ដោយ ៖ រ៉ាណេត

ភ្នំពេញ ៖ ក្រសួងរ៉ែ និងថាមពល បានធ្វើការប្រកាស និងជូនដំណឹងស្ដីពីការបើកតំបន់សម្បទានស្វែងរុករករ៉ែថ្មីចំនួន២ទីតាំងដែលស្ថិតនៅខេត្តផ្សេងគ្នាសម្រាប់ការដាក់ពាក្យស្នើសុំអាជ្ញាបណ្ណស្វែងរុករកពីសំណាក់ក្រុមហ៊ុនឯកជន។

នៅក្នុងសេចក្ដីជូនដំណឹងនៅរសៀលថ្ងៃទី៨ ខែកញ្ញា ឆ្នាំ២០២០នេះ បានឱ្យដឹងថា ក្រសួងរ៉ែ និងថាមពល បានប្រកាសបើកឱ្យមានការដាក់ពាក្យប្រកួតប្រជែងជាសាធារណៈ សម្រាប់ទទួលបានអាជ្ញាបណ្ណស្វែងរុករក ចំពោះតំបន់សម្បទានស្វែងរុករករ៉ែចំនួន២តំបន់ ដូចមាននៅក្នុងផែនទី “ទីតាំង និងកូអរដោណេ” ដែលភ្ជាប់មកជាមួយនៅខាងក្រោមចាប់ពីពេលនេះតទៅ។

តំបន់សម្បទានស្វែង រុករករ៉ែដែលនឹងប្រកាសបើកទទួលពាក្យស្នើសុំ រួមមាន ទី១-តំបន់សម្បទានស្វែងរុករករ៉ែទំហំ ១០៧,១០ គីឡូម៉ែត្រក្រឡា ស្ថិតនៅតំបន់មេមត់ ស្រុកមេមត់ ខេត្តត្បូងឃ្មុំ និងទី២- តំបន់សម្បទានស្វែងរុករករ៉ែទំហំ១០០គីឡូម៉ែត្រក្រឡា ស្ថិតនៅតំបន់ភ្នំប៉ាង ស្រុក អូរយ៉ាដាវ ខេត្តរតនគិរី។

សម្រាប់សាធារណជន ក៏ដូចជាបណ្ដាក្រុមហ៊ុនជាតិ និងអន្តរជាតិ ដែលចាប់អារម្មណ៍ ត្រូវមកស្នើសុំ «ពាក្យស្នើ សុំអាជ្ញាបណ្ណស្វែងរុករករ៉ែដែលមានការបោះត្រាត្រឹមត្រូវ» នៅនាយកដ្ឋានឧស្សាហកម្មអាជីវកម្មធនធានរ៉ែ (ជាន់ទី៥) នៃទីស្ដីការក្រសួងរ៉ែ និងថាមពល អគារលេខ ៧៩-៨៩ វិថីប៉ាស្ទ័រ (ផ្លូវលេខ៥១) សង្កាត់ផ្សារថ្មី៣ ខណ្ឌដូនពេញ រាជធានីភ្នំពេញ ចាប់ពីថ្ងៃជូនដំណឹងនេះតទៅ នៅរៀងរាល់ម៉ោងធ្វើការ។

ពាក្យស្នើសុំអាជ្ញាបណ្ណស្វែងរុករករ៉ែ ដែលបានបំពេញរួចរាល់ ត្រូវភ្ជាប់មកជាមួយនូវឯកសារ និង របាយការណ៍តម្រូវពាក់ព័ន្ធ ហើយដាក់ក្នុងស្រោមសំបុត្របិទជិត ដោយការខ្នងថា «ឯកសារស្នើសុំប្រកួត ប្រជែង» រួចដាក់មកក្រសួងតាម «ការិយាល័យច្រកចេញចូលតែមួយ» របស់ក្រសួងរ៉ែ និងថាមពល យ៉ាងយូរ បំផុតត្រឹមថ្ងៃទី០៥ ខែតុលា ឆ្នាំ២០២០ វេលាម៉ោង១៧៖០០នាទី៕

ដោយ ៖ វុត្ថា

ភ្នំពេញ ៖ តាមការព្យាករណ៍របស់រាជរដ្ឋាភិបាលកម្ពុជាបង្ហាញថា នៅក្នុងឆ្នាំ២០៣៥ ទេសចរអន្តរជាតិនឹងនាំមកនូវចំណូលចំនួន ៤,៧៦៥លានដុល្លារ និងទេសចរណ៍ជាតិចំនួន ១,២៨០លានដុល្លារ ចូលទៅដល់ខេត្តសៀមរាប ខណៈដែលរាជរដ្ឋាភិបាលបាននឹងកំពុងរៀបចំផែនការមេអភិវឌ្ឍន៍ទេសចរណ៍ខេត្តសៀមរាប (២០២០-២០៣៥)។

យោងតាមសេចក្តីប្រកាសព័ត៌មានរបស់រាជរដ្ឋាភិបាលចេញផ្សាយនៅថ្ងៃទី៨ ខែកញ្ញា ឆ្នាំ២០២០នេះ បានឱ្យដឹងថា ផែនការមេអភិវឌ្ឍន៍ទេសចរណ៍ខេត្តសៀមរាប (២០២០-២០៣៥) សិក្សារៀបចំដោយគណៈកម្មការអន្តរក្រសួងដែលត្រូវបានរំពឹងថានឹងក្លាយជាយន្តការដ៏មានសារៈសំខាន់ចាំបាច់ សម្រាប់ការឆ្លើយតបទៅនឹងស្ថានភាពនាពេលបច្ចុប្បន្នក៏ដូចជាអនាគត ឆ្លើយតបនឹងឥទ្ធិពលនៃជំងឺឆ្លងកូវីដ-១៩ (COVID-19) ជាពិសេស ត្រូវសម្រេចឱ្យបាននូវបំណងប្រាថ្នារួមរបស់រាជរដ្ឋាភិបាល ដើម្បីជាអភិវឌ្ឍវិស័យទេសចរណ៍នៅខេត្តសៀមរាប ដូចខាងក្រោម៖

ទី១) ខេត្តសៀមរាប គឺជាខេត្តទេសចរណ៍អន្តរជាតិដ៏គួរឱ្យចាប់អារម្មណ៍ និងមានការទទួលស្គាល់ជាលក្ខណៈជាសកលលើការអភិរក្ស និងកិច្ចគាំពារសម្បត្តិបេតិកភណ្ឌវប្បធម៌ និងបរិស្ថានធម្មជាតិ ដោយផ្តល់ជូននូវធនធានទេសចរណ៍ និងភាពទាក់ទាញជាច្រើនទៀត ។

ទី២) ធានាឱ្យបាននូវផលប្រយោជន៍សង្គម-សេដ្ឋកិច្ច ជាអតិបរមាពីវិស័យទេសចរណ៍ ពោលគឺតំបន់ប្រវត្តិសាស្រ្តអង្គរ, តំបន់ទីក្រុងដែលមានស្ទឹងសៀមរាប, តំបន់ទន្លេសាប, ឧទ្យានជាតិភ្នំគូលែន និងតំបន់ជនបទដែលជាគោលដៅទេសចរណ៍ ត្រូវតែភ្ជាប់ជាមួយការអភិវឌ្ឍសេដ្ឋកិច្ចមូលដ្ឋាន និងការកាត់បន្ថយភាពក្រីក្រ ។

ទី៣) ខេត្តសៀមរាប ត្រូវតែជាគោលដៅទេសចរណ៍ប្រកបដោយគុណភាព សំដៅទាក់ទាញភ្ញៀវទេសចរ ដែលមានគុណភាពមកកម្សាន្ត ម្តងហើយម្តងទៀត ស្នាក់នៅយូរ និងចំណាយច្រើន អាចបង្កើននូវចំណូលជូនប្រជាពលរដ្ឋមូលដ្ឋាន និងកសាងសេដ្ឋកិច្ចមូលដ្ឋានប្រកបដោយបរិយាប័ន្ន ។

លើសពីនេះ «ផែនការមេសម្រាប់ការអភិវឌ្ឍវិស័យទេសចរណ៍ខេត្តសៀមរាប (២០២០-២០៣៥) ក៏នឹងឆ្លុះបញ្ចាំងពីឆន្ទៈរបស់រាជរដ្ឋាភិបាលដែលចាត់ទុក «វិស័យទេសចរណ៍ជាមាសបៃតង» ក្នុងការចូលរួមដល់ការអភិវឌ្ឍសង្គម-សេដ្ឋកិច្ច ការលើកស្ទួយវប្បធម៌ជាតិ និងទ្រទ្រង់ដល់កិច្ចគាំពារបរិស្ថាន ប្រកបដោយប្រសិទ្ធភាពខ្ពស់ និងប្តេជ្ញាចិត្តក្នុងការអភិវឌ្ឍវិស័យទេសចរណ៍ខេត្តសៀមរាប និងតំបន់ជុំវិញ ដើម្បីប្រែក្លាយជាគោលដៅទេសចរណ៍ ប្រកបដោយគុណភាព (Alternative Tourism/Quality Destination) មានការគ្រប់គ្រងលើការអភិវឌ្ឍវិស័យទេសចរណ៍ច្បាស់លាស់ និងកាត់បន្ថយផលប៉ះពាល់ ជាអវិជ្ជមានដល់តំបន់អង្គរ និងធនធានធម្មជាតិឱ្យបានជាអតិបរមា សំដៅទាក់ទាញភ្ញៀវទេសចរមកកម្សាន្តច្រើនដង ពិសេសភ្ញៀវទេសចរកម្រិតខ្ពស់ ដើម្បីបង្កើននូវប្រភពចំណូលជូនជាតិ និងប្រជាពលរដ្ឋមូលដ្ឋាន ។

តាមការព្យាករណ៍ក្នុងឆ្នាំ ២០៣៥ ទេសចរណ៍អន្តរជាតិនាំមកនូវចំណូលចំនួន ៤,៧៦៥លានដុល្លារ និងទេសចរណ៍ជាតិ នាំមកនូវចំណូលចំនួន ១,២៨០លានដុល្លារ ។ ចក្ខុវិស័យរបស់ «ផែនការមេអភិវឌ្ឍន៍ទេសចរណ៍ខេត្តសៀមរាប (២០២០-២០៣៥) គឺ «ការក្តាប់យកមកវិញនូវមោទនភាព ជាគោលដៅទេសចរណ៍ចម្បងបំផុតរបស់វិស័យទេសចរណ៍កម្ពុជា និងជាគោលដៅទេសចរណ៍ចម្បងក្នុងតំបន់អាស៊ីអាគ្នេយ៍» ។

ដើម្បីសម្រេចបានចក្ខុវិស័យខាងលើនេះ «ផែនការមេអភិវឌ្ឍន៍ទេសចរណ៍ខេត្តសៀមរាប (២០២០-២០៣៥)» បានដាក់ចេញនូវគោលដៅយុទ្ធសាស្រ្តចំនួន ០៧ រួមមាន៖

១) យុទ្ធសាស្រ្ដអភិវឌ្ឍន៍តំបន់ទេសចរណ៍អាទិភាពខេត្តសៀមរាប
២) យុទ្ធសាស្រ្ដវិនិយោគទេសចរណ៍ និងការអភិវឌ្ឍរបៀងទេសចរណ៍ថ្មីៗក្នុងខេត្តសៀមរាប
៣) យុទ្ធសាស្រ្ដអភិវឌ្ឍន៍ទីផ្សារ និងផ្សព្វផ្សាយទេសចរណ៍ និងការតភ្ជាប់
៤) យុទ្ធសាស្រ្ដពង្រឹងគុណភាព និងអភិវឌ្ឍន៍ធនធានមនុស្សក្នុងវិស័យទេសចរណ៍ខេត្តសៀមរាប
៥) យុទ្ធសាស្រ្ដក្នុងការគ្រប់គ្រងបរិស្ថានខេត្តសៀមរាប
៦) យុទ្ធសាស្រ្ដអភិវឌ្ឍន៍ហេដ្ឋារចនាសម្ព័ន្ធ និងពង្រឹងការតភ្ជាប់គាំទ្រវិស័យទេសចរណ៍ខេត្តសៀមរាប និង
៧) យុទ្ធសាស្រ្ដអភិបាលកិច្ចសម្រាប់ទ្រទ្រង់ ការអភិវឌ្ឍទេសចរណ៍ខេត្តសៀមរាប (ក្នុងនោះមានយុទ្ធសាស្រ្តចំនួន ៤៦ សកម្មភាពអនុវត្តចំនួន ១៥១ ដែលបានកំណត់រយៈពេលនៃការអនុវត្ត: រយៈពេលខ្លី រយៈពេលមធ្យម និងរយៈពេលវែង) ។

ផែនការមេអភិវឌ្ឍន៍ទេសចរណ៍ខេត្តសៀមរាប (២០២០-២០៣៥) នឹងត្រូវសម្រេចនៅក្នុងកិច្ចប្រជុំឆ្លងម្តងទៀតនៅចុងខែ តុលា ឆ្នាំ២០២០ ក្រោយពីការកែសម្រួល មុននឹងគោរពដាក់ជូន សម្តេចតេជោនាយករដ្ឋមន្ត្រី ដើម្បីពិនិត្យ និងសម្រេចដ៏ខ្ពស់ខ្ពស់៕

ដោយ ៖ ប៊ី

ភ្នំពេញ ៖ ក្រុមហ៊ុន Marvel Garment ដែលជាក្រុមហ៊ុនផលិតសម្លៀកបំពាក់ឈានមុខគេរបស់ប្រទេសចិន បាន និងកំពុងសាងសង់រោងចក្រផលិតថ្មី ចាប់តាំងពីខែមីនាឆ្នាំ ២០១៩ នៅតំបន់សេដ្ឋកិច្ចពិសេសភ្នំពេញ។

បន្ទាប់ពីសាងសង់បានមួយឆ្នាំកន្លះ ក្រុមហ៊ុនបានបញ្ចប់រោងចក្រផលិតដំណាក់កាលទី១ របស់ខ្លួន ហើយបានចាប់ផ្តើមជ្រើសរើសកម្មករ ដើម្បីចាប់ផ្តើមប្រតិបត្តិការរបស់ខ្លួននៅដើមខែតុលា ឆ្នាំ២០២០ខាងមុខនេះ ដែលក្នុងដណាក់ដំបូង ក្រុមហ៊ុននឹងជ្រើសរើសកម្មករចំនួន ៥០០០ នាក់សម្រាប់ផលិម៉ាស ទៅកាន់ទីផ្សារជប៉ុន។ នេះបើយោងតាមរបាយការណ៍របស់តំបន់សេដ្ឋកិច្ចពិសេសភ្នំពេញ (PPSEZ)។

គម្រោងនេះត្រូវបានរចនាឡើងជាចង្កោមនៃរោងចក្រផលិតសម្លៀកបំពាក់ ដោយមានកាត់ដេរ បោះពុម្ព វេចខ្ចប់ និងឃ្លាំង គ្របដណ្តប់នៅលើផ្ទៃដី ៤៣ ហិកតា ក្នុងតំបន់ផលិតកម្មចំនួន ១៦ ត្រូវបានគ្រោងនឹងបញ្ចប់នៅឆ្នាំ ២០២១ និងបានបង្កើតឱកាសការងារចំនួន ១៧,០០០កន្លែង។

លោក YAN DELIN អ្នកគ្រប់គ្រងទូទៅក្រុមហ៊ុន Marvel Garment បានមានប្រសាសន៍ថា “យើងបានសម្រេចចិត្តឈានទៅមុខ ទោះបីមានពេលវេលាដ៏លំបាកនេះក៏ដោយ ដូច្នេះយើងអាចរៀបចំខ្លួនសម្រាប់ក្រោយជំងឺ COVID-19 បានបញ្ចប់។ តាមរយៈការធ្វើដូច្នេះ យើងនឹងបន្តបង្កើតឱកាសការងារបន្ថែមទៀតនៅក្នុងប្រទេសកម្ពុជា”។

កាលពីខែមិថុនា ឆ្នាំ២០២០ ក្រុមហ៊ុនអភិវឌ្ឍន៍តំបន់សេដ្ឋកិច្ចពិសេសភ្នំពេញ បានចុះហត្ថលេខាលើកិច្ចព្រមព្រៀងជួលដីបន្ថែមជាមួយក្រុមហ៊ុន Marvel Garment Co Ltd ដែលជាក្រុមហ៊ុនផលិតសម្លៀកបំពាក់ឈានមុខគេមកពីប្រទេសចិន ខណៈគម្រោងពង្រីករោងចក្រផលិតកម្មនឹងបង្កើតការងារក្នុងស្រុកចំនួន ១៧,០០០កន្លែង។

លោក Yan បាននិយាយថា ប្រតិបត្តិការនេះពាក់ព័ន្ធនឹងការជួលដីទំហំ ៦,៤ ហិកតាបន្ថែម និងជាសញ្ញានៃកិច្ចសហប្រតិបត្តិការរវាងក្រុមហ៊ុនទាំងពីរ ដើម្បីរួមគ្នាបង្កើតការងារ និងសេដ្ឋកិច្ចដ៏សំខាន់។
លោកបាននិយាយថា ក្រុមហ៊ុនបានចាប់ផ្តើមរៀបចំអន្តេវាសិកដ្ឋានរបស់កម្មករ និងកន្លែងនៅជុំវិញ ហើយលោករំពឹងថា គម្រោងនេះនឹងបង្កើតការងារក្នុងស្រុកចំនួន ១៧,០០០កន្លែង។លោក Yan បានថ្លែងបន្តថា “ខណៈកំពុងរៀបចំតំបន់ផលិតកម្ម យើងត្រូវរៀបចំកន្លែងរស់នៅជាមុនសម្រាប់កម្មករនាពេលអនាគត”។

កាលពីខែមីនា ឆ្នាំ២០២០ ក្រុមហ៊ុន Shenzhou International បានបើកការដ្ឋានសាងសង់រោងចក្រកាត់ដេរសម្លៀកបំពាក់ថ្មីតម្លៃ ១៥០ លានដុល្លារអាមេរិកនៅកម្ពុជា បន្ទាប់ពីប្រតិបត្តិការអាជីវកម្មរបស់ខ្លួននៅកម្ពុជាអស់រយៈពេល ១៤ ឆ្នាំ។

យោងតាមរដ្ឋមន្ដ្រីក្រសួងសេដ្ឋកិច្ច និងហិរញ្ញវត្ថុ បានឱ្យដឹងថា ការនាំចេញរបស់ប្រទេសកម្ពុជាតាមរយៈតំបន់សេដ្ឋកិច្ចពិសេស (SEZ) កាលពីឆ្នាំមុនបានកើនឡើងប្រហែល ២៧ ភាគរយជាមួយនឹងតម្លៃសរុបការនាំចេញបានកើនឡើង ២ ៦៨៨ លានដុល្លារកាលពីឆ្នាំមុន។ ក្រុមហ៊ុនចំនួន ៤៦៥ ដែលប្រតិបត្តិការនៅក្នុង SEZ ទាំង ៥៤ កន្លែងរបស់ប្រទេសកម្ពុជា ដែលផ្ដល់ការងារជាង ១០០០០០ នាក់៕

ដោយវុត្ថា

ភ្នំពេញ៖ កម្ពុជាបានស្នើដល់ប្រទេសនៅក្នុងតំបន់អាស៊ាន ធ្វើសមាហរណកម្មតំបន់ ឱ្យបានកាន់តែស៊ីជម្រៅថែមទៀត ដើម្បីសម្រួលដល់លំហូរ ទំនិញ សេវាកម្ម និងប្រជាជន នៅក្នុងពេលមានវិបត្តិសេដ្ឋកិច្ចដ៏ធ្ងន់ធ្ងរ ដោយសារជំងឺកូវីដ១៩នេះ ។

សម្តេចអគ្គមហាពញាចក្រី ហេង សំរិន ប្រធានរដ្ឋសភា នៅក្នុងសុន្ទរកថាគន្លឹះថ្លែងទៅកាន់មហាសន្និបាតអន្តរសភាអាស៊ានលើកទី៤១ ដែលសភាប្រទេសវៀតណាម ធ្វើជាម្ចាស់ផ្ទះ នៅព្រឹកថ្ងៃទី៨ ខែកញ្ញានេះ តាមប្រព័ន្ធវីដេអូ ឱ្យដឹងថា ការរាតត្បាតនៃជំងឺកូវីដ១៩នៅលើពិភពលោក បាននាំមកនូវបញ្ហាប្រឈមជាច្រើន ដែលមិនធ្លាប់មានពីមុនមក ដូចជា សុវត្ថិភាព សុខភាពសាធារណៈ ការបង្អាក់ ការប្រមូលផ្តុំ និងដំណើរការនៃសង្វាក់ផ្គត់ផ្គង់សកល ជាពិសេសបានបង្កផល ប៉ះពាល់យ៉ាងធ្ងន់ធ្ងរចំពោះសង្គម និងសេដ្ឋកិច្ចសកលលោក។

សម្តេចថ្លែងថា “យើងត្រូវធ្វើការរួមគ្នា បង្កើនកិច្ចសហប្រតិបត្តិការ និងសាមគ្គីភាពអន្តរជាតិ ដើម្បីផលប្រយោជន៍រួមរបស់យើង” ។

សម្តេចហេង សំរិនបន្តថា ជំងឺកូវីដ១៩ បានធ្វើឲ្យការរៀបចំមហាសន្និបាតលើកទី៤១ អន្តរសភាអាស៊ាននៅឆ្នាំនេះ ធ្វើឡើងតាមប្រព័ន្ធវីដេអូ។មហាសន្និបាតអន្តរសភាអាស៊ានលើកទី៤នេះ បានប្រារព្ធធ្វើឡើងក្រោមមូលបទ “ការទូតសភា ដើម្បីសម្រេចបានសហគមន៍អាស៊ាន ប្រកបដោយភាពស្អិតរមួត និងឆ្លើយតប”។

សម្តេចថា មូលបទខាងលើនេះ ពិតជាសមស្រប និងឆ្លុះបញ្ចាំងពីភាពចាំបាច់ក្នុងការឈានទៅសម្រេចបានការកសាងសហគមន៍អាស៊ាន ប្រកបដោយឯកភាព សាមគ្គីភាព និងមជ្ឈភាព ដើម្បីជំរុញឱ្យអាស៊ានមានលទ្ធភាពចាប់យកឱកាស និងដោះស្រាយបញ្ហាប្រឈមដែលកំពុងកើតមានប្រកបដោយប្រសិទ្ធភាព។

សម្តេសបញ្ជាក់ថា សភាដើរតួនាទីយ៉ាងសំខាន់ក្នុងការលើកកម្ពស់ភាពស្របច្បាប់ នៃស្ថាប័នពហុភាគី ជាពិសេស ការកសាងអាស៊ានជាស្ថាប័នមួយផ្អែកលើគោលការណ៍ច្បាប់ និងប្រកាន់យកប្រជាជនជាស្នូល។ “ស្មារតីមិត្តភាព សាមគ្គីភាព និងកិច្ចសហប្រតិបត្តិការដ៏ជិតស្និទ្ធរបស់អាយប៉ា នៅតែមានជានិច្ច ទោះក្នុងកាលៈទេសៈណាក៏ដោយ”។

អន្តរសភាអាស៊ាន ដែលហៅកាត់ថា អាយប៉ា(AIPA) ជាអង្គការអន្តរសភា តំណាងស្ថាប័ននីតិប្បញ្ញត្តិ នៃបណ្តាប្រទេសជាសមាជិកសមាគមប្រជាជាតិអាស៊ីអាគ្នេយ៍(ASEAN) ដែលមាន ប្រទេសប្រ៊ុយណេ កម្ពុជា ឥណ្ឌូណេស៊ី ឡាវ ម៉ាឡេស៊ី មីយ៉ាន់ម៉ា សឹង្ហបុរី ថៃ វៀតណាម និងហ្វីលីពីន។

អន្តរសភាអាស៊ាន ជាការប្រមូលផ្ដុំសំឡេងប្រជាពលរដ្ឋក្នុងសហគមន៍អាស៊ាន ជាដៃគូរបស់អាស៊ាន ក្នុងការជំរុញឱ្យសម្រេចបាននូវគោលដៅសហគមន៍អាស៊ានតែមួយ។ មហាសន្និបាតអន្តរសភាអាស៊ាន បានប្រារព្ធធ្វើជារៀងរាល់ឆ្នាំ ដោយប្រទេសជាសមាជិកផ្លាស់វេនគ្នាតាមលំដាប់អក្ខរក្រមនៃឈ្មោះប្រទេសតាមអក្សរឡាតាំង។

សម្តេចបញ្ជាក់ថា សភាកម្ពុជាគាំទ្រការខិតខំប្រឹងប្រែងរបស់អាស៊ាន ក្នុងការថែរក្សា និងលើកកម្ពស់ សន្តិភាព សន្តិសុខ និងស្ថិរភាពក្នុងតំបន់ ការដោះស្រាយ ជម្លោះដោយសន្តិវិធី ឈរលើគោលការណ៍ច្បាប់អន្តរជាតិ និងយន្តការការទូត ជៀសវាងការប្រើប្រាស់កម្លាំងអាវុធ៕

ដោយ ៖ រ៉ាណេត

ភ្នំពេញ ៖ ការវិនិយោគទៅលើសំណង់ឃ្លាំងនៅតាមបណ្តាជាយក្រុង ជាពិសេសនៅតំបន់ដែលមានគម្រោងប្រមូលផ្តុំទៅដោយសំណង់រោងចក្រសហគ្រាសនានា ដូចជាតាមបណ្តោយជាតិលេខ៥១ តំបន់ផ្លូវជាតិលេខ៤ និងតំបន់ផ្លូវជាតិលេខ១ បច្ចុប្បន្នគេសង្កេតឃើញថាកំពុងតែមានសកម្មភាពយ៉ាងផុលផុស ខណៈដែលតម្រូវការទីផ្សារកំពុងមាន។

ស្ថាបនិកក្រុមអ្នកជំនាញអចលនទ្រព្យកម្ពុជា លោក សៅ សាខុំ បានមានប្រសាសន៍ប្រាប់តាមទូរស័ព្ទនៅព្រឹកថ្ងៃទី៨ ខែកញ្ញា ឆ្នាំ២០២០នេះថា បច្ចុប្បន្នទីផ្សារដែលស្ថិតនៅតាមតំបន់ជាយក្រុងភាគច្រើនសុទ្ធតែមានតម្រូវជួល ជាពិសេសសំណង់ឃ្លាំងដែលស្ថិតនៅតាមតំបន់សំខាន់ៗដូចជាតំបន់ផ្លូវជាតិលេខ១ ផ្លូវជាតិលេខ៣ ផ្លូវជាតិ៤ ផ្លូវជាតិលេខ៥១ រួមជាមួយនឹងតំបន់មួយចំនួនទៀតដែលមានភាពងាយស្រួលក្នុងការដឹកជញ្ជូនទំនិញចេញចូលក្រុង។

លោក សៅ សាខុំ បានមានប្រសាសន៍បន្តទៀតថា “ទីផ្សារឃ្លាំងត្រូវបានគេបែងចែកជាឃ្លាំងគ្មានស្ដង់ដា ដែលមានត្រឹមតែជាអគារ ឬជារោងបិតជិតមានទំហំ និងប្រភេទឃ្លាំងមានស្ដងដាដែលត្រូវបានសាងសង់នៅទីតាំងល្អ មានហេដ្ឋារចនាសម្ព័ន្ធ មានបំពាក់បរិក្ខាត្រឹមត្រូវ ហើយនៅក្នុងប្រភេទឃ្លាំស្ដង់ដានេះ ក៏មានការបែងចែកចេញជាកម្រិត Aកម្រិត B និងកម្រិត C ហើយតម្លៃក៏មានភាពខុសគ្នាដែរ”។

លោកបន្តថា “សម្រាប់អ្នកដែលគាត់វិនិយោគទៅលើសំណង់ឃ្លាំង គឺអាចទទួលបានចំណេញ២យ៉ាងក្នុងពេលតែមួយ ដែលក្រៅពីអាចទទួលបានចំណូលតាមរយៈការជួលប្រចាំខែ ឬប្រចាំឆ្នាំ គាត់ក៏អាចទទួលបានចំណេញពីអត្រានៃការឡើងថ្លៃតម្លៃដីផងដែរ ព្រោះជាធម្មតានៅពេលដែលមានសំណង់ឃ្លាំង សំណង់រោងចក្រផ្សេងៗ តែងជំរុញឱ្យសកម្មភាពទីផ្សារដីធ្លីមានការកើនឡើង ប៉ុន្តែអ្វីដែលសំខាន់ អ្នកវិនិយោគ ក៏ដូចជាអ្នកអភិវឌ្ឍន៍មុនពេលសម្រេចចិត្តបណ្តាក់ទុនគម្បីត្រូវពិនិត្យឱ្យបានច្បាស់ទៅលើទីតាំង ស្ថានភាពដី និងតម្លៃដីមុនពេលវិនិយោគ ជៀសវាងសាងសង់រួចមិនមានអ្នកជួល”។

ពាក់ព័ន្ធទៅនឹងទីផ្សារឃ្លាំង លោក ខាត់ សុវណ្ណ ប្រធានក្រុមហ៊ុនភ្នាក់ងារអចលនទ្រព្យ Cam Top Property ធ្លាប់បានមានប្រសាសន៍ថា ការវិនិយោគលើឃ្លាំងសម្រាប់ជួល ជាការវិនិយោគលើផ្នែកអចលនទ្រព្យផងដែរ ប៉ុន្តែហាក់មិនសូវមានការពេញនិយមច្រើននោះទេ ខណៈតម្រូវការលើឃ្លាំងសម្រាប់ជួលកើនឡើងជាប្រចាំ និងរកប្រាក់ចំណេញបានច្រើន។

លោកបន្តថា “ការវិនិយោគលើឃ្លាំងសម្រាប់ជួល ប្រសិនជាឃ្លាំងមិនមានស្តង់ដាអាចជួលបានចន្លោះពី១,២ ទៅ២ដុល្លារ ប៉ុន្តែឃ្លាំងមានស្តង់ដាអាចជួលបានចន្លោះពី២ ទៅ៥ដុល្លារក្នុងមួយម៉ែត្រការ៉េ ឬលើសពីនេះ អាស្រ័យទៅតាមទីតាំង ការបំពាក់បរិក្ខា និងតម្រូវការជាក់ស្ដែងរបស់អតិថិជន”៕

ដោយ ៖ វុត្ថា

ភ្នំពេញ ៖ មន្ត្រីជាន់ខ្ពស់នៃក្រសួងទេសចរណ៍បានអះអាងថា ការរៀបចំផែនការមេអភិវឌ្ឍន៍ទេសចរណ៍ខេត្តកែបនេះ គឺមានគោលបំណង ធ្វើឱ្យខេត្តកែបក្លាយជាគោលដៅទេសចរណ៍ធម្មជាតិ ស្ងប់ស្ងាត់ ប្រណីតកម្រិតខ្ពស់ ប្រកបដោយភាពទាក់ទាញ និងភាពប្រកួតប្រជែងនៅក្នុងតំបន់ និងពិភពលោក។

លោក នី ផល្លី អនុរដ្ឋលេខាធិការ ក្រសួងទេសចរណ៍ នៅក្នុងកិច្ចប្រជុំស្ដីពីសេចក្ដីព្រាងបឋមនៃផែនការមេសម្រាប់ការអភិវឌ្ឍ វិស័យទេសចរណ៍នៅខេត្តកែប កាលពីម្សិលមិញនេះ បានឱ្យដឹងថា ការរៀបចំផែនការមេអភិវឌ្ឍន៍ទេសចរណ៍ខេត្តកែបនេះ តាមរយៈការបង្កើនគុណភាពផលិតផលទេសចរណ៍ដែលមានស្រាប់ និងបង្កើតផលិតផលទេសចរណ៍ថ្មីៗថែមទៀត ដើម្បីពន្យារការស្នាក់នៅរបស់ទេសចរនៅគ្រប់រដូវកាលឲ្យបានកាន់តែយូរ។

លោកបន្តថា ម្យ៉ាងទៀត ការរៀបចំផែនការមេអភិវឌ្ឍន៍ទេសចរណ៍ខេត្តកែបធានាដល់ចីរភាពនៃការអភិវឌ្ឍ និងធនធានធម្មជាតិ និងការរៀបចំដែនដី នគរូបនីយកម្ម និងសំណង់ ពិសេសធានាដល់កំណើនសេដ្ឋកិច្ចមូលដ្ឋាន។

លោក សោម ពិសិដ្ឋ អភិបាលខេត្តកែប មានប្រសាសន៍ និងគាំទ្រយ៉ាងខ្លាំងចំពោះរាជរដ្ឋាភិបាលកម្ពុជា ក្រសួងទេសចរណ៍ និងគណៈកម្មាធិការអន្តរក្រសួង ដែលបានបន្ថែមខេត្ត២ទៀត គឺខេត្តកែប និងខេត្តមណ្ឌលគីរី អោយក្លាយជាគោលដៅទេសចរសម្រាប់ប្រទេសកម្ពុជា។

លោកបានជំរុញឱ្យក្រុមការងារបច្ចេកទេសអភិវឌ្ឍន៍វិស័យទេសចរណ៍ខេត្តកែប ត្រូវធ្វើយ៉ាងណា ខិតខំពិភាក្សាស្វែករកចំណុចល្អៗ និងរកបញ្ហាប្រឈម និងដំណោះស្រាយ ដើម្បីលើកជាគម្រោងចូលក្នុងផែនការមេវិស័យទេសចរណ៍នេះឱ្យបានគ្រប់គ្រាន់។

បើតាមក្រសួងទេសចរណ៍ បន្ទាប់ពីមានការកែសម្រួល ឬមានការសម្រេចឯកភាពពីប្រមុខរាជរដ្ឋាភិបាល ផែនការមេអភិវឌ្ឍន៍ទេសចរណ៍ខេត្តកែបនេះនឹងត្រូវយកមកអនុវត្តចាប់ពីឆ្នាំ២០២១ ដល់ឆ្នាំ២០៣៥ និងអាចមានការពិនិត្យកែសម្រួលសម្រាប់ការអនុវត្តនៅឆ្នាំបន្តបន្ទាប់ទៀត៕