ដោយៈគង់ សូរិយា

សៀមរាបៈ គំរោងបុរី Angkor Land Marបានទទួលស.ជ.ណ និងអនុក្រិតពីរដ្ឋាភិបាល ដើម្បីកាត់ឆ្វៀលគំរបព្រៃឈើ ដើម្បីទុកឱកាសឲ្យក្រុមហ៊ុននេះ អាចចាប់ផ្តើមកសាងគំរោងរបស់ខ្លួនហើយ។

លោកសាស្រ្តាចារ្យទួស សាភឿន ភាគហ៊ុនិកនៃបុរី Angkor Land Mark ស្ថិតក្នុងស្រុកបន្ទាយស្រី ខេត្តសៀមរាបបានមានប្រសាសន៍ឲ្យដឹង តាមប្រព័ន្ឋតេឡេក្រាមនាព្រឹកកាលពីចុងសប្តាហ៍មុនថា បន្ទាប់ពីទទួលបានអនុក្រិត និងស ជ ណនេះ អាចឲ្យក្រុមហ៊ុនរៀបចំផែនការអភិវឌ្ឍន៍ស្តារហេដ្ឋារចនាសម្ព័ន្ឋ និងគំរោងប្លង់មេគំរោងទេសចរណ៍ តាមប្លង់គោលរបស់ក្រុមហ៊ុន។ លោកបន្តថា តាមផែនការគំរោងនេះ មានផ្ទៃដីសរុប៥០០ហិកតា ប៉ុន្តែរហូតមកទល់ពេលនេះ ក្រុមហ៊ុនបានរៀបចំំបានជាង២០០ហិកតារួចហើយ។

គំរោងនេះក្រុមហ៊ុនថៃទាំងបីនោះរួមមាន ក្រុមហ៊ុន Sin Corp ក្រុមហ៊ុន Chang Siem Corporation និងក្រុមហ៊ុន TPI ដែលជាក្រុមហ៊ុនផលិតស៊ីម៉ត៍ខនគ្រីតធំជាងគេនៅប្រទេ​សថៃសហការវិនិយោគ។

លោកសាស្រ្តាចារ្យ ទួស សាភឿនបានបន្តថា គំរោងនេះ គំរោងវិនិយោគនេះស្ថិតនៅលើផ្ទៃដីជាង ៥០០​ហិកតា ក្នុងនោះគំរោងទី១ មានផ្ទៃដី២២៣ហិកតា និងគំរោងទី២ មានផ្ទៃដីទំហំ ៣០០ហិកតា។

លោកបន្តថា គំរោងនេះមានភាពចម្រុះ ដោយមានលំនៅដ្ឋានបែបលំហែរកាយ ភោ​ជនីយដ្ឋាន ផ្សារបណ្តែតទឹកដែលនឹងសាងសង់លើផ្ទៃដី ៥០ហិកតា ហើយវានឹងជាផ្សារបណ្តែតទឹកធំជាងគេនៅកម្ពុជា និងសួនសប្បនិម្មិតស្ថិតនៅលើផ្ទៃដី២០ហិកតា ដែ​លសួន​នេះនឹងមានសត្វចម្រុះ ដែលផុតពូជពីពិភពលោកនេះ។

លោកសាស្រ្តាចារ្យបានបន្តថា “ក្រុមហ៊ុនរបស់យើងនឹងចុះ MOU ជាមួយក្រុមហ៊ុន​ទាំងនោះនៅថ្ងៃទី២០កម្ភៈនេះ ដើម្បីចាប់ផ្តើមអភិវឌ្ឍន៍គំរោងនេះ ដែលវាជាគំរោងទី១ ​នៅក្នុងខេត្តសៀមរាប”។

លោកបន្តថា “មកពីណាមិនសំខាន់ទេ សំខា​ន់គឺទាញយកអ្នកវិនិយោគមកវិនិយោ​គនៅស្រុកយើង ដើម្បីផ្តល់ការងារដល់ប្រជា​ជន និងលើកស្ទួយសេដ្ឋកិច្ចប្រទេសជាតិយើង”៕លោកបន្តថា “គំរោងនេះទទួលបានការអនុម័ត ពីក្រុមប្រឹក្សាអភិវឌ្ឍន៍កម្ពុជារួចហើយ និងកំពុងទទួលបានការគាំទ្រពីអាជ្ញាធរមូលដ្ឋាន ស្រុកបន្ទាយស្រី និងស្ថាប័នពាក់ព័ន្ឋជាច្រើនទៀត”។

លោកសាស្រ្តចារ្យទួស សាភឿនបានបន្តថា រហូតមកទល់ពេលនេះ ការស្នើសុំសាងសង់ផ្សារបណ្តែតទឹកក្នុងគំរោងនេះ ពីក្រសួងទេសចរណ៍ មិនទាន់បានចាប់ផ្តើមនៅឡើយទេ ព្រោះអ្វីៗស្ថិតក្នុងដំណើរការរៀបចំផែនការ និងបន្តតាមនិតិវិធីរបស់ក្រុមហ៊ុន។

លោកបន្តថា “នៅពេលសាងសង់រួច បុរី Angkor Landmark នឹងក្លាយជាគំរោងអភិវឌ្ឍន៍គំរូមួយនៅខេត្តសៀមរាប ដែលនឹងលើកស្ទយដល់សេដ្ឋកិច្ចសង្គម ពិសេសវិស័យទេសចរណ៍ក្នុងខេត្តសៀមរា”៕

ដោយៈស៊ីវ ម៉េង

ភ្នំពេញៈ ស្រ្តីជើងចាស់ក្នុងវិស័យអចលនទ្រព្យបីរូប បានលើកឡើងនូវបរិបទ និងការវិភាគក្នុងវិស័យអចលនទ្រព្យ ខុសៗគ្នាលើទិដ្ឋភាពប្រែប្រួល នៃវិស័យអចលនទ្រព្យក្នុងអំឡុងវិបត្តិដែលកំពុងបន្តនាពេលបច្ចុប្បន្ននេះ។
អ្នកស្រីអាន សុធីតាអតីតនាយិកាក្រុមហ៊ុន CBRE Cambodia និងជាអ្នកវិភាគពី

ទីផ្សារអចលនទ្រព្យឯករាជ្យ បានមានប្រសាសន៍ឲ្យដឹងកាលពីសប្តាហ៍មុនថា ទីផ្សារអចលនទ្រព្យនៅកម្ពុជា មិនមានសញ្ញាល្អប្រសើរឡើងនៅឡើយទេ បើគិតជារូម អ្វីៗនៅមានភាពតានតឹងនៅឡើយ។

អ្នកស្រីបន្តថា “ក្នុងស្ថានភាពនេះ មានតែអ្នកមានលុយទេ ជាអ្នកឈ្នះ ពួកគេចាប់បានឱកាសច្រើន និងល្អប្រសើរ ដោយសារមានតម្លៃអចលនទ្រព្យក្រោមទីផ្សារបានលក់ចេញ”។ អ្នកស្រីបន្ថែមថា “បើរំពឹងការវិនិយោគពីបរទេស មិនទាន់ដល់ពេលនៅឡើយទេ ពួកគេនឹងចូលមកនៅអំឡុងឆ្នាំ២០២២ខាងមុខ”។

ទោះជាយ៉ាងណាអ្នកស្រីមើលឃើញថា ទីផ្សារដីធ្លីនៅមានសកម្មភាពទិញលក់ច្រើនេះជាងគេ បន្ទាប់់មកផ្ទះតាមបុរីមួយចំនួន។ ចំណែកទីផ្សារលក់រាយ ក៏មិនទាន់មានសញ្ញាប្រសើរផងដែរ។

អ្នកស្រីបន្តថា “ទោះបីរងវិបត្តិជំងឺកូវីដ១៩យ៉ាងណាក្តី ប៉ុន្តែវិស័យនេះនៅកម្ពុជាហាក់បង្ហាញសញ្ញារ៉ឹងមាំ បើធៀបនឹងបណ្តាប្រទេសជិតខាងកម្ពុជា”។

ចំណែកអ្នកស្រី Grace Rachy Fong នាយិកាក្រុមហ៊ុន Century21 Cambodiaបានសម្តែងសុទិដ្ឋិនិយមទៅវិញ ដោយអ្នកស្រីមើលឃើញថា ក្នុងបរិបទកូវីដ១៩ បានធ្វើឲ្យមនុស្សអាចបន្សាំខ្លួននឹងបញ្ហា ហើយពួកគេរៀនរស់នៅជាមួយជំងឺកូវីដ១៩ ប៉ុន្តែពួកគាត់បានប្រុងប្រយ័ត្នជាងមុន ខណៈការវិនិយោគរបស់ពួកគេនៅតែបន្ត។

អ្នកស្រីបន្តថា ទីផ្សារនេះបានចាប់ផ្តើម ងើបឡើងវិញបណ្តើរៗហើយ ដោយការវិនិយោគលើទឹកប្រាក់ចន្លោះពី១ទៅ២លានដុល្លារបានកើនឡើង ដោយសារពួកគាត់មានទំនុកចិត្តអ្វីៗនឹងល្អប្រសើរឡើង។

អ្នកស្រីបន្តថា “ការវិនិយោគលើវិស័យអចលនទ្រព្យក្នុងបរិបទនេះ ជាការវិនិយោគ​ល្អ ស្របពេលក្រុមហ៊ុន Zillion Holding បានពង្រីកភ្នាក់ងារអចលនទ្រព្យ ដល់មូលដ្ឋានឃុំ សង្កាត់ទូទាំងប្រទេស។

រីឯអ្នកស្រីតាំង ហួរនាយិកាក្រុមហ៊ុន AMATAK Property Service Co, Ltd បានមានប្រសាសន៍ឲ្យដឹងផងដែរថា សកម្មភាពទិញលក់ នៅតែមានសភាពរប៉េះរប៉ោះ ហើយប្រជាជនកាន់តែមានសុទិដ្ឋិនិយមជាងមុន ព្រោះបញ្ហាក្រពះ បានធ្វើឲ្យពួកគាត់ចាកចេញពីផ្ទះ មកប្រកបមុខរបរធម្មតា ប៉ុន្តែពួកគេបានការពារខ្លួនយ៉ាងប្រយ័ត្នប្រយ៉ែងជាងមុន។

អ្នកស្រីបន្តថា “មួយរយៈចុងក្រោយនេះ ចាប់តាំងពីរដ្ឋាភិបាលប្រកាសពង្រីកទីក្រុងក្នុងកាំរង្វង់១០០គីឡូម៉ែត្រក្រឡា បានធ្វើឲ្យមានសកម្មភាពទិញលក់ដីធ្លី កាន់តែច្រើន ពិសេសនៅតំបន់ភាគខាងជើងរាជធានីភ្នំពេញ៕

ដោយៈសុខុម

ក្រុងរីយ៉ាដ: សារព័ត៌មាន Hotel Business បានចុះផ្សាយកាលពីថ្ងៃពុធ ទី១ កញ្ញា ថា ក្រុមហ៊ុនបដិសណ្ឋារកិច្ចអឺរុប Choice Hotels Europe គ្រោងបើកដំណើរការសណ្ឋា​គារយ៉ាងតិចចំនួន១០ នៅប្រទេសអារ៉ាប៊ីសាអូឌីត ក្នុងរយៈពេល៥ឆ្នាំខាងមុខ។ នេះបើយោងតាមសារព័ត៌មាន Arab News ចុះផ្សាយកាលពីថ្ងៃសុក្រ ទី៣ កញ្ញា។

ដំណឹងដ៏គួរឱ្យភ្ញាក់ផ្អើល និងសាទរនេះកើតមានឡើង នៅពេលក្រុមហ៊ុននេះបន្តកិច្ចព្រមព្រៀងអាជ្ញាប័ណ្ណមេរបស់ខ្លួន ជាមួយក្រុមហ៊ុន Seera Hospitality ជាបុត្រសម្ព័ន្ធកាន់កាប់ផ្តាច់មុខ របស់ក្រុមហ៊ុនទេសចរណ៍ Seera Holding Group ដែលចុះបញ្ជីជាសាធារណៈនៅតំបន់មជ្ឈិមបូព៌ា និងអាហ្វ្រិកខាងជើង។

បច្ចុប្បន្នមានគម្រោងអភិវឌ្ឍន៍ក្រោមម៉ាកយីហោ Choice Hotels ជាច្រើននៅទូទាំងប្រទេសអារ៉ាប៊ីសាអូឌីត ដែលស្ថិតក្នុងដំណាក់កាលអភិវឌ្ឍន៍ខុសៗគ្នា ហើយគម្រោ​ងអភិវឌ្ឍន៍ទាំងនោះ ជាផ្នែកមួយនៃកិច្ចព្រមព្រៀងនេះ។

គម្រោងចំនួន៣ដំបូង គឺគម្រោងសណ្ឋាគារ Clarion Jeddah Airport គម្រោងសណ្ឋាគារ Comfort King Road Jeddah និងគម្រោងសណ្ឋាគារ Comfort Olaya Riyadh នឹងត្រូវបើកដំណើរការនៅចុងឆ្នាំ២០២១នេះ ហើយបើកទទួលយកការកក់បន្ទប់ចាប់ពីឥឡូវនេះទៅ៕

ដោយៈយិន លាងគង់ ស្ថាបនិក និងជាអគ្គនាយកគេហទំព័រ Propertyarea.asia

ភ្នំពេញៈ អ្នកជំនាញ និងអ្នកវិភាគឯករាជ្យជាច្រើន បានលើកឡើងស្រដៀងគ្នាថា វិស័យអចលនទ្រព្យកម្ពុជា ពិតជារងផលប៉ះពាល់ ប៉ុន្តែមិនមានសញ្ញាអាក្រក់ខ្លាំងដូចប្រទេសមួយចំនួននៅក្នុងតំបន់ឡើយ។

ការសាងសង់បុរីតូចធំ ភាគច្រើនលើសលុបនៅតែបន្ត រថយន្តដឹកថ្ម នៅតែបើកបន្តកន្ទុយគ្នានៅលើមហាវិថីឈ្នះ ឈ្នះ (ផ្លូវកប់ស្រូវ) និងសកម្មភាពទិញលក់នៅតែដំណើរការ ទោះបីមិនមានកំនើនខ្ពស់ក៏ដោយ។

ស្ថាបនិក និងជាអគ្គនាយកគេហទំព័រ Propertyarea.asia និងគេហទំព័រព៌តមានហិរញ្ញវត្ថុ និងសេដ្ឋកិច្ច Cambodiafinancialtimes.com លោកយិន លាងគង់ ដែលបានតាមដានការវិវត្តន៍របស់វិស័យនេះ បានលើកនូវចំណុចគន្លឹះសំខាន់ៗមួយចំនួន ដើម្បីចែករំលែកជាទស្សនទាន។

កត្តាទំនុកចិត្ត
ការទិញលក់អចលនទ្រព្យ ពិសេសផ្នែកដីធ្លីនៅតែមានភាពសកម្មជាងគេ ដោយសា​រទំនុកចិត្តរបស់ប្រជាពលរដ្ឋកម្ពុជា ដែលនៅតែមើលឃើញថា​សេដ្ឋកិច្ចកម្ពុជា នឹងបន្តងើបឡើងវិញលឿន បើធៀបជាមួយបណ្តាប្រទេសក្នុងតំបន់ បើទោះបីជាឆ្នាំ២០២០កន្លងមក សេដ្ឋកិច្ចកម្ពុជាដក៣,៥០ភាគរយក្តី តែឆ្នាំនេះសេដ្ឋកិច្ចកម្ពុជាអាចនឹងងើបឡើងក្នុងរង្វង់៣ភាគរយ ហើយបើសេណារីយោអាក្រក់ កំនើនសេដ្ឋកិច្ចឆ្នាំនេះនឹងសម្រេ ចបានត្រឹម១ភាករយ តាមការព្យាករណ៍របស់ធនាគារពិភពលោក។

ជំនឿចិត្តបែបនេះហើយ ទើបបានជាប្រជាជន អ្នកមានលំហូរសាច់ប្រាក់ល្អ ឬអ្នកចេះប្រើប្រាស់បំណុលបានបន្តវិនិយោគបន្ថែម។

សន្តិភាពនិងស្ថេរភាពនយោបាយ
គ្មានសន្តិភាព និងស្ថេរភាពនយោបាយ កុំថាឡើយដីឡើងថ្លៃ កុំថាឡើងមានអារម្មណ៍វិនិយោគ សូម្បីតែលុយដែលកប់ទុកនៅធនាគារ ក៏ត្រូវដកយកមកទុកដែរ ពិសេ​សវិនិយោគិនបរទេស នឹងមិនសម្លឹងមកកាន់កម្ពុជា ក៏ដូចជាប្រទេសណាដែលពួកគេគ្មានអារម្មណ៍មានសុវត្ថិភាពទាំងផ្លួវកាយ ផ្លួវចិត្ត និងសុវត្តិភាពលុយរបស់ពួកគេដែរ។

ហេតុនេះសុខសន្តិភាព ស្ថេរភាពនយោបាយ ពិតជាមានតម្លៃសំរាប់អាយុជីវិត និងសេដ្ឋកិច្ចរបស់ជាតិ។

ប្រើប្រាស់លុយហោប៉ៅខ្លួនឯង
ដោយសារធ្លាប់លំបាក ធ្លាប់ក្រីក្រ បានធ្វើឲ្យប្រជាពលរដ្ឋកម្ពុជាភាគច្រើន ពូកែសន្សំលុយ មិនហ៊ានចាយវាយផ្តេសផ្តាសឡើយ។

ដោយសារការសន្សំលុយនេះហើយ ទើបបានជាប្រជាជនកម្ពុជាភាគច្រើនបានប្រើប្រាស់ហិរញ្ញវត្ថុផ្ទាល់ខ្លួន យកមកវិនិយោគលើវិស័យអចលនទ្រព្យ នៅតែបន្តមានភាពសកម្ម ពិសេសពួកគេមិនលក់ចេញ ក្នុងតម្លៃទាបក្រោមទីផ្សារ (លើកលែងអ្នកមានបញ្ហាលំហូរសាច់ប្រាក់)។

ការប្រើប្រាស់ហិរញ្ញវត្ថុផ្ទាល់ខ្លួន សំរាប់វិនិយោគលើវិស័យអចលនទ្រព្យ ផ្តល់នូវមូលដ្ឋានសំខាន់ជាច្រើនរួមមាន ទី១ មិនធ្វើឲ្យមានបញ្ហាសេដ្ឋកិច្ចគ្រួសារ និងសេដ្ឋកិច្ចជាតិ ទី២ មិនធ្វើឲ្យទីផ្សារអចលនទ្រព្យជាប់គាំង ទី៣ មិនធ្វើឲ្យមានវិបត្តិហិរញ្ញវត្ថុកើតឡើង និងទី៤ ធ្វើឲ្យមានស្ថេរភាពម៉ាក្រូសេដ្ឋកិច្ច ក៏ដូចជាធ្វើឲ្យសុខភាពក្នុងវិស័យអចល នទ្រព្យរ៉ឹងមាំ។

ការបន្តវិនិយោគលើហេដ្ឋារចនាសម្ព័ន្ឋរបស់រដ្ឋាភិបាល
ទោះបីជាមានបញ្ហាជំងឺកូវីដ១៩ ដែលធ្វើឲ្យរដ្ឋាភិបាលកាត់បន្ថយ ការចំណាយតាមស្ថាប័នជាតិមួយចំនួនក្តី ប៉ុន្តែការកសាងហេដ្ឋារចនាសម្ព័ន្ឋធំៗ ដូចជា ផ្លូវល្បឿនលឿនភ្នំពេញ ព្រះសីហនុ ផ្លូវក្រវ៉ាត់ក្រុងទី៣ ព្រលានយន្តហោះអន្តរជាតិភ្នំពេញថ្មី ព្រលានយន្តហោះខេត្តសៀមរាប ការកសាងផ្លួវ៣៨ខ្សែនៅក្រុងសៀមរាប ការស្ថាបនាផ្លូវជាតិលេខ១០ជាដើម នៅតែបន្តដំណើរការយ៉ាងសកម្ម។

មូលដ្ឋានហេដ្ឋារចនាសម្ព័ន្ឋចាំបាច់ទាំងនេះហើយ ដែលមិនត្រឹមតែជួយដល់កំនើន​សេដ្ឋកិច្ចជាតិ កាត់បន្ថយបញ្ហាប្រឈមក្នុងសេដ្ឋកិច្ច ប៉ុន្តែបានជួយធ្វើឲ្យវិស័យអចលន ទ្រព្យ ពីសេសដីធ្លីកើនឡើងជាបន្តបន្ទាប់ (នៅតំបន់មួយចំនួន)​ ទោះបីជាមានវិបត្តិសេដ្ឋកិច្ចសកល ដែលបណ្តាលមកពីជំងឺកូវីដ១៩ក្តី។

គោលនយោបាយលើកទឹកចិត្ត
ជាមួយនឹងគោលនយោបាយបើកចំហជើងមេឃ ការបើកចំហផ្នែកសេដ្ឋកិច្ច តាមរយៈការរៀបចំំច្បាប់បទដ្ឋានគតិយុត្តិនានា បានធ្វើឲ្យអ្នកវិនិយោគជាតិ អន្តរជាតិនៅតែបន្តវិនិយោគ និងពង្រីកមូលដ្ឋានវិនិយោគរបស់ពួកគេនៅកម្ពុជាកាន់តែច្រើនផងដែរ។

ការលើកទឹកចិត្តផ្នែកពន្ឋ ការសម្រួលក្នុងការយកប្រាក់ចំណេញត្រលប់ទៅវិញ ការប្រើប្រាស់ដុល្លារយ៉ាងសេរី និងការអនុញ្ញាត្តឲ្យជនបរទេស អាចបើកក្រុមហ៊ុនខ្លួនឯងបាន១០០ភាគរយក៏ជាផ្នែកសំខាន់ ក្នុងការរក្សាលំនឹងផ្នែកសេដ្ឋកិច្ចរបស់ប្រទេសផងដែរ។

យោងតាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់បានបង្ហាញថា ក្នុងរយៈពេល៦ខែឆ្នាំនេះ កម្ពុជាទាក់ទាញទុនវិនិយោគលើវិស័យសំណង់ក្នុងទំហំទឹកប្រាក់ជាង២៥០០លានដុល្លារអាមេរិកផងដែរ៕