តើរដ្ឋាភិបាលបង្កើតក្រុមការងារសិក្សារៀបចំដោះស្រាយផលប៉ះពាល់ពីការរីករាលដាលនៃជំងឺ Covid -19 ដូចម្តេច?

ដោយ វុត្ថា

ភ្នំពេញ៖ រដ្ឋាភិបាលកម្ពុជា បានសម្រេចបង្កើតក្រុមការងារបច្ចេកទេសចម្រុះចំពោះកិច្ច សិក្សារៀបចំដាក់ចេញនូវកញ្ចប់វិធានការខាងរូបិយវត្ថុ និងធនាគារ ដើម្បីគ្រប់គ្រង និងដោះស្រាយ ផលប៉ះពាល់ពីការរីករាលដាលនៃជំងឺ Covid-19 និងការព្យួរប្រព័ន្ធអនុ គ្រោះពន្ធលើមុខទំនិញមួយចំនួន ក្នុងក្របខណ្ឌ”ទំនិញគ្រប់យ៉ាងលើកលែង តែសព្វាវុធ (EBA)”។

យោងតាមសេចក្តីសម្រេច ដែលចុះហត្ថលេខាដោយ លោកឧបនាយករដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុកាលដែលបានផ្សព្វផ្សាយនៅថ្ងៃទី៥ ខែមេសា ឆ្នាំ២០២០ កន្លងមកនេះបានឱ្យដឹងថា ក្រុមការងារបច្ចេកទេសចម្រុះ ចំពោះកិច្ចនេះមានសមាសភាព៨រូប មកពីក្រសួងសេដ្ខកិច្ច និងហិរញ្ញវត្ថុ៤រូប និងធនាគារជាតិ នៃកម្ពុជា៤រូប ដោយផ្តោតលើការសិក្សា និងវាយតម្លៃ សាភាពការណ៍នៃវិស័យសេដ្ឋកិច្ច និងហិរញ្ញវត្ថុ ដែលប៉ះពាល់ដោយជំងឺកូវីដ-១៩ និងការព្យួរ EBA។

ធនាគារអភិវឌ្ឍន៍អាស៊ី (ADB) កាលពីពេលថ្មីនេះ បានចេញរបាយការណ៍របស់ខ្លួនដោយបានព្យាករណ៍ថា កំណើនសេដ្ឋកិច្ចកម្ពុជានៅឆ្នាំ២០២០ នឹងធា្លក់នៅត្រឹម២,៣ភាគរយ ដោយសារតែការរីករាលដាលជាកលនៃជំងឺ COVID-19 ក្នុងនិងក្រៅប្រទេស ។

លោកស្រី Sunniya Durrani-Jamal នាយិកា ADB ប្រចាំកម្ពុជា និយាយថា ក្នុងឆ្នាំ២០២០ វិស័យធំៗដែលជំរុញកំនើនសេដ្ឋកិច្ចកម្ពុជាបានធា្លក់ចុះ ស្ទើគ្រប់វិស័យដោយសារតែវិបត្តិសកលលោកនៃមេរោគ COVID-19 ។ ក្នុងនោះផ្នែកសេវាកម្មរបស់កម្ពុជា នឹងធ្លាក់ចុះប្រមាណ១,៧ភាគរយ ដោយសារឱនភាពវិស័យទេសចរ និងការថមថយនៃកំនើនអចលនទ្រព្យ។

រីឯកំណើនវិស័យឧស្សាហកម្ម នឹងចុះដល់៦,៥ភាគរយ ដោយសារកម្រិតទាប នៃផលិតកម្ម សម្លៀកបំពាក់ សម្រាប់ការនាំចេញ ក៏ដូចជាវិស័យសំណង់ដែលបន្ថយល្បឿន។ ការធ្លាក់នៃកំនើនតាមវិស័យនីមួយៗនេះ នឹងនាំឲ្យកម្ពុជាដែលជាប្រទេសមានសន្ទុះសេដ្ឋកិច្ចខ្លាំងក្នុងពីរទសវត្សរ៍(២០ឆ្នាំ) ចុងក្រោយនេះ មានកំណើនសេដ្ឋកិច្ចជាតិនៅត្រឹម២,៣ភាគរយសម្រាប់ឆ្នាំ២០២០ ។

យ៉ាងណាក៏ដោយតាមការព្យាករណ៍ និងការរំពឹងទុករបស់ ADB បានឲ្យដឹងថា សេដ្ឋកិច្ចកម្ពុជានឹងហត់ឡើងវិញ ដល់កម្រិត៥,៧ភាគរយក្នុងឆ្នាំ២០២១ ប្រសិនបើការរាតត្បាតនៃជំងឺ Covid-19 ត្រូវបញ្ចប់ ហើយសកម្មភាពសេដ្ឋកិច្ច នឹងវិលមករកភាពប្រក្រតីវិញ តាមរយៈការចាក់វិធានការនានាជាបន្តបន្ទាប់របស់រដ្ឋាភិបាលកម្ពុជា។

សម្តេចតេជោ ហ៊ុន សែន នាយកដ្ឋមន្ត្រីនៃកម្ពុជាធ្លាប់បានមានប្រសាសន៍ថា សេដ្ឋកិច្ចកម្ពុជាបានទទួលរងនូវផលប៉ះពាល់ ដោយសារការរាតត្បាត Covid-19 ជាពិសេសលើវិស័យទេសចរណ៍ និងឧស្សាហកម្មផ្សេងៗផងដែរ តែមិនមែនរងផលប៉ះពាល់ដោយសារតែការព្យួប្រព័ន្ធអនុគ្រោះពន្ធ EBA របស់គណៈកម្មការសហភាពអឺរ៉ុបនោះទេ។

សម្តេចបន្តថា “ការព្យួរផ្នែកខ្លះនៃប្រព័ន្ធអនុគ្រោះព័ន្ធ EBA របស់សហភាពអឺរ៉ុប យូនិងឆាប់គង់តែកាត់បាត់ទាំងអស់ ហើយជាមួយគ្នានេះ យើងក៏មានលទ្ធភាពបង់ពន្ធ ដែលតាមការប៉ាន់ស្មាន គឺប្រមាណ១០០លានដុល្លារក្នុងមួយឆ្នាំ។ សម្តេចបន្ថែមថា “យើងមិនយកអធិតេយ្យភាពកម្ពុជា ដោយារផ្តល់ជំនួយណាមួយនោះឡើយ។

យ៉ាងណាក៏ដោយ ប្រមុខរាជរដ្ឋាភិបាលរូបនេះកាលពីកន្លងមកនេះ បានដាក់ចេញនូវវិធានការផ្សេងៗជាច្រើន ដើម្បីស្រោចស្រងសេដ្ឋកិច្ចកម្ពុជា ក្នុងកាលៈទេសៈនៃការរីករាលដាលជាសកល នៃជំងឺ Covid-19 ទៅលើសណ្ឋាគារ រោងចក្រកាន់ដេរ សហគ្រាសធុនតូច និងមធ្យមជាដើម៕

ចំណេះដឹង! តើឯកសារអ្វីខ្លះត្រូវបំពេញដើម្បីសុំលិខិតអនុញ្ញាតសាងសង់

ដោយ វុត្ថា

ភ្នំពេញ៖ អ្នកសាងសង់ដែលមានបំណងសាងសង់ ត្រូវមកយកទម្រង់បែបបទ និងបំពេញឲ្យបានត្រឹមត្រូវ ដែលអនុលោមទៅតាមច្បាប់សំណង់របស់ កម្ពុជាដែលបានកំណត់។

សម្រាប់អ្នកដែលរស់នៅទីក្រុងភ្នំពេញ អាចទៅសុំច្បាប់ និងដាក់ពាក្យសាងសង់នៅមន្ទីររៀបចំដែនដី នគរូបនីយកម្មសំណង់ និងសុរិយោដីរាជធានីភ្នំពេញ ព្រមជាមួយនឹងក្រសួងរៀបចំដែនដី នរគរូបនីយកម្ម និងសំណង់។

សំណួរ តើអ្នកណាអាចមានសិទ្ធិស្នើសុំលិខិតអនុញ្ញាតសាងសង់បាន?

ចម្លើយ.១. រាល់ការស្នើសុំលិខិតអនុញ្ញាតសាងសង់ លិខិតអនុញ្ញាតសាងសង់ពង្រីកបន្ថែម លិខិតអនុញ្ញាតជួសជុល លិខិតអនុញ្ញាតបើកការដ្ឋាន និងលិខិតបិទការដ្ឋាន តម្រូវឱ្យដាក់ពាក្យស្នើសុំដោយម្ចាស់គម្រោង។ អ្នកតំណាងស្របច្បាប់អាចជំនួសម្ចាស់គម្រោង ក្នុងការដាក់ពាក្យស្នើសុំលិខិតអនុញ្ញាតទាំងនោះបាន។

សំណួរៈតើការសាងសង់ប្រភេទណាខ្លះ ដែលមិនចាំបាច់ស្នើសុំលិខិតអនុញ្ញាតសាងសង់?

ចម្លើយៈ រាល់ការអភិវឌ្ឍអចលនវត្ថុ (ការសាងសង់) គ្រប់ប្រភេទតម្រូវឱ្យស្នើសុំលិខិតអនុញ្ញាតជាមុន លើកលែងតែការសាងសង់ថ្មី ឬការជួសជុលលំនៅឋានតូចតាចនិងពុំមានលក្ខណៈជាការធ្វើពាណិជ្ជកម្ម ដែលស្ថិតនៅទីជនបទឬតំបន់ឆ្ងាយពីផ្លូវជាតិ ផ្លូវដែក និងឆ្ងាយពីតំបន់រមណីយដ្ឋានទេសចរណ៍ តំបន់បេតិកភ័ណ្ឌជាតិ តំបន់រក្សាទុកការពារ។

សំណួរ តើការសាងសង់ចំណតរថយន្ត ឬចំណតម៉ូតូដែលប្រក់ដំបូលនៅក្នុងបរិវេណក្រុមហ៊ុន ឬរោងចក្រចាំបាច់ត្រូវមានលិខិតអនុញ្ញាតសាងសង់ជាមុនដែរឬទេ?

ចម្លើយៈ រាល់ការសាងសង់ចំណតរថយន្ត ឬចំណតម៉ូតូដែលប្រក់ដំបូល នៅក្នុងបរិវេណក្រុមហ៊ុន ឬរោងចក្រដែលមានលិខិតអនុញ្ញាតសាងសង់រួចហើយ មិនតម្រូវឱ្យស្នើសុំលិខិតអនុញ្ញាតសាងសង់ទេ លើកលែងតែការសាងសង់នោះ ធ្វើឱ្យប៉ះពាល់ដល់រចនាសម្ព័ន្ធសុវត្ថិភាពគ្រឿងផ្គុំសំណង់ សណ្តាប់ធ្នាប់សាធារណៈ ឬខុសពីការកំណត់នៃគម្លាតអប្បបរមា កំណត់ដោយបទប្បញ្ញតិ្តជាធរមាន ដែលចាំបាច់ត្រូវស្នើសុំលិខិតអនុញ្ញាតសាងសង់បន្ថែម។

សំណួរ តើស្ថាប័នណាខ្លះមានសមត្ថកិច្ចក្នុងការចេញលិខិតអនុញ្ញាតសាងសង់?

ចម្លើយៈ សមត្ថកិច្ចក្នុងការចេញលិខិតអនុញ្ញាត មានបីថ្នាក់ ៖ ក. ថ្នាក់ក្រុង ស្រុក ខណ្ឌ ចំពោះសំណង់ដែលមានផ្ទៃក្រឡាកម្រាលសំណង់ សរុបតូចជាងឬស្មើ៥០០ម៉ែត្រក្រឡា។ ខ. ថ្នាក់រាជធានី ខេត្ត ចំពោះសំណង់ដែលមានផ្ទៃក្រឡា កម្រាលសំណង់សរុបធំជាង៥០០ម៉ែត្រក្រឡា ដល់៣.០០០ ម៉ែត្រក្រឡា។

គ. ថ្នាក់ក្រសួងរៀបចំដែនដី នគរូបនីយកម្ម និងសំណង់ ចំពោះសំណង់ដែលមានផ្ទៃក្រឡាកម្រាលសំណង់សរុបធំជាង៣.០០០ម៉ែត្រក្រឡា និងគ្រប់សំណង់ស្ថានីយប្រេងឥន្ធនៈ៕

បុរី ប៉េង អុីម ផ្តល់ជូននូវការបញ្ចុះតម្លៃ២ម៉ឺនដុល្លារជាមួយនឹងផ្ទះអាជីវកម្មបែបទំនើបជាង២០០ខ្នង

ដោយៈ រ៉ាណេត

ភ្នំពេញៈ ជាការអបអរសាទរ ក្នុងឱកាសពិធីបុណ្យចូលឆ្នាំថ្មី ប្រពៃណីជាតិខ្មែរខាងមុខនេះ ក្រុមហ៊ុនអភិវឌ្ឍន៍លំនៅដ្ឋានបែបទំនើប និងទាន់សម័យ បុរីប៉េង អុីម បានផ្តល់ជូននូវកម្មវិធីពិសេសមិនធ្លាប់មាន ដោយផ្តល់ជូនការបញ្ចុះតម្លៃរហូតដល់២ម៉ឺនដុល្លារ បន្ថែមពីលើការដូយ៉ាងសន្ធឹកសន្ធាប់ រួមមានគ្រឿងបរិក្ខា និងសម្ភារៈប្រើប្រាស់ក្នុងលំនៅដ្ឋានជាច្រើនទៀត។

នាយកប្រតិបត្តិក្រុមហ៊ុន Great Cam Asia Real Estate លោក ស បញ្ញា បានមានប្រសាសន៍ឲ្យដឹងតាមទូរស័ព្ទកាលពីល្ងាចថ្ងៃទី៣ មេសាកន្លងមកថា គម្រោងអភិវឌ្ឍន៍បុរីលំនៅដ្ឋានបែបទំនើប និងទាន់សម័យ ប៉េង អុីម (Borey Peng Im) ស្ថិតនៅតំបន់ព្រៃស ដែលកំពុងមានការអភិវឌ្ឍយ៉ាងលឿន នៅប៉ែកខាងត្បូងរាជធានីភ្នំពេញនេះ មានចំនួនសរុប៣៣០ខ្នង ដែលសុទ្ធតែធានាបាននូវសំណង់គុណភាពខ្ពស់ ព្រោះគ្រប់សម្ភារៈសំណង់ សុទ្ធតែជាផលិតផលរបស់ក្រុមហ៊ុន SCG។

លោកបន្តទៀតថា “ ជាមួយនឹងភាពល្អប្រសើរ និងសក្ដានុពលនៅក្នុងតំបន់ព្រៃស គម្រោងបុរី ប៉េង អុីម ដែលទើបតែបើកសម្ពោធលក់កាលពីថ្ងៃទី២៧ ខែមីនា ឆ្នាំ២០២០កន្លងទៅនេះ ទទួលបានការចាប់អារម្មណ៍ និងគាំទ្រពីសំណាក់អតិថិជនយ៉ាងច្រើនគួរជាទីមោទនៈ ជាពិសេសមានការស្ញប់ស្ញែង ទៅនឹងម៉ូដលំនៅដ្ឋានដ៏ស្រស់ស្អាត ប្លែកគេ មិនធ្លាប់មានពីមុនមក”។

ជាការថ្លែងអំណរគុណចំពោះអតិថិជន ដែលមានបង្ហាញពីការចាប់អារម្មណ៍គាំទ្រមកលើគម្រោង ជាពិសេស ជាការអបអរសាទរ នៅក្នុងឱកាសពិធីបុណ្យចូលឆ្នាំថ្មី ប្រពៃណីជាតិខ្មែរខាងមុខនេះ ក្រុមហ៊ុនអភិវឌ្ឍន៍លំនៅដ្ឋានបុរី ប៉េង អុីម បានផ្ដល់ជូននូវកម្មវិធីដ៏អស្ចារ្យ និងភ្ញាក់ផ្អើលបំផុត ដោយការបញ្ចុះតម្លៃរហូតដល់២ម៉ឺនដុល្លារ បន្ថែមពីលើកាដូយ៉ាងសន្ធឹកសន្ធាប់ ដូចជាគ្រឿងបរិក្ខា និងសម្ភារៈប្រើប្រាស់ក្នុងផ្ទះជាច្រើនទៀត ជាពិសេសមានបំពាក់ជណ្ដើរយន្តប្រអប់ នៅក្នុងលំនៅដ្ឋាន ដែលកាន់តែបង្ហាញពីភាពទាន់សម័យថែមទៀតផង។

គម្រោងរបស់បុរី លំនៅដ្ឋានបែបទំនើប ប៉េង អុីម ដែលមានទីតាំងដ៏ល្អ ផ្ដល់ផាសុកភាពខ្ពស់ក្នុងការរស់នៅ និងផ្តល់ភាពងាយស្រួលក្នុងការប្រកបអាជីវកម្ម ដែលចំណាយពេលធ្វើដំណើរត្រឹម១៥នាទីពីផ្សារទំនើប AEON3 ត្រូវបានសាងសង់ជាលំនៅ ដ្ឋានជា៣ ប្រភេទ ដែលក្នុងនោះរួមមានដូចជា ប្រភេទផ្ទះអាជីវកម្មចំនួន២០៦ខ្នង ស្ថិតនៅជាប់ផ្លូវធំ៣០ម៉ែត្រ និងមានទំហំ ៤.១ x ២២.៥ ម៉ែត្រ មានកម្ពស់រហូតដល់៤ជាន់ និងមានបំណាក់ជណ្ដើរយន្តប្រអប់រួចជាស្រេច។

ដោយឡែកក្រៅពីនេះ គឺជាប្រភេទផ្ទះវីឡាភ្លោះ និងវីឡាកូនកាត់ ស្ថិតនៅព័ទ្ធជុំវិញផ្សារទំនើបដែលអភិវឌ្ឍន៍ឡើង ដោយក្រុមហ៊ុនផ្ទាល់ នៅលើផ្ទៃដីទំហំ៣៨០០ម៉ែត្រការ៉េ។

ចំពោះល័ក្ខខ័ណ្ឌ នៃការទិញលំនៅដ្ឋានបែបទាន់សម័យ និងស៊ីវិល័យក្នុងបុរី ប៉េង អុីម (Borey Peng Im) រាល់អតិថិជនទាំងអស់មានជម្រើសជាច្រើន ដូចជា ការទិញដោយការបង់ផ្ដាច់ បង់ជាដំណាក់កាល និងការបង់រំលោះជាមួយធនាគារ នៅក្នុងអត្រាការប្រាក់ទាបក្នុងរយៈពេលយូរ ហើយមានឱកាសទទួលបានចំណេញជាច្រើនទៀត នៅថ្ងៃខាងមុខ។

រួសរាន់ឡើង អ្នកមកមុនមានឱកាសរើសបានទីតាំងល្អមុនគេ ចំនួនមានកំណត់។ សម្រាប់ព័ត៌មានបន្ថែម សូមទាក់ទងតាមរយៈទូរស័ព្ទលេខ ៖ ០៨១ ៥៥៥ ១៦៤ / ០៧៦ ៧៩ ៧៧ ៧៧៨៕

CPA Café នឹងបើកដំណើរការនៅថ្ងៃច័ន្ទសប្តាហ៍ក្រោយជាមួយរសជាតិកាហ្វេ ធម្មជាតិដ៏ឈ្ងុយឆ្ងាញ់

ដោយគង់់ សូរិយា

ភ្នំពេញៈ ផ្តោតលើគុណភាពកាហ្វេ និងសុខភាពអតិថិជនជាចម្បង CPA Cafeនឹង

បើកដំណើរការនៅថ្ងៃច័ន្ទ សប្តាហ៍ក្រោយនេះ ជាមួយនឹងរសជាតិកាហ្វេធម្មជាតិ និងការផ្តល់សេវាកម្មរួសរាយរាក់ទាក់ ពិសេសហាងកាហ្វេនេះ នឹងមានសេវាកម្មប្រឹក្សាយោបល់ ទាក់ទងការចាប់ផ្តើមអាជីវកម្ម និងការវិនិយោគលើវិស័យអចលនទ្រព្យផងដែរ។

ហាងកាហ្វេនេះ បាននិងកំពុងរៀបចំយ៉ាងសកម្ម ដែលមានទីតាំងស្ថិតននៅតាមបណ្តោយផ្លូវលេខ២៧១ (ចំងាយប្រមាណ២០០ម៉ែត្រ ពីច្រកចូលក្លោងទ្វារចូលវត្តសន្សំកុសល)ស្ថិតក្នុងសង្កាត់បឹងទំពុនទី២ ខ័ណ្ឌមានជ័យ រាជធានីភ្នំពេញ។

ជាមួយនឹងការផ្តល់រសជាតិកាហ្វេជាប់ចិត្ត គ្មានជាតិគីមី និងបរិយាកាសដ៏មនោរម្យ CPA Cafe នឹងមានរៀបចំបន្ទប់VIP សំរាប់អ្នកទទួលទានកាហ្វេ អាចជួបប្រជុំជាមួយអតិថិជន ឬកិច្ចប្រជុំពិភាក្សាការងារផ្សេងៗផងដែរ។ ជាមួយនឹងដំណើរការបើកលក់ជាលើកដំបូងនេះ CPA Cafeនឹងផ្តល់ការបញ្ចុះតម្លៃ២០ភាគរយផងដដែរ។

អ្វីកាន់តែពិសេស ហាងកាហ្វេនេះក៏មានអ្នកជំនាញអចលនទ្រព្យ និងម្ចាស់អាជីវកម្មលំដាប់ជាតិ អន្តរជាតិអាចផ្តល់សេវាកម្មប្រឹក្សា យោបល់ពីការចាប់ផ្តើមអាជីវកម្មពីការស្វែងរកសេវាប្រឹក្សាយោបល់ទាក់ទងអាជីវកម្ម ភាពជាភ្នាក់ងារអចលនទ្រព្យ ពិសេសការវិនិយោគលើវិស័យសំណង់ និងអចលនទ្រព្យដល់អតិថិជនផងដែរ។

ភ្លក់រសជាតិកាហ្វេឈ្ងុយឆ្ងាញ់ជាប់ចិត្ត ជាមួយសេវាកម្មដ៏ប្រសើរ លោក អ្នកក៏មានឳកាសចាប់ផ្តើមសិក្សារៀនសូត្រ ដើម្បីចាប់ផ្តើមអាជីពជាភ្នាក់ងារ ជាអ្នកវិនិយោគអចលនទ្រព្យ និងអាជីវកម្មនានាផងដែរ៕

អាងហែលទឹក Crystal លំដាប់ពិភពលោក នឹងបង្ហាញវត្តមានជាលើកដំបូងនៅតំបន់រាម ខេត្តព្រះសីហនុ

ដោយ ៖ រ៉ាណេត

ព្រះសីហនុៈ តំបន់ឆ្នេររាម នៃខេត្តព្រះសីហនុ នឹងកាន់តែមានសក្ដានុពល និងសោភណភាពដ៏ទាក់ទាញបំផុតនៃតំបន់ឆ្នេរ ជាមួយនឹងគម្រោងអភិវឌ្ឍន៍ដ៏មហិមារ ថ្មីមួយដែលមានឈ្មោះថា Crystalville Ream Beach ក្រោមទុនវិនិយោគសរុបប្រមណ ១០០០លានដុល្លារ ដោយមានវត្តមានអាងទឹកគ្រីស្តាលលំដាប់ពិភពលោកលើកដំបូងនៅក្នុងតំបន់ផងដែរ។

អាងទឹកសិប្បនិម្មិត បែបអច្ឆរិយៈគ្រីស្តាលលំដាប់ពិភពលោកមួយនេះ មានទំហំ ហិកតា ក្រោមការសាងសង់យ៉ាងវិចិត្រពីសំណាក់អ្នកជំនាញមកពីស៊ីងហ្គាពួរ នឹងលេចចេញជារូរាងនៅចំកណ្តាលគម្រោងអភិវឌ្ឍន៍ Crystal Ville Ream Beach នៅតំបន់ឆ្នេររាម ខេត្តព្រះសីហនុ។

នាយិកាគ្រប់គ្រងផ្នែកលក់គម្រោងវីឡាបែបលំហែរកាយ និងប្រណីតភាពលើកដំបូងនៅតំបន់ឆ្នេរសមុទ្ររាម ដែលស្ថិតនៅក្នុងគម្រោង Crystalville Ream Beach កញ្ញា លីម សុខាដាវីន បានបង្ហើបប្រាប់ឱ្យដឹងកាលពីពេលថ្មីៗនេះថា អាងទឹកដ៏អស្ចារ្យនេះ នឹងក្លាយជានិមិត្តរូបនៅក្នុងគម្រោងអភវឌ្ឍន៍រួមដែលមានតម្លៃវិនិយោគសរុបប្រមាណ ១០០០លានដុល្លារ ដោយត្រូវបានរៀបចំ ជាដំណាក់កាលលើការអភិវឌ្ឍ។

កញ្ញាបានបន្តថា “នៅក្នុងគម្រោងនេះ មានការអភិវឌ្ឍលំនៅដ្ឋានប្រភេទជាវីឡាបែបលំហែរ និងកម្សាន្តកម្រិតអភិជននេះ ដែលជាការវិនិយោគរួមគ្នារវាងក្រុមហ៊ុនក្នុងស្រុកFURI Corporation និងក្រុមហ៊ុនវិនិយោគអចនទ្រព្យដ៏ធំមកពីសាំងហ្គាពួរ គឺជាផ្នែកមួយក្នុងគម្រោងCrystalville Ream Beach”។ កញ្ញាបានបន្តទៀតថា “គម្រោងលំនៅដ្ឋានប្រភេទវីឡាលំហែរកាយនេះ ក្នុងដំណាក់ដំបូង គឺមានត្រឹមតែ១០០ខ្នងតែប៉ុណ្ណោះ រួមជាមួយនឹងគម្រោងអភិវឌ្ឍន៍អាងហែលទឹកគ្រីស្តាលដ៏ប្រណីត និងលើកដំបូងប្រចាំតំបន់ (Crystal Swimming Pool) ដែលមានទំហំរហូតដល់៦ហិកតានៅចំកណ្តាល ដែលជាភាពទាក់ទាញពីបណ្តាមនុស្សនានាចម្រុះជាតិសាសន៍ជាច្រើន”។

សំណង់វីឡាប្រណីត បែបលំហែរកាយ ដែលនឹងត្រូវបានអភិវឌ្ឍន៍នៅក្នុងគម្រោងនេះ គឺមានលក្ខណៈខុសប្លែកពីគម្រោងទូទៅ ដោយសារតែក្រុមហ៊ុនវិនិយោគ និងអភិវឌ្ឍន៍ផ្តោតសំខាន់ទៅលើភាពច្នៃប្រឌិត បង្កើតសោភ័ណភាពស្រស់ស្អាត និងប្រណីតភាព ស័ក្ដិសមទៅនឹងប្រភេទវីឡាស្នាក់នៅបែបលំហែរកាយនៅតំបន់ឆ្នេរសមុទ្រជិតឧទ្យានជាតិរាម ខេត្តព្រះសីហនុ។ អ្វីដែលរឹតតែអស្ចារ្យ និងជាភាពទាក់ទាញនៅក្នុងគម្រោងមួយនេះ ក្រៅតែពីជាវីឡាសម្រាប់ស្នាក់នៅលំហែរកាយ គឺនៅមានភាពអស្ចារ្យជាច្រើនទៀត ក្រោមគំនិតច្នៃប្រឌិតរបស់អ្នកជំនាញមកពីសាំងហ្គាពួរ ដោយគ្រប់វីឡាទាំងអស់សុទ្ធតែមានអាងហែកទឹកនៅពីមុខ ត្រូវតាមក្បួនហុងស៊ុយជនជាតិចិន មានកន្លែងអង្គុយសម្រាកលេង ឬដេកហាលកំដៅថ្ងៃនាតំបន់សមុទ្រ មានតំបន់ម្លប់ឈើបៃតងនៅព័ទ្ធជុំវិញ ហើយនៅលើដំបូលក៏មានកន្លែងអង្គុយលេង ឬទទួលទានអាហារលក្ខណៈគ្រួសារផងដែរ។

នៅក្នុងគម្រោង Crystalville Ream Beach ត្រូវបានរៀបចំអភិវឌ្ឍន៍នៅលើផ្ទៃដីតំបន់ឆ្នេរសមុទ្ររាម ខេត្តព្រះសីហនុ ទំហំសរុបប្រមាណ៤៣ ហិកតា ដោយត្រូវបានចែកចេញជា ៣ដំណាក់កាលក្នុងការសាងសង់។ ដំណាក់កាលទី១ ក្រុមហ៊ុននឹងសាងសង់លំនៅដ្ឋានបែបលំហែរកាយចំនួន១០០ខ្នង (មាន៣ប្រភេទ វីឡាលំហែរកាយ, វីឡាឆ្នេរខ្សាច់ និងវីឡាកោងកាង) ចំណាយពេលត្រឹម២ឆ្នាំ ។ ដំណាក់ទី២ នឹងចាប់ដំណើរការសាងសង់អាងហែលទឹកគ្រីស្ទាល់ (Crystal Swimming Pool) ដែលមានទំហំរហូតដល់៦ហិកតា ក្រោមជំនាញរបស់ក្រុមហ៊ុនមកពីសាំងហ្គាពួរ ហើយក៏ជាលក្ខណៈពិសេសដែលស្ថិតនៅចំកណ្តាលគម្រោង Crystalville Ream Beach ផងដែរ។ ដោយឡែកដំណាក់ទី៣ ក្រុមហ៊ុននឹងចាប់ផ្តើមសាងសង់សំណង់អគាមជ្ឈមណ្ឌលពាណិជ្ជកម្ម ដែលរួមមាន ខុនដូ អាផាតមិន សណ្ឋាគារកម្រិតផ្កាយ៥ រួមជាមួយនឹងផ្សារទំនើប ដែលផ្តោតសំខាន់ទៅសេវាចំណីអាហារ និងសម្ភារៈប្រើប្រាស់ប្រចាំគម្រោងផងដែរ៕

ក្រសួងការបរទេសប្រកាសផ្តល់ទិដ្ឋាការស្វ័យប្រវត្តិដល់ទេសចរដែលជាប់នៅកម្ពុជាដោយសារជំងឺកូវីដ ១៩

ដោយវុត្ថា

ភ្នំពេញ៖ ក្រសួងការបរទេស និងសហប្រតិបត្តិការអន្តរជាតិ បានប្រកាសផ្តល់ទិដ្ឋាការស្វ័យប្រវត្តិដល់ភ្ញៀវទេសចរណ៍ទាំងអស់ដែលជាប់គាំងនៅក្នុងប្រទេសកម្ពុជាដែលមិនអាចចាក់ចេញ ដោយសារការរីករាលដាលជាសកលនៃជំងឺកូវីដ ១៩។

យោងតាមសេចក្តីជូនដំណឹងរបស់ក្រសួងការបរទេស និងសហប្រតិបត្តិការអន្តរជាតិចេញផ្សាយនៅថ្ងៃទី ៤ខែមេសា ឆ្នាំ ២០២០ នេះ បានឱ្យដឹងថា ភ្ញៀវទេសចរណ៍ដែលមកដល់កម្ពុជាបន្ទាប់ពីថ្ងៃទី ១ ខែមករា ឆ្នាំ ២០២០ ហើយមិនអាចត្រឡប់ទៅកាន់ប្រទេសកំណើតខ្លួនវិញបាន និង ដោយសាគ្មានជើងយន្តហោះនោះ ។

រាជរដ្ឋាភិបាលកម្ពុជា សម្រេចផ្តល់ពន្យាទិដ្ឋាការទេសចរណ៍ដោយស្វ័យប្រវត្តិ (Visa T) ចាប់ពីថ្ងៃទី ៣ ខែមេសា ឆ្នាំ ២០២០ បានដោយមិនត្រូវបានផាក់ពិន័យដល់ការស្នាក់នៅក្នុងប្រទេសកម្ពុជាហួសកាលកំណត់នោះទេ រហូតដល់មានលទ្ធភាពចាកចេញពីប្រទេសកម្ពុជា។

តាមសារព័ត៌មានជាច្រើនចុះផ្សាយថា ក្រុមហ៊ុនអាសចរណ៍ជាច្រើនត្រូវបានប្រកាសផ្អាកជើងហោះហើររបស់ខ្លួនមកកាន់កម្ពុជា និងទៅកាន់ពិភពលោកដោយសារមានការព្រួយបារម្ភពីការរីករាលដាលជាសកលនៃជំងឺផ្លូវដង្ហើមថ្មី កូវីដ ១៩ ។

ជាមួយគ្នានេះដែរ ក្នុងរយៈពេលប៉ុន្មានសប្តាហ៍កន្លងមកនេះ មានរដ្ឋាភិបាលបារំាង ស្វីស ម៉ាឡេស៊ី និងបណ្តារដ្ឋាភិបាលផ្សេងទៀងទាំងនៅក្នុងតំបន់ និងអឺរ៉ុប បានស្នើសុំកិច្ចសហការជាមួយរដ្ឋាភិបាលកម្ពុជាបញ្ជូនជើងយន្តហោះពិសេសមកដឹកពលរដ្ឋខ្លួនដែលជាប់គាំងចេញពីប្រទេសកម្ពុជាដោយសារតែមានការព្រួយបារម្ភពីការរីករាលដាលនៃជំងឺកូវីដ ១៩ ៕

អ្នកជំនាញអចលនទ្រព្យម៉ាឡេស៊ីណែនាំប្រជាជនឱ្យជួយទិញអចលនវត្ថុ ខណៈការលក់ដាំក្បាលចុះ

ដោយ ហ្សូលី

ភ្នំពេញៈ បន្ទាប់ពីរងផលប៉ះពាល់សេដ្ឋកិច្ចនៅក្នុងប្រទេសម៉ាឡេស៊ី ក្រុមហ៊ុន Knight Frank Malaysia ដែលជាក្រុមហ៊ុនអចលនទ្រព្យ ផ្តោតលើការជួលនិងវិនិយោគការិយាល័យពាណិជ្ជកម្ម អំពាវនាវដល់វិនិយោគិនឱ្យជួយវិនិយោគ ខណៈសកម្មភាពទិញលក់មានអត្រាទាប។

ទាំងក្រុមហ៊ុនក្នុងស្រុក និងក្រុមហ៊ុនចម្រុះជាតិសាសន៍ បានពន្យារពេលធ្វើសេចក្តីសម្រេចចិត្ត លើអចលនទ្រព្យរបស់ពួកគេ ដែលជាហេតុធ្វើឱ្យសកម្មភាពជួលមានកម្រិតទាបជាងមុន។ អាជីវកម្មស្ថិតនៅក្នុងកម្រិតទាបបំផុត ដោយប្រតិបត្តិការជាច្រើនបានរងផលប៉ះពាល់យ៉ាងធ្ងន់ធ្ងរ ដោយសារការផ្ទុះឡើងនៃវីរុសកូរ៉ូណា។

យោងតាមលោក James Buckley នាយកប្រតិបត្តិទីផ្សារមូលធនរបស់ Knight Knight បានអោយដឹងថា ក្នុងអំឡុងពេលមានអស្ថិរភាពសេដ្ឋកិច្ច ប្រតិបត្តិការទិញលក់អចលនទ្រព្យមានចំនួនតិចតួច។ ដំណើរការស្វែងរកប្រាក់ចំណេញ អាចត្រូវបានរំខានដោយឥទ្ធិពលនៃការផ្ទុះឡើង Covid-19 ដោយសារតែវិនិយោគិន នៅតាមស្ថាប័នមានការប្រុងប្រយ័ត្នជាងមុន។

នៅក្នុងផ្នែកលក់រាយ ការជួលស្ថិតនៅក្រោមសម្ពាធបន្ថែមទៀត ដោយសារតែការអនុវត្តបទបញ្ជាបញ្ជាចលនា Movement Control Order (MCO) រហូតដល់ថ្ងៃទី ១៤ ខែមេសាឆ្នាំ២០២០ ។

លោក Buckley បានបន្តថា អ្នកលក់ពិតប្រាកដនឹងពិចារណាកាត់បន្ថយតម្លៃរបស់ពួកគេ ជំរុញឱ្យមានតួលេខការលក់ឡើងខ្ពស់។ វិនិយោគិនក្នុងស្រុក ក៏គួរតែពិចារណាពីអត្ថប្រយោជន៍ នៃការវិនិយោគដើមទុនមួយចំនួន របស់ពួកគេនៅក្នុងទីផ្សារអចលនទ្រព្យដែលនឹងផ្តល់ភាពប្រាក់ចំណេញពីការទិញនាពេលអនាគត។

លោកបន្តថា “ដូច្នេះអ្នកវិនិយោគគួរបោះជំហានទៅមុខ ធ្វើចរន្តទិញលក់មានសកម្មភាព ដើម្បីជួយដល់អ្នកលក់រាយដោយណែនាំនូវវិធានការណ៍សង្គ្រោះ។

ជាមួយនឹងការកាត់បន្ថយការជួល និងសកម្មភាពវិនិយោគការិយាល័យពាណិជ្ជកម្ម និងការជួល លក់រាយនឹងស្ថិតនៅក្រោមសម្ពាធបន្ថែមទៀតក្នុងរយៈពេលខ្លី។

Covid-19 កំពុងរាតត្បាតសេដ្ឋកិច្ចរបស់ប្រទេសទាំងមូល ក្នុងនោះវិស័យឧស្សាហកម្មទាំងអស់ ត្រូវបានរវាយប្រហារខ្លាំងជាងគេ។ ជាក់ស្តែង ផ្នែកបដិសណ្ឋារកិច្ច ទេសចរណ៍ និងអាកាសចរណ៍ បានលុបចោលជើងហោះហើរ កញ្ចប់ទេសចរណ៍និងការកក់សណ្ឋាគារបានលុបចោលស្ទើរទាំងស្រុង បន្ទាប់ពីមានការរឹតត្បិតការធ្វើដំណើរអន្តរជាតិនិងធ្វើឱ្យប្រទេសនានាធ្លាក់ចុះ(Strait Time)៕

ការសាងសង់រង្វង់មូលស្រអែមខេត្តព្រះវិហារសំរេចបាន ៩០ភាគរយហើយ

ដោយ វុត្ថា

ភ្នំពេញ៖ ប្រធានមន្ទីរសាធារណៈការ និងដឹកជញ្ជូខេត្តព្រះវិហារបានឱ្យដឹងថា វឌ្ឍនភាព នៃការសាងសង់រង្វង់មូលស្រអែម ស្ថិតក្នុងឃុំស្រអែម ស្រុកជាំក្សាន្ត ខេត្តព្រះវិហារ ជាលទ្ធផលពេលនេះសំរេចបាន៩០ភាគរយហើយ។

លោក សំ លាងទី ប្រធានមន្ទីរសាធារណៈការ និងដឹកជញ្ជូនបានឱ្យដឹងនៅថ្ងៃទី ៣ ខែមេសា ឆ្នាំ ២០២០នេះថា រង្វង់មូលស្រអែមនេះបានធ្វើពិធីបែបសាសនា ក្រុងពាលីបញ្ចុះបឋមសិលាសាងសង់ កាលពីរសៀលថ្ងៃទី១១ ខែធ្នូ ឆ្នាំ២០១៨ ក្រោមអធិបតីភាពលោក មាស សុភា ទេសរដ្ឋមន្ត្រីទទួលបន្ទុកបេសកកម្មពិសេស ប្រធានក្រុមការងាររាជរដ្ឋាភិបាលចុះជួយមូលដ្ឋានខេត្តព្រះវិហារ។

លោកបានបន្ថែមថា នេះជាសមិទ្ធផលថ្មីមួយទៀតរបស់ខេត្តព្រះវិហារ បន្ទាប់ពីផ្លូវភ្លោះ និង បុស្បុកលោកតាសួង ដែលមានលោក អ៊ុន ចាន់ដា ជាអតីតអភិបាលខេត្តផ្ដួចផ្ដើមនាពេលកន្លងមក។ ការសង់រង្វង់មូលនេះ ក្នុងគោលបំណងកែលំអសោភ័ណភាពទីប្រជុំជនមួយនេះ ឲ្យកាន់តែស្រស់ស្អាត ទាក់ទាញភ្ញៀវទេសចរជាតិ-អន្តរជាតិ ទៅកម្សាន្តនៅរមណីយដ្ឋានវប្បធម៌ប្រវត្តិសាស្ត្រ ប្រាសាទព្រះវិហារកាន់តែច្រើនឡើង ។

លោកបន្តថា ការសាងសង់រូបសំណាក់គោបូរៈទី៥ នៃប្រាសាទព្រះវិហារនេះ គឺមន្ទីរសាធារណការ និងដឹកជញ្ជូនខេត្តព្រះវិហារ ជាអ្នកទទួលខុសត្រូវក្នុងការសាងសង់ទាំងស្រុង ក្នុងនោះសាងសង់លើរង្វង់មូលដែលមានអង្កត់ផ្ចិត៤០ម៉ែត្រ រូបសំណាក់គោបូរៈទី៥ នៃប្រាសាទព្រះវិហារ ខ្នាត១លើ២៥ ស្មើនឹង៧៥%នៃតួប្រាសាទព្រះវិហារដើម មានរូបនាគ២ ហើយនៅលើរង្វង់មូលនេះក៏នឹងមានការដាំស្មៅ ផ្កានិងដើមឈើលម្អយ៉ាងស្រស់ស្អាត់ផងដែរ។

ខេត្តព្រះវិហារជាខេត្តមួយ នៅដាច់ស្រយាលឆ្ងាយពីរាជធានីភ្នំពេញ និងមានព្រំប្រទល់ជាប់ព្រំដែនប្រទេសថៃ និងប្រទេសឡាវ។ប៉ុន្តែទោះបីជាយ៉ាងណាក្តីក្នុងរយៈពេលចុងក្រោយនេះ ពោលគឺ បើទោះបីខេត្តមួយនេះ មានការអភិវឌ្ឍក្រោយគេក៏ពិតមែន តែមកដល់ពេលនេះ គេបានឃើញខេត្តព្រះវិហារមានការអភិវឌ្ឍលឿន គួរឲ្យចាប់អារម្មណ៍និងបានទាក់ទាញភ្ញៀវទេសចរជាតិ និងអន្តរជាតិទៅមកកម្សាន្តច្រើន ដោយសារខេត្តនេះមានហេដ្ឋារចនាសម្ព័ន្ធល្អ និងប្រព័ន្ធផ្លូវគមនាគមន៍ខ្វាត់ខ្វែង ស្អតមានសោភ័ណភាពទាំងផ្លូវជនបទនិងផ្លូវក្នុងទីក្រុង៕

ចំណេះដឹង! តើអាជ្ញាបណ្ណអាជីវកម្មអភិវឌ្ឍលំនៅឋានចែកចេញជាប៉ុន្មានប្រភេទ?

ដោយ វុត្ថា

ភ្នំពេញៈ រាល់អាជីវកម្មអភិវឌ្ឍលំនៅឋាន ដែលមានទំហំចាប់ពី៤ឬ៣ភូមិគ្រឹះ ឬ ៤ យូនី នៃលំនៅឋាន ឡើងទៅត្រូវមានអាជ្ញាបណ្ណអាជីវកម្ម អភិវឌ្ឍលំនៅឋានជាមុនដែលចេញដោយក្រសួងមានសមត្ថកិច្ច។

យោងតាមសេចក្តីប្រកាសស្តីពី ការគ្រប់គ្រងអាជីវកម្មអភិវឌ្ឍលំនៅឋានលេខ ៩៦៥ សហវ.ប្រក របស់ក្រសួងសេដ្ឋកិច្ច និងហិរញ្ញវត្ថុបានឱ្យដឹងថា អាជ្ញាបណ្ណអាជីវកម្មអភិវឌ្ឍលំនៅដ្ឋាន ត្រូវបានចែកចេញជា២ ប្រភេទ រួមមាន៖ អាជ្ញាបណ្ណប្រភេទ ១៖ ផ្តល់ជូនក្រុមហ៊ុនអភិវឌ្ឍលំនៅឋាន ដែលមានដើមទុនផ្ទាល់ខ្លួនទាំងស្រុង និង/ឬប្រាក់កម្ចីពីគ្រឹះស្ថានធនគារគារ និងហិរញ្ញវត្ថុនានា ដើម្បីអភិវឌ្ឍលំនៅឋាន និងអាចលក់លំនៅឋានដល់អ្នកប្រើប្រាស់នៅពេលបញ្ចប់ការសងសង់ជាស្ថាពរ។

អាជ្ញាបណ្ណប្រភេទ២ ផ្តល់ជូនក្រុមហ៊ុនអភិវឌ្ឍលំនៅឋាន ដែលមានដើមទុនផ្ទាល់ខ្លួន និង/ឬ ប្រាក់កម្ចីពីគ្រឹះស្ថានធនាគារនិងហិរញ្ញវត្ថុនានា និង/ឬដើមទុនដែលបានមកពីការកៀរគរធនធានហិរញ្ញវត្ថុជាមុន ពីអ្នកទិញលំនៅឋាន ដើម្បីអភិវឌ្ឍលំនៅឋានជាប ណ្តើរៗ និងអាចធ្វើប្រតិបត្តិការលក់លំនៅឋានដល់អ្នកប្រើប្រាស់ តាមលក្ខខណ្ឌដែលបានកំណត់ក្នុងប្រកាស។

សេចក្តីប្រកាសដដែលបន្តថា អាជ្ញាបណ្ណត្រូវបានផ្តល់ជូន ក្រុមហ៊ុនអភិវឌ្ឍលំនៅឋាន សម្រាប់គម្រោងអភិវឌ្ឍលំនៅឋានតែមួយ នៅតាំងតែមួយ។ ក្នុងករណីគម្រោងអភិវឌ្ឍលំនៅឋានតែមួយ ត្រូវបានបែងចែកជាច្រើនដំណាក់កាល អាជ្ញាបណ្ណត្រូវបានផ្តល់សម្រាប់ដំណាក់កាលនីមួយៗនៃគម្រោងអភិវឌ្ឍលំនៅឋាន៕

វិភាគ៖ ស្រមោលឆ្នាំ២០០៨ តើធ្វើស្ថាប័នហិរញ្ញវត្ថុដើរតួនាទីសំខាន់ដូចម្តេចក្នុងការជួយសង្គ្រោះសេដ្ឋកិច្ចកំឡុងវិបត្តិ Covid-19

ដោយ ប៊ី

ភ្នំពេញៈ ក្នុងកំឡុងវិបត្តិសេដ្ឋកិច្ច និងហិរញ្ញវត្ថុសាកលឆ្នាំ២០០៨ ជាពេលដែល សេដ្ឋកិច្ចពិភពលោក ស្ថិតក្នុងភាពយឺតយ៉ាវ ធនាគារធំៗត្រូវបានស្តីបន្ទោស លើមូលហេតុ ដែលការបណ្តាក់ទុនដ៏ធំរបស់ពួកគេ លើប្រាក់កម្ចីមានទ្រព្យបញ្ចាំ និងប្រាក់កម្ចីផ្សេងទៀត ជាអ្វីដែលជំរុញពិភពលោកឱ្យធ្លាក់ចូលក្នុងវិបត្តិសេដ្ឋកិច្ច។

ចាប់តាំងពីពេលនោះមក ធនាគារបានក្លាយជាអ្នកទទួលខុសត្រូវ ផ្នែកហិរញ្ញវត្ថុច្រើនជាងមុន ដោយសារការរួមបញ្ចូលគ្នានៃច្បាប់ និងបទបញ្ញត្តិកាន់តែតឹងរ៉ឹង និងការអនុវត្តន៍អាជីវកម្មកាន់តែឆ្លាតវៃ។

ជាលទ្ធផល ក្រុមហ៊ុនហិរញ្ញវត្ថុ អាចជាអ្នកជួយរក្សាសេដ្ឋកិច្ចឱ្យរីកលូតលាស់់ពីអ្វីដែលពួកគេបានឆ្លងបទពិសោធន៍រាប់សិបឆ្នាំ ក្រោយមានការផ្ទុះឡើងជំងឺ COVID-19 ។

ប្រាក់កម្ចីដល់អាជីវកម្មខ្នាតតូចជាពិសេស នឹងក្លាយជាគន្លឹះ ហើយអ្នកជំនាញនិយាយថា ធនាគារនានាត្រូវការពង្រឹងកិច្ចខិតខំប្រឹងប្រែង ដែលក្រុងវ៉ាស៊ីនតោនបានដាក់ចេញរួចហើយ តាមរយៈកម្មវិធីការពារប្រាក់បៀវត្សរ៍ថ្មីធុនតូច របស់រដ្ឋបាលអាជីវកម្មធុនតូច។

លោក Dan Genter នាយកប្រតិបត្តិនៃក្រុមហ៊ុន Genter Capital Management ដែលជាក្រុមហ៊ុនវិនិយោគមួយ ដែលកាន់កាប់ភាគហ៊ុនរបស់ក្រុមហ៊ុនJPMorgan Chase (JPM), Citigroup (C) បាននិយាយថា “មិនដូចឆ្នាំ២០០៨ ធនាគារមិនមែនជាផ្នែកនៃបញ្ហាទេ ហើយពួកគេនឹងក្លាយជាផ្នែកធំនៃដំណោះស្រាយ។

ធនាគារចាំបាច់ត្រូវចាត់វិធានការរហ័ស ដើម្បីជំរុញអាជីវកម្មខ្នាតតូច

លោក Genter បានបន្តទៀតថា “រដ្ឋបាលអាជីវកម្មធុនតូច មិនអាចគ្រប់គ្រងបរិមាណប្រាក់កម្ចីទាំងអស់ ដែលត្រូវការបានទេ។ មធ្យោបាយតែមួយគត់ ដើម្បីបំពេញតាមតម្រូវការគឺធនាគារផ្តល់ប្រាក់កម្ចីបន្ថែមទៀត។

ធនាគារធំ ៗ ជាច្រើនបានចាប់ផ្តើមធ្វើបែបនេះរួចហើយ

ធនាគារ Goldman Sach បានបង្ហាញកញ្ចប់ជំនួយចំនួន៣០០លានដុល្លារ កាលពីថ្ងៃព្រហស្បតិ៍ ដែលរួមមានប្រាក់កម្ចីបន្ទាន់ចំនួន២៥០លានដុល្លារ សម្រាប់អាជីវកម្មខ្នាតតូច។

លោក Michael Corbat នាយកប្រតិបត្តិក្រុមហ៊ុន Citigroup បាននិយាយនៅក្នុងបទសម្ភាសន៍មួយរបស់ស្ថានីយទូរទស្សន៍ CNBC កាលពីថ្ងៃពុធថា ធនាគារិក ធុរកិច្ចធុនតូចរបស់ខ្លួន កំពុងឆ្លើយសំណួរជុំវិញម៉ោង រួមទាំងចុងសប្តាហ៍ពីអតិថិជន និងអ្នកជំនួញ ហើយ ក្រុមហ៊ុន Citi កំពុងធ្វើភាគច្រើនតាមបែបឌីជីថល។ ដូច្នេះម្ចាស់អាជីវកម្មខ្នាតតូចមិនចាំបាច់ចាកចេញពីផ្ទះឡើយ។

លោក Corbat បាននិយាយថា “យើងមិនចង់ឱ្យមានមនុស្សចេញពីផ្ទះទេ ដូច្នេះយើងកំពុងធ្វើឱ្យប្រាកដថា យើងបានរៀបចំចំណុចប្រទាក់ឌីជីថល ដើម្បីឱ្យមនុស្សអាចដាក់ពាក្យសុំតាមអ៊ីនធឺណេត។ លោកបន្ថែមថថា “យើងអាចបង្វែរលុយនេះ ហើយយកវាទៅដល់ដៃជំនួញតូចមួយឱ្យបានលឿនបំផុត។

ភ្នាក់ងារ CNN Business បានទៅដល់ធនាគារធំជាច្រើន ទៀតដើម្បីរកឱ្យឃើញនូវអ្វីដែលពួកគេកំពុងធ្វើដើម្បីជួយសេដ្ឋកិច្ច។

ក្រុមហ៊ុន Truist បានប្រាប់ CNN Business ថា ក្រុមហ៊ុនមានការប្តេជ្ញាចិត្តផ្តល់ចំនួន២លានដុល្លារអាមេរិក ដើម្បីគាំទ្រដល់អាជីវកម្មខ្នាតតូច ដែលរងផលប៉ះពាល់ដោយជំងឺរាតត្បាត។

អ្នកនាំពាក្យក្រុមហ៊ុន Truist បានថ្លែងថា “សម្រាប់អតិថិជនអាជីវកម្មខ្នាតតូចរបស់យើង យើងនៅទីនេះដើម្បីជួយ។ យើងកំពុងផ្តល់ជម្រើសសង្គ្រោះជាច្រើន រួមមានការទូទាត់ប្រាក់កម្ចី ពន្យាពេល និងការលះបង់ថ្លៃសេវា ដើម្បីជួយគាំទ្រដល់តម្រូវការដើមទុនរយៈពេលខ្លី ក៏ដូចជាកម្មវិធីប្រាក់កម្ចីពិសេស ដោយមិនចាំបាច់បង់ថ្លៃសេវាធនាគារ។

ភាពបត់បែនគឺជាគន្លឹះសម្រាប់ធនាគារដែលធ្វើការជាមួយអាជីវកម្មខ្នាតតូច

ធនាគារTD បានឱ្យដឹងថា ខ្លួនកំពុងធ្វើអ្វីដែលវាអាចធ្វើបាន សម្រាប់អតិថិជនអាជីវកម្មខ្នាតតូចរបស់ខ្លួនផងដែរ។

អ្នកនាំពាក្យម្នាក់បាននិយាយថា ខ្លួនកំពុងផ្តល់ប្រាក់សំណង លើការថែរទាំប្រចាំខែ និងថ្លៃសេវាលើសកំណត់ ដោយមិនគិតកម្រៃសេវាប្រចាំខែ និងផ្តល់នូវភាពបត់បែនលើការសងប្រាក់កម្ចី ដែលមានស្រាប់ ដោយសារបញ្ហាលំបាកណាមួយ ដែលបណ្តាលមកពីជំងឺនេះ។

ធនាគារក៏គ្រោងនឹងផ្តល់ប្រាក់កម្ចីកម្មវិធីការពារប្រាក់បៀវត្សផងដែរ។

អ្នកនាំពាក្យរូបនេះបាននិយាយថា “ធនាគារ TD ប្តេប្តេជ្ញាចិត្ត ក្នុងការជួយដល់អតិថិជនអាជីវកម្មរបស់យើង ក្នុងកំឡុងពេលដ៏លំបាកនេះ។

ធនាគារ PNC បានឱ្យដឹងថា ខ្លួនកំពុងធ្វើការជាមួយអតិថិជន អាជីវកម្មខ្នាតតូចដែលកំពុងជួបការលំបាក ហើយនឹងផ្តល់ជូននូវ “លទ្ធភាពក្នុងការពន្យារពេលការបង់ប្រាក់ក្នុងរយៈពេលណាមួយ” និង“ជម្រើសនៃការកែប្រែជាច្រើន ដោយមិនគិតថ្លៃយឺត” ។ ធនាគារក៏មានគម្រោងចូលរួម នៅក្នុងកម្មវិធីការពារប្រាក់បៀវត្សរ៍របស់ រដ្ឋបាលអាជីវកម្មធុនតូច។

អ្នកនាំពាក្យក្រុមហ៊ុនអាមេរិក Bancorp បាននិយាយថា ក្រុមហ៊ុនកំពុងកាត់បន្ថយអត្រាប្រាក់កម្ចីអាជីវកម្មខ្នាតតូច ក្នុងរយៈពេលខ្លីចំនួន២ភាគរយ ដោយលើកលែងថ្លៃសេវាលើអាជីវកម្ម ដែលទទួលបានការទូទាត់ឌីជីថល តាមរយៈ Zelle និងកាត់អត្រាឥណទាន។

អ្នកនាំពាក្យក្រុមហ៊ុនអាមេរិក Bancorp បាននិយាយថា “យើងទទួលស្គាល់ថា ម្ចាស់អាជីវកម្មខ្នាតតូចជាច្រើន ត្រូវបានវាយប្រហារយ៉ាងខ្លួន ដោយជំងឺ COVID-19”។

អ្នកនាំពាក្យក្រុមហ៊ុន Wells Fargo (WFC) បានប្រាប់ CNN Business ថា “យើងប្តេជ្ញាគាំទ្រអតិថិជន អាជីវកម្មខ្នាតតូចរបស់យើងតាមវិធីផ្សេងៗគ្នា រាប់បញ្ចូលទាំងការទូទាត់ប្រាក់សំណងរហូតដល់៩០ថ្ងៃ ការលះបង់ថ្លៃសេវា ពន្យាពេលទូទាត់ បង្កើនដល់បន្ទាត់ឥណទា និងជំនួយដែលបានពង្រីកផ្សេងទៀតសម្រាប់ប្រាក់បញ្ញើ។

ក្រុមហ៊ុន Wells Fargo នឹងផ្តល់ប្រាក់កម្ចី តាមរយៈកម្មវិធីការពារប្រាក់បៀវត្សរបស់ រដ្ឋបាលអាជីវកម្មធុនតូចផងដែរ។

អ្នកនាំពាក្យក្រុមហ៊ុន Wells Fargo បាននិយាយថា “អតិថិជនរបស់យើងកំពុងជួបប្រទះបញ្ហាប្រឈម ក្នុងកំឡុងពេលមានវិបត្តិជំងឺ COVID-19 ហើយយើងចង់ជួយ ក្នុងកំឡុងពេលដែលពិបាក”៕