តំបន់សេដ្ឋកិច្ចពិសេសក្នុងក្រុងព្រះសីហនុ កំពុងបង្កើតលទ្ធភាពផលិតសម្រាប់នាំចេញទៅកាន់ទីផ្សារសាកល

ដោយ ៖ រ៉ាណេត

ព្រះសីហនុ ៖ តំបន់សេដ្ឋកិច្ចពិសេសមួយទីតាំងស្ថិតនៅក្នុុងខេត្តព្រះសីហនុ ដែលមានរោងចក្រជិត៤០ទីតាំង បាន និងកំពុងបង្កើនលទ្ធភាពនៅក្នុងសង្វាក់ផលិតកម្មរបស់ខ្លួនសម្រាប់បង្កើនការនាំចេញទៅកាន់ទីផ្សារសាកល ជាពិសេសទីផ្សារសហរដ្ឋអាមេរិក ទីផ្សារអឺរ៉ុប និងទីផ្សារប្រទេសជប៉ុន។

លោក គួច ចំរើន អភិបាលខេត្តព្រះសីហនុ នៅក្នុងដំណើរចុះពិនិត្យពីស្ថានភាពជាក់ស្ដែងនៃដំណើរការផលិតកម្មរបស់បណ្តារផោងចក្រនានានៅក្នុងតំបន់សេដ្ឋកិច្ចពិសេស ចេ ជាង ស្ថិតក្នុងឃុំជើងគោ ស្រុកព្រៃនប់ ខេត្តព្រះសីហនុ នៅថ្ងៃទី២១ ខែតុលា ឆ្នាំ២០២០បានបង្ហាញពីការគាំទ្រទៅលើគម្រោងនៃកិច្ចអភិវឌ្ឍន៍របស់សង្វាក់ផលិតកម្មសម្រាប់បង្កើនការនាំចេញ។

លោក គួច ចំរើន បានមានប្រសាសន៍ថា “សកម្មភាពរបស់បណ្តារោងចក្រ និងក្រុមហ៊ុនដែលស្ថិតនៅក្នុងតំបនើសេដ្ឋកិច្ចពិសេសទាំងនេះ គឺជាចលករយ៉ាងសំខាន់ក្នុងការជួយទ្រទ្រង់ និងពង្រឹងសេដ្ឋកិច្ចជាតិកម្ពុជា តាមរយៈការផ្តល់ពន្ធ ការផ្តល់ការងារជូនប្រជាពលរដ្ឋ ហើយក្រុមហ៊ុនក៏ទទួលបានប្រាក់ចំណេញដូចគ្នាពីការវិនិយោគផងដែរ”។

តំបន់សេដ្ឋកិច្ចពិសេស ចេ ជាង ស្ថិតនៅលើផ្ទៃដីទំហំ ១៣០ហិកតា មានរោងចក្រសរុបចំនួន ៣៨ ក្នុងនោះ ២៨ កំពុងដំណើការមានដូចជារោងចក្រផលិតចំណីសត្វ រោងចក្រផលិតថង់ផ្លាស្ទិក និងរោងចក្រផលិតគ្រឿងសង្ហារឹមជាដើម។ ដោយឡែកក្រុមហ៊ុន អាយ តាវ ផេតសឹបផ្លាយ (ខេមបូឌា) មានអគារចំនួន១៧ កំពុងដំណើរការផលិតចំណីសត្វសុនខ នាំទៅអឺរ៉ុប អាមេរិក និងជប៉ុន ដោយក្នុងមួយថ្ងៃរោងចក្រផលិតបាន ៣០តោន និងប្រើប្រាស់កម្មករ ១,២០០នាក់ ដោយឡែកវត្ថុធាតុដើមនាំចូលមកពីប្រទេសអូស្ត្រាលី។

ជាមួយគ្នានេះ រោងចក្រផលិតថង់ប្លាស្ទិក ហ័រ កាង ផេកខេកជីង តិចណូឡូជី ដែលមានចំនួន ៤អគារ បានផ្តល់ការងារដល់ប្រមាណ ៥០០នាក់ និងមានលទ្ធភាពផលិតបានប្រមាណ២០តោន ក្នុងមួយថ្ងៃ ហើយថង់ប្លាស្ទិកទាំងនេះ គឺសម្រាប់ធ្វើការនាំចេញទៅកាន់ទីផ្សារអ៉ឺរ៉ុប៕

សមាគមមីក្រូហិរញ្ញវត្ថុកម្ពុជា ចាប់អនុវត្តតាមសំណើររបស់សម្ដេចតេជោ ហ៊ុន សែន ក្នុងពន្យាពេលបង់ប្រាក់

ដោយ ៖ រ៉ាណេត

បន្ទាយមានជ័យ ៖ សមាគមមីក្រូហិរញ្ញវត្ថុកម្ពុជា បានទទួលយកសំណើររបស់សម្ដេចតេជោ ហ៊ុន សែន ក្នុងការបន្ធូរបន្ថយអត្រាការប្រាក់ និងពន្យាពេលលើការបង់ប្រាក់សងប្រចាំខែរបស់ប្រជាពលរដ្ឋដែលកំពុងស្ថិតនៅក្នុងតំណាក់កាលប្រឈមនឹងវិបត្តិគ្រោះទឹកជំនន់ បន្ថែមពីលើបញ្ហា Covid-19 ។

មានប្រសាសន៍នៅក្នុងពិធីចុះសួរសុខទុក្ខ និងចែកអំណោយដល់ប្រជាពលរដ្ឋរងគ្រោះដោយទឹកជំនន់នៅស្រុកថ្មពួក ខេត្តបន្ទាយមានជ័យ នាព្រឹកថ្ងៃទី២១ ខែតុលា ឆ្នាំ២០២០ សម្ដេចតេជោ ហ៊ុន សែន បានមានប្រសាសន៍ថា បន្ទាប់ពីថ្លែងការរបស់នាយករដ្ឋមន្ត្រីនៅខេត្តបន្ទាយជ័យ សមាគមមីក្រូហិរញ្ញវត្ថុកម្ពុជា បានទទួលយក និងអនុវត្តតាមយ៉ាងរីករាយ ក្នុងការចូលរួមចំណែកចែករំលែកនូវទុក្ខលំបាករបស់ប្រជាពលរដ្ឋក្នុងគ្រាជួបគ្រោះជំនន់។

សម្ដេចតេជោ ហ៊ុន សែន បានមានប្រសាសន៍ថា “ខ្ញុំពិតជាមានការរីករាយ ដោយសារតែម្សិលមិញនៅឯមង្គលបុរី ខ្ញុំបានអំពាវនាវឱ្យមីក្រូហិរញ្ញវត្ថុ យោគចំពោះការលំបាក អធ្យាស្រ័យ យោគយល់ចំពោះអ្នកដែលជំពាក់ប្រាក់។ សមាគមមីក្រូហិរញ្ញវត្ថុ គេបានទទួលយកដោយការពេញចិត្ត ក្នុងការធ្វើការយល់យោគ អធ្យាស្រ័យជាមួយអ្នកដែលរងផលប៉ះពាល់ដោយសារជំនន់។ នោះជាកាយវិការនៃការទទួលខុសត្រូវ និងការចូលរួម។ បើនិយាយពីដំណាក់កូវីដវិញ យើងបានរៀបចំឥណទានឡើងវិញ យើងបានរៀបចំឥណទានឡើងវិញរហូតដល់ជាង២៦ម៉ឺនគ្រួសារ ក្នុងទំហំទឹកប្រាក់ជិត២០០០លានដុល្លារ ហើយរហូតមកដល់ពេលនេះ មិនទាន់មានការរឹបអូសណាមួយកើតឡើងចំពោះប្រជាពលរដ្ឋនៅក្នុងដំណាក់កាលដ៏លំបាកនៃកូវីដនោះទេ”។

សម្ដេចតេជោ ហ៊ុន សែន បានមានប្រសាសន៍ទៀតថា “ទន្ទឹមការទទួលបានការយល់យោគនេះ ខ្ញុំសុំឱ្យខាងអជ្ញាធរមើលការខុសត្រូវទៅលើរឿងហ្នឹង ហើយសហការជាមួយខាងមីក្រូហិរញ្ញវត្ថុឱ្យបានត្រឹមត្រូវ ហើយមីក្រូហិរញ្ញវត្ថុក៏ត្រូវពិនិត្យមើលពីស្ថានភាពលំបាកជាក់ស្ដែង ថាតើគួរបន្ធូរបន្ថយការប្រាក់ តើគួរពន្យាពេលនៃការសង់ប្រាក់ ឬគួរឱ្យខ្ចីបន្ថែមទៀតជាដើម ”៕

សម្តេចតេជោ៖ គ្រឹះស្ថានធនាគារ និងមីក្រូហិរញ្ញវត្ថុបានរៀបចំឥណទានឡើងវិញជិត ២០០០ លានដុល្លារ

ដោយ ៖ វុត្ថា

ភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាបានមានប្រសាសន៍ឱ្យដឹងថា បណ្តាគ្រឹះស្ថានធនាគារ និងមីក្រូហិរញ្ញវត្ថុ បានរៀបចំឥណទានឡើងវិញ នៅក្នុងដំណាក់កាលនៃវិបត្តិជំងឺកូវីដ ១៩ បណ្តាគ្រឹះស្ថានធនាគារ និងមីក្រូហិរញ្ញវត្ថុ បានរៀបចំឥណទានឡើងវិញ ក្នុងទំហំទឹកប្រាក់ជិត ២០០០លានុល្លារ ដល់ជាង ២៦ ម៉ឺនគ្រួសារ។

សម្តេចតេជោ ហ៊ុន សែន នៅក្នុងពិធីអញ្ជើញជួបសួរសុខទុក្ខ និងផ្តល់ស្បៀងជូនប្រជាពលរដ្ឋរងគ្រោះដោយទឹកជំនន់ ក្នុងស្រុកថ្មពួក និងក្រុងប៉ោយប៉ែត នៅព្រឹកថ្ងៃទី២២ ខែតុលា ឆ្នាំ២០២០នេះឱ្យដឹងថា មកដល់ពេលនេះ គ្រឹះស្ថានធនាគារ និងមីក្រូហិរញ្ញវត្ថុ មិនទាន់មានការរឹបអូសផ្ទះរបស់ពលរដ្ឋដែលពុំមានលទ្ធភាពបង់ធនាគារនៅឡើយទេ។
ជាមួយគ្នានេះ សម្តេចតេជោ ហ៊ុន សែន ក៏ជំរុញឱ្យអាជ្ញាធរតាមដានចំពោះការអនុវត្តរបស់ធនាគារ និងគ្រឹះស្ថានមីក្រូហិរញ្ញវត្ថុនៅមូលដ្ឋានចំពោះប្រជាពលរដ្ឋរបស់ខ្លួន កុំឱ្យមានការលើកឡើងថា អ្នកដែលទទួលរងនូវផលប៉ះពាល់ ហើយមិនបានសងទៅគ្រឹះស្ថានធនាគារ និងមីក្រូហិរញ្ញវត្ថុវិញ។

យោងតាមសារាចរណែនាំរបស់ធនាគារជាតិនៃកម្ពុជា ស្ដីពី “ឥណទានរៀបចំឡើងវិញ” ក្នុងអំឡុងពេលរងផលប៉ះពាល់ ពីការរីករាលដាលរបស់វីរុសកូវីដ១៩ កាលពីថ្ងៃទី២៧ ខែមីនា ឆ្នាំ២០២០បានឱ្យដឹងថា ធនាគាជាតិនៃកម្ពុជាតម្រូវឲ្យគ្រឹះស្ថានយកចិត្តទុកដាក់ ជាមួយអតិថិជនដែលរងផលផលប៉ះពាល់ ជាក់ស្ដែង និងអនុញាតឲ្យរៀបចំឥណទានឡើងវិញ ចំពោះវិស័យអាទិភាព រួមមាន៖ទេសចរណ៍ (សណ្ឋាគារ ផ្ទះសំណាក់ និងភោជនីយដ្ឋាន ដោយរាប់បញ្ចូលទាំងចំនីអាហារ ភេសជ្ជៈនិងសេវាកម្មគាំទ្រផ្សេងៗ) ,កាត់ដេរ (ដោយរាប់បញ្ចូលទាំងនិយោជិត) ,សំណង់(ចំពោះតែឥណទានសាងសង់ផ្ទះ,ហាងដំបូង និងឥណទានទិញផ្ទះដំបូង) និងការដឹកជញ្ជូន (ជាពិសេស អ្នកបើកបរតាក់ស៊ី និងរ៉ឺម៉កកង់បី) និងឡូជីស្ទីក។

សារាចរណែនាំសង្កត់ធ្ងន់ថា គ្រឹះស្ថានត្រូវមានគោលនយោបាយ និងនិតីវិធីឥណទានរៀបចំឡើងវិញ ក្នុងអំឡុងពេល រងផលប៉ះពាល់នៃការរីករាលដាលកូវីដ១៩ ដែលអនុម័តដោយក្រុមប្រឹក្សាភិបាល សម្រាប់កំណត់អំពីស្ថានភាព និងលក្ខខណ្ឌនៃឥណទានដែលត្រូវចាត់ទុកជា “ឥណទានរៀបចំឡើងវិញ”និងសម្រាប់តាមដាន និងគ្រប់គ្រងឥណទានទាំងនោះ ។

សារាចរណែនាំបន្តថា ចំពោះការរៀបចំឥណទានឡើងវិញ គ្រឹះស្ថានត្រូវកំណត់ឲ្យច្បាស់ ថាអតិថិជនកំពុងជួបការលំបាក ផ្នែកហិរញ្ញវត្ថុ មុនពេលការអនុគ្រោះត្រូវបានផ្ដល់ជូន។

សម្រាប់ការៀបចំឥណទានឡើងវិញនេះ ផ្ដល់ជូនអតិថិជនដែលការទូទាត់សង់ការប្រាក់ ឬនិងប្រាក់ដើម និងហួសការកំណត់ សងលើសពី៩០ថ្ងៃ (ប្រភេទឥណទានដំណើរការ)និងរំពឹងថាអតិថិជនជួបប្រទះការលំបាក ផ្នែកហិរញ្ញវត្ថុ និងការទូទាត់សងតែក្នុងរយៈពេល បណ្ដោះអាសន្នប៉ុណ្ណោះ មានសុពលភាពត្រឹមថ្ងៃទី៣១ ខែធ្នូ ឆ្នាំ២០២០ ។ ចំពោះឥណទានមិនដំណើរការគ្រឹះស្ថាន អាចរក្សាចំណាត់ថ្នាក់ដដែល នៅពេលឥណទានទាំងនេះត្រូវបានរៀបចំឡើងវិញ។

សេចក្ដីណែនាំបន្ថែមថា ការរៀបចំឥណទានឡើងវិញ ត្រូវធ្វើឡើងដោយ “ក្រុមការងារទទួលខុសត្រូវដោយឡែក” ផ្សេងពីផ្នែកដែលទទួលបន្ទុកដំណើរ ការផ្ដល់ឥណទាន ។ ក្រុមការងារនេះត្រូវពិនិត្យឡើងវិញ ជាប្រចាំ លើសំពាធឥណទានអតិថិជន ដើម្បីវាយតម្លៃផលប៉ះពាល់ ជាក់ស្ដែងលើស្ថានភាព ហិរញ្ញវត្ថុរបស់អតិថិជន ៕

ក្រុមហ៊ុនចិនមួយគ្រោងបង្កើតរោងចក្រចម្រាញ់ប្រេងកាតនៅប្រទេសកម្ពុជា

ដោយ ៖ វុត្ថា

ភ្នំពេញ ៖ ក្រុមហ៊ុនវិនិយោគចិន Hainan Starlight Chemical Co.,Ltd បានបង្ហាញអំពីចំណាប់អារម្មណ៍ក្នុងការបង្កើតរោងចក្រចម្រាញ់ប្រេងកាតនៅប្រទេសកម្ពុជា។

នេះ បើយោងតាមលទ្ធផលនៃជំនួបពិភាក្សាការងាររវាងលោក លោក ស៊ុយ សែម រដ្ឋមន្ត្រីក្រសួងរ៉ែនិងថាមពល និងដំណាងក្រុមហ៊ុន Hainan Starlight Chemical Co.,Ltd កាលពីថ្ងៃទី ២១ ខែតុលា ឆ្នាំ ២០២០ម្សិលមិញនេះ ស្តីអំពីសក្តានុពលនៃគម្រោងវិនិយោគលើវិស័យប្រេង និងឧស្ម័ន។

លោក ស៊ុយ សែម រដ្ឋមន្ត្រីក្រសួងរ៉ែនិងថាមពលបានស្វាគមន៍សម្រាប់ការស្វែងរកឱកាសនៃវិនិយោគ និងការអភិវឌ្ឍវិស័យប្រេងកាតនេះ ឱ្យកាន់តែរីកចម្រើនបន្ថែមទៀត និងត្រូវគោរពតាមច្បាប់ និងបទប្បញ្ញាត្តិនានាដែលបានកំណត់។

លោក ជៀប សួរ អគ្គនាយកនៃអគ្គនាយកដ្ឋានប្រេងកាត របស់ក្រសួងរ៉ែ និងថាមពល បានឲ្យដឹងកាលពីកន្លងមកនេះថា នៅប្រទេសកម្ពុជាបច្ចុប្បន្ននេះ មានតំបន់រុករកប្រេងកាត នៅដែនគោកចំនួន ១៩ប្លុក និងនៅដែនសមុទ្រមានចំនួន ៦ប្លុក។

លោកបន្តថា នៅដែនគោកមាន ៨ប្លុក កំពុងចរចាលើកិច្ចព្រមព្រៀងក្នុងការរុករកប្រេងកាតរវាងរាជរដ្ឋាភិបាល ជាមួយក្រុមហ៊ុនមកពីប្រទេសកាណាដា។ រីឯនៅដែនសមុទ្រមាន ២ប្លុក គឺប្លុកA និងប្លុក D ត្រូវបានរាជរដ្ឋាភិបាលកម្ពុជា ប្រគល់ឲ្យក្រុមហ៊ុនឯកជន កំពុងសិក្សាស្រាវជ្រាវ និងកំពុងអភិវឌ្ឍន៍ ឈានទៅផលិតប្រេងនាពេលខាងមុខ៕

ជប៉ុន​ផ្តល់​ឥណទាន​រហ័ស​ដល់​កម្ពុជា និង​បណ្តា​ប្រទេស​ក្នុង​តំបន់ ២៣៧លាន​ដុល្លារ

ដោយ ហ្សូ​លី

ភ្នំពេញៈ រដ្ឋមន្ត្រី​ក្រសួងការបរទេស​ជប៉ុន លោក Toshimitsu Motegi បាន​សន្យា​ជាមួយ​សម​ភាគី​កម្ពុជា លោក ប្រាក់ សុខុន រដ្ឋមន្ត្រីការបរទេស​កម្ពុជា នូវ​ប្រាក់កម្ចី​បន្ទាន់​ចំនួន ២៥ ពាន់​លាន​អឺរ៉ូ (២៣៧ លាន​ដុល្លារ) ដើម្បី​គាំទ្រ​ដល់​សេដ្ឋកិច្ច​របស់​ប្រទេស​នៅ​អាស៊ីអាគ្នេយ៍​មួយ​នេះ​ដែល​ត្រូវបាន​បំផ្លាញ​ដោយ​វីរុស​ឆ្លង។

ក្រសួងការបរទេស​បាន​និយាយថា នៅក្នុង​កិច្ចពិភាក្សា​តាម​ទូរស័ព្ទ ពួកគេ​បាន​ឳ្យ​ដឹងថា ប្រទេស​ជប៉ុន​មានបំណង​គាំទ្រ ដល់​កិច្ចខិតខំ​ប្រឹងប្រែង​រប​ស់​ប្រទេស​កម្ពុជា ក្នុងការ​ប្រយុទ្ធប្រឆាំង នឹង​ការបំពុល​បរិស្ថាន​នៅក្នុង​ទីក្រុង និង​ការបំពុល​សមុទ្រ ដែល​បណ្តាលមកពី​កាកសំណល់​ប្លា​ស្ទិ​ក ក៏ដូចជា​ដើម្បី​បង្កើន​សមត្ថភាព​ប្រឆាំង​ភេរវកម្ម​របស់ខ្លួន។

រដ្ឋមន្ត្រីការបរទេស​កម្ពុជា ដែលមាន​តួនាទី​ជា​ឧបនាយករដ្ឋមន្ត្រី បាន​ថ្លែងអំណរគុណ​ចំពោះ​ការគាំទ្រ និង​បាន​បន្ថែមថា​លោក​រំពឹង នឹង​ជំរុញ​ថែមទៀត​នូវ​កិច្ចសហប្រតិបត្តិការ​រ​បស់​ប្រទេស ក្នុងការ​ប្រយុទ្ធប្រឆាំង​នឹង​ជំងឺ​រាតត្បាត​នេះ។

ក្រសួង​បាន​និយាយថា លោក Motegi ក៏បាន​ជួបពិភាក្សា​តាម​ទូរស័ព្ទ​ជាមួយ​សម​ភាគី​ឡាវ លោក Saleumxay Kommasith ហើយ​បាន​យល់ព្រម​ពង្រឹង ភាពជា​ដៃគូ​របស់​ប្រទេស។

រដ្ឋមន្ត្រីការបរទេស​ជប៉ុន​បាន​និយាយថា ទីក្រុង​តូ​ក្យូ នឹង​គាំទ្រ​ដល់​កិច្ចខិតខំ​ប្រឹងប្រែង​រប​ស់​ប្រទេស​ឡាវ សម្រាប់​ការអភិវឌ្ឍ​ឯករាជ្យ និង​ប្រកបដោយ​និរន្តរភាព រួមទាំង​ការឆ្លើយតប​របស់​ប្រទេស​ចំពោះ​វីរុស​នេះ។

ប្រទេស​ជប៉ុន​បាន និង​កំពុង​បង្កើន​កិច្ចសហប្រតិបត្តិការ ជាមួយ​សមាជិក​ទាំង១០ នៃ​សមាគម​ប្រជាជាតិ​អាស៊ីអាគ្នេយ៍ នៅក្នុង​ការប្រឆាំង​ទៅនឹង​ការកើនឡើង នៃ​ប្រទេស​ចិន​នៅក្នុង​តំបន់។

ប្រទេស​កម្ពុជា និង​ឡាវ ដែលជា​ផ្នែក​មួយ​នៃ​ក្របខ័ណ្ឌ មាន​ទំនាក់ទំនង​ជិតស្និទ្ធ​ជាមួយ​ទីក្រុង​ប៉េកាំង ដែលជា​អ្នកផ្តល់ជំនួយ​ដ៏​សំខាន់ និង​ជា​ប្រភព​នៃ​ការវិនិយោគ។

ក្នុងចំណោម​បណ្តា​ប្រទេស​អាស៊ាន​ផ្សេងទៀត លោកនាយក​រដ្ឋមន្ត្រី Yoshihide Suga បានធ្វើ​ទស្សនកិច្ច​នៅ​ប្រទេស​វៀតណាម និង​ឥណ្ឌូនេស៊ី អស់​រយៈពេល៤ថ្ងៃ​ដែលជា​ដំណើរ​ទស្សនកិច្ច ជា​លើកដំបូង​របស់លោក​នៅ​ក្រៅប្រទេស ចាប់តាំងពី​បាន​ចូលកាន់​តំណែង​កាលពី​ខែកញ្ញា​កន្លងទៅ៕ Tokyo Times៕

តើ​រដ្ឋាភិបាល​បាន​ចំណាយ​ប្រាក់​ប៉ុន្មាន​លាន​ដុល្លារ​ដើម្បី​ជួយ​ដល់ក​ម្មករ​ព្យួរការងារ?

ដោយ:គង់ សូរិយា

ភ្នំពេញ: រដ្ឋាភិបាល​កម្ពុជា​បាន​ចំណាយ​ទឹកប្រាក់​ជាង១៥លាន​ដុល្លារ​អាមេរិក សំរាប់​ជួយ​កម្មករ ដែល​បាន​ព្យួរការងារ​ដោយសារ​ការបិទ​រោងចក្រ សហគ្រាស​នានា​ដែល​បណ្តាលមកពី​ជំងឺ Covid-19 ។

គិត​ត្រឹម​ខែកញ្ញា ឆ្នាំ២០២០នេះ រដ្ឋាភិបាល​កម្ពុជា​បាន​បើក​និង​ផ្តល់ប្រាក់​ឧបត្ថម្ភ​ទៅដល់​កម្មករ និយោជិត ដែល​ព្យួរ​កិច្ចសន្យាការងារ​ក្នុង​វិស័យ​កាត់ដេរ វិស័យ​ទេសចរណ៍ និង​វិស័យផ្សេងៗទៀត​សរុប​ចំនួន៦៣,៤១១,៣៦៨រៀល ឬ​ស្មើនឹង​ប្រមាណ​ជាង១៥លាន​ដុល្លារ​អាម៉េរិក។

យោងតាម​ការ​ឲ្យ​ដឹង​ពី​មន្ត្រីជាន់ខ្ពស់​ក្រសួង​ការងា រ​និង​បណ្តុះបណ្តាល​វិជ្ជាជីវៈ នៅ​ព្រឹក​ថ្ងៃទី២០ ខែតុលា ឆ្នាំ២០២០នេះ​បានឱ្យដឹងថា គិត​មកទល់ពេលនេះ កម្មករនិយោជិត ដែល​បាន​បើកប្រាក់​ឧបត្ថម្ភ​មាន​ចំនួន២៧០,៥៧៣នាក់ ក្នុងចំណោម​កម្មករនិយោជិត​សរុប​ចំនួន២៧៣,៩៤៨នាក់ ពី​ទីភ្នាក់ងារ​វី​ង​ទូទាំង​ខេត្ត ក្រុង។

ដោយឡែក ចំពោះ​រោងចក្រ សហគ្រាស ដែល​កំពុង​ព្យួរ​កិច្ចសន្យាការងារ​សរុប​ចំនួន១១៩ ស្មើនឹង​កម្មករនិយោជិត​សរុប៤៤,៥៧៤នាក់ ក្នុងចំណោម​រោងចក្រ​ទាំងនោះ​នៅ​ដំណើរការ  ប៉ុន្តែ​ព្យួរការងារ​ផ្នែក​ខ្លះ​ប៉ុណ្ណោះ។

ក្រៅពី​វិស័យ​វាយ​ន​ភណ្ឌ កាត់ដេរ សម្លៀកបំពាក់ និង​ផលិត​ស្បែក និង​កាបូប​ធ្វើដំណើរ ក្នុងនោះ​សហគ្រាស​វិស័យ​ទេសចរណ៍ ដែល​កំពុង​ព្យួរការងារ​សរុប​ចំនួន១១៣ ស្មើនឹង​កម្មករ និយោជិត​ចំនួន៩,៩២៥នាក់ ថយចុះ​ចំនួន២សហគ្រាស ស្មើនឹង​កម្មករនិយោជិត​ចំនួន២៧៩នាក់។

ពាក់ព័ន្ធ​នឹង​កិច្ចសន្យា​ព្យួរការងារ​របស់​រោង​ចក្រ សហគ្រាស​ខាងលើនេះ ក្រសួង​ការងារ​បាន​បន្ថែមថា បានផ្តល់​វគ្គ​បណ្តុះបណ្តាល​ជំនាញ​ទន់ ដល់ក​ម្មករ និយោជិត​ដែល​ព្យួរ​កិច្ចសន្យាការងារ​សរុប​បាន​ចំនួន៩១រោងចក្រ ដែលមាន​កម្មករ​ចូលរួម​សរុប​ចំនួន៥៣,៤២៧នាក់៕

ចំណេះដឹង! អ្វី​ជា​ភាគលាភ?

ដោយ​វុត្ថា

ភ្នំពេញៈ ភាគលាភ​គឺជា​ចំណែក​ជា​ទម្រង់ផ្សេងៗ ដែល​ក្រុមហ៊ុន​បោះផ្សាយ​មូល​ប​ត្រ​បាន ធ្វើការ​បែងចែក​ឱ្យ​ភាគ​ហ៊ុ​និក តាម​កម្រិត​នៃ​ភាគកម្ម​របស់ខ្លួន នៅក្នុង​ដើមទុន​ផ្ទាល់​របស់​ក្រុមហ៊ុន។ ចំណែក​ដែល​ចាត់ទុកថា ជា​ភាគលាភ​ត្រូវ​ផ្អែក​តាម​លក្ខខណ្ឌ​ដោយ​ពុំ​គិតថា ក្រុមហ៊ុន មាន​ឬ​គ្មាន​ប្រាក់ចំណូល ឬ​ប្រាក់ចំណេញ​ចរន្ត​ឡើយ។

ចំពោះ​ភាគហ៊ុន​ធម្មតា មួយចំណែក​នៃ​ភាគលាភ នឹងត្រូវ​កាត់​ទុក​សម្រាប់​បង់ពន្ធ​ជូន​រដ្ឋ និង​ចំណែក​ដែល​នៅសល់ នឹងត្រូវ​ប្រគល់ឱ្យ​ភាគ​ហ៊ុ​និក។ ទំហំ​របស់​ភាគលាភ​ទាក់ទង​ទៅនឹង បរិមាណ​មូល-ប​ត្រ​កម្មសិទ្ធិ​ដែល​កំពុង​ចរាចរណ៍​នៅលើ​ទីផ្សារ​មូល​ប​ត្រ។

ទោះយ៉ាងណា ភាគលាភ​ជាទូទៅ​មាន​ទំហំ​ច្រើន ជាង​ទំហំ​នៃ​ការប្រាក់​សន្សំ ហេតុនេះ​វា​នៅតែ​ទាក់ទាញ វិនិយោគិន​ជាង​ជម្រើស​វិនិយោគ​មួយចំនួន ដូចជា ការដាក់​ប្រា​ក់នៅ​ធនាគារ​ដើម្បី​យក ការប្រាក់​ជាដើម។

គោលបំណង​នៃ​ការទូទាត់​ភាគលាភ វា​អាស្រ័យ​នឹង​គោលនយោបាយ​ភាគលាភ របស់​ក្រុមហ៊ុន​បោះផ្សាយ​មូល​ប​ត្រ។ គោលនយោបាយ នៃ​ការទូទាត់​ភាគលាភ​នេះ អាស្រ័យ​លើក​ត្តា​ច្រើនយ៉ាង​មានដូចជា ស្ថានភាព ឱកាស តំរូវការ ផែនការ និង​គោលនយោបាយផ្សេងៗរបស់​ក្រុមហ៊ុន​ជាដើម។

ក្រុមហ៊ុន​ដែល​មិនបាន​ទូទាត់​ភាគលាភ អាចជា​សញ្ញាណ​បញ្ជាក់ថា ក្រុមហ៊ុន​មាន អ​សោធន​ភាព​ហិរញ្ញវត្ថុ ឬ​មិនមាន​ប្រាក់ចំណេញ ក្នុង​ដំណើរការ​អាជីវកម្មរ​បស់​ខ្លួន។ បើទោះបីជា​ក្រុមហ៊ុន មិនមាន​អ​សោធន​ភាព​ហិរញ្ញវត្ថុ ឬ​មាន​ប្រាក់ចំណេញ​ក្នុង ដំណើរការ​អាជីវកម្ម​របស់ខ្លួន​ក៏ដោយ ក៏​ក្រុមហ៊ុន​កំពុង​ប្រថុយធ្វើ​អាជីវកម្ម​របស់ខ្លួន​ដោយ ប្រឈម​ទៅនឹង​ហានិភ័យ ដែល​ត្រូវបាន​គេ​យល់ឃើញថា  ក្រុមហ៊ុន​មាន​អ​សោធន​ភាព ហិរញ្ញវត្ថុ ឬ មិនមាន​ប្រាក់ចំណេញ​ក្នុង​ដំណើរការ​អាជីវកម្មរ​បស់​ខ្លួន។

ជាពិសេស​ក្រុមហ៊ុន​ត្រូវបាន​គេ​គិតថា ពុំបាន​ទុក​ប្រយោជន៍​វិនិយោគិន ឬ​ភាគ​ហ៊ុ​និក​ជាធំ ដែល​ទីបំផុត​ភាគ​ហ៊ុ​និក​អាច​បញ្ចប់​ការវិនិយោគ និង​លក់​មូល​ប​ត្រ​កម្មសិទ្ធិ​របស់ខ្លួន។ ចរន្ត​ធម្មតា នៅពេល​ក្រុមហ៊ុន​មិនបាន​ទូទាត់​ភាគលាភ ថ្លៃ​របស់​មូល​ប​ត្រ​កម្មសិទ្ធិ​នៅលើ ទីផ្សារ​នឹង​ធ្លាក់ចុះ។

ប៉ុន្តែ​នៅពេល​ក្រុមហ៊ុន​ទូទាត់​ភាគលាភ មិនមាន​ចរន្ត​ណាមួយ​ដែល​ធានាថា ថ្លៃ​របស់​មូល​ប​ត្រ​កម្មសិទ្ធិ នៅលើ​ទីផ្សារ​នឹង​ឡើងថ្លៃ​នោះទេ។ ទាំងនេះ​បណ្តាលមកពី​ទម្រង់ នៃ​ការទូទាត់ ភាគលាភ​របស់​ក្រុមហ៊ុន និង​មូល​ហេតុដែល​នាំឱ្យមាន ការទូទាត់​ភាគលាភ​ជា​ទម្រង់​ទាំងអស់នោះ៕

ទ្រព្យសកម្ម​ក្នុងស្រុក​សុទ្ធ​នៃ​គ្រឹះស្ថាន​ទទួលបាន​ប្រាក់​បញ្ញើ​កើន​ទំហំ​ទឹកប្រាក់​ជាង ១៥,៣១ពាន់​លាន​ដុល្លារ

ដោយៈ​ម៉ា​ណេ​ត

ភ្នំពេញៈ ទ្រព្យសកម្ម​ក្នុងស្រុក​សុទ្ធ នៃ​គ្រឹះស្ថាន​ទទួលបាន​ប្រាក់​បញ្ញើ​បាន​កើនឡើង១,១% ដល់ ៦១.២៤៦,៧ ប៊ី​លាន​រៀល (ប្រមាណ ១៥,៣១ ប៊ី​លាន ឬ​ពាន់​លាន​ដុល្លារ) ក្នុង​ខែកក្កដា ឆ្នាំ២០២០ ធៀប​នឹង​ខែមិថុនា។

កំនើន​នេះ បណ្តាលមកពី​ការកើនឡើង នៃ​ខ្ទង់​ឥណទេយ្យ​ក្នុងស្រុក​សុទ្ធ១,៧% ខណៈដែល​ខ្ទង់ផ្សេងៗ សុទ្ធ​បាន​ថយចុះ ២,៥% ។ នេះ​បើ​យោងតាម​របាយការណ៍រ​បស់​ធនាគារជាតិ​នៃ​កម្ពុជា (NBC) ចេញផ្សាយ​នៅ​ថ្ងៃទី២១ ខែតុលា ឆ្នាំ២០២០ ។

ការកើនឡើង​នៃ​ខ្ទង់​ឥណ​នេ​យ្យ​ក្នុងស្រុក​សុទ្ធ​ជា​ចម្បង ឆ្លុះបញ្ចាំង​ពី​ការកើនឡើង​នៃ​ខ្ពង់​ឥណទាន​សុទ្ធ ចំពោះ​គ្រឹះស្ថានសាធារណៈ​មិនមែន​ហិរញ្ញវត្ថុ ឥណទាន​សុទ្ធ​ចំពោះ​រដ្ឋាភិបាល និង​ខ្ទង់​ឥណទាន​ចំពោះ​វិស័យ​ឯកជន២៧,៥% ១,៤% និង១,៣% រៀង​គ្នា ខណៈដែល​ឥណទាន​សុទ្ធ ចំពោះ​គ្រឹ​ស្ថាន​ហិរញ្ញវត្ថុផ្សេងៗ បាន​ថយចុះ ១,៨% ។

ការថយចុះ​នៃ​ខ្ទង់ផ្សេងៗសុទ្ធ ជា​ចម្បង​បណ្តាលមកពី​ការកើនឡើង​នៃ​ខ្ទង់​ដើមទុន ៤% ខណៈដែល​ខ្ទង់ផ្សេងៗបាន​កើនឡើង ៨,២% ។

ជាមួយគ្នានេះដែរ ទ្រព្យសកម្ម​សរុប​រប​ស់​គ្រឹះស្ថាន​ទទួល បាន​ប្រាក់​បញ្ញើផ្សេងៗទៀត (រាប់បញ្ចូល​ធនាគារពាណិជ្ជ និង​គ្រឹះស្ថាន​មីក្រូហិរញ្ញវត្ថុ​ទទួល​ប្រាក់​បញ្ញើ)ក្នុង​កក្កដា ឆ្នាំ២០២០ នេះ មាន​ចំនួន ២២២.៥០២,១ ប៊ី​លាន​រៀល បាន​កើនឡើង ១,៦% ធៀប​នឹង​ខែមិថុនា។

ទ្រព្យសកម្ម​វិស័យ​ធនាគារ​បាន​កើនឡើង​យ៉ាង ឆាប់រហ័ស​ពី​ប្រមាណ​ត្រឹមតែ០,៥ ប៊ី​លាន​ដុល្លារ​អាមេរិក​ក្នុង​ឆ្នាំ១៩៩៨ ដល់៥៦ប៊ី​លាន​ដុល្លារ​អាមេរិក នាពេល​បច្ចុប្បន្ន​គឺ​កើនឡើង​ប្រមាណ១១២ដង ។ ឥណទាន​ប្រព័ន្ធ​ធនាគារ ដែល​ត្រូវបាន​បែងចែក​ទៅកាន់​គ្រប់​វិស័យ​នៃ​សេដ្ឋកិច្ច និង​ប្រាក់​បញ្ញើ​ក្នុងស្រុក​បាន​កើនឡើង១៦៥ដង ប្រហាក់ប្រហែលគ្នា គឺ​ពី​ចំនួន​ប្រមាណ​តែ០,២ពាន់​លាន​ដុល្លារ​អាមេរិក ដល់​ជាង៣៣ពាន់​លាន​ដុល្លារ​អាមេរិក។

ប្រព័ន្ធ​ធនាគារ​បាន​អភិវឌ្ឍ​យ៉ាង​ឆាប់រហ័ស និង​ប្រកបដោយ​ស្ថិរភាព ក្រោយពី​ការកែទម្រង់​វិស័យ​ធនាគារ ត្រូវបាន​បញ្ចប់​ដោយ​ជោគជ័យ​ចាប់ពី​ឆ្នាំ២០០០មក។ ប្រព័ន្ធ​ធនាគារ ក៏ត្រូវ​បានធ្វើ​ទំនើបកម្ម​ជា​បន្តបន្ទាប់ ស្របតាម​និម្មាបនកម្ម​ហិរញ្ញវត្ថុ អន្តរជាតិ និង​បានរួម​ចំណែក​ស្នូល ក្នុង​ការរក្សា​ស្ថិរភាព​ម៉ាក្រូសេដ្ឋកិច្ច គាំទ្រ​កំណើនសេដ្ឋកិច្ច លើកកម្ពស់​បរិ​យាប​ន្ន​សេដ្ឋកិច្ច​និង​សង្គម និង​កាត់បន្ថយ​ភាពក្រីក្រ៕

អ្នក​អភិវឌ្ឍន៍​អចលនទ្រព្យ​ចាប់ផ្តើម​បង្ហាញ​សកម្មភាព​ឡើងវិញ​នៅក្នុង​ត្រីមាស​ទី៤

ដោយ​វុត្ថា

ភ្នំពេញៈ វិស័យ​អចលនទ្រព្យ​កម្ពុជា ក៏ដូចជា​វិស័យផ្សេងៗទៀត បានទទួល​រង​នូវ​ផលប៉ះពាល់​យ៉ាងធ្ងន់ធ្ងរ ចាប់តាំងពី​ការផ្ទុះ​ឡើង​នូវ​វិបត្តិ​សេដ្ឋកិច្ច​សកល  ប៉ុន្តែ​ចាប់តាំងពី​ចុង​មាស​ទី៣ និង​ដើម​ត្រីមាស​ទី៤នៃ​ឆ្នាំនេះ ត្រូវបាន​អ្នកជំនាញ​មើលឃើញថា​អ្នក​អភិវឌ្ឍន៍​លើ​វិស័យ​អចលនទ្រព្យ បាននិងកំពុង​ចាប់​ផ្តើមធ្វើ​សកម្មភាព​បណ្តើរ​ឡើងវិញ។

លោកស្រី ចេ​វ សុ​ឃុន ប្រធាន​សមាគម​អ្នកជំនាញ​អចលនទ្រព្យ​កម្ពុជា នៅក្នុង​កិច្ច​សម្ភាស​ជាមួយ គេហទំព័រ Propertyarea.asia កាលពីពេលថ្មីៗនេះ​ឱ្យដឹងថា   នៅ​ចុង​ត្រីមាស​ទី៣ និង​នៅ​ត្រីមាស​ទី៤នៃ​ឆ្នាំ២០២០នេះ ទាំង​សកម្មភាព​ទិញ-លក់ និង ការអភិវឌ្ឍន៍​ពី​វិនិយោគិន លើ​វិស័យ​អចល​ទ្រព្យ​បានចាប់ផ្តើម​មាន​សន្ទុះ​ឡើងវិញ គួរឱ្យកត់សម្គាល់។

លោកស្រី​បន្តថា “ខ្ញុំ​អាច​និយាយបានថា នៅក្នុង​ឆ្នាំ​ក្រោយនេះ នឹងមាន​សញ្ញា​វិជ្ជមាន នៅក្នុង​វិស័យ​របស់​យើង​អាច​នឹង​ល្អ​ឡើងវិញ ព្រោះថា​អ្នក​អភិវឌ្ឍន៍​មួយចំនួន​បានចាប់ផ្តើម​អភិវឌ្ឍន៍បណ្តើរៗ នៅក្នុង​ចុង​ត្រីមាស​ទី៣ និង​ដើម​ត្រីមាស​ទី៤នេះ ដោយ​មិន​រងចាំ​នោះទេ បើទោះបី​មាន​បញ្ហា​ប្រឈម​យ៉ាងណាក៏ដោយ” ។

លោកស្រី​បន្ថែមទៀតថា អ៊ីចឹង យើង​ឃើញ​សញ្ញា​វិជ្ជមាន​សម្រាប់​ឆ្នាំ២០២១ វិស័យ​យើង​នឹង​ល្អប្រសើរ​ជាង​ឆ្នាំ២០២០នេះ ជាពិសេស​វា​នឹង​អាចមាន​ការរីកចំរើន ដោយសារ​អ្នក​អភិវឌ្ឍន៍​មានការ​ទិញ​ដី​ទុក ហើយ​នៅពេលដែល​វិបត្តិ មានការ​ធូ​ស្បើយ​ខ្លាំង​ហើយ​ពួកគាត់​នឹង​ចាប់ផ្តើម​អភិវឌ្ឍន៍​នៅក្នុង​ឆ្នាំ​ក្រោយនេះ។

ប្រធាន​សមាគម​អ្នកវាយតម្លៃ និង​ភ្នាក់ងារ​អចលនវត្ថុ​កម្ពុជា លោក ច្រឹ​ក សុខ​នី​ម បានឱ្យដឹង​ដែរ​ថា “សម្រាប់​ការយល់ឃើញ​របស់ខ្ញុំ នៅក្នុង​ឆ្នាំ២០២១ វា​ហាក់ដូច​ជាមាន​ភាពស្រពេចស្រពិល​នៅឡើយ សម្រាប់ធ្វើ​ការព្យាករណ៍ ដោយសារតែ​វ៉ាក់សាំង​មិនទាន់​ប្រាកដប្រជា” ។

លោក​បន្តថា ទោះជា​យ៉ាងណាក៏ដោយ វិស័យ​អចលនទ្រព្យ​នៅ​កម្ពុជា​នៅតែ​បន្ត​មាន​សកម្មភាព ជាពិសេស​អតិថិជន​ក្នុងស្រុក​នៅតែ​បន្ត​ទិញ-លក់ ប៉ុន្តែ​អាច​នឹងមិន​កម្រើក​ច្រើន​នោះទេ។

ប្រធាន​សមាគម​រូបនេះ​បានបញ្ជាក់​ទៀតថា “ធនាគារ​មួយចំនួន​នៅតែ​បន្ត​គាំទ្រ​ផ្តល់​កម្ចី​ដល់​វិស័យ​អចលនទ្រព្យ ដែល​វា​ជា​រឿង​ល្អ និង​អនុញ្ញាតឱ្យ​វិស័យនេះ​នៅតែមាន​ដង្ហើម បើទោះជា​កម្ពុជា​ជួប​ឧបសគ្គ​យ៉ាងណាក៏ដោយ។ ដើម្បីឱ្យ​កិច្ចការងារ​លើ​វិស័យ​អចលនទ្រព្យ​ដំណើរការ តាមរយៈ​គោលនយោបាយ​របស់​រាជ​រដ្ឋាភិបាល វិស័យ​ធនាគារ និង​តម្រូវការ​ក្នុងស្រុក គឺជា​កត្តា​សំខាន់​ជួយ​ជម្រុញ ឱ្យ​វិស័យ​អចលនទ្រព្យ​រីកចម្រើន​នាពេល​អនាគត” ៕

តើ​ស្ពាន​ឆ្ពោះទៅកាន់​តំបន់​អរិយ​ក្សត្រ​អាច​នឹង​សាងសង់​ចេញពី​ទីក្រុង​កោះនរា?

ដោយ​ស៊ីវ ម៉េង

ភ្នំពេញៈ នៅ​ថ្ងៃទី២៦ តុលា​ខាងមុខនេះ ស្ពាន​ត​ភ្ជាប់​រវាង​ទីក្រុង​កោះ​ពេជ្រ និង​ទីក្រុង​កោះនរា នឹង​បើក​ការដ្ឋាន​ស្ថាបនា​ជា​ផ្លូវការ ក្រោម​អធិបតីភាព​សម្តេច​តេ​ជោ​ហ៊ុន សែន​នាយករដ្ឋមន្ត្រី​នៃ​កម្ពុជា។

ប៉ុន្តែ​មាន​សំណួរ​ជាច្រើន បាន​សាកសួរ​មកកាន់​គេហទំព័រ Propertyarea.asia ពី​គំរោង​សាងសង់​ស្ពាន​ត​ភ្ជាប់​ទៅ​តំបន់​អរិយ​ក្សត្រ​ថា តើ​នឹង​សាងសង់​នៅពេលណា? ចម្លើយ​ដែល​យើង​អាច​ឆ្លើយបាន គឺ​ស្ពាន​នេះ​ប្រាកដជា​សាងសង់​នាពេលខាងមុខ ប៉ុន្តែ​នៅពេលណា​មិនទាន់​ប្រាកដ​នៅឡើយ​ទេ។

អគ្គនាយករង​ក្រុមហ៊ុន OCIC លោក​ទូច សំណាង បាន​មានប្រសាសន៍​ឲ្យ​ដឹង​តាម​ទូរស័ព្ទ​កាលពី​ថ្ងៃទី២១ តុលា​កន្លងមក​ថា ក្រុមហ៊ុន​មិនមាន​គំរោង​សាងសង់​ស្ពាន ចេញពី​ទីក្រុង​កោះនរា ទៅកាន់​តំបន់​អរិយ​ក្សត្រ​នោះឡើយ ប៉ុន្តែអ្វីៗក៏​អាច​កើតមាន​ផងដែរ​នាពេល​អនាគត ព្រោះ​យើង​មិនអាច​បដិសេធ ១០០ភាគរយ​នោះទេ។

ជាមួយនឹង​សកម្មភាព​ស្ថាបនា ទីក្រុង​កោះនរា​ថ្មី​យ៉ាង​មមាញឹក ប្លង់គោល​អភិវឌ្ឍន៍​ទី​ក្រុង​នេះ ត្រូវបាន​បើក​បង្ហាញ​ជា​ផ្លូវការ​ហើយ ដោយ​ផ្ទាំង​រូបគំនូរ​ជា​លក្ខណៈ 3D បានដាក់​បង្ហាញ​នៅលើ​ជញ្ជាំង ដែក​ដែល​ហ៊ុំ​ព័​ទ្ឋ​គម​រោង D.I RIVIERA ។

លោក​ទូច សំណាង បាន​បន្តថា រហូតមកទល់​ពេលនេះ យើង​មិនអាច​បញ្ជាក់បាន​ថា​ស្ពាន​នឹងត្រូវ​សាងសង់​ត​ភ្ជាប់​ជាមួយ នឹង​ទីក្រុង​កោះនរា​ទៅកាន់​តំបន់​អរិយ​ក្សត្រ​ទេ ប៉ុន្តែអ្វីៗក៏​អាច​កើតឡើង​បានដែរ ព្រោះ​វា​អាស្រ័យ​លើ​ការសម្រេចចិត្ត​របស់រ​ដ្ឋា​ភិ​បាល។

ទីប្រឹក្សា​សមាគម​អចលនទ្រព្យ​សកល ស្ថាបនិក និង​ជា​អគ្គនាយក​នៃ​គេហទំព័រ​Propertyarea.asia លោក​យិន លាង​គង់ បាន​មានប្រសាសន៍ថា យោងតាម​ការវិវត្ត​នៃ​ផ្នែក​នគរូបនីយកម្ម​ទីក្រុង ពិសេស​ការកសាង​ទីក្រុង​កោះនរា​ថ្មី បានធ្វើ​ឲ្យ​ល​ទ្ឋ​ភាព​នៃ​ការសាងសង់​ស្ពាន​ត​ភ្ជាប់​ពី​តំបន់​ក្តី​តា​កុយ ផ្លូវជាតិ​លេខ១ទៅ​តំបន់​អរិយ​ក្សត្រ នឹង​អាច​លើក​ចេញពី​ទីតាំង​នេះ ដោយសារ​លក្ខ​ខ័​ណ្ឌ​មួយចំនួន​ដូចជា ទី១ ប្រសិន​បើក​ការស្ថាបនា​ស្ពាន​ចេញពី​ក្តី​តា​កុយ ទៅ​អរិយ​ក្សត្រ នឹងធ្វើ​ឲ្យ​ខូច​សម្រស់​ទីក្រុង​នេះ។

ទី២ បើ​សាងសង់​ចេញពី​ទីតាំង​ដដែល នឹងធ្វើ​ឲ្យ​ត​ស្ពាន​វែង ដែល​ត្រូវ​ចំណាយ​ថវិកា​ច្រើន និង​មិនសូវមាន​សោភ័ណភាព ទី៣ បើសិនជា​អាច​សាងសង់​ស្ពាន​ចេញពី​ទីក្រុង​កោះនរា នឹង​លើក​កំពស់​សោភ័ណភាព​ទីក្រុង​ថ្មី​ផង និង​ជួយ​កាត់បន្ថយ​ចម្ងាយ​ស្ពាន​ផង។

លោក​បន្តថា “ការសាងសង់​ស្ពាន នឹង​ចាប់ផ្តើម​នៅពេល​ណាមួយឆាប់ៗនេះ ឬ​យូរ​អាស្រ័យ​លើ​ថា តើ​ស្ពាន​នេះ​ស្ថិតក្នុង​គោលដៅ​អាទិភាព​កម្រិតណា ប៉ុន្តែ​ការសាងសង់​ប្រាកដជា​សាងសង់ ព្រោះ​គំរោង​បុរីធំៗនិង​ល្បីឈ្មោះ​ជាច្រើន បាន​ទិញ​ដី​នៅ​តំបន់​នោះ​រួចហើយ” ។

លោក​យិន លាង​គង់់​បាន​បន្តថា សម្តេច​តេ​ជោ​ធ្លាប់បាន​មានប្រសាសន៍​រួចហើយ ពី​គម្រោង​សាងសង់​ស្ពាន​ចេញពី​តំបន់​ក្តី​តា​កុយ ទៅកាន់​តំបន់​អរិយ​ក្សត្រ​នៅពេល​សម្តេច​តេ​ជោ​អញ្ជើញ​ជា​អ​ធិ​ត​បី ក្នុង​ពិធី​បើក​សម្ភោ​ធ​ឲ្យ​ប្រើប្រាស់​ជា​ផ្លូវការ នូវ​មហាវិថី​សម្តេច​តេ​ជោ​ឬ​ផ្លូវ ៦០ម៉ែត្រ៕