សម្ព័ន្ធហិរញ្ញវត្ថុដ៏ធំបស់កូរ៉េខាងត្បូងសម្រេចពង្រីកទុនវិនិយោគនៅកម្ពុជា

ដោយៈ ម៉ាណេត

ភ្នំពេញៈ សម្ព័ន្ធហិរញ្ញវត្ថុ DGB Financial Group របស់កូរ៉េខាងត្បូងសម្រេចពង្រីកទុនវិនិយោគលើវិស័យហិរញ្ញវត្ថុរបស់ខ្លួននៅកម្ពុជាបន្ថែមទៀត និងពង្រីកខ្លួនជាធនាគារពាណិជ្ជ បន្ទាប់ពីកម្ពុជាបានចុះអនុស្សរណៈយោគយល់គ្នា (MoU) ជាមួយ DGB Financial Group ក្នុងគោលបំណងដើម្បីលើកកម្ពស់កិច្ចសហប្រតិបត្តិការវិនិយោគជាមួយគ្នាឱ្យកាន់តែរឹងមាំបន្ថែមទៀត

លោកឡុង ឌីម៉ង់ឯកអគ្គរាជទូតកម្ពុជាប្រចាំនៅសាធារណរដ្ឋកូរ៉េ បានថ្លែងនៅថ្ងៃទី១៥ ខែកក្កដា ឆ្នាំ២០២១ថា នៅថ្ងៃទី ១៤ ខែកក្កដា ឆ្នាំ២០២១ លោក និងសហការីបានចូលរួមជាអធិបតីក្នុងកម្មវិធីសម្ពោធ មជ្ឈមណ្ឌលបណ្ដុះបណ្ដាលវិជ្ជាជីវៈ និងគាំពារស្រ្តីបរទេសក្នុងទីក្រុងថេហ្គូ ជាមួយ ប្រធានសម្ព័ន្ធប្រធានDGB Financial Group និងអភិបាលខណ្ឌសហ្គូ ដោយមជ្ឈមណ្ឌលនេះ មានការឧបត្ថមពីធនាគារ DGB Daegu Bank។

ថ្លែងក្នុងពិធីសម្ពោធមជ្ឈមណ្ឌល លោកបានថ្លែងថា “ខ្ញុំបានលើកឡើងដោយមោទនភាពអំពីសមិទ្ធផលថ្មីនេះបន្ថែមទៀត នៃកិច្ចការងារការទូតសេដ្ឋកិច្ចរវាងស្ថានទូតកម្ពុជា និងសម្ព័ន្ធហិរញ្ញវត្ថុ DGB Financial Group បន្ទាប់ពីបានចុះMOU ជាមួយគ្នាកន្លងមក”។

លោកក៏បានឆ្លៀតជួបពិភាក្សាការងារដោយឡែកជាមួយនឹងប្រធានសម្ព័ន្ធ DGB Financial Group និងអគ្គនាយកធនាគារ DGB Daegu Bank អំពី ការវិនិយោគបន្ថែមនៅប្រទេសកម្ពុជា លើវិស័យហិរញ្ញវត្ថុ ការបញ្ចុះអត្រាការប្រាក់ពិសេសសម្រាប់សហគមន៍ខ្មែរនៅប្រទេសកូរ៉េ ការផ្ដល់ឱកាសការងារដល់និស្សិតកម្ពុជាដែលបានរៀនចប់នៅប្រទេសកូរ៉េ ដើម្បីបម្រើការងារនៅក្នុងធនាគារ និងការឧបត្ថមគាំទ្រផ្នែកមនុស្សធម៌ទាំងនៅកម្ពុជា និងប្រទេសកូរ៉េ ដល់ប្រជាជនកម្ពុជា។

លោកឯកអគ្គរាជទូតកម្ពុជាប្រចាំនៅសាធារណរដ្ឋកូរ៉េ បានថ្លែងដូច្នេះថា “លទ្ធផល សម្ព័ន្ធ DGB សម្រេចពង្រីកទុនវិនិយោគលើវិស័យហិរញ្ញវត្ថុរបស់ខ្លួននៅកម្ពុជាបន្ថែមទៀត និងពង្រីកខ្លួនជាធនាគារពាណិជ្ជ ហើយបានជ្រើសរើសអគ្គនាយកធនាគារជាជនជាតិខ្មែរ ធនាគារ សម្រេចបញ្ចុះអត្រាការប្រាក់ពិសេសប្រមាណ៤ភាគរយសម្រាប់ប្រជាជនខ្មែរនៅប្រទេសកូរ៉េ”។

លោកបានថ្លែងបន្តថា ការជ្រើសរើសបុគ្គលិកខ្មែរបន្ថែមទៀតដើម្បីបំពេញការងារនៅក្នុងធនាគារ និងបានឧបត្ថមថវិកា ២ម៉ឺនដុល្លាអាមេរិក ដល់ការគម្រោងផ្សព្វផ្សាយវិស័យអប់រំសម្រាប់យុវជននៅកម្ពុជា។

ការដោះដូរពាណិជ្ជកម្មទ្វេភាគីរវាងប្រទេសកម្ពុជា និងកូរ៉េខាងត្បូងមានទំហំទឹកប្រាក់សរុប ៣៧៧ លានដុល្លារ ក្នុងរយៈពេលប្រាំខែឆ្នាំ២០២០ កើនឡើង៦,១ភាគរយធៀបនឹងរយៈពេលដូចគ្នាកាលពីឆ្នាំ២០២០។
យោងតាមរបាយការណ៍ពីសហគមន៍ពាណិជ្ជកម្មអន្តរជាតិកូរ៉េ ចាប់ពីខែមករា ដល់ខែឧសភា ការនាំចេញទំនិញរបស់ប្រទេសកម្ពុជាទៅទីផ្សារកូរ៉េខាងត្បូង មានទំហំទឹកប្រាក់ ប្រមាណ១៣៩លានដុល្លារ ថយចុះ ០,៤ភាគរយ ធៀបនឹងរយៈពេលប្រាំខែឆ្នាំមុន។ ក្នុងរយៈពេលដូចគ្នានេះដែរ កម្ពុជានាំចូលទំនិញពីកូរ៉េខាងត្បូង មានទំហំទឹកប្រាក់សរុប២៣៧លានដុល្លារ កើនឡើង១០,២ភាគរយ៕

ក្រុមហ៊ុនLSCGនឹងសាងសង់ខុនដូដំបូងគេនៅទីក្រុងកោះនរាមុនគេនាពេលខាងមុខ

ដោយៈស៊ីវ ម៉េង

ភ្នំពេញៈ ក្រុមហ៊ុនLSCGនឹងសាងសង់គំរោងខុនដូធំមួយ នៅទីក្រុងរណបកោះនរាជាលើកដំបូង និងមុនគេនៅក្នុងទីក្រុងកោះនរានាពេលខាងមុខនេះ ខណៈការសាង សង់ហេដ្ឋារចនាសម្ព័ន្ឋទីក្រុងនេះកំពុងធ្វើឡើងយ៉ាងសកម្ម។

អគ្គនាយកក្រុមហ៊ុនLSCGលោកលី សុខឆាយបានមានប្រសាសន៍ឲ្យដឹងនាព្រឹកថ្ងៃទី១៥ កក្កដានេះថា ក្រុមហ៊ុននឹងសាងសង់គំរោងខុនដូមួយ នៅលើទីក្រុងកោះនរានាពេលខាងមុខនេះ តាមផែនការដែលមានស្រាប់ ខណៈទីក្រុងថ្មីនេះមានទស្សនទានអភិវឌ្ឍន៍ស្រដៀងគ្នា នឹងទីក្រុងកោះពេជ្រនាពេលអនាគត។

លោកបន្តថា “ទោះជាយ៉ាងណារហូតមកទល់ពេលនេះ យើងមិនអាចបង្ហើបពីព៌តមាននេះលំអិតនៅឡើយទេ ប៉ុន្តែការសាងសង់នេះនឹងធ្វើឡើង ដោយសហការជាមួយក្រុមហ៊ុនចិនដ៏ធំមួយ”។លោកបន្តថា “ទោះបីកម្ពុជាកំពុងប្រឈមនឹងវិបត្តិជំងឺកូវីដ១៩ក្តី ប៉ុន្តែវិស័យសំណង់ និងអចលនទ្រព្យនៅកម្ពុជាកំពុងមានភាពរីកចម្រើន និងកំពុងទាក់ទាញការវិនិយោគកាន់តែច្រើននាពេលអនាគត”។

ក្រុមហ៊ុនLSCGបានរីកចម្រើនយ៉ាងឆាប់រហ័ស ដោយកាលពីពេលថ្មីៗនេះ ក្រុមហ៊ុនទទួលបានសិទ្ឋស្តារបឹង៥០០ ដែលមានទីតាំងនៅជិតព្រលានយន្តហោះថ្មី នាខេត្តកណ្តាល ព្រំប្រទល់ខេត្តតាកែវ។

លោកលី សុខឆាយជាសហគ្រិនវ័យក្មេងមួយរូបបានបន្តថា គំរោងសាងសង់ខុនដូនេះនឹងធ្វើនាពេលខាងមុខ ដោយក្រុមហ៊ុនទទួលបានសិទ្ឋវិនិយោគ លើទីក្រុងកោះនរារួចហើយ។លោកបន្តថា នេះជាគំរោងទី១ នៅលើទីក្រុងកោះនរា ព្រោះរហូតមកទល់ពេលនេះមិនទាន់មានក្រុមហ៊ុនណាមួយ ប្រកាសពីការវិនិយោគគំរោងណាមួយ លើទីក្រុងកោះនរានៅឡើយទេ៕

ទីក្រុងកោះនរាមានផ្ទៃដីទំហំ១២៥ហិកតា ដែលកំពុងវិនិយោគដោយក្រុមហ៊ុនOCIC ដែលជាក្រុមហ៊ុនលំដាប់យក្សក្នុងស្រុក ដែលបាននិងកំពុងបោះទុនវិនិយោគ២៥០០លានដុល្លារអាមេរិក ដើម្បីសាងសង់ហេដ្ឋារចនាសម្ព័ន្ឋលើទីក្រុងនេះ៕

ក្រុមហ៊ុនដ៏ធំរបស់ថៃគ្រោង៦០លានដុល្លារសាងសង់គម្រោងរីហ្សតនៅប្រទេសដែនកោះម៉ាល់ឌីវ

ដោយៈ សុខុម

បាងកក: ដោយមើលឃើញពីសក្ដានុពលរីកចម្រើនខ្លាំងសម្រាប់វិស័យទេសចរណ៍នៅប្រទេសដែនកោះម៉ាល់ឌីវ ដែលជាគោលដៅទេសចរណ៍ដ៏ល្បីល្បាញ ក្រុមហ៊ុនបដិសណ្ឋារកិច្ចថៃ S Hotels & Resorts (SHR) នឹងបើកដំណើរការគម្រោងរីហ្សតថ្មីរបស់ខ្លួនមានឈ្មោះថា SO/ Maldives ឆាប់ៗនេះ។

យោងតាមកាសែត Bangkok Post ចុះផ្សាយនៅថ្ងៃទី១៥ ខែកក្កដា នេះឱ្យដឹងថា គម្រោងដែលមានទំវិនិយោគ៦០លានដុល្លារអាមេរិក នេះនឹងបើកដំណើរការនៅត្រឹមឆ្នាំ២០២៣។

លោក Dirk De Cuyper ប្រធានផ្នែកបដិសណ្ឋារកិច្ចនៅក្រុមហ៊ុន SHR បានថ្លែងថា ការសាងសង់រីហ្សតដែលមានផ្ទះលម្ហែកាយប្រភេទវីឡាចំនួន៨០ខ្នងនេះនឹងចាប់ផ្តើមនៅខែវិច្ឆិកា ឆ្នាំ២០២១ នេះនៅលើកោះទី៣ នៃគម្រោងទេសចរណ៍ Crossroad Maldives ដែលជាគម្រោងរីហ្សតចម្រុះរបស់ក្រុមហ៊ុន SHR នៅបឹងទឹកប្រៃ Emboodhoo Lagoon។

គម្រោងអភិវឌ្ឍន៍ដែលកាន់កាប់តាមរយៈការបណ្តាក់ទុនរួមស្មើគ្នាជាមួយក្រុមហ៊ុនអភិវឌ្ឍន៍ Wai Eco World Developer ដែលមានមូលដ្ឋាននៅប្រទេសមីយ៉ាន់ម៉ា នេះនឹងក្លាយជាគម្រោងរីហ្សតទី៣ នៅក្នុងគម្រោង Crossroads Maldives បន្ទាប់ពីគម្រោង SAii Lagoon Maldives និងគម្រោង Hard Rock Hotel Maldives បានបើកដំណើរការនៅខែកញ្ញា ឆ្នាំ២០១៩។

លោក Andrew Langdon អនុប្រធានជាន់ខ្ពស់នៃក្រុមហ៊ុនបដិសណ្ឋារកិច្ចបារាំង Accor ទទួលបន្ទុកផ្នែកអភិវឌ្ឍន៍ប្រចាំតំបន់អាស៊ីអាគ្នេយ៍ ប្រទេសជប៉ុន និងប្រទេសកូរ៉េខាងត្បូង បានថ្លែងថា គម្រោង SO/ Maldives នឹងក្លាយជាគម្រោងដំបូងបង្អស់ដែលនឹងត្រូវដំណើរការក្រោមម៉ាកយីហោ (Brand) នេះក្នុងប្រទេសម៉ាល់ឌីវ។

លោក Dirk De Cuyper លើកឡើងថា ការកើនឡើងនូវករណីឆ្លងវីរុសកូវីដ-១៩ នៅម៉ាល់ឌីវ នឹងជះផលប៉ះពាល់រយៈពេលខ្លីប៉ុណ្ណោះសម្រាប់អាជីវកម្ម ខណៈការឆ្លងកើតមានភាគច្រើនតែនៅក្នុងទីក្រុងរាជធានី Male ចំណែកឯកោះផ្សេងៗទៀតនៅតែបើកស្វាគមន៍ភ្ញៀវទេសចរជាធម្មតា។

ភ្ញៀវទេសចរមកពីប្រទេសឥណ្ឌា ដែលស្ថិតក្នុងចំណោមទីផ្សារធំៗនឹងចាប់ផ្តើមធ្វើដំណើរកម្សាន្តឡើងវិញ នៅពេលរដ្ឋាភិបាលម៉ាល់ឌីវ បន្ធូរបន្ថយការរឹតបន្តឹងលើការធ្វើដំណើរសម្រាប់ភ្ញៀវទេសចរនៅអាស៊ីខាងត្បូង ដែលបានចាប់ផ្តើមនៅថ្ងៃនេះ។

លោក Dirk De Cuyper បានគូសបញ្ជាក់ថា “យើងអាចមើលឃើញទស្សនវិស័យវិជ្ជមានសម្រាប់ត្រីមាសទី៤ ឆ្នាំ២០២១ និងឈានចូលដល់ឆ្នាំ២០២២ ដោយប្រទេសម៉ាល់ឌីវ ទំនងជាគោលដៅទេសចរណ៍មួយដែលមានសុវត្ថិភាពបំផុត”៕

អាជ្ញាធរខេត្តកំពតបញ្ជាឱ្យបញ្ឈប់ជាបន្ទាន់និងមោឃភាពចំពោះការចុះហត្ថលេខាផ្ទេរសិទ្ធិកាន់កាប់ដីរដ្ឋ

ដោយៈ វឌ្ឍនៈ

ភ្នំពេញៈ អភិបាលខេត្តកំពតលោកជាយ តាយបានបញ្ជាទៅអភិបាលក្រុងស្រុកទាំងអស់ក្នុងខេត្តកំពតឱ្យបញ្ឈប់ជាបន្ទាន់និងមោឃភាពនូវរាល់ការចុះហត្ថលេខាឬការបញ្ជាក់ទទួលស្គាល់ លើលិខិតផ្ទេរសិទ្ធិពាក្យស្នើសុំកាន់កាប់ប្រើប្រាស់ដីធ្លី លិខិតទិញលក់ដីរដ្ឋ និងការបញ្ជាក់លើប្លង់បង្ហាញទីតាំងដី ជាអាទិ៍ដែលធ្វើឡើងនៅលើដីក្នុងតំបន់ការពារធម្មជាតិ និងរបៀអភិរក្សជីវៈចម្រុះ

យោងតាមលិខិតរបស់លោកជា តាយអភិបាលខេត្តកំពតផ្ញើជូនអភិបាលក្រុងស្រុក ក្នុងខេត្តកំពតឱ្យដឹងកាលពីថ្មីៗនេះថា តាមរយៈក្រសួងបរិស្ថាន បានសង្កេតឃើញថា រដ្ឋបាលឃុំ សង្កាត់មួយចំនួននៅតែបន្តធ្វើការចុះហត្ថលេខាឬការបញ្ជាក់ទទួលស្គាល់លើលិខិតផ្ទេរសិទ្ធិ ពាក្យស្នើសុំកាន់កាប់ប្រើប្រាស់ដីធ្លី លិខិតទិញលក់ដីរដ្ឋ និងបញ្ជាក់លើប្លង់បង្ហាញទីតាំងដីនៅលើដីដែលបានកាប់ឆ្ការរុករាន ទន្ទ្រានដីព្រៃរដ្ឋ ដើម្បីធ្វើជាកម្មសិទ្ធិ ដែលស្ថិតនៅតំបន់ការពារធម្មជាតិ និងរបៀងអភរក្សជីវៈចម្រុះ ដែលទង្វើទាំងនេះ ជាអំពើផ្ទុយនឹងច្បាប់។

ក្នុងលិខិតរបស់លោកជាវ តាយបានបញ្ជាក់ថា ដើម្បីចូលរួមទប់ស្កាត់និងបដិសេធចោលនូវអនុភាពនានារបស់ឯកសាររដ្ឋបាលខេត្តស្នើឱ្យអភិបាលក្រុងស្រុកចាត់វិធានការមួយចំនួនដោយៈ

១. បដិសេធនិងមោឃភាព រាល់លិខិត និងឯកសារទាំងឡាយណាដែលមានការពាក់ព័ន្ធទៅនឹងការកាន់កាប់និងការផ្ទេរសិទ្ធិទាំងឡាយលើដីធ្លី ដែលស្ថិតនៅតំបន់ការពារធម្មជាតិ និងរបៀងអភិរក្សជីវៈចម្រុះ ដែលរដ្ឋបាលឃុំ សង្កាត់បានចុះហត្ថលេខាបញ្ជាក់ពេលកន្លងមក ។

២. សូមណែនាំទៅរដ្ឋបាលឃុំ សង្កាត់ ឱ្យបញ្ឈប់រាល់ការចុះហត្ថលេខា បញ្ជាក់លើលិខិតផ្ទេរសិទ្ធិពាក្យស្នើសុំកាន់កាប់ប្រើប្រាស់ដីធ្លី លិខិតទិញលក់ដីរដ្ឋឬការបញ្ជាក់លើប្លង់បង្ហាញទីតាំងដី ជាអាទិ៍ នៅលើដីដែលស្ថិតក្នុងតំបន់ការអារធម្មជាតិ និងរបៀងអភិរក្សជីវៈចម្រុះ នៃដែនសមត្ថកិច្ចរបស់ខ្លួន។

៣. ផ្ដល់កិច្ចសហការ និងចាត់វិធានការយ៉ាងម៉ឺងម៉ាត់តាមផ្លូវច្បាប់ចំពោះរដ្ឋបាលឃុំ សង្កាត់ណាដែលនៅតែបន្តចុះហត្ថលេខាបញ្ជាក់លើលិខិតផ្ទេរសិទ្ធិឬពាក្យស្នើសុំកាន់កាប់ប្រើប្រាស់ដីធ្លី ជាអាទិ៍នៅលើដីដែលបានកាប់ឆ្ការ រុករាន ទន្ទ្រានដីព្រៃរដ្ឋដោយខុសច្បាប់ ដើម្បីធ្វើជាកម្មសិទិ្ធក្នុងបំបន់ការពារធម្មជាតិនិងរបៀងអភិរក្សជីវៈចម្រុះ ក្នុងដែនសមត្ថកិច្ចគ្រប់គ្រងរបស់រដ្ឋបាលក្រុងស្រុក។

តាមការបញ្ជាក់ពីភ្នាក់ងារអចលនវត្ថុប្រចាំខេត្តកំពតបានឱ្យដឹងថា ទោះស្ថិតនៅក្នុងវិបត្តិនៃជំងឺកូវីដ១៩ក្ដី សកម្មភាពទិញលក់ដីធ្លីនៅក្នុងខេត្តកំពតនៅតែបន្តមានសកម្មភាពទិញលក់ជាបន្តបន្ទាប់ជាពិសេសប្រភេទដីសម្រាប់សង់ផ្ទះលំហែកាយនៅតំបន់ក្រុងថ្មីនៃខេត្តកំពតគឺក្រុងបូកគោ។ មិនតែប៉ុន្តែសកម្មភាព នៃការអភិវឌ្ឍសំណង់នៅក្នុងខេត្តនេះ ក៏នៅតែមានតែដំណើរជាធម្មតាផងដែរនៅក្នុងវិបត្តិនៃជំងឺសកលមួយនេះ៕

អ្នកជំនាញបញ្ជាក់ថាតម្លៃដីធ្លីជុំវិញទីក្រុងភ្នំពេញ៥០គីឡូម៉ែត្រកើនឡើងដល់១០០ដុល្លារក្នុងមួយម៉ែត្រការ៉េ

ដោយៈ វឌ្ឍនៈ

ភ្នំពេញៈ ទោះបីជាកម្ពុជាជួបវិបត្តិនឹងជំងឺកូវីដ១៩ និងបានជះឥទ្ធិពលអាក្រក់ដល់វិស័យជាច្រើនក្ដី តែសម្រាប់តម្លៃដីធ្លីនៅតែបន្តរក្សាតម្លៃមួយល្អប្រសើរ ជាក់ស្ដែងតម្លៃដីធ្លីនៅជុំវិញរាជធានីភ្នំពេញជា ពិសេសតម្លៃដីនៅតាមបណ្ដោយផ្លូវជាតិសំខាន់ៗ នៅតែរក្សាបានល្អ។

លោកសំ សុខនឿនប្រធានសមាគមអចលនទ្រព្យសកលបានឱ្យដឹងនៅថ្ងៃទី១៤ ខែកក្កដា ឆ្នាំ២០២១ថា នៅតម្លៃដីធ្លីនៅជុំវិញរាជធានីចម្ងាយ៥០គីឡូម៉ែត្រ គឺនៅតែល្អប្រសើរ ក្នុងរង្វន់មិនក្រោម១០០ដុល្លារអាមេរិកទេក្នុងមួយម៉ែត្រការ៉េ។ ផ្លូវជាតិលេខ៤ ៥០គីឡូម៉ែត្រពីភ្នំពេញអាចនិយាយថា ហួសទីរួមខេត្តកំពង់ស្ពឺទៅទៀត តម្លៃដីធ្លីខ្ទង់១០០ដុល្លារអាមេរិកដែរ។

លោកបានបន្តថា ផ្លូវជាតិសំខាន់ៗផ្សេងទៀតដូចជាផ្លូវជាតិលេខ៦ ចេញពីក្រុង៥០គីឡូម៉ែត្រហើយក៏តម្លៃនៅជុំវិញ១០០ដុល្លារអាមេរិកដែរ ហើយផ្លូវជាតិ១ក៏ដូចគ្នា ចេញពីក្រុង៥០គីឡូម៉ែត្រក៏តម្លៃប្រហាក់ប្រហែលគ្នានេះដែរ។

លោកបន្ថែមថា បើយើងប្រៀបធៀបតម្លៃដីធ្លីនៅជុំវិញរាជធានីភ្នំពេញ៥០គីឡូម៉ែត្រដូចគ្នា គ្មានតំបន់ណាថោកជាងតំបន់អរិយក្សត្រនោះទេ។ តំបន់ 7NG បើយើងវាស់ចេញពីភ្នំពេញទៅមានចម្ងាយប្រហែលជា៣០គីឡូម៉ែត្រប៉ុណ្ណោះ ប៉ុន្តែតម្លៃដីធ្លីនៅក្រោម១០០ដុល្លារអាមេរិកនៅឡើយទេ។

លោកបានថ្លែងថា នៅស្រុកល្វាឯមក្នុងតំបន់អរិយក្សត្រវិញក៏ដូចគ្នាដែរ តម្លៃដីធ្លីខ្លះមានត្រឹម២០ដុល្លារឬ៣០ដុល្លារអាមេរិកប៉ុណ្ណោះក្នុងមួយគីឡូម៉ែត្រ ដែលអាចបញ្ជាក់ថាតំបន់ទាំងនេះតម្លៃនៅទាបជាងតំបន់ផ្សេងទៀតដែលមានផ្លូវនិងហេដ្ឋារចនាសម្ព័ន្ធស្អាតល្អ។

លោកបានបញ្ជាក់ដូច្នេះថា “តំបន់ទាំងនេះរង់ចាំតែស្ពានមកដល់ រង់ចាំតែរដ្ឋាភិបាលសាងសង់ស្ពានប៉ុណ្ណោះ វានឹងឡើងថ្លៃ។ តែបើទោះបីជាស្ពានមិនទាន់សាងសង់ក៏ពិតមែនក្ដី អ្នកវិនិយោគក៏គួរតែសម្លឹងមើលពីតំបន់នេះរួចជាស្រេច ព្រោះមិនយូរទេ រដ្ឋាភិបាលនឹងសាងសង់ស្ពានឆ្ពោះទៅតំបន់អរិយក្សត្រជាក់ជាមិនខាន”។

លោកសុខ នឿនបានឱ្យដឹងទៀតថា បើទោះបីជាតម្លៃដីធ្លីនៅតំបន់អរិយក្សត្រ ស្រុកខ្សាច់កណ្ដាលនិងស្រុកល្វាឯមនៅមានកម្រិតក៏ពិតមែន ប៉ុន្តែបើធៀបនឹងពីមុនតម្លៃនេះ បានឡើងជាបន្តបន្ទាប់ ហើយនៅតែបន្តការកើនឡើងបន្តទៀត ទោះស្ថិតនៅក្នុងវិបត្តិនៃជំងឺកុវីដ១៩ក៏ដោយ។

លោកឧកញ៉ាបណ្ឌិតគីម ហ៊ាងប្រធានក្រុមហ៊ុនអចលនទ្រព្យ KW Cambodia បានឱ្យដឹងផងដែរថា ការរីកសាយនៃទីក្រុងធ្វើឱ្យតម្លៃដីធ្លីនៅតំបន់ជាយៗក្រុងកាន់តែឡើងថ្លៃ ហើយវាកាន់តែរីកសាយទៅកាន់តំបន់ជាយៗក្រុងកាន់តែឆ្ងាយថែមទៀត។ ការវិនិយោគដីធ្លីនៅកម្ពុជានៅតែមានឱកាសទូលាយ ដោយសារតែក្នុងតំបន់តម្លៃដីធ្លីនៅកម្ពុជានៅមានកម្រិតនិងមានឱកាសក្នុងការឡើងថ្លៃបន្តទៀតនៅពេលអនាគត៕

ពាណិជ្ជកម្មទ្វេភាគីកម្ពុជា-ថៃសម្រេចបានទំហំទឹកប្រាក់ជាង៣៣០០លានដុល្លារ

ដោយៈ ប៊ី
ភ្នំពេញៈ ពាណិជ្ជកម្មទ្វេភាគីរវាងកម្ពុជា-ថៃ ក្នុងរយៈពេល ៥ ខែ ដើមឆ្នាំ ២០២១ សម្រេចបានទំហំទឹកប្រាក់ប្រមាណ៣ ៣០០លានដុល្លារអាមេរិក ក្នុងនោះការនាំចូលមានទំហំទឹកប្រាក់ជាង២ ៩០០ ខណៈការនាំចេញមានទំហំទឹកប្រាក់ប្រមាណជាង៤៥៩លានដុល្លារអាមេរិក ។ នេះបើយោងតាមរបាយការណ៍ចុងក្រោយពីទីប្រឹក្សាពាណិជ្ជកម្មស្ថានទូតថៃ ប្រចាំព្រះរាជាណាចក្រកម្ពុជា។

របាយការណ៍បានឱ្យដឹងថា នៅក្នុងស្ថានភាពនៃការរីករាលដាលជម្ងឺកូវីដ-១៩ ចំពោះការដោះដូរទំនិញរវាងប្រទេសទាំងពីរ នៅបន្តការផ្លាស់ប្តូរទំនិញជាធម្មតា ទោះបីនៅក្នុងស្ថានភាពមិនទាន់ប្រក្រតីយ៉ាងណាក៏ ជាក់ស្តែងនៅក្នុងរយៈពេល៥ខែ ដើមឆ្នាំ២០២១នេះ ការធ្វើពាណិជ្ជកម្មរវាងប្រទេសទាំងពីរ មានទំហំទឹកប្រាក់សរុបជាង៣ ៣០០លានដុល្លារអាមេរិក បានថមថយជាង ៥ ភាគរយ ខណៈនៅឆ្នាំ ២០២០ ក្នុងរយៈដូចគ្នា មានទំហំទឹកប្រាក់ជាង ៣ ៥០០ លានដុល្លារ ។

ទាក់ទងការនាំចេញ-ចូលវិញ នៅក្នុងរយៈពេល៥ខែ នេះដែរ ពាណិជ្ជកម្មនៃការនាំចូល មានទំហំទឹកប្រាក់ជាង២ ៩០០លានដុល្លារអាមេរិក បានកើនឡើងជិត៣ភាគរយ ខណៈការនាំចេញមានទំហំទឹកប្រាក់ជាង ៤៥៩ លានដុល្លារអាមេរិក ថយចុះជាង៣៦ភាគរយ បើធៀបនឹងរយៈពេលដូចគ្នាទៅនឹងឆ្នាំ២០២០។

ទោះបីមានការធ្លាក់ចុះក៏ពិតមែន តែផលិតផលនាំចេញមួយចំនួនបានរក្សាស្ថេរភាពល្អរួមមាន៖ បន្លែផ្លែឈើ, លោហៈធាតុ ខ្សែអេឡិចត្រូនិច គ្រឿងបង្គុំអគ្គិសនី សាច់សត្វ គ្រឿងបង្គុំអេឡិចត្រូនិច ស្បែកជើង ឧបករណ៍អគ្គិសនីប្រើក្នុងផ្ទះ រួមជាមួយផលិតផ្សេងៗទៀត។

ជុំវិញការធ្វើពាណិជកម្មអន្តរជាតិ បើតាមរបាយការណ៍ក្រសួងសេដ្ឋកិច្ច និងហិរញ្ញវត្ថុ នៅក្នុងរយៈពេល៥ខែ ឆ្នាំ២០២១ កម្ពុជាបាននាំចេញទំនិញសរុប មានទំហំទឹកប្រាក់ជិត៦ ០០០លានដុល្លារអាមេរិក កើនឡើង១,៦% ខណៈការនាំចូលសម្រេចបានក្នុងទំហំទឹកប្រាក់ចំនួនជាង៨ ៦០០លានដុល្លារអាមេរិក កើនឡើង១៧% បើធៀបរយៈពេលដូចគ្នា ឆ្នាំ២០២០៕

រដ្ឋាភិបាលបន្តជំរុញគម្រោងស្ថាបនាផ្លូវនិងស្ពានវែងជាងគេឆ្លងកាត់ទន្លេសាបតម្លៃ២០០លានដុល្លារ

ដោយៈ ប៊ី

ភ្នំពេញៈ រាជរដ្ឋាភិបាលកម្ពុជាបន្តជំរុញគម្រោងអភិវឌ្ឍន៍ផ្លូវ និងស្ពានដ៏វែងជាងគេនៅកម្ពុជា ដោយឆ្លងកាត់ទន្លេសាប តភ្ជាប់ពីខេត្តកំពង់ឆ្នាំងឆ្ពោះទៅខេត្តកំពង់ធំ តាមរយៈការដាក់សំណើទៅរដ្ឋាភិបាលចិន ដើម្បីស្នើឥណទានក្នុងការសាងសង់ផ្លូវ និងស្ពានដ៏វែងជាងគេនេះ។

លោកហេង រត្នពិសិដ្ឋអគ្គនាយកសាធារណការនៃក្រសួងសាធារណការ និងដឹកជញ្ចូន ត្រូវបានដកស្រង់សម្តីពីកាសែតភ្នំពេញប៉ុស្តិ៍កាលពីថ្មីៗនេះ ដោយលោកបានលើកឡើងថា តាមរយៈក្រសួងសាធារណការតំណាងឱ្យរាជរដ្ឋាភិបាលកម្ពុជាកាលពីថ្មីៗនេះបានដាក់សំណើរួចហើយទៅរដ្ឋាភិបាលចិន។

លោកបានថ្លែងបន្តថា សំណើនេះគឺដើម្បីស្នើឥណទានពីចិនមកសាងសង់ផ្លូវថ្មី និងស្ពានដែលត្រូវចំណាយទឹកប្រាក់២០០លានដុល្លារ តភ្ជាប់ពីខេត្តកំពង់ឆ្នាំង និងខេត្តកំពង់ធំ។

ទោះជាយ៉ាងណាលោក ហេង រត្នពិសិដ្ឋ បានអះអាងថា សំណើនេះមិនទាន់មានការឆ្លើយតបពីរដ្ឋាភិបាលចិនទេ ខណៈកម្ពុជាក៏កំពុងទន្ទឹងរង់ចាំចម្លើយនេះ ដើម្បីឈានទៅរកកិច្ចសហប្រតិបត្តិការថ្មីបន្ថែមទៀតក្នុងការអភិវឌ្ឍហេដ្ឋារចនាសម្ព័ន្ធទាំងនេះ។

លោកបានបញ្ជាក់ថា “យើងកំពុងតែដាក់ស្នើសុំឥណទានពីរដ្ឋាភិបាលចិន ហើយយើងមិនទាន់បានចុះកិច្ចសន្យាលើឥណទានទាំងនេះទេ។ សំណើនេះ គឺស្នើសុំធ្វើផ្លូវថ្មីជាមួយស្ពានឆ្លងកាត់ទន្លេសាបនៅខេត្តកំពង់ឆ្នាំងនេះ”។

តាមគម្រោងស្ពានតភ្ជាប់ពីខេត្តកំពង់ឆ្នាំងទៅខេត្តកំពង់ធំនេះនឹងត្រូវសង់ឆ្លងកាត់ដៃទន្លេចំនួន៣ រួមមាន ទន្លេផ្សារក្រោម ទន្លេជល់មុខ និងទន្លេកំពង់ហាវដែលមានប្រវែង៣ ៩០០ម៉ែត្រ។ រីឯការសាងសង់ផ្លូវគឺមានប្រវែង ៥៧,៣ គីឡូម៉ែត្រ ដែលនឹងត្រូវសាងសង់ចាប់ពីស្រុកកំពង់លែង ក្នុងខេត្តកំពង់ឆ្នាំងទៅស្រុកស្ទឹងសែនក្នុងខេត្តកំពង់ធំ។

នៅក្នុងឱកាសបើកពិធី បុណ្យទន្លេលើកទី៥ នៅខេត្តកំពង់ឆ្នាំងកាលពីឆ្នាំ២០១៩ សម្តេចតេជោនាយករដ្ឋមន្ត្រី បានប្រកាសជូនដំណឹងដល់បងប្អូន ជនរួមជាតិទូទាំងប្រទេស ជាពិសេស បងប្អូនប្រជាពលរដ្ឋនៃខេត្តកំពង់ឆ្នាំងទាំងអស់ ឱ្យបានដឹងអំពីគម្រោងសាងសង់ផ្លូវប្រវែងជាង៥៧គីឡូម៉ែត្រ ពីស្រុក កំពង់លែង ខេត្ត កំពង់ឆ្នាំង ឆ្ពោះទៅកាន់ ក្រុង ស្ទឹងសែន នៃខេត្តកំពង់ធំ។

ជាមួយគ្នានេះដែរ ក៏នឹងមានសាងសង់ស្ពានឆ្លងកាត់ដៃទន្លេចំនួន៣ រួមមាន ១)ទន្លេផ្សារក្រោម ២)ទន្លេជល់មុខ និង ៣)ទន្លេកំពង់ហាវ ពីខេត្តកំពង់ឆ្នាំង ឆ្ពោះទៅខេត្តកំពង់ធំ ដែលមានប្រវែងរហូតដល់ទៅ៣៩០០ម៉ែត្រ ដែលនឹងក្លាយជាស្ពានវែងជាងគេបំផុត នៅក្នុងប្រទេសកម្ពុជា។

ទន្ទឹមនឹងនេះដែរ រាជរដ្ឋាភិបាលកម្ពុជា ក៏មានគម្រោងសាងសង់ស្ពាន២បន្ថែមទៀត នៅក្នុងខេត្តកំពង់ធំ ដើម្បីសម្រួលកុំឱ្យមានផលប៉ះពាល់ ទៅដល់ចរាចរណ៍ផ្លូវទឹក ក៏ដូចជាចរាចរណ៍ត្រី។ គម្រោងនេះគឺ បានសិក្សារួចហើយ ហើយមិនមានផលប៉ះពាល់ណាមួយដល់ធនធានធម្មជាតិ បញ្ហាបង្វែរចរន្តទឹក និង ការបំលាស់ទីរបស់ត្រីនោះទេ៕

ការចងចាំដែលមិនអាចបំភ្លេចបានជាមួយនឹងផ្សារប្រពៃណីកម្ពុជា

ដោយ៖ ចិន្ដា

ថ្ងៃពុធ ទី 15 ខែកក្កដា ឆ្នាំ 2021

រឿងដំបូងដែលខ្ញុំចងចាំពីកុមារភាពរបស់ខ្លួនគឺ ជារៀងរាល់ព្រឹកខ្ញុំបានជិះម៉ូតូឌុបជាមួយលោកយាយ ទៅផ្សារសាមគ្គីដែលជាផ្សារក្នុងស្រុកចម្ងាយត្រឹមតែ ១០ នាទីពីផ្ទះរបស់យើង។ តាមទម្លាប់យាយតែងតែ ទម្លាក់ខ្ញុំ នៅតូបអាហារលក់នំបញ្ចុកជាអាហារពេលព្រឹកដ៏មានឱជារសនៅក្នុងតំបន់ នៅមុនពេលគាត់ចេញ ទៅទិញឥវ៉ាន់ និងគ្រឿងផ្គត់ផ្គង់ក្នុងផ្ទះ។ មានពេលខ្លះដែលខ្ញុំបានបរិភោគនំបញ្ចុករួចមុន ខ្ញុំក៏ដើរទៅរក យាយរបស់ខ្ញុំ។ ពេលដែលខ្ញុំមានអាយុ 6 ឆ្នាំ ខ្ញុំនៅតែមានការភ្ញាក់ផ្អើលរាល់ពេលដែលអ្នកលក់ ទាំងអស់ស្គាល់ និងចង្អុលទៅទីតាំងរបស់លោកយាយខ្ញុំ ហាក់បីដូចជាគាត់ជាបុគ្គលល្បីល្បាញម្នាក់។

តាមការពិតជីដូនរបស់ខ្ញុំមិនមែនជាបុគ្គលល្បីល្បាញអ្វីនោះទេ ប៉ុន្តែគាត់គឺជាម៉ូយប្រចាំទីនោះ។ អ្នកគ្រប់គ្នាសុទ្ធតែ ស្គាល់អ្នកផ្សេងទៀតដែលនៅក្នុងទីផ្សារនេះ។ រឿងដែលអស្ចារ្យនៅតែមានជាបន្តបន្ទាប់ ទៀតនៅទីនោះ ដោយក្រោយមកមានស្ត្រីចំណាស់ជាច្រើននាក់បានជួបខ្ញុំ ហើយនិយាយថា “ខានជួបយូរ ឥឡូវធំច្រើនដល់ហើយ”។ ប្រយោគនេះធ្វើឲ្យខ្ញុំភ្ញាក់ផ្អើលបន្តិចព្រោះខ្ញុំខ្លួនឯងចាំមិនបានថា ខ្ញុំធ្លាប់បាន ជួបពួកគាត់នៅកន្លែងណាទេ។ ខណៈពេលដែលកំពុងតែមានចម្ងល់ថាតើខ្ញុំស្គាល់ពួកគាត់នៅកន្លែងណា នោះ រឿងមួយដែលខ្ញុំប្រាកដក្នុងចិត្ត គឺអ្នករាល់គ្នាជាផ្នែកមួយនៃសហគមន៍ដ៏ធំមួយនេះ ពួកគេតែងតែត្រៀម ខ្លួនរួចជាស្រេចក្នុងការផ្ដល់ជំនួយដល់គ្នាទៅវិញទៅមក។

កន្លងមក លោកយាយ និងម្តាយរបស់ខ្ញុំតែងតែធ្វើដំណើរទៅផ្សារក្នុងស្រុកធំៗ ដូចជាផ្សារធំថ្មី និងផ្សារអូរឫស្សី ដើម្បីទិញទំនិញ និងគ្រឿងទេសក្នុងតម្លៃបោះដុំ។ សូម្បីតែសម្រាប់ក្មេងអាយុ 6 ឆ្នាំ ក៏យល់ថា ផ្សារទាំងនេះមានមនុស្សដើរកម្សាន្តយ៉ាងច្រើនកុះករ។ ខ្ញុំចាំបានថាខ្ញុំបែកញើសសស្រាក់ ដោយគ្រាន់តែដើរចុះដើរឡើង ក្បែរភ្ញៀវដែលកំពុងតថ្លៃទំនិញ ដើម្បីទទួលបានតម្លៃថោកនៅជុំវិញទីនោះ។ បរិយាកាសនៃទីផ្សារទាំងនេះ តែងតែមានភាពរស់រវើក និងអ៊ូអរខ្លាំងដែលបង្ហាញពីភាពពេញនិយមរបស់ ទីនេះបើប្រៀបធៀបទៅនឹងផ្សារតូចៗផ្សេងទៀត។

ខ្ញុំដឹងច្បាស់ថាប្រជាជនកម្ពុជាជាច្រើនធ្លាប់មានបទពិសោធន៍ស្រដៀងគ្នានេះដែរក្នុងវ័យកុមារភាព។ ផ្សារបែបប្រពៃណីក្នុងស្រុក មិនថាធំ ឬតូចតែងតែជាផ្នែកមួយនៃការរស់នៅរបស់យើង ដែលនាំមកនូវអាហារ ទំនិញ និងសេវាកម្ម លើសពីនេះទៅទៀតក៏បានរក្សាទុកនូវពេលវេលាដែលមិនអាចបំភ្លេចបាន ជាមួយនឹង មនុស្សជាទីស្រលាញ់របស់យើងផងដែរ។ ទោះជាយ៉ាងនេះក្ដី 15 ឆ្នាំក្រោយមក ទីផ្សារទាំងនេះនៅតែរក្សា បានប្រជាប្រិយភាពដដែល និងទទួលបានអ្នកចូលមកលេងកាន់តែច្រើនឡើងៗ ដោយសារចំនួនប្រជាជន នៅតែបន្តកើនឡើងយ៉ាងគំហុគនៅក្នុងរាជធានីភ្នំពេញ។

ទោះបីជាផ្សារទាំងនេះបន្តមានភាពល្បីល្បាញក្នុងចំណោមអ្នកស្រុក និងភ្ញៀវទេសចរយ៉ាងណាក្ដីក៏ នៅរាជធានីភ្នំពេញ មិនទាន់ឃើញមានផ្សារក្នុងស្រុកបន្ថែមដូចជាផ្សារធំថ្មី ផ្សារអូរឫស្សី និងផ្សារអូឡាំពិក នៅឡើយទេ។ ផ្សារទំនើប និងកន្លែងលក់ទំនិញទំនើបៗជាច្រើន បានដំណើរការ និងកំពុងធ្វើការអភិវឌ្ឍ ជារៀងរាល់ឆ្នាំ។ ទោះជាយ៉ាងណាក៏ដោយអ្នកអភិវឌ្ឍជាច្រើន ហាក់មិនបានយល់ពីសារៈសំខាន់នៃទីផ្សារ ប្រពៃណីក្នុងស្រុកសម្រាប់ប្រជាជនកម្ពុជាគ្រប់រូបនៅឡើយ។

ការចងចាំពីកុមារភាពរបស់ខ្ញុំបានវិលត្រលប់មកវិញ នៅពេលដែលព័ត៌មានអំពីផ្សារបែបប្រពៃណីថ្មី ផ្សារជីស៊ី អូរឫស្សីកំពុងចាប់ផ្តើមដំណើរការសាងសង់នៅក្នុងឆ្នាំនេះ។ ជាមួយនឹងផ្សារក្នុងស្រុកថ្មីនេះ ខ្ញុំជឿជាក់ថា ទីនេះនឹងកំណត់ស្តង់ដារថ្មីនៃអ្វីដែលផ្សារបែបប្រពៃណីក្នុងស្រុកគួរតែមាន ហើយក៏បន្ថែម នូវទីតាំងដ៏ល្បីល្បាញមួយនៅក្នុងទីក្រុងភ្នំពេញដែលកំពុងរីកចម្រើនជាលំដាប់។ អ្នកអភិវឌ្ឍគម្រោងគឺ GCCគ្រុប បានសិក្សាយ៉ាងហ្មត់ចត់អំពីវប្បធម៌ និងរបៀបរស់នៅរបស់ប្រជាជនកម្ពុជានៅមុនពេលបង្កើត គម្រោងនីមួយៗ។ នោះជាមូលហេតុដែលគម្រោងនេះបានទាក់ទាញចំណាប់អារម្មណ៍ប្រជាជនកម្ពុជា ជាច្រើនខែណាស់មកហើយ។ ខ្ញុំសង្ឃឹមថាអ្នកអភិវឌ្ឍគម្រោងថ្មីនេះ នឹងជួយបង្កើនស្ថានភាពសេដ្ឋកិច្ចសង្គម របស់ប្រជាជនកម្ពុជា ក្នុងពេលជាមួយគ្នានេះក៏ជួយបង្កើតអនុស្សាវរីយ៍ដែលមិនអាចបំភ្លេចបានសម្រាប់ មនុស្សជំនាន់ក្រោយឲ្យដូចជាការចងចាំរបស់ខ្ញុំជាមួយនឹងលោកយាយ និងម្តាយរបស់ខ្ញុំផងដែរ។

ផ្សារជីស៊ី អូរឫស្សីបានលុបបំបាត់រាល់បញ្ហា ដែលតែងជួបប្រទះនៅក្នុងផ្សារក្នុងស្រុក ដូចជាខ្យល់ អាកាសមិនល្អ ភាពរញ៉េរញ៉ៃ ច្រកផ្លូវដើរតូចចង្អៀតជាដើម។ សម្រាប់ទស្សនៈផ្ទាល់ខ្លួនរបស់ខ្ញុំយល់ថា គម្រោងនេះនឹងជួយដល់ម្ចាស់អាជីវកម្មក្នុងស្រុក កសិករ និងអ្នកលក់ដូរយ៉ាងច្រើន ដោយអនុញ្ញាតឲ្យពួកគេ ងើបចេញពីបញ្ហាការបាត់បង់ប្រាក់ចំណូលពីជំងឺរាតត្បាតផ្សេងៗ។ លើសពីនេះទៅទៀត កន្លែងលក់ទំនិញ ផ្សេងៗនឹងត្រូវបានបង្កើតបន្ថែមទៀត ដែលផ្តល់ឱកាសថ្មីសម្រាប់ទាំងវិនិយោគិន និងម្ចាស់អាជីវកម្មវ័យក្មេង ក្នុងការចាប់យកឱកាសនៅទីនោះ ព្រោះទីតាំងពាណិជ្ជកម្ម គឺជាកំណប់មាសថ្មី សម្រាប់ទីផ្សារអចលនទ្រព្យ នៅរាជធានីភ្នំពេញ ក៏ដូចជានៅទូទាំងប្រទេសកម្ពុជាផងដែរ។

សម្រាប់ព័ត័មានលម្អិតបន្ថែមអំពីគម្រោងផ្សារ GC Orussey Market

លោកអាចអាចស្វែងរកតាមរយៈ:
Facebook Page https://www.facebook.com/gc.orusseymarket
ឬ Telegram Channel: https://t.me/GCOrusseyMarket

ឬទំនាក់ទំនងទៅកាន់: (+855) 099 331015, 098 331015

បញ្ចប់

ចិន្ដា គឺជាអ្នកវិភាគ និងនិពន្ធអំពីការវិនិយោគរយៈពេលវែង។ អត្ថបទនេះ គឺជាការយល់ឃើញទាំងស្រុងរបស់លោក។

រដ្ឋាភិបាលនិងWFPរួមគ្នាបង្កើតបណ្តាញធុរកិច្ចថ្មីមួយ

ដោយៈ ប៊ី

ភ្នំពេញ៖ រាជរដ្ឋាភិបាលកម្ពុជា និងកម្មវិធីស្បៀងអាហារពិភពលោក (WFP) នៅពីថ្ងៃទី១៥ ខែកក្កដា បានប្រកាសដាក់ឱ្យដំណើរការបណ្តាញធុរកិច្ចថ្មីមួយ ដោយប្រមូលចងក្រងអាជីវកម្ម ក្នុងគោលបំណងលើកកម្ពស់អាហារូបត្ថម្ភឱ្យបានកាន់តែប្រសើរឡើងនៅកម្ពុជា។

បណ្តាញធុរកិច្ចនៃចលនាបង្កើនអាហារូបត្ថម្ភនៅកម្ពុជា(SBNCambodia)នេះជាគំនិតផ្តួចផ្តើមថ្មីមួយនេះដែលប្រមូលផ្ដុំនូវអាជីវកម្មនៅក្នុងវិស័យស្បៀងអាហារដែលមានទស្សនវិស័យវែងឆ្ងាយសម្រាប់អនាគត ដើម្បីពន្លឿនវឌ្ឍនភាព អាហារូបត្ថម្ភនៅទូទាំងប្រទេសកម្ពុជា។

បណ្តាញធុរកិច្ចនេះត្រូវបានបង្កើតឡើងដោយក្រុមប្រឹក្សាស្ដារអភិវឌ្ឍន៍វិស័យកសិកម្ម និងជនបទ (CARD) ដោយមានការគាំទ្រពីកម្មវិធីស្បៀងអាហារពិភពលោក (WFP) ដើម្បីជំរុញកិច្ចសហការនិងការគាំទ្រគ្នាទៅវិញទៅមករវាងវិស័យឯកជន សមាគមធុរកិច្ច រដ្ឋាភិបាល សង្គមស៊ីវិល និងដៃគូអភិវឌ្ឍន៍ ដើម្បីចូលរួមចំណែក ក្នុងការជំរុញឱ្យមានរបបអាហារសុខភាព និងការអនុវត្តទម្លាប់សុខភាពប្រកបដោយនិរន្តរភាព។

អាជីវកម្មចំនួន២០បានចុះឈ្មោះជាមួយបណ្ដាញធុរកិច្ចក្នុងនាមជាសមាជិកស្ថាបនិកនៃចលនាបង្កើនអាហារូបត្ថម្ភនៅកម្ពុជា។អ្នកចូលរួមចំនួន ១១៥ នាក់ មកពីវិស័យឯកជន សមាគមធុរកិច្ច សភាពាណិជ្ជកម្ម និងសង្គមស៊ីវិលបានចូលរួមក្នុងពិធីបើកសម្ភោធនេះ។

អ្នកចូលរួមបានពិភាក្សាអំពីការចូលរួមរបស់វិស័យឯកជនក្នុងការកាត់បន្ថយបញ្ហាអាហារូបត្ថម្ភ និង លើកកម្ពស់ប្រព័ន្ធស្បៀងប្រកបដោយចីរ ដោយអនុវត្តន៍នូវសសរស្តម្ភយុទ្ធសាស្រ្តទាំង៥ នៃចក្ខុវិស័យរបស់បណ្ដាញធុរកិច្ច (SBN)។ សសរស្តម្ភយុទ្ធសាស្រ្តទាំង៥មានដូចជា ការបង្កើតឡើងនូវបណ្តាញធុរកិច្ចមួយដ៏រឹងមាំ លើកកម្ពស់ការយល់ដឹងនិងតម្រូវការអាហារូបត្ថម្ភ បង្កើនការផ្គត់ផ្គង់អាហារដែលសម្បូរជីវជាតិនិងអាហារដែលមានបញ្ចូលមីក្រូសារជាតិ ពង្រឹងបរិយាកាសអំណោយផលសម្រាប់លើកកម្ពស់សុខភាពនិងអាហារូបត្ថម្ភនៅក្នុងសហគមន៍ និងនៅកន្លែងធ្វើការ។

ថ្វីត្បិតតែសេដ្ឋកិច្ចកម្ពុជាមានកំណើនក្នុងរយៈពេលប៉ុន្មានឆ្នាំចុងក្រោយក៏ដោយ បញ្ហាកង្វះអាហារូបត្ថម្ភនិងកង្វះមីក្រូសារជាតិនៅតែជាបន្ទុកធ្ងន់មួយ។ កុមារអាយុក្រោមប្រាំឆ្នាំចំនួន១០% ស្គមស្គាំង និង៣២%ក្រិសក្រិន នៅឆ្នាំ២០១៤។

លោកសុខ ស៊ីឡូអគ្គលេខាធិការក្រុមប្រឹក្សាស្ដារអភិវឌ្ឍន៍វិស័យកសិកម្ម និងជនបទបានមានប្រសាសន៍ថា “យើងមានមោទនភាពចំពោះវឌ្ឍនភាពក្នុងអំឡុងទសវត្សកន្លងមកនេះ ក្នុងការកែលម្អស្ថានភាពអាហារូបត្ថម្ភ ជាពិសេសសម្រាប់កុមារ។

លោកបានថ្លែងបន្តថា “ទោះយ៉ាងណាក៏ដោយ នៅមានកិច្ចការជាច្រើនទៀតដែលយើងត្រូវធ្វើ ដើម្បីលុបបំបាត់បញ្ហាអាហារូបត្ថម្ភ។ អាជីវកម្មក្នុងស្រុក គឺជាតួអង្គដែលមិនអាចខ្វះបាន ក្នុងការលើកកម្ពស់គុណភាពអាហារសម្រាប់ប្រជាជនកម្ពុជា ហើយយើងសង្ឃឹមថា ការបើកឱ្យដំណើរការនូវបណ្តាញធុរកិច្ចនៃចលនាបង្កើនអាហារូបត្ថម្ភនៅកម្ពុជានេះ រួមជាមួយនឹងការគាំទ្រជាបន្តបន្ទាប់របស់យើងទៅលើវិស័យឯកជន នឹងសរបញ្ជាក់ឱ្យឃើញច្បាស់នូវសារៈសំខាន់និងតម្លៃនៃតួនាទីរបស់អាជីវកម្មក្នុងស្រុក។”

ការបង្កើតបណ្ដាញធុរកិច្ច (SBN) នៅកម្ពុជា គឺជាព្រឹត្តិការណ៍ជាតិដ៏សំខាន់ ក្នុងការគាំទ្រដល់ចលនាបង្កើនអាហារូបត្ថម្ភសកល ដែលមានគោលដៅលុបបំបាត់បញ្ហាអាហារូបត្ថម្ភទូទាំងពិភពលោកត្រឹមឆ្នាំ២០៣០។ចលនានេះទទួលស្គាល់នូវតួនាទីដ៏សំខាន់របស់វិស័យឯកជនក្នុងការកែលម្អអាហារូបត្ថម្ភ និងចូលរួមចំណែកដល់ការអភិវឌ្ឍសេដ្ឋកិច្ចប្រកបដោយចីរភាព។

លោកស្រីក្លែរ កូណាន់តំណាងរបស់កម្មវិធីស្បៀងអាហារពិភពលោកប្រចាំនៅកម្ពុជាបានមានប្រសាសន៍ថា “យើងខ្ញុំសូមថ្លែងអំណរគុណដល់រាជរដ្ឋាភិបាល ដែលបានបង្កើតនូវបណ្តាញធុរកិច្ចនេះ និងទន្ទឹងការសហការជាមួយសមាជិកស្ថាបនិកទាំងចាស់ទាំងថ្មីនាពេលអនាគត។”

លោកស្រី បានថ្លែងបន្តថា “ពួកយើងជឿជាក់ថា ការកែលម្អសមាសធាតុអាហារូបត្ថម្ភផលិតផលអាហារគឺជាជម្រើសឈ្នះឈ្នះ សម្រាប់អតិថិជនផង និងសម្រាប់អាជីវកម្មផង ពីព្រោះអាជីវកម្មណាដែលផ្តល់នូវអាហារូបត្ថម្ភល្អ នឹងនាំឱ្យអាជីវកម្មនោះមានលក្ខណៈពិសេសប្លែកពីអាជីវកម្មដទៃ ដូច្នេះនាំឱ្យមានកំណើននៃការលក់និងប្រាក់ចំណេញ។”

លោកលាង ឡេងម្ចាស់ផលិតកម្មត្រីនិងទឹកស៊ីអ៊ីវ និងជាសមាជិកស្ថាបនិករបស់បណ្ដាញធុរកិច្ចSBNកម្ពុជាបានមានមតិថា៖ “ខ្ញុំជឿជាក់ថា បណ្ដាញធុរកិច្ចSBN នឹងបង្កើតនូវគំនិតនិងទំនាក់ទំនងថ្មីៗជាច្រើន ក៏ដូចជាអប់រំដល់សាធារណជនអំពីសារៈសំខាន់នៃអាហារូបត្ថម្ភ។ កត្តានេះនឹងបង្កើននូវតម្រូវការខ្ពស់ជាងមុន៕

រដ្ឋាភិបាលកូរ៉េខាងត្បូងគ្រោងបង្កើនទុនរហូតដល់ទំហំទឹកប្រាក់១៩១ពាន់លានដុល្លារដើម្បីពង្រីកសក្តានុពលសេដ្ឋកិច្ច

ដោយៈសុខុម

សេអ៊ូល: រដ្ឋាភិបាលកូរ៉េខាងត្បូង បានប្រកាសកាលពីថ្ងៃពុធ ទី១៤ កក្កដា ថា ខ្លួននឹងបង្កើនការវិនិយោគរបស់ខ្លួន លើគម្រោងថ្មីៗឱ្យឈានដល់ទំហំ១៩១ពាន់លានដុល្លារ នៅត្រឹមឆ្នាំ២០២៥ បើធៀបនឹង១៣៩,៥ពាន់លានដុល្លារ ដែលខ្លួនបានគ្រោងទុកមុននេះ។

យោងតាមការចុះផ្សាយរបស់សារព័ត៌មាន Korea Times ឱ្យដឹងថា ការបង្កើនទំហំវិនិយោគយ៉ាងច្រើនសន្ធឹកសន្ធាប់នេះ មានគោលបំណងបង្កើតប្រភពកំណើនថ្មីៗ និងដើម្បីត្រៀមលក្ខណៈឱ្យកាន់តែល្អប្រសើរ សម្រាប់ពេលក្រោយវិបត្តិកូវីដ-១៩ បញ្ចប់។

លោកប្រធានាធិបតី មូន ចេអ៊ីន (Moon Jae-in) បានប្រកាសផែនការនេះដែលជាផ្នែកមួយនៃគំនិតផ្តួចផ្តើមដ៏ធំមហិមា Korea New Deal 2.0 Initiative របស់ប្រទេសកូរ៉េខាងត្បូង ដែលជាសេដ្ឋកិច្ចធំបំផុតទី៤ នៅអាស៊ី និងជាសេដ្ឋកិច្ចធំបំផុតទី១០ ក្នុងពិភពលោក អំឡុងកិច្ចប្រជុំជាមួយទីប្រឹក្សាគោល នយោបាយសេដ្ឋកិច្ចកំពូលៗនៅវិមានប្រធានាធិបតី Cheong Wa Dae កាលពីថ្ងៃអង្គារ ទី១៣ កក្កដា។

គំនិតផ្តួចផ្តើមថ្មី ដែលមានភាពល្អប្រសើរជាងមុននេះ នឹងផ្តោតលើការជំរុញការអភិវឌ្ឍនគម្រោងឌីជីថល និងគម្រោងបៃតង ខណៈពង្រីកកម្មវិធីថែទាំកុមារ និងជួយពលរដ្ឋវ័យក្មេង ដែលមានប្រាក់ចំណូលទាបឱ្យទទួលបានលំនៅដ្ឋានផ្ទាល់ខ្លួន។

ប្រធានាធិបតីរូបនេះថ្លែងថា “គំនិតផ្ដួចផ្ដើមដែលត្រូវបានកែលម្អឱ្យប្រសើរជាងមុននេះ នឹងផ្ដោតជាអាទិភាពលើកំណើនឌីជីថល កំណើនបៃតង និងកំណើនប្រកបដោយនិរន្តរភាព និងការពង្រឹងកម្មវិធីផ្ដល់កញ្ចប់ជំនួយសម្រាប់ពលរដ្ឋងាយរងគ្រោះ”។

លោកលើកឡើងទៀតថា “គំនិតផ្ដួចផ្ដើម Korean New Deal នឹងបន្តវិវឌ្ឍខ្លួនជានិច្ច ដើម្បីឆ្លើយតបទៅនឹងតម្រូវការតាមសម័យកាលជាក់ស្ដែង។ យើងអាចប្រែក្លាយវិបត្តិទៅជាឱកាស ដើម្បីផ្លាស់ប្តូររចនាសម្ព័ន្ធ និងមូលដ្ឋានដែលបង្កគ្រោះថ្នាក់”។លោកបន្ថែមថា “កិច្ចខិតខំប្រឹងប្រែងនេះ នឹងជួយកែប្រែមុខមាត់ប្រទេសជាតិ តាមរយៈការប្រែក្លាយវិបត្តិទៅជាឱកាសសម្រាប់ថ្ងៃអនាគត”៕

1...1,8371,8381,839...3,264 Page 1,838 of 3,264