រាជរដ្ឋាភិបាលកម្ពុជា បានបញ្ជូនវិវាទនៅតំបន់មុំបី, ប្រាសាទតាមាន់ធំ, ប្រាសាទតាមាន់តូច និងប្រាសាទតាក្របី ទៅតុលាការយុត្តិធម៌អន្ដរជាតិរួចហើយ

(ភ្នំពេញ)៖ ដោយមិនបង្អង់យូរឡើយ រាជរដ្ឋាភិបាលកម្ពុជា បន្ទាប់ពីទទួលបានការគាំទ្រជាឯកច្ឆន្ទពីសមាជរដ្ឋសភា និងព្រឹទ្ធសភា បានបញ្ជូនវិវាទរវាងកម្ពុជា-ថៃ នៅតំបន់មុំបី, ប្រាសាទតាមាន់ធំ, ប្រាសាទតាមាន់តុច និងប្រសាទតាក្របី ទៅកាន់តុលាការយុត្តិធម៌អន្ដរជាតិ (ICJ) រួចរាល់ហើយកាលពីថ្ងៃទី២ ខែមិថុនា ឆ្នាំ២០២៥កន្លងទៅ។

ក្នុងសេចក្ដីថ្លែងការណ៍នៅថ្ងៃទី៤ ខែមិថុនា ឆ្នាំ២០២៥ រាជរដ្ឋាភិបាលកម្ពុជា បានអះអាងថា ការសម្រេចបញ្ជូនបញ្ហាវិវាទនៅតំបន់ទាំង៤នេះទៅកាន់តុលាការយុត្តិធម៌អន្ដរជាតិ នៅទីក្រុងឡាអេ ដើម្បីផលប្រយោជន៍នៃការធានាបាននូវដំណោះស្រាយមួយដោយយុត្តិធម៌ មិនលម្អៀង និងយូរអង្វែង។

បើតាមសេចក្ដីថ្លែងការណ៍ដដែលនេះ, តំបន់ទាំងបួននេះនៅតែមិនទាន់ដាច់ស្រេច និងមានភាពរសើបជាយូរយារណាស់មកហើយ ដែលអាចបង្កនូវភាពតានតឹងកាន់តែធ្ងន់ធ្ងរ ប្រសិនបើមិនមានការដោះស្រាយនោះទេ។

ខ្លឹមសារនៃសេចក្ដីថ្លែងការណ៍របស់រាជរដ្ឋាភិបាល បានបញ្ជាក់យ៉ាងដូច្នេះថា «ដោយមើលឃើញពីបញ្ហានេះ និងដើម្បីផលប្រយោជន៍ នៃការធានាបាននូវដំណោះស្រាយ មួយដោយយុត្តិធម៌ មិនលម្អៀង និងយូរអង្វែង នៅថ្ងៃទី២ ខែមិថុនា ឆ្នាំ២០២៥ រាជរដ្ឋាភិបាលកម្ពុជា បានសម្រេចបញ្ចូនវិវាទនៅតំបន់ដែលមានភាពរសើបចំនួនបួន គឺ តំបន់មុំបី ប្រាសាទតាមាន់ធំ ប្រាសាទតា មាន់តូច និងប្រាសាទតាក្របី ទៅតុលាការ ICJ នៅទីក្រុងឡាអេ។

តំបន់ទាំងបួននេះនៅតែមិនទាន់ដាច់ស្រេច និងមានភាពរសើបជាយូរយារណាស់មកហើយ ដែលអាចបង្កនូវភាពតានតឹងកាន់តែធ្ងន់ធ្ងរ ប្រសិនបើមិន មានការដោះស្រាយនោះទេ។ ការសម្រេចនេះទទួលបានការគាំទ្រជាឯកច្ឆន្ទ ពីសមាជរដ្ឋសភា និងព្រឹទ្ធសភា លើកទី១ នៅថ្ងៃដដែលនោះ»។

ស្របពេលនៃការបន្តស្វែងរកដំណោះស្រាយផ្លូវច្បាប់នៅតុលាការ ICJ រាជរដ្ឋាភិបាលកម្ពុជា នៅតែប្តេជ្ញចិត្តបន្តការសន្ទនា និងច្រកការទូត កម្ពុជា នឹងបន្តចូលរួមរកដំណោះស្រាយតាមរយៈក្របខ័ណ្ឌទ្វេភាគី ដែលមានស្រាប់ ហើយនឹងធ្វើជាម្ចាស់ផ្ទះនៃកិច្ចប្រជុំ នៃគណៈកម្មការចម្រុះខណ្ឌសីមា និងបោះបង្គោល ព្រំដែនគោក (JBC) នៅថ្ងៃទី១៤ ខែមិថុនា ឆ្នាំ២០២៥ នៅរាជធានីភ្នំពេញ។ ទោះជាយ៉ាងនេះក្តី ដោយសារមានការបញ្ជូនវិវាទខាងលើទៅតុលាការ ICJ នោះ ករណីតំបន់ទាំងបួនខាងលើនឹងមិនត្រូវបាន ដាក់បញ្ចូលក្នុងរបៀបវារៈ នៃសម័យប្រជុំ JBC នាពេលខាងមុខនេះ។

រាជរដ្ឋាភិបាលកម្ពុជាសង្ឃឹមថា ប្រទេសថៃនឹងសហការបញ្ជូនសំណុំរឿងនេះទៅតុលាការ ICJ ក្នុងស្មារតីយុត្តិធម៌ ការកសាងទំនុកចិត្ត មិត្តភាពយូរអង្វែង និងភាពជាអ្នកជិតខាងល្អ។ កម្ពុជាបានត្រៀមខ្លួន បន្តកិច្ចដំណើរការនេះ ដោយឯករាជ្យម្ចាស់ការ ក្នុងករណីដែលមិនមានកិច្ចសហការណាមួយ៕

តម្លៃហាងឆេងមាសបានធ្លាក់ថ្លៃចុះនៅថ្ងៃព្រហស្បតិ៍នេះ

ដោយ: គង់ លាងហួរ
អន្តរជាតិ: តម្លៃហាងឆេងមាសបានធ្លាក់ថ្លៃចុះបន្តិចក្នុងការជួញដូរនៅព្រឹកថ្ងៃព្រហស្បតិ៍នេះ ក្រោយពេលតម្លៃមាសប្រភេទ Spot Gold បានជួញដូរក្នុងទំហំទឹកប្រាក់ចំនួន៣៣៧៥,៤២ដុល្លារអាមេរិកក្នុងមួយអោនគិតត្រឹមពេលបិទការជួញដូរកាលពីថ្ងៃពុធម្សិលមិញ។

តួយ៉ាង តម្លៃមាស Spot Gold បានធ្លាក់ចុះ០,០៧ភាគរយដល់ត្រឹម៣.៣៧៣ដុល្លារក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold futures បានធ្លាក់ចុះ០,០២ភាគរយដល់៣៣៧២,៧ដុល្លារក្នុងមួយអោនគិតត្រឹមម៉ោង១០:៥៣នាទីព្រឹក។

យោងតាមឧបករណ៍ CME FedWatch បានឱ្យដឹងថា បច្ចុប្បន្ន ទីផ្សារមើលឃើញឱកាសចំនួន៩៤,៨ភាគរយ ដែលធនាគារកណ្តាលអាមេរិក (Fed) នឹងរក្សាទុកអត្រាការប្រាក់ឱ្យនៅថេរដដែលក្នុងកិច្ចប្រជុំគោលនយោបាយនៅថ្ងៃទី១៨ ខែមិថុនានេះ។

ចំណែកឯ សន្ទស្សន៍ប្រាក់ដុល្លារ ដែលវាស់វែងរូបិយប័ណ្ណប្រាក់ដុល្លារអាមេរិកធៀបជាមួយនឹងរូបិយប័ណ្ណធំៗចំនួន៦ ដូចជាប្រាក់យ៉េន និងប្រាក់អឺរ៉ូ បានងើបឡើងថ្លៃដល់៩៨,៨១ពិន្ទុនៅព្រឹកថ្ងៃព្រហស្បតិ៍នេះ បន្ទាប់ពីបានបិទការជួញដូរត្រឹម៩៨,៧៩ពិន្ទុកាលពីថ្ងៃពុធម្សិលមិញ៕

អភិបាលខេត្តស្នើអភិបាលខេត្តអាន ហ៊ួយជម្រុញអ្នកធុរកិច្ចនិងភ្ញៀវទេសចរណ៍មកទស្សនា និងវិនិយោគនៅខេត្តព្រះសីហនុ

ដោយៈ គង់ សូរិយា

ប្រទេសចិនៈ អភិបាលខេត្តព្រះសីហនុ លោកម៉ាង ស៊ីណេតបានជំរុញអភិបាលខេត្តអាន ហ៊ួយ លោកវ៉ាង ឈីងស៊ាន (WANG QING XIAN)អភិបាលខេត្តអានហ៊ួយ ប្រទេសចិនជួយជំរុញអ្នកវិនិយោគ និងភ្ញៀវទេសចរណ៍មកធ្វើធុរកិច្ច និងទស្សនានៅខេត្តព្រះសីហនុ។

ក្នុងដំណើរទស្សនកិច្ចទៅកាន់ខេត្តអាន ហ៊ួយ លោកម៉ាង ស៊ីណេត អភិបាលនៃគណៈអភិបាលខេត្តព្រះសីហនុ ត្រូវបានស្វាគមន៍យ៉ាងកក្តៅ ពីលោកវ៉ាង ឈីងស៊ាន អភិបាលខេត្តអានហ៊ួយ។

លោកអភិបាលខេត្តអានហ៊ួយ ក៏បានលើកឡើងអំពីស្ថានភាពភូមិសាស្រ្ត ប្រជាសាស្ត្រ និងសក្តានុពលរបស់ខេត្តអានហួយ ដែលជាខេត្តមួយដែលមានការអភិវឌ្ឍខ្លាំង លើវិស័យឧស្សាហកម្ម បច្ចេកវិទ្យា និងជាខេត្តមួយ ដែលមានចំណូលខ្ពស់សម្រាប់ប្រទេសចិន និងនាំមុខក្នុងការផលិត រថយន្តប្រើចរន្តអគ្គីសនី និងថាមពលផ្សេងៗ ដែលមានការនាំចេញរហូត ដល់ជាងមួយលានគ្រឿងនៅក្នុងមួយឆ្នាំផងដែរ។

ក្នុងកិច្ចជំនួបនេះ ភាគីទាំងពីរ ក៏បានលើកឡើងអំពីទំនាក់ទំនងកម្ពុជា និងចិន បានបង្កើតជាផ្លូវការក្នុងឆ្នាំ១៩៥៨ គិតមកដល់ឆ្នាំនេះមាន រយៈពេល៦៧ឆ្នាំហើយ ប៉ុន្តែប្រជាជននៃប្រទេសទាំងពីរមានការប្រាស្រ័យទាក់ទងគ្នា យ៉ាងជិតស្និទ្ធរាប់រយឆ្នាំកន្លងមក។ ហើយទំនាក់ទំនងនេះជាទំនាក់ទំនង (មិត្តដែកថែប និងជាដៃគូយុទ្ធសាស្ត្រគ្រប់ជ្រុងជ្រោយ) ដែលជាលទ្ធផលនៃភាពស៊ីសង្វាក់គ្នារវាង យុទ្ធសាស្ត្រចតុកោណ និងយុទ្ធសាស្រ្តបច្ចកោណ របស់រដ្ឋាភិបាលកម្ពុជា ក្រោមការដឹកនាំរបស់សម្តេចតេជោ ហ៊ុន សែន អតីតនាយករដ្ឋមន្ត្រី និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងគោលនយោបាយ “ខ្សែក្រវាត់ និងផ្លូវ” របស់លោក ប្រធានាធិបតី ស៊ី ជីនពីង។

តាមរយៈទំនាក់ទំនងការទូត នៃប្រទេសទាំងពីរ ក្នុងនោះ ក្រុងព្រះសីហនុ នៃខេត្តព្រះសីហនុ បានចុះហត្ថលេខាលើលិខិតផ្តួចផ្តើម (Letter of Intent) ជាមួយទីក្រុងស៊ូចូវ នៃខេត្តអានហ៊ួយ កាលពីថ្ងៃទី២៤ ខែមេសា ឆ្នាំ២០១៧ ដោយបានព្រមព្រៀងគ្នាបង្កើតកិច្ចសហប្រតិបត្តិការលើវិស័យសេដ្ឋកិច្ច ពាណិជ្ជកម្ម វិទ្យាសាស្ត្របច្ចេកទេស វប្បធម៌ ការអប់រំ កីឡា អនាម័យ ធនធានមនុស្ស និងទេសចរណ៍។ ហើយស្រុកព្រៃនប់ នៃខេត្តព្រះសីហនុ និងស្រុកយ៉ុងឈាវ នៃក្រុងស៊ូចូវ ក៏បានចុះហត្ថលេខាលើលិខិតផ្តួចផ្តើម (Letter of Intent) កាលពីឆ្នាំ២០១៦ ដោយព្រមព្រៀងគ្នាបង្កើតកិច្ចសហប្រតិបត្តិការលើវិស័យសេដ្ឋកិច្ច ពាណិជ្ជកម្ម វិទ្យាសាស្ត្របច្ចេកទេស វប្បធម៌ ការអប់រំ កីឡា អនាម័យ ធនធានមនុស្ស និងទេសចរណ៍ ផងដែរ។

ក្រោមលទ្ធផលផ្លែផ្កានេះ ខេត្តយើងទាំងពីរក៏បានបន្តខិតខំជំរុញកិច្ចសហប្រតិបត្តិការមិត្តភាព និងទំនាក់ទំនងឱ្យកាន់តែស៊ីជម្រៅថែមទៀត តាមរយៈការចុះហត្ថលេខាលើកិច្ចព្រមព្រៀង ស្តីពីការបង្កើតខេត្តសម្ព័ន្ធមេត្រីភាពរវាងខេត្តព្រះសីហនុ និងខេត្តអានហ៊ួយ ដែលនឹងធ្វើឡើងនៅថ្ងៃស្អែកនេះ(ថ្ងៃទី៥ ខែមិថុនា ឆ្នាំ២០២៥)។

ផ្អែកតាមគោលការណ៍សមភាព និងផ្តល់ផលប្រយោជន៍ឱ្យគ្នាទៅវិញទៅមក ហើយភាគីទាំងពីរនឹងផ្លាស់ប្តូរទំនាក់ទំនងមិត្តភាព និងកិច្ចសហប្រតិបត្តិការលើវិស័យមួយចំនួន ដូចជា សេដ្ឋកិច្ច ពាណិជ្ជកម្ម កសិកម្ម ការអប់រំ បច្ចេកវិទ្យា និងវិទ្យាសាស្ត្រ វប្បធម៌ ទេសចរណ៍ និងឧស្សាហកម្ម។

ក្នុងឱកាសនេះ លោកម៉ាង ស៊ីណេត អភិបាល នៃគណៈអភិបាលខេត្តព្រះសីហនុ ក៏បានសម្តែងនូវក្តីរីករាយ ដោយបានជួបពិភាក្សាការងារយ៉ាងស្និទ្ធស្នាល ជាមួយឯកឧត្តមអភិបាលខេត្ត និងថ្នាក់ដឹកនាំនៃខេត្តអានហ៊ួយ ព្រមទាំងទទួលបានការស្វាគមន៍គណៈប្រតិភូខេត្តព្រះសីហនុ យ៉ាងកក់ក្តៅបំផុត។

លោកអភិបាលខេត្តព្រះសីហនុ សង្ឃឹមយ៉ាងមុតមាំថា កិច្ចសហប្រតិបត្តិការរវាងខេត្តព្រះសីហនុ និងខេត្តអានហ៊ួយ លើវិស័យសេដ្ឋកិច្ច ពាណិជ្ជកម្ម កសិកម្ម អប់រំ បច្ចេកវិទ្យានិងវិទ្យាសាស្ត្រ វប្បធម៌ ទេសចរណ៍ និងហេដ្ឋារចនាសម្ព័ន្ធ នឹងទទួលបានលទ្ធផលជាផ្លែផ្កាកាន់តែល្អប្រសើរ។

ព្រមជាមួយគ្នានេះ ឯកឧត្តមអភិបាលខេត្តព្រះសីហនុ បានស្នើសុំលោកអភិបាលខេត្តអានហ៊ួយ សូមជួយជំរុញវិនិយោគគិន និងភ្ញៀវទេសចរណ៍ ឱ្យទៅបណ្តាក់ទុនវិនិយោគ និងទស្សនាកំសាន្តនៅខេត្តព្រះសីហនុ ឱ្យកាន់តែច្រើនថែមទៀត។ បន្ថែមពីលើនេះទៀត គឺស្នើសុំ ឯកឧត្តមអភិបាលខេត្តអានហ៊ួយ ជួយជំរុញការរៀបចំតភ្ជាប់ជើងហោះហើរត្រង់ពីខេត្តអានហ៊ួយ ទៅខេត្តព្រះសីហនុ។ ជាចុងក្រោយឯកឧត្តមអបាលខេត្តព្រះសីហនុ ក៏បានអញ្ជើញឯកឧត្តមអភិបាលខេត្តអានហ៊ួយ ទៅធ្វើទស្សនកិច្ចនៅខេត្តព្រះសីហនុ ទៅតាមពេលវេលាសមស្របណាមួយ៕

សម្តេចតេជោចាប់ផ្តើមប្រើប្រាស់Fresh AI និងស្នើកូនខ្មែរប្រើប្រាស់កម្មវិធីនេះដែលជាស្នាដៃកូនខ្មែរជាលើកដំបូង

ដោយៈ គង់ សូរិយា

ភ្នំពេញៈ សម្តេចតេជោហ៊ុន សែនប្រធានព្រឹទ្ឋសភាកម្ពុជាបានបញ្ជាក់លើបណ្តាញទំនាក់ទំនងសង្គមថា សម្តេចបានប្រើប្រាស់Fresh AI ជាកម្មវិធីព័ត៌មានឆ្លាតវៃរបស់ខ្មែរជាលើកដំបូង។

សម្តេចបានបានសរសេរលើបណ្តាញ ទំនាក់ទំនងសង្គមនាព្រឹកថ្ងៃទី៥ មិថុនានេះថា ខ្ញុំបានប្រើប្រាស់ Fresh AI ដែលជាកម្មវិធី AI ព័ត៌មានឆ្លាតវៃរបស់ខ្មែរលើកដំបូង គឺងាយស្រួល គ្រាន់តែចុចសួរនាំអ្វីៗជាភាសាខ្មែរ ពាក់ព័ន្ធព័ត៌មានជុំវិញពិភពលោក និងព័ត៌មានចំណេះដឹងផ្សេងៗ វានឹងឆ្លើយតបលឿនរហ័ស ដោយសង្ខេបព័ត៌មាន និងលីងព័ត៌មានពាក់ព័ន្ធជាច្រើន។

សម្តេចបានបញ្ជាក់ថា “កម្មវិធីនេះដើរតួនាទីជា AI ផងនិងដូច Google នៅពេលយើងត្រូវការរកព័ត៌មាន យើងអាចចូលស្វែងរកក្នុង App នេះបាន”។

សម្តេចតេជោបានបន្តថា Fresh AI មានទិន្នន័យផ្ទាល់ខ្លួនជាង៤០០លានពាក្យ (400,000,000) ស្មើជាង៥០ម៉ឺនអត្តបទ និងបន្ថែមបញ្ចូលជារៀងរាល់ថ្ងៃ ធ្វើឱ្យព័ត៌មានកាន់តែច្រើនឡើង និងធ្វើឲ្យកាន់តែឆ្លាតវៃក្នុងការរកព័ត៌មាន។

សម្តេចបញ្ជាក់ថា “វាជាមោទនភាពរបស់ខ្មែរយើង ដែលមានកម្មវិធីAI ព័ត៌មានលើកដំបូងបង្កើតឡើងដោយ អង្គភាពព័ត៌មាន Fresh News ខ្ញុំស្នើសូមបងប្អូនប្រជាពលរដ្ឋខ្មែរទាំងអស់ នាំគ្នាប្រើប្រាស់កម្មវិធីខ្មែរ AI ដើម្បីលើកទឹកចិត្តស្នាដៃខ្មែរ”៕

តើប្រទេសណាទទួលបានតំណែងជើងឯកលេខ១ ដែលស្រូបទាញបានភ្ញៀវទេសចរណ៍បរទេសច្រើនជាងគេក្នុងតំបន់អាស៊ាន?

ដោយ: គង់ លាងហួរ
អន្តរជាតិ: យោងតាមទិន្នន័យបង្ហាញថា ប្រទេសម៉ាឡេស៊ីទទួលភ្ញៀវទេសចរណ៍បរទេសចំនួន១០,១លាននាក់នៅត្រីមាសទី១ ឆ្នាំ២០២៥ ដែលធ្វើឱ្យម៉ាឡេសុីក្លាយជាប្រទេសមានអ្នកមកទស្សនាច្រើនជាងគេបំផុតនៅទូទាំងតំបន់អាស៊ាន ដោយសារគោលនយោបាយលើកលែងទិដ្ឋាការរបស់ខ្លួន។

ចំណែក ប្រទេសថៃ ដែលបានគ្រប់គ្រងតំណែងជើងឯកអស់រយៈពេលជាច្រើនឆ្នាំកន្លងមកនេះ បានជាប់ចំណាត់ថ្នាក់លេខ២ ដោយមានភ្ញៀវទេសចរណ៍បរទេសមកទស្សនាប្រទេសថៃចំនួន៩,៥៥លាននាក់ តាមពីក្រោយដោយប្រទេសវៀតណាមចំនួន៦លាននាក់ និងសិង្ហបុរីចំនួន៤,៣១លាននាក់។

រដ្ឋមន្ត្រីក្រសួងមហាផ្ទៃម៉ាឡេសុី លោក Saifuddin Nasution Ismail បានលើកឡើងថា នាពេលថ្មីៗនេះ ប្រទេសម៉ាឡេស៊ីបានប្រកាសបន្តលើកលែងទិដ្ឋាការសម្រាប់អ្នកដំណើរជនជាតិចិនចំនួន៥ឆ្នាំបន្ថែមទៀត និងអាចបន្តរយៈពេល៥ឆ្នាំបន្ថែមទៀតដល់ឆ្នាំ២០៣៦។

ជាមួយគ្នានេះ ប្រទេសម៉ាឡេសុីក៏បានសម្រេចបន្តការលើកលែងទិដ្ឋាការចំពោះភ្ញៀវទេសចរណ៍ជនជាតិឥណ្ឌារហូតដល់ឆ្នាំ២០២៦ខាងមុខផងដែរ។ នេះបើយោងតាមការដកស្រង់ចុះផ្សាយដោយកាសែតរៀតណាម Vnexpress។

វិស័យទេសចរណ៍របស់ប្រទេសថៃបានរងគ្រោះដោយសារវិបត្តិផ្សេងៗ រួមមានការព្រួយបារម្ភអំពីសន្តិសុខសុវត្ថិភាពរបស់ភ្ញៀវទេសចរណ៍បរទេស ជាពិសេសបន្ទាប់ពីមានករណីចាប់ជំរិតនៅក្នុងខែមករា។ការណ៍នេះបានធ្វើឱ្យចំនួនភ្ញៀវទេសចរណ៍បរទេសធ្លាក់ចុះ៕

ការសិក្សា: ដីនៅរាជធានីតូក្យូរបស់ប្រទេសជប៉ុនមានតម្លៃប៉ុន្មានក្នុងមួយម៉ែត្រការ៉េ?

ដោយ: គង់ លាងហួរ
អន្តរជាតិ: ទីក្រុងតូក្យូជាមជ្ឈមណ្ឌលសេដ្ឋកិច្ច និងពាណិជ្ជកម្មដ៏ធំមួយក្នុងតំបន់អាសុី និងក្នុងពិភពលោក។រាជធានីរបស់ប្រទេសជប៉ុនមួយនេះប្រមូលផ្តុំដោយអគារខ្ពស់ៗកប់ពពកជាច្រើន ដោយមិនសូវមានដីទំនេរច្រើននោះទេ។ ហេតុនេះ ដីនៅទីក្រុងតូក្យូមានតម្លៃខ្ពស់កប់ពពក។

ខាងក្រោមនេះជាតំបន់ ដែលមានតម្លៃដីថ្លៃជាងគេបំផុតទាំង៥ ក្នុងទីក្រុងតូក្យូគិតត្រឹមពាក់កណ្តាលឆ្នាំ២០២៥៖

ទី១: តំបន់ផ្សារទំនើប Ginza

តំបន់ផ្សារទំនើប Ginza ដ៏ល្បីល្បាញមួយនេះមានទីតាំងស្ថិតក្នុងសង្កាត់ Chou។តំបន់ Ginza នៅតែជាតំបន់ដែលមានតម្លៃដីពាណិជ្ជកម្មថ្លៃជាងគេបំផុតនៅក្នុងទីក្រុងតូក្យូនៃប្រទេសជប៉ុន។

ដីនៅក្បែរទីតាំងសំខាន់ៗដូចជា ហាងលក់ឧបករណ៍តន្ត្រី Yamano Music Ginza Main Store ក្នុងតំបន់ពាណិជ្ជកម្ម Ginza មានតម្លៃជាមធ្យមចំនួន៥៥លានយ៉េន(ប្រហែល៣៨១.៣៧៧ដុល្លារអាមេរិក)ក្នុងមួយម៉ែត្រការ៉េ។

ទី២: សង្កាត់ Chiyoda

ដីនៅសង្កាត់នេះមានតម្លៃជាមធ្យមចំនួន៨,៣៨លានយ៉េន(ប្រហែល៥៨.១០៨ដុល្លារអាមេរិក)ក្នុងមួយម៉ែត្រការ៉េ។ សង្កាត់ Chiyoda ជាតំបន់ពាណិជ្ជកម្មកណ្តាលមួយរបស់ទីក្រុងតូក្យូ ដែលប្រមូលផ្តុំដោយអគាររដ្ឋាភិបាល និងទីស្នាក់ការកណ្តាលរបស់ក្រុមហ៊ុននានា។

ទី៣: សង្កាត់ Shibuya

ដីនៅសង្កាត់នេះមានតម្លៃជាមធ្យមចំនួន៧លានយ៉េន(ប្រហែល៤៨.៥៤១ដុល្លារ)ក្នុងមួយម៉ែត្រការ៉េ។សង្កាត់ Shibuya ជាមជ្ឈមណ្ឌលពាណិជ្ជកម្ម និងធុរកិច្ចដ៏សំខាន់របស់ទីក្រុងតូក្យូ ដែលទទួលបានការពេញនិយមក្នុងចំណោមប្រជាជនជប៉ុនវ័យក្មេង។

ទី៤: សង្កាត់ Shinjuku

ដីនៅសង្កាត់ Shinjuku មានតម្លៃជាមធ្យមចំនួន៦,៥លានយ៉េន(ប្រហែល៤៥.០៧៨ដុល្លារ)ក្នុងមួយម៉ែត្រការ៉េ។ សង្កាត់ Shinjuku ត្រូវបានគេស្គាល់ថា ជាតំបន់សម្បូរទៅដោយសារអគារខ្ពស់ៗកប់ពពក មជ្ឈមណ្ឌលផ្សារទំនើប និងជីវិតពេលរាត្រីដ៏រស់រវើក។

ទី៥: តំបន់ Akasaka

តំបន់ Akasaka មានទីតាំងក្នុងសង្កាត់ Minato។ តំបន់ Akasaka ជាតំបន់ដែលមានតម្លៃដីលំនៅដ្ឋានខ្ពស់ជាងគេបំផុតក្នុងប្រទេសជប៉ុន។ តំបន់នេះសម្បូរទៅដោយស្ថានទូត អគារលំនៅដ្ឋានប្រណីត និងស្ថិតនៅជិតអគារ Azabudai Hills។ ដីនៅតំបន់ Azabudai Hills មានតម្លៃប្រហែល៥,៥៦លានយ៉េនក្នុងមួយម៉ែត្រការ៉េ(ប្រហែល៣៨.៥៥៤ដុល្លារអាមេរិក)៕

ការវិនិយោគមជ្ឈមណ្ឌលទិន្នន័យនៅទូទាំងតំបន់អាសុីមានការកើនឡើង ទោះប្រឈមមុខនឹងកង្វះថាមពល

ដោយ: គង់ លាងហួរ
អន្តរជាតិ: យោងតាមរបាយការណ៍ស្រាវជ្រាវថ្មីពីក្រុមហ៊ុនប្រឹក្សាអចលនទ្រព្យ CBRE បានឱ្យដឹងថា ទោះជាមានកំណើននៃការផ្គត់ផ្គង់មជ្ឈមណ្ឌលទិន្នន័យទ្វេរដងនៅតំបន់អាស៊ីប៉ាស៊ីហ្វិកក្នុងរយៈពេល៣ឆ្នាំខាងមុខយ៉ាងណាក្តី ក៏តំបន់នេះនឹងបន្តជួបភាពខ្វះខាតថាមពលចន្លោះពី១៥ជីហ្គាវ៉ាត់ ទៅ២៥ជីហ្គាវ៉ាត់នៅឆ្នាំ២០២៨។

ការកើនឡើងនៃការចាប់យកបច្ចេកវិទ្យាបញ្ញាសិប្បនិមិត្ត (AI) និងតម្រូវការផ្ទុកទិន្នន័យ កំពុងជំរុញតម្រូវការមជ្ឈមណ្ឌលទិន្នន័យនៅទូទាំងតំបន់អាស៊ីប៉ាស៊ីហ្វិក។ ប៉ុន្តែ ក្រុមហ៊ុនប្រឹក្សាអចលនទ្រព្យ CBRE អះអាងថា “មិនមែនមជ្ឈមណ្ឌលទិន្នន័យដែលមានស្រាប់ និងគម្រោងបង្កើតមជ្ឈមណ្ឌលទិន្នន័យនាពេលអនាគតទាំងអស់ក្នុងតំបន់ត្រូវបានបំពាក់ដោយ AI នោះទេ”។

មជ្ឈមណ្ឌលទិន្នន័យ ដែលផ្តោតលើ AI ត្រូវការថាមពលច្រើនជាងមជ្ឈមណ្ឌលទិន្នន័យធម្មតា។ ដោយសារគម្រោងមជ្ឈមណ្ឌលទិន្នន័យជាច្រើននាពេលបច្ចុប្បន្នត្រូវបានរចនាសាងសង់ឡើងមុនយុគសម័យ AI ដូច្នេះតំបន់អាស៊ីប៉ាស៊ីហ្វិកអាចប្រឈមមុខនឹងការខ្វះខាតថាមពលនាពេលអនាគត។

ទោះបីជាមានបញ្ហាប្រឈមទាំងនេះយ៉ាងណាក្តី ក៏ការបោះទុនវិនិយោគលើមជ្ឈមណ្ឌលទិន្នន័យនៅតែមានភាពរឹងមាំ។ យោងតាមក្រុមហ៊ុន MSCI និងក្រុមហ៊ុនប្រឹក្សាអចលនទ្រព្យ CBRE Research បានឱ្យដឹងថា ទំហំនៃការវិនិយោគផ្ទាល់បានកើនឡើងដល់ចំនួន៤,៧ពាន់លានដុល្លារក្នុងឆ្នាំ២០២៤។

លោក Tom Fillmore អ្នកជំនាញជាន់ខ្ពស់ផ្នែកមជ្ឈមណ្ឌលទិន្នន័យ និងទីផ្សារមូលធនអាស៊ីប៉ាស៊ីហ្វិកនៅក្រុមហ៊ុន CBRE បានមានប្រសាសន៍ឱ្យដឹងថា “ដើម្បីទាញយកផលប្រយោជន៍ពីកំណើនបច្ចេកវិទ្យា AI បណ្តាវិនិយោគិនគួរផ្តោតលើការសាងសង់មជ្ឈមណ្ឌលទិន្នន័យទំនើបកម្រិតខ្ពស់បន្ថែមទៀត”។

មូលដ្ឋានគ្រឹះដ៏រឹងមាំនៃវិស័យមជ្ឈមណ្ឌលទិន្នន័យ ត្រូវបានគេរំពឹងថា នឹងបង្កើតនូវឱកាសវិនិយោគដ៏ច្រើន មិនថាតាមរយៈការទិញដោយផ្ទាល់ ការអភិវឌ្ឍន៍ថ្មី ឬភាពជាដៃគូបណ្តាក់ទុនរួមគ្នា៕

បណ្តាអ្នកវិនិយោគជើងចាស់មួយចំនួននៅទីក្រុងហុងកុងកំពុងផ្ងារជើង ស្របពេលទីផ្សារអចលនទ្រព្យដាំក្បាលចុះ

ដោយ: គង់ លាងហួរ
អន្តរជាតិ: ការដាំក្បាលចុះនៃទីផ្សារអចលនទ្រព្យពាណិជ្ជកម្មនៅទីក្រុងហុងកុងរបស់ប្រទេសចិនបានធ្វើឱ្យបណ្តាអ្នកវិនិយោគជើងចាស់ជួបប្រទះការលំបាកផ្នែកហិរញ្ញវត្ថុ ដោយក្រុមអ្នកជំនាញរំពឹងថា ការលក់អាចនឹងបន្តធ្លាក់ចុះ។

កាលពីខែមេសា ម្ចាស់បំណុលបានរឹបអូសយកវិមានប្រណីតមួយខ្នងនៅតំបន់ Pok Fu Lam របស់លោក David Chan Ping-chi ដែលជាវិនិយោគិនជើងចាស់ដ៏ល្បីឈ្មោះ ដោយដាក់លក់ក្នុងតម្លៃ៤៣០លានដុល្លារហុងកុង (ប្រមាណ៥៤,៨លានដុល្លារអាមេរិក) កាលពីសប្តាហ៍មុន។

ទីភ្នាក់ងារអចលនទ្រព្យនានាបានអះអាងថា កាលពីដើមឆ្នាំនេះ លោក Chan បានខកខានទូទាត់សងប្រាក់កម្ចីប្រហែល៣៥០លានដុល្លារហុងកុងទៅឱ្យធនាគារ Fubon Bank។ លោកបានព្យាយាមប្រកាសដាក់លក់ផ្ទះរបស់លោកក្នុងទំហំទឹកប្រាក់ដូចគ្នានេះកាលពីឆ្នាំមុនដើម្បីទូទាត់សងបំណុល។ ប៉ុន្តែ លោកមិនអាចស្វែងរកអ្នកទិញបានទេ។

វិនិយោគិនជើងចាស់ ដែលបានប្រឡូកនៅក្នុងវិស័យផលិតកម្មរូបនេះ បានប្រែក្លាយជាអ្នកវិនិយោគអចលនទ្រព្យដ៏សកម្មមួយរូប ខណៈលោកគ្រប់គ្រងផលបត្រអចលនទ្រព្យជាច្រើន រាប់ចាប់តាំងពីការិយាល័យ អគារលំនៅដ្ឋានប្រណីត ហាងលក់រាយ និងចំណតរថយន្ត។

លោក Chan ជាសមាជិកមួយរូបនៃសម្ព័ន្ធអ្នកវិនិយោគចំនួន១០រូប ដែលបានទិញអគារ The Center កម្ពស់៤៨ជាន់ពីក្រុមហ៊ុន CK Asset Holdings ក្នុងតម្លៃ៤០,២ពាន់លានដុល្លារហុងកុងក្នុងឆ្នាំ២០១៨ ដែលធ្វើឱ្យអគារខ្ពស់កប់ពពកមួយនេះក្លាយជាអគារមានតម្លៃថ្លៃជាងគេបំផុតក្នុងពិភពលោក។

លោក Chan ដែលជាម្ចាស់អគារការិយាល័យចំនួន៧ជាន់នៅអគារ The Center បានលក់ការិយាល័យ២ជាន់ចុងក្រោយទៅឱ្យធនាគារ DBS Group របស់ប្រទេសសិង្ហបុរីក្នុងខែកញ្ញា និងខែវិច្ឆិកា ឆ្នាំមុន ក្នុងតម្លៃជាមធ្យម២៦.៥០០ដុល្លារហុងកុងក្នុងមួយហ្វីតការ៉េ។ នេះជាការបញ្ចុះតម្លៃជាង២០ភាគរយបើធៀបនឹងតម្លៃដែលលោកបានទិញ។

លោក Chan បានថ្លែងនៅក្នុងបទសម្ភាសន៍មួយថា ការវិនិយោគលើអចលនទ្រព្យលក់រាយ និងឧស្សាហកម្មកំពុងជួបប្រទះការខាតបង់ដ៏ធំបំផុត ដោយតម្លៃបានដាំក្បាលចុះធ្លាក់ចុះប្រហែល៦០ភាគរយ។ កាលណាហាងកាន់តែធំ ការខាតបង់កាន់តែច្រើន៕

តម្លៃពិសេស-OCIC បើកគម្រោងថ្មី TIA CITY ជិតព្រលានយន្តហោះអន្តរជាតិតេជោ

ភ្នំពេញ៖ គម្រោងអចលទ្រព្យថ្មីដែលស្ថិតលើផ្លូវ ៦០ ម៉ែត្រ នៅជិតព្រលានយន្តហោះអន្តរជាតិតេជោ កំពុងដំណើរការសាងសង់និងបើកលក់ជាផ្លូវការជាមួយតម្លៃពិសេស (Pre-Sale) ចំណេញលើចំណេញ។

គម្រោងTerra ជាគម្រោងថ្មីដំបូងគេនៃគម្រោងធំTIA CITY ដែលអភិវឌ្ឍដោយក្រុមហ៊ុនអូស៊ីអាយស៊ី (OCIC) ដែលបានបើកលក់ជាផ្លូវការក្នុងតម្លៃពិសេស ត្រឹមតែ ៦ ម៉ឺនដុល្លារជាងប៉ុណ្ណោះ ជូនដល់អតិថិជន។ ការផ្តល់ជូនតម្លៃពិសេសនេះ ត្រឹមថ្ងៃទី25 ខែឧសភា ឆ្នាំ2025 តែប៉ុណ្ណោះ ដូចនេះ អតិថិជនអញ្ជើញមកមុន នឹងទទួលបានឱកាសនេះមុនគេ ហើយក៏នឹងមានឱកាសជ្រើសរើសទីតាំងមុនគេផងដែរ។

ទីតាំងល្អ បានទាំងប្រកបអាជីវកម្ម បានទាំងរស់នៅ ស្ថិតនៅតំបន់សក្តានុពល ចរាចរណ៍ទៅមកងាយស្រួលលើផ្លូវ 60 ម៉ែត្រ គម្រោង Terra ជិតព្រលានយន្តហោះអន្តរជាតិថ្មី ជាមួយលក្ខខណ្ឌងាយស្រួលសម្រាប់អតិថិជន៖

👉 កក់ប្រាក់មុនតិច

👉 បង់ប្រចាំខែទាប

👉 បង់ឥតការប្រាក់រយៈពេលវែង

👉 អញ្ជើញមកមុន នឹងទទួលបានឱកាសមុន

👉 មកមុន ទទួលបានចំណេញមុនប

លោកអ្នកបានដឹងហើយថា ក្នុងខែកក្កដា ខាងមុខនេះ បើមិនមានការប្រែប្រួលទេ គម្រោងអាកាសយានដ្ឋានអន្តរជាតិតេជោ នឹងបើកដំណើរជាផ្លូវការជើងហោះហើរទទួលភ្ញៀវជាតិ-អន្តរជាតិ ចរាចរណ៍ មមាញឹក ព័ន្ធជុំវិញដោយផ្សារទំនើបៗ គម្រោងធំៗ ផ្លូវធំ ទូលាយ ងាយស្រួលចរាចរណ៍ ទៅមក ងាយស្រួលក្នុងការរស់នៅនិងប្រកបអាជីវកម្ម។

សូមកុំឱ្យឱកាសនេះកន្លងផុតទៅ Pre-Sale ចំនួនមានកំណត់! សម្រាប់ព័ត៌មានលម្អិតបន្ថែមទាក់ទងទៅកាន់សហការីផ្នែកលក់៖ 087 888 501 / 011 888 501

ទីតាំងការិយាល័យផ្នែកលក់គម្រោងTIA CITY៖ https://maps.app.goo.gl/thXas1JXpJpxv6GT6
Facebook Page: https://www.facebook.com/profile.php?id=61555283248818

តើការជួលការិយាល័យនៅអគារភ្លោះដ៏ល្បីល្បាញនៅទីក្រុងគូឡាឡាំពួររបស់ប្រទេសម៉ាឡេសុី មានតម្លៃប៉ុន្មាន?

ដោយ: គង់ លាងហួរ
អន្តរជាតិ: អគារភ្លោះ Petronas Twin Towers ជាបេះដូងសម្រាប់វិស័យទេសចរណ៍របស់ប្រទេសម៉ាឡេស៊ី ដែលស្ថិតនៅក្នុងទីក្រុង គូឡាឡាំពួរ។ អគារ Petronas Twin Tower បានទាក់ទាញភ្ញៀវទេសចរណ៍ជាច្រើនមកទស្សនា និងផ្ដិតយករូបភាពនាពេលរាត្រី។

នៅម៉ោងប្រមាណ៨យប់ ភ្ញៀវទេសចរជាតិ-អន្តរជាតិ ជាច្រើនបានមកអង្គុយមើលទេសភាព និងផ្ដិតយករូប Selfie ជាមួយអគារភ្លោះដ៏ស្រស់ស្អាត ដែលបញ្ចេញភ្លើងពណ៍ អមជាមួយសួនបាញ់ទឹកបញ្ចេញភ្លើងចម្រុះនៅក្បែរអគារនេះ។

អគារភ្លោះ Petronas Twin Towers មាន៨៨ជាន់ និងមានកម្ពស់៤៩១ម៉ែត្រ និងមានស្ពានដើរឆ្លងពីអគារមួយទៅកាន់អគារមួយទៀតផងដែរ។ អគារភ្លោះនេះបានចំណាយពេលសាងសង់៧ឆ្នាំ និងចាប់ផ្ដើមបើកដំណើរការជាផ្លូវការនៅឆ្នាំ១៩៩៩ ដោយចំណាយទុនវិនិយោគអស់១,៦ពាន់លានដុល្លារ។

គិតចាប់ពីពេលបើកដាក់ឱ្យដំណើរការនៅឆ្នាំ១៩៩៩ រហូតដល់ឆ្នាំ២០០៤ អគារភ្លោះនេះ បានជាប់ឈ្មោះជាផ្លូវការថា ជាអគារខ្ពស់ជាងគេបំផុតនៅលើពិភពលោក។ ប៉ុន្តែ តំណែងនេះបានរបូតទៅវិញ នៅពេលដែលអគារ Taipei 101 នៅកោះតៃវ៉ាន់ បានបើកដាក់ឱ្យដំណើរការនៅដំណាច់ខែធ្នូ ឆ្នាំ២០០៤។

អគារនេះត្រូវបានរចនាឌីហ្សាញឡើងដោយលោក César Pelli ដែលជាស្ថាបត្យករជនជាតិអាហ្សង់ទីនកាត់សាសន៍អាមេរិក។ អគារនេះមានរចនាប័ទ្មក្រោយសម័យទំនើបដ៏ប្លែកអស្ចារ្យមួយបែប ដែលតំណាងឱ្យសតវត្សទី២១ សម្រាប់ទីក្រុងគូឡាឡាំពួរ។

អគារភ្លោះនេះត្រូវបានតភ្ជាប់គ្នាដោយស្ពានអាកាសចំនួន២ជាន់ នៅជាន់ទី៤១ និងជាន់ទី៤២ ដោយបំបែកកំណត់ត្រាជាស្ពានកម្ពស់២ជាន់ខ្ពស់បំផុតនៅលើពិភពលោក។ ស្ពានអាកាសត្រូវបានរចនាឡើងយ៉ាងពិសេស និងមានមុខងារសម្របសម្រួលទប់ចលនាលំនឹងរវាងអគារទាំងពីរក្នុងពេលមានខ្យល់បក់ខ្លាំង។

អគារនេះមានទីតាំងស្ថិតនៅចំកណ្តាលទីក្រុងគូទ្បាទ្បាំពួរ ដែលមានអចលនទ្រព្យពហុមុខងារ ដូចជា ហាងទំនិញល្បីៗ ភោជនីយដ្ឋាន ការិយាល័យធ្វើការ សាលប្រជុំ ដែលជាកម្មសិទ្ឋរបស់ក្រុមហ៊ុន KLCC Holdings Sdn Bhd។

គិតត្រឹមពាក់កណ្តាលឆ្នាំ២០២៥នេះ តម្លៃជួលការិយាល័យនៅក្នុងអគារភ្លោះ Petronas Twin Tower មានតម្លៃជាមធ្យមចំនួន១៥រីងហ្គីត ក្នុងមួយហ្វីតការ៉េ(ប្រមាណ៣៨ដុល្លារអាមេរិកក្នុងមួយម៉ែត្រការ៉េ)។

យ៉ាងណាមិញ អគារភ្លោះកប់ពពកនេះមិនមានយូនីតលំនៅដ្ឋាននោះទេ។ប៉ុន្តែ នៅក្បែរនោះ គេសង្កេតឃើញមានអគារលំនៅដ្ឋានជាច្រើន ដូចជា អគារ Star Residences អគារ The Binjai On The Park អគារ The Troika និង អគារ Vortex Tower។

អគារលំនៅដ្ឋានទាំងនេះផ្តល់នូវជម្រើសជាច្រើនសម្រាប់អ្នកដែលមានបំណងរស់នៅក្បែរអគារភ្លោះ Petronas Twin Tower ដែលជានិមិត្តរូបរបស់ទីក្រុងគូឡាឡាំពួរ៕

1...225226227...3,256 Page 226 of 3,256