ដោយៈ ម៉ាណា

    វៀតណាមៈ វិស័យអចលនទ្រព្យបាន និងកំពុងដើរតួនាទីកាន់តែសំខាន់នៅប្រទេសវៀតណាម ដោយសារការរីកចម្រើនសេដ្ឋកិច្ច និងលំហូរទុនវិនិយោគពីបរទេស។

តាមទិន្ន័យបានបង្ហាញថា ឧស្សាហកម្មអចលនទ្រព្យរួមចំណែកប្រហែល៤,៦% ទៅ៧,៦% នៃផលិតផលក្នុងស្រុកសរុ។ ការចូលរួមចំណែកកាន់តែទូលំទូលាយ/ពង្រីក (រួមទាំងការរីករាលដាលនៃសំណង់ និងសកម្មភាពពាក់ព័ន្ធ)។

តាមការការប៉ាន់ស្មានឧស្សាហកម្មមួយចំនួន បានដាក់ការចូលរួមចំណែកសរុប (រួមទាំងតំណភ្ជាប់ដោយប្រយោល ជាមួយសំណង់ ហិរញ្ញវត្ថុ សេវាកម្ម។ល។) នៅប្រហែលចន្លោះពី១០%ទៅ១៥% នៃផលិតផលក្នុងស្រុកសរុប។

ប្រសិនបើតម្លៃដីធ្លី (ឧទាហរណ៍ តម្លៃទ្រព្យសម្បត្តិដីធ្លី) ត្រូវបានរួមបញ្ចូល ការសិក្សាចាស់ៗមួយចំនួនបានលើកឡើងថា ឧស្សាហកម្មនេះរួមចំណែករហូតដល់១៣,៦% នៃផលិតផលក្នុងស្រុកសរុប៕

ដោយ: សហសេវិក
អន្តរជាតិ: ទីផ្សារអចលនទ្រព្យរបស់ប្រទេសម៉ាឡេស៊ីនៅតែមានភាពទាក់ទាញចំពោះអ្នកទិញផ្ទះជាជនបរទេស ទោះបីជាមានការដំឡើងពន្ធប្រថាប់ត្រាពី៤%ទៅ៨% យ៉ាងណាក្តី។ នេះបើយោងតាមក្រុមហ៊ុនប្រឹក្សាយោបល់អចលនទ្រព្យ Henry Butcher Real Estate។

ភាពទាក់ទាញនេះ​ ដោយសារ​​តម្លៃ​អចលនទ្រព្យ​នៅម៉ាឡេសុី​នៅ​តែ​មាន​តម្លៃ​ថោក​ជាង​បើ​ធៀប​នឹង​ទីផ្សារ​ក្នុង​តំបន់​ដូចជា​ កោះហុងកុង និង​ទីក្រុងសិង្ហបុរី។ ជាមួយគ្នានេះ ​​ប្រទេសម៉ាឡេស៊ី​ក៏​ផ្តល់​ការ​ការពារ​ផ្នែក​ច្បាប់​សម្រាប់​អ្នកទិញ​ផ្ទះ​ផង​ដែរ។

យោងតាមការដកស្រង់ទិន្នន័យពីក្រុមហ៊ុន Global Property Guide តម្លៃអាផាតមុិន និងផ្ទះល្វែងជាមធ្យមនៅម៉ាឡេស៊ីមានទំហំទឹកប្រាក់ចំនួន២.៤៨៤ដុល្លារក្នុងមួយម៉ែត្រការ៉េ។ តួលេខនេះមានកម្រិតទាបជាងយ៉ាងខ្លាំងធៀបទៅនឹងតម្លៃ២១.៣១០ដុល្លារនៅទីក្រុងហុងកុង និងតម្លៃ១៩.៣០០ដុល្លារអាមេរិកនៅសិង្ហបុរី។

តម្លៃអាផាតមុិន និងផ្ទះល្វែងជាមធ្យមនៅម៉ាឡេស៊ីក៏មានតម្លៃថោកជាងនៅប្រទេសហ្វីលីពីនផងដែរ ដែលមានតម្លៃ៣.៤៤៩ដុល្លារក្នុងមួយម៉ែត្រការ៉េ។

យ៉ាងណាមិញ តួលេខនេះមានកម្រិតខ្ពស់ជាងនៅប្រទេសឥណ្ឌូនេស៊ីបន្តិច ដែលមានតម្លៃ២.២២៦ដុល្លារក្នុងមួយម៉ែត្រការ៉េ និងនៅប្រទេសវៀតណាម ដែលមានតម្លៃ២.៣៨៤ដុល្លារក្នុងមួយម៉ែត្រការ៉េ។

ការដំឡើងពន្ធប្រថាប់ត្រានឹងជះផលប៉ះពាល់តិចតួចលើប្រតិបត្តិការអចលនទ្រព្យជារួម។ នេះជាលក្ខណៈពិសេស ដែលអាចជះផលប៉ះពាល់ជាចម្បងដល់បណ្តាក្រុមហ៊ុនអភិវឌ្ឍន៍គម្រោងលំដាប់ខ្ពស់ ដែលផ្តោតលើអ្នកទិញបរទេស ជាពិសេសនៅទីក្រុងគូឡាឡាំពួរ ទីក្រុង Penang និងរដ្ឋ Johor។

លោក Tang Chee Meng ប្រធានផ្នែកប្រតិបត្តិនៅក្រុមហ៊ុន Henry Butcher បានលើកឡើងថា ទោះបីជារូបិយបណ្ណរីងហ្គីតក្នុងស្រុកងើបឡើងថ្លៃយ៉ាងណាក្តី លោកនៅតែមានសុទិដ្ឋិនិយមលើទីផ្សារអចលនទ្រព្យរបស់ម៉ាឡេសុី។

ជាក់ស្តែង សិទ្ធិរបស់អ្នកទិញផ្ទះនៅម៉ាឡេសុីត្រូវបានការពារក្រោមកិច្ចព្រមព្រៀងលក់-ទិញប្រកបដោយស្តង់ដារ ហើយជនបរទេសត្រូវបានអនុញ្ញាតឱ្យមានកម្មសិទ្ធិលើអចលនទ្រព្យ។

លោក​បាន​បន្តថា ការណ៍នេះ​មានភាពខុសផ្ទុយ​ពី​ទីផ្សារ​អចលនទ្រព្យនៅប្រទេសវៀតណាម និង​ឥណ្ឌូនេស៊ី ដែល​ជាធម្មតា ជន​បរទេស​ទទួលបាន​តែ​សិទ្ធិ​ប្រើប្រាស់​ជាជាង​កម្មសិទ្ធិ​ពេញលេញលើអចលនទ្រព្យ។

លោក Tang បាន​បន្ថែមថា នៅ​ប្រទេស​ម៉ាឡេស៊ី ជនបរទេស​អាច​មាន​កម្មសិទ្ធិ​លើ​អចលនទ្រព្យ ដោយ​ត្រូវ​គោរព​តាម​កម្រិត​តម្លៃ​អប្បបរមា និង​ការ​រឹតត្បិត​ប្រភេទ​អចលនទ្រព្យ។

ការណ៍នេះ​បង្កបរិយាកាសងាយស្រួល​សម្រាប់​បណ្តាអ្នកវិនិយោគ​បរទេស​ក្នុង​ការ​ឈានជើងចូលទីផ្សារ ជាពិសេស​នៅពេល​ដែល​តម្លៃ​អចលនទ្រព្យក្នុងប្រទេសម៉ាឡេសុីមានតម្លៃថោក​ជាងប្រទេសផ្សេងទៀត៕ប្រភព: The Edge Malaysia៕

ដោយ: សហសេវិក
អន្តរជាតិ: អាជ្ញាធររដ្ឋបាលមូលដ្ឋានរបស់ប្រទេសចិនកំពុងបង្កើនវិធានការគាំទ្រដើម្បីស្តារទីផ្សារលំនៅឋានឡើងវិញ ដោយផ្តល់ការឧបត្ថម្ភធនលើការទិញផ្ទះ និងប្រាក់កម្ចីទិញផ្ទះ ដែលមានអត្រាការប្រាក់ទាបជាងមុន។

យ៉ាងណាមិញ ទីផ្សារលំនៅឋានចិនត្រូវបានគេរំពឹងថានឹង នៅតែមានល្បឿនយឺតយ៉ាវ បន្ទាប់ពីការលក់ផ្ទះរបស់បណ្តាអ្នកអភិវឌ្ឍន៍កំពូលទាំង១០០ បានដាំក្បាលចុះ២០ភាគរយកាលពីឆ្នាំមុន។នេះបើយោងតាមការចុះផ្សាយដោយកាសែត Nikkei Asia។

ទីក្រុងមួយចំនួនកំពុងពង្រីកការឧបត្ថម្ភសាច់ប្រាក់សម្រាប់ការទិញផ្ទះថ្មី និងផ្ទះប្រភេទទី២។ តួយ៉ាង ទីក្រុង Changzhou ផ្តល់ជូនការឧបត្ថម្ភធនចំនួន២០០.០០០យ័នសម្រាប់ផ្ទះថ្មី និង១៨០.០០០យ័នសម្រាប់ផ្ទះប្រភេទទី២។ កម្មវិធីនេះបានជួយសម្រាលបន្ទុកដល់អ្នកទិញផ្ទះរាប់ពាន់នាក់រួចហើយ និងជំរុញសកម្មភាពសេដ្ឋកិច្ចមូលដ្ឋាន។

ទីក្រុងផ្សេងទៀត រួមទាំងទីក្រុង Wuhan ទីក្រុងណានជីង និងទីក្រុងហាំងចូវ កំពុងឧបត្ថម្ភធនលើប្រាក់កម្ចីទិញផ្ទះ ដើម្បីកាត់បន្ថយអត្រាការប្រាក់លើប្រាក់កម្ចី។

ដោយឡែក ទីក្រុង Yuncheng បានដាក់ចេញវិធានការផ្តល់ប្រាក់កម្ចី ដែលមានអត្រាការប្រាក់ទាប ហើយរដ្ឋបាលមូលដ្ឋាននឹងជួយបង់អត្រាការប្រាក់ជំនួសដល់អ្នកទិញផ្ទះ ដែលមានសញ្ញាបត្របណ្ឌិត ដោយប្រើប្រាស់ការលើកទឹកចិត្តផ្នែកលំនៅឋាន ដើម្បីទាក់ទាញអ្នកមានទេពកោសល្យ និងមានជំនាញ។

ទីក្រុងមួយចំនួនរបស់ប្រទេសចិនអាចមានលទ្ធភាពដាក់ចេញកម្មវិធីជំរុញទីផ្សារលំនៅឋាន ខណៈដែលទីក្រុងទាំងនោះទទួលបានប្រាក់ចំណូលពន្ធខ្ពស់ពីវិស័យផលិតកម្ម។

ទីក្រុងមួយចំនួនដូចជា ទីក្រុង Changzhou និងទីក្រុង Wuhan ទទួលបានអត្ថប្រយោជន៍ពីរោងចក្រធំៗ និងស្ថិរភាពនៃប្រាក់ចំណូលពន្ធសាជីវកម្ម។ ការណ៍នេះផ្តល់ឱ្យរដ្ឋបាលមូលដ្ឋាននូវសាច់ប្រាក់ដើម្បីគាំទ្រដល់អ្នកទិញផ្ទះ។

ផ្ទុយទៅវិញ ទីក្រុងផ្សេងទៀតកំពុងជួបការលំបាក។ ទីក្រុង Tangshan ដែលពឹងផ្អែកយ៉ាងខ្លាំងទៅលើឧស្សាហកម្មដែកថែប បានជួបប្រទះការធ្លាក់ចុះនៃប្រាក់ចំណូលពន្ធ និងការធ្លាក់ចុះយ៉ាងគំហុកនៃតម្លៃផ្ទះ។ដោយសារមូលហេតុនេះ រដ្ឋបាលមូលដ្ឋានមិនអាចមានលទ្ធភាពដើម្បីដាក់ចេញវិធានការគាំទ្រផ្នែកហិរញ្ញវត្ថុដល់ទីផ្សារលំនៅឋានរបស់ខ្លួនបានទេ ដែលនាំឱ្យការលក់ផ្ទះបន្តធ្លាក់ចុះបន្ថែមទៀត៕ប្រភព: Nikkei Asia៕