ដោយៈ ប៊ី
ភ្នំពេញៈ លោកសូ សុភ័ទ្ទអគ្គលេខាធិការគណៈកម្មាធិការជាតិទន្លេមេគង្គកម្ពុជាលើកឡើថា តំបន់នៅបណ្តោយទន្លេមេគង្គនៅពេលបច្ចុប្បន្ននេះ កំពុងតែមានការអភិវឌ្ឍខ្លាំង ខណៈដែលទន្លេនៅតែមានតួនាទីសំខាន់សម្រាប់ធានានិរន្តរភាពនៃការអភិវឌ្ឍនេះ។

លោកអគ្គលេខាធិការ បានមានប្រសាសន៍ប្រាប់ភ្នាក់ងារសារព័ត៌មានរដ្ឋនៅថ្ងៃទី២៣ ខែមិថុនា ឆ្នាំ២០២១ថា ទន្លេមេគង្គគឺជាទន្លេឆ្លងដែន ដែលហូរកាត់ប្រទេសចំនួន៦ រួមមានចិន មីយ៉ាន់ម៉ា ថៃ ឡាវ កម្ពុជា និងវៀតណាម។

ទន្លេនេះផ្តល់នូវប្រភពទឹក ស្បៀងអាហារ ថាមពល និងជាផ្លូវទឹក ដែលដើរតួនាទី ដ៏សំខាន់ជាចម្បង ទ្រទ្រង់ដល់ការអភិវឌ្ឍ ការលូតលាស់សេដ្ឋកិច្ច និងវឌ្ឍនភាពសង្គមរបស់បណ្តាប្រទេស តាមដងទន្លេមេគង្គ ក៏ដូចជាការទ្រទ្រង់ជីវិត និងជីវភាពរស់នៅរបស់ប្រជាពលរដ្ឋនៅក្នុងអាង ប្រមាណជា ៧០លាននាក់។

ទន្លេមេគង្គផ្តល់នូវការតភ្ជាប់ រវាងប្រទេស និងប្រទេស ប្រជាជន និងប្រជាជន ការធ្វើពាណិជ្ជកម្ម និងជំនួញ រវាងគ្នា និងគ្នា ហើយទ្រទ្រង់ដល់ជីវភាព របស់ប្រជាជនក្នុងអាងទន្លេមេគង្គទាំងមូលប្រកបដោយចីរភាព។

លោកបានបញ្ជាក់ថា “សម្រាប់កម្ពុជាយើង ផ្ទៃដីចំនួន៨៦% នៃផ្ទៃដីប្រទេសសរុប ស្ថិតនៅក្នុងអាងទន្លេមេគង្គ ហើយប្រជាពលរដ្ឋប្រមាណ៩០% រស់នៅក្នុងអាងទន្លេមេគង្គ។ ទន្លេមេគង្គផ្តល់នូវទឹកសម្រាប់បឹងទន្លេសាប ដែលជាបឹងទឹកសាបដ៏ធំនៅតំបន់អាស៊ីអាគ្នេយ៍ ដែលជាជង្រុកត្រីទឹកសាប និងសម្បូរទៅដោយធនធានធម្មជាតិ ជីវចម្រុះដែលទ្រទ្រង់ទៅដល់ជីវភាពរស់នៅ និងការប្រកបរបរចិញ្ចឹមជីវិតរបស់ប្រជាពលរដ្ឋនៅក្នុងអាងទាំងមូល”។

លោកអគ្គលេខាធិការ បានមានប្រសាសន៍បន្តទៀតថា ជាការពិតហើយ ទន្លេមេគង្គបច្ចុប្បន្ននេះកំពុងតែមានការអភិវឌ្ឍខ្លាំងផ្នែកសេដ្ឋកិច្ច ហើយការអភិវឌ្ឍនេះ ចង់ឬមិនចង់គឺវាបង្កនូវផលប៉ះពាល់ តិចឬច្រើនទៅដល់ផ្នែកបរិស្ថាន នៅក្នុងអាងទន្លេមេគង្គ។

លោកបានថ្លែងបន្តថា ជារួមបន្ថែមទៅលើការអភិវឌ្ឍ យើងក៏សង្កេតឃើញថាកំណើននៃប្រជាពលរដ្ឋ នៅក្នុងអាងក៏មានការកើនឡើងពីមួយឆ្នាំទៅមួយឆ្នាំ ហើយតម្រូវការទឹក តម្រូវការថាមពល សម្រាប់បម្រើទៅដល់ការអភិវឌ្ឍសេដ្ឋកិច្ចសង្គម នៃប្រទេសតាមដងទន្លេមេគង្គ ក៏មានការកើនឡើង ទាំងអស់នេះចង់ឬមិនចង់ បានដាក់ជាសម្ពាធទៅលើនិរន្តរភាពនៃទន្លេមេគង្គ ក៏ដូចជាធនធាននៅក្នុងអាងដែលកិច្ចការទាំងឡាយនេះ ចាំបាច់ ប្រទេសជាសមាជិកគណៈកម្មការទន្លេមេគង្គ និងដៃគូសន្ទនា។

ដៃគូសន្ទនានេះមានប្រទេសចិន និងប្រទេសមីយ៉ាន់ម៉ា ត្រូវរួមគ្នា ដោយសារតែទន្លេមេគង្គហូរកាត់ប្រទេសចំនួន៦នេះ គឺប្រទេសតាមដងទន្លេមេគង្គទាំងអស់ចាំបាច់ត្រូវតែពិភាក្សាគ្នា ធ្វើការរួមគ្នា រៀបចំផែនការដើម្បីធ្វើយ៉ាងណា ឱ្យការអភិវឌ្ឍប្រកបដោយចីរភាព ហើយធានាបាននូវនិរន្តរភាព បរិស្ថាននៅក្នុងអាងសម្រាប់ពេលបច្ចុប្បន្ន និងទៅអនាគត ដើម្បីធានាបាននូវវិបុលភាពរួមគ្នា សម្រាប់ប្រទេសទាំងអស់។

លោកអគ្គលេខាធិការបានបន្ថែមទៀតថា និរន្តរភាពនៃទន្លេមេគង្គ គឺជាកិច្ចការស្នូលចម្បងសំខាន់ ដែលប្រទេសតាមដងទន្លេទាំងអស់ ត្រូវរួមគ្នាគិតគូរ និងខិតខំប្រឹងប្រែង ធ្វើយ៉ាងណាដើម្បីដោះស្រាយ នូវបញ្ហាប្រឈម ដែលកើតមាននៅពេលបច្ចុប្បន្ន និងទៅអនាគត ។

លោកបានបញ្ជាក់ថា គណៈកម្មការទន្លេមេគង្គ បានអនុម័តរួចហើយ នូវយុទ្ធសាស្ត្រ អភិវឌ្ឍអាងសម្រាប់ឆ្នាំ២០២១-២០៣០ ហើយទន្ទឹមនឹងនោះយើងក៏មានយុទ្ធសាស្ត្រ និងផែនការមេ តាមវិស័យ រួមមានផ្នែកបរិស្ថាន ជលផល នាវាចរណ៍ វារីអគ្គីសនី បម្រែបម្រួលអាកាសធាតុ ទឹកជំនន់ និងភាពរាំងស្ងួត ដែលយុទ្ធសាស្ត្រទាំងនេះ ជាឯកសារសំខាន់ ជាមូលដ្ឋានដើម្បីប្រទេស ជាសមាជិកគណៈកម្មការទន្លេមេគង្គទាំង៤រួមគ្នា ក្នុងការអនុវត្តឱ្យមានប្រសិទ្ធភាព ដើម្បីធានានូវនិរន្តរភាព នៃអាងទន្លេមេគង្គ ក៏ដូចជាធនធានក្នុងអាង សម្រាប់ជាប្រយោជន៍របស់ប្រទេស ទាំងអស់នៅពេលបច្ចុប្បន្ន និងទៅអនាគត៕

ដោយៈគង់ សូរិយា
ភ្នំពេញៈ ផ្លូវជាតិថ្នាក់ខេត្តចំនួនពីរខ្សែ គឺផ្លូវលេខលេខ១៤៦បេ និងផ្លូវជាតិលេខ១៤៨ ដែលចាប់ផ្តើមសាងសង់ក្នុងកំឡុងខែមេសា ឆ្នាំ២០២០នោះ គ្រោងនឹង បញ្ចប់នៅក្នុងខែសីហា ឆ្នាំ២០២២។

ផ្លូវលេខ១៤៦B ចាប់ផ្តើមពីចំណុចប្រសព្វលើផ្លូវជាតិលេខ៤ ត្រង់គីឡូម៉ែត្រ ១៧៨ +១៦៥ រួចឆ្លងកាត់លើផ្លូវខេត្តលេខ១៤៨ បញ្ចប់ក្នុងចំណុចប្រសព្វលើផ្លូវជាតិ លេខ៤ (ត្រង់ គីឡូម៉ែត្រ ២២៥ +៥៥០)។ ផ្លូវជាតិលេខ១៤៦B ចាប់ផ្តើមពីចំណុចប្រសព្វលើផ្លូវជាតិ លេខ៤ ត្រង់គីឡូ ម៉ែត្រ ១៧៨ +១៦៥ រួចឆ្លងកាត់លើផ្លូវខេត្តលេខ១៤៨ បញ្ចប់ក្នុងចំណុចប្រសព្វ លើផ្លូវជាតិលេខ៤ ត្រង់គីឡូម៉ែត្រ ២២៥ +៥៥០។

លោកស្រីនិន សាផុន ប្រធានគណៈកម្មការទី៩នៃរដ្ឋសភា និងលោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនថ្ងៃទី២២ ខែមិថុនា ឆ្នាំ២០២១កាលពីថ្ងៃទី២២ខែមិថុនា បានដឹកនាំគណៈប្រតិភូចម្រុះ ចុះពិនិត្យវឌ្ឍនភាពការងារសាងសង់ផ្លូវជាតិលេខ១៤៦B និងផ្លូវជាតិលេខ១៤៨នេះ។

ការចុះត្រួតពិនិត្យនេះធ្វើឡើង ដើម្បីត្រួតពិនិត្យលក្ខណៈបច្ចេកទេស តាមដានវឌ្ឍ​នភាពការងារសាងសង់ និងពិនិត្យថាតើក្រុមហ៊ុនសាងសង់ កំពុងអនុវត្តការងារនីមួយៗត្រឹមត្រូវតាមសៀវភៅបន្ទុក ឬកិច្ចសន្យាដែរឬទេ ដើម្បីធានាគុណភាពផ្លូវថ្នល់រឹងមាំ និងប្រើប្រាស់ជាប់បានយូអង្វែង។

នៅក្នុងដំណើរចុះពិនិត្យគុណភាពផ្លូវនេះ លោកទេសរដ្ឋមន្ត្រីស៊ុន ចាន់ថុលបានដឹកនាំក្រុមការងារបច្ចេកទេសជំនាញ ដើម្បីធ្វើតេស្តគុណភាពស្រទាប់ផ្លូវថា តើវាមានគុណភាពជាប់រឹងមាំកម្រិតណា ដោយប្រើប្រាស់ បច្ចេកទេសម៉ាស៊ីនចល័តប្រភេទ FWD ដែលជាម៉ាស៊ីនធ្វើតេស្តគុណភាពផ្លូវ គ្រប់គ្រងដោយក្រុមការងារ ត្រួតពិនិត្យលក្ខណៈបច្ចេកទេសពិសេស ដែលដឹកនាំដោយរដ្ឋលេខាធិការមួយរូប អាចធ្វើតេស្តគុណភាព ប្រកបដោយឯករាជ្យភាព ក្រុមការងារនេះមានម៉ាស៊ីនជាច្រើនគ្រឿង សម្រាប់ចល័តទៅគ្រប់ការដ្ឋានទាំង អស់ដោយគ្មានការជូនដំណឹងជាមុន ដើម្បីធ្វើតេស្ត និងចេញរបាយការណ៍វាយតម្លៃប្រកបសុក្រឹត្យភាព ដោយមិនចំណុះទៅនឹងអង្គភាព ឬគម្រោងណាមួយឡើយ។

ផ្លូវលេខ១៤៦បេ សាងសង់ឡើងក្រោមកញ្ចប់ថវិកាសន្សំរបស់ជាតិ ផ្លូវនេះមាន ប្រវែងសរុប៤៣,០២គីឡូម៉ែត្រ ក្នុងនោះប្រវែង២១គីឡូម៉ែត្រ ជាប្រភេទផ្លូវបេតុងកៅស៊ូ(AC) កម្រាស់៩សង់ទីម៉ែត្រ ចំណែកប្រវែង២២គីឡូម៉ែត្រទៀត ជាប្រភេទផ្លូវបេតុង កម្រាស់ ២៦សង់ទីម៉ែត្រ និងទទឹងផ្លូវ សរុបជារួម១២ម៉ែត្រ៕

ដោយៈ ប៊ី
ភ្នំពេញៈ ទោះស្ថិតក្នុងវិបត្តិកូវីដ១៩ តំបន់នៅព័ទ្ធជុំវិញទីក្រុងភ្នំពេញ កំពុងបង្ហាញសក្តានុពល ទាក់ទាញការវិនិយោគពិសេសវិស័យរោងចក្រ ឧស្សាហកម្ម និងការអភិវឌ្ឍអចលនទ្រព្យ ខណៈគម្រោងវិនិយោគលើការបង្កើតរោងចក្រ ត្រូវបានអនុម័តជាបន្តបន្ទា ប់ ហើយភាគច្រើនគម្រោងទាំងបានបោះទីតាំងនៅខេត្តកណ្តាល និងកំពង់ស្ពឺ។

លោកខេន លូអគ្គលេខាធិការសមាគមរោងចក្រកាត់ដេរនៅកម្ពុជា បានប្រាប់កាសែតអន្តរជាតិថ្មីមួយនៅថ្ងៃទី២៣ ខែមិថុនា ឆ្នាំ២០២១ថា “វិនិយោគិនកំពុងស្វែងរកទីតាំងនៅឆ្ងាយ ក្រៅពីរាជធានីភ្នំពេញ ហើយនេះជាដំណឹងល្អ ដើម្បីគាំទ្រដល់ការអភិវឌ្ឍតាមឆ្ងាយពីទីក្រុង”។

លោកមើលឃើញថា “កំពង់ស្ពឺមានទីតាំងកាន់តែកៀក នឹងកំពង់ផែស្វយ័តក្រុងព្រះសីហនុ ដែលកាន់តែងាយស្រួល ក្នុងការចូលទៅកាន់ទីផ្សារអន្តរជាតិ និងអាចកាត់បន្ថយការចំណាយថ្លៃដឹកជញ្ចូន ពីព្រោះវាមានទីតាំង នៅជិតអាកាសយានដ្ឋានរាជធានីភ្នំពេញ ដែលមានរយៈពេលតែមួយម៉ោង ឬមួយម៉ោងកន្លះកន្លះប៉ុណ្ណោះ”។

លោកបានបន្ថែមថា ការជួលទីតាំងនៅខេត្តនេះនៅមានកម្រិតទាប ដែលជាហេតុធ្វើឱ្យមានការទាក់ទាញការវិនិយោគកាន់តែច្រើននៅក្នុងតំបន់នេះ។

លោកច្រឹក សុខនីមប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានថ្លែងប្រាប់ថា ដីឧស្សាហកម្មនៅតែមានតម្រូវការបន្តបន្ទាប់ ខណៈរដ្ឋាភិបាលបានអនុម័តគម្រោងវិនិយោគលើការបង្កើតរោងចក្រ និងទីតាំងផលិតកម្មជាច្រើន ទោះស្ថិតក្នុងស្ថិតក្នុងវិបត្តិកូវីដ១៩។

ជាមួយគ្នានេះ លោកបានបន្តថា មិនត្រឹមតែវិស័យរោងចក្រ ឧស្សាហកម្មទេ វិស័យអចលនទ្រព្យ នៅព័ទ្ធជុំវិញទីក្រុងភ្នំពេញក៏មានរីកចម្រើនផងដែរ ដោយសារបច្ចុប្បន្ន រដ្ឋាភិបាលបាន និងកំពុងជំរុញការអភិវឌ្ឍហេដ្ឋារចនាសម្ព័ន្ធ ដែលបង្កភាពងាយស្រួលដល់ការធ្វើដំណើរ និងការដឹកជញ្ជូនជាដើម”៕