រដ្ឋមន្ត្រីស៊ុន ចាន់ថុលៈ គម្រោងស្ថាបនាផ្លូវជាតិលេខ៣តម្លៃ២០០លានដុល្លារបញ្ចប់មុនផែនការរហូតដល់មួយឆ្នាំ

ដោយៈ ប៊ី

ភ្នំពេញៈ លោកទេសរដ្ឋមន្ត្រីស៊ុន ចាន់ថុលរដ្ឋមន្ត្រីក្រសួងសាធារណការ និងដឹកជញ្ជូន បានអះអាងថា គម្រោងសាងសង់ផ្លូវជាតិលេខ៣នេះ បានធ្វើចប់រួចរាល់មុនផែនការរហូតដល់មួយឆ្នាំ ដោយគិតមកដល់ពេលនេះសម្រេចបាន៩៨% ហើយ។

ការលើកឡើងរបស់លោកទេសរដ្ឋមន្ត្រីស៊ុន ចាន់ថុលត្រូវបានធ្វើឡើងនារសៀលថ្ងៃទី២២ ខែមិថុនា ឆ្នាំ២០២១នេះ ក្នុងឱកាសដែលលោក និងលោកស្រីនិន សាផុនប្រធានគណៈកម្មការសាធារណការ ដឹកជញ្ជូន ទូរគមនាគមន៍ ប្រៃសណីយ៍ ឧស្សាហកម្ម រ៉ែ ថាមពល ពាណិជ្ជកម្ម រៀបចំដែនដី នគរូបនីយកម្ម និងសំណង់ (គណៈកម្មការទី៩) នៃរដ្ឋសភា ដឹកនាំគណៈប្រតិភូចម្រុះចុះពិនិត្យមើលសកម្មភាព និងវឌ្ឍនភាពសាងសង់ផ្លូវជាតិលេខ៣។

លោកទេសរដ្ឋមន្ត្រី បានបន្ថែមថា គម្រោងសាងសង់ផ្លូវជាតិលេខ៣នេះ បានធ្វើចប់រួចរាល់មុនផែនការរហូតដល់មួយឆ្នាំ ដោយគិតមកដល់ពេលនេះសម្រេចបាន៩៨% ហើយមានគុណភាពល្អ និងធ្វើបានលឿនផងដែរ។ ផ្លូវជាតិលេខ៣ នឹងដាក់ជញ្ជីងថ្លឹងរថយន្តចំនួន២ ដើម្បីឱ្យរថយន្តចូលថ្លឹង ជាមួយគ្នានោះក៏បានត្រៀមដាក់ជញ្ជីងបង្កប់ក្រោមដីបន្ថែមទៀត ដើម្បីធ្វើយ៉ាងណា ទប់ស្កាត់រថយន្តដឹកទំនិញលើសទម្ងន់ ដែលជាមូលហេតុធ្វើឱ្យផ្លូវខូចផងដែរ។

ជាមួយគ្នានេះដែរ លោកបានបន្តថា ទោះបីជាការចុះពិនិត្យជាច្រើនលើកឃើញថា គុណភាពនៃការសាងសង់ផ្លូវជាតិលេខ៣ បានត្រឹមត្រូវតាមលក្ខណៈបច្ចេកទេសក៏ដោយ តែលុះត្រាតែដាក់ឱ្យប្រើប្រាស់បានរយៈពេល១ឆ្នាំ ហើយមិនមានបញ្ហាខូចខាត ទើបអាចទទួលយកបាន។

លោកទេសរដ្ឋមន្ត្រី បានបន្ថែមថា មានក្រុមហ៊ុនមួយចំនួនចង់បានតែចំនេញ មិនគិតជួយថែទាំសម្បត្តិរបស់ជាតិនោះទេ ដោយប្រឹងដឹកទំនិញលើសទម្ងន់កំណត់ច្រើន ដោយអះអាងថា មិនមែនជាផ្លូវដែលខ្លួនចេញលុយសាងសង់នោះឡើយ។ លោកថា នៅតាមទល់ដែនពេលផ្ទេរទំនិញឃើញថា ឡានទំនិញរបស់យើងមួយ គឺត្រូវការឡានដឹកទំនិញរបស់ប្រទេសគេ២ទេីបដាក់អស់។

លោកទេសរដ្ឋមន្ត្រីបានបន្ថែមថា ក្រុមការងាររបស់ក្រសួង តែងតែធ្វេីសកម្មភាពចុះឆ្មក់ចាប់រថយន្តដឹកទំនិញ នៅតាមផ្លូវធំ ដើម្បីធ្វើការផាកពិន័យ និងឃាត់ទុក ដោយគិតមកដល់ពេលនេះ បានចាប់រថយន្តទុកមួយឆ្នាំ មិនឱ្យបេីកបរ បានជាង១០០គ្រឿងហើយ ដោយមិនគិតថា ជាឡានរបស់អ្នកណា មានខ្នងធំយ៉ាងណានោះ គឺមិនអាចអន្តរាគមន៍ដោះលែងបាននោះទេ។

លោកទេសរដ្ឋមន្ត្រីស៊ុន ចាន់ថុលបានបញ្ជាក់ទៀតថា រាជរដ្ឋាភិបាល មិនដែលចង់បានអ្វីពីប្រជាពលរដ្ឋនោះទេ គ្រាន់តែសុំត្រឹមឱ្យប្រជាពលរដ្ឋទាំងអស់ ចូលរួមគោរពច្បាប់ចររាចរណ៍ឱ្យបានគ្រប់ៗគ្នាផងដែរ ដែលនេះគឺជាការជួយដល់រាជរដ្ឋាភិបាលក្នុងការកសាងប្រទេសជាតិហើយ។ បើពលរដ្ឋទាំងអស់ចូលរួមគោរពច្បាប់ចររាចរណ៍ រាជរដ្ឋាភិបាល ក៏មានកម្លាំងចិត្តក្នុងការធ្វើផ្លូវឱ្យកាន់តែល្អបន្ថែមទៀតផងដែរ។

ការពង្រីក និងលើកកម្រិតគុណភាព (ពី DBST ទៅ AC) លើកំណាត់ផ្លូវជាតិលេខ៣នេះ មានប្រវែងសរុបជិត១៣៥គីឡូម៉ែត្រ ចាប់ពីរង្វង់មូលចោមចៅ ដល់ក្រុងកំពត ក្រោមហិរញ្ញប្បទានសម្បទានរបស់រដ្ឋាភិបាលចិនជាង២០០លានដុល្លារអាមេរិក។

គម្រោងនេះចែកចេញជាពីរកំណាត់៖ កំណាត់ទី១ ចាប់ពីភ្នំពេញ (ចោមចៅ)-បែកគូស មានប្រវែងជិត៧០គីឡូម៉ែត្រ ត្រូវពង្រីកទទឹងតួផ្លូវរហូតដល់ ២៤.៥ម៉ែត្រ ជា៤គន្លង (២គន្លងទៅ ២គន្លងមក) ដោយក្រាលបេតុងកៅស៊ូ AC កម្រាស់ ៩សង់ទីម៉ែត្រ ទទឹង ២១ម៉ែត្រ លើទទឹងតួផ្លូវសរុប ២៤.៥ម៉ែត្រ។ ដោយឡែកកំណាត់ទី២ ចាប់ពីបែកគូស ដល់ក្រុងកំពត ប្រវែងជិត៦៥គីឡូម៉ែត្រ ត្រូវពង្រីកទទឹងតួផ្លូវរហូតដល់ ១២ម៉ែត្រ ជា២គន្លង (១គន្លងទៅ ១គន្លងមក) ដោយក្រាលបេតុងកៅស៊ូ AC កម្រាស់៧សង់ទីម៉ែត្រ ទទឹង ១១ម៉ែត្រផងដែរ៕

ក្រុមហ៊ុនយក្សចំនួន២របស់ម៉ាឡេស៊ីសហការគ្នាបង្កើតក្រុមហ៊ុនម៉ាគមនាគមន៍មួយតម្លៃ១២ពាន់លានដុល្លារ

ដោយៈ គៀតឈូ

ម៉ាឡេស៊ីៈ ក្រុមហ៊ុន Axiata Group និងក្រុមហ៊ុន Telenor របស់ប្រទេសន័រវែសបានព្រមព្រៀងរួមគ្នាលើប្រតិបត្តិការទូរស័ព្ទចល័តរបស់ពួកគេនៅក្នុងប្រទេសម៉ាឡេស៊ី ដើម្បីបង្កើតក្រុមហ៊ុនទូរគមនាគមន៍យក្សមួយ ដែលមានតម្លៃ៥០ពាន់លានរីងហ្គីត (១២ពាន់លានដុល្លារ) នៅក្នុងប្រទេសអាស៊ីអាគ្នេយ៍មួយនេះ។ នេះបើយោងតាមការចេញផ្សាយរបស់គេទំព័រ Forbes នៅថ្ងៃទី២២ ខែមិថុនា ឆ្នាំ២០២១។

សេចក្តីថ្លែងការណ៍រួមរបស់ក្រុមហ៊ុន Axiata និង Telenor បានឱ្យដឹងថា ការការច្របាច់បញ្ចូលគ្នារវាងក្រុមហ៊ុនគមនាគមន៍ Celcom Axiata និង Digi.com create នឹងបង្កើតប្រតិបត្តិការទូរស័ព្ទចល័តធំជាងគេរបស់ប្រទេសម៉ាឡេស៊ី ជាមួយនឹងចំនួនអតិថិជនសរុបចំនួន១៩លាននាក់ និងប្រាក់ចំណូលប្រចាំឆ្នាំចំនួន១២,៤ពាន់លានរីងហ្គីត។

យោងតាមរបាយការណ៍របស់ក្រុមហ៊ុនឈ្មួញជើងសារ Nomura ក្រុមហ៊ុនដែលច្របាច់បញ្ចូលគ្នានេះ នឹងមានចំណែកទីផ្សារប្រហែល៤៣,៧%។ នោះនឹងធ្វើឱ្យក្រុមហ៊ុនក្លាយជាអ្នកដឹកនាំទីផ្សារថ្មី ដោយវ៉ាដាច់ក្រុមហ៊ុន Maxis មហាសេដ្ឋី Ananda Krishnan។

លោក Izzaddin Idris ប្រធាននិងជានាយកប្រតិបត្តិក្រុមហ៊ុន Axiata មានប្រសាសន៍ថា“ដោយមានការផ្លាស់ប្តូរយ៉ាងរលូន យើងរំពឹងថានឹងមានភាពប្រសើរឡើងនៅក្នុងចំណូលមុនកាត់ពន្ធ និងកម្រិតលំហូរសាច់ប្រាក់នៅក្នុងក្រុមហ៊ុនច្របាច់បញ្ចូលគ្នានេះ នឹងបង្កើនភាគលាភទៅឱ្យម្ចាស់ហ៊ុនរបស់យើង”។

ក្រុមហ៊ុន Axiata និង Telenor នឹងកាន់កាប់ភាគហ៊ុនចំនួន៣៣,១ភាគរយ នៃក្រុមហ៊ុនវិនិយោគទុនរួម ហើយភាគហ៊ុននៅសល់នឹងត្រូវបានចុះបញ្ជីនៅលើផ្សារហ៊ុន Bursa Malaysia ដោយរំពឹងថា ក្រុមហ៊ុនដែលបានបញ្ចូលគ្នានេះ នឹងបង្កើតប្រាក់សន្សំរួមបញ្ចូលគ្នាចំនួន៨ពាន់លានរីងហ្គីត និងលំហូរសាច់ប្រាក់៤ពាន់លានរីងហ្គីត៕

កំពង់ផែព្រះសីហនុដាក់ចេញផែនការអភិវឌ្ឍរយៈពេលវែងដើម្បីពង្រីកសមត្ថភាពដឹកជញ្ជូនទៅទីផ្សារអន្តរជាតិ

ដោយៈ ប៊ី

ភ្នំពេញៈ កំពង់ផែស្វយ័តក្រុងព្រះសីហនុ បានដាក់ចេញផែនការអភិវឌ្ឍរយៈពេលវែង ក្រោយឆ្នាំ២០៣០ ដើម្បីពង្រឹង និងពង្រីកសមត្ថភាពដឹកជញ្ជូនទៅកាន់ទីផ្សារអន្តរជាតិ។ នេះបើយោងតាមការលើកឡើងរបស់ក្រសួងសាធារណការ និងដឹកជញ្ជូននៅថ្ងៃទី២២ ខែមិថុនា ឆ្នាំ២០២១។

ការលើកឡើងនេះ ត្រូវបានធ្វើឡើងក្នុង ក្នុងការចុះពិនិត្យកំពង់ផែស្វយ័តក្រុងព្រះសីហនុ ដែលដឹកនាំដោយ ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន។ ដំណើរទស្សនកិច្ចនេះធ្វើឡើងក្នុងគោលបំណងដើម្បីស្វែងយល់ពីសកម្មភាពការងារជាក់ស្តែងក្នុងការដឹកជញ្ជូន ការលើកដាក់ទំនិញនៅកំពង់ផែស្វយ័តក្រុងព្រះសីហនុ និងសកម្មភាពអភិវឌ្ឍន៍នានា ផងដែរ។

ក្រសួងបានឱ្យដឹងថា កំពង់ផែស្វយ័តក្រុងព្រះសីហនុ បានដាក់ចេញផែនការអភិវឌ្ឍរយៈពេលវែង ក្រោយឆ្នាំ២០៣០ ដើម្បីពង្រឹង និងពង្រីកសមត្ថភាពនៃការផ្តល់សេវាជូនអតិថិជន ក្នុងនោះរួមមាន៖ គម្រោងកសាងចំណតកុងតឺន័រទី៤ ប្រវែង១៣០០ម៉ែត្រ x ៥៥០ម៉ែត្រ ចំណតកុងតឺន័រទី៣ប្រវែង ១០៥០ម៉ែត្រ x ៥៥០ម៉ែត្រ ចំណតកុងតឺន័រថភ្លើងប្រវែង២៥០ម៉ែត្រ x ១៧០០ម៉ែត្រ អភិវឌ្ឍតំបន់រដ្ឋបាល និងសេដ្ឋកិច្ច ៥៤ ហិកតា និងតំបន់គយត្រួតពិនិត្យទំនិញប្រវែង៦៥០ម៉ែត្រ x ២០០ម៉ែត្រ។

ដោយឡែក ផែនការអភិវឌ្ឍរយៈពេលខ្លីឆ្នាំ២០១៧-២០២៥ កំពង់ផែស្វយ័តក្រុងព្រះសីហនុ មានផែនការអភិវឌ្ឍកំពង់ផែទឹកជ្រៅចំណតកុងតឺន័រជម្រៅ១៤,៥ម៉ែត្រ ក្នុងនោះ៖ គម្រោងកសាងកំពង់ផែ ទឹកជ្រៅចំណតកុងតឺន័រជំហានទីមួយ ប្រវែង៣៥០ម៉ែត្រ ជំហានទីពីរប្រវែង ៣០០ ម៉ែត្រ និងជំហានទីបី ប្រវែង៣០០ម៉ែត្រផងដែរ។

កំពង់ផែស្វយ័តក្រុងព្រះសីហនុ បានចូលទីផ្សារមូលបត្រកម្ពុជា បោះផ្សាយ លក់ភាគហ៊ុន បានបញ្ចុះតម្លៃ១០%នៃតម្លៃសេវាលើកដាក់កុងតឺន័រ និងបានអភិវឌ្ឍចំណតកំពង់ផែពហុ បំណង ដោយឡែកទាក់ទងការងារអាជីវកម្មនិងហិរញ្ញវត្ថុឆ្នាំ២០២០ ធៀបនិងឆ្នាំ២០១៩វិញ កំពង់ផែ ស្វយ័តក្រុងព្រះសីហនុមានទំនិញឆ្លងកាត់ចំនួន ៦ ៦០១ ៨០៤តោន កើនឡើង 0,៨៣% បរិមាណនាវាឆ្លងកាត់មានចំនួន១៥៨២គ្រឿង ថយចុះ៤,៨១% បរិមាណកុងតឺន័រឆ្លងកាត់មានចំនួន៦៤១ ៨៤២ TEUs កើនឡើង០,៤១% និងចំណូលសរុបមានចំនួន ៣១១ ៨១៣ ៧៦៩ ០០០ រៀល ថយចុះចំនួន៧%៕

ថៃ គ្រោងរៀបចំវេទិកាសាធារណៈដើម្បីស្ទង់មតិអំពីការបើកការចរចាកិច្ចព្រមព្រៀងពាណិជ្ជកម្មសេរីអាស៊ាន-កាណាដា

ដោយៈ សុខុម

បាងកក: សមភាគីថៃ និងអាស៊ាន គ្រោងរៀបចំកិច្ចពិភាក្សាឡើងវិញជាមួយភាគីកាណាដា ដើម្បីបង្កើតវិសាលភាពនៃកិច្ចចរចាជុំវិញកិច្ចព្រមព្រៀងពាណិជ្ជកម្មសេរីអាស៊ាន-កាណាដា (Asean-Canada FTA) នៅចុងឆ្នាំនេះ។ នេះបើយោងតាមកាសែត Bangkok Post ចុះផ្សាយនៅថ្ងៃទី២២ មិថុនា នេះ។

លោក Duangarthit Nidhi-u-tai អគ្គនាយករងនៃនាយកដ្ឋានចរចាពាណិជ្ជកម្ម (Trade Negotiations Department) ទទួលបានការចាត់តាំងកាលពីពេលថ្មីៗនេះឱ្យចូលរួមកិច្ចប្រជុំមន្ត្រីសេដ្ឋកិច្ចជាន់ខ្ពស់អាស៊ាន-កាណាដា លើកទី១៣ (Seom-Canada) តាមរយៈ Video Conference ចន្លោះថ្ងៃទី១៤-១៥ ខែមិថុនា ដើម្បីពិភាក្សាអំពីផែនការនានាស្ថិតក្រោមក្របខ័ណ្ឌនៃកិច្ចចរចាកិច្ចព្រមព្រៀងពាណិជ្ជកម្មសេរីអាស៊ាន-កាណាដា។

នៅក្នុងកិច្ចប្រជុំនោះ លោកបានលើកឡើងថា មានការវិវឌ្ឍគួរឱ្យកត់សម្គាល់ទាក់ទងនឹងវិសាលភាពនៃការចរចាកិច្ចព្រមព្រមព្រៀងសេរីអាស៊ាន-កាណាដា ខណៈអ្នកចូលរួមទាំងអស់បានយល់ស្របថាមានភាពចាំបាច់បន្ទាន់ដែលត្រូវស្វែងរកដំណោះស្រាយឱ្យបានឆាប់តាមដែលអាចធ្វើទៅបាន ដើម្បីឱ្យពួកគេមានលទ្ធភាពស្នើរៀបចំកិច្ចប្រជុំរដ្ឋមន្ត្រីសេដ្ឋកិច្ចអាស៊ាន-កាណាដា នៅខែកញ្ញា ចុងឆ្នាំនេះ។

លោក Duangarthit Nidhi-u-tai បានបន្ថែមថា កាលពីពេលកន្លងមក លេខាធិការដ្ឋានអាស៊ាន បានសិក្សាអំពីកិច្ចព្រមព្រៀងពាណិជ្ជកម្មសេរីអាស៊ាន-កាណាដា ហើយបានរកឃើញថា ផលិតផលក្នុងស្រុកសរុប (GDP) របស់ប្រទេសថៃ អាចកើនឡើងដល់៧,៩៦៧ពាន់លានដុល្លារអាមេរិក (ប្រហែល២៥៤,៩៤៤ពាន់លានបាត) ឬកើនឡើង១,៩៧% ចំណែកឯ GDP របស់អាស៊ាន នឹងកើនឡើង៣៩,៣៦១ពាន់លានដុល្លារ (១,២៥៩.៥៥២ទ្រីលានបាត) ឬកើនឡើង១,៦%។

ទន្ទឹមនេះ កតិកាសញ្ញានេះ ប្រសិនបើត្រូវបានអនុវត្ត អាចបង្កើន GDP របស់ប្រទេសកាណាដា បានចំនួន៥,១០៤ពាន់លានដុល្លារ (១៦៣,៣២៨ពាន់លានបាត) ឬកើនឡើង០,៣%។

យោងតាមលោក Duangarthit Nidhi-u-tai ឱ្យដឹងថា នាយកដ្ឋានចរចាពាណិជ្ជកម្ម នឹងរៀបចំកិច្ចប្រជុំជាបន្តបន្ទាប់តាម Video Conference ដើម្បីផ្សព្វផ្សាយជាសាធារណៈនូវលទ្ធផលនៃការសិក្សា ហើយនឹងបើកវេទិកាសាធារណៈជាមួយគ្រប់ភាគីពាក់ព័ន្ធ ស្តីពីការបង្កើតកិច្ចព្រមព្រៀងពាណិជ្ជកម្មសេរីអាស៊ាន-កាណាដា ចន្លោះពីថ្ងៃទី២២-២៩ ខែមិថុនា។ លោកបានគូសបញ្ជាក់ថា មតិយោបល់ដែលបានលើកឡើងក្នុងវេទិកាសសាធារណៈនេះពិតជាមានសារៈសំខាន់ណាស់ដែលជួយដល់ការសម្រេចចិត្តរបស់ប្រទេសថៃ ថាតើគួរបើកការចរចាកិច្ចព្រមព្រៀងពាណិជ្ជកម្មសេរីអាស៊ាន-កាណាដា ឬក៏អត់។

ពាណិជ្ជកម្មទ្វេភាគីរវាងប្រទេសថៃ និងប្រទេសកាណាដា មានទំហំសរុប២,៣១២ពាន់លានដុល្លារកាលពីឆ្នាំ២០២០ ដោយកើនឡើង០.៥៣%។ ក្នុងចំនួននោះ ការនាំចេញពីប្រទេសថៃ មានចំនួន១,៥៤៤ពាន់លានដុល្លារ ដោយកើនឡើង០,៦៧% ខណៈការនាំចូលមានចំនួន៧៦៧,៤៥លានដុល្លារ ដោយកើនឡើង០,៣៧%។

ក្នុងរយៈពេល៤ខែដំបូងនៃឆ្នាំ២០២១ ពាណិជ្ជកម្មទ្វេភាគីរវាងប្រទេសថៃ និងប្រទេសកាណាដា បានកើនឡើង០,៥% ស្មើនឹង៨៤៦លានដុល្លារ ដោយការនាំចេញពីប្រទេសថៃ ឈានដល់៥៨៨លានដុល្លារ ដោយកើនឡើង ០,៦៩%៕

កាវិនិយោគ៖ ទិដ្ឋភាពទូទៅក្នុងប្រទេសកម្ពុជា

ដោយ៖ ចិន្ដា
ថ្ងៃពុធ ទី 16 ខែមិថុនា ឆ្នាំ 2021

ភ្នំពេញ ថ្ងៃទី 16 ខែមិថុនា ឆ្នាំ 2021 – កម្ពុជា គឺជាប្រទេសដែលមានការអភិវឌ្ឍដ៏ឆាប់រហ័សបំផុតនៅ ក្នុងអាស៊ាន ក៏ដូចជាប្រទេសដែលមានភាពទាក់ទាញបំផុតសម្រាប់វិនិយោគគិននៅក្នុងសតវត្សន៍ទី 21 នេះ។ កំណើនដ៏គួរឲ្យកត់សម្គាល់នេះ គឺជាលទ្ធផលនៃភាពនឹងនរផ្នែកនយោបាយជាមួយនឹងការកើន ឡើងនៃវិស័យសំណង់ វាយនភ័ន្ឌ និងវិស័យកាត់ដេរ វិស័យទេសចរណ៍ និងវិស័យកសិកម្ម។ ជាមួយនឹងភាពនឹងនរនៃកំណើនសេដ្ឋកិច្ចជាមធ្យម 7% ក្នុងមួយឆ្នាំ ក្នុងរយៈពេលមួយ ទស្សវត្សចុងក្រោយនេះ ព្រមជាមួយនឹងរបាយប្រជាជនជាង60% ដែលមានអាយុក្រោម 30 ឆ្នាំ ប្រទេសកម្ពុជា មានទាំងធនធានមនុស្ស និងតម្រូវការអ្នកប្រើប្រាស់ដ៏ច្រើនលើសលប់។

ថ្វីបើសេដ្ឋកិច្ចមានភាពប្រសើរឡើងជាលំដាប់ ជម្រើសនៃការវិនិយោគក៏មានកំណត់ផងដែរ។ ការដោះដូររូបិយប័ណ្ណជាអន្តរជាតិ រូបិយបណ្ណ Crypto មូលបត្រកម្មសិទ្ធ មូលបត្របំណុល និងការដោះដូរ វត្ថុធាតុដើមនៅមិនទាន់មានការផុសផុលនៅឡើយក្នុងប្រទេសកម្ពុជា។ ប្រភេទនៃការវិនិយោគបែបនេះត្រូវបានចាត់ទុកថាជាប្រភេទនៃការវិនិយោគដែលប្រកបដោយគ្រោះថ្នាក់មួយសម្រាប់អ្នកវិនិយោគ ខណៈពេលដែលការវិនិយោគតាមបែបប្រពៃណីដូចជា អចលនទ្រព្យត្រូវបានចាត់ទុកថាជាការ វិនិយោគដែលមានផលចំណេញខ្ពស់។

អាស្រ័យលើកំណើននៃសេដ្ឋកិច្ចដ៏ខ្លាំងក្លា និងការវិនិយោគធំៗ ធ្វើឲ្យតម្លៃដីធ្លីនៅក្នុងប្រទេសកម្ពុជា កើនឡើងជាលំដាប់រហូតដល់ 279% ចាប់ពីឆ្នាំ 2010 រហូតដល់ឆ្នាំ 2019។ តម្លៃដីធ្លីក៏មានការកើនឡើងច្រើនគួរឲ្យកត់សម្គាល់នៅតាមបណ្ដាខេត្តដូចជាខេត្តសៀមរាប និងខេត្ត ព្រះសីហនុ។ ភ្នំពេញដែលជារាជធានីនៃប្រទេសកម្ពុជាទទួលបានការវិនិយោគភាគច្រើនពីអ្នក វិនិយោគនៅក្នុងស្រុក និងបរទេសផងដែរ។

ភ្នំពេញមានគ្រប់យ៉ាងដែលទីក្រុងទំនើបទូទៅមាន រួមបញ្ចូលទាំងអាគារខ្ពស់ៗ អាផាតមិន ការកម្សាន្ត ផ្សារលក់ទំនិញ ផ្សារក្នុងស្រុក និងតំបន់ពាណិជ្ជកម្ម។ ទីផ្សារអចលនទ្រព្យនៅទីក្រុងភ្នំពេញមាន ផលចំណេញខ្ពស់ជាងគេបង្អស់បើធៀបទៅនឹងតំបន់ផ្សេងៗទៀតនៅក្នុងប្រទេស។ ដីធ្លី សំណង់លំនៅឋាន និងបុរី មានប្រជាប្រិយភាពខ្លាំងក្នុងចំណោមអ្នកវិនិយោគក្នុងស្រុកទាំងអស់ ខណៈពេលដែលខុនដូ និងអាផាតមិន មានអ្នកវិនិយោគភាគច្រើនជាជនបរទេស។

អត្រានៃការជួលនៅក្នុងប្រទេសកម្ពុជាសម្រាប់អចលនទ្រព្យលំនៅឋានមានពី 6% ទៅ 8% ក្នុងមួយឆ្នាំជាមួយនឹងរយៈពេលជួលជាមធ្យម 12 ខែ។ អត្រាជួលខ្ពស់មានភាពទាក់ទាញខ្លាំងបំផុត សម្រាប់អ្នកដែលចង់ស្វែងរកចំណូលពីច្រើនផ្នែកដើម្បីបង្កើតនូវលំហូរសាច់ប្រាក់ជាវិជ្ជមានសម្រាប់ អត្ថប្រយោជន៍ផ្ទាល់របស់ពួកគេ។ បន្ថែមពីលើនេះ កំណើននៃមូលធនក្នុងទីក្រុងភ្នំពេញអាច កើនឡើងរហូតដល់ជាង 29% ប៉ុន្តែទោះជាយ៉ាងនេះក្ដីអត្រានេះគឺអាស្រ័យទៅលើប្រភេទនៃ អចលនទ្រព្យ និងទីតាំងផងដែរ។ នាពេលបច្ចុប្បន្ននេះ ខណ្ឌដែលមានកំណើនមូលធនខ្ពស់ជាងគេ បំផុតគឺខណ្ឌសែនសុខ ខណ្ឌជ្រោយចង្វារ ខណ្ឌច្បារអំពៅ ខណ្ឌចំការមន និងខណ្ឌទួលគោក។

រាជរដ្ឋាភិបាលក្រុងភ្នំពេញ បានព្យាយាមអភិវឌ្ឍនូវហេដ្ឋារចនាសម្ព័ន្ធនៅក្នុងទ្រង់ទ្រាយធំដើម្បី ទទួលនូវការវិនិយោគផ្ទាល់កាន់តែច្រើនពីក្រៅប្រទេសក៏ដូចជាការគាំទ្រដល់នគរូបនីយកម្មផងដែរ។ អាកាសយានដ្ឋានអន្តរជាតិភ្នំពេញ និងការស្ថាបនាផ្លូវល្បឿនលឿនភ្នំពេញ – ក្រុងព្រះសីហនុគឺជាផ្នែកមួយនៃកិច្ចខិតខំប្រឹងប្រែងធ្វើឲ្យហេដ្ឋារចនាសម្ព័ន្ធនៅក្នុងទីក្រុងមាន ភាពប្រសើរឡើង។ ជាមួយនឹងការលើកទឹកចិត្តពីរាជរដ្ឋាភិបាល ទីផ្សារនៃអចលនទ្រព្យមានភាព ខុសប្លែកពីគ្នា ដូច្នេះហើយទាំងអ្នកវិនិយោគនៅក្នុងស្រុក និងក្រៅប្រទេសគប្បីមានស្វែងរកនូវការ វិនិយោគអចលនទ្រព្យប្រភេទផ្សេងៗទៀតផងដែរ។ ជាទូទៅ អចលនទ្រព្យលំនៅឋានគឺជាប្រភេទ នៃការវិនិយោគដ៏មានសុវត្ថិភាពបំផុតសម្រាប់មនុស្សភាគច្រើន ខណៈពេលដែលអចលនទ្រព្យ បែបពាណិជ្ជកម្មគឺជាជម្រើសដ៏ល្អបំផុតសម្រាប់ការវិនិយោគនៅក្នុងប្រទេសកម្ពុជា និងទូទាំងប្រទេស ផងដែរ។

ផ្សារជីស៊ី អូរឫស្សីគឺជាឱកាសមាសមួយសម្រាប់អ្នកវិនិយោគទាំងអស់ដែលចង់ប្រឡូកនៅក្នុងវិស័យអចលនទ្រព្យបែបពាណិជ្ជកម្មក្នុងទីក្រុងភ្នំពេញ។ គម្រោងនេះគឺជាធ្វើឲ្យគុណភាពផ្សារក្នុងស្រុកមានភាព ប្រសើរឡើងជាមួយនឹងទំនើបកម្មនៃការធ្វើអាជីវកម្មរបស់អាជីវករទាំងអស់នៅក្នុងយុគសម័យនៃ បច្ចេកវិទ្យាឌីជីថលនាពេលបច្ចុប្បន្ននេះ។ ទីនេះត្រូវបានរាប់បញ្ចូលជាទីតាំងដែលស្នងបន្តពីផ្សារ ក្នុងស្រុកទាំងអស់ ដោយការរួមបញ្ចូលគ្នានូវស្ថាបត្យកម្មបែបខ្មែរ និងការប្រើប្រាស់នូវលំហូរខ្យល់ និងម្លប់ធម្មជាតិ។ ទីនេះនឹងក្លាយជាផ្នែកមួយនៃផ្សារក្នុងស្រុកទាំងអស់។ ជាមួយនឹងរចនាបទបែប ទំនើបលាយជាមួយនឹងរចនាបទបែបខ្មែរបុរាណ ផ្សារជីស៊ីអូរឫស្សីគឺជាស្ថាបត្យកម្មដែលមានរួម បញ្ចូលនូវស្ថាបត្យកម្មប្រវត្តិសាស្ត្រ រួមបញ្ចូលជាមួយនឹងការរចនាបែបប្រពៃណីទំនើប។ នៅក្នុងឆ្នាំ 2024 ផ្សារជីស៊ី អូរឫស្សីនឹងក្លាយជាទីតាំងដ៏ល្បីល្បាញបំផុតមួយសម្រាប់ប្រជាជនក្នុងស្រុក និងភ្ញៀវទេសចរណ៍ដែលតំណាងឲ្យប្រវត្តិសាស្ត្រ និងអត្តសញ្ញាណដែលផ្សារភ្ជាប់នូវអតីតកាល មកបច្ចុប្បន្នកាល និងទៅកាន់អនាគត កាលផងដែរ។ បេតិកភណ្ឌវប្បធម៌ខ្មែរមានតម្លៃដ៏ច្រើន លើសលប់ លើសពីតម្លៃនៃអចលនទ្រព្យផ្ទាល់ដោយតំណាងឲ្យគុណតម្លៃ និងចំណេះដឹង ប្រពៃណី និងទំនៀមទម្លាប់ ជំនាញ និងទ្រព្យសម្បត្តិ ត្រូវផ្ទេរបន្តពីមួយជំនាន់ទៅមួយជំនាន់។

ដោយសារតែការអភិវឌ្ឍពាណិជ្ជកម្មនៅតែបន្តបង្កើតឡើងឥតឈប់ឈរ គម្រោងដូចជា ផ្សារជីស៊ី អូរឫស្សីនឹងក្លាយជាប្រភេទនៃការវិនិយោគដ៏ទាក់ទាញមួយសម្រាប់ឲ្យអ្នកវិនិយោគប្រឡូកចូល ក្នុងទីផ្សារអចលនទ្រព្យបែបពាណិជ្ជកម្មក្នុងប្រទេសកម្ពុជា។ អ្នកវិនិយោគប្បីចាប់យកនូវឱកាស ឲ្យបានឆាប់រហ័សដោយសារតែតម្លៃនៃអចលនទ្រព្យប្រភេទនេះតែងតែមានកំណើនជាលំដាប់។ អ្នកវិនិយោគអាចលក់តូបវិញនៅក្នុងតម្លៃខ្ពស់ ឬក៏អាចជួលតូបទាំងនេះសម្រាប់ជាចំណូលបន្ថែម មួយដល់លំហូរសាច់ប្រាក់ជាវិជ្ជមានរបស់ពួកគេ។

បញ្ចប់

ចិន្ដា គឺជាអ្នកវិភាគ និងនិពន្ធអំពីការវិនិយោគរយៈពេលវែង។ អត្ថបទនេះ គឺជាការយល់ឃើញទាំងស្រុងរបស់លោក។

ក្រុមហ៊ុនវិស្វកម្មនិងសំណង់ដ៏ធំមួយនឹងឈានជើងចូលផ្សារមូលបត្រកម្ពុជា

ដោយៈ ម៉ាណេត

ភ្នំពេញៈ អាជ្ញាធរសេវាហិរញ្ញវត្ថុមិនមែនធនាគារ បានសម្រេចអនុម័តសំណើសុំបោះផ្សាយលក់មូលបត្រជាសាធារណៈរបស់ក្រុមហ៊ុន ឌី ប៊ី ឌី អ៊ុនជីនារីង (DBD Engineering) ដែលនឹងក្លាយជាក្រុមហ៊ុនទី១ ចុះបញ្ជីលក់មូលបត្រកម្មសិទ្ធិនៅលើទីផ្សារកំណើននៃផ្សារមូលបត្រកម្ពុជា។ នេះបើយោងតាមសេចក្តីប្រកាសព័ត៌មានរបស់និយ័តករមូលបត្រកម្ពុជា នៅថ្ងៃទី២២ ខែមិថុនា ឆ្នាំ២០២២។

នាព្រឹកថ្ងៃទី២២ ខែមិថុនា ឆ្នាំ២០២១ លោកអូន ព័ន្ធមុនីរ័ត្នឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាអាជ្ញាធរសេវាហិរញ្ញវត្ថុមិនមែនធនាគារ (អ.ស.ហ.) បានអញ្ជើញដឹកនាំកិច្ចប្រជុំក្រុមប្រឹក្សា អ.ស.ហ. លើកទី ២ លើរបៀបវារៈបន្តចំនួន ១. ពីកិច្ចប្រជុំ លើកទី ១ គឺសំណើសុំបោះផ្សាយលក់មូលបត្រជាសាធារណៈរបស់ក្រុមហ៊ុន ឌី ប៊ី ឌី អ៊ុនជីនារីង ម.ក.។

និយ័តករមូលបត្រកម្ពុជាបានឱ្យដឹងថា ជាលទ្ធផល អង្គប្រជុំបានអនុម័តលើសំណើសុំបោះផ្សាយលក់មូលបត្រជាសាធារណៈរបស់ក្រុមហ៊ុន ឌី ប៊ី ឌី អ៊ុនជីនារីង ម.ក. ដោយ ក្រុមហ៊ុនត្រូវបន្តនីតិវិធីនៃការធ្វើបរិវិសកម្ម និងចុះបញ្ជីនៅលើទីផ្សារកំណើននៃក្រុមហ៊ុនផ្សារមូលបត្រកម្ពុជា ស្របតាមបទប្បញ្ញត្តិជាធរមាន។

ក្រុមហ៊ុននេះ ជាក្រុមហ៊ុនពហុមុខងារផ្នែកវិស្វកម្ម និងសំណង់ ដែលផ្តល់ សេវាកម្ម ដូចជា សេវាគូសប្លង់ សាងសង់ ដំឡើង និងថែទាំ ព្រមទាំងមានផ្គត់ផ្គង់ផលិតផលម៉ាកល្បីៗ ដូចជា Schneider, Franklin France, Daikin, Ginde, LG, Mitsubishi, Kumwell, EVT, Tsurumi Pump, និងខ្សែកាបម៉ាក YAZAKI។

និយ័តករមូលបត្រកម្ពុជា បានឱ្យទៀតថា “ក្រុមហ៊ុន ឌី ប៊ី ឌី អ៊ុនជីនារីង ម.ក. នឹងក្លាយជាក្រុមហ៊ុនទី១ ដែលចុះបញ្ជី លក់មូលបត្រកម្មសិទ្ធិនៅលើទីផ្សារកំណើននៃផ្សារមូលបត្រកម្ពុជា”។

ទីផ្សារកំណើន (Growth Board) គឺជាកន្លែងសម្រាប់ឱ្យអាជីវកម្មធុនតូច-ធុនមធ្យមចុះបញ្ជី លក្ខខណ្ឌក្នុងការចុះបញ្ជីមានតិចជាងទីផ្សារគោល។ ក្រុមហ៊ុនដែលចុះបញ្ជីក្នុងទីកំណើន ភាគច្រើនជាក្រុមហ៊ុនតូចៗ និងមានលំនឹងក្រុមហ៊ុនមធ្យមប៉ុ ន្ដែទទួលបានប្រាក់ចំណេញច្រើន ទន្ទឹមនឹងនោះក៏មានហានិភ័យខ្ពស់ដែរ។

សម្រាប់ភាគលាភ ដែលក្រុមហ៊ុនបង់ទៅឱ្យវិនិយោគិនក៌ច្រើនទៅតាមនឹងដែរ។ ចំពោះវិនិយោគិន ដែលចង់ ទទួលបានភាគលាភច្រើន អាចចូលទៅទីផ្សារកំណើនបានសម្រាប់ធ្វើការវិនិយោគ៕

ដំណឹងល្អៈរដ្ឋាភិបាលបញ្ចប់ការសិក្សាផែនការអភិវឌ្ឍហេដ្ឋារចនាសម្ព័ន្ឋធំៗចំនួន៣

ដោយៈគង់ សូរិយា

ភ្នំពេញៈ រដ្ឋាភិបាលកម្ពុជា ដែលមានក្រសួងសាធារណៈការជាសេនាធិកាបានបញ្ចប់ការសិក្សា លើផែនការមេអភិវឌ្ឍហេដ្ឋារចនាសម្ព័ន្ឋធំៗចំនួន៣រួចហើយ ដែលគំរោងនេះនឹងលើកកំពស់សេដ្ឋកិច្ចសង្គមកម្ពុជា។
ទេសរដ្ឋមន្រ្តីស៊ុន ចាន់ថុលរដ្ឋមន្រ្តីក្រសួងសាធារណៈការ និងដឹកជញ្ជូនបានមានប្រសាសន៍ឲ្យដឹងកាលពីម្សិលម៉ិញនេះថា ផែនការមេសម្រាប់គម្រោងធំៗចំនួន៣បានបញ្ចប់ការសិក្សាជាស្ថាពររួមមាន គម្រោងសិក្សាសាងសង់រថភ្លើង Monorail និងរថភ្លើងក្រោមដី(Subway) ព្រមទាំងគម្រោងផែនការមេភស្តុភារកម្ម។

លោកបន្តថា ក្រសួងសាធារណៈការ បានសហការជាមួយទីភ្នាក់ងារ JICA ដើម្បីបង្កើតគម្រោងកំពង់ផែ Port EDI គម្រោងសាងសង់កំពង់ផែសមុទ្រទឹកជ្រៅ១៤,៥ម៉ែត្រ ត្រៀមនឹងបញ្ចប់ឆ្នាំ២០២៥ គម្រោងពង្រីកកំពង់ផែស្វ័យតក្រុងភ្នំពេញ គម្រោងអភិវឌ្ឍន៍កំពង់ផែទេសចរណ៍នៅកំពត បានរៀបចំយុទ្ធសាស្ត្រ សម្រាប់ការដឹកជញ្ជូនតាមផ្លូវដែក បានពិភាក្សាជាមួយភាគីវៀតណាម ដើម្បីតភ្ជាប់ផ្លូវដែកពីហូជីមិញមកបាវិត-ម៉ុកបៃ។

ក្រៅពីនេះ ក្រសួងក៏បានបញ្ចប់គម្រោងសិក្សាសាងសង់រថភ្លើង Monorail និងរថភ្លើងក្រោមដី (Subway) ដើម្បីកាត់បន្ថយការកកស្ទះចរាចរណ៍ ក្នុងរាជធានីភ្នំពេញ បានបញ្ចប់ផែនការមេភស្តុភារកម្ម ដើម្បីទាក់ទាញវិនិយោគិន និងដើម្បីប្រែក្លាយកម្ពុជាជាកន្លែងស្តុក ទំនិញឆ្លងកាត់ និងជាតំបន់ចែកចាយទំនិញនៅក្នុងតំបន់ បានចុះកិច្ចព្រមព្រៀងជាមួយក្រុមហ៊ុនYCH របស់ប្រទេសសឹង្ហបុរី ដើម្បីបង្កើតមជ្ឈមណ្ឌលភស្តុភារកម្មភ្នំពេញ និងបានបង្កើតផែនការមេសម្រាប់គ្រប់គ្រងទឹកកខ្វក់ ដើម្បីធ្វើឱ្យប្រសើរឡើងសុខមាលភាពសាធារណៈផងដែរ។

គម្រោងអភិវឌ្ឍន៍ហេដ្ឋារចនាសម្ព័ន្ធ ដែលសម្រេចបាន និងកំពុងអនុវត្តន៍បន្ត និងគម្រោងនាពេលអនាគត ទាក់ទងនឹងការសាងសង់ពង្រីក និងលើកកម្ពស់គុណភាពផ្លូវពីផ្លូវពីរស្រទាប់ស្តើង (DBST) ទៅជាផ្លូវបេតុងកៅស៊ូផ្លូវ(AC) ស្របតាមបរិបទនៃការរីកចម្រើនសេដ្ឋកិច្ចជាតិ ក្នុងនោះរួមមាន គម្រោងសាងសង់ ពង្រីក និងលើកកម្ពស់គុណភាពផ្លូវជាតិលេខ១ ផ្លូវជាតិលេខ២ ផ្លូវជាតិលេខ៣ ផ្លូវជាតិលេខ៤ ផ្លូវជាតិលេខ៥ និងបណ្តាញផ្លូវជាតិជាច្រើនទៀត។

ជាមួយគ្នានេះក្រសួងកំពុងសិក្សា លើគម្រោងសាងសង់ ពង្រីក និងលើកកម្ពស់គុណភាពបណ្តាញផ្លូវ ដោយលោកស៊ុន ចាន់ថុលបានលើកឡើងអំពីគម្រោងស្នើសុំបង្កើតគណៈកម្មការគ្រប់គ្រងដីចំណីផ្លូវ គម្រោងសាងសង់ស្ពានក្រចេះ ការទិញបានគ្រឿងចក្រត្រួតពិនិត្យគុណភាពស្ពាន ការងារសុវត្ថិភាពចរាចរណ៍ បានបង្កើតមណ្ឌលសេវា សាធារណៈដើម្បីបង្ខិតសេវាទៅកៀកនឹងប្រជាពលរដ្ឋ ការចេញបណ្ណបើកបរអន្តរជាតិសម្រាប់៩៩ប្រទេស។

លោកបន្តថា យើងបានធ្វើការជាមួយក្រសួងសង្គមកិច្ច ចេញបណ្ណបើកបរជូនជនពិការ តភ្ជាប់ប្រព័ន្ធជាមួយអគ្គនាយកដ្ឋានគយ និងពន្ធដារដើម្បីត្រួតពិនិត្យការក្លែងបន្លំពន្ធនិងងាយស្រួលក្នុងការប្តូរកម្មសិទ្ធិយានយន្ត បានដាក់ឱ្យដំណើរការសាលាបង្រៀនបើកបរធ្ងន់ធ្ងរ បានដាក់ឱ្យដំណើរការប្រព័ន្ធលក់លេខពិសេស និងលេខពិសេស ផ្ទាល់ខ្លួនបានចំនួន៥៧០០ផ្លាក ដែលមានQR Code ទទួលបានថវិកា៤៦ពាន់លានរៀលចូលថវិកាជាតិ ការប្រើប្រាស់បច្ចេកវិទ្យាទំនើប ដើម្បីរឹតបន្តឹងនិងទប់ស្កាត់ការដឹកជញ្ជូនលើសទម្ងន់កម្រិតកំណត់ គម្រោងដាក់ឱ្យដំណើរការកម្មវិធីកាត់បន្ទុកបណ្ណបើកបរ តាមរយៈទូរសព្ទដៃជាដើម៕

លោកស៊ុន ចាន់ថុលៈស្នើភាគីចិនជួយបណ្តុះបណ្តាលធនធានមនុស្សលើជំនាញ សាងសង់ហេដ្ឋារចនាសម្ព័ន្ឋធំៗ

ដោយៈគង់ សូរិយា

ភ្នំពេញៈ លោកទេសរដ្ឋមន្រ្តីស៊ុន ចាន់ថុលរដ្ឋមន្រ្តីក្រសួងសាធារណៈការ និងដឹកជញ្ជូនបានស្នើ់សុំភាគីចិន ជួយផ្តល់សាស្រ្តាចារ្យ និងអ្នកបច្ចេកទេសដើម្បីជួយបណ្តុះបណ្តាលធនធានមនុស្សនៅកម្ពុជា លើការសាងសង់កំពង់ផែ ផ្លូវរថភ្លើងលើនិងក្រោមដី សាងសង់ស្ពានធំៗជាដើម។

ក្នុងកិច្ចប្រជុំតាមរយៈប្រព័ន្ឋZoom ជាមួយលោក Li Xiaopeng រដ្ឋមន្ត្រីដឹកជញ្ជូន នៃសាធារណរដ្ឋប្រជាមានិតចិននាព្រឹកថ្ងៃទី២២ មិថុនានេះ ដោយអង្គប្រជុំបានពិភាក្សាលើការចូលរួមសន្និសីទស្តីពី ការដឹកជញ្ជូនប្រកបដោយចីរភាពជាសាកល នៃអង្គការសហប្រជាជាតិលើកទីពីរ ដែលគ្រោងនឹងប្រព្រឹត្តទៅនៅថ្ងៃទី១៤-១៦ ខែតុលា ឆ្នាំ២០២១ នៅទីក្រុងប៉េកាំង ប្រទេសចិន ការកសាងសមត្ថភាព នៃវិទ្យាស្ថានតេជោ សែន សាធារណការ និងដឹកជញ្ជូន និងការចូលរួមកិច្ចប្រជុំថ្នាក់រដ្ឋមន្ត្រី ដឹកជញ្ជូនអាស៊ាន(ATM) ដែលកម្ពុជាធ្វើជាម្ចាស់ផ្ទះ ដែលនឹងប្រព្រឹត្តទៅដោយផ្ទាល់នៅថ្ងៃទី១១-១២ ខែវិច្ឆិកា ឆ្នាំ២០២១ នៅខេត្តសៀមរាប ប្រទេសកម្ពុជា។

លោកស៊ុន ចាន់ថុល បានជម្រាបជូនអំពីវឌ្ឍនភាពនៃគម្រោងសាង សង់ផ្លូវល្បឿនលឿនភ្នំពេញ ក្រុងព្រះសីហនុ ប្រវែង១៩០គីឡូម៉ែត្រ សម្រេចបាន៥៥,០៥% គិតត្រឹមថ្ងៃ ទី១១ ខែមិថុនា ឆ្នាំ២០២១ និងគ្រោងបញ្ចប់នៅខែកញ្ញា ឆ្នាំ២០២២ មុនការគ្រោងទុករយៈពេល៦ខែ ការសម្ពោធដាក់ឱ្យដំណើរការទីស្តីការក្រសួងសាធារណការ និងដឹកជញ្ជូន និងវិទ្យាស្ថានតេជោសែន សាធារណការ និង ដឹកជញ្ជូន ដែលជាមជ្ឍមណ្ឌលបណ្តុះបណ្តាលវិស្វករកម្ពុជា លើមុខជំនាញបច្ចេកទេសឱ្យចេះសាងសង់ផ្លូវ ស្ពានប្រកបដោយគុណភាពរឹងមាំ។

លោកបានជម្រាបផងដែរអំពីការត្រៀមរៀបចំកិច្ចប្រជុំ ថ្នាក់រដ្ឋមន្ត្រីដឹកជញ្ជូនអាស៊ាន (ATM) ដែលកម្ពុជាធ្វើម្ចាស់ផ្ទះនៅថ្ងៃទី១១-១២ ខែវិច្ឆិកា ឆ្នាំ២០២១ និងបានបន្ថែមថា លោកទេសរដ្ឋមន្ត្រីចង់ឃើញការរៀបចំកិច្ចប្រជុំនេះ ដោយផ្ទាល់នៅខេត្តសៀមរាប ហើយគណៈប្រតិភូ ដែលត្រូវចូល រួមទាំងអស់ តម្រូវឱ្យទទួលការចាក់វ៉ាក់សាំង ដើម្បីបង្ការជំងឺកូវីដ-១៩។

តបតាមការអញ្ជើញពីមិត្តចិន លោកទេសរដ្ឋមន្ត្រី បានយល់ព្រមចូលរួមសន្និសីទស្តីពីការដឹកជញ្ជូន ប្រកបដោយចីរភាពសាកល នៃអង្គការសហប្រជាជាតិលើកទីពីរ ដែលនឹងប្រព្រឹត្តទៅនៅទីក្រុងប៉េកាំង ប្រទេសចិន នៅថ្ងៃទី១៤-១៦ ខែតុលា ឆ្នាំ២០២១ ហើយឯកឧត្តមទេសរដ្ឋមន្ត្រី ក៏បានអញ្ជើញឯកឧត្តម Li Xiaopeng ឱ្យចូលរួមកិច្ចប្រជុំថ្នាក់រដ្ឋមន្ត្រីដឹកជញ្ជូនអាស៊ាន(ATM)ផងដែរ ដើម្បីយកឱកាសនេះមក ទស្សនកិច្ចគម្រោងសាងសង់ផ្លូវល្បឿនលឿនកម្ពុជា ហើយជាការឆ្លើយតបភាគីចិន បានយល់ព្រមតាមការអញ្ជើញនេះ៕

តើស្តង់ដាអាគារពាណិជ្ជកម្ម និងលំនៅដ្ឋានគួរមានលក្ខណៈដូចម្តេចដើម្បីជំរុញការអភិវឌ្ឍដោយចីរភាព

ដោយៈវឌ្ឈនៈ

ភ្នំពេញៈ ការសាងសង់អគារមិនថា តែអគារលំនៅដ្ឋាន ឬអគារពាណិជ្ជកម្មនៅកម្ពុជាមានភាពរីកចម្រើនគួរឱ្យកត់សម្គាល់ នៅក្នុងរយៈពេលប៉ុន្មានឆ្នាំចុងក្រោយនេះ ប៉ុន្តែស្តង់ដាអាគារបៃតង ដែលគិតគូដល់បរិស្ថានហាក់នៅមានកម្រិត។

អ្នកជំនាញនៃវិស័យអចលនទ្រព្យបានលើកឡើងថា ការសាងសង់អគារនៅពេលបច្ចុប្បន្ន គួរផ្ដោតលើស្តង់ដារអន្តរជាតិ ទើបមានទីផ្សារនិងតម្រូវការខ្ពស់ ។ តើស្តង់ដារនិងទីផ្សារដូចម្ដេច ដែលអ្នកអភិវឌ្ឍន៍អគារនីមួយៗ ត្រូវផ្ដោតការយកចិត្តទុកដាក់ មុននឹងសាងសង់។
លោកឡោ វិចិត្រ អនុប្រធានសមាគមអចលនទ្រព្យសកល ប្រចាំរាជធានីភ្នំពេញ បានមានប្រសាសន៍ឲ្យដឹងកាលពីម្សិលម៉ិញនេះថា ការសាងសង់អគារមិនថា តែអគារពាណិជ្ជកម្ម ការិយាល័យឬអគារលំនៅឋាននោះទេ គឺត្រូវតែគិតគូពីស្តង់ដារជាតិ និងអន្តរជាតិ។ ការសាងសង់អគារគឺត្រូវគិតមុនថា តើអគារនោះជាអគារលំនៅឋាន ឬអគារការិយាល័យ ឬអាគារពាណិជ្ជកម្មដទៃទៀត។

លោកបន្តថា “បើសិនជាអគារលំនៅឋានបែបខុនដូ គឺត្រូវមានស្តង់ដារបៃតង និងត្រូវមានវេរ៉ង់ដារនៅតាមបន្ទប់នីមួយៗ។ បើសិនជាគ្មានវេរ៉ង់ដាទេ យើងសាកស្រម៉ៃមើលបើសិនជាមានហានិភ័យអ្វីមួយកើតឡើង ដូចជាគ្រោះអគ្គីភ័យជាដើម តើនឹងមានអ្វីកើតឡើងចំពោះអ្នកស្នាក់នៅក្នុងអគារនោះ”។ លោកបន្តថា “សម្រាប់អគារការិយាល័យវិញ ក៏ត្រូវគិតគូច្បាស់លាស់ផងដែរ ដូចជា ពិដានត្រូវតែខ្ពស់ជាងអគារស្នាក់នៅ ហើយបន្ទប់ទឹកនៅជាន់នីមួយៗ នៃអគារការិយាល័យក៏ត្រូវតែច្រើនជាងអគារស្នាក់នៅដែរ”។

លោកឡោ វិចិត្របានបន្ថែមថា សម្រាប់អគារការិយាល័យ ក៏ត្រូវតែគិតគូត្រង់ចំនុចច្រកចេញចូលផងដែរថា តើអនុលោមទៅតាមស្តង់ដារដែរឬទេ។ អ្វីដែលត្រូវយកចិត្តទុកដាក់បំផុតនោះគឺកន្លែងសាធារណៈ( Public Area )ថា តើស្របតាមស្តង់ដារជាតិនិងអន្តរជាតិដែរទេ ពីព្រោះម្ចាស់ក្រុមហ៊ុនខ្មែរជាច្រើន នៅមិនទាន់ពេញនិយមក្នុងការទិញឬជួលការិយាល័យអគារខ្ពស់ៗទេ។ ភាគច្រើនអគារិយាល័យបែបនេះ គឺមានតម្រូវការជួលពីសំណាក់ក្រុមហ៊ុនអន្តរជាតិ។

លោកបន្តថា “ដូច្នេះបើសិនជាអគារនោះ មិនមានស្ដង់ដារអន្តរជាតិទេ នឹងគ្មានអ្នកជួលឬអ្នកទិញឡើយ។ សរុបសេចក្តីទៅអគារនីមួយៗ ត្រូវមានលក្ខណៈខុសៗគ្នាស្របទៅតាមស្តង់ដារនីមួយៗទើបទទួលបានជោគជ័យ”។

លោកសំ សុខនឿនអ្នកជំនាញវិស័យអចលនទ្រព្យ ក៏បានលើកឡើងផងដែរថា ការអភិវឌ្ឍអគារនីមួយៗមិនថាអគារស្នាក់នៅ អគារការិយាល័យ អ្វីដែលត្រូវគិតគូរផងដែរនោះ គឺចំណតយានយន្តគ្រប់គ្រាន់ ទើបមិនធ្វើឱ្យអ្នកទទួលសេវាពីអគារនោះ មិនធុញទ្រាន់ នឹងការស្វែងរកកន្លែងចតយានយន្តរបស់ខ្លួន ឬត្រូវចតតាមផ្លូវជាដើម។
លោកបន្តថា “អ្វីដែលអ្នកអភិវឌ្ឍន៍អគារត្រូវគិត

គូរផងដែរនោះ គឺការសម្លឹងមើលពីទីផ្សារ និងតម្រូវការរបស់អតិថិជននៅពេលបច្ចុប្បន្ននេះ តើអតិថិជនប្រភេទណាដែលកំពុងមានតម្រូវការខ្ពស់ទៅលើការប្រើប្រាស់អគារ”៕

រដ្ឋាភិបាលចិនចាប់សាកល្បងឱ្យក្រុមហ៊ុនអចលនទ្រព្យចូលផ្សារហ៊ុនដើម្បីកាត់បន្ថយបន្ទុកហិរញ្ញវត្ថុរដ្ឋ

ដោយៈ គៀតឈូ

សៀងហៃៈ គម្រោងសាកល្បងរបស់ប្រទេសចិន ក្នុងការប្រើទីផ្សារភាគហ៊ុនដ៏ធំមហិមារបស់ខ្លួន ដើម្បីជួយផ្តល់មូលនិធិដល់ការអភិវឌ្ឍហេដ្ឋារចនាសម្ព័ន្ធ និងបន្ធូរបន្ថយបន្ទុកបំណុលដល់រដ្ឋាភិបាលក្នុងតំបន់ កំពុងមានការចាប់ផ្តើមល្អ។ នេះបើយោងតាមការចេញរបស់សារព័ត៌មាន The Edge Market នៅថ្ងៃទី២២ ខែមិថុនា ឆ្នាំ២០២១។

ក្រុមហ៊ុនវិនិយោគលើវិស័យអចលនទ្រព្យចំនួនប្រាំបួន (REITs) ដែលគាំទ្រដោយវិស័យហេដ្ឋារចនាសម្ព័ន្ធបានចាប់ផ្តើមប្រតិបត្តិការដំបូង នៅក្នុងទីផ្សារភាគហ៊ុនធំលំដាប់ទី២ នៅលើពិភពលោកកាលពីថ្ងៃចន្ទ។ ភាគហ៊ុន ដែលបានទិញលក់ជាសាធារណៈ បានកើនឡើងនៅទូទាំងផ្សារហ៊ុន ដោយកើនឡើងជិត១៥ភាគរយក្នុងមួយក្រុមហ៊ុន REIT ដែលផ្តោតលើការវិនិយោគសួនឧស្សាហកម្មមួយនៅភាគខាងត្បូងនៃទីក្រុង Shenzhen។

ក្រុមហ៊ុនវិនិយោគលើឃ្លាំងកំពង់ផែក្នុងខេត្តក្វាងទុង និងផ្លូវហាយវេក្នុងខេត្តស៊ីជាំង (Zhejiang) បានកើនឡើងចន្លោះពី០,៧ភាគរយទៅ១០ភាគរយ ខណៈសន្ទស្សន៍ហ៊ុនCSI 300 បានបញ្ចប់ការជួញដូរភាគហ៊ុន ដោយបានធ្លាក់ចុះ០,២ភាគរយ ពីកាលពីម្សិលមិញ។

ការចុះបញ្ជីរបស់ក្រុមហ៊ុនថ្មី បង្ហាញពីការចាប់ផ្តើមនៃការពិសោធន៍មួយ ដែលនឹងជំរុញឱ្យទីក្រុងប៉េកាំងអាចទាញយកផលចំណេញពីវិស័យឯកជន និងថវិកាគ្រួសារ ដើម្បីជួយដល់ការស្តារសេដ្ឋកិច្ចឡើងវិញ ដោយមិនចាំបាច់បន្ថែមលើគំនរបំណុលរបស់ប្រទេសនេះ។ ប្រសិនបើទទួលបានជោគជ័យ កម្មវិធីដែលបានពង្រីកនេះ នឹងអាចជួយកាត់បន្ថយភាពតានតឹងផ្នែកសារពើពន្ធដ៏ធំ ដែលប្រឈមមុខ ដោយរដ្ឋាភិបាលក្នុងតំបន់របស់ប្រទេសចិន ដែលជាបន្ទុកបង្កការគំរាមកំហែងរយៈពេលវែងដល់ស្ថេរភាពហិរញ្ញវត្ថុរបស់ប្រទេស។

លោក Fu Lichun សហស្ថាបនិកនៃក្រុមហ៊ុនគ្រប់គ្រងវិនិយោគ Shenzhen Yuntai បានមានប្រសាសន៍ថា “វាពិតជាជួយបន្ធូរសម្ពាធខ្លះៗពីរដ្ឋាភិបាលក្នុងតំបន់ ព្រោះការធានានូវការអភិវឌ្ឍន៍ហេដ្ឋារចនាសម្ព័ន្ធដ៏ធំធេងរបស់ចិននឹងជួយធ្វើឱ្យប្រសើរឡើងនូវតារាងតុល្យភាពហិរញ្ញវត្ថុ។ ការគាំទ្រ ដែលក្រុមហ៊ុនREIT ទទួលបានពីវិនិយោគិន បង្ហាញថា មានសក្តានុពលច្រើនសម្រាប់ផលិតផលបែបនេះ។

ក្រុមហ៊ុន REITs ដែលត្រូវបានយកគំរូតាមមូលនិធិសង្គហធន ជួយឱ្យវិនិយោគិនម្នាក់ៗ ទទួលបានការវិនិយោគទំហំធំ ដោយជាធម្មតាគម្រោងអចលនទ្រព្យ រួមទាំងផ្សារទំនើប និងការិយាល័យ។ ក្រៅពីការលក់បំណុល រដ្ឋាភិបាលមូលដ្ឋានជាច្រើន បានលក់ដីដើម្បីប្រមូលទុនសម្រាប់សាងសង់ផ្លូវថ្នល់ ស្ពាន និងផ្លូវទឹក៕

1...1,8741,8751,876...3,263 Page 1,875 of 3,263