ធនាការពិភពលោកៈការចាក់វ៉ាក់សាំងជូនពលរដ្ឋបានលឿននឹងធ្វើឱ្យសេដ្ឋកិច្ច កម្ពុជាងើបឡើងលឿន

ដោយៈវឌ្ឍនៈ

ភ្នំពេញៈ ប្រធានធនាគារពិភពលោកប្រចាំកម្ពុជាថ្មី លោកស្រី Marysam salim បានបញ្ជាក់ថា ការចាក់វ៉ាក់សាំងជូនពលរដ្ឋកម្ពុជាក្នុងល្បឿនលឿន នឹងធ្វើឱ្យសេដ្ឋកិច្ចកម្ពុជាចាប់ផ្ដើមដំណើរការឡើងវិញ នៅពេលឆាប់ៗខាងមុខនេះ ។

ក្នុងជំនួបពិភាក្សាការងារ តាមរយៈប្រព័ន្ធវីដេអូ ជាមួយលោកអូន ព័ន្ធមុនីរ័ត្ន រដ្ឋម   ន្ត្រីក្រសួងសេដ្ឋកិច្ច និងហិរញ្ញវត្ថុកាលពីចុងសប្ដាហ៍កន្លងទៅលោកស្រី Marysam salimបានកោតសរសើរ ចំពោះកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ដែលសម្រេចបាននូវសមិទ្ធផលផ្លែផ្កាជាច្រើន ពិសេសការដាក់ចេញនូវគោលនេយោបាយដ៏មុតស្រួចសំដៅប្រយុទ្ធ ការពារសុខភាពអាយុជីវិតរបស់ប្រជាជន រក្សាលំនឹងសេដ្ឋកិច្ច និងជីវភាពរស់នៅរបស់ប្រជាជន។

លោកស្រីMaryam Salim បានបង្ហាញជំហរបន្តគាំទ្រ រាជរដ្ឋាភិបាលកម្ពុជា ពិសេស ក្នុងការផ្តល់ជាធាតុចូលបន្ថែម លើផែនការស្ដារសេដ្ឋកិច្ចឡើងវិញ ក្រោយវិបត្តិតូវីដ-១៩ ឆ្នាំ២០២១-២០២៣ និងកែសម្រួលឯកសារក្របខណ្ឌ នៃភាពជាដៃគូរវាងរដ្ឋាភិបាលជាមួយធនាគារពិភពលោក ឆ្លើយតបទៅនឹងបរិការណ៍បច្ចុប្បន្ន និងស្របតាមផែន​ការស្ដារសេដ្ឋកិច្ចឡើងវិញក្រោយវិបត្តិកូវីដ-១៩ ឆ្នាំ២០២១-២០២៣ របស់រាជរដ្ឋាភិបាលកម្ពុជា។

លោកអគ្គបណ្ឌិតសភាចារ្យ អូន ព័ន្ធមុនីរ័ត្ន បានលើកឡើងអំពីផែន ការយុទ្ធសា  ស្ត្រនៃ ការស្ដារសង្គមសេដ្ឋកិច្ចឡើងវិញ បន្ទាប់ពីកូវីដ-១៩ តាមរយៈអភិក្រមចំនួន ៣ រួមមា ១, ការស្តារ (Recovery) ផ្ដោតទៅលើវិស័យសុខាភិបាល ការផ្តល់ហិរញ្ញប្បទានដល់វិស័យឯកជន គោលនយោបាយសារពើពន្ធ វិស័យកសិកម្ម វិស័យទេសចរណ៍ និងវិស័យកាត់ដេរ ២. ការកែទម្រង់ សំដៅលើការកសាងមូលដ្ឋានគ្រឹះរឹងមាំសម្រាប់កំណើនពិពិតកម្ម និង ភាពប្រកួតប្រជែង, និង ៣. ភាពផន់ (Resiliency) ផ្ដោតទៅលើវិស័យឌីជីថល ការអភិវឌ្ឍវិស័យសហគ្រាសធុនតូច និង មធ្យម ការអភិវឌ្ឍជំនាញ ការស្តារសេដ្ឋកិច្ចឡើងវិញលក្ខណះបៃតង និងការពង្រឹងប្រព័ន្ធគាំពារសង្គម ។

យោងតាមក្រសួងសុខាភិបាលបានឲ្យដឹងថា កំណើនអត្រាចាក់វ៉ាក់សាំងកូវីដ-១៩ នៅកម្ពុជា គិតត្រឹមថ្ងៃទី២២ ខែសីហា ឆ្នាំ២០២១ មាន៨៧,២៦% ធៀបជាមួយចំនួនប្រជាជនគោលដៅ ១០លាននាក់ និងលើកុមារ-យុវវ័យអាយុពី ១២ឆ្នាំ ទៅក្រោម ១៨ឆ្នាំ មាន ៥០,៣៩% ធៀបជាមួយនឹងប្រជាជនគោលដៅ ១,៩៦លាននាក់ ។កម្ពុជាក៏បាននិងកំពុងជំរុញការចាក់វ៉ាក់សាំងដូសទី៣ គឺដូសជំរុញជូនពលរដ្ឋកម្ពុជា ដែលចាក់វ៉ាក់សាំងទាំងពីរលើករួចហើយ៕

វៀតណាមពង្រាយទ័ពជួយពង្រឹងការបិទខ្ទប់ក្រុងហូជីម៉ិញ ដោយសារជួបកលយុគ ផ្ទុះការឆ្លងកូវីដ-១៩ខ្លាំង

ដោយៈសុខុម

ហាណូយ: ទាហានវៀតណាម ថ្ងៃច័ន្ទ ទី២៣ សីហា នេះត្រូវបានដាក់ពង្រាយតាមដងផ្លូវនានាក្នុងទីក្រុងហូជីមិញ ដើម្បីជួយពង្រឹងការបិទខ្ទប់ នៅក្នុងទីក្រុងមជ្ឈមណ្ឌលពាណិជ្ជកម្មនេះ ដែលបានក្លាយជាចំណុចចាប់ផ្ដើម នៃការផ្ទុះឡើងការឆ្លងធ្ងន់ធ្ងរបំផុតអំឡុងវិបត្តិកូវីដ-១៩។

យោងតាមការចុះផ្សាយរបស់សារព័ត៌មាន The Edge Markets ឱ្យដឹងថា ស្ថានការណ៍ភ័យស្លន់ស្លោ បានផ្ទុះឡើងនៅផ្សារតាមទំនើបនានា ក្នុងទីក្រុងហូជីម៉ិញ ដែលមានប្រជាជនរហូតដល់ទៅ៩លាននាក់នេះ កាលពីចុងសប្តាហ៍កន្លងទៅ មុននឹងមានការបិទខ្ទប់កាន់តែតឹងរ៉ឹង ដែលបានចាប់ផ្តើមនៅថ្ងៃច័ន្ទ ដើមសប្ដាហ៍នេះ ហើយបានហាមឃាត់អ្នកស្រុកមិនឱ្យចេញពីផ្ទះ។

ការចេញវិធានការរឹងបន្តឹង ដ៏តឹងរ៉ឹងបំផុតរបស់វៀតណាម នេះធ្វើឡើងស្របពេលករណីឆ្លង និងករណីស្លាប់ដោយសារវីរុសកូវីដ-១៩ កើនឡើងខ្លាំងគួរឱ្យព្រួយបារម្ភ។

យោងតាមសាក្សី ដែលឃើញហេតុការណ៍ផ្ទាល់ និងរូបថតលើប្រព័ន្ធផ្សព្វផ្សាយរដ្ឋឱ្យដឹងថា នៅព្រឹកថ្ងៃច័ន្ទ ដើមសប្ដាហ៍នេះ ទាហានបានត្រួតពិនិត្យលិខិតអនុញ្ញាតធ្វើដំណើររបស់ពលរដ្ឋនៅតាមដងផ្លូវ និងចុះចែកអំណោយស្បៀងអាហារ។

ទីក្រុងនេះ បានចាប់ផ្តើមរឹតបន្តឹង ការធ្វើដំណើរកាលពីដើមខែមុន ប៉ុន្តែការឆ្លងបានបន្តកើនឡើងខ្លាំង បន្ទាប់ពីអាជ្ញាធរទម្លាយឱ្យដឹងថា ការអនុវត្តវិធានការរឹតបន្តឹងមានភាពធូររលុង។

យោងតាមក្រសួងសុខាភិបាលវៀតណាម ឱ្យដឹងថា ទីក្រុងនេះបានកត់ត្រាករណីឆ្លងសរុបចំនួន១៧៦.០០០ករណី និងករណីស្លាប់ចំនួន៦.៦៧០ករណី។ តួលេខនេះស្មើនឹងពាក់កណ្តាលនៃករណីឆ្លងសរុប និងស្មើ៨០%នៃករណីស្លាប់សរុបទូទាំងប្រទេសជិតខាងររបស់កម្ពុជា មួយនេះ។

ក្រសួងដដែលនិយាយថា ប្រទេសវៀតណាម ក្នុងរយៈពេលប៉ុន្មានសប្តាហ៍ចុងក្រោយនេះ បានបញ្ជូនក្រុមគ្រូពេទ្យ និងគិលានុបដ្ឋាកចំនួន១៤.៦០០នាក់បន្ថែមទៀតទៅកាន់ទីក្រុងនេះ និងបណ្ដាខេត្តជាប់ទីក្រុងនេះ ដើម្បីជួយទប់ស្ថានការណ៍ឆ្លងកូវីដ-១៩។

ដោយសារមានអ្នកឆ្លងច្រើនពេក និងគ្មានកន្លែងសម្រាប់ទទួលព្យាបាល អ្នកជំងឺស្រាល ឬអ្នកជំងឺដែលគ្មានរោគសញ្ញា ត្រូវបានអនុញ្ញាតឱ្យធ្វើចត្តាឡីស័ក និងព្យាបាលនៅផ្ទះដោយខ្លួនឯង។

ប្រជាជននៅសង្កាត់ Phu Nhuan និងសង្កាត់ Go Vap នៃក្រុងហូជីមិញ បានប្រាប់ទីភ្នាក់ងារព័ត៌មាន Reuters ថា ពួកគេទទួលបានអំណោយអង្ករ ត្រីសាច់ និងបន្លែបង្ការ។

រដ្ឋាភិបាលវៀតណាម បានប្រកាសកាលពីថ្ងៃសុក្រ សប្ដាហ៍កន្លងថា ខ្លួននឹងបញ្ជូនអំណោយអង្ករចំនួន១៣០.០០០តោន ចេញពីឃ្លាំងរដ្ឋទៅកាន់ទីក្រុងហូជីមិញ និងខេត្តក្រុងចំនួន២៣ផ្សេងទៀតដើម្បីចែកជូនពលរដ្ឋ។

បន្ទាប់ពីអាចគ្រប់គ្រងការរីករាលដាលកូវីដ-១៩ បានល្អច្រើនគួរឱ្យសរសើរកាលពីឆ្នាំមុន ប្រទេសវៀតណាម រហូតមកទល់ពេលនេះ មានករណីឆ្លងសរុបចំនួន៣៤៨.០០០ករណី និងករណីស្លាប់យ៉ាងតិច៨.២៧៧ករណី ដែលភាគច្រើនត្រូវបានកត់ត្រានៅក្នុងការផ្ទុះវីរុសបំប្លែងខ្លួនថ្មី Delta ចាប់តាំងពីខែចុងខែមេសា មក។

យោងតាមទិន្នន័យបង្ហាញថា ក្នុងចំណោមពលរដ្ឋសរុប៩៨លាននាក់ របស់ប្រទេ​សវៀតណាម មានពលរដ្ឋតែប្រមាណ១,៨លាននាក់ប៉ុណ្ណោះ ឬស្មើ១,៨%ដែលបានចាក់វ៉ាក់សាំងគ្រប់ដូស ហើយនេះជាអត្រាទាបបំផុតនៅក្នុងតំបន់៕

ស្តង់ដារវាយតម្លៃអចលនទ្រព្យរបស់ប្រទេសកម្ពុជាបានឈានដល់ចំនុចខ្ពស់បើធៀបនឹងបណ្តាប្រទេសក្នុងតំបន់

ដោយ សុជាតា

ភ្នំពេញៈ អ្នកជំនាញអចលនទ្រព្យនៅកម្ពុជា បានលើកឡើងថា ស្តង់ដារវាយតម្លៃរបស់ក្រុមហ៊ុនក្នុងស្រុក មានគុណភាព និងទិន្នន័យគ្រប់គ្រងទីផ្សារបានល្អជាង ក្រុមហ៊ុនវាយតម្លៃអចលនទ្រព្យខាងក្រៅ ដែលពឹងផ្អែកលើទិន្នន័យស្រាវជ្រាវជាគោល។

លោកឌឹត ចាន់ណា អគ្គនាយកក្រុមហ៊ុន Lucky real estate  បានប្រាប់ Property Area Asiaនាព្រឹកថ្ងៃទី២៣ សីហានេះថា ដោយសារតែប្រទេសកម្ពុជា បានកំណត់ស្តង់ដារវាយតម្លៃអចលនទ្រព្យ តាមស្តង់ដារប្រទេសអង់គ្លេស ព្រមទាំងធនធានមនុស្សសំបូរបែប ដែលមានបទពិសោធនចាប់ពី១០ ទៅ២០ឆ្នាំ ធ្វើអោយក្រុមហ៊ុនវាយតម្លៃអចលនទ្រព្យនៅកម្ពុជា បានគ្រប់គ្រងទិន្នន័យទីផ្សារ បានជាប់លាប់ជាងក្រុមហ៊ុនបរទេស។

លោកបន្តថា “នាពេលបច្ចុប្បន្ននេះ ស្តង់ដារវាយតម្លៃអចលនទ្រព្យរបស់ប្រទេសកម្ពុជា គឺមានកម្រិតខ្ពស់ បើធៀបនឹងបណ្តាមួយចំនួននៅតំបន់អាស៊ាន និងលើពិភពលោក”។

លោកបន្ថែមទៀត ក្រុមហ៊ុន Lucky  Real estate មានស្តង់ដារវាយតម្លៃតាមអង់គ្លេសដែរ ព្រមទាំងអ្នកជំនាញ ដែលបណ្តុះបណ្តាលក្នុងស្រុក នៅបរទេស ដែលមានបទពិសោធន៍ជាង១០ឆ្នាំផងដែរ។ ក្រុមហ៊ុនបានសហការជាមួយនឹង ធនាគារពាណិជ្ជ និងធនាគារឯកទេស និងមីក្រូហិរញ្ញវត្ថុនានា។ បច្ចេកទេសក្នុងការវាយតម្លៃ ដែលមានរូបមន្តប្រើប្រាស់ទូទាំងសកលលោក គឹ ប្រើប្រាស់ដូចគ្នាប្រកបដោយ គុណភាព ហើយរបាយការណ៍វាយតម្លៃគឺ ក្រុមហ៊ុនក្នុងស្រុកធ្វើបានក្នុងកម្រិតខ្ពស់៕

រដ្ឋាភិបាលចុះហត្ថលេខាជាមួយក្រុមហ៊ុនកូរ៉េដើម្បីពង្រីកផ្លូវជាតិលេខ៤៨

ដោយៈសុខ ហេង

ភ្នំពេញៈ គម្រោងសាងសង់ និងលើកកម្រិតគុណភាពផ្លូវជាតិលេខ៤៨ ប្រវែងសរុប១៤៨គីឡូម៉ែត្រ ចាប់ពីចំការហ្លួង ស្រុកស្រែអំបិលដល់ក្រុងខេមរភូមិន្ទ ខេត្តកោះ​កុង ត្រូវបានចុះហត្ថលេខាលើកិច្ចសន្យាគម្រោងសាងសង់ ក្រោមហិរញ្ញប្បទានសម្បទានពីសាធារណរដ្ឋកូរ៉េ។

ពិធីចុះហត្ថលេខាដែលបានធ្វើនៅថ្ងៃទី២៣ សីហានេះ ធ្វើឡើងក្រោមអធិបតីភាព លោកទេសរដ្ឋមន្ត្រី ស៊ុន ចាន់ថុលរដ្ឋមន្ត្រីក្រសួងសាធារណការ និងដឹកជញ្ជូន ដោយមានការចូលរួមដោយផ្ទាល់ និងតាមរយៈប្រព័ន្ធវីដេអូពីចម្ងាយ ពីថ្នាក់ដឹកនាំក្រសួងទទួលបន្ទុក តំណាងក្រុមហ៊ុនសាងសង់ តំណាង ក្រុមហ៊ុនទីប្រឹក្សាបច្ចេកទេស និងភាគីពាក់ព័ន្ធផងដែរ។

ផ្លូវនេះមានប្រវែងសរុប១៤៨ គីឡូម៉ែត្រ ចាប់ពីចំការហ្លួង ស្រុកស្រែអំបិល ដល់ ក្រុងខេមរភូមិន្ទ ខេត្តកោះកុង ក្នុងនោះប្រវែង១២២,៩ គីឡូម៉ែត្រមានចំនួនពីរគន្លងប្រវែ​ង២៥,១គីឡូម៉ែត្រមាន ចំនួន៤ គន្លងលើទីតាំងចំនួនបួនគឺ៖ ១). ប្រវែង១២គីឡូម៉ែត្រ (គ.ម ០+០០០- គ.ម ១២+០០០) ២). ប្រវែង៣,៤ គីឡូម៉ែត្រ  (គ.ម ៥៧+៧០០ – គ.ម ៦១+១០០) ចំណុចអន្ទង់អាំង និងជាកន្លែងប្តូរខ្សែផ្លូវថ្មីទី១(Realignment) ៣). ប្រវែង៤,២គីឡូម៉ែត្រ (គ.ម ១២៤+៤០០ – គ.ម  ១២៨+៦០០)ចំណុច ចំណោតតាតៃ និងជាកន្លែង ប្តូរ ខ្សែផ្លូវថ្មីទី២(Realignment) និង៤). ប្រវែង៥,៥  គីឡូម៉ែត្រ(គ.ម ១៤២+៥០០ – គ.ម ១៤៨+០៣៨) ទទឹងផ្លូវ១១ម៉ែត្រ(ពីរគន្លង) ១៨,៥ម៉ែត្រដល់ ២១,៥ម៉ែត្រ(បួនគន្លង) ក្រាលបេតុង កៅស៊ូ(AC) (កម្រាស់ ០៧សង់ទីម៉ែត្រ ) បេតុងសរសៃដែក(២៥សង់ទីម៉ែត្រ) ត្រង់ផ្លូវប្រសព្វ។

ជាងនេះទៅទៀត ផ្លូវនេះមានការកែសម្រួល ចំណុចផ្លូវប្រសព្វចំនួន០៥កន្លែង ១). ចំការហ្លួង ២). ស្រែអំបិល ៣). ផ្លូវបំបែកចូលទៅគីរីសាគរ ៤). ផ្លូវបំបែកចូលទៅទំនប់វារីអគ្គីសនី ៥).ផ្លូវបំបែកចូលទៅ ព្រលានយន្តហោះ សាងសង់ស្ពានថ្មីចំនួន០៤កន្លែង (ប្រវែង១១៣ម) ប្រព័ន្ធបង្ហូររំដោះទឹក លូមូលបេតុង ១៤០កន្លែង(ថ្មី១៥កន្លែង និងពង្រីក១២៥កន្លែង) លូប្រអប់ ១៥កន្លែង(ថ្មី ៣កន្លែង និងពង្រីក ១២កន្លែង) បំពាក់គ្រឿងបរិក្ខារសុវត្ថិភាពចរាចរណ៍ ការកំណត់ល្បឿន៨០គីឡូម៉ែត្រ/ម៉ោង (តំបន់ទំនាប ឬផ្លូវត្រង់) ៦០គីឡូម៉ែត្រ/ម៉ោង (តំបន់ខ្ពង់រាប ឬផ្លូវកោង) រយៈពេលសាងសង់ចំនួន៣២ខែ គ្រោងចាប់ផ្តើមសាង សង់នៅថ្ងៃទី០១ ខែវិច្ឆិកា ឆ្នាំ២០២១។

គម្រោងសាងសង់ផ្លូវនេះ គ្រោងចំណាយទឹកប្រាក់សរុបជាង៧៨លានដុល្លារអាមេរិក ក្នុងនោះ តម្លៃគម្រោងសាងសង់ចំនួនជាង៥៩ លានដុល្លារអាមេរិក តម្លៃសិក្សានិងត្រួតពិនិត្យ គម្រោងចំនួន៦,០០០,០០០ដុល្លារអាមេរិក ក្រោមមូលនិធិនៃកិច្ចសហប្រតិបតិ្តការអភិវឌ្ឍន៍សេដ្ឋកិច្ច (The Economic Development Cooperation Fund-EDCF) នៃសាធារណរដ្ឋកូរ៉េ ថវិកាបដិភាគរបស់រាជរដ្ឋាភិបាលកម្ពុជាចំនួនជាង១៣ លានដុល្លារអាមេរិក សម្រាប់ការងារដោះស្រាយផល ប៉ះពាល់ដោះមីន និងគ្រឿងយុទ្ធភណ្ឌមិនទាន់ផ្ទុះ ការគ្រប់គ្រងគម្រោង និងពន្ធអាករ សាងសង់ដោយ ក្រុមហ៊ុនសាងសង់កូរ៉េ ILSUNG & HANIL  Joint Venture និងត្រួតពិនិត្យបច្ចេកទេសក្រុមហ៊ុន ទីប្រឹក្សាបច្ចេកទេស KCI & KECC Joint Venture។

ផ្លូវនេះគឺជាផ្នែកមួយនៃផ្លូវហាយវ៉េអាស៊ាន១២៣ (ASEAN Highway 123) ដែលភ្ជាប់ប្រទេសកម្ពុជា ទៅព្រះរាជាណាចក្រថៃឡង់ដ៏ និងភ្ជាប់ពីភាគខាងកើតនៃឧបទ្វីបឥណ្ឌូចិន ទៅភាគខាងលិចនៃឧបទ្វីប ឥណ្ឌូចិន ត្រង់ក្រុងដាវ៉េ(Dawai) ប្រទេសភូមា។ តាមបណ្តោយផ្លូវជាតិលេខ៤៨នេះ មានតំបន់សេដ្ឋកិច្ច ពិសេស(SEZ) ចំនួន០៤កន្លែង៖ ១). តំបន់សេដ្ឋកិច្ចពិសេសកោះកុង(Koh Kong SEZ) ២). តំបន់ សេដ្ឋកិច្ចពិសេសស៊ួយ ឆេង (Suoy Chheng SEZ) ៣). តំបន់សេដ្ឋកិច្ចពិសេសគិរីសាគរកោះកុង (Kirisakor Koh Kong SEZ) និង៤). តំបន់សេដ្ឋកិច្ចពិសេសរតនា(Ratana SEZ) ព្រមទាំងមានតំបន់ ទេសចរណ៍គិរីសាគរផងដែរ។

លោកស៊ុន ចាន់ថុលបានថ្លែងអណរគុណយ៉ាងជ្រាលជ្រៅដល់ រដ្ឋាភិបាលសាធា​រណរដ្ឋកូរ៉េ ដែលបានផ្តល់ប្រាក់កម្ចីដើម្បីស្តារ និងលើកកម្ពស់គុណភាពផ្លូវជាតិលេខ៤៨ ក្រោមឥណទាន ប្រាក់កម្ចីរបស់សាធារណរដ្ឋកូរ៉េ(EDCF) និងបានសំណូមពរឱ្យក្រុមហ៊ុនសាងសង់អនុវត្ត គម្រោងសាងសង់ផ្លូវនេះ ប្រកបដោយគុណភាពខ្ពស់ ស្របតាមលក្ខខណ្ឌនៃកិច្ចសន្យាសាងសង់ និងតាម បទដ្ឋាបច្ចេកទេស ជាពិសេសត្រូវតាមដាន និងត្រួតពិនិត្យលក្ខណៈបច្ចេកទេសនៃការសាងសង់ ឱ្យបាន ខ្ជាប់ ខ្ជួនដើម្បីធានាថាផ្លូវនេះមានគុណភាពរឹងមាំ និងអាចប្រើប្រាស់ជាប់បានយូរអង្វែង។

លោកទេសរដ្ឋមន្ត្រី ក៏បានផ្ដាំផ្ញើឱ្យក្រុមសាងសង់ និងក្រុមហ៊ុនត្រួតពិនិត្យ បច្ចេក​ទេសសាងសង់ ត្រូវយកចិត្តទុកដាក់សាងសង់ ដោយឈរលើគោលការណ៍គុណភាពជាចម្បង និងត្រូវស្រោចទឹកឱ្យបានជាប្រចាំដើម្បីកុំឱ្យរំខាន និងប៉ះពាល់ដល់សុខភាពអ្នកធ្វើដំណើរ និងបងប្រជាពល រដ្ឋដែលរស់នៅតាមបណ្ដោយផ្លូវនោះ និងត្រូវធានាថាគ្មានគ្រោះថ្នាក់ចរាចរណ៍នៅលើដងផ្លូវនេះ តាមរយៈការបំពាក់ផ្លាកសញ្ញាចរាចរណ៍ឱ្យបានគ្រប់គ្រាន់ និងមានភ្លើងបំភ្លឺនៅពេលយប់ផងដែរ។

គម្រោងលើកកម្រិតគុណផ្លូវជាតិលេខ៤៨នេះ នឹងផ្តល់អត្ថប្រយោជន៍សំខាន់ៗដូច តទៅ៖ ១) ធ្វើឱ្យប្រសើរឡើងនូវចរាចរណ៍របស់អ្នកដំណើរ តាមរយៈការកាត់បន្ថយពេលវេលា និងថ្លៃធ្វើ ដំណើរនិងដឹកជញ្ជូន ២). បង្កើនការធានាសុវត្ថិភាពចរាចរណ៍ក្នុងការធ្វើដំណើរតាមរយៈបំពាក់គ្រឿង បរិក្ខារសុវត្ថិភាពគ្រប់គ្រាន់ និងកែសម្រួលកាំកំណោ​ង និងចំណោតខ្លាំងរបស់ផ្លូវ ៣). ជំរុញសក្តានុពល តំបន់ទេសចរណ៍ ៤). បង្កើនការអភិវឌ្ឍន៍សេដ្ឋកិច្ចក្នុងតំបន់ជាពិសេសជាមួយប្រទេសជិតខាង៕

ខណ្ឌដង្កោគ្រប់គ្រងទីផ្សារលំនៅឋានតម្លៃទាបច្រើនជាងគេនៅភាគខាងត្បូងក្រុងភ្នំពេញ

ដោយៈសហការី

ភ្នំពេញៈ ស្ថិតនៅភាគខាងត្បូងរាជធានីភ្នំពេញ ខណ្ឌដង្កោគឺជាទីតាំងដ៏ល្អមួយសម្រាប់ក្រុមហ៊ុនអភិវឌ្ឍន៍ សម្រាប់សាងសង់លំនៅឋានតម្លៃទាប ក្នុងចំនួនយ៉ាងច្រើន ដើម្បីឆ្លើយតបនឹងតម្រូវការទីផ្សារក្នុងពេលបច្ចុប្បន្ន។

យោងតាមរបាយការណ៍សិក្សា ទីតាំងភូមិសាស្រ្តនៅភាគខាងត្បូង រាជធានីភ្នំពេញរបស់ក្រុមហ៊ុន CBRE បានឲ្យដឹងថា ដង្កោគឺជាខណ្ឌមួយ ដែលមានការផ្គត់ផ្គង់លំនៅឋានតម្លៃទាបច្រើនជាងគេចំនួន៥៥% នៃចំណែកទីផ្សារសរុប ខណៈ​ដែលខណ្ឌមានជ័យ​មានចំណែកទីផ្សារ៣២% និងស្រុកកណ្ដាលស្ទឹងចំនួន១៣%។ ដោយឡែកសម្រាប់គម្រោងលំនៅឋានតម្លៃមធ្យមវិញ​ ខណ្ឌមានជ័យមានការផ្គត់ផ្គង់រហូតទៅដល់៥៣% ខណៈ​ខណ្ឌដង្កោមានចំនួន​៤២% និងក្រុងតាខ្មៅចំនួន៥%។​​​

ការកើនឡើងនៃគម្រោងលំនៅឋាន តម្លៃទាបនៅក្នុងស្រុងកណ្ដាលស្ទឹង ដែលស្ថិតនៅភាគខាងត្បូងនៃរាជធានីភ្នំពេញ​ កំពុងបង្ហាញអំពីសក្ដានុពល ​ទៅកាន់អ្នកអភិឌ្ឍន៍ជាតិ​​​ និងអន្តរជាតិ ឱ្យយល់ដឹងកាន់តែច្បាស់ អំពីតម្រូវការរបស់ប្រជាជន នៅក្នុងតំបន់មួយនេះ។

នៅក្នុងពេលអនាគតដ៏ខ្លី​ ដីធ្លី​ដែលមានតម្លៃទាប រួមទាំងគម្រោងហេដ្ឋារចនាសម្ព័ន្ធកំពុងសាងសង់ នឹងទាក់ទាញវិនិយោគិនជាច្រើន មកអភិវឌ្ឍន៍គម្រោងលំនៅឋាន​​ជាបន្តបន្ទាប់​នៅភាគខាងត្បូង។​ បច្ចុប្បន្ន គម្រោង R&F City Mansion ស្ថិតនៅតាមបណ្ដោយផ្លូវ៦០ម៉ែត្រ គឺជាគម្រោងអភិវឌ្ឍលំនៅឋានធំជាង ដែលក្នុងនោះមានគម្រោងអភិវឌ្ឍពាណិជ្ជកម្ម និងលំនៅឋាន ដែលគ្របដណ្ដប់លើផ្ទៃដីប្រមាណ ៧.៧ ហិកតា​ ដោយផ្ទៃសាងសង់មានទំហំ៥៦០.០០០ ម៉ែត្រការ៉េ​។

របាយការណ៍ប្រចាំឆមាសទី២ ឆ្នាំ២០២១​ របស់ CBRE បានលើកឡើងថា គម្រោ​ងលំនៅឋាន ក្នុងតំបន់ភាគខាងត្បូង នឹងកើនឡើងច្រើនថែមទៀត ដោយសារតម្លៃដីធ្លីក្នុងតំបន់នោះនៅទាបនៅឡើយ។ គម្រោងលំនៅឋាន ដែលស្ថិតនៅក្នុង​ខណ្ឌដង្កោ ខណ្ឌមានជ័យ​ ស្រុកកណ្តាលស្ទឹង​ និ​ងក្រុងតាខ្មៅ រហូតមកដល់ពេលនេះបានបញ្ចប់ការសាងសង់ចំនួន៥៤​គម្រោង ខណៈដែលគម្រោង​ចំនួន៣០ផ្សេងទៀត កំពុងស្ថិតក្នុងដំណាក់កាលសាងសង់នៅឡើយ។​​

ទន្ទឹមគ្នានេះ នៅភាគខាងត្បូង ក៏មានគម្រោងអភិវឌ្ឍលំនៅឋានខុនដូ មួយចំនួនផងដែរ ក្នុងនោះ​គម្រោងខុនដូចំនួន៣ ដែលមានលំនៅឋានសរុបជាង១០០០ យូនីត បានបញ្ចប់ការសាងសង់ជាស្ថាពរ។​ នាពេលអនាគត ​តំបន់នេះ​នឹងមានចំនួនលំនៅឋានប្រមាណ ៣.៦០០យូនីតបន្ថែមទៀត សម្រាប់ផ្គត់ផ្គង់តម្រូវការទីផ្សារ នៅក្នុងឆ្នាំ២០២៣​​​ ខាងមុខ៕

https://www.harbor-property.com/km/wiki/detail/232

ក្រុមការងាររាជរដ្ឋាភិបាល និងឯកជននឹងដាក់សំណើរទៅសម្តេចតេជោដើម្បីបើកទទួលភ្ញៀវទេសចរណ៍សុវត្ថិភាព

ដោយៈគង់ សូរិយា

ភ្នំពេញៈ ក្រុមការងារដ្ឋាភិបាល និងវិស័យឯកជននឹងបើកកិច្ចប្រជុំជាមួយ លោកឧបនាយករដ្ឋមន្រ្តីអូន ព័ន្ឋមុនីរ័ត្នរដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ ដើម្បីគោរពស្នើសុំការអនុម័តពីសម្តេចតេជោនាយករដ្ឋមន្រ្តីហ៊ុន សែន ដើម្បីឈានទៅបើកទទួលភ្ញៀវទេសចរណ៍សុវត្ថិភាពនាពេលខាងមុខ។

ក្នុងស្មារតីអង្គប្រជុំ ដែលបានធ្វើឡើងកាលពីចុងសប្តាហ៍មុន ក្រុមការងាររដ្ឋាភិបាល និងវិស័យឯកជនបានឯកភាព យកសេចក្តីព្រាងផែនការយុទ្ធសាស្រ្តនេះ ដាក់ឆ្លងក្នុងកិច្ចប្រជុំរួមគ្នា រវាងគណៈកម្មាធិការគោលនយោបាលសេដ្ឋកិច្ច និងហិរញ្ញវត្ថុ គណៈប្រចាំការនៃគណៈកម្មការជាតិប្រយុទ្ធនឹងជំងឺកូវីដ-១៩ និងគណៈកម្មាធិការជាតិអភិវឌ្ឍន៍ទេស​ចរណ៍ ក្រោមអធិបតីភាព លោកអគ្គបណ្ឌិតសភាចារ្យ អូន ព័ន្ធមុន្នីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ នៅថ្ងៃទី២ ខែកញ្ញា ឆ្នាំ២០២១ ដើម្បីឈានទៅគោរពស្នើសុំការសម្រេច និងអនុម័តយល់ព្រមពីសម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា ដើម្បីឈានទៅការប្រកាសបើកទទួលទេសចរណ៍សុវត្ថិភាពនាពេលខាងមុខ។

កិច្ចប្រជុំកាលពីសប្តាហ៍មុន បានធ្វើឡើងក្រោមអធិបតីភាពឯកឧត្ដម ថោង ខុន រដ្ឋមន្ត្រីក្រសួងទេសចរណ៍ និងជាប្រធានក្រុមការងាររាជរដ្ឋាភិបាល និងឯកជន ដើម្បីស្តារ និងលើកស្ទួយវិស័យទេសចរណ៍កម្ពុជា ក្នុង និងក្រោយវិបត្តិជំងឺកូវិដ-១៩ តាមរយៈប្រព័ន្ធអនឡាញ (Zoom Meeting) ដោយមានការចូលរួមពីឯកឧត្ដមអនុប្រធាន សមាជិក-សមាជិកាក្រុមការងារ និងតំណាងវិស័យឯកជន សរុបប្រមាណ១៣២នាក់។

កិច្ចប្រជុំបានផ្តោតលើរបៀបវារៈសំខាន់ៗ រួមមាន ការរៀបចំផែនការសកម្មភាពនៃក្រុមការងាររាជរដ្ឋាភិបាល និងឯកជន និងការពិភាក្សាលើសេចក្តីព្រាង “ផែនការយុទ្ធសាស្ត្រស្តីពីការបើកទទួលទេសចរណ៍សុវត្ថិភាព” ដែលជាឯកសារដ៏មានសារៈសំខាន់ ចាំបា​ច់ និងចំពេលវេលាសម្រាប់ពិនិត្យលទ្ធភាព ក្នុងការបើកទទួលភ្ញៀវទេសចរអន្តរជាតិឡើងវិញ ជាមួយកិច្ចខិតខំក្នុងការវិលត្រឡប់ឱ្យបានឆាប់ទៅរក “ប្រក្រតីភាពថ្មី”នៃសកម្ម​ភាពសេដ្ឋកិច្ច-សង្គម និងជីវភាពរស់នៅប្រចាំថ្ងៃរបស់ប្រជាពលរដ្ឋ។

ការបើកទទួលទេសចរណ៍សុវត្ថិភា ពនឹងត្រូវធ្វើឡើងតាមដំណាក់កាលជាជំហានៗ ដោយឈរលើគោលការណ៍រក្សាបាននូវតុល្យភាព រវាងសកម្មភាពសេដ្ឋកិច្ច-សង្គម និងការធានាសុវត្ថិភាព និងសុខភាពសាធារណៈ សម្រាប់ប្រជាពលរដ្ឋ ភ្ញៀវទេសចរ និងអ្នកដំណើរគ្រប់ប្រភេទ ស្របតាមស្មារតីនៃ “ការធ្វើដំណើរ និងទេសចរណ៍សុវត្ថិភាព” ព្រមទាំងការចាប់យកឱកាសធ្វើកំណែទម្រង់វិស័យទេសចរណ៍កម្ពុជាឱ្យក្លាយជាគោលដៅទេសចរណ៍ប្រកបដោយគុណភាព សុវត្ថិភាព និងនិរន្តរភាព៕

 

វិបត្តិកូវីដ-១៩ បង្ហាញសញ្ញាថមថយ ធ្វើឲ្យការនាំចេញរបស់កូរ៉េខាងត្បូងហក់ឡ់ងខ្ពស់

ដោយៈសុខុម

សេអ៊ូល: ទិន្នន័យរបស់ទីភ្នាក់ងារគយ បានបង្ហាញនៅថ្ងៃច័ន្ទ ទី២៣ សីហា នេះថា ការនាំចេញរបស់កូរ៉េខាងត្បូង ក្នុងរយៈពេល២០ថ្ងៃដំបូងនៃខែសីហា នេះបានកើនឡើងខ្ពស់រហូតដល់ទៅ៤០,៩%។ នេះយោងតាមការចុះផ្សាយរបស់សារព័ត៌មាន CNA ដែលដកស្រង់ប្រភពពីទភ្នាក់ងារព័ត៌មាន Reuters។

កំណើនខ្ពស់នៅក្នុងការនាំចេញនេះ បានកើតមានឡើង ស្របពេលការនាំចូលក៏បានកើនឡើងខ្ពស់ដល់ទៅ៥២,១% ដែលនាំឱ្យមានឱនភាពពាណិជ្ជកម្ម (ការនាំចូលច្រើនជាងការនាំចេញ) បណ្តោះអាសន្នចំនួន៣,៥១ពាន់លានដុល្លារអាមេរិក។

ក្រុមអ្នកជំនាញលើកឡើងថា កំណើនខ្ពស់នៃការនាំចេញ និងនាំចូលរបស់ប្រទេសនេះឆ្លុះបញ្ចាំងថា វិបត្តិកូវីដ-១៩ នៅទូទាំងពិភពលោកបានបង្ហាញសញ្ញាថមថយ ឆ្ពោះទៅរកភាពស៊ាំក្នុងសហគមន៍ ក្នុងពេលដ៏ខ្លីខាងមុខនេះគួរឱ្យអបអរសាទរ។

ការបំបែកទិន្នន័យបានបង្ហាញថា ការនាំចេញផលិតផលបន្ទះឈីបបានកើនឡើង៣៩,៨% ខណៈការនាំចេញផលិតផលប្រេងកាត បានកើនឡើង៥៥,៣% ហើយការនាំចេញរថយន្តបានកើនឡើង៣៧,០%។

ទិន្នន័យដដែលក៏បានបង្ហាញផងដែរថា ការនាំចេញរបស់ប្រទេសនេះទៅកាន់ប្រទេសចិន បានកើនឡើង៣៧,៣% ខណៈការនាំចេញទៅកាន់សហរដ្ឋអាមេរិក បានកើនឡើង៥០,១% ហើយការនាំចេញទៅកាន់សហភាពអឺរ៉ុប បានកើនឡើង៤២,៧%៕

សហរដ្ឋអាមេរិកបន្តពង្រីកការដាក់សម្ពាធលើប្រទេសរុស្ស៊ីដោយសារមហិច្ឆតា

ដោយៈឧត្តម

មូស្គូ: សហរដ្ឋអាមេរិកបាន និងកំពុងដុតកំដៅប្រទេសរុស្ស៊ីសាជាថ្មី ទាក់ទងនឹងគំរោងពង្រីកសក្តានុពលសេដ្ឋកិច្ចរបស់រុស្ស៊ី ជាអ្វីដែលសហរដ្ឋអាមេរិកទំនងជាមិនសប្បា​យចិត្តលើការវិនិយោគដ៏៏ធំរបស់រុស្ស៊ី។

ក្រសួងការបរទេសរុស្ស៊ី បានចេញសេចក្តីថ្លែងការណ៍កាលពីថ្ងៃសៅរ៍ ចុងសប្ដាហ៍កន្លងទៅថា រដ្ឋាភិបាលក្រុងមូស្គូ បានប្ដេជ្ញាចាត់វិធានការសងសឹកវិញ បន្ទាប់ពីសហរដ្ឋអាមេរិក បានដាក់ទណ្ឌកម្មថ្មីផ្ទួនៗមកលើនាវារុស្ស៊ី មួយគ្រឿង និងក្រុមហ៊ុន២ទៀតដែលចូលរួមពាក់ព័ន្ធក្នុងគម្រោងបំពង់បង្ហូរឧស្ម័នខ្នាតយក្ស Nord Stream 2។

យោងតាមការចុំផ្សាយរបស់ទីភ្នាក់ងាព័ត៌មាន Reuters ឱ្យដឹងថា គម្រោងយក្សរបស់រុស្ស៊ី ដែលមានទំហំទឹកប្រាក់វិនិយោគ រហូតដល់១១ពាន់លានដុល្លារអាមេរិកខាងលើនេះ ជាចំណុចក្ដៅដែលបង្កឱ្យមានភាពតានតឹងជាថ្មី រវាងរដ្ឋាភិបាលកក្រុងមូស្គូ និងរដ្ឋាភិបាលក្រុងវ៉ាស៊ីនតោន ព្រោះសហរដ្ឋអាមេរិក មិនចង់ឱ្យរុស្ស៊ី មានសេដ្ឋកិច្ចកាន់តែរឹងមាំ។

គម្រោងយក្សនេះ មានទំហំធំជាងគម្រោងបំពង់បង្ហូរឧស្ម័ន Nord Stream ដែលមានស្រាប់កាត់សមុទ្រ Baltic Sea ទៅទៀត ហើយវានឹងផ្ដល់លទ្ធភាពឱ្យរុស្ស៊ី វាងប្រទេសអ៊ុយក្រែន ពេលបំពង់បង្ហូរឧស្ម័ននេះតភ្ជាប់ទៅដល់តំបន់អឺរ៉ុប។

កាលពីថ្ងៃសុក្រសប្ដាហ៍កន្លងទៅ រដ្ឋាភិបាលក្រុងវ៉ាស៊ីនតោន បានដាក់ទណ្ឌកម្មលើនាវាមួយគ្រឿង។ ម្ចាស់នាវានោះ និងក្រុមហ៊ុនសាងសង់មួយទៀត ប៉ុន្តែក្រុមអ្នកប្រឆាំងគម្រោងនេះលើកឡើងថា វិធានការទាំងនេះមិនទាន់គ្រប់គ្រាន់ ដែលអាចបញ្ឈប់គម្រោងយក្សខាងលើបានឡើយ។

នៅក្នុងថ្ងៃដដែល សហរដ្ឋអាមេរិក និងប្រទេសអង់គ្លេស ក៏បានដាក់ទណ្ឌកម្មលើមនុស្សប៉ុន្មាននាក់ ដែលខ្លួននិយាយថា ជាភ្នាក់ងារស៊ើបការណ៍សម្ងាត់របស់រុស្ស៊ី ដែលជាអ្នកទទួលខុសត្រូវ ចំពោះការបំពុលសម្លាប់លោក Alexei Navalny ដែលជាអ្នករិះគន់វិមានក្រឹមឡាំង (រុស្ស៊ី) កាលពីឆ្នាំមុនផងដែរ។

ជាការឆ្លើយតបទៅនឹងទណ្ឌកម្មថ្មីនេះ លោកស្រី Maria Zakharova អ្នកនាំពាក្យក្រសួងការបរទេសរុស្ស៊ីបានថ្លែងថា “យើងចាត់ទុកទង្វើបង្ករឿង ពីសំណាក់រដ្ឋការលោក ចូ បៃឌិន ថាខ្វះឆន្ទៈនយោបាយ និងជាការគ្មានឆន្ទៈ ក្នុងការកសាងទំនាក់ទំនងអាមេរិក-រុស្ស៊ី ដោយឈរលើមូលដ្ឋានភាពជាដៃគូ”៕

សក្តានុពលធនធានធម្មជាតិ វាលវែងទាក់ទាញទេសចរណ៍ លែងក្លាយជាវាលវែងដាច់អាល័យទៀតហើយ

ដោយៈសការី

ភ្នំពេញៈ ផ្លូវជាតិលេខ៥៥ បានក្លាយជាទីចាប់អារម្មណ៍ជាងគេ វាត្រូវបានសាងសង់ប្រប និងពត់ពេនតាមជ្រលងភ្នំ និងមានរាងរៅដូចពល់ “វារ” គមនាគមន៍ដ៏សំខាន់នេះ ប្រៀបដូចជាអន្តសញ្ញាណទឹកដីស្រុកវាលវែង ខេត្តពោធិ៍សាត់។

តំបន់នេះ បាននិងកំពុងអភិវឌ្ឍខ្លួនទៅមុខជាលំដាប់ ពិសេសលើវិស័យទេសចរ​ណ៍ ក្នុងនោះមានរមណីយដ្ឋាន តំបន់ទេសចរណ៍ ព្រៃ ភ្នំ ទឹកធ្លាក់ និងតំបន់គយគន់ទេសភាពជាច្រើនទៀត ជាពិសេសមានព្រំដែន ជាប់នឹងខេត្តត្រាតប្រទេសថៃ ដែលទីតាំងទាំងនោះ សុទ្ធសឹងតែជាទីគាប់ប្រាថ្នា របស់បណ្ដាភ្ញៀវទេសចរជិតឆ្ងាយ។

ប្រសិនបើភ្ញៀវទេសចរណ៍ធ្វើដំណើរចេញពីខេត្តពោធិ៍សាត់ តាមបណ្ដោយផ្លូវជាតិលេខ៥៥ គេនឹងបានទៅដល់រង្វង់មូលប្រម៉ោយ ដែលជាទីរួមស្រុកវាលវែងនេះតែម្ដង។ ជម្រើសទី១ ប្រសិនបើយើងធ្វើដំណើរបត់ស្ដាំទៅឃុំក្រពើពីរ ទីនោះក៏មានតំបន់ទេសច​រណ៍ធម្មជាតិជាច្រើនដែរ។ ប្រសិនបើយើងធ្វើដំណើរបត់ឆ្វេងទៅឃុំអូរសោម ទីនោះក៏មានតំបន់ទេសចរណ៍ធម្មជាតិជាច្រើន បូករួមទាំងសត្វក្រពើរភ្នំនោះផងដែរ។ ហើយប្រសិនបើភ្ញៀវទេសចរធ្វើដំណើរទៅត្រង់ នោះគេនឹងបាន ប្រទះនឹងរមណីយភាពជាច្រើនសម្បូរបែប។

ចេញពីរង្វង់មូលប្រមោយប្រមាណ៣០គីឡូម៉ែត្ររួចមក ភ្ញៀវទេសចរនឹងបានឆ្លងកាត់ផ្លូវបត់បែនលូនឡើងលើភ្នំ រាងដូចអន្ទង់អាំង “ផ្លូវបុប្ផាលាក់ខ្លួន” ដែលផ្ដល់នូវទស្សនីយភាពប្លែកអស្ចារ្យ ប្រសិនបើគេមើលពីផ្នែកលើ។ ដោយសារតែត្រូវឆ្លងកាត់តំបន់ភ្នំ១៥០០ ទើបក្រុមវិស្វកម្មខិតខំស្ថាបនាផ្លូវបត់បែនឡើង ដើម្បីទម្លុះឱ្យដល់ឃុំថ្មដា ដែលជាតំបន់ដែលមានសក្តានុពលខ្ពស់។

នៅចន្លោះតំបន់ភ្នំ១៥០០ និងតំបន់ថ្មដា ភ្ញៀវទេសចរអាចសំចតនៅទីតាំងសុវត្ថិភាពណាមួយ ដែលមានទេសភាពព្រៃភ្នំ វាលស្មៅលើខ្នងភ្នំ ទឹកអូរហូរតាមជ្រលងភ្នំ ដ៏ស្រស់ត្រកាល ទស្សនាកាន់តែយូរកាន់តែជក់ចិត្ត។

បន្តដំណើរទៅមុខបន្តិច ភ្ញៀវទេសចរនឹងបានទៅដល់រមណីយដ្ឋាន ទឹកធ្លាក់ថ្មដាតូច ដែលមានទឹកធ្លាក់ដ៏ស្រស់ស្អាត មានកន្លែងមុជទឹកលេងកម្សាន្ត មានម្ហូបអាហារសហគមន៍ឈ្ងុយឆ្ងាញ់ ព្រមទាំងនៅជិតនឹងមាត់ផ្លូវធ្វើដំណើរ មិនពិបាកចំណាយពេលច្រើនក្នុងការទៅដល់។

ចេញពីទឹកធ្លាក់ថ្មដាតូច ភ្ញៀវទេសចរនឹងបានទៅដល់ស្ទឹងមេទឹក ដែលជាទីគយ​គន់ទេសភាពមួយបែបផ្សេងទៀត នៅតាមមាត់ស្ទឹង និងក្បែរៗតំបន់នេះ គឺមានរមណីយដ្ឋានទេសចរណ៍ ពិសេសៗជាច្រើនទៀត ក្នុងនោះមានដូចជា ផារ៉ាដាយរីស៊ត, តំបន់អភិវឌ្ឍន៍ ឡុង វឌ្ឍនា ប្រាក់ សុជាតា អនិកជនខ្មែររស់នៅសហរដ្ឋអាមេរិក តំបន់អភិវឌ្ឍន៍ អឹមឌីអេស…ដែលមានកន្លែងសម្រាកបោះតង់ មានទឹកអូរហូររ៉ឹមៗ មានសេវាកម្មម្ហូបអាហារ និងទីទស្សនាទេសភាពជាច្រើនទៀត ពោលគឺ ៣៦០ដឺក្រេតែម្ដង។

ការជិះកាណូត ឬទូកទស្សនាកម្សាន្តនៅតាមដងស្ទឹងមេទឹក ក៏ជាចំណុចគួរឱ្យចាប់អារម្មណ៍ផងដែរ ពីព្រោះសម្រស់ធនធានធម្មជាតិ នៅអមសងខាងស្ទឹង សុទ្ធតែអាចផ្ដល់នូវអារម្មណ៍ស្រស់ស្រាយ ដល់មិត្តអ្នកទេសចរគ្រប់ៗគ្នា។

ចេញពីតំបន់ស្ទឹងមេទឹកនេះហើយ ភ្ញៀវទេសចរយើងប្រាកដជាឆ្ពោះទៅច្រកថ្មដា ដែលជាច្រកព្រំដែនរវាងកម្ពុជា-ថៃ ពោលគឺរវាងខេត្តពោធិ៍សាត់ និងខេត្តត្រាត។ នៅទីនោះភ្ញៀវទេសចរ ក៏អាចឆ្លងកាត់ទៅលេខខេត្តត្រាតបានដែរ ដែលមានផ្សារលក់ដូរម្ហូបអាហារ ផ្លែឈើ នំចំណីជាប់មាត់សមុត្រ និងមានរបស់របរមួយចំនួនទៀត។

ការបើកឱ្យចូលទៅទស្សនានៅខេត្តត្រាតនេះ គឺមានការបើកជាចន្លោះថ្ងៃ មានន័យថា បើកមួយថ្ងៃ ខានមួយថ្ងៃ តែដោយសារតែការរីករាលដាលជំងឺកូវីដ១៩ ទាំងភាគីកម្ពុជា និងភាគីថៃ បានផ្អាកការចេញចូលសម្រាប់ភ្ញៀវទេសចរណ៍មួយរយះសិន។

មួយវិញទៀត ការមកទស្សនាតំបន់ទេសចរណ៍ នៅក្នុងស្រុកវាលវែងនេះ ភ្ញៀវទេសចរ ក៏អាចទិញម្ហូប ជាគ្រឿងសមុទ្រយកមកទទួលទានបាន ឬអាចកម្មង់ទិញយកទៅធ្វើម្ហូបទទួលទាន នៅគេហដ្ឋានវិញក៏បាន។

អាកាសធាតុនៅក្នុងតំបន់នេះ គឺមានសភាពត្រជាក់ស្រួល នៅពេលសម្រាកនាពេលយប់ ញាំងឱ្យការទស្សនា និងសម្រាកលម្ហែនៅតាមតំបន់ទេសចរណ៍ នៃស្រុកវាលវែង កាន់តែទទួលបាននូវភាពមនោរម្យគួរជាទីសុខដុម។ នេះមិនទាន់និយាយអំពីតំបន់ទេសចរណ៍ផ្សេងៗទៀត ដែលកំពុងត្រៀមចាំស្វាគមន៍ភ្ញៀវទេសចរនោះនៅឡើយ។ នៅតាមផ្លូវដំណើរ ជីវភាពប្រជាជនមានការរស់នៅសម្បូរសប្បាយ ខណៈការរស់នៅរបស់ពួកគាត់ គឺផ្សារភ្ជាប់ជាមួយធម្មជាតិ ដើមឈើ ចម្ការដំណាំ នៅក្បែរៗនឹងផ្ទះរបស់ប្រជាជន៕ប្រភពFreshnews៕

ដំណឹងល្អៈរដ្ឋាភិបាលនឹងលើកកំពស់គុណភាពផ្កូវជាតិសំខាន់ៗចំនួន៣ខ្សែនាពេលខាងមុខ

ដោយៈគង់ សូរិយា

ភ្នំពេញុំៈ រដ្ឋាភិបាល ដែលមានក្រសួងសាធារណការ និងដឹកជញ្ជូនជាសេនាធិការ គ្រោងបើកការដ្ឋាន លើកគុណភាពផ្លូវជាតិសំខាន់ៗ៣ខ្សែ ពីផ្លូវដែលក្រាលកៅស៊ូស្រទា​ប់ស្តើង (DBST​) ទៅជាផ្លូវបេតុងកៅស៊ូ (AC) ក្នុងពេលឆាប់ៗខាងមុខនេះ។

ផ្លូវជាតិសំខាន់ៗទាំង៣ខ្សែនោះ រួមមាន ផ្លូវជាតិលេខ៤១ ផ្លូវជាតិលេខ៣១ និងផ្លូវជាតិលេខ៣៣ ដោយមកទល់បច្ចុប្បន្នផ្លូវទាំងនេះ ក្រសួងបានចុះកិច្ចសន្យាសាងសង់រួចហើយ រង់ចាំតែថ្ងៃបើកការដ្ឋានប៉ុណ្ណោះ។

លោកទេសរដ្ឋមន្រ្តីស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូនបាន​បង្ហើបព៌តមាននេះ ក្នុងកិច្ចប្រជុំក្រុមការងារបច្ចេកទេសហេដ្ឋារចនាសម្ព័ន្ធ និងសមាហរណកម្មក្នុងតំបន់ (IRITWG) កាលពីសប្តាហ៍មុន
សម្រាប់ផ្លូវជាតិលេខ៤១ ជាផ្លូវតភ្ជាប់ផ្លូវជាតិលេខ៣ ទៅនឹងផ្លូវជាតិលេខ៤។ ចំណែ​ក ផ្លូវជាតិលេខ៣១ គឺតភ្ជាប់ផ្លូវជាតិលេខ៣ ទៅស្រុកកំពង់ត្រាច ខណៈផ្លូវជាតិលេខ៣៣ គឺតភ្ជាប់ពីខេត្តកែបទៅស្រុកកំពង់ត្រាច។

គម្រោងលើកកម្ពស់គុណភាពផ្លូវទាំង៣ខ្សែនេះ ស្ថិតក្នុងគម្រោងអាទិភាព នៃការសាងសង់ ក្រោមឥណទានសម្បទាន (Loan) និងហិរញ្ញប្បទានឥតសំណង (Grant) របស់ប្រទេសចិន៕