ដោយវុត្ថា
ភ្នំពេញ៖ ក្រុមហ៊ុន China Railway International Group Co., Ltd បានបង្ហាញរបាយការណ៍ស្តីពីលទ្ធផល នៃការសិក្សាបច្ចេកទេសនៃគម្រោងសាងសង់ហេដ្ឋារចនាសម្ព័ន្ធផ្លូវល្បឿនលឿនតភ្ជាប់ពីរាជធានីភ្នំពេញទៅក្រុងបាវិត បន្ទាប់ពីសិក្សារួចរាល។

យោងតាមរបាយការណ៍សិក្សារបស់ក្រុមហ៊ុនបានបង្ហាញនៅថ្ងៃទី៧ ខែកញ្ញា ឆ្នាំ២០២០ឱ្យដឹងថា គម្រោងសាងសង់ផ្លូវនេះមានបីជម្រើស ផ្អែកតាមទីតាំងភូមិសាស្ត្រនិងផលប៉ះពាល់ ជាផ្លូវរចនាឡើងសម្រាប់ល្បឿនលឿនបំផុតត្រឹម១២០គីឡូ ម៉ែត្រក្នុងមួយម៉ោងស្របតាមអនុស្សរណៈយោគយល់រវាងកម្ពុជា និងវៀតណាម។

លោក សូរ វិចទ័រ រដ្ឋលេខាធិការក្រសួងសាធារណការ និងដឹកជញ្ជូនឱ្យដឹងថា ក្រសួងក៏ដូចជារាជរដ្ឋាភិបាលត្រូវការសិក្សាពិនិត្យឱ្យបានគ្រប់ ជ្រុងជ្រោយលើជម្រើសផ្លូវទាំងបីនេះ មុននឹងធ្វើការសម្រេចថាតើត្រូវជ្រើសរើសយកជម្រើសផ្លូវមួយណា ជាពិសេស ក្រសួងរង់ចំាលទ្ធផលរបាយការណ៍សិក្សាផ្នែកហិរញ្ញវត្ថុពីក្រុមហ៊ុននៅពាក់កណ្ដាលខែតុលា ឆ្នាំ២០២០ខាងមុខនេះ ដើម្បីយកជាមូលដ្ឋានក្នុងការសម្រេចចិត្ត។

លោកបន្តថា ការជ្រើសរើសយកជម្រើសណាមួយនោះត្រូវផ្ដោត ជាសំខាន់លើក្របខណ្ឌនៃផលប៉ះពាល់សង្គម សេដ្ឋកិច្ច និងថវិកាសម្រាប់សាងសង់។ជាមួយគ្នានេះ លោករដ្ឋលេខាធិការបានសម្ដែងនូវការកោតសរសើរ ចំពោះការធ្វើ បទបង្ហាញរបស់ក្រុមហ៊ុន និងស្ថាប័នពាក់ព័ន្ធទាំងអស់ដែលបានផ្ដល់ធាតុចូលយ៉ាងសំខាន់ និងមានតម្លៃបំផុតដើម្បីឱ្យការរៀបចំរបាយការណ៍ស្តីពីលទ្ធផលនៃសិក្សាគម្រោងផ្នែកបច្ចេកទេស នៃគម្រោងសាងសង់ ផ្លូវល្បឿនលឿនភ្នំពេញ-បាវិតនេះកាន់តែមានលក្ខណៈគ្រប់ជ្រុងជ្រោយ។

លោកក៏បានបានស្នើឱ្យភាគី និងស្ថាប័នពាក់ព័ន្ធ បន្តចូលរួមកិច្ចប្រជុំប្រចាំខែលើការពិនិត្យ វឌ្ឍនភាពគម្រោងនេះ ដើម្បីផ្ដល់កិច្ចសហការ និងជួយដោះស្រាយនូវបញ្ហាមួយចំនួនដែលក្រុមហ៊ុនមិន អាចដោះស្រាយបានសំដៅឱ្យគម្រោងនេះមានដំណើរការរលូន៕

ដោយ ៖ រ៉ាណេត

កោះកុង ៖ រដ្ឋបាលខេត្តកោះកុង និងមន្ត្រីស្ថាប័នពាក់ព័ន្ធបានបើកកិច្ចប្រជុំ និងពិភាក្សាទៅលើផែនការអាទិភាពក្នុងការគ្រប់គ្រងធនធាននៅតាមតំបន់ឆ្នេរតាមបែបសមាហរណកម្ម ដើម្បីរក្សាបាន និងទាញផលប្រយោជន៍សម្រាប់វិស័យទេសចរណ៍។

អភិបាលរងខេត្តកោះកុង លោក អ៊ុក ភ័ក្រ្តា នៅថ្ងៃទី៧ ខែកញ្ញា ឆ្នាំ២០២០ នេះ បានដឹកនាំកិច្ចប្រជុំពិភាក្សារវាងលេខាធិការដ្ឋាន គ.អ.ឆ.ក ខេត្ត និងអង្គការ IUCN ស្តីពី ការសិក្សាស្វែងយល់ពីវឌ្ឍនភាព យុទ្ធសាស្រ្ត និងផែនការអាទិភាពគ្រប់គ្រងធនធាន តំបន់ឆ្នេរតាមបែបសមាហរណកម្ម នៅខេត្តកោះកុង ។

លោកបានបញ្ជាក់ថា ដើម្បីអនុវត្តគោលនយោបាយ និងការគ្រប់គ្រងតំបន់ឆ្នេរសមុទ្រកម្ពុជាប្រកបដោយចីរភាពទាមទាឲ្យគ្រប់ភាគីពាក់ព័ន្ធទាំងអាជ្ញាធរមូលដ្ឋាន មន្ទីរអង្គភាពជំនាញ ដៃគូអភិវឌ្ឍន៍ និងវិស័យឯកជន ត្រូវមានចំណេះដឹងទាក់ទងនឹងគោលនយោបាយ និងឯកសារគតិយុត្តទៅលើការគ្រប់គ្រងតំបន់ឆ្នេរ សមុទ្រ និងចូលរួមសហការយ៉ាងពេញទំហឹងលើការគ្រប់គ្រងតំបន់ឆ្នេរសមុទ្រកម្ពុជាប្រកបប្រសិទ្ធភាព។

លោក អ៊ុក ភ័ក្រ្តា បានបន្តទៀតថា តាមរយៈកិច្ចខិតខំប្រឹងប្រែងរបស់លេខាធិការដ្ឋាន គ.អ.ឆ.ក រដ្ឋបាលខេត្ត បានបោះពុមុ្ភនូវសៀវភៅ យុទ្ធសាស្ត្រតំបន់ឆ្នេរខេត្តកោះកុង ដែលមានចក្ខុវិស័យប្រែក្លាយ ខេត្តកោះកុង ឲ្យទៅជាទីក្រុងបៃតង ឆ្នេរស្អាត សមុទ្រខៀវស្រងាត់ ដែលសំបូរទៅដោយធនធានធម្មជាតិ និងជីវចម្រុះ ដើម្បីធានាបាននូវ ការអភិវឌ្ឍប្រកបដោយចីរភាព និងបរិយាប័ន្ន។

ក្នុងចំណោមឆ្នេរសមុទ្រប្រទេសកម្ពុជាដែល មានប្រវែងប្រហែល៤៤០គីឡូម៉ែត្រ ខេត្តកោះកុង ត្រូវបានដឹងថាជាខេត្ត ដែលមានឆ្នេរវែងជាងគេគឺប្រហែល ២៣៧គីឡូម៉ែត្រ ដោយលាតសន្ធឹងចាប់ពីចំណុចចាំយាម ឃុំប៉ាក់ខ្លង ស្រុកមណ្ឌលសីមា ព្រំប្រទល់ជាប់នឹងខេត្តត្រាតប្រទេសថៃ ដល់ឃុំជ្រោយស្វាយ ស្រុកស្រែអំបិលព្រំប្រទល់ជាប់នឹងខេត្តព្រះសីហនុ។ ដៅយឡែកកោះ នៅក្នុងលម្ហសមុទ្រមាន២៣ និងកោះនៅក្នុងព្រែកមាន១២ សរុប៣៥កោះ៕

ដោយវុត្ថា

ភ្នំពេញៈ បណ្តាមេដឹកនាំកំពូងអាស៊ី អឺរ៉ុបបានអះអាងពីការប្តេជ្ញាចិត្តក្នុងការរក្សាខ្សែសង្វាក់ផ្គត់ផ្គង់ ដែលមានភាពធន់ បើកចំហ និងការតភ្ជាប់កាន់តែសកម្ម ដើម្បីវិបុលភាពតំបន់ និងពិភពលោក។ នេះបើតាមសេចក្តីថ្លែងការណ៍កិច្ចប្រជុំកំពូលអាស៊ី-អឺរ៉ុបលើកទី១៣ (ASEM) ដែលបានបិទកិច្ចកិច្ចប្រជុំកំពូលនៅថ្ងៃទី ៧ ខែកញ្ញា ឆ្នាំ២០២០នេះ។

 ទោះបីជាដៃគូASEM អនុវត្តន៍នូវវិធានការណ៍វិសាមញ្ញ ក្នុងការការពារ ស្វែងរក គ្រប់គ្រង និងឆ្លើយតបទៅនឹងការរីករាលដាលនៃជំងឺកូវីដ១៩ យ៉ាងណាក៏ដោយ ក៏នៅតែបន្តប្តេជ្ញាធ្វើការឆ្ពោះទៅរកបរិយាកាសមួយ មានលក្ខណៈបើកចំហ សេរី យុត្តិធម៌ និងគ្មានការរើសអើង ដែលផ្តល់ស្ថានភាពស្មើភាព និងមិនលំអៀង តម្លាភាព និងផលប្រយោ​ជន៍ទៅវិញទៅមក សម្រាប់ការធ្វើពាណិជ្ជកម្ម និងវិនិយោគ។

នៅក្នុងសេចក្តីថ្លែងការណ៍រួមរបស់កិច្ចប្រជុំកំពូលអាស៊ី-អឺរ៉ុបលើកទី១៣ (ASEM) ក្រោយកិច្ចប្រជុំ នៅថ្ងៃទី ៧ ខែកញ្ញា ឆ្នាំ២០២០នេះបញ្ជាក់ថា  ASEM ត្រូវការខ្សែសង្វាក់ផ្គត់ផ្គង់ដែលកាន់តែធន់ និងមានពិធិធកម្ម គឺមានភាពចាំបាច់ដើម្បីទប់ទល់នឹងស្ថានភាពវិបត្តិផ្សេងៗ នាពេលអនាគត។

សេចក្តីថ្លែងការណ៍សរសេរថា “យើងបន្តធានានូវលំហូទំនិញ និងសេវាកម្មសំខាន់ៗឆ្លងកាត់ព្រំដែន ក៏ដូចជាការចែកចាយជាសកល និងសមស្របចំពោះទំនិញ និងសេវាកម្មទាំងនោះ ដោយមិនឱ្យមានការរាំងស្ទះអ្វីឡើយ “។

សេចថ្លែងការណ៍បន្តថា “យើងនឹងធ្វើការយ៉ាងជិតស្និទ្ឋ ដើម្បីដោះស្រាយរាល់ការរាំងស្ទះ ដល់ផ្នែកផ្គត់ផ្គង់ដែលត្រូវការសម្រាប់សុខភាព និង សុខមាលភាព របស់ប្រជាជនទាំងអស់។ យើងជំរុញឱ្យរក្សាអន្តរទំនាក់ទំនងចាំបាច់នានា នៅក្នុងតំបន់ដោយជួយសម្រួ​លដល់បំលាស់ទីជាចាំបាច់រស់ប្រជាជន និងទំនិញក្នុងកិច្ចការមនុស្សធម៌ វិទ្យាសាស្ត្រ ព្រមទាំងសកម្មភាពធុរកិច្ចសំខាន់ៗ នៅក្នុងកម្រិតដែលប៉ះពាល់ ដល់កិច្ចខិតខំប្រឹងប្រែងគ្រប់គ្រងជំងឺរបស់ប្រទេសនីមួយៗ”។

សេចក្តីថ្លែងការណ៍ដដែលបន្ថែមថា យើងក៏នឹងបន្តរួមគ្នា ដើម្បីរក្សា និងសម្រួលដល់ពាណិជ្ជករអន្តរជាតិ តាមរយៈអង្គការពាណិជ្ជកម្មពិភពលោក និងសម្របសម្រួ​លដល់ការឆ្លើយតបនានា ដែលធានានូវដំណើរការចរាចរណ៍អន្តរជាតិ និងហេដ្ឋារចនាស   ម្ព័ន្ធដឹកជញ្ជូនសំខាន់ៗ ដូចជាផ្លូវអាកាស និងកំពង់ផែបន្តប្រតិបត្តិការរបស់ខ្លួន ក៏ដូចជាការបន្តលំហូរទំនិញ ស្របពេលកំពុងយកចិត្តទុកដាក់តាមដានសុវត្ថិភាព  និងសុខភាពសាធារណៈ។

វិធានការណ៍សម្រាប់ស្ថានភាពអាសន្ននានា ដែលបង្កើតឡើងសម្រាប់ប្រយុទ្ធប្រឆាំងនឹងជំងឺកូវីដ ១៩ រួមទាំងការរឹតត្បិតការធ្វើដំណើរ ប្រសិនបើចាំបាច់ត្រូវមានគោលដៅជាក់លាក់ តុល្យភាព តម្លាភាព និងមានលក្ខណៈបណ្តោះអាសន្នតែប៉ុណ្ណោះ ។

វិធានការណ៍សម្រាប់ស្ថានភាពអាសន្នទាំងនេះ មិនគួរបង្កើតរបាំងពាណិជ្ជកម្មដែលមិនចាំបាច់ ឬរាំងស្ទះដល់ខ្សែច្រវ៉ាក់ផ្គត់ផ្គង់សកនោះទេ ហើយគួរតែអនុលោមតាមច្បាប់របស់អង្គការពាណិជ្ជកម្មពិភពលោក។ ការរឹតត្បិតការធ្វើដំណើរនានា គួរតែជូនដំណឹ​ងដល់អង្គការសុខភាពពិភពលោក ស្របតាមបទបញ្ញត្តិសុខភាពអន្តរជាតិ (២០០៥)។

ASEM  ក៏ទទួលស្គាល់នូវតួនាទីដ៏សំខាន់ របស់សហគ្រាសខ្នាតមីក្រូតូច និងធម្យម ក្នុងសកម្មភាពសេដ្ឋកិច្ច របស់ប្រទេសយើងទាំងអស់គ្នា។ យើងជំរុញឱ្យអនុវត្តនូវវិធានការសមស្របនានា ដើម្បីបង្កើនទំនុកចិត្ត និងលើកកម្ពស់ស្ថិរភាពសេដ្ឋកិច្ច តាមរយៈគោលនយោបាយជំរុញសេដ្ឋកិច្ចការជួយប្រជាជន និងធុរកិច្ចដែលកំពុងរងផលប៉ះពាល់ដោយសារជំងឺកូវីដ១៩ ជាពិសេសនោះ គឺជួយសហគ្រាសខ្នាតមីក្រូតូច និងធម្យម ក៏ដូចជាប្រជាជនក្រីក្រ និងជនងាយរងគ្រោះបំផុត៕

ដោយៈហ្សូលី

ភ្នំពេញៈ ខេត្តព្រះសីហនុ បច្ចុប្បន្នប្រៀបបីដូចជា តួឯកកំពុងរះយ៉ាងត្រចះត្រចង់ នៅក្នុងប្រទេសកម្ពុជា និងសម្រាប់តំបន់អាស៊ីអាគ្នេយ៍។ វិនិយោគិនជាច្រើន ពិសេសជនជាតិចិនបាននាំគ្នាចំណាយថវិកាជាច្រើនលានដុល្លារ មកវិនិយោគលើវិស័យសំខាន់ៗក្នុងការលើកស្ទួយមុខមាត់ខេត្តព្រះសីហនុ។

ចំនុចពិសេសដែលទាក់ទាញវិនិយោគិន សម្រេចចិត្តក្នុងការបោះទុនជាបន្តបន្ទាប់ បណ្តាលមកពីសក្តានុពលពិសេសចំនួន៣ ដូចជា៖

ការរីកចម្រើននៃវិស័យអចលនទ្រព្យ

វិនិយោគិនជាច្រើនទាំងក្នុងស្រុក និងក្រៅស្រុកដូចជា ចិន ថៃ ជប៉ុន ស្រាក់ដៃគ្នាមកបណ្តាក់ទុនលើវិស័យអចលនទ្រព្យជាហូរហែ។ សំណង់អគារពាណិជ្ជកម្ម ខុនដូ អាផាតម៉ិនស្កឹមស្កៃ លូតយ៉ាងត្រដែត សាយភាយពាសពេញខេត្តព្រះសីហនុ បណ្តាលឱ្យអ្នកជំនាញកោតសរសើរថា ជាទីក្រុងសិនជិនទី ២។ ថ្វីត្បិតតែប្រឈមជាមួយវិបត្តិCovid-19 បច្ចុប្បន្នខេត្តព្រះសីហនុ នៅតែមានគម្រោងអភិវឌ្ឍលើវិស័យអចលនទ្រព្យ ដំណើរការសាងសង់ឥតឈប់ឈរ។

ជាក់ស្តែង អភិបាលខេត្តព្រះសីហនុ លោកគួច ចំរើនកាលពីថ្មីៗនេះ ទើបតែអញ្ជើ​ញទៅសម្ពោធមជ្ឈមណ្ឌលពាណិជ្ជកម្មថ្មីមួយ ដែលជាការបណ្តាក់ទុនពីក្រុមហ៊ុនក្នុងស្រុក។ នេះជាចំនុចមួយដែលបង្ហាញពីចរន្តអភិវឌ្ឍ លើវិស័យអចលនទ្រព្យក្នុងខេត្តព្រះសីហនុ ដែលនៅតែស្ថិតក្នុងដំណើរការអភិវឌ្ឍឥតស្រាកស្រាន្ត។

គោលដៅទេសចរណ៍លេចធ្លោ

ព្រះសីហនុអំណាយផលពីធម្មជាតិ ក្នុងការទាក់ទាញភ្ញៀវទេសចរជាតិ-អន្តរជាតិ មកកម្សាន្តនៅតាមតំបន់ឆ្នេរ កោះតូចធំៗ និងរមណីយដ្ឋានធម្មជាតិនានាដទៃទៀត។ កត្តានេះជាចំនុចវិសេសវិសាល សម្រាប់វិនិយោគិន ដែលមានបំណងវិនិយោគលើវិស័យបដិសណ្ឋារកិច្ចរួមមាន សណ្ឋាគារ ភោជនីយដ្ឋាន ផ្ទះសំណាក់ បឹងហ្គាឡូ ឬរីសតកម្សាន្តជាដើម។

វិសាលភាពនៃការអភិវឌ្ឈហេដ្ឋារចនាសម្ព័ន្ឋ

បណ្តាញហេដ្ឋារចនាសម្ព័ន្ធ ជារឿងសំខាន់ជម្រុញការវិនិយោគ និងលើកកម្ពស់សេដ្ឋកិច្ចខេត្តនិងប្រទេសជាតិទាំងមូល។

ដោយឡែកខេត្តព្រះសីហនុមានសមិទ្ធផល និងគម្រោងអភិវឌ្ឍជាច្រើនដូចជា ផ្លូវល្បឿនលឿន ការអភិវឌ្ឍព្រលានយន្តហោះអន្តរជាតិ កំពង់ផែ ស្ពាន និងតំបន់សេដ្ឋកិច្ចពិសេសជាច្រើនកន្លែង។ លើសពីនេះ ក្នុងខេត្តមាត់សមុទ្រមួយនេះក៏មានរោងចក្រ សហគ្រាសតូចធំ ជាហេតុប្រែក្លាយមុខមាត់ខេត្តនេះជាប៉ូលសេដ្ឋកិច្ចទី៣ បន្ទាប់ពីរាជធានីភ្នំពេញ និងខេត្តសៀមរាប។

លោកអភិបាលខេត្តព្រះសីហនុ គួច ចំរើនធ្លាប់បានមានប្រសាសន៍ថា ដើម្បីលើកកម្ពស់និងបង្កើនកំនើនសេដ្ឋកិច្ចក្នុងខេត្ត រដ្ឋាភិបាលបានស្ដារឡើងវិញទាំងស្រុង នូវហេ ដ្ឋារចនាសម្ព័ន្ធនានា បន្ទាប់ពីទទួលរងការខូចខាត ដោយសារកំណើននៃការអភិវឌ្ឍយ៉ាងគំហុកនាពេលកន្លងមក ក្នុងរយៈពេលប៉ុន្មានឆ្នាំចុងក្រោយនេះ។

នេះជាការបើកទំព័រប្រវត្តិសាស្ត្រថ្មីមួយទៀត នៃខេត្តព្រះសីហនុ ដែលមិនធ្លាប់មានពីមុនមកក្នុងការស្ថាបនាផ្លូវទូទាំងក្រុងបែបនេះ៕

ដោយវុត្ថា

ឥណ្ឌាៈ រដ្ឋាភិបាលឥណ្ឌា បានអនុញ្ញាត្តឲ្យរដ្ឋGujarat សាងសង់អគារកំពស់៧០ជាន់ឡើង នៅក្នុងទីក្រុងចំនួន៥រួមមានទីក្រុង Ahmedabad ទីក្រុង Vadodara ទីក្រុងSurat ទីក្រុងRajkot និង ទីក្រុងGandhinagar ដើម្បីប្រជែងជាមួយនឹងបណ្តាប្រទេសនៅក្នុងពិភពអារ៉ាប់រួម។

យោងតាមការចុះផ្សាយរបស់គេហទំព័រmoneycontrol.com បានឱ្យដឹងថា បច្ចុប្បន្ននេះ ច្បាប់របស់រដ្ឋាបាលរបស់រដ្ឋGujarat បានអនុញ្ញាតឱ្យសាងសង់អាគារកម្ពស់ ២៣ ជាន់សម្រាប់អាគារខ្ពស់ៗប៉ុណ្ណោះ ។ ដូច្នេះបានរដ្ឋាភិបាលរដ្ឋនេះ បានសម្រេចធ្វើវិសោធនកម្មច្បាប់ទូទៅ ((general development control regulations)) ដើម្បីអនុញ្ញាតឱ្យមានការសាងសង់ សំណង់អគារខ្ពស់ៗចាប់ពី៧០ជាន់ឡើងទៅ។

តាមសេចក្តីប្រកាសព័ត៌មានរបស់រដ្ឋាបាលនៃរដ្ឋ Gujarat បានបញ្ជាក់ថា  ច្បាប់ថ្មីនេះ ត្រូវអនុម័តដែលនឹងត្រូវអនុវត្តន៍ ចំពោះសំណង់ដែលមានកម្ពស់ជាង១០០ម៉ែត្រឡើង។ ជាមួយគ្នានេះ គណៈកម្មាធិការបច្ចេកទេស ពិសេសមួយនឹងត្រូវបានបង្កើតឡើង ដើម្បីផ្តល់ការយល់ព្រមដល់គម្រោងសាងសង់នានា។

ប្រភពដដែលបន្តថា ជាមួយនឹងការសាងសង់អគារខ្ពស់ៗនៅក្នុងទីក្រុង ហេដ្ឋារច​នាសម្ព័ន្ធ ប្រជាជន និងការងារជាច្រើនផ្សេងទៀត នៅទីក្រុងក៏នឹងកើនឡើងផងដែរ។  ការអនុញ្ញាតឱ្យមានការសាងសង់អគារខ្ពស់ៗនេះ ក្នុងគោលបំណងដាក់រដ្ឋGujarat នៅក្នុងផែនទីពិភពលោក ដែលអាចប្រកួតប្រជែងជាមួយ នឹងប្រទេសនៅក្នុងពិភពអារ៉ាប់រួម ប្រទេសសឹង្ហបុរី និងប្រទេសផ្សេងទៀត ដែលមានត្រូវបានគេដឹងថាមានអគារខ្ពស់ៗច្រើន។

អភិបាលរដ្ឋ Gujarat លោកVijay Rupani បានថ្លែងថា ច្បាប់ថ្មីនេះ នឹងធានាបាននូវការប្រើប្រាស់ដីល្អបំផុត ហើយវានឹងនឹងជួយបញ្ចុះតម្លៃអចលនទ្រព្យ នៅក្នុងទីក្រុងផងដែរស្របពេលដែលមានការអនុញ្ញាតសាងសង់សំណង់ខ្ពស់៕