ដោយៈ ម៉ាណេត

ភ្នំពេញៈ ខណ្ឌសែនសុខ ចាប់ផ្តើមមានសន្ទុះលើតម្រូវការអចលនទ្រព្យ យ៉ាងឆាប់រហ័ស ទាំងការអភិវឌ្ឍលើវិស័យបុរីលំនៅដ្ឋាន អគារខ្ពស់ដូចជា គម្រោងអគារខុនដូ អគារពាណិជ្ជកម្ម និងផ្សារទំនើបជាដើម ខណៈលក្ខណៈភូមិសាស្ត្រពិសេស នៅក្នុងខណ្ឌនេះជំរុញឱ្យតំបន់ក្លាយជម្រើសទី១សម្រាប់ការអភិវឌ្ឍន៍លំនៅដ្ឋាន។

យោងតាមរបាយការណ៍របស់ក្រុមហ៊ុន CBRE Cambodia  ចេញផ្សាយកាលពីថ្មី​ៗនេះបានឱ្យដឹងថា ខ័ណ្ឌសែនសុខ នៅតែជាជម្រើសទី១ សម្រាប់គម្រោងអភិវឌ្ឍលំនៅដ្ឋានផ្ទាល់ដីជាច្រើន ដោយសារតែផ្ទៃរៀបស្មើដ៏ធំទូលាយរបស់ខ័ណ្ឌមួយនេះ ការរីកចម្រើ​ននូវបណ្ដាញផ្លូវថ្នល់ និងការកើនឡើងវត្តមានស្ថាប័ន សម្រាប់បម្រើឱ្យវិស័យពាណិជ្ជកម្ម ដែលជម្រុញឱ្យមានចលនាសកម្មភាពសេដ្ឋកិច្ច និងសង្គមនៅក្នុងតំបន់។

ខ័ណ្ឌច្បារអំពៅ ដែលស្ថិតនៅម្ខាងទៀតនៃទីក្រុងភ្នំពេញ ឈរនៅលេខរៀងឆ្ងាយទី២ សម្រាប់ការផ្គត់ផ្គង់គេហដ្ឋាននាពេលបច្ចុប្បន្ន។ ខ័ណ្ឌដែលមានលក្ខណៈជ្រោយកោះមួយនេះ ជាទិសដៅប្រកបដោយភាពពេញនិយម សម្រាប់អ្នកអភិវឌ្ឍបុរី។ ទោះបីជាយ៉ាងណាក៏ដោយ ខ័ណ្ឌដង្កោរ នឹងវ៉ាដាច់ខ័ណ្ឌច្បារអំពៅ សម្រាប់ការផ្គត់ផ្គង់លំនៅដ្ឋាន បើសិនជារាល់គម្រោង ដែលត្រូវបានចុះបញ្ជីរទាំងអស់ក្នុងខ័ណ្ឌមួយនេះ ត្រូវបានបញ្ចប់។

នាយិកាក្រុមហ៊ុនអចលនទ្រព្យ AMATAK Property Service លោកស្រី តាំង ហួរធ្លាប់ថ្លែងប្រាប់ថា បច្ចុប្បន្នខណ្ឌសែនសុខ បានប្រែក្លាយជាតំបន់ពាណិជ្ជកម្មកម្រិតខ្ពស់រួចទៅហើយ ព្រោះតំបន់នេះបានបំពេញ ទៅដោយគម្រោងបុរីលំនៅដ្ឋានធំៗ ក៏ដូចជាបណ្តុំលំនៅដ្ឋានកម្រិតខ្ពស់ រួមជាមួយវត្តមាននៃអគារខ្ពស់ៗ ដែលបម្រើឱ្យវិស័យពាណិជ្ជកម្ម។

លោកស្រីបញ្ជាក់ថា “កាលពីមុនតំបន់ខណ្ឌសែនសុខ សម្បូរទៅនឹងការវិនិយោគលើគម្រោងលំនៅដ្ឋានកម្រិតមធ្យម និងក្រោមមធ្យម ប៉ុន្តែឥលូវខុសពីមុន”។ លោកស្រីបានបន្តថា “ការវិនិយោគលើគម្រោងលំនៅដ្ឋានកម្រិតមធ្យមនៅតំបន់នេះ លែងមានទៀតហើយ ប៉ុន្តែសម្រាប់គម្រោងមជ្ឈមណ្ឌល ពាណិជ្ជកម្មគឺនៅមានឱកាស ជាពិសេសវិស័យខុនដូកម្រិតមធ្យម ដោយសារតែតម្លៃដីនៅតំបន់ខណ្ឌនេះ បានឡើងខ្ពស់ផុតពីកម្រិតនៃការអភិវឌ្ឍវិស័យលំនៅដ្ឋានកម្រិតទាប ឬក្រោមមធ្យមនោះទៀតហើយ”។

ទិន្នន័យដែលចេញផ្សាយដោយក្រសួងរៀបចំដែនដី នគរូបនីយកម្ម និងសំណង់ បានបង្ហាញថា ទុនវិនិយោគវិស័យសំណង់នៅកម្ពុជាក្នុងឆមាសទី១ ឆ្នាំ ២០២០ នេះមានតម្លៃជាង៣,៨៤ពាន់លានដុល្លារ កើនឡើង១៣,២៦ ភាគរយ ធៀបនឹងឆមាសទី១ ឆ្នាំមុន។ នៅក្នុងឆមាសទី១ ឆ្នាំនេះការស្នើសុំគម្រោងវិនិយោគលើវិស័យសំណង់មានចំនួន ២ ៥២២ គម្រោង កើនឡើង៤៧៥ ធៀបនឹងឆមាសទី ១ ឆ្នាំមុនមានចំនួន២ ០៤៧ គម្រោង៕

ដោយៈ ម៉ាណេត

ភ្នំពេញៈ អ្នកជំនាញអន្តរជាតិបានលើកឡើងថា កម្មវិធីចាក់វ៉ាក់សាំងរបស់រដ្ឋាភិបាលកម្ពុជា ដែលមានល្បឿនបណ្តាប្រទេសផ្សេងៗទៀតនៅក្នុងអាស៊ាន នឹងក្លាយជាមធ្យោ​បាយមួយដ៏សំខាន់ ក្នុងការផ្តល់ទំនុកចិត្តដល់ទីផ្សារវិនិយោគ ពិសេសបង្កើនទំនុកចិត្តដល់អ្នកវិនិយោគិនអចលនទ្រព្យ។

នាយកជាន់ខ្ពស់ក្រុមហ៊ុន CBRE Cambodia លោក James Hodge បានថ្លែងប្រាប់ឲ្យដឹងតាមអ៊ីម៉េលកាលពីថ្ងៃទី១៨ ឧសភាកមន្លងមកថា កម្មវិធីចាក់វ៉ាក់សាំងរបស់រដ្ឋាភិបាលកម្ពុជា បានកើនលើសប្រទេសផ្សេងៗទៀតនៅក្នុងអាស៊ាន ហើយនឹងក្លាយជាមធ្យោបាយមួយដ៏សំខាន់ ក្នុងការផ្តល់ទំនុកចិត្តដល់ទីផ្សារវិនិយោគ។

លោកបានឱ្យដឹងថា “ដៃគូវិនិយោគដែលក្រុមហ៊ុនCBRE បានពិភាក្សាជាមួយ បា​នសំដែងការកោតសរសើរ ចំពោះវិធានការរបស់រដ្ឋាភិបាល ដែលបានអនុវត្តកន្លងមក ហើយពួកគេមានជំនឿចិត្តថា ការពន្លឿនការចាក់វ៉ាក់សាំងបែបនេះ នឹងជួយឱ្យប្រទេសកម្ពុជាងើបឡើងវិញ ពីវិបត្តិជំងឺរាតត្បាតលឿនជាងប្រទេសប្រកួតប្រជែង”។

លោកបានថ្លែងបន្តថា ប្រសិនបើកម្មវិធីចាក់វ៉ាក់សាំងជូនពលរដ្ឋបញ្ជាក់ថា ទទួលបានជោគជ័យ ក្នុងការគ្រប់គ្រងបានការផ្ទុះឡើងនៃជំងឺកូវីដ១៩ វានឹងនាំមកនូវលទ្ធភាពមួយ ដែលប្រទេសកម្ពុជាអាចវិលត្រឡប់ ទៅរកកម្រិតប្រក្រតីឡើងវិញ លឿនជាងប្រទេ​សផ្សេងៗ ដែលអាចធ្វើឱ្យកម្ពុជាទាញយកអត្ថប្រយោជន៍ពីវា មុនពេលប្រទេសដទៃទៀត។

លោកបានឱ្យដឹងទៀតថា នេះអាចមានន័យថា នឹងមានការលេចចេញជាថ្មី និងងើបឡើងវិញលឿនជាងមុននៅក្នុងឧស្សាហកម្មទេសចរណ៍បែបនេះ និងបង្កើនទំនុកចិត្តដល់វិនិយោគិន ក្នុងប្រទេសក្នុងរយៈពេលមធ្យម ដែលនឹងជួយលើកកម្ពស់សកម្មភាពនៅក្នុងវិស័យអចលនទ្រព្យផងដែរ។

ប្រធានសមាគមអ្នកវាយតម្លៃ និងភ្នាក់អចលនវត្ថុកម្ពុជា លោកច្រឹក សុខនីម បានមានប្រសាសន៍ថា ជារឿងល្អសម្រាប់កម្ពុជា ដែលរាជរដ្ឋាភិបាលបានខិតខំនាំយកវ៉ាក់សាំងការពារជំងឺឆ្លងកូវីដ មកចាក់ជូនប្រជាពលរដ្ឋទូទាំងប្រទេសដោយឥតគិតថ្លៃ។ ប៉ុន្តែយ៉ាងណាក៏ដោយ បន្ថែមពីលើការចាក់វ៉ាក់សាំងប្រជាពលរដ្ឋ ក៏ត្រូវតែបន្តការរក្សាបង្កើនការប្រុងប្រយ័ត្ន រក្សាអនាម័យ ដដែលទើបហានីភ័យមួយនេះអាចផុតរលត់ក្នុងពេលដ៏ខ្លី។

លោកបញ្ជាក់ថា “ប្រសិនបើបញ្ហាត្រូវបានកាត់បន្ថយបានល្អប្រសើរ នៅត្រឹមពាក់កណ្តាលឆ្នាំនេះ នោះកំណើនទីផ្សារអចលនទ្រព្យកម្ពុជា អាចនឹងចាប់ផ្តើមដំណើរការល្អឡើងវិញនៅត្រឹមចុងឆ្នាំ ឬដើមឆ្នាំ២០២២ ជាពិសេសបន្ទាប់ពីស្ថានភាពនៃបណ្តាប្រទេសជាដៃគូវិនិយោគជាមួយកម្ពុជា មានភាពល្អប្រសើរឡើងវិញ ហើយកំណើនសេដ្ឋកិច្ចរបស់ពួកគេក៏ចាប់ផ្តើមមានកំណើនឡើងវិញ”។

រាជរដ្ឋាភិបាលកម្ពុជា បានចាប់ផ្តើមយុទ្ធនាការចាក់វ៉ាក់សាំង ជូនប្រជាពលរដ្ឋនៅថ្ងៃទី១០ ខែកុម្ភៈ ឆ្នាំ២០២១។ រហូតមកដល់ពេលនេះ ពលរដ្ឋកម្ពុជាចំនួនជាង២លាននាក់បានចាក់វ៉ាក់សាំងរួចរាល់។ ចំនួននេះ បានធ្វើឱ្យកម្ពុជាក្លាយជាប្រទេសឈរនៅចំណាត់ថ្នាក់លេខ២ នៅអាស៊ាន ជាប្រទេសចាក់វ៉ាក់សាំងជូនប្រជាពលរដ្ឋបានលឿន និងច្រើនជាងគេ ខណៈប្រទេសសិង្ហបុរីឈរនៅលេខរៀងទី១។

រាជរដ្ឋាភិបាលកម្ពុជា មានផែនការចាក់វ៉ាក់សាំងជូនប្រជាពលរដ្ឋកម្ពុជា ឱ្យបានខ្ទង់ ១០លាននាក់ និងឱ្យរួចរាល់នៅដំណាច់ឆមាសទី១ ឆ្នាំ២០២២៕

ដោយៈសុខុម

ប៉េកាំង: ក្រឡេកមើលមួយភ្លែត យើងនឹងឃើញអ្វី ម្យ៉ាង ដែលមានរាងមូលដូចស៊ុតហាក់អណ្ដែត លើផ្ទៃទឹកគួររឱ្យចាប់អារម្មណ៍។ តើវាជាអ្វីឱ្ យប្រាកដ?។

ដោយផុសឡើងយ៉ាងត្រដែត នៅកណ្ដាលទឹកបឹង សិប្បនិមិត្ត នោះគឺជាអគារសាលមហោស្រពជាតិ ដ៏ធំសម្បើមរបស់មហាយក្សចិន មានឈ្មោះថា National Centre for the Performing Arts ដែលយើងអាចចាត់ទុកថា ជាសំណង់ស្ថាបត្យកម្ មដ៏អស្ចារ្យមួយប្រចាំសតវត្សរ៍ទី២១។

អគារដែលស្ថិតនៅក្នុងរដ្ឋធានីប៉េកាំង ប្រទេសចិន នេះ ក៏ត្រូវបានគេហៅថាអគារ “The Giant Egg” (អគារស៊ុតយក្ស) ផងដែរដោយសារមានរូបរាង ដូចស៊ុត។

យោងតាមឯកសារបង្ហាញថា អគារកម្ពស់ ៤៦,២៨ម៉ែត្រ ដែលគូរប្លង់ដោយស្ថាប  ត្យករជនជាតិបារាំង ដ៏ល្បីល្បាញលោក Paul Andreu នេះមានប្រវែងអ័ក្សវែងរហូតដល់ទៅ ២១២,២០ម៉ែត្រពីកើតទៅលិច និងប្រវែង អ័ក្សខ្លី១៤៣,៦៤ម៉ែត្រ ពីជើងទៅត្បូង និងផ្ទៃសរុប១១៩,៩០០ម៉ែត្រការ៉េ។

ការដំណើរការសាងសង់អគារនេះ បានចាប់ផ្ដើមនៅ ខែធ្នូ ឆ្នាំ២០០១ ហើយបានបញ្ចប់ជាស្ថាពរនៅ ខែកក្កដា ឆ្នាំ២០០៧ ដោយចំណាយទឹកប្រាក់អស់ រហូតដល់ទៅ៣៦៦លានដុល្លារអាមេរិក។

អគារ The Giant Egg បានជាប់ឈ្មោះ ជាសាលមហោស្រពធំបំផុតនៅអាស៊ី ដោយនៅក្នុងអគារនេះ រួមមាន សាលមហោស្រពអូប៉េរ៉ា រោងភាពយន្ត សាលពិព័រណ៍ ភោជនីដ្ឋាន និងហាងលក់ឧបករណ៍បំពងសំឡេង ជាដើម៕

ដោយៈរតនៈ

ភ្នំពេញៈ

ខណៈដែលវិស័យអចលនទ្រព្យត្រូវបានគេមើល ឃើញថា ហាក់ផុសផុល ជាពិសេសនៅតំបន់ដែល អភិវឌ្ឍន៍ខ្លាំង ហើយក្រុមវីនិយោគិនទាំងជាតិ និងអន្តរជាតិបាន និង កំពុងបោះទុនដើម្បីវីនិយោគ លើវិស័យមួយនេះ។

ប៉ុន្តែការវិនិយោគក្នុងវិស័យមួយនេះ ក៏មានហានិភ័យ ខ្ពស់ផងដែរ ហេតុនេះអ្នកជំនាញអន្តរជាតិបានស្នើ ឲ្យអ្នកដែលត្រៀមប្រឡូក ឬបោះទុនវិនិយោគលើ វិស័យនេះត្រូវមើលលើចំណុចសំខាន់ៗចំនូន៩។

លោកស្រីអាន សុធីតា អ្នកជំនាញផ្នែកអចលនទ្រព្យ លំដាប់អន្តរជាតិ បានចែករំលែកថា មុននឹង សម្រេចចិត្តរកស៊ីលើអចលនទ្រព្យទ្រង់ទ្រាយធំ ឬតូច អ្នកវិនិយោគត្រូវសិក្សាលើចំណុចសំខាន់ៗទាំង៩នេះដូចជា

ទី១  ជ្រើសរើសក្រុមអ្នកច្បាប់

មេធាវិគឺជាបុគ្គលដែលសំខាន់ ជាពិសេសមេធាវី ដែលធ្វើការផ្នែកអចលនទ្រព្យតែម្ដង ព្រោះថាមិន មែនមេធាវីណា ក៏អាចផ្ដល់ប្រឹក្សាអំពីការវិនិយោគ លើវិស័យអចលនទ្រព្យបាននោះទេ។

ម្យ៉ាងទៀតមេធាវី ដែលជំនាញខាងអចលនទ្រព្យអាច ចងក្រងកិច្ចសន្យាមួយ ដែលការពារអត្ថប្រយោជន៍ អ្នកវិនិយោគ។

ទី២  ជ្រើសរើសក្រុមការងារផ្នែកគណនេយ្យ និងពន្ឋដា

បច្ចុប្បន្នពន្ធលើអចលនទ្រព្យគឺជារឿងសំខាន់មួយ ព្រោះវាមានភាពស្មុគស្មាញដែលទាមទារឲ្យផ្នែកគណនេយ្យ គិតគូរឲ្យបានច្បាស់លាស់ ធ្វើយ៉ាងណាសន្សំ សំចៃផ្នែកពន្ធឲ្យអស់តិចបំផុត។

ទី៣ គឺជ្រើសរើសអ្នកជំនាញស្រាវជ្រាវទីតាំងដី

អ្នកជំនាញស្រាវជ្រាវទីតាំងដី គឺអាចជួយឲ្យអ្នក វិនិយោគបានដឹងថា អចលនទ្រព្យដែលត្រូវវិនិយោគ នោះមានហានិភ័យឬទេ ហើយអ្នកជំនាញក៏អាចជួយ អ្នកវិនិយោគពិនិត្យអគារថាតើអគារ ដែលវិនិយោគ ហើយនោះអាចប្រើប្រាស់បាន ដោយមិនមានបញ្ហា ឬយ៉ាងណា។

ម្យ៉ាងទៀតអ្នកជំនាញស្រាវជ្រាវដី ក៏អាចដឹថាដីដែល វិនិយោគ នោះអាចប្រើប្រាស់បានទៅលើអ្វីខ្លះ ឧទាហរណ៍ដូចជា សង់អគារ ធ្វើកសិកម្ម។ល។

ទី៤ ភ្នាក់ងារអចលនទ្រព្យ

ភ្នាក់ងារអចលនទ្រព្យ គឺអាចជួយវិនិយោគិន ក្នុងការ សិក្សាពីតម្លៃអចលនទ្រព្យថាតើការទិញមកថ្លៃពេកទេ លក់ទៅវិញថោក ឬថ្លៃពេកជាងទីផ្សារពេកទេ។ជាមួយគ្នានេះភ្នាក់ងារអចលនទ្រព្យ អាចវាយតម្លៃ ពីតម្រូវការអចលនទ្រព្យថា អតិថិជនត្រូវការ អចលនទ្រព្យប្រភេទណា?។ តើការផ្គត់ផ្គង់   ឬលើសតម្រូវការនៅក្នុង​ទីផ្សារ។

ចំនុចសំខាន់មួយទៀត ភ្នាក់ងារអចលនទ្រព្យ អាចវាយតម្លៃបានថា ការវិនិយោគនោះបានប្រាក់ ចំនេញឆ្លើយតបជាមួយអ្នកវិនិយោគឬទេ។

ទី៥ ស្ថាបត្យករ

អ្នកវិនិយោគគឺទាមទារជ្រើសរើសស្ថាបត្យករ ដែលមានជំនាញច្បាស់លាស់ អាចរចនាម៉ូត អគារដែលត្រូវជាមួយទីផ្សារ ដែលត្រូវនឹង រសនិយមរបស់អតិថិជន ព្រមទាំងងាយស្រួល ដល់វិស្វករ។

ទី៦ វិស្វករ

ការងាររបស់វិស្វករគឺជាការងារ ដែលអ្នកវិនិយោគ មិនអាចមើលឃើញ ដូចជាប្រព័ន្ធទឹក ប្រព័ន្ធភ្លើង ប្រព័ន្ធលូ ព្រោះថាការរស់នៅក្នុងអគារ ឬសំណង់ មួយប្រព័ន្ធទាំងអស់នេះគឺពិតជាសំខាន់។

ទី៧ ការជ្រើសរើសក្រុមហ៊ុនសំណង់

ក្រុមហ៊ុនសំណង់គឺមានជំនាញខុសៗគ្នា ខ្លះជំនាញ សង់អគារខ្ពស់ ខ្លះជំនាញសង់​ផ្ទះល្វែង ដូច្នេះត្រូវចេះ ជ្រើសរើសក្រុមហ៊ុនសំណង់ណា ដែលត្រូវនឹង គម្រោងដែលវិនិយោគ។

ទី៨ ផ្នែកធនាគារជាដៃគូ

អ្នកវិនិយោគត្រូវសិក្សាថា តើធនាគារណាដែលផ្ដល់ កម្ចីងាយស្រួល ដល់អ្នកវិនិយោគជាមួយនឹងការប្រាក់ សមរម្យ និងមានភាពបត់បែនលើលំហូរឥណទាន របស់ពួកគេ។

ទី៩ ក្រុមហ៊ុនធានារ៉ាប់រង

អ្នកវិនិយោគត្រូវជ្រើសក្រុមហ៊ុនបែបណាដែលមានទំនួលខុសត្រូវខ្ពស់ ហើយត្រូវដឹងថាតើអគារ ដែល យើងសាងសង់នោះ ទាមទារធានារ៉ាប់រងអ្វីខ្លះ និង ចំណាយបែបណា ដើម្បីយកមកប្រៀបធៀបគ្នាពីតម្លៃ នៃការទិញធានារ៉ាប់រង ព្រោះគម្រោងដែលមានការ ធនារ៉ាប់រងច្បាស់លាស់ ជាគំរោងដែលតែងតែ ផ្តល់ទំនុកចិត្តដល់អតិថិជន៕