ដោយ ហ្សូលី

ភ្នំពេញ៖ សេដ្ឋកិច្ចពិភពលោកហាក់មានស្ថានភាពប្រសើរឡើង ដែលនេះជាលទ្ធផលល្អផ្ទុយពីការព្យាករណ៍របស់មូលនិធិរូបិយវត្ថុអន្តរជាតិ IMF កាលពីខែមិថុនា។ នេះបើតាមឱ្យដឹងពីអ្នកនាំពាក្យមូលនិធិរូបិយវត្ថុអន្តរជាតិ (IMF) កាលពីយប់ទី ២៤ ខែកញ្ញា។

អ្នកនាំពាក្យលោក Gerry Rice បានថ្លែងប្រាប់អ្នកយកព័ត៌មានថា ទិន្នន័យថ្មីបង្ហាញពីចក្ខុវិស័យសេដ្ឋកិច្ចពិភពលោកក្នុងផ្លូវវិជ្ជមាន ទោះបីកាលពីខែមិថុនាអាចមានលក្ខណៈមិនល្អប្រសើរនៅក្នុងវិស័យសេដ្ឋកិច្ចយ៉ាងណាក្តី។ IMF បានបង្ហើបថា ស្ថាប័នខ្លួននឹងដំឡើងការព្យាករណ៍សេដ្ឋកិច្ចនៅខែតុលាក្រោយ ឆ្នាំ ២០២០។

មេដឹកនាំ IMF លោកស្រី Kristalina Georgieva និងប្រធានសេដ្ឋវិទូ Gita Gopinath បានមានប្រសាសន៍ថា រដ្ឋាភិបាលគួរតែបន្តគាំទ្រដល់កម្មករ និងអាជីវកម្ម ព្រោះលក្ខណៈដែលមិនធ្លាប់មានពីមុនមកនៃវិបត្តិនេះអាចបង្កឱ្យមានភាពក្ស័យធននិងការបំផ្លាញការងារ។ ដើម្បីធានាថាការងើបឡើងវិញនៅតែបន្ត វាចាំបាច់ណាស់ដែលការរឹតបន្តឹងមិនត្រូវដកចេញភ្លាមៗទេ។

នៅពេលមេរោគឆ្លងត្រូវបានសាយភាយពាសពេញពិភពលោក សេដ្ឋវិទូត្រូវបានបង្ខំឱ្យធ្វើការពិនិត្យឡើងវិញនូវការព្យាករណ៍របស់ពួកគេចំពោះកំណើនសេដ្ឋកិច្ចពិភពលោក។ មូលនិធិរូបិយវត្ថុអន្តរជាតិ (IMF) គ្រោងនឹងធ្វើបច្ចុប្បន្នភាពទស្សនវិស័យសកលនៅថ្ងៃទី ១៣ ខែតុលា ខណៈអ្នកនាំពាក្យប្រចាំស្ថាប័នមិនបានបង្ហាញព័ត៌មានលម្អិតអំពីការព្យាករណ៍ថ្មីនៅឡើយ។

កាលពីខែមិថុនា មូលនិធិរូបិយវត្ថុអន្តរជាតិបាននិយាយថា ផលិតផលក្នុងស្រុកសរុបរបស់ពិភពលោកនឹងធ្លាក់ចុះ ៤,៩ ភាគរយ ហើយវីរុសនេះនឹងបំផ្លាញប្រាក់ចំនួន ១២ ទ្រីលានដុល្លារអាមេរិក ក្នុងរយៈពេល ២ ឆ្នាំ។ ទោះយ៉ាងណាប្រទេសចិន និងប្រទេសមានសេដ្ឋកិច្ចជឿនលឿនមួយចំនួន កំពុងមានដំណើរការបានល្អប្រសើរជាងការរំពឹងទុកក្នុងត្រីមាសទី ២ ឆ្នាំ ២០២០ ។

អ្នកនាំពាក្យ Gerry Rice បាននិយាយថា យើងកំពុងមើលឃើញសញ្ញានៃពាណិជ្ជកម្មពិភពលោកចាប់ផ្តើមងើបឡើងវិញយឺតៗ។ លោកមិនទាន់ហ៊ានប្រាកដថា ពិភពលោកនឹងធូរស្បើយ១០០ភាគរយទេ ប៉ុន្តែស្ថានភាពនេះស្ថិតនៅក្នុងការប្រឈមខ្លះ ហើយទីផ្សារកំពុងរីកចម្រើនអាចប្រឈមនឹងគ្រោះថ្នាក់នៅពេលណាមួយ។

សេដ្ឋកិច្ចវិទូព្រួយបារម្ភពីរលកទីពីរនៃការឆ្លងអាចបំផ្លាញដល់កំណើនសេដ្ឋកិច្ចពិភបលោក។ អាជីវកម្មនៅសហរដ្ឋអាមេរិកបន្តប្រឈមមុខនឹងបញ្ហានានា ប៉ុន្តែមូលនិធិនៅតែបន្តគាំទ្ររសារពើពន្ធបន្ថែមទៀតសម្រាប់សេដ្ឋកិច្ច៕ Strait Time

ដោយវុត្ថា
សៀមរាប៖ បើសិនជាគ្មានការប្រែប្រួលទេនោះ ផ្លូវទាំង៣៨ខ្សែនៅក្នុងក្រុងសៀមរាប និង ត្រូវបើកការដ្ឋានស្ថាបនាជាផ្លូវការដោយ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា នៅថ្ងៃទី១៦ខែវិច្ឆិកាឆ្នាំ២០២០ខាងមុខនេះ ។

នេះ គឺជាការលើកឡើងរបស់ លោក ទៀ សីហា អភិបាលខេត្តសៀមរាប នៅថ្ងៃទី ២៥ ខែកញ្ញា ឆ្នាំ ២០២០នេះ ដោយបានដកស្រង់ប្រសាសន៍របស់ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មការអន្តរក្រសួង ដើម្បីពិភាក្សា និងអនុវត្តគម្រោងស្ថាបនាហេដ្ឋារចនាសម្ព័ន្ធផ្លូវនៅខេត្តសៀមរាប ។

លោកថ្លែងថា ម៉្យាងទៀតនៅ ពេលដែលយើងកំពុងជួបវិបត្តិជម្ងឺកូវិដ១៩ យើងក៏មិនបន្ធូរក្នុងកិច្ចអភិវឌ្ឍន៍ប្រទេសឡើយ ហើយពេលនេះក៏ជាឱកាស មួយដ៏ល្អសម្រាប់ខេត្តសៀមរាប ក្នុងការរៀបចំស្តារឡើងវិញ នូវហេដ្ឋារចនាសម្ព័ន្ធផ្លូវថ្នល់ក្នុងក្រុងសៀមរាប ក្នុងការ ស្តារឡើងវិញលើវិស័យទេសចរណ៍ នៅតំបន់អង្គរយើងនេះ ។

លោកទៀ សីហា បន្ថែមថា សម្តេចពិជ័យសេនាបានបញ្ជាក់ទៀតថា សម្រាប់ការអនុវត្តគម្រោងស្ថាបនាហេដ្ឋារចនាសម្ព័ន្ធផ្លូវចំនួន៣៨ខ្សែ នៅក្រុងសៀមរាប ខេត្តសៀមរាបនេះ គ្រោងបញ្ចប់ឲ្យបានរួចរាល់នៅឆ្នាំ២០២១ខាងមុខនេះ។ សម្តេចក៏បានអំពាវនាវ និងថ្លែងអំណរគុណទុកជាមុននូវស្មារតីចូលរួមរបស់ប្រជាពលរដ្ឋទាំងការុះរើសំណង់ ឬផលប៉ះពាល់នានាក្នុងពេលចាប់ដំណើរការអនុវត្តគម្រោង។

ផ្លូវទំាង៣៨ខ្សែនៅក្នុងក្រុងសៀមរាបនឹងត្រូវធ្វើការស្ថាបនា និង កែលម្អឡើងវិញ ទាំងអស់នឹងត្រូវធ្វើឱ្យក្លាយទៅជាផ្លូវដែលមានមេត្រីភាព ជាមួយវប្បធម៌ ប្រវត្តិសាស្រ្ត និង ទេសចរណ៍ និងស្របតាមរូបសាស្រ្តទីក្រុង។ ផ្លូវទាំងអស់ត្រូវគិតគូរជាប្រព័ន្ធ និងលើគ្រប់ទិដ្ឋភាព មានជាអាទិ៍ ប្រព័ន្ធ លូទឹកកខ្វក់ លូទឹកភ្លៀង ចិញ្ចើមផ្លូវ ផ្លូវថ្មើរជើង ផ្លូវ សម្រាប់ជនមានពិការភាព ផ្លូវជិះកង់ ចំណតរថយន្ត ប្រព័ន្ធបំភ្លឺផ្លូវសាធារណៈ ផ្លាកសញ្ញានិងគំនូស ចរាចរណ៍ ប្រព័ន្ធកាមេរ៉ា សុវត្ថិភាព អាងចម្រោះទឹក កខ្វក់ និងការធ្វើសួន និងដាំដើមឈើ ។

លោកទៀ សីហា បន្ថែមថាសម្តេចពិជ័យសេនា បានជំរុញឱ្យតពន្លឿនការងាររៀបចំស្ថាបនាផ្លូវ៣៨ខ្សែដែល សម្តេច ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា បានប្រកាសបញ្ចេញកញ្ចប់ថវិកាជាតិចំនួន១៥០លានដុល្លារសម្រាប់ស្ថាបនានេះឲ្យបានលឿនជាទីបំផុត

លោកបន្ថែមថា ផ្លូវដែលបានកំណត់ហើយនោះ គឺមានបញ្ហាមួយចំនួនដែលត្រូវចាត់វិធានការដោះស្រាយឲ្យបានលឿន ហើយប្រជាពលរដ្ឋទៅសង់សំណង់លើដីផ្លូវ ដែលត្រូវអាជ្ញាធរធ្វើការជូនដំណឹងទៅដល់ពួកគាត់ឲ្យធ្វើការរុះរើចេញ ឲ្យបានឆាប់ផងដែរ ។ រាល់ផលប៉ះពាល់ដីរបស់បងប្អូនក្នុងការស្ថាបនាផ្លូវនេះ គឺបងប្អូនបានធ្វើកិច្ចសន្យាជាមួយអាជ្ញាធរហើយ ដែលមានភ្ជាប់ខ្លឹមសារនៅប័ណ្ណកម្មសិទ្ធិដីធ្លីដែលបងប្អូនបានកាន់កាប់នោះ ដែលជា ឯកសារមួយដ៏ត្រឹមត្រូវដែលរដ្ឋបានផ្តល់ជូន ។

គណៈកម្មការដែលមានសម្តេចពិជ័យសេនាទៀ បាញ់ ក៏បានអំពាវនាវឲ្យប្រជាពលរដ្ឋដែលបានសាងសង់សំណង់នៅលើដីផ្លូវរបស់រដ្ឋ គឺត្រូវប្រញាប់រុះរើឲ្យបានលឿនយ៉ាងយូររយៈពេល១៥ថ្ងៃ ទៅតាមការព្រមព្រៀងក្នុងដំណាក់កាលនីតិវិធីចុះបញ្ជីដីធ្លីលក្ខណៈជាប្រព័ន្ធថា នៅពេលរដ្ឋត្រូវការធ្វើផ្លូវពួកគាត់ និងរុះរើចេញដោយខ្លួនឯង៕

ដោយ ហ្សូ​លី

តូ​ក្យូៈ សភា​របស់​ប្រទេស​ជប៉ុន គ្រោង​នឹង​បញ្ជាក់​អំពី​ដំណែង​នាយករដ្ឋមន្ត្រី​ថ្មី​គឺ​លោក​យ៉ូ​ស៊ី​ហ៊ី ដេ​ស៊ូ​ហ្គា នៅ​សប្តាហ៍​នេះ ក្នុងនាម​ជា​នាយករដ្ឋមន្ត្រី​ថ្មី​របស់​ប្រទេស​ជប៉ុន។

លោក​នឹង​ចូលមក​ជំនួស​លោក ស៊ីន​ហ្សូ អា​បេ ដែល​បានប្រកាស​លាលែង​កាលពី​ខែ​មុន ដោយសារ​ហេតុផល​សុខភាព​បន្ទាប់ពី​បាន​កាន់តំណែង​ជិត៨ឆ្នាំ។

អ្នកសង្កេតការណ៍​ជប៉ុន និង​អន្តរជាតិ​កំពុង​សួរថា តើ​គោលការណ៍​នយោបាយ​សេដ្ឋកិច្ច​របស់​រដ្ឋាភិបាល​អា​បេ (ដែល​ត្រូវបាន​គេ​ដាក់ឈ្មោះថា “ Abenomics”) នឹងមាន​ការផ្លាស់ប្តូរ​យ៉ាងខ្លាំង​ឬ​នៅក្រោម​អំណាច លោក សូ​ហ្គា។

ចម្លើយ​គឺថា នឹងមាន​ផលប៉ះពាល់​ភូមិសាស្ត្រ​នយោបាយសំខាន់ៗ ព្រោះ​ប្រទេស​ជប៉ុន​នៅតែ​តស៊ូ ដើម្បី​ជំនះ​នូវ​ភាពអវិជ្ជមាន​ពី Covid-19 ហើយ​សុខភាព​សេដ្ឋកិច្ច​របស់​ប្រទេស​នេះ កំពុង​ក្លាយជា​ចំណុច​សំខាន់ នៅក្នុង​ការប្រឈមមុខ​ដាក់គ្នា កាន់តែ​តានតឹង រវាង​សហរដ្ឋអាមេរិក​និង​ចិន។

មនុស្ស​ជាច្រើន​នៅ​ខាងក្រៅ​ប្រទេស​ជប៉ុន អាច​សន្ម​ត់​ថា លោក​ស៊ូ​ហ្គា នឹង​ផ្លាស់ប្តូរ​តិចតួច ហើយ​គាត់​បានបង្ហាញ​ខ្លួន ដល់​គណបក្ស​ប្រជាធិបតេយ្យ​សេរី ដែល​កំពុងកាន់​អំណាច​ថា​ជា “ ការបន្ត” ដើម្បី​ជំនួស​លោក​អា​បេ។  នោះ​គឺ​ល្អ​បំផុត ដែល​លោក​អាច​លេង​បាន ដោយបាន​បម្រើការ​ជា​លេខាធិការ​គណៈរដ្ឋមន្ត្រី ដែលជា​តំណែង​ដ៏​មាន​ឥទ្ធិពល​បំផុត​ទី​ពីរ នៅក្នុង​ប្រទេស​ជប៉ុន សម្រាប់​ការកាន់កាប់​រយៈពេល​ប្រាំបី​ឆ្នាំ របស់លោក​អា​បេ។

ប្រសិនបើ​ជប៉ុន​ចង់​រក្សា​ជំហរ​ជា​សកល​របស់ខ្លួន លោក ស៊ូ​ហ្គា ត្រូវតែ​ធ្វើឱ្យ​ដាច់ខាត ពី​អ្នក​កាន់តំណែង​មុន និង​ម្ចាស់​ឧបត្ថម្ភ​របស់គាត់ ហើយ​បន្ត​កំណែទម្រង់រ​ចនាសម្ព័​ន្ធ​យ៉ាង​ទូលំទូលាយ។

ជាការ​ពិត ការកែលម្អ​ផលិតភាព​ទីផ្សារការងារ និង​បទ​ប្បញ្ញត្តិ​ច្បាប់​គឺ​ពិតជា​មធ្យោបាយ​តែមួយគត់ ដើម្បី​បង្កើន​កំណើនសេដ្ឋកិច្ច​របស់​ប្រទេស​ជប៉ុន។

នៅ​ចន្លោះ​ឆ្នាំ២០១៣ និង២០១៩ កំណើន​ទិន្នផល​សរុប​ប្រចាំឆ្នាំ ជា​មធ្យម​ត្រឹមតែ ១% និង​លើសពី២% ក្នុង​រយៈពេល​តែ ២ឆ្នាំ នៃ​រយៈពេល ៨ឆ្នាំ នៃ​ការ​កាន់តំណែង​ជា​នាយករដ្ឋមន្ត្រី​របស់​លោក​អា​បេ។

ផ្ទុយ​ពី​ទស្សនៈ​ធម្មតា​ដែលថា សេដ្ឋកិច្ច​ជប៉ុន​ប្រឈម​នឹង​បញ្ហា បណ្តាលមកពី​ប្រជាជន​វ័យ​ចំណាស់ និង​ចំនួន​កម្លាំង​ការងារ​ថយចុះ ចំនួន​ប្រជាជន​ដែលមាន​ការងារ​ធ្វើបាន​បន្ត​កើនឡើង​ពេញ​មួយឆ្នាំ ពីព្រោះ​ស្ត្រី​កាន់តែច្រើន​ចូលរួម​ក្នុង​កម្លាំង​ពលកម្ម។  ប៉ុន្តែ​ជាមួយ​អត្រា​ចូលរួម​កម្លាំង​ពលកម្ម​របស់​ស្ត្រី នៅ​ប្រទេស​ជប៉ុន នាពេល​បច្ចុប្បន្ន​ខ្ពស់ជាង​សហរដ្ឋអាមេរិក និន្នាការ​នេះ​អាច​នឹងមិន​បន្តទៀត​ទេ។

ពិតណាស់​ការជួយ​សង្គ្រោះ​កិច្ចព្រមព្រៀង​ពាណិជ្ជកម្ម ភាពជា​ដៃគូ​អន្តរ​ប៉ាស៊ីហ្វិក របស់​ប្រទេស​ជប៉ុន​ចំនួន១២ ប្រទេស​បន្ទាប់ពី​ការដក​សហរដ្ឋអាមេរិក ដោយ​ប្រធានាធិបតី​ដូ​ណា​ល់​ត្រាំ និង​កិច្ចព្រមព្រៀង​ពាណិជ្ជកម្ម​សេរី​នាពេលថ្មីៗនេះ ជាមួយ​សហភាព​អឺរ៉ុប​គឺជា​សមិទ្ធិផល​គួរឱ្យកត់សម្គាល់ និង​គួរឱ្យ​សរសើរ។

សុន្ទរកថា​ខ្លះ​របស់ Suga ក្នុងអំឡុង​យុទ្ធនា​ការឃោសនា ភាពជា​អ្នកដឹកនាំថ្មីៗនេះ​របស់លោក​សង្ឃឹមថា លោក​អាច​នឹង​ក្លាយជា​នាយករដ្ឋមន្ត្រី ដែល​ហ៊ាន និង​ក្លាហាន​ជាង​ការរំពឹងទុក។

ឧទាហរណ៍ Suga បាន​ស្វាគមន៍​យ៉ាងច្បាស់​នូវ​គំនិត នៃ​ការអនុញ្ញាតឱ្យ​អ្នកប្រកួតប្រជែង​ថ្មី​ចូល ក្នុង​វិស័យ​ដែលមាន​បទ​ប្បញ្ញត្តិ​យ៉ាងខ្លាំង ដូចជា ទូរគមនាគមន៍​ចល័ត និង​កសិកម្ម។

លោក​ក៏បាន​ប្រកាស​ពី​គោលបំណង​របស់លោក ក្នុង​ការបង្កើត​ទីភ្នាក់ងា​រ​ថ្មី​មួយ​ដែលមាន​ភារកិច្ច កែលម្អ​ហេដ្ឋារចនាសម្ព័ន្ធ​ឌីជីថល​របស់​រដ្ឋាភិបាល។

ឧបសគ្គ​ទី២របស់ Suga គឺ​ពង្រឹង​អំណាច​នៅក្នុង​គណបក្ស​របស់គាត់។  លោក​ត្រូវបាន​គេ​បោះឆ្នោត​ជ្រើសរើស ជា​មេដឹកនាំ​ដោយមាន​ការគាំទ្រ ពី​បក្សពួក​សមាជិកសំខាន់ៗរបស់​បក្ស ប៉ុន្តែ​មិនមែនជា​សមាជិក​របស់​ពួកគេ​ទេ។  នៅពេលដែល​លោក​បានតែងតាំង​គណៈរ​ដ្ឋ​មន្ត្រី ការប្រកួតប្រជែង​ផ្ទៃក្នុង និង​ការ​ប្រេះឆារ​ទំនងជា​នឹង​លេចចេញ​ជាថ្មី។

យុទ្ធសាស្ត្រ​ល្អ​បំផុត​របស់ Suga អាច​នឹង​ទៅរក​ការ​ឈ្នះ​ការបោះឆ្នោត​ទូទៅ ជាជាង​ការប្រកួតប្រជែង​របស់​គណបក្ស​ផ្ទៃក្នុង នឹង​ផ្តល់ឱ្យ​គាត់​នូវ​អាណត្តិ ដ៏​មាន​ប្រជាប្រិយភាព ដើម្បី​រៀបចំ​ផែនការ​វគ្គ​គោលនយោបាយ​សេដ្ឋកិច្ច​ដ៏​រឹងមាំ៕ World Economic Forum៕

ដោយវុត្ថា

ភ្នំពេញ៖ កម្ពុជា និងសហរដ្ឋអាមេរិក ប្តេជ្ញាររពង្រឹងកិច្ចសហប្រតិបត្តិការនិងការគាំទ្ររបស់អាមេរិក ដើម្បីជំរុញការអភិវឌ្ឍតំបន់ប្រេងកាតរួមគ្នារវាងកម្ពុជា និងថៃ និងកិច្ចប្រតិបត្តិការវិនិយោគលើវិស័យប្រេងកាតជាច្រើនផ្សេងៗទៀតនៅកម្ពុជា។

ការប្តេជ្ញារនេះ ត្រូវបានធ្វើឡើងនៅក្នុងកិច្ចពិភាក្សាងារកាលពីថ្ងៃទី២៣ ខែកញ្ញាឆ្នាំ ២០២០ម្សិលមិញនេះ រវាងលោក ស៊ុយ សែម រដ្ឋមន្ត្រីក្រសួងរ៉ែនិងថាមពល ជាមួយគណៈប្រតិភូក្រុមប្រឹក្សាធុរកិច្ចអាស៊ាន-អាមេរិក (US-ASEAN Business Council) ដោយមានការចូលរួមពីតំណាងស្ថានទូតសហរដ្ឋអាមេរិកប្រចាំកម្ពុជា និងក្រុមហ៊ុនវិនិយោគធំៗរបស់សហរដ្ឋអាមេរិកជាច្រើន។
យោងតាមរបាយការណ៍របស់កិច្ចប្រជុំបញ្ជាក់ថា ក្រុមហ៊ុនអាមេរិកធំៗទាំងនោះរួមមាន ក្រុមហ៊ុន Chevron ក្រុមហ៊ុន ConocoPhillips ក្រុមហ៊ុន Amazon ក្រុមហ៊ុន Bell Texton ក្រុមហ៊ុន Ford ក្រុមហ៊ុន Visa ជាដើមដែលបានពិភាក្សានេះ ផ្តោតលើប្រធានបទសំខាន់ៗរួមមាន៖
១. ការពង្រឹងកិច្ចសហប្រតិបត្តិការនិងការគាំទ្ររបស់អាមេរិក ដើម្បីជំរុញការអភិវឌ្ឍតំបន់ប្រេងកាតរួមគ្នារវាងកម្ពុជា និងថៃ
២. ឱកាសនៃការវិនិយោគប្រេង ឧស្ម័នធម្មជាតិ និងថាមពលកកើតឡើងវិញរបស់ក្រុមហ៊ុនអាមេរិក នៅកម្ពុជា
៣. ឱកាសពាណិជ្ជកម្មនៃការនាំចូលគ្រឿងបង្គំនិងគ្រឿងបរិក្ខារបស់ក្រុមហ៊ុនអាមេរិក សម្រាប់ប្រើប្រាស់ក្នុងការអភិវឌ្ឍហេដ្ឋារចនាសម្ព័ន្ធថាមពលអគ្គិសនី នៅកម្ពុជា
៤. ការស្វែងយល់អំពីវឌ្ឍនភាពនិងផែនការអភិវឌ្ឍថាមពល នៅកម្ពុជា ក្រោយការរងផលប៉ះពាល់ជំងឺ Covid-19
៥. ជំនួយបច្ចេកទេស និងប្រឹក្សាយោបល់របស់អាមេរិក ដើម្បីបន្តអភិឌ្ឍន៍វិស័យក្រសួង

លោក ស៊ុយ សែន រដ្ឋមន្ត្រីក្រសួងរ៉ែ និងថាមពល បានសម្តែងនូវការស្វាគមន៍យ៉ាងកក់ក្តៅ និងបង្ហាញអំពីជំហគាំទ្រដល់ ក្រុមហ៊ុនអាមេរិកទាំងអស់មកវិនិយោគនៅកម្ពុជា ឱ្យបានកាន់តែច្រើន ដើម្បីបន្តលើកស្ទួយនិងអភិវឌ្ឍន៍សេដ្ឋកិច្ចកម្ពុជា ឱ្យមានការរីកចំរើនបន្ថែមទៀត៕

ដោយ ៖ គង់ ម៉ាលីន

ភ្នំពេញ ៖ ក្រសួងសេដ្ឋកិច្ច និងហិរញ្ញវត្ថុ បានប្រកាសដាក់ឱ្យដំណើរការសន្ធានកម្មជាផ្លូវការរវាងប្រព័ន្ធបច្ចេកវិទ្យាព័ត៌មានសម្រាប់ការគ្រប់គ្រងហិរញ្ញវត្ថុសាធារណៈ និងប្រព័ន្ធគ្រប់គ្រងទិន្នន័យពន្ធដារ ដែលជាការសម្រេចបាននូវការងារទំនើបកម្ម និងស្វ័យប្រវត្តិកម្មថ្មីមួយទៀត។

ក្រសួងសេដ្ឋកិច្ច និងហិរញ្ញវត្ថុ តាមរយៈអគ្គនាយកដ្ឋានពន្ធដារ បានដាក់ឱ្យដំណើរការប្រព័ន្ធបច្ចេកវិទ្យាសម្រាប់គ្រប់គ្រងហិរញ្ញវត្ថុសាធារណៈ និងប្រព័ន្ធគ្រប់គ្រងទិន្នន័យពន្ធដារ ដែលជាការចែករំលែកទិន្នន័យចំណូលពន្ធដារ ទៅវិញទៅមករវាងប្រព័ន្ធគ្រប់គ្រងទិន្នន័យពន្ធដារ (MEF) និងប្រព័ន្ធគ្រប់គ្រងហិរញ្ញវត្ថុសាធារណៈ (FMIS)។

ប្រព័ន្ធនេះ មានមុខងារចំនួនពីរគឺ ៖ ១.ការបញ្ជូនទិន្នន័យចំណូលថវិកាចេញពីប្រព័ន្ធគ្រប់គ្រងទិន្នន័យពន្ធដារទៅប្រព័ន្ធ FMIS ជំនួសឱ្យការ ចេញក្រដាសសលាកបត្របង់ប្រាក់ចូលថវិកាជាតិ និងថ្នាក់ក្រោមជាតិ ដែលពីមុនត្រូវការពេលវេលា យូរ, ប្រើប្រាស់ក្រដាសស្នាម និងនីតិវិធីស្មុគ្រស្មាញជាច្រើន និងទី២.ការបញ្ជូនទិន្នន័យចំណូល ពន្ធដារដែលបានកាត់ទុកដោយអគ្គនាយកដ្ឋានរតនាគារជាតិ និងរតនាគាររាជធានី-ខេត្ត ចេញពី ប្រព័ន្ធ FMIS ទៅប្រព័ន្ធគ្រប់គ្រងទិន្នន័យពន្ធដារដោយបែងចែកយ៉ាងលម្អិតច្បាស់លាស់ទៅតាម ប្រភេទពន្ធ និងអាករនានា ។

ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានពន្ធដារ លោក គង់ វិបុល បានឱ្យដឹងថា រហូតមកដល់ពេល នេះអគ្គនាយកដ្ឋានពន្ធដារ សម្រេចបាននូវការងារទំនើបកម្មជាបន្តបន្ទាប់នានាក្នុងការពង្រឹងប្រព័ន្ធគ្រប់គ្រងចំណូលពន្ធដារ និងអាករនានា និងជាពិសេសប្រព័ន្ធផ្ដល់សេវាផ្សេងៗជូនអ្នកជាប់ពន្ធជាមួយនឹងការខិតខំប្រឹងប្រែងធ្វើសន្ធានកម្មទៅកាន់ប្រព័ន្ធនានារបស់រាជរដ្ឋាភិបាលរួមមាន៖ ប្រព័ន្ធប្រមូលពន្ធគយនិងអាកររបស់អគ្គនាយកដ្ឋានគយ និងរដ្ឋាករកម្ពុជា, ប្រព័ន្ធគ្រប់គ្រងមធ្យោបាយ យានយន្តរបស់ក្រសួងសាធារណការ និងដឹកជញ្ជូន ដែលនឹងសម្រេចបានក្នុងពេលដ៏ខ្លីខាងមុខ ពោលគឺដូចនឹងពេលនេះគឺសម្រេចបាននូវការតភ្ជាប់ជាមួយប្រព័ន្ធ FMIS ។

លោកបណ្ឌិតសភាចារ្យ ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ច និង ហិរញ្ញវត្ថុ និងជាប្រធានក្រុមការងារគ្រប់គ្រងគម្រោង FMIS បានគូសបញ្ជាក់ថា បើគិតមកដល់ពេល បច្ចុប្បន្ននេះ ប្រព័ន្ធ FMIS បានដាក់ឱ្យដំណើរការស្ទើរតែគ្រប់អង្គភាពស្នូលទទួលបន្ទុកហិរញ្ញវត្ថុ និង ថវិកានៅទូទាំងប្រទេស ដែលរួមមានអង្គភាពទទួលបន្ទុកហិរញ្ញវត្ថុនៃក្រសួង-ស្ថាប័នទាំងអស់, អង្គភាព ថវិកាអាណាប័កផ្ទេរសិទ្ធិពេញលេញ, មន្ទីរសេដ្ឋកិច្ច និងហិរញ្ញវត្ថុ និងរតនាគាររាជធានី-ខេត្តទាំង ២៥។

លោក បានថ្លែងទៀតថា លើសពីនេះ ប្រព័ន្ធ FMIS ក៏បានតភ្ជាប់ជាមួយប្រព័ន្ធផ្សេងៗជាច្រើនទៀត ក្នុងនោះមាន៖ ប្រព័ន្ធស្វ័យប្រវត្តិកម្មទិន្នន័យគយ និងប្រព័ន្ធអេឡិចត្រូនិកគយ,ប្រព័ន្ធធនាគាររបស់ធនាគារជាតិនៃ កម្ពុជា និងរបស់ធនាគារពាណិជ្ជដៃគូជាច្រើន, ប្រព័ន្ធគ្រប់គ្រងបំណុលសាធារណៈ និងប្រព័ន្ធគ្រប់ គ្រងចំណូលមិនមែនសារពើពន្ធ ។

លោកបន្តថា ការធ្វើសន្ធានកម្មប្រព័ន្ធទាំងពីរនេះគឺជាការសម្រេចបានដោយជោគជ័យ នូវផែនការគន្លឹះមួយនៃការងារកែទម្រង់ការគ្រប់គ្រងហិរញ្ញវត្ថុសាធារណៈរបស់រាជរដ្ឋាភិបាលដែលជាចក្ខុវិស័យដ៏មោះមុតរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីក្នុងការបង្កើនប្រសិទ្ធភាពដល់ការងារគ្រប់គ្រងការប្រមូលចំណូលថវិកាជាតិ, ការសន្សំសំចៃចំណាយថវិកាជាតិតាមរយៈការកាត់បន្ថយការប្រើប្រាស់ក្រដាស និង នីតិវិធីស្មុគ្រស្មាញនានា, ចូលរួម បង្កើនផលិតភាពការងាររបស់មន្ត្រីពន្ធដារ និងរតនាគារ និងជាពិសេសគឺការផ្ដល់ព័ត៌មានស្ដីពីចំណូល ថវិកាជាតិបានកាន់តែឆាប់រហ័ស៕