សេដ្ឋវិទូម៉ី កល្យាណៈកម្ពុជាមានមូលដ្ឋានក្តីសង្ឃឹមសំរាប់កំនើនសេដ្ឋកិច្ចតាមការព្យាករណ៍របស់រដ្ឋាភិបាល

ដោយៈស៊ីវ ម៉េង

ភ្នំពេញៈ សេដ្ឋវិទូបណ្ឌិតម៉ី កល្យាណទីប្រឹក្សាជាន់ខ្ពស់នៃឧត្តមក្រុមប្រឹក្សាសេដ្ឋកិច្ចជាតិបានថ្លែងថា ការព្យាករណ៍ពីកំណើនសេដ្ឋកិច្ចជាង៤ភាគរយរបស់រដ្ឋាភិបាល សំ​រាប់់ឆ្នាំ២០២២ខាងមុខ អាចទុកចិត្តបាន។

លោកបណ្ឌិតបានមានប្រសាសន៍ឲ្យដឹងងតាមទូរស័ព្ទ នៅព្រឹកថ្ងៃទី១៨ សីហានេះថា បណ្តាប្រទេសអ្នកមានបានគ្រប់គ្រងជំងឺកូវីដបានល្អ ចាក់វ៉ាក់សាំងបានច្រើន គេមានលុយច្រើន ដែលធ្វើឲ្យ​សេដ្ឋកិច្ចរបស់ពួកគេងើបឡើងវិញលឿន ហេតុនេះកម្ពុជាមានសង្ឃឹមជាងមុនលើមូលដ្ឋានកំនើនរបស់ខ្លួន ព្រោះបណ្តាប្រទេសរីកចម្រើននានាមានសេដ្ឋកិច្ចកើនឡើង ក៏ផ្តល់ភាពអំណោយផលដល់ការនាំចេញរបស់កម្ពុជាផងដែរ។

លោកបន្តថា “អ្វីៗដែលជាការព្យាករណ៍របស់រដ្ឋាភិបាល គឺអាចទុកចិត្តបាន និងអាចធ្វើទៅបាន ព្រោះយើងបានគ្រប់គ្រងជំងឺកូវីដបានល្អ និងការចាក់វ៉ាក់សាំងបានលឿន រហូតដល់ជាង៨០ភាគរយ”។លោកបន្តថា “ក្នុងការសិក្សារបស់ខ្ញុំបានបង្ហាញថា មានតែប្រទេសអ្នកមានប៉ុណ្ណោះ ដែលអាចចាក់វ៉ាក់សាំងបានល្អបែបនេះ តែកម្ពុជាអាចធ្វើបានល្អផងដែរ ដែលនេះជាមោទនភាពមួយសំរាប់រដ្ឋាភិបាល”។

លោកបណ្ឌិតម៉ី កល្យាណបានបន្តថា ការសម្រេចបាននូវការចាក់វ៉ាក់សាំងបានរហូតជាង៨០ភាគរយ ជាការខិតខំរបស់រដ្ឋាភិបាល ដែលបានធ្វើការងារច្បាស់លាស់ មុតមាំ និងម៉ត់ចត់បំផុត នេះជាមោទនភាពមួយ។

ថ្លែងនៅក្នុងសិក្ខាសាលាស្វែងយល់អំពី ការកសាងក្របខ័ណ្ឌគោលនយោបាយម៉ាក្រូសេដ្ឋកិច្ចនិងហិរញ្ញវត្ថុសាធារណៈឆ្នាំ២០២២ តាមប្រព័ន្ធអនឡាញZoom ក្រោមអធិបតីភាព  លោកជំទាវកិត្តិសង្គហបណ្ឌិត ឃួន សុដារី អនុប្រធានទី២  នៃរដ្ឋសភា  នៅកាលពីព្រឹកថ្ងៃទី១៧ ខែសីហា  ឆ្នាំ២០២១នេះ លោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ បានលើកឡើងថា  សេដ្ឋកិច្ចកម្ពុជា នឹងមានកំណើន៤,៨ភាគរយក្នុង ឆ្នាំ២០២២ ដោយសារកម្ពុជាមានលទ្ធភាពស្តារសេដ្ឋកិច្ចឡើងវិញក្នុងរយៈពេលឆាប់ បន្ទាប់ពីយុទ្ធនាការចាក់វ៉ាក់សំាងដល់ពលរដ្ឋ បង្កើតឱ្យមានស៊ាំក្នុងសហគមន៍ធ្វើឱ្យសង្គមជាតិមានប្រក្រតីភាព។

លោកបន្តថា “នៅក្នុងការប្រយុទ្ធប្រឆំាងជំងឺកូវីដ១៩នេះ រដ្ឋាភិបាលបានបញ្ចេញថវិកាអន្តរាគមន៍ ក្នុងទំហំប្រមាណ៧១៩លានដុល្លារ ក្នុងយុទ្ធនាការការពារអាយុជីវិតពល​រដ្ឋ រក្សាលំនឹងជីវភាពប្រជាពលរដ្ឋ និងការទ្រទ្រង់សកម្មភាពអាជីវកម្ម  ប៉ុន្តែដោយ​សារមានព្រឹត្តិការណ៍២០កុម្ភៈ  ទំហំថវិកាសម្រាប់អន្តរាគមន៍កូវីដ១៩ អាចមានដល់១.៤៥៤លានដុល្លារ”។

លោកឧបនាយករដ្ឋមន្រ្តីបានបញ្ជាក់ថា “ការដែលមានថវិកាប្រើប្រាស់នៅគ្រាអាសន្ន មិនមែនជាការដៃដន្យនោះទេ ប្រាក់សន្សំនេះកើតចេញពីការគិតគូរ ប្រកបដោយភាពមធ្យ័ត ប្រកបដោយចក្ខុវិស័យវែងឆ្ងាយរបស់រាជរដ្ឋាភិបាល”៕

 

ដំណឹងល្អៈការដ្ឋានសំណង់ចំនួន៥២៧កំពុងសាងសង់នៅក្រុងព្រះសីហនុជាមួយទុនវិនិយោគជាង៨៣០០លានដុល្លារក្នុងរយៈពេល៥ឆ្នាំ

ដោយៈគង់ សូរិយា

ភ្នំពេញៈ ការដ្ឋានសំណង់បាននិងកំពុងបន្តចាប់ផ្តើមឡើងវិញ ចំនួន៥២៧អាគារ នៅក្រុងព្រះសីហនុ ស្របពេលផែនការអភិវឌ្ឍន៍ទីក្រុងនេះ ជាទីក្រុងពហុបំណងបាននិងកំពុងចាប់ផ្តើម។

យោងតាមរបាយការណ៍របស់មន្ទីររៀបចំដែនដី នគរូបនីយកម្មនិងសំណង់ ខេត្តព្រះសីហនុបានឲ្យដឹងថា គិតរហូតមកទល់ពេលនេះ ខេត្តព្រះសីហនុមានអាគារកំពស់ចាប់ពី៥ជាន់ដល់៥៣ជាន់ មានចំនួនសរុប៦០៤គំរោង ជាមួយគំរោងសរុប១៥៩០គំ​រោងមានផ្ទៃក្រឡាសំណង់ ជាមួយនឹងទុនវិនិយោគសរុប១៥,១៨៤ ០៧៨ម៉ែត្រការ៉េ និងមានទុនវិនិយោគជាង៨៣៣១លានដុល្លារអាមេរិក គិតចាប់ពីឆ្នាំ២០១៧ ដល់ឆ្នាំ២០២១នេះ។

ក្នុងចំណោមគំរោងទាំងនេះ គំរោងដែលបានអនុម័តដោយក្រសួងមានចំនួន៤៤២  មានផ្ទៃក្រឡាសំណង់សរុប១៤,០១៦,២៨១ម៉ែត្រការ៉េ មានទុនវិនិយោគជាង៧៧២៧លានដុល្លារអាមេរិក។ សំណង់អនុម័តដោយសមត្ថកិច្ចខេត្ត មាន៣០៨គំរោង មានផ្ទៃក្រឡាសំណង់សរុប៥៧៧ ៥៨០ម៉ែត្រការ៉េ មានទុនវិនិយោគសរុប៣២១,២៧៤,៨៥៧លានដុល្លារអាមេរិក និងសំណង់អនុម័តដោយសមត្ថកិច្ចថ្នាក់ខ័ណ្ឌ ស្រុកចំនួន៨៤០គំរោង មានផ្ទៃក្រឡា២១៩,៥៨៨ម៉ែត្រការ៉េ និងទុនវិនិយោគសរុប៧២,៣៣០,៤០៣លានដុល្លារអាមេរិក។

លោកឃាង ភារម្យអ្នកនាំពាក្យរដ្ឋបាលខេត្តព្រះសីហនុ បានមានប្រសាសន៍ថា ការរីមកចម្រើនវិស័យសេដ្ឋកិច្ចក្នុងខេត្តនេះ នឹងមានភាពល្អប្រសើរឡើងវិញ នៅពេលបញ្ហាកូវីដ១៩ បញ្ចប់នាពេលខាងមុខ ខណៈបច្ចុប្បន្នអាជ្ញាធរខេត្តបាននិងកំពុងជម្រុញការចាក់វ៉ាក់សាំងបង្ការជំងឺកូវីដ១៩ និងអនុវត្តន៍តាមវិធានការណ៍ និងគោលការណ៍ណែនាំរបស់ប្រមុខរាជរដ្ឋាភិបាល ដែលមានសម្តេចតេជោជានាយករដ្ឋមន្រ្តី។

លោកបន្តថា “យើងរំពឹងថាអ្វីៗនឹងល្អប្រសើរឡើង ខណៈវិស័យសំណង់និងអចល​នទ្រព្យក្នុងខេត្តព្រះសីហនុ នៅត្រូវការពេលវេលាបន្ថែមទៀត ដើម្បីឲ្យវិស័យនេះមានភាពរីកចម្រើនលឿនឡើងវិញ”៕

តើអាកាសយានដ្ឋានអន្តរជាតិរបស់ប្រទេសណាបានជាប់បញ្ជីរឈ្មោះលើគេក្នុងឆ្នាំ២០២១នេះ

តើអាកាសយានដ្ឋានអន្តរជាតិរបស់ប្រទេសណាបានជាប់បញ្ជីរឈ្មោះលើគេក្នុងឆ្នាំ២០២១នេះ

ដោយៈសុជាតា

កាតាៈ អាកាសយានដ្ឋានអន្តរជាតិប្រទេសកាតា Hamad International Airport បានជាប់ចំណាត់ថ្នាក់លេខ១ ជាអាកាសយានដ្ឋានល្អបំំផុតប្រចាំឆ្នាំ២០២១នេះ។

យោងតាមការចាត់ចំណាត់ថ្នាក់ របស់ទីភ្នាក់ងារក្រុមហ៊ុនអាកាសចរណ៍របស់អង់គ្លេស Skytrax ដែលស្ទង់មតិពីអ្នកដំណើរជុំវិញពិភពលោក ចាប់តាំងពីខែសីហាឆ្នាំ ២០២០ រហូតដល់ខែកក្កដាឆ្នាំ២០២១ បានលើកឡើងថា តំណែងអាកាសយានដ្ឋានល្អបំផុតលេខមួយ សម្រាប់ឆ្នាំ២០២១ ត្រូវបានទៅលើអាកាសយានដ្ឋានអន្តរជាតិ ហាម៉ាដ Hamad International Airport ដោយសារតែការខិតខំប្រឹងប្រែង ពីក្រុមហ៊ុនអាកាសចរណ៍ដ៏ធំរបស់ខ្លួនគឺកាតា អ៊ែរវ៉េ (Qatar Airways) ផងដែរ។

ដោយឡែកសម្រាប់ឆ្នាំ២០២១នេះដែរ អាកាសយានដ្ឋានចាំងហ្គី (Changi) របស់សិង្ហបុរី ដែលធ្លាប់តែជាប់ជាអាកាសយានដ្ឋានល្អបំផុត ជាច្រើនឆ្នាំជាប់ៗគ្នានោះ បានធ្លាក់មកជាប់ចំណាត់ថ្នាក់ទី៣វិញ ដោយស្ថិតនៅលេខរៀង បន្ទាប់ពីអាកាសយានដ្ឋានហាណេដា (Haneda) របស់ប្រទេសជប៉ុនដែលឈរលេខរៀងទី២។

អាកាសយានដ្ឋានអន្តរជាតិហាម៉ាដ (Hamad International Airport) ជាព្រលានយន្តហោះអន្តរជាតិ ស្ថិតក្នុងទីក្រុងដូហា (Doha) រដ្ឋធានីនៃប្រទេសកាតា (Qatar) ដែលមានស្ថានីយ៍ផ្ទុកអ្នកដំណើរ រហូតដល់៥០លាននាក់ជារៀងរាល់ឆ្នាំ។ ស្ថានីយ៍អ្នកដំណើរនេះ ត្រូវបានចាត់ទុកជាស្ថាបត្យកម្មដ៏ល្អ របស់ពិភពលោកផងដែរ៕

ប្រធាន CVEA បង្ហើបពីរាជធានី ខេត្តជាច្រើននៅតែមានចរន្តទិញលក់ដីធ្លីកើនឡើង

ដោយៈគង់ សូរិយា

ភ្នំពេញៈ ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA) លោកច្រឹក សុខនីមបានបង្ហើបពីរាជធានី ខេត្តមួយចំនួន ដែលការទិញលក់ដីធ្លីបន្តកើនឡើងក្នុងអំឡុងពេលនេះ។

លោកបានមានប្រសាសន៍ឲ្យដឹងតាមទូរស័ព្ទ នារសៀលថ្ងៃទី១៧ សីហាកន្លងមកថា សកម្មភាពទិញលក់ដីធ្លី នៅតែមានភាពសកម្មជាងគេក្នុងវិស័យអចលនទ្រព្យ ដែលសកម្មភាពទាំងនោះ បានកើតមានច្រើននៅស្រុកពញាឮ ស្រុកកណ្តាលស្ទឹង ស្រុកមុខកំពូលក្នុងខេត្តកណ្តាល។ ចំណែកនៅរាជធានីភ្នំពេញ តំបន់ជាយៗក្រុងក៏មានចរន្តទិញលក់កើនឡើងជាច្រើនផងដែរ ហើយតម្លៃដីធ្លីមិនបានចុះថ្លៃនោះទេ លើកលែងតែម្ចាស់ដីត្រូវការលុយប្រញាប់ ឬមានការជាប់គាំងលំហូរសាច់ប្រាក់។

លោកបន្តថា “ខេត្តកំពត កែប មណ្ឌកគិរី ខេត្តកំពង់ស្ពឺ និងផ្នែកខ្លះនៃខេត្តតាកែវ ក៏មានសកម្មភាពទិញលក់កើនឡើងផងដែរ បើទោះបីជាកម្ពុជាកំពុងមានការរាតត្បាតដោ​យសារជំងឺកូវីដ១៩ក្តី”។ លោកបន្តថា “អ្នកមានលទ្ឋភាព នៅតែបន្តប្រមូលទិញដីច្រើននៅឡើយ ដោយសារពេលនេះ ជាពេលវេលាដែលពួកគាត់អាចចចាតម្លៃបានល្អ”។

លោកច្រឹក សុខនីមបានបន្តថា ទោះជាយ៉ាងណាក៏ដោយ បើនិយាយពីវិស័យនេះទាំងមូលនៅតែជួបបញ្ហាឡើយ ដោយសារបញ្ហាជំងឺកូវីដ១៩ ដែលធ្វើឲ្យអ្នកវិនិយោគជាតិ ពិសេសអ្នកវិនិយោគអន្តរជាតិ មិនទាន់បានចូលមកកាន់កម្ពុជានៅឡើយ។

លោកបន្តថា “ការវិនិយោគដីធ្លីនៅកម្ពុជាមានផលចំណេញខ្ពស់ បើធៀបនឹងការវិនិយោគលើផ្នែកដទៃទៀត ដោយសាររដ្ឋាភិបាលបានបន្តផែនការពង្រីកទីក្រុង ការកើនឡើងនូវប្រជាពលរដ្ឋ ការរីកចម្រើនសេដ្ឋកិច្ច និងលំហូរទុនវិនិយោគពីបរទេសនឹងបន្តកើនឡើងខ្ពស់នាពេលអនាគត”៕

ក្រសួងសុខាភិបាលបញ្ជាក់ និងពន្យល់លំអិតពីការចាក់វ៉ាក់សាំងដូសទី៣

ក្រសួងសុខាភិបាលបញ្ជាក់ និងពន្យល់លំអិតពីការចាក់វ៉ាក់សាំងដូសទី៣

ដោយៈគង់ លាងហួរ

ភ្នំពេញៈ ស្របពេលរដ្ឋាភិបាលកំពុង ជម្រុញឲ្យមានការចាក់វ៉ាក់សាំងដូសទី៣ សម្រាប់មន្រ្តីរាជការជួរមុខ មន្រ្តីជាន់ខ្ពស់ក្រសួងសុខាភិបាល បានពន្យល់ពីបច្ចេកទេស និងប្រសិទ្ឋភាពនៃការចាក់វ៉ាក់សាំង ដើម្បីបង្ការការឆ្លងជំងឺកូវីដ Delta។

លោកស្រីវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ច ចាក់វ៉ាក់សាំងការពារជំងឺកូវីដ១៩ មានប្រសាសន៍ឲ្យដឹងថា ចំពោះ​សំណួរ​សួរថា បើខ្វះមិនគ្រប់៦ខែ តើចាក់វ៉ាក់សាំងដូសទី៣បានទេ? គឺយើង​ត្រូវ​ពិនិត្យ​មើល​ថេរវេលា ​នៃ​ការបង្កើត​នូវអង់ទីគ័រ។ អ៊ីចឹងនៅពេលចាក់វ៉ាក់សាំងដូសទី២ចប់ សរីរាង​នឹង​ចាប់ផ្ដើម​បង្កើត​អង់ទីគ័រ ប៉ុន្តែប្រសិនគ្មានដូសទី១ទេ ក៏ដូសទី២មិនអាចបង្កើត​អង់ទីគ័រ​នេះបានទេ តែបើមានតែដូសទី២ អត់ដូសទី១ ក៏មិនអាចបង្កើតអ​ង់ទីគ័របានដែរ។

លោកស្រីបន្តថា “ប៉ុន្តែសម្រាប់វ៉ាក់សាំង​មួយចំនួន បើ​ចាក់តែមួយដូស គឺអាចការពារ​សរីរាង្គ​យើង​បាន​ដែរ តែបានចំនួនទាប មិន​បាន​ដល់​ចំនួន​ដែល​គេ​រំពឹងទុក”។

លោកស្រីឱ វណ្ណឌីនបានបន្តថា ដូចនេះបើផ្នែកលើបរិបទនៃការរាតត្បាត​នៃវីរុស Delta ដើម្បី​សុខភាពយើង ការខុសត្រូវពេលវេលាបន្តិចបន្តួច គឺមិនជាបញ្ហាអីទេ។ អ៊ីចឹង​សូម​បងប្អូន​កុំ​ព្រួយបារម្ភ។ ប្រទេសខ្លះគេចាក់ដែរ ប្រទេសខ្លះចាក់យកពី៤ខែឡើងទៅ។ ប៉ុន្តែ​សម្រាប់​កម្ពុជា​យើង​ កំពុង​មានបញ្ហាវាយលុក​នៃវីរុស ដែលតាផង អាល់ហ្វាផង អ៊ីចឹង នេះជាការចាំបាច់ ប៉ុន្តែ​ក៏​ឈរ​លើ​គោលការណ៍​ស្ម័គ្រចិត្ត​ផង​ដែរ។

ការចាក់វ៉ាក់សាំងដូសទី៣ ដែលជាដូសជំរុញ ​កម្ពុជាបាន​អនុវត្ត​មុន​ប្រទេសជិតខាង ដែល​បាន​ចាក់ជូន​ក្រុមជួរមុខ ទាំង​គ្រូពេទ្យ​ទាំង​វិស័យ​រដ្ឋ និង​ឯកជន ក៏ដូចជា​ក្រុម​សមត្ថិកិច្ច​អាជ្ញាធរ ក្រុម​មន្ត្រី​រាជការ​ស៊ីវិល​ដែល​ធ្វើការ​បម្រើការ​ប្រជាពលរដ្ឋ ចាប់ពីថ្ងៃទី១២ ខែ សីហា ឆ្នាំ ២០២១ នៅ​តាម​មន្ទីរពេទ្យ​ជាតិ​នានា​។

លោកស្រិវេជ្ជបណ្ឌិតឱ វណ្ណឌីនបានបន្តថា ដូច្នេះ​ឈប់​ភ័យ​ខ្លាច​និង​ព្រួយចិត្ត​ ​ដោយ​ការ​ចាក់​វ៉ាក់សាំង​ឲ្យ​គ្រប់ដូស​ តាម​ការ​ណែនាំ​របស់​ក្រសួងសុខាភិបាល ​និង​រាជរដ្ឋាភិបាល​កម្ពុជា ​នោះ​យើង​នឹង​មាន​ភាព​ស៊ាំ​បាន​ពេញលេញ​គ្រប់គ្នា​ ហើយ​អាច​ទប់ទល់​ជាមួយ​វីរុស​គ្រប់​ប្រភេទ​ ដោយ​មិន​ឲ្យ​រាងកាយ​ឈឺ​ធ្ងន់ធ្ងរ​បាន៕

លោកឧកញ៉ាភួ ពុយបង្ហើបពីចំណុចទីតាំងផ្លូវ តភ្ជាប់ពីក្រុងសៀមរាបមកកាន់ក្រុងបាត់ដំបង

លោកឧកញ៉ាភួ ពុយបង្ហើបពីចំណុចទីតាំងផ្លូវ តភ្ជាប់ពីក្រុងសៀមរាបមកកាន់ក្រុងបាត់ដំបង

ដោយៈមុនី រិទ្ឋ

ភ្នំពេញៈ ប្រធានសភាពាណិជ្ជកម្មខេត្តបាត់ដំបង លោកឧកញ៉ាភួ ពុយបានបង្ហើបពីទីតាំងផ្លូវ ដែលតភ្ជាប់ពីក្រុងសៀមរាប មកកាន់ខេត្តបាត់ដំបងនាពេលខាងមុខនេះ។

លោកឧកញ៉ាបានមានប្រសាសន៍ឲ្យដឹងតាមទូរស័ព្ទ កាលពីរសៀលថ្ងៃទី១៧ សីហាកន្លងមកថា តាមរយៈការប្រជុំពិភាក្សា ជាមួយមន្រ្តីក្រសួងនាពេលកន្លងមក ផ្លូវនេះអាចតភ្ជាប់ពីក្រុងសៀមរាប ឆ្លងកាត់ទន្លេសាប មកកាន់ក្រុងបាត់ដំបង ក្រុមមន្រ្តីបាន បង្ហាញនូវទីតាំង ដែលផ្លូវនេះតភ្ជាប់ គឺមកកាន់តំបន់អួរតាគី ស្ថិតក្នុងស្រុកថ្មគោល ក្នុងខេត្តបាត់ដំបង ដែលមានចម្ងាយពីទីក្រុងបាត់ដំបងប្រមាណ៧គីឡូម៉ែត្រ។

លោកឧកញ៉ាបានបន្តថា “ទោះជាយ៉ាងណាគំរោងនេះ អាចមានការប្រែប្រួលឬយ៉ាងណា វាអាស្រ័យលើផែនការរបស់ក្រសួង បន្ទាប់ពីសិក្សាបញ្ចប់រួចរាល់នាពេលខាងមុខ”។

អ្នកនាំពាក្យក្រសួងសាធារណៈការ និងដឹកជញ្ជូន លោកវ៉ាស៊ីម សូរិយាធ្លាប់បានមានប្រសាសន៍ឲ្យដឹងផងដែរថា ផ្លូវនេះកំពុងត្រូវបានសិក្សានៅឡើយ ហេតុនេះយើងមិនទាន់ដឹងពីភូមិសាស្រ្តជាក់លាក់នោះទេ ដោយសារគំរោងនេះ អាចចំណាយពេលផងងដែរ ព្រោះបច្ចុប្បន្នថវិកាជាតិ ចំណាយមកកាន់ក្រសួង បានកាត់បន្ថយ៥០ភាគរយឬកាត់បន្ថយបន្ថែមទៀត ដើម្បីរដ្ឋាភិបាលអាចយកថវិកាទាំងនោះ ប្រើប្រាស់សម្រាប់ស្តារសេដ្ឋកិច្ចក្រោយវិបត្តិជំងឺកូវីដ១៩។

លោកបន្តថា “ការសាងសង់ផ្លូវនេះ ជាអ្វីដែលឯកឧត្តមទេសរដ្ឋមន្រ្តីស៊ុន ចាន់ថុល​រដ្ឋមន្រ្តីក្រសួងសាធារណៈការ និងដឹកជញ្ជូនចង់បាន ហេតុនេះយើងរំពឹងថាផ្លូវនេះនឹងអាចស្ថិតក្នុងគំរោងអាទិភាពមួយនាពេលអនាគត”៕

ក្រសួងសាធារណៈការនឹងបើកកិច្ចប្រជុំលើវឌ្ឈនៈភាពផ្លូវក្រវ៉ាត់ក្រុងទី៤នៅចុងសប្តាហ៍៍នេះ

ក្រសួងសាធារណៈការនឹងបើកកិច្ចប្រជុំលើវឌ្ឈនៈភាពផ្លូវក្រវ៉ាត់ក្រុងទី៤នៅចុងសប្តាហ៍៍នេះ

ដោយៈគង់ សូរិយា

ភ្នំពេញៈ មន្រ្តីជាន់ខ្ពស់ក្រសួងសាធារណៈការ និងដឹកជញ្ជូនបានបង្ហើបឲ្យដឹងថា ក្រសួងនឹងបើកកិច្ចប្រជុំជាមួយភាគីពាក់់ព័ន្ឋទាំងអស់ ដើម្បីពិនិត្យលើ់វឌ្ឍនភាពផ្លូវក្រវ៉ាត់ក្រុងទី៤នៅចុងសប្តាហ៍នេះ។

លោកលឹម ស៊ីដេនីន រដ្ឋលេខាធិការក្រសួងសាធារណៈការ និងដឹកជញ្ជូនបានមានប្រសាសន៍ឲ្យដឹងតាមទូរស័ព្ទ កាលពីល្ងាចថ្ងៃទី១៧ សីហាកន្លងមកថា ថ្នាក់ដឹកនាំក្រសួង​នឹងបើកកិច្ចប្រជុំពីវឌ្ឍនភាពផ្លូវក្រវ៉ាត់ក្រុងទី៤ នៅថ្ងៃទី១៩ សីហាខាងមុខនេះ នៅទីស្តីការក្រសួង។

ទោះជាយ៉ាងណា លោកមិនបញ្ជាក់លំអិតពីព៌តមាននេះនៅឡើយទេ ដោយរង់ចាំឲ្យអ្នកសារព៌តមានចូលរួមស្តាប់កិច្ចប្រជុំដោយខ្លួនឯង។

ជាមួយគ្នានេះ លោកវ៉ាស៊ីម សូរិយាអ្នកនាំពាក្យក្រសួងសាធារណៈការ និងដឹកជញ្ជូនបានមានប្រសាសន៍ឲ្យដឹងនៅថ្ងៃដដែលថា កិច្ចប្រជុំពិភាក្សាលំអិតបែបណាពីផ្លូវនេះ លោកមិនទាន់បានដឹងនៅឡើយទេ។

លោកបន្តថា ផ្លូវនេះកន្លងមកមានការហៅថា ជាផ្លូវក្រវ៉ាត់ក្រុងទី៣ ដោយសារផ្លូវក្រវ៉ាត់ក្រុងទី៣ទើបធ្វើបានមួយកំណាត់នៅឡើយ ហេតុនេះជាអាចជាការពង្រីកផ្លូវក្រវ៉ាត់ក្រុងទី៣ ប៉ុន្តែអ្នកខ្លះហៅផ្លូវក្រវ៉ាត់ក្រុងទី៤។ លោកបន្តថា ផ្លូវនេះបានសិក្សាដោយក្រុមហ៊ុន China Road and Bridge ដែលជាក្រុមហ៊ុនមេធំរបស់ចិន។

លោកលឹម ស៊ីដេនីនធ្លាប់បានមានប្រសាសន៍ឲ្យដឹងថា ផ្លូវខ្សែក្រវាត់ក្រុងទី៤ ដែ​លក្រសួងបានឱ្យក្រុមហ៊ុន សាជីវកម្មស្ពាន ថ្នល់ចិន សិក្សាតាំងពីឆ្នាំ២០១៨ បានសិក្សាចប់សព្វគ្រប់នៅឆ្នាំ២០២០ ដោយផ្លូវនេះមានប្រវែង១៩៥ គីឡូ​ម៉ែត្រ ឆ្លងកាត់ខេត្តចំនួន៤ គឺខេត្តកំពង់ស្ពី តាកែវ កណ្តាល និងខេត្តព្រៃវែង៕

កម្ពុជាបាននាំយករ៉ែមាសជាលើកដំបូងទៅធ្វើការបន្សុទ្ធនៅប្រទេសអូស្រ្តាលី

កម្ពុជាបាននាំយករ៉ែមាសជាលើកដំបូងទៅធ្វើការបន្សុទ្ធនៅប្រទេសអូស្រ្តាលី

ដោយៈតារារះ

ភ្នំពេញៈ មន្រ្តីអគ្គនាយកដ្ឋានធនធានរ៉ែ នៃក្រសួងរ៉ែ និងថាមពលបានឲ្យដឹងថា រ៉ែមាសរបស់កម្ពុជាប្រមាណជាង១០០គីឡូក្រាមត្រូវបាន នាំចេញទៅធ្វើការបន្សុទ្ធនៅក្នុងប្រទេសអូស្រ្តាលីជាលើកដំបូងរួចហើយ និងកំពុងនាំចេញជាលើកទី២នៅថ្ងៃខាងមុខទៀត។

កម្ពុជាបាននាំយករ៉ែមាសជាលើកដំបូងទៅធ្វើការបន្សុទ្ធនៅប្រទេសអូស្រ្តាលី

លោកយស មុនីរ៉ាត់ អគ្គនាយកនៃអគ្គនាយកដ្ឋានធនធានរ៉ែ នៃក្រសួងរ៉ែ និងថាមពលបានបញ្ជាក់ឲ្យដឹងកាលពីម្សិលម៉ិញនេះថា បន្ទាប់ពីបន្សុទ្ធជាមាស៩.៩ហើយក្រុមហ៊ុនអូស្រ្តាលី នឹងដាក់លក់មាសនៅលើទីផ្សារអន្តរជាតិតែម្តង។លោកបន្តថា គិតមក​ដល់ពេលនេះ ការចម្រាញ់យករ៉ែមាសនៅខេត្តមណ្ឌលគិរី បានប្រព្រឹត្តទៅជិត២ខែរួចមកហើយ ដោយចាប់ពីថ្ងៃដំណើរការដំបូងពីថ្ងៃ២១ ខែមិថុនា ឆ្នាំ ២០២១កន្លងទៅ។

លោកបន្តថា ក្រុមហ៊ុនរបស់អូស្ត្រាលីកំពុង តែប្រតិបត្តិការចម្រាញ់រ៉ែមាសនេះជាប្រចាំថ្ងៃ ដែលក្នុងរយៈពេលជិត២ខែមកនេះ ក្រុមហ៊ុនបានចម្រាញ់រ៉ែមាសបានប្រមាណ ១០០ គីឡូហើយបានបញ្ជូនទៅធ្វើការ បន្សុទ្ធនៅប្រទេសអូស្ត្រាលី បន្ទាប់ពីធ្វើការបន្សុទ្ធរួចហើយរ៉ែមាសនេះ នឹងដាក់លក់នៅលើទីផ្សារអន្តរជាតិតែម្ដង ហើយរាជរដ្ឋាភិបាលនឹងទូទាត់ប្រាក់ពន្ធទៅតាមកិច្ចព្រមព្រៀង។

លោកយស មុនីរ៉ាត់ បានមានប្រសាសន៍ថា ការចម្រាញ់រ៉ែមាសបានប្រព្រឹត្តទៅដោយរលូន ដែលជាដំណាក់កាលចាប់ផ្ដើមដំបូង នៃផែនការគឺក្រុមហ៊ុននឹងបន្តចម្រាញ់ ជាបន្តបន្ទាប់រហូតមក។ យើងបានអនុវត្តការនាំចេញបានជាបណ្ដើរៗ ហើយយើងបាននាំចេញជាលើកទី១រួចហើយ ឥឡូវយើងកំពុងរៀបចំនាំចេញនៅជើងទី២បន្តទៀត។ អញ្ចឹងយើងផលិតបានមកដល់ពេលនេះ វាបានជាង១០០ គីឡូក្រាមហើយគិតជាលេខមូល គឺយើងបាននាំទៅធ្វើការបន្សុទ្ធ នៅក្នុងប្រទេសអូស្ត្រាលី ដើម្បីអោយវាក្លាយទៅជាមាស ៩.៩ ហើយដាក់លក់នៅទីផ្សារអន្តរជាតិតែម្ដង។

លោកពន្យល់ថា តម្លៃមាស មិនមានអ្វីដែលត្រូវឲ្យយើងមានការព្រួយបារម្ភនោះទេ ដោយសារថា តម្លៃមាសនៅលើទីផ្សារអន្តរជាតិគឺវាចេញ គ្រប់ម៉ោងប្រចាំថ្ងៃ ដូច្នេះនៅពេលដែលក្រុមហ៊ុនលក់ គឺយើងអាចដឹងពីតម្លៃហាងឆេងមាស នៅលើទីផ្សារនៅពេលនោះហើយ។ ដូច្នេះរាជរដ្ឋាភិបាលអាចទូទាត់តម្លៃពន្ធ ទៅតាមនោះតែម្តង។

រាជរដ្ឋាភិបាល​កម្ពុជា ​បាន​ប្រកាស​ប្រតិបត្តិការ​ចម្រាញ់​រ៉ែ​មាស ​លើក​ដំបូង​របស់​ខ្លួនក្នុងស្រុក​កែវ​សីមា ខេត្ត​មណ្ឌលគិរី ដែល ​វិនិ​យោគ​ដោយ​ក្រុមហ៊ុនអូស្រ្តាលី កាលពីថ្ងៃទី ២១ ខែ មិថុនា ២០២១ ហើយ​​រំពឹង​ថា​ នឹង​ទទួលបាន​ចំណូល​ពី​អាជីវកម្ម​នេះ​ប្រមាណ​៤០​លាន​ដុល្លារ​អាមេរិក​ក្នុង​មួយ​ឆ្នាំ។

អាជីវកម្ម​រ៉ែ​មាស​ក្នុង​តំបន់​អូរ​ខ្វាវ​នៃ​ខេត្ត​មណ្ឌលគិរី ​លើ​ទំហំ​ផ្ទៃដី​ជាង​១៨.០០០​ហិកតា ​ដោយ​ក្រុមហ៊ុន​ រ៉ឺនេសង់ មីនើរ៉ល ខេម​បូឌា ​(Renaissance Minerals Cambodia Limited)​ ដែល​ជា​ក្រុមហ៊ុន​បុត្រ​សម្ព័ន្ធ​របស់​ក្រុមហ៊ុន ​Emerald Resources ដែល​មាន​មូលដ្ឋាននៅ​ក្នុង​ទីក្រុង​ Perth ​ប្រទេស​អូស្រ្តាលី៕

តើពន្ធលើ​អចលនទ្រព្យ​ទាំង៤​ប្រភេទ​នៅ​កម្ពុជា​គ្រប​ដណ្តប់​លើ​ផ្នែក​អ្វី​ខ្លះ

តើពន្ធលើ​អចលនទ្រព្យ​ទាំង៤​ប្រភេទ​នៅ​កម្ពុជា​គ្រប​ដណ្តប់​លើ​ផ្នែក​អ្វី​ខ្លះ

ដោយៈវ៉ាត វិន

ភ្នំពេញៈ ពន្ធលើអចលនទ្រព្យនៅប្រទេសកម្ពុជា ត្រូវបានបែងចែងជា៤ប្រភេទសំខាន់ៗ​ដូចជា ពន្ធលើអចលនវត្ថុ ពន្ធលើដីទំនេរ(ដីមិនបានប្រើប្រាស់) ពន្ធលើការផ្ទេរអចលនទ្រព្យ និងពន្ធលើការជួល។

ដូច្នេះក្នុងនាមជាអ្នកលក់​ អ្នកទិញ និងម្ចាស់អចលទ្រព្យ ​​ អ្នកគួរស្វែងយល់បន្ថែមអំពីពន្ធទាំងនេះ ដើម្បីជាចំណេះដឹងមូលដ្ឋាន ជៀសវាងរាល់ការចំណាយ និងការផាកពិន័យមិនចាំបាច់ផ្សេងៗ។

ពន្ធលើអចលនទ្រព្យ
ពន្ធលើអចលនទ្រព្យសំដៅលើពន្ធដី ផ្ទះ អគារ​​ ឬសំណង់ផ្សេងៗដែលសង់ជាប់ដី ដោយស្ថិតក្នុងទីតាំងជាក់លាក់ណាមួយ ក្នុងតំបន់ទីក្រុង។​​ ពន្ធនេះចាប់ផ្ដើមអនុវត្តន៍តាំងពីឆ្នាំ២០១១ ជាមួយនឹងអត្រាពន្ធ០.១ភាគរយ សម្រាប់អចលនទ្រព្យ ដែលមានតម្លៃលើ​សពី១០០លានរៀល ឬស្មើនឹង ២៥,០០០ ដុល្លារអាមេរិក។ តម្លៃទីផ្សារអចលនទ្រព្យត្រូវបានវាយតម្លៃ ដោយណៈកម្មការវាយតម្លៃអចលនទ្រព្យ ដែលស្ថិតក្រោមការគ្រប់គ្រងរបស់ក្រសួងសេដ្ឋកិច្ចនិងហិរញ្ញវត្ថុ។

យ៉ាងណាក៏ដោយ ប្រភេទអចលនទ្រព្យមួយចំនួន ត្រូវបានលើកលែងដូចជា ដីកសិកម្ម ដីរបស់រដ្ឋ ហេដ្ឋារចនាសម្ព័ន្ធសាធារណៈ អចលនទ្រព្យឧស្សាហកម្មនៅក្នុងតំបន់សេដ្ឋកិច្ចពិសេស និងអគារដែលកំពុងសាងសង់ (សាងសង់ក្រោម ៨០%) ហើយដែលមិនទាន់ត្រូវបានប្រើប្រាស់។

ពន្ធលើដីទំនេរ ឬដីមិនបានប្រើប្រាស់
ពន្ធលើ​ដីធ្លី​មិនបាន​ប្រើប្រាស់​នេះ ដែលត្រូវបានដាក់ឱ្យប្រើប្រាស់ ក្នុងឆ្នាំ១៩៩៥ ត្រូវបានកំណត់​លើដីប្រភេទលំនៅដ្ឋាន​ ដែល​គ្មាន​សំណង់ និង​ដី​ដែលមាន​សំណង់តែត្រូវបាន​បោះបង់​ ដែលស្ថិតនៅក្នុង​ទីក្រុង​នានា និង​ក្នុង​តំបន់ទាំងឡាយណា ដែល​កំណត់ដោយ​គណៈកម្មកា​រ​វាយតម្លៃ​ដី​មិនបាន​ប្រើប្រាស់។​ ពន្ធនេះត្រូវបានកំណត់ក្នុងអត្រា២ភាគរយ ទៅតាមតម្លៃទីផ្សារនៃដីក្នុងមួយម៉ែត្រការ៉េ។

ពន្ធប្រថាប់ត្រា​ (ពន្ធលើការផ្ទេរអចលនទ្រព្យ​)
ពន្ធប្រថាប់ត្រានេះ ត្រូវបានកំណត់ក្នុងអត្រា៤ភាគរយ ដោយ​គណៈកម្មកា​រ​វាយតម្លៃអចលនទ្រព្យ ផ្អែកតាមតម្លៃទីផ្សារទិញលក់ និងផ្ទេរកម្មសិទ្ធនៃអចលនទ្រព្យនោះ។ ជាទូទៅពន្ធនេះ គឺជាកាតព្វកិច្ចរបស់អ្នកទិញ ប៉ុន្តែអាចផ្លាស់ប្ដូរបានអាស្រ័យលើកិច្ចសន្យាទិញលក់ ហើយអ្នកជាប់ពន្ធត្រូវបង់ក្នុងអំឡុងពេល ៣ខែក្រោយពីការផ្ទេរកម្មសិទ្ធិ​។

ពន្ធលើឈ្នួលអចលនទ្រព្យ
ពន្ធលើការជួលអចលនទ្រព្យ ត្រូវបានអនុវត្តន៍លើប្រជាជនខ្មែរ និងជនបរទេស​ដែលជាម្ចាស់នៃអចលនទ្រព្យដាក់ជួល​ ប៉ុន្តែត្រូវបានកំណត់អត្រាពន្ធកាត់ទុកផ្សេងគ្នា។ ចំពោះប្រជាជនខ្មែរ ត្រូវបង់ពន្ធកាត់ទុកចំនួន១០%​​ ចំណែកជនបរទេសត្រូវបង់ពន្ធ​១៤% ពីប្រាក់ចំណូល ដែលពួកគេទទួលបានពីការជួល អចលនទ្រព្យជារៀងរាល់ឆ្នាំ៕

ប្រភព៖ Harbor Property

លោកឧកញ៉ាភួ ពុយៈទីផ្សារអចលនទ្រព្យនៅក្រុងបាត់ដំបងនៅតែដំណើរការ ស្របពេលផ្ទះលំហែរកាន់តែមានប្រជាប្រិយភាព

ដោយៈគង់ សូរិយា

បាត់ដំបងៈ ប្រធានសភាពាណិជ្ជកម្មខេត្តបាត់ដំបង លោកឧកញ៉ាភួ ពុយបានមានប្រសាសន៍ថា បច្ចុប្បន្នទីផ្សារអចលនទ្រព្យនៅក្រុងបាត់ដំបង នៅតែមានការទិញលក់យ៉ាងល្អប្រសើរ បើទោះបីជាមានបញ្ហាជំងឺកូវីដ១៩ក្តី។

លោកឧកញ៉ាបានមានប្រសាសន៍ឲ្យដឹងតាមទូរស័ព្ទ កាលពីរសៀលថ្ងៃទី១៧ សីហានេះថា សកម្មភាពអភិវឌ្ឍន៍អចលនទ្រព្យ នៅក្នុងខេត្តនៅតែដំណើរការធម្មតា ដោ​យ​បច្ចុប្បន្នការសាងសង់បុរី បានរីករាដាលទៅប៉ែកខាងជើងក្រុង ពិសេសតំបន់ស្ថិតនៅស្របតាមផ្លូវជាតិលេខ៥ និងតំបន់ឯកភ្នំ។ លោកបន្តថា ហេតុផលចំនួនពីរ ដែលធ្វើឲ្យទីផ្សារអចលនទ្រព្យក្នុងខខេត្តនៅតែដំណើរការល្អ និងកំពុងមានភាពល្អប្រសើរថែមទៀតនាពេលអនាគតត។

ហេតុផលទាំងពីរនោះ រួមមាន ទី១ តម្លៃអចលនទ្រព្យដែលបានសាងសង់លក់ មានភាពសមរម្យ ហើយរបៀបនៃការរស់នៅរបស់ប្រជាពលរដ្ឋបានផ្លាស់ប្តូរ ទី២ ការផ្លាស់ប្តូររបៀបរបបនៃការរស់នៅរបស់ប្រជាពលរដ្ឋ ដែលខ្លះពីមុនពួកគាត់លក់ក្នុងផ្សារ គេងនៅក្នុងផ្សារ តែពេលនេះពួកគាត់មានពេលចេញដើរលំហែរ មើលទេសភាព និងស្រូបយកខ្យល់អាកាសបរិសុទ្ឋនៅតាមជាយក្រុង។

លោកឧកញ៉ាភួ ពុយបានបន្តថា ហេតុផលនេះហើយ បានធ្វើឲ្យទីផ្សារលំនៅដ្ឋានផ្ទះបែបលំហែរមានការកើនឡើង និងមានប្រជាប្រិយភាពសំរាប់ប្រជាពលរដ្ឋ ដោយផ្ទះបែបនេះ​មានទេសភាពល្អ មានសួនច្បារ និងមានតម្លៃសមរម្យ ដែលផ្ទះនិមួយៗមានតម្លៃចន្លោះពី​ជាង៣ម៉ឺន ទៅ៥ម៉ឺនដុល្លារអាមេរិក ដោយមានបន្ទប់គេង និងបន្ទប់ទឹកចន្លោះពីរ២ទៅ៣បន្ទប់គេង។

លោកបន្តថា បច្ចុប្បន្នមានបុរីធំៗជាច្រើនបាន និងកំពុងសាងសង់នៅក្នុងខេត្ត ពិសេសតំបន់ស្ថិតនៅក្បែរផ្សារភួ ពុយ ដែលឥលូវនេះ តំបន់នេះមានផ្ទះប្រមាណ២០០០ខ្នង ប្រៀបបាននឹងទីក្រុងរណបមួយរួចទៅហើយ។

រដ្ឋាភិបាលបាននិងកំពុងរៀបចំផែនការ សាងសង់ផ្លូវតភ្ជាប់ពីក្រុងសៀមរាប មកកាន់ក្រុងបាត់ដំបង ក្នុងគោលដៅសំខាន់ៗចំនួន៣ ទី១ សម្រួលការដឹកជញ្ជូន និងកាត់បន្ថយថ្លៃដឹកជញ្ជូន ដោយសារវាមានចម្ងាយជិតបើធៀប នឹងផ្លូវតភ្ជាប់តំបន់ទាំងពីរខាងលើ ទី២ រៀបចំខ្សែច្រវ៉ាក់ទេសចរណ៍ តាមមរយៈការដឹកជញ្ជូនភ្ញៀវទេសចរណ៍ពីក្រុងសៀមរាប មកកាន់ក្រុងបាត់ដំបង ដោយធ្វើយ៉ាងណាឲ្យភ្ញៀវទេសចរណ៍ សំរាករយៈពេលវែងនៅកម្ពុជា និងទី៣ រដ្ឋាភិបាលមានគោលដៅកសាងប៉ម នៅកណ្តាលបឹងទន្លេ​សាប ដើម្បីទាក់ទាញភ្ញៀវទេសចរណ៍សំរាកលំហែរ និងគយគន់ទេសភាពដ៏ស្រស់ស្អាតលើបឹងទន្លេសាប។

ជាមួយគ្នានេះ រដ្ឋាភិបាលក៏បាននិងកំពុងរៀបចំផែនការស្តារឡើងវិញ នូវព្រលានយន្តហោះខេត្តបាត់ដំបងផងដែរ។

អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល លោកស៊ិន ចាន់សិរីវុត្ថាបានមានប្រសាសន៍ឲ្យដឹងថា បច្ចុប្បន្នរដ្ឋលេខាធិការដ្ឋានអាកាសចរណ៍ស៊ីវិល បានផ្តល់ការងា​រ និងសិទ្ឋសម្រេចទៅរដ្ឋបាលខេត្តបាត់ដំបង ដើម្បីសម្រេចលើផែនការស្តារព្រលាន​យន្តហោះនេះឡើងវិញ ដោយរដ្ឋលេខាធិការដ្ឋាន នឹងជួយសម្របសម្រួលលើការងារបច្ចេកទេសមួយចំនួនផងដែរ៕