គម្រោងដីឡូតិ៍ ស្យូអាប់ រៀល អ៊ីស្ទេតផ្សារអង្គស្នួល បញ្ចុះតម្លៃ១០ភាគរយ សម្រាប់ថ្ងៃអាទិត្យនេះ

ដោយ ៖ រ៉ាណេត

កណ្តាលៈ បន្ថែមពីលើការផ្ដល់ឱកាសចំណេញដល់អតិថិជនរបស់ខ្លួន គម្រោងដីឡូតិ៍ ស្យូអាប់ រៀល អ៊ីស្ទេតផ្សារអង្គស្នួល បានបង្កើតកម្មវិធីដ៏អស្ចារ្យ ដោយការលក់បញ្ចុះតម្លៃចំនួន១០ភាគរយរាល់ការទិញនៅក្នុងថ្ងៃអាទិត្យនៃសប្ដាហ៍នេះ បន្ថែមពីលើកម្មវិធីទិញចំនួន៣ឡូតិ៍ នឹងទទួលបានការផ្តល់ជូនម៉ូតូស៊េរីថ្មី ម៉ាក HONDA Dream ឆ្នាំ២០២០ ។

អគ្គនាយកក្រុមហ៊ុនអចលនទ្រព្យ Show Up Real Estate លោកអ៊ិន ណាង បានមានប្រសាសន៍នៅព្រឹកថ្ងៃទី៣ ខែកក្កដា ឆ្នាំ២០២០នេះថា ជាការអបអរសាទរទៅនឹងភាពជោគជ័យនៃគម្រោងដែលទទួលបានការគាំទ្រពីសំណាក់អតិថិជន សម្រាប់ការទិញដីឡូតិ៍នៅក្នុងថ្ងៃអាទិត្យ ទី៥ ខែកក្កដា ឆ្នាំ២០២០នេះ នឹងទទួលបានការបញ្ចុះតម្លៃចំនួន១០ភាគរយ បន្ថែមពីលើកម្មវិធីផ្សេងៗទៀតដែលក្រុមហ៊ុនផ្ដល់ជូន។

លោកបានបញ្ជាក់ថា គម្រោងរបស់ក្រុមហ៊ុន ស្យូអាប់ រៀល អ៊ីស្ទេត ដែលមានចម្ងាយប្រមាណ៤០០ម៉ែត្រ ចុះពីផ្លូវជាតិ៤ កំពុងបើកលក់នៅពេលនេះ មានតម្លៃចាប់ពី១២,៥០០ដុល្លារឡើងទៅក្នុងមួយឡូតិ៍ ដែលក្រៅពីស្ថិតតំបន់ទីប្រជុំជនជិតផ្សារអង្គស្នួល ជាភូមិចាស់មានប្រជាជនរស់នៅស្រាប់ និងមានរោងចក្រ សហគ្រាស ឃ្លាំង រួមនឹងការអភិវឌ្ឍបណ្តាញហេដ្ឋារចនាសម្ព័ន្ធរួចជាស្រេច។
ទីតាំងដីនេះស្ថិតនៅជាប់ផ្លូវធំ៣០ម៉ែត្ររបស់រដ្ឋ ហើយនៅក្នុងគម្រោងជាប្រភេទផ្លូវបេតុងទំហំ៨ម៉ែត្រ មានភ្ជាប់បណ្តាញអគ្គិសនី បំពាក់អំពូលសូឡា មានបណ្តាញទឹកស្អាត និងប្រព័ន្ធបង្ហូរទឹកយ៉ាងត្រឹមត្រូវ ហើយក៏មានដាំដើមឈើនៅតាមដងផ្លូវ បង្កើនសោភ័ណភាព ជាពិសេសមានសេវាសន្តិសុខ២៤ម៉ោងក្នុងគម្រោងផងដែរ។

ជាការលើកទឹកចិត្តដល់អតិថិជន ក្រុមហ៊ុនបានបង្កើតកម្មវិធីពិសេស ដោយរាល់ការទិញដីឡូតិ៍ចំនួន៣ឡូតិ៍ ដោយការបង់ផ្ដាច់នឹងទទួលបានម៉ូតូម៉ាក HONDA Dream ស៊េរីឆ្នាំ២០២០ចំនួន១គ្រឿងភ្លាមៗ ហើយសម្រាប់អ្នកទិញចំនួន២ឡូតិ៍ ដោយការបង់ផ្ដាច់ នឹងទទួលបានទូរស័ព្ទស្មាតហ្វូន OPPO ស៊េរីទំនើបមួយគ្រឿង ហើយក៏មានការផ្តល់ជូននួវទូរទឹកកកមួយគ្រឿងផងដែរ (សម្រាប់ផ្ទះល្វែង) ដែលកម្មវិធីពិសេសមានរយៈពេលត្រឹមមួយខែប៉ុណ្ណោះ។ ដោយឡែកសម្រាប់លក្ខខណ្ឌ នៃការទិញដោយបង់រំលោះ ក្រុមហ៊ុនក៏បានរៀបចំកម្មវិធីពិសេសផងដែរ ដូចជា ៖
– បង់មុន ៣០% សល់៧០% រំលស់ ៦ឆ្នាំ ដោយអត្រាការប្រាក់ ១%/ខែ
– បង់មុន ៣០% សល់៧០% រំលស់ ១២ខែ ដោយគ្មានការប្រាក់
– បង់មុន ៤០% សល់៦០% រំលស់ ១២ខែ ដោយគ្មានការប្រាក់ ចុះជូន ២%
– បង់មុន ៥០% សល់៥០% រំលស់ ១២ខែ ដោយគ្មានការប្រាក់ ចុះជូន ៣%
សម្រាប់ព័ត៌មានបន្ថែមសូមទាក់ទងទូរស័ព្ទលេខ៖ ០១០ ៧៨៤ ១៧៧/ ០១២ ៥៥៥ ២៦៥ / ០៩៦ ៨៦៤ ៩៩៩៦ / ០៧៧ ៩៧៧ ៧២៦ ៕

កូរ៉េខាងត្បូងកំពុងពិចារណាសំណើរបស់កម្ពុជាក្នុងការសាងសង់ស្ពានមិត្តភាពកម្ពុជា-កូរ៉េ

ដោយ ៖ ប៊ី
ភ្នំពេញ ៖ សំណើរបស់រាជរដ្ឋាភិបាលកម្ពុជាសុំការគាំទ្រពីរដ្ឋាភិបាលសាធារណរដ្ឋកូរ៉េ ដើម្បីសាងសង់ស្ពានមិត្តភាពកម្ពុជា-កូរ៉េ ដើម្បីជានិមិត្តរូបនៃទំនាក់ទំនងការទូតរវាងប្រទេសទាំងពីរ កំពុងត្រូវបានពិចារណាដោយភាគីកូរ៉េ។

លោក Park Heung Kyeong ឯកអគ្គរដ្ឋទូតកូរ៉េខាងត្បូងប្រចាំនៅកម្ពុជាបានថ្លែងថា “មន្ត្រីជាន់ខ្ពស់របស់ប្រទេសកូរ៉េឥឡូវនេះកំពុងពិនិត្យមើលឯកសារផ្លូវការ ដែលបានដាក់ដោយកម្ពុជា បន្ទាប់ពីមានសំណើរបស់សម្តេចតេជោ ហ៊ុន សែន នាយករដ្ឋមន្រ្តីកម្ពុជាទៅកាន់សាធារណរដ្ឋកូរ៉េ ដើម្បីជួយសាងសង់ស្ពានមិត្តភាពកម្ពុជា-កូរ៉េ ក្នុងពិធីបើកការដ្ឋានជួសជុល និងកែលំអផ្លូវជាតិលេខ ២ និង ២២ កាលពីខែកុម្ភៈឆ្នាំនេះ”។

លោកបានបន្ថែមថា “រដ្ឋាភិបាលកូរ៉េបច្ចុប្បន្នកំពុងពិនិត្យមើលតំបន់ជ្រោយចង្វារ-ស្វាយជ្រុំ ហើយប្រសិនបើគម្រោងនេះត្រូវបានអនុម័ត វានឹងក្លាយជានិមិត្តរូបថ្មីនៃចំណងការទូតរវាងកម្ពុជា និងកូរ៉េ។ កម្ពុជាមានស្ពានមិត្តភាពមួយចំនួនជាមួយចិន និងជប៉ុន ដូច្នេះរដ្ឋាភិបាលកូរ៉េកំពុងពិចារណាយ៉ាងខ្លាំងចំពោះសំណើនេះ។

ការស្នើសុំនេះត្រូវបានលើកឡើង ដោយសម្តេចតេជោនាយករដ្ឋមន្រ្តីកម្ពុជា ក្នុងដំណើរទស្សនកិច្ចផ្លូវរដ្ឋរបស់ប្រធានាធិបតីកូរ៉េខាងត្បូង មូន ជេអ៊ីន មកកាន់ប្រទេសកម្ពុជាកាលពីឆ្នាំមុន។ តាមរយៈវត្តមានស្ពានមួយនេះ នឹងតភ្ជាប់តំបន់ជ្រោយចង្វាទៅស្វាយជ្រុំនៅភាគខាងកើតរាជធានីភ្នំពេញ ដោយប្រើប្រាស់ថវិកា (ប៉ានស្មាន) ក្នុងចន្លោះ ៤០ ទៅ ៥០ លានដុល្លារ៕

សម្តេចតេជោអនុញ្ញាតឱ្យអាជីវកម្មកាស៊ីណូបើកដំណើរការឡើងវិញ

ដោយ ៖ វុត្ថា

ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានប្រកាសអនុញ្ញាតដល់កាស៊ីណូមានលទ្ធភាពបើកប្រតិបត្តិការអាជីវកម្មសារជាថ្មីវិញ ក៏ប៉ុន្តែមានល្បែងភ្នាល់ និងស្លតម៉ាស៊ីនតែប៉ុណ្ណោះ។

សម្តេចតេជោ នៅក្នុងកិច្ចប្រជុំពេញអង្គគណៈរដ្ឋមន្ត្រីនាថ្ងៃទី ៣ ខែកក្កដា ឆ្នាំ ២០២០នេះ បានញ្ជាក់ថា កាស៊ីណូទាំងអស់នោះ ត្រូវស្នើសុំឱ្យមានការអនុញ្ញាតពីក្រសួងសុខាភិបាល ដែលមានភ្ជាប់លក្ខខណ្ឌតម្រូវមួយចំនួន នៃវិធានការការពារជាមួយជំងឺកូវីដ-១៩។

សម្តេចតេជោ ហ៊ុន សែន នាយករដ្ឋមន្រ្តី នៃកម្ពុជា បាន និងកំពុងអញ្ជើញដឹកនាំកិច្ចប្រជុំពេញអង្គគណៈរដ្ឋមន្រ្តី ដែលប្រព្រឹត្តទៅនៅវិមានសន្តិភាព រាជធានីភ្នំពេញ។

សម្រាប់របៀបវារៈនៃកិច្ចប្រជុំនាសប្តាហ៍នេះ មានដូចខាងក្រោម៖
១- សេចក្តីព្រាងច្បាប់ស្តីពីការគ្រប់គ្រង ការប្រើប្រាស់ និងការចាត់ចែងលើទ្រព្យសម្បត្តិរដ្ឋ។
២- សេចក្តីព្រាងច្បាប់ស្តីពីការគ្រប់គ្រងល្បែងពាណិជ្ជកម្ម។

៣-បញ្ហាផ្សេងៗ សំណើសុំការយល់ព្រមពីគណៈរដ្ឋមន្រ្តី ដើម្បីសុំការអនុម័តពីស្ថាប័ននីតិប្បញ្ញតិ្តលើសេចក្តីព្រាងច្បាប់ស្តីពីការអនុម័តយល់ព្រមលើសន្ធិសញ្ញា ស្តីពីការជួយគ្នាទៅវិញទៅមកផ្នែកច្បាប់ក្នុងវិស័យព្រហ្មទណ្ឌរវាងព្រះរាជាណាចក្រកម្ពុជា និងសាធារណរដ្ឋកូរ៉េ៕

សម្តេចតេជោ បញ្ជាឱ្យកាត់ឆ្វៀលដីជូនពលរដ្ឋរស់នៅក្នុងតំបន់អភិរក្ស តំបន់សត្វព្រៃ និងតំបន់ការពារផ្សេងៗរបស់រដ្ឋ

ដោយ ៖ វុត្ថា

ភ្នំពេញ ៖ សម្តេចតេជោ ហ៊ុន សែន នាយករដ្ឋមន្រ្តីកម្ពុជា បានចេញបទបញ្ជា និងបញ្ជាក់ច្បាស់ៗជូនរដ្ឋមន្រ្តីក្រសួងបរិស្ថាន ក្រសួងកសិកម្ម និងក្រសួងដែនដី គឺត្រូវតែកាត់ឆ្វៀលដីជូនបងប្អូនប្រជាពលរដ្ឋដែលបានមករស់នៅលើទីតាំងដីដែលជាគម្របព្រៃឈើ ឬជាតំបន់ការពារ ឬតំបន់អភិរក្សសត្វព្រៃរបស់រដ្ឋ ។

សម្តេចតេជោ ហ៊ុន សែន ក្នុងសម័យប្រជុំគណៈរដ្ឋមន្រ្តីពេញអង្គ នៅព្រឹកថ្ងៃទី៣ ខែកក្កដា ២០២០ នេះ បានបញ្ជាក់ថា កន្លងមក រដ្ឋមានតែដីក្នុងផែនទីទេ តាមពិតមានបងប្អូនប្រជាពលរដ្ឋបានកសាងលំនៅដ្ឋានរស់នៅបង្កើតកូនចៅរាប់សិបឆ្នាំមកហើយនៅលើទីតាំងដីទាំងនោះ។

សម្តេចតេជោបន្តថា នេះជាការដោះស្រាយកង្វល់ជូនពលរដ្ឋពិតប្រាកដ។ កុំទុកប្រជាពលរដ្ឋអោយភ័យខ្លាច អត់ឃ្លាន រត់ទៅចំណាកស្រុកគេតទៅទៀត។ ទន្ទឹមនឹងនេះ សូមកុំអោយពលរដ្ឋពង្រីកថែមទៀត ព្រោះត្រូវការរក្សាទុកព្រៃសហគមន៍ខ្លះនៅជិតៗដើម្បីជាប្រយោជន៍សហគមន៍រស់នៅផងដែរ។

ជាមួយគ្នានេះ សម្តេចតេជោ ហ៊ុន សែន បានដាក់បទបញ្ជាដល់ក្រសួងបរិស្ថាន ក្រសួងកសិកម្ម និងក្រសួងដែនដី ត្រូវដោះស្រាយអោយដាច់ស្រេចនៅក្នុពេលដ៏ខ្លីខាងមុខដើម្បីចេញប្លង់កម្មសិទ្ធិជូនពលរដ្ឋ ហើយកិច្ចការនេះត្រូវធ្វើអោយបានហ្មត់ចត់ និងត្រឹមត្រូវបំផុត៕

គណៈរដ្ឋមន្ត្រីកំពុងពិភាក្សាសេចក្តីព្រាងច្បាប់ស្តីពីការគ្រប់គ្រងល្បែងពាណិជ្ជកម្ម

ដោយ ៖ វុត្ថា

ភ្នំពេញ ៖ សម្ដេចតេជោ ហ៊ុន សែន បានអញ្ជើញដឹកនាំកិច្ចប្រជុំពេញអង្គគណៈរដ្ឋមន្ត្រី
នៅវិមានសន្តិភាព ពិភាក្សាទៅលើកិច្ចព្រាងច្បាប់នៃការគ្រប់គ្រងល្បែងពាណិជ្ជកម្ម រួមជាមួយនឹងច្បាប់ស្ដីពីការគ្រប់គ្រង ការប្រើប្រាស់ និងការចាត់ចែងលើទ្រព្យសម្បត្តិរដ្ឋ។

នៅក្នុងរបៀបវារៈនៃកិច្ចប្រជុំនៅព្រឹកថ្ងៃទី៣ ខែកក្កដា ឆ្នាំ២០២០នេះនេះ មានដូចខាងក្រោម៖
១- សេចក្តីព្រាងច្បាប់ស្តីពីការគ្រប់គ្រង ការប្រើប្រាស់ និងការចាត់ចែងលើទ្រព្យសម្បត្តិរដ្ឋ។
២- សេចក្តីព្រាងច្បាប់ស្តីពីការគ្រប់គ្រងល្បែងពាណិជ្ជកម្ម។

៣-បញ្ហាផ្សេងៗ សំណើសុំការយល់ព្រមពីគណៈរដ្ឋមន្រ្តី ដើម្បីសុំការអនុម័តពីស្ថាប័ននីតិប្បញ្ញតិ្តលើសេចក្តីព្រាងច្បាប់ស្តីពីការអនុម័តយល់ព្រមលើសន្ធិសញ្ញា ស្តីពីការជួយគ្នាទៅវិញទៅមកផ្នែកច្បាប់ក្នុងវិស័យព្រហ្មទណ្ឌរវាងព្រះរាជាណាចក្រកម្ពុជា និងសាធារណរដ្ឋកូរ៉េ៕

China Zun Tower តម្លៃ២៥០០លានដុល្លារមានអ្វីគួរឲ្យចាប់អារម្មណ៍?

ដោយ វុត្ថា

ប៉េកាំង មហាយក្សចិនមិនបញ្ឈប់ការសម្ញែង អាគារកប់ពពករបស់ខ្លួននោះទេ ដោយទីក្រុងប៉េកាំង បាននិងកំពុងតែសាងសាងសង់អគារខ្ពស់កប់ពពកមួយទៀត មានឈ្មោះថា CITIC Tower ឬ China Zun Tower ដែលគ្រោងនឹងបញ្ចប់នៃការសាងសង់របស់ខ្លួននៅក្នុងឆ្នាំ២០១៩កន្លងមកនេះ។

ស្ថាបត្យកម្ម ដែលជាមជ្ឈមណ្ឌលពាណិជ្ជកម្មកម្រិតពិភពលោកនេះ មានកម្ពស់ ១៩០ជាន់ ស្មើនឹង៥២៨ម៉ែត្រ និងត្រូវបានសាងសង់នៅក្នុងខណ្ឌ ដែលមានសេដ្ឋកិច្ចរីកចម្រើន នាទីក្រុងប៉េកាំង ហើយក៏នឹងក្លាយជាអគារ ដែលខ្ពស់ជាងគេនៅក្នុងទីក្រុងផងដែរ។ អគារ CITIC Tower មានកម្ពស់ខ្ពស់ជាងអគារ China World Trade Center Tower III ។

មជ្ឈមណ្ឌលពាណិជ្ជកម្ម China Zun គឺជាប្រភេទអគារប្រើប្រាស់រួម មានទាំងអគារការិយាល័យ អាផាតមិន សណ្ឋាគារ និងស្កាយបារនៅជាន់លើផងដែរ។

អគារនេះ ត្រូវបានចាប់ផ្តើមសាងសង់នៅក្នុងឆ្នាំ ២០១១ ហើយនឹងបញ្ចប់នៅក្នុងឆ្នាំ ២០១៩ នេះ អភិវឌ្ឍន៍ដោយ CITIC Real Estate ដែលបានចំណាយទឹកប្រាក់២.៥ ពាន់លានដុល្លារ៕

កម្ពុជាដាក់ចេញការគ្រប់គ្រង និងប្រមូលចំណូលសួយសារធនធានរ៉ែសំណង់ ដើម្បីជំរុញសេដ្ឋកិច្ចជាតិ

ដោយ ប៊ី

ភ្នំពេញៈ ក្នុងទិសដៅជំរុញការគ្រប់គ្រងប្រកបដោយប្រសិទ្ធភាព កម្ពុជាចេញសេចក្តីសម្រេចប្រកាសគ្រប់គ្រង ប្រតិបត្តិការធនធានរ៉ែរួមមាន ថ្ម គ្រួស ខ្សាច់ ឡាតេរីត និងអាចម៍ដី ដែលប្រើប្រាស់សម្រាប់ផ្គត់ផ្គង់ ឲ្យគម្រោងហេដ្ឋានរចនាសម្ព័ន្ធរបស់រដ្ឋ និងការប្រមូលចំណូលសួយសារ ពីការប្រើប្រាស់ធនធានរ៉ែសំណង់ទាំងនេះ។

ក្រសួងសេដ្ឋកិច្ច និងហិរញ្ញវត្ថុ និងក្រសួងរ៉ែ និងថាមពលកាលពីម្សិលមិញ បានចេញសេចក្តីប្រកាសជាអន្តរក្រសួង ស្តីពីការគ្រប់គ្រង និងប្រមូលចំណូលសួយសារធនធានរ៉ែ ពីការប្រើប្រាស់ធនធានរ៉ែសំណង់ ក្នុងគម្រោងហេដ្ឋារចនាសម្ព័ន្ធរបស់រដ្ឋ ដោយប្រកាសនេះ មានគោលដៅគ្រប់គ្រងប្រតិបត្តិការធនធានរ៉ែសំណង់ រួមមាន ការគ្រប់គ្រងការប្រើប្រាស់រ៉ែសំណង់ ការសម្រួលនីតិវិធីក្នុងការផ្តល់អាជ្ញាប័ណ្ណធនធានរ៉ែ និងការលើកលែងកម្រៃសេវាសាធារណៈ ការកំណត់នីតិវិធីលើការប្រមូលចំណូលសួយសារ និងគោលការអនុវត្ត ក្នុងករណីលើកលែងសួយសារ។

ក្នុងនោះចំពោះអង្គភាពអនុវត្តន៍គម្រោង ទោះជាអង្គភាពរដ្ឋ ឬឯកជន ដែលយកធនធានរ៉ែសំណង់មកប្រើប្រាស់ក្នុងការសាងសង់ ត្រូវមានអាជ្ញាប័ណ្ណធនធានរ៉ែស្របតាមច្បាប់ ស្តីពីការគ្រប់គ្រងនិងធ្វើអាជីវកម្មធនធានរ៉ែ និងត្រូវធ្វើប្រកាសសួយសារ និងបង់ចំណូលសួយសារលើតម្លៃធនធានរ៉ែជូនរដ្ឋ ស្របតាមច្បាប់ និងលិខិតបទដ្ឋានគតិយុត្តិជាធរមាន ។

អង្គភាពអនុវត្តន៍គម្រោងហេដ្ឋារចនាសម្ព័ន្ធរបស់រដ្ឋ ត្រូវដាក់ពាក្យស្នើសុំអាជ្ញាប័ណ្ណធនធានរ៉ែ ស្របតាមគំរូពាក្យស្នើសុំរបស់ក្រសួងរ៉ែ និងថាមពល ក្នុងនោះចំពោះកម្រៃសួយសារនានា អង្គភាពអនុវត្តន៍គម្រោង ត្រូវធ្វើការប្រកាសសួយសារនៅអគ្គនាយកដ្ឋានធនធានរ៉ែ ឬ នៅតាមមន្ទីររ៉ែ និងថាមពលរាជធានីខេត្ត និងត្រូវបង់ថ្លៃសួយសារលើកម្រៃធនធានរ៉ែ តាមលិខិតបញ្ជាបង់ប្រាក់ ដែលចេញដោយអគ្គនាយកដ្ឋានធនធានរ៉ែ នៃក្រសួងរ៉ែ និងថាមពល ឬមន្ទីររ៉ែ និងថាមពលរាជធានីខេត្ត ។

សម្រាប់បញ្ហានេះ អង្គភាពអនុវត្តន៍គម្រោង ទោះជាធ្វើប្រតិបត្តិការធនធានរ៉ែសំណង់ដោយខ្លួនឯង ឬទិញពីទីផ្សារ ហើយមានគោលបំណងរួចពីកាតព្វកិច្ចបង់ ពីសួយសារ អង្គភាពនោះត្រូវសុំទៅរាជរដ្ឋាភិបាល តាមរយៈក្រសួងសេដ្ឋកិច្ច និងហិរញ្ញវត្ថុ។

ក្នុងករណីឯកភាពពីរាជរដ្ឋាភិបាល កំណត់ថា ការបង់សួយសារជាបន្ទុករបស់រដ្ឋ អង្គភាពអនុវត្តន៍គម្រោង នៅតែមានកាតព្វកិច្ចប្រកាសអំពី បរិមាណធនធានរ៉ែសំណង់ ដែលគ្រោងនិងអនុវត្តន៍រ៉ែសំណង់ តាមគោលការណ៍កំណត់របស់ក្រសួងរ៉ែ និងថាមពល ដើម្បីជាមូលដ្ឋានគណនាសួយសារជាបន្ទុករបស់រដ្ឋ។

ចំណែកករណីធនធានរ៉ែសំណង់ ដែលយកមកប្រើប្រាស់ក្នុងគម្រោងហេដ្ឋារចនាសម្ព័ន្ធរបស់រដ្ឋ ដែលត្រូវទិញលើទីផ្សារ អង្គភាពអនុវត្តន៍គម្រោងហេដ្ឋារចនាសម្ព័ន្ធរបស់រដ្ឋត្រូវទិញពីក្រុមហ៊ុន ឬអាជីវកម្មដែលមានអាជ្ញាប័ណ្ណធនធានរ៉ែត្រឹមត្រូវ ក្នុងនោះអង្គភាពត្រូវរាយការណ៍ប្រកាសបរិមាណ និងប្រភពផ្គត់ផ្គង់ធនធានរ៉ែសំណង់ ដែលប្រើប្រាស់ក្នុងគម្រោងរដ្ឋ ជូនមកមន្ទីររ៉ែ និងថាមពលរាជធានីខេត្ត ដែលមានទីតាំងស្ថិតនៅក្នុងគម្រោងនោះ។

ចំពោះការប្រកាសអំពីបរិមាណធនធានរ៉ែ ត្រូវធ្វើមុនគម្រោងចាប់ផ្តើម និងត្រូវបញ្ជាក់អំពីប្រភពការទិញធនធានរ៉ែទាំងនោះ និងត្រូវរាយការណ៍អំពីបរិមាណធនធានរ៉ែ ដែលប្រើប្រាស់ជាក់ស្តែងរៀងរាល់៦ខែម្តង រហូតដល់បិតបញ្ចប់ការដ្ឋានរបស់រដ្ឋជាស្ថាពរ៕

ក្រុមហ៊ុនដឹកជញ្ជួនដ៏ធំមួយរបស់ចិនប្រកាសឈានជើងចូលកម្ពុជា

ដោយ ប៊ី

ភ្នំពេញៈ ក្រុមហ៊ុន BEST Inc., ផ្តល់ដំណោះស្រាយខ្សែសង្វាក់ផ្គត់ផ្គង់ឆ្លាតវៃឈានមុខគេ និងជាអ្នកផ្តល់សេវាកម្មដឹកជញ្ជួននៅប្រទេសចិន នៅថ្ងៃនេះបានប្រកាសពង្រីកបន្ថែមទៀតរបស់ខ្លួនទៅកាន់អាស៊ីអាគ្នេយ៍។ នេះបើយោងតាមសេចក្តីប្រកាសព័ត៌មានរបស់ក្រុមហ៊ុននៅថ្ងៃទី២ ខែកក្កដា ឆ្នាំ២០២០ ។

ការបើកដំណើរការសេវាកម្ម ដឹកជញ្ជូនរហ័សរបស់ក្រុមហ៊ុន នឹងធ្វើឡើងនៅប្រទេសម៉ាឡេស៊ី កម្ពុជា និងសឹង្ហបុរី បន្ទាប់ពីប្រទេសថៃ និងវៀតណាមកាលពីឆ្នាំមុន និងជាការបោះជំហានទៅមុខដ៏សំខាន់មួយទៀត នៅក្នុងមហិច្ឆតារបស់ក្រុមហ៊ុន ក្នុងការកសាងបណ្តាញភ័ស្តុភារដឹកជញ្ជូន ប្រកបដោយប្រសិទ្ធភាព ជាមួយនឹងការគ្របដណ្តប់យ៉ាងទូលំទូលាយនៅក្នុងតំបន់អាស៊ីអាគ្នេយ៍។

ក្រុមហ៊ុនក៏បានប្រកាសបង្កើន ដំណោះស្រាយដឹកជញ្ចូនអន្តរជាតិ ដោយបើកដំណើរការសេវាកម្មឆ្លងកាត់ព្រំដែន រវាងប្រទេសចិន និងទីផ្សារចំនួន៥នៅអាស៊ីអាគ្នេយ៍ក្នុងខែនេះ។

លោក Johnny Chou ស្ថាបនិក និងជាប្រធាននាយកប្រតិបត្តិនៃក្រុមហ៊ុន Best Inc បានមានប្រសាសន៍ថា “យើងមានការរំភើបក្នុងការអភិវឌ្ឍ បណ្តាញភ័ស្តុភាររបស់យើងនៅអាស៊ីអាគ្នេយ៍ ដែលជាតំបន់ផ្តោតសំខាន់នៃយុទ្ធសាស្ត្រសកលរបស់យើង។ លោកបានបន្តថា “ការផ្ទុះឡើងនៃជំងឺកូវីដ១៩ បានបង្កើនល្បឿន និងការពឹងផ្អែករបស់អតិថិជនទៅលើ ពាណិជ្ជកម្មតាមប្រព័ន្ធអេឡិចត្រូនិច និងបង្កើតឱកាសសក្តានុពលកាន់តែធំនៅក្នុងតំបន់” ។

លោកបានថ្លែងថា យើងមានទំនុកចិត្តថាសេវាកម្មដឹកជញ្ចូន ដែលផ្តល់ដោយបច្ចេកវិទ្យារបស់យើង និងជម្រើសដឹកជញ្ជូន ដែលមានគុណភាពខ្ពស់ នឹងក្លាយជាសមាសធាតុសេវាកម្មដ៏សំខាន់សម្រាប់ទាំងពាណិជ្ជករ និងអ្នកប្រើប្រាស់ទាំង ក្នុងអំឡុងពេលដ៏លំបាកនេះ និងលើសពីនេះទៀត។

ដោយប្រើគំរូ និងបទពិសោធន៍ជោគជ័យនៅក្នុងប្រទេសថៃ និងវៀតណាម ក្រុមហ៊ុន គ្រោងនឹងដំណើរការមជ្ឈមណ្ឌលតចំនួន១២ និងស្ថានីយសេវាកម្មចំនួន៤០០កន្លែងនៅទូទាំងប្រទេសម៉ាឡេស៊ី កម្ពុជា និងសឹង្ហបុរីក្នុងរយៈពេល៣ឆ្នាំខាងមុខ។ នេះរួមបញ្ចូលទាំងមជ្ឈមណ្ឌល ទៅតាមតម្រូវការពីរនៅទីក្រុងគូឡាឡាំពួ និងរាជធានីភ្នំពេញ ដែលនឹងត្រូវបំពាក់ដោយឧបករណ៍ស្វ័យប្រវត្តិកម្មទំនើប ដូចជា ស្វ័យប្រវត្តិកម្មល្បឿនលឿន និងប្រព័ន្ធស្កេនទម្ងន់។

យោងតាមការស្រាវជ្រាវរួមគ្នារបស់ Google, Temasek និង Bain & Company ដោយមានអ្នកប្រើប្រាស់អ៊ីនធឺណេត តាមទូរស័ព្ទចល័តមានចំនួន៣៦០លាននាក់ វិស័យពាណិជ្ជកម្មតាមប្រព័ន្ធអេឡិចត្រូនិក នៅអាស៊ីអាគ្នេយ៍នឹងមានតម្លៃដល់១៥០ពាន់លានដុល្លារនៅឆ្នាំ២០២៥ កើនឡើង៣៨ពាន់លានដុល្លារអាមេរិកក្នុងឆ្នាំ ២០១៩ ។

ដើម្បីឆ្លើយតបនឹងការកើនឡើង តម្រូវការពាណិជ្ជកម្មតាមប្រព័ន្ធអេឡិចត្រូនិច និងការវិវឌ្ឍតំរូវការរបស់អតិថិជន ករុមហ៊ុន BEST ផ្តល់ជូនជម្រើសនៃការចែកចាយនៅថ្ងៃក្រោយសំម្រាប់តំបន់សំខាន់ៗនៃប្រទេសថៃ និងការចែកចាយនៅថ្ងៃតែមួយនៅទីក្រុងហូជីមិញ និងហាណូយប្រទេសវៀតណាម។ បរិមាណកញ្ចប់ដឹងជញ្ជួនរបស់ក្រុមហ៊ុនមកពីអាស៊ីអាគ្នេយ៍បានកើនដល់៨,៨ កញ្ចប់នៅក្នុងត្រីមាសទី១ ៕

សេដ្ឋកិច្ចនិងសង្គមខេត្តរតនគិរី នឹងបន្តរីកចំរើនបន្ថែមក្រោយតភ្ជាប់បណ្តាញស្តង់ស្យុងអគ្គិសនី ២៣០គីឡូវ៉ុល

ដោយ វុត្ថា

ភ្នំពេញៈ អាជ្ញាអគ្គិសនីកម្ពុជា បានតភ្ជាប់បណ្តាញអគ្គិសនីខ្សែបញ្ជូនតង់ស្យុងខ្ពស់ ២៣០គីឡូវ៉ុល ប្រមាណ ១០២ គីឡូម៉ែត្រពីវារីអគ្គិសនីទន្លេសេសាន ទៅកាន់អនុស្ថានីយថ្មីនៅខេត្តរតនគិរី ដោយទទួលបានជោគជ័យហើយរំពឹងថា នឹងជួយជំរុញកំណើនសេដ្ឋកិច្ច និងសង្គមនៅក្នុងខេត្តនេះកាន់តែមានការរីកចំរើនបន្ថែម។

អាជ្ញាធរអគ្គិសនីកម្ពុជាបានឱ្យដឹងនៅថ្ងៃទី ២ ខែកក្កដា ឆ្នាំ ២០២០នេះ ឱ្យដឹងថា ខេត្តរតនគិរីបានតភ្ជាប់ជាមួយបណ្តាញជាតិថ្ងៃនេះ ខណៈពីមុនខេត្តនេះ ប្រើថាមពលពីខ្សែព្រំដែនប្រទេសវៀតណាម ដែលងាយរអាក់រអួល ព្រោះជាចុងខ្សែតង់ស្យុងមធ្យមពីប្រទេសគេ។

អាជ្ញាធរអគ្គសនីបន្តថា តាមរយៈខ្សែបញ្ជូនតង់ស្យុងខ្ពស់២៣០គីឡូវ៉ុលដែលមានចំងាយ១០២គីឡូម៉ែត្រ តភ្ជាប់ពីវារីអគ្គិសនីទន្លេសេសាន និងអនុស្ថានីយថ្មីនៅខេត្តរតនគិរីដោយផ្ទាល់ ខេត្តដ៏ស្រស់បំព្រងនេះ នឹងទទួលបានផលប្រយោជន៍សេដ្ឋកិច្ច និងសង្គមយ៉ាងច្រើននាពេលខាងមុខ។ ក្រុមការងារអគ្គិសនីកម្ពុជា កំពុងបន្តការងារឆ្ពោះទៅខេត្តមណ្ឌលគិរីទៀត។

ទំនប់វារីអគ្គីសនី សេសានមានសមត្ថភាព ផលិតថាមពលអគ្គីសនីបាន៤០០មេ ហ្កាវ៉ាត់ គឺជាគម្រោងវារីអគ្គីសនីដ៏ធំបំផុតរបស់កម្ពុជា បើគិតមកដល់បច្ចុប្បន្ននេះ។ ហើយទំនប់ដែលមានប្រវែង៦,៥គីឡូម៉ែតនេះ ក៏ជាទំនប់ដ៏វែងបំផុតក្នុងទ្វីបអាស៊ីផងដែរ។

តាមការគ្រោងទុកទំនប់វារីអគ្គិសនីសេសាននេះ បានបើកសម្ពោធដំណើរការជាផ្លូវការនៅថ្ងៃទី១៧ខែធ្នូ ឆ្នាំ២០១៨នេះ ក្រោមអធិបតីភាពរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ដោយមានសមត្ថភាពផលិតថាមពល អគ្គីសនីបាន១ភាគ៥នៃទិន្នផលថាមពលអគ្គីសនីសរុបក្នុងប្រទេសកម្ពុជា។

គម្រោងនេះ គឺជាគម្រោងរួមគ្នារវាងក្រុមហ៊ុនរបស់កម្ពុជាគឺ រូយ៉ាល់ គ្រុប របស់អ្នកឧកញ៉ាគិត ម៉េងរួមជាមួយក្រុមហ៊ុន Huaneng Hydrolancang International Energy) របស់ចិន និងក្រុមហ៊ុន EVN International Joint Stock Company របស់វៀតណាម។

សព្វថ្ងៃវារីអគ្គិសនីសេសាននេះ បាននឹងកំពុងដំណើរការផលិតអគ្គិសនីដែលនឹងជួយរួមចំណែកធ្វើឲ្យកម្ពុជាមានឯករាជ្យភាព លើវិស័យថាមពលអគ្គិសនី កាត់បន្ថយការនាំចូល និងធ្វើឲ្យតម្លៃ អគ្គិសនីថយចុះផងដែរ។ ទំនប់វារីអគ្គិសនីនេះ នឹងអាចផ្គត់ផ្គង់អគ្គិសនីដល់គ្រួសារប្រជាពលរដ្ឋ តាមបណ្តោយបណ្តាញបញ្ជូន ភ្នំពេញ-កំពង់ចាម-ក្រចេះ-ស្ទឹងត្រែង ព្រមទាំងខេត្តមណ្ឌលគិរី និងរតនៈគិរីផងដែរ៕

បណ្តាប្រទេសតាមដងទន្លេមេគង្គស្នើប្រទេសឡាវ វាយតម្លៃពីផលប៉ះពាល់ឱ្យបានលម្អិតលើគម្រោងវារីអគ្គិសនីហ្លួងព្រះបាង

ដោយៈ រ៉ាណេត

ភ្នំពេញៈ បណ្តាប្រទេសដែលស្ថិតនៅជាប់ដងទន្លេមេគង្គ រួមមានប្រទេសកម្ពុជា ថៃ និងប្រទេសវៀតណាម បានស្នើឱ្យភាគីនៃប្រទេសឡាវ បានធ្វើការវាយតម្លៃផលប៉ះពាល់ឆ្លងដែនឱ្យបានហ្មត់ចត់ លើគម្រោងសាងសង់ទំនប់វារីអគ្គិសនីហ្លួងព្រះបាង មានកម្លាំង១៤៦០មេហ្គាវ៉ាត់។

នៅក្នុងកិច្ចប្រជុំពិភាក្សានៅដើមសប្ដាហ៍នេះ គណៈកម្មាធិការជាតិទន្លេមេគង្គកម្ពុជា ដែលផ្ញើលិខិតទៅរដ្ឋាភិបាលឡាវបានបញ្ជាក់ថា ការវាយតំលៃផលប៉ះពាល់បរិស្ថានឆ្លងដែនបន្ថែមទៀត គួរតែត្រូវបានធ្វើឡើងដោយពិចារណាលើផែនការ និងវិធានការកាត់បន្ថយឱ្យបានត្រឹមត្រូវ និងមានប្រសិទ្ធភាពទៅលើបរិស្ថាន គុណភាពទឹក លំហូរទឹក ផលនេសាទ ដំណាំកសិកម្ម និងជីវភាពរបស់ប្រជាពលរដ្ឋ នៅតាមដងទន្លេនៅផ្នែកខាងក្រោមជាដើម។

រដ្ឋមន្ត្រីធនធានទឹករបស់ប្រទេសថៃ បានលើកឡើងថា ភាគីឡាវ និងអ្នកអភិវឌ្ឍន៍គម្រោង គួរតែកំណត់វិធានការកាត់បន្ថយផលប៉ះពាល់ឆ្លងដែន ទាក់ទងនឹងសេដ្ឋកិច្ចសង្គមការរស់នៅ និងបរិស្ថាន។

ដូចគ្នានេះផងដែរ គណៈកម្មាធិការជាតិនៃទន្លេមេគង្គ របស់ប្រទេសវៀតណាម បានលើកសំណើថា ផលប៉ះពាល់ជាបន្តបន្ទាប់ នៃគម្រោងវារីអគ្គិសនីហ្លួងព្រះបាង និងគម្រោងវារីអគ្គិសនីមេគង្គទាំងអស់ គួរតែត្រូវបានវាយតម្លៃឲ្យបានទូលំទូលាយ។ ដំណើរការពិគ្រោះយោបល់ជាមុន សម្រាប់គម្រោងវារីអគ្គិសនីហ្លួងព្រះបាង បានធ្វើឡើងចំពេលមានបញ្ហាប្រឈមធំៗ សម្រាប់កិច្ចសហប្រតិបត្តិការមេគង្គ ជាពិសេសអ្វីដែលគួរកត់សម្គាល់ឱ្យថ្មីៗនេះ គឺកម្រិតទឹកទន្លេមេគង្គមានការធ្លាក់ចុះយ៉ាងខ្លាំង។

ទំនប់វារីអគ្គិសនីហ្លួងព្រះបាង គ្រោងសាងសង់នៅចម្ងាយប្រហែល២៥គីឡូម៉ែត្រ ពីទីរួមខេត្តហ្លួងព្រះបាងប្រទេសឡាវ ដោយទំនប់នេះមានប្រវែង២៧៥ម៉ែត្រ កម្ពស់៨០ម៉ែត្រ និងទទឹងមុខកាត់៩៧ម៉ែត្រ ក្រោមការផ្ដល់សិទ្ធិទៅក្រុមហ៊ុនវៀតណាមមួយឱ្យសាងសង់តាំងពីឆ្នាំ២០០៧ ប៉ុន្តែរដ្ឋាភិបាលឡាវទើបតែជូនដំណឹង ទៅគណៈកម្មការទន្លេមេគង្គ (MRC) អំពីគម្រោងសាងសង់ទំនប់ វារីអគ្គិសនីកម្លាំង១៤៦០មេហ្កាវ៉ាត់មួយនេះ កាលពីខែតុលា ឆ្នាំ២០១៩ ៕