ក្រុមហ៊ុន Microsoft គ្រោងវិនិយោគទឹកប្រាក់១ពាន់លានដុល្លារ ដើម្បីបង្កើតមជ្ឈមណ្ឌលផ្ទុកទិន្នន័យនៅម៉ាឡេស៊ី

ដោយ សុខុម

គូឡាឡាំពួ: ក្រុមហ៊ុន Microsoft Corporation គ្រោងបោះទុនវិនិយោគ១ពាន់លានដុល្លារអាមេរិក នៅក្នុងប្រទេសម៉ាឡេស៊ី សម្រាប់រយៈពេល៥ឆ្នាំខាងមុខ ហើយនេះគឺជាផ្នែកមួយនៃការសហការជាដៃគូថ្មីជាមួយបណ្ដាទីភ្នាក់ងាររដ្ឋាភិបាល និងក្រុមហ៊ុនក្នុងស្រុក។ នេះបើយោងតាមនាយករដ្ឋមន្ត្រី Muhyiddin Yassin បានបញ្ជាក់នៅថ្ងៃច័ន្ទ ទី១៩ មេសានេះ។

យោងតាមការចុះផ្សាយរបស់សារព័ត៌មាន CNA ឱ្យដឹងថា នេះជាការវិនិយោគធំបំផុតរបស់ក្រុមហ៊ុនបច្ចេកវិទ្យាយក្សរបស់សហរដ្ឋអាមេរិក មួយនេះនៅក្នុងប្រទេសម៉ាឡេស៊ី។

ការប្រកាសនេះធ្វើឡើង បន្ទាប់ពីប្រទេសម៉ាឡេស៊ី កាលពីខែកុម្ភៈ ដើមឆ្នាំនេះបានព្រមព្រៀងដោយមានលក្ខខណ្ឌ អនុញ្ញាតឱ្យក្រុមហ៊ុន Microsoft ក្រុមហ៊ុន Google ក្រុមហ៊ុន Amazon និងក្រុមហ៊ុនទូរគមនាគមន៍រដ្ឋ Telekom Malaysia សាងសង់ និងគ្រប់គ្រងមជ្ឈមណ្ឌលរក្សាទុកទិន្នន័យខ្នាតយក្សនៅក្នុងប្រទេសនេះ និងផ្តល់សេវា Cloud។

ការប្រកាសនេះក៏ធ្វើឡើងផងដែរ ក្រោយពីការវិនិយោគផ្ទាល់ពីបរទេស (FDI) នៅក្នុងប្រទេសម៉ាឡេស៊ី បានដាំក្បាលចុះរហូតដល់ទៅ៦៨%កាលពីឆ្នាំមុន ដែលជាការធ្លាក់ចុះដ៏ធំបំផុតនៅតំបន់អាស៊ីអាគ្នេយ៍។

ប្រទេសម៉ាឡេស៊ី បានលើកសរសើរខ្លួនឯងថាជាគោលដៅវិនិយោគដ៏ល្អមួយ ដោយកាលពីពេលថ្មីៗនេះរដ្ឋមន្ត្រីក្រសួងហិរញ្ញវត្ថុប្រទេសនេះថ្លែងថា ម៉ាឡេស៊ី កំពុងសម្លឹងមើលលទ្ធភាពផ្ដល់គ្រឿងលើកទឹកចិត្តនានា ដើម្បីជួយទាក់ទាញការវិនិយោគផ្ទាល់ពីបរទេសបន្ថែមទៀត។

ម៉ាឡេស៊ី បានបញ្ជាក់ថា ការវិនិយោគពីក្រុមហ៊ុនផ្តល់សេវា Cloud ទាំងនេះនឹងមានទំហំសរុបចន្លោះពី២,៩១ពាន់លានដុល្លារ ទៅ៣,៦៤ពាន់លានដុល្លារ សម្រាប់រយៈពេល៥ឆ្នាំខាងមុខ។

នាយករដ្ឋមន្ត្រី Muhyiddin Yassin បានគូសបញ្ជាក់ថា ជាផ្នែកមួយនៃគំនិតផ្តួចផ្តើម Bersama Malaysia Initiative ក្រុមហ៊ុន Microsoft នឹងបង្កើត “តំបន់មជ្ឈមណ្ឌលរក្សាទុកទិន្នន័យ” ដំបូងបង្អស់របស់ខ្លួនដែលមានមជ្ឈមណ្ឌលរក្សាទុកទិន្នន័យជាច្រើននៅក្នុងប្រទេសម៉ាឡេស៊ី ដើម្បីគ្រប់គ្រងទិន្នន័យពីប្រទេសផ្សេង។

លោក Jean-Philippe Courtois នាយកប្រតិបត្តិរងនៃក្រុមហ៊ុន Microsoft បានចេញសេចក្តីថ្លែងការណ៍ថា “តំបន់មជ្ឈមណ្ឌលរក្សាទុកទិន្នន័យដែលនឹងលេចចេញជារូបរាងនៅពេលខាងដ៏ខ្លីមុខនេះ នឹងមកមកនូវការផ្លាស់ប្ដូរគួរឱ្យភ្ញាក់ផ្អើលសម្រាប់ប្រទេសម៉ាឡេស៊ី” ។

ក្រោមកម្មវិធីនេះ ក្រុមហ៊ុន Microsoft ក៏នឹងជួយពលរដ្ឋម៉ាឡេស៊ី រហូតដល់ទៅ១លាននាក់ឱ្យទទួលបានជំនាញឌីជីថលនៅត្រឹមដំណាច់ឆ្នាំ២០២៣ ផងដែរ៕

សណ្ឋាគារផ្កាយ៧ដ៏ចម្លែក ដែលជាសំណង់ស្ថាបត្យដ៏កំពូលមួយទៀតរបស់មហាយក្សចិន

ដោយ សុខុម

ចិន៖ រះយ៉ាងខ្ពស់ត្រដែតនៅលើមាត់ច្រាំងភាគត្បូងនៃបឹងថៃហ៊ូ (Taihu Lake) ស្ថិតក្នុងក្រុងហ៊ូចូវ (Huzhou) ខេត្តចឺជាំង (Zhejiang) នោះគឺជាសំណង់សណ្ឋាគារលំដាប់ផ្កាយ៧ ដំបូងបង្អស់នៅក្នុងប្រទេសចិន។

សណ្ឋាគារ Moon Hotel Huzhou ដែលមានឈ្មោះផ្លូវការ Sheraton Huzhou Hot Spring Resort នេះគឺជាសំណង់ស្ថាបត្យកម្មដ៏លេចធ្លោមួយក្នុងចំណោមសំណង់ស្ថាបត្យកម្មកំពូលៗនៅក្នុងប្រទេសចិន។

អគារដែលមានរចនាប័ទ្មប្លែកអស្ចារ្យនេះក៏មានរហស្សនាមថា “Horseshoe Hotel” (សណ្ឋាគារស្បែកជើងសេះ) និង “Doughnut Hotel” (សណ្ឋាគារនំដូណាត់) ផងដែរ ព្រោះតែវាមានសណ្ឋានជារង្វង់មូល ហើយមានប្រហោងកណ្ដាលប្រៀបដូចនំដូណាត់ ឬស្បែកជើងសេះនោះឯង។

ក្រៅពីមានសណ្ឋានជារង្វង់មូល សំណង់ស្ថាបត្យកម្មដ៏កំពូលមួយនេះក៏ស្ថិតនៅទីតាំងធម្មជាតិដ៏ស្រស់ស្អាត ដែលយើងមើលទៅឃើញវាផុសត្រដែតផុតពីផ្ទៃទឹក ហើយចន្លោះកណ្ដាលគឺជាផ្លូវទឹកដែលទូក ឬកាណូតធំល្មមអាចឆ្លងកាត់បានយ៉ាងអស្ចារ្យ។

អគារ២៧ជាន់ដែលមានកម្ពស់១០១,២ម៉ែត្រ និងទទឹង១១៦ម៉ែត្រនេះត្រូវបានគូរប្លង់ដោយលោក ម៉ា យ៉ានសុង (Ma Yansong) ជាកំពូលស្ថាបត្យករជនជាតិចិន ដែលមានឈ្មោះល្បីល្បាញពេញពិភពលោក និងដំណើរការសាងសង់ដោយក្រុមហ៊ុន Shanghai Feizhou Group។ ការសាងសង់អគារនេះបានបញ្ចប់ជាស្ថាពរនៅខែតុលា ឆ្នាំ២០១៣ ហើយវាជាហ្វ្រែនឆាយមួយរបស់សម្ព័ន្ធសណ្ឋាគារប្រណីតអន្តរជាតិ Sheraton Hotels and Resort។

នៅពេលរាត្រី អគារនេះបញ្ចេញសម្រស់កាន់តែស្រស់ស្អាត នៅពេលអំពូលភ្លើង LED ដែលបំពាក់ក្នុងសណ្ឋាគារនេះបញ្ចេញពន្លឺជះស្រមោលទៅលើផ្ទៃទឹកបឹងដែលខណ្ឌចែកក្រុងណានជីង និងក្រុងសៀងហៃ នេះបង្កើតបានជាផ្ទាំងទស្សនីយភាពអស្ចារ្យ។

សណ្ឋាគារនេះមានបន្ទប់ធម្មតាចំនួន៣២១បន្ទប់ បន្ទប់ប្រភេទ Villa Room ចំនួន៣៧បន្ទប់ និងបន្ទប់ស្វីត (suite) ចំនួន ៤៤បន្ទប់ បន្ទប់ប្រធានាធិបតី (Presidential Suite) ១បន្ទប់ ក្លឹបហាត់ប្រាណ១ ភោជនីយដ្ឋាន៤ ហាងកាហ្វេ១ និងអាងហែលទឹកកុមារ១ ។

វាគ្មានអ្វីចម្លែកនោះទេ ដែលសំណង់ស្ថាបត្យកម្មមួយនេះបានជាប់ឈ្មោះក្នុងចំណោមអគារស្រស់ស្អាតកំពូលទាំង៨នៅក្នុងប្រទេសចិន ដោយសារតែរចនាប័ទ្មលេចធ្លោ និងប្លែកអស្ចារ្យ៕

លោកឧបនាយករដ្ឋមន្ត្រី ជា សុផារ៉ា សម្រេចបង្កើតក្រុមប្រចាំការដោះស្រាយការងារប្រចាំថ្ងៃ

ដោយ ៖ រ៉ាណេត

ភ្នំពេញ៖ លោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីសួងរៀបចំដែនដី នគរូបនីយកម្ម និងសំណង់បានសម្រេចបង្កើតក្រុមប្រចាំការ និងដោះស្រាយការងារសំខាន់ៗប្រចាំថ្ងៃរបស់ក្រសួងនៅក្នុងអំឡុងពេលបិទខ្ទប់ក្នុងភូមិសាស្ត្ររាជធានីភ្នំពេញ និងក្រុងតាខ្មៅនៃខេត្តកណ្តាល ដែលមានសមាសភាពចំនួន៦រូប ហើយលោកឧបនាយករដ្ឋមន្ត្រីជា សុផារ៉ាជា ជាប្រធានដឹកនាំ។

តាមរយៈសេចក្តីសម្រេចដែលចុះហត្ថលេខាដោយលោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់នៅថ្ងៃទី១៩ ខែមេសា ឆ្នាំ២០២១បានឱ្យដឹងថា ក្រុមប្រចាំការ និងដោះស្រាយការងារប្រចាំថ្ងៃដែលទើបត្រូវបានបង្កើតនេះមានភារកិច្ចសំខាន់ៗដូចជា ៖

* ដឹកនាំ និងដោះស្រាយការងារប្រចាំថ្ងៃ ដើម្បីធានានិរន្តរភាពការងាររបស់ក្រសួង ក្នុងដំណាក់កាលនៃការអនុវត្តសេចក្តីសម្រេចរបស់រាជរដ្ឋាភិបាលស្ដីពីការបិទខ្ទប់ភូមិសាស្ត្ររាជធានីភ្នំពេញ និងក្រុងតាខ្មៅនៃខេត្តកណ្តាល ដើម្បីទប់ស្កាត់ការឆ្លងរាលដាលនៃជំងឺកូវីដ-១៩ ។

* តាមដាន និងសម្របសម្រួលកិច្ចការជំនាញរបស់ក្រសួងទាំងនៅថ្នាក់ជាតិនិងថ្នាក់ក្រោមជាតិ។

* តាមដានសុខភាពនិងដោះស្រាយសំណូមពរចាំបាច់របស់មន្ត្រីទាំងអស់ដែលបំពេញការងារ តាម Online នៅគេហដ្ឋាន ក្នុងអំឡុងពេលបិទខ្ទប់។

* តាមដាននិងណែនាំដល់មន្ត្រីទាំងអស់ដែលបំពេញការងារតាមOnline នៅគេហដ្ឋាន ឱ្យគោរព និងអនុវត្តឱ្យបានខ្ជាប់ខ្លួនវិធានការរបស់រាជរដ្ឋាភិបាលក្នុងការទប់ស្កាត់ការឆ្លងរាលដាលនៃ ជំងឺកូវីដ-១៩ និងផ្តល់ព័ត៌មានជាប្រចាំមកក្រុមប្រចាំការ។

* ផ្សព្វផ្សាយ និងចូលរួមអនុវត្តវិធានការចាំបាច់នានាតាមការណែនាំរបស់រាជរដ្ឋាភិបាលក្នុងការ ទប់ស្កាត់ការឆ្លងរាលដាលនៃជំងឺកូវី-១៩ ។

តាមប្រការ៣ថ្មី នៃសេចក្តីសម្រេចរបស់រាជរដ្ឋាភិបាល ស្តីពីការកែសម្រួលវិធានការដែលត្រូវអនុវត្តក្នុងអំឡុងពេលបិទខ្ទប់ភូមិសាស្ត្ររាជធានីភ្នំពេញ និងក្រុងតាខ្មៅនៃខេត្តកណ្តាល ដើម្បីទប់ស្កាត់ការឆ្លងរាលដាលជំងឺកូវីដ១៩ បានឱ្យដឹងថា អំឡុងពេលបិទខ្ទប់នេះ រាជរដ្ឋាភិបាលអនុញ្ញាតឱ្យ ស្ថាប័នសាធារណៈធ្វើសកម្មភាពការងាររបស់ខ្លួន ប៉ុន្តែប្រធានស្ថាប័នកំណត់ឱ្យមានមនុស្សធ្វើការមិនឱ្យលើសពី២ភាគរយឡើយ។

នៅក្នុងសេចក្តីសម្រេចខាងលើនេះបានលម្អិតថា ក្រុមប្រចាំការដោះស្រាយការងារដែលមានសមាសភាពទាំង៦រូបនេះ ដឹកនាំដោយលោកឧបនាយករដ្ឋមន្ត្រីជា សុផារ៉ា រដ្ឋមន្ត្រីក្រសួងរៀចំដែនដី នគរូបនីយកម្ម និងសំណង់ ដោយមានសមាជិកដូចជា លោក ថេង ច័ន្តសង្វារ រដ្ឋលេខាធិការ, លោក លាង មុន្នីរិទ្ធ រដ្ឋលេខាធិការ, លោក ឡោ សាវុធ រដ្ឋលេខាធិការ, លោក សេង ឡូត អគ្គនាយកនៃអគ្គនាយកដ្ឋានរដ្ឋបាល និង លោក ឆាយ ឫទ្ធិសែន អគ្គនាយក នៃអគ្គនាយកដ្ឋានរៀបចំដែនដី និងនគរូបនីយកម្ម៕

អ្នកជំនាញ ៖ ការទិញអចលនវត្ថុទុកយូរដោយគ្មានការវិនិយោគបន្តអាចក្លាយជាបំណុល

ដោយ ៖ រ៉ាណេត

ភ្នំពេញ ៖ នៅក្នុងវិស័យអចលនទ្រព្យត្រូវបានគេបែងចែកចេញជាច្រើនប្រភេទច្រើនផ្នែក ហើយការវិនិយោគទៀតសោតក៏ត្រូវបានធ្វើឡើងក្នុងរូបភាពផ្សេងៗ ប៉ុន្តែក្នុងនោះអ្វីដែលមានភាពលេចធ្លោជាងគេគឺការទិញលក់អចលនវត្ថុ ដោយហេតុថា ងាយទទួលបានផលចំណេញ ចំណាយទុនតិច ប្រើពេលវេលាខ្លី។

អនុប្រធានសមាគមអចលនទ្រព្យសកល លោកឡោ វិចិត្រ បានមានប្រសាសន៍កាលពីពេលកន្លងទៅថ្មីៗនេះថា ការទិញអចលនវត្ថុទុកលក់យកចំណេញមិនមែនសុទ្ធតែអាចធ្វើទៅបានសម្រេច១០០ភាគរយគ្រប់គ្នានោះទេ ជួនកាលក៏មានអ្នកខ្លះផុងខ្លួន ឬខាតបង់ទាំងធនធាន និងពេលវេលា ដែលអាចចាត់ទុកថាជាបំណុលពីការវិនិយោគថែមទៀតផង។

លោកបានលើកឡើង ការវិនិយោគ គឺជាការទិញទុកសម្រាប់លក់បន្តយកចំណេញ ហើយព្យាយាមធ្វើឱ្យបាននៅក្នុងរយៈពេលខ្លី ដើម្បីអាចយកផលចំណេញ ហើយធ្វើជាទុនវិនិយោគនៅទីតាំងថ្មីផ្សេងទៀតដែលប្រាកដថាអាចទទួលបានផលវិជ្ជមានក្នុងអត្រាខ្ពស់។

លោកឡោ វិចិត្រ បានបញ្ជាក់ថា “នៅពេលដែលអ្នកចំណាយទុនទិញអចលនវត្ថុណាមួយមកធ្វើជាកម្មសិទ្ធិ នោះវាអាចកើតមានរូបភាព២ គឺអាចជាទ្រព្យ ឬអាចជាបំណុលពីការវិនិយោគ។ នៅពេលអ្នកទិញក្នុងតម្លៃមួយទាប ហើយលក់ចេញទៅវិញក្នុងរយៈពេលខ្លីដោយទទួលបានផលចំណេញណពីការលក់ មិនថាផលចំណេញនោះតិច ឬច្រើនវាគឺជាទ្រព្យធនដែលទទួលបានពីការវិនិយោគរបស់អ្នក។ ប៉ុន្តែក្នុងលក្ខខណ្ឌដែលអ្នកទិញអចលនវត្ថុក្នុងតម្លៃមួយខ្ពស់ មិនថាអ្នកបង់លុយដាច់ ឬទិញដោយរំលោះដោយជាប់ចំណងការប្រាក់នោះទេ នៅពេលដែលអ្នកទុកចោលយូរដោយគ្មានសកម្មភាពវិនិយោគបន្ត នោះវានឹងក្លាយទៅជាបំណុលជាមិនខាន” ។

លោកបានពន្យល់ថា អចលនវត្ថុមួយដែលត្រូវបានទិញដោយបង់ផ្ដាច់ក្នុងតម្លៃព្រមព្រៀងមួយ ហើយមិនយូរប៉ុន្មានផងមានគេឱ្យតម្លៃលើសថ្លៃដើម សូមកុំស្ទាក់ស្ទើរ គឺត្រូវតែលក់ដើម្បីបានបង្កើនទុនសម្រាប់ធ្វើការវិនិយោគថ្មីបន្ត។ ជាមួយគ្នានេះ ប្រសិនបើទិញអចលនវត្ថុមួយដោយការបង់រំលោះ ហើយមិនយូរប៉ុន្មានតម្លៃអចលនវត្ថុនោះត្រូវបានគេឱ្យថ្លៃជាងតម្លៃដើមរួមទាំងអត្រាការប្រាក់ ក៏ត្រូរតែលក់យកចំណេញ។ កាលដែលទុកអចលនវត្ថុ ហើយរង់ចាំការទទួលបានតម្លៃថ្លៃដូចការរំពឹងទុកគឺមានអត្រាទាបបំផុត លើសពីនេះអ្នកអាចចំណាយពេលយូរក្នុងការរង់ចាំ ហើយការបង់អត្រាការប្រាក់ក៏កាន់តែច្រើន ដូច្នេះការទន្ទឹងរង់ចាំតម្លៃខ្ពស់របស់អ្នកអាចជាការខាតបង់ទាំងទ្រព្យ ខាតទាំងពេលវេលា ដែលចំណុចនេះត្រូវបានគេចាត់ទុកថាជាបំណុលនៃការវិនិយោគ៕

គម្រោងអភិវឌ្ឍន៍អចលនទ្រព្យចំនួន២៧៩កំពុងដំណើរការសាងសង់នៅទីក្រុងភ្នំពេញទោះសិ្ថតក្នុងវិបត្តិកូវីដ១៩

ដោយៈ ប៊ី

ភ្នំពេញៈ ឆ្នាំ២០២១ ត្រូវបានមើលឃើញថា ទីផ្សារអចលនទ្រព្យនឹងមានការកើនឡើងគួរឱ្យកត់សម្គាល់ក្នុងការផ្គត់ផ្គង់ក្នុងអំឡុងពេល១២ខែ ខាងមុខនេះ ខណៈបច្ចុប្បន្នគម្រោងចំនួន២៧៩ កំពុងដំណើរការសាងសង់នៅក្នុងរាជធានីភ្នំពេញ។ នេះបើយោងតាមការលើកឡើងរបស់ក្រុមហ៊ុន CBRE Cambodia ចេញផ្សាយកាលពីពេលថ្មីៗនេះ។

ក្រុមហ៊ុនCBRE Cambodia បានឱ្យដឹងថា ឆ្នាំ២០២១ មិនមែនគ្រាន់តែជាឆ្នាំថ្មីទេ ប៉ុន្តែហាក់ដូចជាឆ្នាំដ៏សំខាន់មួយ ដែលមានសញ្ញាវិជ្ជមានជាច្រើន ជាពិសេសវ៉ាក់សាំងកូវីដ១៩ ត្រូវបានចែកចាយជាបណ្តើរៗនៅទូទាំងពិភពលោក និងចាប់ផ្តើមមានការផ្លាស់ប្តូរលើសេដ្ឋកិច្ច និងស្ថាប័ននានា។

នៅប្រទេសកម្ពុជា ការចែកចាយវ៉ាក់សាំងបង្ហាញពីការបញ្ចប់នៃជំងឺរាតត្បាត ដែលកំពុងបង្កផលប៉ះពាល់ដល់សេដ្ឋកិច្ច ចាប់តាំងពីឆ្នាំ ២០២០ ហើយជាមួយនេះយើងរំពឹងថានឹងមានការកើនឡើងជារួមនៅក្នុងទីផ្សារអចលនទ្រព្យ។

ជាមួយគ្នានេះដែរវិបត្តិកូវីដ១៩ បានដាក់សម្ពាធកាន់តែខ្លាំងឡើង សម្រាប់ប្រតិបត្តិការសាងសង់។ វិបត្តិនេះមានន័យថា មានតម្រូវការលើការសំអាតកាន់តែច្រើន សន្តិសុខតឹងរឹង ការធ្វើអនាម័យជាប្រចាំនៃគម្រោងអចលនទ្រព្យ និងបង្កើនការគ្រប់គ្រងភ្ញៀវ និងនីតិវិធីរដ្ឋបាលជាដើម។

ការកើនឡើងនូវតម្រូវការទាំងនេះ បង្កើតបានជាបញ្ហាប្រឈម សម្រាប់វិស័យនេះ ជាពិសេសការផ្គត់ផ្គង់កម្លាំងពលកម្ម និងធនធានដើម្បីគ្រប់គ្រងអចលនទ្រព្យ ប្រកបដោយវិជ្ជាជីវៈ និងថ្លៃដើមសមរម្យ។

លោក Shivali Chaman ប្រធានផ្នែកគ្រប់គ្រងអចលនទ្រព្យរបស់ក្រុមហ៊ុន CBRE Cambodia មានប្រសាសន៍ថា“ យើងពិតជាមើលឃើញថា មានការផ្លាស់ប្តូរយ៉ាងឆាប់រហ័សនូវតម្រូវការ នៃការគ្រប់គ្រងអចលនទ្រព្យ”។ លោកបន្តថា “អ្នកអភិវឌ្ឍន៍ និងវិនិយោគិនដឹងកាន់តែច្បាស់ពីផលប៉ះពាល់ ដែលសេវាកម្មគ្រប់គ្រងអចលនទ្រព្យ ដែលមានគុណភាព អាចមានលើការរក្សាទុកកិច្ចសន្យាជួល និងក្នុងការថែរក្សាគម្រោងរបស់ពួកគេ”៕

រាជរដ្ឋាភិបាលចេញសេចក្តីណែនាំបន្ទាន់មួយ លើវិធានការលម្អិតដើម្បីរឹតបណ្តឹងការអនុវត្តក្នុងអំឡុងពេលបិទខ្ទប់ LOCKDOWN រាជធានីភ្នំពេញ និងក្រុងតាខ្មៅ

(ភ្នំពេញ)៖ នៅរសៀលថ្ងៃទី១៩ ខែមេសា ឆ្នាំ២០២១នេះ ប្រមុខរាជរដ្ឋាភិបាល សម្តេចតេជោ ហ៊ុន សែន បានចេញសេចក្តីណែនាំបន្ទាន់មួយ លើវិធានការលម្អិតដើម្បីរឹតបណ្តឹងការអនុវត្តក្នុងអំឡុងពេលបិទខ្ទប់ (LOCKDOWN) រាជធានីភ្នំពេញ និងក្រុងតាខ្មៅ។

សេចក្តីណែនាំបញ្ជាក់ថា ដើម្បីពង្រឹងប្រសិទ្ធភាពនៃការអនុវត្តសេចក្តីសម្រេចលេខ ៤៩ សសរ ចុះថ្ងៃទី១៤ ខែមេសា ឆ្នាំ២០២១ ស្តីពីការបិទខ្ទប់ភូមិសាស្ត្ររាជធានីភ្នំពេញ និងក្រុងតាខ្មៅនៃខេត្តកណ្តាលដើម្បីទប់ស្កាត់ការឆ្លងរាលដាល នៃជំងឺកូវីដ-១៩ និងសេចក្តីសម្រេចលេខ ៥០ សសរ ចុះថ្ងៃទី១៧ ខែមេសា ឆ្នាំ២០២១ ស្តីពីការកែសម្រួលវិធានការដែលត្រូវអនុវត្តក្នុងអំឡុងពេលបិទខ្ទប់ភូមិសាស្ត្ររាជធានីភ្នំពេញ និងក្រុងតាខ្មៅនៃខេត្តកណ្តាល ដើម្បីទប់ស្កាត់ការឆ្លងរាលដាលនៃជំងឺកូវីដ-១៩ របស់រាជរដ្ឋាភិបាល ជាពិសេស ដើម្បីកាត់ផ្តាច់ និងទប់ស្កាត់ការឆ្លងរាលដាលនៃជំងឺកូវីដ-១៩ ឲ្យបានឆាប់រហ័ស និងជាអតិបរមា រាជរដ្ឋាភិបាល សូមធ្វើការ
ណែនាំនូវវិធានការអនុវត្តលម្អិតដែលត្រូវរឹតបន្ដឹងបន្ថែមទៀត៖

សូចនាករចំនួន៤ ធ្វើឲ្យដីតំបន់ផ្លូវជាតិលេខ៤១ និង៥១នៅតែទាក់ទាញការវិនិយោគ

ដោយៈស៊ីវ ម៉េង

កំពង់ស្ពឺ/កណ្តាលៈ តំបន់ស្ថិតនៅតាមបណ្តោយផ្លូវជាតិលេខ៤១ និងផ្លូវជាតិលេខ៥១ បានក្លាយជាតំបន់ពេញនិយមបំផុតលើការវិនិយោគអចលនទ្រព្យ ក្នុងរយៈពេលពីរឆ្នាំចុងក្រោយនេះ ដោយសារហេតុផលសំខាន់ៗជាច្រើន។

ហេតុអ្វីបានជាចរន្តនៃការវិនិយោគក្នុងស្រុក បានបុកសំដៅទៅតំបន់នេះច្រើន យើងសាកល្បង មើលទៅលើចំណុចសំខាន់ៗដូចខាងក្រោមនេះ។

ផែនការរដ្ឋាភិបាល

ជាមួយនឹងការធ្វើពិពិធកម្ម តំបន់ឧស្សាហកម្មរបស់រដ្ឋាភិបាល ស្របតាមនិន្នាការរីកចម្រើននៃសេដ្ឋកិច្ចសង្គម បានធ្វើឲ្យរដ្ឋាភិបាលចាប់ផ្តើមគិត ពីផែនការអភិវឌ្ឍន៍ហេដ្ឋារចនាសម្ព័ន្ឋ ពិសេសផ្លូវក្រវ៉ាត់ក្រុងនានា ដើម្បីធ្វើឲ្យសេដ្ឋកិច្ចរីកចម្រើន និងធ្វើឲ្យចរន្តសាច់ប្រាក់ ហូរចូលហោប៉ៅប្រជាពលរដ្ឋដោយផ្ទាល់ ក្នុងគោលដៅពីរ ទី១ ដើម្បីកាត់បន្ថយភាពក្រីក្រផង ទី២ ដើម្បីពង្រីកផែនការអភិវឌ្ឈហេដ្ឋារចនាសម្ព័ន្ឋផង។

ពីមុនមកទីក្រុង មិនសូវមានសកម្មភាពសេដ្ឋកិច្ច ទើបរដ្ឋាភិបាលបានអនុញ្ញាត្តឲ្យមានរោងចក្រ សហគ្រាសប្រមូលផ្តុំនៅក្នុងទីក្រុង ដើម្បីធ្វើឲ្យមនុស្សចូលមករស់នៅទីក្រុងច្រើន និងធ្វើឲ្យសេដ្ឋកិច្ចក្នុងទីក្រុងរសរវើក ប៉ុន្តែពេលបច្ចុប្បន្នការរីកចម្រើននៃនគរូបនីយកម្ម កំនើនប្រជាសាស្រ្ត បានធ្វើឲ្យទីក្រុងជួបការកកស្ទះចរាចរណ៍ និងធ្វើឲ្យទីក្រុងបាត់បង់សណ្តាប់ធ្នាប់ ពិសេសធ្វើឲ្យបំពុលបរិស្ថានដោយសារផ្សែងពុលពីរោងចក្រ សហគ្រាសនានា។

ហេតុនេះ ទើបរដ្ឋាភិបាលបានដាក់ចេញគោលនយោបាយថ្មី ដើម្បីកាត់បន្ថយបញ្ហាសង្គមផ្សេង ហើយរុញរោងចក្រ សហគ្រាសទីជនបទ ឬជាយក្រុង ដែលគោលនយោបាយនេះ ប្រៀបបីដូចជា ព្រួញមួយបាញ់បានសត្វបី ទី១ ធ្វើឲ្យតំបន់ជនបទកាន់តែរីកចម្រើន ទី២ ធ្វើឲ្យជីវភាពប្រជាពលរដ្ឋកាន់តែប្រសើរឡើង និងទី៣ រុញទីតំបន់ជនបទកាន់តែខិតកៀកនឹងទីក្រុង ពិសេសកាត់បន្ថយការហូរចូលប្រជាពលរដ្ឋ ចូលមករស់នៅក្នុងទីក្រុងច្រើនពេក។

កាត់ចូលទីក្រុង

យោងតាមមន្រ្តីជាន់ខ្ពស់ក្រសួថសាធារណៈការ និងដឹកជញ្ជូនបានឲ្យដឹងថា តំបន់ផ្លូវក្រវ៉ាត់ក្រុងទី៤ ដែលស្ថិតនៅស្របតាមផ្លួវជាតិសំខាន់ៗទាំងពីរនេះ នឹងត្រូវកាត់មួយផ្នែកចូលមកក្នុងដែលរដ្ឋបាលរាជធានីភ្នំពេញ។

ការកាត់តំបន់ណាមួយចូលមករាជធានីភ្នំពេញ នឹងធ្វើឲ្យតំបន់នោះមានការរីកចម្រើនលឿន ដូចជា ការកសាងហេដ្ឋារចនាសម្ព័ន្ឋពីរដ្ឋាភិបាល ការតបណ្តាញទឹកស្អាតកាន់តែលឿន ធ្វើឲ្យវិស័យឯកជនងាកទៅវិនិយោគ នៅតំបន់នោះកាន់តែច្រើន ពិសេសធ្វើឲ្យតម្លៃដីធ្លីហក់ឡើងខ្ពស់។

តំបន់អភិវឌ្ឍន៍ឧស្សាហកម្ម

ស្រដៀងនឹងការលើកឡើងខាងលើ តំបន់ផ្លូវជាតិសំខាន់ៗទាំងពីរ បាននិងកំពុងរីកចម្រើន ដោយទាក់ទាញរោងចក្រ សហគ្រាស ផែស្ងួត សំណង់លំនៅដ្ឋាន បុរី ពិសេសទាក់ទាញមនុស្សទៅរស់នៅកាន់តែច្រើន ហើយនៅពេលណាមនុស្សចូលទៅរស់នៅកាន់តែច្រើន នឹងធ្វើឲ្យតំបន់នោះមានតម្លៃដីធ្លីកើនឡើង សកម្មភាពសេដ្ឋកិច្ចកាន់តែរសរវើកមិនខាន។

តំបន់ណាក៏ដោយ គ្មានមនុស្សរស់នៅ គឺតម្លៃដីធ្លីមិនកើនឡើងនោះទេ ដោយសារគ្មានមនុស្ស នៅពេលគ្មានមនុស្សក៏គ្មានសកម្មភាពសេដ្ឋកិច្ចនោះឡើយ។

កៀកនឹងទីក្រុង

ផលប្រយោជន៍នៃភូមិសាស្រ្ត មានសារៈសំខាន់ណាស់ ព្រោះភូមិសាស្រ្ត គឺជាប់ទាក់ទងគ្នា មិនអាចកាត់ផ្តាច់បានពីការរីកចម្រើនលើផ្នែកអ្វីមួយ។ ពិសេសដូចជាតំបន់ផ្លូវជាតិលេខ៤១ និងផ្លូវជាតិលេខ៥១ ជាផ្លូវជាតិកម្រិតខេត្តឬផ្លូវខេត្ត ដែលតភ្ជាប់ជាមួយនឹងផ្លូវជាតិលេខ២ ផ្លូវជាតិលេខ៣ ផ្លូវជាតិលេខ៤ និងផ្លូវល្បឿនលឿនភ្នំពេញ ព្រះសីហនុ។

ហេតុនេះកត្តាភូមិសាស្រ្ត ឬទីតាំងគឺជាចំណុចសំខាន់ ដែលអ្នកវិនិយោគឆ្លាតវៃតែងតែផ្តោតដោយមិនអាចមើលរំលងនោះទេ៕

អ្នកជឿថាមានព្រហ្មលិខិតទេ ដល់ពេលវេលាដែលត្រូវសងហើយ?

ដោយៈស៊ីវ ម៉េង

ភ្នំពេញៈ ក្រុមមនុស្សជោគជ័យជាច្រើន និយាយពីចំណេះដឹង ទើបធ្វើឲ្យពួកគេទទួលបានជោគជ័យ ហើយមិនជឿថាលើ់លោកនេះមានព្រហ្មលិខិតនោះទេ។

ពាក្យព្រហ្មលិខិត “មិនមែនជាការសំដៅដល់ព្រះព្រហ្មនោះទេ ប៉ុន្តែអ្នកដែលមានអំណាចលើលោកនេះទៅវិញទេ ជាព្រហ្ម ដែលអាចកំណត់វាសនាពិភពលោកបាន”។

ពិតហើយចំណេះដឹងមានសារៈសំខាន់ សំរាប់ត្រួសត្រាយវិថីជីវិត និងការកសាងទ្រព្យ ប៉ុន្តែចំណេះដឹងនេះ ក៏ជាផ្នែកមួយបំផ្លាញពិភពលោកផងដែរ ប្រសិនជាគេប្រើប្រាស់ចំណេះដឹងដោយគ្មានក្រមសីលធ៌ម។

យើងដល់ពេលសងត្រលប់ទៅកាន់ផែនដីវិញហើយឬ? ខណៈដែលផ្នូរសាកសពរួមជាច្រើន បានកើតមានឡើង នៅតាមបណ្តាប្រទេសធំៗនៅលើពិភពលោក ដូចជា អាមេរិក អ៊ីតាលី ឥណ្ឌាជាដើម ដែលមានមនុស្សស្លាប់់ ដោយសារជំងឺកូវីដ១៩រាប់សែននាក់។

ត្រលប់មកកាន់ជំនឿអរូបិយវិញ យើងអាចពិចារណាលើមូលដ្ឋានមួយចំនូនដូចជាបើលើលោកនេះគ្មានព្រះ គ្មានអាទិទេពទេ ច្បាស់ណាស់លើលោកនេះ នឹងមិនមានវត្តអារ៉ាម មិនមានព្រះវិហារ និងមិនមានកន្លែងជាទីសក្ការៈបូជាឡើយ។

បើជំនឿទាំងនោះគ្មានមូលដ្ឋានពិតទេ ប្រាកដថា ពិភពលោកនេះ គ្មានអាចារ្យ គ្មានសាវក គ្មានលោកសង្ឃ សម្រាប់សូត្រធ៌ម ប្រោះព្រំឲ្យអ្នកបានសុខឡើយ។

វាជាជំនឿមួយ ដែលអាចនាំសេចក្តីសុខផ្លូវចិត្ត វាជាការរព្យាបាលផ្លូវចិត្តម្យ៉ាង ដែលបានធ្វើឡើងតាំងពីរាប់ពាន់ឆ្នាំមុន រហូតដល់បច្ចុប្បន្ន ហើយជំនឿនេះនឹងបន្តរស់រានរាប់ពាន់ឆ្នាំទៀត រហូតដល់មនុស្សជាតិរលាយសាបសូន្យ។

ហេតុនេះ មនុស្សក្នុងពិភពលោក គួរត្រូវសងទៅកាន់ភពផែនដីវិញហើយ សងទៅកាន់ភាពជាធម្មជាតិរបស់មនុស្សជាតិឡើងវិញហើយ។ សំណងនោះ គឺជាអ្វីដែលជាការរូបរួមគ្នា នូវការសាមគ្គីគ្នា និងផ្ចុងផ្តើម យោគយល់ លើកដំកើងគ្នាទៅវិញទៅមក ព្រោះជំនឿផ្លូវចិត្តមានសារៈសំខាន់ណាស់ វាមានសារៈសំខាន់ជាងប្រាក់ ដែលអ្នកមានច្រើនប៉ុណ្ណា ក៏វាគ្មានប្រយោជន៍នៅកាលៈទេសៈខ្លះ ប៉ុន្តែវាមានប្រយោជន៍ភាគច្រើន សម្រាប់ពេលពិភពលោក ស្ថិតក្នុងភាពស្រស់បំព្រងមួយ៕

អ្នកជំនាញៈអ្នកវិនិយោគមានទុនគ្រប់គ្រាន់ និងមានចក្ខុវិស័យវែងឆ្ងាយកំពុងព្យាយាមស្វែងរកទិញដីទុក

ដោយៈ រ៉ាណេត

ភ្នំពេញៈ អ្នកវិនិយោគក្នុងវិស័យអចលនទ្រព្យ ដែលមានធនធានមួយចំនួនស្វះស្វែងទិញដី ដែលមានតម្លៃទាបសម្រាប់ទុកលក់ យកចំណេញនៅឆ្នាំបន្ទាប់ ព្រោះអ្នកដែលមានលំហូរសាច់ប្រាក់គ្រប់គ្រាន់ មិនជាប់បំណុលធនាគារ កំពុងស្វែងរកទិញដីដែលមានតម្លៃទាបជាងទីផ្សារ សម្រាប់ធ្វើការវិនិយោគនៅឆ្នាំបន្ទាប់ដូចគ្នា។

ប្រធានសមាគមអចលនទ្រព្យសកល (GRA)លោកសំ សុខនឿន បានមានប្រសាសន៍ប្រាប់កាលពីពេលថ្មីៗនេះថា នៅក្នុងកាលៈទេសៈនេះ មានទាំងអ្នកចង់លក់ ហើយក៏មានទាំងអ្នកចង់ទិញ ប៉ុន្តែស្ថិតនៅក្នុងតម្លៃចរចាមួយដែលទាបជាងទីផ្សារ។

លោកបន្តថា “ធម្មតា អ្នកលក់តែងចង់បានថ្លៃ ប៉ុន្តែក្នុងដំណាក់កាលនេះ តម្លៃមិនអាចទាមទារបានដូចចិត្តដែលចង់នោះទេ ទាល់តែលក់ក្នុងតម្លៃទាបជាងទីផ្សារទើបអាចមានអ្នកទិញ”។ លោកបន្តទៀតថា “ពេលនេះ មិនមែនគ្មានអ្នកចង់ទិញនោះទេ ប៉ុន្តែអ្នកដែលចង់ទិញទាំងនោះភាគច្រើន សំឡឹងមើលពីឱកាសចំណេញរបស់ពួកគេ”។

ភ្ជាបជាមួយនឹងការលើកឡើងខាងលើនេះ លោកសំ សុខនឿនបានជឿជាក់ថា សម្រាប់អ្នកដែលមានលុយគ្រប់គ្រាន់ ពួកគេមិនខ្លាចក្នុងការចំណាយលុយទិញនោះទេ ឱ្យតែអចលនទ្រព្យមានតម្លៃទាបជាងទីផ្សារ និងស្ថិតនៅតំបន់ដែលមានសក្ដានុពល ព្រោះគេគិតថា វិបត្តិជំងឺឆ្លងនឹងផុតរលត់ទៅវិញយ៉ាងយូរអាចចុងឆ្នាំនេះ ឬដើមឆ្នាំបន្ទាប់ ការប្រើប្រាស់វ៉ាក់សាំង កំពុងចាក់ជូនពលរដ្ឋនៅក្នុងប្រទេស ក៏ដូចជាបណ្តាប្រទេសផ្សេងទៀតយ៉ាងសកម្ម ដូច្នេះក្រោយពេលវិបត្តិត្រូវបានបញ្ចប់ សេដ្ឋកិច្ចងើបឡើងវិញ នោះទីផ្សារអចលនទ្រព្យក៏ងើបឡើងវិញ និងមានកំណើនតម្លៃដោយស្វ័យប្រវត្តិ៕

ទោះបីស្ថិតក្នុងដំណាក់កាលបិទខ្ទប់ តែការរីករាលដាលនៅតែមានកម្រិតខ្ពស់

ដោយៈគង់ សូរិយា

ភ្នំពេញៈ ទោះបីជាការបិទខ្ទប់បាននិងកំពុងធ្វើក្តី ប៉ុន្តែការរីករាលដាលជំងឺកូវីដ១៩នៅតែបន្តកើនឡើង ដោយទីតាំងជាច្រើនត្រូវបានបិទជាបន្តបន្ទាប់។

ជាក់ស្តែងផ្សារធំទួលសង្កែ(សាំហាន់) នៅតំបន់ទួលគោកត្រូវបានបិទ។ អាជ្ញាធររាជធានីភ្នំពេញ ក៏បានបិទផ្សារបឹងត្របែកផ្លាហ្សា ដោយសារមានការរកឃើញអ្នកជំងឺកូវីដ១៩នាព្រឹកថ្ងៃទី១៩មេសានេះ។

ចំណែកនៅក្រុងព្រះសីហនុ បានរកឃើញអ្នកកើតជំងឺកូវីដកើនដល់១២៣នាក់ ដែលភាគច្រើនជាអាជីវករផ្សារលើ នៅថ្ងៃទី១៩ មេសានេះផងដែរ។

ប្រមុខរដ្ឋាភិបាល សម្រេចបិទខ្ទប់រាជធានីភ្នំពេញ រយៈពេល១៤ថ្ងៃ ដោយចាប់ផ្តើមពីថ្ងៃទី១៤ដល់២៨មេសាកន្លងមកនេះ ដើម្បីគ្រប់គ្រងការរីករាលដាលជំងឺកូវីដ១៩។

ទោះជាយ៉ាងណាសម្តេចតេជោហ៊ុន សែននាយករដ្ឋមន្រ្តីនៃកម្ពុជាបានព្រមានថា កម្ពុជា អាចនឹងពន្យាពេលការបិទខ្ទប់ដល់រយៈពេល២៨ថ្ងៃ ឬយូរជាងនេះអាស្រ័យលើស្ថានភាពនៃការរីករាលដាលជំងឺនេះ ពិសេសការចូលរួមរបស់ប្រជាពលរដ្ឋ។

សម្តេចតេជោបានលើកដៃសំពះអង្វរក ប្រជាពលរដ្ឋម្តងហើយម្តងទៀត ឲ្យអនុវត្តន៍តាមវិធានក្រសួងសុខាភិបាល ពិសេសចូលរួមស្នាក់នៅផ្ទះ បើមិនចាំបាច់ ដើម្បីឲ្យការបិទខ្ទប់់មានប្រសិទ្ឋភាព៕