ដោយៈរតនៈ
ភ្នំពេញៈប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា(CVEA) បានព្យាករណ៍ថា អចលនទ្រព្យក្នុងស្រុកនឹងមានកំណើន ទិញលក់នៅឆមាសទី២ឆ្នាំ ២០២១នេះ ខណៈដែលវិនិយោគិនបរទេស នឹងចាប់ផ្ដើមចូលមកកម្ពជាបណ្ដើរៗនៅក្នុងឆ្នាំ ២០២២។

ក្នុងសន្និសិទសារព័ត៌មាន ស្ដីពី បច្ចុប្បន្នភាពទីផ្សារអចលនវត្ថុក្នុងកំឡុងកូវីដ-១៩ នាព្រឹកថ្ងៃទី២០ ឧសភានេះ ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីម មានប្រសាសន៍ថា នៅចុងឆមាសទី១ឆ្នាំ២០២១គឺមានការផ្ទុះឡើងវិញជំងឺកូវីត១៩ តាមរយៈព្រឹត្តិការណ៍ ២០កុម្ភៈ ដែលធ្វើឲ្យការទិញលក់អចលនទ្រព្យនៅកម្ពុជា ហាក់មានការរាំងស្ទះ។

ប៉ុន្តែលោកច្រឹក សុខនីម ព្យាករណ៍ថា ចរន្តនៃការទិញ លក់ អចលនទ្រព្យនៅកម្ពុជា នឹងមានកំនើនឡើងវិញ នៅក្នុងឆមាសទី២នៃឆ្នាំ២០២១នេះ។

លោកពន្យល់ថា “មូលហេតុដែលចរន្តនៃការទិញ លក់ អចលនទ្រព្យនៅកម្ពុជាមិនអាចងើបឡើងវិញបាន ដោយសារតែមិនទាន់អាចគ្រប់គ្រងបាន នូវការរីករាលដាលជំងឺកូវីត១៩”។លោកបន្តថា “ប៉ុន្តែប្រសិនបើរដ្ឋាភិបាលកម្ពុជា គ្រប់គ្រងបានហើយនោះ ជាពិសេសចំនួនអ្នកចាក់វ៉ាក់សាំងការពារកាន់តែច្រើន វិស័យទិញដូរអចលនទ្រព្យនេះនឹងងើបឡើងវិញ ព្រោះទាំងអតិថិជន និងអ្នកវិនិយោគបារម្ភពីសុខភាព និងសុវត្ថិភាពរបស់ពួកគាត់”។

លោកច្រឹក សុខនីមបានបន្តថា នៅក្នុងប្រទេសកម្ពុជា គឺមានសក្ដានុពលខ្ពស់សម្រាប់វិស័យទិញលក់អចលនទ្រព្យ ហើយរកនូវប្រាក់ចំណូលខ្ពស់ពីវិស័យអចលនទ្រព្យបើធៀបនឹងប្រទេសក្នុងតំបន់។

លោកលឹម សុជាតិប្រធានក្រុមប្រឹក្សាភិបាលសមាគមCVEAបានមានប្រសាសន៍ឲ្យដឹងផងដែរថា និន្នាការវិនិយោគ ការទិញលក់ ក្នុងវិស័យនេះនឹងងើបឡើងវិញលឿន ដោយសារកម្ពុជា នៅតែមានឱកាសរកបានផលចំណេញពីការវិនិយោគ ពិសេសអ្នកវិនិយោគនៅក្នុងវិស័យនេះនៅតែរកបានផលចំណេញ និងទទួលបានជោគជ័យ លើកលែងតែការទិញប៉ះចំអចលនទ្រព្យដែលមានបញ្ហា។

លោកបន្តថា “អ្នកវិនិយោគអន្តរជាតិនឹងចូលមកកាន់តែច្រើន ហើយពេលបញ្ចប់វិបត្តិនេះ វិស័យអចលនទ្រព្យនឹងស្ទុះងើបលឿនជាងមុនពេលមានវិបត្តិផងដែរ”៕

ដោយៈ លក្ខិណា
ភ្នំពេញៈ បច្ចុប្បន្ននេះ វិនិយោគិនបរទេស ដែលដាក់ទុនវិនិយោគច្រើនជាងគេនៅកម្ពុជា គឺជាវិនិយោគិនជនជាតិចិន ហើយការវិនិយោគភាគច្រើនត្រូវបានធ្វើឡើងក្នុងវិស័យអចលនទ្រព្យ ប៉ុន្តែថ្មីៗនេះ វិនិយោគិនចិនបានចាប់ផ្ដើមដាក់ទុនវិនយោគលើវិស័យកសិកម្មបន្ថែមពីលើវិស័យដែលពួកគេបានដាក់ទុនរួចហើយ។

លោកឧកញ៉ាចេង ខេង អគ្គនាយកនៃក្រុមហ៊ុនអចលនទ្រព្យCPL បានមានប្រសាសន៍នៅក្នុងសន្និសីទតាមវីដេអូនអនឡាញកាលពីព្រឹកថ្ងៃទី២០ ឧសភា ២០២១នេះថា បច្ចុប្បន្ននេះចិនក៏បានសម្លឹងមើលឃើញវិស័យកសិកម្ម សម្រាប់ការវិនិយោគរបស់ខ្លួននៅក្នុងប្រទេសកម្ពុជាផងដែរ ពីព្រោះប្រទេសចិនក៏បាននាំចូលផលិតផលកសិកម្មពីកម្ពុជាច្រើនដែរក្នុងមួយឆ្នាំៗ ដូចជាចេកអំបូងលឿង ស្វាយស្រស់ និងដំណាំផ្សេងៗទៀតកំពុងចរចានាំចេញ។

រដ្ឋមន្ត្រីក្រសួងកសិកម្មរុក្ខាប្រមាញ់និងនេសាទលោកវេង សាខុនឱ្យដឹងថា ចិនគឺជាទីផ្សារធំមួយនៃផលិតផលកសិកម្មរបស់កម្ពុជា តែកម្ពុជាត្រូវតែពង្រឹងគុណភាពផលិតផលរបស់ខ្លួនបន្ថែមដើម្បីអាចឈានជើងចូលទីផ្សារនៃប្រទេសចិន។

លោកបានបន្ថែមថា តាមពិតកម្ពុជាមានផលិតផលជាច្រើនដែលអាចនាំចេញទៅចិនបានព្រោះមានតម្រូវការខ្ពស់ តែដោយសារតែរបាំងនៃភូតគាមអនាម័យ ទើបធ្វើឱ្យកម្ពុជាត្រូវរាំងស្ទះក្នុងការនាំចេញ ហើយក៏ត្រូវការពិនិត្យល្អិតល្អន់ពីសំណាក់អ្នកជំនាញចិនផងដែរ។

វិស័យកសិកម្មរបស់កម្ពុជា ក៏មានវិនិយោគិនជាច្រើនបាននិងកំពុងបណ្ដាក់ទុនវិនិយោគដើម្បីកែច្នៃនិងនាំចេញទៅកាន់ទីផ្សារប្រទេសចិនវិញ ក្នុងនោះក៏មានចេកអំបូង ដំឡូងមី និងផលិតផលកសិកម្មផ្សេងទៀត ។ហើយតាមរយៈកិច្ចព្រមព្រៀងពាណិជ្ជកម្មសេរី កម្ពុជាចិន និងទាក់ទាញវិនិយោគិនបន្ថែមមកបណ្ដាក់ទុនវិនិយោគបន្ថែមនៅក្នុងប្រទេសកម្ពុជា។

លោកច្រឹក សុខនីមប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានឱ្យដឹងថា ការវិនិយោគរបស់ចិន មានច្រើនណាស់នៅអាស៊ីនិងពិភពលោក ហើយបើនិយាយពីការវិនិយោគអចលនទ្រព្យវិញ ការវិនិយោគជនជាតិចិនចូលចិត្តកសាងបណ្ដុំសហគមន៍របស់គេ។

លោកបានបន្តថា នៅក្នុងប្រទេសកម្ពុជា តំបន់ពីរដែលជនជាតិបានចាប់ផ្ដើមកសាងសហគមន៍របស់គេ គឺនៅក្នុងខេត្តព្រះសីហនុនិងនៅរាជធានីភ្នំពេញ រួមទាំងផ្នែកខ្លះនៃខេត្តកោះកុង (តារាសាគរ)៕

ដោយៈតារា
ភ្នំពេញៈ អ្នកជំនាញនៃសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានរំពឹងថា វិស័យអចលទ្រព្យនៅកម្ពុជា នៅចុងឆ្នាំ២០២១ ឬនៅឆ្នាំ២០២២ អាចងើបឡើងវិញជាបណ្តើរៗ ខណៈវិនិយោគិនក្នុងស្រុក បានចាប់ផ្តើមមានចន្តរក្នុងការទិញ-លក់ បន្ទាប់ពីកម្ពុជាទទួលបានការចាក់វ៉ាសាំងបង្ការជម្ងឺកូវីដ-១៩ បានកាន់តែច្រើន ។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីមបានមានប្តសាសន៍ឲ្យដឹង នៅក្នុងសន្និសីទសារព័ត៌មានស្តីពី “បច្ចុប្បន្នភាពទីផ្សារអចលនវត្ថុក្នុងកំឡុងកូវីដ-១៩” នៅថ្ងៃទី ២០ ខែ កុម្ភៈ ឆ្នាំ ២០២១ នេះថា បញ្ហាប្រឈមនៅក្នុងវិបត្តិកូវីដ១៩ គឺបានធ្វើឲ្យប៉ះពាល់ដល់សេដ្ឋកិច្ចជាតិយើង ក្នុងនោះចំពោះវិស័យអចលនទ្រព្យក៏ជាផ្នែកមួយ ក្នុងការប៉ះពាល់ដោយសារវិបត្តិជម្ងឺនេះផងដែរ ដែលជាការរាំងស្ទះដល់ការអភិវឌ្ឍន៍វិស័យនេះ និងការបាត់បង់អ្នកវិនិយោគទុន ជាពិសេសអ្នកវិនិយោគទុនបរទេសជាដើម។

លោកបន្តថា “ទោះបីនៅក្នុងស្ថានភាពវិនិយោគិនបរទេស មិនទាន់អាចធ្វើដំណើរយ៉ាងណាក៏ដោយ ក្នុងនោះប្រសិនអ្នកវិនិយោគទុកក្នុងស្រុក មានសកម្មភាពការធ្វើដំនើរបានអ្នកវិនិយោទុននៅក្នុងស្រុក ពួគគេនឹងចាប់ផ្តើមសម្លឹងមើលឱកាសវិនិយោគឡើងវិញ ជាពិសេសអ្នកដែលមានធនធានហិរញ្ញវត្ថុ”។លោកបន្តថា “អ្នកមានធនធាន គាត់នឹងចាប់ផ្តើមមើលឃើញសក្តានុពល ទិញអចលនទ្រព្យទុក ក្នុងនោះខណៈដែលវិនិយោគិនបរទេសអាចធ្វើដំណើរបាន ពួកគេនឹងអាចសម្លឹងមើលឱកាសនៃការវិនិយោគបន្ត ហើយចំនួននៃការវិនិយោគលើវិស័យនេះ នឹងអាចហក់ឡើងខ្ពស់បន្តិចម្តងៗ”។

លោកច្រឹក សុខនីមបានបន្តថា ដើម្បីធ្វើឲ្យវិស័យនេះងើបឡើងវិញលឿន វាត្រូវការកត្តាខាងក្នុង និងកត្តាខាងក្រៅ។ កត្តាខាងក្នុង គឺរដ្ឋាភិបាលអាចចាក់វ៉ាក់សាំងបានលឿន លែងបង្កហានិភ័យនៃការឆ្លងជំងឺនេះ និងការចាប់ផ្តើមពេញលេញនៃការអភិវឌ្ឈក្នុងស្រុក។

ចំណែកកត្តាខាងក្រៅ អ្នកវិនិយោគអន្តរជាតិតែងតែបារម្ភ ពីការធ្វើដំណើរដោយសារបញ្ហាជំងឺកូវីដ១៩ ហេតុនេះវាត្រូវការពេលវេលាយូរ ដើម្បីឲ្យវិនិយោគិនអន្តរជាតិចូលមក ប៉ុន្តែយើ់ងរំពឹងថា ពួកគាត់នឹងចូលមកនៅចុងឆ្នាំនេះ និងឆ្នាំ២០២២ ដែលពេលនោះវិស័យអចលនទ្រព្យនឹងមានភាពរីកចម្រើនឡើងវិញលឿន។

ជាមួយគ្នានេះ លោក លឹម សុជាតិ ប្រធានក្រុមប្រឹក្សាភិបាល សមាគមអ្នកវាយតម្លៃនិងភ្នាក់ងារអចលនវត្ថុកម្ពុជាលើកឡើងផងដែរថា សម្រាប់ចន្តរនៃការទិញ-លក់ វិស័យអចលនទ្រព្យក្នុងពេលបច្ចុប្បន្ន យើងសង្កេតឃើញថា អ្នកវិនិយោគក្នុងស្រុកបានទិញ-លក់ មានកំណើនខ្ពស់ជាងបរទេស ក្នុងនោះចំពោះអចនទ្រព្យដូចជាដីធ្លី ផ្ទះសម្បែង អ្នកវិនិយោគទុនក្នុងស្រុក មានការទិញលក់យ៉ាងច្រើន។

ចំណែកការវិនិយោគ ទិញ-លក់ ដូចជា ខុនដូ ឬអគារពាណជ្ជកម្មផ្សេងៗ អ្នកវិនិយោគបរទេសមានការអភិវឌ្ឍន៍ និងទិញ-លក់ច្រើន ជាក់ស្តែងនៅក្នុងការរីករាលដាលនៃជម្ងឺកូវីដ-១៩ ឬការ Lockdown វិស័យនេះ នៅតែដំណើរការទិញលក់ជាធម្មតា៕