មហាយក្សចិនចេញបំរាមលែងឱ្យសាងសង់អគារកប់ពពកខ្ពស់ជាង៥០០ម៉ែត្រដោយសារព្រួយបារម្ភអំពី

ដោយ សុខុម

ប៉េកាំង: ប្រទេសចិន ដែលមានស្ទើរតែពាក់កណ្តាល នៃអគារខ្ពស់បំផុតទាំង១០០ក្នុងពិភពលោក បានចេញបំរាមលែងឱ្យសាងសង់អគារ ដែលខ្ពស់ជាង៥០០ម៉ែត្រតទៅទៀតហើយ។ នេះបើយោងតាមសារព័ត៌មាន South China Morning Post ចុះផ្សាយកាលពីថ្ងៃទី៧ កក្កដា។

ការចេញបម្រាមដ៏គួរឱ្យភ្ញាក់ផ្អើលនេះធ្វើឡើង ស្របពេលមានការព្រួយបារម្ភអំពីសុវត្ថិភាពរបស់អគារ និងការផ្គត់ផ្គង់អគារការិយាល័យច្រើនលើសលប់ខ្លាំងពេក បើធៀបនឹងតម្រូវការជាក់ស្ដែងក្នុងទីផ្សារ។

អគារថ្មីៗដែលខ្ពស់លើសពី៥០០ម៉ែត្រ នឹងមិនត្រូវបានអនុញ្ញាតឱ្យសាងសង់ទៀតឡើយ ខណៈអគារដែលខ្ពស់លើសពី២៥០ម៉ែត្រត្រូវបានរឹងបន្តឹង ហើយអគារដែលខ្ពស់លើសពី១០០ម៉ែត្រ ត្រូវតែមានលក្ខណៈស័ក្ដិសមទៅនឹងទំហំ និងសមត្ថភាពស ង្គ្រោះ ពេលមានអគ្គិភ័យកើតឡើងនៅទីតាំងរបស់ខ្លួន។ នេះបើយោងតាមសារាចរណ៍ណែនាំមួយ ចេញដោយគណៈកម្មការជាតិអភិវឌ្ឍន៍ និងកំណែទម្រង់ (NDRC) ដែលជាស្ថាប័នធ្វើផែនការកំពូលរបស់ប្រទេសនេះ។

តាមការសង្កេតឃើញថា ការចេញសារាចរណ៍ណែនាំនេះ កើតមានឡើង២ក្រោយពីអគារ SEG Plaza កម្ពស់៧២ជាន់នៅក្រុងស៊ឹនជិន (Shenzhen) ប្រទេសនេះនៅសុខៗ ស្រាប់តែរញ្ជួយយ៉ាងចម្លែកដោយគ្មានការបកស្រាយត្រឹមត្រូវ។

វិស័យសំណង់ក្នុងប្រទេសចិន មានសន្ទុះរីកចម្រើនយ៉ាងឆាប់រហ័ស ដោយ៥ក្នុងចំណោមអគារខ្ពស់បំផុតទាំង១០របស់ពិភពលោក សុទ្ធតែស្ថិតនៅក្នុងប្រទេសនេះ និងសុទ្ធតែសាងសង់បញ្ចប់ជាស្ថាពរ ក្នុងរយៈពេល៦ឆ្នាំចុងក្រោយនេះ។

ទោះជាយ៉ាងណា ការកំណត់កម្ពស់អគារ ដែលទទួលបានការអនុញ្ញាតឱ្យសាងសង់នេះ ប្រហែលជាមិនជះផលប៉ះពាល់ខ្លាំង មកលើទីផ្សារអចលនទ្រព្យប្រភេទអាជីវកម្មឡើយ ព្រោះអគារដែលពេញនិយមភាគច្រើន មានកម្ពស់ចន្លោះពី១៨០ម៉ែត្រទៅ២០០ម៉ែត្រ។ នេះបើលោក Martin Wong នាយកផ្នែកស្រាវជ្រាវនៃក្រុមហ៊ុនប្រឹក្សាយោបល់អចលនទ្រព្យ Knight Frank។

អ្នកជំនាញរូបនេះគូសបញ្ជាក់ថា “ក្រុមហ៊ុននានាស្វែងរកទីតាំងល្អ គុណភាព និងថាតើអគាររបស់ពួកគេសន្សំសំចៃអគ្គិសនី និងមាននិរន្តរភាពដែរឬទេ គឺមិនមែនផ្ដោតតែទៅលើកម្ពស់ឡើយ”។ លោកបានបន្ថែមថា “បណ្ដាក្រុមហ៊ុនអភិវឌ្ឍន៍នៅចិនដីគោក បានចាប់ផ្តើមផ្លាស់ប្តូរយុទ្ធសាស្ត្រ និងផ្នត់គំនិតរបស់ខ្លួន ដើម្បីនិរន្តរភាពតាំងពីប្រហែល៥ឆ្នាំមុនម៉្លេះ”។

ក្រុងប៉េកាំង ក្រុងសៀងហៃ ក្រុងគ័វចូវ (Guangzhou) និងក្រុងស៊ឹនជិន ដែលសុទ្ធតែមានអគារខ្ពស់បំផុតម្នាក់មួយ ក្នុងចំណោមអគារខ្ពស់បំផុតទាំង១០របស់ពិភពលោកក៏មានទីធ្លា (Space) ទំនេរសម្រាប់ដាក់ជួលខ្ពស់បំផុត នៅក្នុងប្រទេសចិនផងដែរ​។ ផ្ទៃសរុបនៃធ្លាអគារទំនេរ សម្រាប់ដាក់ជួលក្នុងទីក្រុងទាំងនេះ មានចំនួនច្រើនលើសលប់រហូតដល់ទៅ៧,៩លានម៉ែត្រការ៉េ ក្នុងត្រីមាសទី២ ឆ្នាំ២០២១នេះ ដែលស្មើនឹងផ្ទៃអគារមជ្ឈមណ្ឌលពាណិជ្ជកម្មអន្តរជាតិ International Commerce Centre (ICC) ដែលជាអគារខ្ពស់បំផុតនៅហុងកុងដល់ទៅ២៩ដង៕

CMC Real Estate នៅតែមានសុទិដ្ឋិនិយមលើទីផ្សារអចលនទ្រព្យ ខណៈវិស័យនេះនៅតែមានសក្តានុពល

ដោយៈវឌ្ឍនៈ

ភ្នំពេញៈ ស្ថិតនៅក្នុងវិបត្តិនៃកូវីដ១៩ វិស័យជាច្រើននៅក្នុងប្រទេសកម្ពុជារួម និងពិភពលោកផងដែរនោះ ពិតជាជួបប្រទះនឹងបញ្ហាប្រឈមដូចគ្នា ក៏ប៉ុន្តែវិស័យមួយចំនួននៅតែមើលឃើញពីកាសនៃការវិនិយោគ តួយ៉ាងវិស័យអចលនទ្រព្យកម្ពុជា ក៏ត្រូវបានមើលឃើញថា នៅតែមានឱកាសវិនិយោគ ដែលធ្វើឱ្យក្រុមហ៊ុនអចលនទ្រព្យថ្មីៗបានប ង្កើ​តឡើងក្នុងបរិបទនៃកូវីដ១៩ ។

អ្នកនាង គ្រុយ ស្រីខួច អគ្គនាយិកាក្រុមហ៊ុន CMC Real Estate បានមានប្រសាស​ន៍ឱ្យដឹងនាព្រឹកថ្ងៃទី៧ កក្កាកន្លងមកថា វិស័យអចលនទ្រព្យនៅកម្ពុជា ក្នុងរយៈពេលប៉ុន្មានឆ្នាំមកនេះ មានការរីកដុះដាលជាបន្តបន្ទាប់ ហើយមកដល់ពេលវិបត្តិនៃជំងឺកូវីដ១៩នេះដែរ ក៏ឱកាសនៃការវិនិយោគលើវិស័យអចលនទ្រព្យនៅតែមាន សម្រាប់វិនិយោ​គិន ដូច្នេះវាក៏ជាឱកាសរកប្រាក់ចំណេញ សម្រាប់ក្រុមហ៊ុនអចលនទ្រព្យ ដែលសំដៅលើក្រុមហ៊ុនភ្នាក់ងារ។

អ្នកនាងបន្តថា “យើងមិនអាចប្រកែកបានទេ ពីការជួបផលពិបាកនិងបញ្ហារបស់ក្រុមហ៊ុនអចលនទ្រព្យ ដោយមានក្រុមហ៊ុនខ្លះក្ស័យធន និងខ្លះទៀតផ្អាកដំណើរការដោយសារតែហេតុផលផ្សេងទៀត”។ អ្នកនាងបន្តថា “ការបង្កើតក្រុមហ៊ុនអចលនទ្រព្យរបស់អ្នកនាង គឺ CMC Real Estate នឹងចូលរួមដើម្បីបំពេញភាពខ្វះខាត និងចន្លោះប្រហោងរបស់ក្រុមហ៊ុនអចលនទ្រព្យផ្សេងទៀត ដើម្បីឈានទៅរកការអភិវឌ្ឍវិស័យអចលនទ្រព្យនៅក្នុងប្រទេសកម្ពុជា”។

អ្នកនាងបន្តទៀតថា នៅក្នុងប្រតិបត្តិការបើកក្រុមហ៊ុនថ្មី នៅក្នុងប្រទេសកម្ពុជាវាពិតជាពិបាកក្នុងការចាប់យកចំណែកទីផ្សារ ប៉ុន្តែដោយសារតែយើងមានក្រុមអ្នកជំនាញនិងមានវិជ្ជាជីវៈច្បាស់លាស់ ជាមួយនឹងការប្ដេជ្ញាចិត្តខ្ពស់ ក្នុងការផ្ដល់ជូនសេវាជូនអតិថិជន ប្រកបដោយគុណភាព យើងជឿជាក់ថា យើងនឹងទទួលបានទំនុកចិត្តពីអតិថិជន ។

អ្នកនាងគ្រុយ ស្រីខួចបានបន្តថា “យើងបង្កើតមកមិនមែន ដើម្បីប្រកួតប្រជែងជាមួយក្រុមហ៊ុនអចលនទ្រព្យណាមួយ នៅក្នុងប្រទេសកម្ពុជាឬក្រុមហ៊ុនអន្តរជាតិណាឡើយ តែយើងនឹងព្យាយាមសហការ ជាមួយក្រុមហ៊ុនអចលនទ្រព្យដទៃទៀត ដើម្បីឈានទៅរកជោគជ័យ”។

បើតាមអ្នកជំនាញអចលនទ្រព្យជើងចាស់មួយរូបលោកឧកញ៉ា ចេង ខេង កន្លងមកបានលើកឡើងថា ថ្វីត្បិតតែភ្នាក់ងារអចលនទ្រព្យ មានកំណើននៅរយៈពេលប៉ុន្មានឆ្នាំនេះក្ដី ប៉ុន្តែតម្រូវការអ្នកជំនាញ និងភ្នាក់ងារដែលមានជំនាញ និងវិជ្ជាជីវៈនៅក្នុងវិស័យអចលនទ្រព្យនៅតែមានខ្ពស់ ហើយនៅពេលខាងមុខនេះ នៅពេលចប់កូវីដ១៩ វិនិយោ​គិនអន្តរជាតិនឹងមកកាន់កម្ពុជា ដើម្បីស្វែងរកការវិនិយោគ ក្នុងវិស័យអចលនទ្រព្យកាន់តែច្រើនធ្វើឱ្យអ្នកជំនាញ និងភ្នាក់ងារអចលនទ្រព្យក៏កាន់តែច្រើនដែរ។

លោកបន្តថា “បើប្រៀបធៀបនឹងប្រទេសជិត ក្រុមហ៊ុននិងភ្នាក់ងារអចលនទ្រព្យកម្ពុជានៅមានចំនួនតិចតួចនៅឡើយ ដែលទាមទារឲ្យមានការបង្កើតថ្មីៗបន្ថែមទៀត៕

ប្រធាន GRA អះអាងថា អ្នកវិនិយោគចិនជាច្រើនបានវិលមកកាន់កម្ពុជាវិញបណ្តើរហើយ

ដោយៈគង់ សូរិយា

ភ្នំពេញៈ ប្រធានសមាគមអចលlនទ្រព្យសកល (GRA) លោកសំ សុខនឿនបានអះអាងថា នៅពេលនេះអ្នកវិនិយោគចិនកាន់តែច្រើន បានត្រលប់មកកាន់កម្ពុជាវិញហើយ ខណៈពួកគេបានចាក់វ៉ាក់សាំងបង្ការជំងឺកូវីដរួច។

លោកបានមានប្រសាសន៍ឲ្យដឹងនាល្ងាចថ្ងៃទី៧ កក្កដាកន្លងមកថា លោកបានជួបជាមួយអ្នកវិនិយោគចិនថ្មីៗជាច្រើន ដែលពួកគេបានស្វែងរកសេវាកម្មដីធ្លី និងសេវាកម្មទិញលក់ជួលជាច្រើនទៀត។ លោកបន្តថា អ្នកវិនិយោគចិនកាន់តែច្រើនបានមកដល់ខេត្តព្រះសីហនុវិញហើយ ដែលនេះជាសញ្ញាល្អសំរាប់ទីផ្សារអចលនទ្រព្យកម្ពុជា អាចងើបឡើងវិញយ៉ាងឆាប់រហ័ស។

លោកបន្តថា “មានអ្នកវិនិយោគចិនជាច្រើន បានទាក់ទងការងារជាមួយសមាគម និងក្រុមហ៊ុនរបស់ខ្ញុំជាច្រើន ក្នុងមួយរយៈចុងក្រោយនេះ ដោយសាររដ្ឋាភិបាលចិនបាន​ចាក់វ៉ាក់សាំង ជូនពលរដ្ឋរបស់ខ្លូនស្ទើរ១០០ភាគរយហើយ”។

លោកបន្តថា “ប្រមុខរដ្ឋាភិបាលកម្ពុជាសម្តេចតេជោ លោកបានខិតខំដើម្បីចាក់វ៉ាក់សាំងជូនពលរដ្ឋ ឲ្យបាន១០លាននាក់នៅឆ្នាំខាងមុខ ស្របពេលកម្ពុជានឹងទទួលបានវ៉ាក់សាំង គ្រប់២០លានដូស នៅខែសីហាខាងមុខនេះ”។

លោកសំ សុខនឿនបានបន្តថា បច្ចុប្បន្នទំនុកចិត្តក្និងទីផ្សារអចលនទ្រព្យ បានងើបឡើងវិញបណ្តើរៗហើយ ខណៈពេលស្ថានភាពសេដ្ឋកិច្ចសកល និងសេដ្ឋកិច្ចកម្ពុជាអាច​ងើបឡើងវិញល្អប្រសើរនៅឆ្នាំនេះ បើទោះបីជារងការរំខានពីជំងឺកូវីដ១៩ក្តី ប៉ុន្តែយើងឃើញហើយថា ការនាំចេញរបស់កម្ពុជានៅតែកើនឡើងក្នុងឆមាសទី១ឆ្នាំនេះ។

ទំនាក់ទំនងរ៉ឹងមាំដូចដែកថែបរវាងរដ្ឋាភិបាលចិន និងកម្ពុជា នឹងក្លាយជាស្ពានមូយដ៏សំខាន់ក្នុងការទាក់ទាញការវិនិយោគពីប្រទេសចិន ពិសេសក្រោយពេលកម្ពុជា ចិនបា​នអនុម័តកិច្ចព្រមព្រៀងពាណិជ្ជកម្មសេរីរួច នឹងធ្វើឲ្យទំហំនៃការនាំចេញពីកម្ពុជាទៅកាន់ប្រទេសចិនកើនឡើងខ្ពស់ ស្របពេលអ្នកវិនិយោគចិន និងបណ្តាប្រទេសជាច្រើនទៀត នឹងជ្រើសរើសកម្ពុជាជាមូលដ្ឋានផលិត ដើម្បីនាំចេញទៅកាន់ប្រទេសចិនដោយរួចពន្ឋ៕

អ្នកជំនាញៈបើមិនច្បាស់លាស់ ម៉ត់ចត់ កុំធ្វើជាភ្នាក់ងារអចលនទ្រព្យ

ដោយៈគង់ សូរិយា

ភ្នំពេញៈ ការក្លាយខ្លួនជាភ្នាក់ងារអចលនទ្រព្យ មិនមែនជារឿងពិបាកឡើយ តែការទទួលបានផលប្រយោជន៍ និងជោគជ័យក្នុងអាជីពនេះ មិនមែនជារឿងងាយៗឡើយ ហេតុនេះទើបអ្នកជំនាញព្រមានថា “បើមិនច្បាស់លាស់ មិនម៉ត់ចត់ កុំធ្វើជាភ្នាក់ងារអីនាំតែខាតពេល។

ទីប្រឹក្សាសមាគមអចលនទ្រព្យសកល លោកយិន លាងគង់បានមានប្រសាសន៍ឲ្យ​ដឹងតាមទូរស័ព្ទកាលពីរសៀលថ្ងៃទី៧ កក្កដាកន្លងមកថា ភាពជាភ្នាក់ងារអចលនទ្រព្យ ពិតជាមានភាពស័ក្តិសមសម្រាប់អ្នកមានជំនាញ ចំណេះដឹងទូលំទូលាយ ពិសេសមានភាពម៉ត់ចត់ និងច្បាស់លាស់ក្នុងការងារ ព្រោះបើយើងធ្វើការដោយគ្មានចំណុចនេះទេ អ្នកនឹងពិបាកកសាងទំនុកចិត្តណាស់។

លោកបន្តថា “ក្នុងវិស័យនេះទំនុកចិត្តមានសារៈសំខាន់ណាស់ ប៉ុន្តែក្នុងវិស័យនេះក៏មានការបោកប្រាស់គ្នាដ៏អាក្រក់ផងដែរ ព្រោះតែផលប្រយោជន៍ ហេតុនេះអ្នកប្រឡូកក្នុងវិស័យនេះ ត្រូវតែប្រើប្រាស់លិខិតស្នាមជាចាំបាច់ ក្នុងការធ្វើជាតំណាងភ្នាក់ងារលក់អចលនទ្រព្យណាមួយ ឬទិញអចលនទ្រព្យឲ្យអ្នកណាម្នាក់ ដើម្បីទទួលបានកម្រៃជើងសារ”។

លោកបន្តថា “វិធីសាស្រ្តនៃការបោះសន្ទូចរំលងភ្នំ ជាវិធីសាស្រ្តដែលមានប្រើប្រា​ស់ច្រើនជាងគេក្នុងវិស័យនេះ ដែលភ្នាក់ងារអចលនទ្រព្យមួយចំនួន បានបោះបង់អាជីពនេះ ព្រោះហត់នឿយ ឬនឿយណាយ”។

លោកយិន លាងគង់បានបន្តថា យ៉ាងណាក៏មានម្ចាស់អចលនទ្រព្យល្អ ឬអ្នកលក់ល្អផងដែរ ប៉ុន្តែការមិនមានភាពច្បាស់លាស់ក្នុងការងារ នឹងធ្វើឲ្យអ្នកបរាជ័យច្រើនជាង ជោគជ័យ ហេតុនេះការភពប្រសព្វនឹងភាពជោគជ័យ មិនមែនជរឿងងាយស្រួល ប៉ុន្តែក៏មិនពិបាករហូតដល់អ្នកធ្វើមិនបាននោះដែរ”៕

មហាយក្សចិននៅតែជាប្រភពវិនិយោគធំជាងគេបំផុតនៅកម្ពុជាជាមួយការបោះទុនជាង២ពាន់លានដុល្លារក្នុងឆមាសទី១

ដោយៈ ប៊ី

ភ្នំពេញៈ អ្នកវិនិយោគចិនបានឈរនៅលំដាប់លេខរៀងទី១ ដែលជាប្រទេសបោះទុនវិនិយោគច្រើនជាងគេនៅកម្ពុជា ហើយទឹកប្រាក់ដែលចិនបានវិនិយោគនៅកម្ពុជាមានប្រមាណ២ពាន់លានដុល្លារក្នុងឆមាសទី១ ឆ្នាំ២០២១នេះ។ នេះបើតាមរបាយការណ៍ ស្តីពីសកម្មភាពវិនិយោគនៅកម្ពុជា ឆមាសទី១ ឆ្នាំ២០២១ របស់ក្រុមប្រឹក្សាអភិវឌ្ឍន៍កម្ពុជា (CDC)។

របាយការណ៍បានបញ្ជាក់ថា តួលេខវិនិយោគមកពីប្រទេសចិន បានឈរនៅលំដា​ប់លេខរៀងទី១ ដោយចូលរួមចំណែកប្រមាណ៦៩% នៃការវិនិយោគសរុបក្នុងឆមាសទី១ ឆ្នាំ២០២១ ខណៈដែលការវិនិយោគក្នុងស្រុក បានឈរនៅលំដាប់លេខរៀងទី២ ដោ​យចូលរួមចំណែកប្រមាណ ២១%នៃការវិនិយោគសរុប។

សម្រាប់ប្រទេសឈរលេខ៣ គឺប្រទេស Cayman Islands ចំនួន៣.៣៦ភាគរយ(ប្រមាណ៩៩លានដុល្លារ) នៃការវិនិយោគសរុប លេខ៤ប្រទេស Ritisgh Virgin Islands ចំនួន២.៣៧ភាគរយ (ប្រមាណ៧០លានដុល្លារ) នៃការវិនិយោគសរុប ប្រ​ទេសថៃ ឈរលេខរៀងទី៥ ចំនួន១.៧៧ភាគរយ (ប្រមាណ៥២លានដុល្លារ) នៃការវិនិ​យោគសរុប ប្រទេសសិង្ហបុរី ឈរលេខរៀងទី៦ចំនួន០.៦៨ភាគរយ (ប្រមាណ២០លានដុល្លារ) នៃការវិនិយោគសរុប​ ប្រទេសកូរ៉េខាងត្បូង ឈរលេខរៀងទី៧ ចំនួន០.៦៧ភាគ​រយ (ប្រមាណ១៩លានដុល្លារ) នៃការវិនិយោគសរុប។

ប្រទេសម៉ាឡេស៊ី ឈរលេខរៀងទី៨ ដែលវិនិយោគមកកាន់កម្ពុជាចំនួន០.៥៦% (ប្រមាណ១៦លានដុល្លារ) នៃការវិនិយោគសរុប សហរដ្ឋអាមេរិកឈរលេខរៀងទី៩ ចំនួន០.៣២% (ប្រមាណ៩លានដុល្លារ) នៃការវិនិយោគសរុប និងប្រទេសសាម័រ ឈរលេខរៀងទី១០ ចំនួន០.១៣% (ប្រមាណ៣លានដុល្លារ) នៃការវិនិយោគសរុប។

លោកច្រឹក សុខនីមប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានឱ្យដឹងថា ការវិនិយោគរបស់ចិន មានច្រើនណាស់នៅអាស៊ីនិងពិភពលោក ហើយបើនិយាយពីការវិនិយោគអចលនទ្រព្យវិញ ការវិនិយោគជនជាតិចិន ចូលចិត្តកសាងបណ្ដុំសហគមន៍របស់គេ។

លោកបានថ្លែងបន្តថា “នៅក្នុងប្រទេសកម្ពុជា តំបន់ពីរដែលជនជាតិបានចាប់ផ្ដើមកសាងសហគមន៍របស់គេ គឺនៅក្នុងខេត្តព្រះសីហនុ និងនៅរាជធានីភ្នំពេញ រួមទាំងផ្នែកខ្លះនៃខេត្តកោះកុង (តារាសាគរ)”។

យោងតាមសេចក្តីប្រកាសព័ត៌មាន របស់ក្រសួងការបរទេសកម្ពុជា ដែលចេញផ្សា​យកាលពីថ្មីៗនេះបានឱ្យដឹងថា “រដ្ឋមន្ត្រីការបរទេសប្រទេសទាំងពីរ បានឯកភាពពន្លឿននីតិវិធីផ្ទៃក្នុង សម្រាប់ការផ្តល់សច្ចាប័ន លើកិច្ចព្រមពាណិជ្ជកម្មសេរីកម្ពុជា-ចិន ដើម្បីជំរុញពាណិជ្ជកម្ម វិនិយោគ ក៏ដូចជាទេសចរណ៍រវាងប្រទេសទាំងពីរ”។

សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ធ្លាប់មានប្រសាសន៍ថា កិច្ចព្រមព្រៀងពាណិជ្ជកម្មសេរីរវាងកម្ពុជា និងចិន នេះ នឹងដើរតួជាកត្តាដ៏សំខាន់ក្នុងការជួយធ្វើ ឱ្យកម្ពុជា ក្លាយជាគោលដៅសម្រាប់ក្រុមហ៊ុនអាមេរិក ដែលកំពុងរកទីតាំងថ្មីនៅក្នុងតំបន់អាស៊ីអាគ្នេយ៍។

ចំណែក អ្នកជំនាញសេដ្ឋកិច្ចនៅកម្ពុជាវិញ ក៏បានមើលឃើញដូចគ្នានេះដែរ តែបានបន្ថែមថា មិនមែនតែសម្រាប់វិនិយោគិនអាមេរិកទេ ពោលគឺកម្ពុជាអាចនឹងទាក់ទាញវិនិយោគ ដែលមានសក្តានុពលពីប្រទេសផ្សេងៗទៀត ដូចយ៉ាង ជប៉ុន និងកូរ៉េខាងត្បូងជាដើមតាមរយៈកិច្ចព្រមព្រៀងពាណិជ្ជកម្មសេរីរវាងកម្ពុជា និងចិននេះ៕

គិតត្រឹមឆមាសទី១ ឆ្នាំ២០២១ កម្ពុជាបានអនុម័តគម្រោងវិនិយោគថ្មីៗ និងគម្រោ​ងពង្រីកផលិតកម្ម ចំនួន៨៧គម្រោង ដែលមានទុនវិនិយោគ សរុបចំនួន២ ៩៦៩ ៦២៩ ៣៣៨ ដុល្លារអាមេរិក ដែលអាចបង្កើតការងារបានចំនួន៥០ ០២៩កន្លែង៕

សេតវិមាន: សហរដ្ឋអាមេរិក និងមហាយក្សចិន អាចរួមរស់ជាមួយគ្នាដោយសុខសន្តិភាព

ដោយៈ សុខុម

ប៉េកាំង: លោក Kurt Campbell មន្ត្រីសេតវិមាន ទទួលបន្ទុកកិច្ចការសម្របសម្រួលសម្រាប់តំបន់ឥណ្ឌូ-ប៉ាស៊ីហ្វិក (Indo-Pacific) ថ្លែងថា សហរដ្ឋអាមេរិក និងមហាយក្សចិន អាចរួមរស់ជាមួយគ្នាដោយសុខសន្តិភាព ហើយមិនគួរចាត់ទុកទំនាក់ទំនងរវាងប្រទេសមហាអំណាចទាំង២ថាជា “សង្គ្រាមត្រជាក់ថ្មី” ឡើយ។ នេះបើយោងតាមការចុះផ្សាយរបស់សារព័ត៌មាន CNBC។

លោកបានលើកឡើងអំពីទំនាក់ទំនងរវាងប្រទេសទាំង២កាលពីថ្ងៃអង្គារ ទី៦ កក្កដា ថា “ពេលខ្លះក៏មានស្ថានភាពមិនប្រាកដប្រជា ហើយថែមទាំងមានភាពតានតឹងម្ដងម្ដាលទៀតផង”។ នេះបើយោងតាមសេចក្ដីប្រកាសព័ត៌មានអំពីការអត្ថាធិប្បាយរបស់លោក ដែលបានធ្វើឡើងក្នុងព្រឹត្តិការណ៍មួយរបស់អង្គការ Asia Society។

លោកបានបន្តថា “តើខ្ញុំជឿជាក់ថា ប្រទេសចិន និងសហរដ្ឋអាមេរិក អាចរួមរស់ជាមួយគ្នាដោយសុខសន្តិភាពដែរទេ? មែនហើយ ខ្ញុំពិតជាគិតបែបនេះ”។ លោកបន្ថែមថា “ប៉ុន្តែខ្ញុំយល់ថា បញ្ហាប្រឈមនេះនឹងពិបាកខ្លាំងសម្រាប់មនុស្សជំនាន់នេះ និងមនុស្សជំនាន់ក្រោយ”។

ចាប់តាំងពីលោក ចូ បៃឌិន ប្រធានាធិបតីសហរដ្ឋអាមេរិក ចូលកាន់តំណែងនៅខែមករា ដើមឆ្នាំ២០២១ នេះមក រដ្ឋការរបស់លោកបានរក្សាជំហរយ៉ាងតឹងរ៉ឹងចំពោះប្រទេសចិន តាមរដ្ឋការរបស់លោក ដូណាល់ ត្រាំ ដោយលោកបានចាត់ទុកមហាយក្សនៅអាស៊ី មួយនេះថាជា “គូប្រជែងខ្លាំងបំផុត” របស់សហរដ្ឋអាមេរិក។

ចំពោះបញ្ហាដ៏ចម្រូងចម្រាសជុំវិញកោះតៃវ៉ាន់ លោក Kurt Campbell បានគូសបញ្ជាក់ជាថ្មីថា រដ្ឋការរបស់លោក ចូ បៃឌិន មិនទទួលស្គាល់កោះតៃវ៉ាន់ ជាប្រទេសឯករាជ្យនោះឡើយ ដែលស្របទៅនឹង “គោលនយោបាយចិនតែមួយ” (One China Policy)។

ក្រោមការដឹកនាំរបស់ប្រធានាធិបតីចិន លោក ស៊ី ជិនភីង រដ្ឋាភិបាលក្រុងប៉េកាំង បានអះអាងកាន់តែខ្លាំងឡើងៗថា កោះតៃវ៉ាន់ គឺជាទឹកដីរបស់ប្រទេសចិន ហើយបានព្រមានប្រទេសផ្សេងៗ និងអង្គការអន្តរជាតិនានាកុំឱ្យលូកដៃចូលក្នុងរឿងនេះ។

លោក Kurt Campbell បានលើកឡើងបន្ថែមទៀតកាលពីថ្ងៃអង្គារ ទី៦ កក្កដា ថា ពេលនេះសហរដ្ឋអាមេរិក កំពុង “ស្វះស្វែងរកដោយស្ងាត់ៗ” នូវគំនិតផ្តួចផ្តើមពាណិជ្ជកម្មក្នុងតំបន់អាស៊ី។

មន្ត្រីសេតវិមាន រូបនេះបានគូសបញ្ជាក់ទៀតថា ខណៈការងើបឡើងនៃសេដ្ឋកិច្ចរបស់សហរដ្ឋអាមេរិក ពីវិបត្តិកូវីដ-១៩ នៅតែជាគោលនយោបាយអាទិភាពរបស់រដ្ឋការលោក ចូ បៃឌិន “តំបន់ឥណ្ឌូ-ប៉ាស៊ីហ្វិក នឹងក្លាយជាចំណុចស្នូលនៃការផ្ដោតយកចិត្តទុកជាសំខាន់របស់យើងនៅថ្នាក់តំបន់ ដែលជាលើកដំបូងមិនធ្លាប់មានក្នុប្រវត្តិសាស្ត្ររបស់យើង”។

តំបន់ឥណ្ឌូ-ប៉ាស៊ីហ្វិក សំដៅលើតំបន់ដែលលាតសន្ធឹងរវាងមហាសមុទ្រ២គឺចាប់ពីមហាសមុទ្រឥណ្ឌា ទៅដល់មហាសមុទ្រប៉ាស៊ីហ្វិក៕

ក្រុមហ៊ុនអចលនទ្រព្យថ្មីៗនៅតែមានឱកាសក្នុងការចាប់យកចំណែកទីផ្សារកម្ពុជាទោះស្ថិតក្នុងបរិបទកូវីដ១៩

ដោយៈ វឌ្ឍនៈ

ភ្នំពេញៈ ទោះស្ថិតនៅក្នុងវិបត្តិនៃកូវីដ១៩ក៏ដោយ វិស័យមួយចំនួននៅតែមើលឃើញពីកាសនៃការវិនិយោគ តួយ៉ាងវិស័យអចលនទ្រព្យកម្ពុជាក៏ត្រូវបានមើលឃើញថា នៅតែមានឱកាសវិនិយោគ ដែលធ្វើឱ្យក្រុមហ៊ុនអចលនទ្រព្យថ្មីបានបង្កើតឡើង ក្នុងបរិបទនៃកូវីដ១៩នេះ។

អ្នកនាងគ្រុយ ស្រីខួចអគ្គនាយិកាក្រុមហ៊ុនCNC Real Estateបានឱ្យដឹងនៅថ្ងៃទី៧ ខែកក្កដា ឆ្នាំ២០២១ថា វិស័យអចលនទ្រព្យនៅកម្ពុជាក្នុងរយៈពេលប៉ុន្មានឆ្នាំមកនេះ មានការរីកដុះដាលជាបន្តបន្ទាប់ ហើយមកដល់ពេលវិបត្តិនៃជំងឺកូវីដ១៩នេះដែរ ក៏ឱកាសនៃការវិនិយោគទៅលើវិស័យអចលនទ្រព្យនៅតែមាន សម្រាប់វិនិយោគិន ដូច្នេះវាក៏ជាឱកាសរកប្រាក់ចំណេញសម្រាប់ក្រុមហ៊ុនអចលនទ្រព្យ ដែលសំដៅលើក្រុមហ៊ុនភ្នាក់ងារ។

អ្នកនាងបានបន្តថា នៅក្នុងវិបត្តិកូវីដ១៩នេះ យើងមិនអាចប្រកែកបានទេ ពីការជួបផលពិបាក និងបញ្ហារបស់ក្រុមហ៊ុនអចលនទ្រព្យ ដោយមានក្រុមហ៊ុនខ្លះក្ស័យធន និងខ្លះទៀតផ្អាកដំណើរការដោយសារតែហេតុផលផ្សេងទៀត ។ ការបង្កើតក្រុមហ៊ុនអចលនទ្រព្យរបស់លោកអ្នកនាងគឺCNC Real Estate គឺដើម្បីបំពេញភាពខ្វះខាតនិងចន្លោះប្រហោងរបស់ក្រុមហ៊ុនអចលនទ្រព្យផ្សេងទៀត ដើម្បីឈានទៅរកការអភិវឌ្ឍវិស័យអចលនទ្រព្យនៅក្នុងប្រទេសកម្ពុជា។

អ្នកនាងបន្តទៀតថា នៅក្នុងប្រតិបត្តិការបើកក្រុមហ៊ុនថ្មីនៅក្នុងប្រទេសកម្ពុជា វាពិតជាពិបាកក្នុងការចាប់យកចំណែកទីផ្សារ ប៉ុន្តែដោយសារតែយើងមានក្រុមអ្នកជំនាញ និងមានវិជ្ជាជីវៈច្បាស់លាស់ ជាមួយនឹងការប្ដេជ្ញាចិត្តខ្ពស់ក្នុងការផ្ដល់ជូនសេវាជូនអតិថិជន ប្រកបដោយគុណភាព យើងជឿជាក់ថា យើងនឹងទទួលបានទំនុកចិត្តពីអតិថិជន។

អ្នកនាងបាថ្លែងដូច្នេះថា “យើងបង្កើតមកមិនមែនដើម្បីប្រកួតប្រជែងជាមួយក្រុមហ៊ុនអចលនទ្រព្យណាមួយនៅក្នុងប្រទេសកម្ពុជា ឬក្រុមហ៊ុនអន្តរជាតិណាឡើយ តែយើងនឹងព្យាយាមសហការជាមួយក្រុមហ៊ុនអចលនទ្រព្យដទៃទៀត ដើម្បីឈានទៅរកជោគជ័យ”។

បើតាមអ្នកជំនាញអចលនទ្រព្យជើងចាស់មួយរូបលោកឧកញ៉ាចេង ខេងបានលើកឡើងកន្លងមកថា ថ្វីត្បិតតែភ្នាក់ងារអចលនទ្រព្យមានកំណើននៅរយៈពេលប៉ុន្មានឆ្នាំនេះក្ដី ប៉ុន្តែតម្រូវការអ្នកជំនាញ និងភ្នាក់ងារដែលមានជំនាញ និងវិជ្ជាជីវៈនៅក្នុងវិស័យអចលនទ្រព្យនៅតែមានខ្ពស់។

លោកបានបន្តថានៅពេលខាងមុខនេះ នៅពេលចប់កូវីដ១៩ វិនិយោគិនមកកម្ពុជា ដើម្បីស្វែងរកការវិនិយោគក្នុងវិស័យអចលនទ្រព្យកាន់តែច្រើន ធ្វើឱ្យសេវាកម្មពីអ្នកជំនាញ និងភ្នាក់ងារអចលនទ្រព្យក៏មានតម្រូវការកាន់តែច្រើនដែរ។ លោកបន្តថា “បើប្រៀបធៀបនឹងប្រទេសជិខាងភ្នាក់ងារអចលនទ្រព្យកម្ពុជានៅមានចំនួនតិចតួចនៅឡើយ”៕

រដ្ឋាភិបាលជំរុញការសាងសង់ហេដ្ឋារចនាសម្ព័ន្ធផ្លូវ៣៨ខ្សែក្នុងក្រុងសៀមរាបឱ្យបញ្ចប់តាមការគ្រោងទុក

ដោយៈ ម៉ាណេត

ភ្នំពេញៈ រដ្ឋាភិបាលជំរុញការសាងសង់ហេដ្ឋារចនាសម្ព័ន្ធផ្លូវ៣៨ខ្សែក្នុងក្រុងសៀមរាបធ្វើយ៉ាងណាធ្វើឱ្យផ្លូវទាំង៣៨ខ្សែនេះ មានគុណភាពរឹងមាំ និងអាចបញ្ចប់តាមផែនការ ដែលបានគ្រោងទុក។

លោកសួង ហេងរដ្ឋលេខាធិការក្រសួងសាធារណការ និងដឹកជញ្ជូន កាលមិ្សលមិញ ដឹកនាំកិច្ចប្រជុំចរចាថ្លៃការសាងសង់ហេដ្ឋារចនាសម្ព័ន្ធផ្លូវ៣៨ខ្សែ ក្នុងក្រុងសៀមរាប ខេត្តសៀមរាប តាមប្រព័ន្ធវីដេអូពីចម្ងាយ ជាមួយអង្គភាពសាងសង់ ដើម្បីឈានទៅចុះកិច្ចសន្យានៃការសាងសង់។ នេះបើយោងតាមសេចក្តីប្រកាសព័ត៌មានរបស់ក្រសួង នៅថ្ងៃទី៧ ខែកក្កដា ឆ្នាំ២០២១។

ក្រសួងបានឱ្យដឹងថា កិច្ចប្រជុំនេះធ្វើឡើងក្នុងគោលបំណងដើម្បីចរចាថ្លៃ នៃការសាងសង់ហេដ្ឋារចនាសម្ព័ន្ធផ្លូវ៣៨ខ្សែក្នុងក្រុងសៀមរាប ខេត្តសៀមរាប ជាមួយអង្គភាពសាងសង់ ដើម្បីឈានទៅចុះកិច្ចសន្យានៃការសាងសង់ ក៏ដូចជាដើម្បីពិភាក្សាអំពីការងារបច្ចេកទេសនៃការសាងសង់ពាក់ព័ន្ធនឹងការងារហិរញ្ញវត្ថុ ដើម្បីរិះរកនីតិវិធីធ្វើយ៉ាងណាធ្វើឱ្យផ្លូវទាំង៣៨ខ្សែនេះ មានគុណភាពរឹងមាំ ប្រើប្រាស់ជាប់បានយូរអង្វែង ចំណាយថវិកាសន្សំរបស់ជាតិបានចំគោលដៅ និងអាចបញ្ចប់គម្រោងសាងសង់តាមផែនការដែលបានគ្រោងទុក។

ថ្លែងទៅកាន់អង្គប្រជុំនាឱកាសនោះ លោករដ្ឋលេខាធិការ បានសំណូមពរឱ្យគ្រប់ភាគីពាក់ព័ន្ធទាំងអស់ជួយកាត់បន្ថយការចំណាយថវិកាសន្សំរបស់ជាតិឱ្យអស់តិចតាមដែលអាចធ្វើទៅបាន ប៉ុន្តែត្រូវរក្សាបាននូវគុណភាពផ្លូវរឹងមាំ ប្រើប្រាស់ជាប់បានយូរអង្វែង និងបានស្នើឱ្យជួយពន្លឿនការរៀបចំកិច្ចសន្យាការងារសាងសង់ ដើម្បីអាចបើកផ្ដល់ថវិកាជូនដល់អង្គភាពសាងសង់ទាំងអស់តាមពេលកំណត់។

យោងតាមរបាយការណ៍របស់អគ្គនាយកដ្ឋានបច្ចេកទេស នៃក្រសួងសាធារណការ និងដឹកជញ្ជូន វឌ្ឍនភាពគម្រោងសាងសង់ហេដ្ឋារចនាសម្ព័ន្ធផ្លូវចំនួន៣៨ខ្សែនៅក្រុងសៀមរាបខេត្តសៀមរាបនេះ គិតត្រឹមថ្ងៃទី២៥ ខែមិថុនា ឆ្នាំ២០២១ សម្រេចលទ្ធផលការងារបាន៦៣,៨៧%ហើយ៕

បណ្តាប្រទេសអាស៊ានកំពុងជំរុញផែនការបើកទេសចរណ៍ក្នុងតំបន់ឡើងវិញ

ដោយៈ ប៊ី

ភ្នំពេញៈ បណ្តាប្រទេសអាស៊ាន នៅថ្ងៃទី០៧ ខែកក្កដា ឆ្នាំ២០២១នេះ បានពិភាក្សាអំពីគម្រោងបើកទេសចរណ៍ក្នុងតំបន់អាស៊ានឡើងវិញ ប្រកបដោយការទទួលខុសត្រូវ និងសុវត្ថិភាព។

មន្ត្រីជាន់ខ្ពស់ទេសចរណ៍ជាតិអាស៊ានលើកទី៥៤ បានបើកកិច្ចប្រជុំ The 54th ASEAN National Tourism Organizations (NTOs) Meeting) តាមរយៈប្រព័ន្ធវីឌីអូខនហ្វើរេន។ កិច្ចប្រជុំនេះត្រូវបានដឹកនាំ លោកថោង រដ្ឋសក្តិអគ្គនាយកអភិវឌ្ឍន៍ទេសចរណ៍ និងសហប្រតិបត្តិការអន្តរជាតិនៃក្រសួងទេសចរណ៍ ដោយបានពិភាក្សាអំពីគម្រោងបើកទេសចរណ៍ក្នុងតំបន់អាស៊ានឡើងវិញ ប្រកបដោយការទទួលខុសត្រូវ និងសុវត្ថិភាព។

កិច្ចប្រជុំក៏បានពិភាក្សាលើការងារទេសចរណ៍អាស៊ានដែលបានអនុវត្តកន្លងមក និងបន្តពិនិត្យលើការងារមួយចំនួនបន្ថែមទៀត សំដៅត្រៀមរៀបចំខ្លួនបើកវិស័យទេសចរណ៍ឡើងវិញ រួមមានជាអាទិ៍៖

១. ការអនុវត្តយុទ្ធសាស្រ្តទីផ្សារទេសចរណ៍អាស៊ាន ២០២១-២០២៥ សំដៅផ្សព្វផ្សាយពីការរៀបចំខ្លួនរួចរាល់ក្នុងការទទួលទេសចរណ៍អន្តរជាតិ និងបង្កើនទំនុកចិត្តដល់ភ្ញៀវទេសចរ។

២. ផែនការមេស្តីពីការតភ្ជាប់តំបន់អាស៊ាន ២០២៥ លើការអនុវត្តគម្រោងការធ្វើឲ្យប្រសើរឡើងនូវទំរង់ការទេសចរណ៍ឌីជីថលអាស៊ាន (Enhance ASEAN Tourism Digital Platforms)។

៣. គោលការណ៍ណែនាំស្តីពីអនាម័យ និងសុវត្ថិភាពសម្រាប់អ្នកធ្វើការ និងសហគមន៍ក្នុងឧស្សាហកម្មទេសចរណ៍។

៤. ការសិក្សាលើផលប៉ះពាល់នៃវិបត្តិកូវីដ-១៩ គោលនយោបាយ និងការអនុវត្តល្អបំផុត អនុសាសន៍សម្រាប់ផែនការស្តារឡើងវិញក្រោយវិបត្តិកូវីដ-១៩ សម្រាប់ទេសចរណ៍អាស៊ាន។

៥. ផែនការសកម្មភាពស្តីពីសេចក្តីថ្លែងការណ៍ភ្នំពេញ ស្តីពីទេសចរណ៍អាស៊ានប្រកបដោយនិរន្តភាព បរិយាបន្ន និងភាពរឹងមាំ។

កិច្ចប្រជុំមន្ត្រីជាន់ខ្ពស់ទេសចរណ៍ជាតិអាស៊ានលើកទី៥៤នេះ នឹងប្រព្រឹត្តទៅពេញមួយថ្ងៃទី០៧ ខែកក្កដា ឆ្នាំ២០២១ ភ្ជាប់ជាមួយកិច្ចប្រជុំមន្ត្រីជាន់ខ្ពស់ទេសចរណ៍ជាតិអាស៊ានបូកបី និងកិច្ចប្រជុំមន្ត្រីជាន់ខ្ពស់ទេសចរណ៍ជាតិអាស៊ានបូកបីបូកឥណ្ឌា នៅថ្ងៃទី០៨ ខែកក្កដា ឆ្នាំ២០២១៕

សហព័ន្ធឧស្សាហកម្មថៃជំរុញឱ្យរដ្ឋាភិបាលផ្លាស់ប្តូរទីតាំងរោងចក្រនានាចេញពីតំបន់លំនៅដ្ឋាន

ដោយៈ សុខុម

បាងកក: សហព័ន្ធឧស្សាហកម្មថៃ (FTI) បានស្នើសុំឱ្យរដ្ឋាភិបាលផ្លាស់ប្តូរទីតាំងរោងចក្រនានាចេញពីតំបន់លំនៅដ្ឋាន បន្ទាប់ពីមានគ្រោះអគ្គិភ័យឆាបឆេះរោងចក្រផលិតស្នោប្លាស្ទិកដើម្បីទប់ស្កាត់គ្រោះថ្នាក់នៅពេលអនាគត។ នេះបើយោងតាមកាសែត Bangkok Post ចុះផ្សាយនៅថ្ងៃទី៧ កក្កដា នេះ។

សហព័ន្ធនេះបានលើកឡើងថា ទន្ទឹមនេះរដ្ឋាភិបាលក៏គួរតែផ្ដល់គ្រឿងលើកទឹកចិត្តមួយចំនួនដល់បណ្ដាម្ចាស់រោងចក្រផងដែររួមមានដូចជាការបញ្ចុះពន្ធដីធ្លី២% និងការបញ្ចុះពន្ធលើប្រាក់ចំណូលក្រុមហ៊ុនជាដើម។

លោក Supant Mongkolsuthree ប្រធានសហព័ន្ធឧស្សាហកម្មថៃ បានគូសបញ្ជាក់ថា “ការផ្លាស់ប្តូរទីតាំងរោងចក្រនានាទាមទារឱ្យមានការគាំទ្រពីរដ្ឋាភិបាល ព្រោះតែការចំណាយខ្ពស់”។

ក្រុមពន្លត់អគ្គិភ័យ និងក្រុមសង្គ្រោះបានចំណាយពេលដល់ទៅជាង២៤ម៉ោងក្នុងប្រតិបត្តិការពន្លត់អគ្គិភ័យដែលបានឆាបឆេះរោងចក្រមួយយ៉ាងសន្ធោរសន្ធៅក្នុងស្រុកបាង ភ្លី (Bang Phli) ខេត្តសាមុត ប្រាកាន (Samut Prakan) កាលពីពេលរំលងអធ្រាត្រឈានចូលព្រឹកថ្ងៃច័ន្ទ ទី៥ កក្កដា។

ការផ្ទុះ និងអគ្គិភ័យឆាបឆេះដែលបានយក់យកជីវិតភ្នាក់ងារពន្លត់អគ្គិភ័យម្នាក់ និងបណ្ដាលឱ្យមនុស្សរាប់សិបនាក់រងរបួស បង្កការខូចខាតផ្ទះពលរដ្ឋចំនួន៧៣ផ្ទះ និងបង្ខំឱ្យមនុស្សប្រមាណ១.៩០០នាក់ជម្លៀសចេញក្នុងក្នុងចម្ងាយ៥គីឡូម៉ែត្រជុំវិញ ព្រោះផ្សែងដែលចេញពីអគ្គិភ័យនោះជាផ្សែងពុល។

យោងតាមសហព័ន្ធឧស្សាហកម្មថៃ ឱ្យដឹងថា រោងចក្រភាគច្រើនមានទីតាំងស្ថិតនៅឆ្ងាយពីសហគមន៍ពលរដ្ឋរស់នៅ ប៉ុន្តែនៅពេលដែលទីក្រុងចេះតែពង្រីកខ្លួនឥតឈប់ឈរ ផ្ទះ និងរោងចក្រនានាក៏កាន់តែខិតជិតគ្នា។

លោក Supant Mongkolsuthree បានថ្លែងថា រោងចក្រដែលបង្កការបំពុលបរិស្ថាន និងបង្កគ្រោះថ្នាក់ដល់សហគមន៍ក្បែរខាង ត្រូវតែរើចេញពីតំបន់ទាំងនោះស្របតាមបទប្បញ្ញត្តិស្ដីពីសុវត្ថិភាពយ៉ាងតឹងរ៉ឹង។

លោកបានស្នើឱ្យអាជ្ញាធរអចលនទ្រព្យឧស្សាហកម្មថៃ (IEAT) អភិវឌ្ឍតំបន់ឧស្សាហកម្ម ជាពិសេសសម្រាប់សហគ្រាសធន់តូច និងមធ្យម (SME) ហើយផ្តល់ដីធ្លីដែលមានតម្លៃដីទាបដល់ពួកគេ។

សហព័ន្ធឧស្សាហកម្មថៃ ក៏មានគោលនយោបាយលើកទឹកចិត្តឱ្យសមាជិកនានាអភិវឌ្ឍរោងចក្ររបស់ខ្លួនដែលមិនប៉ះពាល់ដល់បរិស្ថានក្រោមកិច្ចសហប្រតិបត្តិការជាមួយ IEAT ផងដែរ។ បច្ចុប្បន្នមានរោងចក្រចំនួន៣០០ស្ថិតក្រោមគម្រោង Eco Factor (រោងចក្រអេកូ)៕