ដោយៈសុខុម

សិង្ហបុរី: ប្រទេសសិង្ហបុរី មានគម្រោងនាំចូលពលករបម្រើការងារ តាមផ្ទះពីកម្ពុជា ខណៈតម្រូវការសេវាជូតសម្អាតផ្ទះក្រៅម៉ោង ក្នុងប្រទេសនេះកើនឡើងខ្ពស់ អំឡុងវិបត្តិកូវីដ-១៩។ នេះបើយោងតាមសារព័ត៌មាន CNA ចុះផ្សាយនៅថ្ងៃទី៦ កញ្ញា នេះ។

កាលពីចុងឆ្នាំមុន លោក Marcus Lim បានទំនាក់ទំនងទៅក្រុមហ៊ុនផ្ដល់សេវាកម្មជូតសម្អាតផ្ទះចំនួន៤ ដើម្បីសួរអំពីសេវាកម្មជូតសម្អាតផ្ទះក្រៅម៉ោង។ ហើយមានតែក្រុមហ៊ុន២ប៉ុណ្ណោះដែលទាក់ទងមកគាត់វិញ។

បុរសវ័យ៣៨ឆ្នាំរូបនេះ ចង់ជួលមនុស្សឱ្យមកជួយសម្អាតអាផាតម៉ិន របស់គាត់២សប្ដាហ៍ម្ដង ប៉ុន្តែក្រុមហ៊ុនទាំងនោះប្រាប់គាត់ថា ពួកគេគ្មានមនុស្សទេ។ ពួកគេនឹងទទួលយកការងារនេះ ប្រសិនបើគាត់ប្រើសេវាជូតសម្អាតប្រចាំសប្តាហ៍។ ក្រោយព្យាយាមរកបន្តទៀត ទីបំផុតគាត់ជួលបានស្ត្រីជនជាតិសិង្ហបុរី ម្នាក់ដែលជួយជូតសម្អាតផ្ទះរបស់គាត់២ដងក្នុងមួយខែ។

តម្រូវការសេវាកម្មជូតសម្អាតផ្ទះ បានកើនឡើងខ្លាំង ដោយក្រុមហ៊ុននានាទទួលបានកំណើនពី២០ភាគរយ ទៅ៥០ភាគរយ ចាប់តាំងពីផ្ទុះការរីករាលដាលវីរុសកូវីដ-១៩ មក។

លោកDaniel Thong ស្ថាបនិក និងជានាយកប្រតិបត្តិក្រុមហ៊ុន ផ្ដល់សេវាជូតស  ម្អា​តផ្ទះ Nimbus បានលើកឡើងថា ក្រុមហ៊ុនរបស់លោកទទួលបាន “កំណើនជិត៥០%”ដែលភាគច្រើន ដោយសារមនុស្សងាកទៅធ្វើការងារពីផ្ទះកាន់តែច្រើន និងនៅផ្ទះច្រើនជាងមុន។ ក្រុមហ៊ុននេះមានបុត្រសម្ព័ន្ធមួយឈ្មោះ Rooma ដែលផ្តល់សេវាកម្មថែទាំផ្ទះតាមតម្រូវការ និងសេវាកម្មជូតសម្អាតផ្ទះក្រៅម៉ោងផងដែរ។

*កម្មវិធីសេវាកម្មជូតសម្អាតផ្ទះតាមគ្រួសារ

ក្រុមហ៊ុនផ្ដល់សេវាកម្មជូតសម្អាតផ្ទះមួយទៀត ដែលមានឈ្មោះថា Ministry of Clean ទទួលបានកំណើនជាង២០ភាគរយ សម្រាប់តម្រូវការសេវាកម្មជូតសម្អាតផ្ទះ។  លោក Rio Goh នាយកក្រុមហ៊ុននេះថ្លែងថា តម្រូវការខ្លះចេញពីការបោសសម្អាតក្រោយពេលរើចេញ នៅពេលដែលពលករបរទេសចាកចេញពីសិង្ហបុរី ឬការជូតសម្អាតបណ្ដោះ​អាសន្ន ខណៈគ្រួសារនានារង់ចាំអ្នកបម្រើការងារ តាមផ្ទះដែលពួកគេបានជួលមកដល់។

ដោយសារតែការរឹតបន្តឹងព្រំដែន ការមកដល់របស់ពលករបរទេស ដែលបម្រើការងារតាមផ្ទះ ត្រូវបានពន្យារពេលសម្រាប់គ្រួសារជាច្រើន នៅក្នុងប្រទេសដែនកោះដ៏តូចមួយនេះ។ ក្រុមហ៊ុន Ministry of Clean បានបន្តថា តម្រូវការសេវាកម្មបាញ់ថ្នាំសម្លាប់មេរោគក៏កំពុងកើនឡើងផងដែរ។

ទាំងក្រុមហ៊ុន Nimbus និងក្រុមហ៊ុន Ministry of Clean សុទ្ធតែស្ថិតក្រោមកម្មវធីសេវាកម្មជូតសម្អាតផ្ទះ តាមគ្រួសារដែលមានឈ្មោះថា Household Services Scheme។

ក្រសួងនាំពលករ (MOW) របស់សិង្ហបុរីបានអនុម័តកម្មវិធីនេះ ជាផ្លូវការកាលពីថ្ងៃទី០១ កញ្ញា។  កម្មវិធីនេះត្រូវបានដាក់ឱ្យដំណើរការសាកល្បង នៅឆ្នាំ២០១៧ ដោយមាន១៥ក្រុមហ៊ុនចូលរួម។ ក្រសួងនេះនិយាយថា បច្ចុប្បន្នមានក្រុមហ៊ុនចូលរួមចំនួន៧៦ដែលផ្តល់សេវាកម្ម ជូតសម្អាតផ្ទះដល់ជាង១០.០០០គ្រួសារ។

ក្រុមហ៊ុនទាំងនេះ ត្រូវបានអនុញ្ញាតឱ្យជួលពលការិនី មកពីឥណ្ឌា យ៉ាន់ម៉ា ស្រីលង្កា និងថៃ បន្ថែមពីលើប្រទេស ឬតំបន់មានស្រាប់ ដែលត្រូវបានអនុម័តសម្រាប់វិស័យសេវាកម្មនេះ។ ទន្ទឹមនេះប្រទេសកម្ពុជា ក៏នឹងត្រូវដាក់បញ្ចូលបន្ថែមក្នុងបញ្ជីប្រទេសដែលបានអនុម័តនេះនៅថ្ងៃពុធ ទី៨ កញ្ញា ផងដែរ។

ក្រុមហ៊ុននានាដែលស្ថិតក្រោមកម្មវិធីខាងលើនេះ ក៏អាចដាក់ពាក្យសុំប័ណ្ណការងារបន្ថែមដើម្បីជួលកម្មករ បម្រើការងារតាមផ្ទះបានបន្ថែមទៀតផងដែរ។

*ពលករបម្រើការងារតាមផ្ទះទៅពីកម្ពុជា

សារព័ត៌មាន CNA បានទំនាក់ទំនងទៅក្រុមហ៊ុននានា ដែលជួលពលករមកពីប្រទេសជាច្រើនរួមមានសិង្ហបុរី ម៉ាឡេស៊ី ចិន មីយ៉ាន់ម៉ា ឥណ្ឌា និងស្រីលង្កា ជាដើម។ ហើយក្រុមហ៊ុនជួលពលករធ្វើការងារ តាមផ្ទះមួយឈ្មោះ Clean Lab ដែលទទួលបានកំណើន៥០%បានបញ្ជាក់ថា ខ្លួនមានគម្រោងជួលពលករធ្វើការងារ តាមផ្ទះពីប្រទេសកម្ពុជា ដើម្បីបំពេញតម្រូវការដែលកំពុងកើនឡើង៕

ដោយៈលក្ខិណា

ភ្នំពេញៈ ក្រុមប្រឹក្សាធុរកិច្ចកម្ពុជាប្រចាំប្រទេសថៃ (CBC ) និងសមាគមពាណិជ្ជកម្មថៃ ប្រចាំប្រទេសកម្ពុជា (TBCC) បានចុះអនុស្សរណយោគយល់គ្នាមួយ ដើម្បីជំរុញការធ្វើពាណិជ្ជកម្ម និងការវិនិយោគទៅវិញទៅមក រវាងប្រទេសកម្ពុជានិងប្រទេសថៃ។

ថ្លែងនៅក្នុងពិធីចុះអនុស្សរណៈ នៅព្រឹកថ្ងៃទី៦កញ្ញា២០២១នេះ លោកសម្បតិ្ត សុធា ប្រធានក្រុមប្រឹក្សាធុរកិច្ចកម្ពុជាប្រចាំប្រទេសថៃ បានមានប្រសាសន៍ថា ការចាប់ដៃគ្នាក្នុងពេលនេះ នឹងជួយដល់ក្រុមហ៊ុនកម្ពុជានៅថៃ ក្នុងការស្វែងរកដៃគូជាមួយក្រុមហ៊ុនថៃនៅក្នុងប្រទេស ក៏ដូចជា ជួយក្រុមហ៊ុនថៃនៅក្នុងប្រទេសកម្ពុជា រកដៃគូជាក្រុមហ៊ុនកម្ពុជាក្នុងប្រទេសកម្ពុជា ។ កិច្ចសហការនេះដែរ ក៏នឹងជួយសម្រួលដល់ការធ្វើពាណិជ្ជកម្មរវាងប្រទេសកម្ពុជា និងប្រទេសមួយកម្រិតទៀតផងដែរ ។

លោកបន្តថា “ក្នុងបរិបទកូវីដ១៩នេះ យើងគួរគិតថាមានមេរៀនអ្វីខ្លះ ដែលបានឆ្លងកាត់ ហើយយើងនឹងចាប់ដៃជាមួយគ្នាឱ្យខ្លាំងជាមួយគ្នា”។ លោកបន្តថា “ក្រៅពីការធ្វើពាណិជ្ជកម្ម កិច្ចសហការនេះដែរ ក៏នឹងជួយជំរុញដល់ទេសចរណ៍ទៅវិញទៅមក និងការផ្លាស់ប្តូរនូវវប្បធម៌ជាមួយគ្នាផងដែរ”។

លោកបន្ថែមថា បច្ចុប្បន្ននេះវិនិយោគិនថៃបាន និងកំពុងរង់ចាំមើលពីស្ថានភាពកូវីដ១៩នៅក្នុងប្រទេសកម្ពុជា ហើយបើសិនជាស្ថានភាពកូវីដ១៩នេះ បានដោះស្រាយចប់ពេលណាលោកថា វិនិយោគិនថៃនឹងចូលមកក្នុងប្រទេសកម្ពុជា ដើម្បីដាក់វិនិយោគរកស៊ីទៅតាមវិស័យនិងជំនាញរបស់ពួកគេ។

លោកថា “យើងជឿថានៅពេលឆាប់ៗនេះដែរ កម្ពុជានឹងបើកទូលាយនិងទទួលវិនិយោគិននានាជាពិសេសវិនិយោគិនថៃ ខណៈកម្ពុជាបានចាក់វ៉ាក់សាំងបានច្រើនជូនពលរដ្ឋទូទាំងប្រទេស”។

លោកស្រីជីរ៉ាណាន់ វង្សមង្គល តំណាងសមាគមពាណិជ្ជកម្មថៃប្រចាំប្រទេសកម្ពុជា បានមានប្រសាសន៍ថា ការចុះអនុស្សរណៈរវាងCBC និង  TBCC នឹងជំរុញការធ្វើពាណិជ្ជកម្មផង និងការធ្វើវិនិយោគផង ។ នៅពេលវិនិយោគិនថៃចូលកម្ពុជា ពួកគេនឹងមានទំនុកចិត្តកាន់តែខ្លាំងថែមទៀត ក្នុងការបណ្ដាក់ទុននិងធ្វើមុខជំនួញ ។

លោកស្រីបន្តថា វាជាការប្រសើរណាស់ ទោះបីជាស្ថានភាពកូវីដ១៩ក្ដី តែទំនិញរបស់ប្រទេសថៃ នៅតែបន្តហូរចូលមកកម្ពុជា ហើយបើសិនជាស្ថានភាពកូវីដ១៩កាន់តែប្រសើរលោកស្រីជឿជាក់ថា នឹងមានការធ្វើពាណិជ្ជកម្មរវាងប្រទេសកម្ពុជានិងថៃកាន់តែល្អថែមទៀត។

លោកស្រីបន្តថា “ទោះបីមានការហូរចូលទំនិញថៃមកកម្ពុជាក្ដី តែការនាំចូលទំនិញពីថៃមកកម្ពុជា ក៏ឃើញថាមានការថយចុះ ប្រមាណ១០ភាគរយ ជាពិសេសទៅលើការនាំចូលសម្ភារៈសំណង់ និងគ្រឿងសង្ហារឹម”៕

ដោយៈសុធា

ភ្នំពេញៈ រដ្ឋាភិបាលតាមរយៈក្រសួងពាណិជ្ជកម្ម កំពុងរៀបចំគោលនយោបាយស្វាយចន្ទី ក្នុងគោលដីប្រែក្លាយកម្ពុជាទៅជាប្រទេសផលិត និងផ្គត់ផ្គង់ស្វាយចន្ទីរកំរិតតំបន់នាពេលអនាគត។

លោករាជ រ៉ា រដ្ឋលេខាធិការក្រសួងពាណិជ្ជកម្ម និងជាអនុប្រធានក្រុមការងារចម្រុះ បានចូលរួមជាអធិតបីក្នុងកិច្ចប្រជុំក្រុមការងារចម្រុះ ដើម្បីរៀបចំគោលនយោបាយស្វាយចន្ទីកម្ពុជា លើកទី១ បានលើកឡើងកាលពីសប្តាហ៍មុនថា គោលបំណងនៃកិច្ចប្រជុំ គឺដើមី្បដាក់ជូនក្រុមការងារចម្រុះ និងតួអង្គពាក់ព័ន្ធ ពិនិត្យនិងផ្តល់ធាតុចូលបំពេញបន្ថែមលើសេចក្តីព្រាងគោលនយោបាយជាតិស្តីពី ស្វាយចន្ទី ២០២២-២០២៧។

កិច្ចប្រជុំនេះ ត្រូវបានរៀបចំជាផ្លូវការកាលពីដើមឆ្នាំ២០១៩ ដោយក្រុមការងារបច្ចេកទេស សហការជាមួយដៃគូអភិវឌ្ឍន៍ និងជំនាញការអន្តរជាតិ បានសិក្សាប្រមូលទិន្នន័យក្នុងប្រទេស និងទីផ្សារសំខាន់ៗក្រៅប្រទេស រៀបចំជារបាយការណ៍ និងកែសម្រួលស្របតាមទម្រង់ ដែលកំណត់ដោយទីស្តីការគណៈរដ្ឋមន្ត្រី និងបានបញ្ចប់ក្នុងកម្រិតបច្ចេកទេសកាលពីថ្ងៃទី៣ ខែសីហា ឆ្នាំ២០២១កន្លងទៅ។

ជាមួយគ្នានេះ លោក ទិត សីច័ន្ទលី ប្រធានស្តីទីនាយកដ្ឋានគោលនយោបាយពាណិជ្ជកម្ម បន្តពិនិត្យ ពិភាក្សា និងផ្លាស់ប្តូរយោបល់ លើខ្លឹមសារសេចក្តីព្រាងគោលនយោបាយជាតិខាងលើ តាមលំដាប់លំដោយនៃមាតិកា និងបានអនុញ្ញាតឱ្យវិស័យឯកជនលើកឡើងនូវបញ្ហាប្រឈម ដែលបានជួបប្រទះកន្លងមក។ បន្ថែមពីនេះ អង្គប្រជុំបានស្នើសុំធ្វើបច្ចុប្បន្នភាពលើទិន្នន័យមួយចំនួន និងកែសម្រួលចំណុចមួយចំនួន ដើមី្បឱ្យឯកសារនេះមានលក្ខណៈត្រឹមត្រូវ និងគ្រប់ជ្រុងជ្រោយ។

គោលនយោបាយជាតិនេះ នឹងផ្តល់អត្ថប្រយោជន៍យ៉ាងច្រើនដល់វិស័យស្វាយចន្ទីរបស់កម្ពុជា នាពេលខាងមុខ ដូចជា ប្រែក្លាយកម្ពុជាទៅជាប្រទេសផលិត និងផ្គត់ផ្គង់ផលិតផលស្វាយចន្ទីដ៏សំខាន់មួយ នៅក្នុងតំបន់សម្រាប់បម្រើទីផ្សារក្នុងស្រុក តំបន់ និងពិភពលោក។ ធ្វើឱ្យផលិតកម្ម និងផលិតភាព មានសមត្ថភាពប្រកួតប្រជែង ទាំងទិន្នផល និងគុណភាព។ កម្ពុជា នឹងទទួលបាននូវតម្លៃបន្ថែមពេញលេញពីស្វាយចន្ទី ចំពោះអ្នកដាំដុះ និងអ្នកកែច្នៃ លើការអនុវត្តខ្សែច្រវ៉ាកតម្លៃ និងខ្សែច្រវ៉ាក់ផលិតកម្មស្វាយចន្ទី។

យោងតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទបានលើកបង្ហាញថា ការនាំចេញគ្រាប់ស្វាយចន្ទីរបស់កម្ពុជា នារយៈពេល៥ខែដើមឆ្នាំ២០២១ មានជាង៨០ម៉ឺនតោន។ បរិមាណនៃការនាំចេញនេះ មានកំណើនរហូតដល់៣២១ភាគរយ បើធៀបនឹងរយៈពេលដូចគ្នា កាលឆ្នាំ២០២០។ ប្រទេសវៀតណាមជាទីផ្សារនាំចេញគ្រាប់ស្វាយចន្ទីដ៏ធំលំដាប់ទីមួយ របស់កម្ពុជា៕