តំបន់ព្រែកឯងកំពុងទាក់ទាញការវិនិយោគលើគម្រោងបុរីលំនៅឋានតម្លៃសមរម្យ

ដោយ ៖ រ៉ាណេត

ភ្នំពេញ ៖ តំបន់ព្រែកឯង ក្នុងខណ្ឌច្បារអំពៅ នៅពេលបច្ចុប្បន្ននេះ បាន និងកំពុងផ្លាស់ប្ដូរមុខមាត់ថ្មីជាមួយនឹងគម្រោងអភិវឌ្ឍន៍ជាច្រើន ជាពិសេស វិស័យលំនៅដ្ឋានបែបទំនើបតម្លៃសមរម្យ ដែលមានមិនក្រោម៥គម្រោងនោះទេ។

រុញច្រានបន្តពីតំបន់ដែលមានការអភិវឌ្ឍខ្លាំងលើវិស័យលំនៅដ្ឋានបឹងស្នោរ ពេលនេះ មានគម្រោងអភិវឌ្ឍន៍ជាច្រើន បាន និងកំពុងបង្ហាញវត្តមាននៅតំបន់ព្រែកឯង ហើយក្នុងនោះក៏មានគម្រោងអភិវឌ្ឍន៍សំណង់អាគារខុនដូ និងអាផាតមិនមួយចំនួនទៀតផងដែរ។

អគ្គនាយកក្រុមហ៊ុនអចលនទ្រព្យ Century21 Fortuna Investment លោក វ៉ា វីរៈ បានមានប្រសាសន៍ប្រាប់តាមទូរស័ព្ទកាលពីព្រឹកថ្ងៃទី៣ ខែកក្កដា ឆ្នាំ២០២០ នេះថា បច្ចុប្បន្នមិនថាចំពោះតំបន់មួយណានោះទេ ឱ្យតែនៅជាប់ជាយក្រុងគឺសុទ្ធ តែមានសក្ដានុពល និងមានតម្រូវការខ្ពស់ក្នុងការប្រើប្រាស់ដីទាំងអស់។ លោកបានបន្តទៀតថា ចាប់ពីបឹងស្នោររហូតដល់កំណាត់ផ្លូវលេខ១១៤ ឬផ្លូវរោងចក្រស្រាបៀរថៃហ្គ័រ បែកចេញពីផ្លូវជាតិលេខ១ ស្ថិតក្នុងសង្កាត់ព្រែកឯង គឺកំពុងមានសក្ដានុពល និងភាពទាក់ទាញខ្លាំង។

លោកបន្តថា “ចាប់ពីចំណុចផ្លូវបំបែកចេញពីផ្លូវជាតិលេខ១ រហូតដល់ចំណុចរោងចក្រផលិតស្រាបៀរថៃហ្គ័រ ភាគច្រើនត្រូវបានក្លាយជាតំបន់លំនៅដ្ឋានកម្រិតខ្ពស់ ឬផ្ទះលំហែរកាយរបស់អភិជនរួចទៅហើយ។ ដោយឡែកចាប់ពីចំណុចរោងចក្រផលិតស្រាបៀរថៃហ្គ័រ រហូតដល់ចំណុចរង្វង់មូលស្ពានទន្លេបាសាក់ គឺនៅមានដីទំនេរច្រើន ប៉ុន្តែមិនមានទំហំធំៗដែលអាចធ្វើជាបុរីនោះទេ ហើយក៏មានតម្លៃថ្លៃផងដែរ។ ដីដែលនៅជាប់នឹងផ្លូវធំនេះ មានសក្ដានុពល និងអាចអភិវឌ្ឍន៍ជាបណ្តុំលំនៅដ្ឋាន” ។

លោកបានបញ្ជាក់ថា “វិស័យដីធ្លីនៅតំបន់ព្រែកឯងមានតម្រូវការខ្ពស់សម្រាប់ការអភិវឌ្ឍវិស័យលំនៅដ្ឋាន ប៉ុន្តែមិនអាចមានទ្រង់ទ្រាយធំទូលាយនោះទេ ដោយសារតែតម្លៃដីឡើងថ្លៃខ្ពស់ ហើយមិនសូវមានដីទំនេរធំនោះទេ ហើយតម្លៃដីនៅតំបន់នេះនៅតែបន្តឡើងទៀត ដែលផ្តល់ឱកាសសម្រាប់អ្នកវិនិយោគនៅក្នុងតំណាក់កាលនេះ។

តំបន់នេះបច្ចុប្បន្ន ត្រូវបានអ្នកជំនាញអះអាងថា តម្លៃដីបានឡើងខ្ពស់រួចទៅហើយ ដែលយ៉ាងហោចណាស់ដីដែលនៅជាប់ផ្លូវ១១៤ មានតម្លៃក្នុងរង្វង់ ៣៥០-៤៥០ ដុល្លារក្នុងមួយម៉ែត្រការ៉េ ដែលវាក៏អាស្រ័យទៅតាមទ្រង់ទ្រាយ និងទំហំដី។ ដោយឡែកចំពោះដីដែលស្ថិតនៅតំបន់ខាងក្នុងដូចជា តំបន់បោះអង្គាញ់ អាចមានតម្លៃចាប់ពី ១៥០ -២០០ ដុល្លារក្នុងមួយម៉ែត្រការ៉េ ហើយនៅថ្ងៃខាងមុខ តម្លៃនឹងបន្តឡើងថ្លៃជាងនេះ។

ជាមួយនឹងតម្រូវការនៃការប្រើប្រាស់ដីធ្លីសម្រាប់អភិវឌ្ឍន៍លំនៅដ្ឋានបែបទាន់សម័យនៅក្នុងតំបន់ព្រែកឯងដែលមានមិនតិចជាង៥គម្រោងធំៗ ក្នុងនោះក៏មានគម្រោងអភិវឌ្ឍន៍លំនៅដ្ឋាន រំដួលវីឡាព្រែកឯង ដែលកំពុងមានភាពលេចធ្លោក្រោមការទទួលបានចំណាប់អារម្មណ៍ពីសំណាក់មហាជន។ គម្រោងមួយនេះស្ថិតនៅក្នុងទីតាំងដែលពោរពេញទៅដោយសក្ដានុពល អំណោយផលលើកក្តាភូមិសាស្ត្រ មានផ្លូវធំៗចំនួន៣នៅព័ទ្ធជុំវិញរួមជាមួយគម្រោងអភិវឌ្ឍន៍ផ្លូវ៣០ម៉ែត្ររបស់រដ្ឋាភិបាល ផ្ដល់ភាពងាយស្រួលក្នុងការធ្វើចរាចរណ៍។ នៅក្នុងគម្រោង រំដួលវីឡាព្រែកឯង បានសាងសង់លំនៅដ្ឋានបែបទាន់សម័យជា៣ប្រភេទ រួមមានប្រភេទ Link House ប្រភេទ Shop House ប្រភេទ Villa កូនកាត់ និងវីឡាភ្លោះ យ៉ាងស្រស់ស្អាត ទំនើប និងស៊ីវិល័យបំផុតស្ថិតនៅភូមិចុងព្រែក សង្កាត់ព្រែកឯង ខណ្ឌច្បារអំពៅ រាជធានីភ្នំពេញ។

បុគ្គលិកផ្នែកលក់ជាន់ខ្ពស់នៃគម្រោងអភិវឌ្ឍន៍លំនៅដ្ឋានបែបទំនើប រំដួលវីឡាព្រែកឯង បានប្រាប់ឱ្យដឹងថា ទីតាំងដែលក្រុមហ៊ុនកំពុងធ្វើការអភិវឌ្ឍបច្ចុប្បន្ន គឺមានលក្ខណៈល្អប្រសើរ ងាយស្រួលទាំងការរស់នៅ ក៏ដូចជាការប្រកបអាជីវកម្មផ្សេងៗផងដែរ។ នៅជុំវិញគម្រោង ក្រៅពីមានហេដ្ឋារចនាសម្ព័ន្ធដូចជាផ្លូវថ្នល់ និងការអភិវឌ្ឍរបស់រាជរដ្ឋាភិបាលស្របតាមប្លង់គោលរបស់រដ្ឋបាលរាជធានីភ្នំពេញ គឺមានគម្រោងអភិវឌ្ឍន៍ផ្សេងទៀតជាច្រើន ដែលក្នុងនោះរួមមានគម្រោងសំណង់បុរីលំនៅដ្ឋានចំនួន៥ គម្រោងសាងសង់ខុនដូ អាផាតមិន និងតំបន់កម្សាន្តកែច្នៃ។

បុគ្គលិកដដែលបានបន្តទៀតថា លក្ខណៈពិសេសរបស់គម្រោង ក្រៅពីស្ថិតនៅក្នុងតំបន់ទីប្រជុំក្នុងភូមិចាស់ដែលមានប្រជាជនរស់នៅស្រាប់ គឺមានផ្លូវធំជាច្រើនខ្សែរ ងាយស្រួលចរាចរណ៍ចេញចូលក្រុង ទាំងរាជធានីភ្នំពេញ ទាំងក្រុងតាខ្មៅតាមរយៈជាតិលេខ១១៤ រួមជាមួយនឹងផ្លូវជាតិលេខ១ផងដែរ។ ដោយឡែកសម្រាប់សំណង់លំនៅដ្ឋានសុទ្ធតែត្រូវបានយកចិត្តទុកដាក់ខ្ពស់ទៅលើគុណភាពជាសំខាន់បន្ថែមពីលើការរចនាម៉ូដបែបទាន់សម័យ និងវិចិត្រភាពបំផុត។ សម្រាប់ព័ត៌មានលម្អិតពីគម្រោង រំដួលវីឡា ព្រែកឯង សូមទំនាក់ទំនងទូរស័ព្ទលេខ ៖ 092 347 779 / 015 322 247 / 068 788 066៕

គម្រោងស្ថាបនាផ្លូវវាងក្រុងកំពតកំពុងទាក់ទាញការវិនិយោគបន្ថែម

ដោយ ៖ រ៉ាណេត

កំពត ៖ ជាមួយនឹងលទ្ធផលនៃការស្ថាបនាផ្លូវវាងក្រុងកំពតទទួលបានជាង ៩០ភាគរយ ដែលគ្រោងនឹងបញ្ចប់ទាំងស្រុងនៅក្នុងអំឡុងខែកក្កដា ឆ្នាំ២០២០នេះ បច្ចុប្បន្នមានគម្រោងអភិវឌ្ឍន៍ជាច្រើន បាន និងកំពុងបង្ហាញវត្តមានជាបន្តបន្ទាប់នៅក្បែរផ្លូវដ៏មានសារសំខាន់មួយនេះ។

គិតត្រឹមចុងសប្ដាហ៍ ដើមខែកក្កដា ឆ្នាំ២០២០នេះ គម្រោងសាងសង់ផ្លូវក្រវ៉ាត់ក្រុងកំពតសម្រេចបានលទ្ធផលជាង ៩០ភាគរយ ដែលគ្រោងនឹងបញ្ចប់ទាំងស្រុងនៅក្នុងអំឡុងខែនេះ។

អភិបាលរងខេត្ត លោក ភូ លិ បានមានប្រសាសន៍ប្រាប់តាមទូរស័ព្ទនៅថ្ងៃចុងសប្ដាហ៍នេះថា គម្រោងសាងសង់ផ្លូវក្រវ៉ាត់ក្រុងកំពត គិតត្រឹមថ្ងៃនេះសម្រេចបានជាង៩០ភាគរយហើយ ដែលអាចនឹងបញ្ចប់នៅក្នុងអំឡុងខែកក្កដា ឆ្នាំ២០២០នេះ។

លោកបានបញ្ជាក់ថា “ឥឡូវជិតបញ្ចប់ការសាងសង់ទាំងស្រុងហើយ ពោលគឺនៅសល់តែការចាក់បំពេញនៅដើមផ្លូវ និងចុងផ្លូវបន្តិចទៀតតែប៉ុណ្ណោះ ហើយតាមរយៈផ្លូវបេតុងវាងក្រុងកំពត១ខ្សែនេះ គឺពិតជាមានសារៈសំខាន់ក្នុងការកាត់បន្ថយការកកស្ទះនូវរថយន្តតូច ធំបើកបរលើដងផ្លូវជាតិលេខ៣ ក្បែរផ្សារសាមគ្គី ក្នុងក្រុងកំពត និងក៏ដូចជាការកាត់បន្ថយគ្រោះថ្នាក់ចរាចរណ៍ ព្រមទាំងរបៀបរៀបរយសណ្ដាប់ធ្នាប់សាធារណៈក្នុងក្រុងកំពត ព្រោះបច្ចុប្បន្នក្រុងកំពតផ្លូវវាងក្រុងប៉ែកខាងជើង ឬខាងលិចនៃក្រុងកំពត នៅពុំទាន់មានផ្លូវសម្រាប់សម្រួលចរាចរណ៍នៅឡើយ” ។

ជាមួយនឹងវត្តមាននៃផ្លូវវាងក្រុងដ៏ស្រស់ស្អាត និងធំទូលាយ មួយនេះ បច្ចុប្បន្នមានគម្រោងវិនិយោគ និងអភិវឌ្ឍន៍ជាច្រើនបានចាប់ផ្តើមបង្ហាញវត្តមានជាបន្តបន្ទាប់ ដែលក្នុងនោះភាគច្រើនជាការវិនិយោគក្នុងវិស័យលំនៅដ្ឋានបន្ថែមពីលើគម្រោងអភិវឌ្ឍន៍តំបន់កម្សាន្តដែលស្ថិតនៅក្បែរមាត់ព្រែកជិតផ្លូវវាងក្រុង។

ផ្លូវវាងក្រុងមួយនេះ ស្ថិតនៅក្នុងភូមិកំពង់បាយខាងជើង សង្កាត់កំពង់បាយ ក្រុងកំពត មានទទឹង ១៥ម៉ែត្របណ្ដោយ ១៣៨០ម៉ែត្រ ធ្វើពីបេតុងសរសៃដែក អមដោយប្រព័ន្ធលូរំដោះទឹកចេញពីក្នុងក្រុងកំពត ដោយផ្លូវនេះតបំបែកចេញ ពីផ្លូវជាតិលេខ៣ ឆ្ពោះទៅទល់នឹងផ្លូវបេតុងម៉ាកេង ស្របតាមបណ្ដោយផ្លូវរថភ្លើងដែលមានគំលាតពីផ្លូវរថភ្លើងចម្ងាយ ១២ម៉ែត្រ និងចិញ្ចើមផ្លូវម្ខាងទៀត មានចំនួន ៣ម៉ែត្រ ក្រោមគម្រោងប្រើប្រាស់ថវិការបស់រដ្ឋបាលខេត្តកំពត៕

ប្រធានាធិបតីចិន លោក Xi Jinping៖ សហគមន៍ចិន-កម្ពុជា មានអនាគតរួមគ្នាមិនអាចបំបែកបានឡើយ

ដោយ ៖ ប៊ី

ភ្នំពេញ ៖ ប្រធានាធិបតីចិន លោក Xi Jinping (ស៊ី ជីនពីង) បាននិយាយកាលពីថ្ងៃសុក្រថា ប្រទេសចិន និងប្រទេសកម្ពុជាបានបង្ហាញតាមរយៈការខិតខំរួមគ្នាក្នុងការរួមគ្នាប្រយុទ្ធនឹងការរីករាលដាលនៃ Covid-19 ដែលសហគមន៍ចិន-កម្ពុជាមានអនាគតរួមគ្នាគឺមិនអាចបំបែកបានឡើយ។

លោកប្រធានាធិបតី Xi ក៏ជាអគ្គលេខាធិការគណៈកម្មាធិការមជ្ឈិមបក្សកុម្មុយនិស្តចិន បានធ្វើការកត់សម្គាល់នៅក្នុងសារលិខិតផ្ញើជូនសម្តេចតេជោ ហ៊ុន សែន ប្រធានគណបក្សប្រជាជនកម្ពុជា និងជានាយករដ្ឋមន្ត្រីនៃកម្ពុជា។ លោកបាននិយាយថា ដំណើរទស្សនកិច្ចរបស់សម្តេចតេជោ ហ៊ុន សែន ទៅកាន់ប្រទេសចិន នៅពេលដែលស្ថានជំងឺរាតត្បាតកំពុងធ្ងន់ធ្ងរនៅប្រទេសចិន ដែលធ្វើឱ្យមានចាប់អារម្មណ៍ខ្លាំងដល់បក្សកុម្មុយនិស្តចិន រដ្ឋាភិបាលចិន ប្រជាជនចិន និងខ្លួនលោកផ្ទាល់។

លោក Xi បានមានប្រសាសន៍ថា ប្រទេសចិនបានយកចិត្តទុកដាក់យ៉ាងខ្លាំងចំពោះការអភិវឌ្ឍនៃទំនាក់ទំនងចិន-កម្ពុជា ដោយលោកបានបន្ថែមថា លោកមានឆន្ទៈធ្វើការរួមគ្នាជាមួយសម្តេចតេជោ ហ៊ុន សែន ដើម្បីលើកកម្ពស់ការផ្លាស់ប្តូរ និងកិច្ចសហប្រតិបត្តិការរវាងគណបក្សទាំងពីរ និងនៅក្នុងវិស័យផ្សេងៗទៀត លើកកម្ពស់ការកសាងសហគមន៍ជាមួយ អនាគតរួមគ្នាសម្រាប់ប្រទេសចិន និងប្រទេសកម្ពុជា និងផ្តល់ផលប្រយោជន៍ដល់ប្រទេស និងប្រជាជនរវាងប្រទេសទាំងពីរ។

លោក Xi ក៏បានមានប្រសាសន៍ថា ប្រទេសចិនគាំទ្រយ៉ាងមុតមាំដល់ប្រទេសកម្ពុជាក្នុងការដើរលើមាគ៌ាអភិវឌ្ឍន៍មួយ ដែលសមស្របទៅនឹងលក្ខខណ្ឌជាតិរបស់ខ្លួន ហើយជឿជាក់ថា ក្រោមការដឹកនាំរបស់សម្តេចតេជោ ហ៊ុន សែន ប្រទេសកម្ពុជាប្រាកដជានឹងបង្កើតសមិទ្ធផលថ្មីៗក្នុងបុព្វហេតុកសាងជាតិ និងចូលរួមវិភាគទានវិជ្ជមានក្នុងការលើកកម្ពស់ស្ថិរភាព និងការអភិវឌ្ឍក្នុងតំបន់។

សម្តេចតេជោ ហ៊ុន សែន ធ្លាប់បានមានប្រសាសន៍ ឋានៈរបស់ចិននៅលើឆាកអន្តរជាតិកំពុងតែកើនឡើង ហើយចិនបានដើរតួនាទីនាំមុខក្នុងការដោះស្រាយបញ្ហាពិភពលោកសំខាន់។ សម្តេចតេជោ បានបន្ថែមទៀតថា ចាប់តាំងពីការផ្ទុះឡើងនៃ COVID-19 មក ប្រទេសចិនបានដើរតួយ៉ាងសំខាន់ក្នុងការប្រយុទ្ធប្រឆាំងនឹងជំងឺរាតត្បាត និងឆ្លើយតបទៅនឹងផលប៉ះពាល់អន្តរជាតិ ដែលបណ្តាលមកពីជំងឺនេះ។

កាលពីឆ្នាំមុន ប្រទេសចិនបានរៀបចំវេទិកាខ្សែក្រវាត់ និងផ្លូវ សម្រាប់កិច្ចសហប្រតិបត្តិការអន្តរជាតិដោយជោគជ័យ ដែលបង្ហាញថា គំនិតផ្តួចផ្តើមគម្រោងខ្សែក្រវ៉ាត់ និងផ្លូវ ត្រូវបានគាំទ្រដោយបណ្តាប្រទេស និងស្ថាប័នកាន់តែច្រើន ហើយកិច្ចខិតខំប្រឹងប្រែងរបស់ប្រទេសចិនក្នុងការជំរុញការកសាងសហគមន៍ជាមួយនឹងអនាគតរួមគ្នាសម្រាប់មនុស្សជាតិ ត្រូវបានទទួលស្គាល់ដោយប្រទេស និងប្រជាជនកាន់តែច្រើនឡើង៕

រោងចក្រកែច្នៃដូងប្រេងរបស់លោកឧកញ៉ា ម៉ុង ឫទ្ធី មានលទ្ធភាពអាចផលិតបាន ៤៥តោនក្នុង១ម៉ោងកំពុងជួបការខាតបង់

ដោយ ៖ វុត្ថា

ព្រះសីហនុ ៖ រោងចក្រកែច្នៃដូងប្រេងដ៏ទំនើបរបស់លោកឧកញ៉ាបណ្ឌិត ម៉ុង ឫទ្ធី សេដ្ឋីកសិកម្មប្រចាំនៅក្នុងប្រទេសកម្ពុជា ដែលអាចមានលទ្ធភាពក្នុងការផលិតបានរហូតដល់ ៤៥តោនក្នុងរយៈពេលត្រឹមតែ១ម៉ោង កំពុងតែទទួលរងនូវការខាតបង់យ៉ាងច្រើនដោយសារកំណើនផ្លែដូងកើនឡើងហួសផែនការ។

លោកឧកញ៉ាបណ្ឌិត ម៉ុង ឫទ្ធី បានសរសេរនៅលើបណ្តាញផ្សព្វផ្សាយផ្លូវការរបស់លោកកាលពីយប់ថ្ងៃទី៣ ខែកក្កដា ឆ្នាំ២០២០ថា នៅវេលាម៉ោង១រសៀលថ្ងៃសុក្រទី៣ ខែកក្កដា ឆ្នាំ២០២០ចុះមកពិនិត្យមើលរោងចក្រកែច្នៃផ្លែដូងប្រេងដែលមានកម្លាំងផលិត៤៥តោនក្នុងមួយម៉ោង ចំការដូងប្រេងនេះមានទីតាំងស្ថិតនៅនៅក្នុងខេត្តព្រះសីហនុ។

លោកឧកញ៉ាបានបញ្ជាក់ថា “ជាមួយនឹងដំណើរការរោងចក្រនេះ ក្រុមហ៊ុនបានចាប់ផ្តើមបណ្តុះកូនដាំដំបូងកាលពីឆ្នាំ១៩៩៦ ជាបន្តបន្ទាប់ដាំប្រមាណជា២ម៉ឺនហិកតា កាលពីឆ្នាំ២០០០ យើងងបានសាងសង់រោងចក្រកែច្នៃទី១ ដែលមានកម្លាំងផលិត៣០តោនក្នុងមួយម៉ោង នៅក្នុងឆ្នាំ២០១៥ យើងបានសាងសង់រោងចក្រកែច្នៃថ្មីមួយទៀតដែលមានកម្លាំងផលិត៤៥តោនក្នុងមួយម៉ោង” ។

លោកបន្តថា “នៅពេលមានវិបត្តិកូរូណានេះក្រុមហ៊ុនមិនបានបញ្ឈប់បុគ្គលិកកម្មករទេ ថែមទាំងបានបង្កើនការថែទាំ ដាក់ជីប្រមូលផលជាធម្មតា។ បើតាមការព្យាករណ៍ឆ្នាំ២០២០នេះ យើងអាចទទួលផលបានតែ ២៧០ ០០០ តោន ទេ តែបើតាមពិនិត្យមើលកំណើនផលផ្លែដូងអាចកើនឡើងរហូតដល់ ៣០០ ០០០ តោន តែជាអកុសល រោងចក្រកែច្នៃទាំង២នេះមិនអាចទទួលយកទៅកែច្នៃបានគ្រប់ចំនួននោះទេ ធ្វើអោយផលផ្លែដូងប្រេងនៅសល់លើទីលាន ប្រមាណជាជាង ៥០០០តោន បណ្តាលអោយរលួយស្អុយចោល ខាតបង់ថវិការយ៉ាងធ្ងន់ធ្ងរ” ។

ជាមួយនឹងសំណេរបញ្ជាក់ពីភាពខាតបង់ថវិកាយ៉ាងធ្ងន់ធ្ងរខាងលើនេះ លោកឧកញ៉ាបានលើកឡើងផងដែរថា បើតាមការអោយដឹងក្រៅផ្លូវការមកថា ប្រទេសឥណ្ឌូនេស៊ី ម៉ាឡេស៊ី និងប្រទេសថៃ មានការថយចុះផលផ្លែដូងគួអោយកត់សំគាល់ ចំណែកឯព្រះរាជាណាចក្រកម្ពុជាយើងវិញបែទៅជាមានកំណើនផលផ្លែដូងប្រេងទៅវិញ ៕

រដ្ឋាភិបាលអនុញ្ញាតឱ្យអាជីវកម្មក្លឹប និង KTV ប្រែក្លាយទៅជាភោជនីយដ្ឋាន ដើម្បីដំណើរការឡើងវិញ

ដោយ ៖ រ៉ាណេត

ភ្នំពេញ ៖ រាជរដ្ឋាភិបាលបានសម្រេចអនុញ្ញាតឱ្យគ្រប់អតីតអាជីវកម្មក្លឹបកម្សាន្ត និង KTV ទាំងអស់ដែលបានផ្អាកដំណើរការតាំងពីអំឡុងខែមីនា ឆ្នាំ២០២០ បន្ទាប់ពីផ្ទុះជំងឺឆ្លងនោះ អាចចាប់ដំណើរបើកទ្វារដំណើរគឡើងវិញ ប៉ុន្តែត្រូវប្ដូរទៅជាប្រភេទអាជីវកម្មបម្រើសេវាជាភោជនីយដ្ឋានវិញ។

កិច្ចប្រជុំពេញអង្គគណៈរដ្ឋមន្ត្រី កាលពីថ្ងៃសុក្រ ទី៣ ខែកក្កដា ឆ្នាំ២០២០ បានសម្រេចអនុញ្ញាតឱ្យអាជីវកម្មក្លិបកម្សាន្ត និង KTV នៅរាជធានីភ្នំពេញ និងនៅតាមបណ្តាខេត្ត ប្រែក្លាយ ទៅជាភោជនីយដ្ឋាន ដើម្បីចូលរួមសកម្មភាពសេដ្ឋកិច្ច និងផ្តល់ការងារឡើងវិញ ប៉ុន្តែត្រូវគោរពឲ្យបានម៉ឺងម៉ាត់នូវវិធាននៃក្រសួងសុខាភិបាល ក្នុងការទប់ស្កាត់នូវការរីករាលដាលនៃជំងឺ Covid-19 ។

នៅក្នុងកិច្ចប្រជុំដ៏មានសារសំខាន់ក្រោមអធិបតីរបស់សម្ដេចតេជោ ហ៊ុន សែន នាយករដ្ឋមន្ត្រីកម្ពុជា កាលពីម្សិលមិញនេះ ក៏បានសម្រេចឱ្យគ្រឹះស្ថានសិក្សាឯកជនដែលមានលទ្ធភាពចាប់ដំណើរការឡើងវិញផងដែរ ដោយអាចអនុវត្តចាប់ពីខែសីហា ឆ្នាំ២០២០ ខាងមុខនេះ ខណៈដែលបណ្តាកាស៊ីណូនៅក្នុងរាជធានីភ្នំពេញ ខេត្តព្រះសីហនុ ប៉ោយប៉ែត ស្វាយរៀង និងនៅតំបន់ព្រំដែនដទៃទៀតក៏ចាប់ដំណើរការឡើងវិញផងដែរ ប៉ុន្តែសម្រាប់តែប្រភេទល្បែងភ្នាល់ និងស្លត់ម៉ាស៊ីន ដោយតម្រូវអនុវត្តតាមវិធានរបស់ក្រសួងសុខាភិបាលឱ្យបានហ្មត់ចត់ ដើម្បីការពារការឆ្លងរាលដាលជំងឺ Covid-19 ៕

គម្រោងផ្លូវរថភ្លើងឆ្លងកាត់រូងភ្នំតម្លៃ ៨៤ពាន់លានដុល្លាររបស់ជប៉ុនត្រូវពន្យាពេលសាងសង់

ដោយ ហ្សូលី

តូក្យូៈ គម្រោងផ្លូវរថភ្លើងឆ្លងកាត់រូងភ្នំពីទីក្រុងតូក្យូ ទៅកាន់តំបន់អូសាកា ត្រូវបានពន្យាពេលបើកការដ្ឋានសាងសង់ ដោយសាររដ្ឋាភិបាលព្រួយបារម្ភ ពីផលប៉ះពាល់នៃការសាងសង់ផ្លូវដែកឆ្លងកាត់ក្រោមរូងភ្នំនេះ។

គម្រោងផ្លូវដែកនេះ ត្រូវចំណាយទឹកប្រាក់ប្រមាណ៨៤ពាន់លានដុល្លារ និងមានប្រវែងរាប់រយគីឡូម៉ែត្រ ដែលក្នុងនោះចម្ងាយ៩គីឡូម៉ែត្រ ត្រូវឆ្លងកាត់រូងភ្នំដ៏វែង។

លោកអភិបាលប្រចាំតំបន់ បានបើកកិច្ចប្រជុំជាមួយក្រុមហ៊ុនអភិវឌ្ឍគម្រោងផ្លូវដែកនេះ និងបានបដិសេធចំពោះការសាងសង់សារជាថ្មី។

អភិបាលតំបន់រូបនេះអះអាងថា “ផ្លូវដែកក្រោមដីនេះ អាចធ្វើឱ្យគូរទឹកព័ទ្ធជុំវិញភ្នំហូរទៅកាន់ទន្លេផ្សេង ដែលប៉ះពាល់ដល់បរិស្ថាន និងបង្កផលលំបាកដល់ប្រជាពលរដ្ឋក្បែរតំបន់នោះ” ។

យោងតាមការចុះផ្សាយរបស់សារព័ត៌មានល្បីរបស់ជប៉ុនបានឱ្យដឹងថា លោកអភិបាល បានទាមទារឱ្យមានរបាយការណ៍ត្រឹមត្រូវ អមជាមួយនឹងទិន្នន័យបញ្ជាក់អំពីផលប៉ះពាល់បរិស្ថាន ប៉ុន្តែគ្មានរបាយការណ៍នោះ ទើបការហាមឃាត់ការសាងសង់ប្រកបទៅដោយជោគជ័យ។

គម្រោងនេះត្រូវចំណាយពេល៥ឆ្នាំក្នុងការសាងសង់ ដោយក្រុមហ៊ុនអភិវឌ្ឍ JR Central ហើយក្រុមហ៊ុននេះ ព្យាយាមដោះស្រាយអំពីបញ្ហាចម្រូងចម្រាស់នេះ ឱ្យបានឆាប់រហ័សបំផុត ដោយគិតគូរនិងព្រួយបារម្ភអំពីការចំណាយ ព្រោះមានបញ្ហាពន្យាពេលការដ្ឋាននេះ។

ដំណាក់កាលទី១នៃគម្រោង គឺជាការសាងសង់ផ្លូវដែក រត់ចេញពីទីក្រុងតូក្យូទៅកាន់ខេត្តណាកូយ៉ា ដែលគ្រោងនឹងដំណើរការនៅឆ្នាំ២០២៧។

នៅពេលការដ្ឋាន ឬគម្រោងនេះមានភាពជោគជ័យ វាអាចរត់បានចម្ងាយប្រមាណ ៥០០គីឡូម៉ែត្រក្នុងមួយម៉ែត្រ និងជួយកាត់បន្ថយពេលវេលា ធ្វើដំណើរពីទីក្រុងតូក្យូទៅកាន់អូសាការយៈពេល ១ម៉ោង៕

មន្ត្រីពន្ធដារ៖ ការយកពន្ធលើដីមិនប្រើប្រាស់ គឺទប់ស្កាត់កុំឱ្យទិញដីទុករង់ចាំដីឡើងថ្លៃ

ដោយ វុត្ថា

ភ្នំពេញៈ មន្ត្រីពន្ធដារកម្ពុជាបានឱ្យដឹងថា ការបង្កើតឱ្យមានពន្ធលើដីធ្លីមិនបានប្រើប្រាស់ គឺក្នុងគោលបំណងក្នុងការទប់ស្កាត់គ្រប់រូបភាព លើទិញដីទុករងចាំដីឡើងថ្លៃ ហើយលក់ក្នុងតម្លៃលើស និងជំរុញការប្រើប្រាស់ដីធ្លី នៅក្នុងប្រទេសឱ្យសមស្របទៅនឹងការអភិវឌ្ឍន៍សេដ្ឋកិច្ច។

លោករស់ សារ៉ាក់ ប្រធានការិយាល័យពន្ធអចលនទ្រព្យ បានឱ្យដឹងនៅក្នុងកម្មវិធី “ពន្ធដារកម្ពុជា” ស្តីពីពលើដីធ្លីមិនបានប្រើប្រាស់កាលពីពេលថ្មីៗនេះឱ្យដឹងថា ពន្ធនេះកំណត់លើដីដែលគ្មានសំណង់ និងដីដែលមានសំណង់បោះបង់នេះ គឺមានវិសាលភាពនូវទូទាំងប្រទេស ដែលស្ថិតនៅក្នុងខេត្តក្រុង និងរាជធានី ពាក់ព័ន្ធនឹងដីដែលគ្មានសំណង់។

លោកបន្តថា “នៅពេលដែលយើងបោះបង់ដី ដោយមិនបានប្រើប្រាស់ដែលត្រូវបានកំណត់ ដោយគណៈកម្មការវាយតម្លៃដីមិនបានប្រើប្រាស់ ស្របតាមសេចក្តីប្រកាសរបស់អគ្គនាយកដ្ឋានពន្ធដារ ហើយមិនបានបង់ពន្ធតាមពេលវេលាកំណត់ នឹងត្រូវមានទោសទណ្ឌ និងការផាកពិន័យទៅតាមច្បាប់ពន្ធដាររបស់កម្ពុជា” ។

លោកបន្តថា ពន្ធដីធ្លីលើដីមិនបានប្រើប្រាស់ ត្រូវបង់ដោយកម្មសិទ្ធិករ។ មូលដ្ឋានកំណត់ពន្ធគឺជាថ្លៃដី គិតតាមថ្លៃទីផ្សារតាមទីក្រុង និងតាមតំបន់នីមួយៗ ដែលវាយតម្លៃទៅតាមតម្លៃគិត ក្នុងមួយម៉ែត្រក្រឡាកំណត់ ដោយគណៈកម្មការវាយតម្លៃដី មិនបានប្រើប្រាស់យ៉ាងយឺតបំផុត នៅថ្ងៃទី៣០ ខែមិថុនា នៃឆ្នាំប្រមូលពន្ធ។

យោងតាមច្បាប់ពន្ធដារកម្ពុជាបង្ហាញថា ពន្ធនេះត្រូវកំណត់តាមអត្រា២%លើមូលដ្ឋានកំណត់ពន្ធ ដែលបានចែងក្នុងមាត្រា៣។ កម្មសិទ្ធិករនៃដីធ្លីជាប់ពន្ធមានភារកិច្ចត្រូវគណនាប្រាក់ពន្ធ តាមគំរូលិខិតប្រកាសផ្តល់ដោយអង្គការពន្ធ និងត្រូវបង់យ៉ាងយឺតបំផុតនៅថ្ងៃទី៣០ ខែកញ្ញានៃឆ្នាំនីមួយៗជូនទៅផ្នែកពន្ធ នៅកន្លែងដែលដីធ្លីជាប់ពន្ធស្ថិតនៅ។ ដីធ្លីជាប់ពន្ធ នីមួយៗត្រូវធ្វើលិខិតប្រកាស១ច្បាប់៕

សេវា Internet នៅកម្ពុជានឹងទទួលបាននូវដំណើរលឿនជាងមុន

ដោយ៖ ប៊ី

ភ្នំពេញៈ អ្នកប្រើប្រាស់ Internet នៅប្រទេសកម្ពុជា វៀតណាម និងឡាវ ឥឡូវនេះគួរតែទទួលបានសេវាកម្ម Internet អន្តរជាតិដែលមានល្បឿនលឿន និងមានស្ថេរភាពជាងមុន បន្ទាប់ពីការជួសជុលខ្សែកាបក្រោមសមុទ្រអាស៊ីប៉ាស៊ីហ្វិក (APG) រួចរាល់។

ការជួសជុលនៅទីតាំង S9 និង S1.7 នៃខ្សែភ្ជាប់ពីប្រទេសវៀតណាម ជាមួយសឹង្ហបុរី និងហុងកុង បានបញ្ចប់ជាស្ថាពរនៅដើមសប្តាហ៍នេះ បន្ទាប់ពីប្រព័ន្ធទាំងមូលត្រូវបានបញ្ឈប់នៅថ្ងៃទី២៣ខែឧសភា។ នេះបើយោងតាមការចុះផ្សាយរបស់គេហទំព័រ ACE New Today ។

ការបញ្ចប់ជាស្ថាពរពីរថ្ងៃមុនការគ្រោងទុក ខ្សែកាបក្រោមសមុទ្រអាស៊ីប៉ាស៊ីហ្វិក មានប្រវែង ១០.៤០០ គីឡូម៉ែត្រ (ប្រហែល ៦.៥០០ មីលីលីត្រ) គឺជាខ្សែកាបក្រោមទឹកដ៏សំខាន់មួយ ភ្ជាប់ប្រទេសវៀតណាមជាមួយប្រទេសជិតខាងក្នុងតំបន់អាស៊ាន។

ស្ទើរតែស្របពេលជាមួយ នឹងការខូចខាតខ្សែកាបក្រោមសមុទ្រ អាស៊ីប៉ាស៊ីហ្វិក ខ្សែអុបទិកអុបទិកអាស៊ីអាមេរិក ដែលមានប្រវែង ២០,០០០គីឡូម៉ែត្រ ក៏ត្រូវបានខូចខាតផងដែរ។ ការខូចខាតទាំងពីរបានប៉ះពាល់យ៉ាងខ្លាំង ដល់ប្រទេសទាំងបីរហូតដល់អុបទិកអុបទិកអាស៊ីអាមេរិក ត្រូវបានជួសជុលឡើងវិញនៅសប្តាហ៍ដំបូងនៃខែ មិថុនា។

យោងតាមរបាយការណ៍ Speedtest report ក្នុងខែឧសភាឆ្នាំ ២០២០ ល្បឿនទាញយក Internet ល្បឿនលឿនរបស់វៀតណាមបានកើនឡើងពី ៤៧,៦៦ Mbps ក្នុងខែមេសាដល់ ៥២,២៩ Mbps នាំមុខប្រទេសឡាវ (៣៤,១៦ Mbps) ហ្វីលីពីន (២២,៣១ Mbps), កម្ពុជា (២១,៨៣ Mbps), ឥណ្ឌូនេស៊ី (១៩,៧៩ Mbps), និងមីយ៉ាន់ម៉ា (១៨,០០ Mbps)។

ការសិក្សានាពេលថ្មីៗនេះបានរកឃើញថា ប្រទេសកម្ពុជាមានតម្លៃសេវា Internet តាមទូរស័ព្ទចល័ត ថ្លៃបំផុតជាគេមួយនៅអាស៊ីអាគ្នេយ៍។

របាយការណ៍ចេញផ្សាយក្នុងសប្តាហ៍កន្លងមកនេះ (ថ្ងៃទី៥ ខែមិថុនា) ដោយក្រុមហ៊ុនទូរគមនាគមន៍ Cable ដែលមានមូលដ្ឋាននៅចក្រភពអង់គ្លេស បានរកឃើញថា ប្រ ទេសកម្ពុជា គឺជាប្រទេសដែលមានតម្លៃថ្លៃជាងគេទីបួននៅក្នុងតំបន់ នៅពេលនិយាយអំពីការប្រើប្រាស់សេវា Internet តាមទូរស័ព្ទចល័ត។

ការរកឃើញនេះបានធ្វើឡើង បន្ទាប់ពីការសិក្សាមួយផ្សេងទៀត ដែលបានរកឃើ ញថា ប្រទេសកម្ពុជាស្ថិតក្នុងចំណោមបណ្តាប្រទេសក្នុងតំបន់ ដែលមានតំលៃរស់នៅខ្ពស់បំផុត។ ការសិក្សានោះដែលធ្វើឡើង ដោយគេហទំព័រ Numbeo ដែលមានមូលដ្ឋាននៅប្រទេសស៊ែប៊ីបានរកឃើញថា ប្រទេសកម្ពុជាគឺជាប្រទេស ដែលមានតម្លៃថ្លៃជាងគេទីបួនដែលរស់នៅក្នុងតំបន់អាស៊ីអាគ្នេយ៍។

នៅប្រទេសកម្ពុជាសេវា Internet ទូរស័ព្ទចល័ត១ជីកាបៃ (GB) សម្រាប់រយៈពេល ៣០ថ្ងៃមានតម្លៃជាមធ្យម ១.៥០ដុល្លារ។ តម្លៃខ្ពស់បំផុតនៅកម្ពុជាសម្រាប់សេវា Internet ទូរស័ព្ទចល័ត១ជីកាបៃគឺ៦,២៥ដុល្លារ ក្នុង១ជីកាបៃ រីឯ ០,២៥ ដុល្លារក្នុង១ជីកាបៃគឺទាបបំផុត៕

ចំណេះដឹងហិរញ្ញវត្ថុៈ មុនសម្រេចចិត្តខ្ចីឥណទានតើអ្នកត្រូវគិតលើកត្តាអ្វីខ្លះ?

ដោយគង់ សូរិយា

ភ្នំពេញៈ ការប្រើប្រាស់ឥណទានត្រឹមត្រូវ មានគោលដៅ និងមិនមានផែនការយុទ្ឋសាស្ត្រច្បាស់លាស់ ឥណទានឬកម្ចីរបស់អ្ននកនឹងជាការបបង្កើនទ្រព្យ ផ្ទុយទៅវិញបើវាជាកម្ចីដែលគ្មានផែនការរឬគោលដៅច្បាស់លាស់ ឥណទានរបស់អ្នកអាចក្លាយជាបំណុល។

តាមឯកសារ និងការអង្កេតមួយចំនួនបានបង្ហាញថា ចំនួនប្រជាជនកម្ពុជាដែលមានបំណងចង់ស្នើសុំកម្ចី ហាក់ដូចជា មានការកើនឡើងខ្លាំង។ អ្នកខ្លះ ស្នើសុំកម្ចី ជាមួយគោលបំណងច្បាស់លាស់ដូចជា ដើម្បីយកទៅពង្រើកអាជីវកម្មជាដើម ចំណែកឯអ្នកមួយចំនួនទៀត មានគំនិតចង់ខ្ចីប្រាក់ តែមិនមានគោលបំនងច្បាស់លាស់ទេថា នឹងយកទៅធ្វើអ្វីអោយពិតប្រាកដ ដែលជា ហេតុនាំអោយគេជួបវិបត្តិហិរញ្ញវត្ថុនៅពេលក្រាយ។

ហេតុនេះទើបគេហទំព័រ www.cambodiabanknews.com ដែលជាគេហទំព័រផ្តោតតលើវិស័យហិរញ្ញវត្ថុ និងសេដ្ឋកិច្ចនៅកម្ពុជា សូមលើកយកនូវទស្សនទានមួយចំនួន ដើម្បីធ្វើជាមូលដ្ឋានសំរាប់លោក អ្នកធ្វើការសម្រេចចិត្តឲ្យបានត្រឹមត្រូវ។

តើអ្នកចង់ខ្ចីប្រាក់ ដើម្បីអ្វី?

លោក អ្នកអាចសួរខ្លួនឯងជាមុនថា តើអ្នកខ្ចីប្រាក់ ដើម្បីអ្វី? ខ្ចី ដើម្បីបង្កើនចំណូល ឬបង្កើតបង្កើតបំណុលសំរាប់ខ្លួនឯង? ចម្លើយគឺ មិនមែនការខ្ចីទាំងអស់ សុទ្ធតែជាការបង្កើតបំណុលនោះទេ។ កម្ចីអាចផ្ដល់ផលល្អឬអាក្រក់ អាស្រ័យទៅលើការប្រើប្រាស់របស់ លោក អ្នក។

ប្រសិនណាបើ អ្នកប្រើវាត្រូវទៅតាមគោលបំណង នោះវានឹងជួយអ្នកក្នុងការរកចំនូលបន្ថែម ប៉ុន្តែផ្ទុយទៅវិញ ប្រសិនបើអ្នកចេះតែខ្ចីតាមចំណង់ ដោយមិនបានគិតអោយបានច្បាស់លាស់ វានឹងធ្វើអោយអ្នកជំពាក់បំណុលគេលើសដើម។

កម្ចីឬឥណទានដែលអ្នកនឹងទទួលបាន នឹងបង្កើតបំណុលដល់អ្នកគឺជា ការខ្ចី ដែលអ្នកខ្ចី ដែលមិនមានគោលបំណងនៃការប្រើប្រាស់ច្បាស់លាស់។

តើអ្នកមានសមត្ថភាពអាចបង់សងវិញឬទេ?

បន្ទាប់ពីអ្នកសម្រេចចិត្តរួចថា លោក អ្នកពិតជាត្រូវការកម្ចីមែននោះ សូមពិចារណាទៅលើស្ថានភាពហិរញ្ញវត្ថុរបស់អ្នក ដើម្បីស្វែងរកសមត្ថភាពនៃការបង់របស់អ្នកថា អ្នកអាចបង់សងធនាគារបានប៉ុន្មានដែរក្នុងមួយខែ។ អ្នកអាចគណនារកតួលេខនេះ តាមរយៈការពិចារណាពី ការប្រាក់ចំនូល និងចំណាយជាមធ្យមរបស់អ្នកប្រចាំខែរបស់អ្នកបាន ដើម្បីបញ្ចៀសហានិភ័យនៃការរសងត្រលប់។

តើហេតុអ្វីបានជាអ្នកចាំបាច់គិតពីចំណូល និងចំណាយនោះ?

វាជាសំណួរសំខាន់ណាស់ នៅក្នុងការគណនាទុកជាមុននួវចំនួន ដែលអ្នកមានលទ្ធភាពក្នុងការបង់សងប្រចាំខែ ទៅកាន់ស្ថាប័នដែលអ្នកខ្ចី ព្រោះថាប្រសិនណាបើ អ្នកដឹងពីចំនួនប្រាក់ដែលអ្នកអាចបង់សងបាន អ្នកនឹងអាចជ្រើសវើសយកទំហំកម្ចី ដែលស័ក្តិសមនឹងអ្នក៕

គម្រោងស្ថាបនាផ្លូវជាតិ ២៧០ ប្រវែង ៥៨គីឡូម៉ែត្រនឹងបញ្ចប់នៅឆ្នាំ២០២១

ដោយ ៖ រ៉ាណេត

កំពង់ចាមៈ គម្រោងស្ថាបនាផ្លូវជាតិលេខ២៧០ ដែលមានប្រវែង៥៨គីឡូម៉ែត្រ តភ្ជាប់ពីឃុំរកាកោងស្រុកមុខកំពូល ខេត្តកណ្តាល ទៅស្រុកកងមាស ខេត្តកំពង់ចាម ដែលកំពុងមមាញឹកក្នុងការស្ថាបនា នឹងត្រូវបញ្ចប់ឱ្យរួចរាល់ក្នុងឆ្នាំ២០២១ ដើម្បីជួយសម្រួលដល់ការធ្វើចរាចរណ៍ និងការដឹកជញ្ជូន។

អភិបាលខេត្តកំពង់ចាម លោក អ៊ុន ចាន់ដា បានបញ្ជាក់សាជាថ្មីតាមទូរស័ព្ទកាលពីល្ងាចថ្ងៃទី៣ ខែកក្កដា ឆ្នាំ២០២០កន្លងមកថា បច្ចុប្បន្នក្រុមការងារជំនាញថ្នាក់ខេត្ត និងក្រសួងសាធារណៈការ និងដឹកជញ្ជូនកំពុងតែជំរុញ និងពន្លឿនការស្ថាបនាផ្លូវលេខ២៧០នេះ បន្ទាប់ពីផ្លូវមួយខ្សែនេះមានសភាពខូចខាតធ្ងន់ធ្ងរ ដែលបង្កផលលំបាកក្នុងការធ្វើដំណើរ ប៉ះពាល់ដល់សុខភាពរបស់ប្រជាពលរដ្ឋ ទាំងការធ្វើចរាចរណ៍ និងប្រជាពលរដ្ឋរស់នៅអមសងខាងផ្លូវ។

លោកបានបញ្ជាក់ថា “ក្រសួងបានធ្វើការប្ដេជ្ញាចិត្ដជាមួយខេត្ដថា នឹងស្ថាបនឱ្យរួច បើទោះបីទំហំថវិកាមានការប៉ះពាល់ដោយសារ Covid-19 យ៉ាងក៏ដោយ ប៉ុន្ដែកងវិស្វកម្មរបស់ក្រសួងសាធារណការធ្វើឱ្យរួច” ។ លោកបន្តថា “នេះជាសំណួរដដែលៗរាប់ឆ្នាំមកហើយ ដែលយើងកំពុងប៉ះពាល់ថវិកា ហើយបើអត់ថវិកាធ្វើទេក៏ពិបាកដែរ ហើយអ្នកធ្វើក៏ត្រូវការថវិកាជាទ្រង់ទ្រាយធំដែរ ដើម្បីធានាគុណភាព” ។

ប្រធានមន្ទីរសាធារណការ និងដឹកជញ្ជូនខេត្ដកំពង់ចាម លោកសុខ ស្រ៊ុន បានបញ្ជាក់ថា កំណាត់ផ្លូវ២៧០នេះ គឺមានប្រវែងជាង៥៨គីឡូម៉ែត្រ ដោយបានសាងសង់ជាគ្រួសកៅស៊ូបានចំនួន ៤៨គីឡូម៉ែត្រ ហើយនៅសល់១២គីឡូទៀត ត្រូវបានផ្អាកសាងសង់មួយរយៈបន្ទាប់ពីមានការផ្ទុះជំងឺ Covid-19 ។ ផ្លូវលេខ២៧០នេះ ជាផ្លូវស្របតាមមាត់ទន្លេ តភ្ជាប់ពីស្រុកមុខកំពូលខេត្ដកណ្ដាល ទៅស្រុកកងមាស ខេត្ដកំពង់ចាម ហើយកំពុងមានការមមាញឹកក្នុងការធ្វើចរាចរណ៍ និងជាផ្លូវសេដ្ឋកិច្ចយ៉ាងសំខាន់ សម្រាប់ខេត្តទាំង២នេះ៕