វិស័យអាកាសចរណ៍កម្ពុជាបានដាំក្បាលចុះមិនធ្លាប់មានក្នុងប្រវត្តិសាស្រ្ត

ដោយវុត្ថា

ភ្នំពេញៈ គិតរហូតមកដល់ពេលនេះ ជើងហោះហើររបស់កម្ពុជា បានដាំក្បាលចុះ ប្រមាណ៩៨ភាគរយ បើធៀបទៅនឹងឆ្នាំមុន ដោយសារក្រុមហ៊ុនអាកាសចរណ៍នានាដែលហោះហើរមកកាន់កម្ពុជា បានបិតជើងហោះហើររបស់ខ្លួន ដោយបារម្ភការឆ្លងនូវជំងឺ Covid-១៩ ដែលកំពុងរាតត្បាតជាសកល។

លោកស៊ិន ចាន់សេរីវុត្ថា អ្នកនាំពាក្យអាកាសចរណ៍ស៊ីវិលកម្ពុជា បានឱ្យដឹងនៅថ្ងៃទី ២៥ ខែឧសភា ឆ្នាំ ២០២០នេះថាបច្ចុប្បន្ននេះ ជើងហោះហើររបស់កម្ពុជាបានធ្លាក់ចុះ ខ្លាំងពោលគឺប្រមាណ៩៨ភាគរយ តែយ៉ាងណាក៏ដោយ យើងរំពឹងថានៅដើមខែកក្កដាខាងមុខនេះ កម្ពុជានឹងមានការកើនឡើងនូវជើងហោះហើរកើនឡើងចំនួន៤០%វិញ។

សម្តេចតេជោ ហ៊ុន សែន ប្រមុខនៃរាជរដ្ឋាភិបាលកម្ពុជាកាលពីកន្លងមកនេះ ធ្លាប់បានប្រកាសថា កម្ពុជាមិនបានប្រកាសបិទជើងហោះហើរ មកពីបណ្តាប្រទេសនានាដែលហោះហើរមកកាន់កម្ពុជានោះទេ ប៉ុន្តែក្រុមហ៊ុនអាកាសចរណ៍របស់បណ្តាប្រទេសទាំងអស់នោះ បានប្រកាសបិទដោយខ្លួនឯងដោយបារម្ភពីការឆ្លងនូវជំងឺ Covid-19 ។

ជាមួយគ្នានេះ ក្រុមហ៊ុន Cambodia Airports បានឱ្យដឹងដែរអាកាសយដ្ឋានទាំងបីរបស់កម្ពុជា គឺអាកាសយានដ្ឋានអន្តរជាតិភ្នំពេញ អាកាសយានដ្ឋានអន្តរជាតិខេត្តសៀមរាប និងអាកាសយានដ្ឋានអន្តរជាតិខេត្តព្រះសីហនុ នៅតែបើកនិងដំណើរការសម្រាប់ក្រុមហ៊ុនអាកាសចរណ៍ជាតិ និងអន្តរជាតិ ជាធម្មតា បើទោះបីកម្ពុជា និងពិភពលោកកំពុងទទួលរងនូវផលប៉ះពាល់ដោយសារជំងឺ Covid-19 យ៉ាងណាក្តី។

រដ្ឋមន្រ្តីក្រសួងសុខាភិបាល លោក ម៉ម ប៊ុនហេង បានឱ្យដឹងកាលពីពេលថ្មីៗនេះថា ទោះក្នុងរយៈពេលកន្លងមកនេះ កម្ពុជាមានករណីឆ្លងជំងឺ Covid-19 នៅមានចំនួនតិច តែក្រសួងមិនធ្វេសប្រហែសទ្បើយ នៃការបន្តរឹតការឆ្លងរីករាលជំងឺCovid-19 ដែលធ្វើទ្បើងតាមរយៈការបន្តត្រួតពិនិត្យតាមព្រំដែន និងតាមអាកាសយានដ្ឋាននានា នៅក្នុងប្រទេ សកម្ពុជា។

កម្ពុជាកាលពីកន្លងកមថ្មីៗនេះ បានអនុញ្ញាឱ្យជនបរទេសមកពីប្រទេសចំនួន៦ចូលមកកម្ពុជាបានវិញមានដូចជា អាមេរិក អេស្ប៉ាញ អ៊ីតាលី បារាំង អាឡឺម៉ង់ និងអ៊ីរ៉ង់ តែយ៉ាងណាក៏ដោយ គ្រប់អ្នកដំណើរទាំងអស់ដែលចូលមកកម្ពុជា ទាំងជនជាតិខ្មែរ និងជនបរទេស គឺតម្រូវឲ្យមានវិញ្ញាបនបត្របញ្ជាក់សុខភាពបញ្ជាក់ថា គ្មានមេរោគCovid-19 ចេញដោយអាជ្ញាធរសុខាភិបាល ដែលទទួលស្គាល់ដោយរដ្ឋាភិបាល នៃប្រទេសសាមីក្នុងរយៈពេល៧២ម៉ោង។

សម្រាប់ជនបរទេសគឺតម្រូវ ឲ្យមានឯកសារធានារ៉ាប់រងសុខភាព ក្នុងចំនួនទឹកប្រាក់យ៉ាងតិច៥ម៉ឺនដុល្លារ ក្នុងអំឡុងពេលស្នាក់នៅកម្ពុជា និងត្រូវគោរពតាមវិធានការផ្សេងៗទៀតដែលកំណត់ដោយរដ្ឋាភិបាលកម្ពុជា៕

វាសនាមជ្ឈមណ្ឌលពាណិជ្ជកម្មលំដាប់ពិភពលោកThai Bunrong Twin Tower កាន់តែមិនច្បាស់លាស់

ដោយស៊ីវ ម៉េង

ភ្នំពេញៈ សកម្មភាពបុកគ្រឹះសាងសង់ជញ្ជាំងបានផ្អាក ហើយភាពវិវត្តន៍នៃដំនើរការសាងសង់ផ្នែកផ្សេងៗទៀតបាននិងកំពុងស្ងប់ស្ងាត់ ដែលធ្វើឲ្យវាសនាមជ្ឈមណ្ឌលពាណិជ្ជកម្មលំដាប់ពិភពលោកThai Bunrong Twin Towerកាន់តែមិនមានភាពច្បាស់លាស់។

ជាមួយនឹងការបិទទ្វារសណ្ឋាគារលំដាប់ផ្កាយ៥ Great Duck ដែលជាសណ្ឋាគារធ្លាប់ខ្ពស់ជាងគេ និងធំជាងគេនៅរាជធានីភ្នំពេញ និងការបើកដំណើរការសាងសង់Intercontinental នៅក្រុងព្រះសីហនុ ដែលវិនិយោគដោយក្រុមហ៊ុនThai Bunrong មិនមានការបរិច្ឆេទបើកដំណើរការ បានធ្វើឲ្យគំរោងយក្សThai Bunrong Twin Towerដែលគ្រោងសាងសង់កំពស់៥៦៨ម៉ែត្រ ស្ថិតនៅក្នុងសភាពអស់សង្ឃឹមកាន់តែខ្លាំង ស្របពេលពិភពលោកកំពុងជួបកលយុគ នៃការរីករាលដាលដោយសារCovid-19។

ជាមួយគ្នានេះ ម្ចាស់ទុនដ៏ធំ ដែលជាអ្នកចេញមុខសាងសង់Thai Bunrong Twin Tower ដែលជាមហាសេដ្ឋីចិន ក៏ត្រូវបានចាប់ខ្លួននៅសហរដ្ឋអាមេរិកផងដែរ។

ចំណែកក្រុមហ៊ុន CMT Cosmo Pte, Ltd Group ដែលជាដៃគូក្រុមហ៊ុនថៃ ប៊ុនរ៉ុង និងក្រុមហ៊ុនដទៃទៀត ហាក់មិនមានសកម្មភាព ឬបញ្ចេញព៌តមានណាមួយពីដំនើរការនិតិវិធី ឬប្រកាសព៌តមានណាមួយទាក់ទង នឹងការចាប់ផ្តើមសាងសង់គំរោងនេះនៅឡើយទេ។

លោកសាស្ត្រាចារ្យទួស សាភឿនស្ថាបត្យករចូលរួមគូប្លង់គំរោងនេះ និងជាមន្ត្រីជាន់ខ្ពស់នៃក្រុមហ៊ុន Thai Bunrong Group ដែលជាអ្នកអភិវឌ្ឍន៍គំរោងនេះមិនបានឆ្លើយតបសំណួរសុំការពន្យល់បានទេ។

ប៉ុន្តែលោកទួស សាភឿនធ្លាប់បានឲ្យដឹងថា ក្រុមស្ថាបត្យករ និងវិស្វករលំដាប់ពិភពលោក ដែលធ្លាប់មានបទពិសោធន៍សាងសង់អាគារខ្ពស់ៗ មកពីបួនប្រទេស កំពុងសិក្សាពីការសាងសង់អាគារនេះ។លោកបន្តថា ក្រុមស្ថាបត្យករ និងវិស្វករចូលរួមគូរប្លង់អាគារភ្លោះកប់ពពកនេះមានមកពីប្រទេសបារាំង សហរដ្ឋអាមេរិក ប្រទេសចិន និងក្រុមស្ថាបត្យករ និងវិស្វករពោរពេញដោយជំនាញ និងបទពិសោធន៍កម្ពុជាជាច្រើនរូបផងដែរ។

លោកធ្លាប់បានមានប្រសាសន៍ឲ្យដឹងថា រហូតមកទល់ពេលនេះ ក្រុមអ្នកជំនាញនិងក្រុមហ៊ុន បានសម្រេចបន្ថែមកំពស់អាគារនេះ ដល់កំពស់៥៦៨ម៉ែត្រ និងបង្កើនទុនវិនិយោគផ្នែកសំណង់រហូត ដល់៥០០០លានដុល្លារអាមេរិក។

លោកធ្លាប់បានអះអាងផងដែរថា “ការសាងសង់មជ្ឈមណ្ឌលពាណិជ្ជកម្មពិភពលោកនេះ មិនមានការប្រែប្រួលទេ។ វានឹងជាមោទនភាព និងជាកិត្យានុភាពសម្រាប់កម្ពុជានៅលើពិភពលោក”។លោកបន្តថា “មិនមានប្រទេសទាំងអស់អាចមានសមត្ថភាពសាងសង់ទេ ជួនកាលពួកគេមានលុយ តែមិនប្រាកដថាអាចសាងសង់បាននោះឡើយ”។

ទោះជាយ៉ាងណាលោកមិនបញ្ជាក់ឲ្យដឹង ពីពេលវេលាជាក់លាក់នៃការចាប់ផ្តើមបើកការដ្ឋានសាងសង់ជាផ្លូវការទេ ដោយបានថ្លែងថា ក្រុមហ៊ុនកំពុងជ្រើសរើសរកពេលវេលាសមស្របមួយ។

នៅពេលទាក់ទងសុំការអត្ថាធិប្បាយពីគំរោងនេះ នៅថ្ងៃទី២៥ ឧសភានេះ លោកទួស សាភឿនមិនបានឆ្លើយតបនោះទេ ខណៈគម្រោងសាងសង់ផ្សារបណ្តែតទឹក នៅក្នុងគំរោងAngkor Landmark ខេត្តសៀមរាបមិនទាន់បានសាងសង់នៅឡើយផងដែរ៕

គម្រោងវិនិយោគថ្មីតម្លៃជិត២២លានដុល្លារនឹងបង្ហាញខ្លួននៅតំបន់ភ្នំបូកគោ

ដោយៈ រ៉ាណេត

កំពតៈ គម្រោងវិនិយោគនិងអភិវឌ្ឍន៍ថ្មីមួយទៀត មានតម្លៃជិត២២លានដុល្លារ នឹងបង្ហាញវត្តមាន នៅតំបន់ឧទ្យានជាតិព្រះមុនីវង្សនៃភ្នំបូកគោ បន្ថែមពីលើគម្រោងធំៗដែលមានស្រាប់ដូចជា គម្រោងសាងសង់សារមន្ទីរថាមពលកើតឡើងវិញ រួមជាមួយនឹងគម្រោងបង្កើតឧទ្យានជាតិ សម្ដេច ហ៊ុន សែន កំពត។

ស្របពេលទៅនឹងគម្រោងអភិវឌ្ឍន៍ធំៗ ដែលមានតម្លៃសរុបរាប់រយលានដុល្លារនៅតំបន់ឧទ្យានជាតិព្រះមុនីវង្សភ្នំបូកគោ ដូចជា គម្រោងអភិវឌ្ឍន៍ក្រុងថ្មីរបស់ក្រុមហ៊ុន សុខា ដែលរាប់បញ្ចូលទាំងការអភិវឌ្ឍហេដ្ឋារចនាសម្ព័ន្ធនានា ដូចជា ផ្លូវថ្នល់ដែលមានភាពសំខាន់ដល់គម្រោង ក៏ដូចជាគម្រោងបង្កើតឧទ្យានជាតិ សម្ដេចហ៊ុន សែន កំពត ដែលរដ្ឋាភិបាល ទើបប្រកាសកាលពីចុងសប្ដាហ៍កន្លងទៅ ពេលនេះមានគម្រោងវិនិយោគតម្លៃជិត២២លានដុល្លារ ក៏ត្រៀមបង្ហាញខ្លួននៅតំបន់នេះផងដែរ។

គម្រោងវិនិយោគថ្មីដែលមានតម្លៃជិត២២លានដុល្លារនេះ នឹងបង្ហាញខ្លួនក្នុងរូបភាពក្នុងវិស័យកសិ-ឧស្សាហកម្ម បង្កើតជាកសិដ្ឋាន ដូងប្រេង កៅស៊ូ និងល្ហុងប្រេង របស់ក្រុមហ៊ុន VIRTUS GREEN PLANTATIONS (CAMBODIA) PTE., LTD. ដែលគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា ទើបតែបានសម្រេចចេញវិញ្ញាបនបត្រចុះបញ្ជីជាស្ថាពរ ដោយមានទីតាំងវិនិយោគ ស្ថិតនៅតំបន់ប្រើប្រាស់ដោយចីរភាពនៃឧទ្យានជាតិព្រះមុនីវង្ស “បូកគោ” ស្រុកជុំគីរី និងស្រុកទឹកឈូ ខេត្តកំពត អាចបង្កើតការងារបានចំនួន២.០៧០កន្លែង។

ជាមួយនឹងគម្រោងវិនិយោគ និងការអភិវឌ្ឍន៍ពីវិស័យឯកជន និងរដ្ឋាភិបាលនៅទូទាំងខេត្តកំពត លោកអភិបាលខេត្តកំពត ជាវ តាយ ធ្លាប់បានបង្ហាញពីគោលជំហរក្នុងកិច្ចសហការ ជួយសម្របសម្រួល ដល់គ្រប់ដំណើរវិនិយោគទាំងអស់ ដើម្បីធ្វើយ៉ាងណាឱ្យគ្រោងកាអភិវឌ្ឍន៍ទាំងអស់ ប្រកបដោយភាពរលូន និងទទួលបានជោគជ័យ៕

ទិញអចលនទ្រព្យបញ្ចុះតម្លៃរហូតដល់៣០% តាមរយៈការចុះឈ្មោះចូលរួមកម្មវិធី Black Friday Property Sale

ដោយ ហ្សូលី

ភ្នំពេញៈ វិស័យអចលនទ្រព្យគឺជាវិស័យ ដែលឈានមុខគេនៅក្នុងប្រទេសកម្ពុជា ហើយក៏ជាវិស័យ ដែលអនុញ្ញាតឱ្យមនុស្សភាគច្រើន ទទួលបានលាភចំនេញខ្ពស់ផងដែរ។ តាមរយៈការលើកស្ទួយវិស័យនេះ ឱ្យកាន់តែមានភាពទូលំទូលាយ និងបង្កើតឱកាសចំណេញដល់អ្នកជាវអចលនទ្រព្យ សូមឆ្លៀតឱកាសចូលរួមចុះឈ្មោះ ក្នុងកម្មវិធីបញ្ចុះតម្លៃអចលនវត្ថុ Black Friday Property Sale។

កម្មវិធី Black Friday Property Sale នេះ គឺជាកម្មវិធីលក់បញ្ចុះតម្លៃអចលនទ្រព្យ ដែលអ្នកចូលរួមទាំងអស់ នឹងទទួលបានការបញ្ចុះតម្លៃពិសេស ទៅលើអចលនវត្ថុគ្រប់ប្រភេទដូចជា ខុនដូ លំនៅដ្ឋានជាដើម។ អ្នកចូលរួមអាចទិញបានក្នុងតម្លៃ ដែលទាបជាងទីផ្សារទូទៅ ឬស្មើនឹងការបញ្ចុះតម្លៃរហូតដល់៣០ភាគរយ។

ក្រុមហ៊ុនអភិវឌ្ឍ និងគម្រោងល្បីៗមួយចំនួនមានដូចជា Urban Village , Borey VIP , The Skyline និងគម្រោងជាច្រើនទៀត បានចូលរួមលក់បញ្ចុះតម្លៃអចលនវត្ថុរបស់ខ្លួនក្នុងតម្លៃពិសេសមិនធ្លាប់មាន។ អ្នកចួលរួមអាចមានទំនុកចិត្តខ្ពស់ ដោយមិនព្រួយបារម្ភពីហានិភ័យអ្វីនោះទេ។

ស្ថិតក្នុងស្ថានភាពសេដ្ឋកិច្ចកំពុងមានស្រពិចស្រពិល តម្លៃអចលនទ្រព្យក៏ល្អ ដូច្នេះមិនគួរណាឱ្យឱកាសនេះរំលងទៅឡើយ ព្រោះនៅថ្ងៃអនាគតអ្នកវិនិយោគលើវិស័យនេះនឹងទទួលបានផលចំនេញទ្វេដងមកវិញ។

តើធ្វើយ៉ាងណាទើបអាចចួលរួមកម្មវិធី Black Friday Property Sale នេះបាន?

សូមធ្វើការចុះឈ្មោះចូលរួមក្នុងកម្មវិធីតាមរយៈLinkមួយនេះ https://propertysale.realestate.com.kh/property-area រួចបំពេញព័ត៌មានជាការស្រេច។ លោកអ្នកនឹងទទួលបានអចលនទ្រព្យក្នុងក្តីសុបិន្ត ជាមួយតម្លៃដែលទាបបំផុត។ ព្រឹត្តការណ៍ Black Friday Property Sale នឹងប្រព្រឹត្តទៅនៅថ្ងៃទី ១២ ខែ មិថុនា ឆ្នាំ ២០២០ ខាងមុខនេះ ចាប់ពីវេលាម៉ោង៤រសៀល ដល់ម៉ោង៨យប់។ ត្រឹមរយៈពេល៤ម៉ោងប៉ុណ្ណោះ ដែលលោកអ្នកអាចនឹងទទួលបានផលចំណេញយ៉ាងច្រើន ដែលមិនធ្លាប់មាន និងមិនងាយទទួលបានឱកាសនេះនោះឡើយ។

របៀបនៃការទិញអចលនទ្រព្យក្នុងកម្មវិធី Black Friday Property Sale

នៅពេលដល់ថ្ងៃទី១២ខែមិថុនា ម៉ោង៤រសៀល ដែលព្រឹត្តការណ៍ចាប់ផ្តើមនោះ ក្រុមការងារនឹងធ្វើការផ្តល់ព័ត៌មាន ទៅកាន់លោកអ្នកអំពីការបញ្ចុះតម្លៃ និងផ្តល់ការណែនាំពីរបៀបទិញក្នុងរយៈពេល៤ម៉ោងនេះ។ ករណីដែលលោកអ្នករកឃើញប្រភេទអចលនវត្ថុដែលពេញចិត្ត លក្ខខណ្ឌកម្មវិធី គឺតម្រូវឱ្យធ្វើការកក់ប្រាក់៥០០ដុល្លារ ជាមុន។

លោកអ្នកមានរយៈពេល១៤ថ្ងៃ ក្នុងការសម្រេចចិត្តជ្រើសរើស និងពិភាក្សាអំពីអចលនទ្រព្យជាក់លាក់ណាមួយ ជាមួយក្រុមហ៊ុនអភិវឌ្ឍន៍ ដើម្បីជួបពិភាក្សា ចុះកុងត្រាកិច្ចព្រមព្រៀងទិញ–លក់។ មិនតែប៉ុណ្ណោះ អ្នកក៏មានសិទ្ធទទួលបានប្រាក់កក់៥០០ដុល្លារ មកវិញផងដែរ ប្រសិនបើអ្នកមិនពេញចិត្តឬសម្រេចចិត្តថាមិនទិញវិញ៕

ក្រុមហ៊ុន Foster & Partners ដែលទទួលបានសិទ្ធិរចនាប្លង់ព្រលានយន្តហោះអន្តរជាតិភ្នំពេញថ្មីមានប្រវត្តិយ៉ាងដូចម្តេច?

ដោយវុត្ថា
ភ្នំពេញ៖ ក្រុមហ៊ុន Foster & Partners ជាក្រុមហ៊ុនគូប្លង់សំណង់ និងស្ថាបត្យកម្មលំដាប់អន្តរជាតិរបស់ចក្រភពអង់គ្លេស ដែលមានមូលដ្ឋានការិយាល័យកណ្តាលស្ថិតនៅក្នុងទីក្រុងឡុងដ៍ ជាក្រុមហ៊ុនដែលត្រូវបានជ្រើសរើស ក្នុងការគូប្លង់មេនៃអាកាសយាន ដ្ឋានអន្តរជាតិភ្នំពេញថ្មីរបស់កម្ពុជា។

ក្រុមហ៊ុននេះ ជាក្រុមហ៊ុនរចនាប្លង់ដ៏ធំ និងល្បីល្បាញលំដាប់ពិភពលោក ត្រូវបានបង្កើតឡើងដោយ លោក Norman Fosterក្នុងឆ្នាំ ១៩៦៧។ Norman Foster ជាស្ថាបត្យករអង់គ្លេសកើតក្នុងឆ្នាំ១៩៣៥ ។ គាត់ទទួលបានពានរង្វាន់ស្ថាបត្យកម្មអន្តរជាតិ ដ៏ល្បី Pritzker Prize ក្នុងឆ្នាំ១៩៩៩ ។

ទស្សនៈស្ថាបត្យកម្ម ដ៏សំខាន់របស់លោក Norman Foster គឺការអនុវត្តទ្រឹស្ដី “High-Tech” ដោយប្រើសម្ភារៈនិងបច្ចេកវិទ្យាទំនើបៗ ហើយថែមទាំងបានប្រៀបប្រដូចស្ថាបត្យកម្មទៅនឹងកញ្ចក់ សម្រាប់ឆ្លុះពីតម្លៃសង្គមនិងការវិវឌ្ឍន៍នៃបច្ចេកវិទ្យាទៀតផង ។

លោក Norman Foster ចូលចិត្តស្វែងយល់ពីបច្ចេកវិទ្យា តាំងពីបុរាណកាលរហូតដល់បច្ចុប្បន្ន ពីព្រោះគាត់យល់ថា បច្ចេកវិទ្យាជាអ្នកធ្វើអោយមានរចនាសម្ព័ន្ធអាគារ។ ហើយរចនាសម្ព័ន្ធអាគារនេះហើយ ដែលជាអ្នកត្រួតត្រា ឬបង្កើតជាលំហរសម្រាប់មនុស្សរស់នៅ។

ស្នាដៃសំខាន់ៗរបស់ក្រុមហ៊ុន Foster & Partners មាន ដូចជា Queen Elizabeth II Great 2000, 30 St Mary Axe 2004, Bloomberg London 2017, និង Apple Park 2017។

ព្រលានយន្តហោះភ្នំពេញថ្មី ដែលមានទឹកប្រាក់១,៥ពាន់លានដុល្លារ ស្ថិតនៅក្នុងខេត្តកណ្តាល និងខេត្តតាកែវ ជាគម្រោងអភិវឌ្ឍន៍ដ៏ធំមួយរបស់កម្ពុជា ដែលបាននិងកំពុងសាងសង់នៅលើផ្ទៃដីទំហំ២.៦០០ហិកតា និងជាការវិនិយោគរបស់ក្រុមហ៊ុនសាជី វកម្មវិនិយោគក្រៅប្រទេសកម្ពុជា (OCIC) ដោយដំណាក់កាលទីមួយ នឹងត្រូវបញ្ចប់ការសាងសង់ក្នុងឆ្នាំ២០២៣៕

ធនាគារ អេស៊ីលីដា បានចាប់ផ្តើមបោះលក់មូលបត្រជាផ្លូវការនៅថ្ងៃនេះ

ដោយ ប៊ី
ភ្នំពេញ៖ ធនាគារ អេស៊ីលីដា ភីអិលស៊ី ដែលជាធនាគារពាណិជ្ជឈានមុខគេនៅកម្ពុជា បានចុះបញ្ជីមូលបត្រកម្មសិទ្ធិជាផ្លូវការនៅក្នុងក្រុមហ៊ុនផ្សារមូលបត្រកម្ពុជា នៅព្រឹកថ្ងៃទី២៥ ខែឧសភា ឆ្នាំ២០២០ ។
ការបោះផ្សាយលក់មូលបត្រកម្មសិទ្ធិរបស់ធនាគារ អេស៊ីលីដា ភីអិលស៊ី គឺជាការបើកទំព័រស័ករាជថ្មីនៃប្រវត្តិជោគជ័យរបស់ធនាគារ ក្នុងនាមជាធនាគារពាណិជ្ជទី១នៅក្នុងព្រះរាជាណាចក្រកម្ពុជា ដែលត្រូវបានចុះបញ្ជីនៅក្នុងក្រុមហ៊ុនផ្សារមូលបត្រកម្ពុជា ។

ទោះបីជាស្ថិតក្នុងដំណាក់កាលនៃការរីករាលដាលនៃជំងឺរាតត្បាតជាសកលក៏ដោយ ក៏វិនិយោគិនចំនួន ២.៤៩៧ នាក់ បានធ្វើបរិវិសកម្ម (ទិញ) មូលបត្រកម្មសិទ្ធិរបស់ធនាគារ ហើយចំនួននេះ គឺជាចំនួនវិនិយោគិនដែលចូលរួមច្រើនបំផុត សម្រាប់ការបោះផ្សាយលក់មូលបត្រកម្មសិទ្ធិនៅក្នុងព្រះរាជាណាចក្រកម្ពុជាកន្លងមក ហើយក៏បង្ហាញពីភាពជឿទុកចិត្ត និងគាំទ្ររបស់អតិថិជន និងសាធារណជន ចំពោះធនាគារ អេស៊ីលីដា ភីអិលស៊ី ផងដែរ ។

វិនិយោគិនអាចដាក់បញ្ជាទិញ-លក់ភាគហ៊ុនរបស់ធនាគារ អេស៊ីលីដា ភីអិលស៊ី ចាប់ពីម៉ោង ០៨:០០ ព្រឹក នៅថ្ងៃចុះបញ្ជីថ្ងៃទី២៥ ខែឧសភា ឆ្នាំ២០២០ នេះ។
លោកបណ្ឌិត អ៉ិន ចាន់នី ប្រធាននាយកប្រតិបត្តិធនាគារ អេស៊ីលីដា ភីអិលស៊ី បានមានប្រសាសន៍ថា ធនាគារ អេស៊ីលីដា ភីអិលស៊ី បានចុះបញ្ជីជាផ្លូវការនៅក្នុងក្រុមហ៊ុនផ្សារមូលបត្រកម្ពុជា នៅថ្ងៃចន្ទ ទី២៥ ខែឧសភា ឆ្នាំ២០២០ នេះ ។

លោក បានថ្លែងថា “តាមរយៈការចូលរួមក្នុងដំណាក់កាលបោះផ្សាយលក់មូលបត្រកម្មសិទ្ធិជាសាធារណៈរបស់ធនាគារ អេស៊ីលីដា ភីអិលស៊ី វិនិយោគិនរូបវន្តបុគ្គល និងនីតិបុគ្គល មានឱកាសវិនិយោគជាលើកដំបូងនៅក្នុងធនាគារពាណិជ្ជដែលបានចុះបញ្ជីនៅក្នុងព្រះរាជាណាចក្រកម្ពុជា។ ភាគហ៊ុនិកសាធារណៈថ្មីរបស់ធនាគារ នឹងទទួលបានអត្ថប្រយោជន៍ពីការរីកចម្រើនរបស់ធនាគារ តាមរយៈភាគលាភនិងចំណេញមូលធន”។

លោក បានបន្តថា “ការបោះផ្សាយលក់មូលបត្រកម្មសិទ្ធិជាសាធារណៈរបស់ធនាគារ អេស៊ីលីដា ភីអិលស៊ី បានទាក់ទាញវិនិយោគិនរូបវន្តបុគ្គលសញ្ជាតិខ្មែរជាច្រើនចូលរួមវិនិយោគនៅក្នុងក្រុមហ៊ុនផ្សារមូលបត្រកម្ពុជា នឹងបន្តរួមចំណែកអភិវឌ្ឍផ្សារមូលធនកម្ពុជា”។

លោក Han Kyung Tae អគ្គនាយកក្រុមហ៊ុន យាន់តា ស៊ីឃ្យួរឹធី (ខេមបូឌា) ភីអិលស៊ី បានមានប្រសាសន៍ថា ជាមួយនឹងការចុះបញ្ជីភាគហ៊ុនរបស់ធនាគារ អេស៊ីលីដា ភីអិលស៊ី នៅក្នុងក្រុមហ៊ុនផ្សារមូលបត្រកម្ពុជា មូលធនូបនីយកម្មទីផ្សារសរុបរបស់ក្រុមហ៊ុនផ្សារមូលបត្រកម្ពុជា នឹងកើនឡើង ៣ដង ។

លោក Han Kyung Tae បានថ្លែងថា “យើងខ្ញុំជឿជាក់ថា ធនាគារ អេស៊ីលីដា ភីអិលស៊ី បានបោះជំហានដំបូងដ៏សំខាន់ ដើម្បីក្លាយជាប្រជាធនាគារដ៏ពិតប្រាកដ តាមរយៈការបោះផ្សាយលក់មូលបត្រកម្មសិទ្ធិលើកដំបូងជាសាធារណៈនេះ”។

ក្នុងនាមជាក្រុមហ៊ុនដឹកនាំគម្រោងដ៏សំខាន់នេះ ក្រុមហ៊ុន យាន់តា នឹងបន្តជួយដល់ក្រុមហ៊ុនបោះផ្សាយ និងវិនិយោគិនសាធារណៈទាំងអស់ តាមរយៈការបង្កើនសន្ទនីយភាពភាគហ៊ុនធនាគារនៅក្នុងទីផ្សារបន្ទាប់ ។
លោក Han Kyung Tae បានថ្លែងទៀតថា “យើងខ្ញុំជឿជាក់ថា ការជួយដល់ក្រុមហ៊ុនបោះផ្សាយក្នុងការបោះផ្សាយលក់មូលបត្រកម្មសិទ្ធិជាបន្តបន្ទាប់ និងការប្រើប្រាស់វិធីសាស្រ្តជួញដូរតាមការចរចានាពេលអនាគត នឹងជួយបង្កើនសន្ទនីយភាព និងទាក់ទាញវិនិយោគិនបរទេសបានកាន់តែច្រើន មិនត្រឹមតែសម្រាប់ភាគហ៊ុនរបស់ធនាគារ អេស៊ីលីដា ភីអិលស៊ី ប៉ុណ្ណោះទេ ថែមទាំងសម្រាប់ទីផ្សារមូលធននៅកម្ពុជាផងដែរ”៕

អ្នកជំនាញថាភ្នាក់ងារលក់អចលនទ្រព្យដែលជោគជ័យខ្ពស់ត្រូវតែមានភាពប្រាកដប្រជា និងឆ្លាតវៃ

ដោយៈ រ៉ាណេត

ភ្នំពេញៈ គ្រប់សមាសភាពដែលបម្រើការងារ និងមានតួនាទីជាភ្នាក់ងារលក់អចលនទ្រព្យទាំងអស់ មិនថាចំពោះផ្នែកសំណង់លំនៅដ្ឋាន ឃ្លាំង អគារពាណិជ្ជកម្ម ឬដីធ្លីនោះទេ គឺសុទ្ធតែចង់ទទួលបានអត្រាជោគជ័យខ្ពស់។

គោលដៅមួយនេះ ត្រូវបានអ្នកជំនាញបញ្ជាក់ប្រាប់ថា អត្រានៃការសម្រេចគឺសុទ្ធតែមានដូចគ្នា ទាស់ត្រង់ថា ភ្នាក់ងារដែលជាអ្នកទទួលលក់គម្រោង មានភាពឆ្លាតវៃ និងមានភាពជឿជាក់លើខ្លួនឯងកម្រិតណាតែប៉ុណ្ណោះ។

អគ្គនាយកក្រុមហ៊ុនភ្នាក់ងារអចលនទ្រព្យ Show Up Real Estate លោកអ៉ិន ណាង ដែលមានបទពិសោធន៍នៅក្នុងវិស័យនេះ បានប្រាប់ឱ្យដឹងកាលពីចុងសប្ដាហ៍កន្លងទៅថា គ្រប់អ្នកដែលចូលមកប្រឡូក នៅក្នុងការងារជាភ្នាក់ងារលក់អចលនទ្រព្យទាំងអស់ សុទ្ធតែមើលឃើញពីឱកាស ដែលអាចអភិវឌ្ឍន៍ខ្លួននៅក្នុងវិស័យមួយនេះបាន ខណៈដែលទីផ្សារមួយនេះមានភាពទូលំទូលាយ និងអាចទទួលបានផលប្រយោជន៍ច្រើន។

លោកអ៉ិន ណាង បានមានប្រសាសន៍បញ្ជាក់ថា “អ្នកដែលចូលមកប្រឡូកនៅក្នុងវិស័យអចលនទ្រព្យដោយផ្ដើមចេញ ពីការងារជាភ្នាក់ងារលក់គឺមានច្រើន ហើយក៏មានអ្នកបោះបង់ឱកាសទៅវិញក៏មានច្រើនដែរ ដោយសារតែភាពបរាជ័យលើការលក់របស់ខ្លួន ហើយមិនមានការអត់ធ្មត់ និងសិក្សាបន្ថែមដើម្បីអភិវឌ្ឍន៍អាជីព” ។ លោកបន្តថា “អ្នកដែលមានឱកាសជោគជ័យខ្ពស់នៅក្នុងអាជីពជាភ្នាក់ងារ ក្រៅពីមានចំណូលចិត្ត គឺត្រូវទាមទារឱ្យមានចំណោះដឹងទូលាយ ជំនាញក្នុងកិច្ចទំនាក់ ភាពស្មោះត្រង់ ជាពិសេសភាពឆ្លាតវៃក្នុងការចេះចាត់ចំណាត់ថ្នាក់ទីផ្សារ និងតម្រូវការជាក់ស្ដែងពិតប្រាកដមុនពេលសម្រេចទទួលយកគម្រោងលក់។

អ្នកជំនាញរូបនេះបានលើកឡើងថា ការទទួលយកគម្រោងណាមួយ ដើម្បីស្វែងរកទីផ្សារ មិនមែនធ្វើឡើងទាំងភាពប្រថុយប្រថាននោះទេ ព្រោះភាពបរាជ័យលើការលក់គម្រោង ដែលក្រៅពីបាត់បង់ឱកាសទទួលបានចំណូល ថែមទាំងអាចធ្វើប៉ះពាល់ដល់កេរ្តិ៍ឈ្មោះថែមទៀត។ ដូច្នេះមុនពេលសម្រេចចិត្តទទួលយកគម្រោង ចាំបាច់មានការស្វែងយល់ឱ្យបានច្បាស់លាស់ ប្រកបដោយភាពប្រាកដប្រជា និងមានភាពជឿជាក់ខ្ពស់ទៅលើការទទួលបានចំណែកទីផ្សារ។

អគ្គនាយកក្រុមហ៊ុនភ្នាក់ងារអចលនទ្រព្យ Show Up Real Estate រូបនេះបានមានប្រសាសន៍បញ្ជាក់ថា “នៅពេលដែលយើងទទួលយកគម្រោង ឬអចលនវត្ថុណាមួយ យើងត្រូវប្រាកដថា អចលនវត្ថុដែលភ្ញៀវពឹងឱ្យលក់ធ្លាប់មានតម្រូវការទេ ឬមានអ្នកដែលកំពុងស្វែងរកទិញឬអត់ ហើយប្រសិនបើគ្មាន តើគួរស្វែងរកទីផ្សារនៅទីណា ប្រើប្រាស់វិធីសាស្ត្រអ្វី ?” ។

លោកបន្តថា ការដែលអាចស្វែងរកទីផ្សារបាន ទាល់តែយើងធ្លាប់មានបទពិសោធន៍ ធ្លាប់ដឹង និងស្គាល់ពីតម្រូវការទីផ្សារ រួមជាមួយនឹងកិច្ចទំនាក់ទំនងល្អជាមួយបណ្តាញនៅក្នុងវិស័យមួយនេះ។ នៅពេលអ្នកមានទំនាក់ទំនងល្អ មានបណ្តាញច្រើន ជាពិសេសភាពស្មោះត្រង់របស់អ្នក វាអាចពង្រីកវិសាលភាពនៃទីផ្សារកាន់តែទូលាយ ហើយជួយជំរុញដល់ការលក់របស់អ្នកកាន់តែមានប្រសិទ្ធភាពខ្ពស់៕

តើស្ថានភាពអចលនទ្រព្យនៅប្រទេសថៃមានសភាពបែបណា អំឡុង Covid-19 នេះ?

ដោយ ហ្សូលី

ភ្នំពេញៈ អចលនទ្រព្យប្រទេសថៃកំពុងដាំក្បាលចុះ ជាប្រវត្តិសាស្ត្រនិងកំពុងប្រឈមនឹងស្ថានភាពអាក្រក់បំផុត មិនធ្លាប់មានចាប់តាំងពីមុនពេលផ្ទុះឡើងជំងឺរាតត្បាត covid-19 មកម្ល៉េះ ។

រដ្ឋាភិបាលថៃបានចាត់វិធានការណ៍ ដោយឱ្យប្រជាពលរដ្ឋត្រូវនៅក្នុងផ្ទះ ដូច្នេះការទិញ-លក់ អចលនវត្ថុនៅក្នុងប្រទេសកិ៏ត្រូវជាប់គាំងដែរ។ ហេតុនេះទើបមានសំណួរចោទថា តើវិស័យអចលនទ្រព្យដែលកំពុងជាប់គាំងនេះ អាចនឹងត្រឡប់មកសភាពដើមដែរឬទេ បើសិនជា Covid-19 រលត់បាត់ទៅ?។

ការវិនិយោគអចលនទ្រព្យនៅលើពិភពលោក បានធ្លាក់ចុះប្រមាណ៤៣ភាគរយ ខណៈដែលមេរោគបានសាយភាយបន្តដល់ខែឧសភានេះ។ មិនថាតែនៅតំបន់អាស៊ី ទ្វីបអ៉ឺរ៉ុប សហរដ្ឋអាមេរិក ក៏ទទួលរងឥទ្ធិពលដែរ។ អ្នកទិញអចលនវត្ថុប្រមាណ៩០ភាគរយ ក្នុងប្រទេសថៃ ច្រើនតែមកពីចិន ហុងកុង និងសិង្ហបុរី ហើយវាមានចំណែកចំនួន៦ភាគរយ នៃទិន្នផលសរុបក្នុងប្រទេសថៃ និងផ្សារភ្ជាប់ទៅនឹងវិស័យទេសចរណ៍ដូចគ្នា។

ជាក់ស្តែងការមកដល់ នៃជនបរទេសបានធ្លាក់ចុះជាង៧០ភាគរយ ចំណែកជនជាតិចិនវិញធ្លាក់ចុះ៩៤ ភាគរយ។

ក្រុមហ៊ុន ឬអ្នកអភិវឌ្ឍថៃបានរំពឹងថា នឹងទទួលបានកំណើនវិនិយោគអចលនទ្រ ព្យក្នុងឆ្នាំ២០២០ ផ្ទុយទៅវិញបែរជាជួបនឹងភាពធ្លាក់ចុះ ជាអនេកដែលនាំឱ្យពួកគេត្រូវកាត់បន្ថយការចំណាយតាមដែលអាចធ្វើទៅបាន។ នៅពេលដែលសេដ្ឋកិច្ចកំពុង ឆ្ពោះទៅកាន់ហានិភ័យ តម្លៃអចលនទ្រព្យក៏មានការប្រែប្រួល ទៅតាមសភាពការណ៍សេដ្ឋកិច្ច។ ការបញ្ចុះតម្លៃ ការផ្តល់ជូនពិសេសៗ បានលេចឡើងខ្ពស់ រីឯកិច្ចសន្យាព្រមព្រៀងមួយចំនួនត្រូវបានពន្យាពេល។

ដើម្បីទុកពេលវេលានេះឱ្យមានតម្លៃ ក្រុមហ៊ុនអភិវឌ្ឍគប្បីស្វែងរកគំនិតថ្មីៗក្នុងការបង្កើតម៉ូដលំនៅដ្ឋាន ឬអចលនវត្ថុ ឱ្យមានភាពល្អប្រសើរក្នុងការរស់នៅ ឧទាហរណ៍៖ ការរក្សាឱ្យខ្យល់ចេញចូលក្នុងផ្ទះឱ្យបានគ្រប់គ្រាន់។

អ្នកជំនាញបានព្យាករណ៍ថា សេដ្ឋកិច្ចនឹងរះឡើងវិញ នៅក្នុងត្រីមាសទី៤ឆ្នាំនេះ ដូច្នេះវិនិយោគិនអាចមានសង្ឃឹម និងទំនុកចិត្តវិនិយោគនៅក្នុងតំបន់បានវិញហើយ។ ការនិយមថ្មីរបស់វិនិយោគិនចិន បានប្តូរការចាប់អារម្មណ៍ពីការទិញអចលនវត្ថុ នៅអាមេរិកនិងអ៉ឺរ៉ុប មកទិញនៅក្នុងប្រទេសជិតខាងដែលជាតំបន់អាស៊ីដូចគ្នាវិញ។ នេះជាសញ្ញាវិជ្ជមានឱ្យឃើញថា អចលនទ្រព្យថៃអាចមានសន្ទុះទិញឡើងវិញដែរ បន្ទាប់ពីមានការជាប់គាំងនូវការទិញ-លក់ខុនដូជាច្រើនយូនីត។

លោក George Chmiel ប្រធានគ្រប់គ្រងនៃគេហទំព័រអចលនទ្រព្យ Juwai.com បានលើកឡើងថា ជនជាតិចិននៅតែជ្រើសរើសទីផ្សារ ដែលស្ថិតនៅក្បែរប្រទេសខ្លួន ជាពិសេសក្នុងតំបន់អាស៊ីអាគ្នេយ៍តែម្តង។

ប្រទេសថៃមានការរស់នៅទាន់សម័យ សុខុមាលភាព ជាមួយនឹងសាកលវិទ្យាល័យនិងមណ្ឌលអប់រំល្អៗជាច្រើន ដូចនេះមិនពិបាកទេក្នុងការទាញយក អតិថិជនមកជួលឬទិញអចលនវត្ថុវិញ៕ Asean Today

ប្រធាន CREA បង្ហាញពីភាពសុទិដ្ឋិនិយមចំពោះគម្រោងសាងសង់ស្ពានតភ្ជាប់ពីទីក្រុងកោះពេជ្រ មកទីក្រុងកោះនរា

ដោយៈ វុត្ថា

ភ្នំពេញៈ ប្រធានសមាគមអ្នកជំនាញអចលនវត្ថុកម្ពុជា ហៅកាត់ CREA បានបង្ហាញពីមោទនភាព និងមានភាពសុទិដ្ឋិនិយមលើគម្រោងបង្កើតក្រុងរណបកោះនរា ដែលស្ថិតនៅក្នុងខណ្ឌច្បារអំពៅ រាជធានីភ្នំពេញ ជាពិសេសគម្រោងសាងសង់ស្ពានតភ្ជាប់ពីទីក្រុងកោះពេជ្រមកកាន់ក្រុងរណបថ្មីមួយនេះ បន្តមកកាន់ផ្លូវជាតិលេខ១ ដែលកាន់តែជួយជំរុញឱ្យចរន្តទីផ្សារអចលនទ្រព្យនៅតំបន់នេះមានសក្ដានុពល។

ប្រធានសមាគមអ្នកជំនាញអចលនវត្ថុកម្ពុជា លោកស្រីចេវ សុឃុន បានមានប្រសាសន៍ប្រាប់តាមទូរស័ព្ទ កាលពីល្ងាចថ្ងៃចុងសប្ដាហ៍កន្លងទៅនេះថា រាល់សកម្មភាព និងផែនការនៃការអភិវឌ្ឍន៍ទាំងអស់ សុទ្ធតែបានជះឥទ្ធិពលដល់វិស័យអចលនទ្រព្យ ក៏ដូចជាជំរុញកំណើនសេដ្ឋកិច្ចជាតិផងដែរ។

លោកស្រីបានមានប្រសាសន៍បន្តទៀតថា “បច្ចុប្បន្ននេះ សម្រាប់ខណ្ឌច្បារអំពៅចាប់ពីចំណុចគល់ស្ពានព្រះមុនីវង្ស រហូតដល់តំបន់ព្រែកឯក លែងជាតំបន់ជាយក្រុងដូចកាលពីមុនទៀតហើយ ហើយក៏មានចំណូលអ្នកចូលមករស់នៅច្រើនផងដែរ ជាពិសេសក្នុងរយៈពេលជិត២ឆ្នាំចុងក្រោយនេះ” ។ លោកស្រីបន្ថែមថា “ក្រៅពីគម្រោងអភិវឌ្ឍក្នុងវិស័យលំនៅដ្ឋានធំៗដូចជាបុរី ប៉េង ហួត បណ្តុំលំនៅដ្ឋានវាលស្បូវ គម្រោងខុនដូធំៗ ដែលវិនិយោគដោយក្រុមហ៊ុនចិន គឺនៅមានគម្រោងអភិវឌ្ឍន៍លំនៅដ្ឋានជាច្រើនទៀតរហូតដល់គីឡូលេខ១៦” ។

លោកស្រីបានបញ្ជាក់ថា ជាមួយនឹងគម្រោងបង្កើតក្រុងរណបថ្មីកោះនរា គឺបានធ្វើឱ្យតំបន់ត្រើយម្ខាង នៃខណ្ឌច្បារអំពៅមានភាពស៊ីវិល័យ និងអភិវឌ្ឍន៍រួចទៅហើយ។ បន្ថែមពីនេះ នៅមានគម្រោងសាងសង់ស្ពានឆ្លទន្លេរ យោងដោយខ្សែកាបមួយខ្សែទៀត គឺកាន់តែជួយជំរុញឱ្យហេដ្ឋារចនាសម្ព័ន្ធ នៅក្នុងខណ្ឌមួយនេះមានភាពល្អប្រសើរ ដែលក្រៅពីបង្កើនសោភ័ណភាព ថែមទាំងជួយសម្រួលដល់ចរាចរណ៍ប្រចាំថ្ងៃថែមទៀត។ តំបន់មួយដែលមានការអភិវឌ្ឍន៍ មានហេដ្ឋារចនាសម្ព័ន្ធល្អងាយស្រួលធ្វើដំណើរ គឺបានជំរុញឱ្យមានកំណើនលំនៅដ្ឋានកាន់តែច្រើន ក៏ដូចជាតំបន់ពាណិជ្ជកម្មផងដែរ ដែលទាំងអស់នេះសុទ្ធតែបង្កភាពល្អប្រសើរដល់ចរន្តទីផ្សារអចលនទ្រព្យទាំងអស់។

គម្រោងស្ពានឆ្លងកាត់ទន្លេ និងតភ្ជាប់ពីក្រុងរណបកោះពេជ្រ និងក្រុងរណបកោះនរាហ៍ មានទំហំធំជាងស្ពានដែលតភ្ជាប់ពីផ្លូវជាតិលេខ៥ ទៅក្រុងរណបជ្រោយចង្វារ។ ស្ពាននេះ ជាប្រភេទស្ពានយោងដោយខ្សែកាប មានប្រវែង ប្រមាណ៥០០ម៉ែត្រ និងទទឹង២៤,៥ម៉ែត្រ ដែលគ្រោងចំណាយពេលសាងសង់៣២ខែ ដោយប្រើថវិកាប្រមាណ៥០លានដុល្លារ ហើយស្ថាបត្យកម្មស្ពាននេះធ្វើឡើងតាមរចនាបថបែបខ្មែរ ។

តាមគម្រោង និងផែនការដែលបានគ្រោងទុក ការសម្ពោធបើកការដ្ឋានសាងសង់ អាចនឹងប្រព្រឹត្តទៅនៅត្រឹមចុងឆ្នាំ២០២០ខាងមុខ។ ស្ពាននេះក្រៅពីតភ្ជាប់រវាងទីក្រុងរណបទាំង២នេះ នឹងមានការតភ្ជាប់ជាមួយផ្លូវជាតិលេខ១ ដើម្បីអនុញ្ញាតឱ្យប្រជាពលរដ្ឋធ្វើដំណើរឆ្លងកាត់ កាត់បន្ថយវិបត្តិកកស្ទះចរាចរណ៍ ដែលតែងកើតមាននៅលើផ្លូវជាតិលេខ១ ជាពិសេសចំណុចស្ពានព្រះមុនីវង្សច្បារអំពៅ៕

Moody’s ព្យាករណ៍ថាសេដ្ឋកិច្ចកម្ពុជានឹងស្ទុះងើបឡើងវិញជិត៦,០ភាគរយនៅឆ្នាំក្រោយ

ដោយ ប៊ី

ភ្នំពេញៈ ប្រទេសកម្ពុជាមានការការពារដ៏រឹងមាំ ដើម្បីឆ្លើយតបនឹងការរំខានដល់ពាណិជ្ជកម្ម និងកំណើនដែលកើតឡើងពីជំងឺរាតត្បាត COVID-19 ។ នេះបើយោងតាមរបាយការណ៍របស់ភ្នាក់ងារស្រាវជ្រាវសេដ្ឋកិច្ចរបស់អាមរិក Moody’s Investors Service។

នៅក្នុងរបាយការណ៍មួយ ដែលត្រូវបានចេញផ្សាយនៅប្រទេសសឹង្ហបូរី កាលពីថ្ងៃសុក្រកន្លងមកនេះ ទីភ្នាក់ងារស្រាវជ្រាវសេដ្ឋកិច្ចរបសអាមេរិកនេះបានឱ្យដឹងថា ការធ្លាក់ចុះនៅក្នុងប្រទេសចិន សហភាពអឺរ៉ុប និងសហរដ្ឋអាមេរិក នឹងរារាំងទស្សនវិស័យកំណើនរបស់ប្រទេសកម្ពុជានៅឆ្នាំនេះ ដោយការព្យាករណ៍ GDP នឹងធ្លាក់ចុះរហូតដល់០,៣ភាគរយ។

ប៉ុន្តែផលិតផលសរុបក្នុងស្រុករបស់កម្ពុជា (GDP) បានព្យាករណ៍ថា នឹងស្ទុះងើបឡើងវិញជិត ៦,០ ភាគរយនៅឆ្នាំក្រោយ។

ភ្នាក់ងារ Moody’s បានឱ្យដឹងថា ទម្រង់ឥណទានចុងក្រោយបង្អស់របស់ប្រទេសកម្ពុជា បានឆ្លុះបញ្ចាំងពី “ទស្សនវិស័យកំណើនដ៏រឹងមាំ” របស់ប្រទេស ក៏ដូចជាបន្ទុកបំណុលដែលមានតម្លៃសមរម្យ និងមធ្យម។

ទោះបីអត្រាឆ្លងជំងឺមានកម្រិតក៏ដោយ ទីភ្នាក់ងារនេះបានឱ្យថា ការផ្ទុះជំងឺនេះនឹងជះឥទ្ធិពលដល់ការវិនិយោគ និងទេសចរណ៍នៅក្នុងប្រទេសកម្ពុជា ជាពិសេស ដោយសារមានទំនាក់ទំនងជិតស្និទ្ធជាមួយប្រទេសចិន។

លោកស្រី Anushka Shah អនុប្រធានភ្នាក់ងារ Moody និងជាអ្នកវិភាគជាន់ខ្ពស់ បានមានប្រសាសន៍ថា “ប្រទេសកម្ពុជាប្រឈមនឹងការធ្លាក់ចុះ ដោយសារមានទំនាក់ទំនងសេដ្ឋកិច្ចជាមួយនឹងប្រទេសចិនកិច្ចយ៉ាងទូលំទូលាយ” ។

លោកស្រី Shah បានកត់សម្គាល់ថា ប្រទេសចិនតំណាងឱ្យ៤៣ភាគរយ នៃការវិនិយោគផ្ទាល់ពីបរទេសរបស់ប្រទេសកម្ពុជា ខណៈដែលភ្ញៀវទេសចរចិនមានចំនួន៣៦ ភាគរយនៃភ្ញៀវទេសចរណ៍សរុបក្នុងឆ្នាំ ២០១៩ ។

របាយការណ៍ខាងលើ បានឱ្យដឹងទៀតថា ការធ្លាក់ចុះសេដ្ឋកិច្ចនៅសហភាពអឺរ៉ុប និងសហរដ្ឋអាមេរិក នឹងធ្វើឱ្យប៉ះពាល់ដល់តម្រូវការទំនិញកម្ពុជា ហើយរាល់ការធ្លាក់ចុះអាចបង្កហានិភ័យដល់ស្ថិរភាពសេដ្ឋកិច្ច និងហិរញ្ញវត្ថុ។

ទោះបីជាយ៉ាងណាក៏ដោយ ទីភ្នាក់ងារនេះបានវាយតម្លៃថា ទស្សនវិស័យទូទៅសម្រាប់ប្រទេសកម្ពុជាគឺមានស្ថេរភាព។

ចក្ខុវិស័យនេះ ធ្វើឱ្យមានតុល្យភាពលើភាពងាយរងគ្រោះ ចំពោះការប៉ះទង្គិច ដែលបណ្តាលមកពីការរំខាន ជាបណ្តោះអាសន្នក្នុងកំណើនសេដ្ឋកិច្ច ដុល្លាររូបនិយកម្មខ្ពស់ និងកំណើនឥណទានយ៉ាងឆាប់រហ័ស ដោយមានកត្តាបន្ធូរបន្ថយ ដូចជា សក្តានុពលកំណើនរឹងមាំ ការបង្កើតប្រាក់ចំណូលរបស់រដ្ឋាភិបាលរឹងមាំ និងលក្ខណៈសម្បទាន និងបំណុលរយៈពេលវែងរបស់រដ្ឋាភិបាល។

ការអនុវត្តការកែទម្រង់ ដែលធ្វើអោយប្រសើរឡើងនូវភាពទន់ខ្សោយស្ថាប័ន និងប្រសិទ្ធភាពគោលនយោបាយ នឹងឆ្ពោះទៅរកការធ្វើឱ្យប្រសើរឡើងនូវចំណាត់ថ្នាក់។

ម្យ៉ាងវិញទៀត ការធ្លាក់ចុះនៃឥណទានធនាគារ ដែលបណ្តាលឱ្យមានឥទ្ធិពលនៃការរីករាលដាលនៃសេដ្ឋកិច្ច នឹងនាំឱ្យមានសម្ពាធធ្លាក់ចុះដល់ចំណាត់ថ្នាក់ របស់ប្រទេស។ ការធ្លាក់ចុះជាបន្តនៃការវិនិយោគផ្ទាល់ពីបរទេស ក៏អាចប៉ះពាល់ដល់កំណើននិងសម្ពាធឥណទានផងដែរ៕ AKP