ដោយៈ ប៊ី

ភ្នំពេញៈ បើទោះបីប្រទេសកម្ពុជាបានជួបប្រទះនឹងជំងឺកូវីដ១៩ វិស័យអចលនទ្រព្យកម្ពុជានឹងអាចនៅតែបន្តភាពរឹងមាំបានដដែល បើសិនណាវិស័យធនាគារនៅតែងអាចបន្តផ្តល់ប្រាក់កម្ចីបាន ស្របពេលម្រោងសាងសង់ធំៗមួយចំនួនគឺនៅតែបន្តអភិវឌ្ឍន៍ធម្មតា។ លោកច្រឹក សុខនីមប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា។

លោកច្រឹក សុខនីមបានលើកឡើងដូច្នេះ ក្នុងឱកាសអញ្ជើញជាវាគ្មិនក្នុងសន្និសីទសារព័ត៌មានស្តីពី «វិស័យអចលនទ្រព្យ និងសំណង់ក្នុងបរិការណ៍ដែលហុំព័ទ្ធដោយជំងឺកូវីដ១៩» កាលពីថ្មីៗនេះ តាមរយៈZoom និងដោយមានការចូលរួមពីវាគ្មិន លោកបណ្ឌិត តាន់មុនីវណ្ណ ទីប្រឹក្សាសមាគមអភិវឌ្ឍន៍ លំនៅស្ថានកម្ពុជា, លោកបណ្ឌិតគី សេរីវឌ្ឍន៍អ្នកជំនាញសេដ្ឋកិច្ច រួមទាំងអ្នកសារព័ត៌មានជាច្រើនរូបផងដែរ។

លោកបានថ្លែងថា សម្រាប់វិស័យអចលនទ្រព្យនៅកម្ពុជា ក្នុងឆ្នាំ២០២១នេះមានការធ្លាក់ចុះ តែក៏ជាឱកាសមួយដល់អ្នកវិនិយោគិនក្នុងការដើរទិញអចនទ្រព្យទុក ព្រោះពេលនេះគឺអាចទិញបានក្នុងតម្លៃធូរថ្លៃ ហើយបន្ទាប់ពីស្ថានភាពបានប្រើសើរវិញនោះ នឹងអាចលក់ចេញក្នុងតម្លៃខ្ពស់ផងដែរ។

លោកបានឱ្យដឹងទៀតថា ថាទោះបីជា ប្រទេសកម្ពុជាបានប្រឈមនឹងជំងឺកូវីដ១៩ តែគម្រោងសាងសង់ធំៗ គឺនៅតែបន្តអភិវឌ្ឍន៍ធម្មតា។

លោកបានបន្តថា បើតាមការសិក្សាទៅលើវិស័យអចលនទ្រព្យនៅលើប្រទេសជឿនលឿន ភាគច្រើន១០ឆ្នាំម្តងនឹងរងនូវផលប៉ះពាល់ម្តង ដូចនេះហើយពេលដែលរងផលប៉ះពាល់នេះហើយ គឺជាឱកាសសម្រាប់អ្នកមានលទ្ធភាពបានដើរទិញទុក ហើយនៅពេលដែលបានធូរស្បើយ ជាឱកាសដែលគេលក់ចេញដើម្បីទទួលបានផលចំណេញ ដែលនេះគឺជាឱកាសមួយនៅក្នុងបញ្ហាផងដែរ។

ដោយឡែក លោកបណ្ឌិតគី សេរីវឌ្ឍន៍បានលើកឡើងដែរថា ទំហំពាណិជ្ជកម្មអន្តរជាតិរបស់កម្ពុជា នៅដើមឆ្នាំ២០២១នេះ គឺមានការកើនឡើងច្រើនជាងឆ្នាំ២០២០ ខណៈដែល ឆ្នាំ២០២០ ប្រទេសកម្ពុជាបានជួបនឹងវិបត្តិ EBA ដែលបានធ្វើឱ្យអារម្មណ៍របស់អ្នកប្រើប្រាស់ទទួលរងសំពាធនៃ EBAនេះ និងទី២គឺបញ្ហាកង្វះនៃវត្ថុធាតុដើមពីប្រទេសចិន សម្រាប់ផ្គត់ផ្គង់លើវិស័យកាត់ដេរ ដោយសារប្រទេសចិនផ្ទុះឡើងនៃជំងឺកូវីដ១៩។

លោកបានបន្ថែមថា សម្រាប់ឆ្នាំ២០២១នេះ ពិភពលោកគឺបានរៀនរស់នៅជាមួយនឹងជំងឺកូវីដ១៩ ក្នុងនោះប្រទេសកម្ពុជា ក៏បានរៀនរស់នៅជាមួយជំងឺកូវីដ១៩ដូចគ្នា ដោយរដ្ឋាភិបាលបានបើកឱ្យប្រជាពលរដ្ឋធ្វើសកម្មភាពសេដ្ឋកិច្ចឡើងវិញ ដោយឱ្យប្រជាពលរដ្ឋធ្វើសកម្មភាពសេដ្ឋកិច្ច និងរស់នៅតាមវិធានការអនាម័យរបស់រាជរដ្ឋាភិបាលដែលបានណែនាំនេះ ទើបអាចជំរុញឱ្យសេដ្ឋកិច្ចកម្ពុជាអាចរីកចំរើនឡើងវិញបាន៕

ដោយៈគង់ សូរិយា

ភ្នំពេញៈ ក្រុមអ្នកជំនាញបាននិងកំពុងមើលឃើញថា ទីផ្សារដីឡូត៍កាន់តែមានការវិវត្តល្អប្រសើរ ដោយទំហំដីឡូត៍កាន់តែត្រូវពង្រីក ដោយផ្តោតលើដីឡូត៍លំហែរកាយកាន់តែច្រើន។

ទីប្រឹក្សាសមាគមអ្នកអភិវឌ្ឍន៍ដីឡូត៍កម្ពុជា លោកយិន លាងគង់បានមានប្រសាស​ន៍ឲ្យដឹងកាលពីរសៀលថ្ងៃទី១៣ កក្កដាកន្លងមកថា បច្ចុប្បន្នអ្នកពុះដីឡូត៍កាន់តែច្រើន បានពង្រីក ការធ្វើពិពិធកម្មផលិតផលរបស់ពួកគេ ដោយចាប់ផ្តើមសាងសង់ផ្ទះតម្លៃសមរម្យសំរាប់លក់ និងបាននិងកំពុងពុះដីឡូត៍ធំៗ ដែលផ្តោតលើគំរោងបែបលំហែរកាយ។

លោកបន្តថា “ជំងឺកូវីដ១៩បានធ្វើឲ្យប្រជាជនស្រ្តេសច្រើន ពួកគាត់រកទីកន្លែងសំរាប់់លំហែរកាយកាន់តែច្រើន ស្របពេលការធ្វើដំណើកំសាន្ត នៅក្រៅប្រទេសមិនអាចធ្វើបាន”។លោកបន្តថា “ការសាងសង់ផ្ទះលំហែរកាយជាបឹងហ្កាឡូ ការបោះតង់កាន់តែពេញនិយម នៅតាមបណ្តាខេត្តជាប់តំបន់ឆ្នេរ និងតំបន់ព្រៃភ្នំដែលមានទេសភាព និងខ្យល់អាកាសបរិសុទ្ឋ”។

លោកយិន លាងគង់បានបន្តថា បច្ចុប្បន្នមានគំរោងដីឡូត៍មូយចំនូន នៅជើងភ្នំបូកគោ កំពុងទទួលបានការចាប់អារម្មណ៍ច្រើនពីប្រជាពលរដ្ឋ។ ការទិញដីឡូត៍ សំរាប់សាងសង់ផ្ទះលំហែរ ក(ចូលរួមចំណែកយ៉ាងល្អប្រសើរ ដើម្បីលើកកំពស់ទេសចរណ៍ផង និងចាក់ចូលធនធានក្នុងមូលដ្ឋានផងដែរ។

ការពង្រីកមូលដ្ឋានសេដ្ឋកិច្ច និងប្រាក់ចំណូលដល់ប្រជាពលរដ្ឋនៅមូលដ្ឋាន ជាគោលនយយោបាយមួយរបស់ក្រសួងទេសចរណ៍ ដើម្បីធ្វើយ៉ាងណាឲ្យប្រជាពលរដ្ឋអាច​ចាយវាយសាច់ប្រាក់នៅក្នុងប្រទេសច្រើន ដែលជាការរូមចំណែកកាត់បន្ថយភាពក្រីក្រផងដែរ។

លោកឆម ចំរើនអគ្គនាយកក្រុមហ៊ុនAdsolutionបានមានប្រសាសន៍ថា ការដើរកំសាន្តនៅក្នុងប្រទេស និងការទិញដីឡូត៍សំរាប់លំហែរកាយ បានកើនឡើងខ្ពស់ចាប់តាំងពីមានជំងឺកូវីដមក។ បញ្ហានេះបានជួយធ្វើឲ្យទីផ្សារដីឡូត៍លំហែរកាយ កើនឡើង ប្រជាជនមានធនធាន បានចាប់អារម្មណ៍វិនិយោគដីឡូត៍ ដើម្បីសាងសង់ផ្ទះឬទិញផ្ទះនៅក្នុងគំរោងលំហែរកាយ ដែលបានរៀបចំឡើងដោយអ្នកអភិវឌ្ឍន៍នានា។

លោកបន្តថា ចាប់ពីពេលនេះ រហូតដល់ពេលអនាគត ទីផ្សារដីឡូត៍លំហែរកាយនឹងមានទីផ្សារកាន់តែច្រើន ខណៈប្រចាពលរដ្ឋមានជីវភាពធូរធារកើនឡើង ពិសេសប្រ​ជា​ពលរដ្ឋខ្មែរ ចូលចិត្តដើរកំសាន្តច្រើនជាងពេលមុន៕

ដោយៈ ម៉ាណេត

ភ្នំពេញៈ រដ្ឋាភិបាលគ្រោងបញ្ចូលគ្នា រវាងសាលារាជធានីភ្នំពេញ ជាមួយនឹងផ្នែកខាងជើង នៃខេត្តកណ្តាល(២ ០០០គីឡូម៉ែត្រក្រឡា) ដើម្បីបង្កើតបានជារាជធានីភ្នំពេញធំមួយ។ នេះបើយោងតាមប្លង់គោលប្រើប្រាស់ដី រាជធានីភ្នំពេញ២០៣៥ ចេញផ្សាយកាលពីថ្មីៗនេះ។

យោងតាមប្លង់គោលប្រើប្រាស់ដីរាជធានីភ្នំពេញ បានឱ្យដឹងដូច្នេះថា ការបញ្ចូលគ្នារវាងសាលារាជធានីភ្នំពេញ ជាមួយនឹងផ្នែកខាងជើងនៃខេត្តកណ្តាល (២០០០គីឡូ​ម៉ែត្រក្រឡា) ឬជាមួយខេត្តកណ្តាលទាំងមូល (៤ ០០០គីឡូម៉ែត្រក្រឡា) ដើម្បីបង្កើតបានជារាជធានីភ្នំពេញធំមួយជាមួយនឹងលក្ខន្តិកៈពិសេសគឺរាជធានី។
រាជធានីនឹងមានស្វយ័ត ភាពហិរញ្ញវត្ថុមួយយ៉ាងធំ ដោយរួមបញ្ចូលទាំងការធ្វើវិនិយោគទុន និងលទ្ធភាពនៃការខ្ចីស្វ័យ័ត ភាពប្រាក់ផងដែរ។

ដំណោះស្រាយដែលមានភាពរលូនបំផុតនេះ នឹងអនុញ្ញាតឱ្យរដ្ឋាភិបាល កណ្ដាលដកខ្លួនចេញ ពីការធ្វើវិនិយោគសាធារណៈនៅរាជធានីភ្នំពេញ ហើយភ្នំពេញអាចរកបាននូវធនធានស្វយ័ត សម្រាប់ការអភិវឌ្ឍរបស់ខ្លួន ជាមួយនឹងសារពើពន្ធមូលដ្ឋានទាំង​ឡាយដែល រាជធានីនឹងគ្រប់គ្រងដោយផ្ទាល់ ហើយក៏អាចមានលទ្ធភាពក្នុងការខ្ចីប្រាក់ដោយផ្ទាល់ពីម្ចាស់ ជំនួយអន្តរជាតិនានា។

រាជធានីភ្នំពេញធំនឹងមានសាមគ្គីភាព ជាមួយខេត្តដទៃៗទៀតនៅក្នុងប្រទេស តាមរយៈសារពើពន្ធជាតិ ដែលករណីនេះបានដំណើរការស្រាប់ទៅហើយ នេះជាដំណោះស្រាយ ដែលត្រូវបានគេប្រើប្រាស់ច្រើនបំផុត សម្រាប់ការគ្រប់គ្រងទីក្រុងធំនានា៕

ដោយៈស៊ីវ ម៉េង

បាត់ដំបងៈ គំរោងវិនិយោគលើហេដ្ឋារចនាសម្ព័ន្ឋស្នូល ដែលមានគោលដៅធ្វើពិពិធកម្ម និងទាញតម្លៃបន្ថែមផ្នែកសេដ្ឋកិច្ចរបស់រដ្ឋាភិបាល និងការវិនិយោគពីវិស័យឯកជនកំពុងជំរុញ និងលើកស្ទួយសក្តានុពលខេត្តបាត់ដំបង។

ផ្លូវជាតិលេខ១០
បច្ចុប្បន្នផ្លូវជាតិជាប្រវត្តិសាស្រ្ត ដែលតភ្ជាប់ពីស្រុកសំឡូត ខេត្តបាត់ដំបង ទៅកាន់ខេត្តពោធិសាត់ និងតភ្ជាប់ទៅកាន់ខេត្តកោះកុង សម្រេចបានប្រមាណ៦០ភាគរយហើយ ខណៈវាជាផ្លូវប្រវត្តិសាស្រ្ត ដែលតភ្ជាប់តំបន់ភូមិភាគពាយ័ព្យ ទៅកាន់តំបន់ឆ្នេរជាលើកដំបូង។

ផ្លូវជាតិ១ខ្សែ ដែលទទួលបានហិរញ្ញប្បទានពីរដ្ឋាភិបាលចិននេះ ជាផ្នែកមួយនៃការដឹកជញ្ជូនកសិផលដ៏សម្បូរបែបពីភូមិភាគពាយ័ព្យ ទៅកាន់តំបន់ឆ្នេរ ដើម្បីនាំចេញទៅកាន់ប្រទេសទី៣ ដែលជាផ្នែកមួយនៃការពង្រឹងឯករាជ្យភាពផ្នែកសេដ្ឋកិច្ចកម្ពុជា សមាហរណកម្មផ្ទៃក្នុង និងលើកកំពស់សេដ្ឋកិច្ចជាតិ។ នេះបើតាមការឲ្យដឹងពីលោកវ៉ាស៊ីម សូរិយាអ្នកនាំពាក្យក្រសួងសាធារណៈការ និងដឹកជញ្ជូន។

ការស្តារព្រលានយន្តហោះ
រដ្ឋាភិបាលតាមរយៈក្រុមការងារអន្តរក្រសួង បានសិក្សាលើផែនការស្តារឡើងវិញនូវព្រលានយន្តហោះខេត្តបាត់ដំបង ដែលបានបោះបង់ចោលអស់រយៈពេលរាប់ទសវត្សរ៍ឡើងវិញ ដើម្បីសម្រួលដល់ការតភ្ជាប់ការដឹកជញ្ជូនផ្នែកផ្លូវអាកាស​ ក៏ដូចជាជម្រុញសក្តានុពលរបស់ខេត្តដែលមានស្រាប់នេះ។

ទោះជាយ៉ាងណាការសិក្សា លទ្ឋភាពស្តារឡើងវិញនូវព្រលាននេះ ក្នុងទំហំកម្រិតណា និងចំណាយអស់ទឹកប្រាក់ប៉ុន្មាន មិនទាន់មានរបាយការណ៍សិក្សាបញ្ជាក់លំអិតទេ ដោយសារបញ្ហាជំងឺកូវីដ១៩ ដែលកំពុងសបន្លាយ។
អនុរដ្ឋលេខាធិការ និងជាអ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល លោកស៊ិន ចាន់សិរីវុត្ថាបានមានប្រសាសន៍ឲ្យដឹងកាលពីពេលថ្មីៗនេះថា ការសិក្សាលទ្ឋភាពស្តារឡើងវិញ នូវព្រលានយន្តហោះខេត្តបាត់ដំបង ត្រូវបានផ្អាកដោយសារបញ្ហារីករាលដាលជំងឺកូវីដ១៩។

ផ្លូវតភ្ជាប់ពីខេត្តសៀមរាប
កាលពីពេលថ្មីៗនេះ លោកវ៉ាស៊ីម សូរិយាអ្នកនាំពាក្យក្រសួងសាធារណៈការ និងដឹកជញ្ជូនបានមានប្រសាសន៍ថា រដ្ឋាភិបាលមានផែនការសាងសង់ផ្លូវមួយខ្សែ តភ្ជាប់ពីក្រុងសៀមរាប មកកាន់ក្រុងបាត់ដំបង ដែលផ្កូវនេះមានប្រវែងប្រមាណ៦០គីឡូម៉ែត្រ។

លោកបន្តថា ផ្លូវមួយខ្សែនេះ តាមគំរោងនឹងសាងសង់ស្ពានឆ្លងកាត់ទន្លេសាប ដើម្បីសាងសង់ប៉មធំមួយ សំរាប់ឲ្យភ្ញៀវទេសចរណ៍សំរាកលំហែរកាយ និងគយគន់ទេស​ភាពទន្លេសាប ដែលគំរោងបែបនេះត្រូវបានរៀបចំនៅប្រទេសកូរ៉េ ជប៉ុន ទីក្រុងហុងកុងរួចហើយ។

លោកបន្តថា “ការសាងសង់ផ្លួវនេះជាផែនការអាទិភាពមួយ ដែលឯកឧត្តមទេសរដ្ឋមន្រ្តីស៊ុន ចាន់ថុល រដ្ឋមន្រ្តីក្រសួងសាធារណៈការ និងដឹកជញ្ជូនលោកចង់បានណាស់”។

ការលើកស្ទួយទេសចរណ៍
នៅក្នុងការរៀបចំផែនការមេតភ្ជាប់ខ្សែចង្វាក់ទេសចរណ៍ ដើម្បីឲ្យភ្ញៀវទេសចរណ៍អន្តរជាតិចំណាយប្រាក់កាន់តែច្រើន និងស្នាក់នៅកាន់តែយូរនៅកម្ពុជា រដ្ឋាភិបាលមានគោលដៅលើកស្ទួយទេសចរណ៍ខេត្តបាត់ដំបង ដោយធ្វើយ៉ាងណាទាក់ទាញភ្ញៀវពីក្រុងសៀមរាប មកទស្សនា​និងស្នាក់នៅខេត្តបាត់ដំបង តាមរយៈផ្លូវជាតិមួយខ្សែដែលតភ្ជាប់ពីក្រុងសៀមរាប មកកាន់ក្រុងបាត់ដំបងនាពេលខាងមុខ។

ប៉ុន្តែទោះជាយ៉ាងណា ការសាងសង់ផ្លូវមួយខ្សែនេះចេញពីតំបន់ណា មកភ្ជាប់នៅខេត្តបាត់ដំបងនៅតំបន់ណា មិនទាន់មានការបញ្ជាក់ឲ្យដឹងនៅឡើយទេ ខណៈវាស្ថិតនៅ​ក្នុងផែនការនៅឡើយ។

ផ្លូវជាតិលេខ៥
ផ្លូវជាតិលេខ៥ ដែលមានប្រវែងដ៏វែង និងតភ្ជាប់ពីព្រំដែនប្រទេសថៃ កាត់វាលទំនាបកណ្តាលប្រទេសកម្ពុជា និងឆ្ពោះទៅកាន់ប្រទេសវៀតណាម ដែលទទួលបានហិរញ្ញប្បទានសម្បទាន ពីរដ្ឋាភិបាលជប៉ុនជាង៥០០លានដុល្លារ នឹងក្លាយជាសសៃឈាមសេដ្ឋកិច្ចដ៏សំខាន់មួយ ក្នុងការលើកស្ទួយសេដ្ឋកិច្ចតំបន់។

ផ្លូវជាតិមួយខ្សែនេះ ក៏តភ្ជាប់ជាមួយនឹងផែនការអភិវឌ្ឍន៍នៃយុទ្ឋសាស្រ្តត្បូង ត្បូងរបស់អាស៊ាន ដែលផ្លូវនេះត្រូវបានចាត់ទុកថា ជាផ្លូវហាយវេរបស់អាស៊ាន ដែលនឹងជួយសម្រូលលំហូរពាណិជ្ជកម្ម ទេសចរណ៍ ឧស្សាហកម្មផងដែរ ដែលធ្វើឲ្យខេត្តស្ថិតនៅស្របតាមផ្លួវនេះ ទទួលបានផលប្រយោជន៍ផ្នែកសេដ្ឋកិច្ច និងទាញតម្លៃបន្ថែមផ្នែកសេដ្ឋ​កិច្ចមួយកម្រិតទៀត។

គំរោងអភិវឌ្ឍន៍ទំហំ៥០០ហិកតា
ជាមួយនឹងផែនការប្រកបដោយមហិច្ឆតា អ្នកឧកញ៉ាឡេង ណាវ៉ាត្រាបាននិងកំពុងវិនិយោគលើផ្ទៃដី៥០០ហិកតា នៅកៀកក្រុងបាត់ដំបង ដើម្បីសាងសង់រមណីយដ្ឋាន លំនៅដ្ឋាន សេវាកម្មលំហែរកាយ មជ្ឈមណ្ឌលពាណិជ្ជកម្មនៅខខេត្តនេះផងដែរ។

គំរោដ៏ធំនេះ កំពុងធ្វើឲ្យតម្លៃដីធ្លីនៅក្រុងបាត់ដំបង ឡើងថ្លៃមួយកម្រិតទៀត ពិសេ​សការប្រកាសស្តារឡើងវិញ នូវព្រលានយន្តហោះក្រុងបាត់ដំបង បានធ្វើឲ្យទីក្រុងនេះកាន់តែទាក់ទាញការវិនិយោគកាន់តែ​ច្រើន ពីវិនិយោគិនជាតិ និងអន្តរជាតិ៕