កំពង់ផែក្រុងព្រះសីហនុនឹងប្រើប្រព័ន្ធផ្លាស់ប្តូរទិន្នន័យអេឡិចត្រូនិកដែលអាចទទួលការចូលចតនាវាធំៗបាន

ដោយៈ រ៉ាណេត

ព្រះសីហនុៈ កំពង់ផែក្រុងព្រះសីហនុ គ្រោងនឹងប្រើប្រព័ន្ធផ្លាស់ប្ដូរទិន្នន័យអេឡិចត្រូនិកថ្មី (Port EDI) ដែលអាចជួយសម្រួលដល់នីតិវិធីចេញ ចូលរបស់នាវាធំៗផ្ទុកទំនិញធុនធ្ងន់រហូតដល់ប្រមាណ៦ម៉ឺនតោន ស្មើនឹងប្រមាណ៩៣ភាគរយ នៃចំនួននាវាប្រចាំតំបន់អាស៊ី-ប៉ាស៊ីហ្វិក។

រដ្ឋលេខាធិកាក្រសួងសាធារណការ និងដឹកជញ្ជូន លោករស់ វណ្ណា បានមានប្រ សាសន៍ឲ្យដឹង នៅថ្ងៃទី១៥ ខែធ្នូ ឆ្នាំ២០២០ថា ការប្រើប្រាស់ប្រព័ន្ធព័ត៌មានវិទ្យា Port EDI ក្នុងការជួយសម្រួលដល់នីតិវិធីចេញ- ចូលកំពង់ផែកម្ពុជា សម្រាប់នាវាដឹកជញ្ជូនទំនិញអន្តរជាតិធំៗ សំដៅគ្រប់គ្រងសេវាដឹកជញ្ជូនតាមផ្លូវទឹក ប្រកបដោយប្រសិទ្ធភាព តម្លាភាព ចំណេញពេលវេលា និងកាត់បន្ថយការចំណាយផ្សេងៗ ជាពិសេសបង្កើនការទាក់ទាញការវិនិយោគផ្ទាល់ពីបរទេស និងបង្កើតការងារធ្វើជូនពលរដ្ឋកម្ពុជាផងដែរ។

លោកបញ្ជាក់ថា “គម្រោងPort EDIដែលជួយឱ្យការធ្វើជំនួញ តាមផ្លូវទឹកមានប្រសិទ្ធភាព និងតម្លាភាពកាន់តែខ្ពស់នេះ គឺជាគម្រោងជំនួយរបស់រដ្ឋាភិបាលជប៉ុន តាមរយៈទីភ្នាក់ងារសហប្រតិបត្តិការអន្តរជាតិជប៉ុន។ ក្រៅពីនេះ ក៏មានការផ្តល់ជំនួយផ្នែកហិរញ្ញវត្ថុ និងបច្ចេកទេសផងដែរ”។

ជាមួយនឹងគម្រោងនៃការអនុវត្ត ការប្រើប្រាស់ប្រព័ន្ធផ្លាស់ប្ដូរទិន្នន័យអេឡិចត្រូនិកថ្មី (Port EDI) កម្ពុជាក៏គ្រោងនឹងពង្រីកសមត្ថភាព កំពង់ផែស្វយ័តក្រុងព្រះសីហនុបន្ថែមទៀត តាមរយៈការកសាងចំណតផែកុងតឺន័រថ្មីមួយ ដែលមានជម្រៅទឹក១៤,៥ម៉ែត្រ ប្រវែង៣៥០ម៉ែត្រ ដែលនឹងធានាដល់ការចូលចតនាវាដឹកកុងតឺន័រខ្នាតធំៗ មានចំណុះរហូតដល់ទៅ៦០.០០០តោនឬស្មើនឹង៩៣ភាគរយ នៃចំនួននាវាប្រចាំតំបន់អាស៊ី-ប៉ាស៊ីហ្វិកនៅដើមឆ្នាំ២០២៣ ដើម្បីឆ្លើយតបទៅនឹងការកើនឡើង នៃបរិមាណកុងតឺន័រ ឆ្លងកាត់កំពង់ផែមួយនេះ ក្នុងពេលបច្ចុប្បន្ន និងនាពេលអនាគត ដែលនឹងក្លាយទៅជាកំពង់ផែលំដាប់ថ្នាក់ខ្នាតមធ្យម ដែលនឹងមានបរិមា ណកុងតឺន័រឆ្លងកាត់លើសពី១លានTEUsក្នុងមួយឆ្នាំ។

ដោយឡែកសម្រាប់តម្លៃដឹកជញ្ជូនតាមសមុទ្រនៅកម្ពុជា នឹងកាន់តែចុះទាបប្រហាក់ប្រហែល នឹងថ្លៃដឹកជញ្ជូនតាមសមុទ្រនៃប្រទេសជិតខាង ដោយកន្លែងចំណតកំពង់ផែ ជាច្រកសេដ្ឋកិច្ចជាតិមួយយ៉ាងសំខាន់ ក្នុងការដោះដូរទំនិញ ផលិតផលកសិកម្មនិងកសិ-ឧស្សាហកម្មរបស់កម្ពុជា ទៅកាន់ទីផ្សារអន្តរជាតិផងដែរ៕

រដ្ឋាភិបាលគ្រោងសាងសង់ផ្លូវរថភ្លើងថ្មីតភ្ជាប់ពីព្រលានយន្ដហោះថ្មីនៅខេត្តកណ្តាល-មកកាន់រាជធានីភ្នំពេញ

ដោយៈ រ៉ាណេត

ភ្នំពេញៈ រដ្ឋាភិបាលកម្ពុជាបានបង្ហាញ ពីគម្រោងសាងសង់ផ្លូវដែកថ្មីចំនួនខ្សែទៀត សម្រាប់តភ្ជាប់ពីព្រលានយន្ដហោះអន្តរជាតិភ្នំពេញថ្មី ចូលមកកាន់រាជធានីភ្នំពេញដើម្បីសម្រួលការដឹកជញ្ជូន បញ្ចៀសការកកស្ទះចរាចរណ៍។

ប្រធាននាយកដ្ឋានព័ត៌មាវិទ្យា និងទំនាក់ទំនងសាធារណៈនៃក្រសួងសាធារណៈការ និងដឹកជញ្ជូន លោក ហ៊ាង សុទ្ធាយុត្តិ បានមានប្រសាសន៍ប្រាប់គេហទំព័រ Property Area Asia នៅព្រឹកថ្ងៃទី១៦ ខែធ្នូ ឆ្នាំ២០២០នេះថា គម្រោងសាងសង់ផ្លូវដែកតភ្ជាប់ពីព្រលានយន្តហោះអន្តរជាតិ-ភ្នំពេញថ្មី មកកាន់រាជធានីភ្នំពេញ ត្រូវបានលើកឡើងដោយរដ្ឋមន្ត្រីក្រសួងសាធារណៈការ និងដឹកជញ្ជូនស៊ុន ចាន់ថុលកាលពីពេលកន្លងទៅ។

លោកបន្តថា “គម្រោងនេះ គឺជាទស្សនៈវិស័យរបស់ថ្នាក់ដឹកនាំ ដើម្បីចូលរួមចំណែកកាត់បន្ថយតម្លៃដឹកជញ្ជូន កាត់បន្ថយគ្រោះថ្នាក់ចរាចរណ៍”។ លោកបន្តថា “មកទល់ពេលនេះគម្រោងនេះ មិនទាន់ត្រូវបានសិក្សាលម្អិតនៅឡើយនោះទេ។ ក្រសួងក៏ដូចរាជរដ្ឋាភិបាល កំពុងសម្លឹងរកដៃគូដើម្បីចូលរួមសិក្សាលម្អិត និងអនុវត្តគម្រោងនេះ”។

ពាក់ព័ន្ធទៅនឹងការលើកឡើង ពីគម្រោងនៃការសាងសង់ផ្លូវដែក តភ្ជាប់ពីព្រលានយន្ដហោះអន្តរជាតិភ្នំពេញថ្មី មកកាន់រាជធានីភ្នំពេញ ដូចដែលបានលើកឡើងខាងលើនេះ សាធារណជនមួយចំនួនបានបង្ហាញពីក្ដីបារម្ភ និងលើកជាសំណូមពរថា ប្រសិនបើគម្រោងសាងសង់ផ្លូវដែកនេះ ត្រូវបានអនុវត្តគួរណាស់កុំប្រើផ្លូវដែកបែបបុរាណ ដែលអាចបង្កជាគ្រោះថ្នាក់ និងគ្មានសុវត្ថិភាព ផាសុកភាពនោះទេ ដែលជាបទពិសោធន៍ផ្លូវដែកតភ្ជាប់ពីព្រលានយន្តហោះពោធិ៍ចិនតុង មកកាន់រាជធានីភ្នំពេញ ដែលទើបត្រូវបានរុះរើចេញវិញកាលពីពេលកន្លងទៅថ្មីៗនេះ ដែលក្រៅពីមិនអាចសម្រួលការដឹកជញ្ជូន ការធ្វើដំណើរ ថែមទាំងខាតបង់ថវិការរបស់រដ្ឋថែមទៀត៕

សូមគោរពជូនពរ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបានក្រហមកម្ពុជា ក្នុងឱកាសខួបកំណើតគម្រប់៦៦ឆ្នាំ ឈានចូល ៦៧ឆ្នាំ

សារលិខិតជូនពរសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ពីសមាគមអចលទ្រព្យសកល

សម្តេចកិត្តិព្រឹទ្ធបណ្ឌិត ជាទីគោរពដ៏ខ្ពង់ខ្ពស់
នៅឱកាសដ៏ប្រពៃថ្លៃថ្លាប្រកបដោយមហាក្ខត្តប្ញក្ស ឧត្តុងឧត្តម នៃ ខួបកំណើតគម្រប់៦៦ឆ្នាំ ឈានចូល៦៧ឆ្នាំ របស់សម្តេចកិត្តិព្រឹទ្ធបណ្ឌិត ប្រធានកាកបាទក្រហមកម្ពុជា សូមគោរពជូន នូវសព្ទសាធុការពរបវរសួស្តី សិរីមង្គល វិបុលសុខ មហាប្រសើរ ចូលមានដល់សម្តេចកិត្តិព្រឹទ្ធបណ្ឌិត សូមមានសុខភាពបរិបូរណ៍ កម្លាំងពលំមាំមួន ជន្មាយុយឺនយូរ ដើម្បីបន្តដឹកនាំស្ថាប័នកាកបាទក្រហមកម្ពុជាឆ្ពោះទៅកាន់វឌ្ឍនភាពក្នុងការបំពេញ បេសកកម្មដ៏ឧត្តុង្គឧត្តមរបស់ សម្តេចកិត្តិព្រឹទ្ធបណ្ឌិត ចំពោះប្រជាជនកម្ពុជា និងប្រទេសជាតិ។

យើងខ្ញុំទាំងអស់គ្នា សូមគោរពកោតសរសើរដោយស្មោះអស់ពីដូងចិត្ត ចំពោះ សម្តេចកិត្តិព្រឹទ្ធបណ្ឌិត ដែលជានិច្ចកាលបានលះបង់ថវិកា កម្លាំងកាយចិត្ត និងប្រាជ្ញាស្មារតី ប្រកបដោយគុណធម៌ និងមនុស្សធម៌ របស់ សម្តេចកិត្តិព្រឹទ្ធបណ្ឌិត ក្នុងការចូលរួមចំណែកដ៏មានតម្លៃថ្លៃថ្លាដោះស្រាយទុក្ខលំបាក និង ជួយសង្គ្រោះបានទាន់ពេលវេលា និងគ្រប់កាលៈទេសៈ ចំពោះចាស់ជរាគ្មានទីពឹង ទុរគតជន កុមារកំព្រា ជនគថ្លង់ យុទ្ធជនរបួស ជនពិការ និងជនរងគ្រោះដោយសារគ្រោះធម្មជាតិ និងគ្រោះមហន្តរាយផ្សេងៗ ជាមួយនឹងរាជរដ្ឋាភិបាលកម្ពុជា។ យើងខ្ញុំទាំងអស់គ្នា មានជំនឿជឿជាក់យ៉ាងមុតមាំថា សម្តេចកិត្តិព្រឹទ្ធបណ្ឌិត គឺជាវីរកុលធិតាខ្មែរមួយរូបដ៏ឆ្នើម និងជាស្ត្រីទីមួយដែលប្រវត្តិសាស្ត្រកម្ពុជាមិនអាចបំភ្លេចបាន ហើយកត់ត្រាទុកសម្រាប់ជាគំរូវីរភាពដ៏ថ្លៃថ្លាដល់កូនខ្មែរជំនាន់ក្រោយសម្រាប់រៀនសូត្រតាម។

ឆ្លៀតក្នុងឱកាសដ៏នក្ខត្តប្ញក្សវិសេសវិសាលនេះ យើងខ្ញុំទាំងអស់គ្នាសូមលើកហត្ថបួងសួងដល់គុណព្រះរតនត្រ័យ និងវត្ថុស័ក្កិសិទ្ធ ទាំងឡាយគ្រប់ទិសទី សូមជួយតាមថែរក្សា និង ជួយជ្រោមជ្រែងប្រោះព្រំ សម្តេចកិត្តិព្រឹទ្ធបណ្ឌិត និង សម្តេចអគ្គមហាសេនាបតីតេជោ ព្រមទាំងក្រុមគ្រួសារ សូមសមប្រកបដោយពុទ្ធពរដ៏ឧត្តុងឧត្តមថ្លៃថ្លាទាំងបួនប្រការគឺ អាយុ វណ្ណៈ សុខៈ និងពលៈជានិច្ចនិរន្តរ៍។

សូម សម្តេចកិត្តិព្រឹទ្ធបណ្ឌិត ប្រធានកាកបាទក្រហមកម្ពុជា មេត្តាទទួលនូវអភិវន្ទនកិច្ចគោរពដ៏ខ្ពង់ខ្ពស់និងគោរពសេចក្តីស្រឡាញ់ដ៏ជ្រាវជ្រៅបំផុតពីខ្ញុំទាំងអស់គ្នា។

ថ្ងៃ អង្គារ ១កើត ខែ បុស្ស ឆ្នាំជូត ទោស័ក ព.ស ២៥៦៤
រាជធានីភ្នំពេញ ថ្ងៃទី ១៥ ខែធ្នូ ឆ្នាំ២០២០
លោក សំ សុខនឿន ប្រធានសមាគមអចលនទ្រព្យសកល

World Bank៖ សេដ្ឋកិច្ចរបស់កម្ពុជានឹងរើបឡើងវិញក្នុងឆ្នាំ២០២១ បន្ទាប់ពីរងការប៉ះទង្គិចខ្លាំងពីការរាតត្បាតជំងឺជាសាកល

ដោយ៖ ប៊ី
ភ្នំពេញ៖ ស្របពេលដែលសេដ្ឋកិច្ចរបស់កម្ពុជាបន្តរងគ្រោះដោយសារឥទ្ធិពលនៃការរាតត្បាតជំងឺកូវីដ១៩ មានសញ្ញាជាច្រើនបង្ហាញថាសកម្មភាពសេដ្ឋកិច្ចកំពុងចាប់ផ្តើមកម្រើកឡើងវិញហើយ។

សេដ្ឋកិច្ចត្រូវបានព្យាករថានឹងរួញទំហំប្រមាណដក ២ភាគរយក្នុងឆ្នាំ២០២០ ប៉ុន្តែត្រូវបានរំពឹងទុកថានឹងងើបឡើងវិញហើយលូតលាស់បានប្រហែលជិត៤ភាគរយ ក្នុងឆ្នាំ២០២១។

ធនាគារពិភពលោកបានឱ្យដឹងដូច្នេះនៅក្នុងរបាយការណ៍មួយឈ្មោះ Restrained Recovery ស្តីពីបច្ចុប្បន្នភាពសេដ្ឋកិច្ចកម្ពុជា ដែលត្រូវបានផ្សព្វផ្សាយនៅថ្ងៃនេះ។

នៅពេលដែលមានការធូរស្រាលបន្តិចនៅក្នុងវិធានការរក្សាសុវត្ថិភាពសង្គម សកម្មភាពសេដ្ឋកិច្ចក្នុងស្រុកកំពុងតែវិលទៅរកប្រក្រតីភាពបន្តិចម្តងៗវិញ។

អន្តរាគមន៍ក្នុងកម្រិតដែលមិនធ្លាប់មានរបស់រដ្ឋាភិបាល បានជួយមួយផ្នែកក្នុងការទ្រទ្រង់ដល់ផ្នែកទទួលទានប្រើប្រាស់ឱ្យនៅស្ថិតស្ថេរ ហើយអតិផរណាក៏ស្ថិតនៅក្រោមការគ្រប់គ្រងជាប់ផងដែរ។ យោងតាមរបាយការណ៍ខាងលើនេះ លំហូរនៃការវិនិយោគផ្ទាល់ពីបរទេសទៅក្នុងគម្រោងក្រៅឧស្សាហកម្មកាត់ដេរនិងទៅក្នុងវិស័យកសិកម្មនៅតែបន្តកើនឡើង ទំនងជាដោយសារភាពទាក់ទាញរបស់កិច្ចព្រមព្រៀងពាណិជ្ជកម្មសេរីដែលកម្ពុជាកំពុងធ្វើជាមួយប្រទេសនានាក្នុងតំបន់។

ទោះបីជាការនាំចេញសរុបនៃផលិតផលកមន្តសាលបានរងការប៉ះទង្គិចពីការរាតត្បាតជំងឺនេះក៏ដោយ ក៏កំណើននៅតែបន្តមានក្នុងការនាំចេញផលិតផលរោងចក្រដទៃទៀត មានកង់, គ្រឿងបង្គុំអគ្គិសនី, និងគ្រឿងបន្លាស់រថយន្ត និងគ្រឿងផ្សំនានា ហើយការនាំចេញអង្ករនិងផលិតផលកសិកម្មផ្សេងទៀតនៅមានសន្ទុះខ្លាំងក្លា។ ជាមួយគ្នានេះ ទេសចរណ៍ក្នុងស្រុកបានជួយមួយផ្នែកក្នុងការធ្វើឱ្យឧស្សាហកម្មទេសចរណ៍និងការធ្វើដំណើរ កម្រើកឡើងវិញ។

លោកស្រី អ៊ីងហ្គូណា ដូប្រាចា នាយិកាគ្រប់គ្រងប្រចាំប្រទេសរបស់ធនាគារពិភពលោក មានប្រសាសន៍ថា៖ «ចក្ខុវិស័យកំណើនរបស់កម្ពុជានៅប្រឈមនឹងភាពមិនប្រាកដប្រជាច្រើនណាស់។

គោលដៅដ៏សំខាន់បំផុតនៃគោលនយោបាយនាពេលនេះគឺ ជាបន្ទាន់ ត្រូវធ្វើយ៉ាងណាស្តារឡើងវិញនូវការងារដែលបាត់បង់ ឬដែលត្រូវព្យួរដោយសារតែការរាលដាលជំងឺនេះ។” លោកស្រីពោលបន្តទៀតថា៖ “ឆ្ពោះទៅពេលខាងមុខ ជាការចាំបាច់ដែលត្រូវជំរុញលើកទឹកចិត្តដល់ការវិនិយោគក្នុងស្រុកនិងពីបរទេសឱ្យទាញយកផលចំណេញពីកិច្ចព្រមព្រៀងពាណិជ្ជកម្មសេរីទ្វេភាគីនិងក្នុងតំបន់ដែលត្រូវបានបង្កើតឡើងកាលពីពេលថ្មីៗនេះ។

លទ្ធភាពនេះអាចធ្វើទៅរួចតាមរយៈការដាក់ចេញឱ្យបានឆាប់រហ័សនូវច្បាប់វិនិយោគមានភាពប្រកួតប្រជែង និងប្រការលើកទឹកចិត្តនានាដល់ការវិនិយោគ អមដោយវិធានការទាំងឡាយសំដៅបង្កភាពងាយស្រួលដល់ការធ្វើអាជីវកម្ម ផងដែរ។”

ក្នុងគោលបំណងជួយកម្ពុជាឱ្យឆាប់រើខ្លួនចេញពីការរាតត្បាតជំងឺនេះ ជាអនុសាសន៍ របាយការណ៍បានស្នើឱ្យបង្កើនការវិនិយោគសាធារណៈសម្រាប់ជួយដល់ជនក្រីក្រី និងសម្រាប់ជំរុញកំណើន រួមមានទាំងកម្មវិធីបង្កើតការងារជាថ្នូរយកប្រាក់កម្រៃប្រចាំថ្ងៃ (cash-for-work projects) ផង ហើយទន្ទឹមគ្នានេះ លើកកម្ពស់វិស័យអតិពលកម្មនានាដើម្បីបង្កើតការងារក្នុងឱកាសដែលមានការងើបឡើងឆាប់រហ័សនៃតម្រូវការទំនិញប្រើប្រាស់ក្នុងស្រុក។

របាយការណ៍ក៏បានលើកឡើងដែរនូវឱកាសនានាសម្រាប់សម្រួលការពង្រីកការវិនិយោគក្នុងស្រុកនិងពីបរទេស ដោយផ្អែកលើកិច្ចព្រមព្រៀងពាណិជ្ជកម្មសេរីទ្វេភាគីនិងក្នុងតំបន់ក្នុងពេលថ្មីៗនេះ រួមមាន កិច្ចព្រមព្រៀងពាណិជ្ជកម្មសេរីរវាងកម្ពុជានិងចិន និង កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP)។

របាយការណ៍នេះបានចង្អុលបង្ហាញដែរអំពីសារៈសំខាន់ចាំបាច់បំផុតនៃការរៀបចំបង្កើនឱ្យមានហេដ្ឋារចនាសម្ព័ន្ធរឹងមាំមួយសម្រាប់វ៉ាក់សាំងកូវីឌ១៩ ក៏ដូចជាការតាមដានឱ្យបានដិតដល់ផងដែរនូវភាពងាយរងគ្រោះផ្នែកសេដ្ឋកិច្ចដែលអាចបង្កដោយកំណើនអូសបន្លាយយូរពេករបស់វិស័យសំណង់ និងអចលនទ្រព្យ។

ការស្ទង់មតិតាមទូរស័ព្ទដែលធនាគារពិភពលោកបានធ្វើពីរដងក្នុងរយៈពេលកន្លងទៅ បានឱ្យដឹងថា ចំនួនអ្នកផ្តល់ចម្លើយដែលកំពុងធ្វើការក្នុងពេលស្ទង់មតិ មានការធ្លាក់ចុះពី៨២ភាគរយនៅពេលមានការផ្ទុះជំងឺកូវីដ១៩ដំបូង មកនៅត្រឹម៧១ភាគក្នុងខែឧសភា ឆ្នាំ២០២០ ហើយតួលេខនេះហាក់ដូចជានៅដដែលក្នុងខែសីហា ឆ្នាំ២០២០។

ការរាតត្បាតជំងឺនេះនៅតែបន្តជះផលអវិជ្ជមានទៅលើសកម្មភាពធុរកិច្ចដែលមិនមែនជាការដាំដុះ ប៉ុន្តែក្នុងសភាពមួយដែលមិនសូវធ្ងន់ធ្ងរណាស់ណាទេបើប្រៀបធៀបទៅនឹងពេលដែលវិបត្តិនេះបានផ្ទុះឡើងភ្លាមៗ។ ការបាត់បង់ចំណូលនៅតែមានទំហំធំធេងនៅឡើយ បើទោះជាការធ្លាក់ចុះចំណូលគ្រួសារថយល្បឿនបន្តិចវិញក្រោយពីរដ្ឋា
ភិបាលបានដាក់ចេញកម្មវិធីថ្មីមួយសម្រាប់ផ្ទេរសាច់ប្រាក់ទៅជួយគ្រួសារក្រីក្រ និងងាយរងគ្រោះ។

ការស្ទង់មតិទាំងនោះបង្ហាញថា ជិត៩០ភាគរយនៃក្រុមគ្រួសារដែលត្រូវបានកំណត់អត្តសញ្ញាណថាជាអ្នកក្រ បានរាយការណ៍ថាបានទទួលប្រាក់សង្គ្រោះនៅក្នុងខែសីហា និងកញ្ញា។

របាយការណ៍នេះមានជំពូកពិសេសមួយផ្តោតទៅលើ ការស្ទង់មតិលើសកម្មភាពធុរកិច្ចកម្ពុជា (Cambodia Business Pulse Surveys/BPS) ដែលត្រូវបានធ្វើឡើងសម្រាប់ស្វែងយល់អំពីផលប៉ះពាល់របស់កូវីដ១៩ ទៅលើធុរកិច្ច។

ការស្ទង់មតិលើសកម្មភាពធុរកិច្ចនេះត្រូវបានធ្វើជាមួយក្រុមហ៊ុនជាង ៥០០ក្រុមហ៊ុនពីខែមិថុនាដល់ខែកញ្ញា ហើយលទ្ធផលបង្ហាញថា អាជីវកម្មជាច្រើនបានបើកទ្វារឡើងវិញហើយតាំងពីខែមិថុនាមក។ យ៉ាងណាក្តី ការលក់នៅមានកម្រិតទាបខ្លាំង ពិសេសសម្រាប់អាជីវកម្មខ្នាតមីក្រូ តូច និងមធ្យម និងសម្រាប់បណ្តាក្រុមហ៊ុនជាច្រើននៅខេត្តសៀមរាប។

បច្ចុប្បន្នភាពសេដ្ឋកិច្ចកម្ពុជា គឺជារបាយការណ៍ចេញផ្សាយពីរដងក្នុងមួយឆ្នាំ ដើម្បីផ្តល់ព័ត៌មានបច្ចុប្បន្នភាពស្តីពីស្ថានភាពម៉ាក្រូសេដ្ឋកិច្ចរបស់កម្ពុជាក្នុងរយៈពេលខ្លី និងមធ្យម៕

គេហទំព័រ Cambodiafinancialtimes.com នឹងចាប់ផ្តើមផ្សព្វផ្សាយវីដេអូព័ត៌មាននិងចំណេះដឹងថ្មីៗនៅដើមឆ្នាំ២០២១

ដោយៈម៉ាណេត

ភ្នំពេញៈ គេហទំព័រ Cambodiafinancialtimes.com និងហ្វេកប៊ុកផេកផ្លូវការ Cambodia Financial Times នឹងចាប់ផ្តើមផ្សព្វផ្សាយវីដេអូ ទាក់ទងនឹងចំណេះដឹង និងព័ត៌មានហិរញ្ញវត្ថុ អចលនទ្រព្យនៅដើមឆ្នាំ២០១២១ខាងមុខនេះ។

ការផលិតវីដេអូថ្មីៗ នឹងផ្តោតលើមាតិកាសំខាន់ៗរបស់គេទំព័រនេះ រួមមានវិស័យធនាការ មីក្រូហិរញ្ញវត្ថុ អចលនទ្រព្យ ធានារ៉ាប់រង ផ្សារមូលបត្រ និងវិស័យ SMEs ជាដើម។

លោកស៊ុំ ម៉ាណេត និពន្ឋនាយកគេហទំព័រនេះ ដែលធ្លាប់បំពេញការងារនៅសារព៌តមាន Phnom Penh Post, Khmer Times ជាច្រើនឆ្នាំបានមានប្រសាសន៍ថា គោលបំណងនៃការផលិតវីដេអូថ្មីរបស់គេទំព័រ Cambodiafinancialtimes.com គឺដើម្បីចូលចំណែកផ្សព្វផ្សាយព័ត៌មានថ្មីៗ ទាក់ទងនឹងទិដ្ឋភាពសេដ្ឋកិច្ចទូទៅ ពិសេសវិស័យធនាគារ និងហិរញ្ញវត្ថុនៅកម្ពុជា អចលនទ្រព្យ និងចំណេះដឹងថ្មីៗទាក់ទងនឹងហិរញ្ញវត្ថុ ដោយយើងសង្ឃឹមថា ការចូលរួមទាំងនេះនឹងក្លាយជា ធាតុចូលសំខាន់ សម្រាប់ប្រជាជនកម្ពុជាយកធ្វើមូលដ្ឋាននៃការគិតក្នុងជីវិតរស់នៅប្រចាំថ្ងៃ។

លោកបន្តថា ហេតុនេះហើយ ក្រុមការងារគេហទំព័រយើងខ្ញុំ បានសម្រេចចិត្តរួមគ្នា ដើម្បីផលិតវីដេអូព័ត៌មាន និងចំណេះដឹងថ្មីៗ ដើម្បីបម្រើជូនប្រជាពលរដ្ឋកម្ពុជាសំរាប់ប្រើប្រាស់ជាចំណេះដឹង ដែលអាចយកទៅវិភាគពិចារណា និងប្រើប្រាស់ក្នុងជីវិតប្រចាំថ្ងៃ ក៏ដូចជាប្រើប្រាស់ជាព៌តមាន ដែលអាចទុកចិត្តបាន មុនសម្រេចចិត្តលើការវិនិយោគអ្វីមួយ។

គេហទំព័រ Cambodiafinancialtimes.com ទើបតែចាប់ផ្តើមបោះជំហ៊ាន ក្នុងវិស័យព័ត៌មាននៅកម្ពុជា ប៉ុន្តែយើងមានធនធានមនុស្ស ដែលមានចំណេះដឹង ជំនាញ បទពិសោធន៍ខ្ពស់។

លោកស៊ុំ ម៉ាណេត បានបន្តថា “យើងទៅមុខជាមួយចំណេះដឹង និងចក្ខុវិស័យច្បាស់លាស់ ដើម្បីជាការតបស្នងដល់សង្គម។ យើងស្វាគមន៍ការរួមបញ្ចូលនូវមូលធនបញ្ញា តាមរយៈការរិះគន់ប្រកបដោយស្ថាបនា ហើយយើងរីករាយធ្វើការជាមួយអ្នកធុរកិច្ចនានា ដើម្បីផ្សព្វផ្សាយពីគុណតម្លៃ និងសេវាកម្មរបស់ពួកគេ” ។

ជាមួយគ្នានេះ យើងឈរលើមូលដ្ឋានជោគជ័យ និងឈ្នះ ឈ្នះទាំងអស់គ្នា ជាអ្វីដែលយើងទន្ទឹងរង់ចាំជាមួយសេវាកម្ម និងការគាំទ្រពីសម្តេច ឯកឧត្តម លោកជំទាវ អ្នកឧកញ៉ា លោកឧកញ៉ាទាំងអស់ដោយក្តីរីករាយ៕

សហភាពអឺរ៉ុបកំពុងធ្វើច្បាប់សេវាកម្មឌីជីថលដើម្បីគ្រប់គ្រងក្រុមហ៊ុនបច្ចេកវិទ្យាធំៗ

ដោយសុខុម

អន្តរជាតិ: សហភាពអឺរ៉ុប គ្រោងនឹងបញ្ចេញសំណើច្បាប់ថ្មីៗ ដែលខ្លួននិយាយថានឹង “ពិនិត្យមើលឡើងវិញ” ចំពោះទីផ្សារឌីជីថល ដោយក្នុងនោះរួមទាំងរបៀបក្រុមហ៊ុនបច្ចេកវិទ្យាធំៗដំណើរការផងដែរ។ នេះបើយោងតាមសារព័ត៌មាន BBC ចុះផ្សាយកាលពីថ្ងៃទី១៥ ធ្នូ។

សំណើច្បាប់ចំនួន២ គឺច្បាប់សេវាកម្មឌីជីថល (Digital Services Act) និងច្បាប់ទីផ្សារឌីជីថល (Digital Markets Act) នឹងត្រូវប្រកាសនៅថ្ងៃអង្គារ ទី១៥ ធ្នូកន្លងមកនេះ។ គេរំពឹងថា នេះជាកំណែទម្រង់ច្បាប់ធំបំផុត ជាប្រវត្តិសាស្ត្រក្នុងរយៈពេល២០ឆ្នាំមកនេះ ដោយផ្តោតលើការប្រកួតប្រជែង និងការធ្វើឱ្យ Platform អនឡាញមានការទទួលខុសត្រូវចំពោះខ្លឹមសារដែលខ្លួនបានបង្ហោះ។

នៅក្នុងសំណើច្បាប់ទាំងនេះ ក៏ទំនងជាមានចែងអំពីការផាកពិន័យធ្ងន់ធ្ងរ ចំពោះអ្នកបំពានផងដែរ។

សំណើច្បាប់ទាំងនេះ ត្រូវបានដឹកនាំតាក់តែង ដោយលោកស្រីឧត្ដមស្នងការMargrethe Vestager ជនជាតិដាណឺម៉ាក និងលោកឧត្ដមស្នងការ Thierry Breton ជនជាតិបារាំង ដែលមានប្រវត្តិធ្លាប់បញ្ចេញវោហារសាស្ត្រធ្ងន់ៗ ប្រឆាំងក្រុមហ៊ុនបច្ចេកវិទ្យាធំៗបំផុត។

កាសែត The Irish Times ដែលចុះផ្សាយកាលពីថ្ងៃអាទិត្យកន្លងទៅ បានដកស្រង់សម្ដីរបស់ឧត្ដមស្នងការទាំងពីរ ដែលបានព្រលយពាក្យថា “ផលប្រយោជន៍ពាណិជ្ជកម្ម និងគោលនយោបាយរបស់ក្រុមហ៊ុនមួយក្ដាប់តូច មិនគួរជាអ្នកកំណត់អនាគតរបស់យើងឡើយ” ។

តាមការរំពឹងទុក ផ្នែកដ៏សំខាន់មួយនៃសំណើច្បាប់នេះ នឹងដោះស្រាយការមានឥទ្ធិពលលុបលើគេ ក្នុងរូបភាពមិនត្រឹមត្រូវរបស់ក្រុមហ៊ុនធំៗ ដូចជា ក្រុមហ៊ុន Google និង Facebook ដែលមានមូលដ្ឋាននៅសហរដ្ឋអាមេរិកជាដើម។

ជាពិសេស ឧត្ដមស្នងការសហភាពអឺរ៉ុបបានគូសបញ្ជាក់ថា ខ្លួនប្រឆាំងនឹងក្រុមហ៊ុនធំៗបែបនេះ ដែលប្រើប្រាស់ទិន្នន័យខ្លួន ប្រមូលបានពីសេវាកម្មមួយ “ដើម្បីកែលម្អ ឬអភិវឌ្ឍ” ទៅជាទម្រង់ថ្មី ដែលធ្វើឱ្យក្រុមហ៊ុនផ្សេងៗ ពិបាកនឹងប្រកួតប្រជែងជាមូយក្រុមហ៊ុនធំៗទាំងនោះ។

ឧត្ដមស្នងការសហភាពអឺរ៉ុប និយាយថា ច្បាស់ណាស់ថា ក្រុមហ៊ុនបែបនេះ “ជាអ្នកកំណត់ច្បាប់លេងហ្គេម សម្រាប់អ្នកប្រើប្រាស់ និងគូប្រជែងរបស់ខ្លួន” ៕

រដ្ឋាភិបាលកំពុងអភិវឌ្ឍនប្រព័ន្ធហេដ្ឋារចនាសម្ព័ន្ធនិងភូមិឋានតំបន់អភិវឌ្ឍន៍ត្រីកោណ CLV

ដោយវុត្ថា

ភ្នំពេញៈ រដ្ឋាភិបាលបាននឹងកំពុងអភិវឌ្ឍន៍ ប្រព័ន្ធហេដ្ឋារចនាសម្ព័ន្ធ និងភូមិឋានរបស់ប្រជាពលរដ្ឋកម្ពុជា នៅតំបន់អភិវឌ្ឍន៍ត្រីកោណ កម្ពុជា-ឡាវ-វៀតណាម (CLV DTA ) ឱ្យមានការរីកចំរើនបន្ថែមទៀត ស្របតាមចក្ខុវិស័យនៃប្រទេសទាំង៣នេះ។

លោកផៃ ស៊ីផានអ្នកនាំពាក្យនៃរាជរដ្ឋាភិបាលកម្ពុជា បានប្រាប់ឱ្យដឹងកាលពីពេលថ្មីៗនេះថា រដ្ឋាភិបាលបានអភិវឌ្ឍន៍ ដូចជា រៀបចំប្រព័ន្ធហេដ្ឋារចនាសម្ព័ន្ធនានា ដូចផ្លូវថ្នល់ និងភូមិឋានរបស់ជាពលរដ្ឋ ដែលជាគោលនយោបាយរបស់រាជរដ្ឋាភិបាលកម្ពុជា ក្នុងការធ្វើឱ្យតំបន់នេះមានការរីកចំរើន ។

លោកបន្តថា “រដ្ឋាភិបាលមានផែនការអភិវឌ្ឍន៍ នៅតាមព្រំដែនឱ្យក្លាយជាព្រំដែនសហប្រតិបត្តិការ និងការអភិវឌ្ឍន៍ ក្នុងន័យដើម្បីសម្រួលដល់ពាណិជ្ជកម្ម វិនិយោគ និងដោះដូរទំនិញរវាងប្រទេសជិតខាងឱ្យមានភាពរលូន និងកំណើនសេដ្ឋកិច្ច” ។

លោកផៃ ស៊ីផាន បន្ថែមថា ជាមួយនឹងការដាក់ចេញផែនការអភិវឌ្ឍ កម្ពុជាក៏អាចរក្សាបាននូវកិច្ចការពារព្រំដែន ឱ្យមានភាពរឹងមាំបន្ថែមទៀត ព្រោះមានប្រព័ន្ធហេដ្ឋារចនាសម្ព័ន្ធតភ្ជាប់ខ្វាត់ខ្វែង ប្រជាពលរដ្ឋរស់នៅ និងធ្វើអាជីវកម្មនៅតាមព្រំដែន នៃប្រទេសទាំងបីនេះ ស្របផែនការចក្ខុវិស័យកិច្ចសហប្រតិបត្តិការសេដ្ឋកិច្ច ។

លោកបន្ថែមទៀតថា រដ្ឋាភិបាលក៏បានដាក់ចេញផែនការ ឱ្យមានការអភិវឌ្ឍន៍គម្រោងកាស៊ីណូ នៅតាមព្រំដែន ដែលអាចផ្តល់ឱកាសការងារជូនដល់ពលរដ្ឋ ដែលជាកម្មករហើយទទួលបានចំណូល សម្រាប់ទ្រង់ទ្រងជីវភាពគ្រួសារ ហើយតំបន់នេះ (CLV) បាននឹងកំពុងក្លាយទៅជាតំបន់សេដ្ឋកិច្ចដ៏សំខាន់ផងដែរ ។

រដ្ឋាភិបាលនៃប្រទេសទាំងបី កម្ពុជា-ឡាវ-វៀតណាម (CLV DTA) បានអនុម័តផែនការអភិវឌ្ឍន៍ទេសចរណ៍តំបន់អភិវឌ្ឍន៍ត្រីកោណ (CLV DTA) នៅក្នុងកិច្ចប្រជុំលើកទី១១ តាមរយៈប្រព័ន្ធវីដេអូ Conference កាលពីពេលថ្មីនេះ។ វាជាឯកសារយុទ្ធសាស្ត្រតំបន់ ដែលភ្ជាប់ការអភិវឌ្ឍន៍វិស័យទេសចរណ៍នៃខេត្តចំនួន១៣ ក្នុងប្រទេសកម្ពុជា (ខេត្តចំនួន ៤: ក្រចេះ ស្ទឹងត្រែង រតនគិរី:គីរី និងមណ្ឌលគីរី) ឡាវ (ខេត្តចំនួន ៤) និងវៀតណាមខេត្ត(ចំនួន៥) ក្នុងចក្ខុវិស័យដើម្បីប្រែក្លាយតំបន់អភិវឌ្ឍន៍ត្រីកោណ ជាតំបន់សមាហរណកម្ម ក្នុងការអភិវឌ្ឍន៍គោលដៅទេសចរណ៍ ប្រកបដោយនិរន្តភាព និងការទទួលខុសត្រូវ លើកកម្ពស់គុណភាពសេវាកម្ម ក្នុងអេកូទេសចរណ៍ កសិទេសចរណ៍ សហគមន៍ទេសចរណ៍ ទេសចរណ៍ផ្សងព្រេង និងបេតិកភ័ណ្ឌ ដែលចូលរួមចំណែកដល់ការលើកកម្ពស់ជីវភាពរស់នៅ របស់ប្រជានក្នុងប្រទេសកម្ពុជា ឡាវ និងវៀតណាម។

ក្របខណ្ឌកិច្ចសហប្រតិបត្តិការ តំបន់ត្រីកោណអភិវឌ្ឍន៍ កម្ពុជា-ឡាវ-វៀតណាមត្រូវបានបង្កើតឡើង ក្នុងគោលបំណងនៃការបង្កើតកិច្ចសហប្រតិបត្តិការ អភិវឌ្ឍតំបន់ CLV ក្រោមគំនិតផ្តួចផ្តើម ប្រមុខរដ្ឋាភិបាលនៃប្រទេសទាំងបី កាលពីឆ្នាំ១៩៩៩ ។

តាមរយៈកិច្ចសហប្រតិបត្តិការ អភិវឌ្ឍតំបន់ត្រីកោណ CLV គឺកម្ពុជា មានខេត្ត រតនគីរី មណ្ឌលគិរី ស្ទឹងត្រែង និងក្រចេះ នឹងក្លាយជាប៉ូលសេដ្ឋកិច្ចថ្មីសម្រាប់កម្ពុជា តាមយៈការតភ្ជាប់ហេដ្ឋារចនាសម្ព័ន្ធ និងលំហូរចូលនៃភ្ញៀវទេសចរ៕

ហេដ្ឋារចនាសម្ព័ន្ឋចំនួន៣ ធ្វើឲ្យប្រែប្រួលតម្លៃសេដ្ឋកិច្ចនៅភូមិភាគធំៗចំនួនពីរនៅកម្ពុជា

ដោយស៊ីវ ម៉េង

ភ្នំពេញៈ ជាមួយនឹងការដាក់ចេញផែនការសមាហរណកម្មប្រទេស និងសមាហរណកម្មតំបន់និមួយៗឲ្យកាន់តែខិតជិតគ្នា ដើម្បីជំរុញកំនើនសេដ្ឋកិច្ច រដ្ឋាភិបាលបានដាក់ទុនយ៉ាងច្រើនដើម្បីកសាង និងតភ្ជាប់ហេដ្ឋារចនាសម្ព័ន្ឋពីតំបន់មួយទៅតំបន់មួយ។

ផ្លូវជាតិលេខ៥

ជាមួយនឹងការកសាងហេដ្ឋារចនាសម្ព័ន្ឋស្នូលសំខាន់ៗ សំរាប់សេដ្ឋកិច្ចជាតិ រដ្ឋាភិបាលមានគោលដៅ ប្រែក្លាយតំបន់ជាប់ផ្លូវជាតិលេខ៥ ជាសួនអភិវឌ្ឍន៍វិស័យឧស្សាហកម្ម ដើម្បីទទួលផលប្រយោជន៍៍ពីការដឹកជញ្ជូនទំនិញឆ្លងកាត់ពីប្រទេសថៃ តភ្ជាប់ជាមួយកម្ពុជា និងឆ្ពោះទៅកាន់ប្រទេសវៀតណាម។

បច្ចុប្បន្ននេះ ក្រោមហិរញ្ញប្បទានសម្បទានរបស់រដ្ឋាភិបាលជប៉ុន ក្រុមហ៊ុនជប៉ុនបាននិងកំពុងពង្រីកការសាងសង់ និងពង្រីកផ្លូវជាតិលេខ៥ជាពីរគន្លងរថយន្ត ដើម្បីសម្រួលការដឹកទំនិញ។

ការពង្រីកផ្លូវនេះ នឹងផ្តល់ផលប្រយោជន៍ ដល់បណ្តាខេត្តនៅតាមផ្លូវនេះ ដូចជាខេត្តបន្ទាយមានជ័យ បាត់ដំបង ពោធិសាត់ តភ្ជាប់មកកាន់កំពង់ឆ្នាំង រាជធានីភ្នំពេញ ឆ្ពោះទៅកាន់ខេត្តស្វាយរៀង ព្រំប្រទល់ប្រទេសវៀតណាម ដែលនេះជាយុទ្ឋសាស្ត្រនៃការអភិវឌ្ឍន៍តាមយុទ្ឋសាស្ត្រត្បូង ត្បូងរបស់អាស៊ាន។

ខ្សែរថភ្លើងតភ្ជាប់ពីប្រទេសថៃ មកកាន់រាជធានីភ្នំពេញ

គំរោងតភ្ជាប់ការដឹកជញ្ជូន តាមផ្លួវដែកពីប្រទេសថៃ មកកាន់ព្រំដែនកម្ពុជា ប៉ោយប៉ែតបាននិងកំពុងដំណើរការផងដែរ ប៉ុន្តែសេវាកម្មនេះមិនទាន់រលូននៅឡើយ ដោយសារបញ្ហានិតិវិធី និងបញ្ហាបច្ចេកទេស ដោយសាររថភ្លើងកម្ពុជារត់បានល្បឿនយឺតៗ ដោយសារកង្វះការវិនិយោគលើផ្នែកនេះឲ្យបានជាដុំកំភួន។

ការតភ្ជាប់ផ្លូវដែករវាងប្រទេសថៃ និងកម្ពុជាជាផ្នែកមួយនៃយុទ្ឋសាស្ត្រតភ្ជាប់អាស៊ានឆ្នាំ២០២៥ខាងមុខ ប៉ុន្តែការធ្វើសមាហរណកម្មនេះ ទទួលបានផលប្រយោជន៍ និងលឿនកម្រិតណា វាអាស្រ័យលើធនធាន និងឆន្ទះនយោបាយរបស់មេដឹកនាំកម្ពុជា ថៃក៏ដូចជាមេដឹកនាំអាស៊ាន។

ផ្លូវជាតិលេខ១០

ការស្ថាបនាផ្លូវជាតិលេខ១០ ដែលមានប្រវែងជិត២០០គីឡូម៉ែត្រ បាននិងកំពុងធ្វើឡើងយ៉ាងសកម្ម ដែលនេះជាផ្លួវប្រវត្តិសាស្ត្រលើកដំបូង ដែលជាការធ្វើសមាហរណកម្មតំបន់ដីគោក ទៅកាន់តំបន់ឆ្នេរ ដ៏មានសក្តានុពលទាំងធនធានធម្មជាតិ និងការដឹកជញ្ជូន។

អ្នកនាំពាក្យក្រសួងសាធារណៈការ និងដឹកជញ្ជូនលោកវ៉ាស៊ីម សូរិយា បានថ្លែងថា ការកសាងផ្លូវនេះរបស់រដ្ឋាភិបាល មិនត្រឹមតែជាការធ្វើសមាហរណកម្មផ្ទៃក្នុងកម្ពុជានោះទេ ប៉ុន្តែវាជាការលើកកំពស់ឯករាជ្យភាពផ្នែកសេដ្ឋកិច្ចកម្ពុជាផងដែរ តាមរយៈការកាត់បន្ថយការពឹងផ្អែកប្រទេសជិតខាង។

លោកបន្តថា “តំបន់ភូមិភាគពាយ័ព្យ ជាតំបន់ពោរពេញដោយកសិផល ដែលពិបាកក្នុងការដឹកជញ្ជូនទទៅកាន់ប្រទេសទី៣ ហេតុនេះការកសាងផ្លូវជាតិលេខ១០ នឹងជួយសម្រួល ការដឹកជញ្ជូនកសិផលចេញពីតំបន់នេះ ឆ្ពោះទៅកាន់កំពង់ផែទឹកជ្រៅដែលជិតបញ្ចប់ការសាងសង់នៅខេត្តកោះកុង” ។ លោកបន្តថា “កំពង់ផែនេះ នឹងអាចដឹកជញ្ជូនទំនិញ ក៏ដូចជាកសិផលកម្ពុជាទៅកាន់ប្រទេសទី៣ ដោយកាត់បន្ថយការពឹងផ្អែកប្រទេសជិតខាង” ។

ផ្លូវជាតិលេខ១០ តភ្ជាប់ពីស្រុកសំឡូតខេត្តបាត់ដំបង ឆ្ពោះមកកាន់ខេត្តពោធិសាត់ និងឆ្ពោះត្រង់មកកាន់ខេត្តកោះកុង ដែលវាជាផ្លូវលើកដំបូង ដែលតភ្ជាប់ពីតំបន់ភូមិភាគពាយ័ព្យទៅកាន់តំបន់ឆ្នេរ ហើយអ្នកនៅតំបន់ពាយ័ព្យចង់ទៅកាន់តំបន់ឆ្នេរ មិនចាំបាច់ចំណាយពេលយូរឡើយ៕

ក្រុមហ៊ុន Econpile ទទួលបានកិច្ចសន្យាបុកគ្រឹះតម្លៃជិត ១០០លានដុល្លារលើ មជ្ឈមណ្ឌលកម្សាន្តដ៏ធំនៅកម្ពុជា

ដោយៈសុខុម

ក្រុងគូឡាឡាំពួរៈក្រុមហ៊ុន Econpile Holdings Bhd ដែលមានឯកទេសខាងខួង និងបុកគ្រឹះ ទើបតែទទួលបានកិច្ចព្រមព្រៀងមួយ ក្នុងទំហំទឹកប្រាក់រហូតដល់ទៅ ៨៥,៧ លានដុល្លារអាមេរិក (៣៤៧,៦ លានរីងហ្គីតម៉ាឡេស៊ី) ។

ទឹកប្រាក់នេះ នឹងទទួលបានពីប្រតិបត្តិការសម្រាប់ការងារខួង និងបុកគ្រឹះសម្រាប់គម្រោងសាងសង់ មជ្ឈមណ្ឌលកម្សាន្តដ៏ធំមួយនៅរាជធានីភ្នំពេញ ប្រទេសកម្ពុជា(ទំនងជាគំរោង Naga3)។ នេះបើយោងតាមគេហទំព័រ TheEdgeMarkets ចុះផ្សាយកាលពីថ្ងៃទី១៥ ធ្នូកន្លងមកនេះ។

ទោះជាយ៉ាងណាក្រុមហ៊ុននេះ មិនបានបញ្ជាក់ថា គំរោងមជ្ឈមណ្ឌលកំសាន្តដ៏ធំនៅរាជធានីភ្នំពេញ ជាសកម្មសិទ្ឋរបស់ក្រុមហ៊ុនណានោះទេ។

ក្រុមហ៊ុននេះបានបញ្ជាក់ថា ក្រុមហ៊ុនបុត្រសម្ព័ន្ធដែលខ្លួន បានកាន់កាប់ទាំងស្រុង Econpile (M) Sdn Bhd ទទួលបានកិច្ចសន្យានេះកាលពីថ្ងៃទី១៤ ធ្នូ ពីក្រុមហ៊ុនចិន MCC International Inc Ltd។

យោងតាមកិច្ចសន្យា គម្រោងនេះនឹងត្រូវបញ្ចប់ក្នុងរយៈពេល៣០ខែ គិតចាប់ពីកាលបរិច្ឆេទចាប់ផ្ដើម ហើយគេរំពឹងថាវានឹងរួមចំណែកជាវិជ្ជមាន ដល់ប្រាក់ចំណូលរបស់ក្រុមហ៊ុន សម្រាប់ការបញ្ចប់ឆ្នាំសារពើពន្ធនៅថ្ងៃទី៣០ មិថុនា ឆ្នាំ២០២១ (ឆ្នាំសារពើពន្ធ ២០២១) តទៅ។

ក្រុមហ៊ុននេះបានបន្ថែមថា “គ្មានហានិភ័យអ្វីធំដុំនោះទេ ក្រៅពីហានិភ័យប្រតិបត្តិការពាក់ព័ន្ធនឹង គម្រោងអំឡុងរយៈពេលនៃកិច្ចសន្យា។ គណៈគ្រប់គ្រងនឹងដាក់ចេញវិធានការគ្រប់គ្រង និងនីតិវិធីប្រតិបត្តិការ ដើម្បីកាត់បន្ថយផលប៉ះពាល់ ឬហានិភ័យដែលអាចកើតមានព្រឹត្តិការណ៍បែបនេះ” ។

យោងតាមគេហទំព័រដដែលឱ្យដឹងថា ភាគហ៊ុនក្នុងក្រុមហ៊ុន Econpile បានហក់ឡើង ០,៩១% នៅក្នុងការជួញដូរពេលព្រឹក ធ្វើឱ្យវាកើនតម្លៃរហូតដល់ ៧៤២,៣១ លានរីងហ្គីត ហើយជាលទ្ធផល៦លានភាគហ៊ុនរបស់ក្រុមហ៊ុននេះត្រូវបានជួញដូរ៕

ការលក់លំនៅឋានរបស់ក្រុមហ៊ុនឯកជននៅក្នុងប្រទេសសឹង្ហបុរីសម្រេចបានកំនើន១៨,៩ភាគរយ

ដោយៈវុត្ថា

សឹង្ហបុរីៈ ការលក់លំនៅឋានរបស់ក្រុមហ៊ុនអភិវឌ្ឍន៍ឯកជន នៅក្នុងប្រទេសសឹង្ហបុរីបានកើនឡើងប្រមាណ១៨,៩ ភាគរយកាលពីខែវិច្ឆិកា ដោយសារមានគម្រោងថ្មីរបស់អ្នកអភិវឌ្ឍន៍បានចាប់ផ្តើម ខណៈបើធៀបទៅនឹងខែតុលា នៃឆ្នាំនេះមានការថយចុះ ។

យោងតាមរបាយការណ៍ពីអាជ្ញាធរអភិវឌ្ឍន៍ទីក្រុង (URA) របស់ប្រទេសសឹង្ហបុរី បានបង្ហាញកាលពី១៥ ខែធ្នូកន្លងមកនេះបានឲ្យដឹងថា ក្រុមហ៊ុនអភិវឌ្ឍន៍ឯកជនបានលក់បានលំនៅឋានបានចំនួន៧៦៧ យូនីតកាលពីខែវិច្ឆិកា ដោយមិនរាប់បញ្ចូលខុនដូ(ECs) ដែលស្មើនឹង១៨,៩ភាគរយ ។

របាយការណ៍ដដែលបន្តថា ផ្ទះចំនួន៧៦៧យូនីតនៃការលក់ចេញនេះ ខ្ពស់ជាងខែតុលា ដែលមានចំនួនត្រឹមតែ៦៤៥យូនីត ប៉ុន្តែបើធៀបជាមួយនឹងឆ្នាំ២០១៩ មានការធ្លាក់ចុះ។

ភាគច្រើននៃការលក់កាលពីខែវិច្ឆិកា គឺស្ថិតនៅក្នុងតំបន់ Rest of Central Region មានំនួន ៤៤៧យូនីត ខណៈតំបន់ Outside Central Region មានចំនួន២៣៦យូនីត និងតំបន់ Core Central Region មានចំនួន៨៤យូនីត។

លោកស្រី Christine Sun ប្រធានផ្នែកស្រាវជ្រាវ និងប្រឹក្សាយោបល់នៅក្រុមហ៊ុន OrangeTee & Tie បានឱ្យដឹងថា បើទោះបីមានបញ្ហាប្រឈមទៅនឹងវិបត្តិជំងឺកូវីដ១៩ ក៏អ្នកស្វែងរកទីលំនៅឋាននៅតែបន្តមាន ព្រោះពួកគេរំពឹងថា សេដ្ឋកិច្ចនៅក្នុងប្រទេសសឹង្ហបុរីនឹងត្រូវស្តារឡើងវិញ និងមានកំណើនខ្ពស់នាពេលខាងមុខដ៏ខ្លី។

លោកស្រីថ្លែងថា“ អាជីវកម្ម និងសកម្មភាពសង្គមជាច្រើន ត្រូវបានគេរំពឹងថានឹងដំណើរការឡើងវិញ” ។ លោកស្រីបានបន្ថែមថា “កម្មវិធីចាក់ថ្នាំបង្ការរោគ ត្រូវបានរៀបចំឡើងនៅក្នុងប្រទេសជាច្រើន ក្នុងនោះមានប្រទេសសឹង្ហបូរីផងដែរ ដែលបានប្រកាសពីផែនការនៃការចាក់ថ្នាំបង្ការរោគ ដល់បុគ្គលិកថែទាំសុខភាពជួរមុខ និងអ្នកជំងឺដែលងាយរងគ្រោះ” ។

លោក Lee Hsien Loong នាយករដ្ឋមន្ត្រីនៃប្រទេសសឹង្ហបុរី កាលពីថ្ងៃចន្ទ បានថ្លែងនៅក្នុងសុន្ទរកថា តាមទូរទស្សន៍មួយថា ប្រទេសសិង្ហបុរីនឹងចូលដល់ដំណាក់កាលទី ៣ នៃការបើកដំណើរការសេដ្ឋកិច្ចជាថ្មីនៅថ្ងៃទី២៨ ខែធ្នូខាងមុខនេះ។

លោកបន្តថា “ប្រទេសសឹង្ហបុរីបានបញ្ជាទិញ ថ្នាំវាក់សាំងពីក្រុមហ៊ុន Pfizer និងក្រុមហ៊ុ BioNTech ដែលអាចនឹងដឹកមកដល់នៅបំណាច់ខែធ្នូនេះ” ៕