ភ្នំពេញៈ គម្រោងអភិវឌ្ឍន៍អគារពាណិជ្ជកម្ម និងលំនៅឋាន “ភូមិកីឡដ្ឋាន វើលដ៍ប្រ៊ីដ” ដ៏ធំស្កឹមស្កៃទំនើបដំបូងគេបង្អស់មួយនឹងផុសរូបរាងឡើងនៅក្នុងទីក្រុងនាគសម្តេចតេជោសែន ភាគខាងជើងរាជធានីភ្នំពេញក្នុងពេលឆាប់ៗខាងមុខនេះហើយ។

គម្រោង“ភូមិកីឡដ្ឋាន វើលដ៍ប្រ៊ីដ” ដ៏ធំចម្លែកប្លែកគេថ្មីមួយនេះដែរ នឹងធ្វើការសាងសង់សម្រាប់ការប្រកួតកីឡាប្រជាជាតិអាស៊ីអាគ្នេយ៍ និង អាស៊ានប៉ារ៉ាហ្គេម ក្នុងឆ្នាំ២០២៣ ដែលនឹងប្រារព្ធធ្វើឡើងនៅលើទឹកដីអច្ឆរិយៈនៃព្រះរាជាណាចក្រកម្ពុជា។ គម្រោងនេះនឹងសាងសង់អមជាមួយស្ថាបត្យកម្មយ៉ាងវិសេសវិសាល លាតសន្ធឹងលើផ្ទៃដីជាង ៦ហិចតា ជាប់នឹងពហុកីឡដ្ឋានជាតិមរតកតេជោ ដែលស្ថិតនៅក្នុងទីក្រុងនាគសម្តេចតេជោ លាតសន្ធឹងលើផ្ទៃដីចំនួន៣៥.០០០ហិចតា នៅភាគខាងជើងនៃតំបន់អភិវឌ្ឍន៍ថ្មីរបស់រាជធានីភ្នំពេញ។

សំណង់អគាររំលេចទៅដោយស្ថាបត្យកម្មដ៏ល្អឯក បូករួមនឹងសោភណ្ឌភាពដ៏គួរឲ្យចាប់អារម្មណ៍បំផុតបែបនេះ គឺជាការសាងសង់ដោយក្រុមហ៊ុន ដាប់ប៊ែលយូប៊ី ស្ព័ត វីលេច ឯ.ក ដែលជាបុត្រសម្ព័ន្ឋក្រុមហ៊ុន វើលដ៏ប្រ៊ីដគ្រុប ដែលជាអ្នកអភិវឌ្ឍ និង ជាក្រុមហ៊ុនសាងសង់លំនៅដ្ឋានដែលមានកេរ្តិ៍ឈ្មោះបោះសម្លេងល្បីល្បាញក្នុងវិស័យ
អចលនទ្រព្យជាង៣០ឆ្នាំមកហើយ។

ដោយស្ថិតនៅក្នុងតំបន់ ពាណិជ្ជកម្ម “ភូមិកីឡដ្ឋាន វើលដ៍ប្រ៊ីដ” ត្រូវបានសិក្សាយ៉ាងល្អិតល្អន់ជាមួយនឹងរចនាបថលំនៅឋានសម័យទំនើបដែលមានខុនដូ១២អាគារស្មើនឹង១៣១៩បន្ទប់ អាគារខុនដូប្រភេទស្ទូឌីយ៉ូ ១អគារស្មើនឹង ១៦៣បន្ទប់ ដែលមានកម្ពស់១៣ជាន់ ផ្ទះល្វែង ផ្ទះអាជីវកម្ម វីឡាភ្លោះ ផ្សារទំនើប សារមន្ទីរកីឡា មានចំណតធំទូលាយ ល្អឥតខ្ចោះសម្រាប់ការរស់នៅ និងវិនិយោគនាពេលអនាគត។

មិនតែប៉ុណ្ណោះ “ភូមិកីឡដ្ឋាន វើលដ៍ប្រ៊ីដ” មានហេដ្ឋារចនាសម្ព័ន្ធតភ្ជាប់យ៉ាងសម្បូរបែបហ៊ុមព័ទ្ធទៅដោយ ស្ពាន ផ្លូវគមនាគមន៍ខ្វាត់ខ្វែង ប្រព័ន្ធដឹកជញ្ជូនសាធារណៈ មន្ទីរពេទ្យ សាលារៀនជាតិ និងអន្តរជាតិ ក្លឹបហាត់ប្រាណ កន្លែងវាយកូនហ្គោលលំដាប់ផ្កាយ៥ និង ផ្សេងៗទៀត។

បន្ទាប់ពី ការប្រកួតកីឡាប្រជាជាតិអាស៊ីអាគ្នេយ៍ឆ្នាំ២០២៣ត្រូវបានបញ្ចប់ យើងមានជំនឿយ៉ាងមុតមាំថា “ភូមិកីឡដ្ឋាន វើលដ៍ប្រ៊ីដ” នឹងផ្លាស់ប្តូរមុខមាត់តែស្រស់អស្ចារ្យ នឹងចូលរួមចំណែកលើកសម្រស់រាជធានីភ្នំពេញទៅជាទីក្រុងកីឡា និង ជាទីប្រជុំជនដែលមានទំនើបកម្មក្នុងតំបន់ជាក់ជាពុំខានឡើយ។

ស្ថិតនៅក្នុងរង្វង់នៃពហុកីឡដ្ឋានជាតិមរតកតេជោ “ភូមិកីឡដ្ឋាន វើលដ៍ប្រ៊ីដ” មានចំងាយត្រឹមតែ ១៥ នាទីប៉ុណ្ណោះពីតំបន់មជ្ឈមណ្ឌលពាណិជ្ជកម្ម ដោយសារតែមានការតភ្ជាប់នូវហេដ្ឋារចនាសម្ព័ន្ធដែលមានស្រាប់នាពេលបច្ចុប្បន្ន និង ការពង្រីកហេដ្ឋារចនាសម្ព័ន្ធទៅកាន់តំបន់មជ្ឈមណ្ឌលពាណិជ្ជកម្ម ផ្សេងៗទៀត ដែលក្នុងនោះ មានស្ពានជាង៤កន្លែង ផ្លូវគមនាគមន៍ខ្វាត់ខ្វែងទាំងចាស់ទាំងថ្មី ប្រព័ន្ធដឹកជញ្ជូនសាធារណៈ ក៏ដូចជាគម្រោងផ្លូវខ្សែរថភ្លើងលើអាកាសដែលតភ្ជាប់ទៅកាន់តំបន់មជ្ឈមណ្ឌលពាណិជ្ជកម្ម ដែលត្រូវបានរចនាឡើងសម្រាប់ទទួលបាននូវភាពជោគជ័យយូរអង្វែង រួមជាមួយកន្លែងផ្សេងទៀតដែលត្រូវបានសាងសង់ឡើងសម្រាប់ការប្រកួតកីឡាផងដែរ។

លើសពីនេះទៅទៀត ក្រុមហ៊ុនវើលប្រ៊ីដគ្រុបដែលធ្លាប់មានបទពិសោធន៍ពេញលេញក្នុងការអភិវឌ្ឍអគារខ្ពស់ទំនើបៗ និង លំនៅឋានដ៏ប្រណីតៗនៅកម្ពុជា នឹងធ្វើការប្តេជ្ញាចិត្តក្នុងការនាំមកនូវបទពិសោធន៍ថ្មីៗ និង ភាពជឿជាក់ក្នុងការរស់នៅរបស់អតិថិជន។ អ្វីដែលគួរឱ្យចាប់អារម្មណ៍នោះ គឺការពន្លឿនការសាងសង់ ដោយផ្តោតជាចម្បងលើគុណភាពសំណង់ និងលក្ខខណ្ឌបង់ប្រាក់ងាយស្រួលសម្រាប់អតិថិជន គឺជាផ្នែកមួយនៃភាពជោគជ័យរបស់គម្រោង“ភូមិកីឡដ្ឋាន វើលដ៍ប្រ៊ីដ” នេះផងដែរ។

ជាពិសេសក្នុងដំណាក់កាលនេះ គម្រោង ភូមិកីឡដ្ឋាន វើលដ៏ប្រ៊ីដ មានប្រូម៉ូសិនពិសេសដែល…………………
សូមទំនាក់ទំនងអាសយដ្ឋាន៖ ការិយាល័យលក់ អាគារ The Bridge SOHO វិថីរដ្ឋសភា សង្កាត់ទន្លេបាក់ ខណ្ឌចម្ការមន រាជធានីភ្នំពេញ។ ជាមួយនឹងការបង់រំលស់លំនៅដ្ឋានដូចជា៖ ខុនដូ វីឡាភ្លោះ ថោនហៅស៍ រ៉ូហៅស៍ រហូតដល់ ៦០ខែ ដោយគ្មានការប្រាក់ (0% Interest) ។ មិនតែប៉ុណ្ណោះ អតិថិជនអាចមានឱកាសឈ្នះរង្វាន់ជាច្រើនដូចជា៖
សាឡុងមួយឈុត ទូរទស្សន៍ ទូទឹកកក ម៉ាស៊ីនត្រជាក់ ម៉ាស៊ីនបោកគក់សំលៀកបំពាក់ ម៉ាស៊ីនបូមធូលី និងសំភារៈប្រើប្រាស់ក្នុងផ្ទះជាច្រើនទៀត 🤩
☎️ កក់ឥលូវនេះដើម្បីទទួលបានតំលៃពិសេស: 085 611 147 / 087 611 147

ដោយៈ លក្ខិណា

ភ្នំពេញៈ អគ្គនាយកដ្ឋានពន្ធដារ ដែលជាស្ថាប័នសំខាន់ក្នុងការប្រមូលចំណូលផ្ទៃក្នុង បានក្រើនរំលឹកដល់អ្នកជាប់ព័ន្ធលើអចលនទ្រព្យរួសរាន់ចូលរួមបង់ពន្ធជូនទៅកាន់អគ្គនាយកដ្ឋានពន្ធដារមុនកាលកំណត់។

យោងតាមសេចក្តីជូនដំណឹងរបស់អគ្គនាយកដ្ឋានពន្ធការនៅថ្ងៃទី៨ ខែមិថុនា ឆ្នាំ២០២១នេះ បានឱ្យដឹងថា ការបង់ពន្ធលើអចលនទ្រព្យ និងការបង់ពន្ធ លើដីធ្លីមិនបានប្រើប្រាស់សម្រាប់ឆ្នាំ ២០២១នេះ នឹងត្រូវបិទបញ្ចប់នៅថ្ងៃទី៣០កញ្ញា ឆ្នាំ២០២១ខាងមុខនេះ ដូច្នេះអ្នកដែលមានចលនទ្រព្យនៅរាជធានីភ្នំពេញ និងនៅតាមបណ្ដាខេត្តទាំងនោះ មេត្តារួសរាន់បង់ពន្ធឱ្យបានទាន់ពេលវេលា ។

ក្នុងសេចក្តីជូនដំណឹងឱ្យដឹងទៀតថា រហូតមកដល់ពេលនេះ អគ្គនាយកដ្ឋានពន្ធដារសង្កេតឃើញថា មានម្ចាស់អចលនទ្រព្យមួយចំនួននៅមិនទាន់បានបំពេញកាតព្វកិច្ចប្រកាសបង់ពន្ធប្រភេទទាំងនេះនៅឡើយ។

ដូចនេះ ដើម្បីជំរុញការប្រមូលពន្ធលើអចលនទ្រព្យនិងពន្ធលើដីធ្លីមិនបានប្រើប្រាស់សម្រាប់ឆ្នាំ ២០២១នេះ បានអស់លទ្ធភាព ប្រកបដោយប្រសិទ្ធភាពខ្ពស់ និងចៀសវាងបាននូវការកកស្ទះ ការប្រជ្រៀតគ្នាមកប្រកាសបង់ពន្ធនៅថ្ងៃជិតផុតកំណត់ ដែលអាចនាំឱ្យមានបាតុភាពអសកម្មដោយប្រការណាមួយ អគ្គនាយកដ្ឋានពន្ធដារសូមក្រើនរំលឹក ដល់ម្ចាស់អចលនទ្រព្យទាំងអស់ ដែលមិនទាន់បានបំពេញកាតព្វកិច្ចបង់ពន្ធមេត្តារួសរាន់អញ្ជើញប្រកាសបង់ពន្ធឱ្យបានទាន់ពេលវេលាកំណត់ ត្រឹមថ្ងៃទី៣០ ខែ កញ្ញា ឆ្នាំ២០២១នេះ។

ចំពោះការខកខានមិនបានដាក់លិខិតប្រកាសបង់ពន្ធទាន់ពេលវេលាកំណត់ទេ ម្ចាស់អចលនទ្រព្យនឹងត្រូវរងនូវទោសទណ្ឌតាមច្បាប់ជាធរមាន។

ពន្ធអចលនទ្រព្យគឺជាពន្ធដែលប្រមូលចំពោះអចលនទ្រព្យដែលមានតម្លៃលើសពី១០០លានរៀល និងមានទីតាំងស្ថិតនៅក្នុងភូមិសាស្ត្ររដ្ឋបាលរាជធានី និងខេត្តនៃព្រះរាជាណាចក្រកម្ពុជា ។ពន្ធនេះ ជាប្រភេទពន្ធផ្ទាល់ដែលតម្រូវឱ្យអ្នកជាប់ពន្ធ ដែលជាកម្មសិទ្ធករ ឬអ្នកកាន់កាប់ឬអ្នកទទួលផលប្រយោជន៍ចុងក្រោយមកចុះបញ្ជីអចលនទ្រព្យ និងធ្វើការប្រកាសបង់ពន្ធយ៉ាងយឺតបំផុតត្រឹមថ្ងៃទី៣០ ខែកញ្ញាជារៀងរាល់ឆ្នាំ ។ ការប្រមូលពន្ធលើអចលនទ្រព្យនេះ គឺសម្រាប់ជាផលប្រយោជន៍ថវិការដ្ឋបាលថ្នាក់ក្រោមជាតិ៕

ដោយៈ លក្ខិណា

ភ្នំពេញៈ វិស័យអចលនទ្រព្យ និងការធ្វើពាណិជ្ជកម្មកម្ពុជា ត្រូវបានរំពឹងថានឹងមានកំណើនឡើងវិញវិជ្ជមានក្នុងឆ្នាំ២០២១នេះ ខណៈឆ្នាំ២០២០កន្លងទៅ វិស័យដ៏សំខាន់នេះ បានធ្លាក់ចុះជាអវិជ្ជមានដល់ទៅ៥,១ភាគរយ។ នេះបើយោងតាមរបាយការណ៍ ស្តីពីស្ថានភាពម៉ាក្រូសេដ្ឋកិច្ចរបស់រាជរដ្ឋាភិបាលកម្ពុជាចេញផ្សាយនៅថ្ងៃទី៨ ខែមិថុនា ឆ្នាំ២០២១នេះ។

នៅក្នុងរបាយការណ៍ស្ថានភាពម៉ាក្រូសេដ្ឋកិច្ចរបស់រាជរដ្ឋាភិបាលកម្ពុជាបានបង្ហាញថា នៅមុនពេលមានវិបត្តិដោយសារតែជំងឺកូវីដ១៩ ពោលគឺចាប់តាំងពីឆ្នាំ២០១៦ ដល់ឆ្នាំ២០១៩ វិស័យអចលនទ្រព្យ និងពាណិជ្ជកម្មមានកំណើនគួរឱ្យកត់សម្គាល់ ក្នុងនោះឆ្នាំ២០១៦ កំណើននៃវិស័យនេះសម្រេចបានក្នុងរង្វង់៩,៩ភាគរយ ក្នុងឆ្នាំ២០១៧សម្រេចបាន៨,៧ភាគរយ ឆ្នាំ២០១៨សម្រេចបាន ៨,៥ភាគរយ ឆ្នាំ២០១៩ សម្រេចបាន៧ភាគរយ ហើយសម្រាប់ឆ្នាំ២០២០ ដោយសារតែវិបត្តិសកល វិស័យនេះបានធ្លាក់ចុះដល់-៥,១ភាគរយ ។

សម្រាប់ឆ្នាំ២០២១នេះ វិស័យអចលនទ្រព្យនិងពាណិជ្ជកម្មត្រូវបានរំពឹងនិងព្យាករថា អាចងើបឡើងវិញ ក្នុងនោះដែរ វិស័យសំណង់ត្រូវបានរំពឹងថានឹងងើបឡើងវិញក្នុងរង្វង់៣,៣ភាគរយ ខណៈឆ្នាំ២០២០វាបានធ្លាក់ចុះដល់ទៅ-៥,៣ភាគរយ។

ចំណែកការនាំចូលសម្ភារៈសំណង់ក្នុងឆ្នាំ២០២០កន្លងទៅ ឃើញថា ដែកបានធ្លាក់ចុះដល់ទៅ-៤២,៣ភាគរយ ស៊ីម៉ង់ត៏ធ្លាក់ចុះ -០,៩ភាគរយ និងការនាំចូលឧបករណ៍សំណងបានធ្លាក់ចុះរហូតដល់ -៩,៧ភាគរយ តែសម្ភារៈទាំងនេះក៏បានរំពឹងថានឹងងើបឡើងវិញក្នុងឆ្នាំនេះ និងឆ្នាំបន្ទាប់។

លោកសន សៀបនាយកប្រតិបត្តិក្រុមហ៊ុនអចលនទ្រព្យឃី រៀលអ៊ីស្ទេតបានឱ្យដឹងផងដែរថា ទោះបីជាស្ថានភាពកូវីដ១៩ នៅតែមិនទាន់ស្រាកស្រានតែ យើងរំពឹងថា វិនិយោគិនបរទេសនឹងចូលកម្ពុជាវិញនាពេលឆាប់ៗនេះ ដើម្បីស្វែងរកឱកាសវិនិយោគ ជាពិសេសវិនិយោគិនចិននឹងត្រលប់មកកាន់កម្ពុជា ដើម្បីអភិវឌ្ឍន៍វិស័យអចលនទ្រព្យនិងវិស័យផ្សេងៗទៀត ដោយសារតែកម្ពុជាបានចាក់វ៉ាក់សាំងជូនពលរដ្ឋកាន់តែច្រើន ហើយស្ថានភាពកូវីដ១៩នៅចិនក៏ឃើញថាមិនមានការឆ្លងរាលដាលថ្មីៗផងដែរ។

យ៉ាងណាក្ដី បើទោះជាពេលនេះកម្ពុជាមិនទាន់អាចទទួលវិនិយោគិនបរទេសចូលមកបណ្ដាក់ទុនវិនិយោគក្នុងវិស័យអចលនទ្រព្យក្ដី តែវិនិយោគិនក្នុងស្រុកក៏បានដាក់ទុនវិនិយោគ លើវិស័យសំណង់និងអចលនទ្រព្យជាហូរហែក្នុងនោះវិស័យដីធ្លី សំណង់បុរីផ្ទះល្វែងនិងវីឡាជាដើម។ ដោយឡែកសកម្មភាពនៃការទិញលក់អចលនទ្រព្យនៅក្នុងស្រុកក៏ត្រូវបានមើលឃើញថា មានសកម្មភាពជាហូរហែផងដែរ ទោះបីជាពេលកម្ពុជាមិនទាន់បញ្ចប់កូវីដ១៩ ជាពិសេសព្រឹត្តិការណ៍សហគមន៍២០កុម្ភៈ ២០២១នេះ៕

ដោយៈ ប៊ី

ភ្នំពេញៈ ការវិនិយោគលើវិស័យសំណង់នៅខេត្តកំពត ត្រូវបានមើលឃើញថានៅតែបន្តមានការចម្រើនទៅមុខជាលំដាប់ពីមួយឆ្នាំទៅមួយឆ្នាំ ហើយការវិនិយោគលើវិស័យនេះនៅតែមានកំណើន ទោះស្ថិតនៅក្នុងវិបត្តិកូវិដ១៩ ក៏ដោយ។

លោកស៊ឹម សុខជាអនុប្រធានមន្ទីររៀបចំដែនដី នគររូបនីយកម្ម សំណង់ និងសុរិយោដីខេត្តកំពត បានឱ្យដឹងនៅថ្ងៃទី៨ ខែមិថុនា ឆ្នាំ២០២១ថា វិស័យសំណង់ក្នុងខេត្តនៅតែបន្តដំណើរទៅមុខជានិច្ច ទោះស្ថិតក្នុងបរិបទកូវីដ១៩ ដោយសារអ្នកវិនិយោគបានមកធ្វើការអភិវឌ្ឍន៍លើផ្នែកនេះជាហូរហែ។

លោកបានបន្តថា បច្ចុប្បន្នទោះស្ថានភាពកូវីដ១៩ហាក់មានសណ្ឋានធ្ងន់ធ្ងរក៏ពិតមែនប៉ុន្តែការដ្ឋានសំណង់ទាំងអស់ក្នុងខេត្ត នៅតែបន្តដំណើរការជាធម្មតា គ្មានការបិទផ្អាកទេ ប៉ុន្តែពិបាករកកម្លាំងពលកម្មបន្តិច ខណៈដែលការរដ្ឋានថ្មីៗបានចាប់ផ្តើមបើកដំណើរកាសាងសង់ជាហូរហែ និងមានចំនួនច្រើនជាងឆ្នាំមុនៗ។

លោកបានបញ្ជាក់ថា កាលពីឆ្នាំ២០១៩ ការដ្ឋានសំណង់មាន២១៦ការដ្ឋាន អត់ច្បាប់២០ការដ្ឋានតម្លៃវិនិយោគសរុប ជាង៣៦លានដុល្លា។ ឆ្នាំ២០២០ ការដ្ឋានសំណង់កើនដល់២៩៩កន្លែង អត់ច្បាប់៤៧ តម្លៃវិនិយោគសរុបជាង៣៧លានដុល្លា។ ដោយឡែក ក្នុងរយៈពេលប្រាំខែដើមឆ្នាំឆ្នាំ២០២១នេះ មានការដ្ឋានសរុបជាងមួយរយការដ្ឋាន ដែលមានតម្លៃវិនិយោគសរុបជាងពាក់កណ្តាលនៃតម្លៃវិនិយោគក្នុងឆ្នាំ២០២០កន្លងទៅ។

លោកបានបញ្ជាក់ថា វិស័យសំណង់ខេត្តកំពតនៅតែមានកំណើនដោយសារ ៖១- ការយកចិត្តទុកដាក់ ដឹកនាំរបស់រដ្ឋបាលខេត្តកំពត, ២-ហេដ្ឋារចនាសម្ព័ន្ធក្នុងខេត្តកំពតអភិវឌ្ឍន៍ច្រើនជាងមុន ៣- សំបូរតំបន់ទេសចរណ៍ ៤-សំបូរភោគផលធម្មជាតិ និង វប្បធម៌ ៥- វិស័យអចលនទ្រព្យនៅតែបន្តសកម្មភាព និងទី៦.ជាខេត្តជាប់នឹងមាត់សមុទ្រផង។

ការផ្តល់សេវាលើវិស័យសំណង់មានបីសមត្ថកិច្ច ១- សមត្ថកិច្ចរដ្ឋបាលក្រុង/ ស្រុក ទំហំផ្ទៃក្រោម ៥០០ម៉ែត្រការ៉េ, ២- សមត្ថកិច្ចរដ្ឋបាលខេត្ត ចាប់ពីទំហំលើស៥០០ ដល់ ៣០០០ ម៉ែការ៉េ និង ៣-សមត្ថកិច្ចក្រសួងចាប់ពីទំហំផ្ទៃលើស ៣០០០ ម៉ែត្រការ៉េឡើងទៅ៕

ដោយៈវឌ្ឈនៈ

ភ្នំពេញៈ មនុស្សមួយចំនួនធំហាក់មានការរារែក ក្នុងការសម្រេចចិត្តទិញផ្ទះ ដើម្បីស្នាក់នៅបានសមរម្យ ហើយត្រូវការពេលវេលាយូរមុននឹងសម្រេចផ្ទះនោះ ហើយពេលខ្លះផ្ទះនោះ ក៏ត្រូវឡើងថ្លៃលើសពីតម្លៃដែលខ្លួនបានស៊ើបសួរដំបូងៗ។

លោកច្រឹក សុខនីមប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានបង្ហាញនូវគន្លឹះចំនួន៤ចំនុច អាចជាដើមទុនក្នុងការគិតពិចារណា មុនសម្រេចចិត្តទិញផ្ទះត្រូវនឹងក្ដីប្រាថ្នារបស់ខ្លួន។

យោងតាមការបង្ហោះលើបណ្ដាញសង្គមរបស់លោកច្រឹក សុខនីមប្រធានសមាគមបានឱ្យដឹងថា មុនពេលទិញលំនៅឋានចំនុចដែលគួរគិតនោះរួមមាន ទី១ ទិញផ្ទះក្នុងក្តីស្រមៃរបស់អ្នក ដែលបំពេញចិត្តរបស់លោកអ្នក ( តំបន់ភ្នំ ជាប់មាត់ទឹក តំបន់ពានិជ្ជកម្ម និងឬ សក្តានុពលនានា ) ទី២ បរិយាកាស អ្នកជិតខាងផ្ទះរបស់លោកអ្នក ( អ្នកភូមិផងរបងជាមួយ ភាពងាយស្រួលក្នុងធ្វើដំណើរ និងអាជីវកម្មផងដែរ) ទី៣ គុណភាពសំណង់ និងកេរ្តិ៍ឈ្មោះ របស់ស្ថាបត្យករ និងវិស្វករផងដែរ និងទី៤ មានអាកាសធាតុល្អ ឬហៅជាភាសាទំនើបថា ផ្ទះមានហ៊ុងស៊ុយល្អ ។

យ៉ាងណាក្ដី នៅក្នុងពេលចប្ចុប្បន្ននេះ មានមនុស្សជាច្រើនដែលទិញផ្ទះ ដោយការបង់រំលស់ ហើយមិនបានគិតពី ស្ថានភាពហិរញ្ញវត្ថុរបស់ខ្លួននោះទេ ជាក់ស្ដេងនៅតាមគម្រោងអភិវឌ្ឍន៍លំនៅឋានជាលក្ខណៈបុរីមួយចំនួន មានផ្ទះតែអត់មានមនុស្សនៅ ឬដាក់ផ្លាកប្រកាសលក់ចេញវិញ ព្រោះតែមិនមានលទ្ធភាព ក្នុងការបង់រំលស់បន្តជាពិសេសនៅក្នុងវិបត្តិនៃជំងឺកូវីដ១៩នេះ។

ផ្ទះក្នុងបុរីជាច្រើនក៏បានលក់ជូនទៅក្រុមហ៊ុន ដោយសុខចិត្តខាតពាក់កណ្ដាលនៃប្រាក់ ដែលបានបង់ទៅក្រុមហ៊ុនព្រោះថា ខ្លួនអស់លទ្ធភាព ក្នុងការបង់បន្ត ដែលទាំងនេះគឺជាអ្វីដែលអ្នកទិញផ្ទះ មិនបានគិតពីស្ថិរភាពហិរញ្ញវត្ថុ ឬមិនបានសិក្សាពីប្រាក់ចំណូលរបស់ខ្លួនច្បាស់លាស់ មុននឹងសម្រេចចិត្តទិញផ្ទះដោយបង់រំលស់៕