រដ្ឋបាលខេត្តកំពង់ស្ពឺត្រៀមរៀបចំមន្ទីរពេទ្យមួយលើផ្ទៃដី១០ហិកតាដើម្បីដាក់អ្នកជំងឺកូវីដ១៩

ដោយៈ ប៊ី

កំពង់ស្ពឺៈ រដ្ឋបាលខេត្តកំពង់ស្ពឺ បានត្រួតពិនិត្យកន្លែងសំរាប់ត្រៀមធ្វើជាមន្ទីរពេទ្យសម្រាប់ព្យាបាលប្រជាពលរដ្ឋដែលកើតជំងឺកូវីដ១៩។ នេះបើយោងតាមប្រសាសន៍របស់លោកវី សំណាងអភិបាលខេត្តកំពង់ស្ពឺ។

នាព្រឹកថ្ងៃទី១៩ ខែមេសា ឆ្នាំ២០២១ លោកវ៉ី សំណាងបានអញ្ជើញដឹកនាំមន្ទីរអង្គភាពជំនាញពាក់ព័ន្ធ អាជ្ញាធរស្រុក ឃុំ ភូមិ ចុះត្រួតពិនិត្យកន្លែងត្រៀមធ្វើជាមន្ទីរពេទ្យសម្រាប់ព្យាបាលជំងឺកូវីដ-១៩ (covid 19) ។

ទីតាំងនេះ ស្ថិតនៅក្នុងភូមិអូរអញ្ចាញ ឃុំតាសាល ស្រុកឱរ៉ាល់ ដែលជាសំណង់របស់អ្នកបច្ចេកទេសសាងសង់ ទំនប់តាសាលជនជាតិឥណ្ឌា មានផ្ទៃដី១០ហិកតា មានអាគារសរុប២៤អាគារ ដែលមានសមត្ថភាព អាចផ្ទុកអ្នកជំងឺបានប្រហាក់ប្រហែល១០០នាក់។

គិតត្រឹមម៉ោង៧ព្រឹក ថ្ងៃទី១៨ ខែមេសា ឆ្នាំ២០២១ កម្ពុជាបានរកឃើញអ្នកឆ្លងសរុបចំនួន៦ ៣៨៩នាក់ ក្នុងនោះករណីសហគមន៍២០កុម្ភៈ ចំនួន៥ ៨៤៦នាក់ អ្នកជាសះស្បើយចំនួន២ ៤៧៦នាក់ អ្នកកំពុងសម្រាកព្យាបាលចំនួន៣៨៦៥នាក់ អ្នកស្លាប់ចំនួន៤៣នាក់ និងស្លាប់ដោយជំងឺផ្សេង ពេលកំពុងព្យាបាលកូវីដ១៩ចំនួន ៥នាក់៕

អូស្រ្តាលីនិងនូវែលហ្សេឡង់បើកជើងហោះហើរឡើងវិញលើកដំបូងសម្រាប់អ្នកដំណើរដោយគ្មានការធ្វើចត្តាឡីស័ក

ដោយៈ ប៊ី

ស៊ីដនីៈ អ្នកដំណើររាប់រយនាក់មកពីប្រទេសអូស្រ្តាលីបានចាប់ផ្តើមមកដល់អាកាសយានដ្ឋាននូវែលហ្សេឡង់នៅពីថ្ងៃចន្ទនេះ បន្ទាប់ពីអាជ្ញាធរបានបើកព្រំដែនឡើងវិញ ដែលជាព្រឹត្តិការណ៍អស្ចារ្យមួយដែលអនុញ្ញាតឱ្យអ្នកធ្វើដំណើរដោយមិនចាំបាច់ធ្វើចត្តាឡីស័ករវាងប្រទេសទាំងពីរជាលើកដំបូងក្នុងរយៈពេលជាងមួយឆ្នាំ។

យោងតាមការចេញផ្សាយរបស់សារព័ត៌មាន CNA នៅថ្ងៃទី១៩ ខែមេសា ឆ្នាំ២០២១ បានឱ្យដឹងថា ទោះបីជារដ្ឋអូស្រ្តាលីភាគច្រើនបានអនុញ្ញាតឱ្យប្រជាជននូវែលហ្សេឡង់ធ្វើដំណើរដោយមិនចាំបាច់ធ្វើចត្តាឡីស័កចាប់តាំងពីចុងឆ្នាំមុនក៏ដោយ ក៏ប្រទេសនូវែលហ្សេឡង់បានអនុវត្តការធ្វើចត្តាឡីស័កសម្រាប់ការមកដល់របស់អ្នកធ្វើដំណើរពីតំបន់ផ្សេងៗ ដោយលើកឡើងពីការព្រួយបារម្ភអំពីការផ្ទុះឡើងជំងឺកូវីដ១៩។

រូបភាពតាមរយៈទូរទស្សន៍បានបង្ហាញពីសកម្មភាពដ៏រំភើបអារម្មណ៍នៅព្រលានយន្តហោះ ដោយក្រុមគ្រួសារជួបជុំគ្នា និងអ្នកដំណើរជាច្រើននៅតាមស្ថានីយចេញដំណើរនៅឯអាកាសយានដ្ឋានអូស្ត្រាលី។

នាយកប្រតិបត្តិ Qantas លោក Alan Joyce បានប្រាប់ដល់វិទ្យុអូស្រ្តាលីថា “នេះជាលើកទីមួយក្នុងរយៈពេល ៤០០ថ្ងៃ ដែលមនុស្សអាចធ្វើដំណើរដោយគ្មានការធ្វើចត្តាឡីស័ក ហើយយើងកំពុងបន្ថែមជើងហោះហើរចំនួន១៦ជើងក្នុងមួយថ្ងៃទៅកាន់ប្រទេសនូវែលហ្សេឡង់ ហើយជើងហោះហើរទាំងត្រូវបានកកពេញហើយ”។

ក្រុមហ៊ុនអាកាសចរណ៍ Qantas នឹងបង្កើនការហោះហើររវាងប្រទេសរហូតដល់ប្រមាណ២០០ជើង ក្នុងមួយសប្តាហ៍ខ ណៈក្រុមហ៊ុនអាកាសចរណ៍ Air New Zealand បាននិយាយថា ខ្លួនបានបង្កើនការហោះហើរកើនឡើងដល់៣០ជើង នៅថ្ងៃចន្ទនេះ ដោយយន្ដហោះរបស់ខ្លួនហោះហើរចូលទៅប្រទេសនូវែលហ្សេឡង់៩៧ភាគរយត្រូវបានកក។

លោក Scott Morrison នាយករដ្ឋមន្រ្តីអូស្រ្តាលី និងនាយករដ្ឋមន្រ្តីនូវែលហ្សេឡង់លោកស្រី Jacinda Ardern បាននិយាយនៅក្នុងសេចក្តីថ្លែងការណ៍រួមមួយថា ការបើកព្រំដែន នឹងជួយជំរុញការស្តារសេដ្ឋកិច្ចសម្រាប់ប្រទេសទាំងពីរ និងមនុស្សរាប់ពាន់នាក់នឹងជួបជុំជាមួយក្រុមគ្រួសារ និងមិត្តភក្តិ។

លោក Ardern មានប្រសាសន៍ថា “វាពិតជាគួរឱ្យរំភើបណាស់ក្នុងការចាប់ផ្តើមការធ្វើដំណើរដោយគ្មានការធ្វើចត្តាឡីស័កជាមួយអូស្ត្រាលី។ ការជួបជុំក្រុមគ្រួសារ មិត្តភ័ក្ត្រ រឺអ្នកទេសចរចាប់ផ្តើមវិលត្រឡប់មកវិញហើយ”៕

ការនាំចេញរបស់កម្ពុជាទៅទីផ្សារកូរ៉េនៅតែបន្តកើនឡើង ទោះស្ថិតក្នុងវិបត្តិកូវីដ១៩

ដោយៈ ប៊ី
ភ្នំពេញៈ ការនាំចេញរបស់កម្ពុជា សម្រេចបានទំហំទឹកប្រាក់ប្រមាណ៩៩,០៧លានដុល្លារ ទៅកាន់ទីផ្សារកូរ៉េខាងត្បូង ក្នុងត្រីមាសទី១ ឆ្នាំ២០២១នេះ កើនឡើង៥,២ភាគរយ បើធៀបនឹងរយៈពេលដូចគ្នាកាលពីឆ្នាំមុន បើទោះស្ថិតក្នុងពេលមានវិបត្តិកូវីដ១៩ក៏ដោយ។ នេះបើយោងតាមរបាយការណ៍ចុងក្រោយរបស់សមាគមពាណិជ្ជកម្មអន្តរជាតិ (Kita)។

របាយការណ៍ខាងលើបានឱ្យដឹងទៀតថា ពាណិជ្ជកម្មទ្វេភាគីរវាងកម្ពុជា និងកូរ៉េខាងត្បូង មានទំហំទឹកប្រាក់២៤១,៧ ដុល្លារ កើនឡើង១,៨ភាគរយ ធៀបនឹងរយៈពេលដូចគ្នាកាលពីឆ្នាំមុន។

ក្រសួងពាណិជ្ជកម្មកម្ពុជា និងក្រសួងពាណិជ្ជកម្មកូរ៉េខាងត្បូង បានប្រកាសបញ្ចប់ការចរចាជាផ្លូវការ នូវកិច្ចព្រមព្រៀងពាណិជ្ជកម្មសេរីកម្ពុជា និងប្រទេសកូរ៉េខាងត្បូង (CKTFA) កាលពីដើមខែកុម្ភៈ ឆ្នាំ២០២១។

តាមរយៈកិច្ចព្រមព្រៀងពាណិជ្ជកម្មនេះ កម្ពុជា នឹងអាចនាំចេញទៅកាន់ប្រទេសកូរ៉េបានទំហំច្រើនជាងមុន ដោយរំពឹងថា នឹងកើនឡើងពី២០ ទៅ២៥ភាគរយ ក្នុងមួយឆ្នាំ ខណៈមុនកិច្ចព្រមព្រៀងពាណិជ្ជកម្មសេរី ក៏កំណើននាំចេញរបស់កម្ពុជា ទៅកាន់ប្រទេសកូរ៉េកើនឡើងប្រមាណ១៥ភាគរយរួចទៅហើយ។

ក្រសួងពាណិជ្ជកម្មកម្ពុជាបានឱ្យដឹងថា កិច្ចព្រមព្រៀងពាណិជ្ជកម្មសេរីកម្ពុជា កូរ៉េគ្រោងនឹងចុះហត្ថលេខាជាផ្លូវការ នៅអំឡុងខែមិថុនា ឆ្នាំ២០២១នេះ ហើយកិច្ចព្រមព្រៀងនេះដែរ ក៏រំពឹងថានឹងចូលជាធរមានជាផ្លូវការ នៅក្នុងឆ្នាំ២០២១នេះដែរ ព្រោះថាកម្ពុជា និងកូរ៉េខាងត្បូង មានពេលវេលាយូរទៀត ដើម្បីធ្វើកិច្ចការនេះ”។

អ្នកជំនាញផ្នែកពាណិជ្ជកម្ម ក៏បានលើកឡើងថា តាមរយៈព្រមព្រៀងពាណិជ្ជកម្មនេះ កម្ពុជានឹងអាចចេញទៅកាន់ទីផ្សារប្រទេសកូរ៉េកាន់តែច្រើន ដែលអាចបង្កើនទំហំពាណិជ្ជកម្មបានមួយកម្រិតទៀត៕

ការនាំចេញរបស់កម្ពុជាទៅទីផ្សារកូរ៉េនៅតែបន្តកើនឡើង ទោះស្ថិតក្នុងវិបត្តិកូវីដ១៩

ដោយៈ ប៊ី

ភ្នំពេញៈ ការនាំចេញរបស់កម្ពុជា សម្រេចបានទំហំទឹកប្រាក់ប្រមាណ៩៩,០៧លានដុល្លារ ទៅកាន់ទីផ្សារកូរ៉េខាងត្បូង ក្នុងត្រីមាសទី១ ឆ្នាំ២០២១នេះ កើនឡើង៥,២ភាគរយ បើធៀបនឹងរយៈពេលដូចគ្នាកាលពីឆ្នាំមុន បើទោះស្ថិតក្នុងពេលមានវិបត្តិកូវីដ១៩ក៏ដោយ។ នេះបើយោងតាមរបាយការណ៍ចុងក្រោយរបស់សមាគមពាណិជ្ជកម្មអន្តរជាតិ (Kita)។

របាយការណ៍ខាងលើបានឱ្យដឹងទៀតថា ពាណិជ្ជកម្មទ្វេភាគីរវាងកម្ពុជា និងកូរ៉េខាងត្បូង មានទំហំទឹកប្រាក់២៤១,៧ ដុល្លារ កើនឡើង១,៨ភាគរយ ធៀបនឹងរយៈពេលដូចគ្នាកាលពីឆ្នាំមុន។

ក្រសួងពាណិជ្ជកម្មកម្ពុជា និងក្រសួងពាណិជ្ជកម្មកូរ៉េខាងត្បូង បានប្រកាសបញ្ចប់ការចរចាជាផ្លូវការ នូវកិច្ចព្រមព្រៀងពាណិជ្ជកម្មសេរីកម្ពុជា និងប្រទេសកូរ៉េខាងត្បូង (CKTFA) កាលពីដើមខែកុម្ភៈ ឆ្នាំ២០២១។

តាមរយៈកិច្ចព្រមព្រៀងពាណិជ្ជកម្មនេះ កម្ពុជា នឹងអាចនាំចេញទៅកាន់ប្រទេសកូរ៉េបានទំហំច្រើនជាងមុន ដោយរំពឹងថា នឹងកើនឡើងពី២០ ទៅ២៥ភាគរយ ក្នុងមួយឆ្នាំ ខណៈមុនកិច្ចព្រមព្រៀងពាណិជ្ជកម្មសេរី ក៏កំណើននាំចេញរបស់កម្ពុជា ទៅកាន់ប្រទេសកូរ៉េកើនឡើងប្រមាណ១៥ភាគរយរួចទៅហើយ។

ក្រសួងពាណិជ្ជកម្មកម្ពុជាបានឱ្យដឹងថា កិច្ចព្រមព្រៀងពាណិជ្ជកម្មសេរីកម្ពុជា កូរ៉េគ្រោងនឹងចុះហត្ថលេខាជាផ្លូវការ នៅអំឡុងខែមិថុនា ឆ្នាំ២០២១នេះ ហើយកិច្ចព្រមព្រៀងនេះដែរ ក៏រំពឹងថានឹងចូលជាធរមានជាផ្លូវការ នៅក្នុងឆ្នាំ២០២១នេះដែរ ព្រោះថាកម្ពុជា និងកូរ៉េខាងត្បូង មានពេលវេលាយូរទៀត ដើម្បីធ្វើកិច្ចការនេះ”។

អ្នកជំនាញផ្នែកពាណិជ្ជកម្ម ក៏បានលើកឡើងថា តាមរយៈព្រមព្រៀងពាណិជ្ជកម្មនេះ កម្ពុជានឹងអាចចេញទៅកាន់ទីផ្សារប្រទេសកូរ៉េកាន់តែច្រើន ដែលអាចបង្កើនទំហំពាណិជ្ជកម្មបានមួយកម្រិតទៀត៕

តើអ្នកណាជាស្តេចស្ថាបត្យករស្ត្រីនៅលើពិភពលោក និងជាអ្នកឌីហ្សាញអាកាសយានដ្ឋានធំបំផុតលើលោក?

ដោយៈសុខុម

ប៉េកាំង: យើងប្រហែលជាបានដឹងរួចមកហើយថា Beijing Daxing International Airport គឺជាអាកាសយដ្ឋានអន្តរជាតិ ដែលធំបំផុតនៅលើពិភពលោក ស្ថិតនៅប្រទេសចិន និងក៏ជាអាកាសយានដ្ឋានមានតែមួយស្ថានីយ (Terminal) ដែលធំបំផុតក្នុងពិភពលោកផងដែរ។

អាកាសយានដ្ឋានអន្តរជាតិក្រុងប៉េកាំង ដែលរាងផ្កាយសមុទ្រ មានផ្ទៃក្រឡាសរុបរហូតដល់ទៅ១លានម៉ែត្រការ៉េនេះ បានជាប់ឈ្មោះជាអាកាសយានដ្ឋានថ្លៃបំផុតក្នុងពិភពលោក ជាមួយនឹងទឹកប្រាក់សាងសង់ ចំណាយរហូតដល់ទៅ១១,៥ពាន់លានដុល្លារអាមេរិក ហើយមានសមត្ថភាពទទួលអ្នកដំណើរបាន រហូតដល់ទៅ១០០លាននាក់ក្នុងមួយឆ្នាំ។

អាកាសយនដ្ឋាននេះ បានចាប់ផ្ដើមដំណើរការសាងសង់ក្នុងឆ្នាំ២០១៤ ហើយបញ្ចប់ជាស្ថាពរនៅខែកញ្ញា ឆ្នាំ២០១៩ (រយៈពេល៥ឆ្នាំ)។

ប៉ុន្តែតើអ្នកទាំងអស់គ្នាដឹងទេថា ស្ថាបត្យករដែលឌីហ្សាញអាកាសយានដ្ឋានយក្សមួយនេះជាមនុស្សស្រី? តើគាត់មានឈ្មោះអ្វី ជាជនជាតិអ្វី និងមានប្រវត្តិបែបណា? អញ្ចឹងតោះ! មកស្គាល់ពីប្រវត្តិរបស់កំពូលស្ថាបត្យកររូបនោះទាំងអស់គ្នា!។

*កុមារភាព និងប្រវត្តិអប់រំ

អ្នកស្រី Zaha Mohammad Hadid ប្រសូតនៅថ្ងៃទី៣១ ខែតុលា ឆ្នាំ១៩៥០ ។ ស្ត្រីជនជាតិអ៊ីរ៉ាក់ មកពីគ្រួសារវណ្ណៈជាន់ខ្ពស់ ដែលមានឪពុកជាអ្នកនយោបាយ ធ្លាប់ជារដ្ឋមន្ត្រីហិរញ្ញវត្ថុរូបនេះ បានសិក្សាថ្នាក់បរិញ្ញាបត្រជំនាញគណិតវិទ្យា នៅសាកលវិទ្យាល័យឯកជន University of Beirut ក្នុងទីក្រុងបេរូត ប្រទេសលីបង់។

ក្រោយធ្វើអន្តោប្រវេសន៍ ទៅរស់នៅក្នុងប្រទេសអង់គ្លេស អ្នកស្រីក៏បានចុះឈ្មោះសិក្សានៅសាលាស្ថាបត្យកម្ម Architectural Association School of Architecture ក្នុងទីក្រុងឡុងដ៍ ក្នុងឆ្នាំ១៩៧២ ។ អ្នកស្រីជានិស្សិតដ៏លេចធ្លោ ដែលសាស្ត្រាចារ្យបង្រៀនគាត់បានពោលសរសើរថា អ្នកស្រីជាសិស្សដ៏ឆ្លាតបំផុតដែលគាត់មិនធ្លាប់ជួប។

*ការចូលប្រឡូកក្នុងអាជីពការងារ

ក្រោយបញ្ចប់ការសិក្សាក្នុងឆ្នាំ១៩៧៧ អ្នកស្រីបានធ្វើការឱ្យអតីតសាស្ត្រាចារ្យរបស់គាត់២រូបឈ្មោះ Koolhaas និង Zenghelis នៅក្រុមហ៊ុនស្ថាបត្យកម្មហូឡង់ មួយមានឈ្មោះថា Office for Metropolitan Architecture នៅក្រុង Rotterdam ប្រទេសហូឡង់។

បន្ទាប់ពីទទួលបានបទពិសោធន៍ច្រើន គួរសមពីការធ្វើការឱ្យគេ។ ទីបំផុតអ្នកស្រីបានបើកក្រុមហ៊ុនខ្លួនឯង ដោយដាក់ឈ្មោះថា Zaha Hadid Architects នៅទីក្រុងឡុងដ៍ ប្រទេសអង់គ្លេស ក្នុងឆ្នាំ១៩៨០ ។ អំឡុងទសវត្សរ៍ឆ្នាំ១៩៨០ ស្នាដៃឌីហ្សាញសម័យទំនើបបែបប្លែកពីគេ របស់គាត់មានភាពលេចធ្លោជាងគេ និងបានជួយឱ្យគាត់មានឈ្មោះល្បីល្បាញយ៉ាងខ្លាំង។

បន្ទាប់មក អ្នកស្រីបានចាប់ផ្ដើមអាជីព ជាសាស្ត្រាចារ្យបង្រៀនជំនាញស្ថាបត្យកម្ម ដោយដំបូងគេចូលបង្រៀន នៅសាលាស្ថាបត្យកម្ម Architectural Association។ ក្រោយមក គាត់បានចូលបង្រៀននៅសាកលវិទ្យាល័យជាច្រើនទៀត រួមមានសាលា Harvard Graduate School of Design សាកលវិទ្យាល័យ Cambridge University សាកលវិទ្យាល័យ University of Chicago សាលា Hochschule für bildende Künste សាកលវិទ្យាល័យ University of Illinois at Chicago និងសាកលវិទ្យាល័យ Columbia University ដែលធ្វើឱ្យកេរ្តិ៍ឈ្មោះរបស់គាត់កាន់តែល្បីល្បាញ។

*ពានរង្វាន់ និងការតែងតាំង

អ្នកស្រីទទួលបានមេដាយ ស្ថាបត្យកម្មពីប្រទេសអង់គ្លេស Commander of the Order of the British Empire (CBE) ក្នុងឆ្នាំ២០០២ ហើយទទួលបានមេដាយ Dame Commander of the Order of the British Empire (DBE) ក្នុងឆ្នាំ២០១២ ។

គាត់ត្រូវបានតែងតាំងជាសមាជិកកិត្តិយស នៃរាជ្យបណ្ឌិត្យសភាអាមេរិក American Academy of Arts and Letters និងសមាជិកកិត្តិយសនៃវិទ្យាស្ថានស្ថាបត្យកម្មអាមេរិក American Institute of Architects។ អ្នកស្រីក៏ជាសមាជិកក្រុមប្រឹក្សានៃមូលនិធិស្ថាបត្យកម្ម The Architecture Foundation ផងដែរ។

ក្នុងឆ្នាំ២០០២ អ្នកស្រីបានឈ្នះការប្រកួតឌីហ្សាញអន្តរជាតិមួយ នៅក្នុងវិញ្ញាសាប្រកួតឌីហ្សាញ ផែនការមេមួយរបស់ប្រទេសសិង្ហបុរី។

ក្នុងឆ្នាំ២០០៤ គាត់បានក្លាយជាស្ត្រីដំបូង ដែលទទួលបានពានរង្វាន់ស្ថាបត្យកម្ម Pritzker Architecture Prize។ ក្នុងឆ្នាំ២០០៥ ស្នាដៃឌីហ្សាញរបស់គាត់ បានឈ្នះការប្រកួតប្រជែង នៅក្នុងវិញ្ញាសារប្រកួតឌីហ្សាញ កាស៊ីណូថ្មីមួយនៅប្រទេសស្វ‍៊ីស។

នៅឆ្នាំ២០០៦ អ្នកស្រីទទួលបានកិត្តិយស ដាក់តាំងស្នាដៃរបស់គាត់ នៅក្នុងសារៈមន្ទីរ Guggenheim Museum ក្នុងទីក្រុងញូវយ៉ក ហើយនោះគឺជាឆ្នាំដែលគាត់ទទួលបានសញ្ញាបត្រកិត្តិយស ពីសាកលវិទ្យាល័យ American University of Beirut។

ក្នុងឆ្នាំ២០០៨ អ្នកស្រីបានជាប់ចំណាត់ថ្នាក់លេខ៦៩ ក្នុងចំណោមស្ត្រីមានឥទ្ធិពលបំផុតទាំង១០០រូបរបស់ពិភពលោក ដែលត្រូវបានចុះផ្សាយក្នុងទស្សនាវដ្ដីដ៏ល្បីល្បាញបំផុត (Forbes)។

*គម្រោងធំៗរបស់អ្នកស្រីទូទាំងពិភពលោក

ស្នាដៃរបស់អ្នកស្រីមានច្រើនរាប់មិនអស់ ក្នុងនោះក៏រួមមានទាំងគម្រោងអាកាសយានដ្ឋាន Beijing Daxing International Airport ផងដែរ។ ប៉ុន្តែជាអកុសល អ្នកស្រីបានចែកឋាន នៅថ្ងៃទី៣១ មីនា ឆ្នាំ២០១៦ (ក្នុងវ័យ៦៦ឆ្នាំ) មុនពេលគម្រោងនេះបញ្ចប់ជាស្ថាពរ។

គម្រោងដែលជាស្នាដៃរបស់អ្នកស្រី មានយ៉ាងច្រើនទៀតនៅទូទាំងពិភពលោក រួមមាននៅប្រទេសអង់គ្លេស ហូឡង់ អៀរឡង់ អាល្លឺម៉ង់ សហរដ្ឋអាមេរិក តួកគី បារ៉ែន អូស្ត្រាលី ដាណឺម៉ាក អេស្ប៉ាញ លីបង់ ស្កុតលែន បារាំង ចិន អ៊ីតាលី ក្រុងហុងកុង អូទ្រីស កូរ៉េខាងត្បូង បែលហ្ស៊ិក អារ៉ាប៊ីសាអូឌីត ជាដើម៕

លោកបណ្ឌិតហ៊ុន ម៉ាណែត និងលោកជំទាវពេជ្រ ច័ន្ទមុនីក្លាយជាបុគ្គលដ៏លេចធ្លោក្នុងវិបត្តិកូវីដ១៩

ដោយៈស៊ីវ ម៉េង

ភ្នំពេញៈ ជាថ្នាក់ដឹកនាំវ័យក្មេង មានទេពកោសល្យនិងសមត្ថភាពខ្ពស់ លោកបណ្ឌិតហ៊ុន ម៉ាណែតអគ្គមេបញ្ជាការរងនៃកងយុទ្ឋពលខេមរភូមិន្ទ និងលោកជំទាវពេជ្រ ច័ន្ទមុនី ដែលបានបញ្ចប់ការសិក្សាថ្នាក់បណ្ឌិត ផ្នែកសុខភាពសាធារណៈនៅចក្រភពអង់គ្លេសបាននិងកំពុងក្លាយជាបុគ្គលលេចធ្លោ និងមានឥទ្ឋិពលនៅកម្ពុជា ដោយមេដឹកនាំវ័យក្មេងទាំងពីររូបបានចុះប្រឡូកការងារនេះដោយផ្ទាល់។

លោកបណ្ឌិតហ៊ុន ម៉ាណែត និងលោកជំទាវបានដឹកនាំក្រុមកងយុទ្ឋពលខេមរភូមិន្ទ និងក្រុមគ្រូពេទ្យស្ម័គ្រចិត្តសម្តេចតេជោ រៀបចំអតីតសណ្ឋាគារ Great Duck, មន្ទីរពេទ្យហ្លួង ម៉ែ សាលសន្និបាត និងពិព៌ណកោះពេជ្របានយ៉ាងលឿន ដើម្បីឆ្លើយតបនឹងកំនើនអ្នកជំងឺកូវីដ១៩ ដែលកើនឡើងយ៉ាងឆាប់រហ័ស រហូតដល់សម្តេចតេជោហ៊ុន សែនបង្ខំចិត្តបិទខ្ទប់រាជធានីភ្នំពេញ និងក្រុងតាខ្មៅ១៤ថ្ងៃ ចាប់ពីថ្ងៃទី១៤ដល់២៨មេសាខាងមុខនេះ។

តាមរយៈរូបថតមួយសន្លឹក ដែលលោកបណ្ឌិតសម្រាកលើគ្រែ ដោយអស់កំលាំង និងលង់លក់ដោយមិនដឹងខ្លួន ហើយត្រូវបានសហការីលួចថត ហើយលោកយកមកផុស បានសរសេរលើបណ្តាញទំនាក់ទំនងសង្គមរបស់ខ្លួនថា “ចុម…ដើរពិនិត្យរៀបចំពេទ្យកូវីដ-១៩រាប់ម៉ោងមិនអី គ្រាន់តែលួចទម្រេតខ្លួនមិនដល់៥វិនាទីផង ត្រូវគេលួចថតបានបាត់ 😅” ។

រកអ្នកលួចថតអត់ឃើញ ឃើញតែរូបថតគេចែកចាយតគ្នា… សម័យបច្ចេកវិទ្យា ពិបាករួចខ្លួនមែន” ។

ជាមួយគ្នានេះ លោកជំទាវពេជ្រ ច័ន្ទមុនីបានសរសេរលើបណ្តាញទំនាក់ទំនងសង្គមរបស់ខ្លួន ដោយដាក់រូបអង្គុយលើគ្រែពេទ្យអមជាមួយផងដែរថា “សុំបញ្ចេញអារម្មណ៍ពិតរបស់ខ្ញុំ: សួរថាតើពេលដែលរៀបចំមន្ទីរពេទ្យ ព្យាបាលអ្នកជំងឺ Covid ម្តងៗតើខ្ញុំមានអារម្មណ៍បែបណា?” ។

លោកជំទាវបន្តថា “ខ្ញុំមានអារម្មណ៍ក្តុកក្តួលចិត្ត អាណិតដល់រដ្ឋាភិបាលដែលខំចំណាយប្រាក់ ក្នុងការរៀបចំមន្ទីរពេទ្យអោយអ្នកជំងឺ មានកន្លែងព្យាបាល អាណិតដល់សម្តេចតេជោ ដែលលោកខិតខំប្រឹងគិតគូរ និងផ្តល់គំនិតគ្រប់បែបយ៉ាង ដើម្បីទប់ស្កាត់ការរីករាលដាល នៃជំងឺ Covid ជាពិសេសគឺការពារជីវិតបងប្អូនប្រជាពលរដ្ឋខ្មែរ។ អាណិតដល់ក្រុមគ្រូពេទ្យជួរមុខទាំងអស់ ដែលកំពុងប្រយុទ្ធជាមួយ និងសត្រូវមិនឃើញស្រមោលនេះ។ អាណិតនិងខ្លោចចិត្តដល់ក្មេងតូចៗ ដែលឆ្លងនៅជំងឺដ៏កាចសាហាវមួយនេះ” ។

លោកជំទាវពេជ្រ ច័ន្ទមុនីបានបន្តថា “ខ្ញុំតែងតែបួងសួងសុំមន្ទីរពេទ្យដែលខ្ញុំកំពុងរៀបនេះគ្មានមនុស្សមកសំរាក និងជាមន្ទីរពេទ្យចុងក្រោយ” ។

លោកជំទាវបានបន្ថែមថា “សម្តេចតេជោ រាជរដ្ឋាភិបាល និងក្រុមគ្រូពេទ្យយើងខ្ញុំបានខំប្រឹងពេញទំហឹងហើយ តែខ្ញុំសុំអោយបងប្អូនប្រជាពលរដ្ឋ ជួយសហការណ៍ទើបយើងអាចឆ្លងកាត់ការលំបាកនេះជាមួយគ្នាបាន” ៕

វិភាគៈការបិទខ្ទប់កំពុងឆ្លុះបញ្ចាំងនូវសីលធម៌របស់ពលរដ្ឋនៃប្រជាជាតិមួយ

ដោយៈយិន លាងគង់ស្ថាបនិកនិងអគ្គនាយកគេហទំព័រPropertyarea.asia

ភ្នំពេញៈ ព្រឹត្តិការណ៍២០កុម្ភៈ បាននិងកំពុងធ្វើឲ្យមនុស្សគ្រប់គ្នាតក់ស្លុត ដោយសារទីក្រុងភ្នំពេញ ត្រូវបានបិទខ្ទប់ជាលើកដំបូង ក្នុងរយៈពេល៤៦ឆ្នាំមកនេះ ដែលកាលៈទេសៈបែបនេះ បានធ្វើឲ្យយុវជនដែលបានកើតនិងធំដឹងក្តី ក្រោយថ្ងៃទី១៧ មេសា ឆ្នាំ១៩៧៥ មិនយល់ពីអារម្មណ៍មួយនេះទេ។

វាជារឿងគួរឲ្យតក់ស្លុតមួយ សម្រាប់អារម្មណ៍ និងស្ថានការណ៍ដ៏ច្រួលច្របល់ និងការត្រូវស្នាក់នៅផ្ទះ ជាប្រចាំក្នុងរយៈពេល១៤ថ្ងៃ ឬអាចយូរជាងនេះ បើសិនជាការរីករាលដាលនៃមេរោគកូវីដ១៩ មិនអាចគ្រប់គ្រងបាន។

វាជាពេលវេលានៃការពិសោធន៍

ការបិទខ្ទប់រាជធានីភ្នំពេញ និងក្រុងតាខ្មៅរយៈពេល១៤ថ្ងៃ វាបង្ហាញនូវរឿងចំណុចវិជ្ជមានផង និងអវិជ្ជមានផង។

ចំណុចវិជ្ជមាន

ការបិទខ្ទប់នាពេលនេះ វានាំមកនូវភាពវិជ្ជមានសំរាប់់រដ្ឋាភិបាល ទី១ អាចបញ្ចប់ឬគ្រប់គ្រងបានទាំងស្រុង នូវការរីករាលដាលជំងឺកូវីដ១៩ បានឡើងវិញ ទី២ វាបង្ហាញពីដំណើរការគ្រប់គ្រងប្រទេស ប្រកបដោយប្រសិទ្ឋភាព និងប្រៀបបីដូចជាការធ្វើតេស្តនូវចរិកលក្ខណៈរបស់ពលរដ្ឋ និងក្រមសីលធ៌មរបស់់ពួកគេ ទី៣ វាបង្ហាញពីសាមគ្គីភាពរបស់ជាតិមួយ ដែលត្រូវរួមគ្នាដើម្បីបញ្ចប់វិបត្តិនេះជាមួយគ្នា ដើម្បីស្តារជីវភាព អាជីវកម្ម និងសេដ្ឋកិច្ចជាតិឡើងវិញ ទី៤ បង្ហាញពីការយកចិត្តទុកដាក់របស់រដ្ឋាភិបាល ចំពោះប្រជាពលរដ្ឋ និងប្រទេសជាតិ។

ចំណុចអវិជ្ជមាន

បញ្ហាកូវីដ១៩ បាននិងកំពុងក្លាយជាសោកនាដកម្មមួយរួចទៅហើយ បើសិនជាជំងឺនេះមិនអាចគ្រប់គ្រងបាន ដែលនឹងនាំដល់ការសោកសៅ ជាច្រើនទៀតសំរាប់ជាតិ ដោយទី១ ការបិទខ្ទប់នេះ បានធ្វើឲ្យប្រជាពលរដ្ឋ កើតមានជំងឺផ្លួវចិត្តកាន់តែច្រើន ទី២ ស្ថានភាពអាជីវកម្ម និសេដ្ឋកិច្ចជាតិកាន់តែយ៉ាប់យឺន និងធ្វើឲ្យសេដ្ឋកិច្ចរបស់គ្រួសារនិមួយៗកាន់តែធ្លាក់ចុះ និងប្រឈមមុខនឹងវិបត្តិបំណុលកាន់តែធ្ងន់ធ្ងរ។

ដំណោះស្រាយ

ស្ថិតក្នុងដំណាក់កាលដ៏៏សោកសៅនេះ ការដោះស្រាយបញ្ហាចំពោះមុខ មានតែប្រើប្រាស់វិធីសាស្ត្រទាំងនេះទេ ទើបការដោះស្រាយជំងឺនេះមានប្រសិទ្ឋភាពខ្ពស់ ទី១ ការពង្រឹងការអនុវត្តច្បាប់របស់់រដ្ឋាភិបាល លើពលរដ្ឋទាំងឡាយណា ដែលបំពានការធ្វើចត្តាឡីស័ក ទី២ កាត់ទោសដោយគ្មានរើសមុខ ចំពោះជនបំពានបំរាមគោចរ និងវិធានបិទខ្ទប់របស់រដ្ឋាភិបាល។

ទី៣ ពង្រឹងការអនុវវត្តន៍ច្បាប់លើមន្ត្រីនគរបាល អាវុធហត្ថទាំងឡាយណា ដែលបើកឲ្យមានការធ្វើដំណើរចេញចូល ដោយលួចលាក់ជាថ្នូរនឹងប្រាក់ ទី៤ ការចូលរួមជាពិសេសជាងគេពីប្រជាពលរដ្ឋ ដោយអនុវត្តន៍នូវវិធានបីកុំ បីការពារ និងត្រូវទៅយកសំណាក ក្នុងករណីដែលដឹងថាខ្លួនមានប៉ះពាល់ ឬបានទៅកាន់កន្លែងដែលមានអ្នកឆ្លងជំងឺកូវីដ១៩ ។

ទី៥ ត្រូវសំរាកនៅផ្ទះ និងមិនចេញក្រៅក្នុងករណីមិនចាំបាច់ ដើម្បីកាត់បន្ថយការឆ្លង រីករាលដាលជំងឺកូវីដ១៩កាន់តែធ្ងន់ធ្ងរ។

ធ្វើជាពលរដ្ឋល្អ

រាជរដ្ឋាភិបាលបានប្រកាសណែនាំ និងហាមប្រាមរួចហើយ មិនឲ្យប្រជាពលរដ្ឋធ្វើដំណើរឆ្លងពីខេត្តមួយទៅខេត្តមួយ នៅក្នុងកំឡុងពិធីបុណ្យចូលឆ្នាំ ប្រពៃណីជាតិខ្មែរ ដែលទើបបញ្ចប់នាពេលថ្មីៗនេះ ប៉ុន្តែទោះបីជាមានការហាមប្រាម ណែនាំ និងការលើកដៃសំពះអង្វរ កពីសម្តេចតេជោហ៊ុន សែននាយករដ្ឋមន្ត្រីនៃកម្ពុជាយ៉ាងណាក្តី ក៏ជនទំនើងមួយចំនួន នៅតែលួចធ្វើដំណើរទៅកាន់ស្រុកកំណើតរបស់ខ្លួន ដែលករណីខ្លះអ្នកនោះបាននាំជំងឺកូវីដ១៩ ចម្លងដល់ក្រុមគ្រួសារ និងសហគមន៍របស់ខ្លួនថែមទៀត ដែលបុគ្គលបែបនេះ ក្រោយពេលព្យាបាលជាសះស្បើយហើយ ត្រូវយកមកកាត់ទោសចំពោះមុខច្បាប់ ដើម្បីជាការព្រមាន។

នៅក្នុងទិដ្ឋភាពច្បាប់ ទោះមនុស្សមិនចង់គោរពច្បាប់ តែច្បាប់មានសិទ្ធចាប់់មនុស្សឲ្យគោរព ដើម្បីសេចក្តីថ្លៃថ្នូរ និងសណ្តាប់ធ្នាប់សង្គម។

លើសពីនេះ កាលពីថ្ងៃទី១៧ មេសាម្សិលម៉ិញនេះ នៅពេលរដ្ឋបាលរាជធានីភ្នំពេញបានរឹតបន្តឹងការធ្វើដំណើរ ក៏នៅមានបុគ្គលមួយចំនួន ដែលគ្មានកាតព្វកិច្ចចាំបាច់ នៅតែបំពានចេញក្រៅ និងត្រូវបានជាប់កកស្ទះ នៅតាមទីតាំងកុងត្រូលមួយចំនួន ដែលនេះវាបង្ហាញរួចហើយនូវសន្តានរបស់ខ្លួន ក្នុងនាមជាពលរដ្ឋល្អ ឬជាពលរដ្ឋដែលគ្មានសីលធ៌ម ជាពលរដ្ឋដែលមិនគោរពច្បាប់របស់សង្គមឬយ៉ាងណា។

ហេតុនេះសូមពលរដ្ឋកម្ពុជា រៀនសូត្រពីការធ្វើឲ្យខ្លួនឯង ក្លាយជាពលរដ្ឋល្អសម្រាប់សង្គម ដោយចូលរួមអនុវត្តន៍ច្បាប់ ស្តាប់តាមការណែនាំរបស់អាជ្ញាធរ និងរដ្ឋាភិបាល ដើម្បីក្លាយខ្លួនជាពលរដ្ឋស៊ីវិល័យរបស់ជាតិ។

យើងខ្ញុំសង្ឃឹមនិងជឿជាក់ថា ប្រជាពលរដ្ឋយើងទាំងអស់គ្នា នឹងចូលរួមជាមួយរាជរដ្ឋាភិបាល ដើម្បីបិទបញ្ចប់ការបិទខ្ទប់រយៈពេលពីរសប្តាហ៍នេះ ដើម្បីកុំឲ្យផ្លូវចិត្តរបស់យើង ការងាររបស់យើង មុខរបររបស់យើង ជំនួញរបស់យើង និងសេដ្ឋកិច្ចរបស់យើងឈានទៅរកការដួលរលំ៕

លោកឌិន សុមេធារិទ្ធ បង្ហើបពីវិធីសាស្ត្រដែលត្រូវធ្វើសម្រាប់ម្ចាស់អាជីវកម្ម និងអ្នកវិនិយោគដែលកំពុងជួបហានិភ័យ

ដោយៈ រ៉ាណេត

ភ្នំពេញៈ ស្ថិតនៅក្នុងដំណាក់កាលនេះ ស្ទើរតែគ្រប់អាជីវកម្ម និងមុខជំនួញតូចធំសុទ្ធតែទទួលរងនូវផលប៉ះពាល់ និងខាតបង់ដោយសារតែវិបត្តិនៃជំងឺកូវីដ១៩ ដែលកំពុងបន្តការរីករាលដាលនៅក្នុងសហគមន៍។

ប៉ុន្តែទោះជាយ៉ាងណា ដំណោះស្រាយទៅលើស្ថានការដ៏លំបាក ដែលកំពុងជួបនៅពេលនេះនៅតែមាន សំខាន់គឺស្ថិតនៅលើម្ចាស់អាជីវកម្មមានភាពរឹងមាំ និងភាពប្រាកដប្រជាបានកម្រិតណាតែប៉ុណ្ណោះ។

លោកឌិន សុមេរិទ្ធ ដែលជាអ្នកវិនិយោគនៅក្នុងវិស័យសណ្ឋាគារ និងជាអ្នកអភិវ ឌ្ឍន៍ក្នុងវិស័យអចលនទ្រព្យមួយរូបបានលើកឡើងថា ជាដំណោះស្រាយលើបញ្ហា ដែលកំពុងកើតមានគឺនៅតែមាន ប៉ុន្តែត្រូវទាមទារឱ្យម្ចាស់អាជីវកម្ម ឬវិនិយោគទាំងនោះមានភាពរឹងមាំ និងមានភាពនឹងនរផ្នែកអារម្មណ៍ជាសំខាន់។

លោកបញ្ជាក់ថា នៅក្នុងសម័យកាលនៃវិបត្តិជំងឺកូវីដ១៩នេះ ស្ទើរតែគ្រប់អាជីវកម្មគ្រប់ប្រភេទ គ្រប់វិស័យសុទ្ធតែទទួលរងនូវផលប៉ះពាល់ ទាស់ត្រង់ថាប៉ះពាល់តិច ឬច្រើនតែប៉ុណ្ណោះ ប៉ុន្តែក៏មានអ្នកធ្វើជំនួញ និងអាជីវកម្មមួយចំណែកតូចក៏កំពុងទទួលបានផលពីវិបត្តិមួយនេះផងដែរ។

លោកឌិន សុមេធារិទ្ធ បានបន្តថា “នៅក្នុងស្ថានការណ៍ដ៏លំបាកនេះ គឺត្រូវទាមទារឱ្យម្ចាស់អាជីវកម្ម ក៏ដូចជាអ្នកជំនួញ ដែលទទួលរងនូវផលប៉ះពាល់ ត្រូវតែមានភាពរឹងប៉ឹងបន្តិច ដើម្បីអាចមានអារម្មណ៍ ក្នុងការពិចារណារកដំណោះស្រាយ ឬអាចចាប់យកមុខជំនួញថ្មី ដែលអាចទទួលបានចំណូល គ្រាន់អាចជួយទប់ទល់នឹងស្ថានភាពដែលកំពុងលំបាក” ។

លោកបន្តថា ម្ចាស់អាជីវកម្មចាំបាច់ត្រូវតែមានភាពនឹងនរ រឹងមាំក្នុងការបោះជំហាន និងស្វែងរកដំណោះស្រាយ។ អ្នករកស៊ីគេមិនងាប់ក្រឡាមួយកន្លែងនោះទេ បើមុខរបរមួយខាត ឬជាប់គាំង គេត្រូវរកមុខរបរផ្សេងបន្ថែមទៀត ដែលអាចរកបានចំណូល ដើម្បីអាចជួយទប់ទល់គ្នា ជៀសវាងការទុកអាជីវកម្មចាស់ចោល ឬបណ្តោយឱ្យដួលរលំដែលប្រឈមទៅនឹងការខាតបង់កាន់តែធ្ងន់ធ្ងរនោះទេ។

លោកឌិន សុមេធារិទ្ធិបានលើកយកពីបទពិសោធន៍ផ្ទាល់ខ្លួនមកបង្ហាញថា “ហេតុផលដែលខ្ញុំមកបង្កើតភូមិផ្កាត្រកួន ក៏ព្រោះតែមកពីខ្ញុំរកស៊ីខាត ផ្នែកសណ្ឋាគារនៅសៀមរាប។ លោកបន្តថា “បើផ្នែកមួយខាងបង់ ខ្ញុំត្រូវបន្ថែមមុខរបរថ្មី កាលណោះខ្ញុំផ្តើមពីការរកស៊ី និងវិនិយោគក្នុងទីផ្សារអចលនទ្រព្យ។ បើខ្ញុំនៅតែប្រកាន់ជំហរលើសណ្ឋាគារតែមួយមុខ នោះខ្ញុំនឹងជួបបញ្ហាកាន់តែធំ ដូច្នេះត្រូវតែមានផែកការបង្កើតប្រភពចំណូលថ្មីបន្ថែម។

លោកបន្តថា អ្នករកស៊ី ឬលក់ដូរក៏ដូចជា បើអាជីវកម្មចាស់របស់យើង កំពុងជួនបញ្ហា ដោយសារបំរាមគោចររបស់រាជរដ្ឋាភិបាល យើងត្រូវគិតថា តើអាចធ្វើអ្វីបានទៀតដែលអាចរកបានចំណូល ដោយមុខរបរថ្មីអាចមានលក្ខណៈប្រហាក់ប្រហែល ទៅនឹងមុខជំនួញចាស់ និងជំនាញដែលយើងមាន។

ឧទាហរណ៍ បើជាអ្នកធ្លាប់បើកហាងលក់ចំណីអាហារ ឬហាងបាយនៅនឹងកន្លែង អាចបន្ថែមសេវាកម្មលក់តាមអនឡាញ ឬសេវាកម្មដឹកជញ្ជូនអាហារ ដល់លំនៅដ្ឋាន ដែលវាក៏ស្ថិត នៅក្នុងផ្នែកមួយនៃអាជីវកម្មចាស់ដដែល ប៉ុន្តែអាចរកបានចំណូល លុះក្រោយពេលបញ្ចប់វិបត្តិ អ្នកអាចងាកត្រឡប់ទៅបន្តដំណើរអាជីវកម្មចាស់ ឬអាចរួមដំណើរជាមួយអាជីវកម្មថ្មីដំណាលគ្នាតែម្ដង។

ជាមួយនឹងការលើកឡើងខាងលើនេះ លោកឌិន សុធារិទ្ធ ក៏បានបញ្ជាក់ថា សូមកុំបាក់ទឹកចិត្ត ហើយខំប្រឹងពង្រឹងស្មារតី ក្នុងការរកចំណូលបំពេញបន្ថែម។ អ្នកដែលអាចទប់ទល់នឹងស្ថានការដ៏លំបាកនៅពេលនេះបាន អ្នកនោះគឺជាអ្នកជោគជ័យដ៏ធំនៅក្នុងមុខជំនួញ ឬអាជីវកម្មជាមិនខាន” ៕

ផ្លូវល្បឿនលឿនពីរខ្សែប្រវែងជិត២០០គីឡូម៉ែត្រនឹងជួយសម្រួលពាណិជ្ជកម្មច្រើនរវាងកម្ពុជានិងវៀតណាម

ដោយៈ ម៉ាណេត

ភ្នំពេញៈ ការស្ថាបនាផ្លូវល្បឿនលឿនទីក្រុងហូជីមិញ-ម៉ុកបៃ ដែលតភ្ជាប់ជាមួយព្រំដែនកម្ពុជា ក្នុងទីក្រុងបាវិត គ្រោងនឹងចាប់ផ្តើមសាងសង់នៅឆ្នាំ២០២៣ ហើយគ្រោងនឹងបញ្ចប់នៅឆ្នាំ២០២៥ ខណៈគម្រោងផ្លូវល្បឿនលឿនភ្នំពេញ-បាវិត កំពុងស្ថិតក្នុងការសិក្សានៅឡើយ។

ផ្លូវល្បឿនលឿនហូជីមិញ-ម៉ុកបៃ មានប្រវែង៥៣គីឡូម៉ែត្រ ខណៈគម្រោងផ្លូវល្បឿនលឿនភ្នំពេញ-បាវិត ក៏ជាខ្សែផ្លូវថ្មីទាំងស្រុង ដែលមានប្រវែងសរុបប្រហែល១៣៥គីឡូម៉ែត្រ ហើយបើបូកផ្លូវទាំងពីរបញ្ចូលគ្នា ប្រវែងសរុបនៃផ្លូវល្បឿនលឿនទាំងពីរនេះមាន១៨៨គីឡូម៉ែត្រ។

ផ្លូវល្បឿនលឿនថ្មីនេះរំពឹងថា នឹងកាត់បន្ថយការកកស្ទះចរាចរណ៍ និងធ្វើឱ្យប្រសើរឡើងនូវការតភ្ជាប់រវាងប្រទេសកម្ពុជា និងវៀតណាម។

យោងតាមការចេញផ្សាយរបស់សារព័ត៌មាន VNExpress កាលពីថ្មីៗនេះ បានឱ្យដឹងថា អាជ្ញាធរនៅទីក្រុងហូជីមិញ និងខេត្តតាយនិញ ដែលជាកន្លែងច្រកទ្វារព្រំដែនម៉ុកបៃជាមួយប្រទេសកម្ពុជា កំពុងព្យាយាមបញ្ចប់នីតិវិធី និងការសិក្សាពីលទ្ធភាពសាង់សង់ផ្លូវល្បឿនលឿន ដែលមានតម្លៃប្រមាណ៥៨៧លានដុល្លារនេះនៅក្នុងឆ្នាំនេះ។

ការទូទាត់សំណងសម្រាប់ការទិញដី ត្រូវបានរំពឹងថានឹងបញ្ចប់នៅឆ្នាំក្រោយ។ ដូច្នេះយ៉ាងយូរ គម្រោងនេះអាចចាប់ផ្តើមសាងសង់នៅឆ្នាំ២០២៣ ។

ក្រុមហ៊ុន China Road and Bridge របស់ប្រទេសចិនកាលពីពេលថ្មីៗនេះ បានបង្ហាញពីលទ្ឋផល នៃការសិក្សាគម្រោងផ្លូវល្បឿនលឿនភ្នំពេញ-បាវិត (Phnom Penh-Bavet Expressway) ជូនថ្នាក់ដឹកនាំក្រសួងសាធារណៈការ និងដឹកជញ្ជូនរួចហើយ ដោយផ្តល់ជំរើសចំនួន៣ ដល់រដ្ឋាភិបាលពិនិត្យ និងសម្រេចយកជំរើសណាមួយ។

យោងតាមឯកសាររបស់ក្រសួងសាធារណៈការ និងដឹកជញ្ជូនបានឲ្យដឹងថា គម្រោងផ្លូវល្បឿនលឿនភ្នំពេញ-បាវិត ក៏ជាខ្សែផ្លូវថ្មីទាំងស្រុង ដែលមានប្រវែងសរុបប្រហែល១៣៥ គ.ម។ ផ្លូវនេះត្រូវសាងសង់ជា៤គន្លង តួផ្លូវមានទទឹង ២៥,៥ ម៉ែត្រ។ ខ្សែផ្លូវនេះ នឹងចេញពីភ្នំពេញ នៅចំណុចផ្លូវខ្សែក្រវ៉ាត់ក្រុងទី៣ កាត់តាមខេត្តកណ្តាល ខេត្តព្រៃវែង និងខេត្តស្វាយរៀង ឆ្ពោះទៅក្រុងបាវិត ព្រំដែនកម្ពុជា-វៀតណាម។

យោងតាមរបាយការណ៍សិក្សា របស់ទីភ្នាក់ងារសហប្រតិបត្តិការអន្តរជាតិជប៉ុន (JICA) ផ្លូវល្បឿនលឿននេះ ជាប្រភេទផ្លូវលើអាកាស (Viaduct) ប្រវែងប្រហែល១២ គ.ម មានលូប្រអប់ (Box Culvert) ប្រវែងប្រហែល ២៨,៤ គ.ម និងជាប្រភេទ ផ្លូវលើកកម្ពស់ (Embankment) ប្រវែងប្រហែល៨៥,៨ គ.ម។ ផ្លូវល្បឿនលឿន ភ្នំពេញ-បាវិត មានផ្លូវបំបែក ប្តូរទិស (Inter-Change) ចំនួន៧កន្លែង កន្លែងឈប់សម្រាក៦កន្លែង និងច្រកទ្វារ ព្រំដែនថ្មីចំនួន១ផងដែរ។

គម្រោងសាងសង់ផ្លូវល្បឿនលឿនភ្នំពេញ-បាវិត ត្រូវបានបញ្ចប់ការសិក្សាសមិទ្ធិលទ្ធភាព និងកំពុងស្ថិតក្នុង ដំណាក់កាលពិភាក្សាលើតម្លៃនៃគម្រោង និងប្រភពថវិកា។

ក្រសួងសាធារណការ និងដឹកជញ្ជូនកម្ពុជា និងក្រសួងដឹកជញ្ជូនរបស់ប្រទេសវៀតណាម ក៏បានចុះអនុស្សរណៈយោគយល់គ្នា ស្តីពីការជំរុញការសិក្សា និងសាងសង់ផ្លូវល្បឿនលឿនភ្នំពេញ-បាវិត និងផ្លូវល្បឿនលឿនហូជីមិញ-ម៉ុកបៃ រួចរាល់ផងដែរ៕

វេទិកាអន្តរជាតិមួយស្តីពីស្ថានភាពសេដ្ឋកិច្ច និងអចលនទ្រព្យនៅកម្ពុជានឹងប្រព្រឹត្តទៅនាចុងខែក្រោយ

ដោយៈ ប៊ី

ភ្នំពេញៈ វេទិកាលំដាប់អន្តរជាតិមួយ ដែលរៀបចំដោយស្ថាប័នអន្តរជាតិធំៗជាច្រើន ដែលផ្តោតកិច្ចពិភាក្សាលើបញ្ហាសេដ្ឋកិច្ច និងការរីកចម្រើនលើវិស័យអចលនទ្រព្យកម្ពុជាប្រកបដោយនិរន្តរភាព នឹងចាប់ផ្តើមនៅចុងខែឧសភាខាងមុខនេះ។

វេទិកាដែលមានឈ្មោះថា Rainmaking Cambodia 2021 រៀបចំដោយស្ថាប័នអន្តរជាតិធំៗ នឹងប្រព្រឹត្តទៅនាថ្ងៃទី២៥ ខែឧសភា ឆ្នាំ២០២១ ដើម្បីពិភាក្សាពីការអភិវឌ្ឍសេដ្ឋកិច្ច និងអចលនទ្រព្យនាពេលអនាគតនៅកម្ពុជា ខណៈព្រឹត្តិការណ៍នេះ ក៏នឹងមានការចូលរួមពីអគ្គនាយកគេហទំព័រ Propertyarea.asia ដែលនឹងបញ្ចេញជាទស្សនទានលើស្ថានភាពសេដ្ឋកិច្ច និងអចលនទ្រព្យចុងក្រោយនៅកម្ពុជាផងដែរ។

ព្រឹត្តិការណ៍ Rainmaking Cambodia ត្រូវបានរៀបចំឡើងដោយ Good City Foundation and InvesHK និងនាយកដ្ឋានវិនិយោគទុនផ្ទាល់បរទេសនៃរដ្ឋាភិបាលហុងកុង ក្នុងកម្មពិធី StartmeupHK នាពេលខាងមុខនេះចាប់ពីថ្ងៃទី២៤ ដល់ថ្ងៃទី២៨ ខែឧសភា និងមានការគាំទ្រពីតំណាង និងសមាជិកនៃវេទិកាផ្លាស់ប្តូរទីក្រុង និងទីក្រុងនៃវេទិកាសេដ្ឋកិច្ចពិភពលោកនៅប្រទេសចិន និងអាស៊ាន (loT and Urban Transformation Platform of the World Economic Forum in China and ASEAN)។

កម្មពិធីសហការបង្កើតតម្លៃរួម នៃអចលនទ្រព្យប្រកបដោយនិរន្តរភាពនៅកម្ពុជា (Co-Creating Common Values of Sustainable Real Estate in Cambodia) នឹងដើរតួនាទីជាប្រធានបទសំខាន់នៃ Rainmaking Cambodia 2021ដែលព្រឹត្តិការណ៍នេះនឹងផ្តោតលើកិច្ចពិភាក្សាកម្រិតខ្ពស់ ស្តីពីនិន្នាការអភិវឌ្ឍន៍ម៉ាក្រូសេដ្ឋកិច្ចចុងក្រោយរបស់ប្រទេសកម្ពុជា។

កម្មពិធីនេះ ក៏នឹងស្វែងយល់ពីការអភិវឌ្ឍអចលនទ្រព្យ នាពេលអនាគត ដូចជាការវិនិយោគអចលនទ្រព្យឆ្លាតវៃ និងហិរញ្ញប្បទានប្រកបដោយចីរភាព និងវិធីដែលអ្នកពាក់ព័ន្ធអាចធ្វើអន្តរកម្ម និងចង្អុលបង្ហាញពីបញ្ហាប្រឈម និងដំណោះស្រាយ តាមរយៈការអភិវឌ្ឍប្រកបដោយចីរភាព និងភាពធន់នៃទីក្រុងកាន់តែប្រសើរ សម្រាប់ប្រទេសកម្ពុជា ក្នុងបរិបទទីក្រុងកំពុងរីកចម្រើន។

វគ្គទី២ នឹងមានកម្មវិធីបង្ហាញអំពីបច្ចេកវិទ្យាសម្រាប់ទីក្រុងល្អ ដើម្បីអនុញ្ញាតឱ្យក្រុមហ៊ុន/សាជីវកម្ម ដែលមានសក្តានុពល បង្ហាញអាជីវកម្ម/គម្រោងរបស់ពួកគេ ដល់បណ្តាញវិនិយោគិនរបស់យើង និងឱកាសដើម្បីទទួលបានរធនធាន នាពេលអនាគតពីទីក្រុងហុងកុង និងតំបន់ Greater Bay Area នៃប្រទេសចិន។

មូលនិធិទីក្រុងល្អប្រសើរ (Good City Foundation) គឺជាអង្គការអភិវឌ្ឍន៍ក្រៅរ ដ្ឋាភិបាលមិនរកប្រាក់ចំណេញ ដែលត្រូវបានបង្កើតឡើង ក្នុងឆ្នាំ២០១៦ ដោយក្រុមអ្នកសិក្សា និងសហគ្រិនហុងកុង ដែលមានចក្ខុវិស័យក្នុងការកសាងភាពធន់ នៃទីក្រុងល្អប្រសើរ១០០ទីក្រុង នៅក្នុងតំបន់អាស៊ី និងអាហ្វ្រិកដែលកំពុងរីកចម្រើន។

បេសកកម្មមូលនិធិនេះ ដើម្បីជំរុញការច្នៃប្រឌិតសាធារណៈ និងភាពជាដៃគូឯកជនក្នុងចំណោមយុវជនជំនាន់ក្រោយ នៅក្នុងទីក្រុងដែលកំពុងរីកចម្រើន ហើយបានទាក់ទាញការចាប់ផ្តើមថ្មីប្រកបដោយភាពច្នៃប្រឌិត ការិយាល័យគ្រួសារ អ្នកបង្កើតគោលនយោបាយវ័យក្មេង និងសាជីវកម្ម ដើម្បីស្វែងរកការអភិវឌ្ឍចុងក្រោយ នៃការកសាងទីក្រុង សេដ្ឋកិច្ច បច្ចេកវិទ្យា និងការច្នៃប្រឌិត និងស្វែងរកភាពជាដៃគូ។

បច្ចុប្បន្នមូលនិធិនេះ គឺជាដៃគូស្ថាប័ននៃសម្ព័ន្ធភាពទីក្រុងវៃឆ្លាត ជាសកលជី២០ (G20 Global Smart Cites Alliance) និងសម្ព័ន្ធឯកជននៃបណ្តាញអាស៊ានស៊ីធីថល (Private Sector Commitee of ASEAN Smart City Network) ក្នុងនាមប្រទេសថៃ និងបម្រើការជាក្រុមការងារមិនស្វែងរកប្រាក់ចំណេញ នៃវេទិកាសេដ្ឋកិច្ចពិភពលោក (ចិន និងអាស៊ាន) ។

ដើម្បីធ្វើឱ្យព្រឹត្តិការណ៍កាន់ស៊ីជម្រៅ មូលនិធិទីក្រុងល្អប្រសើរនេះ បានចុះហត្ថលេខាលើអនុស្សារណៈយោគយល់ ជាមួយសហគ្រាសខ្មែរ (Khmer Enterprise) ដែលជាអង្គភាពអនុវត្តន៍ មូលនិធិអភិវឌ្ឍន៍សហគ្រិនភាព នៃក្រសួងសេដ្ឋកិច្ចនិងហិរញ្ញវត្ថុ ដើម្បីបង្កើតទំនាក់ទំនងសហប្រតិបត្តិការជាមួយគ្នា ដោយជំរុញប្រព័ន្ធអេកូឡូស៊ី និងបច្ចេកវិទ្យា និងដើម្បីស្វែងរកកិច្ចសហការជាយុទ្ធសាស្ត្រស្តីពី លំហូរកិច្ចព្រមព្រៀងវិនិយោគរួមគ្នា និងគម្រោងផ្តល់មូលនិធិរវាងប្រទេសកម្ពុជា និងបណ្តាញវិនិយោគិន ដែលមានឥទ្ធិពលនៅហុងកុង និងតំបន់ Greater Bay Area នៃប្រទេសចិន៕