សេដ្ឋវិទូ​គាំទ្រ​សំណើ​រដ្ឋាភិបាល​ទៅកាន់​ធនាគារឯកជន និង​គ្រឹះស្ថាន​ហិរញ្ញវត្ថុលើ​ការពន្យារពេល​បង់ប្រាក់

ដោយៈ​រ៉ា​ណេ​ត

ភ្នំពេញៈ អនុវត្តតាម​ការណែនាំ​របស់​សម្ដេច​តេ​ជោ ហ៊ុន សែន ប្រមុខ​ដឹកនាំ​រាជរដ្ឋាភិបាល​កម្ពុជា ធនាគារជាតិ​នៃ​កម្ពុជា បានចេញ​សេចក្តីជូនដំណឹង​បន្ទាប់​មួយ ស្នើសុំ​ដល់​គ្រឹះស្ថាន​ធនាគារ និង​ហិរញ្ញវត្ថុ បន្ត​កិច្ចសហការ​ល្អ ក្នុង​ក្របខណ្ឌ​កិច្ចការពារ​អតិថិជន និង​បន្ត​ផ្តល់​ការអនុគ្រោះ តាម​លទ្ធភាព​ចំពោះ​អ្នក​ខ្ចីប្រាក់ ដែល​បាន​រង​ផលប៉ះពាល់​ជាក់ស្តែង​ដោយសារ​ទឹកជំនន់។

លោក​បណ្ឌិត ហុង វណ្ណៈ អ្នកវិភាគ និង​ស្រាវជ្រាវ​សេដ្ឋកិច្ច​នៃ​រាជបណ្ឌិត្យសភាកម្ពុជា នៅ​ល្ងាច​ថ្ងៃទី២១ ខែតុលា ឆ្នាំ២០២០ បាន​ប្រសាសន៍ថា ប្រសិនបើ​បណ្តា​ធនាគារឯកជន ក៏ដូចជា​គ្រឹះស្ថាន​ហិរញ្ញវត្ថុ​នានា អនុវត្តន៍​តាម​ការស្នើ​សុំ​របស់​រាជរដ្ឋាភិបាល​បាន​ទាំងអស់គ្នា វា​គឺជា​រឿង​មួយ​ដ៏​ល្អ ហើយក៏​ជា​សកម្មភាព ចូលរួម​ចែករំលែក​នូវ​ទុក្ខលំបាក​របស់​ប្រជាពលរដ្ឋ ក៏ដូចជា​ផល​លំបាក​របស់​រដ្ឋាភិបាល​ផងដែរ។

លោក​បណ្ឌិត​បន្តថា “វា​ដូច​ជាមុន​មាន​ផលប៉ះពាល់ ទៅដល់​គ្រឹះស្ថាន​ហិរញ្ញវត្ថុ​ណាមួយ​នោះទេ ព្រោះ​ជាការ​ស្ម័គ្រចិត្ត​ចូលរួម​អនុវត្ត​តែប៉ុណ្ណោះ ហើយក៏​មិនមែនជា​ការកំណត់​រប​ស់រាជ​រដ្ឋាភិបាល​នោះដែរ” ។ លោក​បន្ថែមថា “តែ​ជា​សំណើរ​សុំឱ្យ​មានការ​ចូលរួម​ក្នុង​គ្រា ដែល​កំពុង​ប្រឈម​នឹង​ផល​លំបាក​របស់​ប្រជាពលរដ្ឋ ស្ទើរ​ទូទាំងប្រទេសផ្ទួនៗ ព្រោះ​វិបត្តិ Covid-19 មិនទាន់​ផុតរលត់​ផង គ្រោះ​ជំនន់​បានមក​បន្ត​បន្ថែម​មួយតង់​ទៀត” ។

អ្នកវិភាគ​សេដ្ឋកិច្ច​រូបនេះ​បាន​បញ្ជាក់ថា រាល់​ការចូលរួម​ពី​សំណាក់​ធនាគារឯកជន ក៏ដូចជា​គ្រឹះស្ថាន​ហិរញ្ញ ទាំងអស់ គឺ​ពួកគេ​សុទ្ធតែ​បាន​សិក្សា​លម្អិត ពី​គោលការណ៍​ផ្ទៃក្នុង​របស់​ពួកគេ​រួចរាល់ មុនពេល​សម្រេច​អនុវត្តន៍ នៅក្នុង​ដំណាក់កាល​ណាមួយ​ជាមិនខាន។

ធនាគារជាតិ​នៃ​កម្ពុជា​នៅ​ល្ងាច​ថ្ងៃទី២១ ខែតុលា ឆ្នាំ២០២០ នេះ​បាន​បញ្ជាក់ថា ធនាគារជាតិ​នៃ​កម្ពុជា សូម​ថ្លែង​សរសើរ​ចំពោះ​គ្រឹះស្ថាន​ធនាគារ និង​ហិរញ្ញវត្ថុ ដែល​បាន​ចូលរួម​សហការ​អនុវត្ត​ន៍​យ៉ាង​ល្អ ក្នុងការ​អនុវត្ត​វិធានការ​នានា របស់​រាជរដ្ឋាភិបាល និង​ធនាគារជាតិ​នៃ​កម្ពុជា ដែល​បាន​ដាក់ចេញ ដូចជា សារាចរ​ណែនាំ​ស្តីពី​ឥណទាន​រៀបចំ​ឡើងវិញ ការអនុគ្រោះ ប​ន្ទូ​រ-បន្ថយ​កម្រៃ​សេវាផ្សេងៗ ពាក់ព័ន្ធ​នឹង​ឥណទាន និង/ឬ​លើកលែង​ការផាកពិន័យផ្សេងៗ និង​ការ​រឹបអូស​ទ្រព្យ​បញ្ចាំ ដោយ​មិនមាន​ដីកា​ពី​តុលាការ​ជាដើម ក្នុងកំឡុងពេល នៃ​ការរីក​រាលដាល​នៃ​ជំងឺ​កូ​វីដ១៩ ដើម្បី​សម្រាល​បន្ទុក​របស់​អ្នក​ខ្ចីប្រាក់។

ទន្ទឹមនេះ ក្នុងស្ថានភាព​ដែល​ខេត្ត-ក្រុង​មួយចំនួន នៃ​ប្រទេស​កម្ពុជា ទទួលរង​ផលប៉ះពាល់​ពី​គ្រោះទឹកជំនន់ ធនាគារជាតិ​នៃ​កម្ពុជា ក៏​ស្នើសុំ​ដល់​គ្រឹះស្ថាន​ធនាគារ និង​ហិរញ្ញវត្ថុ បន្ត​កិច្ចសហការ​ល្អ ក្នុង​ក្របខណ្ឌ​កិច្ចការពារ​អតិថិជន និង​បន្ត​ផ្តល់​ការអនុគ្រោះ តាម​លទ្ធភាព​ចំពោះ​អ្នក​ខ្ចីប្រាក់ ដែល​បាន​រង​ផលប៉ះពាល់​ជាក់ស្តែង ដោយសារ​ទឹកជំនន់។

ធនាគារជាតិ​នៃ​កម្ពុជា សង្ឃឹម​យ៉ាង​មុតមាំ​ថា គ្រឹះស្ថាន​ធនាគារ​និង​ហិរញ្ញវត្ថុ នឹង​បន្ត​ចូលរួម​សហការ ប្រកបដោយ​ការយោគយល់ និង​អធ្យាស្រ័យ​ខ្ពស់ ស្របតាម​ស្ថានភាព​ជាក់ស្តែង​របស់​អតិថិជន៕

ក្រុមហ៊ុន ប៉េង ហួត គ្រុប ឧបត្ថម្ភរថយន្ត ២គ្រឿង ដល់រដ្ឋបាលខណ្ឌច្បារអំពៅ និងអង្ករចំនួន៥០តោន ជូនសាលារាជធានីភ្នំពេញ

កាលពីព្រឹកថ្ងៃទី២១ ខែតុលា ឆ្នាំ២០២០ ក្រុមហ៊ុន ប៉េង ហួត គ្រុប បាននាំយក រថយន្តចំនួន០២គ្រឿង ( រថយន្តបោសសំអាតផ្លូវចំនួន ០១គ្រឿង និងរថយន្តផ្ទុកទឹកចំណុះ ៨,០០០លីត្រ ចំនួន ០១គ្រឿង) សរុបជាថវិកាស្មើនឹង ១៣៥,០០០ (មួយរយសាមសិបប្រាំពាន់ដុល្លាអាមេរិកគត់) ជូនដល់រដ្ឋបាលខណ្ឌច្បារអំពៅសម្រាប់ការងារសម្អាតបរិស្ថានដើម្បីលើកកម្ពស់សោភ័ណភាពក្នុងមូលដ្ឋាន។

ថ្លែងក្នុងពិធីប្រគល់រថយន្ត លោកជំទាវ ហុង ដានី អគ្គនាយិកា ក្រុមហ៊ុន បុរី ប៉េង ហួត បានលើកឡើងថា៖ ” នាងខ្ញុំមានកិត្តិយស និងសេចក្តីរីករាយដែលបានចូលរួមចំណែកអភិវឌ្ឍទីក្រុងស្អាតជាមួយគម្រោងអភិវឌ្ឍដែលធំជាងគេរបស់ក្រុមហ៊ុនមកក្នុងខណ្ឌច្បារអំពៅនេះ។ សូមថ្លែងអំណរគុណផងដែរដល់រដ្ឋបាលខណ្ឌច្បារអំពៅដែលតែងតែសហការ គាំទ្រ និងជួយសម្រួលដល់ការអភិវឌ្ឍរបស់ក្រុមហ៊ុន។ ជាមួយឡានទាំង០២គ្រឿងនេះ នាងខ្ញុំសង្ឃឹមថា យើងចូលរួមទាំងអស់គ្នាថែរក្សាបរិស្ថាន និងសំអាតទីក្រុងរបស់យើងឲ្យបានកាន់តែស្អាត “។

លោកចេង មុនីរ៉ា អភិបាលនៃគណៈអភិបាលខណ្ឌច្បារអំពៅ  បានថ្លែងអំណរគុណយ៉ាងជ្រាលជ្រៅចំពោះក្រុមហ៊ុន ប៉េង ហួត គ្រុប ដែលតែងតែចូលរួមសហការជាមួយរដ្ឋបាលខណ្ឌច្បារអំពៅលើផ្នែកកិច្ចការសាធារណៈជាច្រើនដូចជា៖ ការរក្សាសណ្ដាប់ធ្នាប់សន្តិសុខ ការកសាងហេដ្ឋារចនាសម្ព័ន្ធ ការលើកកម្ពស់សោភ័ណភាពបរិស្ថានស្អាត និងការអភិវឌ្ឍធនធាននានា។ល។ ក្នុងគោលបំណងចូលរួមសហការជាមួយអជ្ញាធរមូលដ្ឋាន ដើម្បីធានានូវឌ្ឍនភាព សណ្ដាប់ធ្នាប់សន្តិសុខសង្គម សោភ័ណភាពទីក្រុងស្អាត របស់មូលដ្ឋានខណ្ឌច្បារអំពៅ និងប្រជាពលរដ្ឋទាំងអស់គ្នា។

លោកបានបន្ថែមថា៖ ” រថយន្តទាំងពីគ្រឿងនេះ ពិតជានឹងបានចូលរួមចំណែកយ៉ាងសំខាន់ ក្នុងការលើកកម្ពស់សោភ័ណបរិស្ថាន ការអភិវឌ្ឍទីក្រុងស្អាត ព្រមទាំងចូលរួមអនុវត្តសំអាតការងារអនាម័យ ដើម្បីថែរក្សាបរិស្ថានស្អាតសម្រាប់មូលដ្ឋានខណ្ឌច្បារអំពៅ និងបម្រើដល់ការងារសង្គមផ្សេងៗទៀត “។

ក្នុងថ្ងៃដដែលនេះដែរ តំណាងរបស់ក្រុមហ៊ុន ប៉េង ហួត គ្រុប ក៏បាននាំយកនូវអង្ករចំនួន៥០តោន ឧបត្ថម្ភដល់សាលារាជធានីភ្នំពេញ ដើម្បីជួយសម្រួល និងសង្គ្រោះដល់បងប្អូនប្រជាពលរដ្ឋដែលរងគ្រោះដោយសារទឹកជំនន់។

ទីផ្សារអចលនទ្រព្យ និងលំនៅដ្ឋានក្នុងខណ្ឌសែនសុខ នៅតែបន្តមានតម្រូវការ

ដោយ ៖ សំំណាង

ភ្នំពេញ ៖ ខណៈពេលដែលទីផ្សារអចលនទ្រព្យនៅតាមតំបន់មួយចំនួននៃរាជធានីភ្នំពេញកំពុងទទួលរងនូវការធ្លាក់ចុះក្រោមឥទ្ធិពលនៃវិបត្តិសេដ្ឋកិច្ចជាសកល ដែលកំពុងគំរាមកំហែងនោះ សម្រាប់តែតំបន់ខ័ណ្ឌសែនសុខ នៅតែបង្ហាញពីភាពល្អប្រសើរនៃទីផ្សាររបស់ខ្លួនជាមួយនឹងគម្រោងអភិវឌ្ឍន៍ជាច្រើន។

ប្រធានសមាគមអចលនទ្រព្យសកល (GRA) លោក សំ សុខនឿន បានមានប្រសាសន៍ប្រាប់តាមទូរស័ព្ទនៅល្ងាចថ្ងៃទី២១ ខែតុលា ឆ្នាំ២០២០ថា តំបន់សែនសុខ នៅតែបន្តមានសកម្មភាពអភិវឌ្ឍន៍ទាំងលើផ្នែកហេដ្ឋារចនាសម្ព័ន្ធពីសំណាក់រាជរដ្ឋាភិបាល និងវិស័យឯកជន ដែលក្នុងនោះវិស័យសំណង់លំនៅដ្ឋានបានបង្ហាញពីភាពលេចធ្លោជាងគេ។

លោកបញ្ជាក់ថា “ខណ្ឌសែនសុខ បានក្លាយទៅជាតំបន់ដែលមានប្រជាប្រិយភាពខ្ពស់ ក្នុងវិស័យសំណង់លំនៅដ្ឋានកម្រិតមធ្យម និងកំពុងឈានទៅរកកម្រិតខ្ពស់ជាបណ្ដើរៗ ហើយក៏បានត្រៀមខ្លួនរួចរាល់ជាស្រេច ក្នុងទទួលយកវត្តមានថ្មីនៃវិស័យខុនដូ ដែលកំពុងមានតម្រូវការនាពេលបច្ចុប្បន្ននេះ” ។

លោក សំ សុខនឿន បានបញ្ជាក់ថា “ខណ្ឌសែនសុខ គឺជាតំបន់ដែលមានសក្ដានុពខ្ពស់ សម្រាប់បម្រើដល់វិស័យពាណិជ្ជកម្ម ដែលក្រៅពីជាតំបន់ប្រមូលផ្តុំទៅលំនៅដ្ឋានកម្រិតមធ្យម និងកម្រិតខ្ពស់ ក៏មានមជ្ឈមណ្ឌលពាណិជ្ជកម្មធំៗ ដូចជាផ្សារទំនើប AEON2 ផ្សារ Makro ផ្សារ Global House ផ្សារទំនើបជីបម៉ុង មណ្ឌលវិមានសែនសុខ រួមជាមួយនឹងអាគារពាណិជ្ជកម្មអន្តរជាតិមួយចំនួនទៀត ដែលជំរុញឱ្យវិស័យអចលនទ្រព្យ នៅក្នុងតំបន់នេះ កាន់តែមានសក្តានុពលខ្ពស់”។

នាយិកាក្រុមហ៊ុនអចលនទ្រព្យ AMATAK Property Service លោកស្រី តាំង ហួរ បានមានប្រសាសន៍ថា ខណ្ឌសែនសុខ ពេលនេះបានអភិវឌ្ឍន៍ខ្លួនក្លាយជាតំបន់ពាណិជ្ជកម្មកម្រិតខ្ពស់រួចទៅហើយ។ លោកស្រីបានមានប្រសាសន៍បញ្ជាក់ថា “ខណ្ឌសែនសុខបច្ចុប្បន្ននេះបានបំពេញទៅដោយគម្រោងបុរីលំនៅដ្ឋានធំៗ ក៏ដូចជាបណ្តុំលំនៅដ្ឋានកម្រិតខ្ពស់ រួមជាមួយវត្តមាននៃអគារខ្ពស់ៗដែលបម្រើឱ្យវិស័យពាណិជ្ជកម្ម”។

លោកស្រីបានលើកឡើងទៀតថា ពីមុនតំបន់ខណ្ឌសែនសុខ ស័ក្ដិសមទៅនឹងការវិនិយោគ និងអភិវឌ្ឍន៍ទៅលើគម្រោងលំនៅដ្ឋានកម្រិតមធ្យម និងក្រោមមធ្យម ប៉ុន្តែសព្វថ្ងៃនេះខុសពីកាលពីឆ្នាំកន្លងទៅ។ ការវិនិយោគលើគម្រោងលំនៅដ្ឋានកម្រិតមធ្យមនៅទីនេះលែងមានទៀតហើយ ប៉ុន្តែសម្រាប់គម្រោងអភិវឌ្ឍន៍លំនៅដ្ឋានកម្រិតខ្ពស់ ឬមជ្ឈមណ្ឌលពាណិជ្ជកម្មគឺនៅមានឱកាស ជាពិសេសវិស័យខុនដូកម្រិតមធ្យម ដោយសារតែតម្លៃដីនៅតំបន់ខណ្ឌនេះបានឡើងខ្ពស់ផុតពីកម្រិតនៃការអភិវឌ្ឍវិស័យលំនៅដ្ឋានកម្រិតទាប ឬក្រោមមធ្យមនោះទៀតហើយ៕

សម្តេចតេជោ៖ រដ្ឋាភិបាលនឹងពិនិត្យគម្រោងវិនិយោគអគ្គិសនីធំៗចំនួន ២ នៅចុងសប្តាហ៍នេះ

ដោយ៖វុត្ថា

ភ្នំពេញ៖ សម្តេតេជោ ហ៊ុន សែន នាយករដ្ឋមន្ត្រីនៃកម្ពុជា បានបញ្ជាក់ថា រដ្ឋាភិបាលនឹងចាប់ផ្តើមពិនិត្យលើគម្រោងវិនិយោគវិស័យអគ្គិសនីធំៗចំនួន ២ នៅចុងសប្តាហ៍នេះ ។

សេចក្តីប្រកាសព័ត៌មានរបស់ទីស្តីការគណរដ្ឋមន្ត្រី នៅថ្ងៃទី ២១ ខែតុលា ឆ្នាំ ២០២០នេះ ឱ្យដឹងថា យោងតាមចំណាររបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាំ ចុះថ្ងៃទី ២០ ខែតុលា ឆ្នាំ ២០២០ នៅក្នុងកិច្ចប្រជុំពេញអង្គគណៈរដ្ឋមន្ត្រី នៅថ្ងៃទី ២៣ ខែតុលា ឆ្នាំ ២០២០នេះ នឹងបន្ថែមនូវរវបៀបវរៈថ្មីមួយទភ ។

សេចក្តីប្រកាសព័ត៌មានបញ្ជាក់ថា របៀបវារៈថ្មីមនេះ ស្តីពីការអភិវឌ្ឍន៍គម្រោងវារីអគ្គិសនីស្ទឹងតាតៃ លើអនុភាព ១៥០ មេហ្គាវ៉ាត់ នៅស្រុកថ្មបាំង ខេត្តកោះកុង និងគម្រោងវិនិយោគសាងសង់ខ្សែបណ្តាញបញ្ជូនអគ្គិសនី ៥០០ មេហ្គាវ៉ាត់ ពីរាជធានីភ្នំពេញទៅព្រំដែនកម្ពុជា-ឡាវ និងពីបាត់ដំបង ទៅព្រំដែនកម្ពុជា-ថៃ ។

បើតាមលោក ផៃ ស៊ីផាន អ្នកនាំពាក្យនៃរាជរដ្ឋាភិបាលកម្ពុជា បានឱ្យដឹងដែរថា គណៈរដ្ឋមន្រ្តីនឹងបើកកិច្ចប្រជុំពេញអង្គគណៈរដ្ឋមន្រ្តី ក្រោមអធិបតីភាពតេជោ ហ៊ុន សែន នាយករដ្ឋមន្រ្តីនៃកម្ពុជានៅថ្ងៃទី២៣ ខែតុលា ឆ្នាំ២០២០ចុងសប្តាហ៍នេះ ដើម្បីពិភាក្សា និងឆ្លងលើរបៀបវារៈដូចខាងក្រោម៖
១-សេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២១ ២-សេចក្តីព្រាងច្បាប់ស្តីពីការទូទាត់ថវិកាទូទៅរបស់រដ្ឋសម្រាប់ការគ្រប់គ្រងឆ្នាំ២០១៩ និង ៣-បញ្ហាផ្សេងៗ៕

KOICA ផ្តល់ហិរញ្ញប្បទានចំនួន ៨០ លានដុល្លារ អនុវត្តគម្រោងអភិវឌ្ឍន៍ចំនួន ១២ នៅកម្ពុជា

ដោយវុត្ថា

ភ្នំពេញ៖ ទីភ្នាក់ងារសហប្រតិបត្តិការអន្តរជាតិកូរ៉ (KOICA) បាននឹងកំពុងគាំទ្ររាជរដ្ឋាភិបាលកម្ពុជាក្នុងការអភិវឌ្ឍនប្រទេស តាមរយៈការផ្តល់ហិរញ្ញប្បទានឥតសំណង។ ជាក់ស្តែង KOICA កំពុងអនុវត្តគម្រោងចំនួន ១២ គម្រោង ដែលមានទឹកប្រាក់ចំនួន ៨០ លានដុល្លារអាមេរិក និងមានគម្រោងអាទិភាព មួយចំនួនទៀត សម្រាប់អនុវត្តក្នុងឆ្នាំ ២០២១ និងឆ្នាំ ២០២២។

នេះ បើតាមការបញ្ជាក់ពីលោក RHO Hyunjun ប្រធានតំណាង នៃទីភ្នាក់ងារ សហប្រតិបត្តិការអន្តរជាតិកូរ៉េ (KOICA) ប្រចាំប្រទេសកម្ពុជា នៅក្នុងជំនួបពិភាក្សាជាមួយ លោក ឈៀង យ៉ាណារ៉ា រដ្ឋមន្ត្រី ប្រតិភូអមនាយករដ្ឋមន្ត្រី និងជាអគ្គលេខាធិការគណៈកម្មាធិការនិតិកម្ម និងអភិវឌ្ឍន៍កម្ពុជា នៃក្រុមប្រឹក្សាអភិវឌ្ឍន៍កម្ពុជានៅថ្ងៃទី ២១ ខែតុលាឆ្នាំ ២០២០នេះ ។

លោក RHO Hyunjun បន្តថា ចំពោះការចួលរួមជាមួយរាជរដ្ឋាភិបាលក្នុងទប់ស្កាត់ជំងឺកូវីដ ១៩ KOICA បានបន្តផ្តល់ជំនួយ សង្គ្រោះបន្ទាន់ជាច្រើន និងផ្តល់ហិរញ្ញប្បទាន សម្រាប់ចូលរួមស្តារ និងជំរុញកំណើនសេដ្ឋកិច្ចកម្ពុជាផងដែរ។

លោក ឈៀង យ៉ាណារ៉ា រដ្ឋមន្ត្រី ប្រតិភូអមនាយករដ្ឋមន្ត្រី និងជាអគ្គលេខាធិការគណៈកម្មាធិការនិតិកម្ម និងអភិវឌ្ឍន៍កម្ពុជា នៃក្រុមប្រឹក្សាអភិវឌ្ឍន៍កម្ពុជាបានវាយតម្លៃខ្ពស់ចំពោះការគាំទ្ររបស់រដ្ឋាភិបាលកូរ៉េ នាពេលកន្លងមក ដែលបានរួមចំណែកដល់ការអភិវឌ្ឍសង្គម-សេដ្ឋកិច្ចកម្ពុជា តាមរយៈការអនុវត្តគម្រោង និងកម្មវិធីនានា។

លោក រដ្ឋមន្ត្រីប្រតិភូ ក៏បានថ្លែងអំណរគុណយ៉ាងជ្រាលជ្រៅ ចំពោះ KOICA ដែលបានគាំទ្ររាជរដ្ឋាភិបាលកម្ពុជាក្នុងការប្រយុទ្ធប្រឆាំងនឹងជំងឺកូវីដ ១៩ និងអរគុណជាថ្មីម្តងទៀតដល់ការគាំទ្រ និងកិច្ចសហប្រតិបត្តិការក្នុងភាពជាដៃគូល្អរបស់ KOICA។

ភាគីទាំងពីរនៅក្នុងជំនួបនេះក៏បានពិភាក្សាផ្លាស់ប្តូរយោបល់លើកិច្ចសហប្រតិបត្តិការអភិវឌ្ឍន៍កម្ពុជា-កូរ៉េ ក្នុងពេលបច្ចុប្បន្ន និងអនាគត៕

តើរាជរដ្ឋាភិបាលមានលទ្ធភាពខ្ចីឥណទានសម្បទានពីបរទេសត្រូវឈរលើគោលការណ៍អ្វីខ្លះ?

ដោយ៖វុត្ថា

ភ្នំពេញ៖ ដើម្បីមានលទ្ធភាពក្នុងការខ្ចីឥណទានសម្បទានពីដៃគូអភិវឌ្ឍន៍ ឬពីបរទេស រាជរដ្ឋាភិបាលកម្ពុជា បានដាក់ចេញនូវគោលការណ៍មួយចំនួន ស្របតាមកំណើនសេដ្ឋកិច្ច និងសេចក្តីត្រូវការរបស់ប្រទេសដែលកំពុងមានការរីកចំរើន។

លោក ជាម យៀប តំណាងរាស្ត្រមណ្ឌលព្រៃវែង និងជាប្រធានគណៈកម្មការទី២នៃរដ្ឋសភាបានបញ្ជាក់ថា ក្នុងការខ្ចីឥណទានសម្បទានពីបរទេស គឺរាជរដ្ឋាភិបាលកម្ពុជា ចាំបាច់ត្រូវឈរលើគោលការណ៍គន្លឹះសំខាន់ៗ ចំនួន ៤ ដូចខាងក្រោមនេះ៖

១) ខ្ចីឥណទានសម្បទាននៅក្នុងទំហំ សមស្របចំពោះស្ថានភាពថវិកា និងសេដ្ឋកិច្ចជាតិដែលអាចទ្រាំទ្របាន ។ ក្នុងន័យនេះលោកជាម យៀបពន្យល់ថា “យើងខ្ចីគេ លុះត្រាតែរំពឹងឃើញថា ទៅអនាគត យើងអាចមានលទ្ធភាពក្នុងការសងគេវិញ ហើយជំរាបប្រាប់ទៅម្ចាស់ឥណទានទៅតាមអ្វីដែលយើងអាចសងគេវិញបាន”។

២) ខ្ចីឥណទានសម្បទានណាដែលមានកម្រិតសម្បទាន ឬ លក្ខខណ្ឌអនុគ្រោះខ្ពស់ ។ លោក ជាម យៀបពន្យល់ថា “ខ្ចីប្រាក់គេលុះត្រាណាគេផ្តល់សម្បទាន និងការប្រាក់ទាបបំផុតដែលយើងអាចទ្រាំទ្របាន គឺជាគោលការណ៍រួមដែលប្រមុខនៃរាជរដ្ឋាភិបាលបានណែនាំ ដល់ក្រសួងសេដ្ឋកិច្ច និងហិរញ្ញវត្ថុ ឱ្យធ្វើយ៉ាងដូច្នេះ ទើបអាចខ្ខីគេបាន”។

៣) ខ្ចីឥណទានសម្បទានសម្រាប់វិស័យអាទិភាព ទ្រទ្រង់ចីរភាព គណនេយ្យភាព ប្រសិទ្ធិភាព សក្តិសិទ្ធិភាពខ្ពស់បំផុត។ លោក ជាម យៀបពន្យល់ថា “យើងខ្ចី យើងមែនហើយ ប៉ុន្តែយើងប្រើប្រាស់ចំពោះតែវិស័យណាដែលត្រូវអនុវត្តការងារ ឱ្យជាការងារអាទិភាពនៅក្នុងឆ្នាំនីមួយៗ”។

៤) ខ្ចីឥណទានសម្បទានឱ្យស្របទៅនឹងតម្លាភាព និងគណនេយ្យភាព ។ លោកជាម យៀបពន្យល់បន្ថែមថា “ក្នុងន័យនេះ គឺរាជរដ្ឋាភិបាល ក៏រាជរដ្ឋាភិបាលលើកឡើងនូវគោលការណ៍ទី ៥ ថ្មីមួយទៀត គឺ ប្រើប្រាស់ឥណទានសម្រាប់ ហិរញ្ញប្បទានវិនិយោគ លើហេដ្ឋារចនាសសម្ព័ន្ធសាធារណៈ ដែលមានស្តង់ដារ និងគុណភាពខ្ពស់”៕

ប្លង់គោលអភិវឌ្ឍន៍ទីក្រុងកោះនរាបានបង្ហាញរូបរាងច្បាស់លាស់ហើយ

ដោយស៊ីវ ម៉េង

        ភ្នំពេញៈ ប្លង់គោលអភិវឌ្ឍន៍ទីក្រុងកោះនរាលំអិត បានដាក់តាំងបង្ហាញជាផ្លូវការហើយ ខណៈសកម្មភាពរៀបចំហេដ្ឋារចនាសម្ព័ន្ឋទីក្រុងនេះបាន និងកំពុងដំណើរការយ៉ាងសកម្ម។

អគ្គនាយករងក្រុមហ៊ុនOCIC លោកទូច សំណាងបានមានប្រសាសន៍ឲ្យដឹងកាលពីពេលថ្មីៗនេះថា ការរៀបចំហេដ្ឋារចនាសម្ព័ន្ឋសំរាប់កសាងទីក្រុងកោះនរា ដែលមានទំហំផ្ទៃដីជាង១០០ហិកតា នឹងបញ្ចប់តាមផែនការនៅឆ្នាំ២០២៣ខាងមុខនេះ ដោយគ្រោងចំណាយទុកវិនិយោគ ប្រមាណ២០០០លានដុល្លារអាមេរិក(គិតតែការរៀបចំហេ ដ្ឋារចនាសម្ព័ន្ឋ)។

លោកបន្តថា “ផែនការអភិវឌ្ឍន៍ទីក្រុងកោះនរា មានសភាពស្រដៀងគ្នានឹងទីក្រុងកោះពេជ្រនាពេលបច្ចុប្បន្ននេះ ដោយវានឹងក្លាយជាមជ្ឈមណ្ឌលពាណិជ្ជកម្ម លំនៅដ្ឋាន​លំដាប់អន្តរជាតិ”។លោកបន្តថា “ជាមួយគ្នានេះការបើកការដ្ឋានសម្ភោធស្ពានឆ្លងពីកោះពេជ្រ ទៅកាន់ទីក្រុងកោះនរា ក្រោមអធិបតីភាពរបស់សម្តេចតេជោ នឹងប្រព្រឹត្តិទៅតាមការគ្រោងទុក”។

លោកទូច សំណាងបានបន្តថា បច្ចុប្បន្នសកម្មភាព នៃការសាងសង់រចនាសម្ព័ន្ឋ ការចាក់គ្រឹះចេញពីទន្លេ ដើម្បីកសាងទីក្រុងនេះបាន និងកំពុងទទួលបានជោគជ័យ ដោ​យមិនបង្កឲ្យមានផលប៉ះពាល់បរិស្ថានណាមួយឡើយ ព្រោះក្រុមហ៊ុនបានសិក្សាពី​បរិស្ថាន និងផលប៉ះពាល់ច្បាស់លាស់ណាស់ ទើបសម្រេចកសាងទីក្រុងនេះឡើង ព្រោះទីតាំងទីក្រុងនេះជាអតីតកោះចាស់ ដែលបានបាក់ចូលទឹកទន្លេកំឡុងទសវត្សរ៍កន្លងមកនេះ៕

ក្រុមហ៊ុនតំបន់សេដ្ឋកិច្ចពិសេសគ្រោងវិនិយោគបន្ថែមនូវសេវារថយន្តក្រុង និងបង្កើតតំបន់ទេសចរណ៍នៅក្រុងបាវិត

ដោយវុត្ថា

បាវិតៈ ក្រុមហ៊ុនតំបន់សេដ្ឋកិច្ចពិសេសមេនហាតធេន ដែលបាននឹងកំពុងវិនិយោ​គនៅក្នុងទីក្រុងបាវិត បានបង្ហាញពីបំណង ក្នុងវិនិយោគបន្ថែមនូវ សេវារថយន្តក្រុង និងបង្កើតតំបន់ទេសចរណ៍ក្រុងវិត។

នេះ បើតាមលទ្ធផលនៃជំនួបពិភាក្សាការងារជាមួយនឹង លោកប្រធានក្រុមហ៊ុនតំបន់សេដ្ឋកិច្ចពិសេសមេនហាតធេន ក្រុងបាវិត ព្រមទាំងសហការី និងលោក មែន វិបុល អភិបាល នៃគណៈអភិបាលខេត្តស្វាយរៀង នៅថ្ងៃទី២១ ខែតុលា ឆ្នាំ ២០២០នេះ ដោយផ្តោតសំខាន់ៗមួយចំនួនពាក់ព័ន្ធ នឹងកិច្ចការវិនិយោគ នាសាលប្រជុំ VIP សាលាខេត្ត។

លោកម៉ែន វិបុល បានថ្លែងថា ក្នុងនាមរដ្ឋបាលខេត្តស្វាយរៀងសូមគាំទ្រ និងត្រៀ​មសហការជានិច្ច ដើម្បីផ្ដល់ភាពកក់ក្ដៅ ជំនឿទុកចិត្ត និងបង្កលក្ខណៈងាយស្រួលគ្រប់សព្វបែបយ៉ាង ចំពោះគម្រោងវិនិយោគរបស់ក្រុមហ៊ុន ព្រោះគម្រោងវិនិយោគនេះ មិនត្រឹមតែអាចបង្កើតការងារធ្វើជូនប្រជាពលរដ្ឋប៉ុណ្ណោះទេ និងជួយលើកកម្ពស់ដល់វិស័យទេសចរណ៍ក្នុងខេត្តស្វាយរៀងថែមទៀតផង។

លោកប្រធានក្រុមហ៊ុនតំបន់សេដ្ឋកិច្ចពិសេសមេនហាតធេន បានសម្តែងការពេញចិតចំពោះអាជ្ញាធរខេត្ត តែងតែផ្ដល់នូវភាពកក់ក្ដៅ តាមរយ:ការជួយសម្របសម្រួល សហការ និងគាំទ្រ រាល់សកម្មភាពវិនិយោគរបស់ក្រុមហ៊ុន ដែលអនុញ្ញាតឲ្យក្រុមហ៊ុន អាចដំណើរការបានងាយស្រួល ដោយរលូន និងមានការរីកចម្រើនជាលំដាប់ ។

យោងតាមរបាយការណ៍របស់រដ្ឋបាខេត្តស្វាយរៀងបានបង្ហាញថា ក្នុងរយៈពេល ១០ឆ្នាំចុងក្រោយនេះ ខេត្តស្វាយរៀង បានក្លាយជាតំបន់ឧស្សាហកម្មដ៏ទាក់ទាញ ប្រកបដោ​យសក្ដានុពល ដោយមានអ្នកវិនិយោគមកបណ្ដាក់ទុនកើនឡើងជាបន្ដបន្ទាប់  ដែលបានចូលរមចំណែកយ៉ាងសំខាន់ ក្នុងការកាត់បន្ថយភាពក្រីក្រ និងលើកកម្ពស់ជីវភាពរស់នៅរបស់ប្រជាពលរដ្ឋ ឲ្យបានកាន់តែប្រសើរឡើង និងជួយជំរុញកំណើនសេដ្ឋកិច្ច ។

បច្ចុប្បន្ន នៅទូទាំងខេត្តស្វាយរៀង មានតំបន់សេដ្ឋកិច្ចពិសេសចំនួន១១កន្លែង កំពុងដំណើរការ ក្នុងនោះ៨កន្លែង គឺជាតំបន់សេដ្ឋកិច្ចពិសេស មេនហាតធេន តាយសេង សានដុងសាន់សែល ដ្រេហ្គនឃីង ឈីលូ ហាយផាក អ៊ីនធើវៀ អូតូម៉ូបាល និងតំបន់សេដ្ឋកិច្ចពិសេសស្វាយរៀងហ្គីហ្គារីសស៍ មានរោងចក្រ សហគ្រាសធនាគារ គ្រឹះស្ថានមេក្រូហិរញ្ញវត្ថុ ក្រុមហ៊ុនឯកជនចំនួន២០៨កន្លែង ក្នុងនោះក្រុមហ៊ុនវិនិយោគដែលអនុញ្ញាតដោយក្រុមប្រឹក្សាអភិវឌ្ឍន៍កម្ពុជា មានចំនួន១៤១ក្រុមហ៊ុន និងអនុគណៈកម្មាធិការវិនិ​យោ​គខេត្តចំនួន៣ក្រុមហ៊ុន ដោយបានផ្ដល់ការងារធ្វើជូនប្រជាពលរដ្ឋ៨ម៉ឺននាក់៕

សម្តេចតេជោៈកម្ពុជានឹងជំនះបានទាំងបញ្ហាCovid-19និងគ្រោះទឹកជំនន់

        ដោយគង់ សូរិយា

        ភ្នំពេញៈ ជាមួយនឹងការចុះផ្ទាល់ដល់មូលដ្ឋាន និងតែងតែនៅជាប់ជាមួយប្រជាពល​រដ្ឋ សម្តេចតេជោហ៊ុន សែនបានថ្លែងថា កម្ពុជានឹងជំនះបានទាំងជំកូវីដ១៩ និងគ្រោះទឹកជំនន់ ហើយកម្ពុជានឹងស្តារអ្វីបានឡើងវិញ។

សម្តេចតេជោ ហ៊ុន សែននាយករដ្ឋមន្រ្តីនៃកម្ពុជាបានថ្លែងក្នុងពិធីចុះសាកសួរសុខទុក្ខប្រជាពលរដ្ឋ ដែលរងគ្រោះដោយទឹកជំនន់ នៅខេត្តបន្ទាយមានជ័យ នាព្រឹកថ្ងៃទី២១ តុលានេះថា អ្នកនយោបាយចែកអំណោយ ដល់ប្រជាពលរដ្ឋរងគ្រោះដោយទឹកជំនន់ សូមធ្វើដោយកុំរើសអើងប្រជាពលរដ្ឋ។

សម្តេចតេជោថ្លែងថា “នៅពេលប្រជាជនជួបការលំបាក គឺជាទម្លាប់សម្តេចតែងរត់រកប្រជាជន មិនឱ្យប្រជាជនរត់ទៅរកសម្តេចនោះទេ”។

សម្តេចតេជោ ហ៊ុន សែន បានថ្លែងថា ទន្ទឹមនឹងដោះស្រាយចំពោះបញ្ហាទឹកជំនន់ យើងត្រូវរួមគ្នាប្រយុទ្ធជាមួយជំងឺកូវីដ១៩ តទៅទៀត។សម្តេចតេជោ ហ៊ុន សែនបានថ្លែងថា អ្វីដែលរាជរដ្ឋាភិបាល កំពុងធ្វើមិនធ្វើតាមការនិយាយរបស់ពួកប្រឆាំងទេ។

ជាមួយគ្នានេះ សម្តេចតេជោហ៊ុន សែន បានបញ្ជាក់ម្តងទៀត ឱ្យអាជ្ញាធរមូលដ្ឋាន និងសមត្ថកិច្ច ចុះពិនិត្យមើលតាមខ្នងផ្ទះពលរដ្ឋ ដែលរងគ្រោះដោយទឹកជំនន់ និងត្រូវការពារទ្រព្យសម្បត្តិពលរដ្ឋ។

លើសពីនេះសម្តេចតេជោ ហ៊ុន សែន អំពាវនាវដល់ធនាគារ និងគ្រឹះស្ថានមីក្រូហិរញ្ញវត្ថុ ត្រូវមានភាពអនុគ្រោះ និងយោគយល់ចំពោះពលរដ្ឋ ដែលរងគ្រោះដោយទឹកជំនន់។សម្តេចតេជោ ហ៊ុន សែន អំពាវនាវកុំឱ្យធនាគារ ឬមីក្រូហិរញ្ញវត្ថុ មានការរឹបអូសផ្ទះ ឬទ្រព្យសម្បត្តិប្រជាពលរដ្ឋ នៅដំណាក់កាលនេះ ប៉ុន្តែសម្តេចលើកទឹកចិត្តឲ្យស្ថាប័នហិរញ្ញវត្ថុរឹបអូសទ្រព្យសម្បត្តិប្រជាពលរដ្ឋណា ដែលធ្វើតាមការញុះញង់របស់ក្រុមបក្សឧទ្ទាមក្រៅច្បាប់៕

 

ហាងនំបុ័ង និងកាហ្វេរបស់កូរ៉េដ៏ល្បីមួយនឹងឈានជើងចូលទីផ្សារកម្ពុជា

ដោយវុត្ថា

កូរ៉េៈ ហាង Paris Baguetteរបស់ប្រទេសកូរ៉ ដែលជាហាងលក់នំបុ័ង បង្អែម កាហ្វេដ៏ល្បី នឹងឈានជើងចូលទីផ្សារកម្ពុជា  ដោយគ្រោងនឹងបោះទីតាំងរបស់ខ្លួនស្ថិតនៅក្នុងសង្កាត់បឹងកេងកង១ រាជធានីភ្នំពេញ។

លោកឡុង ឌីម៉ង់ ឯកអគ្គរាជទូតកម្ពុជា ប្រចាំនៅក្នុងទីក្រុងសេអ៊ូលនៃប្រទេសកូរ៉េ បានឱ្យដឹងនៅថ្ងៃទី ២១ ខែតុលា ឆ្នាំ ២០២០នេះឱ្យដឹងថា  ហាង Paris Baguette គឺជាហាងលក់នំបុ័ង បង្អែម កាហ្វេដ៏ល្បី របស់ប្រទេសកូរ៉េ ដែលមានសាខាគ្រប់ទីកន្លែង នៅក្នុងទីក្រុងសេអ៊ូល។

លោកថ្លែងថា “បងប្អូនយើងនៅកូរ៉េនេះច្បាស់ជាស្គាល់ហើយ Paris Baguette ដែលជាហាងលក់នំបុ័ង បង្អែម កាហ្វេដ៏ល្បី និងឃើញនៅមានសឹងគ្រប់កន្លែង ហើយនៅពេលបន្តិចទៀតនេះ យើងនឹងបានឃើញវត្តមានសាខា នៅក្នុងប្រទេសកម្ពុជាយើងម្ដង គឺស្ថិតនៅក្នុងសង្កាត់បឹងកេងកង1 រាជធានីភ្នំពេញ”។លោកបន្តថា “នេះជាកូនចំណែកដ៏តូចមួយដែលស្ថានទូតកម្ពុជាយើង បានខំប្រឹងអូសទាញអ្នកវិនិយោគកូរ៉េ សហការជាមួយវិនិយោគិនក្នុងស្រុករបស់យើង”។

តំបន់បឹងកេងកងត្រូវបានគេស្គាល់ថា ជាតំបន់ដែលប្រមូលផ្ដុំទៅដោយអគារពាណិជ្ជកម្ម និងលំនៅដ្ឋានសហកម្មសិទ្ធិកម្រិតខ្ពស់ ប្រចាំនៅក្នុងរាជធានីភ្នំពេញ បច្ចុប្ប​ន្ននេះក៏នៅតែបន្តប្រជាប្រិយភាព និងទាក់ទាញគម្រោងអភិវឌ្ឍន៍ធំបន្ថែមទៀត។

តំបន់បឹងកេងកង បានក្លាយជាតំបន់ពាណិជ្ជកម្ម ពិសេសកម្រិតខ្ពស់រួចទៅហើយ (តំបន់ CBD) នៅក្នុងរាជធានីភ្នំពេញ បណ្តុំទៅដោយអគារពាណិជ្ជកម្ម អគារការិយា​ល័យ ភោជនីយដ្ឋាន ផ្សារទំនើប សណ្ឋាគារ និង ហាងល្បីជាច្រើន ដែលជនបរទេសភាគច្រើនប្រាថ្នាចង់រស់នៅ និងធ្វើពាណិជ្ជកម្មនៅក្នុងតំបន់នេះ៕