជាទិសដៅអភិវឌ្ឍន៍ ដូច្នេះរដ្ឋាភិបាលបានយកចិត្តទុកដាក់អភិវឌ្ឍន៍ផ្លូវ និងហេដ្ឋារចនាសម្ព័ន្ធទៅកាន់តំបន់ឆ្នេរឱ្យកាន់តែងាយស្រួល សម្រាប់ទេសចរធ្វើដំណើរ ក៏ដូចជា សម្រួលដល់វិនិយោគិនទៅកាន់ទឹកដីខេត្តមាត់សមុទ្រផងដែរ ។

ជាការកត់សម្គាល់នៅពេលគម្រោងរបស់រដ្ឋាភិបាលប្រកាស ក៏ដូចជាចាប់ផ្ដើមអភិវឌ្ឍន៍ គេសង្កេតឃើញថា តែងតែមានការចាប់អារម្មណ៍ពីសំណាក់វិនិយោគិន ក៏ដូចជាធ្វើឱ្យតម្លៃដីធ្លីនៅតំបន់អភិវឌ្ឍន៍នោះ តែងមានកំណើនជាបន្តបន្ទាប់ ដូច្នេះហើយទើបរដ្ឋាភិបាលបានជំរុញការអភិវឌ្ឍគម្រោងផ្សេងៗ ជាពិសេសគម្រោងហេដ្ឋារចនាសម្ព័ន្ធផ្ទាល់តែម្ដង។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីមបានមានប្រសាសន៍ថា ខេត្តកំពតជាតំបន់មានសក្តានុពលខ្ពស់ លើការវិនិយោគរមណីយដ្ឋានសម្រាប់លំហែរកាយ និងផ្ទះលំហែរ ដោយសារខេត្តមានសម្បូរធនធានធម្មជាតិមានដងព្រែក ជួរភ្នំ សមុទ្រ ពិសេសមានចម្ងាយជិតរាជធានីភ្នំពេញ បើធៀបនឹងក្រុងព្រះសីហនុ។

លោកបន្តថា “ដោយសារលក្ខខ័ណ្ឌអំណោយផលទាំងនេះហើយ ទើបធ្វើឲ្យខេត្តកំពតទាក់ទាញការវិនិយោគលើវិស័យដីធ្លី និងទីផ្សារផ្ទះលំហែរ ពិសេសខេត្តនេះមានចំណុចពិសេសជាច្រើន ក្នុងការទាក់ទាញភ្ញៀវទេសចរណ៍ជាតិ អន្តរជាតិ”៕

ដោយ៖ សុជាតា

យោងតាមការិយាល័យជាតិនៃប្រទេសចិនបានលើកឡើងថា ទីផ្សារអចលនទ្រព្យបន្តប្រឈមមុខនឹងកំណើនយឺតយ៉ាវពីព្រោះតែការត្រួតពិនិត្យតឹងតែងទៅលើបទបញ្ញត្តិទីផ្សារ និងធ្វើឱ្យការចុះបញ្ជីអចលនទ្រព្យបានធ្លាក់ចុះ ។

តាមការិយាល័យស្ថិតតថា តម្លៃគេហដ្ឋដ្ឋានថ្មីនៅទីក្រុងធំៗដូចជា ទីក្រុងប៉េកាំង ទីក្រុងសៀងហៃ ហ្សិនជិន និង ទីក្រុង Guangzhou បានកើនឡើង ០.៣ ភាគរយនៅខែសីហា នេះបើប្រៀបធៀបនឹងខែកក្កដា ដែលមានអត្រា ០.៤ ភាគរយ ។ ចំពោះទីក្រុងលំដាប់លេខពីរប្រមាណ ៣១ ទីក្រុងបានកើនឡើង ០.២ ភាគរយនៅតម្លៃផ្ទះថ្មី ខណៈទីក្រុងលំដាប់ទីបីដែលមានចំនួន ៣៥ ទីក្រុងបានមើលឃើញកំណើនមិនមានការផ្លាស់ប្តូរនោះទេ។

អ្នកនាំពាក្យការិយាល័យសិ្ថតិជាតិ លោក FU Linghui បានថ្លែងក្នុងសន្និសីទសាព័ត៌មានមួយថា ការទិញ លក់អចលនទ្រព្យគឺស្ថិតនៅស្ថេរភាពក្រោមគោលការណ៍ គេហដ្ឋានសម្រាប់ការរស់នៅ មិនមែនសម្រាប់ទិញទុកលក់ចំណេញនោះទេ។

បើបៀបធៀបនឹងរយៈពេលដូចគ្នា តម្លៃគេហដ្ឋានថ្មីនៅទីក្រុងលំដាប់លេខមួយបានកើនឡើង ៥.៧ ភាគរយនៅខែសីហា ពោលគឺមានធ្លាកចុះពីកំណើន ៦ ភាគរយនៅខែកក្កដាកន្លងទៅនេះ ខណៈទីក្រុងលំដាប់លេខពីរ និង លេខបីបានកើនឡើង ៤.៤ ភាគរយ និង ២.៨ ភាគរយរៀងៗគ្នា។

ផ្អែកទៅលើគោលការណ៍ និងត្រួតពិនិត្យដោយច្បាប់របស់ប្រទេសបានព្យាករណ៍ពីការទប់ស្កាត់នូវហានិភ័យហិរញ្ញវត្ថុ ដែលធ្វើអោយកម្ចីធនាគារចំពោះទីផ្សារអចលនទ្រព្យបានថមថមល្បឿននៅឆមាសទីមួយឆ្នាំ ២០២១នេះ។

បើយោងតាមទិន្នន័យផ្លូវការ បានបង្ហាញអោយដឹងថា កម្ចីចំពោះវិស័យអចលនទ្រព្យបានកើនឡើង ៩.៥ ភាគរយបើប្រៀបធៀបនឹងឆ្នាំមុន ដែលទំហំទឹកប្រាក់ប្រមាណជិត ៨ ទ្រីលានដុល្លារ ដោយកម្ចីថ្មីនេះត្រូវបានកំណត់សម្រាប់តំរូវការអ្នកតាំងទីលំនៅសម្រាប់រស់នៅផងដែរ។

លោក Fu អ្នកនាំពាក្យការិយាល័យស្ថិតិជាតិបានលើកឡើងថា ទីផ្សារអចលនទ្រព្យប្រទេសចិនរំពឹងទុកនៅតែមានស្ថេរភាព ដោយផ្អែកទៅកត្តាមួយចំនួនដូចជា ការសាងសង់ផ្អែកលើទីផ្សារ និងវិធានការច្បាប់បន្តកើនមាន ៕

ដោយៈសុជាតា

វៀតណាមៈ ទីផ្សារអចលនទ្រព្យនៅប្រទេសវៀតណាម បានរក្សាសញ្ញាវិជ្ជមានដោយតំរូវការជួលអាគារពាណិជ្ជនៅបន្តកើនឡើង ជាមួយនឹងតំបន់ពាណិជ្ជកម្មធំៗដូចជា ទីក្រុងហាណូយ និងទីក្រុង ហូជីមិញនៅត្រីមាសទីពីឆ្នាំ ២០២១ ដែលឈានទៅរកភាពប្រសើរឡើងដូចមុនវិបត្តិ Covid 19។

បើទោះបីជាមានប្រសើរឡើងនៅវិស័យអចលនទ្រព្យ នៅប្រទេសវៀតណាមសម្រាប់ត្រីមាសទីពីរនេះក៏ដោយ ប៉ុន្តែអ្នកជំនាញបានព្រមាន ពីការប្រឈមមុខសម្រាប់រយៈពេលចុងឆ្នាំនេះ ស្របពេលដែលរដ្ឋាភិបាលបានរឹតបន្តឹង វិធានការត្រួតពិនិត្យលើស្ថានភាពជំងឺកូវិត១៩ ដែលបណ្តាលអោយមានការកម្រិត ទៅថ្លៃជួលសម្រាប់បណ្តាខែចុងក្រោយនៃឆ្នាំ ២០២១នេះ។

យោងតាមការវាយតម្លៃរបស់ភ្នាកងារអចលនទ្រព្យCBRE បានបង្ហាញអោយដឹងថា វីរុសប្រភេទថ្មីកូវីដ១៩ បានធ្វើអោយរដ្ឋាភិបាលចេញវិធានការ រឹតបណ្តឹងដែលបន្តប៉ះពាល់ទៅដល់សេដ្ឋកិច្ច និងទីផ្សារអចលទ្រព្យនៅតំបន់អាស៊ីប៉ាស៊ីហ្វិច ជាពិសេសតំបន់សេដ្ឋកិច្ចកំពុងលូតលាស់។

ហេតុដូចនេះហើយ អ្នកជំនាញបានជំរុញរដ្ឋាភិបាលតំបន់អាស៊ី ប៉ាស៊ីហ្វិចបន្តលើកកម្ពស់គោលនយោបាយរូបិយវត្ថុសមស្រប ដើម្បីឆ្លើយតបទៅនឹងដំណាក់ងើបឡើងវិញនូវសេដ្ឋកិច្ចនេះ។

សម្រាប់ទីផ្សារផ្នែកលក់រាយប្រទេសវៀតណាម ត្រូវបានអ្នកជំនាញមើលឃើញថា បានបន្តធ្លាក់ចុះនៅត្រីមាសទីពីឆ្នាំ២០២១នេះ ដោយរដ្ឋាភិបាលវៀតណាមបានអនុវត្តនូវគម្លាតសង្គមនៅបណ្តាខេត្តក្រុង ទាំងខាងជើង និងខាងត្បូងប្រទេស។

ប្រឈមមុខនឹងបញ្ហានេះ អ្នកលក់រាយភាគច្រើនបានប្រើប្រាស់ សេវាកម្មផ្សព្វផ្សា​យការលក់ផលិតផលតាមប្រព័ន្ធអនឡាញ ដោយវិធីសាស្រ្តនេះបានព្យាករណ៍ថា នឹងក្លាយទៅជាស្តង់ដារអាជីវកម្មលក់រាយថ្មី ដើម្បីជំនះនឹងវិបត្តិ កូវីត១៩ នេះ៕

ដោយៈតារា

ភ្នំពេញៈ លោក​ឧកញ៉ា ចេ​ង ខេ​ង អគ្គនាយក​ក្រុមហ៊ុន​អចលនទ្រព្យ​ស៊ី​ភី​អិ​ល បាន​មាន​ប្រសាសន៍​ថា បច្ចុប្បន្ន​នេះ ទាំង​វិស័យ​សំណង់ និង​ដីធ្លី គឺ​សុទ្ធតែ​មាន​សក្ដានុពល​វិនិយោគ​ដូច​គ្នា។

លោកបន្តថា គេ​សង្កេត​ឃើញ​ថា វិនិយោគ​ដែល​មិនសូវ​មាន​ធនធាន រឺ​ទុន​ច្រើន​នោះ ពួក​គេ​ចាប់​យក​ការ​វិនិយោគ​ទៅ​លើ​ដីធ្លី និង​ពុះ​ជា​ឡូត៍​លក់​ជូន​ទៅ​ប្រជាពលរដ្ឋ ​ដែល​មាន​ប្រាក់​ចំណូល​ទាប និង​មធ្យម​សម្រាប់​សង់ផ្ទះ​នៅ​ពេល​អនាគត ហើយ​សម្រាប់​អ្នក​ដែល​មាន​ធនធាន​និង​ទុន​ច្រើន គេ​ក៏​បោះទុន​វិនិយោគ​ ទៅ​លើ​សំណង់​អគារ​នានា​ ដែល​គេ​បានឃើញ​ថា នៅ​ភ្នំពេញ​មាន​សំណង់​អគារ​ខ្ពស់​ៗ​ច្រើន​ កំពុង​រីក​ដុះដាល​ដូច​ផ្សិត។

លោក​ឧកញ៉ា​បន្ត​ថា ក្រោយ​ពេល​វិស័យ​ដីធ្លី​បាន​ហក់​ឡើង​ខ្លាំង នៅ​រយៈពេល​ក្រោយ​នេះ យើង​ក៏​បាន​សង្កេត​ឃើញ​ថា មិនមែន​មាន​តែ​អ្នក​ដែល​មានចំណេះ​ដឹង និង​បទ​ពិសោធន៍​ក្នុង​វិស័យ​នេះ ដាក់​ទុន​វិនិយោគ​នោះ​ទេ តែ​គេ​ក៏​បានឃើញ​ថា​មាន​អ្នក​វិនិយោគ​ក្នុង​វិស័យ​ផ្សេង ​ក៏​បាន​ងាក​មក​រក​វិស័យ​ដីធ្លី​នេះ​ដែរ។ ជាក់ស្ដែង ដូច​ជា​អ្នកសិល្បៈ​ជា​ច្រើ​ន​ បាន​ងាក​ទៅ​រក​ការ​វិនិយោគ​ក្នុង​វិស័យ​ដីធ្លី ដោយ​ពុះ​ជា​ដី​ឡូត៍​សម្រាប់​លក់ ដែល​វា​ជា​ព្រួយបារម្ភ​មួយ​នៅ​ពេល​អនាគត។

លោក​ឧកញ៉ាចេ​ង ខេ​ង មាន​ប្រសាសន៍​បន្ថែម​ទៀត​ថា តែ​យ៉ាងណា​ក៏​ដោយ ក៏​យើង​បានឃើញ​ថា ក្រសួង​រៀបចំ​ដែនដី ​នគរូបនីយកម្ម ​និង​សំណង់ ​បាន​ទប់ស្កាត់​នូវ​សកម្មភាព​មួយ​ចំនួន ពី​ការ​ពុះ​ដី​ឡូត៍ ដូច​ជា​រៀបចំ​ជា​ប្លង់​មេ​មួយ និង​តម្រូវ​អោយ​មានការ​រៀបចំ​នូវ​ហេដ្ឋារចនាសម្ព័ន្ធ​ត្រឹមត្រូវ​ផង​ដែរ។

លោក​ឧកញ៉ា​បន្ត​ទៀត​ថា នៅ​ប្រទេស​មួយ​អាច​រីក​ចម្រើន​ទៅ​បាន​លើ​វិស័យ​ណាមួយ គឺ​ត្រូវការ​មាន​ធនធានមនុស្ស ​ក្នុង​វិស័យ​នោះ​បាន​ច្បាស់លាស់ ជាក់ស្ដែង​វិស័យ​ដីធ្លី​ និង​អចលនទ្រព្យ​ទាំងមូល​នេះ​ជាដើម បើ​ចង់អោយ​រីក​ចម្រើន​ទៅ​បាន គឺ​ត្រូវការ​អ្នក​វិនិយោគ ដែល​មានចំណេះ​ដឹង​ជំនាញ​ និង​បទ​ពិសោធន៍​ទើប​មិន​ធ្វើ​អោយ​វិស័យ​នោះ មាន​ហានិភ័យ តែ​បើសិនជា​អ្នក​វិនិយោគ​ទាំងនោះ មិន​មានបទពិសោធន៍ មិន​មាន​ជំនាញ​និង​ចំណេះដឹង គឺ​អាច​នឹង​ប្រឈម​ហានិភ័យ​ខ្លាំង​ណាស់។

លោកឧកញ៉ាចេង ខេងបានបន្ត​ថា បើសិនជា​ធនធានមនុស្ស​ ដែល​មាន​ជំ​ណេះ​ដឹង ដោយ​បាន​ឆ្លងកាត់ ​សាលា​បណ្ដុះបណ្ដាល​ត្រឹមត្រូវ​ហើយ តែ​ពួក​គាត់​មិន​យកចំណេះ​ដឹង​នោះ ទៅ អនុវត្ត​ជាក់ស្ដែង ក៏​មិន​អាច​ធ្វើ​អោយ​វិស័យ​នេះ មា​នាករ​រីក​ចម្រើន​បាន​ដែរ ដូច្នេះ​អ្នក​ដែល​មានចំណេះ​ដឹង​ផ្នែក​ណាមួយ ​គួរតែ​យកចំណេះ​ដឹង​នោះ​ ទៅ​អនុវត្ត​ក្នុង​ការងារ​ជាក់ស្ដែង ដើម្បី​អោយ​ក្លាយជា​ជំនាញ ដើម្បីរក​លុយ​សម្រាប់​គ្រួសារ និង​សង្គម​ជាតិ​យើង៕