ដោយៈ ម៉ាណេត

ភ្នំពេញៈ រដ្ឋាភិបាលសម្រេចដាក់ឱ្យប្រើប្រាស់ប្លង់គោលប្រើប្រាស់ដីគម្រោងអភិវឌ្ឍន៍ក្រុងបូកគោ ដើម្បីឆ្លើយតបទៅនឹងកំណើនប្រជាសាស្ត្រ តម្រូវការក្នុងការប្រើប្រាស់ដី ការអភិវឌ្ឍលំនៅឋាន និងការអភិវឌ្ឍគ្រប់កម្រិតក្នុងពេលបច្ចុប្បន្ន និងទៅអនាគតក្នុងតំបន់ប្រវត្តិសាស្ត្រមួយនេះ។ នេះបើយោងតាមអនុក្រឹត្យស្តីពីការដាក់ឱ្យប្រើប្រាស់ប្លង់គោលប្រើប្រាស់ដីគម្រោងអភិវឌ្ឍន៍ក្រុងបូកគោ ចេញផ្សាយនៅថ្ងៃទី១៦ ខែមិថុនា ឆ្នាំ២០២១។

ដោយពិនិត្យទៅលើសក្តានុពល ក៍ដូចជាប្រវត្តិសាស្ត្រ ក្រុមការងារបច្ចេកទេសនៃក្រសួងរៀបចំដែនដី នគរូបនីយកម្ម និងសំណង់ បានចុះធ្វើការសិក្សាស្រាវជ្រាវក្នុងភូមិសាស្ត្រឧទ្យានជាតិព្រះមុនីវង្ស “បូកគោ” ឃើញថា ទីតាំងនេះជាអតីតទីក្រុងប្រវត្តិសាស្ត្រនៅឆ្នាំ ១៩២៥-១៩៦២ ដ៍មានសក្ដានុពល ដែលមានអាកាសធាត់ ត្រជាក់ល្អបរិសុទ្ធ ទេសភាពធម្មជាតិតំបន់ភ្នំ-សមុទ្រដ៏ពិសិដ្ឋគ្មានពីរនៃព្រះរាជាណាចក្រកម្ពុជា និងជាគោលដៅទេសចរណ៍ប្រណីតកម្រិតខ្ពស់ និងមានហេដ្ឋារចនាសម្ព័ន្ធជាទីក្រុងរដ្ឋបាល ដែលបានបន្សល់ទុករហូតមកដល់បច្ចុប្បន្ន ដូចជាអគាររដ្ឋបាល ព្រះរាជដំណាក់ លំនៅឋាន អគារសេវាកម្ម សាលាក្រុង ប្រៃសណីយ៍ អគារសុរិយោដី សាលារៀន វត្តអារាម ព្រះវិហារកាតូលិក គិលានដ្ឋាន ប៉ុស្តិ៍នគរបាល ទីបញ្ជាការយោធា សណ្ឋាគារ ស្ថានីយទឹកស្អាត ស្ថានីយ អគ្គិសនី ទំនប់ទឹកបារាំង។ល។

ផ្អែកតាមរបកគំហើញនៃការសិក្សាស្រាវជ្រាវនេះ ក្រសួងរៀបចំដែនដី នគរូបនីយកម្ម និងសំណង់ ដែលមានអគ្គលេខាធិការដ្ឋាននៃគណៈកម្មាធិការរៀបចំដែនដីនិងនគរូបនីយកម្មថ្នាក់ជាតិជាសេនាធិការ បានផ្តួចផ្តើម សិក្សា និងរៀបចំប្លង់គោលប្រើប្រាស់ដីគម្រោងអភិវឌ្ឍក្រុងបូកគោ មានទីតាំងស្ថិតក្នុងឧទ្យានជាតិព្រះមុនីវង្ស “បូកគោ” នៃភូមិសាស្ត្រខេត្តកំពត ខេត្តព្រះសីហនុ និងខេត្តកំពង់ស្ពឺ មានផ្ទៃក្រឡាប្រមាណ ២៧ ៩៤៣ ហិកតា ស្មើនឹង១៨,០៩% នៃផ្ទៃឧទ្យានជាតិព្រះមុនីវង្ស “បូកគោ” ទំហំ១៥៤ ៥៤២ហិកតា អនុលោមតាមព្រះរាជក្រឹត្យ ចុះថ្ងៃទី១ ខែវិច្ឆិកា ឆ្នាំ១៩៩៣ ស្តីពីការកំណត់តំបន់ការពារធម្មជាតិ និងអនុក្រឹត្យ លេខ ១៧១ អនក្រ.បក ចុះ ថ្ងៃទី២៨ ខែធ្នូ ឆ្នាំ២០១០ ស្តីពីការកំណត់តំបន់ឧទ្យានជាតិព្រះមុនីវង្ស”បូកគោ” និងឧទ្យានជាតិព្រះសុរាម្រិតកុសុមៈ “គិរីរម្យ” ក្នុងគោលដៅធានាការគ្រប់គ្រង និងអភិវឌ្ឍន៍ក្រុងបូកគោប្រកបដោយចីរភាព។

ប្លង់គោលប្រើប្រាស់ដីនេះត្រូវបានកសាងឡើង ដោយការសិក្សាច្បាស់លាស់លើកត្តាប្រវត្តិសាស្ត្រ ភូមិសាស្ត្រ សេដ្ឋកិច្ច សង្គមកិច្ច បរិស្ថាន ទេសចរណ៍ និងវប្បធម៌ ព្រមទាំងគោលនយោបាយ ច្បាប់ និងលិខិតបទដ្ឋានគតិយុត្ត សំខាន់ៗមួយចំនួនពាក់ព័ន្ធនឹងការរៀបចំដែនដី និងនគរូបនីយកម្មនៅថ្នាក់ជាតិ និងថ្នាក់ក្រោមជាតិ ដូចជា ច្បាប់ ភូមិបាល ច្បាប់ស្តីពីការរៀបចំទឹកដី នគរូបនីយកម្ម និងសំណង់ ច្បាប់ស្ដីពីកិច្ចការពារបរិស្ថាននិងធនធានធម្មជាតិ ច្បាប់ស្តីពីតំបន់ការពារធម្មជាតិ ច្បាប់ស្តីពីកិច្ចការពារបេតិកភណ្ឌវប្បធម៌ ច្បាប់ស្តីពីទេសចរណ៍ ច្បាប់ស្ដីពីព្រៃឈើ ច្បាប់ស្តីពីជលផល ច្បាប់ស្តីពីផ្លូវថ្នល់ ច្បាប់ស្តីពីការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ ព្រះរាជក្រឹត្យ ចុះថ្ងៃទី១ ខែវិច្ឆិកា ឆ្នាំ១៩៩៣ ស្តីពីការកំណត់តំបន់ការពារធម្មជាតិ អនុក្រឹត្យស្តីពីការកំណត់តំបន់ឧទ្យានជាតិព្រះមុនីវង្ស ”បូកគោ” និងឧទ្យានជាតិព្រះសុរាម្រិតកុសុមៈ “គិរីរម្យ” អនុក្រឹត្យស្តីពីការបង្កើតគណៈកម្មាធិការរៀបចំដែនដី និងនគរូបនីយកម្មថ្នាក់រាជធានី ខេត្ត ក្រុង ស្រុក ខណ្ឌ អនុក្រឹត្យស្តីពីលិខិតអនុញ្ញាតសាងសង់ និងអនុក្រឹត្យស្តីពី នគរូបនីយកម្មរាជធានី ក្រុង និងទីប្រជុំជនជាដើម។

ចក្ខុវិស័យនៃប្លង់គោលប្រើប្រាស់ដីគម្រោងអភិវឌ្ឍក្រុងបូកគោនេះ ត្រូវបានរៀបចំឡើងដោយមានលក្ខណៈ ទូលំទួលាយគ្របដណ្តប់ទាំងទិដ្ឋភាពគតិយុត្ត និងបច្ចេកទេស សម្រាប់ធ្វើការសម្របសម្រួលរវាងវិស័យនានាដែល ជាកម្លាំងចលករសេដ្ឋកិច្ច សំដៅធ្វើការតម្រង់ទិសការអភិវឌ្ឍប្រកបដោយចីរភាព ឆ្លើយតបទៅនឹងកំណើនប្រជាសាស្ត្រ តម្រូវការក្នុងការប្រើប្រាស់ដី ការអភិវឌ្ឍលំនៅឋាន និងការអភិវឌ្ឍគ្រប់កម្រិតក្នុងពេលបច្ចុប្បន្ននិងទៅអនាគត ដោយធានាបាននូវការការពារធនធានដី ធនធានក្រោមដី ប្រព័ន្ធអេកូឡូស៊ី បរិស្ថាន និងធនធានធម្មជាតិ ជាពិសេសអភិរក្សតំបន់ទីក្រុងប្រវត្តិសាស្ត្រ។

ខេត្តកំពតស្ថិតនៅទិសនិរតីក្នុងតំបន់ឆ្នេរសមុទ្រនៃព្រះរាជាណាចក្រកម្ពុជា ដែលមានរមណីយដ្ឋានឋានសួគ៌ បូកគោ និងជាសមាជិកក្លឹបឆ្នេរសមុទ្រ ដែលស្អាតបំផុតលើសកលលោក ជាគោលដៅទេសចរណ៍វប្បធម៌ និងធម្មជាតិល្អឯកពេញនិយមបំផុតនៅព្រះរាជាណាចក្រកម្ពុជា។ ខេត្តនេះមានព្រំប្រទល់ជាប់នឹងសមុទ្រខេត្តព្រះសីហនុ ខេត្ត កំពង់ស្ពឺ ខេត្តតាកែវ ខេត្តកែប និងប្រទេសវៀតណាម។

សក្តានុពលធនធានធម្មជាតិជាច្រើន ដូចជា ព្រៃភ្នំ សត្វព្រៃ ទឹកធ្លាក់ កោះ សត្វសមុទ្រ ស្មៅសមុទ្រ ផ្កាថ្ម ព្រៃកោងកាង ឆ្នេរខ្សាច់ ស្រែអំបិល រ៉ែថ្មកំបោរ ដីកសិកម្ម និងមានសក្តានុពលទេសចរណ៍ធម្មជាតិជាច្រើនមាន ដូចជាសំណង់បេតិកភណ្ឌក្រុងកំពត រមណីយដ្ឋានទេសចរណ៍ធម្មជាតិឋានសួគ៌បូកគោ ល្អាងភ្នំកំពង់ត្រាច ព្រែកត្នោត ភ្នំសិដាអោន ទឹកឈូ ប្រាសាទភ្នំឈ្ងោក សួនសត្វទឹកឈូ ទឹកធ្លាក់ បីថ្នាក់ ទំនប់ប្រទាក់ក្រឡា ទំនប់ម្លិច និងរមណីយដ្ឋានភ្នំដូង សហគមន៍ទេសចរណ៍ព្រែកត្នោត ត្រពាំងសង្កែ កែបថ្មី សហគមន៍ទេសចណ៍លក និងតំបន់កម្សាន្តឆ្នេរសមុទ្រព្រែកអំពិល។ សក្តានុពលទេសចរណ៍ទាំងអស់នេះបានធ្វើឲ្យខេត្តកំពតមានការអភិវឌ្ឍរីកចម្រើនយ៉ាងឆាប់រហ័សស្ទើរគ្រប់វិស័យ ដូចជា វិស័យសំណង់ កសិកម្ម ឧស្សាហកម្ម សិប្បកម្ម រ៉ែ ថាមពល សេដ្ឋកិច្ច ទេសចរណ៍ សេវាកម្ម និងហេដ្ឋារចនាសម្ព័ន្ធជាច្រើនទៀត៕

ដោយៈលក្ខិណា

ភ្នំពេញៈ ប្រជាជនកម្ពុជាជាជនជាតិ ដែលនិយមទទួលទានត្រីច្រើនជាងគេ ហើយទទួលទានត្រីច្រើនជាងសាច់សត្វដទៃទៀត ជាក់ស្ដែងបើតាមការសិក្សាប្រជាជនកម្ពុជាជាង១៥លាននាក់ ត្រូវការតម្រូវការត្រីសរុបជាង៨០ម៉ឹនតោនក្នុងមួយឆ្នាំៗ។

យោងតាមសេចក្តីប្រកាសព័ត៌មាន របស់ក្រសួងកសិកម្មរុក្ខាប្រមាញ់ និងនេសាទចេញផ្សាយថ្ងៃទី១៥ មិថុនា ២០២១នេះ បានឱ្យដឹងថា តាមការស្រាវជ្រាវប្រជាជនកម្ពុជាជាអ្នក ដែលចូលចិត្តបរិភោគត្រីហើយក្នុងមួយឆ្នាំៗ ប្រជាជនកម្ពុជាបរិភោគត្រីច្រើនជាងការបរិភោគសាច់សត្វដទៃទៀត។

ការស្រាវជ្រាវបានឱ្យដឹងថា ប្រជាជនកម្ពុជាម្នាក់បរិភោគត្រី ប្រមាណ៥២,៤គីឡូ​ក្រាមក្នុងមួយឆ្នាំ តែសម្រាប់ប្រជាជនរស់នៅតំបន់ទំនាបលិចទឹកវិញ បរិមាណនៃការបរិភោគត្រី បានកើនឡើងដល់ទៅប្រមាណ​៧៥,៦គីឡូក្រាម ក្នុងមួយឆ្នាំក្នុងមនុស្សម្នាក់ ។

ក្រសួងកសិកម្ម រុក្ខាប្រមាញ់ និងនេសាទថា ធនធានមនុស្សពាក់ព័ន្ធនឹងការងារវាវប្បកម្ម មានសមត្ថភាពគ្រប់គ្រាន់។ មន្ត្រីជំនាញ វារីវប្បកម្មត្រូវបានទទួលស្គាល់បណ្ដុះបណ្ដាលក្នុង​ និងក្រៅប្រទេស និងបានយកចំណេះជំនាញនេះ ទៅបណ្ដុះបណ្ដាលដល់កសិករឱ្យចេះចិញ្ចឹមត្រី នៅស្ទើរតែគ្រប់រាជធានី ខេត្តដែលមានសក្ដានុពលផលិត ។

ទោះជាយ៉ាងនេះក្ដី យើងទទួលស្គាល់ថា មូលហេតុចម្បងនៃតម្រូវការ និងការផ្គត់ផ្គង់ត្រីនៅកម្ពុជា នៅតែបន្តជួបបញ្ហាប្រឈម មិនទាន់ដោះស្រាយបាននៅឡើយ ដោយ​សារតែ ការថមថយផលត្រីពីធម្មជាតិ មានបដិបក្ខក្នុងការគ្រប់គ្រងទីផ្សារត្រី នៅកម្ពុជា ការប្រកួតប្រជែងទីផ្សារក្នុងស្រុក យន្តការត្រួតពិនិត្យនៃការនាំចូល មានភាពស្មុគស្មាញ ទាំងបរិមាណគុណភាព និងកាតព្វកិច្ច នានាសម្រាប់អ្នកនាំចូលនិងមានសមត្ថកិច្ចទទួលខុសត្រូវច្រើន។

បញ្ហាប្រឈមមួយទៀតនោះ គឺការវិនិយោគពីវិស៧យឯកជន លើការធ្វើវារីវប្បកម្មនៅខ្វះទុន និងខ្វះចំណេះដឹង ក្នុងការសិក្សាពីតម្រូវការទីផ្សារក្នុង និងក្រៅប្រទេសគួបផ្សំជាមួតម្លៃ នៃការដឹកជញ្ជូនក្នងុស្រុកនិងការនាំចេញ តម្លៃសេវាក្នុងការផលិតកែច្នៃនិងស្តុកនៅមានតម្លៃ ។

សេចក្តីប្រកាសព័ត៌មានដដែលបានឲ្យដឹងថា ដោយសារតែតម្រូវការកើនឡើងធ្វើឱ្យការផ្គត់ផ្គង់ក្នុងស្រុក មិនទាន់ឆ្លើយតបបានគ្រប់គ្រាន់ ដែលធ្វើឱ្យការនាំចូលត្រីពីប្រទេ​សជិតខាងនៅតែបន្ត ។ យ៉ាងណាក្ដី រាជរដ្ឋាភិបាលកម្ពុជាបានលើកទឹកចិត្តប្រកបដោយភាពកក់ក្ដៅ ដើម្បីអនុវត្តគម្រោងវារីវប្បកម្ម ពិសេសការចិញ្ចឹមត្រូវអណ្ដែង និងកង្កែបក្នុងតង់ប្លាស្ទិក ដោយប្រើរយៈពេលខ្លី ចំណាយដើមទុនតិច និងទទួលបានប្រាក់ចំណូលខ្ពស់ នៅតាមខេត្តគោលដៅចំនួន១១ និងខេត្តទទួលរងគ្រោះជំនន់ទឹកភ្លៀង ចំនួន៤នាពេលកន្លងមក៕

ដោយៈ ប៊ី

ភ្នំពេញៈ ក្រុមហ៊ុនMC Payment បានឱ្យដឹងនៅថ្ងៃទី១៦ ខែមិថុនានេះថា ខ្លួនមិនអាច “យល់ព្រម” ជាមួយនឹងការស្នើសុំរបស់ម្ចាស់ភាគហ៊ុន លោកChing Chiat Kwong ដែលថា លទ្ធផលហិរញ្ញវត្ថុមិនល្អរបស់ក្រុមហ៊ុន ជារឿងចាំបាច់សម្រាប់លោក Ching ដើម្បីការពារការវិនិយោគរបស់លោក ដោយស្នើសុំឱ្យរៀចំក្រុមប្រឹក្សាភិបាលឡើងវិញ។

លោក Ching ដែលជានាយកប្រតិបត្តិក្រុមហ៊ុន Oxley Holdings ដែលមានវិនិយោគនៅកម្ពុជា គ្រោងបន្ថែមនាយក(director)ចំនួន៥រូប ទៅក្នុងក្រុមប្រឹក្សាភិបាលរបស់ក្រុមហ៊ុន MC Payment រួមទាំងរូបលោកផងដែរ។
ក្រុមហ៊ុន MC Payment បានឱ្យដឹងថា ដំណោះស្រាយសម្រាប់បញ្ហានេះ នឹងត្រូវយកទៅបោះឆ្នោតនៅឯកិច្ចប្រជុំវិសាមញ្ញ ដែលមានការចូលរួមពីសមាជិកក្រុមហ៊ុន និងម្ចាស់ភាគហ៊ុន (EGM) មួយ នៅថ្ងៃទី៣០ ខែមិថុនា។
លោក Ching បានស្នើសុំដកប្រធានក្រុមប្រឹក្សាភិបាលទាំងអស់ ដោយរក្សាទុកសមាជិកមួយក្រុម។

ក្រុមហ៊ុនបាននិយាយថា ដំណោះស្រាយសម្រាប់បញ្ហានេះ នឹងត្រូវពន្យារពេលទៅកិច្ចប្រជុំវិសាមញ្ញផ្សេងទៀត។
នៅក្នុងកិច្ចប្រជុំរបស់ខ្លួនកាលពីថ្ងៃពុធ ក្រុមហ៊ុន MC Payment បាននិយាយថា សេចក្តីជូនដំណឹងដំបូងរបស់លោក Ching “បានលើកឡើងថា ក្រុមហ៊ុនមានដំណើរការមិនបានល្អ” ហើយថា “ប្រសិនបើគ្មានការគាំទ្រ ផ្នែកហិរញ្ញវត្ថុរបស់លោកទេ ក្រុមហ៊ុននឹងមិនអាចបន្តដំណើរ”បានទេ។

ដោយមានការជំទាស់អំពីរឿងនេះ ថ្នាក់ដឹកនាំក្រុមហ៊ុនMC Payment បាននិយាយថា ការលក់ភាគហ៊ុន (RTO) នៃក្រុមហ៊ុន Artivision Technologies បានផ្តល់អត្ថប្រយោជន៍ដល់លោក Ching។ ជាមួយនឹងការចាក់បញ្ចូលទុនរបស់ក្រុមហ៊ុន MC Payment ទៅក្នុងក្រុមហ៊ុន Artivision ប្រាក់កម្ចីដែលលោក Ching បានផ្តល់ឱ្យក្រុមហ៊ុន Artivision អាចទូទាត់សងវិញបាន។

លើសពីនេះទៀត តាមរយៈការលក់ភាគហ៊ុន និងកិច្ចព្រមព្រៀងដែលពាក់ព័ន្ធ លោក Ching បានចរចាលក្ខខណ្ឌទូទាត់ប្រាក់ចំនួន២១,៩លានដុល្លារ គិតត្រឹមថ្ងៃទី១១ ខែមិថុនា ដែលជាកាលបរិច្ឆេទអនុវត្តចុងក្រោយ។

ក្រុមហ៊ុនក៏បានកត់សម្គាល់ផងដែរថា ចាប់តាំងពីការប្រជុំទូទៅប្រចាំឆ្នាំ នៅថ្ងៃទី២៨ ខែមេសាកន្លងទៅ លោកShawn Ching ដែលកូនប្រុសរបស់លោកChing និងនាយកម្នាក់ទៀត ដែលជាប់ទាក់ទងនឹងលោក Ching មិនត្រូវបានបោះឆ្នោតជាថ្មីទេ អ្នកគ្រប់គ្រងបច្ចុប្បន្ន ត្រូវបានកំណត់ពេលវេលា និងឱកាស ដើម្បីដំណើរការ និងជំរុញអាជីវកម្មបច្ចេកវិទ្យាហិរញ្ញវត្ថុរបស់ខ្លួន។

ក្រុមហ៊ុន MC Payment បាននិយាយថា ខ្លួនបានបើកកិច្ចពិភាក្សាជាមួយលោក Ching ពីថ្ងៃទី៤ ដល់ថ្ងៃទី២៨ ខែឧសភា ក្នុងគោលបំណង ដើម្បីឈានទៅរកដំណោះស្រាយប្រកបដោយប្រសិទ្ធភាព ប៉ុន្តែការពិភាក្សាទាំងនេះណាមួយ គ្មានដំណោះស្រាយនោះទេ។

លោក Ching កាន់ភាគហ៊ុន២៧,០៦% នៅក្នុងក្រុមហ៊ុន MC Payment គិតត្រឹមថ្ងៃទី២៩ ខែមេសា ឆ្នាំ២០២១។ លោកកំពុងព្យាយាមតែងតាំងកូនប្រុសរបស់គាត់ឈ្មោះ Harry Ng លោក Rothschild Chee និងលោក Tan Chee Keong ទៅក្នុងក្រុមប្រឹក្សាភិបាលរបស់ក្រុមហ៊ុន MC Payment ។

ក្រុមហ៊ុននឹងបើកកិច្ចប្រជុំលើកទី២ ជាមួយម្ចាស់ភាគហ៊ុននៅ ឬមុនថ្ងៃទី២៣ ខែមិថុនា ដែលនឹងផ្សព្វផ្សាយព័ត៌មាន និងឯកសារបន្ថែមទៀត ដែលតែងតាំងនាយកដែលត្រូវបានស្នើឡើង និងរាយការណ៍ស្តីពីភាពសស័ក្តិសមរបស់នាយក ដែលស្នើឡើងដោយក្រុមប្រឹក្សាភិបាល ហើយឆ្លើយតបទៅនឹងការចោទ ប្រកាន់របស់លោក Ching៕ ប្រភពៈ The Straits Times៕