ដោយៈ ម៉ាណេត

ភ្នំពេញៈ តំបន់លំនៅឋាន ក្នុងផែនទីប្លង់គោលប្រើប្រាស់ដី គម្រោងអភិវឌ្ឍក្រុងបូកគោ ត្រូវបានកំណត់ឱ្យសាងសង់លើផ្ទៃដី ប្រមាណ៣.៣៩០ហិកតា ខណៈប្រភេទដីអាចសាងសង់បានត្រូវបានកំណត់ជា៩តំបន់សំខាន់ៗ។

ផ្អែកលើផែនទីប្លង់គោលប្រើប្រាស់ដី គម្រោងអភិវឌ្ឍក្រុងបូកគោ ចក្ខុវិស័យឆ្នាំ២០៣៥ ប្រភេទដីអាចសាង សង់បានត្រូវបានកំណត់ជា៩តំបន់សំខាន់ៗ រួមមានតំបន់លំនៅឋាន តំបន់ពាណិជ្ជកម្ម តំបន់ចម្រុះ តំបន់ទឹក ជញ្ជូន តំបន់ទេសចរណ៍ តំបន់រដ្ឋបាលនិងសេវាកម្មសាធារណៈ តំបន់លំហសាធារណះ និងផ្ទៃបៃតង តំបន់វប្បធម៌ និងសាសនា និងតំបន់ហេដ្ឋារចនាសម្ព័ន្ធបច្ចេកទេស។

បទប្បញ្ញត្តិនៃការសាងសង់ ក្នុងតំបន់នីមួយៗត្រូវមានផល ធៀបផ្ទៃក្រឡាបាតសំ​ណង់ធៀបនឹងផ្ទៃដីឡូត៍ សួនច្បារជ្រាបទឹក ការដាំដើមឈើ ជួរតម្រង់ ធ្លាគម្លាត កម្ពស់ ចំណត រថយន្ត អាងបង្គន់អនាម័យ អាងប្រព្រឹត្តកម្មទឹកកខ្វក់ ពណ៌អគារ សោភ័ណភាព និងមានរចនាបថស្ថាបត្យកម្មខ្មែរ និង/ ឬមានធម្មជាតិត្រឹមត្រូវ ស្របតាមបទប្បញ្ញត្តិជាធរមាន និងបែងចែកជាតំបន់ប្រើប្រាស់ដី។

តំបន់លំនៅឋាន តំបន់នេះស្ថិតនៅគម្រោងអភិវឌ្ឍទាំង៨ទីតាំង នៃគម្រោងអភិវឌ្ឍក្រុងបូកគោ មានផ្ទៃដីប្រមាណ៣៣៩០ហិកតា ស្មើនឹង៣៧,៨៥% នៃផ្ទៃដីអាចសាងសង់បានក្នុងគម្រោងអភិវឌ្ឍក្រុងបូកគោ។ តំបន់លំនៅឋានត្រូវបានបែងចែក ជាតំបន់លំនៅឋានដាច់ពីគ្នា ដែលមានកម្ពស់ទាប តំបន់លំនៅ ឋានជាប់គា្នកម្ពស់ទាប តំបន់លំនៅឋានដែលមានកម្ពស់មធ្យម តំបន់លំនៅឋានមានកម្ពស់ខ្ពស់ និងតំបន់លំនៅឋានចម្រុះ។
ដោយពិនិត្យទៅលើសក្តានុពល ក៍ដូចជា ប្រវត្តិសាស្ត្រ ក្រុមការងារបច្ចេកទេសនៃក្រសួងរៀបចំដែនដី នគរូបនីយកម្ម និងសំណង់ បានចុះធ្វើការសិក្សាស្រាវជ្រាវក្នុងភូមិសាស្ត្រឧទ្យានជាតិព្រះមុនីវង្ស “បូកគោ” ឃើញថា ទីតាំងនេះជាអតីតទីក្រុងប្រវត្តិសាស្ត្រនៅឆ្នាំ ១៩២៥-១៩៦២ ដ៍មានសក្ដានុពល ដែលមានអាកាសធាត់ ត្រជាក់ល្អបរិសុទ្ធ ទេសភាពធម្មជាតិតំបន់ភ្នំ-សមុទ្រដ៏ពិសិដ្ឋគ្មានពីរនៃព្រះរាជាណាចក្រកម្ពុជា។

តំបន់បូកគោ ជាគោលដៅទេសចរណ៍ប្រណីតកម្រិតខ្ពស់ និងមានហេដ្ឋារចនាសម្ព័ន្ធជាទីក្រុងរដ្ឋបាល ដែលបានបន្សល់ទុករហូតមកដល់បច្ចុប្បន្ន ដូចជាអគាររដ្ឋបាល ព្រះរាជដំណាក់ លំនៅឋាន អគារសេវាកម្ម សាលាក្រុង ប្រៃសណីយ៍ អគារសុរិយោដី សាលារៀន វត្តអារាម ព្រះវិហារកាតូលិក គិលានដ្ឋាន ប៉ុស្តិ៍នគរបាល ទីបញ្ជាការយោធា សណ្ឋាគារ ស្ថានីយទឹកស្អាត ស្ថានីយ អគ្គិសនី ទំនប់ទឹកបារាំង។ល។

ផ្អែកតាមរបកគំហើញនៃការសិក្សាស្រាវជ្រាវនេះ ក្រសួងរៀបចំដែនដី នគរូបនីយ កម្ម និងសំណង់ ដែលមានអគ្គលេខាធិការដ្ឋាននៃគណៈកម្មាធិការរៀបចំដែនដី និងនគរូបនីយកម្មថ្នាក់ជាតិជាសេនាធិការ បានផ្តួចផ្តើមសិក្សា និងរៀបចំប្លង់គោលប្រើប្រាស់ដីគម្រោងអភិវឌ្ឍក្រុងបូកគោ មានទីតាំងស្ថិតក្នុងឧទ្យានជាតិព្រះមុនីវង្ស “បូកគោ” នៃភូមិសាស្ត្រខេត្តកំពត ខេត្តព្រះសីហនុ និងខេត្តកំពង់ស្ពឺ មានផ្ទៃក្រឡាប្រមាណ ២៧ ៩៤៣ ហិកតា ស្មើនឹង១៨,០៩% នៃផ្ទៃឧទ្យានជាតិព្រះមុនីវង្ស “បូកគោ” ទំហំ១៥៤ ៥៤២ហិកតា។

អនុលោមតាមព្រះរាជក្រឹត្យ ចុះថ្ងៃទី១ ខែវិច្ឆិកា ឆ្នាំ១៩៩៣ ស្តីពីការកំណត់តំបន់ការពារធម្មជាតិ និងអនុក្រឹត្យ លេខ ១៧១ អនក្រ.បក ចុះ ថ្ងៃទី២៨ ខែធ្នូ ឆ្នាំ២០១០ ស្តីពីការកំណត់តំបន់ឧទ្យានជាតិព្រះមុនីវង្ស”បូកគោ” និងឧទ្យានជាតិព្រះសុរាម្រិតកុសុមៈ “គិរីរម្យ” ក្នុងគោលដៅធានាការគ្រប់គ្រង និងអភិវឌ្ឍន៍ក្រុងបូកគោប្រកបដោយចីរភាព៕

ដោយៈ ប៊ី

ភ្នំពេញៈ ពេលយើងលើកឡើងពីទីក្រុងដ៏ឆ្លាតវៃ វាសំដៅលើការចង្អុលបង្ហាញមួយ ដែលបានផ្តល់ឱ្យទីក្រុងមួយ រួមបញ្ចូលបច្ចេកវិទ្យាព័ត៌មាន និងទំនាក់ទំនង (ICT) ដើម្បីបង្កើនគុណភាព និងការអនុវត្តន៍សេវាកម្មទីក្រុង ក៏ដូចជាថាមពលដឹកជញ្ជូន និងឧបក​រណ៍ប្រើប្រាស់ ដើម្បីកាត់បន្ថយការប្រើប្រាស់ធនធាន ការខ្ជះខ្ជាយនិងការចំណាយសរុបលើសលុប។

គោលបំណងសំខាន់នៃការបង្កើតទីក្រុងឆ្លាត គឺដើម្បីលើកកម្ពស់គុណភាពនៃការរស់នៅរបស់ប្រជាពលរដ្ឋ តាមរយៈបច្ចេកវិទ្យាទំនើប ឱ្យស្របតាមការវិវត្តន៍នៃសម័យកាល ដោយសារតែសម័យនេះ គឺជាសម័យឧស្សាហកម្ម៤.០ទៅហើយ។

ក្នុងនោះដែរក៏មានមតិខ្លះទៀតបាននិយាយថា មិនមានការពន្យល់យ៉ាងច្បាស់​លាស់អំពីទីក្រុងឆ្លាតវៃនោះទេ ដោយសារតែបច្ចេកវិទ្យា ដែលអាចដាក់បញ្ចូលទៅក្នុងទីក្រុង ដើម្បីឱ្យវាក្លាយជាទីក្រុងឆ្លាត នៅមិនទាន់មានការច្នៃប្រឌិតបានល្អនៅឡើយ។

លោក Mark Deakin បានកំណត់វាថា ជាទីក្រុងមួយដែលប្រើប្រាស់បច្ចេកវិទ្យាអាយស៊ីធី (ICT) ដើម្បីបំពេញតាមតម្រូវការរបស់ប្រជាពលរដ្ឋរបស់ខ្លួន ហើយការចូលរួមរបស់សហគមន៍ ក្នុងដំណើរការនេះគឺជាភាពចាំបាច់សម្រាប់ទីក្រុងឆ្លាត។

ពីនិយមន័យដែលផ្តល់ដោយលោក Husam Al Waer និងMark Deakin នៅក្នុងការស្រាវជ្រាវរបស់ពួកគេ ដែលមានចំណងជើងថា «ពីភាពឆ្លាតវៃទៅទីក្រុងឆ្លាត» ហើយកត្តាដែលរួមចំណែកដល់ទីក្រុង ដែលត្រូវបានគេចាត់ទុកថាឆ្លាតគឺផ្អែកទៅលើកត្តាសំខាន់ៗដូចជា ទី១ កម្មវិធី នៃបច្ចេកវិទ្យាឌីជីថល និងអេឡិចត្រូនិចជាច្រើនដល់ទីក្រុង និងសហគមន៍របស់ខ្លួន។ ទី២ ការប្រើប្រាស់បច្ចេកវិទ្យាព័ត៌មាន និងសារគមនាគមន៍ ដើម្បីលើកកម្ពស់ជីវិតនិងបរិស្ថានការងារនៅក្នុងតំបន់។

ទី៣ ការបង្កប់នូវ ICT បែបនេះនៅក្នុងប្រព័ន្ធរដ្ឋាភិបាល និងទី៤ ការធ្វើដែនដីនៃការអនុវត្តដែលនាំប្រជាជន និង ICT រួមគ្នា ដើម្បីជំរុញការច្នៃប្រឌិតនិងបង្កើនចំណេះដឹងដែលពួកគេផ្តល់ជូន៕

ដោយៈវឌ្ឈនៈ

ភ្នំពេញៈ ផ្លូវក្រវាត់ក្រុងជាផ្លូវដ៏សំខាន់សម្រាប់ដឹកជញ្ជូន និងការធ្វើចរាចរណ៍របស់ពលរដ្ឋវាងរាជធានីភ្នំពេញ ដើម្បីបញ្ជៀសគ្រោះថ្នាក់ចរាចរណ៍និងការកកស្ទះ ហើយផ្លូវក្រវាត់ក្រុង ក៏ជាកត្តាទាក់ទាញសម្រាប់វិស័យអចលនទ្រព្យផងដែរ។

ដូច្នេះហើយទើបរាជរដ្ឋាភិបាល បានវិនិយោគលើទឹកប្រាក់រាប់រយលានដុល្លារ អភិវឌ្ឍន៍ផ្លូវក្រវាត់ក្រុងជាបន្តបន្ទាប់។

រហូតមកដល់ពេលនេះ ផ្លូវក្រវាត់ក្រុងនៅរាជធានីភ្នំពេញ ឈានដល់ការអភិវឌ្ឍផ្លូវក្រវាត់ក្រុងទី៣ហើយ និងកំពុងបង្ហាញពីភាពទាក់ទាញកាន់តែខ្លាំង ទៅលើការអភិវឌ្ឍអចលនទ្រព្យ ពង្រីកសកម្មភាពសេដ្ឋកិច្ចមូលដ្ឋាន ដែលធ្វើឱ្យវិនិយោគិនកាន់តែច្រើនចាប់អារម្មណ៍ ក្នុងការវិនិយោគនៅតាមបណ្ដោយផ្លូវក្រវាត់ក្រុង ។

បើក្រលេកទៅមើលផ្លូវក្រវាត់ក្រុងទី៣ ដែលរដ្ឋាភិបាលកកំពុងតែជំរុញការអភិវឌ្ឍជាបន្តបន្ទាប់ ឃើញថា កំពុងតែមានភាពទាក់ទាញកាន់តែខ្លាំង ទៅលើការអភិវឌ្ឍអចលនទ្រព្យ ជាក់សែ្ដងគម្រោងអភិវឌ្ឍន៍អចលនទ្រព្យជាច្រើនបាន និងពង្រីកឱកាសវិនិយោគនៅតំបន់ផ្លូវក្រវាត់ទី៣ ហើយក៏ធ្វើឱ្យតំបន់ដែលមានផ្លូវក្រវាត់ក្រុង កាន់មានសន្ទុះដីធ្លីមួយកម្រិតផងដែរ ។

បើតាមលោកសន សៀប ស្ថាបនិក និងជានាយកក្រុមហ៊ុនអចលនទ្រព្យឃី រៀលអ៊ីស្ទេតបានឱ្យដឹងថា សន្ទុះតម្លៃដីធ្លីនៅតំបន់ភាគខាងត្បូងក្នុងពេលបច្ចុប្បន្ននេះ មានការកើនឡើងមួយកម្រិតទៀត ជាពិសេសនៅក្នុងខណ្ឌដង្កោក្នុងរាជធានីភ្នំពេញ ។ កត្តាដែលជំរុញឱ្យសន្ទុះតម្លៃដីធ្លីនៅតំបន់ទាំងនេះ បានកម្រើកមួយកម្រិតទៀតនោះ យើងមើលឃើញថាផ្លូវក្រវាត់ក្រុងដ៏សំខាន់ បានរត់កាត់តំបន់ខណ្ឌដង្កោ និងបែកខាងត្បូងរាជធានីភ្នំពេញ ហើយគម្រោងជាច្រើនទៀតក៏បាន និងកំពុងអភិវឌ្ឍន៍យ៉ាងមមាញឹកនៅក្នុងវិបត្តិកូវីដ១៩នេះ ។

លោកបន្តថា “ម្យ៉ាងទៀតនៅប៉ែកខាងត្បូងរាជធានីភ្នំពេញនេះដែរ ក៏ឃើញថាមានការអភិវឌ្ឍនិងសាងសង់ហេដ្ឋារចនាសម្ព័ន្ធថ្មី ចាស់ ជាច្រើន ដែលធ្វើឱ្យវិនិយោគិនក្នុងនិងក្រៅប្រទេសចាប់អារម្មណ៍លើការអភិវឌ្ឍនមួយនេះ”។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាលោកច្រឹក សុខនីមបានលើកឡើងផងដែរថា ការអភិវឌ្ឍហេដ្ឋារចនាសម្ព័ន្ធ ពិតជាមានសារសំខាន់ណាស់ក្នុងការទាក់ទាញ វិនិយោគិនក្នុងការបណ្ដាក់ទុនវិនិយោគ ហើយទីណាមានហេដ្ឋារចនាសម្ព័ន្ធខ្វាត់ខ្វែងនិងច្រើនតំបន់នោះ នឹងទទួលបានគម្រោងអភិវឌ្ឍន៍ច្រើន។

លោកបន្តថា “ដោយសារតែកត្តាទាំងនេះហើយ ទើបរាជរដ្ឋាភិបាលកម្ពុជាបានជំរុញការអភិវឌ្ឍហេដ្ឋារចនាសម្ព័ន្ធ ទាំងនៅភ្នំពេញ និងនៅតាមបណ្ដាខេត្ត ក៏ដូចជាហេដ្ឋារចនាសម្ព័ន្ធតភ្ជាប់ពីរាជធានីភ្នំពេញ ទៅកាន់បណ្ដាខេត្តជាច្រើនទៀតផងដែរ”៕

ដោយៈគង់ សូរិយា

ភ្នំពេញៈ រាជធានីភ្នំពេញចាប់តាំងពីឆ្នាំ១៩៩៨ បានរៀបចំផែនការតំរង់ទិសអភិ​វ  ឌ្ឍន៍ ជាមួយចក្ខុវិស័យច្បាស់លាស់ ដើម្បីឆ្លើយតបនឹងការរីកចម្រើនសេដ្ឋកិច្ចសង្គម ដោយបច្ចុប្បន្នរាជធានីនេះ មានទំហំផ្ទៃដដីជាង៦៧៨គីម៉ែត្រក្រឡា។

ជាមួយផែនការអភិវឌ្ឍន៍ និងពង្រីកក្នុងកាំរង្វង់១០០គីឡូម៉ែត្រក្រឡា ដែលបានលើកឡើងក្នុងអនុក្រិតស្តីពីការដាក់ឲ្យអនុវត្តប្លង់ គោលប្រើប្រាស់ដីរាជធានីភ្នំពេញ ដែលមានវិសាលភាពគ្របដណ្តប់ លើពេលវេលា​រហូតដល់ឆ្នាំ២០៣៥។

តើអ្វីជាចក្ខុវិស័យនៃយុទ្ឋសាស្រ្តតំរង់ទិសអភិវឌ្ឍរាជធានីនេះ? យោងតាមអនុក្រិតចុះលេខ១៨១ អ ន ក្រ បក ដែលបានផ្សព្វផ្សាយដោយក្រសួងរៀបចំដែនដី នគរូបនីយកម្ម និងសំណង់បានឲ្យដឹងថា ការតំរង់ទិសអភិវឌឌ្ឍន៍ផ្នែកនគរូបនីយកម្ម សំដៅដល់ការអភិវឌ្ឍសេដ្ឋកិច្ច និងសង្គមកិច្ចរបស់រដ្ឋ ក្នុងដែនដីរាជធានីឲ្យមានប្រសិទ្ឋភាព និងនិរន្តរភាព ជាពិសេសដើម្បីតំរង់ទិសការវិនិយោគសាធារណៈ និងឯកជន ក៏ដូចជាការវិនិយោគរបស់ប្រទេសជាដៃគូអភិវឌ្ឍន៍ទាំងអស់ ចាប់ពីពេលនេះរហូតដល់ឆ្នាំ២០៣៥។

យុទ្ឋសាស្រ្តនេះ នឹងជួយសាលារាជធានីភ្នំពេញ ប្រជាជនទាំងអស់ វិនិយោគិន ព្រមទាំងដៃគូអភិវឌ្ឍនានា ឲ្យចូលររួមអអភិវឌ្ឍន៍ទីក្រុងប្រកប ដោយសណ្តាប់ធ្នាប់ល្អ ហើយ​ក៏ធ្វើឲ្យមានវឌ្ឈនភាព ដល់ការវិនិយោគនានា ដោយកាត់បន្ថយឬបញ្ចៀសបាននូវហានោភ័យនានាជាអតិបរិមា។

គោលបំណងនិងគោលដៅនៃយុទ្ឋសាស្រ្តតំរង់ទិសអភិវឌ្ឍន៍

គោលបំណងនៃយុទ្ឋសាស្រ្តតំរង់ទិសអភិវឌ្ឍន៍ នគរូបនីយកម្មទីក្រុង គឺមានដូចជា ទី១ តំរង់ទិសនៃការប្រើប្រាស់ដីធ្លី និងធានាតម្លៃសក្តានុពល ដែលមានស្រាប់ក្នុងទីក្រុង ប្រកបដោយប្រសិទ្ឋភាពខ្ពស់ ចីរភាព សមធ៌ម ដើម្បីគាំទ្រដល់ការអភិវឌ្ឍសេដ្ឋកិច្ច សង្គមកិច្ច ការធានាសន្តិសុខស្បៀង សោភ័ណភាព និងគុណភាពបរិស្ថាន ទី២ តំរង់ទិសការអភិវឌ្ឍដោយតុល្យភាព សមភាព និងភាពស៊ីចង្វាក់គ្នា រវាងរាជធានីភ្នំពេញ ទីក្រុងតូច បន្ទាប់ ខេត្តរបស់ប្រទេស និងទីក្រុងរបស់ប្រទេសនានា។

ទី៣ ធានាការលើកស្ទួយអត្តសញ្ញាណរាជធានីភ្នំពេញ ដើម្បីធ្វើសមាហរណកម្មទៅក្នុងតំបន់ និងប្រកួតប្រជែងជាមួយទីក្រុងនានាក្នុងតំបន់ សម្រាប់ការអភិវឌ្ឍក្នុងបរិបទដែលផ្តល់លទ្ឋភាពធំជាងពេលមុន ទាំងលើផ្នែកបច្ចេកទេសនិងហិរញ្ញវត្ថុ។

គោលដៅ

គោលដៅនៃយុទ្ឋសាស្រ្តតំរង់ទិសអភិវឌ្ឍន៍រាជធានី សំដៅលើផែនការសំខាន់ៗចំនួន៨ រួមមាន ទី១ អភិវឌ្ឍន៍ប្រកបដោយចីរភាព ធានាបាននូវការផ្គត់ផ្គង់សេចក្តីត្រូវការ និងការទទួលខុសត្រូវ ចំពោះផលប្រយោជន៍របស់មនុស្សបច្ចុប្បន្ន និងអ្នកជំនាន់ក្រោយ ទី២ គ្រប់គ្រងការពារប្រើប្រាស់សក្តានុពល និងអភិវឌ្ឍន៍ធនធានធម្មជាតិ ដោយកំណត់ឲ្យ​បានច្បាស់លាស់ជាមុននូវ ទីតាំងឬតំបន់ដែលត្រូវប្រើប្រាស់ សម្រាប់ការអភិវឌ្ឍថ្មី(តំបន់ ដែលទើបបញ្ចួលពីខេត្តកណ្តាល) និងការអភិរ័ក្សនូវតំបន់ ដែលសំបូរសំណង់បេតិកភ័ណ្ឌក្នុងទីក្រុងចាស់។

ទី៣ ធានានូវការប្រើប្រាស់ដីធ្លីសម្រាប់រយៈពេលវែង ដើម្បីឲ្យមានតុល្យភាពក្នុងការអភិវឌ្ឍសេដ្ឋកិច្ច សង្គម និងបរិស្ថាន ព្រមទាំងសោភ័ណភាពរាជធានីភ្នំពេញ។ ទី៤ ប្រើប្រាស់សក្តានុពល ដែលមានពីធម្មជាតិ(ទីតាំងតំបន់ចតុមុខ និងបឹងធម្មជាតិនានា)ឲ្យប្រសើរនិងមានប្រសិទ្ឋភាព ទៅតាមលក្ខណៈពិសេសនៃតំបន់និមួយៗ ទី៥ លើកកំពស់ជីវភាពប្រជាជនទីក្រុងឲ្យកាន់តែប្រសើរ និងកាត់បន្ថយជាអតិបរិមា នូវគម្លាតសង្កាត់ក ណ្តាលក្រុង និងសង្កាត់ជាយក្រុង ទី៦ ធានាការប្រើប្រាស់ ការអភិវឌ្ឍ និងការគ្រប់គ្រងដី តាមផែនការរៀបចំដែនដី និងផែនការប្រើប្រាស់ដី ប្រកបដោយសមភាពយេនឌ័រ និងគាំទ្រដល់ជីវភាពរស់នៅរបស់ក្រុមជនងាយរងគ្រោះ។

ទី៧ រៀបចំបន្ស៊ីការគ្រប់គ្រងដី ការអភិវឌ្ឍថ្មី និងការការពារតំបន់និមួយៗនៃរាជធានីភ្នំពេញ ឲ្យមានភាពសុខដុមរមនាជាមួយគ្នា និងស្របទៅតាមលក្ខខ័ណ្ឌ និងផែនការមេនៃការរៀបចំដែនដីរបស់ប្រទេស និងទី៨ ទប់ស្កាត់និងកាត់បន្ថយនូវហានិភ័យគ្រោះធម្មជាតិនានា ដែលបណ្តាលមកពីគំរោងអភិវឌ្ឍន៍។

អនុក្រិតដដែលបានបន្តថា ដើម្បីសម្រេចនូវគោលបំណង និងគោលដៅខាងលើ សាលារាជធានីភ្នំពេញ ត្រូវរៀបចំឯកសារគោលនយោបាយបញ្ជាក់ អំពីសេចក្តីប្រាថ្នាធំៗ នៃការអភិវឌ្ឍរបស់រដ្ឋលើ់ដែនដីរាជធានី សម្រាប់អនាគតឆ្នាំ២០៣៥ អមដោយផែនទីគោល(Master Schema) ដែលជាឯកសារបច្ចេកទេសបន្ថែមលើឯកសារ យុទ្ឋសាស្រ្តតំរង់ទិសអភិវឌ្ឍន៍ទីក្រុងនេះ ដោយកំណត់យកផែនទីមានមាត្រដ្ឋាន១/៥០០០០ខ្នាតUTM WG84 រៀបចំឡើងនៅឆ្នាំ២០១៥ ដោយមានការដាក់បញ្ចូលនូវគ្រប់ហេដ្ឋារចនាសម្ព័ន្ឋធំៗ  នៃផ្លូវដែលមានទំហំលើសពី២០ម៉ែត្រឡើង ខ្សែផ្លូវដែក ប្រឡាយមេនានា បឹង បរិក្ខាធំៗនានាដូចជាកំពង់ផែ ស្ថានីយ៍រថភ្លើង អាកាសយានដ្ឋាន ស្ថានីយ៍រថយន្តក្រុង ដែល ជាលក្ខខ័ណ្ឌចាំបាច់គាំទ្រ ដល់ការអភិវឌ្ឍទីក្រុង៕

ដោយៈគង់ សូរិយា

ភ្នំពេញៈ នៅក្នុងស្រទាប់អ្នករកស៊ី និងធ្វើការតាមបណ្តាក្រុមហ៊ុននានា ជាពិសេសក្នុងវិស័យអចលនទ្រព្យ មានមនុស្សតិចណាស់ ដែលមិនស្គាល់លោកឧកញ៉ាបណ្ឌិត គីម ហ៊ាង ព្រោះតែលោកត្រូវបានគេស្គាល់ថា ជាបុគ្គលជោគជ័យ និងរកស៊ីមានបានដោយសារតែជំនួញក្នុងវិស័យអចលនទ្រព្យ ក្នុងរយះពេលជិត២០ឆ្នាំ តាំងពីការចាប់ផ្តើមដំបូងផ្នែកទិញ លក់ ជួល វាយតម្លៃ គ្រប់គ្រង និងអភិវឌ្ឍន៌អចលនទ្រព្យជាដីឡូតិ បុរី និងខុនដូជាដើម។

ដោយឡែកកាលពីថ្ងៃទី ១២ ខែកក្តដា ឆ្នាំ២០២១ នេះលោកឧកញ៉ាបណ្ឌិត គីមហ៊ាង បានធ្វើពិធីតាមប្រពីណៃ បុកគ្រឹះបើកលក់ប្លុកថ្មី ជាមួយលក្ខខណ្ឌបង់ប្រាក់ពិសេស និងប្រគល់ផ្ទះជូនអតិថិជន ដែលបានទិញបុរីKS Residence របស់លោក មុនកាលកំណត់នៅក្នុងកិច្ចសន្យាថែមទៀតផង។

លោកឧកញ៉ាបណ្ឌិតបានលើកឡើងថា ដោយទទួលបានជោគជ័យក្នុងការលក់គម្រោងមុនៗរួចមក ថ្ងៃនេះលោកសម្រេចចិត្តបើកបុកគ្រឹះ លក់ប្លុកថ្មីមួយទៀត គឺប្លុក “D” ព្រមទាំងឆ្លៀតឪកាសនេះ ប្រគល់ផ្ទះជូនអតិថិជន ដែលបានទិញប្លុកមុនៗអោយបានចូលស្នាក់នៅមុនការកំណត់សាងសង់ ដែលមានព្រមព្រៀង កិច្ចសន្យាថែមទៀតផង។

លោកឧកញ៉ាបណ្ឌិតបានបញ្ជាក់ថា ការដែលបុរីKS Residence ទទួលបានជោគជ័យខ្លាំងក្នុងការលក់ប្លុកមុនៗ គឺដោយសារទទួលបានការទុកចិត្តខ្ពស់ ពីសំណាក់អតិថិជន ដែលបានអញ្ជើញមកមើលគម្រោងហើយ ក៏សម្រេចទិញតែម្តង ក៏ព្រោះតែបុរី KS Residence ផ្តោតសំខាន់ទៅលើគុណភាពសំណង់ និងភាពស្របច្បាស់ជាចម្បង ដោយបុរី KS Residence មានផ្តល់ជូនប្លង់រឹងទៅឈ្មោះអតិថិជន១០០% តែម្តងដោយអ្នកទិញមិនចាំបាច់ចំណាយលុយ១កាក់ ១សេនក្នុងការបង់ពន្ធ ឬសេវាផ្សេងនោះទេ គឺបុរីជាអ្នកចំណាយអោយទាំងអស់។

បុរី KS Residence ស្ថិតនៅតំបន់ដែលមានប្រជាជនរស់នៅច្រើន តាំងពីដើមមក និងកំពុងមានការអភិវឌ្ឍន៍ខ្លាំង នៅជិតផ្សារគគី ធនាគារ សាលារៀនរដ្ឋ និងឯកជន មន្ទីពេទ្យ វត្តអារាម ផ្ទះប្រជាជន និងមានចំនុចពិសេស១ទៀតគឺ ម៉ូតផ្ទះជាវីឡាកូនកាត់ មានរបងជុំវិញ មានសល់ដីមុខក្រោយធំទូលាយងាយស្រួល ក្នុងការរស់នៅបែបស្ងប់ស្ងាត់ និងមានសុវត្ថិភាពខ្ពស់។

លោកឧកញ៉ាបណ្ឌិត គីម ហ៊ាង បានគូសបញ្ជាក់បន្ថែមថា ប្លុក “D” គឺពិសេសជាងគេ ដោយអតិថិជនមិនចាំបាច់មានប្រាក់កក់នោះទេ គឺអាចរំលស់សុទ្ធ១០០ភាគរយ ផ្ទាល់ជាមួយបុរីតែម្តងរហូតដល់១០ឆ្នាំ”។

បុរី KS Residence មានទីតាំងស្ថិតនៅ ភូមិរទាំង ឃុំភូមិធំ ស្រុកកៀនស្វាយ ខេត្តកណ្តាល ចំងាយ១២គីឡូម៉ែត្រពីស្ពានច្បារអំពៅ តាមផ្លូវជាតិលេខ១ និងចំងាយ ១៨០០ម៉ែត្រពីផ្លូវជាតិលេខ១ ចុះតាមការ៉ាស់សាំង LHR ដែលនៅជិតផ្សារ កៀនស្វាយផ្លាហ្សារ ឬត្រឹម ៣០០ម៉ែត្រ ពីទីលានវាយកូនហ្គោល និងទីក្រុងវឌ្ឍនះ។

សម្រាប់ព័ត៌មានបន្ថែម និងលក្ខខណ្ឌបង់ប្រាក់នានាអាចចូលទៅកាន់៖
• លេខទូរសព្ទ៖ 016 96 2000, 069 96 2000, 078 96 2000 & 099 96 2000
• ហ្វេសបុកផេក (Facebook ផ្លូវការ) https://www.facebook.com/Borey.KSResidence.KH
• ផែនទីតាម Google Map https://goo.gl/maps/yhwvCSxQp4ptEk247

ដោយៈវឌ្ឈនៈ

ភ្នំពេញៈ បើទោះបីជាកម្ពុជាកំពុងជួបវិបត្តិ ដោយសារតែការរីករាលដាលនៃជំងឺកូវីដ១៩ នៅក្នុងប្រទេសយ៉ាងណាក្ដី ការអភិវឌ្ឍមួយចំនួនមិនបានផ្អាកឬបញ្ឈប់ឡើយ ផ្ទុយទៅវិញផ្នែកខ្លះ នៃវិស័យអចលនទ្រព្យមានតែពង្រីកជាបន្តបន្ទាប់ ជាពិសេសការអភិវឌ្ឍលំនៅឋាននៅក្នុងប្រទេសកម្ពុជា។

រាជធានីភ្នំពេញត្រូវបានមើលឃើញថា កំពុងតែបន្តយ៉ាងសស្រាក់សស្រាំ ពីវិនិយោគិនក្នុងនិងក្រៅប្រទេស ។ តំបន់ផ្លូវជាតិលេខ៦ ត្រូវបានមើលឃើញថាកំពុងតែមានភាពទាក់ទាញក្នុងការអភិវឌ្ឍលំនៅឋាន ដ៏មានសក្ដានុពល។

គម្រោងវិនិយោគលំនៅឋានជាច្រើន នៅតាមបណ្ដាយផ្លូវជាតិលេខ៦ ត្រូវបានមើលឃើញថា បន្តអភិវឌ្ឍជាមួយនឹងទំនុកចិត្តខ្ពស់ ទោះស្ថិតនៅក្នុងវិបត្តិយ៉ាងនេះក្ដី។ បើតាមអ្នកវិនិយោគលើលំនៅឋានជាច្រើន នៅតំបន់ផ្លូវជាតិលេខ៦បានបញ្ជាក់ថា ទោះស្ថិតនៅក្នុងវិបត្តិបែបនេះក្ដី ក៏ខ្លួននៅតែបន្តគម្រោងអភិវឌ្ឍន៍ជាបន្តបន្ទាប់ ដោយភាពជឿជាក់ ពីព្រោះពិភពលោក មិនអាចទុកឱ្យជំងឺនេះនៅបន្តលុកលុយ និងធ្វើឱ្យរាំងខ្ទប់ដល់ការអភិវឌ្ឍសេដ្ឋកិច្ចជាតិនិងពិភពលោកនោះឡើយ។

វិនិយោគិនជនជាតិសិង្ហបុរី ដែលកំពុងអភិវឌ្ឍន៍លំនៅឋានតម្លៃខ្ពស់ នៅបណ្ដោយផ្លូវជាតិលេខ៦បានឱ្យដឹងថា សម្រាប់ក្រុមហ៊ុនរបស់លោក មិនត្រឹមតែមិនផ្អាកគម្រោងអភិវឌ្ឍន៍នោះទេ តែលោកក៏កំពុងសម្លឹងមើលពីឱកាសក្នុងការវិនិយោគ ជាបន្តបន្ទាប់ទៀត ដើម្បីបំពេញតម្រូវការរបស់ប្រជាពលរដ្ឋ ក្នុងប្រទេសកម្ពុជា ពីព្រោះបើសិនជាចប់កូវីដ១៩ពេលណា ទើបយើងចាប់ផ្ដើមគម្រោង នោះយើងនឹងចាញ់វិនិយោគិនដទៃទៀតដែលបានចាប់ផ្ដើមមុនយើង ។

លោកប៉ូ អ៊ាវគង់ ប្រធានក្រុមហ៊ុនអចលនទ្រព្យ Advance បានឱ្យដឹងថា ផ្លូវជាតិលេខ៦ពេលនេះ កំពុងតែទាក់ទាញលើគម្រោងអភិវឌ្ឍន៍លំនៅឋាន ដ៏មានសក្ដានុពល ។ ជាក់ស្ដែងបច្ចុប្បន្នលើបណ្ដោយផ្លូវជាតិលេខ៦អា យើងមើលឃើញថាមានគម្រោងអភិវឌ្ឍន៍លំនៅឋានជាច្រើនបាន និងកំពុងសាងសង់យ៉ាងមមាញឹក ទាំងវិនិយោគិនក្នុងស្រុកនិងអន្តរជាតិ ។

លោកបន្តថា “អ្វីដែលពិសេសនោះ តំបន់ផ្លូវជាតិលេខ៦អាពេលនេះ វាលែងជាតំបន់ដែលនៅឆ្ងាយពីភ្នំពេញទៀតហើយ ព្រោះយើងមានស្ពានតភ្ជាប់ពីភ្នំពេញ មានហេ  ដ្ឋារចនាសម្ព័ន្ធ និងមានគម្រោងរបស់រដ្ឋជាច្រើនក៏បាន និងកំពុងអភិវឌ្ឍន៍ជាបន្តបន្ទាប់នៅតំបន់ទាំងនោះ។

ជាមួយគ្នានេះ ទីប្រឹក្សាសមាគមអចលនទ្រព្យសកល លោកយិន លាងគង់បានបន្ថែមថា ការមានដងទន្លេព័ទ្ឋជុំវិញ បានធ្វើឲ្យតំបន់នេះផ្តល់នូវបរិយាកាសត្រជាក់ ជាមួយ​សំណើមធម្មជាតិ ដែលបានធ្វើឲ្យអ្នករស់នៅតំបន់នេះមានអារម្មណ៍រីករាយ និងស្រស់ស្រាយក្រោយពេលក្រោកពីដំណេក។

លោកបន្តថា “ការតភ្ជាប់ហេដ្ឋារចនាសម្ព័ន្ឋខ្វាត់ខ្វែង ជាមួយនឹងពហុកីឡាដ្ឋាន និងទីក្រុងចិននាពេលអនាគត តំបន់ផ្លូវជាតិលេខ៦អា បាននិងកំពុងក្លាយជាទីក្រុងរណបយ៉ាងស៊ីវិល័យមួយនាពេលអនាគត”៕